Nuthlawi 7

NUTHLAWI..(7)

Ziaktu : Toni Râlte

Lucy pawh chuan a hmu ve vek, lak loh chi ni tawh hek lo. "Hello" ka ti bung nghut a. 

"I mu tawh mi?" A rawn ti lâng lang a. "Mu lo" ka ti leh hmuk. 

"Hmuk hmuk a! Min be peih lo mi?" Pangchang zet hian a rawn ti a. Ka ner nawk, "Ka leng a. Nakinah kan inbe dawn nia" ka ti a. Lucy lah chuan min melh kiau si, a hrehawm angreng. 

"I mak ve maw" a ti hlak a. Ka off daih. Ka chetdan chu a smart vak lo tih ka hre tho, mahse, tunah chuan a timing rih lo lulai êm a ni. Lucy chuan, "I bialnu hlui em ni?" A ti sap a. Zêp buai ṭulin ka hre tawh lo, "Umm..pawi ka ti lutuk" ka ti ta ngawt a. 

"Ti nge in inṭhen?" A ti leh zel. 

"Min lo kawp a" ka ti sup. "Kawp lo ta che se la, nang chuan i ṭhen dawn lo tihna a ni em?" A tih chuan ka melh zawk a. "An rinawm a nih chuan ka ṭhen ngai lo" ka ti ta a. 

A khi sak,. "Khatianga biak buai theiha i la awm fô dawn te chuan kan va inrem thei awm lo ve" a ti a. A aw pawh a zangkhai leh daih tawh. 

"Min lo be tawh lo turin ka ti reng, mahse, ka thunun thei bik hleinem" ka ti a. 

"Inbiak tam chuan inngainat a awl asin" a ti leh sep a. A sawi tum ka hrethiam reng, a induhtawk êm avangin, "Be tawh suh, biak a ngai lo" a ti duh bik lo tih thlengin. 

"Ka be hmasa dawn hleinem" ka ti leh a. 

"Mahse, a call i pick tho alawm" a ti leh hram. 

"Ka ṭhen tawhte hnenah ka kir tawh ngai lo" ka ti ta zawk a. A bu nghat. Min rawn melhin, "Haw tawh rawh. Zaninah ka lo inngaihtuah ang, naktukah kan sawi dun dawn nia" a ti a. Min hnar haw chu haw viau tur ka nih laiin a fing ka ti riau! Inhnialna awmze nei lo leh atthlak hmanga zan tumtawi ai chuan mut hahdam kha a thlanawm zawk reng a ni. Tin, a rilru ka hriain ka inhre tawh bawk. Rilru zangkhai takin ka haw ta rêng bawk a. Ke pen pawh a zâng haih haih kher mai. 

Far thing hmun ka thlen laiin Far kung phên atang bawkin ka beisei loh lutuk hian Nuhlir'n min lo barakhaih tehreng a nih chu! Ka va thlawk teuh êm..ka zep lo, khatiang reng renga ka phut nasat kha ka damchhungin ka la tawng lo. Ani lah chu a nui awr awr a, han khin chi a ni bawk si lo, ka ngei ve lek lek a ni. Be lem lova kalpelh mai ka tum lai chuan, "Nunpui" a rawn ti ta mai! Ka ding chiang lutuk chu mak ka inti zawk. Engtin nge ka hming a hriat theih? Mak ka ti êm mai a. 

Ka hawilet a, a la nui vur vur. "Eng nge ni ta?" A pangngai thei ang ber hian ka ti a. 

A ngawi leh hmak bawk si. Rei ngial ka ngaihchan hnuah pawh ṭawng duh tawh hek lo. Ka chhohsan ta daih a. Ka mut rual deuhthawin Lucy ka text a, "La muhil lo lawk teh" tiin. Ka va ngampa sâwt angreng êm. Mahse, a nawm ber hunlai a ni miau bawk sia. "Ngati nge?" A rawn ti hû a. 

"Ka la be duh che" ka'n ti ngei a.

"Hmm..naktukah luiah kan kal dawn sia, muhil hma zawk ila" a rawn ti a. Kan inbiak dan hi inngaizawng inbe satliah kan ang in ti ve em? 

"Aw le, a nih muttui aw. Lucifer" ka ti a. " Kher kher a che..muttui le" a rawn ti a. Ka khi vur vur mai. Luciferi han tihte chu setana vanlam hming kha a nia, mahse, a putu nih a chakawm vak lem loh. Mahse, amah Lucy vangin setana lam ka ngaihtuah thei lem chuang lo. Mami pawh biak leh ka tum tawh chuang lo. Hmabak ngaihtuah nuah nuah chungin ka muhil zui ve ta hram. Dar 7 vel hi ka thawh dan pangngai a nia. Kan inah kha chuan dar 8 rik dawna thawh changte pawh ka nei. In chhungah na nâ na kha chuan min dah lal ve bawk a. Whatsappah ka lut nghal.."Morning..Nizan khan ka lo nghak ve reng che a nia" Mami msg avang chuan ka phurna a hniam rawih thei. Engtiziaa ka thinlunga tla na lo ta em em nge maw a nih le..ka reply lo. 

Jeneti hian tlaiah hian zinga rin theih turin râwng a bawl zel bawk a, chaw erawh fun tur a nih avangin ka chhum tam deuh. Ram lama chettlat hi chu khawpuia awm te hian kan châk sakhai fô,. Thingtlang lamin ngaia an neih mai mai pawh kan tan chuan thil thar a ni. Phur zetin ka insiam a. Jeneti pawh a rawn kal a, ani hi a number ka la neih loh vangin vawiinah chuan lo kal a ngai lo tih ka hrilh thei si lo, a rawn kal tak rau rauah chuan thawmhnaw tlem sûk tur ka neih chu lo su mai turin ka ti ta a. "Rawngbawl a ngai em?" A tih chuan, "Ngai lo mai rawh se" ka ti a. 

"Anuin pawisa min thawn a, amah Lawitlangah a zin daih dawn a" a ti leh a. Ni dawn tak e. An ram hralh vena ₹ 120000 chu min pe a, Safe ka la neih loh avangin, "Mate,ka awm dawn si lo va, a him loh takin hawn leh mai ta che. Kar tharah ka keng mai ang a" ka tih chuan rang fê hian, "Patea ten an rawn chhuh leh vek ang. Dah thatna kan nei bik si lo va" mangang zet hian a ti a. Ka va khawngaih tak. "Aw le, khawi sarâng khan lo fun rawh" ka ti a. Ka chhukthlak paha bank-a pen zauh mai ka tum ta a ni. Zoteii ten bank chabi an kawl tho a. 

Ka inthlak mawlh mawlh a, "Û, ka sual vang pawh ni miah lovin maw. I in hi ka hlau tlat zel. Keimah chauha ka awm hian ka awm a nuam ngai lo, U Vena ka hmuh phei kha chuan ka hlau zual" a ti a..A dik ve thei tho, ka in a fâl ve raih bakah a piahlam ngaw lah Vena bona mual kha a ni bawk nen, ani tleirâwl tal chuan nêl a har ve maithei. 

"Insu vat la, i haw thla daih dawn nia" ka ti ta ringawt a. Vena chanchin ka ngaihtuah tawh lem lo bawk a, engtin nge a awm tak zel pawh ka hre lo. Jeneti chu ka kalsan a, Kima ten min rawn be sek tawh bawk nen..ka zu thlen thlak chuan an lo kim ṭhap tawh a. Bank-ah kal lawk ka ngai si, keimahin ka va lut zuai a, safe-ah pawisa chu ka dah ta a. Ngaihṭha deuhin ka chhuak lehnghal. Pari leh Lucy bakah Kima te nupa, Siama te nupa leh keini aia upa ve hlek tur Faka an tih maite nen chuan lui lam panin kan inchhawm ta hnak hnak a. A kawpkimtea kan han kal velte chu a nuam dangdai ve tlat, Pari leh Faka erawh an inngaihzawn a rinawm loh. Faka chu pa cool tak, ṭawng zawi ruih mai, ṭawng tam bawk si lo a ni a. Zial a heh ve hlein ka hria. Pari nen naupan têt aṭanga inkawm tawh an lo nia..Chawntlangah nupui va neiin an fa pakhatna tur a pai lai, hrin a hun lek lek tawh tihin an nu chu thisen sang vangin a boral thut a niawm e. Kum 4 dawn mumalin a khawsa lo va, a chhungte mangangin an nupa in luah ve aṭang chuan la chhuakin he lamah an la phei ta a. Pari te hian lo kawmhlimin mi pangngai a rawn pha leh chauh a niawm e. Nupui pasal sûn hi chu a na ngawt ang le..tawn ve pawh ka duh lo. 

Lui kan thleng thla hma angreng, ka rin aiin kan kal thei hlawm phian a. A hmun zawl lai leh innghahna hmun rem deuhah kan innghat a. Picnic paha kal kan ni bawk a, a hmuna ei khawp kan man chuan kan lawm tawk viau ang. Bleaching leh lenkhang kan keng a. Len hi ka deng thiam meuh lo..Siama chuan a lo keng ve tho a. Rawngbawlna tur te kan han siam sang sang a. Kima hi a infit vak lo bawk nen, hmeichheho nen a hmun lo nghak turin kan dah a. Siama leh Faka te nen chuan lui hnâr lamah kan chho ta a. Lenkhang pawh a hminga zar ve kha a ni mai a, kan uluk tehchiam lo. Siama lo hual rûk deuh li lian vak lo kan thleng chho a. Sangha chu an awm ve nak nak e. An lian lem lo thung, a tui daih zawk. Nghalim mum sang mai hâng chhum han tuizia mai hi chu aw..lui lam sa hi chu Uchang thlengin ka ei. Bleaching chu kan han thlak ta a. Li a len loh avangin hneh thei mai kan inring. Kan phur sûrh sûrh khawp mai. Faka pawh a ṭawng tam lo naa Siama fiamthu sawiah a khi ve hui reng mai. Kar lovah sangha pawh kan man ṭan a, kaikuang pawh lian ve fê fê an lo awm. Dar 1 rik hma deuhin ei khawp zet kan man ve ta rûih mai. Lenkhang pawh chhuk pahin kan en thla zel a. A lo awk ve leh mial zel bawk. Innghahna hmun kan zu thlen chuan chawhmeh dang kan kente chu an lo chhuangkai vek tawh a. Kima'n tumbu a lo vaipaden suah suah mai a, a hmel zawng zawng nen a inhmeh tawp. Lucy ten sangha an han hmu chu an rak chul mai,. Kan hlim tlang e. Tichuan, mau thei lian angreng takah sangha chu buar leh chakawk telin, aieng, sawhthing leh hmarcha rêp tan bun hmawk hmawk nen, purunsen leh a var nen ngei mai Faka'n a bai thak ta hluah mai a. A tuihâng hawp a châkawm viau rualin dal kan chhum hang tho a, bai thak ngei kha kan ei châk tlang a niang e. 

Chaw ei hmain kan bul lawka li thuk vak lo, zau angreng takah chuan kan cheng bârh bârh a. Lucy pawh a hleuh vei pap pap a, Pari erawh a khup chen bak a dai ngam lo. "I palenna kha hmang ṭangkai ta che" an ti lâwng lâwng reng a, a nui uar uar ringawt. Teteii leh Zoteii te an ṭawng duh bakah an nui ring thei si, vawiin zet zawng kan hlim e. Chance zawn ve hram ka duh si, a rûk deuhin, "Khitah khian inbualna tur a awm, han inbual ang" tiin Lucy ka sawm a. Nuihzat hmel lek leka min melhin, "I chance zawn ve dan chu leh" a ti ta mai a! Kan va inmanchhuak chiang tak. Mahse, ṭhiante bula min tihzah a hlauh vang nge ni min zui ve ta mai a. Lung phênah ka ṭhutpui ta hmak. A sam chu a chhipah a bawk khawm a, t shirt pawl lose deuh mai a ha a, kekawrbul dum a ha bawk. A bawpsei leh nalh zet chu ka lo melh leh rûn ṭhin. 

"I lo inngaihtuah tawh em?" Ka ti ta a. Ka zak vak tawh lo. 

"Vawiinah hian ba khawna zin ka ngai viau a..mahse, hetah ka kal ta zawk a. " A ti daih.mahse, pehhel takin ka zawhna chhanna min hrilh tih ka manthiam ve ta vat. Lawm zetin, "Tak tak tiraw?" Ka ti hluai a. A nui sak a, "Kehchhiat leh ka huam vang erawh a ni lo" a ti sap. 

Kuah pahin, "I kehchhe lul lovang' ka ti a. Min kuah ve lo chungin ka kuah ta reng. Teteii te'n min rawn ko sek sia, bual pawh inbual ta chuang lo chuan kan chhuk leh ta ngawt. Mahse, kan chhuk hmain ka fâwp..ngaihzawng ka neihtirha ka hlim ber ṭum leh fawh nuam ka tihber awmchhun a la ni ngei ang le.. 

Tichuan, dar 3 a lo pel ve tawh bawk a, chaw ei lam kan hnaih ṭan. Faka'n changel hnah a han sat a, nula hoin chaw ei an siam ta mial mial a. Dal hâng, sangha bai thak, tumbu vaipaden thak hâng ṭhak mai han hmeha chaw rum tui tawk han bâr bawk chuan duh aia bar len a awl ..Ṭhu tunga chaw ei hi ka thiam chiah lo va, lung ka la sauh sauh a, ka ṭhutchilh hmiah. Hmeichhe lam pawh an bar ve tâwn tâwn mai. Chaw heh nihte hi hmeichhe ṭhenkhat chuan an zak ṭhin. A va ho tak e aw. Ei ṭeuh ṭeuh se a chak pawh an chak nge nge zawk. Kan han eikhama kuhva hring hmawmin zo zial ru tui zet mai kan han pak khu hlat hlat a, dam man hi awm ve tak mai hi a nia. Aizawl khawpui motor tleh dul dûl lam reng reng ka hrechang tawh lo. Luciferi lah ka bulah a awm ran tawh si. 

Hawn lamah chuan kan hmanhmawh vak lo. Kan puar ve bawk nen, kal chak a har ve bawk a. Kaikuang tam vak lo kha insem tham ni hek lo, kei a parawl ber chu min duhsak tlang deuh nge min hawn luihtir tlat mai a, ka hnar zo ta lo. In ka thlen chuan a khawharthlak angreng, a reh ruih mai sia. Ka han intifai a, chaw ka ei leh duh ka rin loh avangin ka chhum duh ta ting tang lo. Len nan a la hma deuh bawk nen, ka chhungte leh ṭhiante ka bia a. Ka nu ka biak chuan,. "Nu, bialnu thar ka nei a.." ka ti a. Ka khi suk bawk. 

"I va nei rang ve, Mami nen khan in inṭhen tak tak ami a?" A rawn ti a. 

Kan inṭhen chian tawh thu ka hrilh ta vek a. A chek hlak a, "A va mak ve, a fel hmel hnûp hnûp nen" a ti chuai raih. Kan inah vawi khat chaw a rawn ei ve tawh a, fel an ti viau nghe nghe a nih kha. Mami chhungte lam lahin min tiṭha ve em em bawk nen..mahse, tihian kan tawp mai bakah ngaihzawng ka nei leh ta mai chu a nia. A ṭha vekah ngai ang. Ka û te chungchang ka zawt a, "A luhlul sia,tihngaihna pawh ka hre tawh lo ve a. An pa pawn a rawn be reng, mahse, 'kan indan dawn loh chuan ka rawn haw dawn lo' a ti bur mai a! I pa nen pawh tihvak ngaihna kan hre tawh lo" a ti bawrh bawrh a. Ka û hi chu a lunglian chi a ni ve hrim hrim bawk a, mak ka ti lo. "U Hmuna chu nangmahni pawn be ve hrim hrim u la, ani pawh lehlamah a nauin nupui a neih tawh te chuan in hrang chanpui ve mai tur alawm le" ka ti nghut nghut a. Ka nu pawn a sawi nawi lem lo. Kan inbiak zawhah Samua te nen kan inbe leh a, "Thla thar veleh chawlhni hmangin kan rawn zin ang" an tih chuan min tilawm kher mai. A nuam dawn e. Lênglen hun pawh a lo ni ve ta a, ka chhuak leh ta nul nul. Kima te in hi lawiluh a rem bawk nen, kal pelh a harsa ṭhin a nih hi. 

Mateii a lo awm ve a! Thawmhnaw an lo sam nasa mai. Zoteii te unau hi an hmelchhe vak lo hrim hrim, Siama pawh a chhe hran lo, hmeichheho duhzawng tak niin a lang. Mateii erawh anni pahnih ai chuan a ṭha fawr deuh, an naupangber a ni a, Zoteii te in puiah amah Mateii bakah Siama nau mipa te chhungkua leh an nu leh pate nen an khawsa ve a ni. Zoteii chuan, "Nunpui, thawmhnaw hi thing ve la, tu te emaw pekah" awmze nei zet hian a ti a. A nui vur vur bawk, "A ho mai mai, thil leisak nghal ut ut te chu a" ka lo ti vut a. 

Mateii chuan, "U Nunpuia chu nuthlawi zûnah i uai tak tak a ni maw? I rawn zin hma khan fiamthuin an lo sawi a, a thleng dik tak tak" a lo ti ve a. Lucy tih loha hmelṭha ka tih ber kha a ni bawk a, ka duh aiin ka lo melh rei.."Nuthlawi hian a hranin zûn an nei tak tak em mawni le.." ka ti duh lek. A nui har har a, "K'u Lucy te ang hi chu keini ang tan chuan tluk an la har deuh a nih hi a" a ti zawi sap a. A û Zoteii'n thingpui a lum daih bawk a, a ṭawng huai ve phian! 

"Tluk thuah te chuan tluk tehlul e.." ka ti ringawt. Ka ṭawngkam thiam loh leh mi hmai eng ka zah luat vangin ka insawi âwk lek lek fô zel a, ṭawngtam vak ka duh lo. Kima dawr kal a rawn haw a, "Vena an hmu lo leh tawh a nih âwm chu a! A zia lo ṭhin mang e. Zoi, an rawn be lo che em ni?" Tiin an nu a melh a. Zoteii chuan, "Ka phone ka charge daih alawm, a va pawi ve aw..ti nge mawni le" nuam tih loh hmel zet hian a ti a. Roomah a lut nghal bawk. Mateii chuan, "Kei chu U Vena kha ka ṭih deuh tlat, a bo hnu aṭang khan a bulah pawh ka awm ṭha ngam hleinem" a lo ti pek! Ani pawh hi ri ve phawng phawng chi niin a lang. Nia, Vena rawn haw leh kha hmeichhe tan chuan a hlauhawm ve lek lek ang. 

"A bona hmasaah bawk khan a awm ka va ring e. " Ka ti sup a. 

"Umm, Nuhliri'n khalam a pan lai kha a lo hmu a niawm e. Tunah hian chhungkhat hnai kan inkokhawm mêk" Thakima chuan a lo ti ve mek a. Keipawh ka bialnu ka rim leh thei dawn ta lo..Zoteii te chhung an ni sia, nula lo rimsan daih chi zuk ni lo chuan a. Kan chho leh ta dial a, khawtlang tihbuai leh vak ai chuan tiin ṭhenawm khawveng bakah chhungkhat laina te an inhawrkhawm a ni mai..Ka inah pengin ka inthlak zuai a, Siama leh Kima te nen ramhnuai lamah chuan kan liam leh ta a. Kan hmaah tlangval rualkhat vel an kal tawh bawk a, Vena chu kan ko lauh lauh a, a reh leh tlawk tlawk. Kima chuan zawi sup hian, "A khawtlang tibuai zawnga chet tlat zel mai. Tibuaitu eng emaw hi chu a nei a ni" a ti a. Keipawh ka rindan a ni. Dar 11 a ri dawn hnai ta. Kawrtê kan pawhthla ṭêp tihin kawrtê mawnglam aṭang chuan, "Kan hmu e" an rawn ti ta lauh lauh a. Hmanhmawh zetin kan tlanthla nghal. Kan thlengthla har lem lo, an lo kil bial laih a, ngaihṭhatna pawh nei lem loin kan zuk en ve sawt sawt. Vena chu leiah a saisir zawng hian a mu kawm ngal a, amah hnaih bertuin kaihthawh tuma a va kuai chu a let hlawl mai. A lo khawng vek tawh nia! Mitthi a ni ta reng mai. Kan inmelh hrek hrek hlawm a, ramsa sehna hnuhma hmuh tur a awm lo va, a taksaah hliam kan hmu lo. A thihdan lah chu a rem lo bawk si, saisir zawngin rem deuh anga lang, rem mang si loin a thi a ni ber. Puanin an khuh a, kan zinga a phanchang ber chuan khaw mite a be ta a. Vena zawnna tur hlâng siam turin mi pali vel chu vaukam lamah an kal nghal vat. Ka piantirh ata ramhnuaia mitthi ruang ka hmuh vawikhatna a niawm e. Ka tan thil thar mah nise; Vena chhungte tan chuan tawrhna nasa tak a tling ngei ang. Vena û nupui nei tawh chuan, "Hetiang tur a nih vang a nih dawn hi, zing aṭanga a lo buai ruai ni" a ti sup a. Vena ṭhianpa Tea khan a ṭhianpa ruang ṭhutchilh ran chungin, "A mak hle mai, ṭhianpa..min tihrilhhai takzet a ni" a lo ti ve bawk. Han ṭawng lung lunga fiamthu thawhna chi ni hek lo, ngawi rengin kan tihtur kan ti mawlh mawlh hlawm. Vena ruang chu zawn hawin keipawh ka tlang nghal a. Mipui an lo pungkhawm tam tawh hle, dar 1 a pel tawh a. Postmortem kher ṭul an ti lo nge ni, engmah khatiang lam kha an sawi ri lo. A chhungte an tap nasa khawp mai. Kei hetiang kara awm chi hi ka ni vak lo, ka awm thiam lo ka ti dawn nge, ka lai vek zel. Ka chhuak vut a, Lucy te pawh kha in chhungah an lo awm tawh sa, Zoteii te chhung an ni bawk a, an ṭawiawm ṭha khawp mai. Kan ramhnuai kalna lamah ka thlan nasat bakah ka bal ve nin nian bawk nen, han inthlak zawk ka tum a. Lucy ka text zeuh, "Min han inthlakpui lawk la, kan chhuk leh nghal dawn nia" tiin. 

A seen lawk si lo, ka call ta ringawt a. "Miin min sawi duh leh lutuk palh ang" a rawn ti. Tleirawl ang mai..

"A ho ê, Siama bike kan hawh dawn nia,. Lo chhuak lawk rawh" ka va ti leh a. A rawn chhuak ve ta tak tak, ka lawm ngei mai. Siama pawn a bike min hmantir thei a, Lucy ka venthâwn avangin Vena te in piah deuha min lo nghak turin ka ti a, "Kan rinhlelhawm sauh zawk, a ho mai mai" a ti daih. Tichuan, ka in lam panin kan inphur chho ta vâwn vâwn a. Lehlamah hre lo tur âwma ka ngaihte pawn Lucy nen kan chungchâng an lo hre fur tho sia, venthâwn vak ka tum buai peih lo. Mi puitlinga ngaih kan ni tawh bawk a. In kan thleng a, ka insilfai thuak thuak a, ngawi rengin a lo ṭhu ve mai. Ka inthlak lai chuan, "Lo lut ve la" tiin ka au a. 

"Ka duh lo" a ti hmak. Ka va chhuah chuan a phone a lo khawih mial mial a, a bulah ka ṭhu chat. "Chhuk ang" a ti sap a. 

"Reilotê.." ka ti tlat. Chhukpui lehnghal te chu a uiawm lutuk. 

"I sawi vek kha, kan chhuk leh nghal dawn nia" i tih kha..a ti hlar a. "Aw..reilotê tak tak" tih leh ka lama kuah hnaih ka rual, a ṭang bik lo va. Ka fâwp ta hmiah mai. Fawh nuam viau mah se; ka duh angin a la inhawng tawk lo. Ṭhutthleng seiah chuan ka nam mu a, chiang zeta min melhin, "Insual kher ka peih lo" a ti a. Ka nui ringawt. Ka bialnu dangte ka sawngbâwl ang chiahin bul ka ṭan chho a, a ṭan nat loh avangin, "Ka rin aiin a awlsam dawn e" ka ti rilru hman. Mahse, a tawp lam hnaih ka'n tum chho chu min nam dâwrh a, ka lo inring lo nen, ka kang awk mai. A rawn tho nghal zat a, "Ka duh lo" a ti tawi tak

. Thinrim hmel erawh a pu hran lo. "Ngati nge?" Ka ti a. 

"Miteii pa tih loh mipa tumah ka la mutpui lo, ka duh lo. Kan innei a nih loh chuan" a ti fiah kâk a. Zahawm ka ti thar ngei mai. "Umm, ka tum lui lovang.. " ka ti nghet charh. 

A sam bakah a thwmhnaw siamrem pahin, "Chhuk ang" a ti leh a. Ka hnial ta bik lo. Vena te ina tlaivar tur chuan kan inphur thla leh ta a. An khua a lian bawk a, branch 4 lai awm mah se; chhiat tawhah chuan khawhar in an inlenpawh vek tho va. Diktak chuan hetia branch hran tê têa an dinna chhan pawh an veng a inkarkîk hlawm bakah Pêm vengte chu thurualpui an har deuh niin an sawi. A hma chuan section-ah an inṭhen ṭhin a. Mahse, eng emaw changa section inelna velah sawiselna leh lungawi lohna a tam ṭhin avangin section kha branch-ah an hlangkai a ni ber. An branch pualin property an nei hrang vek a, join YMA te'n kum khatah branch inelna an huaihawt ṭhin. Zanin pawh amah Vena a felin uitu an tam bawk a, kan ṭhahnwm hle. Zai pawh a nuam viau e, Lucy te nen kan ṭhu ho bawk a, hrehawm ka hre chang vak lo. Mahse, ka mut a chhuak chho tan. Ka kal chau ve bawk em a ni. Nghenchhan nei ṭhutthleng a awl ta hlauh a, kan insawn phei ta dial. 20 mins vel chu ka muthlu hman awm e. Thingpui kan in a,. An sawhchiar siam a tui reuh ngei mai. Lucy te chuan zunram thiar an rawt a. Kan chhuak ta a. Vena te in aṭang chuan Pari te in leh Kima te in a hla angreng sia, bakah khua a var har tawh dawn lo bawk nen, kan lut leh ta dial a. Han intekrek fâlna hun pawh a awm lo, awm pawh nise Lucy chuan a duh leh ka ring chuang lo. A strict reuh êm mai. Chhawrpial khua ka fakna leh tluk lo ka intih em êmna sawi tur ka hre leh ta nual mai. Lumennaah tuman phone an hmet ve neuh neuh lo va, An muthlu ve a nih pawhin a kil lam an pan hram hram, tin, an thiam emaw thiam lo emaw zai miah lo ka hmu mang lo. Zu rui an awm lo bik a ni lo. Mahse, midang mit tikham zawng leh tibuai zawngin an khawsa lo, a zai ring ring an ni zawk. Hetiang zonun zemawi hi Thingtlang hmun ṭhenkhatah pawh hmuh tur a tam tawh meuh lo chu a nih hi..khua a rawn var ṭan tihin nu leh pa lam an rawn lut zung zung hlawm a, hengte hi hmun tam takah chuan khawvar chian fê hnuah chauh an lo lan ṭhin avangin ṭhalai tlaivar chau ve tak tak ten kan lo nghah an ngai ṭhin. An tiṭha ka ti khawp mai. Ṭin hun an siam a, keini pawh kan chhuak a. Kein kan haw ta dûl dûl hlawm. An khuaah hian motor nei chu an tam viau a, sumo service pawh paruk lai a awm ve. Lucy te pawh khan Car kha an hung ran a, Scooty pawh kha an ta tho a nih ka ring. Vena te veng a piah deuh bawk a, khua ka fang a ni hawt e. In leh lo an nei ṭha tlangin an inel tih a lang, inelna ṭha tak pawh a ni rêng a. Tin, a fai, an khawchhung han bal leh bawlhhlawh paih darh hmuh tur a vâng pharh mai. A tua te inah mah pengkawi tawh lovin ka in lam ka pan ding nghal a, kan veng lam hi chu a khawharthlak angreng thin. Ka chau bawk a, ka mu leh hmiah. 

Ka harh chuan dar 9 a lo pel hlek tawh a. Thlan laih ve ka duh sia, ka tho ṭuih ṭuih. Nimin tlaiah rawng ka bawltir si lo va, chawhmeh siamchawp a ngai si,. Ka tlai dawn tawh sia, thingpui leh biscuit ka ei zawk zawk a, thlan lai tur chuan ka chhuk ve ta a. Kima te inah chuan khualkhua aṭanga lo kal thenkhatin chaw an lo ei hlawm a. Kima chu makpa a nih avangin in lamah a kal hmel..Faka a lo awm remchang hlauh a, kan kal rual thei ta. Thlanmual hi pahnih an nei a, vengthlang leh vengchhakah. Chu chu an khaw chanve chanvein an insem ti mai ang. Vena chu vengthlang thlanmuala phum tur a ni. A hla phian lehnghal a. A hmun kan thlen chuan ka tan mikhual vek an ni, rual ka kawm tam loh a leiah hriat a lawi ka nei lo. Mahse, an felin an hawihhawm khawp a, min zah rûn anga awm lovin an titi bawrh bawrh a, nuam ka ti. Kan ṭhahnem bawk a, thlan khur chhungah pawh vawikhat bak ka lut lo. Kan lai zo ta vat rêng a. Thingpui in pahin an titi lâwng lâwng a. An zinga chak hmel leh thlan khurah pawh lut tam pawl tak sek ṭeng ṭung chuan, "Vena chu ka lainat roh mang e. A bo kan hmuh aṭang khan thil dik lo a awm khan ka hre rêng a ni. A bo dan kan han zawhte khan, 'Sawi chi loh' a ti deuh tlat sia. Tisa piahlam thil a nihte pawh ka ring rum rum e a" a ti suam suam a.

YMA Vice President-in min ho thei a, Ani pawh chuan, "Tea nen hian an inzui nasa bawk a, sawi tak mai maiah chuan amah Tea hian , "Vena chu a damrei ka ring lo, a lungte hi a lêng thut thut zel a. A ngui vak a, a harh leh thut a. Tiang khan a zia hi kum 2 liamta aṭang khan a awm tawh. Ka ngaih hi a ṭha lo ṭhin. Tumpâng ngaw lama kal hi chhuah dawn chuan a rawt ngei ngei bawk..a lo hetih dawn vangte hi a niang" a ti a. Ngaihbel theih ve te pawh a niin ka hria" a lo ti ve charh charh a. Hmanni zinga Vena ka hmuh thu erawh sawi ve ka tum lem lo. Amah ber a kal tawh a, awmzia a nei tehchiam lovang. 

Tichuan, Vena chu kan vuiliamin kan phum fel ta a. Hawn lamah Faka bakah Sawmtea te nen kan kal ho a. Kan hnungah Pu Zuala fapa Mama leh a thianpa an rawn kal ve bawk. Kan hriat theih ngei tur niawm takin a thianpa chuan, "Luciferi te ang zem thlûk theihte chuan a hmu zo vak lo tih a lang reng alawm..kan khaw nula hi an fing ve tawh a, mi pangngai leh pangngai lo an thliarthiam ve riau" a ti lûng lûng a. Sawmtea nui huk leh zawitêa ,"An va tiho ee" a tih sup chuan ka ngaihdan a rawn nemnghet. 

Faka chuan, "Raktir ve mai mai rawh. An tihtheih tawk a nih saw" a ti nghut a. Mipa ve si mi ṭawng el chingte, mi runluih chingte hi ka hmu pa hleithei lo. A nuthai hna riau. Sawmtea te inah kan peng kawi ta daih a,. In kan luh hnuah Sawmtea chuan, "I la hre chho mai ang. Mama sawn Lucy a atchilh thin a, Lucy vangin man hial a lo tawk tawh a ni bawk a, rilru ṭha an pu dawn hauh lo a nia. I in luah ram neitu te an ni bawk nen, fimkhur la" a ti sauh sauh a. Jeneti kâ aṭanga ka hriat tawh avangin mak ka ti lo. 

"Tun thlengin Lucy a la duh tihna em ni!" Mawlmang zet hian ka ti a.

"Duh tawh lo hul hual ang chuan a awm naa, a la duh tih ka chiang" a ti hmiah. Keipawn ka hriatreng a ngai ve a nih chu. Thingpui min lum an tum naa, kan hnial ta mai. Faka nen chuan kan chhuahsan leh a, Faka te hi Kima te in bul lawka awm an ni. Pengkawi tawh lovin ka chho ta vang vang a,. Jeneti'n rawng a lo bâwl rak rak a, Nupuii pawh a lo awm ve. 

"E! Nupuii pawh i lo chho ve ni maw?" Ka ti a. "Umm, a û hian a hlau a" a ti phawng mai. "Net-i, eng nge i hlauh? " Ka tih chuan, "Aaa..U Vena kha he lamah a kal zing sia, ka hlau ve tawp" a ti ve mai a. Ka nuih a za deuh, mitthi leh ramhuai hlau rual an la ni ve bawk a ni. Tui ka lumtir a, an unau chuan an inkawmngeih kher mai. Milar an star zawng an sawi a, an han inhnial leh rih ṭhin. Korean lam milar Nupuii'n a star em em laiin Jeneti'n khawthlang lam a star bawk si..an lawmawm reuh tawp. 

"I phone number min pe la a ṭha ang..eng emaw changa rawn biak nan che" ka tih chuan, "Ka phone a chhe daih a, A nu number emaw Nupuii number emaw hi la mai la" a ti a. Nupuii number chu ka la ta a. 

"I patea te chu an rawn kal leh em?" Ka ti thuphung a. 

"Umm,. Mahse, a nuin 'Kan hman ban chu bank-ah a hun hmaa lakchhuah theih lohin kan dah a. In duh chuan nghak ve mai r'u" a ti tlat a. Nangmah pawh an la rawn be maithei che a ni" a ti siam siam a. An mak em em hi ka ti. Khatiang pawisa tlemtê îta an û nupui leh fate han thîk tlat kha..an rilru a rethei ngawt ta ve ang. Tuilum sa ver vawr chuan ka inbual a, ka harh hawk e. Ka inthlak zawhah, "Û, kan bawl zo tawh a. Kan chhuk tawh mai dawn aw" Jeneti chuan a ti a. Kawngka thleng ka thlah. Zing lamah chaw ka ei lo nen, chaw chu chaw nge nge an lo tih angin chaw châkin ka ṭâm a niang chu maw, zanriah ka ei ta vat a. He lai khua chu thlaih hnah leh rah eng ilo lei tur a awm reng hi a zia. Sa hmeh loh pawn ka puar thei êm mai. Kaikuang kha Jeneti te ka lo suah ve lo a ni..

Lucy ka bia a, "Kal i tum em?" Ka tih chuan, "Mampuia hi a khua a rawn sik ringawt a. Zanin chu kal loh mai ka tum deuh" a rawn ti a. "Ka rawn leng mai ang, keipawh" ka ti. A tel lova kal bik kha ka phur tehchiam lo, phur vanga kal tur ni lem lo mah ila..

Khawhar in kal turte kal rêm âwm velah ka chhuk a, Lucy te in ka pan nghal. Pari pawh a lo ṭhu ve kûk a. Ahruaii te nupa erawh ka hmu lo, "Ahruaii nî ten chaw eiah an rawn sawm a, an leng nghal dawn a niang" Lucy'n a ti a. Remlala erawh a kal tawh a niang. Mampuia chu damdawi an pek vang nge a lo harh ṭha tawh angreng a. 

"Taka! Tu nge in Kohhran chairman le? Secretary zawk pawh a pawi lo maithei. Kohhranah inziah luh ka duh a, . Ka lo mangnghilh daih" ka ti a.

Pari chuan, "Pu Rimawia a nia, Nghakteii dawrkai pa khu..ka'n hrilh dawn mi?" A lo ti var a, ka buk nghut takah chuan a call ta nghal. Ka hming leh pa hming bakah kan khua leh vengte kan sawi hnuah a dah ta a. Hetia inziahluh ve hrim hrim hi a ṭha. Pari bawk chuan, 'Nangni pahnih hi ti nge mi ho hian an hriat em em le. In sawi pawh a ni si lova" a ti ta hlawl a. Keipawn mak ka lo ti sa kha a nia. "Ka hre bik lo" ka ti ringawt. Lucy zawk chuan, "Cctv kal thei an tam ve a. Kan ina a leng lût emaw kan inzui lai hmu chuan min inrûktir leh ṭêp tawh ang" a lo ti hlak hlak. Ka nuih a za deuh, "A pawi lo, a ho ê..hria se..an la hre dawn tho a" ka ti mai a. 

"Hmelma i insiam ve maithei a ni. Kan Luciferi hi a luck ve zêk sia" nui chungin Pari'n a ti a. Lucy chuan, "Parluai, ngawi mai mai teh" a lo ti nghek a.

"Ka hria alawm, khi ka quarter ram neitute fapa pawh kha..tiraw?" Tiin Pari chu ka siai zauh a, hrethiam lutukin a nui vak, "Nanga pawh chu i antena a va chak ve tho ve. Engtin nge i hriat?" A ti a. 

"Ka hriat tura pawimawh chu ka hre ve zel ka tih kha" ka ti vel a, Lucy a nui ṭha duh dêr lo. Thutak zawkin, "Tak taka sawi nuam a ni chiah lo maithei a, Mama sawn a la tibuai che em?" Tiin Lucy ka melh a. 

A hmui tisâwiin a ngawi vang vang phawt. "Ngaihmawh tham chu a ni lo,. " A ti sep a. Eng emaw tak zawng a la ti a ni ngei mai. Pari chuan, "Saw pa pui roh saw a kim chiah lo a nih ka ring. A nute lah sawn an la ṭan ve em em lehnghal a. Lal Mateii pawh a sawi mualpho leh ṭêp kha" a ti bawrh bawrh a. A hmel ena pa viau si, a chetdan chu tenawm rawng a kai ve dawn a nih hmel. 

Lucy chuan, "Miin eng thu pawh ka chungchang thu lo sawi se, k'u Pari emaw kei emaw min hrilh zel rawh. Thil hrechiang lova ngaihdan lo siam thawt thawt hi a hnuah a zahthlak ṭhin..kei chu ka lamhnaite lo chuan min fak kher lovang, fak ka phût hek lo. Mahse, min fak loh avang khan min hua tihna pawh a ni kher lo ang, thil zawng zawng an hriat loh vangte a ni ve thin. An hmuh leh hriat chinah ngaihdan an siam thin a, kei lah ka lo thinchhe ve bawk nen..i hrethiam tiraw?" Tiin min melh kiau a. 

"Mi zawng zawngin i chungchâng thu min hrilh kher a tul hleinem. Ka hriat duh chuan ka zawt thei reng che alawm.." ka lo ti ve nghut. 

Pari a tho thut a, min tiphû alawm le. "Ahruaii te lo hawn hmaa in inchukz hman loh takin..nih u" tih leh chhuah a rual..a va che maksak thei tak. 

Kan nui dun ringawt, "Bialpa zawnpui ve a ngai a nih hi" ka ti a. 

"Zeiloliani a nia, duhtu a hmu lo pawh a ni lo, a thiam lo. A hau hrep ringawt zel..an pa kha a 1st love a nia" a ti a. A dik ang, Pari te ang hi chu mi pakhata bur tlut chi an ni tlat. 

A thingpui lum tum chu ka pawt ṭhu leh a, ka fâwp nghal hmiah. Ka sawi tawh ang khan kan chance neih ve chhunah ka fight tawh a, min hnar a, ka tum nawn tawh kher lovang, eng emaw tak a thleng a nih loh chuan..ani pawn min fâwp lêt ve..kan tui dun ta lutuk nge Miteii'n, "Maa.." a tih riah kan harh hlawl, kan va inla hrang chiang tak. Miteii chu phone hum chungin an room kawngka bulah a lo ding reng..hnar chu lian duh tak a ni. Hmeichhe naupang mah nise, a zahawm thlâwt. Lucy pawh a chebuai ve nak mai. Aw lâwi zet hian, "Bawihte.." a ti thei hram. A nu melh kal chung hian, "Maa..in infâwp ami?" A ti ta pek. Ka rin loh deuhin Lucy chuan a va pan hnai a. "Umn, ani nen sawn kan infawp , amah saw ka bialpa a nia. Miin bialnu te, bialpa te an neih chuan an infâwp ve ṭhin ka tih kha. Tiang kha a ni mai..Chuan, eng nge mamawh i nei em ni!" A ti dam diai a. Miteii chu a bu nghat nghat, "Ih, net pack a zo daih a" a ti a. Ka lo thaw huai mai. A nu chuan a thunsak ta a, thuawih zetin a lut ve leh mai..

Lucy chuan, "Ani kha ka fanu a ni a. Engtin nge ni zel ang? " A ti a, ka chhanna nghakin min melh ngat ngat bawk.