Nuthlawi last

NUTHLAWI (S1 Last)

Ziaktu : Toni Râlte

Miteii lah chu a muhil bawrh bawrh a, a thaw pawn hmuh theih khawpin ṭhat lam a pan a, kan lawm takzet a ni. Damdawi in chu a han sang deuh bawk nen, a vawt sûk mai si a, riah an inrinsa avang khan rizai chu an keng sa tho. Miteii khum bula khum âwlah chuan, "Mu rawh. Ka lo ṭhutpui ang" ka ti a. A lu a thing nar nar, a duh kha ka ring vak lo rêng a. "Mu zawk rawh. " A ti ve ngial a. Kan duh lo ve ve. Mahse, ṭhut tlawk tlawk reng chu mawng a kham ve duh bakah zial zuk a chakawm bawk nen, "A la mutui tho sia, va chhuak harh lawk ila, zial zuk pahin " ka ti a. A hnial ta bik lo. Kan va chhuak a, waiting shed-ah kan ṭhu a. Zial ka zu nghal. "Parteii te lo zin lai ber khera hetia han awm chu..a pawi e" a ti vawng vawng a. 

"Aa..hmalam hun kan hre miau si lo va, engpawhnise, Hetia Miteii a rawn ṭha leh hi ka lawm tak tak a ni" ka ti a. Zan a rei ve tawh bawk a, Nurse duty te pawh an reh viau. Chiang zetin min rawn en leh a, "Ka lawm tak tak aw. " A ti sap. "I ho, a ninawm, khatiang" ka lo ti hluk. Miteii a rawn harh thut a hlauhawm ve bawk nen kan lut leh ta vat a, bakah a vawt riau a, ka inha lum bawk si lo. Miteii chu a lo la mutui hle. "Lucy, muthilh tum rawh, ka ti tak tak..kei chu ka mut a chhuak lo, kan pahniha tlaivar ringawt hian awmzia a nei lo" ka ti a, thu ka pe a ni deuh mah zawk. Khum pakhatah chuan a ṭhu mu ar ar a, "Lo mu ve la han ti dawn ila a mawi chiah si lo. ka mut a chhuak bik lo. Haw tawh mai la" a ti ta daih a. 

Ka melh no vak lo, "Engvangin nge ka hawn ang? Miteii ka menpui dawn alawm" ka ti nghut. 

"Ka ngaihtuah ṭha leh a, a fuh vak lo. Nurse te hi chu ka chungah an ṭha êm a, engmah an sawi lovang. Mahse, tu ten emaw lo hre ta se, damdawi in an hmang tangkai tih kha a chhuah leh dan tur a nia..a tihchi loh" a ti leh ta tlat mai. Ka ngaihtuah chian chuan a dikna chen chu a awm reng mai. Mahse, a tlai tawh si, tuman min hmu a zeng pawh a ni lo va, hetia ka lo ṭhut ve ringawt hi a pawina ka hre hran lo. 

"Sawi daih rawh se. Kan innei vat dawn tho" ka ti hmiah. Min melh rum angreng, ka ngaipawimawh duh der si lo. "Inneih hi i sawi ve ziah a, i chhungte chu i hrilh tawh em? Ka nihna leh dinhmun te?" Thutak deuh zawk hian a ti ta a. Kei pawn tun hun baka kan hmalam hun sawina tur fianrial ṭha kan hmuh ka ring tawh lo bawk nen, ka nu nen kan inbiak dante pawh ka hrilh ve ta vek a. "Engpawhnise, nupui nei rual ka ni ve tawh a, kan inkara buaina siam thei an awm ve nual bawk sia, a hmalamin innei thei ila ka duh. Inzui rei vak kher hi inneih nghehna pawh a ni lo" tiin a tlang ka kâwm a.

"Ka pain min fiam zuk a. Ahruaii a fel êm vang hian lungdama min kaltir ve theih mai ka beisei. Mahse, inneih sawi nan chuan hmâ ka la ti tho. Tihian inzui ve rih phawt ang" a ti a. Ka hrethiam tho. A lo tisual tawh a, tluk nawn leh a hlau tawh tih thlengin,. Ka hnial hran lo bawk. Nupui meuh neih dawn chuan keipawh ka la inpeih em em lo, thil tam tak ngaihtuah ve tho a ngai. A rilru hriat nan ka han intingaihsam lui ve deuh bawk a ni. 

A muhil dawn lo takngiala ka hriat avangin muhil turin ka nawr ta a, a mitmeng aṭangin a mut a chhuak tih a lang reng si. 20 mins hnu velah a muhil ta nge nge a. Kei pawh Miteii khum bawhin ka muthlu zui ve ta nghal a. Vanneih asiamin kan Miteii chu a harh miah lo, khua rawn varin Lucy thawmah ka harh a. Inthiam loh hmel angreng fâ hian, "I chau ngawt ang. Mi la thawh tam hma hian chhuk rawh" a ti sawk sawk. A rilru tur hrethiamin keipawh thawhphan pawh nei lo chuan ka chhuk ta a. Damdawi in vengah hian chhungkaw 7 vel chu hnathawk te tih loh an khawsa ve tlat a, an mitmei ven ve kha ngaiin a lang ve bawk a ni. Kawngka an lo kalh lem lo a, lut nghalin thawm dim takin ka mu zui ve nghal mai. Ka harh meuh chuan dar 8 a lo pel duai tawh. 

Inkhawm ve hram ṭha ka tih avangin ka tho a, ṭhiante hruai ve an ngai bawk nen,. Samua zu lo ken kha nizan an haw hnuah an lo in em mawni, a ṭhing rim an nam ham ham mai a. Parteii pekin, "Inkhawm lo mai ang u. A zahthlak, in rim kha" a ti ta si. Kei lah ka zâm a zal ve deuh bawk nen, Lucy a inkhawm dawn lo tih ka chiang tho bawk si. Kan ṭhulh fel chu a ni ta ringawt. Lucy te pawh inkhawm kal an rêm âwm vela hawn an tum a, Bena leh Pari te an han chho tawh. Keini pawh chaw kan ei sawk sawk a, ke in kan han chho ve ta a. Miteii pawh a lo harh ṭha tawh viau,.Tichuan, fehrehsân awm vel-ah Miteii chu an hawnpui ta a. Keini erawh ka inah kan lut leh diak. Chaw eikhawm kha kan lo rawt tawh ting tang si, Lucy inthlahrung lah chuan, "Eikhawm tho ang u, keini nufa vanga ṭhulh ringawt kha a ho lutuk" a ti tlat a. Chuvang chuan Parteii leh Jeneti te pawh chawhmeh lam ngaihvenin an hmanhlel ta chung chung a. Nupuii hi an lo zin haw zana ka hmuh bak ka hmu leh ta miah lo. A la ṭha vak lo a ni maithei a ni. Chawhnu lam dar 3 bawr velah an rawn chho ve sap sap hlawm a. Lucy pawh hmel hmuh hahdamthlak takin a rawn kal thei,. Kima te nupa an ni bawk a. A nuam chho ṭan leh viau mai. Jeneti leh Parteii'n rawngbawl an chuh tlat si, ka in kawt thing hlim hnuaiah pher phah duaiin kan ṭhu khawm ta dal a. Boruak a nuamin a zangkhai viau. Samua pawh insûm thei tawh hek lo, a zu rawn kente chu a va la ta nge nge a, Kima a phur nghal hûrh a, Zoteii pawh tun ṭum chu a strict duh bik lo. Lucy chuan min rawn melh zauh zauh ṭhin a. Zu chu ka la in lo, in châkna em em pawh ka nei lo naa, ṭhiante an kainam ṭan si. Vawikhat na rêng reng chu han in ve ka duh tho mai. Hmeichheho erawh chuan coke an in thung. Ka msg tone a ri tlang a, Lucy a lo ni. "Zu hi in ve i tum em ni?" Tihtê hi. 

"Ka in ve châk deuh" ka ti a. 

"No 2 aia tam i in dawn loh chuan ka thinrim lovang" a rawn ti! Ka khi suk mai. Phalna ka hmu ta bawk a, no 2 chu phur zetin ka in ve a, ka in lohna a rei deuh tawh nge ka ni nghal chhû mai. Mahse, ruih pawha tawngtam vak chuang lo kha ka nia, ka lang vakin ka ring lo. Kima leh Samua ten an bei uar bawk a, an ṭawng kan ngaithla a ni ringawt mai. Samua kai phur lah chuan, "Ti nge nu ho kha..in ve ta che u, in zak em ni? A ho ê, khawvel a nih hi" a ti lûng lûng tawh si! A va buaithlak tak. Mahse, Pari chuan, "Ka in ngam lo..ka pum hi a ṭha lo khawp a. " Zangkhai takin a lo ti hlauh a. Lucy phei chuan melh pawh a melh duh lo. Ka lawm daih zawk. Jeneti leh Zothana te pawh an lo ṭhu dun leh rial tawh. Tiang chuan khaw thim thet thetah chaw chu kan ei ta a. An bâwl tui bakah chaw ei tuina kan lo lem sak tawh bawk nen,ṭhahnem kan ngai tlâng khawp mai. Kima phei chu kaihthawh a ngai hial. Eikhamah hmeichhe ho an che sang sang a, zial kan lo zu hlat hlat thung. A tukah ka thiante an haw dawn bawk nen, chelh ka duh viau laiin Samua leh Zothana te an eizawnna a laklawh ve nen, remchang hmasa bera rawn zin leh erawh an tum hle. Lucy nen kan ṭhut dun lai takin Mami'n min rawn call leh ta hlauh pek a! Nui chungin ,"La rawh" Lucy chuan a ti sap. Ka lak rual rualin Mami chuan, "Ti nge Samua te lo zin kha i sawi loh? Ka lo kal ve châk asin" a rawn ti hawm hawm mai. Mak ka ti deuh, a mizia nen a inhmeh hlawl lo. 

"Nia, ka lo mangnghilh daih a" ka ti a.

"Ka tel loin i hlim thei ta hle mai tiraw? A ṭha..keipawh pasal ka nei têp" a rawn ti leh ringawt. A ṭawng sehchilh leh ṭawng duhdan aṭang chuan ruih nei a ang. Chutiang mi a ni ngai si lo. 

"A ni maw? A va lawmawm ve, min sawm ve rawh aw" ka ti ta tho va. "Sawm ve loh ten, i bialnu thar i rawn hruai ve ang chu.." a rawn ti ve zêl. 

"Tehreng mai,. " Ka ti puat a. Mipa aw hian a rawn ko lâwng lâwng a, "Ka dah phawt aw. " Tih leh dah a rual. A chetdan teh thut thut chu a mak deuh. Samua te lahin kan inṭhen aṭang khan a chanchin an lo ngaihven tehchiam tawh si lo, eng nge a dinhmun pawh ka hre ve lo. A ṭha turah ngai ang. Ka ṭhiante haw tur thawmhnaw chu hmeichheho chuan an han siamsak leh tê tê a. Jeneti leh Zothana phei chu an insiam rei angreng,. Reilotê an awmdun a, an inkalsan leh mai dawn chu a ni sia. Ka khawngaih reuh. Mahse, Zothana hi tun ang hian a la serious ngai miah lo va, a rinngamin ka ring. Jeneti te unau hi ka hriat hmasakte an nih vang emaw ni ka farnu ang thawthâng hian ka ngai ṭhin. Chuvang chuan tihnat an nih ka hlau ve viau. 

An insiam zawhah kâwn lamah kan vaiin kan chhuk ta dial a, kan tam ve bawk nen, kan mi tawhte chuan min en duh angreng hle. Samua te pawh ka in lamah han rui nawi viau mah se; mi dang zingah erawh an inthunun thei leh viau thung a, lehkhathiam nge nge hi chuan ruih dan tawk pawh an lo thiam ṭhin e. Zothana erawh Jeneti te inah min pensan a, Kei pawh Lucy nen Miteii a ngaihtuah ve tawh bawk sia, kan peng hrang ve nghal. Parteii chu Zoteii nen an inkawmngeih bawk a, Zan tumtawi nan a leng kawi ve ta mai. Samua erawh k'u Pari a zui duan duan mai. An inngaizawng dawn miah lo naa an inpawh ṭha êm a ni. 

Lucy pa pawh a lo awm a. Ani hi a hming ka la sawi lo tak e. Saihmingliana a ni a, Pu Sai tiin an ko ṭhin. Lucy nu boral ta pawh hi Saithangpuii tho a ni,. An sitting roomah hian a thlalak lianpui an tar a, Lucy nen pawh an inang viau, nu hmelṭha tak a ni. Pu Saia chuan, "Duh aiin i chhuak rei hrat. Fanu damlo i nei tih i theihnghilh em ni?" A lo ti nghut a. Ka awm a nuam lo nghal. Lucy pawh chu a hamhaih ve deuhin ka hria, "Nia,. Eng nge a lo an a?" A ti ve mai a. 

A pa chuan, "An pindanah an awm. Zanah hi chuan inkhawm a nih ngawt loh chuan chhuak tawh suh u" a ti bung leh nghut. Ka awm ve reng sia, nuam ka va ti lo tak. Lucy pawh chuan, "I mak ê., Nunpuia a awm ve reng hi" a ti hlar a. A pa pawh chuan engmah a sawi leh tawh lo. Mahse, nuam ka ti lo tawh tho tho. A mitmeng a rum angreng bawk sia. Min hmumawh riau ni ten ka hre zui ta zel, Lucy pawh a awm a nuam vak lo niin ka hria. Mood a dang vek alawm le. Len pawh ka leng rei ta lo. Kawngka bul thlengin min lo thlah a, "Hrethiam rawh aw. Miteii a duat lutuk vang a nih kha" a ti ve ngial a, "Umm, hrethiam e. Naktukah a dam mai ang" ka ti ve ta ngawt. Ka hawnsan ta a. 

Lucy nen pawh kan inbezui rei lo. Min uaptu a awm deuh rûn a, nuam pawh ka ti lo. A tukah chuan zing tawkah thovin ka naute leh ṭhiante chu ka thlah ta a. A khawharthlakin an ngaihawm vung vung khawp mai. Loan pûktir theih a nih dawn tak avangin khawih neuh neuh tur ka nei nual zawk a, rilru a chawlh loh avangin nizan boruak leh ka ṭhiante avanga ka rilru khawlo tur a zia deuh. A chauh pawh ka chau ve deuh, Lucy nen kan inbe mang lo. In ka thlen chuan Jeneti leh Nupuii te an lo awm a, Nupuii pawh tlemin a thau ve tawh, a hmel hmuh pawh a nuam ve ta deuh. Ṭawng erawh a la ṭawng tam chuang lo. Jeneti chu ka fiam zuk zuk a, a nui a nui mai. A lunglêng ve ngawt ang, ka khawngaih reuh. Nupuii chuan, "Û, Jeneti bialpate kha an hausa em?" A ti hlawl mai.

Ka nuih a za deuh, "Umm hausa e, a pa hi Police Inspector a nia, a nu pawh LDC, amah hian pheikhawk dawr lian tâwk a nei bawk a. Jeneti chu a vannei khawp mai" ka ti mawlh mawlh a. Nia, kan ṭhianhoah Zothana te an hausa ber, Samua te pawh an khawsak a harsa lo. Nupuii bawk chuan, "Mahse, zu a in ṭhin tiraw?" A ti leh a. 

Zep buai ṭula ka hriat loh avangin, "Aw.." ka ti tawi tak. A ngawi zui ta daih a. An chhuk hnu lawkah chaw ka ei zui ve nghal. Lucy rim pawh ka inthlahrung zo ta vek mai a..mahse, ina tawm ngawt chu a khawharthlak dawn si, amah Lucy zawk chuan, "I rawn leng dawn em?" A rawn ti a. 

"Ka hre lo, ka rawn leng ang em?" Ka zuk ti thung. 

"Khatiang mai maia i hnual ngawt te'n, kawng zawh tur kan la ngah asin" a rawn ti a. Ka khi suk. 

"Nih chuan ka rawn leng dawn nia.." ka ti a, ka insiam zui nghal. Ka chhuk thla chu damdawi in pêng aṭang khan Nuhliri a rawn chhukthla ve mek a. Tunhnaiah ka hmu ngai miah lo. Ka ngaihbel em mawni amah chu a felfai tawp, a sam pawh a bawrchhawr tawh lo va, a thawmhnaw te pawh an pangngai viau. "Khaw nge i kal dawn?" Ka lo ti var a. 

"Dawrah ka zuk kal lawk ang e" pangngai deuh hian a ti a. Ka melh hrek hrek, mak ka ti tlat a ni. A rual chuan ka kal ve zel a, "I va vâng ve tunlai" ka ti leh a. 

"Nia mawle. Kan buai deuh a, ka nau a damlo ve nen" a ti ve lehzel a. Nuhliri hi a dam tawh a ni maw ka ti rilru ta hial. 

Enchhin nan, "Ṭap thawm kha i la hre ngai em? Tu nge ni reng reng?" Ka ti a. 

A kal chak sauh, mahse, "I hriat tawh reng kha. Khawiahmah sawichhuak suh. An khawngaihthlak" a ti ta mial mial a. Mak ka ti kher mai. Ka hrilhhai lutuk chuan, "I dam tawh em ni?" Ka ti ta phawng a. 

A khi ver ver, min rawn thlêk hawin, "Ka dam reng alawm. " A ti ta a. A kal chak tak êm avangin leh biak zui a hlau a nih ringin ka umzui duh ta lo va. Mak ka tiin ka lawmpui bawk si. Ka mood pawh a ṭha ta huai e. Khawi dangah mah pengkawi tawh lovin Lucy te in ka pan ding nghal a. Ka luh chuan Pu Saia pawh a lo ṭhu khur mai. Mahse, ngaipawimawh vak duh lovin inleng kawmna pindanah ka lut tlang nghal. Lucy pawh chuan min lo be ve nghal luam a, kan boruak chu a pangngai thawkhat viau. Bena te nupa pawn tv an en ve a, Pindan atanga Miteii lo chhuak chu chocolate ka leisak ka lo pe nghal vat. Nui sen sen chunga a rawn ban lai chuan, "Mi-i, chocolate ei tawh suh. I ha a chhe vek ang. " A pu chuan a rawn ti leh ta fak mai. Lucy nen kan inmelh nghek. Miteii lah thuawih thei tih takah a bân a la thla nghal, Lucy a ri ta phat mai. Ka veng hman lo a ni e. "Ei rawh, bawihte, a hma zawng pawha rawn hawn ve ziah si, tun ataka ei han phal loh, a nu ka nia ka phal chuan a tawk" a ti ta hmuar hmuar mai. Pu Saia mitmeng hriam zet chu a ling hlur mai a, Bena te nupa lah an ṭi dûk bawk si, awm a va han nuam lo tak êm. Pu Saia chuan, "Ngawi hmak rawh, Lalbiakdik" a ti tuar. Ka ding uaih hman ṭêp,. Lucy lah chuan, "Eng nge maw i hriat a? Hetia i awm tlat a? Nunpuia hian i eng pawi nge a sawi a? Ti nge i ngaihtheih loh?" A ti tân tân. Ani pawh a pa ang maiin a ling ve vût tho. 

"Ka hriatchian vanga hetianga awm hi ka ni. Nunpuia pawh, i zahawm viau naa rawn dîkdâk tawh lo la a ṭha ang. Ka fanu hi a hmingchhiatna belhchhah suh. " A ti ta hmuk hmuk mai le..ka va hrilhhai tehlul êm. Ka zak bawk si. Tianga ṭawngkhumtu ka la tawng lo a ni bawk a, ka chapona a tâwn tlang chiang hle. Ka ding vut a, "Ka pu, engvanga hetianga min ti nge i nih ka hre lo va, mahse, chutiang taka min ngaina lo a nih chuan ka rawn lang tawh lovang. Lucy, a nih phawt u le" ka ti chang rût a. Kawngka lam ka panzui nghal. 

Lucy hian, "Nunpui, ding rawh. Zaninah hian sawifel ang u" a rawn ti fiak ta ṭhak mai. Ka ke pen ka tawp chawt, Bena hian, "Ni e, Pa, eng thil nge i hriat a, hetianga i awm le? Han sawi law law teh" a lo ti ve a. Laklawh zetin ka la ding khawng reng. Pu Saia chuan inthunun tum takin a aw a thian kharh kharh a. Chutah, "Vena lumen zan khan Nunpuia inah han kalchilhin mawi lo takin in khawsa tih ka hria,. Miteii damloh zan lahin fanu damlo pawh hrechâng lo lêkin nuam in chên a, damdawi inah lehnghal. Nunpuia lahin tu te emaw bulah, 'Ka awm tirha min khawih rawntu te chungtlak nan hrim hrim an khaw nuthlawi hmelṭha ber Lucy ka khawih thei hi ka lawm khawp mai" te i lo ti a niâwm a. Heng zawng zawng ka hriat takah chuan ka lawm lo va, Lucy chungah pawh ka lawm lo va, Nunpuia lah ka haw bawk. Ka fanu neihchhun a ni a, a luhlul êm vangin kawng a lo zawh sual tawh a; a vawihnihna thlentir leh hi ka duh tawh lo. " A ti ta fak fak a. Ka chhing sawk mai. Chutianga thu veivirtu te chu tu te nge ni ta ang le?! Dâwt chiang tak hmanga hnunglam aṭanga sawi kan kai mêk a lo nih chu! Kei chu mipa ka ni, ka ngaihtuahawm loh. Ka bialnu Lucy ka ngaihtuah, vawi tam thu belhchiandâwl lo avangin a lo mualpho tawh ṭhin. Tunah keimah vanga a mualpho leh chu ka tihtheih lantirna hun niin ka ngai. Mahse, hmalak dan tur erawh ka hre mai si lo. 

A reh duk hnuah Lucy chuan, "Tu ten nge chutiang thu chu hrilh che le?! Chutiang dâwt muhlum lutuk phuahchawptu chu tu nge?" A ti nghat nghat a..

Pu Saia chuan, "Ka sawi lovang. Min ring êm a, chuvanga min hrilh a nia. Nangmahni hrechiang em emtu che u a ni bawk. " A ti ta a. Ka rilruin ar bô ka zawng. Tu tak ni ang maw? 

Pu Saia lam chu hawiin, "Ka pu, amah i sawi thei lo a nih pawhin a thusawite kha dâwt an ni tih erawh ka'n sawi ve hram ang e. Lucy mualpho ka duh lova, i fanu hi ka hmangaih a, neih ngei pawh ka tum a ni. " Ka ti nghet charh charh a. Ka thawl hawk thei. Bena pawh chuan, "An va han tenawm ṭhin tak, tu nge le chutiang thu lo thehdarhtu chu..ka û te inkar chhiat duhtu a ni mai. " A lo ti ve hmuk hmuk mai. Chutia kan sawi tak luai luai vang chu nge Pu Saia pawh chu a zum ta deuh dûk hian a hriat a. Aw lâwi lek lek hian, "Ka sawi lo zawk mai ang e. Thudik a nih loh chuan huat vak pawh a ṭul lo. In lo inngaizawnga fianrial hun in lo hmang ve a nih pawhin ka hrethiam e . Inngaizawngte tih fô dan pawh a ni. Mahse, Nunpuia'n phuba lakna ang leka Lucy a sawi khan min tinâ a, ka thin a rim takzet a ni" a ti a. 

"Khatiang thu kha vawikhatmah ka la sawi lo va, ka sawi ngai hek lovang" ka lo ti hmiah. Ka la ding reng sia, ṭhut leh pawh ka lai vel vek tawh nen,. "Ka haw phawt ang e. Lucy, kan inbe ṭha dawn nia. Mangṭha u le" tiin hawilêt hauh loin ka chhuahsan ta a. Ka lo insangmar nasa nge ni ka han inthlahdul chu ka hah hle mai. Ka thin lah chu a rim tulh tulh lehnghal a. A la hma tho tiin Pari ka bia a, a lo la meng hlauh bawk nen, ka peng ta a. 

Pu Saia te nen kan boruak vel hrilh ka duh tehlul nen, Inleng a lo nei rûn a. Ka hmuh tawh hnu chu a ni. Ka hriatchian mi a ni bawk si lo va, ka thu pai chu han sawina chi ni hek lo, ka ṭhu ve ta reng ringawt a, thingpui ka in zawhah ka haw ta daih. Ka ipik tulh tulh lehnghal a, kan ṭhian hnaite ka han mitthla dan dan a, tumah kan chungchang thu han thehdarh tur âwm ka hre lo. Ka mi rin te vek an ni . In ka thleng pawh ka che reng reng chu ka ri deuh sawk sawk mai a, ka inhrithla a ni ber awm e. Tumah ka be châk lo va, tuman min lo be lose ka duh. Ka mu lah chu ka hah ngawih ngawih. Pu Saia hmel lah ka mitthla zut reng lehnghal a. Lucy pawn min lo call ,ka la lo. Hahdam ka mamawh rih tlat. Min lo text a, "I ṭha em?" Tih a ni. 

"Ka ṭha rih lo" ka ti ta thlâwt a. 

"Ka hrethiam, thutlukna i kutah a awm e. Ka pa avangin ngaihdam ka dil bawk e" a rawn ti thlap thlap a. Chungte chuan min ti ipik zual. "Ngaihdam a ngai hleinem, kan chungchanga thu belhchiandawl lo thehdarhtu kha a tenawm" ka va ti hrep .

"Ka pa hian tu nge a nih a sawi duh si lo va. Rindan ka nei thiam lo " a rawn ti ve a. 

"Eng nge a sawi leh? Ka hawn hnuah" ka zuk ti hrâm. 

"Hrehawm a tia, i lakah a inthlahrung khawp mai" a rawn tih chuan tlemin ka thaw lâk a zia deuh. Miteii a khuh nasat deuh avangin a dah ta rih a. Miteii lah a lo hrisel lo ve leh zel bawk nen,. Kan boruak tawn zet chu aw. 

Engtin tin emaw chuan ka muhil ve thei ta hram a. Ka harh chuan Jeneti'n kawngka a lo kik ve mêk bawk. Ka va hawnsak vat a, "Thawh i hai a ni maw?" Tiin a nui var var. Nizan lam boruak kha ngaihtuah duh lo luiin, "Nia mawle ,ka mengrei deuh a" nui chungin ka lo ti ve a. Inphihfai turin ka kalsan zui nghal. Chaw pawh ka ei ta lo mai. Hmanhmawh zetin ka chhuk a, bank ka thlen chuan loan pûk tum mi pathum an lo awm tawh. Mood chhiat nak alaiin a..kan hna a ni miau si a. Kan han ti nek nek a, hrilhfiah vak ngai lo sa an ni hlauh a, a zia tak a awm e. Chhun chawlh laiin phone ka en hman chauh. Ka rin loh deuh thil ka hmu leh ta. Veroi bawk a ni, "Lucy nen in inṭhen chuan ka hauh che a nia, pawisak ka neih lohzia i hre mai ang" tih a ni. Mak hi ka va ti tak. Ti nge hetiang hian a awm le?! Chhan pawh ka chhang duh ta lo. Amah vek hi em ni ang Pu Saia bula thil lo sawitu kha..mahse, Pu Saia nen an inhnimhnaih hmel bawk si loh. Ninawm, rilru ka tihah peih tawh lo. Thil ei pawh a tui vak thei lo. Banah pawh ka haw nghal nal nal, ka ṭawng tlem lutuk chu mak an ti ve maithei a ni. Jeneti pawh ka be lûmlâm vak lo, a phone chhia kha an rawn siamtir bawk a, a phone kheuhin a khi leh ver ver thin. A awhawm angreng. A haw hnuah dan pangngaitêin chaw ka ei a. Ka ei tlem ngang mai. Hotê leh chinfel harsa anga lang ni miah si lo buaina chuan rin aiin min khawih na zêk. Pu Saia nen lo inrem ta tehreng pawh ni ila kei induhtawk ru ve tak hian awlsam taka ka pawha ka biak bawrh bawrh theih ka ring tawh lo. Chulai takah chuan Lucy nen kan inkar a buai phah ve thei. Ani tan pawh ṭha taka min lo dawnsawn huam chu a har ve ka ring tho. Tlawm zawk tur ka nih rualin patling pui si, a mawihawih zawng eih lova khatia a in chhunga min chachhuah nghal thur thur kha paidaih harsa ka ti a ni. Lucy ka duhna leh thlakhlelhna erawh a kiam phah eih lo. Mahse, zanin chu leh loh ka tum thung. Khaw nge ka len ang aw tih ka ngaihtuah mêk laiin Pari'n min lo call ta a. Ka la rang teh e. 

"Naua, thil hi a lo mak thei viau mai a..Khang in chungchânga dâwt lo vawrhdarhtu chu Zoteii lek alawm lo ni" a rawn ti nghal sawk sawk. Mak ka ti lutuk chu ka meng phâwk ngawtin ka ring. Ṭawng nachâng pawh ka hre lawk lo. "Maw?! Ngati nge?" Ka ti nawk nawk a. 

"Tuman a chhan kan hre bik lo. A mak kan ti ve tho. Mateii hian a ngaizawng che em?" A rawn ti ta daih. 

"Ngaihzawn pawh ka hre lo, Lucy nen kan inzui tih a hria" ka ti ringawt. 

"Mateii vangin hetiang hi a ti a nih ka ring tlat. A nau tan a ît hle che a nih hmel. " A rawn ti nghat a. 

"A ni thei dawn mi? A va mak ve le. Lucy nen an inkar a ṭha hle bawk si" ka ti ve hluai. 

"Nia, a mak tih bak sawi tur a awm lo. Lucy chuan va kal chilh a tum a, kan khap bet thei hrâm. Vawiin nilêng deuhthawin a pa a lo dâwp a niawm e. Pa Saia pawh a inpuang lo thei ta lo a niang" a ti charh charh a. Kan Luciferi tak hi chu aw, thinrim insûm lam hi chu ka ha se..mahse, ka duhna a zual sauh. 

"Thakima tal hrilh ve u la, a tiang lo ve êm mai, nge keiman Zoteii chu ka be zawk dawn" ka ti a. 

"Be lo ve, kan sawi ho va, Zoteii pawh a hma ang tho khan kan kawmin kan bia ang. Engmah hre miah lo angin, tichuan, khang thil a lo sawi chhan kha kan hre thei mai ang. I zir viau a ngai bawk ang" a rawn ti a, rilru dam chiah lo mah se; chutiang ruahmanna an neihte chuan ṭhiahsak ka tum hran lo, bakah a mipa tih chi vak pawn ka hre lo. Ka awm a nuam huai hran miah lo, Zoteii, ka nêl hmasak pawl, fel leh mawngzâng bengvar bawk si chuan Lucy nen min pawh ṭhen a lo duh a maw?! Mateii tan min lo hauh tehreng pawh nise, ngaihbel tur eih pawn hetiang lam rawngkai ṭawngkam a nei ngai bawk si lo. Hmm,. Luciferi hi neih vat a ngai a nih hi a. 

Mut dawna Lucy nen kan inbia pawh zan hmasa ai chuan a zangkhai ta deuh e. "Lemchan a thiam viau a nih chuan, keini pawn kan thiam ve viau tur a ni" a ti hmak mai si a, a rilru sawhsawntir tumin awmzia a nei dawn lo bawk nen, ka sawi buai ta lo mai. "Inneih vat a ngai a nih hi, a buaithlak, midang an inrawlh reng a. Thu lêngvâk a tam si, nakinah phei chuan kan inṭhen daih palh ang. Innei ang aw" ka ti sur sur a. 

"Teh puat zel a che. I ngaihhlut loh hmel lutuk" a ti ve ringawt. 

"Ka ngaihhlut vang alawm ka sawi. Kuminah hei kum a tâwp ṭêp tawh a, kumthar lama innei turin tun thla tawp emaw December thla tirah emaw palai ka rawn tir mai dawn" ka ti zung zung a. Ka phur thar riau lehnghal. 

A ngawih vang vang hnuah, "Ka hrethiam lo, ka pa hi..min la thlahlel ve sia" a ti niah niah a. "Kei pawn ka thlahlel che. Keini pahnih hi rei tak inzui chi kan ni lo" ka ti hmuk. 

"I luck bawk sia tiraw? A buaithlak" nui chungin a ti a. 

"I luck vang alawm kan buai. Keiin ka bawhzui vat si che a.." awmze nei zetin ka ti a, a nui hawk hawk. "Chuan, kan innei dawn tiraw?" Ka ti leh a. 

"Aw..teh sek a" a rawn ti hlar. Ka nui vur vur mai. A tawpna chu a hlimawm leh ta. 

 Khami hnu lama Zoteii te han hmuh leh chu keimah zawk ka lai tlat! Ka awmthiam lo. Amah Zoteii lah chu a inthup thiam nge danglamna awm eih lovin min be siam siam reng a, Mateii vel lah a sawi ngai bawk si lo. Mahse, zirtawpni-a Mateii a rawn lan takah chuan thil kaldan ka manchho ve ṭan. Ṭhakima leh Mapuia te chu an buai angreng a, Mateii erawh ka office-ah a rawn lut thung. Form fill up tur a awm avangin leh ka enpui hman loh avangin Zoteii va intihpuitir turin ka ti a. Chhuak mai ta lo chuan a û chu a ko lut ta a. Chutia kan pathuma kan han awmho takah chuan Zoteii chuan, "Mate, kan makpa hual ṭhelh hi thingpui i khilai dawn em?" A ti ngei a. Ka nui ringawt. Mateii lah chuan zam vak lo hian, "A ṭhelh kher lo maithei asin..tiraw? U Nunpui.." tiin min rawn melh zawk, "Ni ngawt mai" ka ti a. 

Zoteii chuan chhuah pahin, "Thingpui ka va lam ang e. " A ti sap. Chance min pek a tum tih ka hria, mahse, a duh ang a hmu dawn hauh si lo. Vanneihthlak zetin Pari a rawn kal hlauh mai a, Hruaii account-ah pawisa a thunsak dawn a lo nia. Mateii aiin ka lo ngaihsak ta si, ani lah engkim hrethiam ta bawk si chu a chimawm lehpek a, "Palai tur chu ka be tawh a,. An phur khawp mai. Mate, hâ kan tah hriam a ngai ṭan aw" a ti ham ham a. Music ka lo man ve tho si. Tlaia kan bân dawnin Zoteii chuan, "Palai tirh i tum hnai a ni maw?" A ti ta chiah a. 

"Umm, tih vat hi a ṭha" ka ti ve mai a. 

"A hma mah mah chuan ka hre deuh. Mahse, i thu thu a nia. Inhriatchian tluk hi a awm lo a nia" a ti deuh kher a. "Hrechiang lo hian nei ila, kan rin aia an lo fel hlauh chuan a nuam dawn asin" ka ti ta daih. Khata a hmel thim hmak kha ka hrechhuak fôin ka ring. Luciferi nen kan inkarah chuan k'u Pari chauh ding tawh se ka duh ta bawk. 

Ka lo sawi lâwk angin ka chhungte ka han râwn a. Ka û te kha an inhruai haw ta nge nge kha a nia. December thlaah in hrang an chang ve dawn a ni. Ka lawmpui e. Boruak chhiain min nang rih lo bawk a, ka nute chuan midang ang bawkin kan la inzui rei lo deuh chu an ti ve. Mahse, zêp nei lem lovin kan harsatna ka sawi a. Ka pain, " A neitu tur i nia, i tihsual leh i tawrh tur tho a nia. Kei chuan hnialna ka nei lo. Anmahni lam pawh an lo rem lo ve thei tho bawk" a ti ta nge nge a. Ka lawm hle. Mahse, Lucy te lamin buaina an nei ta tlat! A buaithlak ṭhin mang e. 

Nancy a rai! Remlala fa a pai ta si. Innei lo thei lo dinhmuna ding ta chu min hmakhalh dawn ta a ang hle. Ka lo tum urh ve tawh nen chuan aw. Remlala chawp chawp chuan ka hmel huat lek lek hial. Palai an han tir a, Nancy te lam lahin nakkum lam an lo tinzâwn ta bawk si. An thutlukna min rawn hrilh zan chuan, Lucy chuan, "Kum khat chhung chu i nghei rih a ngai dawn a nih hmel..lut leh chhuak an duh si lo va" a rawn ti kher. A la lâp lutuk nia ka hriat vangte chuan ka thinrim lek lek. 

"I rai ve ang a a ni mai" ka'n ti ngawt a! 

"Rai tur chuan thil eng emaw tih ve a ngai asin" a la tizui! 

"Kan ti mai dawn alawm" ka tih chuan, "I ti lo vang" a rawn ti hlak. Ka chhungte pawn kan chungchâng an hriat chuan, "Pathian remruat te pawh a ni zawk ang e. Kumte chu a liam ve zung zung alawm" an ti duh lek a! Thil tih tum, tih leh loh hi ka thiam lo, hrehawm ka ti ṭhin. Engpawhnise, han nghak leh ṭâng ṭang mai teh ang. 

Zoteii dâwt sawi vanga Pu Saia nen kan inkar chhe ta deuh pawh Lucy finthiamna vangin a ziaawm chho ta viau a. Ka zu lên te hian a pa nen chauha ṭhu dun turin chhuanlam siamin min chhuahsan fô! Chutiangah chuan inbe lo thei lo kan lo ni ṭhin si,. Pu Saia chu a nihna takah chuan pa ṭawngtlem tak ni mah se; kawm a nuamin a titi a ngaihnawm thei viau. Keipawn ka induhtawkna ka hlip thla ve hret hret zel e. A û te chu kumtir lama innei tur an nih avangin anni lam pawh Hunpui lo thleng tur lam pawh hawi hleithei lovin an inpuahchah nasa ve a, keipawn ka theih ang chinah ka pui ve nasa. 

Remlala te inneihnain min tisukûk zo ta tih an hria ni ngei tur a ni. Zoteii te unau pawn min be ṭha thei viau,. Ngaiah ka nei tawh zawk. Ka luck vang ni pawn ka hre lo. A hminga hlawh chhetê ka neih ve vangte hi a nih ka ring. Thakima te hian hmelah chuan Zoteii hi a phû vak lo, mahse, tihian an innei a, Zoteii te chhungkaw rilru chu a hriat ve theih mai âwm e. Tin, Zoteii putea te chhungkua Vena leh Nupuii te inkara an tlakzeh dan aṭangte khan ka ngaina tehchiam lo. 

Kum tâwp chawlh ka han nei ta a. Ka rilru a buai angreng. Aizawl lamah ka chhungten min thlahlel ve si, ka ṭhiante ngei ngei pawn. He lamah ka bialnu te nufa lo ni bawk. Lucy bula hman ka châk êm êm, mahse, Christmas tal chu ka chhungte bula hmana kumthar hmang tura chhuk turin thutlukna ka siam ta a. Lucy pawn a hnial lo. Min hrethiam ṭhintu a ni a, mahse, min hrethiam duh lo luitu pawh a ni tho. Ka duhna chhan hi pakhat chiah sawi dawn ta ila, 'Mipa ka nihna anga a huna min zahthiamna hi' a nih ka ring. Hmeichhe huaisar, pawisak nei lo, mi kawlhsen anga sawi ni fô mah se; Keiin thutak deuha ka sawi fak tawh chu a pallui ngai lo. Bialnu te chunga thuneih tum vek hi ka mizia a ni ngai lo, mahse, Lucy chu ka hmangaih a, a ṭha lam kawng zawh tura thunun erawh ka duh thung. 

"Ka sam hi ka ti ṭial ve dawn aw" a tih ṭumin, "A ngai lo, sam dum hlap hi mawi ka ti" ka lo ti a. 

Chhunah Pari ten an lo sawm nasa a niang. An uar ve lah tak bawk a, tiṭial se a inhmeh viau ngei ang. Mahse, "Nunpuia'n a dum mawi a ti zawk sia. " Tiin a lo hnial ve ṭâng ṭâng. 

Ka haw a hun ṭêp tawh avangin ka ngaiin awmdun tam ka duh sia, ka hun awlah chuan ka lêng deuh chawt a ni ber e. Mut dawnah nise msg pawh duhkhawp lovin kan invideo call a. Tleirâwl inngaizawng kan ang ka ti ṭhin. Ka hawn dawn zanah chhang kan kang a. Pari pawh a rawn kal ve. Chhang ei zawhah a haw a, a chhungte pawh an mu vek tawh. 

"I rinawm ang tiraw?" Ka ti a. 

"Aw"a ti sep chu ka duhkhawp lo, ka kuah bet a, "Lo kal ve mai ta che. " Ka ti a. 

"Han ṭha la, ralkhat aṭangin ka rawn vil dawn che alawm..min ngai hman lovang" inringtawk zetin a ti lehpek a. Ka fâwp vawng vawng. "Ka hmangaih che" inti ve sek lo mah ila, chetzia hian kan va lantir nasa si êm. A felhlel chin kan thlen loh nana a break rah hun a hre zat zat zel te hi Luciferi duhawmna a ni. 

Miin Nuthlawi tiin an lo ralkhat nuthuri zuam ve ngawt a maw?! Hehe..

"Ani chu nuthlawi a ni. A tawnsual hmanga inzir fing a nih avangin a thinlung a tikhauh zawk a ni. 

Ani chu nuthlawi a ni. 

Mi rinawm a nihzia sawi duah lovin thim leh êngah rinawm awlsamzia a tarlang mai zawk a ni. 

Ani chu Miteii nu a ni. 

A mipa duhzawng chauh zawng lovin, a fanu tan pa ṭha a zawng tel zawk a ni. 

Ani chu kei aia upa a ni. 

A bâwih ni tur pasal ni lovin, a kulhpui leh inhumhimna tur mipa ni tura min chhertu a ni. 

Ani chu Luciferi a ni. 

Setana ni lovin ka tan leh Miteii tan Vantirhkoh a ni. 

Ani hi ka nupui a ni dawn a ni.." 

Note : Season 1 ka tihtâwp thut chhan chu christmas boruak chu thuhran, ka ziah khawlsa a zo tawh a, ziak khawl leh turin hun ka mamawh tlat a ni. Tun ang dinhmunah mitthi, chhungkua, masi boruak nen ka hun neihin a tlin rih lo, ziah chauh chu a harsa lo, ziah bawk chhiar bawk chu ka tlin rih ngang lo a ni e. Damtêa kan awm a nih chuan ni 3, january aṭangin season 2 ang deuhin a chhunzawmna kan rawn tichhuak leh turah ngai ang aw. 🥰🔥