Nuthlawi 3

NUTHLAWI ..(3)

Ziaktu : Toni Râlte

Dik tak chuan ngaihzawng ka lo nei ve nual tawh a. Mami anga rinngam thlap hi ka la nei ngai lo. Min duh nasatu zawk a ni bawk a, ka thikthu pawh ka tichhe ngai lo. Amah zawk hian min ringhlel reng zawk a, ka lo lerh ve tawh ṭhin bawk nen. Mahse, dawhtheih a ngai tih hriain ka palliam mai zel. Chutia amah zawkin min han phatsan ta mai chu nâ ka ti riau. A tlawmthlak tihna chen ka nei ve bawk nen,. Bakah an mudun ngei tih lah a chiang nasa si. Rilru a tinuam lo viau, mahse, intipa ve thei tak ka nihna hian min chhanhim ti mai ang, va biak leha insawifiah tura nawr ka tum lo bur. Tikhan a tawp a ni mai. Kan intawn hmaa a nundan chu ka thunun theih a nih loh avangin ka pawmzam thei ang. Kan inngaihzawn lai renga min thlima midang bula mu thei hmeichhia chu ka tan a tenawm tlat! Ka pawm thei tawh dawn chuang lo. 

Chaw ei pawh a titui lo ve tham tlat! Bakah chawhmeh ka nei chhe ve bawk lah tak a. Inkhawm ve ngei ka duh avangin phur fahran lo chuan ka insiam a, Marovi te in chhak lawk kha a nia, mi zawh chawp a ngai dawn lo. Ka thiam ang tawka ka inchei ve hnuah ka chhuak ta a. Pi Mawii inkhawm tur nen kan kal rual a, anni erawh UPC an ni thung. "Lo inkhawm ve mai rawh" min ti luam naa, "Nidangah le" tiin an Biak in pengah kan inthlah ta a. Chhawrpial nu-a ka hmelhriat hmasak pawl a nih avangin leh a fel êm vangin ka la lenglut zutin ka ring. Sawmtea nen kan kal rual thei ta hlauh a, ani hi ka kawm zui tur a ni mahna. Kima te, Siama te pawh kawm nuam viau mah se; nupui nei tawh an nihna laiah kan inthurual reng thei dawn lo va, a buaithlak. Kan hmaah chuan Lucy leh Pari te kha an kal a. Lucy chu a nulian roh sia, puan bih a inhmeh kher mai. Para erawh a lian mah mah a, hmeichhe lian lutuk hi chu îtawm lamah an kal thei meuh lo. Bakah Pari chu incheina a care vak hmel loh,. Lucy chuan kawr pawl lar tak a ha a, puanzeh dum a bih a, a pheikhawk dum pawh chu a sang lutuk lo. A sam a thlah leh hnûp bawk si. Nuthlawi kha an tia, fa engzat nge a neih tawh ang le..tawi khawmuang lovin Biak inah chuan kan lut ve ta nghal a. Inkhawm kan ṭhahnem khawp mai. An khuaa Kohhran lian ber a lo ni bawk nen. Nula lam pawh an tam e. Inkhawm ban vat vata lo enchian ka châk,. Mipa nih ve chuan hei hi kan rilru a ni ve châwk a nia. Indem ngawt chi pawh a ni lo, kan ngaizawng kher dawn e tihna ni loin hmeichhe hmelṭha hmuh hi chu a nuam ve êm a ni. Ka rin aia hmain kan bang ta a. 

Sawmtea nen thingpui lumna sir lungphun bulah kan lo ding a. Nula lam chu ngunthluk fahranin ka lo melh rulh rulh a. An sawi ang tak tak khan nula hmelchhe tak sawi tur an awm miah lo. Hmelṭha langsar pahnih erawh an awm a, pakhat chu Lucy a ni a, pakhat erawh tu nge a nih ka hre lo. Lucy ai chuan a tê hlek ang a, a vun a êngin a sam chu a buang thâng a. A hmaifang a dik a ni tawp mai, ka sawi ve duah thiam lo e a. Sawmtea bulah ka zawt ta nge nge a, "E..Mateii a nih saw. Zoteii nau.." a ti a. Thakima nupui Zoteii nau lek maw lo ni..an va inthat hleih bawk ve mawle. Sawmtea lah chuan, "I melh uluk bik riau mai, zaninah kan va rim dawn mi?"nui huah huah chungin a ti a. 

Lucy va melh leh daihin, "A ngai lo..a zahthlak" ka ti nghut a. Mateii an tih chu ṭha viau mah se; Lucy, a ṭhianten Luciferi an tih mai, nuthlawi kawlha an sawi chuan engtin emaw min hîp tlat! Ka sawithiam bik lo, belhchian châkna ka nei..tin, Mami nen in inṭhen chauh a, i va lerh em em min lo ti maithei. Chutin ngaihzawng neih leh vut ka tum a ni lo, Mami laka ka rilru damlo leh tlawm ka intihna hian tlan tauhna a zawng zawk a ni..runluih tih lam erawh a ni lem lo thung. 

Stepa kan inzuithlak lai chuan, "Nunpui, i ṭha maw?" A rawn ti a. Parpaliani a ni. Ka lo nuih suk a, "Ṭha a ni mai, i va nalh ve kha.." ka ti zauh a. A bula kal Lucy'n ka mit a la zawk reng sia. 

"Sundayah tal chuan nalh ve ka tum alawm..lo pengkawi ve la, thingpui rawn in r'u, Sawma" tiin Sawmtea a melh pah a. 

"A hmeh tui deuh i show dawn te chuan" Sawmtea'n a lo ti vat. 

"Show e ..show e" a lo ti zung zung. Keini pawn kan hnial lem lo va, bakah Lucy chu a rawn pen ve ka beisei vang a ni deuh. Kei hi ka dik lo tawp mai, he nu hi ka ngaizawng ringawt dawn em mawni le..

Pari in lam kan pan zui nghal a, sawi tawh angin tlang bâwk deuha awm an ni a. A thawvengin, a in pawh lian vak lo mah se, a nuamin a felfai kher mai. Pangpar mawi deuh deuh lah chu a ngah si. A fanu pawh ka hmu ve ta, Nuteii an ti mai a, Pari ang lo deuhin a ria ṭhal a, kum 13 bawr vel a nih hmel. Awmpui nula Hruaii a tih kha a nei bawk a, a fel thar thar khawp mai. Eng nge a eizawnna ka hre lo naa a khawsa thei thawkhat viau a nih hmel, a in chhungkhur bungrua a changkang hlawm êm mai. Lucy pawh beisei ang tak takin a rawn tel ve zel a, a la ṭawng miah lo thung. Sawmtea pawh chuan a be bawk si lo, mak ka ti deuh. 

"Hruaibawih, chhang kha kang ila tiraw..Hei Lucy nen hian lo buaipui r'u" Pari chuan a ti lâng lâng a. Lucy chuan ner sakin, "Mi chhawr hi nuam i ti ve sia maw.." a ti a. A tho nghal nalh. A pheikhawk kha hlipin Pari chapal lian angreng tak a bun tawh a, a keṭhiah mawizia chu aw..ka enzui vung vung chu min lo hmu ni tur a ni. "Eu! Nunpuia chu'h..i rilru ka hre mai" Pari chuan a'n ti nghal ngawt a. Ka zak ve deuh. Sawmtea pawh chuan, "Mateii emaw i melh ka tih kha, Ani lek saw a ni maw i lo melh" a ti zui a, za vak lovin ka nui hui ringawt. 

"K'u Par, i va awm nuam reuh ve mawle..in i nei nuam si" tiin topic ka thlak ta daih a. 

"Awihawm loh êm mai a. A nuam tak tak thei lo. Lei ngai leh hmabak a la tam lutuk.." a lo ti ve vat a. Sawmtea chuan, "Mawina..U Pari hi nuthlawi hausa tiin a lar teh mai a nia. Ani chu sumdawn a thiam tlat a. Bialpa lah a ngaihsak si lo" a lo ti ve luam a. 

"Sawmbial, ngawi mai mai teh.." a lo ti hlak a. A ṭawngkam bungrua hi a lawmawm thei riau. Lucy aw hian, "Lo phei r'u, kan rawn chawi phei peih lo" a rawn ti lauh lauh a. Choka lamah kan phei ta dial. Zo chhang hi ka ngaisang khawp a, ka phur kher mai, zingah chaw kha tihtham ka ei meuh lo bawk nen. Lucy bulah tak chuan ṭhuthmun ka rem ve ta chat a. Mi rawn melh zawk a, a mit a lasawn leh rang khawp mai..

Pari chuan, "Nizan kha a zia lo êm mai, i na lo maw?" Tiin min rawn melh kual a. 

"Na lo ve,." Ka lo ti var. Ka na lo reng bawk a. 

Lucy chuan, "Pemthar ho zahtheih lohzia saw aw. An pemna rei tawh mah se; khaw mi leh sa hlunte chu zah ve awm tak a nia " a lo ti nghat nghat a. Kawlh an tih chhan pakhat nia ka rin chu a ṭawngkam chhuak reng reng hi a nêm fahran lo. A vîn lam a pâwl zel mai a ni. 

Sawmtea chuan, "Nia, hman deuha doctor lo awm an khawih rawn aṭang khan ka mil thei tawh lo. Bakah an inla hrang ve hrim hrim bawk a" a lo ti ve a. 

"Khawi atanga lo pem nge an nih reng reng?" Ka lo ti ve a. 

"Khaw ṭhenawm Lawitlang aṭang sawn mawle, an lo pem kum hian hri mak deuh a leng vak a, an pem chhuak nual" Sawmtea bawk chuan a lo ti a. 

Pari awmpui Hruaii chu chum ṭha ve tak, han en reng reng pawha ât hmel buang mai a ni a, Sawmtea bulah, "U Sawmte, ih, U Marovi cousin khi kei chu ka ngei chi..a inlak hmel si" a ti ta pek a. Pari'n, "Kan Hruaii mai mai ṭhin hi aw..Nuteii damdawi ei a hunin ka hria, va eitir lawk teh" a lo ti ta vat a. 

Lucy chuan, "Tu nge khah? Veronica an tiin ka hria. A fel hmel êm kha" a lo ti a. 

Sawmtea chuan, "Umm, Veroi,. A sual hran lo. Kan inkawm tam hran lo bawk nen, ka hrechiang ve vak lo. A chamrei tawh angreng" a lo ti ve mai bawk a. 

Pari chuan, "Chamrei ang chu..a pahrawn nen inmil hek lo. Ka naute hi an in bul lawkah an awm alawm. An rawn hnawtchhuak a nih ka lo ring mah zawk asin" a ti ta hluai a. Kei erawh sawi ve tur hre hek lo, ka lo ngaithla deuh tawp ringawt. 

"Leh ringawt a che. Thil hi sawi phawng phawng suh" Lucy chuan melh hrâwk chungin a lo ti a. 

"Aaa..ka hriatchian vang a nia" ṭha deuhin Pari chuan a lo ti a. Sawmtea pawh chuan an sawi pawp ta sa sa a ti ni ngei tur a ni. "K'u Pari sawi kha a dik alawm, A pahrawn nen hian an inngeih lo va, bakah amah Veroi hi khawlai mi ve deuh hlek niin an sawi. Han drinks thei mai ang chi, riahbo lamte pawh ti ve zeuh zeuh ang kha. Marovi nu chawilen a lo nihna laiah a nu ai mahin a ngai zawk tihtheih a nia, an hnawtchhuak em ka hre lo naa, a rawn tlan tau zawk pawh a ni ve thei tho" a ti ve mawlh mawlh a. Veroi hmel landan kha ka mitthla leh thiam tawh lo. Ka bul maia ṭhu Lucy chuan min hîp na deuh te pawh a niang. 

"Hei mikhualpa hian sawi tur a hre ve lo êm mai, thudang sawi r'u" Lucy chuan a lo ti ta var a. A dik reng, ka tan an thil sawi chu a ṭangkai lem lo bawk a ni. 

Pari chuan, "Nunpui, i parawl deuh ngat ngat dawn tihna mi? Awmpuite nei la..a khawharthlak awm si, i awmna khi" a ti a. 

"Parawl rih ang. A nuam zawk, ka thu ber dawn a" ka lo ti a. 

"In veng lam khi nula an awm mang lo lehnghal a. Insuk leh eng emaw remchan loh vanga rawngbawl a ngaihte chuan min rawn hrilh hmiah zel rawh. Keini kan awlthâwng alawm" a ti suam suam a. A ti duh tak tak ang tih pawh ka ring. Lucy chuan, "Khalamah te chuan a buai bik nang. Tleirâwl an tam thung alawm, an veng khi" a lo ti zauh a. A tu amah lah chu ka la hre ve si lo. 

"Kan vengah chuan Pi Mawii te chhung chiah ka la hria..hman zana a fanu fa thite kha" ka ti a. 

Sawmtea chuan, "Ekhai! Hmelhriat tur diktak i hre hmasa a, a lawmawm a nih chu. Ni Mawii khi a fel a nia aw. A tlawmngai si, fak lo pawh hi ka hre lo. Jeneti han raite kha an khawngaih hlawm teh asin" a lo ti ve luam a. 

"Kha kha ni e..a fa a thih khan an sawi dan hmangah kha nautê kha sâwn a nih hmel sia, Jeneti lah kha a la naupan hmel bawk si" hriatchian châk ve deuh hian ka ti a. Hei hi chu ka hrechiang châk ve deuh tlat a ni. 

Pari chuan a aw thian kharhin, "Nia mawle, a pawi tak tak a ni. Ramsanga fa a pai kher kher hi, Ramsanga te chu hei Sawmtea bialnu Marovi te kawmthlangah khan an awm a. A bum chiang ve khawp mai, an nu nen an inṭhen a, an inṭhen chhungin Jeneti a lo zarbuai vel a. An nu a rawn let leh ta roh si,. Jeneti a rai tih a hriat tawh hnuah pawh an nu chu hnar phal hek lo. A ngaihsak lo nasa bawk si, ka ngei teh mai a ni" a ti bawrh bawrh a. 

"Pi Mawii te khi hmeithai em ni?" Ka ti leh a. Lucy chuan, "Umm, an pa hi nikum hmasa a ni em khah..tah khan a boral tawh a. Jeneti leh a phirpui Nupuii bakah Ni Mawii khi an ni mai. An nuṭa neihchhun lah q boral tawh si" a lo ti a. Tikha chuan ka hrechiang ve ta deuh a, a zia e. 

Dar 3 a lo ri hnai ta mai a. An bula awm a nawm vang nge a rei lo riaua ka hriat ni. Lucy chuan, "Ka haw dawn. Pa Par, zanin chu ka inkhawm dawn lo aw" a ti a, biak leh hman rual lohin a chhuak nul nul. He nu hi a..Sawmtea pawh chu a phone a rawn ri a, a va biak sur sur hnuah, "Pem vengah ka ṭhianpa ka va kalpui lawk ang e. Nunpui, zanah kan leng leh dawn nia, min lo sawm la aw" a ti a. A chhuak chu a ni ve mai. Keipawh muangmara chhuah chhoh ka duh a, mahse, Pari chu biak lawk ka duh tlat. 

"K'u Par, Lucy te hi eng nge an chhungkaw dinhmun?" Ka ti nghal tâwng a. Mak a tih vak loh danah ka zawh a lo ringsa em mawni..

"A pa hovin an khawsa a. Unau pathum karah a milai niin hmeichhe awmchhun a ni bawk a. A pa hi Primary zirtirtu pension a nia,. An upa ber hi nupui a nei ve zuai a, an nu a uire khanglang a..a fapa chu an awmpui khi..Lucy nau te nupa khi chuan fa an la nei bik lo, anni nupa bakah amah Lucy fanu Nuteii aia kum 2 -a nau te nen tunah khian an khawsa mêk. " A ti ta zung zung a. Ka la duhtawk lo nasa. 

"An khawsak a harsa em? Amah hian eng nge a thawh? " Ka ti leh a. Ka zawh châk ber erawh ka la zawt lo. 

"Harsa em em chu an ni hran lo. Chu a pa pension hlawh bakah a û khi damdawi-inah khian Lab-technician niin a thawk ve a. Amah Lucy hi chu kan sumdawng dun ṭhin. Thawmhnaw bakah in chhungkhur bungrua kan khawih tlangpui..a nau hi English medium-ah a thawk ve bawk a. Kan khua angah chuan a khawsa thei pawl an ni zawk mah ang" a ti sûrh sûrh a. A ṭhiannu chanchin sawi chu nuam a tih hmel angreng, chu chuan zawh zel min intithlahrung lo ka ti mai. 

"A nih ti nge a thlawi? " Ka ti ta a. Min rawn melh deuh kâwk, ka inthiam lo leh hnuhnawh. Mahse, ka hre châk miau si a,. 

"Englo a nia. Sawi dawn chuan sawi thui a ngai. Aizawlah pasal a rawn nei a, a tleirâwl chhuak hlim kha a hmelṭha si, kan khaw tlangval kei ka ni inti chinte chuan an ngaizawng deuh vek rêng a. A han nula chho a, kan venga Doctor rawn awm fapa khan atchilh taktê hian a atchilh a. A hmel lah a lo ṭha ve phian si, Kan Luciferi pawh a talbuai ta a. Chutihlai chuan a nu a la dam a, ani Lucy hi rilru lian zet, a tih tawhna lama bur tlut chi a ni ve a. Zankhat mitthi lumen zana Thanpuia nen Thanpuia te ina thingpui an va in kha tu ten emaw a ni lo zawngin an lo hêk ni tur a ni. A pa lah khi pa khirh leh amah ang chiaha mi bumro a ni ve sia, Lucy chu a hau ta hrep a,. Lucy'n thil awmzia sawifiah a tum kha a beng pek a! Ani Lucy luhlulna kaichhuakin Thanpuia a be nghal a. An inru ta ngawt mai kha a nia. Reifê chu man leh mual pawh an inhlan hleinem. Thanpuia lah engmah thawk bik hek lo, Aizawlah an in pui an nghak nupa a. Thanpuia bak fa kha an nei lo hrim hrim bawk nen, a hnua an sawi leh danin Thanpuia pawh kha falâk an ti tlat..thla 2 emaw âwrh inzuia innei ve ta ngawt an nih avangin man te an han inhlan fel hnu khan Thanpuia ze dik tak a lang ṭan ti mai ang. No.4 a lo ti ru ve reng hi a lo nia! A nu leh pate lah helamah an awm si. Lucy chu a rethei ṭhin khawp mai a. Miteii a neih hnu thla 3 vel lekah Thanpuia chuan hmeichhia hruai lutin Lucy chu a hnawtchhuak a. Mahse, A duhthlanna leh a pa thuawih lo va kal a nih avangin chutia inṭhen mai mai chu a duh bik hauh lo. Ama thuin a lut leh ngat a. Thanpuia nupui hruai luhte nen kar khat zet chu an chengho hmiah a ni. Thanpuia kha a bawraw hrim hrim, rui ve satliah chu nise thuhran, A nuten Lucy pawisa an kawltir hi helama an rawn kal rual rualin a chhuhsak nghal a. Amah Lucy hian a sawi ṭha duh lo em zawk a, chaw nghei changte pawh a ngah a niang. Buhfai leh chawhmeh leina takngial pawh a nei ve si lo, mi intifai te, mi buhthleite hian a inhlawh ve ṭhin a. Chu chu a pawisa hmuh ve dan a ni mai. Bakah sawi leh sawi hnu a la puitlin tawk lohnaah a la â êm mai a. Mahni inhaikaw tur pawh khan a rilru khan a la phak lo ve a ni. 

Thanpuia nu lah kha mi khermei, thîp ram reng mai a nia. Aizawla an haw ve hi chuan Lucy chu chhiahhlawh a ni deuh tawp. A raipuar lai pawn duat leh ngaihsak a hlawh lo. Hrisel lo leh hah reng renga pai a ni bawk a, Miteii pawh khi a enkawl fê chung pawn a rualpuite a pawl pha lo reng bawk a. An pa lah a kut a ram si, a duk cher chur zel a. Mahse, a hnawhchhuah leh tuna an inṭhen hlen bak hi vawikhat mah a tlan lo. A tuar rei ve a nia..a la naupan tehlul nen khan. A tam lutuk, sawi zawh sen chi a ni lo. An pa hmeichhe rawn hruai haw ve ngawt kha a chhungten an va hruai haw ta daih a. Miteii thla 8 a nihin hmeichhe dang bawk a hruai lut leh ta a. Chumiṭum erawh chuan Lucy nu leh pate ngaihdan a ni ta ngang lo va, an hruai haw ta a. Bungrua pawh an la ta vat. Tikhan a tawp chu a ni mai. Hetah hmeichhe awmchhun a ni a, duat rawn a nih vei nen, a pa pawh a inchhir alawm. Amah ang chiah fanu a nei tih hre lo va khati teh chiama a lo hau kha..tunah khi chuan Lucy tel lo chuan an khawsa hlei thei tawh lovang,. An chhungkaw thil engkim rêltu leh mawhphurhna latu a nia. A pa pawh khian a ringzo khawp mai. A nu boral hnu lawkah Thanpuia khan a rawn be chho leh ṭan a. Mahse, Lucy ze danglam vek tawh a hre ve lo a nih hmel..kha a pasal nei ve ringawt khan a nun a vawchhia a, mipa hi ṭhian atan bak chuan eng atanmah a ti lo a ni ber. Vawikhat Miteii pawh kum 5 a nih ve tawh hnuah kan nawrluih tlat avangin Middle school zirtirtu-a lo awm Chhana kan tihpui a. Tihluih ve tumin Lucy pawn theihtawp a chhuah. 

Mahse, a vanduaina a la kaltluang zel nge mawni dawn ni, Chhana chuan Lucy te kawmchhak lawk ami Thari lakah sâwn a thlak ta pek a! Khata ṭang khan ngaihzawng a nei leh tawh lo hrim hrim. Kawlh kan tih chhan pawh nuthlawi a nih vanga zuam ve ngawttu mipa pahnih te chu tlema tlemah a tihlum lo chauh pek a! Khi..amah a hleitlingin thahrui a nei zêk bawk nen, an kuah satliahah pawh ani chuan ṭawngkam mai a duhtawk ve tawh lo..amah leh amah inhungbik a duh luat vanga khitia kawlh leh rorum taka khawsa a ni tih ka chiang..a sual leh nunrâwn vang a ni lo nasa. Tunah chuan kan khaw tlangvalte hi chuan ngaihzawn enah an en tawh lo tawp. A thlawi hnu pawh hian a la luck a nia aw. Kan khuaa Sawrkar hnathawka rawn awmte hian an belbul nghal chawt zel a. Ṭhian anga kawm theih chi chu a lo kawm ve mai, amah beisei tum anga an lan chuan tuma hmai êng a zah ngai lo. A ri ṭhak zel..chuvang chuan nangpawn i lo englo deuh a nih pawhin fimkhur rawh..ṭhian aṭanga bulṭan a fuh ang" a ti ta dap dap a. Ngaihnawm ka va ti kher êm. Lucy chu ka ngaina zual sauh lehnghal. 

"Aa..chutin ka va ngaizawng hran lo. Ka hrechiang chak mai mai a" ka han ti ve sasawi a. Nui hawk hawk chungin, "Ka nau, nuthlawi phanchang tawh ka nih hi, music man lo rual ka ni tawh lo" Pari chuan a ti a..ka nui ve ringawt. Min man chiang angreng khawp mai. Kan titi tui atalângin a lo tlai duai tawh a, zan lama leng leh tura inchahin ka hawnsan ta a. 

In ka thlen veleh rawng ka bawl nghal a. Chhungte nen pawha chaw ei tlem tawh nak alaiin mahni mai chuan ei tam a har ve lulai khawp mai. Loh theih lohin Mami ka hrechhuak leh, ka theihnghilh dawn lo tih ka hria a, mahse, hriatreng erawh ka tum hauh lo. Min phatsan duhtu vanga ka nun tihhrehawm hian hlawkna engmah ka neih phah dawn lo. A la reh reng danah kha pa nen khan an la hlim tluang zel a nih ka ring. Zothana leh Samua te nen kan invideo call a, ka ṭhian ṭha ber ve ve an ni bawk a, Mami chungchang chu ka hrilh ve a. Mak an ti ve khawp mai. "Bro, tiang nungchang ṭhat hmel deuh, ze zâwi deuhho hi a rukin pawisak an nei lo duh zêk a nia. A ho êm mai, ani lo hi i hmu nasa lutuk" Samua chuan a ti lûng lûng a. Zothana paw'n, "Kha lamah khan han melh taih tur te an awm lo mi!" A rawn ti. Lucy chungchang ka sawi ṭêp a, ka ṭhulh leh. A la hma deuhin ka hria. "Lo zin vat teh u, mahni chuan a hrehawm em mai" ka ti sek ringawt. Nizana min sual rawn vel kha chu ka zêp..an thinrim leh dawn sia, anni thluak aia thahrui ngaina tih takah, an ri leh phat dawn tih ka chiang. Hre lo law law rawh se. 

Pari te ina zuk len leh ka châk deuh tlat a, ka insiam a. Zan lam chu inkhawm ka thatchhia..Ka insiam laiin Mami ṭhiannu ve ber Dampuii'n min lo call a. Ka la ve mai. 

"Ti nge engmah hrechiang lova thutlukna i siam ngawt a?" A rawn ti deuh tâwng. 

"Eng a?" Ka ti ringawt. Chhan dan tur ka la ngaihtuah hman loh vang a ni. 

"Lalmami rilru i tina hle mai. I be duh bawk si lo, engmah i hre lo a nih kha" a ti a. 

"Ka hriat vang alawm ka biak tak loh" ka ti hmuk a. 

"Kha pa kha a bialpa a ni lo, a cousin a nia..a ruih vangin tiang khan a ṭawng a nih kha" a la ti ta deuh deuh, ka nui tawp mai. 

" a..Dampui, i ṭhiannu chhan hi chu tum buai lo mai teh. Ka chiang. Chutianga thil dik lo a nihte chuan amah pawn min rawn bia ang hmiang, hei a la ngawi reng a. An hlim dun viau a nih ka ring" ka ti nghut nghut a. 

A chek hlak. "I va hrethiam lo tak" a ti sep a. 

"A ho êm mai, hriatthiam ka duh lo. Tikhan tâwp se a ṭha mai. Lo hlim dun rawh se..nakinah kan inbe leh dawn nia, ka leng dawn a, ka dah phawt" tiin ka dah ta daih a. Mami leh a kaihhnawih thila inhambuai ka duh lo. Mak deuh chu tukinah te kha chuan ka na nget nget kha a nia. A thiam lo zawk ka nih lohna khan min delh rit ka ti mai, mahse, mi rinawm lo na nâ na chuan thinlung chhungril an luah phak lo a niang e. Tunah tak hi chuan ka na miah lo. Ka inla sehhel ve bawk a. Pari te in lam pan chuan ka pen thla ta pawk pâwk a. Inkhawm kal an rêm deuh tawh bawk a, min lo betu an awm lem lo. Kima te pawh naktukah an rawn haw phei tawh dawn a, lenna tur ka haihchham tawh bik lovang chu. 

Pari fanu Nuteii hi a kum ngaihtuahin a fingfel kan tih ang chi kha a nia, a hmel pawh a ṭha. Tv an lo en ṭhap a, Pari chuan min lo be nghal sawk sawk. Rei ka ṭhut hmain Hruaii'n thingpui sen hâng ngei mai min rawn thlit nghal zat bawk. 

"Naktuk aṭangin tiraw hna in ṭan dawn?" A ti a. Ka lo bu nghut. "Manager hlui kha chu sawi leh tak lovah biak a hrehawm angreng a, Thingtlang tih takah berh ve fe fe, mawlmang ve tak tak kan tam ve bawk nen, a lo hrawk leh khur khur zel a niang. Nang chu ni ve miah suh" a ti sar sar a. Sawi tawh angin inla hotu thiam vak lo, ni ve deuh tawp ka ni a, biak hrehawm ka nih chu ka ring lo ve tawp. 

"Engtik nge lui chu kan kal ang?" Ka ti a. Ka châk êm a ni. "Ka hrethiam lo, chawlh in neih hunah ni mai lawm" a ti ve mai a. Ani hi a kal phawt chuan Lucy pawh a kal ka ring tlat a ni. 

"A nih chuan tunlai in sumdawnna in chawl rih nge?" Ka ti a. 

"Chawl tihah bungrua a tâng rih a. Kan zin leh têp ang. Lucy tak khi chuan kâwnah khuan dawr hawn a rilrûk a. A thurualpui hleihtheih tawh lovang" a ti a. 

"Ani nen khian in inkawp chawt em ni?" Ka tih chuan, "Umm, kei aiin a nau deuh naa, a tleirawl chhuah vel aṭang khan nau ang hian ka hruai kual nasa a..tihian kan inzui ta zel a nih hi" a ti a. 

"Nang pawh hi pasal nei leh rawh" ka'n ti ngawt a. A nui vak vak ringawt. Neih leh chu a tum vak lo em mawni. A la tlawntlaiin a hmel lah a ṭha si. A hmu zo dawn lutuk tih ka hmuthiam ve kur..

Nuteii leh Hruaii te pindana an inzui luh rual deuhthawin Lucy a rawn lut ve hlawl mai. Ka lungphu a rang ve dat nia! Tiang hian hmeichhe lakah ka awm khât asin le. A hmel erawh a dik meuh lo, a thinrim nge a lungngai nge ka sawi thei chiah lo naa, hlim hmel chu a pu lo chiang a ni. Min rawn melh zauh a, Pari a melh leh nghal. "K'u Par, Thanpuia a rawn kal a" a ti ta sap a. Chu hming chu tlaiah khan ka lo hre ve tawh. A pasal hlui ngei kha a ni tlat. Pari pawh a meng phâwk deuh a, "Eng a? Eng nge a rawn tih a?"a ti hliai. Ani pawh a awrâwl a dik chiah lo. 

"A zaktheilo khawp" a ti hmak a. Pari bulah a ṭhu ve nghal. 

"Tunah khaw nge a awm?" Pari'n a lo ti a. 

"Kan inah. Chuvang alawm ka rawn kal" a ti leh mai a,. Ṭawng tam a hlauh hmel viau. Ka tan lo sawi ve tur a awm si lo, ka inthahrung letling. 

"Nunpui, Thanpuia chu Lucy pasal hlui hi a nia" Pari chuan a ti a, a mitmei chuan tlaia kan inkawmna kha sawi lo turin min ti tih ka manthiam ve mai. 

"Umm a nih chu a" ka ti ringawt. Lo chhan dan tur a vâng êm a ni. Lucy chuan, "A ṭap vel " a ti leh sep a. Ka nuih a za deuh, a hmelhmai zawng zawng nen a pasal hlui chu a ei lo tih a hriat ngawih ngawih. Pari pawh a nui ve huk a, "Chu! I nghing mai dawn em ni?" A ti zauh. A tilui tih ka hrereng. 

"A teuhin a hnai lo. A mittui khi tuizêm khat pawn tling se, ka lêt chuang lovang" a ti sak sak a. An sawi fô tawh angin a lungawi loh chuan mi hmai êng a zah lo an tih kha a tak tak a nih hmel. Min venthawn loh danah. 

"Chuan, i rawn kalsan daih sia, a rawn kal ve leh ang e" Pari bawk chuan a ti leh a. 

"Kal ngam lovang. Ka pa inkhawm tur pawn a ṭhulh leh ringawt alawm. A ṭhianpa nen an nia, a haw pui ve mai ang" Lucy chuan a lo ti a. 

"A ṭhat chu, tikhan leng ve rih mai rawh. Tihian ka inah Nunpuia nen in inrim tihna a ni mai" Pari lah chuan a lo ti leh hmiah. Ka kiai suk a, ka zak hran lo. Lucy chuan min rawn en zauh a, "A ni lo tiraw? Inkawm chu a ṭha, inrim chu a tenawm" a ti nghat a. A mizia leh nunhlui ka lo hre tawh bawk a. Mak ka ti lo, "Nia, inkawm hi a nuam ber" ka lo ti ve vat. A ngaih a ngam hmel ta deuh a. "I fel viau chuan kan veng nula hmelṭha ka la tihpui ang che" a ti deuh ngei. Amah hi ka target tih a inhrethiam der lo. 

"In khuaah hian nang aia hmelṭha an awm chuan ka rim ngei ngei ang" ka tum loh deuhin ka ti ta tlat! Ka inchhir nghal. Mahse, ka sawi zo vek tawh si. A ner sak a, "Mipa dang angin â ve miah suh. K'u Pari chhawrthlapui ṭawng ka'n hawh ang e, 'I lawh theih loh tur thei lawh tum ṭâlh ai chuan, i lawh phak theirah tui deuh deuh lo zawk rawh" a ti charh charh a, a va beidawnthlak deuh ve. Mahse, induhna te, inngainatna te hi chu vawi leh khata ṭhanglian thut ai chuan zawi zawia kuhmuma parchhuak hi a fuh zawk fô. Hetia a inlak hran nasat poh leh hnaih ka tum ve zel ang a..ka duh chu ka hmuh ngei ka ring tlat a ni. Mahse, Pari thurawn ang khan fimkhur erawh ka ngai khawp ang. 

"Lawh theih loh tur chu kih hmiah mai tur alawm, kan lo thei tawh mai dawn a" satliah zetin ka lo ti a. A nui ta hawk hawk, chutia a ngaihaw lo ringawt pawh chuan awm a tinuam thei chu a ni sia aw. 

"I â roh siah' an ti ngawt a. Pari lah kan inbiak chhung zawngin a lo nui pût pût ringawt. "Lo la len ka tum asin" ka ti a. 

"Nuam i ti lovang" a ti duh lek. 

"Ti ang" ka lo ti ve leh, "Rim tur ṭha tâwk ka la kawhhmuh ang che" a lo ti ve lehzel. A thinrim chuang lo bawk a, a ṭha mai e. Kawngka an rawn kik a, Mipa, keimah ang rual vel tur a rawn lut hlawl. "U, lo haw ve lawk mai teh. U Thanpuia khi a buaithlak lutuk" a rawn ti lut nghal a. 

"Hawntir rawh u ka tih kha, a hmel ka hmu peih hleinem" a lo ti hlar a. A nau chuan, "A sapatâl a, a ṭhianpa nen te an insual dawn dawn. Nangman lo khap teh ka ti" a ti ve leh mai a. 

."Ka peih lo, a sapatâlna lamah han lum bo daih se a ṭha tur' a lo ti hmiah. A pasal hlui, a fanu pa ngei mai lakah chuan a rilru a lêt chiang hle a nih hmel. 

A nau chu a chek hluk a. "Luhlul ve bawk sia a. " A ti nghut a, a chhuak leh nghal daih. Mahse, thawm a rawn awm leh nghal vat a. Lucy nau rawn lêt leh chuan zuitu a nei tlat! Keimah nen kan inchen tawk viauin a rinawm, cher lam deuh, vun dâng angreng tak, inchei punk zet mai a ni. Pari a ding nghal a, Lucy pawh a meng hrâ mai. 

"Lo haw tawh la, Bawihi, thil sawi ho lawk ang u" a rawn ti nghal thawr thawr. Thanpuia ngei chu a nih a rinawm, a enga mah hmain ka lo hmu khawdang sial nghal ngawt. "Haw rawh u, hetah ka riak dawn" Lucy chuan a ti ram hmak a. 

"I tel lo chuan hawn ka tum hleinem, Miteii pawh a khawngaihthlak..haw ang" Thanpuia chuan a ti leh a. 

"I fanu saw e..i khawngaih ve pawh a ngai lo. I fa a ni tih te hi a hriat ka phal hlek lo a nia" Lucy aw chu a chang ta kher mai. Thanpuia chuan min rawn melh zawkin, "Ṭhianpa, Lucy hi i eng nge a nih." A ti khauh mai. 

"Ka bialnu' ka lo ti hmiah. Lucy chuan mi rawn melh nghek naa ka pawisa duh lo. "Wow! Ka nupui i lo ngaizawng ve ringawt tihna em ni " elsen zet hian a ti a. 

"I nupui ka ni bawk lo ve a..haw teh u, ka ning" Lucy chuan a rawn ti vat a. Ka bialnu anga ka sawi avang khan ka lakah a thinrim hle ang tih ka hlau . Mahse, Thanpuia la awm ve hian min hliahkhuh deuh. 

"Bawihi, min hrem rei thawkhat tawh alawm le. Tunah chuan ka piangthar tawh. Chhungkaw din ṭhat leh hi ka duh ber a ni. Nang pawn i duh ṭhin kha" Thanpuia chuan a ti nem duai a. 

Lucy chu za vak lo hian a nui hak, "Piangthar a?! Nang ang mihring pianthartirtu chu a dawthei ve khawp ang. Pianthar chi i ni lo, piang ve lo tur chi zawk i ni. Mampui, hruai haw teh. A hmel hi ka hmu ning" tiin a nau a va melh zauh a. 

A nau pawh chuan, "Nia, U Thanpui, hawh haw ang. Nidangah i harhfim hunah i lo kal leh zawk dawn nia" tiin a ding a. Thanpuia chuan, "I û leh ka fanu tel lo chuan ka haw dawn lo ka tih kha. Min nawrlui suh u" a ti fiak ṭhak a. A thinrim hmel ta deuh. Kei ka lo awm ve kher bawk nen. 

Ka rin loh lutukin Lucy chuan, "Thanpui, a pawi hle mai. Hei Nunpuia nen hian thla tharah kan innei dawn a. Ka fanu pawn a pa ang thlapin a en thei a ni. I hmeichhe hnip deuh deuh ho kha han chinglet leh mai rawh. Ka duh tawh ngang lo che a ni"a ti ta khawl khawl a. Ka dawnsawn tur nise zah vangin ka sen vek tawh ang. Thanpuia erawh zak hmel aiin thinrimna hmel a pholang zawk .."Khanglang che u chuan le. Ka nupui i nih kha..hmeli" a ti ta mai. Mampuia kha a rawn ding ve ta phat a, "Haw rawh. Haw vang vang rawh. Ka û hian engtikah mah a nei tawh dawn chuang lo che. Lo kal rawh. Ka zaidam lai hian haw mai rawh" a ti ta salh salh a. Buaina chhuak mai thei dinhmunah kan ding mêk..a ṭul a nih phawt chuan chet lak ka hreh fahran lo. 

An inpawt sawk sawk a, Thanpuia ṭhianpa niawm tak a rawn lut ve hlauh a, an innawr chhuak thei ta hram..kan thaw ta huai a.

Lucy chuan, "I ṭangkai reuh kha le..mahse, a tak leh a lem a awm tih i hriat loh ka hlau" a ti zawi sap a. 

Amah chiang taka va melhin, "A tak a la ni vat ang" ka ti ve ta sak a. A mitmeng a thim khap a,. "Tawrhna hi kan pumpelh theihna kawng a lo awm ve tho zel a nia..i hrethiam tiraw..Manager" tiin min rawn melh de sawr sawr a. 

Ka rilruin tum nghet tak ka nei nghal. "He hmeichhia hi ka bialnu ka nihtir dawn hrim hrim" tiin. Mahse, nuthlawi lungfing chin, kawlh bawk si, mahnia sum thawkchhuak thei, chhungkaw tana hlu leh pawimawh bawk si chhai chu a huphurhawm ru fû tho. Mipa zei leh nula cheng hre tak ka ni lo bawk nen..Engpawhnise, Kawng chu a awm ve zel tur a ni. Nunhlupuia hi ka hlawhchham tur a ni lo. Ka khi ta suk a..