Sangbera 9

SANGBERA (9)

Ziaktu : Toni Râlte

A thusawi awmzia hrethiam lo fê chuan ka lo melh kâwk a. "Khatin makti viau suh. I inhriatchian ang zat khan ka hrechiang che" a ti leh hmiah. Min hrechiang viau hi mak ka ti lo naa engtin nge min hriatchian dan erawh ka hrethiam hauh lo. "I sawi awmzia pakhatmah ka hrethiam lo" ka ti ro hak a. 

Nui hukin, "I hre chho zel mai ang. Thil pakhat pawimawh hmasa ber erawh, May, Pathian i hnaih a ṭha" a ti ta a. Ka che hrut ringawt. Ka rin loh lam daihin Pathian a rawn sawikai bawk si. Kan zanin tlai boruak zet chu a. Kimtea lah a muhil char char a, "Ka lakah Pathian a ṭha ve lo" ka ti chhum hmak. 

"A ṭha a niang, i la dam te, Kimtea a la dam te..engkim vangte pawhin" a ti duah a. Ṭawngkam thiam tak a ni bik lo tih ka hria. 

Hetia a sawi lai reng pawn kan chawhmeh siam tur chu a buaipui pah tho a, kei erawh chu chairah ka ṭhu deuh tawp. Bakah octopus te kha mi râp deuh a, ka khawih ṭha ngam meuh lo. 

"Eng nge a ṭhatna? Ka nu min laksak a, ka û min laksak leh a. Ti nge hausa ve deuh ten min piantir loh? Mi chhiahhlawh ni turin min siam a. Eng nge a ṭhat vakna?" Ka thiam ang tawk chuan ka ti deuh hlawk hlawk a. Ka thin a rawn tâwt ṭan ta bawk. A mak a ni, Pathian lam sawi te, Kimtea'n ka hriat ngei tura tu emaw sermon a play changte hian keimahah hian tâwt riauna, thawk tiharsa khawpa awm nawm lohna hi a lo awm mai ṭhin. Mi hlim ṭhenkhat chuan min hmu se, "Ramhuaiin a tibuai che a nih hi" an ti leh tawh maithei. 

Chawhmeh chhuangkaiin a rawn kal hnai hlek a, "I nu kha natna hrehawm tak vei chung khan la dam zel se, dam thei si lo, thi thei si lo ni ta se, i awm a nawm zawk i ring em? I û pawh mahni inthlahrung leh inkiltawih reng renga a nitin nun hmang chungin wheelchair-ah khan ṭhu reng se , nuam i ti zawk ang maw? …may, ṭawngkam ka thiam ve tawk lo, mahse, ka thusawi hi ngaihtuah chiang la aw. Tin, vawikhatmah chhiahhlawh tih ṭawngkam hi sawi leh tawh ngai suh. Chhiahhlawh i ni lo va, midangte nun awlsam zawk nana ṭanpuitu i ni. " A ti ve ta duah a. Ṭhahnem a ngaih hmel kher mai. Pathian laka ka rilru hi chu ka û thih sarhû lai khan a lo hre tawh a, mahse, kha chen he lam kaihhnawih a sawi ngai miah lo. Zanina chaw ei a lo duh chhan pawh hi min counselling a duh vang em mawni. Amah lah hi a Pathian mi hmel vak bik si loh, ka sawi awmzia chu hei ṭhalai pawla inhmanga a kûl a taia ṭang a ni bawk si lo va, chu chuan min tichiâi ve lo thei lo. 

"Ni e, ka nu kha chu khatia a kal kha ka lawmpui. A nâ kha a nâ êm a. Ka û erawh min la dampuiin rorel tur tal pawn lo awm ve mai mai se ka la duh" tlema inthlahdul hlek hian ka ti a. Ka hun liam tawh ka chhuikir zut zut bawk. 

"A chang chuan keipawh hian a awm lo emaw ka ti fô. Mahse, a awm a. A hun takah a che ṭhin. Nang pawh hian i ring alawm, May, zêp buai duh suh. I ring a, i rin luatah i beisei ang chhanna i hmuh loh vangin huat i tum mai chauh a ni. I haw lo, i inla khauh rih mai mai" a ti ta nghut nghut a. A sawi dik lo ka ti ngam miah lo. Ni e, Kimtea khawsik ka hriat phat pawh khan ṭawngṭai kha a rawn lang nghal a, mahse, a lakah ka hel tih ka hrechhuak chawpchilh a, ka ṭhulh leh daih a nih kha. Ka inrin hmain ka kut chu a rawn vuan a, a kut lian leh dam thlup chuan a hmer vawng vawng bawk, tunah tak hi chuan Evangelist speaker ni mai âwma mawi a ni. Ka mita chiang taka min enin, "Pathian tel ve kan phal lohna hmun chu a ruak asin. May, i ruak êm êm tih ka hria. " A ti zawi ruih a. Ka rilruah a tla na viau a niang, ka lo chhing vang vang. Ka nunin mu leh mal a neih vak loh dan, eng ber hi nge ka damchhan tih pawh chiang zo tawh lo khawpin harsatna thlipuiin min nuai a. Ka tum ber leh ka tihtheih awmchhun nia ka hriat chu ka nau Kimtea hlawhtlintir kha a ni mai a, sum menin ka meng a ni ber. Chhuak ila, mi sumdawnna hrang hrang ka han hmu a, "Ti ve ta ila.." tih bak ka rilruah a lang ngai lo. Ka la thawkrim tawk lo a nih hi, kan sum khawlsa a tlem tawh sia, zanah te hian eng emaw tak ti ve ila, chawhmeh eng ilo lei ve nan pawh tih te hi ka thil ngaihtuah nasat pawl a ni fô, kuhva te hi ka siam ve mai dawn em niang tih te, U Sangi hnung hi zui ila, sumdawnna lian leh zau zawk te ngaihtuah zel ila tih thute hi ka mut dawna ka ngaihtuahna luahtu an ni ṭhin. Sum a awm chuan engkim tihtheihah ka ngai a, chu chuan ka nun a tiruak zualin ṭhian kawm te min tichâk lo zo vek zel. Ngaihtuah mah teh, Aizawlah hei chen kan awm ve ta a, ṭhian bulfûk tia sawi theih pakhatmah ka la nei lo a nia. Hengte hian ka inhung bikzia leh keima khawvel bîka ka chen nasatzia a pholang viau awm e. 

"Chu chu engvanga sawi nge i nih? Min counselling tihna mi?" Namnul tum tak hian ka ti a. A nui duh ṭhak lo. 

"Ka hmanhmawh lo vang. Mahse, kan bulṭanna pawh a ṭha e. Khaw maw sauce kha lo ban lawk" a ti leh ta daih a, Pathian thu lam chu a sawi zui leh ta miah lo. Kimtea a rawn tho va, "Ka ril a va tiṭâm e. " Tiin kan chawhmeh siam rîm chu a hip vang vang, a pang ka deh chuan a lo dai diak mai. A ruh chuktuah erawh nâ a la ti deuh. "May, alu hi bai thak la, dal a la awm bawk a, a tawk reng" a octopus chan pah chuan Sangbera chuan a ti zung zung a. 

"Aw le boss" ka lo ti uang zauh. Mi rawn thlêk hâw a, "I âwm ang reuh ṭhin" a ti duh lek. Kimtea'n, "Mukbang ka'n en teh ang,. Ka chaw ei a tui nan" a ti ta pek a. Chaw ei dawna en hi a ching ve hrim hrim. 

Alu ka vel mawlh mawlh laiin U Rini leh Terini te an rawn lut leh ta hlawl. Thawk ka lo la hawk ringawt. Ka eng emawti nin riau alawm, ka sawi thiam lo. U Rini chuan, "Lsa tlin lawm nan chaw eia lo sawm che u kan tum a. Mahse, Lsa khan mikhual i neih thu kha a sawi sia, Sangbera lek " a ti nang nang a. Terini erawh chuan Sangbera chu a lo melh deuh ngat ngat. 

"Nia, mahnia chaw ei hi a nuam lo êm a, bakah Kimtea'n sea food a ei châk a.." Sangbera chuan a lo ti ve a. A che leh nghal mawlh mawlh bawk. 

Terini chuan, "Octopus chu a..mi râp reuh e. Kaikuang kha chu a tui dawn a nih kha, Mayi chuan a siam thiam leh tawp nang.." tiêl lek lek hian a ti a. "Thiam ve nang, mahse, kha a awm a.." tiin Sangbera ka melh zauh. 

U Rini chu ka ngaihbel vang pawh ni lo hian lungawi lohna a nei tih ka hrethiam ve tlat. A nui lui thei hlawl lo, a mitmeng lah a thîp râm bawk si, a nau bulah, "Chho ila" a ti nghat a. 

Terini zawk chuan, "Ee..ka lo kal chhan ka la sawi lo tak. Kimte, in sir Vena number ka duh a, i nei em? I number ka lo nei bawk si lo" tiin ka nau chu a va pan a, an inpe ta a niang. Chhoh an tum a, Rawn lehhawi leh hramin U Rini chuan, "May, Lsa a titau a nia..i timak ve bawk a" a ti deuh sak a. A kal zui daih bawk si. Hrilhhai zetin ka meng hrû ringawt. Sangbera zawk chuan, "A tihtheih a va tlem ve, I U Rini chu" a ti a. A nui hawk hawk bawk. Ka rin loh deuha ngaih loh lama a lo ngai lo chu ka lawm angreng. Hrechhuak thut niawm takin, "Taka! I inbual duh em? I la inbual awm si lo" ka ti hluai a. 

"Ka rawn phei hma khan ka inbual alawm, ka balh hmel em ni " a ti deuh hluk a. "Balh hmel loh e." Ka ti sap. 

Dar 6-ah chaw chu kan ei a, kan dawhkan lian lem lo takah chuan Aizawl kan awm aṭanga a hmasa ber ni turin Sangbera chawhmeh siamte chu kan hung ve dal mai. Chaw ei hmain a beer kha a va lem lawk a, ka hmu reng naa Kimtea ka venthâwn vangin engmah ka sawi lem lo. Ka beisei aia tam Kimtea pawn a ei ve thei a, damloh pawh hian chaw hi thlah lo ila a zia mai. Kan eina ka seng felin ka silfai vek a. Hahdam hmel zetin ṭhutthleng seiah a ṭhu a, mei a zu hlat hlat bawk. A zial zu lai hi ka hmu tam viau lo naa, inhmeh ka ti deuh tlat nia. La haw mai a tum loh hmel. Kimtea pawh a pindanah, "Ka test theih thut takin ka va chhiar ang e" tiin a lut a. Lehkha hi zir rawh tih ṭâwng ṭâwng a ngai ngai lo. Tichuan, kan pahnih chauhin kan ṭhu dun leh ta ran mai. U Rini a rawn chhuk leh ka hlau, dik tak chuan Sangbera hi ka va ngaizawng pawh a ni lo, U Rini leh Remruati te hi chu ngaizawng lo se ka ti ve tawp, an phû lo ka ti a niang. 

"Rini te in hi luah tawh lo u la ṭha ka ti" a ti a. 

"Ngati" ka lo ti teh tawp. 

"Rim ve che duh paw'n min lo rim zel sia" nuihza insûm zet hian a ti a. Keipawh ka nui. 

"Beiseina i pe a ni mai lawm" ka'n ti deuh hmak a. 

"Hmm, ka pek awm pawh ka hre lo. Kan zirho lai pawh khan a mizia hi mak ka ti sa hrim hrim" sawi ṭha duh vak lo hian a ti a. 

"I ngaihzawn ṭhin reng kha, in zir ho lai te chuan" ka ti leh tâwng. Ka hriatdan kha ni miau hek, makti hmel a pu deuh zawk a, insiamrem leh vatin, "Tak tak nise Rini chu a lawm awm" a ti duh lek. 

"Ih, hmannia min hrilh zawh tak loh kha min hrilh leh tawh la, a laklawh e" ka ti a. Hre tawh mah ila, ama kâ aṭang ngeia hriat ka duh tlat. "A pawimawh viau hran lo asin. " A ti nghut a, ka ngawih tak rengah chuan, "A thi tawh a,a thlân chu i hmuh kha. Hmeichhe danglam leh pawisawi lo tak a ni a, a derthawng a, kha khan a nun a tihtawi phah ta a nih kha..a laka ka inthiam lohna avangin amah anga dinhmun khirha dingte puih ka duh a. Nang hi a hnuhnungber ni thei la ka duh ta " a ti duah a. A sawi awmzia ka hrethiam em em lo naa, ka bo lutuk lem lo.

"Min pui nasa tawk tawh alawm, nia, duhtawk tawh rawh" ka lo ti ve khauh a, "I ngaihtuahna hi a dangdai thei. " A ti hluk ringawt. A lungawi vak lo êm mawni. 

"A nia lawm, nang hi chu awm lo la, kan khawngaihthlak lehzual dan tur hi. I fel si, nupui fel deuh nei la, min chhawr zui zel rawh aw' ka ti ham ham a. A hma ang khan ka zan rûn duh tawh bîk lo, a hminga koh erawh ka la tîm ve deuh. 

Za deuhin a nui hawk hawk a, "I U Rini hi ka nei mai dawn mi niang" mei nei zeta a tih chuan ka naupanchhiatna rawn lang nghalin, "A ngai lo, ani chu.." ka lo ti vat. A nuih a za telh telh thung. 

"Ih, englo, engtin nge ka chanchin hi i hriat? Min hriatchian hmel sia" ka ti a, ka thutak angreng. Ani pawh a nui tawp hmak a, "Mizoram zimtêah tumah chhui hi kan harsa hleinem. " A ti a.

"Chupawhnise, ti nge min hriatchian kher kha i duh? Heti ve mai hi ka ni sia"ka ti a. 

"Ka hnathawk turte chu ka hriat atana ṭul ka tih chin ka chhui ve tawp zel alawm. " A ti mai a, ṭawngsual ka hlauh vangin ka ngawi ta reng. 

"Mipa hi engvangin nge i huata i hlat? Han chhang ve teh" a ti sup a. 

Ka heh liak zauhin, "Huat ka duh vangin' ka ti thâm ṭiak. 

"Samuela vanga khawvel mipa zawng zawng angkhata i ngai a nih chuan ropui ka ti ngawt ang che" a ti hriam hraih a. Ka zâm deuh titih ringawt mawle. 

"Amah vang kher pawh a ni lo" ka ti niah niah a, min en reng tih ka hria.."Ih, mipa ngaihsak hman ka ni lo alawm, ka dinhmun i hriat hi. " Ka ti chhuak thei hram. 

"Chu chu a chhan diktak ni zawk se i ropui lehzual sawt ang" a tih leh chuan ka thinrim ringawt. Rum fahrana melhin,"Eng nge i hriat a? Zawhna min zawt sek suh. Ka nun a nia, ka thu thu alawm" ka ti nghat nghat. 

"Tihthinrim che tuma sawi ka ni lo. Ka nupui i nih huna insiamrem ka mamawhna tur hriat lawk ka tum mai chauh" a tih chuan ka melh kâwk a, tawng tuma ka ân laiin, "Ka haw tawh ang e. Chuan, i nau vangin naktuk chawlh ka pe ang che." A ti dam leh thlup a, biak leh hman rual lohin a chhuak leh daih. Hmela mai mai chu le..min zah loh vang nge min hmuhsit vang ni ang? Min hmuhsit hi chu ka ring phal lo, min khawngaihna leh duhsakna zozai te avangin. Min fiam kual a châk a niang tih dawnin kan kum ka ngaihtuah a, midang fiam kual nan hun a nei lo tih hretu ka ni bawk si. Min lo duh em mawni le..ka ding hluai a, lai zetin ka ṭhu leh. Keimah chauha awm e ti lo chuan ka zak chem chem nia mawle. Sangbera hian min duh tak tak ang tih ka hlau ta riau! Ka hlauhna chhan lah hi ka duh lo lutuk..ka rilru sak leh khauh tawh a nêm ka hlauh vang chauhin min ngaizawng lose ka ti a nih chu..Mayi hi ama tawkah a va buai sî êm..

Ka mu hma ta daih a, mut hmaa Kimtea ka va en khan a khua chu a lo sik rih lo va, mutpui ka tum lah chuan a intitlangval ve tawh sia a duh bik si lo. "I khuasik chuan min lo call harh mai rawh" ka ti ta ngawt a. Zan danga ka muthilh hma theih theih nen zanin chu ka let ka let mai. Sangbera thusawi zawng zawngte ka ngaihtuah let a. "Hmeichhe dik tak i nih theih nan " te kha a tia. Hmeichhe diktak ka ni reng sia..hriatthiam nghal theih tur hian sawi ve mai tur a nia. 

Ka muhil thei lo chuan IG-ah ka va stalk ta vel a, ka awmdan chu ka inzahpui tawp. Ka en châk miau sia lawm le. Eng thlalak thar mah a lo dah lo va, Remruati ka stalk leh hram. Ka rin ang chiahin Sangbera nen Sangbera car-a an chuan dunna a rawn dah leh a, comment ka en chhuak leh vek a, Sangbera'n a comment miah lo! Chu chauh pawh chuan ka thaw a tidam. A va ho e aw. Ka ṭhu ta hlawl a, ngawi teh u, kei hian Sangbera hi ka lo duh ve reng tihna em ni? Ka ning a..

Zing dar 3 rik hma deuhin Kimtea'n min rawn kai tho va. Ka va phei ta vat, a lo khawsik a lo sang hle mai a! A lu lah chu na a ti bawk si. Chiâi loh hram tumin damdawi chu ka pe vat vat a, a pang sa vûr chu puanhuhin ka dep bawk. Chu chu vâwt a ti leh bawk si, aw..a tawrh ai te hi tuar thei ila ka tuar thei reng asin le. Kan unautê chuan mangang leh baihvai zetin khawvar thleng kan inṭhutchilh ta ran a. Leilung a rawn lan takah chuan a khawsik leh luna pawn kiansan vein a muhil thei ta hram. Kan in admit lo kha ka inchhir ṭêp a ni. Hetiang a nih zel dawn chuan vawiinah tihdan ngaihtuah mai chi a ni. Ka mut leh chuan ka mu rei lutuk ang tih ka hlau sia, luhai leh rit bûrin khawsak ka rel a. Nimin lama kan ei ban a la awm bawk a, eirawngbawl a ngai lo zawk a. 

Zirtawpni a ni tih ka hriat rualin Baby ten Sangbera party tura an sawm zan kha a ni tih ka hre nghal. Mahse, kei pawh Lsa'n min sawm ve tho a, ka kal erawh a rinawm loh. Lsa ngaihtuah lai takin a rawn lut hlawl a, "Kimtea chu eng nge a an a?" A rawn ti lut nghal. 

"A zia a ni mai" ka ti ringawt. "Chuan, engtin nge zanin chu i thei ang em?" A ti a. Min melh rân bawk. 

"Ka hre lo, ka theih pawh ka ring chiah lo" ka ti sep a. 

"Tihdan ka hria, nimina in tih ang khan hetah ei ve mai ila" a ti ta hlauh a. Chutiang em em han hnial chu ka hreh tawh si, "A pawi hleinem.." ka ti ve ta a. A hmel a hlim sawt. 

"Kei pawh vawiin chu in luah tur ka zawng ang ka tia, ka lo bazar haw nghal dawn nia" a ti mawlh mawlh a. 

"In luah hran chu i tum ta mi?" Ka lo ti vat. 

"Tum e, chenho reng chu eng emaw a awm ṭhin" a ti mai a. A dik viau mai. 

"He mi vengah tho nge?" Ka tih chuan, "Ni lo maithei, ka la chiang lo. Ka lo fin zawk mai dawn che u mi?" A ti fiamthu hlut a. 

A haw hnu lawkah Kimtea a tho harh peih rih si lo va, ka pum a ruak bawk nen, chaw ka ei a. Sangbera a la reh..ka biak hmasak chhan tur ka hre lo bawk a, ka ngawi ve tlat. Bakah party-naah te a kal dawn vel a, ka be châk lo. Hmm..ve ngawt a. 

Kimtea chu ka va en leh a, thawh a lo tum mek, ka pui ta vat a. "I han in admit mai ang hmiang, tiang chu a zia lo êm mai" ka ti a. 

"Ka ṭhian ten maw rul sa emaw zu a tha an tia sin" a lo ti daih. 

"A vâng awm ê, rul sa te chu" ka lo ti ve mai a. 

Min melh ṭha ngam loin, "Zu chu a awm ang" a ti sup. Zu ka huatzia a hre bawk a, sawi ringawt pawh a inthlahrung viau. "A ṭha tak tak dawn mawni le. An chiang maw!" Ka ti hliai a. 

"Umm, Angaihi nu pawh an in tir a, a dam hmiah alawm" a ti sauh sauh a. Dam nana hman dawn te chuan ka remti lo hran lo. "Mahse, tu nge kan leitir ang? Khawi ami nge kan lei ang?" Ka ti hû a. 

"U Mka khian a hriat ka ring a, i be ngam em?" A ti ta a. Ngam thu-ah te chuan ngam tehlul e. Ka call nghal ta chung a. Inah a lo awm remchang hlauh bawk a, ka ko thla ta vat. Kimtea vel te chu ka han sawi zung zung a, a nui ṭhâw reng a, "Hmela, ka in tur emaw i tia mi? Min tlawmngaihsak mai rawh, lamna tur kan hre ve si lo" ka ti a. No khat lek a lei theih loh a tih si avangin an vengah zu ṭha pangngai um khat kha 500 a lo nia, amah Mka lah chuan, "Ka in ve duh alawm, ka da sia" a ti ve sek nen, ₹ 500 kentir chuan ka tir liam ta a. A dam leh si loh chuan ka thinrim ngawt ang. 

U Mawii'n min lo call a, anni nen hian kan inbe deuh reng zel a, tunhnaiah keimah zawk hian ka be hman ta lo deuh a. "Hei i nau Rempuii hi a thi pût a reh thei tlat lo mai a, kan lo chhohpui mai dawn em mawni kan tia, hetah chuan tihngaihna an hre vak lo va" a rawn ti a. Rempuii chu an fanu û ber dawttu kha a ni. U Mawii te hi ka û mai a, a nihna takah chuan ka nuteii tur leh u Kunga pawh ka patea tur a nia. Mahse, an la naupang ve tho sia, kan in û ta nawk nawk kha a nia. 

"Ehe! A va zia lo ve, lo chhohpui rawh u, in nupain nge ?" Ka ti sawk sawk a. 

"I Û Kunga chu hei vawk kan vulh leh nual sia, a lo kal ve thei lo vang, kei leh Nubawihi ten kan rawn kalpui ang" a ti a. Nubawihi chu an fa û ber a ni thung. Anni unau hi lehkha zirna lamah an tui vak lo nge, an bang ve ve tawh a niawm e. 

"Aw lo kal rawh u, helamah te chuan tihdan a awm zawk ang" ka ti a. Ka tana mi ṭha te tan hi chuan ka inphal ve viau zel. A sum leh pai ang zawngin kan inpui thei lo bawk nen. 

Ka rin aiin Mka chu a rawn let hma. Bottle-ah a thli chhuak a, no khat tui pawlh loh chu Kimtea a pe ta. Ka en reng chuan a in ngam loh ka hlauh avangin pindanah ka lut ta daih a. Zu akara local rim phei chu rimchhia ka tih êm vangin, "Dah bo vat teh" Mka bulah ka ti a, "Ka in ve lawk ang" tiin a thli a. Kawngka a inhawnsa avangin a zu thli chhuak lai kher kher chu Sangbera'n a rawn hmu leh ta tlat! Mka pawh chuan a thukru vat naa, a hmu hman vek tho. 

Min rawn en a, a ngaihna a hriat vak loh hmel, namnul tum zetin, "Mka nih hi, kan in chung tlangval kha..Dengue -ah zu a ṭha an tia, Kimtea ka lo intir a..a bang a in a nih kha" ka lo ti zawt zawt. Ka dangte chu a nal reuh mang e. 

A rum nghut ringawt. Mka lah hi a chimawm ve sia, "Eng nge i insawifiah zung zung kher a" a lo ti! Ka va melh nghek ringawt. Sangbera chuan Kimtea pangte chu dekin, "Zing lamah i khua a sik em?" A ti a. Kimtea lah chuan zep buai hek lo kan inkaihthawh dante chu a sawi ta mial mial a. 

Na angreng zeta min rawn melhin, "Thil thleng a awm chuan min hrilh rawh ka tih kha" a ti a. "A tlai tawh sia" ka ti ringawt. 

A inchei nalhin a smart angreng sia, mi hmuh tur pawimawh deuh a nei a nih ka ring. Mka pawh a chhuak ta a. Ka thaw huai. Ka nau awm lai laiin, "Kha mi lo zawk mipa nen khan zanah chuan in chhuak dawn ta em?" A ti ta nghut a. 

"Chhuak chi ka nih loh hi" ka lo ti hlak hlak. 

"Chuan" a ti hû a. 

"Hetah chaw a rawn ei dawn" ka ti liam puat a. A mitmeng inthlak ranzia leh Kimtea vanga a inthunun ran leh sizia kha aw. Mipa inthunun thei zet chu a ni. Lungtum satliah a ni lo, Lungpui a nih hi,a nghet tlut mai a..

"A ṭha lawm,. Ka rawn bia ang che. Kimte, lo dam la aw.." tiin a lu-ah a tuai zauh a. A chhuak leh nghal daih. Tihian hmanhmawh zet zet hian min rawn tlawh kawi ve a, a lawmawm lamah ngai mai teh ang. U Sangi ka bia a, "I buai loh chuan lo leng la..kan khua a har sia" ka va ti a. 

"Awii, mate, lal Kawnga nî a lo zin a, kalsan hleihtheih pawh a ni lo. " A rawn ti a. An buai ve thin êm bawk a ni. Vawiin chu mut nan hmang mai teh ang. Kimtea chu a rui niin ka hria, a bu lûk lûk a, tui pawlh loh no khat tawp chu a tan chuan ruihna tham a ni hrim hrim. Khumah ka muttir ta daih a. Kawngka ka kalh sauh sauh a, Ṭhutthleng seiah ka mu ve ta hlûn mai. 

Ka lo muhil ve sek a niang. Ka phone ri char char avangin ka harh ta hlawl a. U Mawii a lo nia. Hlauthawng ru deuhin ka la a, "Hei kan lo thang mêk a, dar 4 bwr velah kan lo thlen ka ring, in awmna kan hre si lo va, engtin nge niang?" A rawn ti a. Ka lo hmuah tur thu ka hrilh ta mai. U Mawii te an lo kal chuan Lsa pawn chaw a rawn ei theih loh hmel, hrilh hriat vat loh chuan..ka call ta chung chung a. Thil awmze diktak ka han sawi takah chuan mi pangngai a ni bawk a, a hrethiam viau mai. "Nidangah a ni mai, dam tlang hlawm phawt rawh u..Terini te ho nen kan ei mai ang" a ti a. Ka lawm tak tak a ni. Kei akara min duhsaktu kha a ni ve sia. Thingpui ka lum a, Sangbera'n a rawn call ta chiah. Ka lo châng ru deuh em mawni..

Lsa vel a sawi hmain U Mawii te chungchang chu ka sawi ta daih a. 

"A va pawi ve aw. Dr. Rintea biak ran a ngai a nih chu, vawiin tlaiah an hman loh paw'n naktuk atan in book lawk loh chuan" a ti leh ta zung zung. Kei ai hian thil a hre zawk ziah a, a fing zawk ziah bawk. Keite chu he lam doctor pawh ka hre ve reng reng hleinem. 

"A number ka nei hleinem, engtin nge niang" ka ti hû a. "Ka lo bia ang. Zanah dar 9 hmain lo mu suh aw. Ka rawn kal ang" a ti a. Kan inbiakna kan titawp nghal. Thupek tharlam hi min pe deuh reng a, ka thin lah a rim ngai si lo. A thu ve bawk nen. 

Kimtea lah a chattha nge a harh thei reng reng lo mai, ka kaitho duh lo law law. Dampui se ka ti mang e aw. Rawng pawh ka bâwl hma ta deuh. Nu Zuali dawr bulah hian sangha zuar a awm a, U Mawii te an lo kal sia tiin ka han lei ve a. Mutna velah hian kan buai deuh maithei. Puanthuah hi ka ngaihtuah ve viau naa, neih tam tak tak hi a awm hleithei bik lo. Tihdan a awm ve mai ang chu maw. Ka inbual a, Kimtea pawh a rawn harh ve tawh, a ni bûr mai a, a luak te a chhuak bawk nen. U Mawii te hmuak turin ka chhuahsan lo thei si lo. 

Dar 4-ah chuan ka lo hmuahna tur hmunah ka awm vâng tawh. Ka phone ka hmeh mual mual laiin, "May" a rawn ti hlut a. A aw avang chuan ka hawi rang kher mai. Samuela, ka mihring huat em em a ni miau a. Hman ai khan a hmel pawh a lo puitling ve tawh a, a incheina man chu a to maithei, mahse, a ṭawp ru tlat. Ka sawi thiam lo. 

"Nang maw!" Ka ti hliai ringawt. 

"I dam maw?" Tiin a kut a rawn phar chhuak a. Ka vawnsak lo chiang kher mai. 

"I la danglam lo ni maw?" Te chu a la ti ta deuh deuh. Ka be châk hlawl lo tih a hrethiam lo nge mawni ..

"Ka danglam ring suh" ka ti ram hmak a. A nui deuh hûi a, a hmelte hi chu a chhia pawh a ni lo. Mahse, ka ten tawh. 

"Aizawl i ngeih a ni maw..i chhe lo tawh hle mai" a ti leh phei chu pet zawt ka châk kher mai. Mi an awm ve bawk si. Kan in awmna min zawt chu ka sawi lo chiang teh asin aw. U Mawii'n min lo call ta hlauh a, ka kalsan ta daih. 

U Mawii te nena kan han inhmu leh chu kan inngai tawh bawk a, kan inkuah chung chung mai. Rempuii erawh a dâng bel mai a, a zawiin a chau tih a hriat hle. Taxi la-in kan in lam kan pan ta dial a. An chau ve bawk a, zanriah kan ei kham meuh chuan Nubawihi pawh a muthlu deuh titih der mai. Kimtea nen kan mu dun ang a, ka khum hi a hmaa Kimtea nena kan mutdunna tho kha a nia, a zau ve bawk a, tah chuan an nufa chuan inhnawh mai se ka ti ta ngawt. An hreh lem lo bawk a. Dar 8 ah chuan min mutsan ta diak a, kei erawh thupek ka hmu si, mutsan ngam si lo, lo nghak anga lan hreh si hian ka awm a. Ka mawng a za sek, ka call ngam chiah si lo. Dar 9 rik nan 5 mins a la awm ang tihin kawngka a rawn kik ta a. Ka va tho rang tak. A palian mai sia, kawngka te chu a zim sawt ni hian ka hria. 

Kan ṭhu dun ta kar a. U Mawii te vel chu min zawt a, Dr. Rintea a biak tawh thu leh naktuk dar 10-aṭanga a hmuh theih tur thu a sawi ta a. "Ka lawm lutuk thin, i lo awm hi" ka ti ve hliai a, ka lawm tak tak reng a. Min rawn en a, ka lai leh si. Amah pawh en lo chuan, "Baby te bulah khan i kal ta mi?" Ka ti sep a. Zawh loh hram ka duh tehreng nen chuan aw..

"Ka kal i ring em?" A ti hmuk a, "Ring" ka ti vat. 

"I ring sual thei em mai. Bungrua a lo thleng a, ka buaipui alawm." A ti a. Sawi mai tur ka hre si lo chuan, "Thingpui ka va lum ang e" tih leh din ka rual a, ka kuta rawn vuan chat, "Nakinah. Ṭhu phawt teh" a ti a. 

Ka ṭhu leh ta nge nge. "May..nimin aṭang khan i danglam tih i inhria em?" A ti thawp sup a. Chhuat lam ka melh char char. "Ka danglam pawh ka hre lo" ka ti sap a. 

"A nih ti nge dar 9 rik hmaa i mut loh?" A ti ta a. Ka va melh vak, "Min lo nghak rawh i ti a nih kha" ka ti hlar a. 

"A nih chuan ka thu chu ti nge i va awih ve" a ti lehzel, Hmela mai mai chu aw. 

"I ninawm..i hnuaia thawk ka nia, i hre vek" ka ti leh hmarh hmarh, ka thinrim tak tak awzâwng si lo. A nui suk a, "I duhawm reuh" a ti a. Ka hmui ka tipawrh ringawt. 

"I inhung bîkna ka su hawng dawn ka tih kha" a ti leh a. A inringtawk lutuk chu ka ngei ṭêp. 

"Chutiang rilru ka pu lo" ka ti hmak a. 

"Baby te bula ka kal pawh i rilru chuan a phal lo..tiraw?" A tih leh zet phei chuan, "Haw rawh" ka tih tak ngawt kha. Ka rilru kil khatah erawh, "May, nêm suh, mipa te infiamna hmanrua ni suh" tiin ka infuih ve mawlh mawlh. Ka bula ṭhu mêk, mipa danglam tak hîpna hi a châk roh si a, kei hmeichhe mawlmang lutuk hi Samua ai mah khan min rap hrual ang tih a hlauhawm êm a ni. 

"Thingpui chu in ila,. Ka ril a ṭâm ve ṭêp" a tih chuan ka harh zawk. "Chaw i la ei na nge?" Ka ti a. A bu nghut. "Ei rawh, chaw kan ei bâng alawm, ka siam ang aw" intibengvar zetin ka ti ve sawk sawk a. 

"Ei lo law law ang. Thingpui a tawk mai" a ti a. Ka nawrlui duh lem lo. Thingpui ka siamsak lai chuan phone-ah tu emaw a bia a. "Bulṭantu angah a inngai em ni? A share pe la, kaltir rawh. " A ti rum ûl a. An sumdawnna chungchang vel a nih ka ring. Ka bula a mize danglam ve vek zel hi a mak ve ê..

"Naktukah chuan Lungleiah ka zin lawk a ngai a. Lângin..ka rawn buaipui hman dawn lo che u a. Chanchin min lo hrilh ve la aw. " A ti a,. "Nia, i va zin laklawh" ka lo ti a. 

"Nia, chhungkaw thil lam zawk a nia" a ti mai a. Ka zawt thui duh lem lo. Thingpui a in zawhah chuan hawn a tum hnai a, "Ka û te pawh an mu hma sia, i hmu ve hman si lo" ka ti ve ngial a. "An haw nghal bik nang. Ka haw ang, zingah chhuah ka tum sia, lo inenkawlṭha la " tiin ka chalah a rawn fâwp zauh. Ka lo îp zawk naa, ka hmuia a fawh ang ni loin a dam thlap mai. Ṭha tak chuan kan inthlah ve a. Kan awmdan hi ka hrethiam ta mang hlek lo mai. Min ngaihsak si, kei lahin ka lo dawngsawng ve zel bawk sia..hmm, a hnuaia ka inhlawha pawisa ka thawhchhuah theih zel dawn chuan a ṭhaah ngai ang. Hei aia hna nuam leh hlawh tam hi kei te chuan khawiahmah ka hlawh pha dawn si lo. 

Ka mu fel deuh chiah tihin in chung lamah thawm bengchheng zet a rawn awm ta a. Ka ṭhu leh hlawl. An intibuai niin ka hria, thinrim taka âng buan buan thawm a ni tlat. Ka hâwkdâk vak lo naa, Kawngka hawngin ka va ngaithla rû kûr..ka rindan chiah. Terini aw hian thinrim hmel zet hian, "Lawmsang, i va zakthei lo ve. Thlah rawh. Tenawmpa" a ti tuar tuar a. Pa Zothana aw hian, "In va bengchheng ve mawle..Lawmsang, eng nge a? Ti nge Robina kha kut i thlak?" A ti khur khur a. Lsa aw hian, "Terini hi ka farnu ang tho a nia, a mualpho ka duh loh vangin tiang hi a thleng a nih hi. Robina nen riahdun an tum ka khap a, Terini ka rawn hruai haw lui a, min rawn umzuiin kut min rawn thlak a nih kha" a ti ta hmiah hmiah a. Robina ni ngei tur chuan, "Zawnga, kan nu nen kan inkarah hian rawn inrawlh ve tawh suh aw. An awmpui mai mai lehnghal" a ti thur thur a. An ri leh nghal buan buan. A tu ber nge ṭawng pawh ka hre thei tawh lo. "A ho em mai" ti sapin kawngka ka kalh a, ka mu leh ta daih. Mahse, 20 mins vel hnuah kawngka an rawn kik a, ka hlauthawng deuh, anni zurui hian min rawn eng emaw te hi an tum a ni thei ang em? Ka phone a rawn ri zat a, Lsa a ni. "May, khawngaihin lo hawng lawk mai teh a.." a rawn ti a. Hmanhmawh zetin ka va hawng ta a. 

A ruckshack leh air bag nen a lo ding ran mai. A hnar thi chu a la tawp fel chiah lo nge ni thisen tlem azawng a la kai a, a hmui pawh a kak deuh a nih hmel. Ka ko lut ta vat a. 

"Zanin chauh ka lo riak thei ang em?" A ti ta a. 

"Thei tehreng mai, in buaina kha ka lo hre ve deuh a, a zia lo hle mai. An hnawtchhuak che tihna mi?" Ka ti ta phawng phawng a. 

Rilru nat hmel fê hian, "Umm, ka pu chu a fate an thu êm mai a. Ka thlavang pawh a hauh ngam lo a nih kha..an fanu hurherh lutuk tihmualpho pawh hreh lo, a bialpa ṭenghnêng zet kha kei aiin a hlu zawk a niang. U Rini chu awm se min pui ang. " A ti bawrh bawrh a, a puakkeh ve a nih dawn hi. 

"Va inphih fai phawt teh, kha i hnar thi te kha tireh phawt ang" ka ti a. A che ve mai bawk. A bag te chu lo dah ṭhatsakin puanthuah ka va laksak a, ṭhutthleng seiah chuan anni mipa chu an sei ve angreng sia, a hrehawm ka ring. "Ṭhutthlengah khan ka mu thei tho ang" a ti naa. Ka phahsak ta tho a. 

."A zia lo hle mai, i û te lo zin lai tak a ni bawk sia, mahse, in luah tur ka hmu tawh a. Naktukah ka insuan lut mai ang. " Inthlahrun hmel zet hian a ti a. Ka khawngaih reuh, "I ho lutuk, i duh chen chen i awm thei alawm. Hmanhmawh suh,. " Ka ti ve luam a. A hmui kakah chuan pemthar damdawi ka hnawihsak a. Kan inhnaih angreng bawk nen, a hmui ka hnawihsak lai chuan zawitê hian, "May..ka duh che.." a ti a. Zu rim a rawn nam hak bawk. Ka tawlh hnung nghal dâwrh. 

"Ka tihpalh" a ti leh vat nangin, "Muttui phawt.." ka ti a. Ngawi rengin ka luhsan ta a. Rilruah erawh a inthlahrung lutuk hmel kha khawngaihna ka nei. A rui ve deuh bawk nen..Terini te chu an mak ka ti..an unaupa tho, baihvai ve em em a nia, khatiang vanga han hnawhchhuah kher. Pa ber zir loh a ni tel thei bawk ang chu. 

Ka phone a rawn nghawr dat dat a, ka hmet êng vat. Kimtea hnar sûk sûk melh zawkin lehlam ka hawi a, Sangbera msg lo awm rân chu ka open ta a. 

"Tikhan ka nupui tur i ni tawh aw. " Tih ringawt..a va mak dawn ve aw. 

"I zak lo" ka va ti a. 

"Ka zak ve tho" a rawn tih chuan ka inrin hmain ka nui huk. Ka insum leh vat a. 

"Ngaihzawng leh pasal neih ka duh lo" ka va ti leh a. 

"Ngaihzawng leh pasal chu i nei kawp thei reng nang, uire i duh ngawtte a nih loh chuan" a rawn ti leh zuah zuah, a va nghal e aw. 

"I ninawm, ka mu dawn.." ka va ti a. 

"I tana mipa awmchhun ka nih hi..hmm, muhil rawh. Sûksûkpui" a rawn ti..Sûksûkpui tih thu ringawt chu ka mangphan a, ka mumangah dawra ka thil leinaa dawr nghaktu hian, "Sûksûkpui" tiin min lo ko vel..haha..ka â ṭan mêk chu a ni mai lo maw?!