Sangbera 4

SANGBERA..(4)

Ziaktu : Toni Râlte

Hmalam ka melh ngawt ngawt a, chiâina, hamhaihna, hrilhhaina te chuan min rawn bawm khat mur mur niin ka hria. Sangbera pawh a ṭawng tawh bik lo. Kan in kan thleng a, in chungte in kawtah chuan thenawm khawveng bakah ka la hmuh ngai lohte pawh an lo ding khawm laih hlawm a. Car aṭang chuan ka chhuak ngam lo. Ka hlau, tu emawin, "May, a pawi khawp mai. I û chu kan chhan hman ta lo a ni" min tih ka hlau a ni. Sangbera chuan kawngkhar a rawn hawng a, "Hlau suh, lo kal rawh le" a rawn ti dam thlup a. Khur ru zawih zawih chungin ka chhuak. Kan in panna step pawh chu min kaih loh chuan ka zawh hleithei lo a ni. Kan inah chuan an lo khat deuh mup tawh a, U Rini ṭap pur lai ka va hmu fuh kher bawk si, ka û chu a kal ta ngei a ni maw tiin ka ding khawng reng a. Kimtea rawn kalin, "Ate, Mama saw.." a ti ringawt. Awmze nei lo zet hian ka lo melh nghek a, eng thu dang mah sawi tawh suh aw ka ti rilru a. Sangbera chu ka û pindanah va lut vein kei erawh ka la ding reng. Reivakloah ka û chu an rawn zawnchhuak a, ka piah lawka ṭhuin, "A mar an hmu tawh lo a ni lawm ni? Nge maw damdawi ina kal a ngaih le?" A ti bul bul a. Ka bengah chuan ring tak a ni. Sangbera'n , "Ka motorin kalpui i la, A thei thei khan min lo zui ve mai dawn em niang" a ti a. Min rawn melhin, "Kal ang le..i û hi damdawi inah kan hruai a ngai" a ti sup a. Ngawi rengin ka zui ve. Damdawi in kan thlen hnuah chuan kei chu ka lo hawi vel mai mai, a buaia te an buai em em a, doctor te pawh an vei tuak sek mai. Ka rilru a ruak a, tihtur leh tih loh tur ka hre lo. 

"May" ka bulah a rawn ding a. 

Ka melh chho hâ.."I û chu va hmu ve la" a ti sup. 

Min rawn kai a, ka zui ve mai. Ka û an muttirna lamah chuan kan inzui lut ta a. Khumah chuan a lo mu zangthal a, a maimichhing bawk. Puan varin an lo khuh a, muhil a ang. A khum bula dingin ka melh reng a, Doctor pakhat chu ka bulah rawn dingin ka darah a rawn hmer a, "Bawihi, pawi kan ti hle mai. I û hi kan chhan thei ngang lo a ni" a ti a. Ka chhing sawk. Mitthi ni tawh sa damdawi inah an kalpui a, an chhan theih rêngin..chhuatah chuan ka tlusawp niaih a. Ka thaw hah leh ipik lutuk avang chuan ka hahin ka chau takzet. Ka âwmah a rawn hnawh mup mup tawh si. Kimtea ṭap rawng rawng pawh ka hria. Ni e, ka û Lalnunsanga, Puia tia an koh ṭhin, mi vanduai em em kha khawvelah a awm ta lo. Ka nu ang bawkin min kalsan ve leh ta. Van khi lo tlain khawvel hi rawn delh chhe vek se ka va ti êm..ina kan hawn lai te, kan in an singsak lai te,.engmah kha chiangkuangin ka hre lo. Ka rilru mang dan chu milim ang mai ka ni. Ka û bulah ka ṭhu a, ani erawh a mu tlat si. Ka ṭap thei lo ka thin tawt bawk si chu ka khawng ta ṭhin a, vawi hnih lai min zawnchhuak a niawm e. Tu te nge lo kala kan chhungte lo kal an awm em tih pawh ka hre lo. Kan tana ṭha em em reng U Kaisangi'n kan chhungte chu a lo hrilh hre vek a lo nia. Kei erawh zankhuain ka ṭhu tawp a, ka mut a chhuak lo va, ka û chu a rawn thâwk leh ngei ringin ka melh ngat ngat mai a ni. Sangbera pawh a lo tlaivar ve ṭhak a lo nia. 

Kan unau min hre ngai eih lo veng chhung ṭhalai tam tak rawn kal khawm te chu lawmthu pawh ka hrilh chuang lo. Kan chantawkah chuan ka lungawi lo va, chuti em ema vanduaina chu kan phû bikin ka hre lo. An ṭawngṭai laite chuan ka meng a, ka hawi kual thul. Pathian hming an lam laite chuan ka lo nui a, "In Pathian sawi teivet hi a awm lo ve" ka rilrua lo tiin, an hla sak te chu a zawm pawh ka zawm duh lo. Pawi ka tih ber erawh ka la dam ve hi..Khua a lo var a, U Sangi'n an ina chaw ei tura min hruaichhuah a tum a. Ka duh si lo. Kimtea erawh chuan a va ei ang. Khua lo var chuan ka rilru nu but pawh a rawn thlifim ve ta tial tial a. Ka û chu a thi tawh a, vawiinah phum a ni dawn tih pawm zet erawh harsa ka va ti si êm. A thih chhan lah a mu hlum tih ringawt a ni si. Engvanga muhlum nge maw a nih ang le? A hmaa a awmdan leh a thil sawi duhdan aṭang te khan he hun hi a lo hmu lâwk tihna em ni ang? 

Sangbera ka bulah a rawn thu a, "May, thil i ei loh chuan i chau lutuk dawn a nia. Eng emaw ei rawh aw" a rawn ti sûp sup a. 

"Aih" ka lo ti bawl.

"I û duhdan pawh a ni miah lovang. I pawm thiam a ngai, a harsa ang, mahse, chu chu kawng awmchhun a ni" a ti duah a. Ner sak chungin, "Ka thi ve duh" ka ti daih. Min lainat hmel zeta min melh chuan ka lung a tichhia, ṭah erawh ka ṭap thei si lo. Thingpui thlum no khat erawh ka in ve. Sangbera chuan, "Ka va haw lawk ang a, ka rawn kal leh ang. Thil atthlak engmah tih lo tum suh aw..a ṭha em?" Tiin min melh ran a. Zahawm ka tih êm vangin ka bu nghat a. A chhuak zui ta nghal. Ka pa chhungte zingah ka pa û chiah Pa Nghaka leh ka ni Ruali te chiah an rawn kal. Ka vui lo ve. Ka nu te lam aṭangin ka nu laizawnte nupa leh putea te an rawn kal thung. Ka nu boral khan ka nu laizawn hi zai hlimchhawn a nih avangin a rawn kal thei lo kha a nia. Putea hmel ka han hmu chu ani chauh hi kei leh Kimtea tana awm a ni tih ka hai lo bawk a, ka puakkeh ve ta rawih râwih mai. Putea chuan min kuah a, ani pawh a tarmit phenah a mittui a luang ve zawih zawih mai. 

Chutiang chuan ka û chu a vanglai takin vuiliam a ni ta a. Thlan thlengin ka zui, ka chau lo..

Vengchhung mite an felin ṭhalai lam pawh an tlawmngai em em a. Thih nan hi chuan Mizoram tluk hi a lo awm lo ve. Tin, a hnua ka hriat leh danin kan dinhmun a ṭhen azar an han hriat khan min lo khawngaih ve hlawm khawp a lo nia. Kan Kohhran Chairman hausa deuhte phei chuan ka û chu ₹10000-in an râl hial a ni. Râlna sum tlingkhawm chu keini unau fahrahzia ngaihtuahin tam tham tak a ni. Pangpar pawh kha a dawng ve nual mai. Mi te hi an lo va ṭha tehlul êm. Tin, sawi hmaih hauh loh tur in chungte an felin, chhungkaw nu leh pa nih an tlin takzet. Engkim chu ka tih ve leh ka sawi ve ngai lovin an lo tifel zung zung mai a ni. Tin, kan unau tana mi hlu tâwpkhawk U Kaisangi te nupa hi chu sawi loh a lum a ni. Û ber chan changin mi lo lengte a lo dawngsawng vek a, a mawng a zâng si. U Kawnga pawh eirawngbawl leh eng emaw chetna turah a phusa berah a ṭang bawk. Kan vanduai azarah kan vanneih zia ka hrechhuak thar. Mahse, Pathian vang ka ti duh chuang lo. Mite ṭhat hrim hrim vangah ka ngai lui tlat a ni. Ka pa chhungte kha chu a tukah an haw nghal a. Putea leh Nuteii te erawh chuan a thihcham thleng min chenpui ve a. An va hlu tak êm. 

Ka inbual zo, ka sam ka hruk hul laiin U Sangi a rawn kal a. "Mate, Sangbera chungah lawmthu sawi in ba nasa a nia aw. Engkim a senso leh sum hmanna tur kha aman a tum vek a nia" a rawn ti nghal bawrh bawrh a. Sangbera hming a sawi takah chuan ni e, ka hnathawhna lama ka pu mahnise, kan chhiat tawh chhung leh a hnulam thlengin a rawn chuangkai âwl lo va, hun awl a neih loh ve êm avang erawh chuan rei a awm ngai lo thung. Chutia sum sen ngaia a lo pe zel chu ka rinphak bak a ni. 

"A va fel ve, ka hlawhah cut se a ṭhat chu" ka ti ringawt a.

"I hlawhin a rul phak teuh lo. Mahse, rulh leh turin a pui lovang che u, mipa fel tak a nih vang a ni ngei ang" thutak deuh hian a ti a. 

"Umm, ka thiam ang tawkin lawmthu ka lo hrilh ang" ka ti sap.

"I nunna chhanchhuaktu pawh a nia" U Sangi chuan a ti sep a. Ka lo chhing daih thung. Ni e, Sangbera chu ngei riauna ka nei a. Ka û kan vuiliam rual khan keipawh zanah ka chhuak ang a, khawi hmunah emaw ka va thi ve ang tih rilru ka pu a. Mahse, ka awmdan leh zeizia a ṭang chuan ka thiltum ruk chu a lo hrethiam ni ngei tur a ni. Sangbera chuan min chhuahpuiin hmun pakhatah min dinpui a. Chutah chuan thih ve ka tum tih pawh ka hrilh ta law law a nih kha. Ani chuan thutam a sawi lo, "Kimtea hi mahni intihlum ve tur chuan a la nau deuh mang e" tih chiah a sawi. Mahse, chu a thusawiin a nghawng chu ka la dam ta tlat hi a ni. Ka nau kha ka lusûnna khan min nghilhtir a, engtin nge a damkhawchhuah ve ang tih lam ka lo hrechang tawh lo. Mahni hmasial takin khawvel chhuahsan ka lo tum vei rawk a. Min mamawh ngawih ngawihtu, ka thisen zawmpui awmchhun ka nau Kimtea a la dam ve tlat si a! Chuvang chuan châk hle mah ila thih ai chuan dam ka thlang leh ta zawk a nih kha. Khang thilte kha U Sangi bulah a thuphungin ka sawi a, a lo la hre ve reng a nih dawn hi. 

Ka û thihcham a rawn thleng ta a. Mi kan buai tawh nen, inleng pawh kan beisei ngam vak lo nachungin kan beisei aia tam inleng kan nei a, a lawmawm khawp mai. A tukah putea te an haw tawh dawn a, zanah chuan kan unau chungchang kan sawiho ta a. Nuteii chuan, "Kimtea hi chu kan bulah awm mai se, kan fate nena inkawm rual an ni bawk a, nuam a ti thuai mai ang. Hetia unau chauha khawsak chu a dik lo, nang i putea te bulah awm bawk la.." a ti mawlh mawlh a. Putea erawh chuan, "I thutlukna leh duhthlanna kan zahsak tho che a nia. Mahse, kan ngaihtuah êm mai che u a, i û la damlai kha chuan engmah ti thei lo mah se; awmhmuna ro a rel ve thei ringawt pawh kha a thlamuanthlak a, a awm ta si lo. Nang lah i la naupang ve bawk si,eng nge i rilru te han sawi ve hrim hrim teh" a ti a. 

Hei hi a hmaa an lo sawi thawi tawh avanga ka lo ngaihtuah felsa vek tawh a ni a, Ka û duhthusamin Aizawlah kan pem a. Vanduaina kan tawk a, ka û awm tawh lo mah se; a lu nghahna hmun leh a duhthusama a pemna hmun hi chhuahsan ka tum ta lo bur mai a ni. Putea te bulah awm ila ka rethei dawn lo tih ka hria. Fanu an neih loh vangin a duat pawh min duat fu ang. Mahse, ka nau neihchhun Kimtea nena awmhran chu thil theih loh tawp niin ka ngai. Ka tel loin a awm thei lo ang bawkin a tel lo pawn ka awm thei dawn lo. Min mamawh a, kei hian ka phatsan lovang. Chung ka rilru zawng zawngte chu putea te chu ka hrilh ta vek a. A bu nghut nghut, Nuteii zawk chuan a hrethiam lo lek lekin ka hria. Mahse, min nawrlui ngam bik lo. 

"Engtin nge ei in zawn ve ang? A zirna senso nise a sang chho ve zel dawn a nia" a ti ta chiah rêng a. 

"Nia, mahse, tihdan a awm ve zel mai ang. Taima leh rinawm taka ka thawh chuan ka nau hi ka enkawl ve thei em em ang" ka lo ti a. 

Putea pawh chuan, "Hausa lê lû lo mah ila; ralkhat aṭangin mamawh zualpuia hman khawpte pawh inthawn dan a awm alawm. I duhthlanna chu ka zahsak a che. Tin, in unau zawng in fel êm mai a, ngaihtuahawmin in awm bik lovang tih ka ring" a ti ve a. Ka lawm hle. 

Mut hmain Sangbera'n min lo call a, lawmthu kha ka thiam ang tawkin ka hrilh tawh a. "I ho lutuk, ka tihtur, ka mawhphurhna alawm" tiin min a nih kha. Putea pawn a lawmzia a hrilh ve. Fel a tiin thawk fuh min ti viau. 

"Hello" ka tih rual chuan, "Aizawlah in la awm dawn em?" A ti a. Mak ka ti deuh. 

"Aw dawn e, ti nge a?" Ka ti hû a. 

"Aa..ka zawt mai mai che. A nih chuan ka hnenah i la thawk dawn em?" A ti leh a, ka ṭawng hmain, "Ni lo, naktuk tlai lamah ka rawn kal ang. Kan sawi dun ngai thil a awm" a rawn ti leh lawi a. Min tibuai tulh tulh, "Aw le" ka ti ta tho va. A dah zui nghal. Kimtea ka mutpui a, a muhil sâk sâk chu thlirin ani bak thisen zawm ka nei tawh lo, ka neihchhun a ni tih ka inhrilh mawlh mawlh. A rawn ṭhanglianin tlangval fel leh rintlak tak a rawn ni chho ang a, kei dam thlakhlelhna nei tawh lo a û hi dam nawmna min la hmuhtir ngei ka beisei a ni. Keia mihring rilru hel laklawh tawh hian "Pathian tel lo paw'n ka enkawl thei ngei tur a ni" ka ti ta riap mai si a. Mahse, zâmna ka nei lo, ka nau tan tih hreh leh thawh hreh ka nei ngai dawn si lo va. 

A tukah putea te pawh an haw a, khua a har nghal vung vung. Tukṭhuan chu U Sangi te chhungkuain an rawn ei a, a zia ta phian. U Kawnga hnathawkin a chhuak a, U Sangi pawh a fate nen an in lamah a sumdawnna buaipui a ngaih ve tawh êm avangin a va haw phei ve a. In chungte pawh nizan dar 7 bawr velah khan Pa Zoa farnu Reiek ami a boral ve a, an chhung kal diak mai a, a reh hle. Kimtea pawh ka tur lui nasa tawh a, school a kal ve tawh. Keimahin kan in zau lo takah chuan ka awm ta ran mai. Inngaihtuah leh vak chuan ka rilru a no leh mai mai dawn tih hriain kan in an singsak, hmanhmawh buangbar taka kan senghawi ho te chu chinfel ka rilruk a. Kan pindan tak hi chu an ṭhiat ve lo. Ka û pindanah ka lut a, ka hnual nghal ngawih ngawih. A hma kha chuan khumah a lo mut loh pawn a chairah thuin thlanglam tukverhah a dak vung vung ṭhin kha a nia. A thih hma zana khum bula a ṭhu ka hmuh khan ti nge ka va pana eng harsatna nge a neih tih ka va zawh loh le ka ti vawng vawng zel. Inchhirin awmzia a nei tawh si lo. Ka û pindan chu ka han chingfel a, khatia a nat tak hnu khan a phone khawih reng peih hek lo, Magazine te hi ka leisak thin a. U Rini'n a lehkhabu a hawhtir ve bawk. Chung ho chu a khum bul dawhkan hnuai drawer-ah ka dah lut a, Ka û khan detective lam hi a chhiar nasa a, lehlin pawh a chhiar nasa. Detective Boss Amanda lehkhabu, U Rini ta a hawh chhah ṭha ve tak dah luh ka tum lai takin a kar atang chuan lehkhaphek hnih hi a rawn tla a. A inziak khat dal bawk. Eng nge ka hriat pawh ka hre lo, ka zuk chhiar kher kher a. Ka û kutziak ngei a nih bakah a thuziah ka zuk hmuhchian lai chu, "Thihna hi damna a ni fô" tih lai chu a ni. A ranga rangin lehkhabu chu ka keu leh thuak thuak a, mahse, lehkhaphek dang a awm tawh lo. Drawer-ah chuan ka dah a. Chung lehkhaphek inchilh lo chu kengin khumah ka ṭhu sauh sauh a. Ka û thuziak chu ka chhiar ta a ni. 

Hetiang hian a lo ziak. 

"Min hmangaihtu ka nu ka chân a. Pa ber rîkrâpna leh tihduhdahna hnuaiah rawn seilianin farnu duhawm leh hmelṭha tak Mayi ka nei a, mipa naupang duhawm em em Kimtea ka nau a awm bawk. Ka nu avang khan ka pa sualna kha ka hre tam lo zawk a. Ka nu a han thih tak aṭang chiah khan ka mawhphurhna sanzia ka hrechiang ta a ni. Ka pa hi chu ka nu pasal a nihna ang bakin ka en thei tawh lo. A thih pawh khan mak tihna leh min ṭhawngtu ka nei lo. A phutawk ve rengah ka ngai. Ka rin aiin a thi awlsam mah mah zawk. Khatiang pa kha ka mihringpui te hian nei ve lo se ka duh ngawih ngawih. Mahni rilarah thisen ngeite pawh hmangaih thei lo ka pa kha chi thlah ve tlak a ni lo. Ka pa thih hnuah khawvel changkanna leh hmasawnna tem ve turin Aizawlah ka naute ka pempui a. Ka thawh theih ang ang thawh ka hreh lo va, min khawngaiha min tuamhlawmtu U Sangi te nupa hi Pathianin mal la sawm khawp ang. Ka naute hi chuan zir theih sang ber thleng lehkha zir se, mi hlawhtlingah chhuak se ka duh a. Chumi hnuah keima nun chu ka inngaihtuah ve thei chauh ang chu..Mahse, vanduaina bân hi a lo va sei ngai ve le..

Kan hnathawhna hmunah ka chesual a. Ka che thei ta lo. Ka damchhungin ka ke rinchhanin ka kal leh thei tawh dawn lo tih ka hriat ni khan ka thi tawh. Ka thaw a la tâwp lo mai zawk a ni. Min damtir leh avangin Pathian lakah ka vui hial a nih kha. Ka naute phurrit ni tura dam kha ka thlahlel mawlh lo asin. Mahse, ka naute hian min va hmangaih tehlul êm. Ka nu, nu azawnga nu fel leh hmangaihna ngah ber mai khan keini a fate nunah hmangaihna chi a lo kui ṭiak diam tawh a, ka nu hlimthla chuan min chenchilhin chumi avang chuan thih ka ṭhulh fô mai. Ka naute ka ngaihtuah a, ka ṭah chang hi a va tam tak êm. Mayi te hi aw..nula a ni ve tawh a, kei a u hian mite anga incheina ṭha leh silhfen mawi tak hmanga thuam ve theih hi ka châk ṭhin. Mi chhiahhlawhah ṭangin zing aṭanga a mut hun thlengin mawng pawh hung hman lo khawpin a buai a, ka nau, van khian malsawm che rawh se aw. 

Nitin keimaha ka awm tak hnuah chuan kawng pahnih zawh tur ka nei tih ka hria a. Pakhat chu ka nu hnena kal, pakhat leh chu ka naute tibuai tam lova mahnia inhaikuak ve..duhthlanna harsa tak a ni. Ka nu lah ka mumangah ka hmu chamchi a, a kut dam taka min chul te kha ka va thlahlel ṭhin êm..Nu, ka lo kal ve mai dawn aw.."

Ka û thuziah ka chhiar zo chu ka khur zawih zawih. Khumah ka bawk thlawp a, insum reng reng lovin ka'n ṭap tak tak mai a. Ka û rilru tur kha hriatpui ve viauin inhre mah ila, a rilru lo retheih thinzia leh keini a naute avang chauha la thaw ve hram hram a nihzia ka han hriatchian takah chuan ka thinlung hi chhun angin a na a ni. A chhan chu keipawh Kimtea vanga la dam ka ni miau a! Ka û sulhnu ka chhui chu a ni ta reng mai. Ka thinlung tak taka sawiin, ka û mual liam tawh chu ka bia a. "Û, ka lawmpui che. Natna awm tawh lohnaah i awm tawh a, ka nu bulah i cheng tawh bîk a. Hlim rawh aw. Min lo ngaihtuah reng reng suh. " Tiin. Mak deuh maiin ka rilru chu a zang hawk mai a, ka che vel reng reng chu ka zangkhaiin ka phur thar sawt ni hian ka hria. Heng zawng zawngah hian Pathian hming chu ka la lam duh chuang lo. 

Tlai dar 4 vel chiah chiah a niawm e. Kawngka an rawn kik a, ka va hawn chuan Sangbera a lo ding rûn mai. "Lo lut rawh" ka ti sap a. Eirawng ka bâwl zo thawkhat tawh a, kei tihtur khek thei vak lo chi ka nia, rawngte hi ka awm ni chuan bawl hma thei tak ka ni. 

"I putea te chu an haw tawh maw?" A ti thuphung a. 

"Umm, haw e" ka ti a.

"Chuan, engtia khawsak nge i tum tak?" A ti ta a. Inthlahrung tak chungin, "Rem i tih chuan i hnuaia la thawh zel ka duh a. Ka nau enkawl a ngai sia" ka ti a. 

Mitmeng zaidam zeta min melhin, "Thutlukna ṭha tak a nih chu. Engtik lai pawhin i tan hna a awm aw. Mahse, ruahmanna pakhat ka lo nei ve a" a tih chuan, phâwk angreng tak hian, "Eng maw?" Ka lo ti vat. 

A khabe hmul tuai zauh pahin, "I nau nen chauha heta khawsak hi a him tawkin ka hre lo a ni" a ti nghet churh. A awmzia hrethiam chiah loin ka melh a, ka mitmenga zawhna chu a hrethiam nge ni, "A awmzia chu hmeichhia la naupang tak i ni a, i nau lah rawlthar mai chauh. Tunlai khawvelah misual pawisak nei lo an tam tawh sia" a ti ta mawlh mawlh a. Hmn, ka hrethiam ve chiah. 

"Ka invenghim ve thei alawm" inringtawk takin ka ti a. A nui hawk, "I rilru huaisenna ringawt khan a chhanhim thei dawn lo che a nia" a ti leh a. 

Ka hmui tisawiin, "A nih chuan engtin nge kan awm chuan ang?" Mawlmang zet hian ka ti a. 

"Enteh, May,. Piteii hriselna dinhmun saw nitin a hniam tih ka hria. I duh chuan a ai i awh thei ang. Ka inah i nau nen hmun ruak a awm. In him bawk ang" a ti ta charh charh a. 

Ka inngaihtuah vung vung. Min duhsak leh khawngaihna vang a ni tih hre mah ila, ka û lu nghahna in han chhuahsan nghal rum rum chu ka ngaingam meuh si lo. Bakah mi ten eng angin nge min ngaih ang..tlangval amah chauha khawsa bula va awm ve ringawt chu. Thisena inzawmna awm si lo va chenho reng chu nakinah neuh neuh te a la awm maithei, chhe takin kan inchhuah ang tih a hlauhawm. Bakah ka nau school kalna tur a hla dawn lutuk..

"Enteh, Pu Sangber, min duhsakna hi ka lawm lutuk. Mahse, tunah rih chuan kan in hi ka chhuahsan thei rih lo. Thil tam tak avang pawn..min hrethiam rawh aw. Kan him thei em em ang" ka ti ta tawp a. Ka inthlahrung kher mai. 

"Min pu tawh suh. I duh chuan min û mai rawh. Nia, i duhthlanna ka zahsak ang che. I tan rilru siam a la harsa ang tih ka hria alawm. Thil dang daih, May, College kal kha i la châk reng em?" A ti ta daih a! Ka lo meng bial kâwk. 

"Maw..aa..châk pawh ka hre lo.." ka ti ta ringawt. 

"Inthlahrung mah ta che. I duh phawt chuan min hrilh dawn nia. Thil harsa a ni hleinem" a ti a. 

"Aih, ka zir peih tawh lo. Rilru a tâwp tawh..ka nau hian zir se a tawk reng, ka lawm e" ka ti ve ngial a. Nia, zep loh chuan college kal châkna ka nei tawh lo. Zirna hmachhawn leh tur chuan ka bil tawh. Mi chhiahhlawha ṭan mai mai hi ka phutawk chiah. 

"A nih chuan engtik aṭangin hna i rawn zawm theih ang?" A ti a. 

"Naktuk aṭang pawn ka thei tho" ka lo ti vat a. 

"A ṭha e. Ka lo beisei ang che. " Tiin a ding a. Hawihhawm chhuahin, "Chaw ei ve ta che" ka ti ve sap. Ka zak leh deuh, keini chawhmeh te chu a ei duh lo tawp ang. 

"I chawhmeh siam ka ei leh châk viau naa, hun dangah ni rawh se. Meeting ka nei a. " Tiin min chhuahsan ta a. Ka ruak huaiin ka inhria. Sangbera hi mipa angin ka en lo, ka sawi awmzia chu hmeichhiain mipa an en dan angin ka en ve lo, kei zawng lungpui ka ni tih tawh kha. He ka thinlung sak tak hi tu mipa mahin an tihnêm leh theih ka ring tawh lo. Mahse, ka tan a ṭhat leh min duhsakna avang hian Sangbera tan chuan ka theihtawp ka chhuah ve ang,. 

Kimtea nen chauh zanriah kan kil ta a. Chaw ei a tui mawh viau mai. Naktuk aṭanga ka hnaa ka kal leh tur thu ka sawi a, "Umm, nia, i lo haw tlai pawn a pawi lo. Eirawng ka bawl thiam ve tawh alawm" a ti thên a. He nau hi chu a va duhawm tak. 

"Zirnaah chauh i rilru pe la, kan dinhmun hrechiang bawk la, mi hlawhtling ni ngei turin theihtawp chhuah rawh aw" tiin ka fuih leh malh malh a. Buk nghauh nghauh pahin, "Ka hria..Ate, class 10 ka pass chuan science ka la dawn aw. Doctor nih ka duh" a ti ta a. A nih tum leh a tuina lam hi a sawi ngai lo. Tuna a sawi hian min tilawm hle, Kimtea a nih bik vanga doctor a nih theih lohna tur chhan ka hre hauh lo. "Tehreng mai, sum leh paiah chuan buai suh, i û hian i hlawhtlinna tur a nih phawt chuan thawh hreh ka nei lo..mahse, theihtawp chhuah ang che" ka ti a. 

"Ka hlawhtlin hunah chuan nangmah vang a ni tih mite hmaah ka puang ang" a ti zawi sup a. Chu chuan min tilâwm. 

Zanah chuan inleng kan nei ta lo bawk nen, Kimtea lehkha zir hlanin U Sangi te inah ka va phei ve zuai a. An ni hi an buai ve ṭhin nen, ka pui hman ngai si lo. Kan awmna a inhlat lem lo va, ka va thlen chuan a bungrua a lo thleng chu niin chhuatah an lo chap darh nuaih mai. "Awii, May, lo call che ka tum lai tak, enteh, hei a lo thleng hnem sia, min pui ve lawk rawh" a lo ti nghal zung zung a. A thliar fel dan tur min hrilhin keipawh chu ka che ve nghal mawlh mawlh. U Kawnga lo haw pawh a rawn buai ve nghal zat, "May, Pu Sangbera chuan an ina awm turin a sawm che u elo?" A ti a. Engtin nge maw a lo hriat ni. 

"Engtin nge i hriat?" Ka lo ti thung. 

"Ka û-in dawra a sawi a hria a niang, ka bulah a sawi ve leh a. A khawngaih ve khawp che uin ka hria. " A ti bawrh bawrh a. 

"Dik chiah, a mak zawk e. Ti taka min khawngaih hi" ka ti ve ringawt. 

U Sangi'n fiamthu hian, "A ngaizawng che a niang" a lo ti kawkalh. 

"Saw pa sawn hmeichhia a ngaihsak lo, lungtum a nih saw" ka lo ti hmiah. U Kawnga chuan, "Nia, ka û pawn mak a tih thu a sawi ve fo mai,. Amah tlangval hmelṭha leh fel, intodelh bawk si te chu nula fel leh hmelṭha tak takte pawn an neih duh dawn nen, amah hian a hawi lo hrim hrim a nih hmel. Mahse, chuti takin a la upa lo va, chuvangte pawh a niang" a lo ti luam a. 

"A upat tawh ka ring, kum engzat nge a nih?" Ka tih chuan, "Kum 32 a niin ka hria, a puitlin bakah a hlawhtling sia, saw sawn a tilang upa vek" a ti ve mai a. Ka rin aiin Sangbera chu a la naupang.

U Sangi te in luahna nu, Nu Zami, nu phawk leh ho ve tak a rawn lut ve a. A titi nghal bawrh bawrh. "May, inleng an rem ve ta deuh a ni maw?" A tih chuan ka lo chhang vat a. 

"In vanduai unau ngawt mai, mahse, i fel ka ti ngawt mai che, i la naupan reuh nen, tihian i nau i han enkawl dawn chu a nia..i puitling ka ti thlawt" a ti niah niah a. Ka lo zak deuh, fak tlak ka nih loh tehlul nen. Ka chhan hmain, "Kan thudangalai chuan kha Pekmawia te ṭhianho chu an tân hmel khawp mai,nizanah Pi Ngaii te dawr an lo rawk a niawm a, an chawh ka ti ngawt mai. Tâng daih teh se" a ti bawrh bawrh a. Ka lo hre ve lehpek lo. 

Thingpui te kan in zawhah phei ka tum a, ka nau ka ngaihtuah deuh bawk nen, Nu Zami bawk chuan, "May, thutak khûka khûkpui chi a nih leh nih loh chu ka hre lo va, i û boral ni chhun reh lai tak khan Peka hi in in aṭanga a rawn chho hmutu an awm tak asin. Saw Tetea te in piah lawka an mi anglo kawl, Chhuna sawn a sawi fuk fuk a, ani mi pangngai loa thuchâng, tu khaw khain an ngaihven zui ta lo va. Ka han sawi ve mai mai a nih chu, a hma khan buaina angrengte kha in lo nei ve tawh nen" a ti ta mial mial a. Ka haw tur ka ṭhulh leh nghal, "Sawi chiang deuh teh, Nu Zam, engtin chiah maw pu Chhuna chuan a hmuh?" Ka ti ta sek sek a. 

U Sangi te nupa pawn an lo bengkhawn ve hle. Nu Zami chuan a aw thian leh kharh kharhin, "Aa..lumen zanah khan thingpui lumnaah Chhuna chu a awm ve a niawm e. Kan tlangval sawi ka hriat tho a nia. I û boral dan mak an tih thute an sawiho nak nak a, Chhuna pui roh chuan, "Amahin a thi awm lo em mai, misual Peka'n a tihlum a niang, chhunah pawh an in aṭanga a rawn chho ka hmu alawm. Ka hmuh vang ringawtin tah hian min hnek lehnghal" a ti pek a niawm e. A bek dinglam a dawm vung vung bawk. A tawng hre pha ho pawh an phâwk hrâ hlawm a. Mahse, hmalak chi a nih leh nih loh an hrethiam lo. A hnu lawkah Chhuna pu sawn, "Kan Chhuna lah hi Peka a ngei vang hian dâwt te hi a thutak sawi ang nulh nulh a, engahmah ngai suh u. Peka hi a hmelhuat tlat a, a chhan pawh kan hre lo,. Khamini te chuan Chhuna te chu Salemah a zu kal daih alawm" a ti ta bawk sia. Chuvang chuan tuman an sawi ri leh ta lo a nih hmel. Mahse, kei chu ka ngaih a ṭha chiah lo va, i bulah ka sawi ta mai a ni..hmalak ngaihna a awm tawh pawhin a lang lo va, i û kha mahni intihlum a nih ka ring hauh lo" a ti ta charh charh a. Ka thaw nge thaw lo pawh ka hre lo, a sawi zawh chuan ka hah hle ringawt. U Kawnga chuan thutak hmel zet hian, "Chhuna chu kawm chian a ngai a nih chu..a pu chuan buainaa tahluh a hlauh vangin dâwt a sawi a niang" a ti a. 

Nu Zami bawk chuan, "Hretu kha an awm nual a, mahse, a tu aman an sawichhuak lo leh Mayi te beng takngial pawh a thleng lo hi mak ka lo ti zawk a. An hrilh ngam lote pawh a ni maithei" a ti a. Thil ni thei a ni. Mahse, ka hre tlai emaw tlai lo emaw bawhzui chi niin ka hre tlat. Rilru na thar dawn pawh nise, thil thleng palh a nih loh chuan ka û khan a dikna chanvo a hmu ngei tur a ni. Ka hul hiau a, sawi ve tur reng reng ka hre lo. U Sangi'n, "Engtia tih chi nge niang le?" A ti a. 

U Kawnga chuan, "Mayi ngaihdan te pawh nise, mitthi tawh khin chu a awlsam an ti sia..tharthawh leh kher pawh a ṭha ber lo thei tho" a lo ti ve a. Ka thaw kâwk, min melh ṭhap tih ka hria..a tumah en lo chuan, "Zaninah ka lo ngaihtuah ang. Nu Zam, ka lawm lutuk. " Ka ti a. Ka ding nulh, "Ka va haw ang e, Kimtea a khua a har lutuk ang. " Tih leh chhuah ka rual. Mak min tih viau ka ring, mahse, hawihhawm leh phungthlûk lam a lang thei tawh tlat lo. Ka lung a phu dûp dûp a. Ipik si, thinrim bawk, rilru na bawk siin ka awm a ni ber mai. In ka luh dawn chuan ka theihtawpin ka insangphek a, hmel pangngai ka put hram ka beisei. Kimtea chu mipa tih takah min chîk lo bawk a, engmah a sawi lo. zan dang aiin ka mu hma ta bawk. Mahse, ka muhil lo chiang khawp mai. Ka nauin min hriat ka hlau bawk si, tlaivar zaka ka inngaihtuah hnuah Police pun rih lo va, keiman muangchânga hmalak ka tum ta a ni. U Sangi te erawh ka hrilh ve ang..eng pawh ka tawk thei, min hriatpuitu an awm kha ṭha ka ti. Sangbera ka rilruah a rawn lang a, mahse, hrilh ve kher ṭulin ka hre lo, ka tibuai tam tawkin min pui tam tawk tawh e. Pekmawia chuan ka û chungah thil ṭha lo a lo ti a nih teh chuan..ka damchhung leh ka thih hnu thleng pawhin ngaihdam ka tum lo. Tin, jail tantira hremna pek ka duh hek lo, keimahin ka ti ngam lo a nih pawhin a ti ngam ka ruai mai ang, nunna chu nunna vêkin ka thleng ang a, ka bâ ka tlakah ka ngai bawk ang. 

Tlaivar ṭhak mah ila, zinga ka thawh pawn ka chau hran lo. Ka mit erawh a senin a thip ve deuh. Ngawi rengin ka che mawlh mawlh a. Ka taxi hman thin Valtea pawh nizan zantirah ka be tawh a. Ani hian ka û boral pawh khan a rawn râl ve vang vang a, a fel tak tak a ni. Kimtea pawh a insiam a, pawisa hi ₹ 20 aia tam ka paitir ngai lo. Zuk leh hmuam a ti lo va, thlum ei nasa lo turin ka hrilh zing bawk a, hmawmsawm lam a uar tehchiam lo. Tiffin nise a pai ziah bawk a. Hmanna tur em em a nei lo. Kimtea kal hnu lawkah ka insiam a, chaw pawh kuttum tiat bak ka ei lo. Chaw châkna ka nei hlawl lo. In chungte inah ka peng ve a, tukṭhuan an lo kil mek chauh. "Ka hna ka ṭan leh tawh dawn a. Chabi ka rawn dah aw" tiin ka khai nghal a.

Pa Zoa chuan, "Mayi zawng i lo puitling reuh êm mai,. Ti ṭâng ṭâng rawh. Hei i nu Zuali lah chuan tun thla in luah man a free dawn che u a nih hmel a".tiin an nu a melh a. Lawm deuha nuiin, "Awii, tak tak a nih chuan ka va lawm dawn ve" ka ti ve mawlh mawlh. 

Nu zuali chuan, "Tak tak ni e, chhiat in tawk a, hengte chu kan tih ve tur alawm. Mamawh i nei emaw harsatna i nei emaw a nih chuan sawi hreh reng reng suh aw" a ti zui malh malh a. Hetiang mifel kan tawng unau leh thin hian dam pawh a tinuam ve deuh thin. 

U Rini chuan nui sang chungin, "May, min lo biak rawh aw" a ti zauh a. Ka buk khum zauh a, an laklawh bawk nen, ka chhuahsan ta a. 

Sangbera in ka thlen chuan awmhmun kawr nen a in bul velah a lo tei lauh lauh a. Min rawn hmuh chuan, "May, lo kal lawk teh," tiin min hui a. Ka va pan hnai vat, pangpar pawl riai mai, par lian vak lo nalh zet mai hi a kawk a, "Eng pangpar nge i hria em?" A ti a. Kei hetiang lam reng reng ngaihven ngai lo, Thingtlanga kan hmuh tam ve deuh Derhken, Zamzo tih vel bak hre lo tan chuan a harsa mang e aw. Hre lo nih ka hreh ve bawk si, "Ih, par pawl a niang" ka ti ta ngawt a. A nui hawk hawk. "Hre lo nih i hreh lutuk a nih kha..kei pawn ka hre bik hleinem..pangpar te hi ngainat ve tur aw..May par a mawi tehlul nen" a ti lûng lûng a. Ka ngawi reng. 

 Kan inzui lut a. Nu Buangi ka hmu leh ta chuang lo. "Khaw nge" ka tih chuan, "Damdawi inah" tih chauhin min chhang. A lo na viau em mawni dawn le..ka kal loh rei ve nen, in chu tihfaisaktu an awm tho nge a hma ang thoin a fai vûk a, han tihbelh tur ka hre lo lek lek zawk. 

"May, kha hei ha rawh, pawn lam saw vawiin chu kan tifai ang, lukhum hi khum bawk la" tiin lukhum leh kamiz ban tlawn min rawn pe a. Ka lo la ve mai. "Ka huanah ka hruai ang che. Chawhma chhung bak kan thawk lovang. I hreh em?" A ti a. 

"Hreh lo ve" ka ti sep. A rawn kun hniam a, "Nizanah i muhil miah lo a ni maw? " A ti sup. 

"Muhil e..ti nge?" Ka ti hliai a. 

"I mitmeng kha mawle..aw le, a rei lovang" tih leh chhuah a rual a. Ka umzui ve nghal. A in piah maia kawng fai tak chu zawh dunin a huan lam chu kan pan ta a. Ka rilruah eng thildang mah a leng thei lo. Pekmawia ringawt a awm. A huan chu a zau hran lo naa a nuamin thei chi hrang hrang a tam khawp mai. Kawiâm te chu an hmin ṭan a, kan lo va, serthlum erawh an la sên deuh. Hnim vel a samfai chhungin theitê ka lo lo va, ka ei pah bawk. Theite kunga ka lawn mêk laiin huan chhung ni tho si, a mawng lam deuha thlan ang deuh chu ka zuk hmu ta a. Ka melh vung vung. 

"Nimbu kha tlem lo leh ila, kan chho dawn nia" a tih avangin nimbu chu kan lo leh a, thlan chuan ka rilru a luah leh tlat tawh. Huan sir lama kuhva bul vel a fan lai chu chuhin chak zetin huan mawng lam chu ka pan ta a. Ka thleng thla thuai e. Thlan a lo ni tak tak mawle. Thlanlung te taktê a lo inchhawng vâ a. 

Zodinpuii- kum 23 

Thih ni - Ni 13, May, 2018 

Tih a lo inziak..Zodini tih hming chu ka hre tawh..ni tak e, Nu Buangi'n a sawi tawh tak kha..kha hmeichhe thlan kha maw hei hi..a thih ni lah chu ka birthday a ni lehnghal..ka kheimit rawn thip zawk chu ka zuk hup that a, ka râk nghal ṭhawt. Rûl..

A tlanchhe zui daih, mahse, rultuha niin ka hria a, ka thih phah em lo turah ka ngai. Ka kheimit erawh a na reuh hle. Kal tuma ka han pen chu ka tlu ta hnawk mai..khai aw! Sangbera rawn chhukthla mek chu ka han hmu phê ruâi a. A hmela thinrimna leh a mitmeng ling vût te avang chuan ka maimichhing ta tawp a. Ka zawn a lo thleng tih erawh ka hre thei. 

"He lai hmun hi i la hmu ngai lo va, i la hre ngai reng reng lo tih theihnghilh ngai suh" a ti vawt raih a. Ka ṭim sung sung thei hial…