Sangbera 6

SANGBERA ..(6)

Ziaktu : Toni Râlte

Ka awm a nuam ta hauh lo mai. Whatsapp-a nawmnah tak taka min lo be chhawhchhi thintu kha Remruati lek maw lo ni a?! Ka rin loh leh beisei loh lam daih a ni. Maktia ka din khawng reng laiin Sangbera chu a rawn kal phei a, "Erica chuan a nei nual e. Tiru, a hla lo bawk a, i zu kal ang u" tiin ka thil khai pakhat chu rawn lak a tum a. Ka lo tawlhsawn dâwrh, ṭawng tuma ka an lai takin Remruati chuan, "Nia, hawh, May, Sawmdawnga ṭhianpa a nia a tlawm thei viau ang che" tiin a nui sâng a. A hma lawka ka beng bula thusawitu kha amah a ni ta lo emawni ka ti hial mai. Chinghne beram vun sin dik tak a nih hi. Ka la ngawi reng chu min rawn hnaih a, "Khawi ka lo khai chhawk ang che, i khai rit lutuk a nih hi" tih leh ka thil khailai chu rawn lak a rual . Sangbera chuan maktih hmel lek leka min enin, "Eng nge a? May..i ṭha em?" Min ngaihtuah hmel tak hian a ti a.

Harhchhuak thutin, "Aw ka ṭhain ka hria. " Tiin ka che hrut a. Remruati lah a la nui ver ver, Sangbera ka zah êm avang chauhin ka zui ta a. Bakah Tv man tlawm chu kan mamawh ve bawk nen. Rilruah erawh thildang a lut thei meuh lo. Erica dawr a tih, TV bakah in chhung mamawh chi hrang hrang awmna dawr lian zetah chuan kan lut ta a. Erica ni ngei tur chuan min lo dawngsawng vat vat, a fel khawp mai. A dawr thawk nula tê lam nelawm zet mai hian tv man tlawm te chu min en kualpui ta a. Sangbera te erawh Erica ṭhutna bulah awmin an inkawm ho. Samsung LED TV chuan ka mit a la reuh hle. A len over loh bakah kan in nen pawh a inrem ve deuhin ka hria. A man erawh ka duh ai chuan a to deuh a ni. Ka pawisa ip ka ngaihtuah rauh rauh mai. Sangbera a rawn lang hlawl, ka en lai mêk chu rawn hmuin a man a zawt a. Ka rin loh lutukin, "Lo pack fel u la..Erica ka va pe fel ang e" a ti ta mai a. Rang lutuk hian, "Engvangin maw!" Ka ti vak. Nula pawh chuan mak a tih hmel deuh. Sangbera lah chuan ngaihsam hmel fê hian, "I nau thilpek pek ka duh alawm" a ti mai si. Chutiang man zah zah thilpek kan dawng lo. 

"A ngai lo, ka la nei daih ve alawm..a ngai lo reng reng" ka ti chul a. 

"May, hahdam rawh. I nei lo ka ti hleinem. Mahse, khang i kawlsa kha chu nakin atan khawl rawh..a ṭha em?" A ti dam thlup a. He pa hian engvanga min duhsak em em nge maw a nih le? Ka lungawi lo lek lek zawk a ni, a zahthlak zozai ve tawh êm a ni. 

Remruati a rawn phei hnalh hnalh a, nuam lo ka ti lehzual..chuvang chuan, "U Remruat, hei U Sangbera hi hrilhfiah teh, tv min leisak a tum tlat a. Min pui nasa tawh lutuk, a zahthlak" ka lo ti nghal mawlh mawlh. 

Remruati lah chuan nui leh sen sen chungin, "A va ho tak, May, i tv man kha ani nikhat lakluh vel lek a niang chu..leitir mai mai teh..a tihtur a ṭhulhtir theih tawh loh" a ti mauh mai si. Ka hrilhhai letling zawk. Tichuan, an ti tlat sia, TV chu kan la ta phawt. Erica chuan, "May, lo nghak lawk rawh. Vawiin hi in vannei khawp mai, discount lai a nih bakah gift in dawng tel dawn a" nui var var chungin a ti a. Ka lo hawihai viau. A hnu lawkah dawra thawk hian woofer ṭhat hmel zet hi a pack mawlh mawlh a, "Kha hei hi vawiina i gift chu aw" a ti a. Ka meng pawng hlawt ringawt. Mi vannei tak ka ni. Chutihrualin Sangbera lakah ka inthlahrung a, ka lung a awi lo ru deuh bawk. Ka chapo ka inti miah lo naa, midangte puih leh khawngaih nih kumtluan chu ka duh bik hauh lo. Kut leh ke ka nei ve a, taksa hrisel tak ka nei bawk. Kan unau eikhawp leh inenkawlna khawp chu ka thawkchhuak ve thei em em ang. Chu chu ka duh ber pawh a ni e. 

Sangbera motor han lak chhung kan lo nghak a. Thingpuite min chahsak a, an va felin an va polite tak. Remruati leh Erica chu an titi bawrh bawrh a, kei erawh ka ṭhu ngawi reng. 

Erica chuan min rawn enin, "May, i pu chu a fel em? A la thinchhia em?" A ti thut a. 

"Aa., Thinchhe nang, a fel lutuk" ka ti ve vat. 

"A huan te kha i zu fang ve em?"Erica chuan min en chîk zual sawtin ka hria. 

Ka hmela engmah lantir loh tum hram hramin, "Fang vak lo, thei chu ka lo ve a" ka ti a. 

Remruati chuan, "A bula awm tura a sawm che u khan ti nge i duh loh?" A ti a. 

"Ka nau school kalna a hla dawn sia, bakah kan tibuai lutuk palh ang" ka ti ringawt. A nui a, nuihsawh rawng a kaiin ka hria. "Nia, in tibuai ve ngawt mai, in inhriatna a la rei loh ngaihtuahin" a ti hlang hlang a. Ka ngawi reng. Remruati'n min ṭawng elsen tam hmain Sangbera a rawn thleng ta a. Ka thaw huai e. Bangbawr zetin a motorah chuan kan lut a. Remruati pawh Sangbera awm lai chuan a ka pawh zen ila min seh lovang tih theih turin a awm leh tawh. A zia hi mak ka ti thlawt. Sangbera hi a lo ngaizawng reng tihna em ni le? Kan in pengah ka chhuk a, vanneihthlak deuhin ka chhuk deuh chiah tihin Mka a rawn chhuak a, ngam deuhin, "Min lo pui teh" ka ti vat. Sangbera'n min pui leh ṭâlh ang tih ka hlau a ni. 

Ka va dak zuai a, "Ka lawm e. Naktukah ka rawn thleng hma ang" ka va ti a. Mka a lo melh daih, mahse, insiamrem vatin, "Aw le. Tlai lam pawh ka sawi ang khan" a ti nghut a. A tlan zui nghal. Mka chuan, "I va money ve a" a ti a. Ka nui ringawt. Inah kan thiar thla a, ka chau viau. Khaw lum nen, ka tei ve nasa bawk nen, ka ke nâ lai pawh a rawn vûng leh deuh. Ka inremfel sawk sawk a, Tv chu set top box te la leia set ṭhat te a la ngai dawn a. Chutia en nghal theih pawh a ni lo. Kimtea rawn hawn hmain ka inremfel ta vek a. Ka inbual dawn laiin a rawn haw. 

Tv a hmu chu a nui ver ver mai. A hlim hmel hmuh chu a nuam mang e. Ka inbualsan ta a. Remruati bawk ka rilruah a rawn lang leh ta. Mak ka ti ê..engtin nge khatiang nula hmelṭha leh class bawk si chuan kei angte chhe zet zeta min rawn biak duh ni ka ti. Kan innag lo ve lulai êm a, a hmuhmawh tham niin ka inhre lo. Sangbera kha a ngaizawng deuhin ka hre rêng a. Sangbera pawn duh ve mai awm. 

Eirawng ka bâwl laiin ka rin loh deuhin U Chhuna leh a nau nula senior, Thangpuii an tih kha an rawn lut ta hlawl mai le. Ka rilru a danglam nghal dâwrh. Kimtea chuan hre ve lo se ka duh si a, ṭul ûk lovah dawrah ka tir ta ringawt. A hrethiam ve nge ni, "Tetea te inah ka peng lawk dawn aw" a ti a. Ka remti hle. 

U Thangpuii chuan, "Chhuna, engkim sawi rawh le. Hei Puia nau bulah hian..i thil hmuhte kha" a ti nghal zung zung a. 

Chhuna chuan kuhva a ṭhial nuau nuau a, a ha chu a sen ṭhût mai. Hawi vual vualin, "Pekmawia chu a sual êm alawm ,jailah khung daih rawh aw" a ti ta daih a. 

Ka lo bu nghat. "Aw le..nangin min puih dawn phawt chuan kan tantir daih ang" ka lo ti vat a. 

Tichuan, a tira ka thu hriat ang zawng zawng kha Chhuna hnen ngei aṭang chuan thil nihdan chu ka hre ta a. A chiang viau e. U Thangpuii bulah, "Police chu hrilh ngei ka tum a. U Chhuna hi thu an rawn zawt ngei dawn si a, i chhungten an lo remtih loh khan ka talbuai thei dawn a" ka ti a. 

"Lungngai suh, nizanah kan inhau vak a, an rilru ka hneh tawhin ka hria. Ka nu te pawn hnialna an nei tawh lo" a ti ta mial a. Ka lawm hle. Karleh lam aṭang law lawa buaipui ka tum. Naktuk inrinni a ni tawh bawk si. U Thangpuii chuan, "Engmah hlau suh, thil dik lo hi chuan lanchhuah hun a nei leh tho tho zel. Chuvang a nia Chhuna pawh ka rawn hruai ni. Peka hi keipawn ka mil lo hrim hrim bawk. A nu te lahin an hlauh vang hian an ṭan lo ngam si lo va" a ti a. Inhrethiam tawn takin kan inmelh a, Kimtea rawn haw hmain min hawnsan leh ta a ni. 

Chaw ei laiin, "Ate, Pu Chhuna te khan eng nge an rawn tih a?" A ti ta chiah a. 

"An rawn leng ve mai mai a nih kha" ka ti ringawt. Zawhna dang min zawt lo naa a ngaih chu a ṭha tehchiam lo niin a lang. 

"Taka naktukah nilêngin hna ka thawh a ngai dawn a, i lo inenkawl thei ang tiraw? Chuan, U Sangi te in chabi ka dah ang a, in chhuahsan suh aw..bungraw la tur an rawn kal dawn a, i va pe lawk dawn nia" ka ti mawlh mawlh a.

"Aw le.." a ti leh thliam. Ka vak chau ve nen, mut hma daih ka rilruk a. Mahse, Mka leh Lsa te an rawn teilut leh nulh. Han biakchhiat chi an ni bik mang si lo. Lsa pawh nizan ai ngawt chuan a ṭawng duh ve tawh. Eng nge vawiin lam a interview te chu ka zawt khawmawi ve a, "A ṭha turah ka ngai" a ti ringawt. Mka ṭawngkamah Zirtirtu hna a dil ve niawm tak a ni. Amah hi a zirtirtu lo tawp, ka sawi thiam lo. A ngawichawi sia, nêl leh naupang tan pawh an hriat loh han zawh vel kha a nuam vak lo vang. Thingpui ka lumsak hnu reivakloah ka hâm ru lai min hmu em mawni, "Chho ang, Mayi hi a mut a chhuak tlat" Lsa chuan a ti a. Chelh pawh ka chelh khawmawi lo. An haw veleh ka ha ka nawt a, ka mu nghal daih. Ka muhil tui viau. 

A tukah ka sawi lawk angin hma takah Sangberah in ka thleng a. Nu Buangi kha kan ve pawh ka duh viau naa, ka hun neihin a zir hlawl si lo. Ka ngaihtuah ve khawp mai. Amahin tukṭhuan chu a lo inbâwl ve em mawni..

"Vawiin chu sawi tawh angin mikhual ka nei dawn a, an vaiin 6 an ni dawn a. Chawhmeh siam tur chu fridge ah a awm vek, ṭul leh ṭha i tih angin i siam mai dawn nia, sa an ei thei vek" a ti zung zung a. Pu berin chhiahhlawh a bia ang mai ka inchan, mahse, hrehawm ka tih phah lo. Chhiahhlawh hian duhsak ka hlawh zing tawh êm mai. Chawhma chhungin in chu ka tifai a,. Ani erawh a pindanah a inkhung. Chetna tur a tam lo bawk a, ka zo thuai mai. Tlai dar 4 velah chauh a mikhualte chu an rawn thleng dawn a, ka hmanhmawh em em lo. Thingpui in in a rawn chhuak zuai a, min melh vung vungin, "May, i sam kha tan la i inhmeh zawkin ka ring" a ti teh ngawt. Ka sam hi a sei mawl ve tawp bawk a, ka chhipah hian ka bâwk mai zel, a hnawk ka tih vangin, tan lam erawh ka lo ngaihtuah ngai lem lo. "Ka tan ngai lo va, ka awm thiam lovang" ka ti ta ngawt a. A nui huk ringawt. Thingpui in zawh aṭangin a mikhualte eitur lam chu ka buaipui chho ta a. Ani pawh a pindanah a lut leh tawh. Vawk sa leh arsa bak sa chu ka siam lo. Thlai lam kha an duh viau zawk ka rin avangin ka phuahchawp kual a, bai pawh a uih leh uih lo ka siam vei thlap. Thingtlang lamah chuan chawhmeh hi bawlhlo tel lutuk lo va han siam tawrh maite kan tihṭhan a lo ni bawk nen, ka phe buai ve hle. Dar 3 pelh hlekah chuan a chhuan kai tur ang ang leh a hmin tur ang ho pawh ka tifel thei ta a. Ka che nasa bawk a, ka'n awlthâwng ta chu ka ṭhu hle hle mai. Sangbera a rawn kal a, "Inbual i duh em? Va inbual la..ka lo vil ang" a rawn ti a. 

"Inthlakna ka keng lo" ka lo ti vat. 

"I hak tâwk awm chu ka kawlin ka ring..tikha chuan mikhual dawngsawng chi i ni lo, va inbual thlandai rawh" a ti zung zung a. Ka ṭawp hmel viau em mawni dawn le. Thuawih tak chuan bathroomah chuan ka lut ve ta mai bawk a. Engkim awmsa a ni bawk a, ka inhlip sawk sawk a, ka inbual nghal sar sar. 

Towel-a intuam hlânin ka va chhuak a, "Ka thawmnaw pindanah lut la" a rawn ti lûng lûng. Towel a chhing lek lek nen, ka mal te chu a hmuh hlauin a pindan lam chu ka pan ta rawk rawk a. A thawmhnaw dahnaah hian single khum mar nalh tak hi a awm sa a, chutah chuan ka hak tur chu a lo dah thlap. Underware nen lai lai..awii..ka nuih a za lek lek, engtin nge heng hmeichhe thawmhnaw te hi a lo kawl ve ni. Teberi thawmhnaw a nih chu ka ring si lo, a chhan chu Teberi kha kei aiin û mah se, kei aiin a tê..

Bra leh underpant lah chu ka'n tawk em em khawp a! Ka size hre sa hian a lo lei lâwk te a nih ka ring rum rum. 

Tshirt eng dak hlarh mai chu ka han ha phawt a. Ka tawk leh chiah chiah khawp mai. Jogger pants dum pawh chu ka hak tur ni âwm reng a ni. Kei hi ka thau lo naa, ka khal ve târh mai a, ka mawng pawh a poh ve târh mai. Ka sam ka su lo bawk a, darthlalang lian zet hmaah chuan dingin ka han thlah hnûp a. Zep nâk emaw Sangbera sawi vang pawh ni loin ka enkawl hman bawk si lo nen, a bawrchhawrin a ṭhing ngawih ngawih. A phirsi bawk si, ner nak chungin ka zial nawk nawk a, ka chhipah ka bâwk leh ta thân. A hmai hnawih leh engilo te pawh ka hmansak ve ta tawp mai. Ka va chhuah chuan a lo ṭhu duai a, ngunthlûk zet hian min lo en. Ka lai angreng hle. Ani pawh mak deuhin a thutak rûn a, ka sawi thiam lo, eng emaw mawlhtu nei ang hian a awm. 

"Ti nge min en reng? Dik lo a awm mi?" Ka ti ta tawp a. A harh thut nge ni a lu thing nawkin, "Awm lo ve. I inhmeh êm a" a ti ta a. A lawmawm ve duh khawp mai. Dar 4 pawh a ri hnai ta. Fel lo lai a awm em tiin ka sulhnu te ka han chhui leh a. 

"Duhtui vak duh suh. Lo kal tur te hi ka ṭhiante vek an nia, official taka lo dawnsawn tur a ni hran lo..hahdam rawh" a rawn tih chuan ka rilru a nuam huai mai. Remruati a rawn tel ve ang em tih ka ngaihtuah nghal. Lo tel ve lo se ka duh, mi hmaah te khan huat hleihtheih si loh, min elsen si khan a ṭawng leh kha a niang a, ka chhang thiam leh dawn si lo. Motor rawn tlan thawmah ka phu zawk a. Ka che ve nghal zat bawk. 

Sangbera ṭhiante chu a sawi tawh ang khan an vaiin paruk an ni. Mipa pathum leh hmeichhe pathum. An nalhin an changkang takzet. Sangbera chuan an hming a sawi dan dan hlawm a, Mapuii a tih phei chu nalh tak a ni. Mipa pathumte pawh Sangbera ang maia zahawm, palian tak tak an ni a. Kuri bialpa Ricky chu an zingah a hâng ber naa, hmelṭha ka tih chi tak a ni. An kum pawh a naupang chhe tawh lo hlawm viau ang. Keipawh ṭha tak leh polite tak vekin min bia a, ka tan han îp leh inthlahrunna tur a awm miah lo. Hei hi a ni ka ti, lehkhathiam leh changkang tak takte hriathranna chu ka ti ve tlat. Mi changkang leh lehkhathiam tak tak chu an bula awm a hahdamthlakin an mi uap a na ve lem lo,. Thufingin a lo sawi ang khan, Keini aia dinhmun hniam zawka awmte kan en leh biak danah hian kan nun chhungril chu a lo lang chiang ber an tih kha..ni e, ka pawm thlap mai. 

Mapuii chuan Sangbera melhin, "Remruati a awm ve ka lo ring a" a ti sap a. Ka tum loh deuhin bengte chu ka lo chhi ang dâwk dâwk a, kei hi ka mawl tlat.

"Rawn tel vena chhan tur a nei hleinem. Heite chu kan ṭhianho pual alawm" Sangbera'n a lo ti hmiah. 

Lawmkima chuan min rawn melh leh zauh zauh ṭhin a. Mak ka ti deuh, mahse, a hnuah, "Tu emaw min tihrechhuak alawm le..mahse, sawi chhuah kher a ṭul ber lo ve" a ti lawi a. A bialnu hlui te hi ka lo ang ve deuh em ni dawn ni. 

An inkawm chhungin chawhmeh ka lo tilum a. Ka eisiam chu tui an ti lovang tih ka hlau takzet. Kimtea nen pawh kan inbe tawh a, amah a inenkawl thei a, thla a muang. "Lengchhuak suh aw. Ka rawn haw hma chu" ka ti a. 

"Tetea te inah inkhel en kan tum a, ka châk ve e, kan tv a la en theih si loh a" a rawn ti nang nang. Ka khawngaih ve leh bawk si, "Aw en mai rawh. Mahse, in kha ṭha takin kalh la aw" ka ti hram. 

Dar 6-ah zanriah chu an ei ta a. ka vil rân mai. Opi chuan, "May, lo kil ve rawh, i la leng reng. Khatia min vil a ngai lo" a lo ti a. Mahse, ka ngam lo. Ka duh angin ka ei ṭha ngam dawn si lo. 

Ricky chuan bai uih chu a hâwp hruih a, "A va tui chiang êm, tiang bai hi lawm ei ka châk fô thin. May, i thiam hle mai" a ti hlut a. Lawm tak mai hi ka ni. Midang pawn min fak ve mawlh mawlh hlawm. Mizo te hi han inla changkangin, hnamdang tihdan han entawn viau thin mah ila, kan hnam nuna bet heng eisiam dan bai, bawl leh a dangte hi chu kan la bosal phal tak tak bik lo. Hei hi chhawmnun zel chi pawh a ni. Khawpuia awm hlei hlei hian an ngaisangin ka hria. A lawmawm takzet.

An ei khamah ka sengfel leh vek a, nula ho lah chuan min lo puih ve an tum sateh a, "Va ṭhu mai mai ru" ka ti ta ngawt. An nui har har reng a. Thil pakhatah chauh lo chuan helhkam ka nei rih lo, min mawlhtu thil pakhat erawh chaw ei hma deuh 10 mins vel a la awm ang tihah khan balcony-ah chhuakin an ṭhu khawm laih a, zu changkang chi, kei chuan a hming pawh ka hriat ve loh an in ka va hmu a, Sangbera pawn a in. Chu chuan ka thinlunga zu ka huatna rawn tisosângin theihtawpa ka inthunun a ngai a. Mahse, ka pa anga rui chhia leh rui sual tumah an awm tak lovah khan ka inthlahdul ta hret hret zawk a ni. Zu erawh ka haw ta lo tihna a ni lo. Chaw chu an inkawm hlanin ka bar ve ta zawk zawk a. Ka puar ngei mai. Kan khaw hluiah khan ṭhiante hian, "Mayi hi chu chaw i heh nen, i dul hi a kiar ve thei ngai lo reng reng,.i phakar" te hi min ti bawl bawl zel. Nia, mak ve tak chu ka dul vun a pân a, thil ei ṭeuh mah ila, ka dul a kiar ngai lo. Chutiang chiah chuan Azuii û U lalduhi hi thau deuh mai a ni a, chaw emaw thildang hrim hrim a ei tam miah lo. Mahse, a dul a kiar reng tho. A mak ve ngawt mai. 

Ka inpeihfel meuh chuan dar 8 a lo hnai ta kuar. Kan mikhualte chu pawn lamah an awm a, an nui leh ham ham chu ka hre pha reng. An ruala haw ve mai chi te a ni ang em te ka ti rilru a, ka rilru a buai ru hle. Ka bag ka sam ka sam laiin Sangbera a rawn lut a, "May, i inpeih tawh maw? Tirawh le, ka thlah ang che" a rawn ti a. 

"Ih, an rual sawn ka haw ve mai dawn mawni ka lo tia, an la awm dawn mi?" Amah tihbuai ka hreh vanga sawi ka ni. A mitmeng danglam zawk chu makti zetin ka melh a, "Engvangin nge an ruala hawn i duh? Min hlau em ni?" Ka mitah tak rawn melhin a ti ta nghut mai. Ka chil ka lem khawlh.."Ni lo, ka sawi awmzia chu, tihbuai che ka duh lo va..e chuan ka thawmhnaw te hi" ka tih laiin, "Nei rawh" a ti hmuk. 

Ricky leh Mapuii rawn lut mêkte lam chu hawiin, "Mayi hi ka han thlah lawk ang e." A ti satliah a. Ka laka a ṭawngkam bung nghut kha a hmang ve lo, chu chuan mi run deuh. Min rawn signal zauh a, ka zui chhuak ve nghal. 

Kan tlanchhuah rualin, "Ka hlauhawm em ni?" A ti leh a. 

"Aih..i hlauhawm ka ti mawni le?" Dawhthei lo zet hian ka lo ti ve hlak hlak. 

"Ni e, ka tina lovang che. " A ti zawi sup. Hmalam a melh ran a, zu kha a in ngei naa a rui pawn ka hre lo. Zu in hrim hrim chu an rui turah ka ngai sia. 

Dawr kawtah a ding a, eitur eng emaw a lei nual. Chungte chu min pek pahin, "I nau hawn ve rawh" a ti p hnial hian awmzia nei hek lo. 

"I u chungchang chu eng nge chanchin?" Pangngai tak hian a ti leh lawi a. 

"Amah Pu Chhuna kha ka bia a, thawhṭanah hian police biak ka tum deuh a" ka ti sêp sep a. 

"A ṭha alawm. Keimah nen kan va be dawn nia. Chuan, i hna i kal dawn lo maw?" A rawn ti hû. Chuta min rawn melh chuan amah a ang lo, ka sawithiam danin a at hmel buang a, pawisawi lo hmel a pu hliah hliah. 

"Aa..kal ang, police biak chhungte chu a rei dawn mi?" Ka ti let ve hû a. 

"Umm..rei lo, a nih chuan piteii kan va kan nghal dawn nia,." Ka thil duh em em ka sawi ngam si loh a rawn sawi chu ka lawm hle. "Um, ka kan ve duh sia, ka sawi ngam si lo va" ka ti sar sar a. 

"Engvangin nge i sawi ngam loh?" A ti sup a. 

"A nuam lo ve lawm,." Ka ti ringawt. Za deuha nui hawk hawkin, "Ṭhian nih chu kan la hlat hmel hle mai a" a ti dam ruih a. Kawngsir mihring tei vel thlir pahin, "Ṭhian ni rual kan nia mi?" Ka ti sap a. 

A tlan muang deuh sawt. "I ṭhian ni turin ka upa mah mah em ni!" A ti leh a. Zanin chu a ṭawng duh riau mai. A zu in vang kha a ni chiang. 

"Upa lo, ka rin aiin i naupang zawk" ka ti duah a. 

"Chuan..eng nge i harsatna?" A tih zawm zat, ka dang titih mahse, hnar hnuaiah phatna bo hek lo. "Ka boss ang i nia, inṭhian ringawt te chu a" ka ti nghat. 

"Chuvang chauh chuan maw?" A ti leh ta zel a. 

"Aw" ka ti ta ngawt. 

"A ho..tak taka May, nang leh kei hian inanna kan nei..chuvangin ka nau ang maiin ka en che. A ṭha em? " A tih lai mêkin a phone a rawn ri a, Remruati tia a save ka va hmu hman, ka hnual ve ringawt lehnghal. 

"Yes.." a ti hawk a,.leham ṭawng ka hre lo. "Oh! Anni chu group hran an nia, i tel vena chi a ni lo tih i hria alawm" a ti mawlh mawlh a. Remruati chu a rawn vui leh a ni ngei ang. 

"Ok..i thu vek alawm..boss" a ti leh zung zung a, ka hriat lohin ka lo ner vak nge ni min rawn melh zawk chu, "Ti nge?" A ti hû a. Ka inthlahdul vat. Hmalam enin, "Engmah" ka ti hul hak. Nge maw ka lunghnûr ve ringawt ni, ka zak thei lo em mai a. 

Kan in kan thleng a, "Muttui aw. I chau âwm sia.." a tih chu chhang vein hawilet lovin ka chhuksan ta nal nal a. In ka thlen chuan Kimtea pawh a lo awm tawh. Tuilumin ka inbual leh thuak thuak a, ka mu ta daih. Ka chau ve riau tlat a ni. Naktuk sunday mahnise, ka tan thawh hma nachhan tur a awm ve lo, Ka neih zawng zawng leh ka ngaihhlutte min laksaktu biakbûkah sawn ka pen luh ve kher a ṭulna ka hre lo ve.

Ka phone rawn nghawr dawt dawt reng vang chuan ka hmet êng ta nge nge a. Remruati bawk! Number hi a va ngah awm ve aw ka ti, a peih pawh hi a peih zozai mang e. A tawngkamte lah chu thinrim lai ber pawha kan sawi duh loh tur, zahmawh tak tak an ni hlawm a. Ka ner sawk nghe nghe. 

"Ka rawn be ṭhin che tih hi i hrilh ka lo ring a, i hrilh ngam kha ka ring lo rêng a ni. A chhan chu nang fahrah lubâwk ai kha chuan kei a ṭhianṭhaber leh a nupui la ni mai tur hi a ring fê zawk si a. Haw vat rawh, khaw pilrilnu..i hmel zahpuiawm lutuk kha kan hmu hnê tawh" tih te chuan ka nuih a tiza lek lek zawk. A chauhthubarawh mang e. Remruati hian rilru lam natna mental problem a nei a nih ka ring ta hial. Kei ber kher heti taka min hmumawh ta mai hi, a âwmang lo ve êm a ni. 

"I hmelṭhata i inchei dan a class thin tehlul nen, i mizia hi a ṭhingin a hniam ngawih ngawih, ka lo ngaihsan leh dahsan rûk vena che kha a bo fai vek tawh. " Ka va ti ve ta hmak a. A chhiar nawn zing deuh nge min rawn chhang lawk lo. Min rawn chhan hmain ka muthilhsan ta daih a. Ka mumang mai mai chu aw..

Zing ka harh thleng pawn ka la ngai veng veng thei mawle. Ka chûn nunnêmi ka hmu tlat alawm le, tuna kan awmnaah ngei hian ka û pawh dam viahin kan nufa li hian kan lo khawsa a..a tak takah chantir thei dawn ila harsa ber pawh ka hmachhawn ngam ang mawle..ka û nen inkaiin kawngka aṭanga chhuah chu an lo tum a, Kimtea nen kan lo auzui ṭâwk ṭâwk. Rawn lehhawiin ka nu chuan, "May duhawmtê, he leia dintu che Pathian i hriatrenga i zui phawt chuan, engtikah emaw kan la inhmu leh ngei ang" tiin min lo thlah a. A thusawi chuan mi vilh ngut ngut reng mai, mahse, he rilru hel laklawh, inla sak leh khauh laklawh hian nêm mai erawh a tum îkhaw si lo. Ka mamawh ber laia ngawi thei hian min hmangaih ka ring thei lo a ni. Kimtea ka kaitho duh lo,. Pathiam ram rawn khawn Kohhran upa a rawn lut hlawl mai a. Kan innêl ve tawh viau. 

Kei pawh chuan ka lo pe vat a, Pathian ram kher hi chu ka nu aṭanga kan chhawm, a hnua ka û in a ngaihpawimawh leh em em kha a ni bawk a, ka dah hrang ve zel. Ṭawngṭaina a nei a, kan inchibai a, a chhuak nghal. A tiṭha ṭhin khawp mai. Kei lah Biak inah ka lang ngai der si lo. 

Kimtea inkhawm hlan chuan ka kuta sum la awm zatte chu chhiarin ka inchhût fel vel a. Sum manage hi a lo har khawp mai, kan la naupang ve bawk nen. Ka û damlai pawh khan thla tirah kan lakluh aṭangin Pathian ram kan dah hrang phawt a, chumi hnuah in luah man leh tui bill, Electric hi chu in chungten min kêp,. Kimtea school fees kan dah hrang leh bawk a,..a bak chu khawsak rêl nan a ni tawh mai. In chhungkhur bungraw liantham mamawh neih pawn sum hlawm hmuh a nih loh chuan tihngaihna a awm ve lo. Savings hi ka û khan a ngaipawimawh êm a, keipawn chhunzawm ve zel ka tum . Thla khata ₹500 tal khawl ve pawh a hlu ka ti. 

Ka indah fel âwrh tihin Lsa a rawn lut hlawl mai a. "I inkhawm bîk na nge?" A ti hû. Ka lo aw ve mai a. 

"Keipawh inkhawm lam hi ka til thênna a ni lo" a tih chuan ka nuih a za hle. A sawi duh loh hmel êm a. Kan inkawm ve ta reng a. Hmanni lawka Reieka thi kha a nu chu a lo nia, unau pahnih chiah niin a farnu chuan pasal a nei tawh a. An pa diktak hi boral tawhin tuna an pa hi an pahrawn a lo nia. A nu boral sarhu lai laiin a pahrawn chhungte lamin an in leh lo chu chan ngei tumin an rawn hêl nghal a niawm e. A nu leh a pahrawn din ngei nisi kha an ni unau chuan chan a lawi nei ve ta hek lo. Inah pawh chuan cheng duh bik lovin a pute hi a rawn bêl ta ngawt a niawm e. Zirtirtua a interview kha a tling ve a nih chuan mahnia awm hran ve a tum thute pawh a sawi ve mual mual mai. Kan dinhmun a inan thuak vang nge ka ngaina thar viau. Amah a sualin a ngeiawm hran lo bawk nen. 

 Kimtea lo hawnah thingpui kan in a, kan in lai mêkin Terini a rawn kal a. Lsa chu rawn kovin, "Mahni level te hi kawm ve tur..sawtah Nancy te inah min va kalpui teh " a ti bawrh bawrh. A ṭawngkam meinei chu hriat loh der hram hram ka tum thung. Lsa chuan a hrethiam chiang mai, "Kan vai hian Pathian siam kan nia, level level sawi a ngai lo. Scooty i khalh thiam ve reng, bakah Nancy ka hmu peih lo" a lo ti hmuk hmuk nia! An inah a awm a, Terini thu te chu hnial lova kal rawk rawk tura ka ngaih laiin chutiang chuan a ti ta zêk sia, ka lo ṭang ve ṭeuh. 

Terini a ling ta phat rêng a. "Ve a che a. Min va hruai mai rawh, ka kut ka tinâ a, ka khalh thei lo. Bakah hetah leng reng suh, Thingtlâng zia i kai palh ang" nui si, thutak si hian a ti leh hlawng hlawng a. 

Lsa lah a ṭhu nghet tlut, "Keipawh Thingtlang tho alawm ka nih. Nancy te inah kher lo chuan ka hruai peih che, ani kha a bulah 1 sec pawh ka awm peih lo" a ti ta hmawk hmawk a. 

Tlawn titih hian, Terini chuan, "Umm a nih chuan, Hruaii te inah kan kal mai dawn nia..hawh" tiin an inkaichhuak ta nge nge a. 

Kimtea'n, "U Terini hi chu a chapo ve ngawt mai, chuvang a nia a hmelchhiat em em bik" a ti ta mai a. 

"Aa..a zia ve hrim hrim a niang. A ho lutuk" ka tihsak vat. Ka nau rilru hi chu kha-in, mi huatna te hi nei ve lo se ka duh takzet a ni. 

Rawngbawl hma ka'n muhil ve lawk te'ng tiin ka mu a, ka muhil ṭan siar siar tihin Kimtea'n ,"Ate, ih, i boss a lo kal" tiin min rawn kaitho ta mai. Ka va ṭhuchhuak rang tak. Eng nge a rawn tih dawn le..ka va thawh chuan a lo ṭhu khur a, kamiz body fit, a dum a hak chuan a tilang naupang tawp. 

"Eng nge?" Ka ti teh tawp a. 

"Ka lo leng" a ti ve tawp bawk. Amah hlat deuhin ka ṭhu a, Kimtea a pindan aṭanga rawn chhuakin, "Ate, Angaihi note ka va hawh lawk aw..ka rei lovang" tiin min dil a. A hma thilthleng avang khan ka ngaihtuahzia a hre tawh bawk a, a fimkhur ve tawh hle. Sangbera chu awm lo se ka phal kher lo maithei. Kimtea chhuah hnu lawkah, "Chaw min chhum kep rawh aw" a ti leh ngawt a. 

"Ngati?" Ka ti ve leh hê haw. 

"Zawhna i ngah, ka ei ve duh a ni mai. I phal lo mi?" A ti hluk hluk a. 

"Phal lo ka tia mi?" Ka tih chuan, "Hnial hrat mai mai" a ti hmuk a. Ka nuih a za ru hle. 

"I mak em alawm" ka ti a, "Nge ka makna? I zak a nih kha" a ti a. 

"Ka zak bawk lo e a." Ka ti hlar. 

"Tak taka, I bula chaw ei ka châk a. Ka rawn kal. Tin.." a tih lai mekin a phone a rawn ri..kan awmdun lai hian a ri thei sia maw. Ner nâwng chungin a la ta tho va. 

"Inah ka awm lo, ka zin thut a. Chhim lamah. Ka hre lo, naktukah emaw tuesdayah emaw ka haw ang. " A ti zung zung chu ka lo melh kur ringawt. Ngati nge dâwt a sawi zuap zuap kher le. A dah hnuah, "I va dawthei " ka lo ti sak a. 

Za lo zeta nuiin, "May, i hrethiam lovang. Chimbuai hi ka hne a ni. " A ti hlawl mai. Rindan ka nei ta, hmeichhia tu emaw atchilhtu a nei ang a, hmuh phêt a tum a niang. Ani lah lungtum a ni bawk sia. 

"I luck em a nih kha" ka ti êl kual a. 

"Ngawi mai teh" a ti hlur. 

U Rini ṭawng lâng lâng kan hriat rualin kan inmelh zawk, a hnual ngawih ngawih tih ka hmuhthiam ve avangin, "Kimtea roomah sawn va awm rawh' tiin ka kawhmuh vat a, rang lutukin a lut ve zuk. Keipawh chu ṭhutthlengah ka mu nghal zat. U Rini chu a phone hmet mawlh mawlh chungin a rawn lut ta chiah a. A hawi nasa mai. 

"Sangbera a rawn kal khan ka hre sia..khaw nge?" A ti nuah nuah a. 

"I rawn chhuk hma chiah khan a chhoh kha, in intawk hial lo maw?" Mak ka inti, dâwt sawi thiam ngai miah lo, hmelhmaia lantir ngei ngei khan awlsam zetin dâwt ka sawi zuah zuah a nih chu! 

Bet vak lo hian a ṭhu a, "A van mak, ka rawn hmu thuak a, ka inthlak laklawh sia, a rei loh tehreng nen, eng nge a rawn tuh reng reng a" a ti leh mawlh mawlh. 

"Min call tlang thei si lo va, naktukah a zin dawn tih a rawn sawi zuai a nih kha" ka ti ta ngawt a. Ka rilrua rawn lang ang ang ka sawi ve ringawt. 

"May, zep miah lohin sawi la, bialnu a nei mi?" A ti ta hlawl mai. 

"Ka hre miah lo, hmeichhia a ngaihsak vak loin ka hria. Kan inhnimhnai bawk si lo va" ka ti a. Hei hi chu dawt muhlum a ni hran lo. 

"Nia, enteh, biak te hi a har tawp, call a la ngai bawk si lo, msg nise zinga thwwn te hi zanah min reply a, a buai tih chu ka hre tho va, a mak ka ti mai mai" a ti niah niah a. Ka khawngaih lek lek mai. 

"A buai vang a niang. A phone khawih hi ka hmu khât tawp, keipawn" ka ti a. 

"Hna te chu i lo sawi tawh em?" A tih chuan, U Rini chu a chhawr duh dawn lo tih ka chian ve êm avangin, "Sawi a, mahse, nu Buangi ngaihchân a ti deuh tlat a" ka ti nawi nak. 

"Tuin nge rawngbawlsak?" Min chîk hmel zeta a rawn tih chuan, "Keiman" ka ti ta mai. Za vak lo hian a nui a, a rilru tur âwm ang ka hrethiam ruak. 

"Mahse, nimin tlai bak ka la bawlsak lo, niminah chuan a ṭhianten chaw an rawn ei a. A bak chu a naute bulah a ei" ka ti zung zung a. 

"Remruati a rawn kal ve leh em?" A ti chat. 

"Kal lo" ka ti a. Thaw huai hmel a pû. 

A rawn kal chhan ber awm ta bawk si lo chu a bet lo khawp a, "Bawihteii uniform nawh a ngai, ka han chho ang e. Nakinah thil tihdan tur ka la hrilh ang che" a ti a. Ka chelh lem lo. 

Kimtea pindana ka va luh chuan ka hmui ka hup a, ka nui khur ngar ngar. Ani U Rini hmuh hlau lutuk kha leng leh leng lovin khum hnuaiah a lo va lut chu niin, a ke lam a lawr zuah bawk si. Nuih loh chu har tak a ni. A rawn chhuak a, "Nui suh" a ti nghut, ka nuih a za telh telh si. 

"In khum a tê lutuk a nih hi" a ti leh a. Ka û thih hnua ka nuih nasat ber ṭum a niawm e. 

Thutak zawk hian, "I che fel hle mai, in khum hnuai pawh a fai ṭha kher mai. Hei vang hian a niang ka.." a tih laiin ka phone ve thung a rawn ti tlang tlang. A mitmeng thim raih chuan min melh a. 

"Va la rawh" a ti sup. A awmdan mûk tak avang chuan engtin emaw ka awm a, ka awm a nuam lo deuh ringawt nia. Min lo calltu lah chu company lek! A va ho e aw. 

"Lo chhuak ta che, i room pawh a nih loh khaa. " A la awm reng avang chuan ka va ti lâwng lâwng a. 

"May, ka nuam lo..lo lut lawk teh" aw thâm ṭuak hian a rawn ti a. Ka lut rang kher asin. Khumah a vâng zawng hian a lo mu a, a âwm veilam a dawm vung vung. "Eng nge a? Ti nge?" Tiin ka va hnaih nghal ruak. Ka kut chu lain a lamah min pawt hrâwk a, ka zuk bawh thlawp..hnai zetah kan inmelh a. Ka ṭawng hmain, "May..ka hua che..tu emaw hlimthla nih hi bansan tawh rawh. Khawngaihin" a ti ro hulh a,.makti zeta ka melh vung vung laiin Samuela chiahin a la fawh ka hmui chu a rawn fâwp ta mai a..!