Miteii nu 4

MITEII NU (4)

Ziaktu : Toni Râlte

Chetlak mai dan tur hre lo chuan ka ding hluai ringawt a, mahse, inngaihtuah harh leh vatin, "Kal ang" tiin motor chabi ka la nghal. Ani pawn ihê loin min zui a. Midang han hrilhhriatna hun pawh uiawm kan ti nge ni, kan pahnih chuan Lawitlang lam panin chak zetin kan inkhalhchhuak ta a. Tlema kan han inthlahdul theih deuh hnuah Lawitlang lam be lehin, Miteii chu a ṭhat deuh tawh thu leh Zirtirtu pawh chu khawtlang hruaitute kuta a awm thu an rawn sawi a. Ka thaw huai mai. Mahse, va thlen hrim hrim ṭha kan tih avangin kan tlan zel tho va. Khua kan luh chuan Miteii te awmna hmun nia an sawi Lawitlang YMA President in kan pan ding nghal a. Chawntlang leh Lawitlang lam hi ka pal zen zen loh vangin hmelhriat pawh ka nei lem lo. Lucy erawh sumdawnga an kal fô avangin a hre deuh vek tihtheih tur a ni thung. In chhunga kan va luh chuan Apuii leh Miteii te pawh kan va hmu nghal a, An madam Muani'n a lo ṭhutpui ran bawk. Miteii hmel hmuh pawh rinai tak chuan a nuam. Kan thinrim an hlau deuh nge, lo awm vete chuan a zaizâp zawngin min lo khap thuai thuai hlawm a. Miteii bulah ṭhuin, "I ṭha em?" Ka ti nghut. A bu nghat a, "Umm..ka hlau tawh lo, in lo kal ka ring rêng a" tiin a nu nen min melh tawn a. A nu chuan, "Tihian kan rualin Apuii nen chuan haw nghal mai se la; naktuk zingah in rawn haw dawn tho bawk a" tiin Madam chu a dil a. Ani pawh chuan, "Ni e, hruai haw nghal mai r'u, midang erawh helama thawhpuite an zahawm ve bakah chawhlui te min lo siamsak ve bawk nen, zingah kan rawn haw dial mai ang. Engpawhnise, Sir Dina chungchang pawh saw lama ngaihtuah turin ti mai ang u aw" a ti zung zung a. An Madam hi nikum khan pasal amah aia naupang fê a nei a, mahse, amah hi mi fel leh naupangte pawn an ngainat em em a ni, fa erawh an la nei bik lo a niawm e. Chutiang chuan midang tichiâi vak loin Lawitlang khua chu kan chhuahsan leh ta nghal a. Apuii leh Miteii te chu a hnungah an ṭhu a, thil thlendan chu a nuin a zawt ta a. 

Miteii chuan,"Zing aṭang khan a rui tawhin ka hria, chuan nimin tlaiah kan thlen inah U Sawmi te nen an rawn kal a, tah pawh khan min en reng zel,. Apuii pawh ka hrilh a. Chuan, vawiinah chuan zing aṭang khan a rui a, a tawng reng bawk. Volley ball kan khelh zawh khan mipain football an khel a, Apuii hi a period sia, "Min va inthlakpui rawh' a tih avangin sir te kan dil a, kan kal a. Kha kha min lo zui a niang, an field hi khaw pawnah a awm daih sia, kawngah khan min lo umphak a, Apuii bulah 'Biak fâl lawk ka duh a, tah khan lo nghak rawh' tiin min hruai hran a tum a. Ka ṭang ve tlat si, Apuii pawn a lo phal bik lo va, mahse, min pawtlui tlat bawk sia, kan ṭap a. Apuii hi a beng let tawp a, 'Nang pawh i ṭah leh chuan ka hnek ang che. Vaipa ai chuan ka zei zawk ang..i thiannu hian khawiahmah a sawi dawn hleinem, ka duat viau ang che. Ka subj-ah phei chuan i tiṭha ber zel ang' min tia. Ka ten lutuk kha ka nam vak a, a rui ve tawh nen, a tlu a. Tlanchhiat kan tum lai takin min rawn bawh vak a, Apuii phei chu kawngthlangah a tlathla daih alawm. Ka kawr a pâwt ṭet a, kan au vak vak ringawt. Chuan, Apuii hi hmanhmawh takin field lamah a tlan leh a, chutih chhung zawng chuan min sual a tum char char, mahse, an rawn thleng thla hma hlauh a.." tiin. Ka thinrim lutuk chu ka lo khalh chak vak a niang, Lucy'n, "Insûm deuh la, chetsual a hlauhawm" a rawn ti sep. Ka inthlahdul ta nghal a. Khuaah an rawn hawnpui ngei ka ring a, ka va khawih châk tawh tak êm. Ka fanu hlau thlabar leh manganga siamtu chu ka khawih lohna chhan tur reng ka hre lo. Apuii chuan, "U Sawmi vang vek alawm. Hmanniah pawh Miteii awm loh laia kan awmho laiin, 'Sir Dina hian Miteii a star a, ka tihpui ang. Kan ṭhianho tan vek a nia, tuman engmah lo sawi nawi suh u" a tia

..Bakah vawiinah pawh khan Miteii kha hruai hran phêt a tum hrim hrim, Miteii zawk hian a duh lo zel a" a lo ti ve tân tân. A dik ang, Sawmi hi a nasa tawh mah mah..Miteii te aiin a lo upa kher bawk nen,. Boruak a ngam dan a ngan ṭan tlat. A nute bula la sawi pawh a ngai dawnin ka hria. 

In kan thlen chuan ṭhenawm khawveng an lo lut khawm nak nak a, an lo hre leh vek tawh a lo nia. An thinrim thu bak sawi tur an hre meuh lo. Kima te nupain midang hawn rêm tawh hnuah pawh min la menpui a, thil atthlak ti lo turin min fuih mawlh mawlh reng mai. Miteii erawh Apuii nen an riakdun dawn a, an mu tawh. 

Kan nupain muthmunah kan sawi dun a, "Sawmi bawkin an vanduai tawhna kha a hrilh a ni mai. Chutin mite hi an kamtam em em hran lo, a hranpain pawngsual tawk an ni tawh tih hi kha pa kha tuman an hrilh lovang. Sawmi pawh a mutpui theih avangin Miteii hi a lo hmelṭha reuh bawk nen, a duh anga awmpui ve mai theihah a ngai a nih hmel. Engpawhnise, naktukah Police te pawh an rawn thleng ang a, thil awmdan chu a lang chho zel mai ang" Lucy chuan a ti mawlh mawlh a. 

"Ni e, Keipawh ka rindan a ni deuh. Chu ai chuan Miteii hmalam hun zel tur hi a ni. Khatianga mikhual tlangval pawhin an zuam theih chuan khawtual tlangval tlema chiangkuang lo te hian a tlafâl laite hmu fuh se an bawhzui duh mai lo'ng maw?" Ka ti a. Rilru a chawl hleithei lo. 

"Nia, hlauhthawnnain ka khat. Mahse, a la naupang sia, hmun danga kan hmuh phak loha dah daih lah ka ngaingam chiah si lo. Keimah hian inringtawk taka enkawl ka duh a ni" a ti charh charh a. Ka rilru a khawih ta deuh nge, kuah pahin, "I thei. Lucy i nih kha..i enkawl thei ber ang. Bakah amah Miteii hi a va sihhnip pawh a ni lo va, han tleirawl tak takin han nula chho se, enkawl dan tur pawh kan hre chho ve zel mai ang. " Ka ti a. Ani pawn min lo kuahlêt vein, "Nang ka lo nei che hi ka tisual lo tih ka hrechiang telh telh mai. Nupui ṭha tak nih ka tum reng ang" tiin min rawn fawp zauh a. Muthilh tumin kan chhing ta vang vang. 

A tuk zingkarah Dina te chu kan lo nghak ta ṭhap a. Police pawh an rawn thang mêk. Zingkara lo chhuak an ni bawk a, an rawn thleng hma viau, kawnah kan lo awm ṭhup mai si. Tlangval thaza, Mikhual a nih vang hrim hrim pawha piai hlak chak ho pawh an awm hle hle thei lo. Mahse, VCP bakah YMA hruaitu ten an khap hram hram a. Dina chuan ngenna a lo siam ve a niawm a, "YMA hruaitute kutah min pelut nghal r'u" tiin. A thawhpuiten ngei viau mah se; hriatthiamna sang ber nen an rawn thlen rualin Pu Ruata inah an luhpui ta rap rap a. Keini nupa pawh kan lut ve nghal. Police hoin an biak hmaa lo kawm ve reng reng ka duh a ni. Midang kan chanchin hre ve ho chuan pawnah an lo nghak ṭhup mai. Hetiang khawpa Miteii thlavâng hauhtu an tam hi lungte pawh a chhe lek lek dawn alawm le. Dina chu tlangval pangngai tak, hmel naupan hmel zet, tleirâwl ho star zawng tak a ni a,khawpuia seilian ni bawk chu a no sûrh ve lah tak a. Mahse, Lawitlang lamah tu ten emaw an lo piai hlak tawh a niang, a hmai chu a him meuh lo. A duk bakah khem neuh neuh a nei nual. Nimin a sarhu laia ka thinrim tehlul nen, zing dai chuan min hmet dai ve em mawni, thinrim vak ka han tum paw'n a hma ang khan ka sa hleithei tlat lo. Kut pawh ka thlak lo. Ka thinrim tâwpah lo chuan kut ka thawh ngai lo bawk nen. Ka ṭhut hnaih sauh sauh a, "Dina maw i nih?" Ka han ti tê tê a. Pu Ruata te chhungkua bakah Sawmi pa leh khawtlang hruaitu ṭhenkhat bak kan awm lo. 

"Aw" a ti sup a. Hnuailam ringawt a melh mai. A zak ve te pawh a niang, a ṭhing rim lah chu a nam ang hum hum a. Ka uak ṭêp a ni. 

"Ka fanu hi hmeichhe naupang mai chauh a la ni a, engvanga khatia khawih ringawt nge i nih?" Ka han ti leh a. 

A heh ro zet chu a liak zauh a. "Ih. Ka tihpalh takzet a ni. Khatianga chet kha ka tum miah lo, zu ka ruisual palh a ni. Min ngaidam hram rawh u" a ti ta mawlh mawlh a. En erawh min la en ngam ta chuang lo. 

"Kan khuaa i rawn awmna hi a la rei lo hle asin. I thisen a sang mah mah a ni. A nih ka fanu hian mitmei a hmuh tawh che em ni? Khatianga i chet ngam ngawt danah" ka ti leh a, Lucy erawh a ner deuh. 

Dina chuan, "Hmuh lo. Biak pawh kan inbe ngai lo. Ih, englo, Sawmteii hnen atangin chanchin ka hria a, a vanduaina te kha..bakah amah hi a hmelṭhain a fel reuh sia, ka lo star ru ve hrim hrim bawk a. " A ti ta a. Ka sa ta deuh zak mai. Ka rin ang ngeiin Sawmi vek a lo nih chu a! He nau hi zilh hlak a ngai a nih hi a. 

Han zawh leh mai tur ka dap laiin Police lam an rawn lang ta a. Pakhat zawk chu Lucy nen an lo inhre ṭha hle mai a, hmana an bungraw thenkhat bo chungchangah an lo inbe hrep tawh a lo ni. 

"I thiltih hi a pawi thui viau maithei a ni. Kumtling lo a la ni si a, nang lah sawrkar hnathawk i la ni zui! I hmakhua chu a êng vak lo maithei a ni. Anni lam an inphahhniam theiha an ngaidam thei che a nih hlauh chuan i hna hi chu hum dan dan a la awm maithei a, chupawh a sawi lawk theih lo.." tiin an han vau vel a. A mangan hmel tawh viau. Sawmi pa Pu Khawla pawn kan nupa chu ngaihdam min dil mawlh mawlh reng mai. Lucy ṭhianpa chuan a ruk deuhin, "A thiltih hi in tan chuan ngaihdam mai chu a harsa viau ang a, mahse, hetiang case chu a buaithlak angreng a, case a kal laklawh tawh chuan inngaihdam tih velin awmzia vak a nei thei tawh lo. Chuvang chuan nangni lam paw'n ngaihdam duhna rilru te in pu a nih chuan, tuna kan la awm lai hian sawifel mai a pawi lovang. Kan chhohpui chuan a nih tur ang a ni tawh dawn a" thukhuh angreng tak hian a ti sur sur a. Police lam rilru pawh ka hrethiam tho mai , dik tak chuan Miteii a khawih pawi hman lo bawk a, ngaihdam mai pawi ka ti lutuk lo. Hna nei a lo ni ve kher bawk sia, a hna vawnlai han bantir ngawt kha nakin zelah nuam lo kan tihte ka hlau ru deuh, bakah zu a lo rui ve kher bawk nen. Lucy nen pawh kan han inrâwn a, ani pawn ka rilru ang deuh tho chu a lo pu ve. Chuvang chuan case sang zawk êm thleng lova chulai hmuna inchinfel chu kan tithlu ta a. Mahse, a rang thei ang bera kan khua aṭanga sawn turin khawtlang hruaitu ten ngenna siam se kan duh, Naupang dang tan pawh a him tlat lo. Dinsanga pawh chu kan thutlukna avang chuan a lawm em em a, a mittui te pawh a tla hial mai. A hnua ka hriat leh danin ani pawh a nî enkawl seilen a lo nia,. Tuna a hna a hmuh hma thla 2 liamtaah khan a nî chuan a lo boralsan ve tawh a lo nia. Lehlam zawng tak chuan a lainatawm. A la naupang a, bakah lehlamah mi bright tak, chhiarkawp thiam em em a lo ni a. A bulṭanna a fuh lo em mai a, kan khaw tan a chhenfâkawm thei dawn ta lo a nih hmel.

Chutiang chuan Miteii avangin buaina han tawk leh zauh mah ila; kan inchingfel ve leh thei mai zel a. A lawmawm lamah ngai ang. Lucy pawh a puar lian chho ve zel a, a thin hi chu a chhe sa hrim hrim bawk a, a rai vang hian a chhiat belh pawn ka hre lo. Mahse, a taksa lamah harsatna neuh neuh a tawk chho ṭan a. A kâwng na leh kham vanga ṭhut hleihtheih loh te, a thawhah ṭhinte leh a taksa rawn vûng leh thinte avang chuan rin ai takin kan inbuaipui nasa. Miteii lah tiang damlohna thilah chuan a la chhawrtlak lutuk bawk si lo va, ka hah ve thei hle. Dam leh hrisel takin nautê kan nei ang tih beiseina nena hmalam kan thlir lai chuan Lucy chungah natna chimawm zetin hmun a rawn luah ta tlat mai le. Naupai lai laia Anxiety han neih chu, a hahthlak dan a rapthlak. A tirah ka hrethiam lo va, ka thinrim lek lek zel. 

Bank-a ka awm laiin Pari'n min lo call a , "Nunpui, lo haw lawk mai teh a. Lucy hi a buai deuh a" a rawn ti a. Ka âwl lai tak a ni bawk a, hmanhmawh zetin ka haw phei a. Pari leh Faka an lo awm ran mai, Lucy chu kan pindanah a lo inkalh khung daih a, Pari'n thil awmzia a sawi mawlh mawlh. "Englo a nia, Bungraw chah a lo thleng kim lo va, Lucy hian a la kawl takin tiin dawrah ka en a, chutia ka chhuah rau rau chuan tiin ka rawn peng kawi a, Mahse, Lucy hi a thaw a lo hah nasa mai a, 'K'u Par, ka thi dawn. Min chelh duh suh u, ka thi dawn tho tho' a ti tlat bawk sia. Ka rawn call lai che khan a lut daih a, a inkalh khum ta tlat a nih hi" tiin. Ka thaw hawk ringawt. Kawngka chu ka han kik a, "Keimah..lo hawng lawk teh" ka ti a. A reh vang vang, ngaihṭha vak lo hian vawi hnih vel ka kik leh a. "In va ninawm tak" a tih hlak ri leh kawngka a rawn hawn chu a rual a. Kan lut ta huk. A hmel chu a pangngai reng, mahse, a chauh hmel deuh. "I ṭha em? Engtin nge i awm?" Ka ti a. A ngawi reng. Pari te pawh a bungraw la tur ten an lo call sek avangin an haw ta thuai a. Kan nupa chauha kan awm hnuah, "I hrethiam lo vang. Ka awmdan hi i hriatthiam chi a ni lo" a ti leh ringawt. 

"Sawi la, ka hriatthiam dan turin" ka ti a. A ngawih vang vang hnuah, "Kar hmasa aṭanga inṭan tawh a nia. Miteii vanga ka rilru kalthui nasa lutuk leh keimah chauha ka awm nasat vanga thleng niin ka hria. Ka hah tawp. Ka fanu vang hian miin min hmusit ni ten ka hria a, dawra ka va kal ve zawk chhung ringawt paw'n keimah ka awm ve vanga min dawr duh lo niten ka hria a. Tin, ka kawng kal laite hi tlu mai tur ang te, step thui lotê ka zawh paw'n lum tura inngaihna te ka nei a. Ka mut hahdam ve pawn in chim thut tur ang leh thi dawn tlata inhriatna te ka nei a. Ka hlau a ni. Ka nau pai pawh hi thisain a pian ka ring tlat" a ti ta bawrh bawrh a. Ka melh vang vang ringawt. Tunhnaiah a ṭawng tam lo em em a, chaw a ei tlem zual bawk. Nupa nun pawh kan hmang ngai lo rêng a, a naupai vangin a taksa lamah harsatna a tawk a nih ka rin vang a nia. Kei tak pawh kan hna thilah ka buai ve deuh vangin ka lo ngaihsak ṭha vak lo bawk nen. Ka inthiamlo ta hle. 

"I rilru i sêng nasa lutuk a nih chu. Naupai lai i ni sia, inngaihtuah vak vak suh ka tih ṭhin kha. Engpawhnise, naktukah han incheckup la a ṭha ang" ka ti a. 

"Chutia ka inngaihtuah vak pawh ka hre lo. Ka awm âwl lutukte hi a ni maithei" a'n ti ngawt a. Nu dangte aia a awmawlna ka hre vak si lo. Miteii hi zirna lamah insawrbing se kan duh avang leh amah Lucy tan pawh in chhunga chet tam chu ṭhaa kan hriat avangin zingkar aṭangin engkim a khawih vek zel. Tlai lamah thui vak lo a la walk ziah bawk. Hetia a danglam ringawt hi ka hrethiam chiah lo. Engtin tin emaw chuan kan inhnem thei a..

Mahse, ni a liam a, Lucy natna chu a zual ta telh telh, a naupai lah thla 7 a rawn ni tawh si, ka mangang ṭan ta riau mai. Ka nute ka han hrilh a, Partei'n ,"Anxiety a nih chu, heamah rawn chhohpui vat rawh. A naupai a hrâm tawh si" a rawn ti ta zung zung a. Lucy chu thi dawn tlata a inhriatna leh midang ten an ensan leh hawisan anga a hriatna chuan a tibuai ber. A ṭhiantha ber berte bulah pawh a zalên thei tawh lo. A kim hlawl lo a ni e. Keipawn ka hna chinfel lohte ka han chingfel zung zung a, Kan nu chu Aizawlah ka hruai ta .Miteii te erawh an zirna a laklawh bakah an ṭang ve si a, Pari bulah kan hnutchhiah ta mai. Pari hi chu kan ringtawk bawk a. Aizawlah pawh kei tak chuan ka buaipui mang lo, Parteii'n doctor a va hmuhpui a, engkim tih ngai zawng zawng chu a va tihpui vek mai. Ka lawm takzet a ni. Doctor paw'n Lucy chu a fanu vanga he natna hi nei chho niin a ngai deuh. A la nasa lutuk lo bawk a, damdawi a chawh a, a nau neih hmain a theih chuan vawikhat incheckup leh turin min ti a ni. Miteii kan ngaihtuah ve tho nen, rei châm lovin kan haw a. Damdawi te a ei chho ang a, a zia turah ka ngai. 

Dik tak chuan damlo han enkawl vel hi ka zeihawi tehchiam lo va. Lucy pawh ka lakah a vui maithei, mahse, han tih vak dan ka hre lo a ni. A tlaivar chuan ka menpui tawp a, tlaiah in ka thlen veleh ka chetpui a, a tam thei ang ber titipui ka tum ṭhin. Nupa nun lam chu beisei chi-ah ka ngai lem lo a, ka vui lo bawk. Amah zawk hi a chang chuan a inthlahrung ṭhin. A pum a lian telh telh a, chetpui pawh a harsat ve ṭan. Miteii pawh a chhawr loh theih loh chho a, ani lahin lehkhazir ai chuan a lo châk tumhrang nen. Ka nupui chu a landanah îtawmna nei lem lo, dul kawh luah, mawng dêp tak ni mah se, ka hmangaihna a tlakhniam phah lo va, him damin nau a hring thei lovang tih ka hlau ngawih ngawih. A damdawi a ei ṭhat bakah ṭhiante hian an rawn kan âwl lo va. Pu Saia pawh a rawn teilut ve zauh zauh mai. Remlala leh an nute chu kan beisei buai lo law law. Sawi hmaih loh tur chu Remlala hian zu a in nasa em em a, a zu inpui ṭhin Tluanga hi huan samfai turin ka ruai a. Chhun chawlh laiin Remlala a khawngaih thu a sawi bawrh bawrh mai. 

"Pa ṭha leh zaidam, sêl leh î nei ngai lo a nia. Nancy a lo nei hi a tihsual lian ber a ni. Karah fa an lo nei tawh si nen, tihian nupui ngam lo, thaibawih tiin khawtlang hmuhsit rûk a ni ta ringawt chu a nia. Amah pawh hian a hre ve vek, ka bulah hian a sawi thin. 'Ṭhianpa, kei chu ka vanduai êm a ni. Mampuia nuin min uiresan a, tikhan ka fapa nen damkhawchhuah tumin theihtawp ka chhuah ve a, Nancy a rawn lang a, a zei si, an chhungkua sawn min atchilh emaw tih mai tur a nia. Kei ang mi zei lo leh tih tawh lama nghet bur tan chuan talchhuah a harsa tawh êm a ni. Tihian, ka nupui vangin ka naute nen kan inhlat phah a, kan in chhung lah a nuam tawh si lo, ka pa ai chuan a nupuiin thu a nei zawk a. Ka zu in te hi kan nu te chuan min sawisel a hnêkin min zawnpui changte a awm, thi vat ila ka rokhawm hi a duh ni berin ka hria' a ti ve nuah nuah zel. A nihna takah chuan a chhungril nun a sual si lo va, a rilru hah leh buai vang hian zu hi a in ve mai chauh niin ka hria" tiin. 

Thil ni thei tak pawh a ni. Mahse, Remlala ka dem vena erawh Nancy mizia leh duhdan hresaa nei a ni. An inzui chhung khan a hrechiang hman vek, Lucy a lo sawi dante pawh hre lo a ni lo. Mahse, a palzam lui a, tihian chhungkaw kawrâwng, a naute nen inhlat leh inpawh lo takin an awm phah a. Siamṭha tur ber a nih laiin a hniam zawngin a ke a pen a, chhungkuaa mipa te mawhphurhna sanzia leh an hlen zawh loh vanga chhungkaw kehchhiat theih dan hi Remlala aṭang hian ka hre tawh. Nih ve ka tum lo bur. Mipa kan niha pasal dinhmuna kan din phei chuan kan nupui te kaihphar theih mai mai tura nêp hi nih loh bur tur ka ti ve tlat. Inlak zahawm viaua inlak thu viau lam a ni lo, hmeichhe mizia a zirin a huna rik ṭhak ngam te, a huna zawldawh te hi mipa ziain a kentel tur niin ka hre ve tlat a ni. 

Tin, Sir Dinsanga kha thla liamtaah sawn chhuah a ni ta bawk. Kan khawtlâng hruaitu te chungah ka lawm khawp mai. A aiah nupui fanau nei tawh, pa zahawm leh Kohhran rawn bêl chawt Pu Tlana a rawn awm ta a. Ngaih a ngam ṭan e. 

Miteii pawh a la pangngai chho ve zel a, Sawmi erawh a thlah ta hmak. Apuii leh Nuteii te nen an inkawm ta char char a,. A nu nau neih chhung chu Aizawlah kan hruai ve ang kan ti deuh. A zirlai a thiam chhuak tawh tho bawk a. Kar kawng a hla tham ve nen, "Hetah nei mai la" ka'n ti dêk dêk a. 

"Ka duh teuh lo, Pu Ṭialhranga te, nurse Engi te'n an hmu dawn asin" a ti hlar si a. A hmelhriatte hmuh ai chuan hriat lohin an hmu tur chu a duh zawk ni fahmiang ka ti. Lucy nau neih thla kan chuankai hma lawk kârah hian Miteii'n call dangdai tak a dawng leh ta pek a. A number save loh atang bawkin a ni. "Ka nghak lian dawn che, kum 18 i tlin veleh ka nei ang che. Tuman min dal lovang. " Tih te, "Vai pawngsual hrep tawh hnu kha chu mizo mipa pangngai chuan nawmchen nan bak an duh dawn chuang lo che, ka neih loh che chuan tuman an nei dawn lo che" tih angrengte a rawn sawi nuai mai. 

Kan thinrim ta viau a, a block leh hmak. Mahse, number dang dang aṭangin whatsappah a rawn be chho leh a, Kan khaw mi leh sa ngei a ni tih a chianna chu Miteii chetdan, a school ban hun, a penkawina, engkim chu a rawn hre dik chat chat. Block leh a tum a, ka phal ta lo. He mihring chimawm tak hi kan hriatchhuah a ngaiin ka hria. Nakinah Miteii tan a la hlauhawm thei dawn tlat. Keiman Miteii phone ka kawl chu a tam zawk, chungte chu zuk hre zel a mawle..Lucy phei chuan, "Kan inah hian a rukin camera a kam a ni lo maw?" A ti hial mai. Kan han zawng deuh a, chutiang âwm kan hre si lo. Sunday tlai Miteii leh Apuii te buhfaiṭham khawn chu Apuii chauh a rawn lêt a, "Khaw nge Miteiii" kan tih chuan, "Ehe! A lo la haw na nge, pi Kaii veng lamah a kal a, kei vengthlang a. Min lo text reng sia" a ti ta mai a. 

Hlauthawng takin Miteii kan call chûk chûk, a ring quit ṭhak. Apuii chuan Miteii nen an intext-na chu min hmuhtir a, "Ka lo va haw ang, ka lu a nâ" tih a ni. Apuii tan pawh rawn haw mai loh kha chu tihtheih awm hek lo. Midang hriat hlau ru takin Apuii nen chuan kan zawng ta a. Thingtlang khua mah nise, kan khua a lian ve angreng si. Kan call pah reng bawk. Pi Kaii pêng lamah ka kal a, Apuii'n vengthlang a zu fang leh bawk. Hmelhmai thunun hram hram chungin mi ka tawh piangte chu Miteii an hmu em tih ka lo zawt zel a. An hmu bawk si lo,. Ka lêt leh lamah Lucy call ka dawng ta a. "Hei a lo haw e. A phone a lo thlauh a, a rawn mangang haw khawp mai." A rawn ti a. Apuii ka call a, kan let leh ta nghal. Chumi ṭum chuan ka rin loh takin Miteii chu ka chungah a thinrim ta tlat mai le.

"Ti nge eng emaw hlekah hian i buai em em zel a? Min ngaihtuah leh lutuk hi ka ning ṭêp. Min rawn zawnte kha a ngai lo lutuk,. " A ti tân tân a. Ka hrilhhai viau mai. 

"Aa. Tunlaiah mi an sual tawh si a, ka ngaihtuah deuh che mawle. " Ka ti ta ngawt a. Ngawi ta mai lo chuan, "I phî vak zel a, anu pawh a awm mai mai hi. Nang phei chu ka pa diktak pawh i ni lo lehnghal.." a tih rual chiahin Lucy'n, "Vohbik, ngawi rawh" a ti fiak ta ṭhak mai. 

Mahse, a mak lutuk, Miteii, kum 14 pumhlum ve êk êk chauh chuan, "Ka sawi dik lo mi? Min ven dan em em hi ka ning. Leng rei hlek ila min lo call nghal chawng chawng a, mi pawn mak an ti ang. " A ti leh hlaih hlaih a, mak ka tih êm vangin ṭawng nachâng pawh ka hre lo. Apuii pawh chuan nuam a ti lo nge a chhuak ta daih a. Lucy chuan a fanu chu a dinchilh ran a. A thinrim hle tih ka hria, Miteii lah a ngawi ngal si. "Eng thil nge maw i hriat a khatia i pa i rawn chachhuah ve ngawt le? Hre rawh, hetiang pa ṭha lutuk, nangmah ngaihtuah em emtu i nei hi lawm ngawih ngawih rawh. Tin, tun hnuah kan tel lovin school i kal tih loh chu i chhuak tawh lovang" a ti ta fak fak a. Hrehawm ka tih leh ka nat êm vangin pindanah ka lut ta daih. Khumah ka ṭhu hnawk a, ka chhing sawk ringawt. Engtin nge reilote chhungin Miteii a danglam daih theih? A ma rilru puakchhuak a nih ka rin lohna chuan min la chhâwk hram hram a ni e. Khalam kha chu a nuin a chingfelin a chhuichhuak ve tawh mai a niang chu. Zanriah ei lai pawn tumah kan ṭawng lo. Kan boruak chu rit ru tak a ni. Mut pawh kan mu hma. 

Muthmunah Lucy chuan, "Tunhnaiah a nungchang a danglam hrim hrim alawm, mipa i nia i chîk vak lo va, kei hian ka hria. Tirh a hnial thar a, tum bûr a ching thar bawk. Tin, Sawmi nen pawh an inkawm leh zauh zauh tawh..phone kan kawltir hma lutuk hi a pawi a nih hi..ka lawm hauh lo mai" a ti charh charh a. Kei chu inah ka awm tlem nen, bakah mi thil chîk mi ka ni bawk si lo va, chutiang chu ka lo hre ve vak lo. 

"Nangman i la titipui dawn nia" ka ti nghut a. Ka ṭawngdan aṭang chuan ka lungawi chiah lo tih a manthiam a niang, "Nang a puitling zawk chu lo titau rih lo la..ka be dawn alawm. Khawngaihin lo nghak rawh, a tana pa ṭha ber i nihzia hi ka la hriatfiahtir ngei ngei ang" a ti nghat nghat a. A ti leh ang tih ka ring bawk a, ka ngawi ta rih. A tuka ka va chhuah chuan a ngai angtêin Miteii chuan, "Pa, morning" nui sâng chungin a lo ti a. Nimin lama thil thleng hre miah lo angin..

."morning" ka ti ve mai a. Kan inbe zui lo. Biak bawrh bawrh kha ka tim tlat nia! Ka va puitling lo tak em. Lucy erawh nidang ang thoin a titi bawrh bawrh a. Tukṭhuan pawh puar tak chuan ka ei ve e. Nilêngin ka rilru mawlhtu erawh a awm ta thung. Lucy lahin engmah a rawn sawi bawk si lo, engtikah nge a titipui ang tih ngawt ka ngaihtuah. 

Zanriah ei khamah an nufa tan hun remchang siamsakin "Kima te inah ka va teilut lawk" tiin ka chhuahsan ta a. Zoteii lahin ka tana hriat nuam vak lo a sawi leh ta bawk si, "Nunpui, Miteii hi in ven ṭan a ngai maithei aw. Sawmi nen hian an inzui an hmu zauh zauh a nia, Sawmi hian pawisak a nei lo sia. Bakah Miteii zia hi tunhnaiah a dang tlat, Sunday te khan a pawnfen kha a nihna bak bakin a pawt chhing a, a mal a lang vek te an tia. In enchîk lehzual a ṭha ka ti, an tleirawl ve mai dawn sia" tih thu chu. Rilru hahna bawk, kan nu nau neitur nen. Kima pawh ka zilhhau atang khan a nghei ta char char a, mut dawnah te chuan a lo in mahna, kan va hriatpui tawh lo. A hmel pawh a pangngaiin a êng ṭan tawh a. A lawmawm khawp mai. Lucy'n min rawn text a, "Lo haw tawh la" tiin. Ka haw phei ve leh ta hnuk hnuk a. 

Miteii chuan lehkha a zir nge, a pindanah a tawm a. Lucy nen tv en pahin kan titi ta a. 

"A inchhir a, hrehawm a tih thu bak a sawi lo. Ngaihdam dil che a duh a, a ngam chiah bawk si lo. Khami tlai a phone tibo nen a thinrim ve hlur tawh khan mawhpuh tur a dap ve a niang. Engpawhnise, tun ṭum chu hrethiam la aw" a ti mawlh mawlh a. Ka hah a dam huai huai mai. A phone bo kha an lo chhar a, nimin tlaiah khan an rawn pe leh nghal a ni. A vannei khawp mai. 

"Ni e, hetiang hunte pawh hi a awm ve tur alawm" ka ti a. Mut hma deuhin Miteii pawh a rawn chhuak a, a meng bûi lâk mai. A nu hian a lo ṭim hrep zawk em mawni, "Pa, nimin kha ka tihpalh lutuk. Min ngaidam rawh aw. Hrehawm ka ti lutuk,. " A ti ta ngawih ngawih a. Ka fanu hmelah chuan inchhirna ka hmu bawk nen, "Ekhai! Khatin hrehawm ti suh. Pa leh fa inkarah chuan khatiangte kha a awm chang a awm ve thin alawm. Lo kal teh" tiin ka kuah ta hlân a. Ani pawh a nui ve leh ta sen sen mai. Chhungkua kan hlim leh ta. 

Nau nei tur chuan Aizawl kan pan ta a. Kan in leh lo pawh Kima te nupa kutah kan dah tawp mai. Ranvulh kan nei lo bawk a, a zia. Aizawl kan thleng a, Lucy a rit tawh bawk nen, Parteii a fel thar thar ngei mai. Kei pawh ka âwlthawng viau, Miteii pawh a û te nen an inzui leh chawt tawh. Kan thlen tûka a inbual chuan min ko lut a, "Ziat fai teh, ka kun thei tawh si lo,." A ti ta. Nui ruh ruh chung chuan ka ziahfaisak a, "Zawngṭah vanglai a ni lo hlauh chu a lawmawm mang e , ka hnar phal dawn dêr si lo" a la ti zui! Kan nu ṭhin hi a.. Ka rin aiin a vei rei a, zan dar 9 velah a vei ṭan a, han enkawl vak dan ka hre hlawl si lo, kilkhatah ka lo mangang ve em em tawp. Damdawi in kan thlen chuan a thlanin a bual huh hnêp tawh. A na thawkhat a niang, a awrâwl pawh a chhuah theih lo. Ṭahte chu khawilamah, a mittui leh thanfîm erawh an luang zawih zawih reng a. Ka nu leh Parteii te vekin an buaipui. Ka pain Miteii te unau in lamah a lo awmpui thung a. Kan tlaivar ta thak mai. A tuk October ni 17 chawhma dar 11:47-ah ka nupui chuan fapa min hrinsak ta a ni. Neih pangngaia a nei thei chu kan lawm takzet. Ka fapa chu nurse hian a lo pawm a, a hmai khuhna ka'n keu chu ka hmangaihna zawng zawng hi amahah chuan a luanglut vek ni mai hian ka hria. A sen chek a, a hrawl roh si, a nu pum kha a puar bawk a ni. A fuke reng reng chu a sei thlurh bawk a, an hmelṭha emaw chhia emaw fuke kim leh piansualna nei lova an lo piangchhuak hrim hrim hi Malsawmna ropui tak a ni tawh hrim hrim e. Lucy erawh a chau viau. Tiang chuan kei chu pa dik tak ka ni ve ta chu a nia. Kawng zawh tur erawh a la thui dawn mang e. Ka fapa hmingah chuan, 'Hmangaihsangzuala' tih ka sa a. A sei deuh naa ka duhdan a ni tlat. A inhliam ve nain kan dil nasa bawk a, ka rin aia hmain kan chhuak. In lamah erawh ka buai phah ve deuh. An ṭhuina te chu tuiluma deh a ngai sia, ka deh loh chu a duh si lo. Mahse, chu ai mah chuan kan pindan a ûp bakah Duatpuia chu zing dar 1 bawr vela ṭah a ching roh a, Parteii leh ka nute kaihthawh a inthlahrunawm tawh si, kan nu lah a rai hma pawh mut duh chi leh mu nghet thei zet a ni a, a harh tih hriatreng pawha muhil der ngat ngat thei kha a ni ve tlat. A chauh ve bakah mut tam a mamawh ve tho si, thiam leh thiam lovin ka fapa chu ka awi ṭhin a. Ka pangtilum chu hre hma tak a ni. Mut ka hmu tha mang lo, mahse, chhun lamah min chhawk ve thung a, a zia hlauh. Kei akara kan fapa rawn en duh an awm ve zut te chu nuam thei tak a ni. Thilpek pawh a dawng hnem reuh lutuk. A û te mawlh hi a ni, an khawih leh pawm châk lutuk hi ven an ngai hial zel. A muhil lai pawh an thlir reng peih. Vanneihthlak deuhin Lucy chuan hnute tui a ngah a, a hnute ṭang nasa ṭhin lutuk te hi a chik puat puat thei. Hnute rim lah hi a thang hiam reuh a, chuvang ni maw Lucy chu a inbual zing viau. Vawi hnih khat bak a hnute rim kha ka hre lo.

"Ka khawngaih che,. I nghei rei tawh sia" a tih chuan, "Ka nghak thei alawm" ka ti mai a. Zep loh chuan ka duhtawka hrâwm ka chak thin. Mahse, tu te emaw ang deuha an damchian hma hmaa lo sawp nek zawng a herh thlak ka ti ve deuh. Ka nuten Christmas pawh hmang law law turin min ti a, mahse, in lam ngaihtuah a nat bakah ka hna avangin kan thei lo. Miteii lah chuan helama hman min dil nasa a, mahse, ani pawh January thlaa an exam mai dawn avangin kan remti ta lo. November thla tawpah Lucy pawh a dam chiang ta tihin Chhawrpial kan pan leh ta vang vang a. 

Nau rawn en an tam thin si. Miteii a buai thei, thingpui lumsak an ngai ve thin sia. "Kan khua aia thingpui heh hi an awm lovang. Ninawm" a tih chang a awm fo. A hmaa whatsapp lama rawn be sek ṭhintu khan a rawn be tlem ta deuh a, Miteii'n a chhang duh miau si lo nen, a beidawng ve te pawh a niang. Christmas dawn te a ni bawk a tiin kan Kohhran chuan Camping an buatsaih dawn a, Evangelist lar tak an sawm a ni. Camp luh hma nî sunday chawhnu thingpui kan in laiin kan nu chuan, "Lut ve rawh aw. " A ti a. Min nawr na vak ngam lo, hna ka chhuanlam leh dawn tih a hresa bawk nen, "Ka hna hi" ka ti ta chiah bawk. 

"A ho, engmah buaithlak leh hmanhmawhthlak a awm lo. Lut ang che" a ti ta hmawk hmawk a. 

"Ka piangthar reng alawm" ka tih lahin, "Piangthar tan intuaitharna tur alawm ni rêng a. " A ti leh hmak bawk si. Ka ngawi zui ta daih. A tuk tlai ka han bang chu ka mutbu leh thawmhnaw a lo siamfel diam tawh chu niin,. Kima pawh an nuin a lo nawr ve ngei a. Ka va phur tehchiam lo em..

Hna lamah enghelh tur a awm tawh bawk si lo. Chhuanlam tur ka dap ruk rauh rauh laiin kan nu chuan, "Hmana i sawi 'Sum hi kan pathian ang e aw' i tih kha ka rilruah a thi thei lo. Ka nihna a ni thin. Mahse, kei chu nau no pawm ka nia,ka lut ve thei si lo, chhungkaw lû ber hi han lut la..i chhungkua hi kawng dikah min hruai ang che..Isua hi lû bera i neih phawt chuan chhungkua kan dam ang a, kan fate hmalam hunah pawh Pathian a tel ve zel tawh ang.." a rawn ti ta dap dap a..engtin emaw ka awm. Camp luh ka peih lohna te chu an kiang nghal duak miah lo , mahse, Lucy mitmenga chhungril taka min ngenna chuan min hneh tlat. Hlimsang ho dan takah 'ka kawchhunga nautê a che tlat' an tih ang hian, Ka chhungril a fan a, Camp luha rilru thar leh Pathian nena ka chhungkaw enkawl chu ṭul ka ti ta viau mai..

Biak in thleng min thlah a. "Inenkawlṭha u la aw. Nupuii emaw Apuii emaw lo awmpui mai r'u" tiin ka chah ve lawm lawm a. Nui sâng chungin, "In chhuah nî-ah fai mangtarain ka lo inbual ang" a ti sap. Nui hawk hawk chungin Biak in chhungah ka luhsan ta a. 

(He story hi in duhdan angin a kal lo maithei. He lam hi ziak tura request ka dawng nasa êm a, kei nula senior hian nupui pasal, fa enkawl lam te ka han ziak ta chiam a. Engpawhnise, tu emaw tan malsawmna a nih tak mialin ka thuziak tlawm tak hi in tan ka hlan e. 😍