Nuthlawi 2

NUTHLAWI (2)

Ziaktu : Toni Râlte

Pari melh zawkin, "Ka rawn kal a,i awm si lo. Phone ka keng bawk si lo va" a ti sap a. A aw erawh a hmelṭhat ang aiin a mawi lo, a chher lek lek. A lai rût bawk si, a zaithiam lo ve teh ang chu. Pari lah chuan, "Ka awih lo, kan mikhualpa rawn rim i duh vang a niang" a lo ti zauh a. Ka lo nui leh vur vur ringawt. Kima chuan, "Hei hi a nia nichina kan sawi Lucy chu..a hmingpum Luciferi" a lo ti a. Lucy chuan, "Lukawlh, ngawi mai teh. " A lo ti nghek. 

An boruak hap hi a nawm hmel tawp, ka sawithiam lo, an inpawhin an infiamna pawh a na viau ang tih ka ring. Lucy nen chuan kan han inhmelhriat ve a, min ngaihven tehchiam lo khawp mai. Hmelṭha ka tih avangin ka hriat lohin ka lo melh leh reng ṭhin. Thingtlâng ka hmuhsitna ni miah lovin Lucy hi khawpuiah pawh awm se, zahpuiawm loh tur chi, langsar tur chi niin ka hria. Kima chuan, "Naktuk zanah lenkhâng zar chuan kan riak dawn asin, Bleaching pawh chu aw" Tiin Pari chu a melh a. Pari chuan, "In zak chai em? Ka tel lova kal te in tum a..ka tel ve dawn loh chuan ka pe awm lo che u e" a lo ti hmawk hmawk. 

"I kal ve ang a a ni mai lo'm, Lucy, kal ve la.." tiin a sawm zui ve zat a. Lucy erawh chuan a sam ṭhenkhat a benga zeh pahin, "Ka hman ka ring lo, Lawitlangah ka phei zuai a ngai. Ba ka khawn dawn.." a lo ti a. Tel ve se ka ti ru viau. A nuam hut hut ngawt ang. 

Chutia kan titi ho mam mam lai chuan Siama kha a rawn lut ve a, "Jeneti fa a thih kha in hria em?" A rawn ti lut nghal. An phâwk hlawm hle. Jeneti a tih takah chuan tukina raipuar kha a ni ngei ang le..

Lucy chuan, "Ngati nge a thih?" A lo ti vat a. 

"Ka hre lo, eng emaw natna a niang, a thaw a rawn hah vak a. A thi zui ta mai an ti" Siama chuan a ti liam puat a. Hlamzuih a nihna laiah a la lâp viau a niang. "A va khawngaihthlak ve aw. Mahse, lehlamah chuan Jeneti tan chuan a lawmawm zawk ang" Pari chuan a lo ti a. 

Zoteii pawh chuan, "Nu Mawii tan pawh sawn a lawmawm daih zawk ang. Jeneti chu a vanduai em mai" a lo ti ve mawlh mawlh a. 

Zahtheih loh chhuahin, "In sawi chu tukina nau nei kha em ni?" Ka lo ti ve a. A nih thu an lo sawi tliar tliar, "A nih chu aw, a va zia lo ve" ka ti ve a. Zoteii chu a ṭawng duh ve bawk a, "jeneti ka hmuh châng hi chuan ka thin hi a rim leh ut ut zel, Ramsanga tenawmzia hi aw.." a ti vawng vawng a. Hriatchian ve a chakawm viau naa, ka tan a pawimawh hran loh avangin ka ngaihven zui lem lo. Dar 8 a lo pel tawh bawk a, "Ka han haw chho ve ang e, vawiin kan lui kalna kha ka sil ve ṭhûm mai" ka ti a. 

Pari chuan, "I va fit lo roh e aw. "A lo ti hlak, ka nui ringawt. 

Min ui der viau naa ka hawnsan ta mai. Mut ka châk deuh tlat a ni. Ka in ka thleng a, ka chhungte nen kan inbiak zawhah Mami nen kan video call a, Lungleiah a zin ta bawk nen, an buai deuh bawk sia, kan inbe rei lo. Khum ka deh rual chuan ka silzia ka hrechiang sawt. Ramchhuak khât tih takah. Phone pawh khawih zawm tawh lem lovin ka muhil ta bawrh bawrh a. Ka harh chuan ni a lo chhuak tawh. Mut ka kham hnêp hnâwp bawk a, ka tho ta a. Ka inphihfai hnuah rawngbawl nan a la hma deuh bawk nen, zing boruak hîp pahin tiin ka quarter bul vel chu ka fang kual a. Sawi tawh ang khan ka awmna hmun hi mi ram a ni a, a ram neitute hian in hmun chiah chiah hi an leitir a ni. A bak a chhehvel hi chu an ram a la ni vek. In thlang lamah huan an siam ka tih tawh kha, Primary School lo lam erawh thingtuai lian vak lo a ding thliah thliah a, theihai kung lian fahran a ding bawk. He lai ram hmunhma hi a rem khawp mai, a ram neitute hian luah zawk awm tak a nia, ran vulh nan pawh a ṭhat tehlul nen. A hmun a han fâl deuh vang hian an luah duh lo a ni maithei. Keiin nuam ka tih tehreng nen. Darkar chanve hnu velah rawngbawl turin ka lut leh ta a. 

Vawiin hi zirtawpni a ni a, chawhnu lamah luiah kan riahluh dawn vangin chawhma lam chu kâwn velah mamawh zu lam ka tum a. A karah sunday a tla dawn si a, chawhmeh eng ilo pawh lam lâwk kha ṭha ka ti a ni. Inchei lem lovin ka awmhmun thawmhnaw nen ka chhuk ta a. Pi Mawii te in ka kalpelh dawn chuan rilruah mawlhtu ka neih avangin ka peng ta nge nge a. Nutling pathum leh patling pahnih bakah tleirawl pakhat an lo ṭhu thap mai. Jeneti ber erawh ka hmu lo, a mu a ni maithei. Pi Mawii chuan min lo be chul a. Thingpui min lo thlitsak nghal bawk nen, ka ṭhu ve ta nge nge a. "Nizanah in chhiat tawh thute ka lo hre ve a, a zia lo tak tak a ni" ka ti ve luam a. 

"Ni e, a damchhuah mai kha kan beisei ve a nia. Mahse, engkim hi Pathian remruat a ni" a ti ṭha ve mai a. 

"Jeneti chuan a tuar na awm mang e,." Tih pahin ka hawi a. 

"Nu tan chuan a na lehzual ngawt ang, amah jeneti a la naupang ve bawk nen.." ka bula ṭhu nu cher lam chuan a lo ti ve a. Jeneti pawh chu reivakloah a rawn lang ve ta a, a mit a bui lak a, a hlim lo tih a hriat ngawih ngawih. Niminah khan ka lo en chik lo bawk a, tuna ka han hmuh chian takah chuan tleirawltê tak tak a lo nia!hei vang hi a niang Zoteii te pawn an tan a ṭhat zawk an rin thu an lo sawi ni. A la nau deuh êm mai. Pi Mawii chuan, "Chhiat chu tawk lo ila, chawlhni zingah chaw eiah ka sawm ang che ka lo ti a nia. A lehpekah a ni mai. Inṭhenawm kan ni bawk a, engmah sawi hreh loh tur ka tih kha aw" a ti leh mawlh mawlh a. Nu vengva leh bengvar tak zawng a ni chiang mai. Hmeithai an ni a ni maithei, pa ber tur âwm ka hmu tlat lo. Nupa niawm tak an rawn luh leh takah chuan keipawh chuan ka chhuahsan ve ta rih a. Kima te ina peng kawi tawh lovin kâwn lam ka pan ding nghal. 

Ka hmuh tum aiin ka hmu pui ti mai ang,. An dawr reng reng chu a lian hlawmin khawpui daifêm ang mai an ni. Chawhmeh zawrhna lam ka pan nghal a, chhe har chi deuh ka lei a, fridge ka kawl loh avangin hei hi chu tih makmawh a ni. Min en duh ve angreng a, a khua a lian naa mikhual nge nge chu kan lo langsar hma deuhte pawh a niang e. Eichawp dawr lian angreng taka choka bawlhlo ka lei lai chuan Lucy kha a rawn lut hlawl mai. Thophang hmel a pu lo va, make up engmah inbel lo mah se; a hmeltha zawk emaw tih mai tur a ni. Min hmuh rual chuan ka lo nuih vang nge a ṭhen ve sak a, Tel pack khat leh Amul gold a lei zui zat, dawr nghaktu chu nula senior a nih loh paw'n nuthlawi a nih ka ring, tarmit vuah hmelchhia tia sawi tur nisi lo, hmel laklawh kan tih ang hi a ni. Chunu bulah chuan, "U Nghakte, hei hi bank manager thar chu a nih hi,. Chhuah miah suh" a'n ti teh ngawt a. Nghakteii chu a nui vak vak, "Nang lah hi mi hmuh apiang hian tizawng hian ṭawng ziah suh. I â lutuk"a ti bawrh bawrh a. 

Nui mang lo hian, "Nge a nia lawm..i upa tawh" a lo ti liam puat a, enghelh vak hi a neih loh ve hmel tawp. A chhuak tur chu, "Lucy, khawi laiah nge in in a awm? Lo lente pawh ka la duh thei a" zahtheih loh chhuahin ka ti thâwr a. Hmel danglam lem lo hian kâwn thlen hma deuha building lian lam, rawng hring dal raih an hnawih chu kawkin, "Khi khi kan in chu..nia, i lo la leng dawn nia.." a ti sap a. Ka melh nghek ringawt. Amah rim tumna rilru put ve mêk laia ka beisei anga a phur lo chuan min tihnual a ni mahna. 

"Ka rawn rim dawn he sin " ka ti nghut a. 

"I ho e a. Inrim tih vel a buaithlak" tih leh chhuah a rual nghal daih. Nghakteii chuan, "Aww..a va sual thei tak,. He nu hi zawng a hahthlak a nih hi" tiin min lo hnêm vat a. 

"Nang pawh ka la rawn rim ang che. " Ka ti vel ta ngawt. Sawi tur kha a vâng ve êm a ni. 

"Kan khaw nula hmelṭha tak tak i la hmu lo a nih kha, lenna tur chu i la hre viau ang" a lo ti siam siam a. Nghakteii hi kawm a nuam phian dawn e, remchang takin dawr a lo nghak bawk nen. Muangchangin ka haw chho a, ka inremfel zung zung. Nizanah khan Thakima te nupa number kha ka la tawh bawk a, kan kal hun tur vel ka zu zawt a, Kima chuan, "Lo call che ka lo tum ve mêk a. Hei a zia lo tak tak a ni. Zoteii nî a boral a, Lawitlangah kan phei a ngai dawn. Tun mai khan kan hre ve chauh bawk nen.." a rawn tih chuan ka hnual rawih thei. 

"A va pawi ve aw" ka ti thei ṭâwk. 

Min ngaihtuah hmel takin, "Lo kal ve mai ta che, hmelhriat i la nei fumfe si lova, hrehawm i tih takin" a ti luam a. Mahse, ka hmelhriat pawh ni hlei lo thihnaa va kal ve ringawt kha ka hreh ve bawk si, "Aa..a pawi lo, hmelhriatte chu an awm chawp ve mai zel alawm" ka ti ta ngawt a. Tlangval kan ni ve a, kawng chu a kaw chawp ve mai ang chu. Tiang chuan kan ramriak tur kan ṭhulh fel ta si a, Bank lama chinfel tur ang angte chinfel ka rilruk ta a. Aizawlah pawh khan a lênglâm tam lo ka ni bawk a, mahnia tawm kerh kerh chu hrehawm ka ti hran lo. Manager hlui Muana min hnutchhiah sulhnu ṭhenkhatte chu dawhkanah ka chhawp hnawk rum a, thingpui hâng ka chhuang leh tê tê phawt, ka thlit mek laiin pa pakhat, chal arh phak mai, hmelfang dik zet mai hi a rawn tek lut nawlh mai a. Han en mai pawn pa zahawm tak a ni.

"Ee..hei min hre kher lo maithei, hemi ram neitu hi ka nia. Pu Zual tiin min ko mai dawn nia. Huanah khuan hnahthial ka rawn la e ka tia, in rawn thlentirh lah khan Chawntlangah kan awm daih a, nizanah kan rawn haw leh chiah. "A ti nghal sawk sawk a. Kan inchibai sawk sawk. 

"Hei ram i nei ṭha hle mai, Pu Zual" inla patling fahran hian ka ti ve a. 

Thingpui hang chu ka thlit ve nghal zat bawk. "Nia mawle, an awt ve thei ngawt asin. Keimahni pawh hian thawkkhat lai khan luaha ranvulh lamte kha kan tum thut thut a, mahse, bank lam khan min rawn dil ta si, pawisa hlawm kan mamawh lai tak a lo ni nen, tiang hian kan inleitir ta ngawt kha a nia.. ranvulh te i duh phawt chuan i vulh thei a nia, min vengthâwng suh. Chuktuah huan siam pawh a rem êm saw.." a ti leh luam a. Pa ṭha tak niin ka hria. A ṭawngkam reng a dam dup mai a. 

"Aa..ranvulh thei chi pawn ka khawsak ka ring chiah lo. Huan erawh chawhmeh eng ilo chin nan chuan ka la duh ve maithei" ka ti ve a. 

"Hmelhriat mumal pawh i la nei awm si lo,. Zanin tlai chu chaw rawn ei rawh aw. Kâwn piah lawkah khuan kan awm..kan lo ring dawn che a nia. Kan lo awm remchang vat si lo va,.i lo ei ve ngei tur a ni" a ti ta tlat mai a. Min nawr dan a thiam bakah keipawn mikhual chan chang reng ai chuan tiin inhawn ve deuh ka duh a. Ka hnial ta bik lo. Hnahthial a zuk lak zawhah min hawnsan ve leh ta a. Eirawngbawl ka thiam si lo va, an ṭawngkam ṭha um mai a ngai a nih hi maw..

Dar 3 velah ziahfel ngai ka ziak fel thawkhat ta a. Ka nghawng a kham ngei mai. Fai ser sawrin ka inbual a. Zanriah ei turin Pu Zuala te in lam chu ka pan leh ta a. Nghakteii dawrah pêng lehin kuhva leh zial ka lam a, Pu Zuala te in awmna ka zawt zui bawk. Naupang thil rawn leite chu koin, "Apu hi U Rinrini te inah khan va hruai lawk r'u le" a ti a. Zah hmel lek lekin naupang pahnihte chuan min hruai ta a,. Pu Zuala te in chu Assam type, lian ṭha tak, uluk taka sak tih hriat zet mai hi a ni a. Kawt zawl zau vak lo an nei bawk. Kawngka a lo inhawn sa avangin, "In awm maw!" Tih pahin ka lut ta mai. An nu niawm tak hian min lo chhawn vat. Luh chiahin Living room a ni a, a thlang lamah choka awm nghalin, Living room dinglamah Sitting room a awm a. Veilamah pindan pathum a intlar bawk. "Ee..Nunpuia i ni ang tiraw? Lo ṭhu rawh.." a lo ti sawk sawk a. Nu tê lam, hmel fai vâng mai, samkir a ni a. A la upat hmel lutuk lo. "Kan pa chu a inbual a, a zo ṭêp ang" a ti leh a. A aw pawh a zangkhai hle. Ngaihngam tak chuan ka ṭhu ta a. Ka ṭhut hnu reivakloah Pu Zuala pawh chu a inbual zo va, "E! I lo thleng tawh elo? Rawn hruai te i ngaih takin tiin Mama kha ka lo hrilh sa a. A lawmawm e.." a ti luam a. Pindan pakhat aṭang chuan tleirâwl tih dawna nula ve tho si, nula puitling erawh la ni chiah si lo hi a rawn chhuak a. A zahzum hmel angreng. Nu ber chuan, "Bawihi, i û kha call teh, lo haw tawh teh se, a va rei ve" a lo ti vat. An fanu a ni tih ka hai bik lo. Nula phone hman hlan chuan, "Kan fanu neihchhun a nih kha, Rinrini a nia. A û chiah hi a inkhel lehpek a niang, Mama erawh a pute inah a va kal lawk a nih kha" a ti nghal mawlh mawlh bawk. Kei ṭawng tam vak lo tih takah mi han biak lumlâm vel hi ka zei lo khawp a, zawhna min zawt a nih loh chuan ka ngawi deuh ngat ngat zel, hei vang hian nelawm lo nih ka hlawh fô mai. Ka ngai haw hran lem lo. Pu Zuala inbual zo pawh a rawn ṭhu ve tawh a, 'Kan nu hi Biakzuali a nia, Nu Biak tiin i ko mai dawn nia. Mi panga kan khawsa ve a, hei ka fanu pawh pasal nei rual a ni ve mai dawn.." a ti sûrh sûrh a. Pa titi nuam ti ve tak niin ka hria. 

"In puitling ṭhuau tawh a nih hi,. In lah in nei nuam si" ka ti ve luam a. 

"A nuam thei tak tak lo,. Ka pension hlawh kan hmang zo titih der chu a ni mai a, khawsak a harsa chho ṭan khawp mai" a ti a. 

Pu Zuala hi a hnua ka hriat leh danin Middle school zirtirtu a ni a, kumin kumtirah khan a pension ve a ni. Nupui a nei har a ni maithei, an fanu hi a la naupan hmel ên mai. An fapa te pawh an rawn hawng a, An upa ber Mama tia an koh chu kan inchen thuak ang,. Pu Zuala chuan, "Ani hian nikum khan MA a zo ve a, hei hna a vâng si a, School-ah mi ai te a kal vel ta mai mai rih a nih hi, a nau chiah Zorema erawh chuan lu mehna dawr ka hawng ve e a tia, saw kâwnah sawn a nghak ve ṭhin a. Kan te ber Rinrini erawh kuminah college a kal ṭan ve chiah a, mahse, hei a vanduai a, a hrisel lo zui ta em em a, kumin chu chawl rih mai rawh tiin a rawn haw ta ngawt a nih hi" a ti mual mual a. Rinrini leh Zorema te chu an zûm deuh nge ka biak loh chuan min be ve mang lo. Mama erawh tlangval pangngai tak a ni tawh bawk a, min be ve luam mai. "Bank-ah te hian thawh ve theih a chakawm, engtin emaw min la ngaihtuahpui ve teh" a ti suam suam a, Economics a lo la ve bawk a, ni e, tihtheih kan nei te a nih chuan hriat ve reng pawh a ṭha viau ang. Ar an lo talh chu niin an tihautak duh mai mai hi ka tia. An bai ka ei tam daih zawk, a tui êm a ni. Kei mizo chawhmeh hi ka ngaina a, kan inah pawh chhum hân leh bai a awm loh chuan ka eitui vak ngai lo.. ka duh aiin ka puar..a manhla khawp mai. Chaw eikham veleha haw vut chi ni nghal lo chuan..thingpui hângte kan han in leh tê tê a. 

Pi Biaki lah nu ṭawng duh ve tak a lo ni bawk a."Nunpui, heta i awm ve reng chuan Kima ang sawn kan khaw mi ngei nupuiah i la nei ve mai ang a..an fel teh mai a nia, kan khaw nulate hi aw" a ti ve bawrh bawrh a. Tlangval ka nih vang nge nula lam ngawt hi min sawipui a, Mami chuan hria se a thinrim leh ngawt ang. 

"Kima sawi takah chuan an nu nî kha a boral a, an kal daih sia, anni bak han kawm tur ka la nei lo nen, a khawharthlak ve riau mai' ka ti a. 

"Ekhai! Lungngai suh, sunday an va cham law law ka ring deuh a, an châm chhungte chu helamah rawn chhuk daih rawh. Mahnia rawng inbawl bakah chaw ei tui a har si, inthlahrung reng reng suh" Pi Biaki chuan a lo ti var a. Tupawh mai ka chunga an ṭha hi ka lawm mang e. 

"Ni e, ka la rawn leng zut ang. Chaw erawh ka rawn ei reng chuan chaw ka heh sia, ka tihek lutuk ang che u. Ti daih ila, Pari te kha khaw nge maw an awm ve le?" Ka ti hluai a. An inmelh zauh chu ka hmu reng. Pu Zuala chuan, "Pari tehdaih pawh chu..Kâwn chhaklamah khian tlâng bâwkah an awm..in lo inhre tawh a ni maw?" A ti a. A mitmenga eng emaw lang zawk chu eng nge a nih erawh ka hrethiam chiah lo. Pari te nen kan inhmelhriat dan chu ka sawi a, "Ni dawn tak, Kima te nen sawn an inzûrâ ve viau tak alawm. An fel alawm Pari te pawh..a vanduai mai pawh a" a ti ve leh mai a. Ka zawt thui duh lem lo. Ka hriat atana pawimawh ni lem lo ngaihvena phi ruai hi ka zia a ni lem lo bawk a. 

Dar 9 a ri dawn hnai tihin ka hawnsan ta phawt a, ka la leng leh fô dawnin ka hria. Kawm an nuam nupa êm mai. Kâwn atanga ka in pen chhohna tur ka thlen hma hlekin tlangval rualkhat ho an rawn ri phei mam mam a. An ṭawng rin danah an rui ve deuh em mawni ka ti. Lehpelh mai tuma ka pen chak sawt chu an zinga pakhat chuan mi rawn su deuh nawk a, ngawi rengin ka kal leh nghal. Chupa chu niin ka hria, "A va inla ngeng ê" a ti zui nang nang a. Ka ngaihsak duh lo, mahse, pakhat thau lam hian ka hnunglam aṭangin mi rawn nêk leh kher a, ka ding ta a. "Ṭhiante u, eng nge ni ta?" Ka ti a. 

Min rawn sutu chuan , "A tu chu nge maw i nih a? I va inla ngeng ve mawle" a ti phawr phawr a. Buaina rim a hnai tih ka hria. "Nunpuia ka nia" ka ti nghut a. An vaiin panga an ni. Street light chuan a chhun fuh bawk a, an rui tih hai rual a ni lo, zu rim an nam huam huam bawk.

"Kan khaw mi leh sa i nih loh chuan ti nge i rawn inreport loh a? He khuaah chuan kan phalna tel lovin mikhual an zalên ngai hleinem" cher sang lam, hmelchhe ve fahran chuan a lo ti hmuk hmuk a, ka nuih a za deuh. Han en reng reng pawn tlangval pangngai tak an ni bik lo tih a chiang khawp mai. 

"Ka lo hre lo a nih chu" tih leh kal mai ka tum chu ka kawr nghawngah pakhat hian a rawn ṭhâm a, min hnuk let dâwrh mai. "Ekhai! Buaina ka duh lo a nia" ka ti hman ṭâwk, ka hnarah tak hian pakhatin a rawn hnek a. A na ve det. Thi erawh a thi êm lo. "Khati zawng khan maw" ka ti sup a. Insual buainaa tel ngai lo mah ni ila, mahni tawka fit intih ve hunlai a ni bawk a, anni zu rui mai mai chu ka hlau hran miah lo. Chersanga khan mi rawn vai fua a, ka lo kun zauh. A tir bera min sutu khan posi lain min veh nghal thar thar a, a lian lo bawk nen, a nuihzatthlak lek lek. Mi rawn hnek a tum lai tak chuan ka lo vaikhalh a, a bek dinglam a ri chhawk mai. Chutah zet chuan an vai mai chuan min rawn bawr ta luai luai mai a. An thawm a na bawk nen, tin, pakhatin mi panga han hneh ngaihna awm hek lo le..lei charah chuan ka tlu a, mahse, ka indan ve nasat avangin ka hmai tak chu an khawih fuh hleithei bik lo. Chutia thawm bengchheng kan siam tak luai luaiah chuan kâwn bul vel ami te chu rawn chhuakin an rawn ṭhelh ta a. Keipawh tu emaw hian min rawn kaitho vat, ka nâk veilam bakah ka chawn pahnihte chu an ṭum deuh nen, a sil ṭhûm mai. Chhawrpial khua chu khaw nuam leh him tak a ni emaw ka tih laiin mi ṭhing tak tak te avangin ka hnual rawih rawih thei. Patling aw fiak ṭhak hian min tibuaitu te chu a hau ta a. 

"Nangni ho hi in hnawksak ta viau e. Kan enliam mai mai che u a, a ni tawh em em lo. In hre viau ang" tiin. Kei chu ka hriat ngai pawh ni lo tlangval kei aia nau hlek tur hian min rawn kai a, Nghakteii te inah chuan kan lut zui ta nghal. A hnu lawkah YMA hruaitu niawm takte an rawn lut ve a, thupha an rawn chawi nasa mai. 

"Anni ho kha kan khaw mi leh sa diktak an ni lo va, pem thar veng ami te an nih kha. An zakthei lo a nia, mahse, kan ngawi mai mai tawh dawn lo. Khua lo var se an chan a chhe khawp ang..lo hrethiam hram hram teh aw, a zahthlak kan ti takzet a ni"an ti mawlh mawlh hlawm a. A inthlahrunawm letling zawk. Hliam na em em ka nei lo hlauh a, a tihzia. Pem veng chu an khaw tawntirh lam kha a lo nia, pem khawm bakah hnamdang awm khawmna hmun niin, a khaw mi leh sa dik takte nen pawh an lo inmil vak lo a nih hmel. An zâm lo ve reng reng hi ka tia. Ka duh loh dan deuhin ka lar dawn a nih hmel a, a nuam lo angreng. Mahse, ka thiam loh a awm chuang lo bawk a, a pawi lo zo tawh ti mai teh ang. Dar 10 pelhah ka haw thei ta chauh. Hawn kawngah chuan ka'n thinrim ṭha leh vel a, tihtheih ka nei tawh si lo. Ka mut hmunah pawh thildang ka ngaihtuah thei meuh lo. Mut pawh ka muhil har reng a. Ka harh meuh chuan dar 8 a lo ri lek lek tawh. Ka tho vat a, ka intihfai zawhah chaw chhuangin artui ka kang nghal. A namliam ve theih mai ang chu maw. Vawiin chu chhuah pawh ka tum lem lo, ka insu ve ang ka tia. Hmun ka phiah dûrh dûrh laiin pa pahnih hi an rawn lang hlawl mai. Ṭhutna ka lo kawhhmuh sawt sawt a, an vcp leh YMA president te an lo nia. Vcp hi Pu Duha a ni, YMA president erawh pu Ruata a ni thung. An fel duam duam khawp mai, thupha an chawi leh zet hnuah, "Kan nikhua loh a leiah a tirah pawh rawn chiauau nachang che kan lo hre lo va, a zia lo tak tak a ni. Zanin tlai chu kan in lamah chaw rawn ei ve reng reng rawh.." VCP chuan a ti a. 

"Akhai! A ngai reng reng lo. Niminah pawh Pu Zuala te inah ka ei tawh bawk si, ei chhuah zut pawh chu" ka lo ti ve ngial a.

"Sawm che ka tum hrim hrim alawm, lo ei ang che. " A ti vut mai a, hnial theih ni pawn a lang lo. Pu Ruata pawh chu YMA hruaitu niawm reng a ni, a ṭawngkam chhuak a dam thlup ang aiin hruaitu a nihna anga thuneihna lekkawh a hunah erawh a rum viau ka ring. Hetiang mi hi an ṭha. Mizo society-a buaithlak tak pakhat chu mi hmai eng kan zah lutuk te, ṭhenawm khawveng kan inhre lutuk te hi niin ka hria. Thil dik lo an ti tih hriatreng pawh inṭhenawm khawveng vek kan nih avangin hmalak ngam loh emaw sawisel ngam loh kan nei ṭhin a. Kan enliam ta ringawt zel, hei hi a fuh lo. Hruaitu atan hi chuan mi hmai êng zah lem lo, a ṭul huna hlauhawm thiam mi hi kan mamawh tawh. Hlauh nei hruaitu, chhung leh khat te pawisawi hlau, mi zawng zawng tihlawm tum hruaitu hi kan mamawh ber an ni lo nasa. 

Min hawnsan hnuah keipawh ka insu ve a. Ka insuk laiin ka phone a ri sek lehnghal,. Ka insuk zawha ka'n en nâk chuan Mami a lo nia! A sa leh teh ang chu. A call lak loh hian a thinrim thei tawp. Ka call back ta vat a, "Eng nge i tih a?" A rawn ti pawr hlar a. 

Ka insuk thu ka sawi chuan, "A nih chu..nula inleng i nei a nih ka lo ring a. " A ti nghat. Ka nuih a zâ, "In haw tawh dawn em?" Ka ti ta daih a. 

"Sunday cham law law r'u an tia, zin a khât ve bawk nen, mondayah kan haw ang" a ti a. Chutia a ṭawng lai tak chuan mipa aw hian, "Ono Hotel chu ka be tawh aw.." a rawn ti bul bul a. 

Mami chu ka ngaihbel nge a ṭawng a bah nghal nak. "Tu nge a?" Ka ti nghal a. 

"Ka ṭhianpa a nih kha, kan ṭhianho inhmuhkhawm kan tum a" a ti zawi sap a. Mipa aw bawk khan, "Hrilh ṭha ve mai la aw" a la rawn ti zui! Ngaihṭhat lohnain min tuam nghal a, Mami lah a tîm dûi bawk si. "I eng nge a nih a? Khaw maw ka lo bia " ka ti ro hak a. 

."A ṭul lo, i ho em mai a. " A ti a, a kalsawn a ni maithei, mipa ṭawng thawm ka hre tawh lo. 

"Tu nge a nih? Sawi vat rawh" ka ti leh a. 

"I va mak e aw, ka ṭhianpa ka tih chu..min ringhlel elo?" Kei ai maha pawr hian a rawn ti a. 

Rilru nut but laia thutlukna siam ka duh loh avangin, "A ṭha lawm..nia, va inhmukhawm r'u" ṭha deuhin ka ti a. Kan inbe rei lo. Mami hi ka lo ring em em a, ka rin ang hi a lo ni chiah lo em mawni dawn le..kan inzui chhung khan rinhlelh tur leh thik tur ka hre ngai lo. Phone in check sak tih vel hi ka ti ve ngai lo va, privacy ka zah avangin. Mahse, zep miah loh chuan Mami chu ka ringhlel ngai lo hrim hrim, ka ngaihzawng tawhteah ani baka rin ka la nei ngai hauh lo, a mizia leh nungchang vangte pawh a ni maithei. Mahse, tunah hian a vawikhat nan rinhlelhna ka nei ve ta tlat. Zan lamah eng nge kan hmachhawn dawn ka hre bik lo le. Phur vak lovin ka in chu ka tifai ve a. Ka nu khan a ṭul zual chu a tifai tawh naa, ka thawmhnaw te chu ka thlep fel leh a, mipa che fel thlip thlep ka ni hran lo. Mahse, tette aṭanga kan ṭhanhnan a ni bawk a, ka thawh veleh hian khum ka siam nghal a, ka room hi chu keiman ka tifai ve mai zel. Thil hnawk neih nuaih ngaitheilo ka ni bawk a, towel huh pur dah tawm tawp te hi ka hmu thei lo. Ka nau Parteii hi ka û aiin a che fel zawk bawk. 

Dar 3 velah bawk ka inbual a, VCP in chu ka hriat theih mai ka inring. Kima te sawi hmangah Pu Duha hi a term hnih chelhna a ni awm a, thudik a nih chuan pa ṭha leh VCP nih tlin tak a ni ngei ang. Ka insiam zawhah muangmarin ka chhuk leh ta hnak hnak a, ṭhenawm hnaivai tak ka nei lo kha a tirah ka lawm ve rawk a, khualkhuaah chuan a lo nuam em em miah lo. Pi Mawii te inah pen ka tum zet a, mahse, inhnial bawrh bawrh thawm ka hriat avangin a hun ber lovin ka hria a, ka kalsan leh ta mai. Pu Duha te in chu an sak thar hlim a ni bawk a, a mawiin a nuam khawp mai. Anni chhungkua hi pariat an ni a, anni nupa bakah An fa upa ber te nupa leh an fapa,chuan a naute pathum an ni. An upa ber dawttu mipa nen chuan kan inrual viau maithei. Sawmtea a ni a, kawm pawh kan inkawm thei ta phian. Chumi nau hmeichhe pahnihte pawh an la nula ve ve a, zirna an chawlhsan vek tawh thung. An in bul lawkah dawr lian ve tak an nei a, chu chu an eizawnna ber a nih hmel, Sawmtea chuan an sumo a khalh bawk. An fanu naupangber chu Maengi a ni a, a û erawh Lawmi a ni thung. Lawmi pawh a felin mi biangbiak a thiam viau mai. Kan han inkawm nak nak a, nu ber chu Pu Duha aiin a upat hmel..hna a thawk nasa ve a ni maithei a ni. Ani pawh a fel khawp mai. Ka chungah tupawh an ṭha a, ka lawm, ka phu lo khawp mai. 

Khaw thim hmain zanriah kan ei a. Vawksa rêp chhum bakah anthur tuilum , Behlawi hnah bai leh alu fry kan hmeh a. Ka eitui leh hle,. Chaw eia sawm ka harsat ang aiin ei vek vekah chuan puar lova ei ka duh ṭhak bik lo. Zah vanga rilṭam ka duh bik lo. Kan eikham a, Sawmtea chuan, "Nula rim ang aw. I intihmikhual rei lutuk chuan hrehawm i ti rei mai mai ang. Kan khua chu mi ti huam chi kan ni si lo va, kan leng dawn nia" a ti sur sur a. Mahnia ka in reh deuha awm leh tlawng ai chuan tiin ka lo hnial bik lo. Mahse, Kan len chhuah hmaa Mami biak erawh ka duh. Min kap tlat a ni. Dar 7 a la ri lo deuh ang tihin ka call ta a. Ka chhuak bawk. A ring ral ṭhak ṭhak ta mai. Chuti'n ka la thinrim duh lo. Chaw an ei buai lai a niang a, a hre lo a niang ka la ti fan a. Sawmtea nen chuan nula rim tur chuan kan chhuak ta a. "Ka bialnu rim phawt ang aw, a cousin lo zin lai a nia, ani pawh a chhe vak lo" tiin a nui vur vur a. 

"I tih dan dan a ni mai" ka ti thluam. Kâwn lo lamah kan peng ta daih a, a bialnu te chu Biak in thlang lawkah an lo awm. Thil ka hrechhuak, ka pa khan ka kal dawn khan Kohhran kha a ngaipawimawh khawp mai a, inlawmluhtir ngei ngei turin min chah nasa. Mahse, tun sundayah erawh ka thei dawn lo a nih hmel. Ni e, Kohhran hi han bêl ve chawm phawt ila, hmelhriat pawh ngah a awl bik.

A bialnu te in chu a hlui ve lek lek tawh a. Len erawh a lian fû. Kan va luh chuan min lo be nghal siam siam a, A bialnu chu Marovi a ni. Naupang pahnih an lo awm ve bawk a, Marovi cousin a tih kha a hnu lawkah room atangin a rawn chhuak a. Cher lam, pian nalh deuh mai a ni reuh a, ka nau nen an inrual khat vel maithei. A sam a tawi a, hmelṭha lutuk tia sawi theih ni chiah lo mah se; a hmelchhe miah lo. Bakah a che vel reng reng chu a zei thlarh mai. Veronica a ni a, mahse, Vero tiin an ko mai a, a remchâng phian mai. Marovi pawh a chhe hran lo, a thau lek lek em aw tihtur a ni a. A nelawm leh a hmela nui hmel châm reng avang chuan ka ngaina nghal viau. Bakah mikhual kan nih vanga min han zah ṭût ṭûtna ang kha a awm lem lo va, a nuam. Naupang awm vete chu Marovi nau fate an nia, Marovi hi an unau zingah a upa ber a, a nau mipa te chhungkua bakah an te ber mipa Aizawla zirna vanga awmte leh a nu leh pa an ni deuh mai. Veroi chu Marovi nuteii fanu niin Aizawl Saron vengah an lo awm ve reng a lo nia. He lamah hian Marovi nu damṭhat theih loh vangin a zuk zin ve a niawm e. A awmna erawh a rei tawh thung. Kan palitê chuan kan inkawm ve ta lêt lêt a, a nuamin a hlimawm viau mai. Mami pawh ka lo hrechang lehpek tawh lo. Marovi thingpui lum hlan chuan Veroi chuan, "Nunpuia chu inleng nula i nei leh nual tawh lo maw? Patân ram tih takah he laia hnathawka awm chu an chhuah mang mang lo a nia aw" a ti bawrh bawrh a. 

"A tân te pawh kan la tâng ang chu" ka ti ve ringawt. Sawmtea chuan, "Mawina, khilamah a hûng ṭha viauin ka ring. " A lo ti zauh a. Mami ka hrechhuak chawpchilh nghal. Call leh a hun viau tawhin ka hria, mahse, a rem ṭeuh si lo. Thingpui kan in a, Marovi chuan, "Nunpui, naktuk chu inkhawm ve rawh aw.." a ti a. 

"Nia, khawm ve ang chu..in khua hi Kohhran a tam ve riau mai. A lian ve bawk a" ka ti a. An khuaah hian Presbyterian, Baptist, UPC, Salvation, IKK leh Roman Catholic an awm a ni. Mahse, Kima te sawi hmangah Kohhran pawl tam mah se, khaw inlungrual tak an ni awm a, a ṭha hle. Khaw ṭhenkhatah hi chuan Kohhran pawl ram avanga khawtlang inlungrual lohna hi a awm ve ṭhin tlat a tin ni. 

"Vero, engtik nge hawn i tum deuh?" Sawmtea chuan a ti a. Veroi leh Marovi an inmelh zawk. 

"Aa..ka la haw lawk lovang, Christmas pawh ka hmang maithei" a ti zawi sap a. A mitmengah chuan eng emawni a lo lang zawk. "Nia, cham ve reng tawh. Nu Thari pawh i rawn awm hnu chu a zia sawt sawt hi" Sawmtea chuan a ti a. 

"Marovi nen hian innei tawh teh u, mo ṭhianah ka ṭang chak tawh" Veroi chuan a lo ti daih. Kan nui ho dar dar a, "I pa Kunga hi alawm,. A nghochhuaka nulattir a tum mawni" Sawmtea chuan a ti hluk a. Marovi pa a sawina a ni tih ka hrethiam ve mai. 

Dar 10 rik hma deuhin kan hawng ta a. Sawmtea nen kan kal hran rual rualin Mami ka call nghal. A ring ral leh ṭêp tawh tihin a rawn la ve ta hram a, "Ti nge miscall i hmu awm sia, i rawn call back loh a?" Ka ti a. Ka awki pawh a nelawm chiah loh. 

"Nia, kan buai ve tawp a, hei haw pawh kan la haw lo. " A la ti zui!

"In riak dawn mi?" Ka ti leh ngat a.

"Riak lovang. An rui a, ṭhenkhat hi" zawi deuh hian a ti a. Nidanga Mami a ang lo tawp a ni mai. Ka sawifiah thiam lo va, ka thinlung hian a hrethiam tlat si a ni. 

"Haw tawh rawh" ka'n ti ngawt a. 

"Mahni chuan ka ngam lo alawm" a tih lai takin, "Tu nge i biak a? Ninawm..dah teh, light kha off nghal la" vawiina mipa aw ngei mai khan a rawn ti hluk hluk..ka ṭêk ve chhawk thei nia! Mami chu a ngawi dat a, insûm buai ṭul tawh lova ka hriat avangin, "A mak hle mai. Aw le, a ṭha vek e. Hlim ang che u. Mangṭha" ka ti a. Ka hmet hlum nghal. Min rawn call zui lo bawk. Ka thiltawn tehthut chu a mak ka ti ve thlawt. Mami ber kherin min bum chu! A mizia nen a inmil lo ve bawk êm a ni. A tirah chuan ka thinrim leh tlawm ka intihna avangin ka rilru pawh a na em em lo. Mut pawh ka la muhil thei. Mahse, a tuk zing ka harh aṭangin min vilh ta ngut ngut mai..