Nuthlawi 1

NUTHLAWI..(1)

Ziaktu : Toni Râlte

Ka pu, ka pa pa tar ve tawh lam chuan muangchâng hian, "Bawiha, a va lawmawm ve aw. Sit reng reng suh. Khawpuiah te chuan bank-a thawk te hi an hah thei teh mai a nia. Tihian kum hnih khatte i va thawk ve ang a, chumi hnuah te chuan insawn dante pawh kan la ngaihtuah ang chu. Naktuk tlai lam chu saw lamah chhungkuain inthlahna ni pah fâwmin chawhlui kan kil ho dawn nia.." a ti chuar chuar a. Ka ngawi reng. Ka lawm a, ka lawm dan a famkim lutuk lo thung. A chhan pawh khawpuiah ngei ka thawh ve theih ka lo inbeisei vang a ni. Mahse, nu leh pa te thawhchhuah ringawt ring lova chutia mahnia keima khawvel bîk ka han siam ve thei tawh tur erawh ka lawm viau tho mai. Ni e, Thingtlang khaw lian ve tawk takah Bank Manager hna ka hmu ve tlat a ni. Manager hna ka hmuh hma hian bank pahnihah ka thawk ve zuai hman a, mahse, kum 2 liamtaah khan ka ril TB avangin ka chawl ta a. Tihian tunah mahni kea ding turin hna hlu tak chu zawm mai theih turin ka hmu ve leh hlauh a ni. Ka thawhna tur Chhawrpial khua hi vawi khat chu ka zin ve tawh ti ila zan riak pawh a ni lo va. Thingtlang khaw lian tak, in 500 bawr vel an ni maithei..Mizoram hmar lama awm a ni a, Aizawl aṭangin ni khat kal vel a niawm e. Kum 5 liamtaah khan Bank hi an lo hawng tawh a, a changtlung viau nghe nghe. 

A hmasain ka hming chu Nunhlupuia a ni a, Nunpui emaw Hlupui ti hian min ko tlangpui. Aizawl Kanan vengah kan khawsa ve a, Ka nu hi ka nu leh paten min la dampui bakah ka pu, ka pa pa hi a la dam ve bawk. Ka pa hi kan veng Kanan Middle School-ah peon a ni a, ka nu erawh chuan thingpui dawr chhetê a siam ve a. Chu chu kan chhungkaw eizawnna a ni ve mai. Kan unau hi pathum lek kan ni a, kei hi a milai leh mipa awmchhun ka ni. Ka û hian Lungleiah pasal a nei tawh a, ka nau Parteii erawh chuan vanduaithlak takin sâwn a pawm ve hlauh mai a, a fapa Jojo pawh kum 4 a tling ve dawn tawh. Kei hian kuminah kum 34 ka tling ve chiah bawk. Parteii hian a thlawi tak hnu hian online shopping lam ti vein an nufa eikhawp na na na chu a thawkchhuak ve khawp mai. Ka pa nau ka patea ten in pui luahin kan in ṭhenawm hnai angreng a. Ka pate unau hi panga niin, an upa ber erawh a boral tawh a. Ka pa hi an milai ve tho a ni. Ka patea nen chiah mipa an awm bawk, ka nî te pawh Aizawl veng dangah an awm hlawm a. Chhungkaw pangngai tak, hausa lua lo mah se; a vantlang tawk an ni vek mai. Keini hi kan naupanlai khan kan berh deuh ber zawk a, a puih pawh min pui nasa hlawm. Ka pu hi chhungkaw huikhawm thiam tak a ni bawk a, kan inpawh hlawm viau. Kei hi MA (Economics) ka zawh hnu lawkah Bank-ah ka inhlawh chho ve a, mahse, hlawh a tam fahran lo. Ka college kal chhung khan taksa lamah harsatna ka tawk nasa a, tlangval vea pumpa ka hriselna a hniam angreng hle, damdawi inah pawh vawi 3 lai ka lut tawh a ni. Mahse, lehkhazir lam hi ka lo timi ve phian nge ni MA ka zo ve thei ta hram a. Ka û kha pharmacist a ni a, Parteii erawh College a kal laia rai kha a ni bawk a, zirna lam chu a hawi leh ta lo. Ka pa hlawhte a lo ṭhahnem ve tawh bawk a, tunah chuan kan mamawh tawk chu kan nei ve thei ta deuh. Mipa sa pan lam ka ni ṭhin a, Ka ril TB khan damdawi ka ei ṭhain ka dampui ta hmak bawk kha a nia, kha kha ka ngeih viau a niang, ka sa pawh a rawn ṭha chho ve ta deuh a. Ka nu hi vun rawngah chhunin ka hâng lutuk lo. Mizo mipa vantlang chen vel chu ka ni ve a, mipa hmelṭha tia sawi theih tur chi niin ka inhre lo. Mahse, mizia avangte pawh hian kan lo lang hmelṭha ve thei te pawh a niang e, ṭhiante hian fiamthu titak deuh hian, "Nunpuia zawng a tawlh hrut hrut a, chhe lo zet a thing leh nawlh zel" an ti ve fô. Bialnu hmelchhe tak ka nei ngai lo mai ni lovin ka bialnu te hi hmeichhe dang zingah pawh a langsar chin an ni ve châwk. Ka zei pawh ka hre si lo. Ka ṭawng tam loh vang te, ka caring vangte hi a niang te ka ti mai zel. Mahse, ngaihzawng nei ve zul mah ila han kawp vel kha ka ti ngai lo. Tin, ka tluang em em bik lo va, luahlan ka nih loh leh ka ex emaw an ex te emaw vang hian kan chhe tlangpui zel. Ka vannei a, kan inṭhen pawn han vei zuina leh han natpui vawng vawng ka la nei lo hlauh. Ka la lâp te pawh a niang e. Nupui neih lam erawh ka la ngaihtuah ngai miah lo, kum 37 vel tal nih phawt ka duh a ni. Ka nu hi Serkawn, Lunglei lam daih an nia, ka nu nuteii, Aizawla awmte inah awmin college a rawn kal ve a niawm e. Ka pa nen intawngin tihian nupaah an insiam zui ta kha a nia. Ka nute hi an hûng viau mai. Unau 8 zet an ni a, an la dam kim vek bawk. Ka nu hi upat dan indawt aṭangin a palina a ni. Nuteii ringawt pawh 3 lai ka nei a,. Pakhat phei chu Aizawlah hian an awm ve nghe nghe. Ka û pawh Serkawna a zinna lamah tuna a pasal hi tawng a ni. Pathian zarah chhungkua kan inngeihin kan inpawh tlâng a, ka nu leh ka pate chhung lam ve ve te nen kan inzawmna a ṭha viau bawk a, enghelh vak tur kan nei hran lo. 

Ṭhiante pawn ka hna hmuh thar chu min rawn lawmpui ve liam liam a. Ṭhian hi ka nei ve duah naa kawm bik erawh pahnih ka nei thung. Zothana leh Samua te an ni a, Zothana hi Luangmual-a khawsa niin Samua erawh Bawngkawn lam daih a ni thung. Chutichung chuan chhuahvah nikhua chuan kan inkawp chawt a, a ngaih pawh kan inngai ṭhin viau. Ruihtheihthil hi zu chu han lem ve zauh chang ka nei a, Meizial ka zu bawk a. A bak ka ti lem lo. Kan Kohhranah langsar vak lo chuan ka inhmang ve a, khawtlângah erawh ka pa hian a ngaipawimawh bawk a, a langsar pawl chu ka ni ve deuh. Ka pa hi YMA Treasurer hlun a ni ṭhin bawk a, a hnung erawh ka zui zo lo viau thung. 

Ka pu rawt angin chawhlui te chu kan kil ho a, Zothana leh Samua te pawh an rawn tel ve. Kan kim thawkhat viau, Patea bakah ka nî te pawn min lawmpui em em a, a khawsak harsa ber kan nih vangte pawh a niang e. Keipawh a tirah tui lo ru deuh mah ila; chutia min han phurpui tak viauah chuan ka phur chawpchilh ve nghal mai. 

Samua lah chuan, "I zu awm mah ang a, a tirah tumah khan an phû lo che ang a, thla li nga velah chuan tumah i phû tawh dawn lo a nia" a ti sur sur reng a. Ka nuih a za viau, thil ni thei tak pawh a niawm e a. Zothana lahin, "Han awm rei deuh la, daivah a châkawm êm mai, chawlh remchanah kan rawn zin ang a, sa pêlin i riak hluai teh ang u" a ti deuh sek bawk. Tlangval tha zat vanglai a ni bawk a, lui kal leh ramhnuai han daidar vel hi nuam kan ti viau zel a, mahse, hun kan neih loh bakah Aizawl lamah chuan han vahchhuahna mai tur hi a vâng ve bawk nen..

Tiang chuan Chhawrpial khuaa hnathawk tur chuan ka inpuahchah chho ṭan a. Bank- lama thawkte awmna tur bank bul lawkah quarter an lo nei hlauh mai a, a tihzia e. Ka nuin min kalpui dawn a ni. Mahnia khawsa tur ka nih avangin thil han remfel eng ilo kha hmeichhe hna deuh a ni sia, min zuk kalpui ve dawn a ni. Kan kal dawn zanah ṭhiante nen ka bialnu Mami kan rim a, Mami nen hian thla 2 êrh âwrh kan inzui ve tawh a. Kei aiin kum 2 in a nau, khal lam, ngo lam deuh, hmai hlai phuk mai leh nelawm zet mai a ni a. Ka ṭhianpa Zothana nau Amy te nen an inkawm ve ṭhin a, chuta ṭanga inhre chho kan ni. Kei ka single lai a nih bakah amah Mami khan min lo star ve deuh ngei a niang, Lal Amy'n min hrilh a, ka bawhzui ta mai a ni. Han inkawp takah chuan kan nghet chawpchilh ve nghal mai bawk a, amah hi tuallim vak lo, Kohhran leh khawtlanga inhmang tak mai a ni a. Min kaihruai ṭha phian mai. Chhungkaw pangngai tak an ni bawk a, lenluh pawh a nuam thei viau. Ka hna hmuh chu min lawmpui thiam em em a, mahse, kan awm hrang tur erawh pawi a ti ve hle. Amah hi mi ti zawk zawk lo tak, a rilru ngei ngei pawh phawrh ṭha ngam lo a ni a, mahse, kan han awm hran dawn meuh chuan, "I lerh ve bawk sia, kan inṭhen vat ka ring" a ti ve ngei. Ka lerh pawh ka hre tawp si lo. "Lo rinawm la, thla khatah vawi khat tal rawn haw ka tum ṭhin ang, nakkum lamah chuan kan innei tawh ang a" ka ti ve mai a. Nupui nei lo rual chu ka ni tawh lo nain la tlangval hi nuam ka la ti! Samua leh Zothana te hian nupui nei ve phawt se ka la nei ve ang chu. Parteii a fel êm a, mipa a ngaihsak bawk si lo , mo kan mamawh em em pawn ka hre lo. Parteii fa neihna hi kan veng ami chu a ni naa, ka farnu hian bum a tawk ti mai ang,. Parteii a rai hnu lawkah nupui a ruksan ta daih mai a. Keini tan va tihbuai chi ni tawh hek lo, sâwn man erawh kan inpe hram a. Jojo a rawn piang a, kum 1 a han nih ve takah kha chuan a pa chhungte lam hian an rawn ngaihven ve zeuh zeuh. A pa erawh chuan a piang ve tih pawh hre lo angin a ngaihsak lo thei. Chutiang na nâ na chu an tel lo va enkawl theih kan tum tlat a, keimah hi paah min nei ti mai ang, a pû tur ka nih laiin min pa ta daih rêng a, pawi ka ti lem lo. 

Zothana leh Samua te chu thingpui hâng in zawhah chhuanlam siamin min chhuahsan a. Chance pek kan ngai ve bawk a ni. Mami chu a ngui viau mai, sawi leh sawi hnu amah han inphawrha a rilrua awm te han sawi bawrh bawrh chi a nih loh avang hian min duh vak lo ni ten ka hre ṭhin. Mahse, zaninah erawh zah pawh a dâwn zo tawh bik lo a ni mahna.."Nunpui, i zuk lerh vaih aw. Rinawm deuhin ka lo awm ang a, min lerhsan si chuan a na viau ang" a ti ve deuh reng mai a. 

"I lungngai a nih kha..ka lerh hran lo a nia, bakah ngaihzawng zu zawng tur ka ni hleinem.." ka ti a. Sawi tawh angin ngaihzawng chu nei ve nual tawh mah ila midang kawp tih vel hi ka ti ngai lo. A cheap ka ti..Mami pawh a rinawm chhung chu phatsan ka tum hran lo. Mahse, neih vat erawh ka rilru a la ni lo. 

"Zothana te lo zin hunah ka lo kal ve ang" a ti a. "Um, lo kal ve ngei ngei rawh" ka ti a. Mami hian zirna a chawlhsan tawh a, College pakhat canteen a nghak ve a, a hlawk phian. A taima ve bawk nen. A chhungte mut tawh hnuah pawh ka la ṭhu reng a, kan inkhal neuh neuh reng mai. Kan inngaihzawn aṭang hian hun thawl leh fianrial kan nei mang mang lo va, vawikhat chu ka fight ve tawh. Mahse, min hnar avangin ka tum nawn leh tawh lo. Kei ka rilru hi a mak nge a mak lo ka hrethiam lo. Ngaihzawng ka neih hian kan chance vawikhat neihnaah ka fight nghal thâwr zel a, chuta ka hlawhtlin chuan a hnuah pawh kan zawngchhang lo thei lo va, min lo hnar hlauh erawh chuan ka tum nawn tawh mang mang lo, eng emaw fê a nih loh chuan. Chutih rualin hmeichhe tam zawkin an rindan mipain hmeichhia a mutpui theih chu a hmusit ṭhin tih vel hi a ni vek lo tih ka chiang. Zêp nâk emaw tlangval ve nafam chu virgin reng ta bik hek lo, han kawih zangthal theih a mual mualte pawh ka nei ve alawm. Mahse, vawiin thlengin tumah sex ka hmanpui avang khan ka hmuhdan leh ngaihdan a danglam phah lo. Kan duhthlanna ve vein kan mudun a ni mai. Anmahni ka dema ka hnualsuat dawn a nih chuan keimah ngei pawh hi ka inngaihnep a ngai dawn tihna a nih chu..

Mami pawh chu ka han fâwp vawng vawng a, a khal roh si, a îtawm ve reng. Mahse, a chhungte mu tawh mah se; anmahni in ngeia mutpui erawh ka duh lo. Zalên leh inpawh taka kan hmandun theih lohnnah chuan ka thla a muang thei lo. 

Dar 11 a ri dawn ta hial mai. Thingpui pawh no 2 lai ka in tawh. Zingah thawh hma a ngai ve bawk si, hawn lam ka hnaih ṭan ta a. Kawngka thleng min lo thlah a, "Ka sawi kha aw..i lerh vaih"a ti lehpek. Min chân chu a hlau ve viau em mawni dawn le..ka kuah a, "Min ring tawp rawh. Ka rinawm ang" ka ti nghet charh a. Ka rilru tak tak ka sawi. Nupui pawh nei dawn ila Mami hi chu a iaiawm loh pawl a ni. A nungchang a ṭha a, a hmel lah a zahpuiawm loh bawk..a neihte pawh kan la innei ve ang chu maw. Ka hawnsan ta a. 

Hmabak huphurh leh nghakhlel ru deuhin ka muhil ta bawrh bawrh a. Ka nuin min lo kaitho a, mut ka kham lo kher mai. Ka mit nuai chawt chawt chungin ka tho a. Jojo hian thawh a hre khawp a, a rawn rak leh chul tawh. Ka'n inphih fai sawk sawk a, mipa hi zawg kan insiam rei ngai lo bawk a, ka nu aiin ka inpeih hma leh zawk. Tichuan, kawmchhakte taxi-in sumo counter lam chu kan pan ta vang vang a. Kum 4 liamtaah khan Bolero kan lei ve a, keimah hian bike ka kawl ve bawk. Mahse, chungte chu ken ngaihna a la awm rih lo. He lamah a ṭangkai zawk dawn, Ka pa hi a naupang vak tawh lo naa lirthei hi a tuai ve thei mai zel a, ka awm erawh hi chuan ka nu hian ka pa khawih a remti ngai meuh lo. Chetsual a hlauhawm ve bawk a. Sumo pawh a lo ding ran tawh a. A hmasa ber seat-ah ka nu nen kan ṭhu dun a. Dar 6 leh a chanve velah kan chhuak thei hram. Seat a full vek a, mipa paruk leh hmeichhe pali kan chuang. A laia ṭhu patling nelawm vak loh chuan, "Bank Manager tur chu em ni i nih?" A ti a. Ṭha takin ka chhang. "Kan inṭhenawm dawn a nih chu.." tiin a hmingte a sawi ve a, Pu Ramzauva a ni. Quarter bul lawkah an lo awm a lo nia. A tihzia viau e. Driver chu kuhva heh zet mai, ṭawng duh zet a ni a. Valpui tiin an ko.."I rawn awm ang a, kan khaw chhuahsan chu i la hreh ve viau maithei a ni. A nuam a nia aw,. I hma chiaha rawn thawk pawh khan chhuah a hreh alawm,." A ti sur sur a. Pu Zauva bula ṭhu tarmit vuah nutling tawh chuan, "Aaa..Chhuana te kha chu nuam han ti lo chi a ni hleinem,. Englai pawn a nam reng a nia. Pawnlamah biak nuam ropui si, bank-ah biak hrehawm leh em em bawk si kha a nia, a awm tawh lo tur hi lawm fe fe kan tam a nia" a rawn ti ve bawrh bawrh a. Driver bulah zawitê hian, "Zu a tam mi?" Ka ti a. 

"Tam han tihtur chu a ni lo naa, in tur chu a awm ve reng" a ti mai a. Ka mikhualna ramah chuan ka zia pawh ka thup ve rih a ngai dawnin a lang. Kan tlan rei deuh a, kan muthlu ta bawrh bawrh hlawm a. Chhawrpial kan thlen meuh chuan khua a thim chhulh tawh, Bank-a thawk ,cashier inah kan innghat dawn a, min lo hmuak hlauh bawk. Anni nen hian a hmain kan inbe tawh a, nupa reka khawsa niin an nu hemi khua a ni bawk a, Bank-ah hian co-worker-in a thawk ve bawk a ni. Bank bul lawkah an awm nghe nghe. Kan han innghat fel a, bungrua kha he lama awmsa a awm nual avangin chuti tehluain kan inkeng tam lo. Kan inbual fai tê tê a, ka nu hi ṭawng duh ve tak, mi biangbiak thiam tak a ni bawk a, Thakima te nupa nen pawh chuan an inkawm thei viau mai. Ṭhakima nupui ho Zoteii a ni a, a felin Kima ai mahin ka nêl hma zawk awm e. 

Zanriah pawh dar 8 rik dawnah chauh kan ei thei hram. Ril a ṭâm tawh bawk a, ka ei ṭeuh mai. An in a lian lem lo va, chhuatah ka mut a ngai ang, ka nu erawh Zoteii nau, an khaw ṭhenawm ami an awmpui ṭhin, an khuaa zin ve lawk khumah a mu thei dawn thung. Kima chu a kawm tlak viau mai a, ani pawh Aizawl Venghluia awm a ni a, hetah hian bank an hawn tirh aṭanga thawkin tihian nupui te hial a nei ta bawk nen, a khua angah a ngai ta deuh niin a lang. 

Chhawrpial khua chu sawi tawh angin in 500 bawr vel an ni a, Kohhran pawh an awm chikim ve viau mai. YMA pawh branch 4 lai a ding a, Zirnaah pawh Higher Secondary thleng a awm bawk a ni. Thingtlâng kilkhawr tak a ni lo bawk a, Aizawl khawpui chêp tak leh bengchheng tak ai chuan nuam ka tih daih zawk ka ring. Kei hmun fianrial leh reh raih hi ka ngaina bawk nen. Bank-ah hian thawktu pathum an awm mêk a, Kima tih loh chu an khaw mi leh sa te an ni. 

"I han awm rei ang a, nuam i ti chho ve viau ang. He khua hi a nuam dangdai ve riau a nia, ramvah lam te i tui phei chuan ramngaw a la tam teh mai a nia.." Kima chuan a ti sûrh sûrh a. Ṭhakima hi lu kawlh tûl mai, thau lam lek lek, hâng lam a ni a. Nelawm leh nuih heh deuh mai a ni, an nu Zoteii erawh cher ve lam, zawiawi deuh mai a ni a. Mahse, a mizia erawh ngainatawm deuh si a ni. 

"Ramvahte chu nuam ka ti lutuk alawm, air gun pawh ka rawn ken saw..lui kalna te hi a hla em?" Ka ti ve vat a. 

"Hla nang, he khaw nawmna chu lui paliin a hual a, mahse, humhalh lai an nei thung. An chengkawl te hi a tui teh mai a ni" a ti leh mawlh mawlh a. Kan thlen aṭangin rel lû ang maiin a la khu deuh vut vut reng a, zial a heh ve hle ni tur a ni. 

Zoteii chuan, "Ngawi tak rawh, Nunpui, i nupui tur ṭha tâwk ka hualsak che a nia aw. Kan khaw nula te hi an hmelṭha teh mai a nia" a lo ti ve sar sar a. Ka nui ringawt. Ka nu chu a zin chau ve deuh nge ni a mu ta vat a, naktuk aṭangin ka in tharah insuanluha insingsak te a ngai dawn sia, keipawh mut hma a ṭha viau. Mut erawh a chhuak tehchiam lo. Zoteii mut hnu lawkah Ṭhakima ta pek chuan asenchi um rawn phawrhin a chanve aia sang vel hi a la awm a. Khi vur vur chungin, "Mut dawna han lem zauh hi ka ching ṭhang a, i duh ve em?" A ti a. An hotupa tur mah ni ila, inlak hotu viau te hi ka mizia a ni lo bawk a. 

Ka nu a la awm avangin leh thlen phata han dawmpui nghal chu fel lo deuha ka hriat avangin, "Ka ti lo mai ang,. " Tiin ka hnar ta hrâm a. Ka chau ve nen, no khat vel lek han in chu ka châk ve reng mai. Kima chu ka mutsan ta a. Ka mutui viau mai, Mami ka mumangah ka lo hmu lehnghal a, zinga ka ṭhanharh chuan lung a leng ve veng veng thei nia. Tukṭhuan ei khamah ka quarter lamah kan inthiar phei ṭan ta a, Zoteii nau pickup kan hmansak a, vawikhatah kan inthiar zo nghal mai. Quarter chu ka duhdan ang takin a fal reih a, ṭhenawm hnai ber pawh Primary School a ni mai. Kawt zawl lah a zau reuh si, in erawh a lian hran lo hle. A ban concrete niin a bang erawh tile a ni thung a. Choka leh inleng kawmna pindan a inzawm titih a, mutna pindan erawh lian vak lo pahnih a awm ve. Nupa reka khawsakna âwm vel a ni. In hnung lam chu a ram neitu ten huan an siam a, thei chi hrang hrang an ding fur mai. Tui harsatna khua a ni lo hlauh a, An khawtlang hruaitu ten an lei sintex 2000 lts lai a inhung a. Keimah ringawt chuan ka ring rei viau ang. Tin, a awmna lai hi a han pawng hlek bawk a, khaw thlir pawh a nuam viau mai. Chu chu ka chhungte tel lova ka khawsakna hmun tur a ni ta. Zoteii te nupa bakah Zoteii te monu phawk zet mai Teteii ten min rawn pui a, ka nu a awm bawk nen, an remfel zung zung mai a, chawhma chhung lekin ka bungraw neih ve ho chu an rem fel thawkhat titih. Ka nu rawtna angin Kima'n vawksa a zuk lei a, tlai lamah min puitu te nen ka in tharah chuan chawhlui kan kil ve dawn a ni. A hlimawm ṭan e. 

Hmeichhehoin rawng an bâwl a, Kima leh Teteii pasal Siampuia te nen keini kawt zawl daihlimah kan lo inkawm thung a. "Zu a tam viau a ni maw?" Ka tih chuan, Siama chuan, "Langsar takin an zuar ngam lo a ni mai a, in tur chu a awm ve reng mai" Driver sawi ang khan a ti ve mai a. Kei hi nu leh pate hmuh lohah ka khawsa dawn chu a ni sia, ka insûm thei lo mai ang tih ka hlau ru angreng. Bank Manager meuh te chu eng emaw ti deuha min hmuh an tum ve kha a niawm sia, ka inteitêt vaih chuan a chi loh viau ang. Ṭhakima chuan, "Siama, nizan Rinawma te sih châng kha eng nge an ân tak?" A ti a. 

Siama chuan, " An kap lo. A mak ve ngawt mai, Khulai sih khu..châng an awm hian a rawn chhuak ngai miah lo" a lo ti nghut a. 

"Sa vel hi a la tam viau em ni? Ramsa hi kei ka ngaisang a, lei tur te in hriat chuan ka duh a nia. Ka pa thawnah" ka lo ti ve vat a. 

Siama bawk chuan, "Pu Thanga'n a nei leh maithei, ka lo zawt dawn nia, ani hi upa deuh tawh mah se; a kut hi a hmui ve riau" a lo ti a. Ka pa hian a ngaisang ve bawk a, ka thawn theih chuan a lawm dawn êm mai. 

Kima chuan, "Zanin chu tu nge kan han rimpui ang che aw" a ti vawng vawng a. 

" a..nula rim rim a ngai lo, tian inkawm ila a nuam zawk" ka lo ti vat. Rilruah Mami a awm ve reng bawk nen, nula han rim kual vel kha ka thlahlel tehchiam lo a ni. Zanriah an peih ta bawk a, muangmarin kan ei ta a, kan inpawh tlang tawh bawk a, kan hlim dar dar khawp mai. Teteii chu sawi tawh ang khan a phawk sia. Kan nui hawk hawk reng mai. Siama chu tu emawni hian a rawn call reng a, chungte chu "In nu Parpaliani a ni leh lo maw? A ngai leh tawh che a niang" a ti zuah zuah a, Siama lah chuan a phone chu enin, "I va sawi dik reuh e. A rawn haw a niang" tiin a phone chu a pickup nghal a. "Pa par, i lo haw mi!" A ti zui zat. 

An inbiak zawh hnuah, "A va tih chi tak, kar tawpah zan khat riakin luiah i zu kal teh ang u, ka lenkhâng chah a rawn hawn bakah bleaching a rawn hawn bawk a. Nunpui, lo kal ve rawh aw" a ti nghal mawlh mawlh. 

Kima pawh chuan, "A nuam khawp ang, sangha tui hun lai tak a ni lehnghal" a lo ti bawk. Ka nu hi naktukah a haw leh mai dawn a, mahnia awm reng ai chuan luiah chuan zuk kal ve daih ka duh. Min han châmpui duh viau mah se; Aizawl lamah nu ber tel lo chuan rei an khawsa thei si lo va, kei pawn chelh ka tum lem lo. 

"Par paliani chu tu nge a?" Ka lo ti hû a. A mak êm alawm,. Kima chuan nui huah huah chungin, "I hmu ang a i hre mai ang. A palian teh mai a nia, kum 4 liamta khan pasal a sûn a, fanu pakhat an nei ve hman a, mi zau leh ṭhenrual huikhawm thiam lutuk mai a nia.." a lo ti a. 

Teteii chuan, "Eee..Nunpuia hi Luciferi tihpui r'u.." tiin a lo nui vak vak a, ka lo melh hû ringawt. An hmelhriat ho hming a mak thei ngei mai. 

Siama chuan, "Chi nang, a hlau palh ang" a lo ti nghut. 

"In hre maksak thei ee..tak taka nula lam kha chu ngaihven vak suh u, khi lamah ka hung ve tho alawm" nui chungin ka ti a. Hetia sawi tlang bawrh mai hi a fuh mai. 

A tukah chuan ka nu chu ka va thlah a, sarêp lah kha an lo nei tawh si lo, a awm veleh thawn tura intiamin kan inthlah a. A kal hmain min zilh malh malh mai. "Tlangval ṭhalai i ni a, hetah khualkhuaah i awm tawh dawn chu a nia. An beisei sang dawn che tih hria la, kohhran leh khawtlangah i theihtawpin inhmang ve la, tupawh kawm theih tum la, khawi hmunah pawh Pathian mi chu an tlangtla zel a nia..kan lo ṭawngṭaipui reng ang che" tiin. Nu leh pa min zilhhautu tur kan la neite hi van malsawmna a ni tih loh rual a ni lo ve. 

Tunkar chhung chu chawlh a la ni tho bawk a, ka âwlthawng angreng viau. Ṭhakima te inah ka peng kawi a, Zoteii1'n, "Chaw ei ve la, mahnia ei chu ei tui a har êm mai" a lo ti var. 

"Nimin tlaia kan ei ban kha a la awm nual,.ei lo phawt ang" ka ti a. Chaw eia sawm hi ka harsat ve hrim hrim. Mahse, insiamrem te pawh a ngai chho dawn a ni. Kima vawk chaw pe zo chuan, "Tunkar in chawl tho sia, vawiin chu kaikuang i zuk kâp ang hmiang" a ti a. Ka rilrem zawng tak a ni. "A pawi hleinem" ka lo ti hmiah. Tukṭhuan ei khama kal tur chuan ka in lam ka pansan ta a. Ka in thlen hma pêngah PHC panna kawng a awm a, motor a lut chho thei vek a ni. Sawi tawh angin Primary School pêng a awm bawk a, an khaw kâwn lûn lai tak erawh zuk pan ve deuh hlek a ngai. In pali nga vel bak ka in kawngah a awm a, min melh hrek hrek duh chauh. An in leh lo a ṭhat lutuk loh danah khawsak harsa ve tê tê an nih a rinawm. Chuvanga min pawh ngam lo an nihte pawh a rinawm e. Ka in ka thleng a, chawhmeh ka tilum a, chaw pawh a ṭhing ka chhuanglum hmiah. Eirawngbawl hi zep loh chuan kan inah ka ti ngai lo va, ka nu leh ka farnute hian min phût lo ve bawk nen, a huphurhawm ru viau mai. Artui kan leh dal ka hmeh tlut tlut te pawh a ngaih hmel. Tukṭhuan ka ei khamah ka insiam nghal a. Mami nen kan inbe pah bawk, "Naktukah Lungleiah kan zin dawn, ka nî fapa te inneihnaah.." a rawn tih chuan, "Va lerh lo la" ka ti zauh a. 

"Nangmah kha i ngaihtuahawm fê zawk" a ti hlak. Boruak a ṭha a, rilru a engthawl a, a zia viau zel e. Kima te in lam panin ka chhuk leh ta hnak hnak a, damdawi in pêngah chuan car pakhat a lo ding a, driver niawm tak chuan car hnuai te chu a lo bih dûk dûk mai. Hawihhawm chhuahin, "Kha..in chhia elo?" Ka ti a. A rawn hawi rang kher mai, "Nia mawle..hei nau nei tur ka phur bawk sia, a eng lai nge chhia ka hre si lo, a rawn thi teh ngawt a" a ti nuah nuah a. Motor hnung seatah chuan mi pahnih an ṭhu, raipuar ṭeuh tawh chu a rawn rum nghat nghat a, "A va zia lo ve aw. Engtin nge awm in tum? A la hla em?" Ka ti a. Car aṭang chuan nutling hmel felfai tak hi a rawn chhuak a, "Ee..kan bank Manager thar kha i ni maw? Hei a zia lo tak tak a ni. Jeneti lah chuan a vei titih tawh sia" a ti luam a. Ka va dak ve zuai chu a pum lo dawmin a thlan a lo tla hliam a, ṭah êm chu a hreh nge ni a mittui erawh a rawn luang zung zung a, a na thawkhat viau a nih hmel. Driver chuan phone a hmang a, a hman zawhah "Tea te an rawn chho dawn e. Khaw nge i kal dawn a?" Tiin min rawn en a, ka lo sawi ve vat. Midang rawn kal hma chuan kalsan a rem chiah si lo, ka lo awmpui ve ta ngawt a. Hmingte inhrilhin an fel khawp mai. Driver chu Chhuana a ni a, nu chu Pi Mawii a ni thung. Raipuar chu Pi Mawii fanu a ni a, Jeneti a ni bawk. 20 mins vel zet kan ṭhut hnuah Tea a tihte chu an lo thleng ta a. An han en vel a, keipawh Kima'n min nghah tawh dawn avangin ka chhuksan ta a. 

Ka zu thlen chuan ani pawh a lo insiam mêk a, Siama a rawn tel ve thei dawn bawk. Kaikuang chaw chah atan broiler chaw leh favai kan hmang dawn a, ka la kap ve ngai miah lo naa, ka tih ve theih mai ka ring. Chaw ka lo fun si lo va, Kima'n min fun kep ta ngawt. Tichuan, muangmarin an khaw lui pakhat Rairuang lui an tih lam chu kan pan ta a. 

An khaw thleng hi a nuam viau, khaw dung pawh a sei ve viau tho nain an peng darh tam zawk a. Restaurant bakah thawmhnaw dawr te, sa zawrhna dawr te pawh a awm ve vek a ni. Siama te pawn, "Kan khua hi a tirah chuan in 150 an tling âwrh a niawm e, mahse, an inthlah pung chak a, birth control an uar ve vak lo. Tin, khawtlang kan inlungrual em em a, kan VC te pawh an ṭang ṭhin bawk a, tihian kan khaw ṭhenawm te aia sangah kan invawrh thei ta chu a nih hi" an ti rêng a. A dik khawp ang. 

Kima'n, "Kan VCP pawh khan chaw eia sawm che a tum tak kha.." a ti zauh a. 

"A zahthlak e a" ka ti sup ringawt. Ka mikhualna ramah hian khawtual mi ang thawthângin min ngai ve nghal hmiah se, min melh bik lo se ka duh daih zawk. 

Lui chu a hla angreng naa kawng a nuam viau. Kan thlen thlak chuan chawl khawmuang lovin lui mawng lam kan zawh nghal a. Khawpui leh Thingtlang chu lui kalah kan inthlau deuh, an perkai zung zung mai a, kei erawh ka lo fit tawk lo a niang, ka inchhuih leh khut khut ṭhin. A chaw chah chu an dah nghal zel a, kaikuang hi chu lui saah chuan ka duh ber pawl a ni ve a, han kang ro ṭhap ila sehhmehah te hian a tui riau. Hehee..a man vel hi a nuam ve hrim hrim bawk. Tichuan, kan thleng hla tawk tawh ang tihin meizuk pahin kan ṭhu khawmuang ve a, Siama pek chuan, "Khu lai lawkah khuan lengkir a awm a, kan khaw naupang pathum lai an tlahlum tawh asin. Zanah phei chuan zu thleng ngam an awm ngai meuh lo" a ti a. 

"An hrang tihna mi?" Ka lo ti vat. 

"Thawm an nei ve ṭhin a niawm e. Kei tak chuan ka la hre ve lo" a ti mai a. Khawvelah hian eng nge i hlauh ber? Tiin min zawt ta se; kei chuan Uite pangngang ka tih ka ring. Ka hlau satliah lo, mi râp ngawih ngawih. A bak thildang ramhuai emaw thlahrâng emaw hi chu ka hlau hran lo. Tawnhriat ka la nei lo bawk a, mitthi te pawh hi ka khawih nawk nawk chang a tam mai. Han râp zuina ka nei ngai lo. 

Kan hahdam ta tihin lui hnâr lam chu kan zawh leh ta a. Kaikuang pawh an kap chho ṭan. Keiin thei ka lo keng a, kar lovah thei a khat ta mai. Ka ak ṭha ta hmak a,. Chawhnu dar 2 velah kan chawfun kan dahna hmun kan thleng chho a, thei li lai kaikuang kan man tawh. Ka rin aiin a tam. An sawi angin kaikuang aiin sangha an ngaihven zawk tlat a, chuvang a ni maithei. Chawfâk a hun ta bawk a, kaikuang leh buar bakah chakawk te kan chhum pawlh a, tui ti zetin chaw kan fâk ta a ni. Ei khawp ṭheuh kan man bawk a, hawn lam kan hnaih ta a.

Zoteii'n rawng min lo bawl kep vek bawk nen, ka hnial ta bik lo va. Ka han inbual fai tê tê a, ka chhuk leh lamah Pi Mawii leh tleirawl hi damdawi in kawng atang khan an rawn chhuk ve leh chiah a. Kan lo inhre tawh bawk a, kan chhuk rual ta a. Jeneti pawh chuan ṭha takin nau a lo hring a, mipa a ni nghe nghe, ka pensan dawn chuan Pi Mawii chuan kawngpui aṭanga va penhleh hlek assam type in lian lo tak chu kawkin, "Saw saw kan in a nia, lo la leng ve rawh aw. Mamawh i neih phawt chuan sawi hreh suh, kan neih zawngte a nih phei chuan " a ti luam a. "Tehreng mai, naute pawh ka la rawn en ve dawn nia" ka ti ve a. Hmelhriat siamna zel a ni a, a zia khawp mai. 

Kima te ina ka luh chuan nu lian angreng tak, ngo vung mai. Sam buang lam lek lek, hmel chhe lo tak hi a lo ṭhu ve kûk a. Min hmuh chuan, "Ee

.hei hi maw kan manager thar chu.." a lo ti nghal vat a. Ka rindanin kum 38-42 inkar bâwr vel a nih ka ring. Kima chuan, "Ni e, Nunpuia a nih kha..Nunpui, hei hi Pari chu, Paliani" a ti zauh a. Ka nui vur vur. 

"Kim lukawlh, tiang khan mi ko teivet suh. Nunpui, nupui i nei tawh em?" Tiin Parpaliani chuan mi rawn melh zauh a, nui ruh ruh chungin, "La nei bik nang, min zawnpui ang chu" ka lo ti ve a. Mak tak maiin Pari chu ka ngaina nghal hmak. Ka hmuh vawikhatna aṭangin hmeichhe nu zîm zem a ni lo tih ka hrethiam nghal bawk. Zoteii chuan, "K'u Par, chaw ei ve nghal rawh aw. Ka chhum kep che" a lo ti ve a. 

"Leh ringawt zel a, eng nge in hmeh dawn?" A ti zui hluk a. Zoteii chuan a sawi dan dan a, "Hmm, Kan mikhual thar lawm nan ei ve leh tawp ang. Nuteii chu a û Hruaii nen ei mai rawh se" a ti liam puat a. Mipa ang chiaha ngaihsam a nih ve hmel, tiangho hi kawm an nuam daih zawk. Reivak loah chaw ei chu an siam a, Kima chuan an roomah a va lem zuk tih ka hrereng, la insûm ka tum ve hram hram. 

Kan chaw ei lai chuan Pari chu a titi tui nasa mai a, "Nimin tlai chu Luciferi te nen kan rawn chuang ho va, Pu Zaliana te nau sawn a fiam ve ngawt mai a. A ṭêk teh e..kan Luciferi saw zawng a kawlh dan saw a pingling ngawt mai" a ti mawlh mawlh a. Luciferi an tih teh fo hi tu tak ni ang maw? Pari te ang type tho hi a nih ka ring. 

Kima'n, "Ani saw Lucifer ti hian kan hre ṭhûm a, a hming pangngai hi eng nge mawni le?" A ti a. 

Zoteii chuan, "Lalbiakdiki a niin ka hria, mahse, Lucy tih hi a larpui zawk a, a thlawi hnu hian a kawlh luatah Lucifer an ti ta niin ka hria" a lo ti var a. Nuthlawi pawh chu an va tam awm ve mawle. Kei hi zêp nâk emaw vawikhat pian ve mana nuthlawi ngaihzawn chu tia inla eng emaw ve chi ka ni pek a! Nuthlawi ṭhian erawh ka ngah phian..mahse, nuthlawi ngaihzawng ka la nei lo, ka hmuhsit leh ngaihnep vang pawh a ni lo. Fa nei tawh phei chu chhungkuaah buaina a tam duh niin ka hria a, ka farnu ngei pawh nuthlawi a ni. Sâwn a pai tih kha ka nuten an lo hre hmasa tawh a, ka thinrim an hlauh vangin min lo hrilh ngam lo a lo nia! Thla 3 hnuah ka hre ve chauh, ka lo chîk em em lo bawk nen. Ka thinrim a, ka rilru a na bawk. Mahse, a nih tur ang a nih vek tawh avangin ka hau na vak lo. Kut phei chu ka thlak lo. Nuthlawi thenkhat zahawm tak, mahni inhai kaw mi tak an awm a, nuthlawi ṭhenkhat zuam sual har tak, sihhnip em em an awm bawk. Nula zingah pawh an awm tho,. Mahse, nula chu nula an nihna hian a la chhan ve deuh a. Chutiang vel chu ka rilru puthmang a nih avangin nuthlawi chu ka ṭhian atan ka duhtawk mai ṭhin. Kawm erawh an nuam thlawt, hei tuna ka ṭhian thar Parpaliani pawh hi ka kawm nasat tur a ni tih ka chiang khawp mai. 

Chaw eikham zial kan zuk laiin kawngka chu a rawn kik dat dat a, Kima'n, "Lo lut rawh" a ti lûng lûng. A rawn inhawng a, Hmeichhe hleitling lam, khal zet mai, mipain, 'A îtawm' kan tih ang chi ngei mai kha a rawn pen lut ta chhak chhak a. A sam chu a dum hlap a, a hnâwng chap bawk, a vun nalhzia mai mai chu aw..a hnute kawh lah, te chhe lem lo tak leh a kawng fêk rât te, a mawng bawr lian leh khal târh mai te chu keia mipa mit hian a va hmuhhmaih lo chiang tak..Jogger pants grey rawng a ha a, tshirt dum a nghawng V a ha bawk. 

Zoteii chuan, "Lo ṭhu rawh..K'u Lucy.." a lo ti sar sar a. Ka rilruah hming pakhat a rawn lang nghal, 'Luciferi' tih ngei mai chu..!