Miteii nu 2

MITEII NU..(2)

Ziaktu : Toni Râlte

"Engtin nge ka awm a? Veroi nen chuan biak chu kan inbe ngei, ka kut hmawr pawhin ka khawih lo ve" ka ti nghut nghut a. A thikthu chhe lutuk leh a zeldîn nasa thin lutuk hi ka ngei thin. Tiangte chuan kei chauh lo ama nun thleng pawn a tichêp zo vek dawn alawm le. Hei chiah hi a nuna ka sawisel chu a niawm e. Famkim a lo harsa ve deuh a niang e. 

A hmui tipawrhin, "Biak pawh a ngai lo, khati khawp khan kan inneih hmain a huangtau a, melh pawh melh a ngai lo" a ti hmarh hmarh a. Ka nuih a za leh deuh, "Ka be tawh lovang..a ṭha em? " Ka ti a. A ngawi zui ta. Tukṭhuan tur a rêl a, keipawh han mut lehna chi a ni lo bawk a, kawmthlang huanah ka zu tei vel mai mai. He in hmun kan lei hnu lawkah an huan lo ram hi kan dil a, an phal chiah lo nain an fapa damlohna avangin phai lama an inentir a ngai sia, min leitir leh ta hram kha a nia. A zau hran lo naa a hmun hi a nuam reuh a, In sir huantê hi Lucy chan a ni ve thung. Anṭam, bean tih vel a ching ve a. Kawmthlang huanah thei lam ka ching ve thung. Nimbu bakah thingfanghma tih vel a awm sa bawk a, han fan hi a nuam ve hrim hrim mai. Miteii'n, "Pa, chaw kan ei dawn" a rawn ti vau vau a. Ka chho leh ta hnak hnak. Pathum tlawng hi chuan chaw eitui a harsat chang a awm ve thin. Miteii te pawh mitthi kan neih avangin school an chawl dawn a, "U Nupuii te nen luiah kan insu dawn aw" tiin min dil a. Nupuii hian a duat khawp a, khawi iloah pawh a hruai ve ziah zel. "In zuk chesual a nge,." Ka tih chuan, "Tui kan cheng lovang. Luia chaw ei kan châk a" a ti a. 

Vawi hnih an kal tawh avangin ka ngaihtuah lutuk lo. Chaw eikhamah a insiam nghal malh malh, insûk tur chu a nuin a khungkhawmsak a. "Tui kha cheng reng reng suh ang che u. Tu tu nge in nih dawn?" A ti mawlh mawlh a. 

Miteii chuan, "Kei, U Nupuii, Tebawihi, Apuii leh U Sawmi te" a lo ti ve mai. Apuii hi Miteii best friend a ni a, ṭhenawm lawkah an awm bawk nen, an inkual nasa ve hle. An kum a inrual bakah an class a inang a, Biak in thlengin an inzui dat dat reng mai. Keini nupa pawh Miteii te kal hnu lawkah kan insiam a, a puan bih laiin a dul ka va zût thuak a, "Puar ve ûl tawh se" ka ti sup bawk. A ner sak a, "I nghei rei dawn asin, i duh mi?" A la tizui. Ka nui pût pût a, "Neih dawn tak takah bak insûm a ngai leuh" uang fê hian ka ti a. A nui ve ringawt. Thakima te'n ka motor an la rawn dah si lo, ke-a kan kal mai a ngaih hmel. Mahse, vanneihthlak deuhin kawn kan thlen laiin motor remchang a rawn tlan hlauh a, kan chuang ve daih. Pari pawh nimin piah khan Aizawlah a zin a, a awm loh hlek hi chuan a ngaihawm thin. Faka nen kuminah innei ve se kan duh viau, an pa lungphun phawt a duh ve sia. Mapuia te in kan va thlen chuan Lucy chuan a puan kensak chu a va dah zuai a, rei a ṭhu lo. Nu ho zingah a insawn a, keipawh kawngka bulah ka ṭhu. Zai a nuam angreng. 

Vui zawhah râlna kan pek hnuah kan haw leh ta a. A remchang êm a tiin Lucy te inah kan pengkawi ve leh zuai. Pu Saia chiah a lo awm a, khaw nge midang kan tih chuan, "Nancy te chu an in lamah an leng a nih kha, Siami pawh Lawitlangah tukin khan a phei lawk, a û fapa a na angreng a.."a lo ti thluam a. Lucy chuan hun remchang tak niin a hria nge, a pa chu a ṭhuthnaih sauh sauh a, "Pa, nizana kan sawi ang khan..lehkha chu fel takin siam rawh aw. Nakinah buaina a awm ang tih a hlauhawm êm mai" a ti a. 

A pa pawh chuan, "Ni e, ka ngaihtuah fel vek tawh alawm. Bena hi ka fapa naupang zawk leh hna nghet nei lo zawk a ni a, ka thlahthlam thiang lo.."a ti ve a. Thla a ngam ta deuh e. Remlala te an rawn hawn takah chuan kan haw thla ve ta a, Miteii a lo la haw lo. Ka kawng nât deuh avangin ṭhutthlengah ka tluzâl a, ka lo muhil zui ta a niang. Lucy aw hian, "Nunpui, harh teh. Vatin..Miteii ten buaina an tawk a nia" thlaphang taka a rawn tih chuan ka meng chiang kher mai. Ka tho vat a, Lucy chuan, "Miteii leh Sawmi te an bo" a ti ta mai! Dawt a sawi a nih ringin ka melh kâwk a, a thutak si. "Eng nge a awmzia?" Ka ti hrâwk. 

Chutihlai chuan thenawm khawveng an rawn lut ta huk a, ka la hamhaihin ka la chiâi deuh, ka la hawi â hû mai. Sawmi nu Pi Buangi chuan a hmai hupin, "Khaw nge an awm tak ang?! " A ti a, a ngik feih feih bawk. Lucy erawh a inthunun thei hle. A che buai vak lo..YMA hruaitute chuan zawn dan tur an ruahmanna te chu an sawi zung zung a. Keipawh chiâi ru tak chung chuan ka insiam nghal mawlh mawlh a. Thakima te pawh an rawn haw tawh a niang, an rawn lang ve var. "Ṭhianpa, kal nghal mai ila" a ti a. Tichuan, rilru buai leh mang ru zetin Miteii te zawng tur chuan kan chhuak ta a. 

A bo dan Nupuii te ho sawi dan chuan, "Kan insu zo kha chakawk leh tumbo vel kan veh a. Miteii leh Sawmi te'n mei an lo nun a, Apuii hian kan innghahna hmun a thleng hmasa ber a, 'Khaw nge Miteii te hi' a ti nghal. Mei pawh an lo la nun lo va, kan ko vak vak a, min chhawn thei si lo. Min tihderh a niang kan tia, mei pawh kan chhem zui nghal. Mahse, darkar chanve hnuah pawh an rawn lang thei si lo va, kan mangang kan rawn haw ringawt a ni. An phone lah an hnutchhiah ve ve bawk sia" tiin. Ka fanu chungah chuan eng tak thleng ang maw? He ta ka awm hnuah Vena chiah kha a la bo a, a hnuah a thi zui ta mai bawk nen, ka hlauthawng ru ngawih ngawih. An lui kalna hi Ramri lui an ti mai a, Chawntlang ram nen an inrina lui a nih vang a ni. Khua aṭanga lui hnai ber a ni a, a lian lem lo bawk nen, puitling lam hi chu an kal zen lo. Insûkna rem deuh deuh a tam avang hian intihlim paha insûk hi an uar a, hetiang thil hi a la thleng ngai lo. Kima te ho chuan min ṭawng thlamuan mawlh mawlh mai. Chawntlang lam pawh an be tawh a, khaw inhnaihtê kan ni bawk a, anni lam pawh an rawn thawkchhuak dawn. Lui chu kan thleng a, kal thui pawh ngai lovin an insûkna hmun chu kan thleng nghal mai. Hnuhma leh han ngaihbel tur eng thil mah kan hmu si lo. YMA Secretary Liansanga chuan, "Hnuhma hmuh tur a awm si lo, a mak hle mai a. Khawmu chawi te hi an ni mai lo maw le.." a ti nuah nuah a. Khawmu chawi êm an nih ka ring si lo. 

"Rukbo an ni thei ang em le?" Inthlahrung deuhin ka ti a. 

Pu Ṭhuama, Middle school headmaster chuan, "Thil ni thei a ni. An inrin loh laia thawm siam miah lo tura rukbo an ni thei tlat. Hnuhma a awm loh danah hian mi pakhat thiltih a ni lo bawk ang, hnehsawh taka rukbo an nih rinna ka nei" a ti mawlh mawlh a. 

Lui kam lehlama va kal Ṭhianga te ho chuan, "Hei hmuh kan nei e. " Tiin samṭâwnna dum hi an rawn lek vâ a, Miteii sam ṭawnna a ni chiang, ka'n en chiang leh a, Miteii ta ngei a ni. Chulai hmun chu kan han belchiang leh deuh a, ngaihbel theih tur chuan a pe ve deuh sûn mai, an inchai ve deuh turah ngai ta ila..mahse, thawm an chhuah miah lo thei chu a mak a ni. Nupuii te kha an kal hla hran lo, auchhuak se an hre pha em em ang. A nih chuan an ka an hnawhphuisak tihna a ni thei ang. Hruaitu te chuan min sem darh a, keini pawh lui aṭang chuan pêngin kawng mumal awm loah kan kal darh ta a. Changel hmun niin hrui zâm chi an awm nual bawk. Mahse, kan daidar nghal zel a, a khât tawkin Miteii te chu kan ko reng bawk. Kan chhuah khan dar 3 a pel tawh a, khua a rawn thim ṭan dawn ta mai. A kal erawh kan kal thui viau. Kan kalna ram hi Chhawrpial ram pawh a ni tawh lo. Khua a rawn thim takah chuan hruaitu ten ruahmanna ṭha zawk siam tura khuaa haw leh phawt an tithlu a. Zan thim hnuaiah pawh zawn zel ka duh em em, mahse, thiante ho chuan, "Ram chinchâng kan hrechiang bawk si lo va, bo ve mai a awl dawn lutuk. Dawhthei hram hram rawh. Eng êm an ti lovang" tia min khap ve tlat avangin an hnung ka zui ta a. Lucy hmachhawn ka huphurh hle. Mite, khaw nge maw i awm le?! 

Khawhar in lam pawh kan ngaihven hleithei lo a ni ber e. Lucy meuh pawh khua a rawn thima zan a nih takah chuan a ṭap ta fap fap mai. Ka hnem thiam bawk si lo,. Pu Saia te pawh an rawn leng thla ve a. Miteii hi a duat ve bawk a, a rilru a hah hmel khawp mai. Chawntlang lam khawtlang hruaitu te leh kan khawtlang hruaitu te inbe râwnin, mi rubo duh mai tur âwm an han thlir kual a. Khaw mi leh sa diktak te hi chu rinhlelh ngawt an harsa ve bawk nen, Chawntlang lam chuan kar khat liam taa Vai pathum, damdawi zuar an rawn kal thu leh chumite chu tunah khuaah an awm tawh loh thu an rawn sawi ta a. An thlenin pain nimin chawhnua Lawitlâng lam pana an kal leh thu a sawi a, mahse, Lawitlang lamah chutiang mi âwm an awm loh thu an rawn sawi si. An rinhlelhawm ta hle mai. Rilru a chawl lo va, mawhpuh ber tur hre si loin thin a rim ṭûn reng mai. Miteii phone te ka han check kual a, ngaihbel tur engmah a awm lo. Ngaihzawng pawh la nei lo, rilru thianghlim lutuk hi a tu chuan nge maw lo rubo ta ang le?! Vai pathumte chu kan target ta ngawt a. Anni bak rinhlelhawm awm hek lo. An sawi danin an damdawi rawn zawrh ho pawh chu an hralh ve nual a niawm e, nau pai theihna te, mipa serh lenna te, thi pût nasa tihtawpna te a ni nual a, a dangdai reng reng e. Chawntlang leh Lawitlang lam te nen ṭangrualin vai te chu zawn beihpui thlak an ti ta rup mai. Hmun danga an la kal hlat loh kan beisei a ni teh chêk ang chu..rilru a haha phur a rih tak tak hian ṭawngṭai chham dan tur pawh hi thiam a lo har khawp mai a, kei pawh, "Lalpa, Miteii te hi himdamin min hmuhtir leh rawh" tih bak ka chham hleithei lo. Tupawh mai chuan min khawngaihin min manganpui niin ka hria. 

A tul varṭianah ṭhalai zawng zawng deuhthaw te chu kan chhuak khawm leh ta. Keipawh ka hna thilah min hrethiamin engmah an sawi nawi lo. A pa tak ni lo mah ila a nu pasal ka ni miau a, tin, kan inngainat dan lah an hre ve bawk nen. Chawrpial ram chin zawng keini'n kan dap ang a, Lawitlang leh Chawntlang lamin an ram chin an lo dap ve bawk ang. Mizo tlawmngaihna hlutzia hi chu chhiat han tawh chiah hian a lang ṭhin. Kan lo va hlu ṭhin tehlul êm. 

Tichuan, Miteii te zawn beihpui chu kan thlak ta tak tak a. Thin thîp vung vung khawpa rilṭam dangchara kan zawn hnu chawhnu lamah tawh ph call ka dawng ta a, midang pawn an dawng ve. Ka thu hriat chu a ri a va mawi êm..",Miteii leh Sawmi te kan hmu e, a rubotu te pawh" tih thu a ni. Hah leh chauh pawh hrechang tawh lo lêkin in lam kan pan ta chûk chûk a. Ka hlim lutuk chu ka tlan titih a ni ber e, hetiang tak hian a ni maw ka ril a rah ni lo Miteii hi ka lo hmangaih tawh ni..Kan in kawtah chuan an lo tlim hmûr mai a. Eng sawi set set lovin in chhungah ka lut nghal vut. Sitting roomah chuan Miteii leh a nu chu an lo ṭhu dun ran a. Midang pawh an awm nual, tu tu te nge ka va hre hlawm tawh lo. Miteii'n ka hmel a hmuh rual rual chuan a rawn tlan a, "Pa" tih leh min rawn kuah a rual nghal, ka lo pawm chawt a. A ṭap nghal hlawp hlawp bawk. Min thlir ṭhup tih pawh ka hrechang tawh lo. "I ṭha em? Bawihte..ka va lawm tak êm" ka ti mawlh mawlh a, a ṭap uar sauh mai. Lucy a hmai hupa lo khur ngat ngat ka va hmu a, ngaihṭhat lohnain min tuam nghal. Miteii chu a bek tawn tawna vuanin, "Engtin nge an tih che? Sawi rawh. Mawh.." ka ti sehchilh nawk nawk. Ka thisen rawn lum chu ka hre zui bawk. Mittui luang zawih zawih chung hian, "Pa, a na lutuk" a ti ta a. Ka khurh nasat êm avangin ka thlah hlawl,. Mittui kar aṭangin lo awm vete chu ka hmu phê ruai a. "Khawiah nge an awm?" Ka ti nghal tuar bawk. 

Thakima hian min rawn chelh vat a, "A sarhu lai chuan inthunun tum hrâm rawh" a ti nghet churh. Mahse, pawn lam thawm ri hak ka hriat avang chuan chak zetin ka tlanchhuak a, veranda-a an hual tuau chu ka va keu nghal sawt sawt. Vai pathum hmelchhe zet zet, meng ker te chu ka va bawh rawk a, phuar hlawm an ni bawk nen, an che thei lo chai chai ngei mai. Ka hnek buan buan a, ṭhenkhatin min dan an lo tum, kan insual buai nuaih nuaih ni maiin ka hria. Lucy aw hian, "Nunpui, a tawk..nunna petu kan ni si lo va, a laksaktu ni lo hram rawh. Khawngaihin" a rawn ti dam thlap a, ka bânpuamah min rawn chelh bawk. Thakima leh Siama ten min chelh hneh bawk nen, chet ka la zui ta lo. Mahse, ka khawih nual hman a niang, vai te chu an tlu zawi reng a, pakhat phei chu a ka aṭangin thi a chhuak hial. Khawngaihna chhetê mah ka nei lo. Min lo dang nasa deuh deuhtu te kha Police an lo nia..Police kuta an awm tawh vangin tlangval thaza leh thinrim te pawn duh angin chet an la thei lo. Ka thin hi a va dam lo tak êm. 

"An thin leh lung ka khei chhuah hma ngeiin he lai hmun aṭang hian la bo rawh u" ka ti ṭuâk a. Ka aw pawh a la khur nasa khawp mai. Khawtlang hruaitu te puihna nen engtin tin emaw an hruaichhuak thei ta a. Lo khawih zauh tawk erawh an awm reng. A mawh lo ve, tlangval ṭhenkhat ṭawngkam, "Vai mai mai te chu ren vak an ngai em ni? Kan ramah kan mizo hmeichhia te ngei min khawihsak a, engah nge nunna nen kan thleng loh bik ang? " An tih pawh chu dik ka tiin an nunna chu laksakin awm pawh nise pawi tihna ka neih ka ring hauh lo. Thin a rim tak tak chuan Pathian thu chu ngaihtuah harsa tak a ni. Mahse, Police te pawn an hna an thawh a ngai miau si a, a hnua ka hriat leh danin Chawntlanga a thlen inten Police an lo ko lâwk a lo nia. An khaw ho pawn an dem hle nghe nghe. Police awm lai êma tualthah kha chu kan lo hreh ve bawk nen, Police ho tak pawh khan an lainat hranpa lo a niang. An hlap zawt zawt mai. Engtin nge case a kal zel dawn tih erawh kan la hre lo. 

Miteii aiin Sawmi hi kum 3-in a upa zawk a, ani chuan ṭhanthi pawh a nei tawh a ni. Kan Miteii erawh chu lian uaih mah se; Ṭhanthi a la nei lo va, ṭhangthar te hian thi an neih hma tawh êm vangin a nu ngaihṭhalo hian damdawi eng eng emaw a eitir fô mai. Mahse, a la hun lote pawh a niang e. Chu ber chuan ka thinlung a tina ngawih ngawih a ni. Mizote ngaihdanah ṭhanthi neih hmaa pawngsual tawk emaw duh vang renga sex hmang emaw te chu hur hlen tur, buanchak lo tura ngaih an ni si a, keipawhin he ngaihdan hi ka nei ve bawk nen. Ka fanu hmalam hun ka ngaihtuah a, ka na a ni. Kei ai mahin Lucy thinlung hi a nat ka ring bawk, chu chuan min vaw chau ve zel bawk si. Thil thlen dan chu hetiang hi a niawm e. 

Khatia Apuii te hoin an chaw chhun hmeh tur tumbu leh chakawk an zawn hlan khan mei chhem tumin an lighter ken an zawng fê a, chutia an buai lai tak chuan khang vai pathumte kha rawn langin ka rindan ang chiah khan romol-in an hmui leh hnâr an rawn hup a, auchhuak tur an awm lo, damdawi hmanga romol kha chiah vek a lo ni si, nikhua an hre lo zui nghal a. Tikhan lui kam lehlamah an paw phei a, Miteii samṭawnna kha a tla nghe nghe a nih kha. Khuaah luhpui ngam lovin ramhnuaiah an tawmpui a, nikhua an rawn hriat hnuah Miteii chu a la naupan bakah a têt zawk vangin an zinga patê ber chuan a pawngsual a, Sawmi erawh vai 2 ten an pawngsual thung. An hmui an charbet hmiah a, an au thei si lo. Ka ngaihtuah zawngin ka nâ..Khaw pathumin kan zawng tih an hre lo va, Lawitlang ramah luhpuiin chuta ṭanga Aizawl lama chhohpui an tum a, vai rama hralh an tum a ni ber. Hei hi an vawikhatna pawh a lo ni lo nghe nghe. Chhim lamah pawh tleirâwl pakhat an lo ru bo tawh a lo nia, tun thlengin chhuichhuah a ni ta lo a nih chu..Lawitlang rama an awm chu Lawitlang ṭhalai hoin an lo nangching ta hlauh a, tikhan an rawn hruai haw ta a ni. Tin, thu lawmawm tak ka ti mai a, Police ten an hruai hnu lawkah motorah vai pakhat chu a hliam tuar loin a boral a. Pahnihte pawh enkawlna pek an nih loh chuan thi mai thei dinhmunah an ding bawk. Sual man chu thihna a ni si a..

Miteii te avangin khawtlâng titi a dang a, khawi hmunah pawh sawi a ni zel mai. Tlangval thenkhat thindam thei lo lahin khawtlang hruaitute an lo mawhpuh ve bawk nen, Police an lo ṭawiawm kha an hua a ni ber ang chu. Lehlamah tlangval ho rilru ka hrethiam a, khawtlang hruaitu te rilru tur pawh ka hrethiam tho mai. Tunah chuan ka fanu hmalam hun ka ngaihtuah a ngai ta ber zawk. Lucy nen titina hun remchang kan la nei hleithei lo. Miteii hlau thlabâr lutuk chu kan bulah lo chuan a mu duh si lo, Kan khum a chêp deuh bawk nen, keiman karkhat dâwn chu ka mutpui a, a zan mutui laite hi a rawn rum chhuak a, hlau thlabara rawn ṭahchhuah te a nei ṭhin. Ka lainat ngawih ngawih. Tleirawl uaih mah se; kan nautê a la ni a, a tan khatiang kha a damchhunga a theihnghilh tawh loh tur a ni tlat. Keini nupa pawn kan thaibosak thei tawh dawn lo. Mahse, kan fanu hi mi pangngai takah kan siam ang. Chu chu ka tum tlat a ni. Tin, vai pahnihte pawh central jail-ah an lut thla a, damchhung tâng tura an chungthu rêlsak an ni. Mahse, pakhat zawk chu a lo nghal deuh nge a thattu ber hriat si lohin jail-ah a mu hlum a, pakhat erawh a nungchâng a ṭha viau nge ni, a la dam ve ngar ngar mai. 

Mampuia a rawn haw a, a nau pawh tlemin a zia ta deuh. A pute ina an lên hlanin Lucy nen Miteii chungchang kan sawi dun thei ta. 

"Mizo te ngaihdan chu thuhran nise, khawtlângin an endan tur hi ka ngaihtuah ngam lo. Khawngaih tawk an awm ang a, mahse, a han nula ang a, tu te emaw rilru chhe fâl ten a vanduaina hi ṭul mang lovah an sawi sak ka hlau a ni. Tin, amah hian a hrereng tawh dawn bawk a" a ti mawlh mawlh a. Keipawh mut mawh hnârmawha ka lo neih ve ṭhin kha a lo ni bawk nen, "Kan rilru a va inang ve ..Amah hi chhelin nunphung pangngai zawh tum viau mah se; tu tu te emaw mawlmang ve tak tak ten an lo fiam ang tih hi ka hlau. Aizawlah kan dah mai dawn mawni te ka ti rum rum" ka ti a. Aizawlah hi chuan school la kaltir tho tho a ngai dawn a, tin, keini pawh kan la awm a ngai dawn tho. Hetah hian kan chen kumkhua ka ring lo. 

"Ka hrethiam lo,tunah hi chuan amah pawh hi ṭha taka hrilhfiaha a rilru siam nghehtir hi ka duh. Mi thenkhatte ngaihdan a lo hre ve ang a, buanchak lo emaw a inti ve ngawt ang tih ka hlau a ni. He kan ngaihdan dik lo zet hi a dik lohzia fiah nan ka fanu hi ka hmang dawn.." a ti nghet charh charh a. Ka lo pawmpui hle. 

"Chutak chu lawm he lai a vanduaina hre ve lote bulah awm se ka duhna chhan..mi phunglung pui pui, sawi âwm a nih leh nih loh pawh hrethiam lo a tawn hunah a na lutuk ang. Amah lah nang anga sehhel leh khauh a ni ve si lo" ka ti nghut nghut a. A inngaihtuah a niang,. Nautê kan la nei lo bawk nen, Miteii awm hrantir daih pawh chu a khawharthlak dawn bakah keimah zawk zawk hi ka awm thei lo maithei a ni. Ka nute pawn, "He lamah rawn awm thawveng rih se, zirna te chu tlai luat a awm lo" an rawn ti fô..an tu tak tak ni lo mahse, an ngaihtuah ve khawp mai. Amah Miteii pawh hian ka nu phei chu a ngaina viau nghe nghe. Ka chhungte sawikai takah chuan Miteii pu, pu Saia te chunga ka vuivaina tlem ka'n sawi ve leh lawk ang e. Vanduaina kan tawh hlimte kha chuan an rawn leng ve zut mai,. Nancy leh Pi Siami te pawn kan hma ngai ber niawmin a hnem lah min hnem thiam. Kar khat vel a han ral a, an ṭawngkam midang ka aṭangin kan hre ta zauh zauh. "A hur hlen ngei dawn sia aw. A nu lahin a duat hlum lo chauh sia, kan khawtlang tihmingchhetu a la ni ngei ngei ang" tih te, "A lo him tawh lo sa a ni lo maw? Nâ a tih hmel loh em mai" tih angreng..Lucy ka chelhbeh chang a tam ta viau, han kalchilha nuai hrep a duh zel mai si a. Kei a pa zawk na nâ na chuan insûm rih turin ka duh si. Pu Saia leh Remlala te erawh chuan engmah an sawi ve lem lo. Bena te nupa phei chu zantin deuhthaw an la rawn lêng a ni. Fa an nei har a ni bawk a, Miteii hi an duat ve êm a ni. Tin, sawi hmaih loh tur chu pawngsual a tawh aṭanga kar hnihna nilaini-ah Miteii chuan thi a rawn nei ve chiah bawk. A hlauthawng khawp a, a nuin engkim a hrilhfiah a, a zia ta hlauh. Ṭhanthi te a nei ta bawk a tiin Lucy hian a fâla kawm a duh a, thil tihmakmawh a ni bawk nen,. Hun remchang hmasa berah Hmeichhe nihphung, ṭhanthi a neih tak avangin mipa nen an inpâwl chuan rai theih a ni tihte, virgin tawh lo mah se; a duhthlanna tel lova pawl luih a nih avangin Pathian leh midang ngaiha a la thianghlim thu leh, ngaihzawng a neih ve pawn amah chu hrilh zel tur ten a hrilh ta malh malh a. Miteii pawh a bu nghat nghat mai a, a hrethiam ve a niang chu maw. A bialpa te tupawh sex hmanpui miah lo turin kan chah ngun khawp mai. Tin, bialpa nikhua vak lo, a taksa mawina ngawr ngawt duha mutpui tum tlat a tawng ang tih ka hlauh êm avangin fimkhur turin ka hrilh nasa bawk. Mipa sual leh fing kherek tak tawng ta se; 'I virgin tawh chuang lo" tih thu hmanga a vehkual chuan Miteii te ang tleirâwl derthawng leh nghenchhan mamawh ve lutuk hi a hnip ka ring si a..khatiang a thlen loh nana fimkhur kha ṭha ka ti ber a ni. 

Sawmi pawh kha a khawngaihthlak takzet. Ani chu Miteii aia û zawk a nih bakah bialpa leh star hre rual a ni ve tawh si a. A kimkit phahin inah a tawm deuh reng zel. A changin kan inah a rawn leng a, Miteii a ziaawm hnuah phei chuan an riahdun chângte pawh a awm. Tin, Nupuii leh Apuii te an fakawm bawk. An rawn kal reng a, an ṭhiante tan an mamawh huna awm reng an tum ve khawp mai. Chu chuan Miteii te nunah pawh an hloh tawh inrintawkna kha an neih thartir leh a, tin, a sarhu lai a ni bawk nen, khawtlang mimir hrim hrim pawn deusawh rawngkai emaw tiêl ang zawngin an bulah ṭawngkam an cheh ngai lo. Hmalam hun erawh tu hriat va ni suh. 

Pu Chungnunga te in pawh chu Pu Saia te chuan lei felin, Lucy nawrna angin lehkha pawh fel takin a siam a, a thurochhiah pawh a faten an enpui vek. Sawiselna a awm lem lo a niang, Remlala hi nupui a neih hnuah zu a in nasa deuh a, a â deuh bual tawh niin a lang. Tiang a nih chuan Nancy hian chhuahsan hun a la nei maithei a ni. Bena te insuanluh nî chuan Lucy te pawn an va pui ve a, kei erawh hotulian te an rawn kal avangin ka lo dawnsawn an ngai si. Chawhnu lamah an haw a, hna laklawh em em a awm lem lo bawk a tiin Bena te in thar lamah ka chho ve a. An luah tawk reuh dawn khawp mai. Ahruaii te nau tleirawl Mary kha an hruaitel ve zel a, tihian an fanu upa ber ang a ni ve mai. Tekuri hi Miteii hian a duat khawp a, a lian ve tawh si, an inpaw ûr reng zel. An han inremfel a, Nimin lamah a liantham an lo thiar tawh bawk a, an inchingfel hma angreng. Tlai lamah chawhlui kil an ti ve si a, Thakima leh Siama te nen rawng kan bâwl a. Teteii a rawn phei ve bawk. Nancy leh Pi Siami te rawn lang ve miah lo chu mak pawh kan ti hran lo ve, rawn tel lo se boruak a nuam daih zawk. Chaw ei kan peih meuh chuan dar 7 a ri thuak tawh. Naupanghoin an ei hmasa a,. Kima'n Asenchi a rawn phawrh nawlh mai. Zu ka in lohna a rei tawh angreng. Kan inneih zan, lawiṭhat zan khan Beer kan in dun a, chu chu a ni deuh mai. Châkna em em ka neih tawh loh bakah Lucy lah a lo strict ve bawk nen,. Mahse, zanin chu ka in ve leh ta ngawt. An mikhual room tura an pindan tê fel rin renah chuan kan inluhchhawk sek hlawm a, Lucy pawn engmah a sawi bik lo, mitmei râng pawh min hmuh bik lo. Chaw ei lah chu a tui phian a, hetia nupui ka neih hnu hian tlangval laia dulkiar hlauh vanga chaw ei tui châng pawha insûm ru deuh ṭhin kha ka inthlahdah chho a, ka dul la kiar hran lo mah se; ka tlangval lai ai chuan rit tawh tak ka ni. Lucy erawh inneih hma aiin a nalh zawk emaw tih mai tur a ni, a inuluk ngaiin a inuluk reng a, ei leh inah a fimkhur bawk. Miteii te hian hmawmsawm a ei ngai mang lo. Chaw lah a nuin a bituksak a, buh hi bowl khat vel a ei ve ṭâwk ang, chawhmeh lam erawh puarna khawp a ei ṭeuh thung. Modelah siam a tum a niang e. Ka inrawlh peih ve lem lo. Ahruaii chuan, "Kan insingsak fel tak tak hunah picnic ve ang u, kan buai hlawm sia, chhuah thawven kan mamawh ve alawm le" a ti sar sar a. Pari leh Faka te an rawn lut ve mêk. Lawitlangah ba khawnin an va kal a, an rawn thleng chiah a nih hmel. An rawn kil ve nghal a, Faka erawh mitmeiin zu awmna kan hrilh zauh a, a lut nghal zuk. 

"Awiii. Tumah mi hrang in awm lo bawk a, ka lungawi lohna hi sawi ka duh ve tlat tawh. Rina chhungte ṭawngkam ka hre ta zauh zauh a, ka lawm lo viau. Vuivai duh ngai lo, thil palliam chi ka nia, mahse, a ni em em tawh lo. Vawiina kan ba khawnnaah Rina ṭhianpa ve ber Sanga te inah thingpui kan in a, Sanga hi chuan min hrechiang bawk a, min ṭan em emtu kha a ni ve a. 'Parte, Rina nu leh a naute ṭawng duhdan hi ka ngaihdan a ni chiah lo. 'A pasal boral hma aṭanga lo inzui ru tawh an nia, tihian hun remchang hmasa berah a langin an inzui ta a tih te, a pasalin bul a lo ṭan tawh a sumdawnna lah tihian a ta neih a, siki sen pawh ka lo pe ve ang che u tih awm lo..in leh lo nise Rina thawhchhuah hmanga an lei a nia, pasal a nei a nih ngat chuan in saw kan luahtir hauh lovang tihte an sawi nasa sia, engkim hretu ka nih venaah i ngawi rei deuh lo maw ka tia" A hma pawn hetianga ṭawngkam an neih hi ka hre zauh zauh, mênah ka thlak zel kha a nia. Faka nen hetia kan han inzui tak avanga an rawn huangtau leh hi ka paidam thei tawh lo" tiin a âng ve ta bawrh bawrh mai. Par paliani thinrim âng ka hriat vawikhatna a ni hial awm e a. A nulen ang chiaha zaidam, nui huah huah kha a ni a, ani meuh a ân chhuah ve takah chuan a nêp lovang tih a lang reng. 

Lucy chuan,"Nikumah pawh ka hrilh tawh che, thil hi ngaihzam chi leh chi loh a awm ve a, nang chu i palzam mah mah ṭhin" a lo ti ve vat. 

Pari bawk chuan, "Chuvang alawm thla lehah lungphun ka tum tak ni. Chuan in leh lo chungchang hi chu engmah sawi theih an nei lo, ka hminga awm a nia. Tin, kan pa thawhchhuah a ni lo tih chu anmahni paw'n an hrechiang, kan in man tur tuaka Lucy nen kan thawhrim dunzia kha khawmite pawh hian an hre viau ang. Sum pek leh pek loh velte phei kha chu..thla tin deuhthaw ka pe ṭhin..an mamawh zat an rawn sawi tawp a, an thisente hi a sâng a nia. Ka thawhrimzia hre hawt si lo hian" a ti leh tûn tûn a. 

"Hei chu pe tawh suh, i mawhphurhna an ni lo " Zoteii'n a lo ti ve hmak. 

"Tih tak êmah chuan an tunu te hi vawikhatmah kawr chhetê pawh an la leisak lo. Mak hi ka ti ve êm asin, U Rina boral hma pawh khan an ngaihsak chuang lo. An tu a ni ve lo a niang ka ti tawp zel" Pari chuan a ti leh mawlh mawlh a. Kan lo fuih ve luam hlawm. Faka erawh a ngawi reng a, a tan lo sawi ve kha nuam dawn hek lo le. Picnic pawh chu kan rawt zui ta zel a,Miteii te bona hmun Ramri luia zuk picnic chu kan rêlthlu ta nghal mai. Kartawpah bak kan hman hlawm lo bawk a. A nghahhlelhawm tawh angreng. 

Dar 10 velah kan haw ta chauh. Miteii pawh intifaiin a mu nghal. Keini nupa pawh muhil nghal rih lovin Miteii chungchang bawk kan sawi dun leh a, amahah han danglamna em em a awm tawh rih lo va, a hlauhna leh thlabârna ten an kiansak ve ta bawk nen. Mahse, ngaihven reng tur erawh chuan kan inchah mawlh mawlh thung. 

"Nautê kan siam tawh a, i inthlahdah riau mai" ka ti sup a. 

"Ka rawt ang ka ti ve reng, i chauh ka ring a" a lo ti vat. Hei hi a ni Lucy ka duh zualna em em chu. Hmeichhe thenkhat ten zahthlak leh sawi thiang lo anga an ngaih nupa nun hmante hi a rawt ve fô zel. Tin, kan inpawh vang pawh a nia nga, nupa nun, khumlaizâwl nunte hi kan sawidun fô a, kan induhkhawp lohna leh kan beisei tawn te pawh kan inhrilh hreh ngai lo. Chu chuan kan nupa nun a tinghetin a phuarkhawm zual a, in zah ṭît ṭêt awm ta lo chu khumlaizâwl nunah midang beisei thei miah lovin kan inchâwmpuar tawn em em a ni. 

 A tukah a ngaitê bawkin office ka kal leh a, Samua nen kan inbe zuai, Sangsangi nen inneih lam an tintuah chhoh dante a sawi zawk zawk a, hundanga inbe ṭha turin kan titawp ta rih. Nei ve tawh se ka ti, Sangsangi nen hian an inzuina a rei ve tawh a, mahse, vawi 7 vel an inṭhen tawh. An thinrim hian inṭhen an sawi ve ziah zel a, an inṭhen hlen thei tak tak si lo. Bank dawr an awm ve nual a, Veroi pawh a rawn lang leh nawlh. Pawisa a rawn lachhuak a lo nia.."Thingpui ka show sak ang che" a tih tlat avangin ka lo remti ve mai. "Karlehah Aizawlah ka chho leh lawk maithei. Ka nu a zual deuh a, ka han buaipui ve loh chuan" awlsam deuh hian a ti mawlh mawlh. 

"A ni maw? A va zia lo ve, eng nâ nge a?" Ka ti a. An chhungkaw chanchin Pari sawi bak kha ka ngaihven lo bawk nen, ka hre tam lo khawp mai. 

"Cancer mawle..a chuap a cancer alawm. Mahse, a phutawk" a ti riap mai. Mak ka tihna chu ka thup hram hram ringawt. "A va pawi ve aw. Doctor ten tihtheih an nei tawh lo a ni maw?" Ka ti ve zel a. 

"Nei tawh lo, tikhian a rawp ral ringawt ang. Mahse, a thih hma khian piangthar se a lawmawm ang" a ti leh hmiah. Han sawizui vak chi niin ka hre ta lo va, Marovi te chungchang ka sawipui ta daih. A chhuah dawn chuan nui sâng chungin, "In nu a âng leh ngei ang..a thikthu saw a chhe ve sia tiraw? Tihluih hi a nuam ve a. Bakah ka la duh reng bawk che nen"a ti leh ham ham a, min chhuahsan zui nghal. A che maksak thei mang e. Lucy bulah pawh he nu chungchang hi ṭha deuha la sawi a ngai a ni. Boruak a ngam sia, kan nupa kâr a khik phah thei tlat. Ban meuh hi chuan ka zawi ve rawih thei..ṭhu chunga hnathawh pawh hi rilru sên a lo ngai ve tho nen, ka chau ve viau tho zel. Lucy a lo haw tawh a, mak ka ti deuh. 

"Vawiin chu ka khar hma, Miteii ten extra class an kal sia, rawngbawl a ngai si" a lo ti nghal var. 

"An va ṭang ve aw" ka ti mai a. 

"Thil sawipui che ka duh" pindana ka lut tur chu a rawn ti zui a. 

Ka inbual zawhah chokaah chuan ka va phei ve a, Miteii pawh a rawn bang tawh. Hlauthawng ru angreng deuh hian, "Eng nge i sawi duh chu" ka ti a. 

Phur hmel fâ hian, "Ih, vawiin chu thil ka ngaihtuah mai mai a. Chawntlang, Lawitlang leh kan khaw hoin an inhmanṭâwm theih tur park emaw picnic spot emaw hi ka siam châk deuh a. Kan intichangkang ve zel a, ṭhalaite tan han spot-na tur hi a vâng ve lutuk a. Dawr hi chu midang nghahtir ta mai ila te ka tia" a ti ta mial mial a. Lucy buaithlak ve deuhna leh bawk chu tihtur a khêk thei lo leh engkim a hmanhmawh ṭhin hi. Vawiina a ngaihtuah chhuah chu tihhlawhtlin a duh leh nghal rum rum tihna a nih chu..

"A ṭha reng alawm. Mahse, hmanhmawh vut chi pawh a nih loh chu..nau i pai bawk si. Nau han nei zo la, muangmarin kan ngaihtuah dawn nia" ka ti a. Hetia ka tih hi chuan min nawr ngai bik lo, a nghak ve leh mai zel. Mahse, a idea kha keipawn ka lo ngaihtuah ve fô chu a ni. Sumdawnna ṭha tak a nih piahlamah bulṭantu nih hi ṭha ka tia. Thil tam tak erawh ngaihtuah a ngai ang chu..

Zanriah ei laiin, "Sir thar kan nei a,.Ih U Sawmi te chhung an nia, U Sawmi'n maths a thiam lutuk tuition kal dil rawh a tia.." Miteii chuan a ti siam siam a. Nia, zirtirtu rawn awm thar tur kha an sawi tak alawm. Miteii hi subject dang thiam viau mah se; Mathematics-ah hian a hniam deuh a, kei hian ka enpui zauh zauh. Lucy pawh hi a tui lohna lam a lo ni tehchêk em mawni.."Mathematics hmuchhuaktu hi lo thihchilh daih se kan ti thei lutuk" a ti mai mai zel. Kei ka ziana lam a ni hlauh zawk a, mahse, chauh ve tawh lamah chuan inzirtir reng hi a peihawm loh ve ṭhin. 

"Sawmi te inah a awm dawn em ni?" Ka ti a. 

"Aw awm rih dawn. Tuition kha chu ka kal peih vak chuang lo. Ka pass tho ang" a ti liam puat. Lucy chuan, "A laklawh rih sia, nakkum lamah duh leh i kal dawn nia" a lo ti a. 

Kan chaw eikham eina an sengfel lai chuan Miteii phone a rawn ri ral ral a. "Pa , lo la lawk mai" a rawn tih avangin ka la a, number ringawt a ni. "Hello" ka tih chuan mipa aw puitling tawh tih hriat tak mai hian, "Miteii ka lo bia" a rawn ti a. 

"Hei a buai lawk a, nakinah rawn call leh mai ta che" ka ti ve mai a, "Aw le" tiin a dah a. Thleng a sil zawh hnu tv kan la en hma siin a rawn call leh, Miteii chuan lain, "Hello" a ti tliang ral a. Lehlam ṭawng ka hre thei lo. Miteii hmel nur nâng leh, "Tu nge i nih a? I va zak lo ve. Bialpa ka nei duh lo" a ti ram hmak chuan ka awm a tinuam lo. Phone chu a dah tau hmak a. Thinrim hmel deuh hian, "Ka bialnu tur i nih kha..virgin tawh lo mah la ka iai lo che " min rawn ti ringawt mawle.." a ti khur dar dar a..