Miteii nu 3

MITEII NU (3)

Ziaktu : Toni Râlte

Lucy nen kan inmelh zawk a, "Khaw maw? Tu nge?" Tih leh a nu chuan a phone chu va ban a rual a. Miteii pawn a pe ve mai. Lo calltu pa number chu a la nghal a, ama phone aṭangin a call nghal. A ring ral ral a, a la duh ṭhak lo mawle. A hnuah phei chuan a rawn block ta daih a. Keiin ka phone aṭangin ka try ve leh, a ring quit ṭhak ṭhak mai si. Kan number neitu a ni tihna a ni mai lo'm ni? Ring reng si, la duh miah lo chutih a hnêka min block nghaltu te chu..Lucy paw'n " He mihring hian kan nupa min hrechiang a, kan number pawh a nei " a ti hmiah mai a. Miteii tihhlauhthawn ka duh loh avangin, "A rawn fiam ve mai mai te pawh a niang, Mite, kha number kha block daih rawh. Khatiang ṭawngkam kha ngaihthlak pawh ngaithla tawh suh" ka ti a. A bu nghat nghat mai. Rilru nuam vak lo chuan a lehkhazir chhungin Lucy bungraw rawn thleng thar list leh a man te chu ka chhutsak ta a. Chhiarkawp lamah a pachhiat deuh avang hian hetia kan inneih hnu hi chuan a chhût lam hi min papêk tawp mai a, a phakar tak tak a ni. Apuii nu a rawn leng a, anni hi sawi tawh angin inṭhenawm hnai kan ni bawk a, kan intlawhpawh zut zel. An khawsak hi a chuti lua bik lo va, Apuii pa hi a rem rema inhlawh ve ṭhin niin a nu hian mei a zial ve a, Apuii te upa ber te chhungkua an indang tawh a. Chumi nau chiah hmeichhia chu Aizawlah dawr nghakin a inhlawh ve bawk, Apuii u chiah erawh a nu nute bul Lawitlangah a awm daih a, an ziaawm phah phian awm e. Meizial tur a rawn keng a, Lucy chuan a zial thiam loh avangin a lo ṭawnsak a. Nu ṭawng duh ve tak, a titi ngaihnawm thei deuh mai a ni a. 

"Sawmi saw an buaipui ru ṭan tih thawmte ka lo hre ve a, tunah sawn bialpa a nei ve a niawm e. Pêm veng ami, a bialpa chu tlangval puitling tawh a ni sia, school han tlanbopui mai te a hrat nge mawni..sawi a awm zauh zauh mai. Pêm vêng thlen hmaa pu Lawma huan lam pana an kal dun hmu an awm a niang. A zia lo em mai. " A ti siam siam a. Pi Remi hi a kamtam vanga tiang sawi hi a ni lem lo, kan bula a sawi tawh hi chu mi tam zawkin an lo hriat tawh a ni tlangpui, tin, kan nupa kan bengvar loh aleiah khawtlanga thil thleng kan hriatna ber a ni ve a, midang bulah a va sawi sur sur ngai chuang lo. 

Lucy chuan, "A va pawi ve aw. Chutia hmun fianrial an pan fô te chuan tih loh lohte hi an va ti ang tih a va hlauhawm ve mawle" a lo ti ve var a. Kei chuan an chetsual tawh ngei ka ring. Ka sawi duh chuang lo thung. Pi Remi chuan, "Chu chu lawm, Ṭhasanga pi pawn, "A rai mai ang tih a va hlauhawm ve" a tih hmiah kha. Sawmi chhungte pawh an hrilh tawh an tia, mahse, an hau lo nge tun thlengin an la hmu sia" a ti a.

Sawmi te chhungkua hi harsa lutuk lo, hausa em em ni chuang lo an ni a. A pa hi mistiri niin inhlawhna a hmu âwl lo, a nu erawh chuan puan a ṭhui ve ṭhin a. Sawmi û chiah hi naupangtêin sâwn a pawm ve a, a fa kum 2 pawh a tlin hmain a thak leh nghal an tia..an veng viau naa tlem lai deuh kha chuan a rai thu leh a hnu lawka nau a tihtlak thu an sawi. Tunah hian a bialpa , vengchhak ami pathlawi nen an inzui ngawrh viau. Sumdawnna eng eng emaw a ti vein ka hria. A u te dang erawh a rem rema inhlawh an ni maiin ka hria. An pa ber hi zu ngawlvei tihtheih chiah lo, nam ve thei reng a ni bawk nen, an zalên mah mah em aw tih châng chu ka nei deuh. Nu ber lah lenglâm ve tak, puanṭhui tur a neih loh chang chuan ina awm ngai mang lo kha a ni ve bawk a. Sawmi hmalam hunah nghawng a nei ang tih te pawh a hlauhawm angreng. 

"Keiman ṭha deuhin ka hrilh dawn nia. Sawmi nu chuan min hnial vak ngam lo" Lucy chuan a ti a. Miteii avang pawhin Sawmi kal fawr lutuk tur ven chu a ṭul ve bawk a ni. 

"An zirtirtupa lah kha a la naupan hmel angreng sia, a hmel kha ruih neite pawh a angin ka hria.." Pi Remi chuan a ti pek a. Miteii sawi kha a nih hmel ka ti. Pi Remi hawn hnu lawkah keini pawh kan mu ve ta a. 

Zingkara Miteii thawm chu ka hrereng, ka la tho peih lo. A zai rat rât a, "Krista, nang tel lo chuan, chhungkua a dam thei lo…" tih hla kha thiam leh thiam lo hian a sa a. Ka rilru a kal thui ta deuh. Kan inneih hnu aṭanga Kohhran ka thlahthlam takzia leh khawtlangah pawh ka hna vanga chhuanlam ka ngah ṭhinzia te,. Lucy rawn harh rawn meng diar diar chu melhin, "Bawihi, sum ringawt hi kan pathian ṭan tlatin ka hria" ka ti ringawt. Mak tih hmel deuh hian min melh kâwk. "Eng nge awmzia?" A ti ha a. Ka zak leh si, "Ka ṭawngvai a nih kha" tiin ka thawhsan ta daih. A hrilhhai hmel kher mai. Faifûk rût rût chungin kawmthlang huanah ka chhuk leh daih, exer lakna a ni pah a, a zia viau. Nuhnun rah a lo hmin tawh bawk a, ka lo nual. Tukthuan ei laiin Miteii chuan, "U Sawmi chuan tuition kal turin min ti reng, Apa ten an phal rih lo ka ti tawp a" a tih chuan, Nizana Pi Remi thusawi ngaihtuah lêtin, "Nia, kal rih lo phawt rawh. In lamah theihtawpin kan zir dawn nia" ka ti a. Lucy hmel pawh a hlim sawt. A fanu ka duat poh leh a hlim tih ka hria. Miteii chhuah hnuah muangmarin ka insiam a, pindana a rawn lut chu ka hmu tuihnai riau mai. Ka lo melh reng chu a ngaihna hriat loh hmel zet hian, "Thil dik lo a awm em ni?" A ti sap. Kawrbah a bahna sin angreng tak a ha a, a bra hrui pawh a sin êm vangin a sexy ta phian mai. Kekawr a chawnpuar thleng vel deh nuam zet a dum leh a vara par a ha bawk a, a dul a la kiar em em lo va, a hnute nise a rai vang nimaw a kawh zual nasa mai si, a sam hnawk niaih te pawh chu an îtawm zo vek tawh. Ka pan hnai a, "I duhawm lutuk" tih pahin a hmuiah ka fâwp a. A hrilhhai deuh chuan ka hria, mahse, ka hmui ka phawi hnuah, "Min ît thut a mi?" A ti ta pek a. Ka lai lek lek. "Chiang e" ka ti zawi sup. Min tihbeidawn duh ngai lo ka nupui chuan meng de sawr sawr chungin, "Kawngka va kalh rawh" a ti ta nge nge a. Phur zeta kawngka ka va kalh hnua thil thleng chu ngaihtuah ve tawh mai r'u..hehe..

Vawiin chu mood a fuh cher cher bawk a, min dawrtute pawh hlim takin an haw niin ka hria. Kima zu in nasa lutuk erawh complain a rawn lut lehpek a, a hma pawh khan ka zilh tawh reng. Inkawmho vek kan lo nihna laiah han hauh chiam kha thil nuam a ni bik si lo. Amah ngau ngau hi chu pa ṭha leh zaidam, midangte puih nuam ti em em a ni. A zu rui pawh a polite, mahse, ruih reng na nâ na chuan ṭawng sual châng leh han chet fimkhur tawk loh châng a nei lo thei lo va, khang kha tlema inla kulmûk leh chimlîm deuh ten an lo hmu langsar ṭhin si. Amah hêktu te pawh hi chutiang mize nei vek chu an ni. Keia bân theih a ni lo naa warning erawh ka pe ve thei. Ban dawnah ka ko lut a, a harhfimin ka hria. Ka zilh ta mial mial a, a tan pawha dawnsawn nuam tur deuh ka ngaihtuahna lamah ka hah vekin ka hria. A bu nghut nghut a, "A dik alawm. Min hrethiam thin a, ka lawm. Kan nu pawn min hau zing tawh. Zu ngawlvei chu ka inti phal lo naa, ka in tam tih hi chu zêp buai pawh ka tum lo. Ni e, ka lo insiamṭha ang e. Siama hi lawm a nei thei si, ka lo hnar hleithei bik si lo va" a ti ve nuah nuah a. 

A dik ang, Siama pawh hi duh ve hleuh hleuh tak mai hi a nia. Kan inkawm avang khan keipawh in turah min ngai vek, mahse, a harhfim reng ta na nâ na chu min hre ve leh mai. Tiang chuan Kima pawh ka kaltir ta a. Lucy bawkin rawng a lo bâwl. "Miteii hi chhawr vak chi pawh a ni lo, zirna lamah hian a rilru pe ṭha se la, nang pawh dawr nghak tur chhawr mai rawh" ka ti puat puat a. Lucy hi inah chetla tam se ka duh vang a ni pakhat. 

"Nia, Nupuii khian a peih ang em aw ka lo tia. Vawk te khi chu a nu pawn a lo buaipui ve mai ang a, kan inpuitawn a ni mai a" a ti ve a. A ṭha khawp ang. Amah Lucy pawh a hahdam phah deuh bawk ang a. 

Ṭhianho picnic kha Pari'n a ke a bilh avangin kan ṭhulh ta rih, ani ber a kal loh chuan boruak a hot thei dawn loin kan hre tlâng a niang chu maw. Miteii ten exam an hmachhawn ṭan dawn bawk nen, keipawh inah ka tâl tam. Zanah darkar khat tal chhiarkawp chu ka zirpui ta a. Hma a sawn viauin ka hria. Sawmi chungchang an sawi ruk kha a lo dik tak tak a nih hmel. Miteii meuh pawn a sawi ve niah niah mai, "Vawiinah lunch break laiin a lo kal a, 'Mite, khutah min zuk kalpui lawk teh' a tia, mahse, Kan test dawn bakah Apuii ten an phal tlat lo va,.." a ti mawlh mawlh. Sawmi hi an aiin û mah se; an class a inang a, school naupang an tam tham deuh avangin section-in an ṭhen ve a ni. 

Lucy chuan, "I zui lo chu a ṭhat chu..Apuii chiah saw kawm la a tawk rih aw. Sawmi te pawh biak chhiat tur a ni chuang lo va, mahse, kawm tak tak erawh nang aiin a û bawk nen, thlah rih mah la a pawi lo" a ti dap dap a. 

"Hmm, bakah bialpa a nei an ti! Ih, tlangval a nia" a ti niah niah. 

"A nih nangin i nei ve em?" Ka lo ti zauh a, "Nei lo. Pawl 10 ka pass hma chuan ka nei dawn lo" a ti nghet charh. Chu chuan min tilâwm angreng. A nu a chhun takzet a nih chuan a thutiamah a ding nghet ang chu maw. 

Hun a kal ve zel a, Lucy pawn nau thla thum mi lai a pai ve ta. Tunah chuan Nupuii a chhawr ta bawk a, a leh awl ta phian. Dawrah chuan a va kal zeuh zeuh chauh. Nupuii lah a lo zeihawi phian a, amah mi ṭawngmawh tak a nihna kha a paihthla ve hret hret tawh bawk nen,. Ngaihzawng lam erawh a ngaihven meuh lo. Vena kha a lo hmangaih ve viaute pawh a niang e. Lucy dul pawh a kiar ve ṭan tawh a. Rai no a haw vak lo em mawni tihtheih turin luakchhuak leh thil han huat a nei lem lo. A huat awmchhun erawh arsa a ni daih, a rim a hriat rualin a thinrim ka ti mai. Thei a duh em em a, nimbu ka zuk lawhsak hi dangpuithu nen a'n bawl suah suah a, a tithak mah mah thin chu ka khak fô. A pum tan a ṭhat ka ring lo a ni. Nawmsam loh châng a nei tih lohah chuan zingkar leh tlai ni nêmah damdawi in veng lamah a walk ziah zel,. Kei hi ka thatchhe khawp a, ka kalpui hi a tlem zawk awm e. A vui hran lo a niang. Miteii pawh an exam-ah pakhatna a rawn ni leh a, chhiarkawpah pawh a rawn hmu ṭha ve deuh ta. Sawmi erawh hlauh ang ngeiin a fail a, a nun a tlahniam chak angreng viau. Vanduaina a lo tawhna kha inbawhbehtir lo se a ṭha asin mawle, a nun a loose phah ta zawk si a. Tleirawl hre ṭan, bialpa leh star melh hunlai a ni bawk si. A vanduai angreng khawp mai. Miteii ngaihtuah a na ṭhin viau. Mahse, kan hlauhthawn ang êmin engmah a la thleng lo hlauh zawk a. Eng nge maw kan an zel dawn ni. 

Mampuia tlawh pah leh bungraw lam pahin Aizawl zin turin kan inpuahchah a,. Chamrei erawh kan tum hran lo. Zing thawh hma a ngaih avangin kan mu hma a, Lucy chuan muthmunah, "Hetah hian kan awm hlen hmel si loh a, Aizawlah hian in hmunte pawh ngaihtuah ve ṭan a ngai lo maw? Inpui lah Parteii te nufa khian an luah hmel si a,. An tan ngaihtuah leh a harsat hmel bawk nen" a ti sêp sep a. 

"Nia tiraw? Ka pa te nen kan sawiho dawn nia. Mahse, Aizawl chu a to khawp ang" ka ti a. 

"Kan khua hi a hrisel lo ve tihna ni loin nakinah Miteii te pawn zirna sang zawk an la zir duh dawn a, awm hran kual leh kha a khawharthlak dawn lutuk" a ti a. 

"Nia, kan ngaihven dawn nia" tiin ka kuah hlân a. Kan ngawi dun ta vang vang. A tuk zing tâwkah ka motor-in kan tlan ta vûk vûk a, a front seat-ah kan inhnawh leng vek bawk a, a zia. Hotelah tukṭhuan kan ei tih loh chu kan ding mang lo. Miteii pawh a muthlu bawrh bawrh mai. Kan tluang bawk a, dar 3 rik hmain kan thleng. Peng kawi lovin kan in lam kan pan nghal a, ka nu leh Mampuia ten kawtah min lo hmuak, Miteii leh a û han inhmu chu an inkuah chûk chûk mai. Pianghmun ang mai kha an ni bawk a, inngai lo thei an ni lo. Jojo pawn mi rawn belbul leh chat, ani hi zawng mipa naupang ang pawn ka la en thei meuh lo. Nautê ang hian ka la en deuh tlat. Chhungkua kan han inhmukhawm leh ta chu kan hlim khawp mai. Ka pa pawh ka hmu tlangval viau e. A hmaa ka pindan ni ṭhinah keini nupa chu kan invawmlut leh a, Miteii erawh a unaute nen pindan pakhat an luah dawn a ni. Kan han intifai zung zung a, Lucy pawh a chauh ka rin nen, a che leh nghal zung zung mai. Ka nu leh Parteii te nen an inbelbul chawt reng a, keini ka pa nen zan lama Lucy nen kan lo sawidun kha kan sawi dun mai mai,. Nakinah thupuifûn zawka la sawi atan tiin zanriah kan eisan ta rih a. Parteii'n uluk taka a siam an ni hlawm bawk a, ka puar kher mai. Lucy paw'n, "Awii, nau ka pai aṭanga ka chaw eitui ber a la ni" a ti nghe nghe. An han insengfel a, keipawh patea te ka va tlawh a, chaw eiah min lo sawm nghal var. Hei chu chiang sa. Ka'n sawi duh chu Lucy nen kan inrûk tirh khan amah nuthlawi fa nei a lo ni tawh nen, Patea te nupa hi an hmin lo khawp mai a. Lucy tan tak pawh a nuam lo ve duh khawp ang. Mahse, Lucy mizia leh an chhungkaw dinhmunte ka han hrilh ve a, hmin lo viau mah se; ka pate lamin ka duhthlanna an ngaipawimawh ve tho nen, engmah chu an sawi nawi ta lo hlauh. Kan han innei a, Aizawla kan awm chhung reilotê chhung khan Lucy mize diktak, a rinawmna, a tumtlang lutuk te, a huaisenna leh a invawnna te an hre chho zel a. Tin, Lucy lahin an iai deuh tih hre kar chungin tlawn ni si loin a hnaih hret hret zel a, a ko zing viau bawk. Ko ta mawlh mawlh reng chu ngainat chin an lo nei lo thei lo va, zawi zawiin an thinlung a hneh chho a, tunah phei chuan anmahni zawk hian an ngaiin an rawn be fô mai. Hei hi a ni Lucy finna chu. Khatiang a ti kha a tan tlawmna a ni lo, hnehna a ni. "Nuthlawi ka nih avangin min iai a, nula hnahkhat te aia ka thlanawm zawkna ka lantir ngei ang" tia chona inpein a theihtawp a chhuah mai. A hlawhtling ta chiah bawk. Jojo te an rawn lut a, "Pa, apu ten a pute nupa nen lo phei rawh se an ti" an rawn tih avangin, patea te nupa nen chuan kan phei ta a. Thingpui hâng dawm chungin ka in tur chungchang kan sawi ho ta a ni. Ka pa hian in leh lo hi a ngaipawimawh em em a, hetia a hmanhmawh chûk chûk pawh hi mak ka ti hran lo. 

"He in hi i nau te nufa hming pawn ka la dah lo. Sawipui phawt che ka duh a, marawhchu, Lucy paw'n lo hrethiam se, nangni nupa chu ngaihtuahawm in ni lo tih ka hria. In nuin nise i hlawh aia tam a lakluh chang a tam a, i naute nufa erawh i hriat angin zan khat mitchhin pawh lo tawk ila i û te ai chuan nangni a pûrbuai zawk dawn hrim hrim che u. Eizawnna nghet nei lo a ni bawk nen..chuvang chuan mizo te ngaihdanah fapain a pa ro a khawm tur a ni tih hi awm mah se; unau zinga a chan chau leh eizawnna nei lo kutah awm se ka duh a. In in tur erawh kan ngaihthah dawn tihna erawh a ni lo. Parteii hian pasal chhia ṭha te nei ve nise hetiang hian ka ti bik lo vang, amah lah hian mipa lam reng reng a ngaihsak bawk si lo. " Ka pa chuan a ti ta dap dap a. A thusawi tinte chu hnialna engmah ka nei lo. Lucy erawh venthâwn ve ṭha ka ti a, ka va melh chuan, "Ka pawm vek e. Inpui kan luah loh avang khan in fate kan nihna a bo chuang hleinem,.kei chu min vengthâwng suh u, hetia felfai taka chhungkuaa sawiho hi a ṭha ber" a ti siam siam a. Lung a dam e. Ka nute pawn ka pa thu chu an pawm vek. Patea te nupa pawh chuan pa ber thutlukna chu sawiselna an nei lo bawk. Kan chhungkaw thutlûkna chu ka û pawh kan va hrilh ve..sawinawi a nei lo. Parteii zawk chu a inthlahrung. 

Kan chau ve deuh bawk nen, kan mu hma deuh. Lucy chuan, "Ka ṭhiannu hian in hmun lo ram a commission ṭhin a, ka'n be ve reng reng ang e aw" tiin a phone a hmet a. Keipawh Samua te nen kan inbe daih. Chaw eikhawm an rawt leh ngei dawn a, ka tan hnial chi a ni lo bawk ang. Samua tlangval chhung a rei tawh dawn bik lo nen,. A tha vek zel e. 

A tukah chuan bungraw hawn tur lam kan ngaihven a, hmelhriat kan hmu leh nawlh zel bawk. Lucy chu ka hmelhriattir zel a, ex te ka hmu ang tih ka hlau ru angreng, kan nu thikthu hi a chhe ve bawk si. "Naupangho khan skateboard min chah nasa sia, va en lawk ang" tiin min kai dâwr dâwr,. Ka pain Mampuia a lo leisak a niawm a, Jojo leh Miteii ten an awt ve nghal. Skateboard chu kan han enkual a, a duh manto thei sia, kei mi hautak ngai lo tih takah ka duh tlawm angreng si. 

"Nunhlupui leh! I dam a maw?" Ti chûltu lam chu ka hawi vat a. Ka beisei loh tawpin Mami nen kan inhmachhawn ta ran mai. 

"Ehe! I dam maw? Ka dam alawm" ka ti ve a. Kan inchibai nawk nawk. 

"Kha kha in nu chu mi? " Lucy lo ding ve chu a melh zauh a, ka bu nghut. A kut pharchhuakin, "Mami ka nia, lo inchibai ve ila" tiin a nui sâng. Lucy pawh chuan nelawm takin a lo chibai ve vat. "Lucy a nih hi,. Chuan Lucy, hei Mami kha.." ka ti lâwi rût. Lucy chuan a hrethiam tih ka hre nghal. Mami chuan kalpui pawh a nei lo mawni, "Fa in la nei lo mi?" A ti ve zel a. Kan pai mêk thu ka lo hrilh vat, kal thuai thuai se ka duh si, ani lahin tawi khawmuanna ngawt a zawng a. Lucy erawh a pangngai reng. 

"Keini chu kan inṭhenna a rei leh tawh. Nuthlawi hi a lo nuam daih zawk a nih hi" a la ti ham ham zui. 

Lucy chuan a bungrua a pack tir zo va, pawisa a pek zawhah, "Kal ila, Mami, kan haw phawt ang. Nidangah kan la inkawm leh dawn nia" a ti sar sar a, kan kalsan ta. In lam kan panzui nghal hmiah bawk. Ka rin angin a thinrim miah lova, engmah Mami chungchang a sawi hek lo. Ka awmthiam vak lo zawk, a thinrim ring ru deuh khan ka awm sia, engmah a tilang leh ta bawk si lo. He nu zia tê reuh hi chu a.. Mahse, Zanriah kan ei hma deuhin call ka dawng a, ka inbual zo ka inhruk hul lai a nih avangin aman a lo la..an inbiakna pawh ka hre vak lo. Zanriah ei laiin, "Parte, Mami khan i û a rawn be leh a. Vawiinah kan inhmu sia, a lung a lêng thar leh a niang" a ti ta mai a. Parteii chu a meng zîm san mai. "A zak si lova a..a thlawi tak hnu hian a thlalak velah a inchei parh thei khawp mai" a ti nghat a. Ka lo ngawi kur ringawt. Ka nu lah chuan, "Mama nen khan an innei ve mai anga tih tur khawp khan an inzui ve a nia, tiang khan an zuzi leh ta mai mai sia. A mak thin ngawt mai" a la tizui. Lucy mitmeng alh phat chu ka hmu reng, mahse, a inthunun leh vat. 

"Ti daih ila, Parte, hetia online shopping ti reng lo hian keimah ang hian bungraw lian lam hi khawih ve la,. Khawpuia awm i ni lehnghal. A hlawk daih zawk sia" a ti ta daih a. Ka thaw huai mai.

Samua te an rawn lêng a, Sangsangi rim turin kan chhuak ta dial. Sangsangi pawh a lo khal ta hle. A nuih heh ngaiin a la nui heh reng mai. Thla hnih hnua innei mai tur an ni bawk a, an inpawh tawh viau. Kan leng rei lem lo, Zothana te inah kan pengkawi a, Jeneti pawh a lo hmelṭha tawh khawp mai. A vun pawh a êng tawhin a khal ve tawh bawk nen, min lo be nghal siam siam a. Zothana nu te lahin " In nu nen chaw in rawn ei loh vaih" an lo ti ve sek bawk. Min duhsaktu te bula awm hi chu a nuam thin ngawt mai. 

In ka thlen chuan an lo mu vek tawh a. Ka mu zui ve nghal. Kan nu erawh a lo la meng kar. Thinrim hmel a pu lo va, mahse, a la muhil lo chuan min titîm deuh. "I lo muthilh tawh ka ring a" tiin a chalah ka fawp zauh. 

"A chhuak lo alawm. Mami khan min lo bia a" a ti ta mai.

"Maw?! Ti nge a lo biak che? Engtin nge i number a neih?" Ka ti vat. 

"Ka hre nang. I pe a niang chu ka ti..mahse, thil pawi kan sawi lo aw" a ti dam dap a. 

"Eng nge a rawn sawi?" Ka ti lawi a. 

"In inngaihzawn lai vel a rawn sawi duah. Thîk se min duh luatah ka thik lo daih..ka'n bum keuh teh ang ka tia" tiin a nui awr awr a. A va nghal reuh tak. Mahse, ka hah a dam huai huai mai. Tu emaw ka ṭhiante aṭangin ka number chu a nei a nih ka ring. Keimah zawk chu min rawn be chuang bawk si lo. Engpawhnise, Lucy nen chuan min tinghing zo chuang lo'ng e. 

A tukah ka tho hma ber,. Eng nge ka hriat pawh ka hre lo. Ka nu rawn tho chuan min bazarpui daih lehnghal. Tlaiah patea te inah chaw kan ei ang a, inrinni tlaiah Zothana te inah. Han hnial rual an ni si lo va le, a lawmawm rualin ka nu a vui nuah nuah. Min thlakhlelh vang zel a nia. Kan hawn chuan rawng an lo bawl zo diam tawh. 

In lei tur pawh chu kan han ngaihven ṭan a,. Lucy ṭhiannu kha chuan a chhiar to mah mah ka tia. Thil hmanhmawhthlak lutuk a ni lo bawk a, helhkamah ka nei tehchiam lo. Kan haw hma thawhṭanni tih lohah chuan buaina tawk loin hlim takin hun kan hmang a. Miteii te unau lah an inzui chawt reng a, tudang mah an ngai lo. Lucy nen erawh fianrial hun kan hmang vak lo. Chutihrualin muthmunah erawh kan titi dun ziah thung. Ka nî te huanah te ka zu kal a, ram lam ngaina ta chu nuam ka zuk ti leh hle. Tin, ka pa hian chaw ei lai te hian Kohhran ka belh that vak loh vang hian min zilh zeuh zeuh. Ka nuin a lo tuihnih ziah bawk, Lucy'n a lo hrilh a nih ka ring. An sawi dik bawk nen, ka chhang ngai lo. Mahse, sawi takah chuan a dik a dik chuan keini ang zu leh saa tlân lem lo, mipat hmeichhiatna lama va tlan chuang lo, mi pawi a hranpaa sawi hran lo leh kan sualna lai han sawi fakna tur awm si lote tan hian pianthar hi a harsa a nih ka ring. Keipawh hetia ka han inngaihtuah hian sim tur em em nei vak hian ka inhre ngai lo, "I piangthar em?" Tiin min zawt ta se, "Piangthar e" ka tih mai ka ring. Chutihrualin , "Vanram i kai ang em?" Ti ta se, an mita chiang taka en chungin, "Aw, kai ang" tia ka chhan theih erawh ka ring si lo. Helai tak hi ka buai fô. Han pianthar leh vak dan tur ka hre bawk si lo. 

Thawhṭanni kan hawn hma ni chuan kan bazar ve a, Lucy hi chuan thil hi a ngaihtuah kim thin. Thenawm naute bakah kan inleng ṭhangte ho thlengin eng emaw chhetê tal a leisak vek zel. Kan bâwr hle rêng a. Tlai lamah ka nî te, patea te ho nen chawhlui kan kil ho dawn a. Ka cousin te nen hian inrualkhat tawk chu awm mah ila; han inzui ngat ngat kan awm mang lo. A hunah eraeh unau kan nihna kan hre viau hlawm. Kan ri nak nak hlawm a, kan hnawk nuaih bawk. Lucy pawh a inbualfai a, ka naute a va pui ve nghal. Kei erawh ka cousin te nen in chungah ka inkawm khawm a. Lucy fel an tihzia leh hmelṭha an tihzia an sawi ve nak nak a, a tak tak a ni emaw ni lo emaw dawnsawn a nuam ve reng. Kan inkawm tui lai mêkin Parteii a rawn tlan chho hlawk hlawk a, "Mam, lo chhuk vat teh, khu Mami khu" a rawn ti! Ka ding hluai mai. Chiâi lem lovin ka chhuk ve nghal a. In hnuaiah chuan le..Lucy leh Mami te an lo indinchilh ran mai. Lucy pawh tun ṭum chu a meng no viau lo, Mami lah a harhfim meuh lo tih a mitmeng aṭangin a hriat, kai lutuk erawh a ni lo.

"Eng nge thleng a?" Ka ti nghal vat. 

Lucy ṭawng hmain Mami chuan, "In nu hi a rilru a va tê ve, hetiang thingtlang akara nuthlawi lehnghal hian ka thurâwn engahmah a ngai lo vel khanglang a. Zilh ve deuh teh" a lo ti nghal buan buan. 

Parteii a insûm thei ta lo nge, "I va zakthei lo tak,. Nangman buaina i rawn siam a nih kha, U Lucy mawhpuh tum hlek suh. Mam, ka'n sawi ang e. Salad kan chan mawlh mawlh laiin Mami hi a rawn kal a, a ṭhiannu nen hian. Lucy bulah, 'I pasal hi ka bialpa hlui, min duh hlum lo chauhtu a ni ṭhin tih i hria em? Min lo hmusit ve khanglang ang e aw. Ka duh loh hnu i nei a, chibai min buk mawlh mawlh tur i ni" a rawn ti nghal bawrh bawrh a. U Lucy chuan zaidam deuhin, "A ni maw , ka lo hre dawn nia" tih bak a sawi lo. Awm ve dangte pawh zah loin a inâng thinrim chawp a, 'Lucy hian min hmusit. Nunpuia hi theihtawp takmeuha a kherh vanga ka lak aṭanga labo a nia, a zar nasatzia leh a in luahah te pawh a han riahchilh tawp zel tih ka hre vek' te a tia. U Lucy insûm zo loin a beng ta a nih kha" a ti ta mawlh mawlh a. 

Ka thinrim hran lo, mak ka ti zawk, chuti em ema Mami lo tlachhe ta chu mak ka ti a ni. Nula ngawichawi, tu pawimah sawi ngai lo, zakzum deuh kha a ni ṭhin sia. 

"Ka sawi dik lo em ni? Nunpui, a zar nasa che a ni lo'm ni? An khuaa hnathawka awm tawh phawt chu bualthluk ngei tumin a lo inzuar ṭhin a ni lo'm ni?" Mami'n a ti tâwn tawn a, ka sa phut. "Ngawi rawh, ngawi hmak rawh. Ka beng duh mai ang che" ka ti ta tuar a. A ngawi chiang khawp mai. Lucy erawh che map lova dingin Mami chu a melh kal mai a, a zahawm duh khawp mai. 

Mami chu hnai set sawta kalchilhin, "Mami, hei hi lo hria la ka duh, Ka nupui hi keiman nasa taka ka beiha ka zar hnua ka neih a nih hi. Nuthlawi azawnga nuthlawi thianghlim leh zahawm ber a ni bawk. Chuan, kan in aṭang hian chhuak la, keipawh kan nu pawh vawikhatmah min rawn be tawh ngai suh. Tun aṭang hian inhmelhriat kan ni tawh lo. Chhuak r'u,. " Ka ti ta hmak hmak a, a ṭhiannu zak chuan a kai lawk a, a chhuahpui ta nal nal. Ka pate leh ka nî te ho chu ka zah ngawih ngawih. Khatiang êma nasa bialnu ka lo nei ṭhin tih an hriat ka duh lo a nia aw. Mahse, Mami chu mak ka la ti tho. Kan boruak a tichhe deuh naa titi dang an vawrh zui ta bawk nen, rin ai tak chuan kan zangkhai leh ta phian a. Lucy pawh a tider nge phei zawng ka hre lo va, thinrim âwmin a lang lo. Mahse, keimahah nuam tih lohna a riak tho, khati êm êma Mami'n min zuam kha zahthlak ka ti êm a ni. A tuka haw tur kan nih avangin an leng rei lem lo,. Keini pawh kan insiam a, Miteii a khawngaihthlak, a u te a ngai si. School chawlh leh veleh an rawn zin ve ang chu. Kan inpack fel a, kan mu ta. 

Lucy chu lehlam a hawi ta hmak mai. Sawi dun law law ka duh, hetia upbo tum ang taka chhungril ipik si ang hi ka thiam ve lo. "Sawi dun ila" ka ti sup a. Rawn hawi chuang lo hian, "Bialnu hlui te zuam zawng tak pasal neih hi ka dream-ah a tel lo asin" a ti nghat. Ka chhing sawk mai. 

"Nia, hrehawm ka ti, ka duh vang renga thleng a ni hleinem. Tiang khan a rawn kal dawn tih rin ngaihna ka hre miah lo" ka ti zawt zawt a. A rawn inlet ta nge nge, "Thildang kha chu ka hrethiam, a rui a, a rilrua awm a sawi a ni mai. Mahse, i hmaihmaah ngei keiman ka zar nasa che anga a sawi ngam kha a mak ka ti! Khalam hawi khan ṭawngkam i lo nei a nih ka ring" a ti hmiah mai. 

"Min ring emaw ring lo emaw chutiang thu chu tu bulah mah ka sawi ngai lo va, sawi tur pawn thudik a ni hek lo. Mami nen kan inbiak lohna rei tawhzia i hria alawm" ka ti ve ta a. 

"Nia,. Ama irawm chhuak a nih chuan ka na hran lo. Nang emaw tu emaw kâ aṭanga a hria a nih erawh chuan mak ka ti" a ti leh a. Inthlahrung ru takin ka kuah a, ka rin ang ngeiin min lo nam bawk. Mahse, ka kuah lui tlat thung. "Engpawhnise, ka nupui i nia, ka hmangaih che a, ka hmangaih zel ang che. Ka ex an ni emaw i ex an ni emaw an tihbuai theih tawk lek inlaichinna nei kan ni lo tihah hian chiang phawt ang..ummm" tiin ka thlem ta a. Pawr ve chi ka ni lo tih kan boruak kaldan aṭang khan ka hrethiam ve a, zai ka dawh ve ngar ngar khawp mai. A tawpa tawpah chuan ani pawh a inthlahdul ta nge nge a, "Nau pai lai phei chuan rilru tihhah te kha a ṭha lo a nia" ka tih ve zel takah chuan nidang angin a thinrim rei ta bik lo. Bakah Mami nen kan inṭhen dan leh amah nen kan inzui hnua Mami ka chhandan zawng zawng hmutu a ni a, min rinhlelhna chu a nei bik lovang. Mami lah amah aia hmelṭha leh thlanawm zawk a ni bawk si lo. A tuk nghakin lungdam tak chuan kan muhil zui ta a. 

Tichuan, inngai tak chunga inthlahliamin kan khaw lam kan pan leh ta vang vang a. Miteii a ngui hle, tihhlim kan han tum viau paw'n a lunglêng chu a hnuk a ulh zel reuh a, an inzui nasa ve bawk a ni. Jojo lahin a ngaina si..tiang taka anni unau an inngaina hi ka lawm ru hle thung. Kan hmanhmawh vak lo, Pari inah chaw kan ei dawn bawk nen, dar 4 pelhah kan thleng ve hrâm. Kan han insingsa sawk sawk a, Pari in lamah kan chho ta dial. Kelsa an lo siam chu niin, Faka hi rawngbawl nuamti deuh, tuihnai leh thianghlim taka siam thiam a nia. Pari erawh amah letling, Hruaii a chhawr chhan pawh Nuteii vang ni tho mah se; a eirawngbawl thiam lo lutuk hi a ni ber. Dar 6 pelhah zanriah chu kan ei a,. Miteii leh Nuteii te hi inkawmngeih tak an ni ve tho va, mahse, Nuteii hi a hrisel loh a leiah a chhuak tam lo nen, an inlenpawh ta vak lo a ni. 

"Lung chu phun vat la, innei teh u. Chaw kan rawn ei ziah ang" ka tih chuan, "I zak lo. Faka ang hian eisiam te hi thiam ve ta zawk che" Pari'n a lo ti nang nang. Faka lah ngawi rengin a nui pût pût a. Pawi hi a sawi lo ve chiang alawm. 

Pari bawk chuan, "Taka kartawp atang hian crusade a awm dawn kha, Faka nen hian va chhim ve teh u aw" a ti ta daih a. Lucy nen kan inmelh zawk, ka pate min zilhna nen a inhmurem chho ṭan riau. 

"A ho,. Kan piangthar reng tiraw? Faka" ka ti a. 

"Dik chiah, sim tur kan nei tawh lo. Nangni pahnih hi lut zawk rawh u. In kawlh lutuk te hi" a lo ti ve zêk. Kan nui bâwk bâwk a. Chaw ei lah a tui e. Lucy a chau ve deuh nen, dar 8 velah kan haw thla ta hnang hnang a. Kan mu nghal daih. 

A tuk aṭangin nunphung pangngai kan zawh chho leh a, Miteii pawh school a kal leh tawh. Kan zin chhungin thil thleng erawh a lo awm ve a, Sawmi leh an zirtirtu lo awm thar ,an ina innghat kha naupang tu ten emaw an chesual lai an lo phâwk niawm tak a ni. A lar viau mai a, Sawmi lah school a la kal tho va, mahse, an zirtirtu erawh Pu Ruata te in hnuaiah a insuan lut ta a ni âwm e. An sawi danin Sawmi pa pi leh Sir Dina pa te hi unau an niawm e. Chhungkhat inkara chutiang thil thleng chu mualpho khua a sei zual bik fô. Mahse, an inhlat deuh tawh a, kei chuan hmuh rem dan dan ka thiam ve mai. Miteii pawh kan hrilh ngun ta sauh a, Sawmi nen an inkawm ngai tawh mang lo. 

An school pawh an sports leh dawn a, sports lam hi a tui ve riau a, bakah a infit zek zawk bawk nen. Apuii nen an phur khawp mai. Running shoe manto ve tak kan chahsak thul, kan neihchhun a ni rih bawk a, kan theihtawp chuan kan vur vein ka hria. Lawitlang lama va inel tur kha an nia. Ngaihtuah ru viau mah ila Apuii bakah an madam Lateii hian a duatin a ngaihsak ṭha a, ka ngaih chu ka tingam ta deuh ngawt. Zan 2 va riak tur an nih avangin phur takin a insiam a, Apuii nen an thleng dun dawn bawk. A tukah hlim takin kan invailiam a. Lucy'n, "Ngaihtuah lutuk suh,. Eng êm a ti bik lovang" a ti a. Mahse, kei aiin a ngaihtuah dawn tih ka hai lo. Hman deuha rawn be ve ngawttu kha a block tak vang nge a reh ta vang vang a. Tu nge tih erawh kan la hre ta chuang lo. 

Zan khatna chu Miteii tel loin kan hmang ta a. A khawharthlak deuh bawk nen, Kima te inah kan leng ta vel mai mai. Naupang lawm ta ngang chu an fapa hian mi nel reuh khawp mai a, a lak pawh kan la phei zing. A tukah loan buaipuiin nilêng deuhthawin ka buai a, ka chau ve hnâwp mai. Ka inbual zawhah zanriah kan ei a, Lucy hian kei aiin a eirei ziah zel a, zanin erawh min thawhkhalh ve tlat! Khua a thim tawh a. Ka la ei lai mêkin a phone a ri a, a la vat. 

"Aw..maw! Engtin nge a awm? Mai mai chuan" a ti hlak hlak chu ka hria, ka kham nghal a. A awrâwl atangin thil dik lo a awm tih ka hai hauh lo. "Eng nge a?" Ka ti nghal vat. A phone la keng reng siin , "An sir thar zuruiin khawih a tum a, an buai viau" a ti khur dat a.