Sangbera 8

SANGBERA (8)

Ziaktu : Toni Râlte

Engtin nge hetiang thu hi Sangbera'n a ziah theih? Ka bo tulh tulh mai. Ka han ngaihtuah vang vang a, Sangbera hian a hma daihin min lo hre tawh tihna a ni thei ang em? A hnena ka thawh theih dan te, engkim zawng zawng ka han chhût kual a. Mahse, ka duh ang chhanna ka hmuchhuak thei chuang lo. Sangbera chauhin ka buaina hi a chingfel thei ang. Chutia rilru buai taka ka awm lai chuan Nu Buangi aw ka hre thut. Rang lutukin ka indah fel zung zung a. Ka va chhuak ta vat. Nu Buangi hi in chhung dungah hi chuan a tei thei ve a, "Lo ṭhu rawh, thingpui kan lum dawn nia" ka lo ti sawk sawk. A ṭhu ve mai a. A natna hian a vaw chau bawk a, a ngui nghiai reng mai. 

Tihfel ngai ka tih zawhah thingpui chu ka lumsak a, "I mu ṭha thei em? Nizan lamte" ka tih chuan, "Mu ṭha e. Ka mumangah Bawiha te unau ka lo hmu lehnghal a. Ka ngai vawng vawng mai. An hnena kal ve vat vat hi ka châk tawh a ni" a ti a. A lunglêng tih a hriat mai. 

"Nu Buang,in zawh awm chi a nih leh nih loh ka hre lo va, in fate chu engvanga thi nge an nih a? Fa han chân vek mai chu a rapthlak dawn e" ka ti a. 

"In zawh âwm ni tehlul e. Bawiha kha chu zanah a kaih chiam a, a tuka damdawi ina kan va kalpui khan darkar hnih pawh a awm tling lo, a kal ta mai a ni. A nau erawh a ṭhiante nen an lui kalnaah tuiah a tla a. Ni 3 hnuah chauh alawm kan zawn hmuh ni" a ti charh charh a. Ka khawngaih hle, kan tana mi hlu em emte chân natzia ka lo hre ve tawh miau a. 

"A pawi em mai, la dam se nupuite pawh an nei ve tawh awm sia" ka ti ringawt a.Thawk la halhin, "Pi pute serh leh sang kan pawisak loh rah kan sêng a nih hi..pi pu chenah thla serha inneih hi an duh ngai loh a nia. Kan pa pa hi alawm pawisak a nei lo lutuk a, kan lo puk lawk tawh bawk nen, 'Thla serh tih mai mai, Christian kan ni tawh, a ho lutuk" a ti tlat a. Kan nupa chauh hi zawng kan tluang, mahse, ril arah fate han chân vek mai chu a nâ tih hian sawiin a siak lo a ni e" a ti leh malh malh a. Thla serh chu ka lo la hre ve lehpek lo va, ka han zawt zui zat. "August leh september hi an serh alawm" a ti ta a. Mak ka ti hle. Nia, puithunna atthlak hi kan ti teh châwk a, a tam zawkte hi chu rin bur chi a nih loh rualin ngaihbel tur tinga thleng dik ve leh nulh hi a awm châwk. 

"A nih U Sangbera hnenah hian engtik aṭangin nge i thawh tan?" Ka ti ta daih a. Zawh duh ka nei a tin ni. A thingpui a han in tê tê a, " a..a rei ve tawh. Zodini awm hma, Sangbera in dan tirh aṭanga thawk tawh ka ni. " A ti chuar chuar a. 

"Nu Buang, zodini chungchang kha tlem azawng min hrilh tawh tak asin. A thlan pawh ka hmu tawh. Mak ka ti lutuk a, i hre vek ang tiraw? Nang chuan" tiin bul ka han ṭan ta a. 

"Hre tehreng e. Kei aia hrechiang an awm lovang, aman a hrilh tho che chuan ka hrilh dawn che nia. Mahse, ka hrilh che tih a bulah sawi lo la aw" a ti a. Ka lo phur nasa tawh mai. 

"Sawi lo hrim hrim ang" ka ti sawk sawk. 

Nu Buangi chuan ka hriat châk êm êm thil chu hetiang hian a sawi ta mawlh mawlh a. 

"Zodini sawi hmain Sangbera hnena kan thawh dan hi hre ve hrim hrim la a ṭhain ka ring. Hei a chhang chiah Lalbawiha nupui hmasa Viteii hi nau chungah a boral hlauh mai a, chutihlai chuan ka chhul ziah vangin damdawi inah ka awm ve a. Viteii a boral khan an ward-a awm ve ta chu kei ka lo dam ṭha ve deuh tawh nen, ka buaipui ve nasa a. Bawiha lahin mu leh mal reng a nei si lo. Ta ṭanga Sangbera te nen pawh in hmelhriat chho kan ni ta a. Kan khawsak dinhmun a harsat êm vangin chumi kumah tho chuan an vengah an in bul lawkah in kan luah a, kan awmna hmasaah in luah man kan bat rei tawh êm avangin min hnawtchhuak a ni. Hrisel ṭha pangngai kan nih lai chuan chutiang takin kan rethei bik lo. Mahse, kan pa hi kei ai maha hrisel lo a lo ni bawk nen, kan buai ta viau mai a. Kan dinhmun hriain Sangbera chuan an inah min chhawr zui ta a. Bawiha lah buaipui leh awmpui chawt ngai a lo ni bawk nen, chhungkhatah kan insiam a ni ta reng mai. Tichuan, amah Sangbera hetia a in dan tak hnu hian keini nupa pawh min chhawm ve ta zel mai a ni. Kan tan chuan hmuh theih pathian a ni. Chuan, Zodini chungchang chu ka'n sawi ang e. Sangbera hi zin chhuak reng reng a ni a, vawi khat a zin leh chuan Zodini hi a rawn hawn ta hlawl mai. Kan bulah a sawi tam lo naa, amah Zodini hian min ngainat ve êm avangin a chanchin tlem azawng chu min hrilh ve a. Pahrawn a hrawn a, a pahrawn chu zu ngawlvei, sual tak mai a ni. Ani han tleirawl chhuak kha vawi tam khawih a lo tum tawh ṭhin a. A nu lahin an retheih leh han tlan tauhna tur a neih loh miau avangin a thlavâng a hauhsak ṭha ngam bawk si lo. Sangbera te zu zin kha, Zodini te ṭhenawmah an thleng a niawm e. An thlen inah Zodini chu a pahrawn nen buaina an neih leh avangin a tlanchhe lut niawm tak a ni. Chutiang vel chu a ni a, Sangbera lainat chuan a ina awma a thiam ang anga chhawr turin a rawn hawn tawp mai a ni. An han inchenchilh tak hnu chuan mipa leh hmeichhia na nâ na chu inngainatna a lo piang chho ta a. Amah Zodini tê kha a inngaitlawmin a mawng a zang si, pawi hi a sawi lo reuh êm êm mai a. Sangbera lung a dum chho ta em em a ni. Kan Sangbera hi mipa mak ve tak pawh a ni, tlangval hmelṭha leh hausa ni si hi a mit a hniam ka ti dawn nge, a fing ka ti zawk dawn. Nula hmeltha leh changkang te hian an zar nasa a, mahse, tumah beiseina a siamsak ngai hauh lo. Sawi tawh ang khan Zodini nen chuan zep nâk emaw nupa ang deuhin an khawsa chho va, mahse, khatia man leh mual inhlan si lova nupa anga khawsak ngawt kha Amah Sangbera chuan Zodini a venthâwn vangin ṭha a ti lo va, Zodini te khuaah palai a tir ta a ni. Ani ang tlangval hausa te chu an ni tan hnar phal chi ni hek lo le,. An inrem ta a. Mahse, Zodini nuin, "Amah te pawh lo haw vein awm hrang ve phawt u la, mi ngaihah pawh a mawi ve alawm" tia a ngen avangin reilotêa innei tawh mai tur chu an hreh ta bik lo va. Zodini pawh a haw ve ta a ni. Sangbera pawh nupui nei tura lêngin a sumdawnna lamah a ṭang sauh sauh a. A naute hi a chhawmdâwl ve pah reng bawk. Bawiha pawh a lusûn te zia chhoin tuna an nu Mami hi a unauten nei turin an nawr nasa a, hei a nei fuh khawp mai. An awhawm chhungkua teh asin. 

Chutia mo lawm tur nghaka kan inpuahchah mup mup lai chuan Zodini hnen aṭangin Sangbera chuan thu thinṭhâwng tak a hre ta tlat mai. A pahrawnin hrai ruiin a lo khawih a lo ni. A thinrimin Zodini lah chuan la innei lo mah se; uire ang mai niin a inngai a. A rilru thlengin a buai chho ta hial mai. Sangbera chuan FIR thehlutin Zodini pa pawh an man a, tunah hian a la tâng êm ka hre lo. Zodini chu amah ngeiin zuk hruai hawng lehin a bulah bawk a awmpui leh ta a. Mahse, Zodini rilru nâ leh inthlahrung lutuk khan a rilru lam a lo nghawng bakah a chhul lam a lo chiang lo lehzel a lo nia. A chhul chu loh theih lohin an paihsak ta. Fa a nei ve thei dawn lo tih a inhriatna khan a vaw chau telh telh a, Sangbera nupui nih a duh ta lo chho ta a ni. Amah Sangbera'n a iai loh thu leh a neih ngei ngei tur thute, fa te chu an lak mai tur thu a hrilh pawhin Zodini inthlahrung lutuk tawh rilru chu a sak tlat tawh si. Tiang khan an buai chho zel a. Zodini pawh an khuaah a va awm rên râwn a, Sangbera'n a thlah theih nan pasal a va um ta a ni. Sangbera'n a hriat chuan a kehchhe chiang teh asin. Zodini hming reng reng a lam ri ta ngai lo va, keini pawn Zodini chu demna chin kan nei. Mahse, Sangbera a hmangaih loh vanga khatianga che ta mai kha a ni lo tih erawh kan chiang. A reh ta vang vang a. 

Kum khat chu a ral hman awm lo ve. Zodini thih thu kan hre ta ringawt mai a ni. A pasal um ve tehchai kha a pahrawn ang maia laktlak loh, pawisak nei lo tak mai a lo nia. Kutthlak te a lo ching niawm tak a ni. An nupa khan Aizawlah mi in hnuai an lo luah ve a lo nia..A pasal kha mistiri chu a ni ve âwm e. Zodini chu a pasal sawisak hlum anga sawi a nih avangin Police pawh an inrawlh ta vat a, an pa lah chuan, "Ka nupui a ni lo, man leh mual kan inhlan lo. " A ti hmiah mai a.Zodini nu lah Zodini boral hma lawk khan thingin a delh hlum a, chhungkhat laina dang a neih kan hre bawk si lo. An in luah lah chu ruang han nghahna tlak loh khawpa chhia leh tlabal, zim bawk si a nia. Teberi ten an lo hriat chuan Zodini ruang lainatawm tak chu an inah lak an tum ta a. Mahse, Sangbera hian , "A tana ka tihtheih hnuhnung ber" tiin a huanah a phûm ta a ni. Chutiang vel kual chu a nia, an chanchin hi sawi dawn chuan nilêng sawi tur a awm ang. Sangbera hi a vanduai ve hrim hrim bawk a, Teberi sawi danin Zodini hmaa a ngaihzawng lahin Sangbera nuhrawn lo lungrualpuiin an lo phiar ru a, a sum chiah a lo duh a lo ni. Mi ṭha tak a nih nen, a vanduai khawp mai. 

Zodini hming kan lam ri ngam ngai lo, amah pawn a sawi ngai hek lo. A thlân erawh a tifai fô . A naute hian an ngaihtuah em em a, hmeichhe ṭha tak tawng se an duh luatah a rukin a nupui tur âwm te hi an melh ru fô mai. Amah lah hian a ngaihsak lo nasa si. I chanchin ka hriat tirh khan Zodini ka hrechhuak vang vang alawm..in dinhmun khan inanna a nei ve deuh bawk nen, chuvangte pawh a niang, Sangbera pawn a ngainat chea a hnenah a thawhtir che ni. Hetiang hmeichhia, chhungte avanga dinhmun hrehawma dingte hi a pui ta nual mai. A ngaipawimawh lutuk.." tiin. 

Ka ngaithla zo chu ka hah vek, ka lo insangruh nasa a lo nia. A ngaihnawm a, mahse, a lungchhiatthlak bawk si. Sangbera'n min khawngaiha min duhsak em em chhan pawh ka hre ta. Keipawh amah hringtu a pa tihduhdahna leh nuhrawn kara seilian ka ni miau a. Ka chanchin hi a lo hre thui viau ang tih pawh ka ring ta. Tin, a chanchin ka hriatbelh leh takah chuan ka ngaisangin ka zah ngawih ngawih. Nupui ṭha tak a la nei mai ang. 

Hlawhfate ei tur ka siamsak laiin Baby tia a koh, nula te takte kha a ṭhian pahnihte nen an rawn lang hlawl mai. Nu Buangi a hmuh chuan, "Ehe! Pite, i la dam elo?" A ti ta mai a. A ṭawngkam thiam loh vang pawh a niang a, mahse, a mawi chiah lo ka ti. 

Nu Buangi chuan, "La dam ve hram hram e. Pasal kha i nei tawh em khah?" A lo ti ve a. 

"Nei ta nang..ka la nula duh alawm" a ti satliah a, chokaa ka awm chu min rawn thlêk zauhin, "Ka ring rêngah, a bialnu ni loin a chhiahhlawh i nih kha..Kan Sangbera uan peihzia hi chu aw" a ti hlang hlang mai. Ka chhang lo. Remruati te ang zia a kai avangin ka ngaina lo nghal. Mahse, ani hi chuan Sangbera a ngaizawng ve lo turah ka ngai. 

"Thingpui min lo lum lawk aw. " A rawn ti leh a, "Ka hman rih lo tlat, hlawhfate eitur ka siam a" pangngai deuhin ka ti a. A ner nâwng mai. A ho êm mai, Sangbera chhiahhlawh ka nih avangin a inleng apiangte chhiahhlawh ka ni ve tihna a ni lo. 

Hlawhfa ho chu an rawn chho a, eitur chu ka lo pe vat vat. An ṭawng tam lo hlawm khawp mai. Nu Buangi pawh a in eipuar zawhah, "May bawih, i pa Thana a rawn thleng hnai tawhin ka hria, ka va haw lawk ang e" tiin a haw a. A chhuah hnu reivakloah Baby ṭhiannu hâng lam deuh chuan, "Hawh u, thla va la ang u, a hmun hi a nuam si" a ti lâng lâng a. An chhuak ta dial e. Sangbera ka call ve a, ka call hmasa khât khawp mai. 

"Baby te kha an rawn leng a,." Ka ti teh tawp. 

"Aw..min rawn hrilh alawm, Nakinah a bialpa a rawn kal mai ang. Hlawhfate chuan thil an ei tawh em?" A ti nghal zung zung. An ei mêk thu ka hrilh a, "Vawiin chu ka rawn tlai deuh maithei aw. Eitur pawh ka order mai ang, lo bâwl a ngai lovang" a rawn ti leh a. Ka hawn hmain kan inhmu hman dawn lo a nih hmel. 

Hlawhfaten huan lam an pan leh hnu lawkah Baby te chu an rawn lang leh a, a bialpa te niawm tak an rawn thleng ve chiah bawk. In chhungah an rawn lut a, keipawn be lem lo chuan eitur ka lo pe ve sawk sawk. Baby bialpa chu Henry a ni a, A hma khan Sangbera'n a sawi tawh kha. A ṭhianpa erawh Papui tiin an ko thung. "I hmel en ang aiin i ei siam a eitlak viau e" Baby chuan a ti leh pek a. A hneawm ṭan tlat, hnuaichhiah deuha min biak reng chuan mil hi an lo har thuai zel. Henry chuan, "Mayi maw i nih?" A lo ti ve a. Ka bu nghat. 

Min be zui ta vak lo hlauh a, Poolah te chuan an va kal a, an rak chul mai. Nuam an ti ve hle a nih hmel. Keipawh hlawhfate lo hawn ruala haw ve mai turin ka intifel a,. Thawmhnaw ka thleh ṭhat laiin Baby bawk a rawn lût a. "May, rawng i va bâwl har ve, vawksa a awm chuan fry teh aw. Chuan bai kha ti uih lo bawk la" a rawn ti teh ngawt a. 

"Ka bâwl dawn hleinem. U Sangbera'n a ngai lo a tia, ani pawn a order dawn, ka haw ṭêp" ka lo tih chuan a meng nur nâng mai. "Chaw kan ei nghal dawn tih kha ka hrilh reng sia, a theihnghilh mawni le..ka'n bia ang e" tih leh call a rual a. 

"Ngati nge chaw kan ei nghal dawn ka tih kha..hei Mayi lah hawn hma a tum leh daih bawk si" a ti hmarh hmarh a. Sangbera ṭawng ka hre pha lo, "A mak ee..kan hman ve ni a nia. A la hma tho alawm, bâwl leh mai se la" a tih chuan ka lo ner sak. Ka peih loh vang pawh a ni hran lo, hawn hma ve ka duh a ni. 

Tau deuh titih hian phone chu a dah a, min melh no tehchiam lo. Ka laka a ṭuan ta daih chu mak ka ti. "Nangmah vang vek, hawn hma i tum kher a" a ti ram hmak a. Ka ngawi reng. Chhanin awmzia a nei dawn chuang lo. A chhuak leh ta mai bawk a. Hlawhfate pawh an rawn haw chho va, an zo hma angreng. Valtea ka be lawk tawh a, ka insiam nghal. Sangbera ka be leh phawt, "Hawn ka tum sia, i ṭhiante hi engtin nge niang?" Ka va ti. 

"Aw piteii ka be tawh e, a rawn phei ang. In lo nghak turin" a rawn ti awlsam êt a. A ṭha e. 

In ka thlen hmain U Sangi'n min lo bia a, "Chaw ka chhum kep che u, sazuk rêp kan rawn hawn a, in ei ve châk ang. Lo phei hma tum u la" a rawn ti a. A zia hle. Ramsa hi ei duh loh vak ka nei lo, mahse, keini ang tan chuan a to tham ve êm a, a nazawnga lei tur a awm lo bawk nen. A zia viau e. U Rini chhuak tur nen kan intawk leh ngei, a inchei nalh leh khawp mai. "Kha i boss lah chu a rawn kal ve duh si lo va, ex te ka kalpui ta vel mai mai dawn a nih hi" nui chungin a ti a. Birthday lawmnaah a kal dawn tih ka hrechhuak. "Haw pawh a la haw lo, a buai tak tak a niang" ka ti ve mai a. Ka kalsan nghal. Kimtea te school hian tun hnaiah cultural dance an zir khawtlai ve ṭhin a, a lo la haw lo. 

Inbual fai sarin Kimtea nen U Sangi te ina zanriah ei tur chuan kan chhuak ta a. An pain rawng a lo bawl sûrh sûrh a. U Sangi'n naupang a lo bual mêk thung. An che tlai ve ṭhin hrim hrim bawk a, ngaiah an nei tawh. A thil chah thar ho te chu ka en nghal sawk sawk, Top nalh ve deuh, kekawr leh puan nen pawh hak theih chu hlawh laka pekah ka batsak ve a. Thil thar te hi kan nei khât angreng si, Kimtea tan t shirt leh kekawr bul ka leisak bawk. Dar 6:30 velah chaw chu kan ei ta a. An chhangchhe bawk a, kan chaw ei pawh kan felfai thei meuh lo. Ka puar kher mai, sazuk rêp fip tawh lam hi chu a tuiin a hâng bîk riau. Sakhi chek hi ka duh em em bawk. 

Chaw ei khamah pawh kan ṭhu khawmuang ve a, ka zawh châk ruk deuh ka zawt ta phawng. "Enteh, U Sang, U Kawnga û khan U Sangbera hnuaia hna min zawnsak khan U Sangbera hian ka chanchin vel hi a hre nual em?" Ka ti a. Mak ti hmel a pu lek lek. 

"I chanchin kha chu U Liana zawkin min zawt nual..amah Sangbera nen tak chuan kan sawi vak lo" a ti ta a.

U Kawnga'n, "Ngati nge a chu chu" a lo ti vat. 

"Aa..engvak ni lo e, ka chanchin hi a hriat tam hmel êm a, ka ti mai mai" ka lo ti a. 

U Sangi bawk chuan, "Zep loh chuan min ngei ka hlau deuh a, a tirah khan ka sawi duh lo a nih kha. I chanchin, i tetlai, in chhungkua a tam mai, Samuela nena in buaina te pawh kha Sangbera chuan a hria..mahse, ka sawi lo kha chu. Engtin nge a lo hriat ka hre miah lo" a ti ta mawlh mawlh a. Mak ka ti telh telh. Samua nena kan chungchang phei kha chu Lsa chiah ka la hrilh kha a ni sia, Sangbera tehdaihin a hria chu a mak tih loh rual a ni lo. 

Kan titi tui ta phian a, thildang te pawh kan sawi nual. U Rini te unauah kan pakai chho a, U Sangi bawkin, "Rini hi chu a sual hran lo. Terini ber hi an in in luah dawn pawh khan ka vengthâwng a, hei Nu Zami te hian an hrechiang bawk nen, mahse ,kan bulhnaia in awm kha ka duh sia, in luah thei ve ta phian a. In intlawhpawh tam loh hi a ṭha zawk mah" a ti leh bawrh bawrh a. 

"Nia, Terini hi chu mi hmuhsit a tina vein ka hria. " Ka ti ve hmiah. 

" Ani pawh khi a thlawi tawh tho alawm. I la hre tawp nang, mahse, mi ina mo tur chuan a la nau ve êm bawk a, thla 4 erh awrh kha chu an innei ve hman ang, pasal a neihte chuan kum 16 pawh a la tling dawn mawni tih tur kha a nia" a ti leh a. Mi chanchin ngaihven hmanin ka khawsa lo a ni bawk a ,ka tan thil thar vek a ni. 

Kan haw meuh chuan dar 9 a pel duai tawh. Keipawh intifaiin ka mu nghal daih. Kimtea hi zan rei ti ila dar 10 bawr velah hian tu emaw hi a be ve ziah a, ka sawi tawh ang khan bialnu te hi a lo nei ve deuh em mawni ka ti. Lerh rual an lo nih bakah tunlai ṭhangtharte hi chu an rilrute hi a hmanhmawh bawk sia, remchang a awm veleh ka zawt ang. Remruati'n ka number thar a hre ta lo bawk a, betu ka nei lo leh ta hle mai. Pawi ka ti chuang lo. Lsa hian video nuihzatthlak deuh deuh min lo thawn a ching a, chuzawng chu. Zanin pawh a rawn thawn leh a, ka nuihpui vur vur mai. "Hlau miah suh aw. " A rawn tih chuan ka meng deuh kâwk a, "Hlauhawm lam video chu ka duh lo a nia" ka ti vat. 

"Video a ni lo, ih maw..Peka a hrâng an tia. An ina riak ngam pawh an awm tawh lo. I antena te hi a chak lo ve sia, i la hriat loh takin ka tia" a rawn tih chuan lungphû a rang ve dat thei. Mahse, mi dawihzep ka ni hran lo bawk a, ka mut a chhuak zui ta bawk nen, ka mutsan ta daih a. 

Zingah a ngaitê bawkin ka che zung zung. Nidang aia a thawh har avangin Kimtea chu va kaihthawh ka tum a, a pang a lo sa vur mai. A mitmeng pawh a sen râm mai a, rang takin damdawi ka zawng nghal. Ka eitir ta a. Chuti tehthuta a khua a sik chuan min tihamhaih vek alawm le. A hmain a insawisel bawk si lo,. Chutiang tehnuaih kan nih takah chuan ka hnaah ka kal thei dawnin ka hre lo va, Sangbera ka be ta a. "Ka rawn chhuak hma ang, damdawi inah kan kalpui dawn nia" a rawn ti leh hmiah tawh. 

"Aa..ngaichâng ve deuh ila, vawiin chu ka ti" ka ti a. Dik tak chuan damdawi in kal te hi thil ṭha ni mah se, sum hman ngaihna vek a ni ṭhin a. Na tawpkhawk a nih loh chuan theih ang anga in lama inenkawl ka duh deuh a ni. Chaw pawh a ei peih ta lo va, nachhawknain a'n chhawk ve deuh hnuah, "Nizan pawh khan ka kaitho têp che a, ka lu a na lutuk a. " A ti ta a. Ka neihchhun a nih tawh avang hian ngaihtuah loh a har êm a ni. 

Ka rin aia hmain Sangbera a rawn thleng a, Kimtea lah chu a thaw sa tho mah se; a lu na a la awm thu leh a ruh chuktuah a nat dante a sawi a. "Kal ang, va insiam rawh" thunei zetin a ti leh tawh. Hnial ngam hek lo, ka insiam sawk sawk a, min admit thut takin tiin mamawh thenkhat ka khung bawk. "Ka pua ang che aw" Kimtea bula a tih chuan a lu a thing nasa mai. "Ka kal thei mai ang" a ti zawi sep a. A chauh hmel reuh si. Stepah chuan an in kuah chho ta a, Lsa a lo tei nulh nulh a, chanchin min lo zawt vat. Ka sawi ve mai a. "Ka lo kal ve dawn mi? Ka va inthlak ang a, bike-in ka rawn zui ang che u" tlawmngai tak hian a ti a. Ka hnial hma hmain Sangbera'n, "Ka enkawl thei ang, ka kutah dah rawh" a lo ti nghut. A aw lah chu a nelawm vak lo lehnghal. U Rini lo chhuak lo se ka tih nen, a thawmhnaw pho turin min rawn hmu leh ta bawk, a phâwk ngang mai a. Chanchin a han hria chu Kimtea a khawngaih vang em em pawh niin ka hre lo, Sangbera bula chettlat a châk vang nge ni, "Min lo nghak r'u.." tih leh in chhunga tlan luh a rual a, a va inthlak rang tak. Sangbera lah chuan dawhtheih loh hmel zet hian, "Ve teh sek hian aw" a ti bul bul a. Mahse, U Rini lo kal ve tur chu pawi ka ti vak lo, eng emaw chenah min pui ve thei ang a, ka bangboin damdawi in chinchangte hi ka hre lo ve ropui si. 

Damdawi in kan thlen chuan lehkha ka va la a. Sangbera bulah, "Ih, kan lo buaipui thei tawh mai ang, i hnaah kal i ngai sia, kal tawh mai rawh" ka ti niah niah a. 

"Khatin inthlahrung zet khan min be ṭhin suh. " A lo ti daih. Ka hrilhhai letling e a. Kimtea an koh luh hun tur nghakin kan ṭhu ṭhap a, U Rini a tawng deuh char char a ni mai. Sawi turte chu a hria hi ka'n ti mai mai khawp a. "Enteh, engmah ka ti ngai chuang lo va, min lo chhawr ve teh a. Eirawngbawlah tal" a ti hawm hawm a. 

Sangbera lah chuan, "Hei hian thawh tur a nei nang" tiin min melh zauh. U Rini chuan huangtau chhuah zelin, "Ani te chu in tihfai velah i chhawr mai dawn lawm..a thuhrimin ṭhian hlui nih manah eng emaw hi chu min tihsak ve a ngai" a ti leh ham ham. Sawi ve tur lah chu ka hre der si lo, Sangbera chuan, "Ni e, kan la ngaihtuah ang chu" a ti sup a. 

Kimtea an rawn koh avangin ka kaitho a, kalpui mai ka tum laiin Sangbera'n, "I sawi thiam ang tiraw? Admit che a tum pawn hnial suh aw" a rawn ti a, ka bu nghat. Kan luhsan ta a. A natdan velte chu aman a sawithiam ve vek bawk a, lo tuihnih zauh zauh kha a ni mai. "Admit in duh em? Tiang natna kha tunhnaiah a dam riau mai a, Dengue a nih hmel, test va nei u la, admit in duh chuan khum ruak a awm thei mai ang" tiin test-na hmun min hrilh a, kan chhuak ta. Kan va test nghal a, a khua pawh a rawn sik leh ṭan. Ka rilru a buai mang e, "Ate, in admit loh ka duh zawk e, kan rethei sia" a ti ta reuh a. 

"Ekhai! I damna tur a nihte chuan lungngai suh, pawisa te chu mihring vanga awm alawm a nih le. Kan dam ang a, kan thawkchhuak leh mai dawn alawm" ka ti a. Kan dinhmun a hrethiam lutuk hi ka khawngaih ṭhin. Dengue chu a lo ni tak tak a! Mahse,amah Kimtea chu ka'n nawr ngial paw'n in lama inenkawl a duh tlat si, ka tilui thei ta bik lo va. Damdawi erawh kan lei nual mai. Sangbera'n a pawisa a phawrh leh ka hlauh vangin a ruk deuhin damdawi pawh ka lei ringwt. 

"Admit chu duh mai tur che alawm le.. " hawn kawngah Sangbera'n a ti a. Taka kan hawn dawn khan front seat-ah u Rini chu a ṭhu lut that a, Kimtea ṭhutpui ka duh vangin a hmaa ṭhut kha ka tum lem lo hrim hrim a, Sangbera mitmeng thim raih danah U Rini chet dan vel chu a ei vak lo a nih ka ring, "May, kan inhmeh ve tho em? He car hi ka la khalh lovang tih tu nge sawi thei?" Sangbera kal bo lawk hlanin a la ti ham ham zui! A ṭha vek e. 

"Ei chak i nei em? Chaw i ei si lo va" Kimtea bulah ka ti a, a lu a thing ringawt. "Kan pack tir dawn nia, May, eng nge i ei châk" Sangbera'n a rawn tih chuan ka chhan hma hmain U Rini'n, "Hot pot ve ang u. Kimtea pawh kha damdawiin a chhawk rih tho kha." A lo ti zawt zawt a. 

"Aa..ei chak pawh ka nei lo, inah siam zawk i la" ka ti ve ta hmak. Sangbera'n , "A tihchi viau ang, Noodles ka ei châk ve tlat. Teberi siam a ni dawn lo va, a thak over lo turah ngai ang. Kimchi kan lei nghal bawk dawn nia. Kimte, octopus i ei châk em?" A rawn ti ve ta duah a. U Rini hmel ka hmu thei lo va, a lawm vak lo maithei a ni. Tichuan, amah sangbera'n eiturte chu a lei ta vek a, U Rini erawh a ngawi dâk tawh. In kan thleng a, Kimtea chu ka muttir a, U Rini pawh a rawn chhuk ve zel. Noodles te chu kan siam ta a, a inti siam thiam vel bawk sia a. Ninawm. 

"Sangber, Remruati hian bialpa a la nei leh ta lo mi!" A ti hlawl. 

"Nei ang, ka hre nang" a lo ti ve mai a. 

"Alexa kha chu a uiawm ve ngawt mai. A hmelṭha sia, a vanglai takin a kal bawk nen" a ti leh mawlh mawlh a. 

"Ni ngawt mai, ka ngai ṭhin viau asin" Sangbera paw'n a lo ti a. 

U rini bawk chuan, "Remruati nen in inkawp emaw ka ti hman alawm, in inzui nasa ve sia. " Meng relh relh chungin a ti leh a, Sangbera chuan ngaih thutak loh hmel zet hian, "Ṭhian ka ngaizawng ngai lo" a ti deuh tâwng. 

Eitur a hmin a, Kimtea pawn tlem chu a rawn ei ve. Ka ei tui zêk a, Sangbera'n, "Kan Teberi hmarcha han ngamzia chu e, a noodles siam ei ngam kan chhungkuaah kan awm lo" a ti lûng lûng a. Teberi hmel ka lo mitthla. 

"In zawt ta mai mai ila, pasal ka neih hnu lawk khan Lalrami te khan nupui i neih tur thu vel kha an sawi sia, i la nei si lo va" a ti ta a. Sangbera ka melh vat a, min lo melh ve chiah. 

"Dâwt an sawi a nih chu" a ti zawi ruih a, a mitmeng a thim leh raih tawh bawk. Kei chuan thudang ka sawi ta daih a. Kan ei zawh thlengin U Rini chuan chhoh a tum si lo,. Sangbera pawh chu a ding ve ta hluai a. "Ka kal a ngai, mi hmuh tur ka nei sia. Kimtea chu lo ṭha rawh se, thil thleng a awm chuan min rawn hrilh la aw" a ti vut a. Kei pawh ka ding ve nghal, kawngka bul thleng ka thlah a, U Rini rawn phei ve lai takin ka beng bulah, "Zanriah ka rawn ei ang" a ti sup a, ka men phar lai takin a kal nul nul. U Rini pawh chu a chho ve nghal daih. Kimtea pawh tuilum chi-alin ka inbualtir a,. Rawngbawl nan a la hma deuh nen, ka online ve mai mai a. 

"I dam maw? Eng nge i tih ṭhin?" Rawn titu dp chu ka en vat a. Tlem chuan min ṭhawng ve deuh, Samua lek a lo nia. Engtin tak ka number nei ang maw. Azuii'n a pe emaw U Mawii te a zawt a ni thei ang em? Chhan pawh ka chhang lo. Ka huat dan a la ngai reng si a. Lsa'n, "Tun hnai hi inleng i nei i nei mai a, eng emaw a awm te a ni lo maw?" A rawn ti a. Ka khi ṭhâw ringawt. 

"Ka boss alawm" ka ti satliah a. 

"Boss pawh a ngaihzawn theih tho alawm.." a rawn ti lehpek, "I ninawm,." Ka han ti a. Kan inngam ve tawh bawk nen. 

"Naktuk zan chu dine out ve ang hmiang. Celebrate tur ka nei ve a" a rawn tih chuan, "I tling ta mi?" Ka ti vat. 

"Umm, Pathian zarah. A mak tawp, celebrate pui tur khan nangmah ka hrechhuak hmasa ber che mawle. I thei ang tiraw?" A rawn ti teh mial a. Mak ka ti keipawn. "Kimtea hi a damlo sia" ka ti ta ngawt a. 

"Chuan, ka lawmpui lutuk che" ka ti leh nghal zat. Tuna a hna dil hi Addhoc Aided a ni tawh a, an hlawh pawh a chhiat ka ring lem lo. A lawmpuiawm takzet, a dinhmunte ka lo hre ve bawk nen. 

"Kimtea awmdan azirin aw" a rawn ti hram a, "Ni rawh se" ka ti ve mai. 

Sangbera msg a rawn thleng ve nulh, msg hi kan inthawn mang mang lo, call hi a ni deuh tawp zel. "Sea food ka rawn hawn ang, lo bâwl lawk vak duh suh. " Tiin. Chaw rawn ei chu a tum tak tak êm mawni le. 

"Ti nge i lo ei dawn" ka va ti hê haw a. 

"Mahni chauha zanriah ei chu a nuam lo, bakah i ngaihawm bawk a" a rawn ti leh kher. A hmel ka hmu lo chungin ka lai leh em em bawk. 

"Aw le" tiin ka chhang ta ringawt. A lo ei dawn rau rau chuan tiin ka inbual hma a, kan in hi chhuah chhawnga awm a nih vang hian chawhnu lamah chuan a dai ruih tawh zel a, a vawt lek lek tawh. Ngaihtuah lem nei lo va ka inbual sar sar laiin "In va reh ve, in mu mawni le?" Lsa aw hian a rawn ti lâwng lâwng a. "Ka inbual" tiin ka va au ve nghal. Keipawh ka che hmanhmawh ta deuh a. Tihṭhana nei tawh ka ni bawk nen, bathrooma inthlaka inhrûkhul hi ka thiam lo, towela intuam hlânin ka chhuak a, a lo ṭhu kur mai. Ka ngaihbel nge ni ka kawng hnuailam ka taksa lang thei chin chu a melh uluk hian ka hria a, "Lo ṭhu lawk rawh" tih leh pindana luhsan ka rual nghal. Ka inthlak sawk sawk a, lotion pawh ka inhnawih thuak thuak ringwt. Ka va chhuah chuan a phone a lo hmet nuap nuap a, "Vawiinah i hre chiah mi? In result kha" ka ti thuphung a. 

"Imm nichin mai khan. Ka pu a lawm ve lutuk a, ar a rawn lei haw dawn a niang, nangni pawh rawn ei chho turin a ti che u a" a ti zung zung a. 

"Zanin tlai chu mikhual kan nei dawn a, kan rawn ei theih ka ring lo, bakah Kimtea hi heti hi a ni sia" ka ti vat a. 

"Ni ve bawk si, tu mikhual nge in neih ve dawn tehdaih a" a ti a, ka sawi hreh vel tlat ta nih chu..mahse, min en reng sia, "U Sangbera khan lo ei a tum tlat a, chawhmeh ka rawn lei haw ang a tia" ka ti ta sep a. A aw a thian lui kual vel, "Hmm..remchang a la thiam ve maw.." a ti a. Ka nui ringawt. Tui ka va lum a, ka bra a lo inphelh kawkalh a! A va hahthlak e aw. Siamrem mai tuma ka zu khawih chu ka la bat fuh thei lawk lo lehnghal, Lsa chu a tho vat a, "Khawi,.ka hnehsawh zawng tak" tih leh ka kawr hnunglam hlim paha ka bra rawn khawih chu a rual ta a, a rei miah lo. Mahse, rum nghut thawm chu hriain kawngka lam ka hawi vat a. Sangbera chu inkhaibâwr angreng tak hian a lo ding reng mai. A mitmeng a hriamin a vawt ruih mai a, min melh ngat ngat bawk. Kei atak pawh chu ka heh a hil a, sawi mai tur ka la haihchham zuk! A thil khaite chu dawhkanah dahin, "Ka rawn tibuai che u a nih hmel a, pawi ka ti hle mai. " A ti nghut a. K chil ka lo lem khawlh , Lsa lah chu a ngawi vei hmak bawk si. "Tibuai lo..ih, englo ka bra a inphelh a, min siamsak lawk a nih kha" ka ti bah nawk nawk a. 

"Hmm, ni ngei teh se" a lo ti leh hmuk. Engvangin nge maw ka rilrute chu a nawm loh ve ringawt le? Lsa lah chu engtizia em mawni haw ta mai lo chuan a la ṭhu sauh sauh mai a. Haw se ka ti ru deuh. Kan pathum inkara boruak eng emaw awm chu a nihna tak sawifiah thiam lo mah ila, Sangbera a ṭanga rawn inṭan chho a ni tih ka hre ve. 

Zahzelah a thil rawn leite chu ka va phawrh sawk sawk a, kaikuang lian deuh deuh te, tuikep bakah Octopus notê te an ni. "Engtin nge ka siam ang?" Ka tih chuan, "I duh angin" a ti leh ringawt. Ka thinrim ta thut a, a thuhrimin Lsa nen chuan engtin emaw pawh lo awmdun ni ila, ka boss a nih vang mai khan ka lakah a thinrim thiang ngawt bik lo. Insûm hman ta lo chuan, "Ti nge i thinrim ringawt a? I eng pawi nge ka sawi?" Ka ti leh ta hmiah. A khi suk a, a nuih a za hlawl lo tih hmuthiam rual zawng ka ni ve tawh. 

"Rim lo ta se i lawm leh chuang miah lovang" a ti ta daih a, hrethiam lo fêin ka va melh vak ringawt. Lsa pawh a ding ve ta nge nge a ,"May, ka chho ang. Mikhual i nei dawn sia, zanin chu i hman lo nise..naktuk zan chu aw" tiin min rawn nuih a. "Nia, kan sawi ṭha dawn nia" ka lo ti ve vat. A chhuah rual rualin Sangbera chuan kawngka a va kalh nghal. A chetdan naupangchhia ru angreng tak chu ka lo thlir reng a, a rawn lêt leh chuan, "A endan che kha ka duh hauh lo " a ti ro hulh a. 

"Eng maw?" Ka lo ti

"A ril a ṭâm hle a nih kha" a ti leh daih, ti nge maw thumak tak tak hlir a sawi sek le. 

"A ho..chawhmeh chu engtin maw ka siam dawn?" Namnul tum deuh hian ka ti a. 

"Chhum la, a bak ka ti ang" a ti hluk a. 

Beer niawm tak hi a rawn phawrh a, ka lo meng hrâ mai. Beer pawh ka tan chuan zu ang vek an ni tlat. A mitmeng a dam leh vek tawh a, nelawm tak hian a nui a. "May, zu ni loin hei chu beer aw. Chuan, kei hi i pa ni lovin Sangbera ka ni. Zanin atang hian Hmeichhe diktak i nih leh theih nan bul ka ṭan ang" a ti nghet ta charh a.