Nuthlawi 4

NUTHLAWI ..(4)

Ziaktu : Toni Râlte

Chhan leh mai ngaihna ka hre tawh si lo. Mi run ngei mai. Mahse, beidawn ka tum lo bur, ka phur telh telh zawk. Ka phone a rawn ri ṭût a, Mami a lo ni. Ka reject hmak a, Lucy chuan min lo hmu reng a niang, "Kei chu mi kan call a, min reject hian ka call nawn tawh ngai lo" a lo ti deuh hmak. A chimawm thiam ve dawn hle niin a lang. Mami chuan a rawn call nawn leh kher bawk si, "Hello," ka ti ta nge nge a. 

"Ti nge i reject kher a?" A hmaa kan inngaihzawn lai âwphawi ang khan a rawn ti leh ngher ngher a, tenawm lamah a kal..

"Ka leng a" ka ti nghut a. 

"Nula i rim mi?" Titau awka hian a ti leh a. "Aw..nakinah kan inbe dawn nia, nih phawt" tiin ka dah ta a. Pari leh Lucy te erawh chuan thudang an lo sawi daih, min ngaihven lo chu ka lawm zawk. Thingpui hâng kan in leh hnuah hawn lam ka hnaih a, Lucy pawh a ding ve nghal zat. Kan chhuak rual ta a. Kawng thui lotê kan zawh dun dawn a, ka bem nghal thâwr mai dawn mawni ka ti thut thut, mahse, a zahtheihlohthlak ka ti ve bawk si. Ani pawh chu in chhunga a awmdan ang khan a awm tawh lo, a ngawi hmuk mai. "Naktukah eng nge i tih dawn?" Ka ti ta nge nge a. 

"Chawntlangah ka phei lawk maithei. Ba khawn a ngai a" a ti ve mai a. 

"Zanah ka lo leng dawn asin" ka ti leh a, ka zâm chu ka ti lo. Mahse, ka insangmar ve deuh. "I tum tak tak ami a?" A ti hâw a.

"Tak tak e" ka ti sup. 

"Lo leng rawh. Chhang kan kang dawn nia" a ti ve leh ta thliam a. Pari thurâwn hrerengin ka si duh hlek lo, kan kal hran dawn pawh chuan kan inmangṭha tawp a, kan kal hrang ta vang vang. Keipawh muangchangin ka in lam ka pan ta chhat chhat a. Pi Mawii te awmna aṭanga ka in pan chhohnaah hian in ding a awm lo va, far thing bakah zairum leh Khiangte an ding ve thluah. Chung thingkungte chuan thla êng an hliah deuh avangin ka phone flashlight ka on a. Damdawi in peng ka thlen chuan ka phu chiang kher mai, pengah tak chuan mihring nge ramhuai pawh ka hre lo. A khup chunga a kut nghatin a lo ṭhu kun ngur mai a. Ka han ên fuh ve bawk nen, ka lungphu a rang kher mai. Ka aw ka thian kharh a, muangchang hian a rawn dakchhuak ta. Mihring ngei chu a ni e. A sam a bawrchhawrin a balh hmel viau a, a hmai pawh a mang deuh nen nuan.. a nui ta huk a. A aw a lian roh viau lehnghal. "Hetah eng nge i tih?" Ka ti ta tawp a.

Min chhang ta lo chuan a tho tharh a, damdawi in lam pan chuan a tlan ta puat puat a. Mi â a nih ka ring nghal. Keipawh ka in lam ka pan ve ta nghal a. Ka mu fel chiah tihin Mami bawkin min lo call leh, a tehsek chuan aw..

"I haw tawh em?" A rawn ti a.

"Aw" ka ti hmuk. 

"I la thinrim mi a?" A rawn ti vel..

"Thinrimna chhan tur ka nei em ni?" Ka ti ve ngat. 

"Ka hre nang, min be duh si lo va, i thinrim niang ka ti" a rawn ti a. 

"Biak nachhan tur che ka nei tawh hleinem" ka ti a. 

A rum nghat, "I mak ve maw" a la rawn ti ta deuh deuh. 

"Ka mak lo, i mak zawk" ka ti ve zel. Zaninah hian sawi fel law law a ṭha. 

"Eng nge ka makna? Engmah hrechiang lovin min ringhlel ringawt a nih kha" a ti tân tân a. 

"Ka hrechiang lo a maw? Ṭâng ṭang che chuan..kan tawp tawh ka tih kha. A dang a awm thei tawh lo. " Ka ti ta hmiah a. Inbiak reng pawh ka peih lo. 

"Kha pa kha ka cousin a nih kha, a rui a, a uang ve a nih kha.." a ti hlak hlak. Ka nuihte lam a za. "Aw..unaupa uang thei deuh i neih vangin kan inṭhen angah ngai mai rawh. Ka dah aw. Ka mut a chhuak" ka ti a. Ka hmet hlum nghal. Mutchhuak erawh a bo chiang hle. Intipa thei viau mah ila; nupui atan hiala lo suangtuah rûk ve rauh rauh kha a ni ve miau a. Neih atan pawha ka iai loh ve berin mipa dang laka min han phatsan chu a na lo bik lo. Ngaihzawngte avanga nguia lungngaih êm êm hi ka zia a nih loh avangin tuar lo angin ka lang ve mai mai a ni. A ruk tak chuan chhungril nun a khawih ve lo thei lo. A chhungte leh ka chhungte pawn min hriatpui ve vek tawh bawk sia, a nuam vak lo. Ka nute erawh ka la hrilh lo thung. Ka lerhsan hlaua min chah mawlh mawlh rengtu khan ka zin aṭanga kar khat êm pawh a liam hmain min phatsan chu a ni ta mai sia! A zahthlak lek lek zawk. 

Facebook-a ka luh chuan ka ninhlei thilthuin Lucy profile ka zawng ta vel a. Lucy tih chu a tlar thla dul mai. A hnam hming ka hre mai si lo, an pic aṭangin ka zawng ta ngawt a. Mahse, Lucy hmel awm reng reng ka hmu lo. Nakinah ka zawt mai ang ka ti ta ngawt a. Ka phone dahin muthilh tumin ka chhing ta vang vang a. 

Ka harh rual chuan vawiinah office kan kal tawh dawn tih ka hrechhuak nghal. Phur ru takin ka tho va,.rawng ka bawl nghal mawlh mawlh. Artui kan leh tawp a ni mai. Tukṭhuan ka ei sawk sawk a, dar 9:30 ah bank hawn a ngaih avangin tlai loh hram tumin ka insiam nghal zung zung. Tichuan, bank lam pan chuan ka kal ta thoh thoh a. 

Ka va thlen chuan Kima a lo thleng ve chiah a. An zinna vel a sawi luam. Ka pindanah ka lut nghal a, vawiin chu mi an tam a rin loh thu a sawi a, mahse, working hours chhung chu kan ṭhut ve a ngai tho si. Hnathawk dangte pawh an rawn kal ṭan a. Zoteii erawh vawiin chu an zin chau nen, a chawl a. Kima tih loh thawk ve pakhat hi kan inhmuh vawikhatna a ni. Inrinniah khan a zin a lo haw ve chiah bawk nen, Mapuia a ni. Ani pawh nupui nei tawh a ni a, fa pakhat an nei tawh. Khaw tawntirh lamah an lo awm daih a lo nia. Ani pawh a fel viau, a ṭawng tam bik lo hle. Dar 11 velah Account transfer tur an lo kal a. Nu pahnih leh nula pakhat an ni. Thakima ten an lo buaipui thung. An nui hawr hawr hlawm a, fiamthu an duh hmel hlawm hle. Chhun chawlh a nih chuan, Bank piah lawka thingpui dawr lian lo tak lam panin kan inzui phei ta ṭhâm ṭhâm a. A nghaktu chu nu valai, thau lam deuh, nui hmel pu reng ang hi a ni. A hmelhriatsa ang mai hian min lo be nghal bawrh bawrh a, "I hmel pawh a ṭhat hi le..ngawi tak rawh, kan khaw mi ngei nupuiah i la nei ngei ang. " A lo ti nghal bawrh bawrh a. Ka nui ve ringawt. Chow satui leih ngei mai kan han ei a, hetiangte hi Aizawlah chuan ei tur a vâng tawh a nia. A siam tui em em mai lehnghal. Kan ei lai mêkin Marovi leh Veroi ten chhang an rawn lei ve a. Kan inbe ve chul mai. Veroi chu a hmain an sawi dan ka lo hre tawh si a, ka lo en chîk deuh. Thil danglam erawh ka hmu lem hlei lo va. Amah pawh chuan min ngaihsak hmel a pu lem lo, Marovi nen zawk kan inbe luam..Kan in eipuar ta bawk a, bank lam kan pan leh ta dial. Pari a rawn lang nulh a, "Min rawn rim dawn elo?" Ka lo tih chuan a meng rum teh e. Pawisa a rawn deposit dawn a lo nia. ₹ 50000 lai..he nu hi a nei zêk ang. A nuai tel boruakah a cheng mek tih ka hai lo. A dah luh zawhah, "Lo leng rih rawh. Kan âwl sia, a khawharthlak" ka ti ve tlat a. Amah chawp chawp hian ka ngai vek tawh. Mihring hi kan va danglam chak tak em. 

"Lucy chu Chawntlangah chuan a phei ta a nih kha. Thanpuia te lah an la haw lo lehnghal, a riak maithei a ni" a tih chuan ka lo hnual ve ringawt nia. 

"Ngati nge an haw loh le?" Inthlahrung chung chungin ka ti a. 

"Ka hre bik lo, a zak lo ngawt mai. Lucy thinlunga a tlak nat lohzia hria se chuan a haw nal nal tawh ang mawle"a ti ve suam suam a. 

"Nupui dang a nei ta chuang lo em ni!" Ka ti a. Hriatchian châkna hlira ka khat hi keimah pawn mak ka inti. 

A aw a thian kharh a, "Nei e, pahnih lai a nei hman..A pakhatna nen kha chuan kum chanve vel bak an inkawl lo, a pahnihna nen kha chuan fa pawh pahnih lai an nei ve hman, sawi leh sawi hnu neih reng tlak ni hek lo, a nupui pawh chuan a chhuahsan ve ta daih a nih hmel. Bakah Thanpuia nu kha a sual ve êm bawk a" a ti mawlh mawlh a. 

Lucy chungchang hlir sawi ka hreh avangin, "Anih K'u Par, ngaih loh lamah ngai lo la, in pa kha engtia boral nge?" Ka ti a. Sawi hreh hmel a pu bik lo. 

"A kal kha a lo chhe vek tawh a, chhan ngaihna kha a awm tawh lo hrim hrim. A hma pawn a insawisel fô a, mahse, damdawi te min chawh a, amah khan a ngai thutak duh ngai lo va, kha kha a pawi tawp. Damdawi ina kan inadmit meuh kha chuan a kâl kha a chhe vek tawh a, damchhuah ngaihna a awm tawh lo a ni" a ti chuai raih a. Pasal sûn tur chuan a la upa lo hlein ka hria. Mahse, amah hi a nutling hnûp a, naupangchhe lutuk a ni tawh lo tih chu a lang thei.

"Nuteii sawn a ngai ṭhin em?" Ka tih chuan, "Tehreng mai, a boral hlim phei kha chuan a rawn haw leh turah a ngai a, kawngkaah hian a lo hmuak ṭhin. Kei tak pawh kha ka mumal lo va, Lucy te, Zoteii te ho an fel êm mai a, engkimah min tuamhlawm tawp a ni mai. " A ti ve malh malh a. 

"Pasal neih leh lam hi i ti vak tawh lo mi?" Thutak deuhin ka ti a, a nui lui sak. "Ka hre lo le,. Ka chhungte leh ṭhiante hi chuan nei leh tur hian min ti fô a, mahse, ka la inpeih tak tak thei lo. Mipa han ngaihsaka ngaihven chi ka ni lo bawk nen..ka fanu hmakhua hi ka ngaihtuah ber a ni mai" a ti a. Ṭhianho zinga boruak tinuam ber berte chhungril nun hi a lo buaiin tu hriatpui loh hian an lo rûm ve nasa ṭhin hle ang tih ka ring. Pari pawh awmkhawmna zingah chuan a boruak siamthiam ber a ni ang tih ka ringhlel lo va, mahse, a muthmun leh a fanu kuah rân chunga a suangtuahna te erawh tu khaw khain kan hriatpuiin kan hriatthiampui ve kher lovang. Hetiang mi hi an chhel ka ti. 

Office kan bang a, Kima te inah ka pengkawi a. Chaw eiah min lo sawm leh zat. Mahse, tun ṭum chu ka hnial ve. Mahnia inrêl hrang ka nih avangin eirawngbawl te pawh ka zir chhoh ṭan a ngaiin ka hria. Lui kal pawh kan hman tlan hun kartawp lam kan tinzâwn ta a, picnic ang deuhin kan ti dawn a ni. A nuam viau ang. Ka in pana ka chho chu Pi Mawii khawi ilo kal haw lam nen kan kal rual ve leh a, "Chaw lah chu i rawn ei duh si lo. Keini lam kan la buai ve deuh bawk nen.." a ti siam siam a. 

"Ka la rawn ei tluk tluk lovang tih pawh a sawi theih miah loh a nia. Eng nge Jeneti chu a an zel? " Ka ti ve luam a. 

"Aa..a ṭap a ṭap mai a. A la nau ve deuh bawk nen. Mahse, a rei ang a, ngai a awh ve leh mai ang" a ti a. Anni hi an khawsak dinhmun ka hrechiang miah lo mai a, hmeithaia khawsa an ni bawk nen, puih ve pawh an chakawm viau mai. "Nakinah ka la rawn râl dawn nia. A khawngaihthlak êm mai" ka ti a. Kan inṭhen ta rih. In ka luh hmain kawmthlang huan aṭangin Pu Zuala leh Pi Biaki te an rawn chhuak chho hlawl, "Lo kal r'u, thingpui in ang u" ka lo ti ve var a. An rawn lut ve mai. Thingpui pawh chu ka chhuang ta nghal a. An thei lawh te chu min pe ve ṭeuh lehnghal,. Thingpui kan in lai chuan, "Pi Mawii te khu eng nge an khawsak dinhmun le?" Ka ti ta chawt a. Ka rilru an luah deuh tlat a tin ni. 

Pi Biaki chuan, "Mawiteii te maw..âaa. an harsa ve angreng. An pa chhungte hi ka ngei teh a nia, sawi âwm pawh a ni lo maithei a. An pa a boral khan in pui an luah kha a nia, a boral atanga thla 3 êm pawh a ral hmain Pa Rina nau Sawmzuala te chhungkuain an hnawtchhuak a, in pui chu an rawn luah ta a. In leh lo an nei reng sia, khawtlang mak tih a tling alawm. VC ten khawngaihin tuna an awmna khu an sahthlaksak ve a, an in pawh khu khawtlang sak sak a nih khu. An pa chhungte sual aleiah mi khawngaih an hlawh ta hlauh a, amah Mawiteii lah vanlaia tla, lainatawm lutuk a nih bakah pawi a sawi lo si, mi duhsak a hlawh ta viau zawk a. Tikhuan vawk te a vulh hlawh ve a, ar a vulh ve bawk a, a fanu te khu dawrah te an inhlawh ve bawk a, an la nghei lo hram hram a nih khu" a ti ta bawrh bawrh a. Ka rilru a dek zar mai. He khuaa ka hmelhriat hmasak pawl a nih piahlamah amahtê kha ka lainat chi tak a nih vang a niang. 

."Fapa an nei bawk si lo a tiraw?" Ka ti a. Pu Zuala zawk chuan, "Nei e, Thantea kha la dam se chuan tiang em em khu an ni bik lo vang. An upa ber a nia, a pa boral hnu kum 2 lekah a thingzâr thlak kha a chesual a, kâ pawh chhawn hman lohin a boral ta a ni. An vanduai ngawt mai" a ti ve chuar chuar a. Vanduai ber emaw inti ṭhin mihringte zingah hian keini aia vanduai hi an lo awm ve lehzel mai. A tur ve renga ngaia Pathian hnena lawmthu sawi chamchi lah chu kan vâng hrep lehnghal a. 

Pi Biaki chuan, "Nunpui, Lucy te nen khan in inkawm ve em ni?" A ti ta daih a. Mak ka ti deuh, "Umm kawm ti ila, Kima te aṭanga ka hriat a nia" ka ti ve mai a.

An inmelh leh ralh tawh. Hemi te hian eng emaw hriat an nei em mawni le. Pi Biaki bawk chuan, "Umm, an fel alawm, sumdawn an thiam si, mahse, kawm dan tawk thiam rawh aw. An tih tawh lovah an nasa ania. I Zak lutuk palh ang" a ti ta duah a. 

"A va mak awm ve aw. Engtia nasain" ka ti ve mai a. 

"Aa..hetia han en mai chuan an felin mi biangbiakte pawh an thiam fû, mahse, an tih loh zawng emaw an pawisawi zawnga ṭawng i cheh zeuh chuan an ankhum hrep duh ang che. Tlem laia damdawi ina thawk nurse nau tlangval pawh Lucy chuan khamah a nam a, a lum hlum ṭêp asin" a ti ta mai a. Chu kher chu ka la hriat loh thil a nih avangin mak ka ti viau, "Eheu! A va mak awm ve aw. Chu tlangval chu engvanga nam lum nge maw a nih le?" Ka lo ti hluai a.

Pa Zuala zawk chuan, "Aa..Lucy te hian dil an nei a, tah chuan sangha man turin an kal a niawm e. Pari te, Tluangi te ho nen an ni nuaih mai. Picnic tenau a ni bawk nen, zu te pawh an in a niawm e. A khami rui lungpuam vel kha a niang an tih mai mai kha. Zu te khi a in tlat a, nuthlawi mahnise, hmeichhe tiha tan a mawi lo" a ti chuar chuar a. Zu a in ve thu an sawi awm ka la hre miah lo va, an sawi hreh pawh a ni maithei. Nia, tunlai khawvel ṭhang chho zelah mizo hmeichhe zingah han lem ve thei mai hi an kat nuk tawh a. Sual angah pawh kan ngai hran tawh lo. An ruibuaia mi pawi an va sawi emaw nawmchenna suala an tluk luh loh chuan kan inenliam mai mai tawh chu a nih hi. Keipawn ka inpui ve fô mai, mak tih enah pawh ka en ngai lo. Lucy pawh chuan lo in ve tak tak pawh nise, ka va demin ka va hnualsuat phah viau hran lo. Amaherawhchu, chu tlangval a nam lum chuan chhan ṭha tak a neih ka ring tlat! A kawlhzia leh mipa laka a inhung bingzia ka lo hre tawh nen, chutiang lam vang chu a nih ka ring. Ka sawi duh kher chuang lo thung. 

"A nih chu a! A zia lo hle mai. ..chutin kan inkawmngeih viau rih hran lo, Kima te nen an lo inkawm ve sia, chuvang mai mai" ka ti ta ringawt a. An nupa mitmeng atangin eng emaw tak an la thup nia hriatna ka nei, zawh erawh ka zawt duh lem lo. Thingpui an in zo va, an haw thla ta a. Keipawh rawng ka bâwl zui nghal. Ka nauin min lo call a, "Mam, U Mami nen in inthen law!" A rawn ti a. Ka sawi ve mai. 

"Min lo bia a, a rawn insawifiah char char,. Nang pawh thil i hrechiang tawk ami? " A rawn tih chuan Mami chu nasa ka lo ti deuh. 

"Hrechiangin ka inhria. Bakah ka lo dik tawk lo a nih pawhin kan kar a hla tawh sia, ka ring thei tak tak tawh lovang, a buaithlak" ka ti duah a. 

"Khalamah khan duh dang i neih a ring a" a ti a. 

"Maithei, mahse, ka hrechiang phawt ang" ka ti hmiah. Chhungkuaah engmah zêp leh thup ṭît ṭêt kan nei lo bawk a. "Eh! I lerh mai sia maw? Tu nge a chu chu, a chhe lo em?" A rawn ti nghal zat zat. 

"A hmel chu tha i ti ve tho vang. Nuthlawi a nia" ka tih chuan, Rang zetin, "Nuthlawi kha i duh ngai si lo va" nui ar ar chung hian a rawn ti a. Amah nuthlawi ve tho a lo nihna laiah min elsen ve pah tih ka hai lo. 

"Nia, mahse, hei tum loh deuhin a zûnah ka uai ve dawn a niang" ka ti a. Ka nui huk. Ani pawh za zetin a rawn nui a. "U Samua te lo zin hunah ka lo kal ve dawn, zawrh tur ka lo keng ang a. Ka châk ve" a rawn ti leh ham ham a. Ka nuin rem a tih ka ring chiah lo, Parteii tel lo hian kan khawsa hleithei tawh meuh si lo va. Ka nute chu âwl hneh tak a ni. Jojo hi chu ka nu leh pate fa a ni mai, a nu aiin an buaipui nasa zawk. Sâwn a pawm tirha kan thinrima kan rilru a nat ve nen, nautê a lo piang chiah chu a lawm leh a duat ber berah kan ṭang leh lawi a! Thisena inzawmna thûkzia hi chu aw..

Ka dal kan a la ût zui. Phone ka hmang tui hlek a ni. Chaw ka chhuan lai takin Air gun puin Pi Mawii te motor chhia rawn siamsaktu Tea kha a rawn dak heu mai. Tea hi a hming ang tak tak hian a lian lem lo va, a ngo var reuh thung. "Chaw i la ei bik lo maw?" Nelawm tak hian a rawn ti a. 

"A nih hi, ka hmanhmawh vak lo va, khawilamah nge i kal a?" Ka lo ti ve vat. Kawngka bul chhuatah a ṭhu a, thingpui erawh a duh tlat lo. "Mei ka zu dawn aw. Vena ka'n nghak lawk ang e" a ti a. 

Ka in piah lam, Damdawi in letliam lamah sava an va châng a lo nia. Pahnih chu a kap ve. Varung niin ka hria. Mahse, sava sa hi ka ei loh avangin min pek a tum pawh chu ka hnial thei hram. An thilphal ṭhin mang e aw. "Lal Vena pawh chu a va rei e aw..ani hi kawng a bo pek em mawni le" zial zuk pah chuan a ti leh ṭhin a. "In kal tlang lo em ni?" Ka tih chuan, "Kan kal hrang a, chawlhhmunah intawh leh kan tum mawle, ka nghak rei tawh sia, a rawn haw tawhah ngaiin ka rawn haw a. A phone a keng lehpek si lo, a nau ka zu bia a, a la haw loh thu a rawn sawi sia.." a ti mawlh mawlh a. 

"A la ramngaw viau em ni? Saw lam saw" ka tih chuan, "Ngaw angreng e, sa chân nan te pawh an la hmang ve ṭhin. Kan khaw ram hi kan la daidar hneh lutuk lo" a ti ve mai a. Khaw thim hnuah pawh Vena hmel chuan lan tik ni a nei thei ta si lo, a mangang chuan Vena nau chu a call leh ta ngawt a, a la haw loh thu a rawn sawi leh bawk si. A mangang ṭan ta deuhin ka hria. Vena chu ka hre ve lo naa, chu chen chen a rawn haw lo chu a mak ka ti ve tho. "Umm, engpawhnise, ka zu hawng thla phawt ang e. A ni em em tawh lo" tiin a tho a, a haw thla ta hnak hnak. Keipawh ka inbual a, chaw ka ei zui nghal. Thleng ka sil mêk laiin tlangau an rawn au ta a. "Vanlalvena, Pu Thanghrima fapa chu tunah hian a awmna chin hriat lohin a bo mêk a. Lo hmu in awm chuan YMA hruaitu te hnenah emaw a chhungte hnenah emaw hrilh hriat thei nise a lawmawm ngawt ang. Dar 8 thleng kan ngaichâng ang a, chanchin engmah hriat tur a awm loh chuan a zawng turin ṭhalai te a thei apiang Kâwn zauah innghahkhawm tur a ni ang" tiin. Ka rilru tê têin, "A bo ngawt chu ka va ring lo ee..eng emaw tawhsualte hi a tawk zawk em mawni le" ka ti. Tlangvala pumpa an khaw ram lehnghala kawng bo ngawt thu awmin ka hre lo a ni. Mahse, a bo theih loh chu ka ti lo a nia. Chutiang thil thlengte a awm takah chuan keipawh chanchin ngaihven pahin hmanhmawh angreng takin Kima te in ka pan a. Chaw an lo eikham ve mêk chauh. Vena chu Zoteii putea fapa a lo la ni zui! "Ani pui hi khawmu te hian a chawi em mawni le" Ṭhakima'n a ti pek a. Zoteii a meng no lo nasa. Siama pawh a rawn lang ve vat a,. "Tumah hmu leh han inreport an awm tlat lo. A mak ka ti mang e aw..khilai ramte chu a kal ṭhang hle sia" a ti vang vang a. Ngaihdan neih thiam a harsa angreng khawp mai. 

"Engpawhnise, an in lamah i va phei ve phawt mai ang u. " Kima chuan a ti a. Kan phei ta dial. Vena te chu Pêm veng nen an inrîna lai takah an lo awm a. Mipui pawh an pungkhawm chak hle. Vena nu leh pate chu ka hmuh tum aiin ka hmu naupang. A nu chu a ṭap deuh pur tawh a, a pa erawh a intipachang thei angreng. YMA lam ten information an rawn pe leh a, Vena zawnga chhuahkhawm tur a ni ta. Keipawh Kima chhungte an lo ni ve bawk nen, chhuah ve ka tum. Awmhmun thawmhnaw nena chhuak ka ni tho bawk a, han inthlak leh ka tum lem lo. Pari pawh a rawn lang ve a, Lucy erawh a riak ta nge ka hmu lo. Tichuan, ka in tlang lamah chuan kan inzui chho ta nguah nguah a, khaw lian tak a ni bawk a, ṭhalai an tam kher mai. Thla ên lai a ni bawk a, torchlight bakah phone flashlight nen kan zawn theih mai a rinawm. Kima leh Siama te nen kan inzui a. Ram chinchang ka la hriat ve loh avangin bo ka hlau viau. Kan kal thui telh telh a, kawng erawh a chhengchhe lem lo. A ngaw a chhah tulh tulh bawk. Fit ve viau emaw ka intih laiin ka ṭhiante ka pha mang lo viau. Vena chu an ko pah reng a, chhawntu reng an awm si lo. A tawpah Luitê kan pawh ta hlawl a. Hruaitu pakhat rawn dingin, "Hei dar 12 a pel dawn tawh a. Tlaivara zawn pawh kan inhuam em em ang tih ka ring. Amaherawhchu, groupah insiamin inṭhen ta mai ila, group 1na te zanin tlaivar se la, naktuk chhunah group dang, khatiang zela kan tih loh chuan khawtlâng huapin kan chau lutuk palh ang e. " A ti tê tê a. Tichuan, group pawh an siam zui a. Keipawh Kima te nen min dahho ve leh. Group 1 lam chu patir tê tê, ram chinchâng hre deuh deuhho an ni a. Kan kal dawn khan hruaitu bengvâr ten chaw an lo fun diam bawk a, a hma vak tawh lo nen, an tlingtlâk theih mai a rinawm. Zawi muangin group 1 te chu kan hawnsan ta a. Group insiam chhung kha a rei deuh avangin in kan thlen meuh chuan dar 2 a ri hnai kuarh. Zep nâk emaw ka chau kher mai. Ka rawl bawk si. Siama te ho pawh ka zui thla peih ta ngang lo va, min hrethiam viau. Ka intifai a, ka mu hmak. Phone pawh ka khawih peih lo. 

Ka harh chuan dar 8 a lo pel vah tawh. Ka tho vat a, ka sil lutuk chu ka zak zawk e a,. Chawhmeh siamchawp vek a la ngai zui a, tukin chu ei lo mai teh ang tiin Pi Dari dawra inhnawhpuar mai ka rilruk. A siam tui reuh bawk a. Ka insiam sawk sawk a, Kima te ina penkawi hisâpin ka chhuak thla ta a. Zoteii chiah a lo awm a, Kima chu zingkarah a lo chhuak daih a lo nia. Ka chauh a rin avangin min lo kaitho ngam lo a niang. Vena lah thei reh takin a reh vawng vawng mai si. A mak ka ti ve hle mai. Zoteii pawh chuan mak a tih thu a sawi ve mawlh mawlh. "Zote, ngaih loh lamah ngai lo la, ruihhlo te a ti ve em?" Ka ti ta tawp a. 

"Zuk leh hmuak bak a ti ngai lo. Chu chu lawm damdawi ti ṭhinte chu nise khawi lai ram palailêngah emaw a lo OD a niang te pawh a tihtheih a..a mak a ni" a ti ve mai a. Ka la hmuh miah loh Vena chu ka lainat ta hle. Ramsa sual te hi a tawng nge ni ang a, khâmah te a lum ni ang..Kima awm hek lo, Zoteii pawh Vena te in lamah a kal dawn bawk nen..Midang phût lem lovin bank lam ka pan ta a. Dawrtu kan neih ka ring vak lo bawk a, hnathawk te pawh rawn kal lo mah se; pawi ka ti lem lo. Pi Dari dawrah pêngin thingpui leh chhang ka ei a. A titi leh suam suam a, "Vena tê chu aw..kei ka rindan chuan a lum a nih ka ring. Khing lai ram khi khâm angreng hi a tam ve riau sia. Damin hmu leh hram se aw" a ti vawng vawng a. 

"Nia tiraw? A zia lo êm mai, an sawi hmangin a fel hmel bawk sia" ka lo ti ve a. 

"Fel tehreng e. Ruihthehthil a ti bawk si lo, tlawmte hi a ngai a nia..a pawi êm mai" a ti a. Chutah ka ṭawng hmain min rawn en leh ang hê hâw a. "Bawiha, Aizawl khua tiraw i nih?" A ti ta daih a. Ka nih thu ka sawi chuan, "Khatlaah khan ka nau chiahte hi an awm ve alawm, ka rawn zin ve zeuh zeuh. Mahse, kei kan khua hi nuam ka ti daih zawk, nang pawh i awm rei ang a, nuam i ti viau ang" a ti leh mawlh mawlh a. 

"Nuam ka ti..nula an hmelṭha bawk nen" ka ti zauh a. 

"Awii..chu chu lawm, kan khaw nula tlangval te hi an hmelṭha a nia ,kan tui tlan hi a dik tlat a..Lucy te ho thlawi hma phei chuan mikhual lian leh hausak hmel tak tak hi an rawn zin zut zel asin" a tih chuan ka beng a tivir..

"Lucy i tih chu Luciferi an tih hi maw?" Ka han ti phawt a. 

"Ni e mawle, Lucy nu hi ka nuteii fanu alawm..ka naui khi chu a nulat lai phei kha chuan ka chhuang ve thei ṭhin asin..mahse, a vanduai ta em mai a" a ti chuai raih a. 

"Nuthlawi a nih tak avangin a vanduai tihna a ni kher hleinem..a la hmelṭhat em khi, ka hmuh chinah hmelṭha ka la ti ber" ka lo ti ta hmiah. Midang an awm lem lo bawk a, bakah Pi Dari te nen chuan an lo inchhung bawk nen, ka inthlahrung ta vak lo. 

"Chuti maw? Awiii han inngaizawng ula in inhmeh awm mang e. Mahse..mipa lam hi a ngaihsak duh tawh der si lo va" rilru hah hmel fê hian a ti a. 

"Kan la inngaizawng thut maithei asin.." nui chungin ka ti a. "Bei ve hrim hrim rawh,. Pasal ṭha deuh nei se ka duhsak takzet a ni" a ti luam a. 

Bank chu keimahin ka nghak ta ran a. Kima leh Mapuia ten min lo be tawh a, kan buai hran lo nen, ka hrethiam khawp mai. A khawharthlak riau mai. Ka phone ka khâl ka khâl ringawt. Vena lah chuan rilru a kap ve tho bawk si,. Ka nute pawh chanchin ka hrilh ve a, "I zawng ve a nih pawhin fimkhur la aw..tiang hunah hian khawtual aiin mikhual hi an chesual duh riau a nia" a ti deuh reng mai. Fate ngaihtuah tina chi a ni bawk nen,. Parteii nen erawh kan inbe leh tawh rih lo, Mami pawh a reh ta vang vang mai. Ka rinhlelhna kha dik lo tak tak se chuan a mangang viau ang. Ka rilru aṭanga a tlahniam chak lutuk hi mak ka ti zawk..ka lo hmangaih miah lo a ni maithei. Hmangaih hi ka la tawng lo a ni maithei, kan inṭhen hian ka la na ngai lo êm mai. Ka kum ngaihtuah chuan nghet taka ngaihzawg nei rual ka ni ve tawh reng. Rilru a la puitling tawk lo pawh a niang e. 

Chanchin ka ngaichâng ve reng a,. Han biak sek kha ka inthlahrung ve bawk si. Chawhnu dar 2 a ri ṭêp tihin Zoteii'n min lo call a, "Vena chu an hmu e. Mahse, nikhua a hre lo" a rawn ti ta a. Ka phâwklêk ve vek. Dawrtu nei ta bawk si lo chu ka haw ta daih. Haw tih lêmah Zoteii te inah mi bo zawngtu te ho chu ka lo nghak ta a. Darkar chanve hnu velah an rawn thleng. Vena chu damdawi inah an phur chho nghal a, a mar a phû ṭha a, mahse, a harh thei tlat lo a niawm e. Kima te pawh an rawn thleng ta a. Vena an hmuh dan chu an sawi ta a. 

"Lawmpuia leh Johny ten an hmu a. Tumpâng ngâwa Maurawtlâng hnuai zawngtê leilawn hmunah tehdaih khan an zu hmu mawle. Khalaite kha chu tu vak mahin tlawh ena an en loh lai kha a nia, Zawngte leilawn bulah a silai nen a lo let reng a niawm e. A thi emaw an ti hman alawm..Pathian zarah a harh vat turah ngai ang. A rilṭam tawngkhawng ṭamchhawl pawh a ni maithei" a ti charh charh a. A vanneihthlak viau e. Zan lamah damdawi ina an kal chuan min lo sawm ve tura hrilhin ka chhohsan ta a. Tak a! Hman zana kawnga lo ṭhu rûn mai ka hmuh kha thildang ka ngaihtuah tam luatah ka sawi ta miah lo va, nakinah ka sawi mai mai chhin ang. Ka hmu leh ta miah lo lehnghal. 

Pi Mawii anhnah zuar tur nen kan intâwk leh hlauh mai. An in bulah chuktuah huan a lo siam ve a lo nia. Anṭam leh behlawi hnah ka leisak ve a. Anni chhungkua hi rilruah an awm ve reng mai a, in ka thlen hnu thleng pawn ka ngaihtuah. Puih ve ka duh si..Jeneti emaw a phirpui emaw zawk kha thla bîin lânga ka ina thawk tura chhawr te ka ngaihtuah a. Tihtur em em a awm lo bawk a, in a tihfel zawhte chuan hmun dangah te pawh a thawk lâwp lâwp thei dawn sia, eirawngbawl kha a ni leh mai a. Nakinah Kima te ka sawipui chhin ang ka ti ta mai. Chaw ka ei kham a, zial ka zuk laiin Kima leh Siama bakah Pari leh Lucy te an rawn lang ta hlawl mai. Ka'n lai ṭût lehnghal a! Ka va chhe tak. Pari leh Lucy chu an hawi ruai a, ka bungraw neih a beitham angreng si, a nuam vak lo. Pari ta pek chuan, "Hmm, chaw ei thleg pawh chu i va nei pachhe ve mawle, chaw eikhawm dawn pawn mahni eina tur rawn ken a ngai dawn a nih hi a" a ti roh a. 

"Lo donate rawh ti ta che' Lucy chuan a lo ti sap. 

"Dik chiah, lo donate rawh" ka lo ti vut a.

"Ngawi tak rawh, Luciferi nen kan rawn indan ang che, i ruak êm mai..tiangte chu a" a ti lâng lâng a. Ka lo nui ṭhâw ringawt. 

Tichuan, Damdawi in lam chu kan pan ta hlawm a. A lo hla vak lo. Kawngpuiin a pawh vek bawk nen. Han thlen chhoh chuan a tlang a sang ve nen, a vâwt sûk mai. An lo awm ve nual a, tihtheih em em nei hek lo ila kawtah chuan kan ṭhu ta vel mai mai. Vena chu a rawn harh tawh naa a la ṭawng miah lo. A phâwk hrû danah hlauh eng emaw tak a nei a nih an ring hlawm. Kima pawn zawi supin, "Tumpâng ngaw saw chuan titi a titam ve riau asin. Ka awm tirh pawh khan ka thlen inpa khan a sawi nasa tawh. Sih a awm a, chumi huai chu a hrân nasat thu a sawi tlat, chungte chuan ngaihtuahna a tithui angreng" a ti ve nuah nuah a. Kei chuan engmah sawi ve tur ka hre lo. Pari pawh chuan, "Pem tharpa thih dante pawh kha..a mak viau lo maw?" A lo ti ve a. 

Siama chuan, "Chutiang sawi sawi s'u..eng vak a ni lovang" a lo ti hlur a. Ka nuih a za deuh. Lucy chuan, "Nunpuia in ti hlau palh ang, an veng a ni bawk sia..a dawih hmel si" a lo ti zauh. 

Ka ner sak a, "Nia, ka hlau ṭan der tawh a nia" ka ti sup. Lucy bulah ka ṭhu bawk a, a nuam veng veng. A phone a la chhuak a, whatsappah a lut zuai, ka zuk melh ru hram a. Chat a tam ngei mai. A luck thawkhat ang tih ka ring. A number neih dan ngaihtuah a ngai tlat. Bulṭan dan tur ka hre mai si lo. Thian dangte hriat phak loh tur hian, "I number lo sawi teh" ka ti ta a. 

"Eng atan?" A ti! Ka nerkhum ṭêp a ni. 

"Ka duh" ka ti nghut a. Ka zak lo der tawp. 

A sawi ve ta mai bawk a, ka lawmzia chu aw. Luciferi tiin ka save! 

"Thanpuia chu a la awm mi?" Ka ti a. 

"A niang, ka la hmu lo. " A ti nghat a. 

"I ba va khawn te chu i hmu ṭha thei em?" Ka ti leh a, kawm ve char char ka duh. "Hmu ṭha ve reng mai. Taka! Naktuk chu ka rawn kal ang..deposit a ngai" a ti hliai a. 

"Umm lo kal rawh" ka ti vat. Kima chuan, "Eng tih theih a ni chuang si lo va, kan haw mai dawn mi!" A lo ti a. 

"Ka inah thingpui in ila " ka lo ti var. 

"A tha lawm, no i ngah maw?" Pari'n a lo ti hram. 

"I ninawm" ka ti hluk. A sualthiam ve thei sia maw. Kan chhuk ta dial a, ka in pêng kan thlen chuan, "Taka! Hman zan khan tah hian hmeichhe pakhat a lo ṭhu reng a, ka biak lah khan min chhang duh si lo va" ka ti a. 

Intiamrual ang hrimin, "U Nuhliri a nih chu" an lo ti rual dual. Ka khi suk a. "Ti nge a thut le?" Mawlmang zet hian ka ti a. 

"A..a chhul a ṭha lo va,. Khatia ṭhut kha a ching ṭhin alawm, a lainatawm a nia" Lucy chuan a lo ti var a. A nih ka ring rêng a. 

In chhung kan lut tur chu Pari a inchhuih khut khut a, Lucy a va vuan chu ani a lo ding nghet si lo nge ni kei a bula kal chu mi rawn kuai nghek a, ka lo chelh vat. Tum loh deuhin a hnutê ka dek ta hlauh mai le..