Nuthlawi 8

NUTHLAWI (8)

Ziaktu : Toni Râlte

A zawhna awmzia chu ka hre lutuk tlat. Fanu nei tawh a ni, a fanu a phatsan dawn lo va, amah neih ka duh chuan a fanu pawh ka kentel ve zel a ngai dawn tih ka hming ka hriatchian tlukin ka hrechiang. Engpawhnise, ka chhan ngei chu a ngai ang. 

"I fanu hi kan fanu a nih hunah 'Pa' tia min koh theih i ring em?" Ka ti ta a. A mitmeng buai nak kara phurna lo lang zawk chu ka hmuhhmaih hauh lo. Ka chhan dan chu a beisei loh lam a ni ang tih pawh ka ring. "Ka thu a hnial ngai lo" a ti ve ta sak a. Kan inchhang tawk dun fû mai a. Remlala lêng a rawn haw ta sia, kan sawi zawm ta lo. Tv enin a rawn thu ve ta bawk nen,. "Kha, Nunpuia chu Jeneti i chhawr a ni maw? I tiṭha hle mai a" a ti thûm dût a. 

"Tihṭhat pawh a ni lo, an khawsak dinhmun khi a harsa ve êm mai a" ka ti ve a. Thingpui hâng ka in leh tê tê hnuah muangmarin ka tho chhuak a. Remlala pawh a zei fû roh mai, a pindanah a lut thek. Kawngka bulah reitawk fang kan han infâwp leh a. Inmangṭhain ka hawnsan ta a. Kan veng lam hi a han san deuh vang nge boruak a dai riau a, zanin pawh a vawt sûk mai. Thlasikah phei chuan a hik ve riauin ka ring. In ka luh rualin current a rawn thim chut pek a. Ka phone ka kensa avangin ka buai lo hlauh. Keia ngaihtuah kim lo khan mombati takngial pawh ka lo lei si lo,. Thimah chuan ka mu ta kur a. Thim hi ka hlau lem lo naa, ka thaw a tipik deuh ṭhin. Lucy nen kan intext zuai a, a fanu mutchhuah hun hi a mut hun a nih ve mai avangin reitak erawh kan intext thei lo. Keipawn hriatthiam ve zel ka duh rih. 

Zanin hi eng nge a awmzia ni..ka mut a chhuak thei dêr lo. Chhunah ka muhil azeng pawh a ni si lo. Ka taksa chuan mut a mamawh, a chhuak hlawl si lo chu a buaithlak. Mut tihchhuah nan thawnthu te ka han ngaithla ngawt ṭhin..ka harh tulh tulh. 

Ka tal ka tal hnuah dar 1 pelh velah chuan ka hriat loh karin ka lo chhing ve hlek a. Mahse, ṭap kerh kerh thawmin min kaiharh leh ta tlat. Dar 2 leh a chanve a lo ri ve mêk bawk. Ka inbeng kang a, Current erawh a la awm lo. Ṭap ri chu ka in piahlam ramhnuai aṭanga rawn ri niin ka hria. Ka mutna pindan hi ramhnuai lam kha a ni hrim hrim bawk a. Chawl loin a ṭap zel a, a ring hran lo, mahse, ṭap ri zawng a ni chiang. Nuhliri leh bawk em ni ang? Ka ring chiah si lo. Vena ruang thlak zan a lo ni bawk nen, ka hlau em em lo naa thinthia muthilh erawh a har viau mai. Hmeichhe awrâwl zawng a ni chiang mai a, va fiah tur meuh chuan ka ngam lo ti duh si loin ka châk zawk zawk lo a ni ber awm e a. Ngaihzam tumin ka inlukhup thawk a, ka chhinsan ta daih. Ka harh leh chuan khua a lo var iarh tawh. Thla a muang nghal suai suai alawm le. 

Sunday a nih bakah ka hming ziah nî a nih avangin phur ru takin ka tho a, ka taksa rawl vel pawh a zia angreng viau. Chawhmeh ṭhing ka ring leh thei dawn e. Inkhawm tura ka chhuah pahin ramhnuai lam chu ka va melh zauh a, engmah hmuh tur a awm lem lo. Min tibuai leh tithlabâr zawngin a che lo bawk a, palliam mai a ṭha e. Parteii min leisak kamiz senduk ka taksa nen inrem thlup mai ka ha a, kekawr dum ka ha bawk. Pheikhawk pawh a dum. Hetianga inchei hi ka duhdan a ni fô, rawng dum ka ngaina a, ka ngainat lohna awmchhun chu hmeichhiaah a ni mai awm e. Hmeichhe vun êng lam zelin min hîp ṭhin. Nu Mawii te nufa kal mêk ka zu umpha a. Nupuii erawh ka hmu lo. "Khaw nge?" Ka tih chuan, "Ani hi ka hrethiam lo, inkhawm hi a thatchhe lutuk, chhuanlam a siam reng a. Tunah pawh ka insûk ngei ngei a ngai a ti leh tlat a. Naktukah Chawntlangah a va zin ve lawk dawn nen" nu Mawii chuan a ti duah a. Jeneti pawh an inchei chuan nula tak tak te pawh a ang alawm le. 

Inkhawm kan tam leh hle. Keipawh min dintir ve zuk kha..mipui hmachhawn vak ngai lo tih takah ka zâm leh viau. Lucy te pawh hnunglam aṭangin ka va hmu, Pari nen bawk an ṭhu dun. Banah Sawmtea nen bawk kan inkawp leh a, sawi tawh angin Kima te ho chu titi a rual lo lek lek zel a, nuam lo an tih ka hlau zawk ṭhin. Marovi leh Veroi te pawh an rawn lang ve vat a, "Thingpui rawn in u la" Marovi chuan a tih tlat avang leh Lucy te chu an fate châng sawi rual tur an enpui a ngaih avangin Sawmtea te chu ka zui ve ta nge nge a. Marovi nu Pi Thari an tih chu a felin a ṭawng duh hle. A pa erawh a lo la haw lo thung. "Noodles chhum ang u aw.."Veroi chuan a ti a. A siam nghal mawlh mawlh bawk. Pari sawi kha ka hrechhuak, hetia en mai chuan khawlai mi ve tak a nih duh loh hmel viau, a hresual ve te pawh a ni maithei a ni. Zothana tana ka hual ruk kha a nia, an inkawp thei mai turah ka ngai. "Nunpui, Aizawla chhoh i tum hnai em?" Tih pahin min rawn melh a. 

"Tum hran lo ve. Ti nge?i tum deuh mi?" Ka tih chuan, "Tum chuang nang. Ka awm ve reng rih ang. Aizawl chu ṭhianten pasal an nei vek tawh a, a nuam lo" a ti ve duah a. 

"Nia awm ve reng rawh. Pasalte pawh i nei ang chu hetah" ka ti hlut a. 

"Hmm,. Neih tur pawh ka hre lo e a. Nang chu i nei dawn chiangsa" tih pahin a nui a. 

" A chiang sa ngawt lo" ka ti nghut. "Chiang reng. Mahse, i luhkhung ringawt ang e aw. Mipa tih a thiam sia, a rap hrual ve nek mai ang che" a ti ta bawrh bawrh a. A ṭawng dan chu mak ka ti deuh. Sawmtea leh Morovi te erawh thlalak an en a, an rawn hre ve kher lo maithei. 

"Rap hrual bik lo ve a" ka ti ringawt a. 

"I duap ve hmel ropui sia, Lucy aia ṭha hi chu i hmu ve ang mawle" tiêl lek lek hian a ti leh. 

"Hmu lo a niang" ka tih chuan, "I zawng tlat lo alawm, i bur nghal chawt a. Ngaihtuah tlemthlak lutuk, an background te hi chhui ve tur, mi pangngai nih chuan" a ti leh duah a. Chhan dan tur pawh ka hre lo e a, Vanneihthlak takin Sawmtea te an rawn phei hlauh a, thudang an sawi ta daih a, ka thaw huai mai. Veroi ṭawng duhdan aṭang chuan Lucy chu a lo ralkhat ngei ve ringawt tihna nge a thîk zawk? Thîk nise ngaihbel theih tur tal pawn ka lakah a awm tur a ni. A awm bawk si lo. Mak ka ti ru viau mai. 

Noodles chu kan ei a, kei ka ngaina ve vak lo. Mahse, ka ei tui phian. Lucy text ka dawng a, min be hmasa khât viau. "Kan haw tawh aw. " Tih tê a ni. "Aw, ka rawn haw ṭêp" tiin ka reply a. Marovi ta pek chuan, "Vena chuan thawm a nei an ti tlat! Nizanah inriak tlangval hoin an hria a niawm e. " A ti a. 

Sawmtea chuan, "Zorina pawh khan a sawi ve nuah nuah a, ka lo ngai thutak lem lo va, a hrân te pawh a hrang ang. A thih dan kha pangngai hek lo" a ti puat a. Ṭap ri ka hriat vel kha sawi ka tum zet a, hriatpuitu ka nei lo bawk nen, ka ṭhulh leh ta mai. A kamtamthlak mai mai. "Kan ineipuar zo chiah naa, Zoteii te ina penkawi ka duh sia, ka chhuk mai teh ang" tiin ka ding vut a. Veroi chuan, "A nih loh kha, in nu i hlau a nih kha" a lo ti zauh. Ka nui hawk hawk, ka chhang lem lo. Sawmtea nen zan lama inhmu leh tura intiamin ka hawnsan ta a. Zoteii te chu mikhual an la nei ve dih diah sia, ka kalpel leh ta phawt. "K'u Pari te inah ka awm" Lucy'n a rawn tih leh takah chuan Pari te inah ka chho a. An pahnih hian mûk zetin an lo titi. "In va mûk em em" ka ti nghe nghe. "Nia, thu pawimawh deuh kan sawi a" Pari chuan a ti ringawt. Lucy erawh inthunun a tum viauin ka hria. "Ka hriat ve chi te a ni em?" Ka tih chuan, "Nih loh pawh a awm lo. Ka û chungchang a nia" Lucy chuan a ti a. 

"Ti nge i û chu?" Ka ti ve mai. "A bialnu ṭawngkam vel ka hria a, vawiinah, ka lawm vak lo mawle" a ti a. 

Han zawh thui vak kha nuam hek lo, ka ngawi ta ringawt. Pari zawk chuan, "Zawh chin chiah hi i sawi ṭhin a, nangpawh hi a. Tak taka! Remlala bialnu chu i hriat theih dan tur chuan..Nghakteii te in ep chiah khu a nia. Nancy a nia. A fel reng, fel pawh. Mahse, a nu khu a nasa ve a. Nizanah a ṭhiante bulah, 'U Remlala nen kan inneih chuan thla khat pawh an inah khian ka awm lovang. Luciferi lal hrawtna hnuaiah ka khawsa peih lo, a fapa pawh khi ka enkawl peih teuh lo. Min ṭhen ngam chuang lo va, ka indanpui hmak ang' a lo ti vel niawm tak a ni. Nu Dari te monu nau Hriati'n Lucy a lo hrilh ve leh sia, kan Luciferi rilru a na a nih kha" a ti ta mawlh mawlh a. A hmeichhe thuhla han ti dawn ila, chhungkaw nghawng thei a nih miau avangin palzam mai chi niin a lang si lo. Lucy chu han sawipui vak dan ka hre lo hle. 

"A va zia lo ve, a fiamthu te hi a ni zawk ang em?" Ka ti a. 

"Fiamthu lo nasa, a hma deuh pawh khan tianga a ṭawng hi chu kan hre zauh zauh. Lucy hi a huphurh zual a, Remlala hi indanpui nghal vat a tum ber" Pari bawk chuan a ti a. Lucy chuan, "Indang tur an ni tho a, indantir loh kan tum pawh a ni lo. Hetia min hmer tel teivet hi ka ning. Ka vawikhat ṭhuai pawh a dâwl awm si lo va.." a ti hmuar hmuar a. Amah zaidam lo chi, ṭawngka vîn a ni bawk nen, a sawidan vel chu a inhmeh angreng. 

"I û hrilh hre ve la, aman a zir a ngai a nih chu" ka ti a. 

"Awii, duapzûla a nih hi. Nancy'n a lo kawp ṭum pawn a ngaidam leh hmak. A ṭhen thei lo tak tak a. Chuvang alawm a bialnu pawn a zuam em em" a ti leh hrep. Sawi tur a vâng viau. Pari zawk chuan, "Keiman Remlala chu ka titipui ang, Eizawnna nei a nia, Nancy aia ṭha a hmu tam lutuk. Lucy lo huphurhin lo er lawk pawh nise, Remlala Fapa lehzel a ngaitheilo hi ka ngaithiam lo. Remlala te chuan û angin min en a, ka sawi chu a ngai haw dawn lo" a lo ti sawk sawk a. Ani hi zawng a patling ruih zel. 

A tlai ve tawh nen, Lucy chuan chaw a ei nghal dawn avangin ka hawnsan a. Zanah khawhar ina kal kan tum. Jeneti leh Nupuii ten rawng an lo bâwl leh a, siam belh ngai a awm lo bawk a, an âwlthâwng viau. Nupuii zia hi mak ka tihzâwng tak a ni. A zakzum ni pawn ka hre lo, a inla hrang ka ti mai. Ama khawvelah amah chauhin a cheng ni hian a lang. Jeneti nen chuan an zia a dang ve khawp mai. An hawn hnuah chaw ka ei a. Inkhawm banah khawhar ina hunserh pawh hman chauh tur a nih avangin ka hmanhmawh lem lo. Ka inbual zo inthlak laiin kawngka a ri rak a, ke pen thawm ka hre zui zat. "Tu nge?" Ka ti a. Ke pen ri a tawp chawt, ngaihṭha vak loin ka va chhuak a. Nuhliri bawk! Min nêl ve nge ni min zuam zawk. A lo nui vur vur a, a râpawm lek lek. "Eng nge ni ta?" Pangngai takin ka ti a. 

"Nizana ṭap kha tu nge i hria em le?" Naupang thil thar nei, intithei taka ṭawng hi a ang.."hre nang, i hria mi?" Ka lo ti vat a. 

"Umm, ka hre rin ranah. Mahse, ka sawi dawn lo. Enteh, ka mawi em?" Ti leh daihin a derhken par bawk chu a bengah a zep vâ a. A khi vûn vûn bawk si, a lawmawm angreng. "Mawi lutuk, hei khua a thim tawh sia, han haw rawh. I chhung ten an ngaihtuah ang che" ka ti a. Nuhliri hi Nghakteii'n a chanchin a sawi aṭang khan lainatna ka nei tlat a, chutin hnawksak ka ti hran lo. Mahse, ka chhuak dawn sia, a buaithlak. "Umm,. Ih maw..sahdah ka nei tawh lo va" beisei nei zet hian a ti a, pawisa ka va la ta vat. Ka pek rual chuan, "I fel si, nakinah thil tê tê ka hrilh ve ang che" tiin a nui sen sen a, a chhuak nghal. Ka hmuh hmasak ber khan kum 40 hial a kai tawh ka lo ring kha a nia, ka hmuh chian tawk loh vangte pawh a niang. Kum 30-35 bawr vel chauh a la ni. A lainatawm reuh khawp mai. Ngaihtuah zui vak duh lovin ka insiam a. Ka chhuak zui ve nghal. 

Khawhar inah kan ṭhu hrang a, Veroi te nen tlar khatah an la ṭhu zui! A hnu deuhah Remlala leh nula pakhat an rawn lut ve a, A bialnu chu a ni ngei ang. Nula tê lam, ria lam deuh, hmaifang erawh chhe lem lo a ni a, make up erawh a inbelchhah mah mah a ni. Zai a nuam viau a, ṭhalai pawh kan tam e. Banah ka chhuak hmasa zawk a, thingpui lumna bulah ka lo nghak. Pari nen an rawn inzui phei a, an hmaah Veroi te an kal bawk. Ka zâwn an lo thlen chuan Veroi chuan, "Pathlawi, naktukah ka rawn kal ang. " A rawn ti zauh. Lucy chuan a hre pha tih a rawn hawi danah ka hre thei. A ho ê, khatiang mai mai. 

"Pathlawi i ni em ni?" Kan haw kawngah chuan a ti ta ngei a. Ka nui huk , "Ni mai mai lo" ka ti a. 

"Veroi khan a va ngamtlak che ve. " A ti leh nghat. "Aw kan inhre ve a, chuvang a niang" ka ti ringawt . Kan hnunga nula rual khat kalte zinga a tu ber nge ka hre lo, ring angreng fâ hian, "Mikhual hlah ngai lo kan nei te hi a lawmawm ê..pawih thingzai te chu melh leh peih ṭhak nang" a ti lâwng lâwng a, an nui ham ham bawk. Lucy chu a ding ta chat mai. Pari zawk chuan, "Inngaihbel duh suh, i insawi âwk mai mai" a ti ta hlauh a, a kal ve leh mai. Chumite lah chuan duhtawk mai loin, "A tu zawk nge loan pûk kan dil ang? Thenkhat te an thu hmel zawk bawk sia" an ti leh a, ka ngei ve lek lek. Lucy chuan zawi sapin, "Rosangi leh a uitê te an nih chu. A damchhunga min er reng renga hun hmang tur a nih saw" a ti a. "Engahmah ngai suh. An cheap lutuk" ka lo ti ve hmuk. Pari te ina kan pen dawn lai chuan, "Mi ina mikhual tlangval rim hi a hit riau an ti leh tawh. Min chimbuai tur fate an awm lo va" a tir ami bawk khan a rawn ti lehpek a, Lucy kan khap zo ta lo. A inher a, kan lam pana rawn phei mêk, nula palite chu lo hmachhawnin, "Rosang, ka bialpa hi i lo star lehpek em ni? I tihtheih hi a tlem si a maw? I khawngaihthlak. Kei anga luck ve i duh chuan, taima takin hnate thawk ve la, nilêng lênga mi rêl lo khan..i mizia te hi siamṭha ve la..chuan, i luck ve mai ang" a ti ta siah siah mai. Pari chuan, "Ṭawngtir mai mai rawh. A mood a chhe zual mai mai" a ti sap. 

Rosangi an tih chu thau lam,sang lo ve tak, a hmel phei zawng make up vang nge ni a chhe em em lem lo, ka duhzawng erawh a ni lo chiang. "I lo inngaihbel ve ringawt elo? Inngaihbel âwm tawk tê tê hi a awm ve a nia. Nang anga luck nihte chu duh ila inchei a ngai nang. " A ti tân tân a. 

"Thaui.." Lucy chuan a ti hriam hraih a, a rawn phei ve leh daih. Mahse, A nihna hmanga a han chhan tak fawkah chuan Rosangi chu a sa ta kher mai, a ânhla zawng zawng kha ka hre sêng lo. "Nang anga mipa duh huam huam ka ni ve lo,. Inla nungchang ṭha, nuthlawi ni chunga inla fair der vel,. Mi huat hlawh i nih kha..mipa ho pawn fiamthu nan bak an hmang lo che. Zak hle rawh" tih velte a ni nuaih. Lucy lah ngeiawm zet hian, "Chho ang u. A mawl lêng lûng si. Tihian a mawnghlim leh mai mai rawh se" a ti a, kan chhohsan ta daih. Kan boruak tawn tehhrep chu aw. 

Ina kan luh chuan, Nuteii te chu an lo mu tawh a. Lucy chuan,"Ka awm rei lo vang. Mampuia a damṭha si lo va,." A ti a. Pari'n thingpui a lum nghal rak rak. 

Lucy chuan min lo enin, "Eng nge i ngaihtuah?" A ti nghat a. "Engmah ngaihtuah lo ve, kha mite kha an mak ka ti" ka ti ringawt. 

"An dan alawm, A mak ngawt mai. Rosangi min han er dan em em hi chu! A pawi ka sawi pawh ka hre si lo" a ti hlak hlak a. 

Pari chuan, "A pawite chu sawi e a. A tleirawl chhuah aṭangin Mama atchilhtu a nih kha..i theihnghilh ta mi?" A lo ti a. Ka manthiam chiah. Mama kaihhnawih thil pawh chu a tam reng reng e a. "Ninawm, he pa vang hian buaina ka tawk ve ziah. " Lucy pawh chuan a ti ro hak. Thingpui kan in a, zan te a lo rei ve ta bawk nen, Lucy lah a hmanhmawh angreng si, kan haw ta phawt a. In ka thlen chuan ka inthlak sawk sawk a, ka mu nghal. Ngaihtuah lêm pawh ka nei vak lo. He mi khaw mite zinga a chanve zetin Lucy hi an mil lo niin ka hria. Faktu an awm tho nain a lang apâu pawha rêl duh an awm zel chu amah pawh hian dik lohna tam tak a nei ve ngeiin ka ring. Remlala bialnuin zak ṭhak lova a hmuhmawh thu a sawi ngam danah, huphurhawm tak leh hrawn chakawm loh takte pawh a ni ve maithei. Lucy sawi ang deuh khan thudik ziktluak hre si lova ngaihdan siam tawp mai an tam hmel bawk. Engpawhnise, chung an thusawi nazawng chuan Lucy ka duhna leh thlakhlelhna an hnawtkiang zo chuang lo. Nuthlawi a nih vanga ngaizawng ka ni lo va, a hmasa berah chuan hmelṭha ka tihzawng tak a nih vang a ni phawt, a dawtah a mizia ka hrechiang zel a, mipa laka a awmdan, amah zuam ve ngawttu te chunga khawngaihna a lantir lohzia te thlengin. Chu chuan zûng kaiin ka duhna a rawn tinghet ka ti mai. Hmeichhia a nihna angah chuan a nu a, thinlung nêm tak pawh a neih ve ka ring. Mahse, a hunah chuan mipa ang maia kawlhsan a ni a, chutiang hmeichhia chu ka la tawn ngai loh avangin ka ngaisang letling te pawh a ni maithei. Tin, a ruka samari mi ṭha a nihna te pawh hmaih theih a ni lo bawk ang chu. 

Zanin chu eng thâwm mah ka hre ta lo. Ka mutui viau e. Ka harh chuan khua a var tawh a, muangchangin ka insiam. Office tlai hi ka hlau ṭhin a, nghah nih ai chuan nghaktu nih hi nuam ka ti zawk. Jeneti pawh a rawn thleng chho hma angreng. "Vawiin chu i hlau tawh lo ni maw?" Tiin ka lo nuih a. 

"Hlau lo, chhunah chuan..tlaiah Nupuii a lo chho ang. Û, i awmna hi sawn daih rawh" a ti pek a. 

"Ngah maw?' ka lo ti vat. 

"A nuam lo. Ṭhenawm i nei bawk si lo, U Zoteii te in bul velah khuan awm ve daih la" a ti a. 

"Awmna tur a awm ngawt si lo alawm.." ka lo ti ve mai. A nu Aizawla a zin tur thute a sawi ve luam a,. Nupuii entir a ngaih thu te, "A eng nge nâ?" Ka tih chuan, "Na tia sawi tur a nei lo. Mahse, zanah te hian a hâ a ṭhial nasa thei lutuk, bakah muthilh te a harsat a, chaw a ei thei bawk si lo. Rual a pâwl lo lutuk te hi Anu a mangang a. Han entir a tum deuh tawp, A ṭhiannuin a rawn chah ve reng bawk sia" a ti melh melh a. 

"A va pawi ve aw. Nia, han zin se la, an zin chhungte chu hetah i rawn awm ve daih dawn nia" ka ti a. Ka insiam zo va, ka chhuahsan ta a. Nuhliri kha hmuh leh ka duh riau mai, rilruah hian a awm ve veng veng zel nia! Ṭap ri te kha engtin nge a lo hriat ve tehdaih ni..uang deuh khan tu nge a nih tihte a hre ve leh lawi bawk sia. Ka chhuk mêk laiin Morovi lehVeroi bakah ka la hmuh loh mipa pakhat hi car-in an rawn chho a, Vero chu a hnungah a ṭhu a, a chauh hmel angreng. "Engtizia nge?" Tiin ka va dâk ve a. 

Marovi zawk chuan, "Hei tukin dar 4 vel aṭang khan a thaw a rawn hah thut a, kan han ngaichâng a, a zia leh mai dawn emaw kan tih laiin chaw eikham aṭang khan a rawn zual leh sia, kan chhohpui lawk dawn a nih hi" a lo ti sawk sawk a. Veroi chuan chhan pawh min chhang peih lo. Biak vak chi nia ka hriat loh avangin "Chanchin ka rawn zawt leh ang che u,. " Tiin ka kalsan ta a. A mak tehthut mang e. 

Bank ka thleng a, Nu Mawii pawisa kha chu amah nen sawi dun leh ṭha ka tih avangin safe-ah ka la dah rih. Fix-a dahtir ringawt pawh nakinah an buai phah ka hlau ve deuh bawk sia. NREGS hlawh lut lam kan buaipui a ngai. Kima leh Mapuia pawh an buai viau. Zoteii pawh Vena te in lamah pawh a leng hman bik lo. Nizana Lucy tieltu Rosangi pawh kha a lo kal ve ngei, a tawng duh ve thawkhat a niang, a ka a chawl mang lo. Mapuia te ka va pui ve ta bawk a, hna a sâwt ta deuh. A veng thlera an lak mai loh chuan nikhatin min daih dawn tlat lo. Nu Biaki pawh ka hmu, eng a hria chu ni maw min be lem lo va, ka be lem bik lo bawk. Lucy nen kan chungchâng a lo hre ve tawh ang a min do te hi a ni maithei bawk. A ho sih sah em mai. Thingpui in chawlh pawh chhuak thei hek lo, Nu Dari nula chhawrin min rawn pek chilh ta tawp a. Hmanhmawh takin kan namliam a ni mai e. Lucy te chhungkua erawh Ahruaii'n a rawn la ve a, Ahruaii hi samkir chhep mai, hmel ngaihnobei ve tak a ni a. A aw hi a thâm ṭiak a, a mawi angreng. "Mampuia a la ṭha hleithei lo va, ka û pawh a ṭhu hman meuh lo" a ti a. Lucy khan a rawn sawi hrim hrim a. Mampuia hi a û te inṭhen khan kum 2 emaw vel chauh a la ni a, Miteii hi kum 1 vel a niawm e. Lucy hian fa pahnih a pawm a ni ringawt mai, Mampuia pawn a nu ang thawthângin a ngai rêng bawk. Remlala tan pawh a farnu chu a hlu ve khawp ang. Darkar chanve dâwnin kan bang tlai. Ka chau ve deuh. Hna hrâm thawkin hlo te va thlo bawrh bawrh lo mah ila; mipui huhâng vang ringawt pawh hian chauh ve theih tak a ni. Jeneti leh Nupuii te haw lam nen kan intâwk a. Chabi hi a spare ka kawltir law law kha a nia. "I rei sia, Naktukah zin an tum sia, insiam nen..kan haw ta mai" inthiam loh hmel deuh hian a ti a. 

"Imm, nia..kan laklawh lutuk a" ka ti mai a. 

In ka thleng a, ka pa nen kan inbia a, ka pa nen hian phone call hi chuan kan inbe khât angreng, a pawimawh viau a nih loh chuan. 

"Hei, Hmuna a rawn phei hlawl mai a. Engtia ro han rêl chi nge mawni dawn le? I û lahin in hrang an chan dawn loh chuan hawn a duh bau si lo, Hmuna lahin i û hruai haw lova hawn a tum bik bawk si lo" a rawn ti a. "Inṭhen ringawt zawng a ṭha lo, Bawihpuii te an khawngaihthlak. Haw phawt se la, in hrang chan pawh sawi ve leh se, chuta an la ngawi tlat a nih leh khalam kha chu ka û duhdan a ni tawh mai. A vawikhatna a ni sia, haw ve leh phawt rawh se" ka lo ti a. Ka pa ngaihdan pawh a ni. Ka û ka khawngaih loh vang a ni lo, mizo danah thil mawi leh mawi lo te hi a awm ve miau si a. Thiamchan nan pawh ka û chu let leh se ka duh a ni. Ka pa nen kan inbiak zawhah kan innêl tho tiin U Hmuna pawh ka be ve a, "Inpui luah tur in ni chuang lo bawk a, i nau te tan pawh awmho dul dul kha a inthlahrunawm zawk daih thei. In hranga awm tak avang hian an intihrang vek tihna a ni kher lo, engkimah intuamhlawm vek theih a ni. I ngai thutak leh lutuk a niang. Nupa inṭhen phah nana hman chi pawh a ni lo a nia..". Ka ti hmiah hmiah. "Nia, a dik chiah. I û bulah pawh ka sawi tawh alawm, 'Haw phawt ila, in luah tur pawh ka be lâwk vek tawh, thla thar veleh luahlut turin' ka tia lawm. " A rawn ti ve leh thluam a. Ti kha chuan ngaih a ngam ta deuh e. 

Chaw ka ei a, ka ei kham ka tui awm zat ka en dik laiin Ramhnuai aṭangin Nuhliri a rawn chhuak leh ta hlawl mai. A hmaa a zia ang lo takin a ngui nghiai a, a za mang tlat lo. Mi melh run run bawk si, "Eng nge i tih?" Ka ti thâwr a. 

"Engmah. Ka haw dawn" felfai zet hian a ti a, a chho nal nal. Makti ru deuhin keipawn ka luhsan a, leng turin ka insiam nghal. Marovi te kha chanchin ka la zawt miah lo tih ka hrechhuak leh hnuhnawh. Ka call ta chung chung a, "Hei kan la zia thei vak lo, Nebulizer a hîp a, mahse, chutia serious em em a ni lo e. " A ti a. 

Ka ṭawng leh hmain, "Sawmtea a rawn chho mêk, a rawn sawm dawn che. Lo kal ve rawh" a rawn ti hlut a. Ka chhan hmain midangin an lo be buai sia, a off leh daih bawk si. Sawmtea lah a rawn lang ve nghal zat lehnghal, inthurual te pawh an ang alawm le. 

"Kal ang" tiin min nawrseh tlat sia, lehlamah Marovi avang pawn han kal ve chu ṭha ka ti tho, hmelhriat ka neih hmaa kan rim hmasak ber, min be tlangnel thiam em emtu kha a ni ve a. Lucy erawh ka be hrâm, "Aw han kal rawh. Keini pawh nakin deuhah kan rawn kal dawn,. K'u Pari a la hman lo deuh a. " A ti thliam a. Buaina a awm êm lovang chu tiin ka chho ve ta a. 

Kan han thlen chuan Veroi leh Chawntlanga nau nei bak awm an lo awm lo. Marovi bakah tlangval te khan an lo la awmpui a, kan va ṭhu lut ve. Veroi pawh rin aiin a harh ṭha. Thawhah ṭhin hrim hrim a nih thu an sawi a, a vanduai hle mai. 5 mins vel kan ṭhut hnuah tlangval chuan, "Mami, zial ka va zu lawk" tiin a chhuak a. Marovi lah chuan, "Sawmte, Nunpuia awm remchan lai hian min zu inthlakpui lawk teh, amah Veroi thawmhnaw pawh lak a ngai. Ka rawn chah duh tingtang lo che a, kan riah a ngai dawn sia" a ti sar sar a. An tihdan vel chu a! Sawmtea lah chuan hnial hek lo, an chhuk ta daih mai. Veroi chu chhuahsan ngawt chi a ni si lo. A thil hîp lai chu an rawn laksak tawh a. A zia deuh tak vangin. A ṭhu mu a, kei lahin sawi tur em em ka hre bawk si lo. Phone ka khal mial mial ringawt. 

"Engtin nge Lucy hi i duh theih?" A ti ta hlawl a. 

Ka melh vak ringawt. A sawi dan tehtawp chu a mak êm a ni. 

"Ngati nge?" Ka ti let hû a. 

Za vak lova nuiin, "A chanchin engmah i hre lo em ni? Hman zan lawkah pawh a pasal hlui sahhlum a tum a nia" a ti nghat a.

"A tihtur a ti zawk alawm, a fanu thlavâng a hauh a nih kha' ka ti nghut. 

"Eheu! I thluak a lo su ve hman a ni maw? I damchhunga Lucy uitê i ni tawh tur hi ui fe fê che kan tam a nia" a ti leh sak sak a. A rilru tur âwm ang ka hrethiam ta deuh. 

"A chanchinte chu ka hre vek alawm, ka hriat vang alawm ka duh..hmeichhe huaisen hi ka ngaisang. Tin, Lucy chu a hmelṭha bawk a ni" ka ti hniam raih a. 

A ner sak, "A hmel hi chu a ṭha alawm, hei vang hian alawm Hmelṭha nunrâwng nih a hlawh ṭhin. Engpawhnise, mutpui atan vel mai mai bak i ngaihzawn ka ring chuang lo va, ka sawi tam lo mai ang.." a ti leh hlang hlang a. Ka mil lo ṭan riau mai. Ka ngawi ta reng a. "Tui kha min lo ban lawk" tiin a rawn kawk a. Ka lo pe vat, bottle a lak pah chuan ka kut chu tihluih tih hriat zet hian a rawn ti chul zauh, hre lo angin ka awm lui tlat thung. "Chance vawikhat tal te chu min pek ve tur che a nia" a ti sap a. 

"Engti zawngin" ka ti ve hrâm. 

"I hria alawm" tiin min rawn melh ralh a. Ka melh rei duh lo. Kawngka lam hnungchhawn zawnga ṭhu ka ni a, kawngka lam va melh zauhin, "Ka lawm e,. Ka dam huai mai" a ti zang vah a, a ngaihna hre lo zetin ka lo melh hû thung. K'u Pari aw ka hre zui ta zat a, ka hawilet rang kher mai. "Nunpui, phone i va la thei lo ve" tih pahin min rawn en a, a hmelah danglam a awm lem lo. Ka indap vat a, "Ka lo silent pek a nih hi. " Tiin ka tho vut. Lucy leh Mampuia inpawm ran chu ka hmachhawn ta nghal a.Ani pawh a hmelah han danglam engmah a awm lo, "Engtin nge a awm?" Tiin ka pan vat a , khum lo hnai berah chuan a muttir a. A pang chu a dek bawk . "A khua a rawn sik leh deuh a. " A ti sep. Nurse a rawn lut a, "Kan tlangvaltêa chu ngah nge i lo damloh mai mai aw.."tih pahin venflon vuahna tur a zawng a. Lucy chuan, "U Chhan, riah kher a ngai lovang tiraw?" A lo tih chuan, "Ngai lo ve, i ti ve thei vek a ni lo'm ni? "A lo ti a. 

"Thei ve mai ang. Mampui, Anu Chhani hian a jection dawn che a, a na lovang aw. I damna tur a nia" naupangchhia deuh hian a ti a. Mampuia pawh naupangchhe em em a ni tawh bik lo bawk a, a bu ve nghat. Rei ngial an zawn hnuah an hmu ta hrâm a. Nurse chu a thiam bawk a niang, a vawikhat vih luhnaah a dik nghal thlap mai. A senior hmel tawh bawk a. Pari nen Mampuia kan lo ṭhutpui chhungin Lucy chuan damdawi a va lamkhawm a. Marovi te lah chu an la rawn thleng si lo, mahse, an tlangval kha a rawn lut ta hlauh a. "E..ṭhianpa, hei ka chhuk thla dawn a, Marovi te bulah khan lo sawi mai rawh aw. Veroi pawh naktukah chuan i chhuak thei mai ang. Lo ṭha vat rawh" ka ti luam a. Min chhang lo chiang kher mai. A nuihzatthlak lek lek. Pari lah a chimawm vang nge ni a lo va be ve sek lehnghal a, Veroi lahin a rultawk lekin a lo chhang ṭhin si. Lucy inpeih hnuah Mampuia te nen kan pathum chuan ward chu kan chhuahsan a. Lucy te motor a lo ding vâng mai. 

Pari chuan, "Nunpui, nang khalh zawk teh, Kan Luciferi chu a hmanhmawh luatah a dai pawp pawp zel a, ka hlau riau" a ti lehpek a. "Lucy law lo khalh chho" ka tih chuan, "Umm, ani te chu an LPK pawh a khalh hmiah zel" a lo ti. A ṭha vek zel e. Ka bialnu a ni zel dawn bawk a. Lucy erawh a ngawi reng a, a lungawi vak lo em mawni ka ti. Pari leh Mampuia te an awm ve sia, ka la be duh rih bik lo. Lucy te motor chu ka khalh haw ta a. Kawngah Pari chuan, "Mipa hi chu kei ka beisei ve danah chuan lirtheite pawh tuai ve thei mai zel, guitar leh a music instrument lam hrim hrim pawh han khawih ṭê thiam ve mai ang te, infiamna lamah lah ball petna lam hawi manthiam pha ve zel ang chi hi ni mai se, hmel tih vel hi chu ka dah chungnung viau lo" a ti lâng lâng a. Ka khi suk ringawt, a sawi angho kha ka tih ve theih vek a nih vangin ka lawm ru viau thung. Guitar phei chu kan Kohhranah khan a perh nasa pawl ka nih ve ka ring. Football lah tlaw viau e ti lo chuan ka khel peih ve phian a, heta ka awm hnu hian TV nei ta lo chu phone aṭanga en ka peih lo nen, ka en rih ta lo chauh a ni. 

Lucy te in kan thleng a, Mampuia a pawm chhuak, keiin garrage-ah motor ka dahlut ve bawk. Pari pawh a la haw bik lo. 

Ahruai'n thingpui min lo thlit nghal var. A fel ṭhin a nia. Mampuia chu Lucy chuan a va muttir a niang. A rawn chhuah leh hnu reivakloah Bena te nupa chuan, "Lalnu-i a lo haw a, kan han leng ve lawk ang e"tiin an chhuak a. Lalnui an tih chu Ahruai'n an inneiha ṭhiana a hman a niawm e. Pari chuan, "Veroi kha a serious viau em ni?" A ti a. 

"Viau pawn ka hre lo" ka ti sup. 

Lucy chuan, "Eng nge i chungah chuan a lawm tehchiam a?" A ti ta chiah a. 

"Ka hre bik lo, khatia a ti ringawt kha keipawn mak ka ti tawp" ka ti ve hû a. A ni chiah bawk si a ni. A ner sak, Pari erawh a lo khi vur vur thung. "A lo ngaizawng ru ve tak tak chein ka hre ta" Lucy bawk chuan a ti a.

"Ngaizawng lovang, ngaizawng pawh nise, ka duhzawng a ni lo" ka ti liam puat. Ka ngaihpawimawh loh hmel em vang ni maw ani pawh chuan a sawi nawn leh tawh bik lo. Pari a haw a, kan pahnih chiahin kan awm leh ta. "Mampuia hi a nuin a rawn ngaihven ve ngai em?" Ka tih chuan, "Ngaihven lem lo. Pasal a nei bawk sia" a ti sep. Zanin chu chhungkaw lam kan sawi dun ve nasa mai. Keipawn a hriat atana ṭha leh ṭul te chu zep nei lem lovin ka hrilh ve mawlh mawlh. A pa zin kha vawiina lo haw tur a nih laiin naktukah zawk a lo haw dawn a, ka la hmu ve thuai ang chu maw. "Ka pa leh Mampuia vang hian pasal neih lam hi ka ngaihtuah ngam lo ṭhin. Ka u hian Mampuia hi hmangaih tho mah se, a bialnu saw a ngam hlawl si lo va, ka pa lah ka tel lo chuan awm hleithei lo, ka nu boral hnuah phei chuan a innghahna ka ni ringawt a. Rilru a buai ve duh angreng" a ti melh melh a , ka hrethiam khawp mai. Hmeichhe tam tak, lengrei kan tihte harsatna nen pawh a inang viau. 

"Mampuia hi chu kan lo innei ta a nih pawhin kan kut tur tho a ni ang. Miteii nen pawh ṭhen chi pawh an ni nang" tihte thleng ka sawi vang nimaw zanin chu a hlim ve hle. Kan boruak pawh a nuam, a nuihte pawh kan nui dun nasa. Inzah ṭît ṭêt lova inpawh taka inkawm hi ka duhdan tak pawh a ni rêng a ni. Dar 10 pelhah ka haw chho a. A reh vawng vawng hle. Ka in tual ka thleng a, muangchâng loin in lam ka pan ding nghal. Chabi ka phawrh lai takin ka ramhnuai lam atang chuan ṭap thawm bawk kha a rawn ri leh ta rawng rawng mai le! Min aikaih ka ti dawn nge, "Teivet a! Mihring nge i nih ramhuai tih zawng ka hre dawn khawp e" ti rilruin thawm lo chhuahna lam chu ka pan ta chhat chhat a. Ri pawh a hnai ve zel,. Ramhnuai luhna kawng aṭangin thawm chu a hla lo. Kawngṭum chu ka zawh phei buan buan a, ngaw luh hma sia hmun zâwl, khiang buk zet hnuaiah chuan ka hmuh tum loh tawp ka hmu ta a.."Nupui" ka ti ta tuar a..