Nuthlawi 9

NUTHLAWI (9)

Ziaktu : Toni Râlte

Nupuii chu a rawn hawichhuak rang kher mai. Mahse, ka lo beisei ang aiin a hamhaih lo. Thlabar hmel a pu hek lo va, lungchhe ngawih ngawih hmel a pu zawk. A mak tehdaih mang e aw. "Eng nge i tih?" Ka ti a. Ka aw khur lek lek chu ka hlauh vang pawh a ni chiah lo, ka chiâi vang zawk a niawm e. Muangchang hian a rawn ding a, "Khawiah mah sawi suh aw" a ti tliang ral. A âw-ah zâmna emaw han danglamna chhetê mah a nei lo. "Haw ang" ka ti hmuk a, midang ka venthawn vang a ni zawk mah âwm e. Min rawn zui ve mai bawk a. Nu Mawii ka call nghal bawk. "Kan rawn chho e" a rawn tih chuan ngaih a ngam huai e. Ka inah ka hruai phei a, kan la ngawi dun ngat ngat. Lucy text ka chhan lawk loh vang nge min rawn call a. "Eng nge thleng a?" A rawn ti hlar. 

"In ka thleng chiah a" ka ti lâwi rût. 

"Khaw nge i penkawi a? I thlen a hun daih tawh sia" titau awka tih hriat zet hian a rawn ti a, engkim hrilh chi niin ka hre rih si lo. "Nu Mawii te inah ka peng zuai a..ka mut hunah ka lo bia ang che.Ka'n inthlak lawk ang e" tlawn titihin ka ti a. 

"Aw le, ka mu tawh a, rei suh ang che" a rawn ti zawi sap. 

Nu Mawii leh Jeneti te pawh an rawn thleng a. An thlabar hmel hle. Nupuii awmdan chu hresa an ang tlat, keiin ka lo hrechhuak leh si chu an hlauhthawn hmel zawk niin ka hria. Thil awmzia ka sawi malh malh a, Zawhnain a tawp ka khar bawk. A reh tlawk tlawk hnuah Nu Mawii chuan a aw a thian kharh a. 

"Nunpui, pawi kan ti lutuk. Min hrethiam hram rawh aw. Englo a ni, Vena leh Nupuii te hi Vena damlai khan an lo inhmelduh ve a. Mahse, Vena te nen Kohhran inang ta lo chu a pa sawn ṭhen turin a hrilh ṭhin. Keini nufa ngei pawh min rawn luhkhungin Nupuii leh Vena an inṭhen lo a nih chuan ti ang zawng te hialin min rawn vau a ni. Chutiang na na na chu tiin keipawn Nupuii chu ka khuahkhirh chho a. Vena pawh a rawn kal ngam tawh lo. Mahse, an lo induh nghet ve em em a lo nia! Vena bo ṭum khan sawi chhuah leh chi pawh a ni lo Nupuii nen tlan dun an lo tum chu niin..mahse, Jeneti aṭangin chutiang thil chu ka hriat veleh Vena a bo tih an puan hma khan ka va umzui a, an lo biru ngat ngat a lo nia. Ka thlem a, ka ngen a, an rawn haw duh si lo. Nu ka nihna angin ka fanu chu ka haw luihpui ta a, amah zawngtura lo kal te nen pawh kan intâwk hman ṭêp a ni. Tichuan, Nupuii chu pawn chhuah kan phalsak loh bakah amaha awmtir pawh kan remti ta lo va, kan veng tawp mai a ni. Ka awm loh pawn a û-in he lamah pawh a rawn hruai zel hi..

Vena erawh a danglam phah ta a. Khatia a danglam ta viau kha Nupuii vang ni deuh tho mah se; ngaw chhungah khan eng emaw a va tawng a nih ka ring. A chhungten min haw nufain min duh lo si a, kei pawn hetiang taka min duh lo chu tiin Nupuii pawh ka theihtawpin ka zilhin ka fuih ve a ni. A thih nî khan Nupuii chuan, "Inṭhen mai ang. Ka nu leh ka û te rilru ka tina duh tawh lo" tiin a lo thlah a. Tikhan ramhnuaiah kalin a va intihlum nge, ka hre tawh bik lo. Tiang khan a boral ta si. Nupuii hian amah vangah ngaiin a rilru a hrehawm em em a. A ruang lumen zanah te khan kan veng tlaivar a ni deuh mai e. Tiang hian tuma hmuh leh hriat lohin Vena lo lan leh beiseiin ramhnuaiah a rawn kal ṭhin a,. Kan inveng seng bik ngang lo a ni. Pawi kan ti takzet. He kan nufa thurûk hi min vawnpui hram rawh aw" a ti ta ngawih ngawih a. Ka chil ka lem khawlh ringawt. He khuaah hian thil danglam a thleng a thleng ve ta mai. 

"Ekhai! Zêp tehlul e. Mahse, Nupuii zawk hi in vena in fimkhurpui deuh chu a ngai ang" ka ti a. "Naktukah Aizawlah ka chhohpui dawn a, ka ṭhiannu, kan nulat laia ka ṭhian ve ngawih ngawihin kan chanchin a lo hriatin an bula awm turin a rawn ti a. Aizawlah han awm rih se la, a rilru pik zualpui pawh a reh kan beisei a ni" a ti ta a. Nupuii entir tur anga an insawi kha chulam biahthu daih chu a lo ni. Nupuii chu a ngawi ngul a, a luhlul hmel viau. Vena chhungte reng reng pawh kohhran vanga fate rilru han hliam chu! Kohhran rawngbawl leh Pathian rawngbawl hi kan tam tawh bawk a ni. A pawi ngawt mai. Vena tê pawh chu a lainatawm hle mai. Mahse, amah intihlum a nih erawh ka ring lo bur. A ruang awmdan ka mitthla hian hlauh deuh eng emaw tak zawng a nei chiang a ni. Chu erawh a la dama te hian kan hre lo kumkhua maithei..

"Aw le, engpawhnise, zuk haw thla rawh u. Hei zan a rei mai dawn. Zin tur in ni si, keimah lam kha chu lo vengthawng reng reng suh u. Tuman an hre lo vang. Tluang deuhin in zin dawn nia" ka ti luam a. Anni pawh chu an haw thla ta hnak hnak a. Ka inthlak nghal sawk sawk. Ka mut rual deuhthawin Lucy ka call. A ring quit ṭhak. Nu Mawii te nen kan inbiak chhung kha a rei lutuk lo naa a nghaktu tan chuan a rei ve deuh maithei bawk. Whatsapp-ah ka va bia a. "I mu tawh mi?" Tiin. A seen thei bawk si lo. Min mutsan emaw a titau emaw a niang tiin, "Ka tihpalh aw. Ka nu nen kan inbia a" tiin ka va mangṭha ta ngawt a. Ka nu sawi takah chuan Lucy chanchin leh an chhungkaw dinhmun vel engmah chiangkuangin ka la hrilh lo va, ka û vangin an la buai ve bawk nen. Remchang hmasa berah ka hrilh ang. Nupuii te unau vangin ka muhil har phian lehnghal. A mizia hi huai leh hrâng ho duh chi ka ti mai, ngawi reng, suangtuahna ngah tak mi ni bawk si, a rilru hah leh natna te sawi ve bawrh bawrh ngai bawk si lo..hetiang mite hian depression pawh an nei hma zualin ka lo hre ve mai mai. Ka lainat rualin tihtheih erawh ka nei tam hran lo khawp mai. 

A tukah a ngaitêin ka nilêng hun ka hmang leh a, Pem veng ho hlawh lak ni a ni a, min tibuaitu te vêng an nih vang nge ka lo chu kha ṭha vak lo. Ka mood a dik chiah lo bawk nen. Lucy nen erawh kan inhau lem lo naa, hmaichhana sawidun ṭha ka ti. Ka nu nen kan inbiak a ring tlat lo, kan inbe lo ve rêng bawk a. Nupuii te chungchang ka hrilh thei bawk si lo, a rindan chuan Mami nen inbia angah min ngai! 

"Mi thikthu chhia ka ni. Ka ta chu ka hauh a, tumah ka pawisa lo. Mâwl nihte , rapthlak nihte ka zak bawk hek lo. Mipa ka duhthlanna ngeia ka ngaihzawnpui chu tu hmeichhia mahin ka lak aṭangin an rubo lovang. Mahse, nang hian beiseina i pek vanga an huangtau ngam a nih chuan, Ṭhen hlen i ni ang a, i lakah ka thikthu a chhe leh tawh ngai lo bawk ang. Chuvang chuan dâwt min hrilh ngai lo la, thudik chu na deuh pawh nise, ka tuar theiin ka tuardam mai ang. Tin, mi ngaidam thei lo khawpa famkim ka ni lo bawk,. Ngaihdam erawh ngai ngun suh. Kei chuan a ṭha thei ang bera hmachhawn zel che ka tum dawn si a. I inthlahrung palh ang" tih thu a sawi fak fak kha kum tam liam hnuah pawh ka theihnghilh theiin ka ring lo. Luciferi nge nge, nuthlawi zûn ngah tak zawng a lo ni ngei e. 

Ban hun kan pel leh hret. Zoteii te inah ka peng zuai a, An huan ami Maian min thartem ve a, Maian hi kei tui ka tih ve pawl tak a ni tlat. Thildang hi han thlak pawlh nuaih zel bawk ila,. Ka in lam ka pan leh ta hnak hnak a. Ṭhu chunga hnathawk mah ni ila banah hi chuan kan chau ve rawih tho zel. Jeneti pawn a lo bâwl mêk a, a nute an zin sia, ka bula lo awm rih mai turin ka sawm kha a nia. Mahse, a hreh ve deuh nge mawni, "Zanin chu Amawitea ka sawm a, min riahpui thei dawn a.." a ti a. Amawitea chu an kawmthlang râwlthar a niawm e. A la bâwl zo lo bawk a, kan titi dun mai mai. Ramsanga chanchinte kan sawikai a, Ramsanga hi ka la hmu ve miah lo a ni maithei. Jeneti chuan an inkawp lai velte chu a sawi siam siam a.

"U Ramsanga chu maw nangmah ang chen vel a nia, a hmel pawh a ṭha. Ih, Class x kan kal lai khan a pa ai hi a rawn kal ṭhin a. Min lo star a niang. Mahse, nupui a la nei a; chuan pawl 10 ka pass a, class xi ka kal laiin an nu nen chuan an inṭhen ta a. Min lo be ṭhin. Anu phone bak phone kan la nei lo va, dik tak chuan ka phone chhe ta pawh kha ama min leisak a nia, ka birthday-ah min pe ve ngei alawm. A lo hmelṭha ve bawk sia, nupui a neih tawh loh takah chuan ka lo duh ve tho sia, ka bialpa hmasa ber a nia. Chuan ih, an huana kan kal ṭumin min sawm tlat sia, ka lo duh ve bawk si. Kan chesual ta a. Kha lo kha vawihnih kan chesual leh a, ka rai ta a. Ka rai aṭanga thla 4naah a nupui nen an innei leh. Ka rai tih a hriat khan titla tur leh a senso pawh min pek tur thu a sawi a, ka ngam ngang lo a ni. An innei leh ta bawk nen, tikhan ka awm ve tawp. Bawihteii kha dam se chuan Anu ang hian pasal nei tawh lovin ka enkawl ang ka tia. Mahse, a boral leh ta si. Kan chhungkua chu kan vanduai e.." tiin. Ni e, mi vanduai an ni ka ti lo thei lo. Nu Mawii lah dinhmun chhe theihtawpah a ding a, a fate lah tiang hi an ni bawk si..mahse, Nu Mawii felna leh Pathian belh tlatna hian rah ṭha zawng a la nei ngei ang le. 

Jeneti min hawnsan hnuah chaw ka ei ve nghal. Maian ka hmeh vang nimaw ka ei hnem phian. Zanin chu ka chhuak hma angreng. Lucy a tihtauh deuh vangte pawh a ni mahna le. An ina ka luh chuan a pa ni ngei tur hi a lo ṭhu ve a. Ka pa nen an inrual vel maithei, Sang leh ria lam, fîp ṭang kan tih ang deuh hi a ni. A vanglai chuan pa hmelṭha leh hleitling tak a ni ngei ang. Remlala'n a chhun berin ka hria, Lucy pawh chuan min han inhmelhriattir ve a. Pa ṭawngduh tak ni chuan a lang lo. Mahse, mitmei kawi min hmuh lo va, inkiltawih lam a pâwl zawk mah e a. Mampuia pawh a zia tawh hle.. eitur leisak ka chin avang hian min ngaina ve riau tawh a, Miteii pawh kan inkawm thei ve tawh viau. A pu zin a lo haw bawk a, an bel deuh chawt. Lucy chu a va inthlak zuai a, "Sakhi sa kha i duh ve tak tiraw? Pu Zaluaia'n a kap a, va en ang..Pa, lo awmpui lawk rawh aw" a ti zung zung a. Ka lo hamhaih deuh, engmah a sawi lawk si lo. Ngawi rengin ka zui chhuak ta a. 

Pawn kan thlen rualin, "Zanin chu in lepse hun aw" a ti zauh a. Ka va thlêk hâw ringawt. Nui sak chung hian, "Ka lepse vek dawn che. Min ngaizawng ta hi i inchhir hle maithei a ni" a ti leh a. 

"Inchhirtir min va duh awm ve" a bawplawkah ka lo la chat. 

"Inchhir mah la, i inchhir lo leh vat dawn tho" a la ti zui! Hetiang hmeichhe inringtawk takte hian alawm min hîp fô ṭhin. Nuthlawi a nih vang pawh a ni lovang, Lucy hi nula hnahkhat phei chu nise tun ai hian a confiin a induhtawk lehzual ang tih a mizia leh ṭawngdan aṭang hian ka manthiam ve tlat. Nuthlawi dinhmun a hniamin a chhe ta viau e ka tihna ni lovin, nuthlawi a nihna hian tlemin a nundan pangngai aṭangin a hnukhniam ve lo thei lo va, ka tan chhai nuam tawk a lo ni thei ta chauh a ni. 

Pu Zaluaia te in lah chu a hla zêk a! Feh kawng niawm tak kan zawh leh fê hnuah kan thleng chauh. Veng tlabirh lama awm an ni bawk a, an in leh lo pawh a ṭha tehchiam lo hle. Electric bulb sen rîm rêm a lo inchhi ve a, kan zu luh chuan mi pali nga vel an lo awm ve. Lucy chuan, "Ka pa Luai, min chantir ve thei ang chu tiraw?" A ti lut nghal var a. 

"E..lo kal r'u, nangni te chu chang lo thei in ni nang" Pu Zaluaia ni ngei tur, zopa ve tak, sa chhe ve angreng tak hian zo zial pet vû chungin a lo ti ve vat. Ṭhutthleng sei vak loah chuan mawng kan hûng ve a, "Kha, kan bank manager kha em ni?" Pakhat chuan a rawn ti a. Lucy chuan ka nih thu a lo sawi ve vat bawk. "Khaw nge i fate, an va reh teh ṭhiap ve" a tih chuan, "A pite in lamah ka tir a nih kha. " A lo ti nghut. Rei kan ṭhut hmain sakhi chu 1kg ve ve min leitir ta a, a rit nalh mai. Hawn kawngah Pu Luaia chanchin chu a sawi mial mial a. 

."An khawngaihthlak asin, fa mipa pahnih an nei a, an nu hi Pu Luaia nau nen an tlandun daih a. Tikhuan an pafa thumin an khawsa ve tawp mai a ni. Amah hi a ramvachal ve a, sa a kap a kap ve ṭhin. Khu khu an eizawnna ve ang a ni mai, a fapate lah an la naupang ve bawk nen, mahse, lehkha an thiam thei reuh a. Tikhuan a theihtawpin a châwm ve ngat ngat, mi khawngaih leh lainat an hlawh a, lehlamah chuan an vannei tho mai" a ti siam siam a. Mi vanduai tak tak hi an lo va tam êm ve aw. Heng mi vanduaite zarah kan vanneihzia kan han hrechhuak ve leh chauh zel a, mihring nun tak hi chu aw..

Min rawn tawk zawnga rawn phei thum mam mam te chu ngawi renga lehpelh mai kan tum laiin pakhat hian Lucy chu a rawn nêk lui deuh kher a. "He nu hi alawm kawih zangthal châkawm chu" a ti nghal zat bawk. Pakhat hian ka ṭawng ve hmain, "Mahse, mikhual kan tluk leh ta lo chu a nih hmel" tih pahin min rawn thlêk hâ a. A nui sûng bawk. Chupa chu hriat tawhna ka nei chiang, ni dawn tak..Mama ṭhianpa thlan laih nî-a kan hnunga kal kha a ni chiang lutuk. Lucy chuan, "Hêl hûl che u chuan le..zahna pianpui r'u aw"a ti fiak ṭhak a. Ka kai vat, ka veilamah ka kaltir ta a, mahse, pakhat a rawn huangtau leh hram, "Mikhualpa, kan khaw nuthlawi hi kan hauh ve riau a nia. Ani ngat phei chu" tih leh ka hnungzânga ngaihnep hmel zeta rawn ben thek thek a rual a. Lucy vanga thleng a lo ni kher bawk nen, "Ṭhianpa, ka bialnu chungchâng chu keiman ka ngaihtuah ang. Buaina ka duh lo ve" ka ti chang rût. Awka nêm taka hmachhawn chi ni nghal lo chuan. An nui hluah hluah a, min elsen leh runluih tur hrim hrima rawn kal te pawh an ang alawm le. Lucy chuan, 'Kalsan ang,." A ti sep a. Min kai dâwr dâwr.."Thaibâwih tur" an tih leh huk chu ka hre hman. Mahse, Lucy chuan, "Sawtiang mihring tenau ho khing tur khawpin i tê love" a ti nghat a. Hmalam panin kan pen dun hlawk hlawk. Engvanga khatianga min rawn tiel vel ngawt nge maw an nih ang le.. an pawi ka sawi tawp si lo va, Mama idea a ni chiang lutuk. Amah bak ka ngaihtuahnaah an awm thei lo. A va ṭhing tak. Ka thinrim hran lo naa a mipa tih chi loh riauin ka hria. Lucy chuan an in thlen hmain, "I mood a dik em?" A ti dam thlap a. Kan kut pawh a la invuan reng. "Ka ṭha reng, i ṭha zawk em?" Ka ti var a. 

"Ka ṭha. Khatiang mai maiah ka buai lo" a ti sap. "Mama kid te an ni hial lo maw?" Ka ti a, "Maithei. A va tlachhe tak" tiin a nui hawk. An in kan thleng a, ka mood pawh a danglam ve nghal. Lucy chuan, "I pa te thawn i duh chuan rêp ila. Hei ka pa hian lo rêp se la, i thawn dawn nia" a ti thliam a. Ka va lawm tak. Hnialna ka nei lo khawp mai. 

A pa chu a zin chau ve nen, a mu ta mai a. Midang an awm bawk si lo, chance hi chu kan nei ṭha phian zel. Mahse, fimkhur erawh a ngai tho mai. Kan ṭhut dun leh hnuah, "Ka thin ka tirim ṭha leh dawn" a ti deuh ngei. Ka nui ringawt a, "A ni tak tak aw, ka lung a la awi chuang lo. " A ti leh. A inla no ni chuang si lo hian pangchang deuhin a awmthiam tlat! Chu chu a cute khat tlat si a ni. 

"Engtin nge i thinrim kan tihreh ang?" Ka ti a. 

"Kan inlepse ang ka tih kha,. Khawi i phone" tiin a kut a rawn pharh ta vâ mai. Ka la tawn ngai loh thil a nih avangin ka hamhaih lek lek. Bialnu ka nei ve ta nual mai, ka phone lepse ngam ka la tawng lo va, keipawn min check sak lose ka duh luatah an phone ka khawihsak ngai lo. Privacy inzahsak tih luklak kha ka chhuanlam a ni chiah ṭhin rêng a, tunah duh taka ka ngaihzawn Luciferi'n min dil mauh chu a ni si a! 

"I hlau em ni?" Fiah zet hian a rawn ti leh, ka phu zuk a. Ka phone chu phawrhin, "A ṭul ber em ni? Phone inchecksak tih vel hi ka duh vak lo asin" ka ti nghut a. En vek mah se; tunhnaiah kher kher chuan rinhlelh tur a hmuh ka ring lo. Mami nen kan inbiakna lah hmu vek mah se; pawi ka tih loh tur an nia, mahse, tlawm zawk ang maia lang tura ka inngaihna chuan min hnialtir châk ve a ni ber. Nui sâng chungin, "Kei chu ka danglam ka tih kha" a ti zangkhai vah, a nui hmel a mawi êm vang nge ni ka phone chu a kutphah chungah ka nembei ta nge nge a. Mahse, lungawi lo âwm deuhin ka la awm lui ngar ngar. Ka password min zawt lovin min hawntir a, a bur ta ngat ngat mai. Ka tlawmla chuan, "Khawi i phone" ka ti ve hmuk a . Îhe lovin min pe nghal hmiah. Ka thinrimna emaw ka rilru tinatu emaw hmuh ka hlau ru tho si. Mahse, a whatsappah chuan ka lut ve ta nge nge a. A tlar tla tuar. Number a save loh ten an rawn be nasa, mahse, a tu amah a chhanglet miah lo. A delete a nih chu ka ring bik si lo. Parpaliani nen an inbiakna a tam ber awm e, an inhnaih tehreng nen an va peih mai mai tak e aw. Thanpuia msg pawh a awm. Mahse, a seen pawh a seen sak lo, Mama msg ka zawng ru deuh a, ka hmu miah lo, thîk tur ka hmuh tak si loah chuan fb-ah ka lut leh ta ngawt. Whatsapp ai mah khan a active lo. Awmzia a awm lo. Ani pawh a duhtawk a hmu ta nge ni, ka phone chu min pe a, "Tunah chuan kan ṭha dun e" a ti zui zat bawk. 

"Chuan" ka ti nghut. 

"Ka ngaih a ṭha ka tihna a nia" a tih chuan, 'Ti nge ka lakah i ngaih a ṭhat loh? " Ka ti ve khauh a. 

"Nangmah i nih vang a ni kher lo. Mipa i nih vang a nia" a ti mai a. Kan hun kal tawha kan tawn thilte hian kan tun hun a la nghawng ve fô ṭhin reng a ni. Ka dem lo, a nunhlui ami ang kha ka ni lo tih ka lantir a ngai tih ka hria. 

Thingpui in pah chuan, "Nakkumah innei ila" ka ti thut pek a! A hamhaih ve hmel kher mai, ka nui duh der si lo. "A la hma" a inthunun theih hnuah a ti a. 

"Hma lo..ka upa tawh" ka ti ve zel. 

"Ka upa zawk.." a ti ban chhalh a. 

"A ho" ka ti leh hmiah. Min rawn thlêk hâw chungin, "I chhungte i hrilh tawh em?" A ti a. 

"Ka nu ka hrilh a, mahse, chiang zawkin ka hrilh leh ang" ka tih chuan, "Hrilh vat ang che. Mo atan nuthlawi an beisei dawn miah lo a nia" a ti sap a. 

"Nula kher kher pawh an beisei chuang lo" ka ti ve leh tlat. "Ka pa hian pasal ka neih pawh hi a phal dawn mawni le" a ti vei niah niah. 

"Phal ang. Ahruaii te nupa an awm hi" ka ti ve zel a, "Thil tam tak ngaihtuah a ngai aw. Nunpui, mizo i ni a. Mizo society i hria, kei hi nula hnahkhat ni lovin nuthlawi fa pakhat nei ka ni bawk. Ngaihsam miah suh..i hrethiam em?" Nuin a fa hnena a hrilh ang mai hian min hrilh ka ti mai. Keipawn thutak zawkin, "Ka hria e..ka hria Lucifer," ka ti a. A nui hak, ka insûm zo ta lo va, ka lamah pawt hnai dâwrhin ka fâwp leh ta vawng vawng a. Bena te nupa thawm kan hriat takah chuan ka thlah thei ta hram. Kan thinrimna te kan inthawidamsak ta bawk a, keipawh ngaihṭha takin ka haw chho ve ta a .

Ka nu nen kan inbiak leh hmasak berah Lucy chungchang chu ka sawi ta vek a. A chanchin zêp ṭhen emaw sawi belh emaw ka neih ka hre lo. Ka nu chuan, "Mama, chutianga sawi kai hat te chu a tihchi dawn em ni? Nakinah i la buai palh ange, nula hnahkhat hmu lo pawh i ni bik lo va" a ti a. Hei hi chu a sawi ka ring sa hrim hrim. " a. Nu, ka duh taka ka ngaihzawn, ka duhthusam tak kha a ni miau a. A thlawi dan lah a thiam loh engmah a awm si lo. Kei chuan ka inchhir ka ring lo" ka ti ta hmiah a. Mahse, hmalam huna buaina emaw harsatna emaw lo thleng ve thei mai tur nia ka ngaihte ka ngaihtuah lo tihna a ni lo. 

"Mipain chutianga duh in thlan ngut tawh chuan insawhsawntir theih ni hek lo le..kan hre chho zel ang chu, nau a la pai thei ang maw?" Ka nu chuan a ti a, a serious viau tih ka chiang hle. "Nau chu la pai thei ang, a la upa over hleinem, a duhawm tawk chauh" ka tih chuan a rawn nui hawk hawk. 

"Nuthlawi ṭhenkhat hi chu an hun tawn tawhte hmangin an inzir fing ṭhin a. Chutiang mi chu a nih ngei beisei ang. Mahse, i nihna leh dinhmun hria la, mualpho te kha a hlauhawm aw" a rawn tizui hram. Ka nu nge nge. Ka nuin ka bialnu a iai loh chuan ka pa pawn engmah a sawi nawi dawn lo, a thaibawih e ka tihna a ni lo a nia. Ka pain ka nu a rinngam vang zawk a ni. Ka chhungte bulah engkim ka sawi ta bawk a, lungmuangin hmalam hun pawh ka suangtuah thei ta. Ka lawmna pakhat chu Veronica nena kan inbiakna ṭhenkhat ka lo delete hman kha..hmu ta se, a fawh pawh kha kan infawp ngût lovang. Veroi lahin ṭawngkam a rawn duhtui tehchiam si lo. He nu zia hi a mak riau! Min ngaizawng tia confi taka sawi dawnin chuti faluain a lantir chuang si lo,. Min ngaizawng lo tih dawn lahin eng emaw a awm bawk si. Lucy a ngei ve hrim hrim te pawh a niang e. 

Nu Mawii te zin pawh an la rawn haw lo va, Jeneti pawh a hna ngai a rawn chhunzawm reng, Nupuii a khawngaihzia leh a tawrh ai pawh tawrh a inhuamzia a sawi chamchi ṭhin..ani hi zawng fa nei tawh a ni bawk a, kum lamah la nau viau mah se; puitlin rûkna riau a nei tlat. "Netpui, sawi nuam lo a nih chuan sawi kher lo la, Ramsanga hian a la rawn be thin che em?" Ka ti a. 

"Aw..ka phone a chhe daih sia, min rawn be thei tawh lo. Mahse, ka chhang let ve ngai lo" a ti a. 

"A rawn biak leh che emaw engtin emaw hneh leh che a tum a nih pawn hnar fithla ṭhak rawh aw. An nu pawh a khawngaihthlak ve tho" ka ti nuah nuah a. "Nia, ka duh tawh lo hrim hrim, bakah anu ka khawngaih, a rilru a na leh dawn si" a ti ve thliam a. 

Chutiang chuan boruak muanawm tak hnuaiah Lucy nen kan inkar pawh a ṭha ve zel a, rilru a hlimin ngaih a ṭha e. Veroi erawh a chang changin min la rawn bia, ka leng ngai lo bawk a, ka hmu khât angreng. Mama pawn Lucy a bansan ve ta nge a chimawm rih lem lo. Thla pawh a thar dawn ta a, Nu Mawii te zin pawh rawn hawin Nupuii chu rilru lam doctor te pawh an lo panpui niawm tak a ni. Damdawi an inchawh bakah an infuih nasa a, a ṭha chho ve zel turah ka ngai. An chhungkaw thurûk erawh khawiah mah ka sawi lo. Vena chhungte lam hi an venthawnawm zawk mah, an rilru a la dam hleithei lo tih thawmte ka hria a, an fapa thih dan kha an han ngaihtuah let ang a, an rilru a na tulh tulh a nih a rinawm viau. A sarhû laia hma la duh si lo, se bo hnua se kawngkhar ang mai. Zothana leh Samua te pawh rawn zin an tum khawp mai a, Parteii lahin rawn zui ve a tum ṭang ṭang. Ka hnial lem lo. Kan ṭhianho kan awm chuan kan chhuak vâk leh nasa dawn sia, in nghaktu neih kha a pawi hran lo. Samua'n, "Ka stock nual mai, chên hle ila a ni mai" a rawn tih chuan ka dry-na a rei ve ta hle tih ka hrechhuak. Ka zin tirha ka insûm kha ka la insûm zel a. Lucy nen kan han inzui chho a, Zu in ve ṭhin ang te khan an sawi tak naa hmeichhe zu in mi leh mi lo hrehrang lo tur khawpa â ka ni bik lo ka ti ve tlat. Lucy chuan tunhma a thlawi tirh velah chuan a lo lem ve thin pawh a ni maithei. Mahse, tun hnuah chuan han rinhlelh tur emaw ang hian a awm ka la hre lo. Zu chungchang kan sawi ngai bawk si lo nen, kan picnic ṭum lah khan enchhin ve dawn pawn a in ve ber Kima leh Siama te khan an nupuite an hlauh avangin an keng ngam si lo. Mahse, ruihhlo tel lova picnic kha a va nuam si em. 

Thla thar chawlhni hmasa ber hmang turin ningani zingah ka ṭhiante chu an rawn zin ta a. Parteii pawh a rawn tel ve ta ngei e, Lucy nen an han inhmu ang a, eng tak ang dun ang maw. Keipawh bân hun aia hmaah ka haw a. Kâwnah ka lo hmuak rân mai. Jeneti ka hrilh lawk vek tawh a, in lam ngaihtuah buai a ngai lo. An rawn thleng ta, Samuaa rawn nui vur vur mai. Zothana'n, "Khaw nuam tak a nih hi a " a'n ti nghal ngawt a! Ani hi zawng khawi hmunah pawh hian a tlei thei mai zel. Parteii erawh a rui deuh a, a chauh hmel angreng. Ka in lam panin kan inzui chho ta ṭhâm ṭhâm a. 

Zothana leh Jeneti te han inhmu chiah lai boruak kha engtiangin nge ka han sawifiah ang aw. Kan awm ve tih hre miah lo ang chiah hian an inmelh ngat ngat nia! Ka aw ka then kharh takah chuan an harh nge ni, an phu dun zawk a. Jeneti chu a sen ṭâwn ṭâwn mai! Samua a â lo hlauh a, thildang hmangin a rawn zaizâp thei ta hram. Zothana erawh Jeneti zûnzam a rui nge ni a la hawi hruk hruk mai. A ṭha dawn e. An han intifai a, zanriahte kan ei khamah chuan Lucy rimpui ka tum a. Parteii chuan, "Ka awm ngam teuh lo mai" a ti khauh fung si. "A va buaithlak e aw. Lo kal ve mai rawh" ka ti ta ngawt a. Ka bialnu hmu châk ve reng reng kha a ni bawk nen, a insiam nghal chûk chûk. Kan vai chhuah ta dial a. 

Lucy ka hrilh sa bawk a, ani pawh a lo inring ru ve deuh a niang. Zanin chu ka hmu hmelṭha zual. Zothana leh Samua te mitmeng aṭang pawh chuan Lucy chu ka bialnu hlui te aiin a ṭha zawk an ti tih ka hre thei. Parteii erawh a inthunun thei viau, Lucy chu a phak tawkin a chîk ve hle tih a lang. Lucy pawh a bulah chuan a fimkhur viauin ka hria. Tiang chuan kan inkawm ve ta bawrh bawrh a, kan hlim ve hle. Thingpui tui tak kan in bawk, "U Lucy, i nau hi ka hmuh hnu a ang ê" Parteii'n a tih chuan, "Hmu tawh ang, Aizawlah Higher a rawn kal alawm" a ti mai a. Bena erawh a chhuak rih. A rawn lut leh chu Parteii ta pek chuan, "Benjamin Lalhminglian" a ti ta thut mai. 

 Bena pawh a meng phâwk viau, mahse, rei a chiâi lo. "Zothanpar.." a ti ve ta nghek. 

An nui dun ta hawk hawk a, Ahruaii pawh hamhaih hmel takin a lo nui ve. A hnu deuhah Bena chuan, "Zothanpari leh U Nunpuia te hi unau an ni tih ka lo ring pha reng reng hleinem. Ani nen hian class xii-ah khan kan ṭhu dun alawm, mi ninhlei, mi harh a nih hi, khawvel hi a va zim êm" a ti ta chûl a. 

Boruak a nuam ta sawt mai. A mak hle mai a. Ka nau leh Lucy naute lo inṭhianṭha veleh zel chuan ka ngaih a tiṭhain ka awm a tinuam khawp mai. An zin chau ve bawk nen, rei tak erawh ka lenpui lo. Hawn kawngah chuan ka ṭawng ve hman mang lo. "Ṭhianpa, a chhiat loh kha le..i phû lo lek lek zawk, chhuah miah suh. Fate nu atan chuan khatiang hleitling leh hmelṭha kha an fuh. Nakkumah nei hmak rawh" an ti ham ham mai. 

Parteii pawh chuan zawi sap hian, "A inringtawkin a smart khawp mai. Ngainat harsa chi, mahse, ngainat tawh vek veka bansan theih loh ang chi kha" a ti a. Ka ngaihdan a rawn nemnghet chiang hle. 

Mut pawh a tui narawh e. A tukah chuan Kima te nena kan rawt tawh angin chawhma chhung chauh hnaah kan kal a, chawhnuah zan lên deng turin kan kal dawn a ni. Parteii chuan amaha awm a hlauh avangin Jeneti'n a lo awmpui dawn a ni. Kima, Faka leh keini ṭhian thum te chu lui lamah kan liam leh ta diak a. Sangha an ei châk vang em em pawh a ni lo, lui kal leh ramhnuai han zawh ve hrim hrim kha an duh ber a ni. Siama pawh rawn kal ve a châk tehlul nen, a kawng a herh pek a! A che hleithei meuh lo. Hah pawh hrechâng lek lovin lên chu kan deng ta a, Zothana hian a thiam ve sawih sawih a, Samua nen erawh mau thei kan lo keng ve thung. Kan man tam lutuk lo, vawikhat ei ṭheuh chuan kan insem ve thei hram. Mahse, nuam kan tih ber pawl a ni bawk a, kan hlawk tho mai. In kan thlen chuan Jeneti leh Parteii pawh an lo awm ran a. Jeneti leh Zothana te hi engtin emaw sawirem an ngai a ni. An inmelh no thei em mai. Mut hmunah pawh Zothana chuan a sawi ve sûp sup kha. A tuk chu kan rawl ve deuh bawk nen, keini pawh bank hawn loh nî a ni bawk a, kan awm mai mai. Lucy hi lengah ka sawm ṭhin a, mahse, a duh ngai ṭhak lo. Vawiin pawh ka sawm leh a, mahse, min hnial. K'u Pari ka be ta vat a, ani thluak hmang thiam ta na nâ na chuan kan inah rawn len a rawt a,Lucy pawh chuan a rawn zui ve lo thei ta lo. A û Pari thu hnial a hreh piahlamah ka bula awm a châk ve tho tih ka hre ve kur. Ka ina kan han awmkhawm mam mam chu kan hlim dar dar hle. Kima te an la awm ve lo mah mah, Samua leh Pari an inzûrâ nghal hle. Fiamthu an thawh thiam bawk a, anni vangin kan khi ṭhâw reng mai. 

Eitur chu Lucy leh Parteii te'n an siam a, tikhan inbe tamin inkawmngeih se ka duh a ni. Jeneti pawh ka call chho a, Zothana hmel hmuh a nuam leh ta. Chance pek ve deuh ṭhaa ka hriat avangin Jeneti chu ka thawmhnaw ka thleh ṭhattir a, Zothana pawh reivakloah a va lut ve ta zuk. 

Lucy chuan, "Samu, Mami nge hmelṭha keimah?" A ti khauh pek a! Samua lah chuan, "Nang chu angel ang mai alawm i nih. Mami chu a hmelchhe lo, mahse, rinawmna a tlachham deuh a ni" a ti ham ham. Ka lo lai ve ringawt. 

"A nih Nunpuia ai hian ka upatna a lang em?" A ti leh a, "I naupang zawk lo maw? A va'n mak" Kan Samua ṭhin hi chu aw..

"I ṭhianpa hian ṭhian a nei fuh hle mai che u" Lucy pawn a ti ve ta nge nge. 

Sunday tlaia chaw eikhawm kan rawt a, Kima te nupa pawh an rawn tel ve thei tawh ang chu. An haw hnu lawkah Jeneti pawh a haw. Zothana khik sûng reng danah a hlawhtling a ni tih kan hrethiam. "Ka ru haw daih dawn mawni le" a ti sek lehnghal. Zothana hian ama pualin dawr a nei ve tawh a, amah misual a nih loh bakah an chhungkua an pangngai bawk nen, Jeneti tan pawh ka duhpui hle. Inhmangaih reng teh se. Zanah Lucy rim ka tum mêk laiin K'u Pari'n min rawn bia a. "Miteii lung ṭha lo a chhuak leh a, hei kan rawn chhohpui dawn. Lo insiam rawh" a rawn ti khur hlak hlak a, a awki a dan êm avangin ka thla a lo phâng deuh. Ka ṭhiante pawh chu bengvar takin an insiam ve zung zung. Pari te chu kan lo nghak ta a. An rei lem lo, motorah kan inhnawh ve rawp rawp a, kan tlan chho nghal. Miteii chu a nuin a pawm bet a, a ko mawlh mawlh reng bawk. Rawn zuitu an tam danah a serious tih chu a lang chiang khawp mai. Lucy erawh a ze nghet tak, nghet churh reng kha a bo miah lo. Chiâi hmel a pu lo va, a fanu tan chuan kulh nghet tak angin a awm reng mai a ni. Kan thleng chho a, Doctor a lo awm lo zui! Nurse ten an theih ang angin an buaipui naa rilru a hah ṭan ta hle. K'u Pari a âng ta a. "Kan Doctor pa lah hi a zin reng a, haw reng mai. Doctor ve si, ti nge a hna hi a va tlin lo em em ve, duty tur a nih laiin hetiang hna hlen lo lutuk chu ban daih tur alawm, mai mai a na" a ti buan buan mai. Ka va thlâwp chiang tak êm. Khawpuiah awm se a inthlahdah ngam dawn hauh si lo. 

Miteii chu a mu zawi reng a, a marphu leh lungphu a muang telh telh mai. Lucy chuan a chelh rân a, "Bawihte, Mitê, i ṭha em êm ang. Ka duat, harh hram hram rawh aw" tiin a ko mawlh mawlh reng a. Kei pawn Miteii chu a khât tawkin ka ko ve reng. Tupawh mai chu kan thla a phâng a ni e. Nurse Chhani an tih kha lo kalin , "Bawihi, doctor a awm si lova, hetah chuan hei bak tihtheih kan nei si lo. A rang lamin hmunpui in pan mai dawn em mawni le" a rawn ti ta a. Lucy mittui a rawn hnâm nghal. Min rawn en a, "Kal nghal ang u" ka lo ti nghet charh. A mitmeng ṭanpui ngai ngawih ngawih kha hmuh fo ka va duh lo tak êm. A inhmeh hlawl lo, ani chu hmeichhe chak tak a ni si a. 

Remlala te nen kan han sawi ho a, Lucy Pa, Miteii pu phei chu inah a awm daih, a thlaphân êm vangin a kal ve an lo phal lo a lo ni. Kan sawiho lai chuan Miteii chu a rawn ṭha leh deuh a, a thaw pawh a rawn dik ṭan. Kan va lawm tak. Chutiang a nih avang chuan a nu Lucy thu angin, zanin chu kan ngaichâng dawn a ni. Dik tak chuan a zan azana han inphurh chhoh kha kawng a ṭha vak lo nen kan han khaw loh phah kha a hlauhawm ve deuh bawk a. Ka rilrua ka ṭawngṭai nasat ber ṭum a ni hial awm e a. Hetiang em em hian Lucy leh a laichinte hi ka lo hmangaih thei ang tih ka ring pha ngai lo. Hmangaihna hi rei tak inkawp avanga lo awm a ni lo tih ka chiang ta hle bawk. Ni e, Lucy hi Luciferi a nih chhung chu ka hmangaih tlat dawn a ni. 

Dar 12 rik dawnah ka ṭhiante chu ka hawtir a, K'u Pari pawh kan nawr lui tlat a, a haw ve hram. Lucy nen Miteii chu kan awmpui dawn a ni. Damdawi inah awm ve dang tumah an awm lo va,. Mahse, Lucy bula ka awm thei tur leh Miteii ka awmpui ve tur chu ka lawm zawk. A landanah a ṭha chho ve leh mai dawnin a lang bawk si. Ṭhiante leh Lucy unaute ho kan vailiam zo, kan lut leh tur chu..Lucy chuan, "Ka lawm e aw" tiin min rawn melh zauh a, a mitmeng de sawr sawr chu lungchim taka melh vein, "Ka fanu nihtir vat ka duh a ni" ka lo ti sup a. 

"Mipa i nia..i thu thu aw" a tih ri chu ka bengah a va ngaihnawmin a va mawi tak êm..