Nuthlawi 6

NUTHLAWI (6)

Ziaktu : Toni Râlte

Zoteii te bulah chuan Miteii chungchang chu ka sawi ve a. "Nia, nizan khan kan rawn kaitho duh ta lo che a nih kha..kan buai ve deuh alawm" a lo ti a. An lo hre daih zawk a nih hmel.

"Engtin nge Thanpuia chuan a rîkrâp a?" Ka ti leh a. 

Chek hlak hlakin, "Awii, a nasa tawp. Sakawlh ang mai a ni. Chemte sei reng ruang a keng a, Remlala leh Bena ten va chhuhsak an tumna lamah Remlala ban puam pawh a zai alawm..'Lucy, ka fanu ka la dawn..ka fanu hi ka enkawl dawn' tih ṭanin a ṭang a. Miteii lahin a hlau si, Lucy insum thei tawh lo khan chempui chuhin sahhlum a tum ta a, Thanpuia a tlanchhe hman hram alawm..damdawi leh zu a rui a nih ka ring. A rapthlak êm mai" a ti bawrh bawrh a. Ka bialnu hual leh a fanu tithlabartu chu mipa taka hmachhawn ka châk ve khawp mai. Ka hlau hran miah lo. 

Bank kan thleng a, vawiin chu loan chungchangah kan hotute nen kan inbe deuh char char, kar thar aṭanga pekchhuah theih kan tum si a, keipawh ka awl hman meuh lo. NREGS hlawh a lo lut ve leh nulh bawk sia, ṭhenkhat a hmanhmawh zualin rawn lak an tum..mahse, kan sawiho a, VC te pawn min lo be bawk nen, kar thar aṭanga pekchhuah kan ti ta a ni. Chhun chawlh a nih meuh chuan ka hnungzâng a kham ṭhûm mai. Ka han zi mar vel a, ka ril pawh a ṭam angreng hle. Nu Dari dawr lamah kan phei leh ta dial a, kawnga kan kal laiin Pari ka be ta nge nge, "Hei a zia tawh e. Kan rawn hawnpui dawn. Lo chho duh kher lo mai rawh u" a rawn tih chuan ka zâng hawk mai. Han chhoh ka hreh lam aiin Lucy rilru nuam tur ka lawmpui vang a ni. A fanu vanga a mood a danglam chuan kei thengin ka tuar dawn si a. Nu Dari pawh a ngaitêin a lo ṭawng leh bawrh bawrh a, an chhungte ni bawk a, Lucy te chungchang a ni a sawi ni. 

"Ka thin hi a rim a nia, ka faten min hrilh duh lawk lo lehnghal a, ka hriat meuh chuan Thanpuia a lo haw hman tawh si, a thlen inte thlenga va chachhuah kha ka duh rum rum tawh a nia. A tenawm lutuk em mai. Kha leh chen a nupui leh fanu tirethei reng rengin a hun a hmang a, Lucy rawn intuaithar leh veleh an rawn lang leh a. " A ti hlaih hlaih mai. A pawi kan sawi ang tih a hlauhawm, nu Dari te ang hi chu lamṭang atana duhawm tak an ni reng reng a. Paratha hlai hlep hlawp leh kel êk chana kan han ei chu a puar theih ngei mai. Hnain min la hmuak ṭûn sia, kan let leh ta vat a. Keipawh ka bur leh nghal char char. Kei hi tihtur khek thei thlawt lo, thatchhe arbawm khai ang deuha tih zawh vat vata chawlh thlahlel mṭhin ka ni a. Tunah pawh ka thawk leh ngat ngat tawh. Ban hunah pawh ka la zo fel si lo va, midang hawn hnu darkar chanve velah ka zo thei hram. Muangchângin ka haw chho ta a. Rawngbawltu ka neih tawh avangin ka hmanhmawh lo ve hrim hrim bawk a ni. 

In ka thlen chuan Jeneti chu a lo la awm a. Rawng a lo bawl zo diam tawh. A bai rim lah chu a tui viau lehnghal a, ril a tiṭâm. "I duh chuan i haw thei aw. Vawk chu in va pâwltir ta em?" Ka ti a. 

"Umm, kan tithei hram. Ih, maw ,Pi Nuhliri a lo kal a. Ka hlau ṭêp" a tih chuan ka khi suk. Ka in hi a ngaina riau em mawni dawn ni. Jeneti hawn hnuah ka inbual a. Chaw ka ei zui nghal. Vena vel kha Zoteii te kha engmah ka la hrilh lo va, thil sawi nuam a ni chiah lo bawk nen. Saw lai ngawah sawn eng emaw tak zawng a awm a ni ngei ang. 

Zial ka zuk hlat hlat laiin ka û in min lo call ta ngei a, a thleng tawh a ni ngei ang. 

"Awiii, Mam, awm la ka tih nen aw" a rawn ti nghal bawrh bawrh. 

"Eng nge in buaina ber?" Ka ti a. 

"A tam lutuk. Ka tlin tawh ngang lo a ni e. Kan indang dawn a nih loh chuan ka lêt tawh dawn lo. Hmuna nêp lutuk hi ka ngei ber. Mipa chu a nia, a patling lo a ni. Naupang pali, mize inang lo ṭhah kan kawl a, chuta karah an la thliar zui. U Muani faten bawnghnute an chawm laiin ka faten dal an chawm a. Rilru a na ve thei tho si. Ka hlawh nise an duh huam a, nilêngin ka chhuak lo thei lo va, mei nei zet zetin in lama tangkai lo angin min sawi leh a, hlawh lak a hunah an phi cheng tho si. A tam lutuk, rêl chan ka chan thin vang hian ka sawi duh ngai lo. Tun ṭum chu ka peih tawh lo a ni tawp" a ti hmiah hmiah mai. Ka û hi a nulat lai pawha ze zâwi lam, ṭawng tam vak lo, taima zet si a nia. Ani meuh chutia a han ân ve bawrh bawrh takah chuan eng emaw dik lo zawng a awm ngei ang tih ka ring thiam ve mai. 

"Engpawhnise, U Hmuna pawh be leh la, a rilru te pawh a buai ve viau maithei asin" ka ti dêk dêk a. "Awii Pa nêpa a nih saw, kan inneih hma Nuteii te nupa min zilhna ka lo ngaithla duh lo kha a pawi ngawt mai. Vengkhat an nia, an inhrechiang si,.A pawi takzet a ni. In dan thu pawh a chhungte bulah te chuan keiman ka nawr nasat vanga rawt angah alawm a insawi. A farnu te lah saw an rapthlak si, thatchhe bawk si, ka mopui saw chu a sual pawh ka ti lo, a thluak an su vek a, ka la hrethiam. Ka nu ber saw a rilru ṭha se chuan chhungkaw nuam tak ni thei reng tur kan ni mawle.." a ti duah a. 

"Ka lo be ve hrim hrim dawn nia, inṭhen ringawt a ṭha lo. Karah fa in nei tawh" ka ti ve ngial a. Jojo aṭang hian nu leh pa kar lova fate seilentir chu ka remti chiah lo a ni. 

Ka û nen kan inbiak zawhah ka insiam a. Kima te ina pen phawt rilrukin ka chhuk ta thoh thoh a. Nuhliri ka tawk leh, mahse, hlauh hmel deuhin kawngsirah a kal daih a, ka be ta lo. Vena bawk ka rilruah a rawn lut leh ṭhin. Mahse, ka tan a pawimawh ber lo tih chu ka inhnemna a ni. Kima te pawh an nupain an lo awm a, inleng ka la hmuh ngai loh an lo nei bawk. 

"Va len i tum em?" Zoteii a ni. Awmze nei zetin min melh ralh bawk. Lâi ru zet hian, "Tum" tih chauhin ka chhang a. An inlengpa a awm ve si avangin Vena pawh ka sawi duh leh ta lo. Lucy te in lamah ka phei leh ta a, Sawmtea kuhva lei nen kan intawk. "Zanin chu Marovi te han rim leh ila..Veroi khan a star che a nia aw" a la tizui! 

" a..zanin chu nangmahin lo leng rih mai teh, kal tumna ka lo nei tawh sia" ka ti ta ringawt. Veroi'n min star pawh chu ka ring lem lo, a sawi ve mai mai a niang. A hmel pawh ka chiang tawh lo ve a. Lucy te in ka thlen chuan Nu Dari a lo awm ve a. Min hmuh chuan a nui var var mai. Min titlangnel zual a, a zia. 

Lucy pawh ka beisei vak lohin a hmel a ngui lem lo, Miteii tana ka leisak eiturte chu ka pe a. A û pawh ka leikep tho. Lucy chuan lawmthu min hrilh sap. Remlala pawh a bân a tuam bûr mai. Lucy nen thingpui hâng ina kan ṭhut fâl laiin, "I ṭha tiraw?"ngaihtuah hmel deuhin ka ti a.

"Ka ṭha e. " A ti sep a. A nu hnûp nain, a rilru a nu zêm si lo hi ka duhna a niawm mang e. 

"Miteii chu a ṭha takzet maw?" Ka ti leh a, ka biak dan vel hi a bialpa ka nih duh hmel, "Ṭha turah chuan ka ngai a, a lung hi chu check up leh a ngai hrim hrim" a ti a. 

"Nia, la kalpui rawh u. Chuan, Thanpuia te chu an haw tawh maw!" Ka ti leh a. 

."Haw lo ngam chi ni hek lo, kan veng tlangval hoin an châng tawh sia,. Kan khaw leilung hi rawn rap tawh lo kumkhua se a ṭha" a ti hmak hmak a. A pasal hlui heti taka a hua hi lehlamah chuan a ngaihṭhatthlak. Nuthlawi ṭhenkhat ka kawm ṭhinte zingah ngei ngei pawh, inṭhen tirha pasalte haw hle si, hun a kal deuh a, an pasal hlui te an move on ṭan tih âwm vela va hnip leh tlat hi an awm châwk. Ka dem miah lo nain Lucy'n a pasal hlui lam a hawi tawh miah lo chuan min tiawm nuam zual. Bena te nupa leh Nu Dari te an inkawm a, Nu Dari chuan, "An mar dek thiam chu in râwn ve reng reng lo a ni. Va kal ve ila, Ahruaii lahin inentir i tum tawh bawk si loh chuan" a ti hlut a. 

Bena chuan, "Û, kan va kal ve chhin dawn mawni le..ka nu hian a ring ve bawk sia" a ti a. Lucy chuan, "Tiang lam hi ka ring lo khawp mai a, mahse, va kal ve chhin u la.." a lo ti var a. Nu Dari ho chuan an chhuak ta a. Naupang pahnihte chu roomah an awm daih a, Remlala pawh Nu Dari te chhuah hma khan a chhuak tawh. Kan pahnih chauh kan ni ta. Mipa hi a lo zâm theih ve khawp mai, ka mipatpuite pawh hi in nih ve tho ka ring a, kan duh vak loh, duh ve deuh tho si te bulah chuan kan lâi em em meuh lo, Lucy hi ka thinlung taka ka duh leh ka vei rûk a nih vang nge ni ka zâm lek lek fô! Mami bulah te khan zâmna chhetê mah ka nei ngai lo kha a ni sia. 

Mahse, zaninah hian engpawh tawk dawn ila ka rilru hrilh ka duh. A hma mah mah maithei, ṭhian ang taka han inkawm bawrh bawrh pawh la nei mumal lo mah ila; ka nghak thei tawh lo a ni ber. Ka chil ka lem khawlh a, "Lucy.." ka ti sup. 

"Eih" a ti ve mai a. 

"I rilru ka hre lo va, min haw dawn nge engmah ka hre lo. Mahse, ka rilru hi sawi ve hrim hrim ka duh a ni" ka ti ta a. Chhuat lam ka bih rân bawk. 

"Sawi la" a ti nghat a. A ruka thawk lain ka inhumruh a, "I ngaihbel theih chu ka ring tho. Ka duh che tih hi chu" ka ti tlang ta hrâwk a. 

A ngawi hmak. 1 min rei ber ṭum a nih ka ring. "Min hua em ni?" Ka ti leh a. 

"I â ka ti" a ti daih. 

"Ngati maw!" Ka ti hû a. 

"Eizawnna ṭha tak i nei a, tlangval hmelṭha pangngai tak i ni bawk. Nuthlawi ni lovin nula hnahkhat i phû..kei chu ni lo ve" a ti ta mawlh mawlh a. Thinrim taka inhnar ai chuan dawnsawn a nuam fê zawk. 

"Chu! Min hnar tihna em ni?" Ka ti ve leh ngat. Ka zâmna te pawh a kiang ṭan tawh. 

"Aw ka hnar che ni rawh se. Ka tina mai mai zawk ang che. Ṭhian nih hi a ṭha zawk" a ti ta hmiah mai le. Ka rindan sa deuh mahnise ka hrilhhai takzet. Hnawl leh hnar han nih ngawt chu a zahthlakzia in hrethiam ve thoin ka ring. Tin, tlawmthlak ka ti viau bawk. Beidawn mai erawh ka tum lo. He a inhung bikna bang hi ka chhu chim ngei tur a ni. 

"Mahse, ka duh ruk deuh chu ṭhian anga kawm harsa ka ti khawp ang" ka ti a. 

"I ti lovang, ka thiam alawm" a la ti lehzel. 

"Ti nge min duh loh?" Ka ti ta tawp a. 

A inngaihtuah nge chunglam a melh zawk a, chutah "I fel a, i ṭha bawk a. Hmeichhe dang tan i ṭha lehzual ang" a ti ta a. Hawihhawm a chhuahna mai chauh a ni tih ka hrethiam ve. "Ngaihzawng neih leh hi ka duh tawh lo a ni" ti zawk se ka pawm thei zawk awm sia. 

"Inhnarna mawihnai pawh i hre hle mai, i tiṭhang tawh a niang" hul deuh hian ka ti a. 

"Tiṭhang turin kan luck ve lo. Zoteii nau Mateii saw ngaizawng rawh, kan khaw nula chhuanvawr a nih saw, fel si, hmelṭha si..sî hlir a ni mai" a ti ta duah a. 

"Aih. In khuaah nangmah chiah ka duh" ka ti bur bawk si. 

"Thingpui hâng ka'n lum ang e" a ti leh ta daih, "Kan inna a la rei lo lutuk, lo ṭhu phawt rawh" tiin ka tum loh deuhin a bânah ka vuan palh a, mi rawn melh ta kuau mai. Inthiamlo zetin ka kut ka lathla a, "Ka tihpalh" ka ti sup. Mahse, ka bulah ni lo a ṭhu ve leh ta tho a. 

"Chuan.." satliah deuh hian a ti hap. Engkim lak lâp a tum ṭan tih ka man ve..kei lah ka la thutak ropui si. 

"Ka beidawng dawn lo a nia" ka ti nghet charh. 

"I mawl, i â..min hrechiang phawt la, i inngaihtuah dawn nia. " A ti ta zêk a, a ṭawng pawh a vîn lam hret a ni tawh. 

Ka nui lui a, "Ka hriat tura pawimawh chu ka hre ve nual tawh. Ka zirchian hmasak loh hmeichhia ka ngaizawng ngai lo" ka ti ve ngat. A nunhlui sawichhuahtir ka tum a ni lo va, a inhung bîkzia erawh sawiin eng ang mipa nge a duh tih hriat ka tum tlat a ni. A ner nâwng a, a hmelṭha tho si. "Nunpui, mipa ka mamawh lo" a ti ta nge nge a. Ka la ngawi reng, mahse, ka melh chiang viau thung. 

"Ka mamawh lo mai ni lovin ṭhian thlan kawngah pawh ka fimkhur asin. Nang chu K'u Pari ten an comment ṭha em che a, ka ṭhian ka nihtir che a ni. A bak chu pel lo teh ang. Thinrim ka duh lo va, nang tihnat che emaw kan inkar boruak tihchhiat vek ka duh hek lo" a ti ta mawlh mawlh a. Ka hriat duh a la sawi ta chuang lo. 

"Mipa mamawh lo nia insawite hi mipa vanga kehchhe tawh an ni tlangpui..i pasal hlui vang em ni?" Ka ti a. 

A chil a lem khawlh, Lucy meuh pawh a zâm ve deuh niin ka hria. "Kha mihring kha chu a bultumtu a la ni thei ang chu..mahse, amah vang ngawr ngawr pawh a ni lo. a, ngaihzawng neih ka peih tawh lo a ni mai. Mipa chu in tenawm, in hur si, in rinawm hlawl bawk si lo. Natna chauh in ni, kan nufa hian kan tlei tawk. " A ti ta sak sak a. Umm ka hriat duh a sawi ta. Mipa rinawm lo leh sex-a insûm thei lo a ngaina lo tih a chiang viau. Tin, an pawnlam landan chu a care tehchiam kha ka ring vak lo hrim hrim sa a. 

"Aw le..ka tihpalh, tihthinrim che ka tum lo a nia. Mahse, mipa i huatna chhan ka hre tawh a, ka lawm. Anni ang kha ka ni ve lo tih ka lantir ngei ang" ka ti ta charh charh a. Ka tumruh viau mai. Ni e, ka mualpho laklawk tawh. Lucy hi ka induhtir thei ngei tur a ni. Duhzawng leh ngainat zawngte hneh tum tluka beihna phurawm a awm dawn chuang em ni? Ka tlawmsan hni hne chuan mipaah ka inchhiar ngam tawh nang..ka chapona kawl vete dah liana intipa taka ka bansan avang khan ka hlim phah sawt dawn lo va, ka inngaihsan phah dawn bawk si lo. Lucy hian a hranpa takin min duh lo a ni lo,. A lo chen tawhna khawvel ang kha kan din dun ang tih a hlau a ni zawk..khaichhuaktu ka nih a ngai. Nuthlawi fanu nei a ni. He lai tak erawh ka inngaihtuah nawn leh a ngai ang. Kan inkawp a nih chuan nupui nei lo rual ka ni tawh lo va, Lucy hi awlsam taka ṭhen theih a ni tawh dawn hek lo, ka hmaa lo kal tawhte ang maia nêp taka ka phatsan a nih chuan a damchhungin nuthlawi nih a thlang dawn..ka nei duh ang em? A sarhû lai a nih avangin awlsam takin "Aw" ka ti ngei ang. Mahse, ka chhungkua, ka hmalam hun bakah a pasal hlui leh a fanute thlenga ka ngaihtuah kim ve chu a ngai dawn a ni. Nuthlawi a nih vanga ka iai ni lovin, nuthlawi a nih vangin kan pahnih khawvel tur a buai thei ang em tih ka ngaihtuah a ngai zawk. 

"Tum buai suh. Nang phei chu i luck dawn si" a ti zauh. 

"Ka haw phawt ang. Muttui aw. Miteii pawh lo ṭha se" ka ti thut a, a hrilhhai hmel kher mai. Mahse, mipa dang aia ka danglamna ka lantir a ngai tlat. Ka duh huam chuan min ring lo nghal dawn, ka ngaihsak loh lutuk lahin a rin ang mipa ka ni dawn. Chona lian tak zawng a va ni si êm. Nghakteii dawrah sahdah leh hmawmsawm ka lei a, Nuhliri pekah ka ti a ni. A la tlaichhe lo bawk a, Nghakteii chu Nuhliri chungchang ka zawt ta mai mai a. 

Ani nula senior tih takah sawi tur a lo hre nasa mai a. Tiang hian Nuhliri chanchin chu a sawi ta a. 

"Nula hnahkhat ngat a la nih hi. A tetlaiin khawsikpuiin a na vak a, ta ṭang khan mi pangngai a pha zân tawh lo sa. A tleirawl chhuah hlimin a nu a boral a, a tuar khawp mai. Unau pali an nia, amah hi a upa ber dawttu,. Damdawi in letliamah khian an awm a. A û hi tuiah a tlahlum a. A nau chiah hian pasal neiin Sailianah an awm a, an naupangber erawh a la tlangval ve. A pain nupui a nei leh a, a pa hi damdawi inah khian 4th grade-in a thawk ve a, a nupui hi Lawitlang khua a ni. An nuhrawn khi a sual turu lutuk a, Hliri lah mi pangngai pha ta chiah lo chu an inbakkaih nasa ve ṭhin. Kum 3 liamta vel aṭang khan a chhul lam a chiang lo ṭan a, a nau pasal nei tawh khan a han entir vang vang, mahse, tihtheih a awm lo a niang. Tihian mu leh mal nei lovin a khawsa tawp mai a ni. A chhul ṭhat loh hma te chuan rualbân chiah lo mah se; engkim chhiat ṭhatah pawh a thawhhlawk ber pawl a ni ziah zel, tupawn kan khawngaihin ka ring. A nuhrawn lahin a fanu a rawn chhawm bawk si..Hliri chu an ten a, a hranin chaw te an eitir thul, a nau mipa a awm chang hi chuan a chhan bawk a, an tiduhdah ngam lo, mahse, ani lah khi khaw danga inhlawha zin reng reng a ni ve si, a lainatawm asin aw.." tiin. Khawvel hi a fair hlawl lo tihna chhan tur hi a tam ṭhin mang e aw. 

Ka duh ka hre ta bawk a. Ka haw chho ta hnak hnak a. A reh ruih tawh mai. Nuhliri hmuh leh ngei tumin ka hawi hruk hruk a, mahse, zanin chu a rawn lang miah lo. Ina ka luh hmain ka in piah ngaw ril lam aṭanga lo lang ṭau meichher chhi chu ka va en vang vang a, hetiangte hi hmuh a khât tawh viau a ni. Vena bawk ka rilruah a rawn lang a, ka tukkhum a za mer mer mai. A ranga rangin ka lut ta a. Intifai sawk sawkin ka mu ta daih. Whatsappah ka lut a, Lucy ka text nghal, "Ka mu chiah" tiin. A engahmah hmaa ka han inreport nghal ngawt chu zaklo ka inti ve reng. Mahse, mi dawhthei tak ka ni bik lo va, hetia chetlak nghal zung zung hi a ngai tlat a ni. 

"Keipawh" a rawn ti ve mai bawk a. Ka khi suk. 

"I mut a chhuak tawh em?" Ka ti leh a, "Chhuak lutuk lo. Bawihteii a la muhil lo va" a rawn ti vei thlap. Kan inpawh deuh sawta ka hriat chu le..

"Ba khawn khan i zin ta dawn lo mi?" Ka ti leh daih a. "Zin tawh lo ting tang mai ang, naktuk tuk lehah luiah khan kan kal dawn sia" a rawn tih chuan hlim vur vur tak ka ni. "Nia, Miteii kha uap ve deuh a ṭha..a khawngaihthlak" ka'n ti ve luam a. Ka naupangchhe thar thutin ka inhria, ka lei te ka han chhuah vel thul..min hmutu chu awm se an zak zawk maithei a ni. 

"Nia,. Taka! Jeneti chu i chhawr ta mi?" A ti hluai a. 

"Umm, hei a che fel reuh khawp mai" ka ti a. 

"An lawm ngawt ang. Pui zel rawh. " A ti ringawt. A nin chin thleng biak ka duh loh avangin a laklawhah ka mangṭha leh thut. Youtube ka en ta daih a, ka phur hûrh vang em mawni a engamahah chuan rilru ka pe hleithei lo. Ka muhil ve leh thei hram zawk a. 

Ka nitin hun dan pangngaiin a tuk pawh ka hmang chho leh a. Marovi leh Veroi te an Account transferin an rawn kal ve a, kan inkawm char char, inleng kawm tur an awm hian ni pawh a rei lo ve deuh a, a zia viau. Veroi'n a star che titu kha Sawmtea a ni tak e. Mahse, Veroi chuan min star hmel pawn ka hre lo. A phone a khawih deuh char char,. Mahse, an hawn dawn lamah Marovi chuan, "I rawn leng duh tawh mang si lo..lenna tur ṭha deuh i nei chiang" a tih zauh takah chuan, Veroi chuan, "Lucy a rim ṭhin mawle..nuthlawi zûnah a uai ve tlat..i uiawm ta phian" ngeiawm rawngkai nisi, huat dawna huat hleihtheih si loh hian a ti ta nghat a. A mitmeng pawh a hriam lam deuh a ni. Ka nui ringawt a, "Teh ngawt a..in antena hi a ṭha mang e" ka ti ve ringawt. 

"Ka hriat duh tur chi chu ka hre vat vat zel" a ti leh sak a, Marovi kaiin an chhuak daih. Titau te pawh a ang lek lek alawm le. Zan khat chiah ka la lêng a, ka laka titau ngam tur khawpin kan la innêl lo tih ka chiang, a zia ve hrim hrim te pawh a niang e. Vawiin chu ka ban hma pui a. Kima te inah ka pengkawi. Ka lut chiah tihin Vena a rawn chhuak ve zuk a. Min en lem lo. Sawi a remchang bawk a tiin hmannia ka hmuh dan velte chu ka sawi ta hmiah a. A ngaihthatthlak loh ve bawk a ni. Anni pawh chuan mak an tih hmel viau mai, Zoteii chuan, "Chuvang vel chu a nih dawn chu, a zia a mak kan lo tih kan lo tih. A bo velin a nghawng angah kan lo ngai rawk a, eng emaw tak a tawng a nih ka ring tlat. Vena hi mi dawihzep a ni hauh lo asin" a ti nuah nuah a. Han sawibelh tehchiam tur erawh ka nei lem lo. Ka haw chho chu Nu Mawii'n min lo ko pêng ta tlat. A hmel a thutak êm avangin ka ngaih a ṭha vak lo. Nupuii'n rawng a lo bâwl a. Nu Mawii chuan, "Nunpui, zah pawh dâwn zo loin ka ko tawp mai che. Ih e, ka rilru a hah viau mai. I hriat angin hmanni khan kan pa naute khan kan ram ka hralh kha thinrimin min chachhuah a, kan pa min hnutchhiah ve liau liau a nih avangin Mateii nau pai inenkawl nan tiin ka hralh ta mai kha a nia. Chu chauh pawh chu an lo ît a. Ka hralhna ka la hman bân pawh a bo a bang awm lova pe let turin min ti a, engtin nge ka tih tak ang le? Hei Masi te a nia nga, ka faten mamawh an nei ve leh ngei ang a. Ti nge maw kan vanduai em em bîk ni..VCP pawh ka be tawh a, Englo a nia, kan pa kha reitak khumbeta nâ a nih vang khan ka hriatpui hauh lohin leh ka awm loh hlanin a naute hian in leh lo te, a thil neih ve ang angte kha an unau hminga dah turin an lo ti a niawm e. An thlem dan tak ka hre lo va, Heta nu anga ka neih ve ka nu Zîngi ṭawngka aṭang erawh chuan, Kei hian ngaihzawng nei ang leh a boral hnuah pawh pasal dang ka neih leh vat an rin thu te an lo sawi a niawm e. Kan pa lah a hniam tawhin a rilru lah han fîm chi ziazang ni tawh hek lo..a naute lahin an nawr thiam si, a kutzungpui a lo nem ve ta mai a niawm e. Tikhan a mitmu êm pawh a keh hmain min hnawtchhuakin kan nupaa kan lo din ve pawh min chhuhsak a, kan huan leh ram an nei vek bawk. Kut bêng takmeuhin kan chhuak kha a nia. Tuna ka ram hralh erawh kan ram a ni tih pawh ka lo hre lo va, A leitupa Pu Khuma hian mi rawn dil ta ngawt si. Khami ram kha Pu Thanhranga ram ni ṭhin, Pu Hrânga'n kan pa a pek ve lehchhawn a lo ni a, vannei ka intih em em laiin tiang hi kan tawng leh ta si..tihngaihna ka hre lo. Ka han koh chhan che pawh bank-ah sawn rawn dah lut vek ila, engtin emaw lakchhuah theih loh angin a siam theih em?" A ti ta mial mial a. Ka va khawngaih tehlul êm. 

"Ekhai! Lungngai reng reng suh. Vawiinah te khan lo sawi tawh tur alawm le. Naktuk chawlh a ni tawh sia. Engloin ti rawh..an lo dil leh che pawn, 'Bank-ah ka dah a, a lakchhuah theih loh. A hun hma chuan' i ti dawn nia. Kar tharah pawisa chu min thawn la, ka lo dahlut ang e" ka ti ta a. Ngaihngam huai hmel a pu..an chanchin ka hriat thawi kha a lo dik chiah a nih dawn hi. Tuna Pi Mawii te nufa chan hi a awihawm loh ti duh reng reng suh, hetiang mi duhâm hi kan vengah pawh ka hria. A pasal a sûn aṭanga thla 2-naah an pa ai thawk thei tura engkim tihfel vek tawh pawh a pasal farnu zawk thawhtirin hotu lian te an be thiam a. An pa nena an in leh lo zawng zawng an chhuhsak vek. Mi duhâm te hian vanram an han chan loh dan tur hi aw…Mahse, chhungkaw pa ber fin tawk lohna a tih ve theih ang. Pa berin felfai takin thurochhiah siam se, ukil hriatpuina nen thlap. Thih hnua ro inchuha buaina hi a tlem phah ngei ang. 

Ngaihngam tak chuan ka hawnsan ta a. Jeneti pawn rawng a lo bawl zo leh diam tawh. Ani pawh an chhungkaw dinhmun vang nge a ngui nghiai a, "I mood a va off hmel ve" nui chungin ka ti a. 

"Anu hi ka khawngaih êm a ni" a ti ta reuh a. 

"Umm, min lo kopêng a, kan inbe tawh e. Engkim a ṭha vek ang" ka ti sup. A hmel pawh a êng sawt thei. 

"E tak! Û, enteh, saw lamah sawn U Vena pui kha chak tawkin a kal phei a, a thinrim hmel bawk sia maw.." a ti hluai a. Min tiphu ve zawk alawm le. Mahse, ka buaina tur niin ka hre lo. Pu Zuala huan fang a rawn dak zuai a, "Jeneti chu i nupui rûk emaw ka ti dawn alawm le..kha in inchhawr a ni maw?" A ti a. 

"Nia mawle, hei a fel tak tak a ni" ka lo ti ve var a. 

"An fel unau a nia. Netpui, i û kha vil tlat la, i pasal a la ni thut thei a nia" a ti pek a. A nui huah huah naa Jeneti nui ve miah lo chuan ka rilru a tinuam lo deuh. Pu Zuala kal hnu chuan, "Hemi te chhungkua lah hi min khawngaih hmel deuh hian an lang a, mi bulah te hian min ṭanpui tawh thu te, an fanuin thawmhnaw min pek thute hi an sawi leh vak vak zel a. Kha.. tunah pawh min ṭawng el leh tawh a nih kha, U Ramsanga kha Pu Zuala nupui û fapa a nia..a ruk hian min mil lo reng si. Ka ngei tlat" a ti nghat nghat a. A la naupang a, a rilrua awm ang ang a sawichhuak mai zel ang tih ka ring. 

"A ni maw? A va zia lo ve. Mahse, a fiamthu kha chu engah mah ngai suh. Ka farnu ang alawm in nih.." ka lo ti vat a. 

"Keipawn a û angah khan ka ngai che. I fel si,. Ih maw, an star che a nia aw. Mahse, kei chuan ka star ve lo che" a ti niah niah a. Ka nuih a za hle. Tleirawl bum nuam a nih lai remchanga hmangtu kha ka hmu ve châk mang e. 

"Keipawn star ka nei alawm" ka tih chuan, "Ka hria, Miteii nu" a lo ti vat..mak ka ti. Ti nge an lo hriat leh vek tawh le? Thingtlâng khaw lian ve tak a ni sia. 

"Nia..i van hria" ka ti ringawt. Nui sâng chungin, "Miteii nu chu a hmelṭha si, a fel si. Innei daih ula in inhmeh ngawt ang. Ani chuan thawmhnaw min pekte, bungrua min pekte leh Anu hnena pawisa a pekte hi mi bulah a sawi ve ngai lo reng reng..kan khuaah a fel ka ti ber" a ti ta mial mial a. Min va tihahdam zual tak. Lucy chu ka rin loh lamah samari mi ṭha a lo ni reng a nih chu..

"Mahse, a kawlh tiraw?" Ka ti a, ka nui pût pût bawk. "A thinchhe ve a, a kawlh pawh ka ti lo. " A ti ve ringawt. 

Thil ka hrechhuak ta thut a, "A nih Net-i, ka lo awm hma deuh khan heta nurse lo awm chumi nau mipa chu khâmah a namthla tawh ami? I hre ve em?" Ka ti ta chung chung a. Pu Zuala te nupa thu min fah kha ka hriatchhuah vang a ni. 

A ngawi dat a, a kutzungṭang elh neuh neuhin, "Umm, a namthla alawm. Mahse, kha pa kha a tenawm êm alawm. Kan khaw tlangval pawn khawih an tum asin. U Lucy kha khawih a lo tum a. Chuvangin a nam vak a, a lum ta a nih kha. A haw vang vang a, a rawn kal leh tawh ngai lo" a ti ta nghat nghat a. Ka rindansa a ni a, mak ka ti lo. 

"Umm, Lucy thiamloh pawh a nih loh chu a tiraw?" Ka ti a. 

"Ni nang aw. Mi ho pawn U Lucy an dem lo hrim hrim, E chuan! Ih, mi pakhat pawh a bekah a hlap tawh asin" a ti leh hliai a. "Tu nge chu chu" ka ti ve vat. 

"Kha Pu Zuala te fapa, U Mama kha mawle.." a tih chuan ka fiah ta uar mai le. Pu Zuala te nupa bula Lucy leh Pari hming ka sawi rik ruala an inmelh dan kha ka hrechhuak chawpchilh a, chutiang thil a lo thlen tawh vang a nih teh hrep chu a! 

"Ngati nge a bekah a hlap a?" Naupangchhia zet hian ka ti a.

"Ih, an sawi dan chuan U Mama hian a ngaizawng thei lutuk a, mahse, U Lucy'n a duh bawk si lo. Chunglai chuan kan khuaah football tournament a awm a, mikhual pawh an awm nual. Mikhual tlangval ho chuan U Lucy an rim luih luih a, U Mama chuan a lo thîk ve ringawt a niang, A zu rui kha a va lut thawr thawr a, U Lucy chu a kuah ringawt a. A lo namkiang kha an intibuai chho a. 'ka nula i nih kha' tih velin a ṭawngkhum a niang. U Lucy thinrim lutuk chuan an sikri dahchhan ami chartin bungin a hlap ta an ti..Pu Zuala te khan report an tum a, U Lucy'n a report khalh daih..Ka nula a lo ti ve ringawt kha a lungawi lo lutuk a. Mahse, Pu Zuala ten ngaihdam an dil a, an ngaidam ta hrâm a niang.." a ti ta zung zung a. Thawk pawh thaw ṭha ngam mang loin ka lo ngaithla. Lucy ka duhna leh ngaihsanna a zual zel e. Pu Zuala te tan chuan lo fak chiamna chhan tur a awm lo ve bawk a nih chu a..

Jeneti haw hnuah ka dan pangngaiin chaw ka ei sawk sawk a, a bâwl tui riau zel mai a. Ka chhawr sual lo hle mai. Ka bialnu hual rim tur bawk chuan ka chhuk leh ta nul nul. Pari'n min lo be leh nawlh.."Lo peng teh aw. Thil sawipui che a ngai" a rawn tih chuan nuam ka ti lo ve ringawt. Thil ṭha lo lam a ni thei ang em? A rawn thutak angreng bawk si. 

Ka thlen chuan amahin tv a lo en a. Min hmuh rual rualin, "Ka bulah hian lo ṭhu teh" a lo ti sawt sawt. 

Ka ṭhu ve mai a. Min tihlauthawng teh hûrh sia a. "Sawi teh" ka ti vut. 

"Nizanah i rilru i hrilh em ni?" A ti sap a. 

"Umm, nge chu chu?" Ka ti leh nghut. A inla thutak vel lutuk hi a hrehawm. A zia a ang lo si. 

"A sawi a. Mipa amah ngaizawngtu min hrilh awmchhun i nih bakah a rilru buai thu a sawi vawikhatna " a tih chuan ka ṭawng lawk thei lo. Ka melh kur ringawt. "I va chhe dêk dûk tak. I hamhaih em ni?" A ti a. 

"A mak em alawm, tak tak a ni em?" Ka ti a. 

"Dâwt ka sawi ngai lo" a ti hlar a..ka nuih tlawn leh ta vel. 

"Chuan, eng nge i lo sawipui ve" ka ti leh ta sek sek a. 

"Teh ruai a che. Khu ruai suh. Nang chu ka duhpui che alawm..'A hmain ka bulah a sawi thawi tawh a. Mipa dang ang a nih ka ring lo. I duhthlanna a pawimawh' ka ti" a tih chuan, "I va â tak, 'Duh rawh' ti ta che" ka ti hlur a. A nui vur vur ringawt. 

"Nawrluih chi a ni hleinem. A rilru a buai ve nak chuan a duh ru ve tho che tih hrethiam lo khawpin chhâw suh" a ti ta zêk a. Mahse, ka ngai haw phal teuh lo mai. "A nih chuan ka beidawng dawn lo tihna" ka ti ṭâlh. Min melh rawm râwmin, "Thluak fîm tak erawh hmang ang che. Ka ṭhiannu a ni a, a nata a kehchhiat leh ka remti lo. I nei duh dawn lo a nih chuan bansan law law a finthlak ang. Hmalam hun thui tak ngaihtuah ang che" a ti ta a. Hei chu nizan lamah ka ngaihtuah fel thawkhatin ka hria. Ka chhungte erawh ka la hrilh lo. 

"Amah ber hian âw min pawh ve se, inhrechiang tawnin inzirchiang ve bawk ila..chungte chu rilru siam a harsa tawh lo" ka ti nuah nuah..

"A dik reng mai. Engpawhnise, zaninah han nawn leh sak la, mipa over, ti huam chi ang kha a ten uchuak a nia. I tihnat vaih chuan ka khaizai ang che" a ti thur thur mai. A nulian roh sia, mipa ṭhenkhat hi chuan thahruiah an hneh kher lo maithei a ni. 

Rilru hlim leh engthawl takin K'u Pari in chu ka chhuahsan a, Luciferi te in lam ka pan ding nghal. Ka va luh chuan Ahruaii te nupa chauh an lo awm a, ka hrilhhai hle. Mahse, Ahruaii chuan, "Lo ṭhu rawh. Ka û chu kawmchhakah a kal lawk a nih kha" a lo ti sawk sawk a. Ka ṭhu ve ta mai bawk. Msg-in, "In inah ka awm, lo haw tawh la" ka han ti zeuh . A seen aṭanga 2mins velah kawngkaah a rawn dak lut heu mai. A va nuam ṭan ve mawle. Phûngthlûk nan Ahruaii te chu nizana an mardek thiam râwn vel kha ka zawt ve a, "Ṭhat lohna engmah in nei lo, in la inhamtawng lo mai mai a nih hi" a tia. Kan ngaih a ṭha ve ringawt" an ti a. 

"Nia, in hmanhmawh ve deuhte pawh a ni maithei asin. In la pai em em ang" ka ti ve luam. 

Reivakloah an nupa chuan an mu ta daih a. Lucy nen bawk kan ṭhu dun leh ta. Zan hmasa aiin ka zâm lo zawk. "Naktuk ka nghakhlel" ka ti sup a. 

"Kei deuh" a ti ve ngei. 

"In khaw mite hian kan pahnih vel hi an hre leh vek tawh" ka'n ti ngawt a. Min rawn thlek zauhin, "Eng kan pahnih maw?" A ti dam thlap. Ka zâm leh titih dawn, hrep taka!

"Aa. Ka lo rim ṭhin che tih hi mawle" ka ti ta ngawt. 

"An hriatna hi a chak thei êm alawm. A ho êm mai, ṭhian kan ni tho alawm " a ti liam puat a. Namnul a tumna lamah a insangmar ve tho ang em le? 

"Ṭhian ringawt kan ni lo têp" ka ti nghut a. Tv lam ka thlir daih thung. Min en tih ka hrereng,. "I mak" a ti hlak a. 

"Ka mak..i mak ve tho" ka ti leh ringawt. 

"I lerh ang" a ti leh daih. "Min la hre zel dawn alawm" cho zetin ka lo ti si, a dang ve deuhin ka hria. "Ti lo teh, Nunpui.." a ti hawk a. Beidawn ka tum der si lo. 

"Ka duhthua ka neih a ni bik lo va, ka duh duha ka tihtawp theih a ni hleinem" ka ti ta a. 

"Kan khawvel a inang lo. Engmah i hre hek lo" a ti leh ringawt,. Pari hnen aṭangin thil lo hre lâwk lo ila chuan ka induhtâwkna a kaitho ve tawh maithei. Teirei peih lo mi tak ka ni ve bawk nen.

"Khawvel a inân kher a ngai lo,. Kan thinlung a inân chuan, khawvel dang a din theih" ka ti a. Mak ka inti. Ka ṭawngkam thiam vel lutuk chu..tiang hi ka ni ngai lo asin le. 

"Kan en ang chu" a ti ro hak a. Va melh zauhin, "Chuan..kan inkawp ang..a ṭha em?" Ka ti a. Zâmna chhetê mah ka nei ta lo. A ngawi reng a. "Lucy, i hun kal tawh kha a rawn lêt tawh dawn lo, hlauthawng suh. Ka siamṭha vek ang. " Ka ti nghet charh a. Ka piantirh ata ka la thutak ber ṭum a la niawm e a. 

Chiang zet hian min rawn melh a, "Aw le..mahse,.." a tih lai mêkin ka phone a rawn ri ṭût, a va han timing lo lulai tak..Huiham..Mami a la ni zui a!..