Sangbera last

SANGBERA ..(LAST)

Ziaktu : Toni Râlte

Zing dar 3 a pel fel tihin nurse pakhat hian Kimtea rawn harh thu a rawn sawi ta a. Ka ṭawngtaina chhanin a awm tih ka hria. Sangbera nen nghet taka kut insuihin kan ṭhu dun a, ka mut pawh a chhuak lo. A chauh pawh ka chau hek lo. Julie te pawh an lo ṭhu ve ṭhap a, U Kawnga erawh hnathawh ngai a nih avangin haw tura ka ngen nasat em avangin a haw ve hram. Khua a rawn var ṭan a, ka lungngaihna leh manganna te chuan kian lam an hnaih chho ta tial tial a, ka thlamuang em em chu keipawn mak ka inti! Hetianga chhungril thlamuanna hi ka la neih ngai lo thil a ni miau a. Hei hi em ni Pathian nena lendunna chu le..ka la tem ngai loh thil a ni. Kimtea chu ward pangngaiah an sawn ta a, Julie te pawh hreh takin ka hawtir ta hlawm, an chau ve dawn êm mai. Keini nupain Kimtea chu kan buaipui a, Sangbera'n ṭul a tih miau avangin Cabinah kan insuan lut leh ta. Engkim a ṭha thei ang ber duh ṭhin pasal ka nei hi ka va vannei tak êm. Kimtea chu a la harh ṭha chiah lo naa, ngaihtuahawm em em a ni tawh lo. Truck driver khan zu a lo rui a, side la lo deuhin kawng kawiah a rawn tlan a lo nia. Bike erawh mak deuhin a khem nin nian chauh. Driver pawh Police in an la tawh a, Sangbera an rawn ko nghe nghe. Kan nupaa ngun taka kan ngaihtuaha kan sawi dun hnuah Driver chu ngaihdam mai kan tithlu ta a, Kimtea pawh rawn harh se kan duh dan ang tho hi a duhdan a nih ka ring. Sum leh paiah phânna tur a awm lo bawk a, rilru nuam takin ka awm leh thei tawh. 

Nilêngin Kimtea ka awmpui chawt a, in lamah amah chauha Sangbera awmtir chu nuam ka tih loh avangin Mami te ina chaw ei ve mai turin ka ti a. Keini chu cabinah kan inbâwl thei tho. Nubawihi leh Azuii a tuk maiah an rawn thleng ve bawk a, ka hah a dam huai mai. Nubawihi'n riahpui a chuh nghal that bawk a. Azuii nen Sangbera nen kan pathumin in kan lo nghak dawn a ni. Kan zanriah ei chu kan nui bâwk bâwk mai, Azuii'n a bialpa nena an infight dan a sawi a, "Azuii chu ka fight peih tawh lo, a chak êm mai,. Min bin âwrh âwrh mai a, a tlawmthlak lutuk" tiin a bialpa chuan a ṭhiante bulah a lo sawi niawm tak a ni. Ka ṭhiannu hi ka ngaisangin ka chhuang em em a ni. A rawn zin chau ve bawk nen, "Mu hma rawh" kan ti tlat a. Nubawihi room turah a mu dawn a ni. Azuii mut hnuah keini nupa pawh intifaiin mut lam kan hnaih a, Nubawihi ka han biak chuan, "Hei a ṭha tawh lutuk. Buhhawp pawh a ei ve ṭeuh mai. A bialnu a rawn kal a, dawrah ka lensan rih.." a rawn ti a. Rin aia hmain kan chhuak thei turah ngai ang. Kan khaw hlui lama zin lah Kimtea avangin a flop ve leh ta bawk si. Mahse, engkim hi Pathian remruat vek a ni e. 

Kan han mu chu ka chau ve deuh bawk nen, muthilh mai a duh. Mahse, min rawn kuah a, min thlahlel ngawih ngawih tih a lang si, putea thusawi kha ka hrechhuak, "Nupa nunah inhriatthiam tawnna tel lo chuan chenhona nuam a awm thei lo" a tih kha. Chuvang chuan ka insangmar a, duhthawh taka lo kuah let vein kan infâwp vawng vawng a. Tun ṭuma kan infawh chu a thlum dek dek bîk. Engtin nge ka sawi ang aw..a nuam a ni tawp mai. Inpawh leh inzah ṭit ṭêt lova hmangaihna kan han chen dun takah chuan keipawn a vawrtawp ka thleng ve ta hial mai. Hei hi maw hmangaihna chen dun chu le..a thlan hliam a, a lungawi tih hi a hriat hliah hliah, chu chuan keipawh min tihlim takzet. Hnai taka min rawn melhin, "Ka hmangaih che a, ka hmangaih zel ang che" a ti zawi sup a. Ka insûm thei ta bik lo, "Keipawn ka hmangaih che" ka ti ve sep a. Induh takin kan inpawm vawng vawng mai. Kan han mut ṭhat leh hnu chuan, "Khaw maw i phone kha" tiin min dil a, ka lo pe ve mai. Period calender tih emawni hi a download a. Ka lo en reng. A settings chu a khawih zung zung a, "Engtik nge i period tawp ni?" A ti nghut. Ka ngaihtuah vang vang hnuah ni 8 a ni tih ka hre thei, ka hrilh a, period end-ah chuan a chhu lut a. "I menstrual cycle hi ni 28 dan a nih hi, hmeichhia chu in ni tlangpui vek. I period leh period inkarah ni 26-28 a tla tlangpui tihna a nia, a nih chuan i rai theih hun chance ṭha ber chu i period ṭanni aṭanga chhiara ni 14-16na a nih hi..hei i man em? Raina chance san hun lai chu a symbol a lan kuau hi..hriatreng tur a nih hi" a ti zung zung a. Mawlmang zetin ka lo thlir ve reng ringawt. Chungte chu engtin nge maw a lo hriat ni..

"Period zawh chiah hian a rai theih ber emaw ka tia" ka ti a. Hei pawh Azuii bakah U Sangi te sawi aṭanga ka hriat a ni. 

"An ti châwk alawm, mi tam tak chuan period zawh hi raina chance san ber hun emaw an tia. A ni lo. A hniam lai a ni mah zawk. Mahse, raina chance awm miah lo chu a ni lo thung" a ti leh kalh kalh a. Ka lo ngaisang ru viau,. Ka blind ve ropui sia. 

"A nih chuan friday zan hi a sang a nih hi" ka phone melh vung vung chung chuan ka ti a. A nui huk, "Kei chu ka fit reng" a ti pek a. Tiang lam sawi chuan ka zah hun a thleng nge nge ṭhin. Mahse, ka insiamrem ve zel a ngai tih ka hria. Nupa nih tawh chuan nupa nun chungchangte hi tenawm rawngkai si lovin sawi dun bawrh bawrh ila, Teberi leh U mami te ang mai hian..nupa nun pawh a nuamin a hlimawm nge nge ang tih ka hria. Min kaihruaitu hi a zei lo hran lo bawk a, ka zeihawi chho ve zel ang chu..

"I chau a nih kha, muhil rawh" tiin ka chalah a fawp zauh a. 

"I la muhil ve dawn lo mi?" Ka tih chuan, "Lehkha chinfel ngai ka nei a. A rei lovang, ka lo mu vat ang" a ti sup a. Min thawhsan ta a. Keipawh ka chau ve bawk nen, kar lovah ka muhil ta bawrh bawrh a. Ka zun chhuakin min kaiharh lehpek, ka bulah Sangbera a lo la mu hlek lo mai. Dar 2 a ri lek lek tawh sia. Ngaihṭha vak lo hian ka tho va, ka va zung a. Inthiam lo ru deuh chungin kan pindan atang chuan ka chhuak ṭhem ṭhem a. A hmaa a thawmhnaw dahna pindan kha library roomah kan siam tawh a, tah chuan a sumdawnna thil vel pawh a chingfel thin. 

Kawngka chu a lo inkau deuh a, zawitê hian ka va nam a, ṭawng ri ka hre nghal. Ka ding chawt mai. Kan pa chuan phone-ah tu emaw a lo be mêk a lo nia, ngaihthlak rûk châknain ka khat si. Ka inthunun zo ta lo. 

Sangbera chuan, "Kan nun aṭang hian i damchhungin kal bo ang che. Chutiang a nih loh zawngin Remruati te ang bawk khan chinfel dan ka hria a nia." A ti hmawk hmawk a. Tu tak bia ang maw..a aw a thian khurh a, "Nute, i hriat tur chu maw..ka nupui leh a nau chungah eng thil pawh i ti a nih chuan nang hi ka nuteii tak tak i ni lo tih ka theihnghilh ang. Mapuii pawh vaubet tawh suh, kaltir rawh. Duhâmna kha chintawk neihtir tawh rawh. Min hriatchian kha" a ti leh hmuk hmuk a. A lungawi lo tih a awrâwl aṭangin ka hre thei. Nute tia a koh avangin kha hmeichhia, Mapuii nena lo kal ngei kha a nih ka ring. Lehlam ṭawng ka hre thei lo. 

"Aw le, a ṭha e. I laka ka tlawm vang ni miah lovin ka nuhrawn thlarau ka zah avang chauhin i mamawh ang zat chu ka pe ang che. Mahse, i damchhungin i kalbo tur a ni. A chiang em?" A ti leh khur khur a. Kawngka lam rawn pan thawm ka hriat avangin rang zetin kan pindanah ka tlan lut ta a. Ka âwm ka dawm a, ka lungphu chu a rang kher mai. Ka mu leh ta hlân a. Thil dik lo leh ṭha lo lam a ni lo bawk a, kei leh Kimtea venhim a tumna lamah khatiang khan ruahmanna a siam tih ka hriatna chuan ka hlimna a rawn belhchhah leh sawt. Ka pasal hi nitin hriatchian deuh deuh ka châk a ni. A lo mut lai pawh ka hre lo. Ka mutui kher mai. 

Tukṭhuan kan kil laiin, "Azuii nen chuan va bazar u la, Kimtea pawh in rawn tlawh kawi ang a, kei chu kalna tur pawimawh ka nei tlat mai a. Zanriah erawh ka rawn ei hman ang" a ti suam suam a. Nizan boruak vel kha chu sawi kher pawh ka tum lo. Vawiin lamah pawisa kha an inhlan dawn ni turah ka ngai. Keimahni vanga pawisa a chân nual tur chu pawi ka ti viau naa han tihtheih ka nei bawk si lo. A rualin kan chhuak dawn a, chaw eikham veleh kan insiam zui nghal. 

"Pawisa kha i mamawh zat kha keng mai rawh aw. Azuii pawh eng emaw te kha leisak ve la, khu leh ram chen aṭangin a rawn zin ve sia" a ti a. Keimah ang lo deuhin tihhamhaih ve nan hrim hrim dingdihlipin a biangah ka fawp zauh a, "Aw le boss" ka ti sap. A meng buai ta chiah a, mahse, hlim hmelin a rawn thlak nghal. 

"Hmelṭha viau suh" a ti nghut ringawt. A nuam eee..tichuan, Azuii nen a ruala chhuakin bazar thlen hmain kan chhuk ta a. Damlo kan hun a nih chiah loh avangin bazar hmasak phawt kan ti a, Azuii mamawh a ran damdawi te chu kan lei hmasa ta phawt. Hun kan hmang rei lem lo. Azuii chu kawr leisak ve hrim hrim ka duh a, ani lah a chhungte thil enkual a lo duh ve bawk nen, kan inzui ta dat dat a. Azuii inhmeh chi tak kawr a ruka ṭial, smart ru deuh chu ka en a, "May, en teh, saw saw Remruati kha a ni em?" Azuii'n a rawn ti sar sar. A hawina lam chu ka va en vat. Remruati ngei mai chu rui em em hian dawr pakhat bul stepah a lo ṭhu thlep nuaih mai a! A hmel chu a la ṭha reng naa, sawi thiam si loh hian a ṭawp. A bulah midang an awm bawk si lo, tisawn a lo rui ṭhin tihna em ni? An bail chiah sia,. Jail-a hin reilotê a zu hman ve vang khan a rui tihna em ni ang? Mak deuh maiin nuihzata deusawh tur ka nih laiin ka lainat tlat nia mawle! A vanglai hun a ta ni ngai lo tur mipa atchilh reng rengin a hmang a, thil tenawm tak tak leh ruahmanna dangdai tak tak te neiin manchhuah a ni ta nge nge a. A tawpna chu a ho hle mai maw..kan nunah hian kan beidawnsan tur kan beidawnsan phal loh hian hlimna hian min kiansan ve châwk zel. A pawi êm mai. 

Ngaihven lo luiin Azuii chu ka kawr thlan nen inthlakna roomah ka nawrlut a, "Ha chhin rawh" ka ti a. Mak a ti deuh naa a ha chhin ve mai, a ha tawk chiah lehnghal. "Leisak ve che ka duh a. I inhmeh bawk si" ka tih chuan, "A ngai lo, a ngai lo reng reng" a ti ve fun a. Mahse, ka leisak awm tho ê. A phû ve êm mai. Kan inneih hnuah Sangbera tan engmah ka la lei miah lo tih ka hrechhuak chawpchilh nghal a. Eng nge ka leisak ang aw tih ka ngaihtuah nasa, a tawpah nectie ka rilruah a rawn lang ta tlat. Tichuan, nectie ka mit la bertu chu ka leisak ve ta a. Hote pawh nise a ngaihhlut tho ka beisei. Kan bazar zo thawkhat ta bawk a, Kimtea kan tur chuan damdawi in kan pan zui ta a. 

Kan han thlen chhoh chuan Nubawihi a lo inbual mêk a, Julie leh Kimtea an lo ṭhu dun ran mai. Julie chu a zak viau a niang, a sen awp awp thei. Mahse, ka be nghal bawrh bawrh a, eitur kan kente chu ka kheh nghal sawk sawk. Kimtea pawh a tira na lem lo, a âwm ruh rawn nâ leh deuh bak chu na dang a nei tawh meuh lo. Mahse, a cham thleng erawh a awm ve a ngai ang. Kimtea chuan min melh vung vungin, "Ate, i va'n hmelṭha em em vawiin hi " a ti teh ngawt a. A dawngtu tan erawh a lawmawmin ka inrintawk phah viau. 

"A hlim ang chu, an pa hian a duat em alawm" Azuii'n a lo ti khauh. 

Julie lah ri phawng phawng chi lo a ni ve bawk nen, "U May, i rai tawh em?" A ti roh a. 

"Rai pawh ka hre lo" ka lo ti. "Rai tawh la ka ti ê..hmeichhe naupang cute deuh ka duh" Kimtea'n a lo ti ve sek. Huiham, nge maw rai lam pawh chu an sawi chhên le. 

Kimtea bawk chuan, "E tak! Ate, U Terini kha a piangthar a, a dam tawh asin. Tukinah a ṭhiante nge ka hre lo, chumite nen chuan damlo an rawn kan a. Keipawh min lo la hria a, 'I U hnenah khan ngaihdam min lo dilsak rawh aw. Ka sual êm mai' a tia. Chuan ₹1000 lai min pe ve asin" a ti ta mawlh mawlh a. Chuzawng thil danglam tak a nih chu mawle. 

"A va lawmawm ve aw. A natna te a dam tawh phei chuan..nakinah va len ve tur a nih chu" ka lo ti hluai a. Ka lawmpui tak tak,. Pathian nen kan intawh hma kha chu nise "A piangthar der a niang" ka ti leh maithei a ni. Mi ei loh ka tina ve ropui sia. 

"Nia, a lawmpuiawm tawp. A hmel pawh a ṭha leh tawh lutuk" a lo ti ve chul a. Nubawihi inbual zo a rawn lut a, "U May, enteh u, a hrehawm ê" a ti teh ngawt a. "Eng chu" kan lo ti rual ṭhawt. 

"Hei hi a thak lutuk..ka hiat vûng vek tawh" tiin a kap a kawk ta vû mai. Azuii a khek nghal tuar a, Julie a dir nghal tlat tlat bawk. Amah Nubawihi lah chuan hrehawm a tih hmel bawk si, "Ngawi rawh, damdawi ka zuk zawhsak ang che. A hrehawm viau ang. " Ka ti a. Kimtea lah uang ta reng reng chu, "A bal a niang, sil ṭhin ta che" a lo ti hluk. Nubawihi chuan lungawi lo em em hian, "Awiii, ngawi mai teh. Ka sil ziah, ka sil pilh lek lek zawk aw. Balh vang a ni lo,.tiraw Au May" tiin ka puihna a rawn dil a. 

"Ni vek lo ve. Tihfai ṭhat peih loh vanga thak te chu a awm ve tho va, mahse, a tam zawk chu bawlhhlawh chhuak vangte a nia. Chutin pilh dawn khawp ten sil tawh reng reng suh. A rim da vek khawpa sil te hi doctor ten an phal reng reng hleinem,. A rim hi natna hrik laka vawng himtu a nia. Damdawi i ei ang a, i dam mai ang. Chutihrualin i zun zawha i silfai zawhah puan ro thianghlimin hru hul zel rawh. Zun fep hian sil mah ila hruk hul leh loh chuan a tirimchhe ve thei a. " Ka ti duah a. Azuii ho ho chuan min ngaihsan hmel vel tawp, "Doctor i lo ni reng a ni maw?" Azuii'n a ti zauh. 

Nuih vur vur pahin, "Kan pain whatsapp-ah min lo thawn a. A hrante chuan ka hre bik teuh lo" ka ti a, kan nui zo ta vek. Ka intih hriat ve tehreng nen, Sangbera vang mai mai a ni leh si. Kan pa chungchuanzia lanna a ni tho va, ka zak lem lo. Nubawihi damdawi tur chu ka zuk leisak ta a. 

Sangbera'n min lo call ve chiah bawk, "Rin aiin ka hman hma leh sia, ka rawn lam haw ang che u, Tleia te inah ka peng lawk" a rawn ti a. A aw pawh hi a mawi thar vek tawh. 

"Nubawih, zanin chu ka lo riak ve dawn mi? I chau awm sia" ka ti dêk dêk a. Kimtea nen a rualin, "A ngai lo, kan free lo" an ti hmak nia! An rilru chu ka hrethiam tho mai. Hawn lam kan hnaih a, Sangbera pawh a rawn thang mêk. Rawn lan ve zuai a duh sia, kan lo nghak a. A rawn pen lut thoh thoh chu kan lo thlir thap, a lai ve deuh nge a khi hui a. "Teh ṭhap a che u" a'n ti ngawt a. 

Nurse a rawn lut a, "In kan hun a tawp a. A riahpui tur lo kha chu lo chhuak rih tawh ta che u" a rawn ti a. Kan chhuak tur chu Kimtea'n, "Ate, nautê kha aw. " A rawn ti hrâm. Ka va chhiatkhum a, Sangbera'n hrethiam fahranin, "Lo ṭawngṭai char char r'u" a la ti zui! An hneawm ê.

Julie chu scooty-a kal a ni a, kan inthlahliam hnuah keini pathum pawh kan hawng ve ta a. In kan thlena kan nupaa rooma kan awm hnuah, "Nizan kha engkim ka hre vek" ka ti ta nge nge a. Zep neiha mawlhtu neih hi ka peih thlawt lo. A lo manthiam nghal nge ni, "E..a pawi loh chu. Amah kha vawiinah ka va hmu alawm,. Pawisa ka pe tawh a, a rawn ninawm tawh lovang" a ti dam thluam a. 

"Mapuii ve thung kha" ka ti leh hrâm. 

"Ani kha chu Nuteii convince a nia, a bulah ṭha takin ka sawi tawh a. Min tibuai chhunzawm ngam tawh lovang" a ti leh mai a. A ngaihsam ṭhin lutuk hi ka ngei. Mahse, a engah mah hmaa lo hlauhthawn vak ka tum bik lo. Remruati ka hmuh thu leh a ruihzia ka sawi chuan, "Ka rin ang chiah a nih chu..kan mawhphurhna a ni lo tihah chiang phawt ang" a ti hmiah mai. Ngaihven chu a tum loh hmel khawp..Zanriah pawh hlim takin kan kil ho a, Azuii titi hi ngaihthlak a nuam thei bawk a, châm ve reng se ka va duh tak. Mahse, a buai ve bawk si. "Kimtea dam ṭha se chuan ka picnic pui ang che u ka lo ti a nia, Azuii awm lai hian" Sangbera pawn a ti nghe nghe. 

"Tihian picnic reng ang ka ni.. " Azuii'n a lo ti zauh. Kimtea dinhmun pawh a ṭha a, chhuah an dilna erawh an la remti chiah lo. Naktuk lam chu Azuii ka thlah hnuah keiman ka awmpui ve ang. Nubawihi pawn hahdam a mamawh ve rih tlat, in lamah engmah ka ti azeng pawh a ni lo va. Dar 8 velah Azuii chuan, "Ka mutsan mai ang che u, thawh hma ka ngai dawn sia, Kimtea dam veleh in lo zin a ngaih kha aw.." a ti siam siam a. La ngai viau mah ila thawh hma a ngai sia, in hnuaiah min chhuksan ta a. Keini pawh tihtur dang awm hek lo, kan mu leh ta ngawt mai. 

Mu chungin kan titi a, "U Sangber, Teberi te vel kha i la sawi zo lo ania" ka tih chuan, "Sawi zawh kher a ngai tawh hleinem. Ka chingfel tawh a. Bakah khami bak kha a awm vak tawh lo. A tawpah kan inhrechhuak tlang ti mai ang" a ti a. 

"Ngai lo, sawi teh, Zôra velte pawh" ka ti ṭâlh. 

"Aw..hnial lah hi i harsa reuh sia. Umm, ka nuhrawn kha Zôra nu diktak niin Zôra leh a û hmeichhia, zeng kalsanin ka pa a bumthlu a, nuthlawi a pasalin a phatsan anga insawiin. Ka pa pawn a lo ring ve mai. Mahse, tikhan Teberi leh Zôra te an inngaizawng leh ta si, thudik chu hailan a ni ta a ni. Ka pa kha ka nuhrawn thah a ni chu ka ti ngam lo va, mahse, eng emaw tak zawng a tih ka ring tho. Chhungkaw mualpho te, buai vakte hi ka pa duhdan a nih ngai loh avangin rilru nuam lo chungin kan ngawihsan ta kha a nia. Teberi nu dik tak kan hrechhuak zui ta bawk a,. Ka pa a boral khan ka nuhrawn chu a boruak hap a san tak êm avangin Bawiha hian in aṭangin a hnawtchhuak ta a. Ka pain a hnutchhiahah ka nuteii nen khan an insawn ta a. A hnu lawkah pasal angreng neiin a pasal chuan ka nuhrawn chu a vithlum ta a ni. A hnu thla reilotêah ka nuhrawn thattu pawh chu a inawkhlum zui ve leh ta a ni. Ka nuhrawn rochun a in kha a nau ka nuteii khan a chang zui ta a. Mahse, duhtawk nei thei lovin sum leh pai a la rawn beisei reng a. Kan chhungkaw thuruk midangin an hriat ve loh hi midang bula tlangaupuiah min vau ve ṭhin. Kan hlau miah lo naa, chhungkua dinin hlim takin kan khawsa vek tawh a, khatia mi zawng zawng hriata va inphawrh mualpho kha kan duh bik lo. Tichuan, nizan khan nang leh Kimtea te chunga hmalak a tum thu a rawn sawi lehpek a. Ka hupbo ta mai a nih kha. Sum leh pai hi khawvela kan chen chhung chuan a pawimawh ve bawk sia..ka ui thei ta bik lo a ni e. A chhan chu kei hi in bulah ka awm reng lo thei,. Engtin emaw lo awm ula ka awmdan tur chu i ngaihtuah thiam lo zawk ang..tikhan a tawk em?" A ti dap dap a. 

"Tawk mai rawh se. I sawi kim lo thiam ropui si" ka ti nghat a. 

"Nunhlui te chu phumbo vek tawh ang. May, hmalam pan hi kan tihtur a ni. A dik tiraw?" A ti nghut a. 

"Dik e.." tiin ka melh chho a. 

A ngaitê bawkin nautê siam hna bawk! A fit pawh kan fit dun reng reng hi ka tia. Kan zawh chuan, "Tikhan ṭawngṭai hnan ang" a la ti zui! Kan nuihzatthlak nupa teh e. 

Zingkarah Azuii kan han thlah a, a cham rei lo bawk sia, a ngaihawm dawn teh e. Tukṭhuan eikhamah a chhuah rualin keipawh ka chhuak ve leh a. Kimtea ka awmpui dawn a ni. Ka luh rual rualin, "Ate, ka ning tawh. Haw ka châk e" a lo ti nghal. 

"Doctor ten an la phal si lo va" ka ti ringawt. Nubawihi pawh ka tihluih angin chabi ka pe a, ka hawtir ta rih. Kimtea nen kan inawm nileng a ni deuh mai e. Julie te pawh vawiin chu an rawn kal lo. Kan unauin kan nunhlui sawiin a changin kan lungchhia a, a changin kan nui dun leh ker ker thul..unau inkawmngeih tak kan ni te hi a lawmawm ka ti mang e. "Nikhaw hre lo va ka awm lai khan Anu leh Mama te kha ka lo hmu a, motor nalh tawkah hian an lo chuang a, chuan ve tumin ka lo um vak vak a. Anu chuan, 'Let leh rih rawh. I U Mayi khua a har lutuk anga sin" a lo tia. Tah khan chuang ve ila chuan ka thih daih ka ring" a ti nuah nuah a. Keipawn ka ring. Mahse, ṭawngṭaina chhangtu Pathian kan nei tlat a, ka lawm nawn leh fô ṭhin. 

"Min thihsan daih ten, engtin nge awm se min tih? Nang bak neih ka nei tawh lo" ka ti a. A ngawi reng thung. Tichuan, tlaiah Nubawihi'n min rawn thlak leh a, Sangbera nen Teberi te ina zanriah ei turin kan kal ta nghal a. Teberi te in hi vawikhat chu ka kal tawh a, mahse, kan awm rei lo. A pa hnutchhiah inah a pasal fanau bakah Zôra pa te nen an khawsa ho a ni. Zôra pa hi a hma chuan zu ngawlvei a ni ve ṭhin a niawm e. Mahse, tihian rawn piangtharin a taksa ngeih tawk hna a thawk bawk a, a la lang upa miah lo. Kan va thlen pawh chuan amah berin min lo dawngsawng a, ka nel nghal sarh mai. Zôra hian motor workshop lian ve tak neiin, Teberi hi chuan engmah a thawk lo va. Mahse, workshop aṭang hian an mamawh chu an hmu tawk viau mai. Zanin tlai hi engvanga chaw eia min sawm teh hlawl nge an nih ka hre ve lo. Arpui tuilai ngei an lo buhchiar hluah a, vawk lu bai a la awm bawk. Teberi intihtheihna ber a ni ve a, sa siam hi a thiam riau. Bai erawh an pa vekin a ti thung. Teberi bai siam ve chu an ei ngam lo a thak lutuk an ti. A tê a te hian thak hi a ngam reuh sia maw. An fanu erawh laklawh deuhin a lo muhil a, ka lawm châk tehlul nen. Zanriah chu kan kil ta hlawm a. Zôra chuan inla patling fê hian, "Zanin tlaia kan sawm chhan che u chu, thil pawimawh deuh mai a awm a. Englo a nia, hei ka pa hi nupui neihtir leh kan rilrûk a. Ṭhenawm lawkah sawn an khawsa a, ani pawh a fanuin hmanni mai khan pasal a neihsan ve a, amah maia khawsa a nia. Amah pawn a hreh lem lo va, amaherawhchu, an in leh lo saw chhuahsan lovin ka pa hi lut zawk se a duh a. Ṭhenawm lawk inhne reng kan ni tho bawk a, eng nge in ngaihdan kan han hre duh deuh mawle" a ti charh charh a. 

Sangbera ka ngaichâng.."A ni maw? A va lawmawm dawn ve aw. Chutiangte ngaihtuah vak ngai a ni dawn em ni? Khualkhua te chu nise thuhran, amah Ka pa hian insuan luh a duh phawt te chuan..chu bak bak" a ti ve chuar chuar a..Sangbera mak ka tihna em em chu a bula awmte azir zela a ṭawngkam hman dan leh a ṭawngchhuah dan a tidanglam zung zung ṭhin hi. Thupui fun ngai tak thilah chuan a uang ngai hauh lova, fiamthu rawngkaiah erawh ho deuh deuha nawi a thiam tho bawk si. 

Zôra pa chuan, "An han ti mai pawh a! Kei nupui neih leh pawh hi ṭul ka ti vak lo asin. " A lo ti ve zuk a. Nupui nei lo rual êm zawng a la ni lo. Kan pa bawk chuan, "Akhai! I vannei ka ti viau asin. I faten nupui nei leh turin an nawr zawk che a nia. Ka hmelhriat pakhat te chu an nu ber thih hnu fêah an pa chuan nupui neih leh a tum a, an remtihsak hauh hleinem, chhungkaw pa ber a ni naa, in aṭangin an hnawtchhuak hmiah mai asin. 'Tar hur' ti ten an ko nia! Kei ka ngaihdanah chuan upat lamah hian kawppui nei leh nei lo inkar chu a hla zualin ka hria. Dammawh hritlan nikhuaah chuan fate ringawt chuan an ngaihtuah vek seng ṭhin lo. Chuvang chuan upat tawh hnuah pawh nupui pasal neih leh a ṭha ber" a lo ti dap dap a. Ka hmin zân mai. Sangbera ho chuan Zôra pa te inneih dan tur ruahmanna chu an siam a ni der mai. An awlsam teh e. Teberi nen erawh kan lo titi ve mai mai a, Remruati a ngeizia te, a hma aṭang tawha a û a ngaihzawn theihzia te..a tam mai. Engpawhnise, Remruati kan paihbo tawh a ti mai ang, a rawn dîkdak leh ngam ka ring tawh lo. Zôra nuteii leh Mapuii te lah kan pain a hmet mit tawh bawk a, enghelh tur em em kan nei tawh lo. Kimtea lah dam ṭha pangngai ang mai a ni tawh bawk si. Zan dar 8 pelhah kan haw ta a. In kan thlen chuan a hma chhe tawh lem lo bawk a, kan intifai sawk sawk a, kan mu nghal daih. 

"Ka sumdawnna huang zauh belh zel ka rilruk a, district capitalah hian Lawngtlai leh Mamit lamah ka la hûng lo va, nakkum lamah ruahmanna ka siam ang ka tia. Kimtea zir zelna senso atan Champhaia ka dawr khi dah mai ta ila, i nu lung lah kan phûn leh thei ta si lo. Nakkum lamah i û nen a rualin kan ti mai dawn mawni tihte ka ngaihtuah a, eng nge i ngaih ve dan?" A ti mawlh mawlh a. 

"Ṭha i tih ang kha a ni mai, ngaihdan ka nei ve thiam lo. " Ka lo ti ringawt. 

"Keimahah innghat lutuk suh aw May, ka sawi awmzia chu pasal rinchhan leh lutukte hi an fel lo ka tihna ni lovin, zan khat mit chhin tawk thei reng kan ni a, chumi hun atana lo inpuahchaha mahnia din ve theih hi tum tlat tur..i hrethiam tiraw?" A ti sûp sup a. 

"Umm, mahse, ka thi hmasa zawk duh" ka lo ti kawkalh a. "I va ho e aw. I thih hmasak zawk ten ka upa tawh sia, ka khua a har dawn sin, nangte chu pasal dangte i nei leh ang a" a ti a. 

"Ka duh lo e a" ka lo ti vat. Ni e, ka pasal ai hian thi hmasa ila ka duh zawk, a tel lova khawvel hmachhawn chu a zâmawm duh dawn êm mai.. 

Kimtea damdawi in aṭanga a chhuah hnu thla khat velah Zôra pa te pawh an innei a. Ṭhenrual ṭha te nen hlim takin inneihna ruai kan ei a, kan tlaiin kan puar khawp mai. Tihian Zora pa pawh a nupui bulah a insuanlut ve ang. Lehlamah in hrang aṭang hian a inngeih theih daih zawk. An lawmpuiawm viau e. Zôra pa te inneih tûkah chiah Lsa te inneih sawmna card kan la dawng zat zui! A hlimawm ṭan viau e. Mahse, kan pa hi a rilru a zau tehlul nen, Lsa te inneihnaah chuan kal a remti tlat lo. Kimtea pawh a kal chuang lo. Mahse, Lsa chu ka tan lo ngeiawm tawh mah se; kan inneih dawna a thil min tihsak bakah misual tak a nih bik loh avangin kan pa remtihna thlapin rizai leh thosilen ka leisak ve tho. Va lang thei lo mah ila a lawm ve thoin ka ring. Samuela chanchin erawh kan hre lo vang vang a. Nubawihi rawn kan paha mamawh lama rawn zin U Mawii'n Samua chuan nupui a ruk thu leh a nupui chu amah aia kum 9 vela upa a nih thu te a rawn sawi a, damdawi zuar a nih thute chenin. Kan Samua pawh a lo tlachhe ta hle mai. Nun pangngai tak kha lo hmang hle hle se a ṭha mai tur. 

Sangbera sawi fô tawh angin U Sangi te nupa pawh hlâwk zawka sum an hmuh ve theih nan, Sangbera'n a dawr piah lawka dawr lian vak lo chu a leisak a, tah chuan U Sangi chuan Silchar leh Gauhati aṭanga a lak a dawr bungrua te a zuar ve ta a. Lawmthu min hrilh bang lo. Mahse, kan unau tana an ṭhatna zozai te kha rulh zawh theih ka inring lo zawk. Ṭhatna hi chu ṭhatna veka thungrulh hi a lo harsa lo khawp mai. Nubawihi pawh thla khat a awm hnuah laklawh deuh mah se; a châk em em puanṭhui zir tur chuan kan intifel thei a, Sangbera rualin a kal a, tlai lamah erawh an ban hma avangin Kimtea rualin a lo haw ṭhin. Kimtea kha bike emaw two wheeler hrim hrim a khalh ngam ka rin tawh loh laiin a hma ai mahin a ngam tawh zawk a! Sangbera'n khalh nuam zawk tur leh a zawh tawk tur tiin scooty a laksak a. Chu chuan school a kal nitin ve ṭhin. Nakkum lamah erawh hostelah a awm a ngai tawh ang. Chhungkua kan hlim a, Pathian zarah kan hrisel bawk a, hei bak bak chu ka ti deuh. 

Inrinni zing a ni a, Nubawihi leh Kimtea te hi an bazar mai zel a. Lei tur list ka ziah mawlh mawlh lai chuan namên lovin ka luak a rawn chhuak a, ka râ a sô nge engtin emawni ka awm. Bathroomah ka tlan lut rawp a, ka va uak ta tuar tuar a. Zingkar mai a nih avangin luak chhuah tur lah chu ka nei mang si lo. Ka chau rawih thei nia. Ka va chhuah leh chuan Nubawihi leh Sangbera te hian ngun fê hian min lo en a. Mak ka ti deuh, "Eng nge?" Ngaihṭha vak lo hian ka ti a. 

Kan pa chuan, "Test kit rawn lei teh se, I awmdan kha nau pai i ang tlat" a ti ta. Ka lo ngaihtuah loh lam tak. Zêp nâk emaw naute siam hna kha kan thawk tlut tlut a, ka rai mai thei si lo nen, a la hun lo a niang e tiin ka lo beisei vak duh tawh lo va. Ka la naupang tho a, hlauhthawnna erawh ka nei lo. Chutia kan pain min ringhlel ta chu keipawh chu ka inringhlel ve chawpchilh nghal. Tiang khan ka awm ngai tlat lo a ni. Nubawihi lah chuan, "Ka sawi tawh kha aw. A hming chu keiman ka sa dawn.." a lo ti leh hmiah. Kan â tlang hlawm bawk sia maw. Kan pa erawh a ngawi run run a, a helhhawlh te pawh a ni mahna. 

Nubawihi te bazar chhungin eirawng ka lo bâwl a. Weeken-ah hi chuan Nubawihi te an chawl ve bawk nen, aman engkim a khawih ṭhin. Lehlamah engmah ti lo va tawmsen ve reng hi ka duh lo, khua a har ṭhin. Nidang aiin an rawn haw hma a, an rawn luh rual rualin, "Ate, kha le..va test rawh" Nubawihi chuan a ti lâng lâng. Au May ti khan min ko ṭhin a, a rem teh ṭeuh ṭhin lo nge , Kimtea min koh angin min ko ve ta daih. Keipawh chuan test kit chu ka lo la vat a, kan pa bulah, "Engtin nge test tur" ka ti hû. 

"Hei tah hian i zun kha i zuk far ang a, rin sen pahnih a awm chuan i rai tihna" a lo ti awlsam êt a. Bathroomah ka luhpui ta vat. Tlem chuan thinphû a rang deuh. Beisei ru em em si kha a hun tak takah chuan , "A ni lo vang" te ka han ti ṭha leh vel a! Ka zun chu ṭhanemngai taka dawhin ka han far ta pap pap a. Test kit chu ka melh ngat ngat. Rin sen pakhat a rawn inrin kalh a. 6 sec velah rin sen dang a rawn inrin leh ta…Chhei le! Ka rai! A ranga rangin ka tlanchhuak nghal a. Min lo thlir ṭhaptu te lam chu hawiin test kit chu ka lek kang vah a, "Ka rai" ka ti lang lâng. An pathum chuan an zuang, kut an bêng thul. Sangbera'n min rawn kuah chawt a, "Ka lawm e. Sûksûkpui" a ti mial mial. Kan hlimin kan lawm takzet a ni. Tukṭhuan pawh kan ei lawk thei hleinem le. Kan chhung leh khatte kan be kual a, tupawn min lawmpui em em vek. 

Rai no stage ka han kai chho a. Sa rim ka han ti thei lo nghal pang. Ka lung a noin ka tapbelh em em bawk a, Kimtea'n, "Sa ka ei châk ee" a tihte hian, Kan pain, "I û awm laiin sawi tawh suh, a rukin ka leisak ang che u. A huatthu a chhe si,." A ti ṭhin. Ka hre ru reng siah. Keimah vangin an insûm ve vek tih ka hriatte hian anmahni ka khawngaih vangten ka'n ṭap leh chiam zel a! Ka nunphung chu midang nunphung nise ka ngeia ka ngei dan tur chu aw..a chang leh kan pa hi min sîk pawh ka duh ngai lo. Zan khat phei chu ka mumangah Mapuii nen khan hotel pakhatah an lo inzui lut a, kei leh Lsa hian kan va enthla a, an mudun lai tak va hmu lo mah ila, Mapuii chu ka thîk ngawih ngawih..ka lo ṭap vak vak a, ka harh phah. Kan pa chuan min lo kuah chial a, ngei zetin a kut chu ka thingthla nawk, ka tum bûr a, a ngaihna hi an hre lo khawp a, kei lahin, "Ka mumangah pawh in lo inzui a, a tak ramah phei chuan in mudun nasa ngawt ang" tih mai maiin ka ankhum reng mai. "I mumang alawm" tih bakin min chhang duh lo. A hnu lawkah ka lungawi chawpchilh ve mai. 

Ka naupaiin thla li a rawn kai chho a, raino stage kha chu ka hnuchhawn ṭan,. Ei leh in ka duh thar a, ka sawi tawh phawt chu lei vek a duh ṭhin si, zan laia a tlanchhuah ṭumte hi a awm. Chutiang khawpa duattu leh hrethiamtu ka nei chu ka zo lo lek lek ṭhin, hmeichhia chu kan heti châwk rêng a. Mipa ten duat leh hmangaih taka hriatthiamna nen min dimdawih avanga han inlulin mai te, mipa han thuhnuai tum mai changte kan nei lek lek fô. Hetah tak hian hmeichhia kan nihna hi kan chianthar fô a ngai,. Pathianin hmeichhia chu mipa tihlima a kawppui awm mi tura a din leh siam kan nihnaah chiang ila, mipa dawhtheihna ramri kham pel khawp khawp hian kan pen chak ngai lovang. Hmeichhia kan nihnaa kan lungawia kan inpawm hian kan tlawm tihna a ni lova, kan dinhmun diktak kan luah tihna zawk a ni. Aa..Sangbera ang hi pasalah tupawn nei se, nupui ṭha leh fel tak an ni ve thei vekin ka ring. 

Mamit-ah zan 2 lek riakin a zin a, zan 2 rei ber ṭum a la niawm e. Video call-in zan dar 9 aṭanga 11 thleng kan inbia. Mutmu tuah ṭha hman pawh hian ka siam ṭhin lo. Mahse, ka tan a dawhthei a, a phunnawi ngai lo. Chau hmelte hi a pu lo thiam tawp. Kimtea'n, "I tibuai leh lutuk, mite pawh an rai , tiang em emin an pangchang lo. Lal û hi a khawngaihthlak..insûm ve deuh rawh" min tih tak hialah chuan, "Ekhai! A ni dawn tak e. " Tiin ka insûm ve ta deuh a. Mahse, ka pasal ka thlakhlelhna zual zel erawh thunun ka tum buai duh lo, mi ṭhenkhat rai ten an pasalte an huat tlat laia ka lo ngai em em hi vannei ka intih nâk alaia. Chumi a zin haw kan han mu chu zêp nâk emaw nupa nun kan hmang lo rei ve bawk nen, a beisei ve ngei alawm. Kei lah ka mawl dan a chhah si a, "Naute i hawlh nâ ang" tih ṭanin ka ṭang pek a. A thin pawh a rim lo, a nui khur char char. Ṭha takin min hrilhfiah a, ka hmin ta hram. A tukah Teberi leh U mami te rawn lengin rai laia nupa nun hman a hlauhawm loh thu leh thla 8 vel aṭang chuan insûm a pawi loh thu an rawn sawi ta chiam a, Sangbera'n a ko a nih ka ring. Keipawh ka fing leh ta sawt mai. Bahkhawr te hi ka ei lo rei a nia, nautê a chhun hlum ang tih ka hlau tlat pek alawm..a ropui loh theih ngei mai. Vaccine bakah checkup ṭha takin kan nei reng a. Naute insiam puitlin hma khan ultrasound-in kan en a, kha bak kan en leh tawh lo. A insiam puitlin hnua kan va en leh chuan Doctor Malawmi chuan, "Phir a ni khan ka hre rêng a! In vannei hle mai" a ti ta mai a! Karei! Phir ka pai a nih chu! A ruk tak chuan ka huphurh em em, ka zei lo si, ka â si..nautê pahnih chu engtin nge kei tehlul hian ka enkawl thiam ang tihah ka buai a. Mahse, ka pasal U Sangbera'n, "Nu i nia, pa ka nia. Nu leh pa kan ni dawn a, engah nge i buai viau? Ka awm alawm..ṭha takin hring la, eng ang chiaha pa ṭha nge ka nih i fiah dawn nia" cho zet mai hian a ti ta a. Ka dam sawng sawng mai. Phir pai ka ni bawk a, thla 6ah te chuan rit tawh tak ka ni, ka dul a lian bawk si. Mahse, Zing dar 6-ah min kaitho zat zat a, kan in leh a chhehvelah min walk pui ṭhin. Tlaiah a rawn haw hma a, zanriah ei hma darkar khat velah kan walk leh bawk. Nubawihi pawh a chawl rih ta tawp a, in lamah che turin ka inzo ṭha bawk si lo nen, Sangbera a hlauthawng tlat a ni. 

Ka dul puar pung mai zut hauh hauh pahin, "Ka fate u, keimah in pa aw..ka hmangaih em em che u a nia" a han ti sûp sup a. Hah hi a dam sawng sawng zel nia! 

Ka neih dawn hnaihah chuan min awmpui chawt a. Kei pawh inzo tawh hek lo, ka mu deuh reng tawh. Ka nau neih hun tur an sawi hma ni 2naah ka vei ṭan ta a. A nâ a ni. Damdawi ina min phurh chhoh lai te chu ka hre mumal lo. Min veitir ta lawk bawk si lo va, a chang leh ka bungbu, a chang leh ka tei vel thul. Sangbera mangangin min rawn zut a tum te chu ka lo ngei tawh a, "Nangmah vang a nih hi..a na asin. Kal teh" tiin ka lo hau a. Kan bul vel amite chuan min lo nuih min lo nuih mai. A tawpa tawpah min veitir ta hrâm a. Pathian hi chu a va ṭha tak êm, Phir lehnghal kha neih pangngaiin ka nei thei tlat! Min chhartu nurse pakhat phei chuan, "Ka nau chhar tawh zawng zawngah an la fai ber awm e" a ti hial. Engdang a ni lo, nupa nun kan hman loh rei chu thuhran Khawthlang lam aṭangin a bag bagin coconut a chah a, a tui min intir reng a, nau an fai lo thei lo. 

"Mipa leh hmeichhia an ni e. An hmelṭha phek phuk lutuk" Nurse pakhat zawkin a tih chuan, "Lalpa, ka lawm e" ka ti sep. 

Kan pa a rawn lang ta a, a mitah mittui a tling nia! Mahse, hlim hmel a pu thung si. Ka chalah a rawn fawp a, ka kut rawn vuanin, "Sûksûkpui, ka hmangaih che.. " a ti tham ṭuak a. Hnai taka inmelhin kan nui dun ta sak a. 

A TAWP TA.