Sangbera 7

SANGBERA ..(7)

Ziaktu : Toni Râlte

Ka theihtawpa nain ka nam a, ka rak tuar bawk. Ka nam na thawkhat bawk a niang, min thlah ta a. Rang taka thovin ka thawmhnaw ka siamṭha sawk sawk. Thinrim meng ling hlarin, "I va zak lo rapthlak ve" ka ti khur dat dat a. Ngawi rengin a rawn tho a, "Ka tihpalh" a ti zawi raih a. 

"Haw rawh. " Ka ti tuar. Ka hmai a sen vekin ka ring, ka thinrim êm a ni. Ka thinlunga mipa huatna bet nghet tawh tak mai kha a rawn puak pawp pawp mai niin ka hria. Engmah sawi tawh bik lo chuan pindan aṭang chuan a chhuak a, kawngka a kan dawn lai takin a rawn lehhawi a, "May, ka tihpalh. A thleng leh tawh lo vang" a ti leh a. Ka chhang lo. A chhuah hnu thleng pawn ka la khur der der thei nia. Ka thaw te chu a hah vek mawle. Rilrua thildang ngaihtuah thei lo chungin rawng ka bawl a. 

Kan zanriah ei boruak pawh a mûk viau, Kimtea pawh chuan thil thleng a awm a ni tih a hrethiam nge, zawhna min zawt lo va, kei lahin hrilh ka tum bik hek lo. A hnuaiah ka la thawk zel dawn em tih ringawt ka ngaihtuah. Mahse, engtin nge ei ka zawn ang? U Sangi hnung hi ka zui ve mai dawn em ni ang? Sumdawn lah hi ka thiam lo nasa si. Rilru a hah duh viau mai. Rilru buai nak alaiin Sangbera call ka dawng zui! 

Lak loh ka hreh ve bawk si, ner nâng chungin ka pick up a. Hul zet hian, "Aw" ka ti a. 

Dam deuh hian, "I ṭha em?"a rawn ti a. 

"Ka ṭha" ka ti ringawt.

"Naktukah hian piteii lakchhuah ka tum a, tlai lamah zanriah kilpui ka tum bawk a, ka naute an rawn kal dawn bawk. I hman ang tiraw?" A rawn ti a. Tlem chuan a inthlahrun hmel. 

Lehlamah kha zawng zawng kan mamawh laiin a tlanchhe ngai lo va. Sum hman a ngaihnaah nise ka inthlahrun thleng rawkin a inphal a. Vawikhat a insum zawh loh vanga han thlauhthlak hmak chu hrehawm ka ti ve tho. 

"Aw ka hman ang" ka ti sap a. 

"Aw le, ka lawm e. Ka lo beisei ang che" a ti a, a dah zui nghal. Lsa a rawn leng a, ani hi a ṭawng tam lo naa, kan inkawm thei ve ta phian mai. "May, pathlawi ka nih hi aw. i awih em?" A tih chuan, "Awih mai mai lo" ka ti a. 

"Tak tak alawm, ih maw, chanchin ngaihnawm deuh ka nei ve asin, i ngaithla duh em?" A ti sauh sauh a. Kei rilrua thildang ngaihtuah hleithei lo, thildang ngaihtuah duh em em chuan, "Sawi teh" ka ti ta sek sek a.

A aw a'n thian tê tê a. Tihian a chanchin chu a sawi ta a. 

"Kum 19 lek ka nihin nupui ka ru alawm, kei aiin kum 7-in a upa a, kan khaw ṭhenawm ami a nia, a hmel chu a ṭha em em pawh a ni lo, a felin a taima a, min duat bawk nen. Chuan, kan inru ve ringawt a. Ka chhungte chuan kei aia a upat vangin an duh lo khawp mai, a chhungte pawn min duh bik chuang lo. Mahse, kum khat lai chu kan innei ve tho. Kan ṭhenawmte in hnuai kan luah ve a, eizawnna dang nei ta lo chu inhlawhna awm ang angah kan inhlawh ve ṭhin. Chuan christmas kha a nuin "Kan bulah lo hmang r'u, i pa la damlai hian"a tih avang leh a pa hi cancer thi mai thei dinhmuna a din vangin kan va hmang a. Kan nu cousin, keimah ang rual vel hi an inah chuan a awm ve a, a fel thar thar viau. Mahse, urlawk zanah zu kan in dun pek a, a lo in thei ve phian si. Tum loh tawpin kan chesual ta a, khatah khan lo duhtawk mai ila ṭha tur. Amah zawk chuan min beisei zui ta fô mai a. Ruaiṭheh zanah khaw daiah zu va in pahin kan chesual leh a, min hmutu an lo awm ta si. Kan nuin a hriat chuan a rilru a na khawp mai a, a cousin pawh a tukah an khuaah a haw nghal. Keipawh min hnawtchhuak a, ngaihdam dil eng ang mah ila a pawm thei lo. Ka tihsual a ni a, thiamthu sawi tur ka nei lo. Ka hawsan ta a. Kum tharah kan va ko a, mahse, a duh tawh teuh lo. "Sex hi tihpalh a ni lo" a ti hmiah mai a, a sawi dik bawk si. A pa lah enkawl ngai a lo ni bawk nen, tiang chuan kan tâwp ta ringawt mai a ni. Ka ngai ṭhin ngawt mai. Amah anga fel leh taima, min zahthiama min duattu kha ka tawn leh pawh ka ring tawh lo. A pa boral hnu kum khatah pasal fel deuh a nei ve leh a, ka rilru na viau mah se; ka lawmpui. Pasal ṭha tak kha a phû ka ti. Aizawlah hian an awm ve tawh a, kan inhmu fuh ve zauh zauh. Chung vel chu a nia,. Pathlawi chu ka ni ve tlat" a ti ta dap dap a. Ngaihnawm ka lo ti khawp mai. Rinawm lohna hi chuan inchhirna hi a thlen nge nge ṭhin. 

"I rinawm lo em a nih chu" ka ti lehpek a. A nui suk mai. "Bialpa i nei ve tawh em? I ngaihsak lo nasa mai sia" a tih chuan, "Nei ve tawh e. Pakhat" ka ti nghat a. Samuela hmel ka mitthla nghal. 

"Sawi ve rawh, a nuam ve lawm" a ti deuh tlat. Keipawh chu ka inhawng laklawh nge ni tuma bula ka la sawi ngai reng reng loh, Samuela nena kan chanchin te chu ka sawi ve ta a. "Ngaihzawng neih leh hi ka tum tawh lo, mipa chu in hur êm mai" tiin a tawp ka khar a. A nui char char, "Teh tawp zel a che. I sawi dan khan ka nuih a tiza. Mipa zawng zawng kan inang hleinem. I tawn fuh loh vang khan an inang vekah ngai suh, chuan, i ngaihsanawm. Tunlaiah nula virgin hi an tlem tawh asin" a ti duah a. 

"Virgin thi ṭhak dawn" ka tih chuan a nui huk. Keipawh ka nui ve a, mipa ṭhian nei thei pawha ka inrin loh laiin Lsa chu ka ṭhian atan ka pawm ta hmiah mai. Ka khua a lo har ru hle ṭhin tih ka hriatchhuah phah bawk. Mka pawh hi a sual hran lo va, mahse, a dazât ti mai ang, a ho ve leh mah mah a. Lsa nen hian kan inkawm thei ber ang. 

Ka mu tur Kimtea a mu tawh em tih ka va en dêk dêk lai chuan a lo ṭawngṭai mêk a, a thu chham chuan mi dek zawk mai. "Lalpa, Ateii pawh nangmah ring lo va, haw tlattu che a ni a, hei hi nang chuan i tidanglam thei tih ka hria. A tawpkhawkah nang lo chu belh tur kan nei lo. Khawngaihtakin Ateii hi nangmah ringtu nihtir ve rawh" tiin. Ngawi rengin ka pindan ka pansan ta a. Pathian hi a awm lo ka ti lo. Mahse, ka tana mi hlu ber berte min laksak a hnu hmanah mite anga neinung ve deuh tal ten min siam ve tur a nia. Rethei bakberh turin kan piang a, tihduhdahna leh nghaisakna tuarin Aizawlah lah mite hmuhsit leh kamchhe tleuhna kan la ni zui a. Eng nge belh a sâwtna chhan tur ka hrethiam lo. A tukah chuan a ngaitê bawkin Valtea nen Sangbera in kan pan ta a. Ka thleng hma angreng. Amah pawh a lo awm a, ka hmuh chuan min fawh lai kha ka hrechhuak a, ka lai deuh ringawt mawle. 

"Tihian ka chhuak ang a, Piteii chu ka han hruai ang e. Chawhmeh kan lo lei haw nghal ang, ei châk te i nei em?" A ti a. Min biak dan vel chu a nupuite pawh ka ang alawm le. 

"In tih ang ang kha a ni mai. " Ka ti ringawt. 

"Ka naute pawh an rawn thleng ṭêp ang. I lo inpuihtir dawn nia, Remruati pawh a rawn kal ang" a ti a, ka lo ner sak. "Ti nge" a ti hû a. 

"Timah" ka ti ro halh. Min chîk viau hlauin ka kalsawn ta daih a. A kal hlanin thawmhnaw tlem ka su a, chhuatte ka nawt bawk. Tihfai tur hi a vâng thei sia, a hrehawm zawk. A mutna pindan lam ka chinfel mêk laiin motor tlan thawm ka hria a, a naute an ni ngei tawh ang. Ka la zawh fel loh deuh avangin ka va chhuak lem lo. Thawm erawh ka ngaichâng reng a. A hnu lawkah Remruati aw ngei mai ka hre ta. "In va reh ve, May, i awm em?" A rawn ti lang lâng a. 

"Aw awm e" tiin ka au ve. 

Kawngka chu a rawn hawng a, ka va mitsir zauh, Sangbera khum bul dawhkan ka hrukfai lai a ni. A rawn phei a, "A pindan thlengin i tihfaisak elo?" A ti a. 

"Aw" ka ti teh tawp. 

"Zo vat teh, coffee ka in duh" a ti hlak hlak a. 

"Va inthlit ve mai la. A harsa lo ê" ka ti a, Machine a awm reng a, in thlit ringawt kha thil harsa a ni lo. 

"Eheu! Kan chhiahhlawhnu chu i va ngampa ta ve" a ti hê hâw a. 

"Chutia mi?" Ngaihpawimawh loh hmel zetin ka lo ti ve. Ka tih zawh avangin pindan atangin ka chhuak a. Min rawn zui zel. "Sangbera ka hrilh ang" a tih chuan, "I thu thu" ka ti hmak bawk. Sangbera a ngaihzawn rûk vanga ka zahpah viauna chhan tur ka hre lo ve. 

Kan inhnial tam hmain Teberi te an rawn thleng ta hlauh a, ka lawm tak tak a ni. "Ee..U Remruat, i va thleng hma ve.. May, ka û chu a kalna a rei tawh em?" A ti nghal zat a. Ka lo chhang vat. A pasal chu a kawng dawmin a dingin, "Ka herh deuh mawni le..ka fit lo lutuk a, chuvang a ni. " Tiin a han tiche kual a, nâ tih hmel zetin a ner sak sak bawk. An nu chuan, "Ṭhing ee, khaw maw bawkkhup teh" tiin a nawr a. Zorina chu a bawk ve mai bawk. An fanu chu ka lo ban vat a, min duh ve mai. Tebreri chuan Zorina kawng chu a han hmet kual a, an pa lah chuan, "I tet tet nen i hmet na reuh zek a.." a lo ti ṭuah ṭuah. Ruh lam te, tha nâ tih vel hi ka hmet ve ṭhin a. Kan khaw hluiah kha chuan min lo pan ve zauh zauh ṭhin. 

"Ka lo hmet ve chhin dawn mi? Ka thiam em em lo nâin" ka ti a. Teberi chuan, "Awii, lo hmehsak teh..i thiam tak ang" a ti vat a. Zorina chu ka'n hmet ve a, a nâ lai ka hmeh chuan patling e ti lo chuan a rum kâwk ṭhin. A herh deuh niin a lang. Oil nen ka han zûtsak takah chuan, "A zia ta hawk e. May, i kut a dam sia, i thiam hle mai" a ti a. A lawmawm ve riau. 

Remruati lah chuan, "Inzût lam thiam hi chuan englo lam pawh an thiam" a lo ti vel a. 

"I thiam ngawt ang" ka lo ti zawi sap. U Bawiha te chhung an rawn thleng ve leh ta. Kan ri leh ta lê lû mai. Phir unaute lah an harhin an hlei mai sia maw. U Mami'n, "Kha i u Mayi tihfelsa zawng zawng in tihnawk leh vek dawn, pawnah va infiam r'u" a ti a. 

"A ngai lo, awmtir mai mai rawh. Pawnah chuan ni a sa ang" ka lo ti vat. 

Sangbera'n min lo call a. "An lo thleng tawh em?" A ti a. An lo thlen thu ka sawi laiin Remruati'n ka phone chu min rawn chhuhsakin, "Lo thleng vat teh.." a ti lâng lâng a. Sangbera chhanna erawh ka hre lo. A off hmak zui. A va che ngeiawm thiam tak. Chawng chawng mai a..

Teberi te nen kan inkawm a, an nui duh si, u Bawiha nupui U Mami lah fiamthu a hre hnem si, ka nui nasa ngang mai. Teberi ta pek chuan, "Nizan kan pain mi rawn dap dâwk dâwk a, Ka pa a la muhil lo tih ka hre si, ṭawng si lovin kan inelh ngat ngat. "Ka châk asin" a ti sur sur a. 

"Ka pa a la meng" ka ti hrawk a, ka pa lah fiamthu duh ve ta chu room lehlam aṭangin, "Nia, ka la meng, Bawiha" a rawn ti ta pek a. Kan nui vak vak alawm" a ti a. An pa lah chuan nui ṭha duh mang lo hian, "Rak phawng phawng zel suh" tiin a chhuak nulh. Nupa inhmeh leh inpawh tak zawng an ni chiang mai. U Mami pawh chuan, "I ti duh a, Kevina te hi e an harhvâng sia maw. Laklawh lai laite hian thawnthu hrilh an han phût ta ṭhin a, a beat hi a buai nak tawh zel. " A ti a, zahmawh angah pawh an ngai lo. Remruati'n, "In zak lo lutuk, chutiangte sawi sawi chi a nia mi?" A lo tih chuan, Teberi'n, "Nang phei chu pasal nei la, i nasa zual ngawt ang aw" a lo ti ve leh. Aa..an bula awm a nuam a ni tawp mai. 

Sangbera te pawh dar 1 rik hma deuhin an lo thleng a, Nu Buangi chu a cher kuam mai. A biang pawh a kî vân mai a, ka va khawngaih reuh tak. An chawhmeh lo hawn chu U Mami nen kan lo dahfel zung zung a. Nu Buangi'n vawk sa a ei châk bawk a, kan chhum hluai a niang chu. Thlai lam ka khawih leh a, Teberi leh U Mami ten sa lam an chang leh. Remruati erawh Sangbera bulah a tawlh leh char char, hneawm sia a. 

Dar 3 bawr velah kan inpeih thawkhat bawk a, chhuanlam leh turin kan inhung fel a, Pool lam kan pan ta diak. Tui an chen laiin pool sirah ka lo ṭhu a, naupangte thla te chu ka laksak,. Tui ka hlauh êm vangin chen tumna ka nei lo. Kimtea nen kan inbe zo ka phone dah ṭhat ka tum lai takin ka inrin hmain Remruati chuan min rawn pawt thut mai. Tuiah chuan ka tla ta bâwrh a, ka phone ka thlauh zui nghal bawk. Remruati lah chuan min ngaina ber ang hrimin min kuah thuak thuak a, min nempil ta mai. Mangang zetin, "Ka duh lo, tui ka cheng thiam lo" ka ti ṭâwk ṭâwk a. Uangthuang zetin min nem lui ngat ngat bawk, mahse, tu emaw hian zo zet hian min rawn pawm kang ta nawlh a, Sangbera a ni. Pool sirah chuan min hlang chho a, ṭawng pawh ka la tawng thei lo. Ka khur der der bawk. Sangbera awrâwl chuan, "Tui a hlauhzia i hmu a ni lo'm ni? Chintawk neih tur" a ti bul bul a. A lungawi vak lo tih a lang. Remruati chuan, "A hlau tih ka hre hleinem" a ti hlak hlak bawk. 

"Ka phone a tla daih" ka lo ti a. U Bawiha'n a lo zu dap fuh nge, a rawn lek kang vâ a. "A chhia ang. " Sangbera chuan a lo ti vut. Ka tan phone pakhat neih pawh a harsat tehlul nen, ka thiam loh vang pawh ni lova chutia ka phone a han chhe ngawt chuan ka rilru a tina hle. Remruati ka ngeina a zual sawt. 

Remruati chuan, "Siamtir a har lovang" a lo ti ham ham. Ka ngei ve tawpkhawk bawk a, "Ka tan a siamna man ringawt thawhchhuah pawh a harsa asin. " Ka lo ti tuar. Midangho pawh chuan min rawn en ṭhup mai. 

"Khatin min vin khanglang suh, ve mai mai a che" Remruati chuan a ti ram hmak a. 

Sangbera'n, "Ngawi rawh. I over lek lek ṭhin. May, hrehawm ti suh. Ka lei ang che" a lo ti hriam hraih. Remruati chu a titau ta hmak a, tûm bûrin in lam a pan hmawk hmawk a, va inthlak sawk sawkin hawn a tum ta mai. Tuman an va thlem duh si lo, Sangbera chu rawn melhin, "Ani vang khan min vin a maw? I hre viau ang. " A ti nghat a. Sangbera lah chuan lehlam a hawisan daih. A titau laklawh si nen, Remruati chu a haw ta a. U Mami'n, "Mil reng hi a har ṭhin." A ti sap. A awm lo chu a nuam daih zawk. 

Keini pawh chu in chhungah lutin kan intifai hlawm a, chaw ei lam pawh kan hnaih ṭan. Teberi chuan, "Hrehawm ti suh aw. Phone mante lek lek chu Mama hian a nei lutuk"a ti seuh seuh a. 

"A thlawnin min tihsak hnem tawh si, ka hlawh aṭanga rulh tur talin ni rawh se" ka ti ve. A inthlahrunawm zozai êm a ni. Kan chaw ei pawh kan puar viau e,. Keipawh ka intihfel zawhah hawn lam ka hnaih ṭan. Teberi te rualin ka haw ve dawn a ni. Nu Buangi te awmpui an ngai sia, Sangbera chu ka phût ngam lo. 

In ka thlen meuh chuan ka chau zawi hle. Tv kha kan fit tawh a, Kimtea chuan a lo en mêk. Ka phone chhiat thu ka sawi chuan pawi a tih ve hmel hle. Phone khawih tur nei ta lo chu ka inbual zawhah tv te chu ka en ve ta mai mai a. Remruati thinrim hmel kha ka mitthlaah a lo lang leh ṭhin. Min huat belhchhah ngei dawn a, mahse, pawi ka ti lo. Ani huat mai mai kha a. 

Ka mutui kher mai, ka chau bawk a ni. Ka û chungchangah police ka la hmu ta chuang lo va, a chhan pawh U Sangi te nupain, "Min lo nghak rawh, kan buaipui dawn nia" an tih vang a ni. Tuilum ka in laiin U Rini a rawn chhuk a, "Peka thih thu kha i hre tawh em?"a rawn ti teh ngawt. Mak ka ti lutuk a, ka ka hô mai. "A thi maw?! Engtin?" Ka ti hluai. Kimtea pawh a rawn tho ve a, mak a tih hmel kher mai. U Rini chuan " Nizanah a leng kha a haw lo va, mahse, a riahbo fô vangin ngaihṭhat lohna an nei hran lo a niang. chuan tukin zing dar 6 velah khan RV kawngah kawngsira a let reng an hmu a, nichin lawk khan Peka a ni tih an confirm chiah. " A ti mawlh mawlh a. A va mak teh thut dawn ve le. Vengchhung au rinna aṭangin Peka thih thu chu an rawn puang ve chiah. Ṭhenawm mai mah nise, a hmaa kan lo inbakkaih tawh avangin va lan ve ka tum hran lo. Mak an ti chuang lo vang. 

U Rini pawh chu a ṭhu ve ta reng a. Sangbera bak sawi tur hi a hre ngai si lo. Chutia a sawi a sawi takah chuan, Remruati'n Sangbera a ngaihzawn thu leh kei thlenga min huat thu bakah nimina a chetdante chu ka hrilh ve ta vek a, hmeichhia tih takah ka thawl huai nghe nghe. A chek hlak hlak a, "Awiii Remruati mai mai chu, a va zakthei lo, ka ringhlel rêng a. An thlalak a post sek danah te hian..nge nangte chu a lo ngei ve ringawt che a, Sangbera ṭhianpa bialnu hlui a nia..a ngam pawh a ngam reng reng e a" a ti hlawih hlawih a. Remruati leh U Rini hi inhau se an in chhang tawk viau ang. 

U Rini chhoh hnuah chaw kan ei a, Sangbera'n min lo call, "Ka rawn chhuak phei dawn a, i phone tur chu kan en dawn nia. Lo la awm rawh"a rawn ti leh hmiah. 

"Aa..ka lei ve mai ang, tlem chu ka la nei ve" ka ti naa, a pawm leh dawn chuang lo. Ka lo nghak ta ngawt a. U Sangi te nupa pawh an rawn thang mêk. Peka thi chu mak an ti ve hle, mi kut tuar tia sawite a awm a, a phutawk a hmu nge a vanduai zawk ni ang aw. Peka ber a thih tawh si chuan ka û thih chungchang pawh sawi zui neih loh law law ka tum ta mai . Dar 10 pelhah Sangbera chu a rawn thleng a, "U Rini'n a hmu che em?" Ka lo ti nghal vat. Mak tih hmel deuh hian, "Hmuh pawh ka hre lo, ti nge?" A ti a. 

"A rawn zui leh che ka ring a" ka ti ringawt. Ka lo insiam sa vek tawh bawk a, kan chhuak thei nghal. "A thlawn ringawt chuan ka duh tawh bik lo a nia. Ka rul ang che..thla tin ang pawn" ka ti mawlh mawlh. 

"Ho viau lo teh. " A ti sup ringawt. Ti nge heti em ema min duhsaka min khawngaih le..hmannia min fawh dawn khan, "Tu emaw hlimthla nih hi bansan rawh" te kha a tia. Tu hlimthla nge maw a sawi ni..Zodini kha a ni thei mai ang em? Ka ding ta chawt mai. A rawn hawilet hû a, ka lo melh ran bawk. 

"Ti nge? Eng nge?" A ti tâwng. 

"Engmah" ka ti bawk si, ka zawt hreh ve tho bawk nen,. 

"Khaw nge in kal dawn?" U Rini aw kan hre ta. Pangpar tui a lo pe mêk a lo nia. Min melh dan chu ka duh lo ru hle, thikna ka hmu tel tlat a tin ni. "Hei dawrah kan kal lawk dawn a" ka ti a. 

"Sangber, ka sawmna che kha a chhana min la hrilh lo a nia" tiin Sangbera a melh daih a. 

"Eng nge khah?" Pakhat lah chuan a lo ti..U Rini chu a hnual hmel tawp. "Birthday lawm kha..naktuk zan ka tih kha..lo theih hram tum la" a ti nang nang a.

"Meeting ka nei a, naktuk zan chu..a pawi hle mai" a sana melh zauhin Sangbera chuan a ti a. A kal zui hmiah bawk. U Rini chu a meng no lo khawp mai. Remruati ang khan min haw ve mai ang tihte pawh a hlauhawm alawm le. Motora kan luh hnuah, "Kal ve mai tur alawm..min huat hmel si" ka ti nghat a. 

"A huat ve ringawt nachhan tur che a awm lo. A ninawm roh si" a ti ta mai a, a sawi dan tehtawp chuan ka nuih a tiza tawp. Phone dawrah min luhpuiin a dawr neitu patling thau angreng tak nen chuan an inbe nghal bawrh bawrh. "May, tikhan lo en kual rawh" a ti a. Dawra thawk nula sa pan lam, hmel fai veng hian min rawn buaipui nghal vat bawk. 20000 aia manto chu ka melh lo lui tlat, tunlaiah phone 10000 man tih vel chu mi nawlpui pawn an hmang tawh lo ang a nia, keipawn a ṭha, tlawm tho si ka duh. Kan enkual fê hnuah Oppo Reno chuan ka mit a la ta ber. Sangbera chu ka bulah a lo ding reng tawh a, "Oppo ber kher maw..tak taka a ṭha. Hmelṭhat a awl" a ti zui hluk a, ka nui ve ringawt. 27000 in kan la ta a. Kan chhuah hnu chuan, "Tikhan thlatin ka hlawhah i cut ang, 2000 zelin" ka ti sap a. 

A nui hawk hawk, "Cut tham pawh i hlawh hleinem. Tikhan pawm mai mai teh" a ti nghut a. Motora kan chuan leh hnu chuan a in lam kan pan dawn emaw tih laiin hmundang kan pan ta daih. "Khaw nge kan kal dawn" ka ti a. 

"Aizawl khawpui ka fan kualpui dawn che. " A ti ringawt. 

"A va ho tak" ka ti hlak a. 

"Vawiin chu chawlh ka pe ang che. Ka âwl ni a ni bawk a" a ti leh hmak. Ka thu lo ve bawk sia maw. Gabriel Garden an tih maiah min luhpuiin, ka kal vawikhatna a ni. A awm tih hre tho mah ila, chutiang vela kal chu ṭulin ka hre lem lo nen,. A hmun han luh chuan a lo nuam ngei mai. A thawvengin a fai si. Midang pawh an lo awm ve far,. Intihhlimna chi hrang hrang naupang leh puitling tan an siam bawk a. Pangpar lam ngaina tan pangpar chi hrang hrang thlir tur a awm bawk a, thlam aia lian hlek tur cottage an ding pheuh pheuh bawk. Phul hmun zawl nuam zetah kan ṭhu dun a. Mi rehna lai ber a ni bawk. Hetia kan pahnih chauha mûk deuha kan awm hian ka lai tlat zel. Ka ṭhing thei ee, laihna chhan tur ka nei azeng pawh a ni si lo. 

"Nuam i ti em?" A tih chuan, "Nuam tawp, thaw a veng " ka lo ti ve a. 

"Taka khawi maw i phone kha settings vel ka lo khawih ang" a ti a. Ka pe ve vat. Ka blind bawk a, Kimtea ka râwn chang hi a tam mai. Ka phone chu a han khawih chho a, a awlsam thei ang bera min set sak turin ka lo ti bawk. Sim card kha kan lei nghal bawk a, ka number ngai ang kha chu book leh tê tê a ngaih vangin a thar ka hmang ta mai. "Password -chhu lut la" a rawn ti a. 

Ngaihtuah chiang mang hlei lo hian, 1305 ka lo ti vat. 

"I birthday maw?" A ti a, "Umm" ka ti mai a. Min melh ta veng veng mai le..thil ka hrechhuak ta thut,. Zodini thih nî kha ka birthday a nih tak kha mawle. 

"Nge tihsual ka nei ami?" Ka ti hû a. 

"Nei lo. A mak" a ti nghut ringawt. 

"Min en reng sia,"ka ti a. 

"Hmuhnawm hek che" a tih chuan ka zak chuan hnuailam ka melh daih. 

"Tak taka May..heng zawng zawng thlen dan hi hre tawh la a ṭhat ka ring" a ti sup a. 

"Umm, sawi rawh" ka ti vat. Thawk a la hawk a, harsa tih hmel fê hian, "Nangmah anga fahrah nula rethei tak hi a awm a. Mahse, a thi tawh. Ani chu ka huanah khan phum a nia" a ti ṭan ta a. Ka ngaithla uluk lutuk chu ka hah lek lek zawk. 

"A pahrawn lak aṭanga ka chhanchhuah, ka hnena khawsa zui ta a nia..amah vangin vawiin thlengin ka tlangval ta a nih hi.." a tih mek laiin, "Sawmdawng" a rawn ti lang lâng a. Remruati leh amah ang bawka inchei nalh a ṭhiannu te an lo ni. Ka hnual nghal vek thei mawle. Sangbera chuan, "Ehe..in kal ve elo?" A lo ti vat a. Remruati mitmeng kha zet chu ka melh duh lo lui tlat. 

"Eng nge in tih a?" Ngaihnobei vak lo hian a ti a. Kan ṭhutna an rawn thleng phei der tawh. 

"Hei mayi hi ka lenpui a nih hi." Zaidam zetin Sangbera'n a lo ti. 

Ner nâwng chungin, "Ni dawn tak, hetiang hmunte hi a tan chuan vanram ang vel a ni awm sia. I va fel ṭhin tak êm.." a ti hluam hluam a. Ka ngawi char char thung. A ṭhiannu chuan, "Friday zan kha i off thiang lo aw. Ka tan a pawimawh teh mai a nia.." a ti sar sar a. Eng tak ni leh ang maw..

"Nia ka lo tum ang. " A ti ve mai bawk. Remruati chuan, "Min rawn sawm ang che" thuneih hmel fê hian a ti a. Sangbera lah chuan, "Azuali nen kan lo tum tawh asin. " A lo ti si. Remruati chuan ṭap mai tur hmelpu hian, "Ninawm, Hmangaihzuali ve teh sek pawh hi a. " A ti hlak hlak a. A ṭhiannuin a kheuh zeuh lai chu ka hmu reng. Remruati ṭhiannu chuan Remruati kaih pahin, "Kan kal phawt ang, Zorema ten min nghak a" a ti sawk sawk a, an kal zui nghal. 

Sangbera chu a ngawi ta reng a, a thil sawi lai kha chhunzawm se ka duh nen, a sawi zawm ta bawk si lo, ka zawt ngam bawk si lo. A laklawh ve lulai êm a ni. 

"Remruati hi i hua em" a ti ta daih a. 

"Haw lo, ka khawngaih zawk" ka lo ti hmak. 

"Ngah maw?" A tih chuan, "A ngaizawng che sia, tupawh a thîk a. A khawngaihthlak alawm" ka lo ti zung zung. A nui hawk hawk a, "Min ngaizawng dawn mawni le..ṭhian alawm kan nih" a ti ve mai a. 

"I hrethiam vek, i fing a, i tilang duh lo mai mai. A ngaihzawnzia che chu haider rual i ni tawh lo, duh ta che. A hmelṭha a, a changkang a. " Ka ti duah. 

"Teh duah a che. Ṭhian nih hnuah mi ka ngaizawng thiam lo. Bakah Remruati chu ka ṭhianpa bialnu alawm" a ti a. U Rini khan a sawi tawh tak e. 

"Mahse, min thik ve vak zel hi ṭha deuhin hrilh teh, min runluih peih bawk sia, a naupangchhia e" ka ti ve ngial a. Kumah Remruati ka phak lo naa puitlin kawngah chuan ka cho ve zân mai. 

"A zia ve mai ang.." a ti ringawt. Chuan a thilsawi lai mawlh kha, hre châk zek zek ang hian ka awm. 

Ka insûm thei ta ngang lo va, "Ih, I thilsawi lai kha sawi zawm leh la" inthlahrung zetin ka ti a. Min rawn melh zawkin, "Hun dangah le..a moodah ka awm leh tawh lo, thil va ei ang" a ti ta daih. Hmm..a va sual thiam tak. Ka zui lo thei si lo, Restaurant lian leh thianghlim zetah kan lut a, a kil lam tukverh bulah kan ṭhu. Menu ka han en mai chu Awiii a tam zawk chu an hming ka hriat ve chauhte an ni. Rice, chow tih vel a awm lo reng reng. Eng nge kan ei ang pawh ka hre lo. Chah sual ka hlau bawk si, menu ka melh ngat ngat ringawt. Ka hriat lar ve ber burger lam chu ka thlûr ta bîk a. Humburger ka chah ta ngawt mai. Sangbera'n eng soup emawni a chah tel bawk a, ka puar ve thei êm ang chu maw. Hei hi a nia lehlamah inzir ve a ngaihna chu, hriat tlem lutuk te hian zahna min thlen fô. Khawvel changkan ang mil zela kan inupdate ve hi a ṭul khawp mai. Phone kan hum deuh vek tawh a, inzir a harsa lem lo. Ka mawl ang anga ka lo mawl zel chu tumah dem thei ka ni lo, keimah chiah ka demawm. 

Eitur chu an rawn dah a, ka ril a ṭâm tawh bawk nen, ka ei nghal buan buan. Min en reng chu en let vein, "Nge? " Ka ti a.

"I hmuhnawm bian bian lutuk" a tih chuan, "I ho" ka ti nghat. Kan ei zawh meuh chuan ka puar ngei mai. Ka uang ve châk tlat a, "Tun ṭum chu ka lo treat ve ang che.." ka ti deuh ngei. 

"Next-ah aw" a ti mai a. A wallet a phawrh nghal. Waiter kuta pawisa a pek lai mekin, "Awiii Sangber" rawn ti hluttu lam kan hawi rual ṭhawt. Nula tê lam, ngo vir ver, hmel chhe lo tak hi a ni a. 

"Teh hlawl che u, Baby" Sangbera pawh chuan a ti ve hluai a. 

"I dam maw? Kan inhmuh lohna a rei ve ta hle mai a. Kha.. in nu mi?" Tiin Baby a tih chuan min rawn kawk zauh a. Ka lu ka thin nar nar laiin Sangbera ta pek chuan, "Aw..nih hi,. Kan innei vat ang" tiin ka chhipsam a rawn tuai zauh. Makti em em hian ka han melh a, a thutak ropui si. Hmela hian eng game nge maw a khelh leh tak le..

Baby chu a nui naa Sangbera bialnu tur êm chuan a beisei ka pha lo deuh nge, a nuih dan a pawnlâng riau. "Nih chu a. Nakinah remchangah ka la rawn lêng ang,. Chaw te pawh kan la eikhawm leh ang chu. " A ti sar sar a. Sangbera pawh chuan, "Tehlul e. Henry nen pawh renew leh r'u, a khawhar thei ruk ruk lutuk" a lo ti zauh a. Baby a nui tawi tak mai. A kal hnuah, "I zak lo sia maw..nge i bialnu anga mn sawi ve ringawt" ka ti hmarh hmarh a. 

"I la ni vat dawn tho a. A ni lawm ni!" Tiin min melh kul mai. 

Ka hmui tipawrhin, "Aih, bialpa ka duh lo" ka ti ro hak a. 

"Kha i inhungna bang kha ka sut hawn zawh loh i ring deuh em ni?" A tih chuan ka melh kâwk a. "Tuman an su hawng dawn lo" ka ti hmak. 

"Ok, i tihtauh hmain chhuak ang, titau ka thlem thiam lo" a ti a. A nghal ve reuh mang e aw. Lungawi tak chuan ka zuichhuak ve leh mai bawk a. 

Kan hawn dawnah Remruati te pahnih bawk kan hmu leh, ka ning. Ka rilru hria niawm takin, "Kal vat ang. " A ti a, min rawn kai nghal zat, a kut chu ka thingthla duh bik teuh lo. Remruati mitmeng chu ling tak a ni. A ho ê..a ṭawng theih man a ni mai. Kan in kawta ka chhuk dawn chuan, "Naktukah rawn hma tum rawh aw. Huan sam tur hlawhfa ka la dawn a, ka buai deuh takin" a ti a. Ka bu nghat. "Chuan, muttui leh chaw eitui" a ti nghut a. Ka chhan hma hmain a tlan daih. A va chimawm e aw. 

Zanah U Rini a lo leng ta alawm. Awii, a'n sawi tak tak chu ka za vek thei maw le. An college kal laia Sangbera'n a biak dan, a zui dan..a tam mai. Remruati leh Alex a sawi kai bawk a, mi rêl chu hnehsawh tak a ni. A haw har hrep lehnghal a. A mak tawp, hetia Sangbera a sawi a sawi hian ka rilru a lo na ve ringawt zel mawle. Ka thîk nge, ka lo duh ru ve reng ni. Mahse, duh chu ka tum si lo. Lsa te khawhar in kal haw an rawn leng leh a, thingpui ka lo lumsak. Kan topic pawh kan thlak thei ta hrâm. Peka thih dan an sawi dante an sawi a. Mka chuan, "A ṭhiante sawi dan kha chuan an intibuai a, mahse, an inkhawih na hran lo. Chuan, an rawn haw rual vek sia, mahse, Peka hi a zu chhuk leh ngat a ni maithei' a ti a. 

"A nun a chhe êm mai a, a thih dan pawh a pangngai loh hi.."U Rini chuan a ti a. Ka pawmpui hle. Kan veng chhungah Peka aia sual pawh an awm ang, mahse, ani hi chu a chimawm bakah a zaktheilo lutuk hian hawtu a ngah phah. 

"A nau pawh kha a ṭap miah lo mawle.." U Rini'n a tih chuan mak pawh ka ti lo. Ka pa ruang chungah ka tap bik miah lo ang khan. 

An haw hnuah keipawh ka mu ve nghal a, chhuah hma ka ngaih avangin ka tho hma viau. Kimtea nen pawh hun kan hmang dun tam lo ta kher mai. Ani hi ama awm awm hian a awm ve a, lehkha zir hi chu a peih viau thung. Angaihi hi a sawi ve sek mai a, an inbialnu bialpa ve deuh em mawni, nakinah la zawhchian a ngai a ni. 

Sangbera in ka thlen chuan a huan sam tur te chu an lo awm tawh a. Nu Buangi te pawh anmahni in lamah an phei ve tawh a ni maithei. Teberi khan an inenkawlna man chu a û-in a tumsak vek thu te kha a sawi a, midang tan malsawmna hi chu a va ni tak. Hlawhtling âwm reng pawh a ni. Thingpuite an in hnuah hlawhfa pahnihte chu a huan lamah an chhuk ta a, Sangbera pawh, "Vawiin chu hna ka ngah viau mai. " Tiin smart takin a chhuak zui nghal bawk. Tihfel ngai ka tifel zung zung a, a pindan ka tihfai lai chuan ka rilruah thil eng emaw a rawn lut ta tlat. A dik lo tih hre tho mah ila, hriatchâkna chuan min hneh ta nge nge a. A almira, thing ṭha chia siam, ngheh hmel zet lian lutuk lo chu ka hawng a. Thawm ka dim hle, tumah an awm tawp si lo. Lehkhabu bakah file te a lo awm a. An pawimawh hmel hlaqm viau. Chutah a hnuai ber kil deuhah chuan Album a lo awm ta rân a. Kawngka ka va kalh tê tê a, Album chu lachhuakin Sangbera khum bul sofaah chuan ka ṭhutpui ta. Ka lungphu lah chu a rawn rang ve chiam lehnghal a,. An tetlai thlalak ho chu ka keu thuak thuak a. A tawpa tawpah hmeichhia, keimah nena intiat thuak tur, sam tawi, hmel felfai leh simple zet hi a rawn lang ta. A hnuaiah Sangbera nen hlim taka an nui dun lai a rawn lang leh a, ka keu zel a, chu nula chu a lang tam tawlh tawlh. Remruati te ang êma hmelṭha chu a ni lo, mahse, mi fel leh rilru ṭha niin a lang. Chutah leh thlalak hnuhnung berah chuan ka rin loh leh beisei loh lutukin Keima thlalak ngei, he ina ka thawh hmasak ber nîa ka thawmhnaw hak ngei mai nen ka lo awm ve zan mai. Chokaa ka chetla lai a ni a, ka lang ṭha tehchiam lo hle. Eng nge ka hriat pawh ka hre lo, chu thlalak chu phawrhin a hnung lam ka en vut a. 

"May Zoremmawii..ka nupui tur" tih a lo inziak kalh nia..maktiin ka ding ta hluai a..!