Miteii nu 5

MITEII NU (5)

Ziaktu : Toni Râlte

Kan speaker hi Mizoram huapa lar leh keipawn youtube lama a sermon ka ngaihthlak ve fô thin a nia. Nun tuihalna em em pawh nei hran loin kan han lut ve ta chawm chu a nia. Luh zan hi chu kan chhangchhe deuh thin. Zu rui chunga rawn lut an tam angreng a, a mut pawh kan mu hma. A tuk aṭangin ngaihthlak hna kan han thawk chho ṭan a, a sawi ṭha thei dup dup khawp mai. Keipawh tihtakzetin ka ngaithla chho ṭan a, fel ka lo intih rûkna, sim tur nei lo anga ka inhriatna te leh a langa sual ka tih loh vanga fihlim ta riaua ka inhriatna te chu a rawn pawtthla hmiah hmiah ni maiin ka hria. Ka nihna sual, ka sim theih miah loh vanga pawnchhe hnangkhai pawh ka tluk lohzia ka han inhre chho a. Zah vangin ka kun ta lup lup mai. A tawi zawngin sawi ila, a hmaa ka sawi zauh tawh, sum ka pathian nia ka inhriatna te pawh kha speaker hmangin Pathianin a dikzia min hriattir ka ti mai. Ni e, khawvel changkang chho zelah sum leh pai pawimawhzia chu kan hre tlâng awm e. Kei ngei pawn damkhawchhuah ve nan theihtawp ka chhuah a, Lucy sumdawnna lah hei aia a hlawkna tur ka dapsak ngat ngat bawk. Pathian zarah kan khua angah chuan a awmthei pawl, mite pawhin an ban nasat kan ni ve rêng a, kan la hautak lo bawk nen. Miteii lah an ṭhianho zingah thawmhnaw leh thildangah pawh a sang filawr lak a, a nu zawk hi chuan, "Tun aṭanga kan tihsan sak lutuk chuan nakinah kan la buai ang" a ti fô zawk. Kei hian kan neihchhun a nih rih bakah mite ngaiha pahrawn fel nih ka duh luatah a manto to ka melhsak thin. Hengte hi thil ṭul lo tawp a ni. A silipar chenin branded lo chu kan ti zel tawh a, hetiang reng hian kan hausa dawn si lo. Tin, vanduaina a tawh chungchanga mihring theihna leh finna hmachhuana enkawl kan tum pawh hi a lo fuh lo hle. Pathian thu han hrilh melh melha chulam kawng zawh tura han fuih kan nei ngai miah lo. Lucy hian ka hriat lohin a lo ti thin em erawh ka hre lo thung. Pathian a neih hmasak phawt chuan kan hlauhthawn thil kha a thleng dawn lo tih kan lo ngaihtuah hmasa lo chu mawl ka inti ngawih ngawih. 

Tun ṭum zet chu ka harhthar chiang ta hle. Ka lâwm a, ka hlim em em bawk. Tleirâwl sual an tih ang pawh nei em em lo, tlangval hnuah pawh a changa zu ka in bak sualna liantham sawi tur ka neih lohna chhuanga midang ka chungtlâk ruk theihzia te, chhungkuaah buaina ka siam loh vanga chhungkaw thenkhat kehdarh ka hriatthiam lohzia te, zu in ve zeuh zeuh mah ila zu ngawlvei ka ngaihnep rûk thinzia te..a tam mai. Khang zawng zawng hmanga khenbeh ka han nih zet chuan ka tlawm vawng vawng mai. "Lalpa, ka tlawm e." Tihna nun ka neih takah chuan ka khawvel thlir dan a danglam zo ta. Pathian hi a ṭha mang e aw. 

Chhuah niah ka fanu leh a nu ten min lo hmuak ran a, nautê chu Nupuii'n a lo awm a niawm e. Zingkara chhuak kan ni a, tukṭhuan kan han ei tlâng leh chu an ṭawng ve hman meuh lo. "Chhungkaw lungphûm atan Isua ni lovin pawisa kan lo hmang rei lutuk a, tun aṭang chuan kan danglam ang" ka tih chuan, "Nia, sawma pakhatte pawh hi kan lakluh tam ngaihtuahin kan pe tlem" Lucy'n a lo ti zauh. Thilpek lamah pawh luanchhuah tam kan rêl a. Lucy chu nu ho pual lâng camp-ah a lut zui ve ta bawk nen,. Duatpuia ka paw deuh reng mai a, nu ho hian min nuih min nuih reng mai. Hlim takin Lucy pawh a rawn haw a, chhungkaw boruak a nuam takzet a ni. 

Lamtuala thiam mang lova Lucy lam ka han hmuh phei chuan lung a chhe rum rum thei mawle. Miteii te thianho lah an lam dal dal reng a, khawtlang boruak pawh chu nuam tawh tak a ni. Hunpui pawh chu hlim takin kan hmachhawn chho a. Nau pawm a nih avangin Lucy chuan Miteii bazarpui thei hek lo, Parteii kan chah a, ani'n Miteii tawk tur a lo hre khawp mai a. Nalh lutuk tak mai a rawn thawn vang vang. Duatpuia erawh a la sen deuh a, thawmhnaw lum lam bak kan leisak lo. Zantin chhung inkhawm kan nei a, kan inhmanchhâwk ṭhin. Keipawh christmas ruai fatu-ah min lo ruat ve a, heta ka awm hnua a vawikhat nan. Urlawkni a rawn thleng a, chhangban/ zo chhang ei ve ngei kan duh avangin Miteii leh Apuii te tirin chhang chu va her turin an kal a. Kei pawh Lucy a hah deuh vangin ka thawmhnaw ka nâwt a,. A hma kha chuan inla pa takin thawmhnaw nawh tih vel chu Lucy kutah ka dah mai zel. Tin, in chhungkhur chetah pawh ka pui ngai lem lo. Tunah erawh Miteii a awm loh chuan ka pui ve zel tawh. Chawhmeh lo chan te, tual lo phiahfai te, thingpui lo lum te mai mai pawh an tan chuan a hlu ve bawk a. Lucy nen pawh buaina kan nei lo. Thlasik a nih tawh avangin dar 5-ah zanriah kan ei tlangpui a, dar 5 a rik pawh chuan Miteii te chu an la haw si lo. Lucy chuan a call a. "An lo tam lutuk a, hei kan hun a thleng ve têp" a la rawn ti. A ni maithei..chhang herna hmun 2 chiah a awm bawk nen, "Chaw lo ei mai r'u..Apuii nen kan ei ve leh mai ang" a tih avangin kan eisan a, inkhawm ka duh ve bawk si a ni. Miteii te lo hawn hmain inkhawm turin ka chhuak, Lucy phei chuan, "Chutiang em emte chu a..lo haw mai r'u" a va ti leh tawh. Khua a thim tawh hi chuan Pathian ring zo lo niawm takin Miteii hi kan ngaihtuah leh sek sek zel. A tan pawh a ninawm ve fô hian ka ring a ni. Ka inkhawm chhung pawh chuan ka ngaihtuah leh reng tawh. A mak mang e aw. Ban veleh ka haw nghal a, kan in leh Biak in hi inhlat lutuk chu a ni lo. Pi Zaii damlo a chau riau an tih pawh chu nakinah a hranin ka leng mai ang tiin kan in lam ka pan zar zar a, ka thlen hmain call ka dawng. Lucy a ni. 

"Aw" ka ti puat a. 

"Rawn haw vat teh, Nu Buangi a rawn kal a..hei kan buai deuh laih mai" a rawn ti a. Lucy mak vena deuh chu thinchhe viau e ti lo hian a ṭawng rang ngai lo, a thinrim em ema a ân ve hlak hlak paw'n a tawng a muang churh zel a, a dam thlap zel. A thinrim lo emaw tih mai tur a ni zel. Keipawh chu hmanhmawh deuhin ka phei ta a, ka luh dawn chuan Nu Buangi thinrim awrâwl pawh chu ka hre zui nghal. 

Ka lut a, Nu Buangi chu a lo ding to mai. Miteii leh Apuii bakah Zoteii leh Lucy te an lo awm ve bawk, Miteii te lam hawiin a kawk sawk sawk mai a. "Nangmahni vangin ka fanu hi a mualpho zing tawh lutuk. Tihian mi bulah in sawi a, mahni thiam inchantir in..ka hre vek.." a ti hlawih hlawih mai. A ngaihna hre lo zetin ka melh kual a, "Eng nge thil awmzia?" Ka ti nghut.

Zoteii zawk chuan, "Kha.. zanina an chhang va hertir kha Sawmi te nen an lo inhnial deuh em mawni, Sawmi a zualko a, Nu Buangi khan a rawn luhkhung ta a nih kha" a lo ti nghat nghat a. 

"Mite, eng nge thil awmzia?" Ka ti a. 

Miteii chuan, "Ih, chhang hernaah khan U Sawmi te chu an lo kal a. Kan bulah khan min tiel deuh deuhin an ṭawng reng a, 'Vaipain pawngsual lo mah se; tun angah chuan a virgin tawh chuang lovang, Sir Dina te kha amah vangin an sawn a, a thinrim teh mai asin. Amah tê reuh sawn mitmei a hmuh alawm' tih velten a ṭawng reng a. Ka ngei ve lutuk khan, 'U Sawm,i dawthei em mai, chutiang chuan ka awm lo hrim hrim..i lerh lerh nen" ka ti ve a. Chuan chhang herna te nu ber Pi Puii pawh sawn a ngei ve a niang, a hau hrep a..chung vel chu a thinrim a niang" a ti ta niah niah a. A ṭawngkam hi a la naupangchhia ve bawk a, mahse, Dawt a sawi ka ring lo. "Apui, a dik em chu chu?" Ka tih chuan, "Umm dik vek. E chuan, a bialpa a niang ka hre bik lo, kha khan Miteii bulah 'Ka duhtawkin ka la suasam ang che.' a ti ringawt bawk, an rui bawk sia" a lo ti ta hmiah hmiah a. 

Ka thinrim hle, "Chu! nu Buang, thil kalhmang in hrechiang lo a va ang ve. Sawmi pawh chu rawn kal se la, hetia in luhkhung ang zawng chuan a mualphothlak deuh lo maw?" Ka ti a. Ka theihtawpin ka aw ka thunun. 

"Engpawhnise, Mi-i leh Puii te hi an kamtam hrim hrim, Sawmi chungchang an lo sawi ve sek a ngai lo. Keini a chhungten engkim kan hria. mi sawina zawng zawng hi thudik a ni hek lo" a ti leh phiar phiar a. 

" ..engpawhnise, Nu Buang, ṭha zaiin kan la sawi dawn nia, ṭhenawm hnai kan nia, duhtawk rawh" Lucy chuan a lo ti a. 

"A nih tak chu! Keini aia inkhawsak a san vanga inhnuaichhiahna hi ka duh miah lo a nia. Lo ṭawng tam tawh suh se" ti khur hlak hlakin a chhuak tau ta nghawng nghawng a. A chhuah hnu chuan kan ngawi deuh ṭhap. Sawi mai tur ka vân a ni ber. Lucy zawk chuan, "A zia lo hle mai" a ti sap a. 

Ka va inthlak ta daih. A chhuah hnu chuan, "Aw le,' Lucy tih nghat ri chu ka hria. Ka hah a dam huai chuan ka hria. Zoteii te haw hnuah erawh kan titi nasa. "Miteii pawh a dik vek lo vang a, pawn lamah tal tam lose aṭha ber, hei Christmas vuakvêt a ni chho bawk nen, mi hian midang zawng aiin an chîk bik dawn a, amah pawn a zo lovang tih a hlauhawm" ka ti a. 

"Ni e, bakah sawi leh sawi hnu, kan veng leh lutuk anga an ni tleirawl luhlul lai chuan kan tihel ang tihte pawh a hlauhawm. Mahse, chhuah erawh chhuak tam suh se" a ti a. Zanin pawh urlawk zan a nih avangin Nuteii te nen Nupuii te ina hman min dil kha a nia, chhuah ka remtih tak loh avangin kan inah ar an kang ve a, a nu nen kan mutsan a nih hi. Nupuii te bula a awm chuan ngaih a ngam deuh. Duatpuia a fel chho ta deuh bawk a, kan zangkhaiin mutmu pawh kan tuah ṭha deuh e. 

Christmas chu a rawn thleng ta,. Biak in panin hlim takin kan chhungkuain kan kal a. Tupawh mai chu an mawi em em vek. Naupangho mawlh mai hi aw..naupan lai te pawh min tingai alawm le. Chhungkaw kima hetiang hunpui kan han hmang thei ringawt te hi malsawmna vek a lo ni. Zaikhawmna lamah pawh keini paho chu eisiam turin min ti bawk nen, Kima leh Siama te nen kan inzui ve reng mai. Kan phaktawk chanvo han tihte chu Pathian nen chuan a nuam vek tawh mai. 

Lucy erawh nau pawm a nih bakah Duatpuia a la sen ve bawk nen, a chhuak tam lem lo. Ruaiṭheh tlaiah ka mit tikham deuh thil ka tawng leh pek a! Lucy te chu Zoteii te, Pari leh Ahruaii te ho nen an rawn kal a. Duatpuia pawh Pari'n a paw hnûp hnûp mai. A hnu deuha Miteii te pawh an rawn kal a, mipa an rawn kalpui ve tlat. Miteii, Nuteii leh Apuii te an ni a, mipa pahnihin an rawn zui, mipa pakhat zawk chu Pu Ruata tupa a ni a, pakhat erawh an zirtirtupa Pu Tlana fapa a ni thung. Aizawla lehkhazir, hunpui hmanga rawn haw a ni nghe nghe. Chaw an dawh lai chuan rem leh rem lo hian chu pa chuan Miteii kut a va vawnsak zauh a, Miteii chuan thinthlak a hnêkin a lo nuih sen sen. Pa rilru zîm leh khirh tak nih hi ka duh bik lo, khatiang em em lo hmuhmawh viau lah zahthlak tihna chen ka nei. Mahse, Miteii vanduaina avangin ka mit a thi hma êm a ni. Tleirawl an nia, an rualpuite pawn ngaihzawng neiin kawngah pawh an tlar ngam tawh laiin ani erawh keini min hlauh vang nge phei chu ka hre lo, ngaihzawng pakhatmah a neih ka la hre lo. Pu Tlana fapa hian a ngaizawng tihna nge? An lo inngaizawng tawh zawk. Chaw chu an kil ho va, an haw rual leh bawk. Fatu hi chu kan buai thei bawk a, a haw pawh ka haw tlai angreng. 

Lucy leh a ṭhiante an lo awm a, an lo inkawm tui nasa mai. "Khaw nge Miteii" ka tih chuan, "An leng ve a nih kha..hei an lo haw ve ṭep ang" tiin sana a melh zauh. Zanin chu inkhawm lova zaikhawm tur a ni a, dar 6:30 a la ri lo deuh. Mi lêng chu an haw deuh vek tawh ang. Ngaihṭha vak lo chuan ka inbual a. Lucy zawk pawhin a ngaihven loh chuan lo buai ve chiam kha ka duh vak lo, bakah hmana Miteii ṭawngkam kha ka hrechhuak leh ṭhin bawk nen. Ka insûm ve deuh. "Zaikhawm i tum em?" Ka inbual zo chu a lo ti var a. 

"Ka chau ve deuh a, mahse, reilotê chu va lan ve zawk a pawi lo" ka ti a. Duatpuia a ṭah avangin a buaipui a. Pari chuan, "Ka han haw ve tawh ang e, zanin chu Rina putea te an rawn leng dawn a,. " A ti a. Midang pawh chu an tho ve sang sang. 

Miteii chu call ka tum zet a, mahse, a thinrim leh ka hlauh avangin ka ṭhulh ta rih. Ka lo nghak deuh a, thingpui hang ka in bawk. Lucy zawkin, "An va rei tawh ve mawle, call teh" a ti a. 

"Nangman call zawk rawh" ka tih chuan maktih hmel lek lek hian, "Ti nge? I va inla hrang ve" a ti sap a. 

"Chulam a ni lo, thil ka chhiar laklawh lutuk" tiin ka phone ka bih ngur ngur, a call ve mai a. "Lo haw tawh u la, zaikhawm te pawh in tum lo em ni?" A ti lâng lâng. A dah zui leh ta mai,. "Pu Tlana te inah ser kan bawl a ti a nih kha. An fapa sawn a sitar ve deuhin ka hria" nui chunga a tih chuan, "Nia, ruai pawh an ṭheh ho kha" ka ti vut. 

"A fel hmel reuh reng, mahse, kan la hrechiang lem lo va" a ti a. Ka chhang tawh lo. Miteii te rawn thlen nghak hman lovin Kima nen bawk zaikhawmna in lam kan pan leh ta a. Darkar chanve hnu velah Miteii te pawh an ṭhianho bawk khan an rawn kal ve. Zaikhawmna in lama an la kal duh chuan tiin ka ngaih a ṭha ta deuh. Pu Tlana fapa chu sang lam, cher lam a ni a, a vun a êng viau, zuk leh hmuam a ti lo a niang,. Tunlai ṭhalai ho ang bawkin a hairstyle pawh a tunlai viau. A zai ve mang lo va, A bulah Miteii a ṭhu a, an inbe leh zeuh zeuh. Chung thleng thlenga ka lo hre zel chu ka inngei lek lek. Ka fahrawn venhim ka duh luatah ka intihrehawm mai mai niin ka hria a, zai lamah rilru ka pe ve ta daih. Hun a kal ve zel a, an ṭhianho inchhaihna aṭangin Miteii leh Zorina te chu an inngaizawng ve ta tih a hriat theih mai. Engtikah nge a nu leh pate min hrilh a tum ka hre lo va, zawh ngawt lah ka tum hek lo. Zai a nuam a, hlimsang ho lah an che na. Kum pawh a liam dawn ta ruai e. Kumhlui thlah tlaiah an thianho chaw eikhawm an rêl ve a,. Pari hian kumin kumtir khan huan puitling tawh a lei a, hlawhfate ruaiin a chei hnûm khawp mai. Thlam pawh pahmei in tiah zet a sa a, khua aṭangin motorin a kal theih vek bawk bakah tui nise a piah luitê ami a la a, dil pahnih a awm bawk. Keimahni ho pawn chaw eikhawm kan la tum kha a nia, mahse, mahni buai buaiin kan la buai rih ve êm a, chutah chuan Miteii te chuan ei an tum a ni. A nuin min râwn a, Nupuii a kal ve dawn bawk a tiin ka phalsak. A lawm thiam ngei mai. Zorina khan bullet a nei a, a inhmeh phian,. Zorina bike-ah Miteii a chuang a, Pu Ruata tupa Vanlala leh Nuteii inphurin, Nupuii ngaizawng em em thintu Sangtea maruti-ah an ken tur dahin Nupuii leh Apuii an chuang bawk. Tiang chuan chawhnu lamah an kal a. Ka ngaihtuah duh lo lui ve deuh. 

Keini nupa pawh kan inbualfai a, Ka pute in lamah kan leng chho ve a. Ruaitheh zan aṭang khan ka pu a nuamsam meuh lo va, tunah phei chuan a bet titih ta hial.. A upat ve tawh bakah a saitica leh thawhah a rawn zual tlat mai a, amah pawh a tla ve dâwk mai. Ahruaii te chhungkua pawh an rawn lêng a. Nancy leh Remlala te nupa pawh an awm ve mial e. Kan han kal chang hian an awm khât angreng a, Pi Siami erawh rin ai takin a fel, an pa pawh a buaipui peih phian. Hetiang dammawh hritlan hunah tak hian a nia kawppui te hlutna chu a lanfiah thin ni, fate chu fate an nia, engkim zawng zawng an buaipui thei lo. Ka pu pawh hetia nupui a nei leh hi lehlamah chuan a lawmawm viau mai. Kan titi laih laih a, ka pu chu dam ṭha se heta chaw eikhawm kha a sawi ve a nia, amah ber a damṭha ta si lo. 

Nancy chuan, "Miriami khu veng ṭha r'u, an sawi duh teh mai a nia. Mipa a ngam lutuk an ti" a rawn ti teh ngawt a. Lucy chuan, "Engtin nge an lo sawi a?" Dam thlap hian a ti a. 

Nancy chuan, "An sawi ṭeuh mai, Pu Tlana fapa nen an inngaizawng an tia, ama bem hmasak te a niawm a. Sawmi te hi ama sawi mualpho angin an sawi, chuan, a school uniform pawnfen te hi a chhing mah mah tih te" a ti duah a. Pawnfen chungchang kha chu a dik maithei, mahse, chutia chhing uchuak a ni lo. Amah a ṭhangduh sia, a ṭhansan vang a nia, kumtharah law law a thar lei a nuin a tih vang a nia. A dang a sawi ho kha chu ka awih tehchiam lo. Sawmi chungchang phei chu hetia an awmho pawh hian an sawi ngai lo. Lucy pawh chuan, "An ṭawng peih ve bawk a nih chu, ven a ngai lo. Chhia leh ṭha a hre vek tawh, anni ang rual kan nihte chuan kan lerh vek alawm. " A ti a. 

Ner sak chungin, "Kha..khati kha in nia, fa ṭan inti sia, tiang chuan intikhawlo vek ang,.High school a pass hma hian a rai ang e aw" Nancy chuan a ti leh hlang hlang a, Lucy chuan a ngei deuh nge ni, "I nau ang êma rai hma lohtir kan lo tum dawn nia" a ti hmak. Chu ṭawngkam chu a haw hle a ni ngei ang, "Kan chhungkaw chungchang hi i sawi phak a awm lo, ka nau chu a duh leh lo rai ang hmiang. A nun a nia a thu thu, ve khanglang che u hian a" a ti hlaih hlaih a. Lucy ka mitmei ṭhin, Nancy tihthinrim hrim hrim chu a tum nge mawni dawn ni, "Kha..nangpawh i nau sawi chu i duh miah loh kha, hetiang tlang thulêngvak mai mai engahmah ka ti lo, a chenpuite hian kan hrechiang a, a tawk viau. Tin, a sawi pawh an sawi tak tak lovang, i phuahchawp a niang" a ti ve ta duah a. 

"Min va ngai rilru chhe ve, nang anga rilru kawi, mote ngeih lo ang ka ni ve lo" Nancy chu a thinrim tawh khawp mai. Lucy lah chuan nui chungin, "Min ngeih loh vang zawk a ni lo'm ni? Pasal ka neih lawng lawng tak. Ngawi mai mai rawh" a ti si. A tham lo ve khawp mai. 

Remlala rawn lut bulah, "Kha..i nau rilru chhe lutuk khan min hmusit khawp mai, ka nau rai chungchang thlengin a sawi duh a. Ka lawm lo aw..ka haw dawn" a lo ti nghal buan buan. Han tlan nan chuan a ho ve mang e aw. Ka rin loh leh beisei loh lutukin Remlala pek chuan, "Aw i duh leh haw la..a ho êm mai" a lo ti hmiah. Lucy pawn mak a ti vein ka hria. Pi Siami'n, "In ho em mai, Nancy, nang pawh khatiang mai maia tlan tauh te chu a..inngeih tak khan awm mai mai teh u, i pa damloh lai a ni lehnghal" a lo ti ve a. 

Nancy chuan, "Ka pa pawh a ni lo ve. A thuhrimin, an fapa, an unaupa zu ngawlvei hetiang khawp hian ka buaipuiin ka enkawl a, lawm tak aruangin min la sawichhe duh a. Ka ning tawh, damlo buaipui rengte hi ka hne tawh. Remlala lah rui chhhawr reng bawk si.." ti hlawih hlawih chungin pindanah a lut a, kan ngawi ṭhap. Reivakloah rawn chhuak lehin Remlala chu a dinchilh a, "Ka haw dawn a nia, haw rawh i ti bawk a. Min rawn ko reng reng suh ang che. I hria em?" Ti tâwn tâwnin a chhuak ta daih. Remlala lah chuan thaw huai hmel a la pu zui. A va ho mai mai e aw, Lucy pawh ka hau a, "A mizia i hrereng a, ngawihsan ve mai mai tur alawm" tiin. 

"Awiii, ka tawng na lo zawk a nih kha. Ka rilru a na rei tawk tawh, ka sawi duh lo mai mai alawm. Ka pa damlo, chet pawh che hleithei lo a tawngkhum dante hi ka lawm hleinem, 'I thi mai thei bawk si lo, buaipui ngai bawk si..ninawm' ti ten a lo ṭawngkhum ṭhin. A buaipui pawh a buaipui tawp si lo va, rawngbawlah nise ka nu a hah em em a, chhâwk a tum bawk si lo. Tikhan haw daih se an thawveng zawk ang" a ti ta hmiah hmiah mai. Pi Siami pawh chuan, "A sawi dik alawm. Kan nau mah nise, han chenpui tak tak chuan a lo nasa reuh êm mai. Fate zun leh ek takngial pawh thianfai peih lo, an thawmhnaw nise keimah zelin ka su a. A damlo der peih bawk si, chhungkhat kan nihna laiah ka enliam lui hram hram zawk a ni" a lo ti ve mial mial. A mak hle mai. Nancy hi chu mo ṭhenkhatin, "Tumah sual sa an awm lo, an lawina te a zir" an tih thin zingah a tel ve lo. Amah hi a sual sa tawp,. An sawi danin hmelchhe lo tak mahnise, nula to lo pawl tak a niawm e. An chhungkaw zia aṭang rengin nupui atan êm chuan an iai zel an ti. Chutiang mi chu kan nu û-in a han nei chu a nia, hetia buai rap rap hi chu a âwm viau. 

Remlala pawn, "A thawventhlak daih zawk. ng peih bawk si, kei pawh zu ka nghei dawn. Kumthar aṭangin..nunphung pangngai ka'n zawh ve leh tawh ang e" a ti chuar chuar a. A hun tawh viau a ni. Lucy nen bâng lova kan ṭawngṭaipuina rah a rawn lang ve dawn ṭante pawh a niang. 

Dar 3 leh a chanve velah kan haw thla a, Pi Siami khan chaw eiah min sawm naa, kumthar lamah law law kokim deuha tih kan rêl ta zawk. Lucy chuan Nupuii a va bia a, "I naute kha veng fmkhur rawh aw, dilah te khan an chêng ang e" tiin a chah nasa mai. 

Dar 6 pelh tawhah Miteii te pawh an rawn haw ve ta hram. An rawn hlim haw khawp mai a, Nupuii eirawngbawl thiamzia bakah Vanlala fiamthu thawh peihzia an sawi nak nak mai. A inbual fai zawhah a nu chuan a ko a. Kan pathumin kan ṭhu ta ran mai. 

"Engtikah nge bialpa i neih thu hi min hrilh i tum?" A nu chuan a ti ta a. Miteii chuan hnuailam a melh ran mai. A zak ve bawk ang chu.."Ka nei ami?" A ti sep a. 

"Zorina nen in inngaizawng a ni lo'm ni?" A nu chuan a lo ti vat. 

Nui lek lek hian, "Chu! In hriat reng chu.." a ti lawi si. 

"Nangman i ngaizawng hmasa zawk em ni?" A tih leh chuan rang lutuk hian, "A teuh lo mai..aman min ngaizawng, ih, min lo biakna a rei tawh mai, mahse, ka chhang ngai lo va." A lo ti mawlh mawlh. A dik ngei ang.

"Ka sawi fô kha aw. Bialpa i nei a, mahse, fimkhur tur. Engtin pawn thlem chein dawr che mah se; mipat hmeichhiatna hmanpui loh tur" Lucy chuan a ti dap dap .

"Imm ka hria lawm" Miteii chuan a ti sap. 

"A ṭha e. Zorina pawh misual a ni lo turah ngai ila, chutihrualin zirlai ve ve in la ni a, zirlai thlahthlam phah nan hmang miah suh ang che" a ti leh a. Miteii pawh a bu nghat nghat mai. Chutiang chuan kumhlui kan thlahliam a, zanlai inkhawmah kei ka han kal ve. Remlala pawh a rawn kal a, a rui lo niin ka hria. 

Kumthar kan chuangkai ta a, a lawmawm mang e. Ka pu pawn ziaawm lam a pan ve ni ten ka lo hria a. Nancy erawh Remlala'n ko duh hek lo, ruaiṭheh dawnah te khan parh zetin a nau nen an rawn kal a. Kekawr tight uluk lutuk nen, boot nen a inṭam at mai. Nancy te chhungkua hi ka hrechiang lutuk lo naa an sawi hmangin mi nasa ve tak chu an niawm e. A pu hi dawrkai hausa hmasa a ni a, chuta ṭanga inrochun zelin dawr chu an eizawnna a ni mai. Nu ber aṭangin fuh tawh hek lo, Nancy pa nu tar tawh tak te hi an tiduhdah hle niin an sawi. Nancy nau chiah hian kum 14 lek a nihin nau a pai a, chu chu a nia Lucy sawi kha. Khawtlang mak tih a hlawh ve hle a niawm e. A fapa nen an nula tlangval rual leh a ni mai e, tin, pa hran aṭangin fa pakhat a nei leh bawk. Nancy u mipa erawh Chawntlangah a nupuite khaw lamah an awm a, hei pawh Nancy te hian a nupui an ngeih hlawl loh vang an tia, fapa neihchhun pawh a indang rawp rawp mai chu a nia. An upa ber erawh Marovi te vêng lamah khan pasal a nei a, ani chu a pangngai viau a niang, a pasal te lam an pangngai bawk a. Remlala nen engtin tak awm zui zel ang maw..

Ka sawi leh duh pakhat chu Nu Mawii te hi a ni. Mas dawn khan Lucy'n kawrlum leh puan nalh deuh mai a leisak a, Aniin a thlawn ngawta dawn duh bik hek lo, a ar vulh lai min rawn pe ve vang vang. An nufa hian an hautak lo dun bawk a, a pasal chhungte lamin an rawn tibuai ta vak lo nen. An awm thei ve ta phian..Jeneti te pawh kumthar rawn hman an tum reng a, mahse, Zothana pa damlohna avangin an rawn kal thei ta lo. Ruaiṭheh zawhah Nu Mawii te nufa an rawn leng reng a, kei fatu tura ruat mah ni ila, zanlai inkhawm ban ka haw kha lung ṭhilah ka tlu pek a, ka bân ka bawh na deuh nen, ka fatu ta lo ringawt. Chutia na em em erawh a ni hran lo. 

Nu Mawii chuan, "Kan Nupuii pawh bialpa a nei ve a, a rawn rim reng mai. " A tih chuan Vanlala chu a hlawhtling ve ta nge nge a ni maw ka ti rilru a. Tlangval puitling tawh, fel leh hlim thei tak a ni bawk a, Nupuii tan pawh ka iai lo khawp mai. Nupuii lah chuan, "Min birh ngun leh lutuk a, ka ning ṭêp zel" a lo la ti zui. Kan nui dar dar mai. Miteii te pawh an lêng leh a, a nu nen kan chah ngun bawk a, kan ngaihtuah lutuk tawh lo. Zorina hi a la rawn leng miah lo va, pawn lamah ai chuan inah inkawm se ka duh zawk. An la naupang ve sia, an zak a nih ka ring. Biak erawh inbe ngun tak an ni. 

Zanah kan nupain kan zaikhawm ve a, nautê chu Ahruaii'n a awm. An duat khawp a, naute tho an ni bawk a, min chhawk phian mai. Kan zaikhawm tui lai laiin Apuii a rawn lut a, "Pa Pui, lo chhuak lawk teh" a rawn ti. Ngaihṭha vak lo hian ka va chhuak a. Pawnah Miteii a lo ding reng mai, Lucy ngaihṭha lo a rawn chhuak ve nghal bawk. Miteii chu ṭap hrep hmel a pu a, mi an awm ve nual avangin, "Haw ang u" ka ti a, kan haw ta dial. In kan thleng a, thil awmzia ka zawt ta a. 

Apuii chuan, "Ih..U Sawmi'n U Zorina bulah dâwt dâwt a lo sawi a. 'Vai pain a pawngsual hma khan sex a hmang tawh. Na pawh a ti lo rêng a, mi nasa lutuk a nia, hlau hle rawh. Kei aia hrechiang an awm lo" tih velin,. Chuan kan len khan Pu Sawia tlângah kan chho a. Chance an nei ve a, U Zorina chuan a sual hrep a, Miteii'n a duh bawk si lo. Tah chuan U Sawmi thusawite chu U Zorina chuan a sawi ta a.Chuan, keipawn dâwt a nihzia ka sawi nasa, U Zorina pawh a lungawi ve maiin ka hria. Miteii nen inah hian an inthlak avangin kan lo nghak a, Tebawihi'n Miteii a rawn bia a, 'U Sawmi leh Zorina te an inphur..Tlângah an chho, Urlawk zan pawh khan an hmang ho alawm," a rawn ti ta a. Miteii rilru na lutuk a ṭap tawp a, kan rawn ko ta tawp che u a nih kha" tiin. 

Tun ṭum chu kei aiin Lucy a thinrim zawk. A fanu a bialpain a phatsan vanga rilru nâ vang nge Sawmi dâwt sawi vang tih erawh ka hre lo. A bialpa neih vawikhatnaah a ṭhian ni ve tawh ṭhinin a lo hêk a, chutah an la inkawp zui! Miteii te ang thinlung nêm tan chuan palzam a harsa ve viau ang. 

Lucy chuan, "Ngawi tak rawh u, keimah ngeiin Malsawmi chu ka bia ang. Eng nge maw hetia a tih fô mai le? Mi-i, nang pawn hre rawh. Zorina chu vawikhatmah be tawh suh. Chutiang mipa tenawm lutuk chu thian atan pawh an tlak loh " a ti fak fak a. Miteii erawh chuan hnuailam a bih reng ringawt. Lucy chu a muhil hleithei lo, chutitaka a thinrim chu mak ka ti zawk. 

"Hahdam tum rawh, a ṭha leh vek mai ang" ka tih chuan, "I hrethiam lovang. Miteii tawn ang chiah hi ka tleirâwl laiin ka tawng tawh alawm. Ka ṭhianṭha ber emaw ka tihin min luahlan a, ka bialpa bulah nasa takin min rêl bawk. A hnuah ka hre leh vek si,. Miteii natna hi ka hriatthiam êm vangin ka na lo thei lo a ni" a ti ta a. A mak zawk hle mai. A ṭhianṭha ber chu Pari hi emaw ka lo tia.

"Tu nge chu nu chu?" Ka ti a. 

"Hetah a awm lo, Aizawlah pasal a nei a, mahse, min tihnatna phuba kha a niang chu maw..an pain bialnu dang a neihsan reng mai" a ti a. Sawi leh vak tur ka hre lo hle mai. Ka kuah ta ngawt a. A tukah chuan zingkarah Lucy chu Sawmi te inah a phei ta hmiah mai. Ka inthiar lai a ni sia, ka chelh hman si lo. Ka va kal ve vat a, Sawmi te kawtah Sawmi leh a nute nen an lo indinchilh ran mai. 

"Sawmi, i ṭawngkam hi kan hre zauh zauh. I mak ka ti lutuk, hetiang tur a ni ngai lo. I chetchhiat tak avanga ka fanu hmertel zel a ngai hleinem. Engmah hre lo turah min ngai suh, vawikhat pawh ka fanu hi dâwt hmanga i lo sawi mualpho leh a nih chuan ka ṭhuai tawh ang che. Tun ṭum erawh zah ka ngai ang" a ti chang fak fak a. Sawmi lah chuan, "Chutiang ka sawi lo hrim hrim, min puhchhiat in tum a nih kha.." a lo ti ve nasa, a hmel erawh a pha dâi mai. A nu pawn chhan ngaihna a hre lo a niang, a ngawi ve reng ringawt. 

Miteii chu Zorina khan ngaihdam a rawn dil nasa, "Sawmi khan min kalpui rawh a ti tlat a, i chungchang min hrilh tur a neih thu te..chuan ka kalpui mai a ni. Tlângah tak kan kal lo, ka duh lova. Urlawk zanah pawh kan inah an rawn kal a, ka pa ten hmanpui ve mai rawh an tih vang chauhin ka hmanpui ve a nih kha.." tiin a rawn insawithiam ve nasa. Mahse, Miteii chuan a chhang duh bik lo. A lunglêng tih erawh ka hria,. Lehlamah Zorina sawi pawh kha a dik maithei. Sawmi hi a nasa êm mai a, Miteii nena vanduaina tawk dun, amah zawk che chhe zui ta si, Miteii kaihluih ve a duhna lamah tiang hian a che ta mai niin a lang. A lainatawm zawk e a. Zan khat a pute ina kan len hlanin Zorina chu a lo leng a niawm a. Hmaichhana tihtak zeta an han inbiak leh ngen takah chuan an inngaidam ta nge ni, an inbe chho leh ta a. Lucy pawn a hau lem lo. 

Hun a kal ve zel a, hna pawh kan ṭan leh tawh. Duatpuia pawh a lawm ve theih tawh viau mai. A nu aiin a u hian a paw nasa zawk. Tin, Sawi hmaih loh tur chu Nancy kha koh a ni ta si lo, a mangang ṭan ta viau a niawm e. Remlala lah a sawi ang chiah khan kumthar aṭang khan zu a thlah hmiah a, Kohhranah a theih ang angin a inhmang zui ta bawk si. A lunglêng ve pawn a hriat loh. A fanu erawh a ngaihsak viau. Nancy nute lamin ṭawngkam nei zauh zauh mah se; engah teh vak a ngai lem lo a niang. A bengngawng awm ve tawp a ni. Lucy zawkin vawikhat chu koh a rawt a. "Naupang an khawngaihthlak, fate tihfahrah ringawt a tha ngai lo. Nancy pawh nangman i zir tawh a, a insiamṭha ve mai ang" a ti a. 

Remlala chuan, "Khutiang mihring khu a insiamṭha awm lo em mai. Tikhuan inhmuchhuak phawt rawh se" a ti tlat si. A pasal berin koh a duh si loh chuan tihvak ngaihna a awm lo. Nancy te lamin bungraw lak an tum chuang hek lo. Zorina pawh Aizawla a chhoh a hun leh dawn ta. A hawn hma zanah inthlahna angrengin kan inah ar an kang ve a, an hlim dar dar hle. Kan mutsan ta daih a. Miteii lung chu a leng ve ngawt ang. 

"Duatpuia thawk dan hi a dang deuh lo maw? Han en teh" Duatpuia thaw lâk dan chu a sak deuha ka hriat avangin ka ti a. Lucy pawh chuan a rawn en vat, a thin chu a khuar dûk dûk mai a. Kei ka ngaih a ṭha lo nasa mai. 

"A nih hi..a va mak ve, vawiin khan a pang a lum ka ti rêng a" a ti a, a pawm nghal. "A la hma tho hi, han chho lawk mai ang" ka ti a. Kan insiam nghal zung zung. Miteii te chu in lo nghak tura hrilhin damdawi in lam kan pan ta a, midang pawh kan hrilh hre lem lo. Doctor lo awm lai a ni hlauh a, Lucy nen an lo innêl bawk nen, a en ta vat vat a. "Septicemia a nih ka va ring êm..he lamah chuan inenkawl dan a vâng si a, engtin nge kan han tih ang aw" a ti vang vang a. 

"A khua pawh a sik a nih hi" a ti lehzel. Kan hlauthawng nupa khawp mai. Duatpuia chu a rawn ṭap feih feih a, a nu chuan a awi nghal..Doctor chuan, "Khaw maw..ekhai! Hei a kaih a nih hi..lo mut teh" tiin a hmanhmawh hmel hle. Ka lo ding zum ve reng, ṭawngṭai pawh ka ṭawngṭai lem lo. Ka hlauthawng em em ringawt. 

Nachhawkna an pe a, Duatpuia pwh a hnu lawkah a ṭap bang ta. Mahse, Doctor chuan, "Naktukah hian Aizawlah kalpui nghal ula ka duh mang e, lirthei in nei tho a.." a ti ta a. Ka fapa te taktê chuan thih a sual mêk tihna em ni? Kan haw pui a, a mu ṭha viau dawn emaw kan tih laiin zing dar 2 vel aṭangin a ṭap a, a ṭap bang thei lo. A ṭap rei bawk a, a aw te chu a chhang ṭiak tawh. Ka va khawngaih tak êm. Miteii pawh a rawn tho ve hlawl, kan pathum chuan kan inpawm chhawk ta tawp a, pawm loh chuan a ṭap nghal zel si, mang ang ṭan ta. A tukah ṭhiante callin kan chin ka hrilh zung zung a, Aizawl kal turin kan insiam zui nghal. Miteii te chu school an ṭan tawh si a, a pute in lamah a pi Siami a fel tawh tho a, lo awm rih mai se tiin kan hnutchhiah dawn a ni. Ṭhianten min rawn thlah liam liam a, Duatpuia chutianga a han awm thut chu a ṭhawng ve hle. In lam ngaihtuah miah lo turin min chah a, a ngaihṭhatthlak ṭhin e. 

Kan tlan tluang angreng a, ṭah chang han nei mah se; nizan ang em em chu a ni tawh lo. A thaw a sak em em a, vawi 2 nachhawkna kan pe hman. Kan thleng a, private hospitalah thlak pawh inthlak lovin kan kalpui nghal. Rin ang ngeiin min lo admit a. Duatpuia chu an enkawl nghal mawlh mawlh, a hnarah pipe vuahin hnutê pawh a hne thei tawh si lo va, a sawra sawr chhuahin pipe hmang chuan an pe tawp dawn a ni. A chau reuh si, ka en rei chuan ka hnuk a ulh dawn zel. 

Ni 3 lai kan awm ta. Hma kan sawn em em lo,. Septicemia chu a lo ni ngei a, a ṭah reng vangin kan inthlahrung a, cabinah kan lut ta mai. Parteii a hlu leh ngawt mai. A û Lucy a awl hneh mah mah, chhunah Lucy a mu a, zanah erawh keimah nen kan awmpui thung. Miteii lahin a rawn call awl lo va, a nau chu a ngaihtuah ve takzet a ni. 

Ni 6 kan awmna tlaiah chuan Miteii hian, "Pa, a pu hi a thi dawnin ka hria. Nizanah pawh a pi nen kan tlaivar..hei tunah damdawi inah kan chhohpui dawn a" a la rawn ti zui! A va mak mawlh mawlh dawn ve le. Lucy rilru a hah zual ngawt ang. 

Kan han ngaichâng ren rawn a, Duatpuia pawh a zia ve tawhin ni 2 hnua chhuak tawh tur kan ni. A lawmawm viau rualin ka puin rilru a tibuai leh ta bawk si. Zan dar 8 a pel hlek ang tihin, Pari'n min lo call a. "Lucy pa chu a kal chiah e. " A rawn ti ta. Lucy chuan Duatpuia hnutê a pe mêk a, a pa vangin a rilru a hah bawk nen, a cher ve kuam a, a chauh hmel ngawih ngawih. "Lucy" ka ti sup a. A rawn hawi vat, "I pa chu a kal chiah a nih chu" ka ti a. Nui hmel pu lek lek hian, "Ka dawm hlum lohin a kal ta a ni maw.." a ti khur dat a, a mittui a rawn hnâm ṭiam ṭiam bawk.