Sangbera 5

SANGBER..(5)

Ziaktu : Toni Râlte

Ka la maimichhing lui tlat. A rawn ṭhu hniam niin ka hria. "I harh tih ka hria a nia. Tho la, chho ang" a ti nghut a. Ka meng ta nge nge, "Rulin min chuk alawm" ka ti sap a. 

"Chuvang tak chuan alawm chho ang ka tih" dawhtheih loh hmel zet hian a ti a. Ka ipte ah lai chu rawn lain kei pawh chu thei leh thei lo hian ka ding a, ka kheimit chu ka zuk en, a lo vûng ve bûr mai. A na nget nget bawk si. Pen ka han tum a, ka hlawhchham chiang hle. Hmel nelawm tehchiam lo hian, "Lo kal rawh" tih leh ka hmaa kun a rual a, min paw dawn a nih hmel. Duhthlan tur dang nei hek lo le..ka bawh ta a, min zo nelh nelh ngei mai. 

In chhungah min luhpui a, ṭhutthlengah min nghat chawrh. Mahse, thinrim ngam chi ka ni lo. A lung ka tihawi loh vangin kei chu tlawm dêka awm tur ka ni tih ka inhre ve. A pindanah a lut nulh a, reivakloah damdawi bur lian vak lo kengin a rawn chhuak leh a, ka ke chu a hrufai a, ngawi rengin a buaipui mawlh mawlh. Sawi tur ka hre si lo, ka inthlahrung bawk si. A tuam fel hnuah, "Ni khat chu i chawl thei ang. Tei vel a harsa rih ang" a ti leh nghut a. 

"Umm" ka ti ringawt. Chiang zet hian min rawn en a, ka mit ka lasawn rang kher mai. Aw chang beng bawng hian, "Eng nge i ngaihtuah?" A ti a. 

Ka hmui petin, ṭi zet hian ka melh ve a, "Thlân kha ka ngaihtuah" ka ti ta tawp mai. Dâwt sawi thiam lo tih takah. A rum nghut a, "I la hmu lo, i hre hek lo" a ti leh a. 

"Ka hmu miau sia lawm" ka inrin hmain ka ti ta pek a, ka hmui ka hup nghal vat. A mitmeng a rum ûl mai, mahse, a thinrim lai chuan hmelṭha ka ti tlat pek. Mipa dang anga pawisak nei lo hmel a pu ve lo va, inthunun a tum luatah tlemin a sen ve deuh naa, a hmelhmai chu a dam thlup thung. 

"Ni e, i hmu. Tikhan tawp rawh se. Ani kha ka chhungte tih loha ka tana mi pawimawh ber a nih kha" tiin chhuat lam a melh ta vung vung a. Zawh chian châknain khat mah ila; ka huaisennain a ngam si lo. 

"Thil sawi duh ka nei a" ka ti sep a. Mi pawh en chuang lo hian, "Ka ngaithla e" a ti sup. 

"Ka û chungchang a nia. Muhlum a nih ka ring lo" ka ti ta hmiah a. Min rawn thlêk hâw a, a ṭhutdan a siamrem pah bawk. A ngaihven ṭan tih ka hre thei. Sawi vek law law mai ka duh. Rilru a tibuai tho si. Min melh tak rengah chuan zâm ru zet hian, "Ih, khamini khan hmannia ka insualpui Peka kha kan in aṭanga a lo chhuak chho lai hmutu a awm a. " Ka ti ta a. 

"I va sawi har ve" a ti hrâwk a. 

"Nizanah ka hre ve chauh alawm" ka ti ringawt. 

"Chuan, engtia hmalak nge i tum?" A ti a. Ka chil ka lem khawlh, "Police hrilh hre rih lo va keiman chhuichian phawt ka tum a" ka ti ta a. 

A hmaa a awki nelawm lo leh rum takte kha an thlawkbo ta vek emaw tih mai tur hian, "Fimkhur la, puih i ngaih chuan sawi hreh suh ang che" a ti dam ta thlup mai. Ka thla a muang nghal vawng vawng. A tho vut a, choka lamah a lut. Ka che hleithei der si lo. 10 mins velah tray chawiin a rawn phei leh ta a. Thingpui a lo va siam chu niin, a siam tui phian lehnghal. Kan in dun a. A ṭawng hun ka nghak tawp mai a ni. 

"Piteii kan turin ka chhuak dawn a, ka rualin i haw ve thei ang, hahdam i mamawh rih a nih kha" a ti a. Ka chhang lo. Kan in zawhah ani chu a inbual a, kei erawh phone khawih pahin ka lo mu vel..ka laka nasa taka a thinrim lo chuan ka awm a tinuam ta deuh. Zodini thlân kha ka hrechhuak zawk. Chunglam melhin ka ngaihtuah ta vung vung. Kum 23 lek a nihin a thi tihna a nia, a vanglai hun pawh a la hmang ṭan lo tihtheih a ni. Engvanga thi nge a nih ang le? Sangbera bialnu a ni ang tih chu ka ring nghal mai a, mahse, he lai a in bula a bialnu thlân lo awm ta ngawt chu a mak riau! Nge an lo innei hman zawk ni ang. Ka buaina tur a awm miah lo nain ka ngaihtuah lo thei bawk si lo. Sangbera thawm ka hriat rualin ka tho vat a. A lo insiam leh diam tawh. Tun ṭum chu businessman ang pawn a inchei lo, tshirt loose lam a var a hmaa print awm a ha a, kekawr dum hain chapal kaih a kezungṭang sei sal mai lang thei a bun leh tawp. A simple si, a fresh bawk si. 

"Kal ang aw. " A ti a. Ka lo bu nghat. Nu Buangi a kensak tur thei te chu a khungfel zawhah a in chu kan chhuahsan ta a. Dar 1:17 vel chauh a la ni. Rulin min chuk azarah ka haw hma dawn a nih hmel e. A car-a kan ṭhut luh hnu chuan, "Nu Buangi hian natna eng emaw a vei mi?" Ka ti ta tawp a. 

Hmalam melh ranin, "Aw.. tihdam theih a ni tawh lo" a ti nghut. Zawh nawn leh hi a inthlahrunawm thei mang e. 

"E taka U Rini khan min lo biak rawh a tia" ka ti leh daih. Ka nui bawk. 

Min rawn melh zawkin, "A ho" a ti bul hmuk. Ka hmui ka va tihpawrh khum ringawt. A nui hawk a, "I ke nâ kha mut hmain tuilumin dep ang che"a ti leh daih. Ṭawng leh tawh lovin kawngpui kan pawh a, a phone a rawn ri.."Aw..naute" a ti sup a. 

Lehlam ṭawng ka hre thei lo nain Teberi nen khan an inbia niin ka hria. A mengphâwk deuh zawk chu ka hmu thei, "Aw le, Ka rawn thleng vat ang. Lo mangang suh..engkim a ṭha vek ang" a ti a. Phone a dah nghal. A tlan chak ta sawt a, a hmel pawh a thutak leh rûn tawh. Ka be ta lo law law. Kan in pengah min chhuktir a, "I kal thla thei ang em?" A tih chuan a hmanhmawh hmel sia, "Aw thei e, ka lawm e" ka ti a. A tlanzui nghal. Ka bai auh auh a, chabi ka lak lai chuan ka la hmuh ngai loh, tlangval a lo awm a, Mka ṭhianpa ni turah ka ngai, ka chhuak leh nghal vat,stepah bang rinchhanin ka thleng thla ve thei hram. 

Ke na chung chungin ka inbual a, Ka inthlak laiin Kimtea pawh a rawn haw. Vawiin chu an bang hma a nih hmel. Ka ke nat thu te chu ka lo hrilh ve luam a, "A va pawi ve..mahse, lungngai suh, keiman eirawng ka bâwl ang." A ti sauh sauh mai a. Hah hi a va tidam ṭhin tak. Choka dep ṭhutkhawmna pindan ti ve mai ang, ṭhutthleng sei pathum kan hung ve a, chutah chuan ka tluzâl ta mai mai. Sangbera nau te chuan eng thil tak tawk ang maw. 

Kimtea chuan rawng a bawl zui a, "U Peka te chu Police-in an man a, mahse, vawiinah a lo chhuak leh a niang. Ka hmu..tâng daih se ka ti sin le" a tih nuah nuahah chuan ka harh zawk. 

"A rawn chhuak leh nghal a maw?" Ka ti nghek. Mak tih hmel deuh hian, "Umm, ngati nge a?" A ti hû. Ka ṭawngdan kha a ngaihṭhatthlak loh ve deuh bawk a ni. Nui luiin, "Aa..engmah ni lo ve. Keipawh tâng daih se ka duh vang a nia" ka ti ta ringawt. Kimtea bula kha thil chungchang kha ka sawi chuan a zirna lamah harsatna a tawh phah ka hlau, bakah mipa a lo ni ve bawk nen, atthlak deuha chet a lak ka hlau bawk. 

Kan khaw hlui lama ka ṭhian ve ber Azuii nen kan intext a, ani hi zirna bansan ve tawh tho a ni. "I nuhrawn te nupa khan kan ṭhenawmte in an rawn luah a, awiii an insual reng zel. A fanutê kha home-ah a la dah daih zui" a rawn tih chuan mak ka ti. Mahni rilarah te meuh, mahni la dam lai renga midang kuta han dah theih mai chu. Nia, kha nu kha chuan zu leh pawisa bak a duh lo bawk a, nakinah chuan ka pa ang bawkin a nawmchenna hâkin a la thi ve ngei ang le. 

Number hriat loh aṭangin msg ka dawng a, contact hi ka nei tam lo bawk nen, biak tur ka nei lo thei tawp. Luck lo ve tak chu ka ni. Min lo texttu chuan, "Chhiahhlawhnu" a rawn ti teh ngawt a! Ka chhiar nawn sek. A dp a dah lo va, tu nge a nih ka hre si lo. 

"Tu nge aw?" Pangngai thei ang berin ka va ti a. 

A hnu reivakloah, "Mi chhiahhlawha ṭan chu a nuam em?" A rawn ti leh a. Chutah pawh ka la insûm thei, "Hlawh hmuhna a nihte chuan nuam e" ka ti ve leh. 

"A dik ang, fahrah tan duhthlan tur dang awm hek lo. "A rawn tih leh chuan, "Tehsek a! Tu nge maw i nih le?" Ka va ti ta a. Mi zaidam zawk zawk ni ta lo chu min tithinrim leh ta dêr mai. 

"Insum..insum, mahni nihna sawi hi chu a na alawm tiraw?" A rawn ti leh chu, ka va call ta hmiah. A reject chiang ngang mai. 

"Eng nge i duh a? Hetia mi rawn tih vak?" Ka va ti ve leh a. 

"Duh ka nei lo, hetia tihthinrim che hi nuam ka ti"a rawn tih chuan ka sa ta zak mai. "A pawi hle mai. Bye" ka ti a. Ka block ta hmak. A tu phiangsen nge maw ni dawn ni. 

Kimtea inbual hlanin U Rini a rawn chhuk a, "Ti nge i ke chu?" A ti nghal var. Ka lo sawi a. "Tu nge tuamsak che a?" A ti teh daih. "Sangbera" ka ti ringawt. 

"Awii i va vannei tak. Min lo biak ta em?" Nui har har chungin a ti a, Sangbera min chhanna kha a tan a lawmawm loh êm avangin, "Chutiang mood-ah ka awm lo alawm. Kal leh veleh aw" ka ti ta ngawt a. 

"Ka zar thluk theih i ring em?" Inrintawk hmel zeta a tih chuan engtin emawni hian ka awm. Ka sawi ve thiam lo e a. "Ring e" ka ti sep. 

"Tihdan ka hria, a hnuaiah hna dang thawh awm chi min lo zawnsak ve la..kan thawkdun thei ang a, a nuam dawn asin" a ti hluai. 

"Nia, ka lo zawng ang, a eirawngbawltu hi a damlo va, eisiamtur a duh ka ring" ka ti zung zung a. 

"Good,. Ka thiam lutuk alawm, eisiam te chu..kei chu awmchilh ngei ka duh" a ti leh sar sar a. A lo star viau a nih dawn hi. Sangbera'n a bem ve tawh ang khan a insawi a, "Hetia duh leh viau turte chu a hunlai khan duh mai tur che nia, " nghal zetin ka lo ti a. A ngawi dat a, inthiam vak lo hmelpu hian, "Nia..ka sawi tawh kha, kan pa hluiin min zar lai a ni sia, ka nêp thei lo alawm. A pawi ngawt mai" a ti nuah nuah. Terini'n a rawn bia a, a hmel a inthlak vek. Lungawilo, thinrim châk zet hmel a pu, a tho a. "Kan pa hlui a rawn kal leh a nih chu, ka hne a nia" insehruh chungin a ti a. Ka chhanna pawh ngaihven tawh lem loin a chho ta nghal a. U Rini hi ka hriat ve dan chuan a fanu pa, a pasal hlui hian no.4 a lo ti ve a niawm e. Reitak a dawh ve hnuah a tuar thei ta ngang lo va, a haw ta niin an sawi. A neih leh duh kher ka ring lo, hetah a nuamsa êm mai. Keini pawh chuan zanriah kan ei ta nghal a. Kimtea eirawngbawl chu ka rin aiin a tui daih mai, "Engtin nge i siam thiam zawk?"ka tih chuan, "Youtubeah a siam dan a awm vek alawm" a ti mai. Nia, kan khawvel hi zawng a ṭha lam pawn chhe lam pawn thil hi a awlsam tawh ngawt mai. 

Kan eikham a, thleng a sengin a sil nghal vek bawk. Min âwl hneh lutuk chu ka hrilhhai letling zawk. "Ate, kan neih ve deuh hunah tv hi lei ve ila" a thleng sil zo rawn ṭhu chuan a ti a. 

"Nia, tunah pawh kan lei thei ve reng asin, Mama ralna kha a tam ve lutuk a" ka ti a. "Mahse, chutia a râlna te hman ringawt chu a chi dawn mi?" A ti a. 

"Aa..thil ṭul loah kan hmang dawn chuang hleinem, tv neih loh chu khua a har ve êm a. Kan ngaihtuah dawn nia. " Ka ti a. Phone hi ama pualin a nei lo va. A la naupang bawk nen, ka û phone kha min dil ve nasat êm vangin a hmang ve ta a ni. Mahse, thu a awih bawk a, phone khawih hun ka siamsak thlap a, a zawm ṭha viau. Ka ke na chu a zia reng mai. A damdawi hnawih kha ka ngeih viau a ni ngei ang. Rulngân te lo ni ta se, ka nasa lo viau ang. 

U Sangi te nupa an rawn leng a, an fate erawh U Kawnga nu a lo zin a, an in awm ve a niawm e. U Kawnga te hi Sialhawk khua an nia. A taima khawp mai. Kimtea hian ka u room kha a chang ve ta bawk a, lehkha a zir mek. 

Khunkhân takin ka û thihna vel chu kan sawi a, U Kawnga chuan, "Tlaiah khan Chhuna chu biakfâl tumin an in bul velah ka va kal e ka tia, pawnah a lo ṭhu leh vâng tawh. Mahse, ka hnaiha ka biak lai takin a û pui saw a rawn chhuak a, Chhuna chu, 'Inbual rawh' tiin a luhpui daih mai a. A chhungte sawn eng emaw zêp an nei em mawni aw ka ti. " A ti mual mual a. 

"Ka ke hi han dam deuh se, keipawn biak ka tum alawm. Buainaa intahluh an hreh a nih ka ring. Hmuhsit thil ni lose, ani rualbanlo sawn dâwt muhlum a sawi ngam ngawt ka ring lo. Thihna thuah lehnghal" ka lo ti ve bawk a. 

U Sangi chuan, "Engpawhnise, kan fimkhur a ngai viau ang. Nu Zami pawh kamtam lo deuh turin ka hrilh kha. Peka nu hi fing phakar zet mai a ni a, engtin emaw insawi fihlim dan tur a lo ngaihtuah hman a hlauhawm.Amah Peka pawh thlithlai chu a ngai reng" a lo ti ve mawlh mawlh a. Ka pawm hle. U Sangi'n thingpui a va lum a, an va fel nupa tak. 

"Mi inah chuan thawk lo la, ka sumdawnna ang hi bei ve la ṭha tur a nia, a hahthlak naa a hlawk ve riau asin. " A tih chuan, "Sumdawn lam hi chu ka thiam ve vak lo. Tih tawrh theih hi ka duh ber mai" ka lo ti ve mai. A ni lah tak bawk a, tih neuh neuh, chhut neuh neuh ngai hi ka thawk ve thiam lo, ka zaidamna leh taimakna hian a tlin ve lo a ni ber. 

An hawn hma deuhin U Sangi'n, "Kan rawn len chhan ber pawh kan sawi lo têp alawm le..englo a nia, tun sunday hmang hian hei i u Kawnga te khuaah kan han zin dawn a. Ka nu a lo zin remchang nen, thlah haw pahin. In chabi i kutah ka dah ang a, inrinni chawhnuah bungraw rawn lam an rawn kal dawn a, i lo buaipui hman ang em ka tia" a ti ta a. 

"Awii, in zin daih te chuan kan khua a har awm e..lo haw leh vat ru aw. Umm, buaipui thei mai ang, mahse, eng bungrua nge tih kha sawi chiang la" ka ti a. An zin tur chu ka huphurh ve tak tak. An ni bak chhungkhat ti mai ang, hnaivai an awm si lo. 

"Kha chu a harsa lo, a pangah lehkha ka bel vek tawh, whatsapp lamah ka rawn hrilh mai ang che, a dâwn hnaihah"a ti a. Min rinzia a lang a, ka lawm. Nia, an in saw a zim naa, rukru tan chuan rawk tur a tam ve reuh êm a ni. 

U Sangi te hawn hnuah keipawh mu turin ka insingsa a, ka ke chu Sangbera sawi ang khan ka silfai vek a, thiam leh thiam lo hian ka tuam a. Kimtea pawh a mu tawh. Mut duh rual an ni ve bawk nen, zingah pawh hian ka kaitho hma duh ngai lo. A ṭhan tur anga a ṭhan theih loh ka hlau ve a ni. Whatsappah ka lut a, number hriat loh aṭangin msg ka dawng leh tawh. Tîm ru deuhin ka open a, "Inzuar law law zawk la, a hlawk zawk asin" a rawn ti ringawt. 

Ka ner sak a, "Aih" tih chiahin ka va chhang. A hnuah msg eng eng emaw a rawn thawn leh sek a, seen pawh ka seen sak peih lo. Status ka en kual a, amah ang lo takin Sangbera chuan a lo up ve ngei, ka nuih a za deuh. A status chu a ui pahnih te kha an ni. Para leh Duma te kha. Ka thawh hnu hian ka kal ve tawh nî chuan ui in bik atana an siam Sangbera in hnunglamah an va awm daih zel a, an zaidam bawk nen, ka hlau tawh vak lo. A status ka en hnu reivakloah, "I ke na chu eng nge a an?" A rawn ti a. Chawhma lama ka laka a thinrim nen, min lo la ngaihtuah ve hram hram chu ka lawm. 

"Hei a na miah lo, ka ṭha lutuk" ka ti a. 

"A lawmawm e. Naktuk chawl la, a tuk leh aṭangin i rawn zawm thei ang.." a rawn ti a. Ka pawm viau. 

"I haw tawh mi?" Ngam leh ngam lo chuan ka va ti ve a. 

"Haw tawh e. " Tih chauhin min chhang. Va biak leh dan ka hriat tawh loh avangin dah mai ka tum a, mahse, amah zawk chuan a rawn type leh mêk a. Ka lo ngaichâng. 

"Ka phalna la lovin tumah ka number pe tawh suh" tih a ni. U Rini ka hrechhuak nghal. A va be thin tih a chiang ta viau. 

"Aw le" ka va ti a. A seen a, a reh zui tak avangin keipawh ka mut a chhuak ṭan nen phone chu lukham bulah dahin ka chhing ta vang vang a. 

Ka tho dam angreng. Vûn pawh a lo vûng tawh mang lo, na vak lo chuan ka pen ve thei tawh bawk. Kimtea school kal tura a chhuah hnu reivakloah U Sangi a rawn lut a, "I ke a na sia, ka rawn kal ta mai" tiin chabi chu min pe a. Vawiinah an chhuak dawn a ni. Tluang taka zina lo haw leh vat tura inchahin kan inthlahliam ta a. Vawiin chu eng emaw tak tih ka rilrûk. Chhuna hmuha biak ka tum a ni. 

Chhuna hi a hmingpum pawh ka hre chiah lo,. Keini ai chuan a û hle ang. Pa bêm leh thau angreng tak, hâng lam, ha sen tak, han en mai chuan rualbanlo a ni ang tih hriat theih nghal pawh ni lo hi a ni ve a. Mahse, biak chiahin a pangngai lohna a rawn lang thin. Engvanga rualbanlo nge a nih lam erawh ka hre ve tawh lem lo. A chhungte chuan engtin pawn min hnar mah se; thu pahnih khat tal chu hriat ngei ka tum ruh hle. Ka ke nise ka pen thei tawh a, rah nat ngam erawh a la ni lo, mahse, kan inhnaih tho va, tihdan a awm mai ka ring. Tihfel ngai ka theih chin chin ka tifai a. Ka hman angreng hle. Ka inthlak a, u chhuna hmu tur chuan zawimuangin ka chho ta a. In chungte pawh ka tlawh tawh lo. Tetea te in lam chu ka pan a, an ni nen hian kan intlawhpawh lutuk lo naa, min khawngaih ve hle tih ka hria. Tetea leh Kimtea an lo inkawmngeih ve bawk nen, mahse, ka pengkawi ta chuang lo. Sawi tur a vâng thei êm mai. Tetea te in leh U Chhuna te in inkarah in pakhat a awm. U Chhuna te kawt ka thleng ta,. Intipachangin ka inhumruh a. Nidanga veranda-a lo thu ziah ṭhin U Chhuna hmuh tur a awm lo. Engpawhnise, an inah chuan luh tawp mai ka tum ta a ni. A chhungte chuan engtinpawn min ti rawh se, hmachhawn turin ka intipachang a, kawngkapui chu ka kik ta koh koh a. Reivakloah U Chhuna û, nutling tawh hian a rawn hawng ta a. Ka hmel a hmuh chuan a chiâi deuh tih ka hre thei. Nui sâng chungin, "Ka lo lut lawk thei ang em?" Ka ti a. 

Nui miah lo hian, "Lo lut rawh" a ti bung nghat. Ka pawisa duh bik lo. Living room zau angreng takah chuan thu rawh min tih pawh nghak lo chuan ka ṭhu ta thâwr a, pindan pakhat aṭangin Chhuna pu tar tawh tak, zângkul deuh hi a rawn inhawl chhuak a, a tarmit phen aṭang chuan tu nge ka nih hriatchian tum niawm takin min rawn thlêk nasa ngang mai. Chhuna te chhungkua hi ka hrechiang lem lo va, kawngka min lo hawnsaktu bakah an in thlanglam bathlar zau angreng takah chuan nula nge nu pakhatin thawmhnaw a pho mêk. Chubak midang ka hmu miah lo mawle. 

Kawngka min lo hawnsaktu chuan, "Eng nge i duh?" A ti nghal tawp a. A aw pawh a nêm fahran lo. A hmel hi a thinchhiat hmel hrim hrim. 

Zam duh bik hauh lo hian, "U Chhuna hi a awm em le? Lo biak lawk ka tum a" tiin ka hawi kual a. 

."Awm lo, a zin, eng atan nge i tih reng reng a?" A aw chu a vin lek lek. Putar pawh chu min hmachhawn zawngin a rawn ṭhu ve a. 

"Ka û chungchangah biak ka duh" ka ti nghat. Reilote chhung chu a reh duk mai. Chu chuan ka thil sawiin nghawng a nei a ni tih a tichiang mai âwm e.

"I û pawh a hre lo va, eng atan teh daih nge biak i duh a?" Nu bawk chuan a ti leh a, chutihlai tak chuan an fapa tlangval niawm tak hi a rawn lut ve chiah. Ka hmu fo tawh a, kan inbe ngai lem lo. Min hmu chu mak a tih ve hmel deuh. 

"Ka û thih ni-a a thil hmuh kha hriatchian ka duh a ni" ka ti leh tawp. Ka insanmar nasatzia an hriat ka hlau ru hle. 

Putar chuan aw khur lek lek hian, "Engmah a hre lo. Kan Chhunrûma te thusawi lo ngaih thutakte chu a..i va pangngai awm lo ve" a lo ti hluk hluk a. Tlangvala chuan min rawn enin, "An sawi i lo hre ve ni maw?" A chhungte aia awka nem zawk hian a rawn ti ve a. Ka bu nghat, "Tin, dâwt a nih ka ring miah lo bawk" ka ti nghet charh. 

Thawmhnaw pho kha a rawn lut a, min hmuh chuan a mitmeng a buai ve nak. Mahse, engmah sawi lovin pindan pakhatah a lut daih. Nu bawk khan, "Enteh, Mami, kan naua hi mi pangngai pha lo a ni tih i hria a, khang a thusawi niawm takte kha belhchian dawl lo vek an nih kha, ring duh reng reng suh. Tunah phei chuan a zin daih" a ti nghat nghat a. Ka ngawi rân. Eng thil nge ka sawi ang tih ka ngaihtuah a ni. Putar bawk chuan, "Chuan, lo kal tawh suh, ka fapa rilru buai tawh sa hi rawn tibuai zual suh. Nula, thurâwn ka pe ang che. I û khan in hriat lohin damdawi tam tak a bar ang a, a muhlum a ni ngei ang, chu chu pawm tum la, i hahdam a ni mai" a ti khur leh dat dat a. Ka insûm zo lo, ka ding phat a, "Ka pu, i fapa tu emaw i chânin i sûn ve tawh em? " Ka ti nghek. 

A kut khur dar dar chuan tuibur a han hmuam leh tê tê a, "Ka fapa te pahnih hi an boral tawh.."a ti ta a. Ka dang titih. 

"An ni chu an thihdan a rinhlelhawm ve loh a ni ngei ang maw? Enteh, ka û kha mahni intihlum duh tur chi a ni lo. In ka chhuahsan dawn pawn ṭha takin kan inthlah. U Chhuna hian ka û thattu a hmu e ka ti lo, mahse, khaminia a thil hmuhte kha hriatchiana kawmchian ve ka duh mai chauh a ni. Chutah chuan eng nge in tan hlauhthawn tur awm a? Buaina maw? Police em ni? Thihna hi fiamthu pawh a ni lo. Engpawhnise, ka haw ang e. Mahse, ka û thihna chungchangah complain ka thehlut ang" ka ti ta khawl khawl a. Kei aia upa vek mah nise, ka zah thei tawh bik lo a ni ber. Ka pen chiah tihin thawmhnaw photu kha pindan aṭanga rawn chhuakin, "Keiman engkim ka hrilh ang che" a rawn ti ta a. Ka ding chawt. Midang pawh chuan an va melh ṭhup mai. Zâm hmel angreng tak hian a rawn pen phei zel a. Kei ai chuan a upa fê ang, nulian angreng tak a ni. 

"Chhani, eng nge maw i hriat le? Ngawi mai mai teh" nu khan a rawn ti fiak ṭhak. 

Va melh zauhin, "Thudik sawi mai hi a ṭha. Engtikahmah kan rilru a nuam dawn chuang lo. May, ṭhu rawh" tiin ṭhutthleng lam a kawk zauh. Ka lungphu a rang ṭan tawh hle. Ka ṭhu ve mai a. Putara leh Nu kha chu an thinrim hmel khawp mai. Ka hmaah rawn ṭhu vein chu nu chuan, "Ni e, i thu hriat kha a dik, Ka û chuan a sawi ngei alawm, tin, dâwt a sawi hek lo. Khamini khan Pekmawia kha in in aṭanga a lo chho lai ka û chuan a hmu a, Peka nen hian an inhal ve hrim hrim bawk nen, ka û in a lo hmu ve kher bawk nen, Peka chuan, "Nang lah hi khawi hmunah pawh hian i awm a' tih leh a biang dinglama hnek a rual a, Mi pangngai lova thuchâng, ka û chu a rawn ṭap lut ruah ruah nghe nghe. Mahse, chutiangin kan lo ûksâk duh vak lo. Ani pawh a zia chho ve mai bawk a. Tikhan a hnu lawkah i û boral thu kha kan hre zui ta bawk nen, Ka u lah chuan tikhan thingpui lumnaah a lo sawi ve leh bawk si, ka pate leh ka pute hlauthawng hian an khap dai ta mai a ni e. " A ti ta dap dap a. A reh ngawih ngawih. Ka lo hriat hnu vek tawh pawh nise a mi den dan a la danglam chuang lo va, ka thinlunga a tlak dan a la nêp thei chuang hek lo. 

"A nih chuan bawhzui tlak niin ka ngai a, i ngai ve em?" Ka ti sap a. A ngawih vang vang hnuah, "Nangman ṭul leh ṭha i tih ang khan hma la tawp rawh. Ka û-in Peka a hmuh vang ringawt khan Peka thah a ni tihna a ni chuang lo va, mahse, rinhlelhna i nei a nih phawt chuan hma i la thei" a ti charh charh a. ka lo bu nghat. Nu khan, "Chhuna a rilru a buai tawh sa nak alaia tihbuai belh leh hi kan remti lo kan tih kha" pawr zet hian a rawn ti a. 

"Ka pi, engtinmah a awm dawn lo, a thil hmuh chiah a sawi dawn, hlauthawng suh" ka ti chang fak. Vai ho ang mai, ka ngei tlat alawm. 

Tlangval pawh khan, "Nia, lehlamah eng emaw thilte a lo nih chuan ngawihsan ringawt chi a ni bik lo alawm, Putea pawh a ṭang na ve êm mai, Peka lah khan a lo hnek ve kher bawk si" a lo ti ve mial a. Ka lawm ru viau mai. Tichuan, ṭhenkhat rilru dam chiah lo mah se; hlawhtling inti ru tak chuan ka hawsan ta a. 

U Rini chhuak tur ka tawk a, a nalh ngei mai. Nuthlawi lengleh, inchei thiam tak a ni bawk a, "I va nalh" ka ti hliai nghe nghe . Lawm hmel tak hian, "Ka confi sawt, hei ka leng ve lawk dawn..hrethiam em?" Tiin min rawn siai zauh. Tu nen tak inhmu dawn chu ni maw? Tu emaw hming a rawn lang a, mahse, "A ni âwm lo êm mai" ka ti chhuak sap. Sangbera a nih ka ring ve ringawt pawh kha ka inngei zawk, dik tak chuan Sangbera hian a duh ka ring lo a ni. A duh ang tih te chu ka hlau deuh em mawni ka ti lek lek. In ka thlen thleng chuan Peka ai mahin Sangbera chuan ka rilru an luah ta pek a nih kha. A va ho e aw. 

La hma deuh mahse rawng ka bawl ṭan der tawh. Kimtea a rawn bâng a, "Ate, ka bag hi thlak ka duh ve tawh e, vawiinah pawh Johny ten min nuih vak vak a" a rawn ti lut nghal. Nia, kei tunhnai ka buai ve deuh nen, ka nau hi ka lo ngaihsak ṭha hman lo deuh a ni. A bag chu a lo ṭet hrup tak alawm, "Naktukah ka va bazar dawn alawm, tv pawh ka lo en nghal ang" ka ti ta var a. Sangbera chu ka dil tawp mai ang ka ti ta a ni. Min hrethiam tho vang. 

Zanah chuan ka rin loh deuhin Mka leh an ina lo awm, a ṭhianpa emaw ka tih kha an lo leng a. Ka û boral hnu aṭang khan inleng neuh neuh kan nei ve reng nen, Mka hi a rawn lang khât ve deuh. 

"May, hei ka cousin a nih hi, ka nî fapa..Lsa a nih hi.." Mka chuan a ti nghal zung zung. Lsa chu Mka aiin a lian hlek ang, hmel fai vung mai, ṭawng tlem hmel tak a ni a. Ka lo nuih ve ringawt. 

Mka chu a titi char char, kei chuan remchangah lain a ngawih lai takin, "Mk, Peka te kha an lo chhuak leh tawh ami?" Ka ti a. 

"Chhuak leh tawh e, an tân kha ka ring vak lo hrim hrim. Pekmawia hi chu aw ka pawi hi sawi se ka hnek châk a nia" a ti leh sur sur a. A dik ang, tlangval ṭhenkhat Peka hretu te chuan hnek an chak ru ṭhumin ka ring. Lsa chuan, "May, tihian i nau nen chauh maw in khawsak" a ti a. A aw chu Sangbera aw nen inanna riau a nei, ka phu zawk nghe nghe. 

"Aw nih ve hi, he lamah i rawn awm dawn mi?" Ka ti ve a. 

"Aw, awm ve rih ang.." tiin a khi suk a. A zo der. Thingpui ka va lum a, Kimtea hi ka support ve nan tiin thingpui sial tak leh a hmeh ka chhawpsak ṭhin. Tikhan an zirnaah pawh an phur ve phah ṭhin. Thingpui kan in laiin, "Mk, englo U Chhuna te saw an chhungkua saw eng ang mi nge?" Ka ti a. 

Thingpui a in tê tê hnuah, "Tehdaih che chuan..ih, an fel ve reng. Zorema nen pawh sawn kan inkawm ve zeuh zeuh, chubak han sawi vak dan a vâng e" a ti nuah nuah a. 

"Engzat nge an chhungkua saw, an tam hmel ka ti" hriat loh hmel deuh hian ka ti a. 

Makti hmel a pu lek lek tawh. "Saw an pu tar tawh tak saw a nia, chuan U Chhuna nu leh pate bakah an unau saw pathum an la khawsa a, U Chhuna nau U Zopuii saw a senior tawh teh mai a nia, a thi a hul tawh maithei a ni. Chuan, Zorema te nufa an ni leh a, Zorema pa saw nikum hmasa khan a boral a, tisawn a nuin a lêtpui leh ta a nih saw.." a ti ve leh ta duah a. Ka hrekim thawkhat viau e. Vawiin khan U Chhuna chu a nu leh paten an chhuahpui daih a nih ka ring, a zinna hmun ka lo zawt lo kha mawl ka va inti tak. Mka te len chhungin Lsa chu vawithum chiah a ṭawng ve. Kan inkawmngeih har ve ngawtin ka ring. An la awm lai mêkin Sangbera call ka dawng ta nawlh, "I ṭha zel em?" A rawn ti thûm leh dût a. 

Ka ṭhat thu ka hrilh zawhah, "Naktuk hi min hrethiam leh hram thei la ka ti ê..ka nau mamawh lama bazar ka duh lutuk a. " Ka ti ta tawp a. Inthlahrun chu na duh tak a ni. 

"Aw..a pawi hleinem, keipawh Bawiha te inah ka riah a ngai dawn a. A remchan mai chu. Inrinniah erawh mikhual ka nei dawn a, nilêng hun i neih theih ka beisei" a rawn ti ta a. 

"Aw le, ka lo tum ang" ka tih laiin Mka khan a lighter a hmuh mai loh avangin gas-ah meizial ṭan a tum a, gas lighter kan dahna min lo zawt ve mêk, Sangbera chuan, "Inleng i nei elo?" A ti a. 

"Umm, ka in luahna te tlangval an nia" ka ti ve mai a. 

"Aw le..inkawm rawh u. Ka'n dah ang e,." A ti sup a. A dah zui nghal. Mka te pawh a hnu lawkah an chho ve ta a, keipawh ka mu ve nghal daih. 

Whatsapp-a ka luh chuan kha number hriat loh bawk msg kha a lo awm leh dul tawh. Ner nâng chungin ka open a, "Thingtlangah kir leh rawh, Thingtlangnu" tih te,

"I nauin a thihsan leh hma che khan tlanbo ru" 

"Vawi 100 pawh min block mah la, number dang 200 ka la nei thovang" tih a ni. A hmaa ka block kha a lo ni reng a nih awm chu. Tu nge niang tih ka ngaihtuah ve ta deuh. Peka a nih chu ka ring chiah lo. A chhan pawh ka hre lo, ka ring lo ve tawp. Mahse, Thingtlang aṭanga pem kan nih hria, ka û thih pawh hre vektu, min hrechiang viautu chu a ni phawt ang a. A number chu ka save ta a. Nakina la chhuichian atan tiin, ka reply duh lem lo. Sangbera status en ka tum a, a awm lo. A dp ka en hram, a nau fate thlalak a hmang. An va duhawm hlawm tak. Teberi fanu hi aw a nulat hunah a hmelṭha ngawt ang le..

Ka thawh chuan Kimtea'n tui a lo lum mêk a. Zingtin tuilum in hi kan chindan ṭhan a ni. Ka bazar tur thu ka sawi chuan a lawm ve hle. Keipawn kan mamawh zualpui te chu ka en kual a. Sawi tawh ang khan ka û ralna sum tlingkhawm kha a tam ve a, bank-ah kan in kan hralhna kan hman bân leh putea min lo thawn ve zeuh zeuh te a la awm ve bawk. Engtin tin emaw kan mamawh tak tak ang chu lei ve theih mai ka inbeisei a ni. Muangchangin ka insiam a, inchei lem lovin ka chhuak. Ka ke pawh a na mang tawh lo a ni e. In chungte in ka thlen chuan kawtah Lsa khan bike a lo la chhuak mek a. Min hmuh chuan, "I chhuak dawn mi?" A ti a. Ka lo buk khum vat, "Keipawh, hawh lo chuang rawh" a ti a. Bike-ah vawikhatmah ka la chuang lo tih a hria ang em le? Taxi fare a to ve bawk nen, a ṭawngkam ṭha ka um ta ringawt. Zei lo zetin ka lawnkai a, a kekawr kawngah ngam leh ngam lo hian ka vuan. Tlak ka hlau êm a tin ni. 

"I bazar dawn maw?" A rawn tih chuan, "Aw, nang eng nge i tih dawn?" Ka ti lâwng lâwng a. 

"Interview ka nei dawn a,." A ti ve mai. Kan inbe zui tawh lo, inbiak rin a ngai bawk nen. Bazar thlen hmain ka chhuk a. Ani pawh a tlan zui nghal. A hmasa berin ka nau bag ka en a, a ṭha ber pawl a man pawh to ve tak ka leisak ta hmak. A ṭha ber ka tihsak theih loh pawhin a dawttu tal a phû a ni. Tichuan, in chhungkhur mamawh eng ilo ka lei leh bawk. Ka hahin ka chau ve hle, ka thlan hluam mai a, ka hmelchhe ngawt ang,. Ka ril a ṭam ve bawk nen, bazar thlang lawka thingpui dawr lian lo takah chuan ka zu inhnawhpuar a. Ka chhuak, step ka zawh chhoh leh lai takin Sangbera leh Remruati rawn inkai thla hnalh hnalh ka han hmu ta. Ka bâwrin ka thlan nasa si, ka zak ve ta tlat a nih chu! Mahse, kalbona hun a awm tawh lo. Sangbera chuan min rawn hmu hman tlat tawh. 

"I va bâwr ve.." a ti a. 

"Nia.." ka ti ringawt. Remruati chu a lo nui leh sâng a, a hmelṭhat ngaiin a la ṭha reng. 

"Eng nge i la en dawn?" Sangbera chuan a ti leh a. Engmah tih ka tum zeta ka dâwtsawi thiam lo leh bawkin, "Tv en ka tum deuh a.." ka ti zawi sap. 

"Ngawi rawh..Erica biak a ngai a nih chu,. An ni hian tv chu an nei chikim" tih leh phone phawrh a rual a. "A ngai lo, ka en ve thei mai ang, ka tibuai ang che u" ka lo ti vat. Na zeta min rawn melhin, "Min sawibo hi tum teivet suh" a ti hmuk a. Mak tiin ka hamhaih hle. 

Remruati chuan, tissue paper hi min rawn pe a, "Inhru fai rawh..i hah lutuk a nih kha" a ti sap. Lawm taka lain ka hmai chu ka hru mawlh mawlh, Sangbera chu a kalsawn hlek a, Erica a tih chu a va bia a ni ngei ang. Min hnungchhawn zawngin a ding bawk. Ka inhruk mawlh mawlh laiin ka beng bul maiah hian, "In khuaah haw leh rawh, Thingtlangnu" a rawn ti zawi raih a. A nui hmel phêna a vertherna chu ka hmuchiang ta hle. Mak tiin ka melh ta reng a..