MITEII NU. 1

MITEII NU.. (1)

Ziaktu : Toni Râlte

"Lucifer, ka lawm e. Ka hmangaih che" tiin a pum chu ka fawp zauh a, nui sâng chung hian, "Ka lawm daih zawk. Keipawn ka hmangaih che" a ti sep. Nghet zetin kan inkuah ta vawng vawng a. Room kawngka chu rawn kikin, Miteii aw hian, "Pa, Apa.." a rawn ti lang lâng. Ka tho vut a, "Aw lo lut rawh" ka ti lûng lûng a. Kawngka chu rawn inhawngin ka fanu Miteii chu a rawn pen lut ta zân zân a. 

"Min hrilh duh in nei em?" A tih chuan a nu nen kan inmelh ralh ralh, "Mawh" pangchang zetin a ti leh a. Lucy chuan, "Lo kal hnai teh" a lo ti a. Miteii kut chu lain an nufa chuan an inmelh vawng vawng a. "Nau i nei ve tawh dawn a" a nu chuan a ti a. Miteii mitmeng chu a danglam nghal vek, hlimna leh phurna hlir hian a khat a ni ber. A hmui hupin a rawn dakchhuak leh a, "Maw! Tak tak em? Ka va'n lawm..awiii, nau ka nei tawh dawn" tiin a zuang zak zak a. Kan pathum chuan kan inkuah khawm a, kan nui ri chu rimawi ngaihnawm ber a va nih mai hmel êm…

Ni e, Lucy nen kan inneihna pawh kum 1 a tling ve ta reng mai a. Kan inneih tirh phat aṭang khan kei chuan zêp nâk emaw fa ka awt ru nghal viau. In ni ve vek thoin ka ring. Mahse, kan pai thei lawk ta si lo va, Lucy pawh hian hrehawm a tihphah ṭhinin ka hria, Miteii lahin nau a awt ve em em bawk nen, tunah hei thla 1 mi nau a pai ve ta chu a nia. Lawm lo chi pawh kan ni lo. Ka chhungte kan hrilh ve nghal a, ka nu lawm nui ri chu hriat a nuam ngei mai. "Aizawlah rawn nei ngei ngei rawh se" a rawn ti chûl nghe nghe. Keini pawn hei chu kan tum sa kha a ni ve rêng reng a. 

Lucy chuan, "Ka pate hi ka'n hrilh ve ang e" a ti sap a. 

Ka lo bu nghut. A pa chu a call ta a. Ka pu nen kum chanve dâwn kan inbe ta lo tih pawh ka hrechhuak chawpchilh nghal. Bena te nupa leh an fanu Tekuri te nen erawh kan intlawhpawh reng tho va, Remlala te chhungkua nen erawh kum khat dâwn chu kan inhnimhnai ta lo. A chang chuan Lucy ka zah avang hian siamṭhat ka duh fô, mahse, amah Lucy zawk hi a luhlul zawkah a ṭang ṭhin a, "Kan tihchhiat pawh ni hlei lo siamṭhat hi kan bat a ni lo ve" a ti bur mai si. Ka puzawn avang chauh pawha chhungkua kan inpum leh theih hi ka duhthusam a ni, ka nu leh pate pawn chulam hawi chuan min rawn fuih fô. Kan nupaah bawk buaina a awm lehzel si a..Lucy leh ka puzawn tak hi chu an la inbiak zeuh zeuh vang chauh a nia hetia a naupai thu pawh a hrilh tak ni. Hre ve hrim hrim se a ṭha ber mai. 

Ni e, kan paltlang thil tam tak kha mi thenkhat tan chuan a holam viau maithei. Mahse, mahni chunga a tlak loh hi chuan thil reng reng hi a ropui viau ngai lo. Keini nupa pawh hian harsatna kan lo hmachhawn dun ve tawh a, kan hriatreng tur pawh an la ni ngei ang. 

Khatia Remlala leh Nancy te innei lo thei lo dinhmuna an din tak siah kha chuan Lucy min ngenna angin keipawn a kum leh nghah kha ka pawiti hran lo va, dawhtheih erawh harsa tih châng ka nei ve tho. Nancy khan zir viau chu nise hetia kan inṭhê ṭhu hi a ngai lo ni mai tur a nia. An inneih hma hauh aṭang tawha Nancy'n Lucy a huphurhna leh Mampuia a mil lohna chu an inneih hnuah pawh a chhawmlut ta zel si. Lucy lah mahnia inenkawl thei, chhungkua lo khaidinga mawhphurhna tam tak lo la tawh a ni si a, Nancy chungtlak tumna chu a tei thei ṭhak bik si lo. Thla khat âwrh an inneih hnuah Nancy chuan indan a han rawt ta pang a! Mi zawng zawngin mak an tiin ka hria. Mahse, Pu Saia chuan a remti bik lo. Nancy lahin, "Chenho dul dul ka peih lo, kan awm dawn a nih chuan Bena te tal hi in dang rawh se" tiin a han rawt leh ta hmiah mai a! Pu Saia lah chuan eng chu a hria ni maw..Nancy thu chu a zawm duan duan tlat! Bena te nupa chu Lucy dawr thar piah lawk, Pu Saia farnute in hnuaiah an indang ve ta rawih a. Lucy nî Pi Dini te an felin an inhrethiam tawn êm a, nuam an ti ta viau nghe nghe. Bena khan loan pukin Ahruaii chuan Pêm vêng tawntirhah dawrtê a siam ve a, Bena schoolah a la thawk bawk. Tiang chuan an khawsa ve naw naw a, kumin kumtirah khan an fa hmasa ber Tekuri tia kan koh mai chu a lo piang ta bawk. Remlala te pawn fanu tho an nei a, a nuin sap hming a ngaisang bawk a, 'Deborah Vanlalchhuangi' tih an sa tain ka hria. Ka'n sawi thui zel ang a. Remlala te nupa bakah Lucy te pafa an la khawsa ho ve zel a. Mampuia pawh Lucy zarah a la nuamsa ve zel bawk. Nancy hi chuan a be ngai lo tihtheih a ni, Mampuia pawn a ngaina lem lo viau. Pu Saia'n Nancy a lo duat leh a thu a lo awih viau chhan a lang chho ta a. Engdang a ni lo, Nancy te chhungkhat hnai tak Chawntlang ami nu chhûr pui tawh, a fate pawh nupui pasal nei vek tawh leh Pu Saia te chu an lo inhnimhnai ve a lo nia! Chu nu chu Pi Siami an ti mai a, a hmingpum pawh ka hre lo. Lucy mitmei a ven vang chauhin a pa chuan a la nei rih lo mai chauh a ni. Lucy'n a pate chungchang a hriat veleh Pi Siami chanchin chu hriatchian a tum ta nghal a. Pi Siami chuan fa pathum neiin an pa zungawlvei vangin an inṭhen a lo nia. An fa tê ber chauh amah Pi Siami chuan a enkawl a niawm e. A nuṭa te bêlin reitawk fang a awm hnuah in chhete an khawrsakah a fapa nen an insuanlut ve a. A rem rem a thawk ve a niawm e. Nu sual tak tia sawi ni lo mah se; ṭhianṭha a nei lo va, nu lênglâm tam tak, a sum hmuhna tur a nih dawn chuan tlawm leh zah pawh sawi thei lo va che duh mi a ni an tia, a fapain nupui a han nei a, a mo nen an inngeih lo chho ta si. A dinhmun a hrehawm chho ta a, Nancy te lamin tum nei rânin nge maw ni dawn ni, Lucy pa nen an inhnimhnaihtir ta a. Pu Saia lah khawhar ve tak, kawppui mamawh ru ve em em a lo ni si. Chutiang luklak kual vel avang chuan Nancy leh Pu Saia te chu an lo inzûrâ viau a nih hmel. Lucy rilru pawh a buai ta viau mai. Lehlamah a pa chu a khawngaih ve tho si, lehlamah Nancy leh a pa bialnu inmil lutuk chuan chhungkuaah thil ṭha lo a thlen a hlau ve bawk si, ka bulah rêng pawh a sawi zing. Kei lahin tihtheih ka nei tam si lo. Pu Saia mahni thuduh leh luhlul ve tak lah chuan kum chanve a liam awrh tihin pi Siami chu a hruai ta hmiah mai a! Lucy te pawh an inring hman lo. Chhungkua han inrâwn awm miah lova chutia a rûk a râl ang ziazanga an han khawsa chu Bena leh Lucy te ngaihdan a ni ta lo kher mai a, mahse, Pi Siami a rawn lawilut tawh si, tilang vak duh lovin an lungawi lohna chu nawpral an tum chho a. Pi Siami pawh a fel sur sur viau. Lucy hi chu inah a awm tam lo bawk a, huphurh viau mah se, hrawn hrehawm tur niin ka hre lo. Nilêngin dawr a nghak a, khaw thim dâwnah a haw a, zanah in chhungkhur a tihtheih ang ang tifelin a dawr aṭanga a sum hmuh lah chhungkaw tan a hmang tam zawk bawk. Hun a kal zel a, kum tawp pawh kan hnaih chho tan a. Lucy te chhungkua pawn buaina an hmachhawn ṭan leh ta..

Ka bulah a sawi duh ngai lo va, a tawpkhawkah a sawi ve chauh. Hetia a dawr nghak a hawng hi a chang chuan rawngbawl loh, in hnawk leh bal taka a lo awm thin thu leh Miteii leh Mampuia thingpui lumsaktu an awm ngai loh thute a ni. Chutiang a nih vang chu nimaw Miteii te unau chu an school bang a nu dawrah an awm khawtlai ta ziah a. Inah chuan lehkha zir chu sawi loh, an tir nasa mah mah thin a niawm e. Lucy lahin kehthei dawma a dawm te kha an lo ni ve bawk si. Nikhat chu Lucy bungrua a rawn thleng a, a haw tlai ta deuh. In a han thleng chu chaw takngial pawh chhum a la ni lo va, Nancy te in lamah chaw an lo ei phei vek a lo nia! Miteii te lah an ril a ṭâm tawh si..Lucy chu a ang chhuak ta nge nge a. Mahse, an la innghirngho lutuk lo. Kar khat a liam a, Mampuia'n an inkhelhna lamah a bân a bawhpelh ve hlauh mai a! School pawh a chawl ta rih. A school chawlh ni 2-naah chuan Lucy te ṭhenawmnu Lucy nena innêl tak Pi Kaii hian a rawn call a, "A pi leh a nu Nancy ten an vaw nasa lutuk a, lo chho vat teh" tiin. Lucy chu a ranga rangin a chho ta a. Chutah chuan an buaina chu a punlun chho ta a niawm e. Mampuia bân rawn na leh deuh khan nachhawkna a lam a, Pu Saia'n a eitir hnuah a mu a. Nancy nuin an huan anṭam rawn la ve tura Nancy a rawn bia chu Nancy chuan Mampuia chu zuk la turin a tir a niawm e. Ani a bân la na bawk si leh mutchhuak si khan, "Tlaiah ka kal mai ang. Ka bân a la na e" a lo ti ve a. Chu chu naupang tihmawh tiin Pi Siami leh Nancy te chuan an hau ta hrep a, Pu Saia hi chuan a tu hmuh hmasak ber a lo nihnaah a lo ṭan ve a, a thlavâng a lo hauh ve chu huatpuiin, "Naupang thuawih lo enkawl dan kan hrilh ang che" tiin kut hial an lo thlak a nih awm chu. Remchang an zawng rân te pawh a nih a rinawm. Kan Luciferi lah a puakkeh ve tawh si nen, Nancy chu a kêk hrep a, chhuatah a hnuk kual a niawm e. Pi Siami'n lo dan ve a tum pawh chu a nuhrawn mah nise, a nam lêng lawp a, dawhkanah a va intauh nghe nghe. Remlala rawn hawin eng sawi set set lovin a farnu chu a'n beng nghal ṭhuai pek a! An buai ta luai luai a ni ber e. An ṭawngkam tam tak chu palliam mai chi pawh a awm ang. 

Lucy thinlung tina tu ber erawh, "I sum thawhchhuakte hi i lo chapopui ang e. Engmah a ni lo. He in chhungah hian in nufa aia hnawk an awm lo, awm lo daih ula kan hlim zawk ang" Remlala'n a tih chu a ni. Chu zet chuan a mittui pawh a luantir ve a ni. Tichuan, min rawn biain Pari ina a awm thu leh hruai turin..îhê lovin ka zu hruai ta hmiah a. Miteii pawh kan hruai tel ve, Mampuia pawh hruaitel kan duh a, mahse, Remlala'n, "Ani chu ka fapa a ni. Ka enkawl thei, a mamawh lo che" a tih hmak avangin, "A fapa ka hmangaih loh vang ni lovin a fapa tana ka hlutzia lantir a ngai a nih hi" tiin rilrua Mampuia vei ru rân chungin kan kalsan a. Aizawlah zan 3 ka han tlanpui ve ngei a. Palai kan tir a, Ni Dari te, Nî Dini te leh Pu Saia nau Pa Nghaka te zarah kan inrem thei ta a. Man leh mual kan inhlan chûk chûk a, ka inah pastorin mi tlemtê hmaah min inkutsuihtir ta ngawt mai a ni. Ka chhungte an zahawm hle naa kan dinhmun an hriat vek avangin Lucy chu an lainat zual a, min hrethiam khawp mai. A lawm pawh ka lawm. Tichuan, Lucy chu ka nupui a lo ni ta a ni.  

Ka in luah chu kan luah tâwk reuh viau. Mahse, Lucy ka neih vang ni maw Pu Zuala te chuan sawi neuh neuh an lo nei ṭhin aniang, Lucy chuan nuam a ti ta chiah lo va. Pu Zuala te hnawhchhuah theih ka ni lo nain bank-a thawk mikhual dang an awm ve leh takah chuan Lucy rawt angin bank bul lawka an sak thar, te fel rên râwn chu a neitupa ten sum lamah harsatna an tawh avangin hralh an phal a, kan lei ta hmiah mai. Ka pawisa aiin Lucy pawisa kan hmang tam zawk. Tichuan, keimahni in ngeiah kan khawsa ve ta a. Office kalna a hnai si, nuam tawh tak a ni. Zoteii te nen pawh Lucy vang khan kan han inhlat deuh naa, Mateii'n Aizawl khua ngei pasal a neih tak vang nge ni kan inhnaih leh hle tawh a. Kan lo inhnaih ta bawk nen, kan inbantawn viau. Anni pawn fa an nei ve tawh. Tin, Nu Mawii te kha kan la in tichhungkhat zel a,. Jeneti leh Zothana te pawh Lucy nen kan inneih hnu thla 4naah Aizawlah an innei ve ta nghe nghe a, ka va lawmpui ber tak. Zothana chuan nu Mawii leh Nupuii te pawh Aizawl lama hruai vek pawi a ti lo. Mahse, "Kan pa lu nghahna a ni si a, bakah a tul tawpkhawkah lo chuan makpa te belh chawt chu a nuam lo" Nu Mawii'n a tih ve tlat avangin Nupuii nen an khawsa ve rak rak a, Zothana ten a sumpai ang zawngin an rawn pui reng bawk nen, an khawsak a ziaawm ve tawh hle. Sawmtea leh Marovi te pawh an lo puklâwk ve ngei a, an innei tawh. Marovi a fel khawp mai. Veroi erawh kha chu Marovi pasal neih hnu lawkah Chawntlangah pasal a va nei ve a, kum chanve pawh an inneih hmain an inṭhen zui leh ta mai. Aizawlah a haw nge ka ngaihven lo bawk a, ka hmu ngai tawh lo. Pari mawlh hi a chanchin sawi a nuam ṭhin. Faka nen khan an inkawp ka tih hian in awih lo hial ngei ang, mahse, a dik tlat si. Remlala te fa neih hnu lawk aṭanga inkawp chho ve an ni a, kan lawmpui em em. Amah pawh a nun a hlimin hmuh a hahdam em em a, Faka lah kha chen rilru nâ tawh han dam leh a ni bawk a, pa ṭawngmawh tak kha a titipui theih ta viau. Inneih erawh Pari pasak boral ta lungphun zawh lam an tintuah ve a, Faka hi a luh zawk mai a rinawm. A û te chhungkua nena khawsa kha an nia, an ni an chhungrual ve bawk si, an pafa tan chuan inthlahrunte pawh a na ve thei a, Pari lahin rawn lut se a duh em em zawk si. Engkimah inhriatthiamna leh inremna hi a awm chuan dân leh dûn kalpel pawh ni ila nun leh chenho a nuam mai e. Mizote hi chu dan leh hrai kan intingaipawimawh thin leh lutuk a, "Mipa zawk hmeichhe ina luh te chu.." tih angreng, "Thaibawih em mai" han ti duh maite kan awm châwk. Dinhmun a zir zel hi a ni ngai a, kei ka khirh lohna lam tak a ni ve. In hrang la chang tur tho tho, chenho dul dul te hian inlaichinna a tinghing thei zawk fo! Nupa intihthiam loh vang pawh ni lem lo va, chhungte vanga han kal hrang ta mai hi an awm nual, miin chhungkua a dina nupui fanau a nei tawh a nih chuan mawhphurhna pek ngama a chhungkaw tana inpektir tawp mai hi a fuh. Mo tha chhawr tih luklak, fate rintawk loh vanga an indan phal loh tlatte hi puitlin lohna kawng sialtu a ni..harh chhoh ve zel hi a ṭha e. 

Lucy nen kan inneih hnu thla 2na velah Mampuia hi a rawn tlan tau hlawl mai a. "Ka haw duh tawh lo. "A ti bur mai si, rawlthar an ni chho ve tawh a, an rilru len lai a ni bawk nen, Lucy nen Mampuia an enkawl dan kan lo hre ve nel nual bawk si. Hawntir kan tum ta bik lo va. Diktak chuan Remlala hi ka nupui unaupa mah nise, nêp ka tiin ka haw lek lek zel. A fapa ngei pawh a nupui lakah a chhanhim zo lo a nia! Nancy uitê a ni ringawt mai a ni. Mampuia chu an inah a lal lo nasa si a, a pihrawn leh a nuhrawn te kamchhe tleuhna a nih piahlamah tirhkah a ni ber a. A eitur siamsaktu awm ta lo chu amah vekin thiam leh thiam loin a insiam a, eirawngbawl tura rin changte an nei hial zel! An mak ka ti em em lutuk. Pu Saia te nupa lah an nute khaw lamah an zin zut reng a,. Remlala lah office a ngai reng bawk si, a in nghak ber Nancy lah a thatchhe lawtlak a, nau a lo pawm ve lehzel bawk si. An in chhung pawh a tlachhe sawt hle. A bal thei si. Pu Saia chuan an inkawtah an nu tan eichawp dawr a siamsak ve a, chupawh chu an nghak ṭha hleithei lo. Pi Siami nuamleng lutuk chu Bena te nupa hian an ngei zual..Tichuan, Mampuia chu an rawn koh pawn kan phal ta lo va. Kumin kumtirah Aizawlah school kan kaltir ta daih a, aman a lo duh zawk bawk bakah Parteii'n a duat khawp a, jojo lahin a ngaina si. Ka nute in atangin school a kal a ni. Nuam a ti lutuk hi chawlh pawn a rawn haw duh ngai lo, a lawmawm lamah ngai zel mai teh ang. Remlala nen kan inbiak hleitheih lohna chhan bul pawh Mampuia hi a ni ve pakhat a,. Lucy leh Miteii te'n an ngaih em vangin ka Aizawl zin ṭumin chawlhni hmang turin ka hruai thla a. Zanriah kan ei laiin Remlala a rawn lut hlawl mai. Mak kan ti viau. Engdang sawi set set lovin, "Mampui, Aizawlah i chho tawh lovang. Kan bulah i awm ang, i nu a hah si, i nau pawh i lo awm ve thei tawh ang a, bakah mi hrang ina i seilen ka remti lo" a ti nghal pûng pûng a. Lucy nen kan inmelh zawk. 

Fimkhur takin, "Ngawi teh, chutiang ngawt chu a dik lovang. A zirna a laklawh vek dawn asin. Kumin chu zir zo law law se la mawle" ka lo ti ve a. 

Ner nâwng chungin, "I thu lo ve chiang ê..kan chhungkaw thilah chuan i lo inrawlh a ṭul lem lo ang" a ti ta mai a. Lucy a ding ta phat a, "Naupang awm ve lai renga hetianga in rawn tih ziah vei le..chhuak phawt teh, nakinah ka rawn chho ang" tiin a û chu a namchhuak a. Kawngka a kalh nghal rawk rawk bawk. Kei chu ka ngawi hmak, ka rilru a nâ. Ni e, ka zak, ka tlawm bawk si. Ka nupui nuṭa chuan min lo va ngainep awm em em ve tih chiah ka ngaihtuah. Mampuia enkawl hi kan bat pawh a ni bik lo, hetiang khawp hian kan duat vein ka nute pawn an tu ang tak takin an ngai a. Kan ṭhatna hre duh miah lo te laka ṭhat chhuah reng hi kan bat niin ka hre hlawl lo. Mahse, Mampuia chuan, "Apa, i rilru tina suh. Apa Remlala te bula ka awm dawn ai chuan home-a awm pawh ka duh zawk. " A ti ta reuh a, rilru a khawih bakah a tina. Chu chuan ka thinrim zualpui chu a thawidam ta deuh a, Lucy'n theihtawp chhuahin min hnem bawk, ka lakah a inthlahrung tih ka hrereng, amah vang chauhin ka nêm ka ti mai. Chumi zan chuan Lucy chu a han kal ta ngei a, Mampuia chungchangah reifê an inhnial hnuah Lucy chuan hnehna a chang ta zawk ti mai ang. An sawizui ngam ta lo va. Tihah chuan Nancy tan a lo hnawk tho va, Remlala rui phur, mi thenkhatin, "I makpa chhungten an enkawl daih hi a tlawmthlak" tia an lo fuihpawrh vang vek a nia khatia a rawn tih ngawt ni. Mahse, a ṭawngkam te avang khan kei chuan ka be hmasa thei ta lo va, tihian kan inmikhual kalpelh ngâwk ngâwk tawp zel mai a ni. An in lam kan tlawh lohna pawh a rei tawh angreng. Bena te nupa nen kan inhnimhnai hle thung. Chutiang boruak chu kan chhungkaw thiltawn chu a nia. Hetiang a nih mêk laia ka nupuiin nau a han pai hi kan lawm em em a ni. A chhungte lam nen pawh boruak a ṭhat phah maithei asin. 

"Ka pa chuan, 'Chawlhniah chaw lo ei u la, Bena te chhungkua nen' a tia. Ka hrethiam lo" kan nu chuan a ti niah niah a. 

"A ṭha reng alawm" ka ti ringawt. Min rawn melh a, "I kal ve ang em?" A ti sap. A û leh a pate nen kan inpawh lohzia a hrechiang ve êm a ni. 

"Ka hre lo" ka ti hmuk. Rilru a la hel ve lo thei lo a ni. Kan sawi zawm rih ta lo. Ka sawi loh theih loh tur chu Miteii hian min ngaina em em a, fahrawn anga en theihin a khawsa lo hulhual,. Mamawh nei se 'Pa' a ti vek a, nâ a neih emaw a damloh emawin, "Pa, min mutpui rawh" tih a ni vek bawk. A nu zilhna aiin ka zilhna a la nâ a, a hmingpuma vawikhat ka koh ṭum chuan a ṭap zawih zawih thei, ka ko leh tawh lo chiang hle. Chutiang a nih avang chuan keipawn ka duatin ka hmangaih lo thei lo. A nu a chhunin a tleirawl tituai ve ṭan tawh lehnghal a, ven a la ngai viau ang em tihte ka ngaihtuah fo mai. Lucy hian a tetlai khan a lo enkawl ṭha êm mai a, ka tan chuan a hautak tawh lo zawk, mahse, a step dad ka nih ang pawhin ṭha taka enkawl zui zel erawh ka tum ve khawp mai..

Zanriah kan ei lai chuan Lucy phone a rawn ri a, min melh zawkin, "Ka pa a nih hi" a ti sap. Ka ngaihven lo lui. A pa chu a be zui ta mawlh mawlh a, "Pa, a û in hrilh tawh em?" Miteii chuan a ti a. 

"I pite khan an hrilh mai lo'ng maw?" Ka lo ti dam thluam. 

"Ni dawn tak, a lawm ve ngawt ang" tiin a nui sen sen a, a hmel hi chu a la ṭha dawn khawp e. Tunah pawh tlangval hawklak hoin an fiamthuin an hisâp ru fô tih ka hre tlat. 

Kan nu phone be zo chuan, "Ka pa chuan zanriah eikhamah lo chho lawk r'u a tia..eng emaw pawimawh deuh a awm a niang" a ti a. 

"I zawt lo em ni?" Ka lo ti sup. 

"Zawt a, a sawi chiang duh lo,. In hmun lei chungchâng vel lam chu a ni" a ti a. 

Lucy nen kan inneih hnu lawkah pêm veng lama an ram an hralh a, Bena te nupa mi in luaha an khawsak laia chutia a ram a hralh chu khawtlang dem a hlawh hle nghe nghe, a inthiam lo hian in hmun dapsak leh a tum a ni maithei a ni. Chaw kan ei kham a, Lucy hian Miteii hi a chhawr hmain a hrual thiam khawp a, a bu ang thlapin a che thiam vek tawh. Eirawngbawl pawh sa siam tih loh chu a thiam vek, bai phei chu a nu aiin a siam tui zawk mah awm e. Mahse, bawlhhlo a heh ṭhin hle. Tin, in chhungkhur chetah pawh a nu hian engvak a khawih tawh lo tihtheih a ni. Zing dar 5:30-ah Miteii hi a tho nalh a, dar 6 thleng a workout a. Dar 6-7-ah lehkha zir lehin dar 7 -8 ah in chhung a tifai leh vek a. A inbual a, tukṭhuan eiin school kal turin a chhuak ṭhin. Tlaiah nise a nu dawrah a awm avangin leh kei lah ka la hawn ngai loh avangin eirawng a lo bawl fel diam zel a. Zanah dar 9 thleng lehkha a zir a, a mut hnu darkar khat chhung phone khawih kan phalsak ve a. A mut hun tawhah chuan a phone hi a nu kutah a submit thlap zel. Tin, amah Lucy hian, "Khawvela thil thleng kan hriat theih ang ang hi chu hriat ve vek tur" tiin chanchinthar puan chhung chuan ngawi rengin kan thlir ho ṭhap zel, Vanglaini chanchinbu kan la bawk nen, Miteii hian a vai takmeuh meuhin a chhiarchhuak vek zel. Kei tak hi chuan article leh sports column bak ka bih ngai mang lo. Kan fanu hi a naupan ang aiin a bright viau reng bawk. A nu hi a taima bawk êm a ni. 

Chanchinthar kan en zawh chuan, "Engtin nge niang, kan han chho lawk mai dawn mi?" Tiin min râwn a. Chhungkaw thuhla a nih chuan a pawimawh hmel ve bawk nen, ka hnial duh ta bik lo va. Miteii lehkhazir laiin kan chhuahsan ta a. 

Kawnga kan kal dun tawh hi chuan ka kai deuh hlân zel a, kei insi lova awm hi ka thiam lo a niang. Midang tan chuan a over e tihtheih tur pawh kan ni ngei ang, mahse, nun hi a rei lo êm mai a, a hunlai chuan theihtawpa kan inhmangaihna lantir tluk hi a awm lo ka ti. Mi bulah mawi lo khawpin kan inzial reng lo bawk a,. Hetia inkaih dun mai mai te, mi mitmei vêng lem lova a biang han piai zauh te hi ka hrat. Ani pawn min khak ngai lem lo. Nupa ṭhenkhat an lo innei hi an tisual a niang a tihtheih mai tura inhlat em em reng, inbe tam bawk si lo, mi bula kaldun pawh zak deuh tlat ang te hi kan va hlêp nasa si êm. A inchhirawm loh nasa bawk si. Leiah pawh nuamsa ila, vanah nuamsa bawk ila tih hi ka duhthusam a ni.

Kan han thlen chhoh chuan Bena te nupa pawh an lo ṭhu ran tawh. Bena te hian nautê an nei ve bawk nen, Ahruaii nî tunu, a nuin pasal a neihsan leh tak an awmpui a, nau lakchhawktu an nei bawk a, an zangkhaiphah viau. An hmel a thutak hlawm êm avang chuan nuam lo ka ti nghal. Mahse, ngawi reng chuan ka ṭhu ve mai a. Pu Saia chu ka melh run run ringawt. Ka lo en chîk ngai lo va, ka hmu tar hle mai. Nia, a kum a lo tam ve zel bawk nen,. Pi Siami lah hnathawk ngai lo tih takah a thau mum tûl a, a la vanglai hle hian a lang. Kuhva ṭhial sawk sawk pahin mei a zu hlat hlat a, a kutzungṭang pathumah zungbun a tlar ṭhât a, ṭhi hrawl angreng tak gold rawng a awrh vei hnûp bawk nen, ân deuh a nei. Nancy pawh an fa pahnihna tur a pai leh mêk tawh a, rai a haw vak lo nge a thau vei hmân a, duhdah zet hian a lo ṭhu niaih. Remlala erawh a ṭhu mitak viau. 

Kan ngawih vang vang hnuah, Pu Saia chuan, "Hei , ka kohkhawm chhan che u chu, Pu Chungnunga te khi pêm an tum a niawm a. An inhmun khi tihral a duh a, min rawn zawrh hmasa ber bawk nen, khitiang in ding sa, a hmunhma ṭha leh rem bawk si khi chu hmuh zen zen theih a ni lo va. Engtin nge kan han tih ang ka ti deuh mawle,. Bentea te nupa hian an pualin in leh lo an la nei lo va, Mama te hi chuan tuna kan in leh lo hi an enkawl zui mai turah ka ngai a. Engtia ro han rêl chi nge mawni dawn ni?" A ti dap dap a. 

Makpa tan chuan lo sawi ve tur awmin ka hre lo. Remlala chuan, "Nia, a ṭha ka ti viau mai. An in lah khi a ṭha sa bawk nen. In tih dan dan a ni mai" a lo ti a. 

Bena chuan, "Engzat nge an chhiar reng reng?"a ti a. 

Ka pu chuan, "Nuai 15 kha a chhiar ve a, a ram saw a hmunhma ṭha viau mah se; a zau hran lo va. A la nêp theih ka ring deuh, pêm buh bela inbel tur ang kan nia, anni lam pawh an tawlh hrehin ka ring lo" a lo ti a. 

Kan nu chuan, "Keipawh Mama sawi ang khan lei theih chuan ṭha ka ti e. "A lo ti var. Bena te nupa tan liau liau a nih chuan ṭha ka lo ti ve khawp mai, mahse, nakinah ka pu boral hunah te hian ziaka dahfel a nih loh vaih chuan Pi Siami leh Nancy te hian sual an chhuah leh a hlauhawm dawnin ka hria, tuna chutiang thu han sawi chi a ni si lo. 

Bena pawh chuan, "Nia, mahni in leh lo ngeia han khawsak tluk a awm lo va,. Kan lei theih chuan a lawmawm ngawt ang" a ti a. Ahruaii nen kan ngawi kar chu ka nuih a za deuh, kan thu loh hmel ve chiang alawm..

Nancy chuan, "Ka pa, Bena te chu lo leisak ta pawh ni la, zan khat mit chhinte tawk ta la, ka nu hi engtia awmtir nge i tum reng reng. Kut cha bênga chhuak thei a ni ve tlat a nia" a lo ti ta khak khak mai. Lucy ṭawng tum chu ka kheuh vat. A ngawi leh ta a. 

Ka pu chuan a aw thian kharh kharhin, "Ani te chu hmanni lawkah ka tihfelsak tawh kha mawle. Ka kumte a lo tam tawh a tiin engpawh tawk thei kan nia, engkim fel taka dah thlap hi ka duhdan a ni.."a lo ti ve nghut nghut a. Tlem chuan ngaih a ngam ta deuh. 

Pi Siami chuan, "Keimah chu ngaihtuah vak ka ngai lo. Chu ai chuan Bena te in tur chu kan pawisain em ni kan lei dawn? Neih kan nei tawh mang hleinem. " A lo ti ta daih a. An sawi har ka lo ti deuh rêng a ni. Hetia min kokhawm rup lo hian a duh phawt chuan ka pute ang mi tumtlang chuan ama thu pawn a lei hmiah thei tih ka hai lo, hetia keini bakah Bena te thlenga a ko tel ve hian chhan a neih ngei ka ring sa rêng a ni. 

"Nia, i nu sawi ang khan, sum leh paiah harsatna tlem a awm a. Chuvang a nia in unau ho ka kohkhawm che u ni..Lucy leh Mama te pawn in nau a nihna laiah a tan in inhuam ve ka beisei a, Nunpuia pawh mi rilru tluang i ni a, ngaih loh lamah min ngaihsak loh ka beisei bawk, engtin nge kan han ṭan tlân ang le?" A ti ta a. A inthlahrun hmel ve lutuk chu ka nuih a lo za deuh. Lucy chuan, "Chungte chu phone-ah khan lo sawi sa diam tur a nia, nupa te pawh kan lo inrâwn ve ang a. I sawi ṭha duh lo êm alawm" a lo ti ta chat a. Ka mitmei a ven vang tih ka hria. Nuam lo an tih ka hlauh avangin, "Aa..kei kha chu min vengthâwng vak suh u. Chapo thuhla ni lose, ka hlawh ringawt pawh hi kan la kham tâwk viau a nia, Lucy hian ama puala a neih vete a hman phal a thu a ni mai. A daih lohna ang ang pawh keipawn insên ka hreh lo a nia" ka lo ti ta vat a. Ka pate ka râwn hmasa lo erawh chuan min tiawm nuam lo deuh. 

An sawi ho ta tliar tliar a, Pi Siami leh Nancy te lo ṭawng ve sek hi ka ning. Pu Chungnunga pawh an han be nghal chûk chûk a, ani pawh an pem dawn vanga hralh duh em em kha a ni bawk nen,. Nuai 13-ah a tla thla thei ta hram a. Nuai 13 chu ṭhen sawm lehin Bena te in tur chu leisak an tum tlâng ta poh chu a nia. Fimkhur thuhlaah zahtheih loh chhuahin, "Ka pu, ngaih loh lamah lo ngai lo ula, Bena te in kan lei rual hian a lsc nen fel takin ziakin dah thlap theih nise a lawmawm ngawt ang. Sawibuai theih tawh lohin" ka ti ta a. Nancy lo ner sak chu ka va hmu kher..ka sawi sual lo tih ka chiang nghal. Bena pawh chuan, "Keipawh ka ngaihdan chiah. " A lo ti ve vat a. 

Pi Siami'n, "In han tihdan vel chu i pa pawh chu damreitir in va tum loh hmel ve mawle, chutianga thil hmanhmawhthlak pawh a nih loh chu, tihian kan sawiho tawh a,.a chiang tawk tho alawm le" huatthua lak hleihtheih si loh hian a lo ti a. Lucy'n, "Ni lo ve, tunlaiah fimkhur a ṭha. Ziakin fel takin i thurochhiah siam nghal la a ṭha" tiin a pa a melh a. Pu Saia erawh a ngawi vung vung. Lei fel phawt ila tiin thutâwp an siam ta rih a nih kha. 

Muthmunah kan nupa pawn kan sawi dun leh a, Lucy pawh a lo hlauthawng ve hle a lo nia. A pa a boral vaih chuan Remlala khi chu Nancy leh Pi Siami ten an thuhnuai hneh dawn lutuk, Bena te in tur anga leisak nisi kha an rawn chuhpui leh lovang tih a sawi theih tlat loh a ni. 

Ka muhil siar siar tawh ang tihin Sawmtea'n min lo call a, ka'n lak nâk chuan, "Mitthi kan neih kha i hre tawh em? Mapuia nu kha a boral thut a niawm e. In thawhpui a ni sia, i la hriat loh takin ka tia." A rawn ti a. Ka tho uaih mai. Mapuia nu hi rei tak khumbetin a na tawh a, tunhnaiah a zia deuh tia an lawm ve tehlul nen. Vawiinah pawh Mapuia chuan a ziaawm thu kha a sawi reng tak asin. A mak teh thut hle mai. Lucy pawh ka hrilh ve nghal a, "Ka zu lan ve loh chuan" tiin ka insiam nghal mawlh mawlh. 

"Umm, i tlaivar dawn em?" A tih chuan, dar 11 a pel tawh a, tlaivar ve law law chu mawia ka hriat avangin ka bu nghut a. "In tuamlum rawh aw, zing lamah chuan a vawt ve tawh a nia " tiin kawrlum lam a va la chhuak a, min haktir nghal mawlh mawlh. Kan inah hian a hmingin mutna pindan pathum kan siam ve a, Miteii pawh ama pualin pindan a nei hrang ve tawh. Pakhat erawh mikhual room atan kan ti a, Mampuia a lo hawn hi chuan Miteii nen room an inṭawm mai zel. Kan in aṭanga ka chhuak chu tlangval rualkhat ho rualin ka chhuk ve ta mai. Niminah ka bike a chiang lo va, ka motor lah Thakima te nupain Chawntlangah an zinpui daih si, ka paidal mai loh chuan..

Sawmtea nen pawh kan inhmu ta thuai a, Siama a rawn lang bawk. Mapuia te hian in an sa thar hlim a ni bawk a, a zau ṭha hle. Ṭhalai bakah thenawm hnai nu leh pa an khat dul mai. Ruang chu reivaklo kan va kilpui ve a, Mapuia hian fa pathum lai a nei tawh a, a pa a boral tawh a, tunah a nu a ni ve leh a. A tuar na ve khawpin ka hria. Tihian Mapuia te chhungkua bakah a nau nula senior ve tawh lam te nen an khawsa chho dawn chu a nia. Nu leh pa uap loh chhungkua hi chu a eng emaw ti ruah riau zel nia! Tar chaklo tê pawh nise, an lo awm ve hrim hrim hian min tiphuisui..

Lengkhawm hla hlir kan sa a, zai a nuam viau mai. Mapuia nu hi hlimsang a lo ni bawk nen. Keipawh ka zai ve nasa mai. Zing dar 2 bawr velah zun zungin ka chhuak a, zial ka ṭan nghal bawk. Phone hmet mawlh mawlh chunga ka ṭhut lai chuan ka darah a rawn hmer thut a, ka va phu chiang tak. A nui ver ver a, "Ehe! Vero, teh hlawl che chuan" ka lo ti vut a. Ka hmuh lohna a rei ve leh deuh a, a dângin a nulat lai aiin a cher deuh bawk. A bak a hmel chu a la paih lem lo. 

"I dam maw?" A ti sap a. 

"Dam ve e, nangni?" Ka lo ti ve vat. 

"Dam a ni mai ang chu, vawiinah ka rawn chhuk alawm. Aizawlah ka awm char char a" a ti a, ka rindan chiah. 

"Chuan helamah i awm leh tawh dawn tihna mi?" Ka tih chuan, "Umm, awm leh rih ang. U Marovi'n pasal a nei bawk sia, Anu sawn min ngai lutuk a" a ti niah niah a. Nu Thari chawilen a ni bawk a, an inngai ka tih tawh kha. 

"Awm ve reng rawh. Pasal ṭha deuh kan zawng dawn nia" ka ti a, ka nui bawk. 

A ner sak a, "Ninawm, pasal tih reng mai. Awmzia a awm lo. In tenawm êm mai, mipa chu" a ti nghat nghat a. 

A pasal hlui kha ka hrechiang vak lo va , ka ngaihven lo bawk nen. "Kan inang vek lo a nia" ka ti satliah a. A thiante an rawn lang ta bawk nen, a ding thut a. "Ka la beidawng lo a nia..i lakah" tih pahin min rawn melh kâwk..ka hamhaih chhungin a kal daih lehnghal. Eng thu nge maw a sawi le?! 

Mipa hrisel pangngai tak ka ni ve bawk a, zan khat tlaivar hi chu engah teh vak ka ngai lo. Zingkarah darkar khat vel thalai ho ka han pui ve leh zuai zuai a,. Mapuia hrilhin ka hawnsan ta a. Lucy te pawh an lo tho tawh a. Keipawh ka tih fô angin tuilum in tur ka thli nghal a. Lucy chuan min lo be miah lo! A buai rih vangah ngaiin ka va kal hnai a, a bianga chuk zauhin, "Morning.." ka ti sup. 

"I hmui tenawm khan min fâwp suh. Veronica fawh hnu hmui hi ka tan a bawlhhlawh" a ti hlar mai. Ka inrin hmain ka nui hawk a, rum fahran hian min rawn melh, "Khawiah pawh hian spy ka nei. Mi thikthu chhia Luciferi ka ni ka tih kha.." a ti hriam hraih a..