Nuthlawi 5

NUTHLAWI (5)

Ziaktu : Toni Râlte

Ka kut chu ka la vat tak naa, a meng rum lutuk chu ka melh kur ringawt. Midangin an hre lo hlauh a, ani pawh a insûm nge ni, no lo zeta min melhin in chhungah a lut ve ta hram a. Ka thaw huai mai. Ṭhutthleng sei pakhat a awm ve a, keimahni khan plastic chair pali kha kan keng ve bawk a, chaw ei dawhkan a ni leh tawp. Pari chuan, "Siama, ṭhutthleng pakhat chu in siamsak ve a ngai a nih hi..tiangte chuan len pawh a inthlahrunawm dawn alawm" a ti a. "Nia, siamtir ve chu a ngai" ka lo ti vat, hei hi chu ka tum rilru sa kha a nia. Thingpui lum ka tum lai chuan Lucy chuan, "Khawi ka lo lum ang" a lo ti var a. Mak ka ti angreng zawk. A lum ta rak rak a, no hi chu ka nu khan a ngaipawimawh ve a, dozen 1 lai kan keng thla a. Ka indaih ve viau. "Choka bungrua hi kan pe ve dawn che nia, office thilah eng emaw chaw eikhawm te pawh i la thleng ve thei" Lucy chuan nui miah lo hian a ti a. 

"Aih, ka leisak dawn che u nia" ka lo ti ve vut. A peka inpek ngawt chu nuam ka ti bik lo. Thingpui kan in lai chuan, "Ti daih ila, Pi Mawii te khu ka rilruah an awm reng mai a. An khawsak a harsat ve hmel nen, a fanu tu emaw zawk khu lângin ka inah ka chhawr dawn mawni ka ti" tiin ka râwn a. Siama chuan, "A va ṭha dawn ve, nia, an harsa ve khawp asin. Mahse, an inrên thiam êm zawk a, nula an ni ve tawh sia, an khawngaihthlak reng mai" a lo ti chuar chuar a. Siama hi kei aiin a naupang ngei ang a, mahse, nupui a neih tawh vang nge a inla patling thei riau. A ṭawngdan leh chezia hi a patling ruih zel. 

Pari pawh chuan, "An lawm ngawt ang. Thla bîa hlawh lak tur a awm hian a zia ve alawm. Thingpui dawrah ni khatah 100 hlawh ten an thawk a, a tlem ve lulai êm mai" a lo ti ve mawlh mawlh. 

"Nia, naktukah hna kal pahin ka pengkawi chhin ang. Pi Mawii khu a fel reuh êm a, biak hmasak ka chang ngai meuh lo" ka ti ve a. 

Tiang chuan thudang dang pawh kan sawi a. Pu Zuala te'n Lucy an sawi vak dan kha chu sawichhuah chi a ni lo. Mahse, eng emaw tak an inkarah a awm em mawni ka ti mai mai. Ka hmuh leh hriat chinah Lucy chu kawlh pawh a la kawlh mang tlat lo. An rilru en nan, "Picnic chu in rêl fel tawh maw. A chakawm tawh ê" ka ti hluai a. 

Pari'n, "Zobuhi leh Techhiai te lah kha a phur ber berah an ṭang lehnghal a. Keipawh ka ba ka lo khawn vat vat ang. Luciferi pawh i hman ve ang chu tiraw?" Tiin a melh zauh a. 

"Kartawp tiraw khah? Lâwitlangah naktukah emaw a tuklehah emaw ka va kal leh lawk ang a, ka hman ve theih mai chu ka ring" a ti ta mial a. Ka lo lawm veng veng. Pari'n ka rilru a hriat deuh ruak tawh avangin lehlamah chuan ka ngaih a ngam. Pari hian a ṭhiannu tan min duhpui lo chu nise min be ṭha duh tawh meuhin ka ring lo. Anni ang chin chuan mi hmai êng an zah vak lo nen..ka ngaih a ṭha ve tawp. Dar 10 a ri dawn tihin, Lucy chuan hawn a rawt a. An tho ta sang sang mai. Keipawn ka chelh duh ta lem lo. Kan inmangṭha hnuah ka intifai sawk sawk a, ka mu ve ta hlûn a. Lucy number hmetchhuakin a dp chu ka han belchiang tê tê a, A fanu a nih ka ring, chu nen chuan hmai insi lek lek hian an selfie a, effect tih vel a hmang ve lem lo chuan ka hria. A hmelṭha tho si. He nu hi a danglam tlat..

Mami'n whatsappah min lo be leh ta hram a. Ka chhiarsak ve tho. "Ih maw, i thîk êm êm khan kum 24 ka nih aṭangin min ngaizawng tawh. Mahse, ka cousin ka tih kha chu dâwt a ni lo. Ka nu û ka pu fapa a nih kha. Tette aṭanga khaw hmun lova kan awm avangin kan inpawh vak lo va, chuvang chuan unau pawh sawi hleithei lovin min duh ta mai a ni. Khami zan khan hotelah khan riah chu kan riak dun ngei, mahse, engmah a thleng lo. Nang nen kan inkar a hre vek..keipawn ngaihzawng nei chunga mipa dang kawp ka duh lo. Mahse, tikhan thutlûkna i rawn siam hmawk hmawk a, i rilru fîm hun ka nghak a, mahse, engahmah min ngai ta bawk si lo. Chuvang chuan keipawn rilru dang ka pu ve tawh mai ang e. Inchhir lo la, nupui ṭha tak i tawng dawn nia" tih thu a ni. A type sei ngei mai. 

"Aw le. Nang pawh le.." tih bak han chhanlet dan tur ka hre mawlh si lo. A sawi khi ka awih lo a ni lo. An riahdun zana engmah thleng lo anga a sawi erawh ka thinlungin a ring thei lo. Chu chuan min tiluhlul a, ka inchhir a nih pawhin ka tuar tawh mai ang chu. Amah ngaizawng char chartu bula a riak duh ringawt pawh kha a ngaihzawng tan chuan palzam a harsa tlat! Nakinah kan la buai fô dawn tho si a, tihian tâwp hlen law law ila a ṭha. 

"I hlim tawh awm bik hle mai maw" a la rawn ti hrâm a. Ka chhang tawh lo. Hunin a la hril zel ang chu. Lucy a thlen tawh ringin ka va be ta tâwng a. 

"I mu tawh em?" Tiin. 

"Mu chiah" a rawn ti ve mai a. Ka dp aṭangin min hre nghal a nih hmel. "Ka no hi save ve rawh" thuneih hmel zetin ka ti vel a. " Ka save alawm" a ti leh tawp. 

"I mut a chhuak tawh em?" Zawhna zawh loh chuan min be rei duh dawnin ka hre lo. 

"Chhuak tho mai. Muhil tawh rawh nangpawh" a rawn ti a. Zan khatnaa biak duah ka duh lo bawk nen ka mangṭha ta vat a. A zan khatna chu a chhe em em lo ve. Ka mutui thei riau zel hi a mak ka ti zawk. A hma chuan ka mutna khum ka sawn hian ka muhil hleithei ngai lo. He khua hi a ṭha a niang e.

Zing dar 3 a pel tawh tihin ka kawngka chu a rawn insawi dawt dawt a. Ka harh chiang kher mai. Ka inbeng kâng a, âw erawh ka chhuah duh rih lo. A vawihnihna pawh chu a ring angreng, zawitêin ka tho ṭhem ṭhem a, mutna pindan tukverh aṭang chuan ka va bih ta dêk dêk a. Ka lungphu dup dup pawh a reh nghal duak! Pi Nuhliri an tih, chhul ṭha lo kha a lo ni reng mai. A sam chu a thlah hnûp kher a, a hnawk angreng si, chu chuan a tirâpawm ve deuh. Mahse, mihring a ni tih ka chiang bawk a, ka hlau eih lo. A lu a hiat nuah nuah a, ngawi rengin a kal leh daih bawk. Keipawn va umzui ka tum lem lo. ka zun leh tê tê hnuah ka muhil leh ta bawrh bawrh. Ka harh chuan dar 7 a lo pel hlek chauh. Ka tho a, chaw ka chhuang nghal. Anṭam ka tlak ta bawk a,. Nula ka chhawr theih chuan chawhmeh pawh ka hmeh tui ve deuh tawh ang chu maw. Vawiinah Lucy kha rawn kal a tum tak e, mood a fuh nghal sûrh mai. Lehamah Mami nen kan inṭhen chauh a, lerh min lo ti a nih pawhin a mak lo ve mahse, hetia mikhualna rama awm nawmna an lo awm ve hi a nuam dangdai riau asin,. Vei ruk neihte hi hrehawm hmel tak anga lang, nuam ru deuh si a nia. Tleirâwl laiin heng thil hi chu kan lo hriat ṭhan tawh kha maw. 

Chaw ka ei kham a. Muangmarin ka insiam nghal. Vena chanchin erawh ka la hre leh rih lo. Vawiin lamah te chuan a rawn ṭha ve tawh maithei asin. Pi Mawii te ina pen ka tum avangin nidang aiin ka kal hma deuh. Far thing an phun tlar zawn ka thlen chuan, Pi Nuhliri bawk kha far thing phên atangin a rawn chhuak luau mai. Kum 40-45 bawr vel a nih a rinawm. A sam chu a pheng em em a, kekawr dum bal paw thuk mai a ha a, tshirt hring lian hnek hnuk a ha bawk. Amah chu a inbual khât vang pawh a niang, a rim a na angreng. Be ta lem lo chuan ka kalpel ta mai a, mahse, 'Hei..i in luah bulah khian mitthi a awm" a rawn ti ta mai a! Ka ding chiang kher asin. Ka hawilet vat a, nui vur vur chungin a inher a, a chho leh daih. Ka hamhaih atalângin auh zui nachâng pawh ka hre lo. Ngaihṭha mang lo zet chuan ka chhuk leh ta hnak hnak a. Pi Mawii te in lamah chuan ka pengkawi ta a. 

Tukṭhuan an lo eikham ve tawh a. Jeneti'n thleng a lo sil mêk. Pi Mawii chuan ar chaw leh chawṭhing a lo hmet mêk bawk. Min hmuh rual chuan, "Teh hlawl che chuan, lo ṭhu rawh.." a lo ti chul a. Keipawh ka ṭhu ve nghal. Jeneti phirpui pawh pindan atangin a rawn chhuak ve chiah a, an inang kher mai. Zahzûm hmel deuhin tukverh bulah a va ṭhu a. Pi Mawii chuan, "Eng nge zing ṭhang ṭhangah kan inah te i rawn tih ve mial?" A ti leh a. 

"Nia., Ka rawn peng lawk. Englo a nia, kei hi ka nep khawp a, rawngbawl takngial pawh ka thiam si lo. In chhung han tihfel leh tihfai lamah lah ka pachhe si..Jeneti emaw a unaunu emaw hian lângin min rawn pui ṭhin se, lawmman te pawh kan inpe ve ang a ka lo ti mai mai a. Kan inpuitawn a ni mai a ka ti deuh" ka ti ta zung zung a. Ka rin aiin ka sawi thiam. 

"Khai aw! Pu Nunpuia chu,.i va tilawmawm êm ve aw. Chutia i chhawr duh te chuan rem lohna engmah a awm hleinem. Zêp nâk emaw khawsak a harsa ve si a, an mamawh takngial pawh hi ka tihsak hleithei tawh lo achha chu a nih hi..kan lawm ngawt ang..i chhawr theih chuan" a ti ta chûl a. A lawmzia a hmelah a lang vek, keipawn ka tisual lo tih ka chiang ve mêk bawk. 

"Aa..lawmman pawh mite angin ka titam em em thei kher lo maithei a, amaherawhchu, a hna a hahthlak dawn loh a. Tihian tukṭhuan eikhamah lo kal se la, tihfel ngai tifel se, chhunah te chuan thil dang pawh a ti thei vek a nia. Tlai lamah rawngbawl a ni leh mai a. Zing lam kha chu bâwl a ngai lo turah ka ngai.." ka ti ve ta duah a. 

Jeneti thleng sil zo chu a rawn phei a, ani chu fa hial lo nei ve tawh a nih vang nge a unaunu ai chuan a zak lo thei zawkte pawh a niang. "Keimah ka thawk anga ni mai lawm. Nupuii chu a zakzum êm mai, hrehawm a ti palh ang" a ti ve a. A tu zawk zawk pawh nise harsatna ka nei lem lo. 

A nu pawh chuan, "Ni e, i nau zawng ina tawm chi a ni sia, nangmah zawkin i kêp a ngai a nih hi..a lawmawm em mai, i Pu hi thingpui hang va lum rawh" a lo ti vat vat a. A la tlai chhe lo bawk a, ka hnial hran lo. 

"In pu kher kha ka duh lo a nia. Min û rawh se,. Nula tlangval theuh ṭheuh" tiin ka nui a. Tlangval lai aṭanga in pu ṭût ṭut te chu ka duh bik lo. Jeneti te hi "An va hmelṭha tak" tia sawi hluai theih chu an ni lo. Mahse, an vun a mam a, an ngo lo nain hmuh an nuam tawp, ka ṭawng huatthu suhah UPC an ni bawk a, an sam a sei hniang mai a, a dum hlap bawk. Sam dum hi kei mawi ka ti ber rêng a. Lucy sam pawh kha ka hmuh hmasak ber aṭangin mawi ka lo ti tawh kha a nia. Jeneti chu a û zawk a ni tih ka hre thei ta a, an inân êm vangin a tu emaw zawk hi khawiah emaw hmu ila ka hai dawn chiang. An thau lo va, an intiat nasa bawk si. "An inang nasa mai sia, engtin nge maw ka han chhinchhiah ang le?" Ka ti ta ngawt a. Pi Mawii pawh a nui ve hawk hawk. 

"I ti duh, an tet lai pawn ka ko sual fô mai. Mahse, Jeneti hi û zawk a ni bawk a, a sang hlek. Mahse, an awmdun loh chuan hai an awl tho, i chhinchhiah dan tur chu Jeneti saw chuan ṭhi a awrh..saw ta ṭang sawn chhinchhiah ve tawp mai rawh" a ti a. Ka nuih a za ru hle. Thingpui hâng ka in lai chuan pa pakhat hi a rawn lut a. Ka ngaihbel nge Pi Mawii hmel chu a dur deuh. Chu pa lah chuan ka awm ve tih hrereng chungin, "Tlanmawi, engvangin nge Hmunṭha rama kan ram ve kha i lo hralh a?" A ti hmuar hmuar. 

Pi Mawii chuan muangchang hian, "Insûm teh, Zami pa..saw lai ramte chu ka ram ve liau liau a ni e, ka duhdana ka tih a thiang" a lo ti ve sak a. A zâm vak bik lo tih ka hria. Chupa lah chu a ding reng a, a meng rum ûl bawk. "A hma pawn ka sawi tawh. VC te pawh ka tehtir ang ka tia, i lo tehtir chawng chawng a, ka û hnena Pu Zingmawia pek a ni. I ram a nihna pakhatmah a awm lo. Nangni nufa hi ka û khan engmah a hnutchhiah lo che u ka tih tawh kha" a ti leh tun tûn a. Pi Mawii pasal nau a ni tih ka hrethiam nghal. Nuam ka tih loh em avangin ka tho a, "Ka kal ang e. Nu Mawi, naktuk aṭangin Jeneti chuan lo ṭan se la aw" ka ti dam thlup a. Ṭha takin min thlah..rilru erawh a nuam chiah lo. Kha pa kha a zâm loh hmel si, mihring rilru hi a lo chhe thei hle a nih dawn hi. An chanchin tlem ka hriat aṭang ringawt paw'n Pi Mawii te nufa chan kha a rapthlak ka ti. A pasal chhungte kha nasa ka lo ti ru ve viau kha a nia. Tuna an buaina khan nghawng lian tak a nei ang em le..

Kima te nupain min lo kalsan tawh a. Mahse, ka tlai chhe lo ve. Lehkha ziah fel ngai ka ziak fel nghal mawlh mawlh. Lucy rawn kal lai pawh chuan ka la buai angreng. A fanu a rawn kalpui ve a, ka hmuh vawikhatna a ni. Miteii an ti mai a, A hming diktak erawh Miriam Lalvohbiki a ni. Koh duat nan Mite an ti ve tihna a nih chu. Nuteii ai khan a tê hlek a, a zahzûm hmel hle bawk. A nu a chhun fai vek ka ti lo thei lo, a hmelṭha, mahse, a dawldâng. Lucy chuan pawisa a dah lut a, a tam tham leh ngawt ang chu. "La leng ve rih r'u, chhun chawlh a hun ṭêp, kan phei rual dawn nia" ka ti ve tlat a. Remchang takin Ac tranfer tur nu pathum an rawn kal a, Lucy chuan a lo fill up pui ta hlauh a. Miteii chu a nu Zoteii nen an inawm a, a tlei viau. Account tranfer fel hnuah chhun chawlh la hun chiah lo mah se; Lucy te thlah pahin kan chhuak ta dial a. Pi Dari dawr lam kan pan leh ta chat. Vawiin chu tleirawl hmel fai ving veng a lo awm ve a, a chhawr thar a ni maithei. "Mite, eng nge i ei duh?" Ka ti khawmawi ve a. Naupang han chhawnchhaih vel hi ka zeihawi vak lo, Jojo pawh khan min ngaina har angreng. Mahse, a len deuh tawh hnuah erawh min ngaina leh ta lutuk a, a buaithlak lek lek fô. Fa nei ta ila fa enkawl thiam tak ka nih ka ring lo, an duh duh ka tihtir a, Jojo pawh a nuin a han hrem changte hian ka lo lainat a, ka tauhpui fô mai. Hei hi a ṭha hauh lo. Fate enkawl tur hi chuan nu leh pate hi thuneihna pumhlum pe tawp ila, an pi leh pu, an nî, putea emaw pawh lo ni ila an nu leh paten an thunun a nih chuan lo inrawlh ve loh hi a ṭha ber. Duat erawh kan duat ang,. Ka nu hi chu a zia, ka pa zawk pawh khi keimah ang chi a nia, tu hmel a hmuh hmasak ber a ni bawk nen, Parteii pawh hian a sawi ve nuah nuah zel. 

Miteii chuan, "Ih maw, chana" a ti ta reuh a. Chana ber kher chu a! Lucy a nui rah rah a. "Hei pui Aizawla ka zinpuia Restaurant changkang taka ka chawlhpui ve te hian chana leh rice a lam nulh zel a. A buaithlak ṭhin.." a lo ti a. 

"A ṭha daih zawk alawm, a hautak lo zawk" ka lo ti vat. 

Miteii chuan kum 9-na a hmang ve mek tawh naa a kum aiin a lang naupang. Bakah an duat no ve deuh te pawh a ni maithei. School pawh an khaw English medium-ah a kal ve a, vawiin erawh an chawl a niawm e. Biak chuan ṭha takin min chhang a, naupang harhvâng tak a ni lem lo. Nu Dari a titi leh bawrh bawrh a, Lucy te nen an lo inchhungkhat bawk nen, chutia kan han chawlho ta chu a lawm tih ka hre mai. A hma khan kan sawi dun tawh bawk sia. "Mate, i pa chu a zin ta mi?" Tiin Lucy a bia a. "Aw..sunday cham te kha a tumin ka hria" Lucy pawh chuan a lo ti ve var a. 

"Tak ana, nimin khan Mampuia kha a rawn ṭap haw pûr mai a, ka lo zawt sasawi a, engmah a sawi ṭha duh si lo. Eng nge thleng a?" Nu Dari bawk chuan a ti leh a. 

Lucy chuan, "Zorama ten an lo vêl leh deuh a niang. A patea va kal a tum thut thut a, kan bengdai thei hram, keiman ka la khak ang" a lo ti a. Mampuia an tih chu a û fapa kha a nih hmel. 

Zoteii'n, "Ahruaii khi engtik nge a inentir leh dawn, thurualpui ka duh riau mai " a lo ti a. 

"Karleh lamah a niang. 'Inentir pawh ka peih tawh lo' te kha a tia, mahse, kan nawr ve deuh a, kal rual tak teh u" a lo ti siam siam a. Hetia a titi lai te hian ka lo en leh reng ṭhin. Ka zahpuiawm mah mahin ka inhria. Tianga hmeichhia han ngainata han duh viau hi ka la nei ngai tlat lo a tin ni. Nu Dari bawk chuan, "A beidawng hma em mai, Feli pawh kum 3 hnuah alawm a pai chauh.." a lo ti ve a. Thil kan ei zawh chuan Lucy te chu kan kalsan a, Bank thlen hma deuhin Zoteii'n, "Pu ber hian kan Luciferi hi a melh ngun riau zel a. Hmalaksak a ngai a ni" a ti sêp sep a. Ka nui huk. 

"I lo ti ve maw? Nia, Lucy hi chu a chhe lo ve êm alawm" Mapuia'n a lo ti ve sup. Ani hi a ṭawng tam lo êm mai a. Chutia a rawn ṭawng ve chuan ka nuih a tiza zual sauh. 

"In ho mai mai e a" ka ti nghut. 

Han inzêp kual vak ka tum hran lo, mahse, mipa ka nih angin midang min sawipui chu ka duh lo. Keimah ngeiin hmalak ka tum. Hmanhmawh ruai ka hreh rih zawk a ni. Ka virpilh palh ang tih ka hlau. Ban hun pangngaiah kan bang ve a. Peng khawmuang lovin muangchângin ka haw chho ta a. Ka in kawt Tuizem bulah Nuhliri kha a lo ṭhu leh tawh. Derken par hi a lo sik nawi mial mial a, ka thawm hria ang pawn a lang lo. Ka aw ka thian a, a rawn hawi chuang lo. Ka kal pel a, ka luhsan ta mai. 

Vena kha a rawn harh ṭha tawh a, mahse, a bo dan erawh a la sawi duh chuang lo. A taksaah felhlel engmah a awm tawh lem lo bawk a, an hawnpui tawh an ti. Kan inhre ṭha em em lo bawk nen, ngaihven vak ka tum lo. Rawng ka bâwl a, Naktuk aṭang chuan Jeneti a rawn kal tawh dawn a, ka âwlthawng dawn khawp mai. Ka nu nen kan inbia a, "Hei i û a rawn lungawi lo khawp mai a. An pa chhungte nen an intithiam vak lo nge ni..rawn phei a tum a, i pain a la khap rih.." a rawn tih chuan mak ka ti deuh. Ka û te hi kum 4 dâwn an innei tawh a. Vuivaina a neih ka hre ngai lo.

"A va mak awm ve, engtia intithiam lo nge an nih a?" Ka ti a. 

" a..a sawi ṭeuh mai. A inkhawl khawmte pawh a niang. Kei chuan rawn phei ve rih mah se pawi ka ti lo..ka ngai ve tho bawk sia" a ti a, Unau zinga upa ber hi chu nu leh pate thachhang dâwltu an nihnaah ngaih pawh an ngai zual deuhin ka hria. "Aw ṭha in tih ang ang khan lo ti mai r'u" ka ti tawp ringawt. Kan awm hrang tawh si a, a buaithlak. Ka û nen hian kan tet lai kha chuan kan inmil lo viau zel, a kawlh reuh sia, thahruiah hneh mah ila û zawk a nihnaah ka khawih duh chiah si lo. Parteii nen erawh kan inmil hle thung. Ka duat ve bawk a. Mahse ,kan han upa ve zel a, u ber na nâ na chu an rilru a lo puitlung bawk nen, ka û hi ka râwn tamin a thu ka ngaichâng ta fô mai. Fa hi pahnih an nei tawh a, mipa leh hmeichhia an nei. 

Zanriah ei hmain ka inbual a, ka inbual zawhah Nuhliri chu a la awm em tiin ka va bih leh dûk dûk a, a la ṭhu reng. Khua a thim lek lek tawh sia, ka va pan ta nge nge. "Hetah eng nge i tih?" Ka ti ta ta a. 

Min rawn melh kuau mai. Ka rin loh lutuk hian, "Sahdah leina min lo pe" a ti ta daih. Ka nuichhuak teuh hle a ni. "E aw lawk aw" tiin pawisa ka va la tê tê a, ₹50 tlang pein, "Kha le..hei khua a thim mai dawn a, haw tawh rawh" ka ti a. Thuawih zetin a tho nalh a, Damdawi in tlang lamah a chho ta nul nul. Khi lamah an in a awm a ni maithei. Keipawh chaw ka ei ta nghal a. Zanin chu Lucy rim ngei ka tum. Keimah chauha len ka tum bawk. In ka chhuahsan lai chuan damdawi in lam panin motor a rawn tlan chho vûk vûk a, damlo an awm leh a ni maithei. Zoteii te inah pawh pêng kawi tawh lovin Lucy te in ka pan ding nghal. "In awm maw" tih leh kawngka inhawng saa va dah ka rual a. 

Lucy aia naupang hlek tur, hâng lam lek lek, mahse, hmelchhe lo tak hian, "Lo leng rawh" a lo ti var. Lucy te monu a nih ka ring nghal. Lucy pawh a rawn phei ve mêk a, "I lo leng tak tak elo!" A ti sap. 

"Umm' ka ti hmuk a. "Hawh , helamah hian" tiin ṭhutkhawmna pindanah min hruai nghal. An in chu a lian thawkhat,. An in chhung bungrua reng reng chu a changkang hliah hliah. Tin, a fai hle bawk. Amah Lucy nge fel zawk an monu tih erawh ka hre lo. Ka han ṭhu a, Miteii leh amah aia upa tur mipa naupang ten phone an lo khawih ve mêk bawk. Lucy nau khan tv a lo en bawk a. Lucy chu ka bulah a rawn ṭhu ve zat a, a inbual zo deuh chiah a niang a sam a la hnawm chap mai. A rimtui bawk si. "Ti nge?" A ti hê hâw a. 

"Ti nge?" Ka lo ti ve hmuk. Za lo zet hian a nui a, min haw lo naa min lawm vak loin ka hria. A nunhlui ka hriat tawh avangin mak ka ti lo. "I nau nupui ami?" Tiin hmeichhia kha ka melh zauh a, "Aw..nih saw" a ti ve mai a. 

"I û a leng nge?" Ka ti ve zel,."Ani chu a inkhung deuh chawt zel. Ahruai, hei hi kan manager thar chu a nih hi.." tiin an monu chu a au lâng lâng a.A nau kha Benjamina niin Bena tia koh a ni. A û erawh a hming ka la hre lo. Miteii chuan, "Maa, min lo hostpot.." a rawn ti a. "Bawihte, i lehkha zir a hun ṭêp, khawih tawh lo law law rawh. Mampui, nang pawh dah tawh la" Lucy chuan a ti a. An hnial eih lo, an dah nghal sawk sawk. Naupang thuawih tak an ni e. "Thingpui hang in ang u aw. Ka va lum ang e" tiin choka lam a pan leh nghal. 

Bena chuan min rawn melh zauhin, "I va fel ve, i rawn len teh tlat" nelawm takin a ti a, ka awm a nuam sawt. 

"Fel vang pawh a ni lo.. " ka lo ti ringawt.

"Vawiinah khan loan chungchang kha an sawi deuh a, a pûk theih dawn hnai em ni? " A ti leh a. 

"Tunah hian kan la tifel lo deuh a, kar thar aṭang chuan a pûk theih tawh ang, pûk ve i tum deuh em ni!" Ka lo ti ve a. 

"Tam phei chu pûk ka tum lem lo,Nuai 5 bawr vel lek ka mamawh ve deuh a" a ti nuah nuah a. 

"A nih chu a! Lirthei lak i tum deuh nge?" Tiin ka han zawt thui ve deuh a. 

"Tum chiah lo ve. Kan nu hi dawrtê ka siamsak ve dawn mawni ka ti mai mai, ka pa nen hian an khawhar thei angreng sia, khawhar hnemah lo nghak ve mai mai se ka ti mawle" a ti ve ta duah a. Pasal fel tak a ni ngei ang le. 

Lucy pawh thingpui hâng nen a rawn phei hnalh hnalh a, a va duhawm hnûp hnûp tak. A fanu leh a vahpa te chu roomah luhpuiin lehkhazir tur a va enpui zuai a, a rawn lêt har lo. "Û, kha U Nunpuia bulah loan vel kha ka lo sawi a" a nau chuan a lo ti a. A nau nen hian kan inrual deuh rengin ka ring. Min û ṭût bawk sia, "Ee..a ṭha lawm, Nunpui, a pûk theih dawn mi?" A ti a. 

."Kar thar aṭangin a theih ka ring" ka lo ti var. "Nia, lo pûktir ve teh u. Keipawh ka rawn pûk maithei" tiin a nui a. Ahruaii'n an pa chu rawn koin, "Ar chu va talh rawh" a rawn ti lang lâng. 

Bena kal hnu chuan, "Ti nge ar te in talh dawn, mikhual in nei dawn mi?" Ka ti a. 

"Ahruaii nute zin turin zingah chaw an rawn ei dawn a. Chuvang a nih kha" a ti a. 

."In khaw mi a ni na nge?" Ka ti vat. "Chawntlang alawm an nih. A fel a nia, amah ni lo midang kan mo ang tih a hlauhawm,. Ka nep ve ropui sia" a ti a. 

"I nep lo a niang, i hausa alawm" ka lo ti vat. Min rawn melh ralh a, a na hran lo. "Sum thawhchhuah ringawt hi chakna tehna pawh a ni lo. K'u Pari zâr ka zo ve mai mai alawm. Sumdawng chi vak ka ni lo, ka thinchhe sia" a ti ve ta luam a. 

"Nia i zaidam vak ka ring lo" ka tih chuan, "Ve che" a ti nghat. Ka nuih a, "Mahse, i duhawm tho" ka ti sup a. Ka zak leh deuh. "Over suh" a ti nghal zat a. Ka bu nghut. 

Pindan thlanglam ber aṭang chuan mi pakhat a rawn chhuak a, a palian angreng hle. Khabe hmul a nei a, mipa intipa ve tawk tak, chapo nisi lova inringtawk ve tak a nih hmel. Lucy chuan, "Mam, hei Nunpuia a nih hi, Bank manager thar kha" a lo ti ve vat a. Nui chungin a rawn bu nghut. "I va fel ve,. " A ti ve sup a. A zo der. "Sawtah Êngzami zu fâng ka va insak teh ang" tiin a chhuak zui nghal. Lucy chuan, "Kan upa ber a nih kha..Remlalfaka a nia, Remlal an ti tlangpui. Nang chuan û rawh, i la nau si" a ti deuh kher..

"Nang aiin ka û aw" ka ti zauh a, a ner sak, "Min û tawh la a ṭha ang. Ka nau nen hian in inrual ka ring tlat" a ti a. 

"A ho chutiang. Hmelah ka û zawk tho" ka lo ti vat. Pari kâ aṭangin Lucy chu kei aiin kum khatin a û tih ka hria. A nau pawh kha kei aiin a nau leh si ang. Bena te ar talh zo pawh an rawn lut tawh a. Lucy chuan hrechhuak thut niawm takin, "E taka! Nunpui, hawh lo kal teh" tih leh thawh a rual a, ka ding ve hluai. An choka dep pindanah min luhpui a, tah chuan choka bungrua a lo tlar dul mai. "Ka dah hrang tawh naa, i duh ber inlak ve rawh.." a la ti zuk! Thutak deuhin, "I ti tak tak ami? A ngai lo ka tih kha..a ngai miah lo. Ka leisak ang che" ka ti ve ta tlat a. 

"Over suh, i lei awm chuang lo. Ṭhian kan nih kha"a ti ṭhak a. Min rawn en kalh bawk nen kan mit leh mit chu a intâwng chiang khawp mai. Engtin emawni ka awm, ngaihbel luih vang nge ani pawh a tîm nghal dûk hian ka hria a. Min leitir a tum lo bur mai si, hreh chung chungin a thil min pekte chu ka dawng ta a. Ka lawmin ka inthlahrung a nih ber chu. An sawi aiin a rilru a lo ṭha phian sia..ka lo duh riau pawh kha ka indem ta miah lo. Zan khatnaa len rei vak ka duh loh avangin dar 9 rik hmain ka haw ta a. Kawngka bul thleng min rawn thlah ve, "Lo len leh i phal em?" Ka tih khan.."Ṭhiante ka hnar ngai lo" a la ti hram a nih kha..hmm, ṭhian nih a duh em em laiin keiin a aia thûk zawhpui ka la tum chu a ni ve sia..

Ka bungraw dawn thar khai chung chuan Nghakteii dawrah ka peng leh zuai a. "Kha bungrua i va lei a ni maw!" A lo ti var. "Aw a nih hi. A lo tlawm phian a" ka ti zuah zuah. Lucyin min pe tih sawi kha amah Lucy vangin ka hreh ru tlat. Leng khawmuang lovin ka in lam ka pan ding nghal a. Thla a êng viau..lungte pawh a lêng dawn dawn alawm le. Ka bungraw thar ho chu ka han rem khawm ve a, tunah chuan chaw eikhawm pawh ka dawngsawng thei ta var var e.. thutthleng an siam bawk ang a, in tak tak te pawh a ang ve mai ang. 

Zothana nen kan inbia a, "Kan Samua chu a chatthla pek a nih kha. Sangsangi nen an inhau lehpek a, a hahthlak ṭhin a nia" a ti nuah nuah a. 

"A va mak thin tak..ngati lehpek nge?" Ka ti a. 

"A ex Mali kha i hria em? Kha nen an inbiakna Sangsangi'n a mansak pek a. A ṭhen titih a, mahse, an inṭhen hlen ka ring lo. A rui lungpuamin zin a rawn chhen lehnghal a" a rawn tih chuan ka nui vur vur. Samua zia hrechiang tawh tan a mak loh chu thuhran, chutiang case chu kan hre tam tawh lulai êm a, nuihzat lamah a kal tawh zawk a ni. 

"Lo zin vat teh u, nula an chhe lo hlawm a nia aw" ka ti ham ham a. 

"Ka ta ve tur kha lo hual lawk rawh. Ka single rei tawh tlat" a rawn tih chuan Zothana hmeichhe duhzawng hre tawhtu ka nih avangin Marovi cousin Veroi kha ka mitthla nghal. "Ka hre nghal, rawn zin vat ula a ṭha a ni mai" ka ti a. 

Kan inbiak zawhah ka nu ka call ve leh zuai, ka û te chungchang ka la hre leh lo nen, Ka nu chuan, " aa..kan han khap viau pawn a thinur thlu ve ngang a niang, naktukah rawn phei a tum ta a nih kha. A fate pawh a rawn hruai dawn" a ti ta a. "Eng ber nge an thubuai le? In sawi ṭha duh bawk si lo" ka tih chuan, "Englo a nia. Hmuna (ka û pasal) nau Fela khan nupui a neih ve kha kumin kumtirah. An nu kha a no ve deuh bawk nge ni, Hmuna nu nen lah an intithiam phian sia, Hmuna farnu rawn kir leh lah kha a tawrhhlelhawm sâwt riau a niang. I û pawh a chhel lo ve bawk a. Chutiang tehnuaih chu an nih avangin an innghirngho ve zeuh zeuh bawk nen Hmuna bulah in dan a rawt ve a, Hmuna lah a nu leh pate a hlau si, mahse, a sawi erawh a sawi ve tho a niawm e. Chuta ṭang chuan i û an endan a danglam chho a. Thla hmasa a hlawhte kha Hmuna'n a bo a bâng awm lovin a nute kutah a pe lut vek a niawm e. Ani i û lahin mamawha a han dil ve lahin phun âng chungin a nu chuan a lo pe ve ṭhin sia..khatiang boruak vel nen khan..aa i û pawn thiamlohna a nei ṭeuh ang, amaherawhchu, sawti deh duah an awm a, I û te lahin fa an nei tawhin in hrang pawh chang se khawsa ve thei mai tur an ni tho a, sawtia awmkhawm dul dul chu neuh neuh a awm ṭhin a. A pawi a nih hi..amah lo haw phawt se, i pa nen pawh kan lo kawm ve ang a, kan rawn hrilh leh dawn che nia" a ti dap dap a. Ka nu hi ka nu a nih vanga ka fakna ni lose, thu uar ngai lo, a nihna ang taka sawi ṭhin mi a ni a, ka û hian a chhun hle bawk. Tuna ka û vuivaina pawh kha thu uar a awm lovang, awm a hnêkin ka û chuan thu a la khuh mah mah zawk maithei a ni. A dik ang U Hmuna te hi chhungkaw hûng ve tak an nia, unau 6 niin an upa ber pasal nei tih loh an la chengho vek a, Hmuna û chiah lah a fate pahnih nen a lêt leh bawk si. Hmuna nau chiahte nupa bakah an naupangber mipa lah kha kan zin hnuhnun ber pawh khan ruihhlo duh ve tak, ruk pawh rû duh mai chi kha a ni ve bawk nen, Ka û, chhungkaw hulhâr leh che fel thlip thlep chhungkua aṭanga lawi tan chuan a nuam fahran lovang tih ka ring. Vawikhatmah a la tlan lo va, tun ṭum chu a ti ve tak tak dawn a niang. Ka nu nen kan inbiak zawhah mu turin ka intintuah a. Mut dawn tak takah Lucy ka va mangṭha hram. Min chhanna pawh nghak ta lo chuan ka chhinsan ta daih a. 

Ka harh chuan dar 6 a pel hlek chauh, nizan khan ka muhil hma bawk a, mut ka hmu ṭha hle. Insawizawi pahin tiin ka chhuak a, Vena te bona lam ka in piah lamah chuan ka air gun akin ka phei nul nul. Zingkar boruak a nuam takzet,. Ramngaw tak chu pawh ka tum lem lo. Bo ve ka hlau deuh. Air gun hi ka patea min lei ve ngat a nia, ka roh viau. Ka kut erawh a hmui lem lo. Sava chiar nak nak thawm ka hre naa, Ramar emaw vahrit emaw an nih ngawt loh chuan kah ka tum lo, ka lainat bak an sa ka ei ngai lo. Kawngṭum thar lutuk tawh lo ka pawh ta hlawl a, dar 7 a rik dawn tawh avangin letsan mai ka tum. Ka inher chiah tihin pen ri thlup thlup ka hria a, ka ding vat. Kar lovah chu kawngṭum aṭang chuan Vena ngei mai kha chemtum chauh hûmin a rawn lang hlawl mai! Mak ka ti angreng hle. Niminah khan damdawi in aṭangin a chhuak chauh si, tuna ka hmuhdan lah ipte pui pawh a ak si lo. A meng dava riai mai a. Ka dawihzep lo nia ka inhriat ve tehlul nen, hlauhna mak tak hian min rawn tuam ta er er mai. Ka kha a chih a, biak nachang pawh ka hre lawk lo. Min rawn kalpelh dawnah erawh ka harh ta thut a, "Vena, khaw nge i kal a?" Ka ti ta thut. A ding chut a, min pawh en chuang lo chuan, "Haw rawh" a ti hmuk. A sawi zawi viau naa ka bengah a ring viau. A kal leh nghal nul nul. Ka zui ve nghal a, mahse, ka hah lutuk tlat. Vena chu umphak rual a ni lo, tlan nisi loah chuan a la kal chak ber mai awm e..in ka thlen chuan ka thaw hlawi hlawi mai..Vena chu a mawng phe takngial pawh ka hmu tawh lo. A mak dangdai ka ti ve deuh. Eng emaw tak zawng a ni ngei ang. 

Tukṭhuan ka rêl sawk sawk a. Chaw ei hmain ka intleuh zuai bawk. Chaw ka ei kham a, thleng ka sil laiin Jeneti a rawn thleng. "Pu, ka lo thleng " a ti pek a. Ka ṭhen ru sak. 

"I va hma ve, chuan min pu tawh suh aw. Û min ti mai rawh, i û angin min ngai la" ka ti a. 

"Aw le..ka û" felfai tak hian a ti reuh a. A ṭha dawn e. Tihtur te chu ka han sawi ve dawn a, "Ka hria lawm..ka lo ti vek ang" a ti leh thliam. 

Ka la hmanhmawh lo bawk a, "Nupuii kha i nau zawk maw?" Ka ti a. 

"Umm, nih kha. A zakzum lutuk a ani chu" a ti ve mai a. 

"Kei chu zah vak ka ngai lo aw. Eitur te kha i duh chuan lo insiam rawh. " Ka ti leh zung zung a. 

"Û, ka tihfel zawhah kan vawkpui pâwltir a ngai a, ka kalpui lawk ang aw. Anûin thing a phur dawn sia" a ti a. 

"Tehreng mai. I tihtur i tihfel zawh chuan i duh duh i tithei" ka lo ti leh vat. "Ka lawm e, i fel si" nui sâng chungin a ti a. Pawi a sawi lo reuh khawp mai. Parteii ka hrechhuak vang vang mai. 

Tiang chuan ka chhuahsan ta a, Kima te in thlen hma lawkin Pari'n min lo call ve hluai mai. "K'u Par, kya he" ka ti uang a.

"Miteii damdawi inah kan phur chho dawn a, ka lo hrilh ve che" a rawn ti ta mai. "Ehe! Ti nge?" Ka ti hluai a. 

."Hmel Thanpuia vang leu luau mawle. Tukin khawvar tirh vel khan a lo va rikrâp chiam aniawm e. Miteii lung ṭha lo sa nen, nikhaw hre lovin a awm a. Kan Luciferi'n sahhlum tumin a um a, kan dang thei hram alawm" a rawn ti bawrh bawrh a. Nute hi chuan an rila rah an fate tan chuan engmah tih an hreh ngai lo rêng a ni.

"Chhun chawlh hunah ka rawn kal ve ang" ka ti a..lirthei ka kawl ve hi chu a ngai a nih hi…Kima te in lam chu ka pan thla ta nghal a.