Sangbera 3

SANGBERA..(3)

Ziaktu : Toni Râlte

Remruati a rawn ṭawng leh vat, "Dinglian, i va â mai mai tak, zu a in lohna a rei tawh alawm,. Va thlah rawh, kan nula hi.." tiin. Ka hnual ve ringawt. A chhan ka hre si lo. Awmngaihna min ti hre lo deuh, an inhnial tam hmain Dinga lam chu hawiin, "Kal ila" ka ti ta ngawt a. Sangbera chuan, "Aw le, Dinga, fimkhur takin khalh ang che" a rawn ti a. Remruati car back seat-ah ka ṭhu lut nghal. Dinga pawh rawn lut ve zatin, min rawn lehhawi a,kan awmna hmun min zawt ta a. Chak lutuk lo chuan min tlanpui a, kan ngawi dun kar mai. Kawngpui kan pawh hnuah erawh dawr zawnah a ding a, kuhva leh sikret a lei a. Kan tlan leh rualin min be ve ṭan ta a. "I thawhna pa hi a khirh viau em? Mipa inchengvawng lutuk chu hrawn an hrehawm an tia" tih vel a ni. A hrehawm lem loh thuin ka chhang a. Ka hming vawi hnih min zawh hman avangin chaw ei hma khan no hnih khat a lem hman a nih ka ring deuh. Zu ka hua ka tih tawh kha..Dinga pawh chu ka mil lo ve ringawt. Kan in peng kan thleng a, "In unauin maw in awm, enteh, ka laklawh sia, peg khat lek ka lo in teh ang a.." a la ti zui! Rum zeta melhin, "Ka ûin a remti lovang" tih leh lawmthu pawh hrilh lova kalsan ka rual. Ka pain ka thinlungah zu rui mite huatna chi a tuh laklawh a, zu rui ṭhin chu sual vek turah ka ngai tawp mai. Ka ngaihdan chu a mawl hle tih ka hre tho naa, ka thlak thei chuang der lo. In ka thlen chuan Kimtea'n lehkha a lo zir mêk a, ka û erawh a pindanah a lo awm. Tukverhah a lo dak vauh vauh a. 

"In lo buai em?" Ka tih chuan, "Buai nang, Kimtea chaw chhum a ût deuh tih mai loh chu"a ti sup a. Ka nui hak. Mut hmain ka tifai a, ka inthiar feltir bawk. Ka chau ve deuh nge ka muttui viau mai. Sundayah hi chuan Kimtea a inkhawm ṭhin a, ka û a hetih tak hnu, Pathian laka ka vui hnu hi chuan kohhran lam chu hlamchhiah hneh tak ka ni. Tu khaw khain min hre lo bawk a; a zia viau. Bakah ka û enkawl a ngai ve tho nen. In ka tifel rak rak a, U Rini a lo lut hlawl mai. Rawn teiluh nawlh chang hi a nei ve ṭhin. Ka lo be ve sawk sawk a, ka û lam a en daih, "I zia zel em? " A ti a. Ka û chu a lo bu nghut. 

Chutah ka lam rawn hawi lehin, "May, i hnathawhna chu a nuam bawk maw? Sangbera inah i lo thawk reng a, mak ka ti tawp" a ti siam siam a. 

"Umm, nuam a ni mai. I hria mi? Ka pu chu" ka lo ti hû. 

Nui sak chungin, "College kan kal ho ṭhin alawm,. A luck thei tawp. Kan ni ve hman ṭêp alawm, mahse, kan pa hlui hian mi zar hneh lutuk a, ka hnar thei ta lo alawm" a ti a, a nui zui hawk hawk bawk. 

"A nih chu,. In in hnuai kan luah tih hria se i chanchin min zawt ngei ngei ang" ka ti ve vat a. 

"Aa..min hre duh tawh lo tawp ang,. An milian tawh a. Bakah Sangbera chu sumdawn a thiam bakah a taima êm a, hlawhtling tlak pawh a ni " a ti duah a. 

"Eng nge a sumdawnna ber hi le.." ka lo ti hû. Mawl min tih hmel fê hian, "A va mak mai mai tak, chung em emte chu hre ve ta che. Englo, a nau hi kut themthiam zet mai a nia, furniture lam a khawih a, chung bungrua te chu state pawn leh ramchhungah a thawnchhuak ṭhin a. Mahse, tunah chuan a nau kutah a dah tawh an tiin ka hria, tunah tak hi chuan foreign lam dawrin thawmhnaw lam a khawih tawh an ti" a ti leh mawlh mawlh a. U Rini zarah ka bengvar ve leh ta sawt e. Thingpui te ka lum a, kan inho laiin Kimtea leh a ṭhianpa ve ber kan thenawm lawk ami Tetea te an rawn haw a. 

"Ate, Tetea te nen kan leng ve lawk dawn aw. Kan kal hla lovang" a rawn ti lut nghal. An râwlthar chho ve ṭan a, ngaihtuah an na thei si. Mahse, sunday te a ni bawk a tiin ka remtihsak a. No ka sil zo ka kut ka hruk hul laiin Sangbera'n min lo call teh hlawl a. Sangbera hi kei aiin a û viau naa, amah ka biak hian ka la mawl biak a, hetia ka sawi hi chuan ka û lo mai ang. 

"May, nizanah Dinga nen in inhnial deuh em ni?" A rawn ti teh ngawt a. Ka bangbo deuh. 

"A awihawm loh e" ka ti fân raih.

"Remruati'n min rawn bia a, Dinga a lungawi vak lo tih a sawi a. Eng nge thleng ka hre duh mai mai mawle" a rawn tih chuan, "A zak lo e a. Amah kha a ngeiawm êm anih kha, kan ina zu in min dil a, ka phal lo a nih kha" ka ti ram hmak a. A thaw hawk ri chu ka hrereng. 

"Ok, ka hrethiam e. I û a ṭha em?" A rawn ti tehdaih a. 

A ṭhat thu ka hrilh a, kan inbiakna kan titawp zui. Dinga chu ka va ngei tak. Ka hmu leh ang tih ka hlau. U Rini haw hnu lawkah a chhang chiah an mipa neihchhun Mka a rawn chhuk ve leh a. Ani hi sawi tawh angin engmah a ti ngai lo va, ina awma games khelh hi a hna ber ni maiin ka hria. An duat ve bawk nen,. A hmel pawh a chhe hran lo, mahse, a zawi êm êm thung. Rawn lenluh hi a hrat thar a, zanah phei chuan darkar khat tal a rawn leng ziah. Ka ning hran lo va, ka nel em em lo bawk. 

"Lal May, sundayah te hian leng chhuak ve thin la, inpenparh ve rawh. Tawm reng ringawt mai, Puia pawh ngaihtuahawm em em a nih loh hi" a ti vei hluk hluk a. 

"Ka peih lo" ka lo ti hmuk. Thingpui ka siamsak ve a. "Nizan ka thu chhiar kha tak tak a nih chuan thla tharah khian German doctor thiam deuh a rawn kal dawn an tia, Puia pawh hi entir ve hrim hrim u la a ṭha ang" a ti luam a. Ka bengverh zawng tak a ni. 

"A ni maw? Entir ve tur a nih chu.." ka lo ti hlut. 

Ka û chuan zawi sup hian, "Beidawnna mai mai" a lo ti a. Mahse, ka intiphur lui a,"Chutiangin ngai suh, eng a nih loh pawn ngai awh a ni mai a. Pan ve hrim hrim kha a tha alawm" ka lo ti thung. A ngawi ta reng a, a pindanah a lut zui daih. Hetianga a mood a chhiat hi chuan chimbuai loh a him ber tih ka hria a, ka umzui duh lo. 

Mka'n Instagramah Account min siamsak ve a, facebook ac ka nei tawh bawk. Mka haw hnu chuan Sangbera stalk ka châk tlat pek a, ka zawng risk vak vak. Sangbera tia ka zawn chuan a lo tlar thla dul mai a, a tuamah a hmel ang pu an awm si lo. Malsawmdawnga ka search thul..a tawpa tawpah Sawm_dawnga tiin ka hmu ta a. Ka follow ngam ta chuang lo. Mahse, a thlalak te chu ka en ta tho va, a dah tam lem lo. Smart taka a incheina deuh vek,. Remruati nen an thlalak pahnih a dah tel bawk. Caption chu ka'n chhiar vel kher a! 'With my good girl' tih ve ve a dah. An thlalak dunnaah chuan Remruati kawngah kuahin Remruati'n a darah a lu a han nghat bawk. An inhmeh dun sia, ṭhiante han nih ka ti rilru a. Ka ngaihtuahna atthlak leh mawlmang zet chu Kimtea lo haw thawmin a rawn chhilhbo ta a. Ka nau rawn pai lut khat khat leh hmai sen vek chu mak ti zet hian ka lo melh hû..

Ṭhutthlengah chuan a mu thal der a, thei leh thei lo hian, 'Ka luak a chhuak' a ti ṭuau bawk. 

"Kima, Kimte, hei ti nge hetia i awm a?" Tiin ka sawi nawk nawk. A rawn meng a ruai a, "U Peka te lawm, min in luihtir a nih kha" a ti nuah nuah. Zu rim lah chu a nam nasa si, ka kaitho lawk a, bathroomah hruaiin "Luak rawh" ka ti nghek. A luak ta bawrh bawrh a, a lute ka leih huh a, a chauin a zawi ngei mai. Tlema a rawn harhfim deuh hnu chuan, "Thil awmze diktak sawi rawh le" ka ti a, ka thinrimna ka thup hram hram a ni. Ka û pawh a rawn inkhalh chhuak a, mak a tih ve hmel hle. 

Chauh hmel deuh hian, "Ih, Tetea leh Hmuaka te nen kan leng kha, Hmuaka putea te motorah kan chuang ve a. Hmun reh ve deuhah min hruai a, zu kha in ru an ti tlat a. U Peka'n, 'A in lo chu kan hawsan bakah ka hnek ang' a tia. Kan hlau sia, kan in a.." a ti ta a. Ka hrawkah hnawhtu a awm avangin ka ṭawng thei lawk lo. Mai mai chuan aw..

Ka û min kohzui lawm lawmna pawh hrechang tawh lo chuan Tetea te in hnuai luahtu Peka te in chu ka pan ta nal nal. Peka chu ka û nen an inrual vel awm e. Mi nghal tak, kei pawn ka biak ṭhat peih loh, amah aia upa te kawm ṭhin, insual pawh hrat tak a ni. An kawta Tetea û nula lo ding chuan min lo be nghal var a, "May, Kimtea a rawn rui haw ve em?" A ti a. Ka bu nghat, "Peka khu a awm em?" Ka ti a. 

"Awm ang, ani pawh a rui" a ti ringawt. Step chu ka zawh nghal, an kawngka a lo inhawnsa avangin kik khawmawi lovin ka lut thâwr..Peka te hi a nu hova khawsa an nia. A farnu pakhat hi Nu Zuali dawrah a thawk ve nghe nghe. A nau rawngbawl mêk bulah chuan, "Peka hi khaw nge?" Ka ti chang fak a. 

Mak tih hmel deuh hian, "A mu a..ti nge?" A ti a, a ṭi deuh dûkin ka hria. 

"Min va kaihthawhsak teh a. Ka be duh" ka ti leh hmiah. Mi hmai êng zahna ka bosal tawh hle, ka thinrim êm a ni. A û chu a va kaitho a, phun bul bul chungin a rawn tho ve mai a. Min hmuh chuan pawr zet hian, "Eng nge a?" A ti khur khur. 

"Engvangin nge ka naute zu i lo in luihtir a? I va zaktheilo ve,. Ka lawm lo teh mai a nia. Ka report dawn che tih hre rawh" ka ti ve ta khar khar a. Elsen zeta min nuih hnuah, "I ngam chuan min report la, nangni thingtlang aṭanga rawn pem, nu leh pa pawh nei tawh lo, kal thei tawh lo û nei bawk..ve mai mai a che" a ti ta zêk a. A nau chu kil khatah a lo ding khawng reng. 

Ka sa chhuak vek thei, ka pan hnai set sawt a, "Hmela le! I va rapthlak ve..i.hre mai ang, ka ngam leh ngam loh chu..i lo en dawn nia"ka ti sak sak a. Ka beksamah a rawn kek lawp, a nau a ṭe nghal tuarh. Kei lah tlawm tum bik ta lo chuan a sam balh hmel zet, buk zetah chuan ka kek ve nghal chat. Kan insual chu a ni ta reng mai. Kan rik tak luai luaiah chuan a nau chuan midang a han ko nge, Tetea pain min rawn kuah bet a,min hruaichhuak ta a ni. Zu a rui zawi bawk nen, min khawih hman vak lo, ka sam erawh a pheng ve deuh..an in tualah kan dingkhawm laih a, thil awmzia sawi ka tum lai mêkin in hnuai aṭang chuan Peka chu chemte sei reng ruang hum chungin a rawn tlanchhuak a, kan darh deuh hak, min rawn pan ding lai takin tu emaw hian Peka chu va hnaihchilhin a beng ṭhuai a, a tlu hnawk mai. A chemte kenna kut chu zuk rapbetin a hum nghet zo ta lo va, chemte chu a zuk chhar ta daih. A rawn hawilet chuan maktiin ka meng bial kâwk. Sangber a ni tlat! Min rawn pan a, zaidam hmel zet hian, "Tirawh, ka hruai haw ang che. A tina lovang che" a ti dam thlup a. Chechâng lovin ka lo melh kuau ringawt. Ka kutah kaiin kan in lam min panpui ta daih a, lo awm vete pawh chu an phâwk hle hlawmin ka hria. Kan in kan thlen thlak rualin U Rini leh Terini te an rawn chhuk ve zat bawk. Kimtea chu a lo muhil bawrh bawrh mai, hauh hrep chi lah a ni si lo. Sangbera chuan min ṭhuttir a, "Eng nge thleng?" Thuneih hmel fê hian a ti a. 

Ka ngawih rei deuh vang nge ka û chuan thil awmzia chu a rawn sawi ta mawlh mawlh a. Sangbera hmel rum sawt chu ka hmu thei. U Rini lah chuan, "Sangber, i dam maw? Ka hmu hlawl che chu mak ka ti.." a lo ti ve sek. 

Sangbera chuan melh zawkin, "Ka dam alawm..nia, kan inhmu leh chu a lawmawm e" a ti ve mai a. Keimah min rawn en leh daih, "Kha naupang lakah khan eng nge tih i va tum reng reng? Rilru fim tak hman hun a ni zawk asin" a ti dam thlup a. 

"Ka thinrim êm alawm, a sual hrim hrim..insual a hrat si" ka ti hmuar hmuar. Ka thinrim a la reh chiah si lo. Zaidam deuh hian a khi suk a, "I va huai reng reng ve" a tih chuan ka melh râm râm a, "Huai lam a nih loh chu" ka ti vin ṭhak. A che hrut a, ka û lam chu hawi lehin, "Sangbera ka nia, hei i nau hnathawhna hi..he lamah ka rawn kal remchang sia, ka rawn tlawh che u a nih hi, i dam ṭha zel em?" Nelawm takin a ti leh daih a. Ka û chuan, "Umm ka hria che alawm, hei ka ṭha ve zel e. I tilawmawm lutuk, ka nau i lo chhawr duh a" a lo ti ve luam. 

"Ka rawn kal hun erawh a fuh chiah lo a nih hmel" min rawn thlek zauh chungin a ti a. Ka lo nerkhum vak ringawt. A ding hluai a, "Ka haw phawt ang, May, khatin mipa sual tawh suh aw. Naktukah ka lo beisei ang che" a ti nghut a. Hrilhhai zeta ka melh reng laiin a chhuak daih. U Rini nen pawh an inbe leh tawh lem lo. An enzui ve vung vung ringawt. A chhuah fel hnuah Peka chungchang chu kan sawi leh a,. "FIR thehluh ka duh" ka tih chuan, ka û-in, "Insûm rawh. A vawikhatna te a nia, a thleng nawn leh a nih chuan kan che ve ang" a lo ti a. 

Terini'n, "A thuhrimin Kimtea te pawh tleirawl an ni ve tawh a, zu in luihtir theih an ni dawn em mawni le" a lo ti hlang hlang a. Ka melh hrâwk. 

"Peka sualzia i hria alawm" ka ti ringawt. 

Kan kawngka chu a rawn inhawng ṭhuai a, kan phu deuh zawk hlawm. Peka nu Nu Ziri a rawn lut a, a hmai sen vek danah a thinrim tih a lang. Engdang sawi set set lo hian, "Engvangin nge ka fapa i lo luhkhung a? Police hnena report-ah te i lo vau vel a, in dinhmun hre rawh. I zaktheilo reuh hle mai" a ti chang fak fak a, min melh kul bawk. Ka ding a, "Thil awmzia hrechiang hmasa phawt la a ṭha ang" ka ti sap. 

"Ka hre vek tawh. Peka'n engmah tihsual a nei lo, ka in chhungah ngei kut i lo thlak a. I rapthlakzia hi" a ti tâwn tâwn a. Amah hi ka hrechiang lutuk lo va, hetiang taka âng thei a nih pawh ka lo ringpha ngai lo. 

"Ka nau zu a in luihtir kha sual a ni lo a maw? A ngam zawng an nih vanga ruihhlo petu i fapa khan engmah a tisual lo a maw?" Ka ti ve ta hrep a. Ka û chuan, "May, duhtawk rawh. A tawk. Nu Zir, ka nau hi a thinrim a insûm zo lo deuh a, i lo hrethiam dawn nia. Mahse, khatiang thil kha thleng nawn tawh lo se kan duh e. " A lo ti dap dap a. Awrâwl vin pawh a hmang lo chungin Nu Ziri chuan, "Tlangval ve uaih tawh zu a in luihtir lovang, a hlau sawi tur hre loin Peka a puh mai mai a nih kha..in michhiatzia leh fahrahzia te hi hre ve rawh u, zahpuiawm lutuk" a ti hmuar hmuar a. Ka ṭawng hmain U Rini'n, "Khai a! Nu Zir, i mak hle mai a. Fahrahte hi duhthlanna a ni hleinem, an fahrah thu kha sawi kher a ngai lo..i ṭawng tam mah mah" a lo ti ve ta fak a,. U Rini hi chu nuthlawi phanchang tih takah mi hmai êng a zah vak lo a. Chutia a lo ṭawng ve chu ka lawm ru viau. 

Nui lui tih hriat zet hian Nu Ziri chu a nui lui kual a, "Vei tak che u hian aw..engpawhnise, Kan in chhunga kut hial rawn thlak ngamtu he nu lakah hian FIR ka thehlut maithei a ni, in lo hre ve mai mai dawn nia" a ti hlang hlang a. 

Nui ve sakin, "Ka lawm ngawt ang, thehlut ngei ngei ang che. " Ka ti ve ta hmak. Peka nau khan a nu chu a rawn ko va, an chhuak ta a. U Rini chuan, "An ni pawh tihtak êmah chuan hmeithai an nia, fahrah hmusit thei dinhmunah an ding hleinem, an fapa suahsualzia leh nghalzia pawh an hria, mahse, Peka saw an hlau tlat a, chuvang mai mai a nih kha" a ti nghat nghat a. 

Terini erawh chuan, "Nu te chuan fate chu an ṭan ve bawk ang chu..Kima te pawh chhuah tamtir tawh lo ula a ṭha a ni mai, chho ang" tiin a û a melh a. U Rini chuan min rawn enin, "Sangbera number kha whatsapp-ah min lo thawn ve teh aw" a ti a, ka bu nghat. An chho zui ve ta nghal a. Kimtea chuan zanriah pawh a ei peih lo. A chauin a zawi nguai mai a, ors te ka han leisak a, ka intir a. Mut dawnah a inbual bawk. Kamkhat mahin kan hau lo naa a inthlahrung hle tih ka hria. Zu ka huat êm avangin ka unau te hi chuan far khat pawh in ve lo se ka duh. 

A tukah thawh ka hai pek a! Thawh hlim aṭangin ka phe buai nghal char char. Ka û ka bual nî a ni bawk nen, ka hnaah pawh ka tlai hlek a ngai dawn a nih hi. In atanga ka chhuah chuan dar 9:30 a pel thuak tawh. Valtea nen ka hnathawhna lam chu kan pan ta a. Ka beisei loh deuhin Sangbera car a lo la awm. A kal daih tawh ka ring a nia. Ṭi ru deuhin ka lut a, Nu Buangi ka hmu mai bawk si lo. Ka bag ka dahfel hnuah insuk tur a awm leh awm loh ka va en nghal a, thawmhnaw tlem a lo awm. Bathroomah ka luhpui nghal. 

Ka insuk mawp mawp laiin Sangbera aw ka hre thut, ka phu chiang kher mai. Kawngka bulah a lo ding rûn a, "Koh i va hre thei lo ve" a ti hluk a. A lungawi chiah lo a nih hmel. 

"Tihpalh" ka ti vat a. 

"Chuan, i rawn tlai bawk a, engmah i rawn sawi bawk si lo" a ti leh hmuk a. Nuam lo ti deuhin "Nia, thawh ka hai a" ka ti sap. 

"A nih dawn kha" a ti ve ringawt. Ka insuk chhunzawm a, "I insuk zawhah ka kamiz i nawh a ngai aw" ti leh hmukin min kalsan ta a. A awmdan chu mak ka ti deuh, ti nge a thinrim ringawt le?! A pawi ka sawi awm ka hre si lova. A mood a fuh lo a niang. Ka insuk zawhah chuan a thawmhnaw pindanah lutin a kamiz hak tur a pawl tak nalh zet mai chu a lo dah lang vâ a, thawmhnaw nawh lam hi ka zei tehchiam lo. Mahse, ka tih ve theih mai chu ka ring. Uluk taka ka nawh laiin call ka dawng a, ka nî Luaii a ni. 

Teh tlat a ti rilru chung chuan ka la ta tho va. "Hei i pa Zaua farnu entira rawn kal a ngai a, keini nupa hi hruai turin min ti tlat sia, in inah kan rawn innghah mai loh chuan" a rawn ti nia! Ani hian a ni lawm ni ka û chetsualna pawh, "In phutawk" tia min hrilhtu kha..ka ner sak a, "A rem lovang. Mikhual thleng tlak kan ni lo ve" ka ti ve ta hmak. 

A chek hlak a, "I va mak reuh e, i nî ka nih hi,. Kan mamawh khât tehlul che u nen" a ti hlak hlak a. 

"Kan mamawh lai che uin in awm bik hleinem..Pa Zaua chhungte inah thleng mai r'u" ka ti ve tlat, ka dah zui ta bawk. Ka thiltihah inchhirna ka nei lo. Tikhan kan inrultawkah ka ngai e. Thil kang hmui rum rum ri ka hriat rual chuan ka hawikual vat, karei! Ka kamiz nawh lai mêk chu a lo kang chu niin, istiri ka lak kan chuan siamṭhat rual a ni tawh lo. Mangang zetin ka hawi ka hawi a, a mood a fuh loh sa nak alaia a kawr hak tur ka nawt kang tih hrilh tur chuan ka huaisen tawk lo a ni ber. Chutia hrilhhai zeta ka din khawng reng lai chuan a rawn lut zui! 

"I zo em?" A ti naa, a hnâr a lenkual bakah a kawr chu a rawn hmu ta si, na zeta min rawn melhin, "Kamiz i nawt thiam lo tih i sawi hmasa thei lo em ni?" A ti hriam hraih a. Ka zâm lutuk chu ka inhaw zawk. 

"Ka..ih, englo, call ka dawng a..chuan" ka tih mêk laiin, "He kamiz pawimawhzia hi nang tehlul khan i hrethiam pha chai nang..a ni em? " Tia rawn pen pâwk pâwkin a kamiz chu a la a. A kâng lai lah chu a hnung lam, a laihawl bawr lai tak a ni si. Mawl ka intiin engvanga istiri kha tung lo nge ka nih ka inhrethiam tawh lo, ka ni Lûaii ber kherin min lo call vangte pawh a niang e. 

"Ka tihpalh lutuk..ih, hetiang chiah hi ka leisak mai ang che" ka ti a. Ka aw a khur deuh. Min rawn melh kâwk a, ka melh rei ngam lo. 

"Hetiang chiah kawr hi i hmuh ka ring lo. " A ti bul hmuk a. Ka ngawi reng, a closet hawngin kamiz eng dal raih, daih hmel zet chu rawn khaichhuakin, "Kalsawn rawh. Bungraw ho va hrufai rawh" a ti leh hmuk a. Rang lutukin ka kalsawn nghal. Ka thaw a chham hman lek lek alawm le. 

A nawh zawha a rawn chhuah chuan, "Ka chhuak dawn a. I tihtur i tih zawhah in hi i kalh ang a, i haw thei ang. Chuan, engmah sawi lova tlai ka remti lo tih hre tawh bawk la,. Chabi spare chu ka khai khi.." a ti leh zung zung a, a hma ai chuan a nelawm ta deuh e. ka lo thaw hawk ringawt. 20 mins vel a va insiam a, a rawn chhuak leh chu melh loh a har, a nalhin a smart thlawt. Khawiah nge a kal dawn ka hre lo, ka zawt ngam hek lo. A phone hman lai te chuan ka lo melh leh zûk zuk ṭhin. 

"Ka rawn tlai lo vang. Bawihi, hlawhchham ka duh lo aw" a ti mawlh mawlh. Tu tak bia ang maw. A hman zawhah min rawn melh zawk a, "I duh chuan ka rualin i haw thei ang" a ti leh lawi a! Ka lâi kual vel vek. Tihtur a sawi chin ho ka ti zo tawh a, a in hi han tihfel ngai em em a awm lo bawk nen, hawn a remtih chuan tlai khat lek taxi fare save pawh a hlu ka ti si. 

"Aw rem i tih chuan" ṭawngkam hawihhawm ka hmang ve hram. Sir zawngin a khi suk chu ka va hmu thei. Min nuihzat em mawni le. Ka bag ka la a, kan inzuichhuak ta a. Nu Buangi te lo kal loh chhan ka zawt ngam si lo. A car hnung lam ka pan laiin, "Hetah a hmaah" a rawn ti nghut a. A thu zawm lo ngam hek lo le..a hmaah chuan ka ṭhu lut ta a. Ka lungphu ri ring lutukte chu a hriat ka hlau mang e. Kan tlanchhuak zui nghal a, a hmaa a hmel mûk leh tak rûn ang kha a pu tawh lo, a zangkhaiin eng emaw nghakhlel hmel a pu..hmalam melh ran chungin, "Piteii chu a nawmsam loh vangin ka chawlhtir a nih kha" ka zawh pawh ngai lo chuan a rawn ti ta a. 

"A va pawi ve, a eng nge nuam lo a?" Ka tawng dan chu a chaltlai ang tih ka hlau leh hnuhnawh.

"A khuasik" a ti leh tawp. Sawi leh tur a vâng ta khawp mai. 

"Nimina i insualpui pa kha i ngam tak tak em ni?" A ti ta daih a. Nui lui hram hramin, "Thinrim tawpah tuman engmah kan hlau ngai lo" ka ti sap a. 

"I kawlh hle mai" a ti duh lek. Tumah ka la insualpui ngai tawp si lo va. Ve ringawt chuan a. 

"U Rini khan a sawi che a" ka ti teh ngawt a, a ngawih dat avangin, "In nih ṭêp thu pawh a sawi" ka ti lehzel. Dakthei chan ka chang a ni ber e. Ka sawichhuah chhan pawh U Rini thusawi a dik reng em tih hriatchak vang lam ai mahin sawi tur hre si lo, sawi ve duh si ka nih vang niin ka hria. 

"I awih em?" A ti ta daih a, ka hrilhhai nasa. 

"Awih e" ka ti puat. 

A ngawi ta veng veng a, sawi leh mai tur lah ka hre si lo. Kan veng tawntirh kan thleng dawn a, "A la hma tho va, kawnah sawn ka lo chhuk ang" ka huaisenna zawng zawng sawmkhawmin ka ti ta a. 

"Aw le" a ti ve mai. Remchang laiah dingin ka chhuksan ta a. A tlanliam lai thlirzui pahin, "Tumlian" ka ti zui hlak. Kan in lam chu kein ka pan ta ngat ngat a, a la hla angreng si. 

Nu Zuali thingpui dawr thlen hma deuha dawr pakhat bul stepah chuan Peka leh a ṭhiante an lo ṭhu ṭhap a. Ka kalpelh dawn lai takin, "Thingtlangnu, khawi maw ₹100 chu.." Peka hian a rawn ti lûng lûng a. Hre lo niawm takin ka kal lui zel a. 

"Hey, i beng a chhêt a mi? Ding rawh. " Tih leh ka hmaa din a rawn rual a. Keipawh ka ding ve mai. Mi veivak an awm kal reng naa, min ngaihven awm pawn an lang lo. Mi hi kan buai tawh hlawm bawk nen. 

"Engvangin nge pawisa chu ka pek ngawt ang che" ka ti chang fak a. 

Thlek deuh hâw pahin, "Min rawn ânkhumna man kha mawle..vatin, kan indaih lo a nia" a ti leh a, zaktheilo hi ka'n ti ngawih ngawih khawp a! Za deuha nui hawk hawkin, "I â a nih chu..kal sawn teh" tih leh nêksawn ka rual a, ka kal zui nghal. A ṭhiante lah an rui deuh bual tawh si a, "Eu..hmeichhia a ngam dawn na nge?" An lo ti vel a. Peka lah fuihpawrh nuam tawk vela chhah a lo ni ve bawk nen, min rawn kuaiher sawk, mi veivak pawn min rawn ngaihven ṭan ta deuh. A kut chu paihthlain, "I va ninawm e. Nang hi cheng engzatmah pek che ka ba lo aw. " Ka ti fiak ṭhak a. 

"I ba ka tih chuan i ba a ni mai. Phawrh mai rawh" a ti leh tûn tûn a. Pa pakhat zahawm tak, palian lam deuh hi a rawn kal hnai a, "Buaina in nei em ni? Eng nge ni ta?" Awka nem tak hian a rawn ti ta a. Chuveleh Pekmawia chuan, "Ka bialnu nen kan inkarah rawn inrawlh ve suh" a lo ti nia. Ben chawrh ka va châk tak. 

"Ka bialpa a ni awzawng lo mai, mi zaktheilo, mi tenawm a nih hi, ka pu, ka lawm e" ti sawk sawkin ka kal nal nal. Ka thinrim thar ngei mai. In ka thleng pawh ka ri deuh sawk sawk a niang, ka ûin min zawt ta nghe nghe. Ka inthiam ta lo chu ka han nui leh rih. Kimtea pawh chau chung chungin school a kal ve kha a nia, vawiin chu ka haw hma bawk a tiin kan in chu ka siksâwi e ka tia. Ṭhutthleng leh eng ilo te hi han rem danglam ve ila, in thar chante hi a chang ve thei a nia. 

Zanriah ei hma deuhin U Rini'n phuihnam tlak min lo suah a, tui ka tih pawl tak a ni ve. A ṭhu khawmuang ve a, "Sangbera nen chuan kan inbe leh a, a zia a lo la paih lo khawp mai. " A ti ham ham a. Ngaihven hûrh anga lan hreh ru siin, "Eh..chu ni leh daih ula" ka lo ti a. Nui chungin, "Aa..keini ang nuthlawi te chu min iai ang, nula chhelo fe fe a hmu hnem dawn sia, mahse, maw May, min biak danah khan min haw vak lo chuan a lang" a ti leh sar sar a. 

"A lerh vak lo a niang, nula pakhat bak a la rawn kal lo, chupawh a ṭhiannu" ka lo ti ve a. 

"Remruati kha maw..ka hria alawm. College kan kal ho vek zel a, Remruati leh Sangbera ṭhianpa Alexa an inkawp ṭhin a. Alexa kha vanduaithlak deuhin motor accident vangin a boral ta sia, Sangbera hian a thianpa bialnu chu tiin a ngaihsak em em a, an inkawmngeih phah ta viau a nih hmel.." a ti mawlh mawlh a. Ka hriat ngai loh ka hre thar leh ta. 

Ka û lo ṭhu ve reng chuan, "A nih Rini, eng nge an chhungkaw lam chanchin te i hre mial em?" A lo ti ve a. 

U Rini chuan a ṭhut dan siamrem sauh sauhin, "Umm, hre ve nel nual ti ila ka hriatna pawh Sangbera te ṭhenawm lawkah hian ka ṭhiannu a awm a, chumi min hrilh chu a nia. A sawi danin Sangbera nu kha an nu tak a lo ni lo. Tin, an farnu Teberi pawh kha Sangbera pa fabîk a lo nia! A pa a boral tawh a, a boral hnu lawkah a nu kha in aṭanga chhuakin a nau nen an pa hnutchhiah inah an khawsa a. Sangbera te chu, An unau thumin an awm zui ta a. Sangbera nau mipain nupui a nei a, Chuan, Teberi pawn pasal nei ve lehin, Sangbera chuan a naute chhungkua chimbuai duh loin tuna a awmna hi a lei ta a tia. Tisawn amahtêin a khawsa ve chu a nia. Nupui nei rual chu a ni ve tawh reng mawle.." a ti ta dap dap a. Sangbera chanchin ka hriat belh zel chuan ka awm a tinuam ve ringawt. A dik alawm, mahni hnathawhna chanchin hriatchian loh chuan ṭawngsual te hi a hlauhawm duh riau. 

Kimtea lehkha zir hlanin ka û ka hru fai a. A ngawih vung vung hnuah, "May, ka lo thi ta a nih pawhin Kimtea hi thlahthlam miah suh aw. Ka nu thuchah kha hrereng la" a ti ta ringawt a. Bangbo leh hrilhhai ru deuh hian, "Chutiangte sawi a ngai mi? Sawi tawh suh, i thih kan phal reng reng lo. German doctor pawh a lo kal ṭêp ang" ka ti ve ngial a. 

A nui hul hak, "Ka nu ka mumangah ka hmu zing riau a, ka ngaihte a ṭha lo lek lek ṭhin. " A ti leh daih. Mumanga mitthi tawh hmuh chu thil pangngaiah ka lo ngai mai a, ka û erawh a rilru a lo buai ru hle a nih hmel. A mut hnu lawkah keipawh ka hmaite ka phih a, mi hausa fanu ni ve ta lo chu skin care tih vel hian rilru a luah pha mang lo va, U Sangi zawrh day leh night cream bakah sunscreen ka hmang ve a, ka duhtawk viau mai. Tin, tu el maha ka inchei a ngai lo bawk nen. 

Ka mu tur khum ka lawnkai chiah tihin Sangbera'n min lo call a, makti ru deuhin ka la. 

"I mu tawh em?" A rawn ti sup a. 

"Mu dawn chiah, eng nge ni ta?" Ka ti hliai. 

"Inah maw i awm?" A ti leh kher a, "Inah lo khaw nge ka awm ang a?" Ka aw chuan ngaihno a bei vak lovin ka hria. 

A nui hak a, "A that chu..naktukah rawn tlai suh ang che" a ti a. Ka ṭawng hmain a dah daih. A awmzia pawh ka hre mai mai lo ve a. Ka vannei a, muthilh theih loh hi ka nei vak ngai lo, ka la upa lo bawk a. Ka muhil chuan Sangbera ka mumangah ka la hmu zui,. Thlan vûng thar deuhah hian a lo ding a, a lungngaih hmel takzet. A kawrah te chuan thisen a lo kai nuaih bawk si, ka lo thlir reng a, a phun sûp sup a, a thusawi chu ngaihthlak chian tumin ka va hnaih a, "Min ngaidam ang che" tih thu chiah ka hre thei. Kan sazu nghal zet kawlin choka bungbel a tihtlak rum rum avangin ka harh ta hlawl a. Thawh phan pawh nei lovin ka tho ṭhem ṭhem a, he sazu nghal uchuak lutuk hi a hneawm êm a ni. Mahse, ka va hmu hman ta chuang lo. Ka zung nghal a, ka zung zo kan pindana luh leh mai ka tum lai takin ka û pindan kawngka inkhar phui lo karah chuan khum bula a chair-a ngawi renga a lo thu hi ka va hmu ta a. Ka ding chawt. Ti nge tun ang zan rei tawhah a la men le? Ka va lut mai dawn em niang tihte ka ngaihtuah a, mahse, ka tibuai ang tih ka hlau bawk si. Ka pindan lam ka pansan ta ngawt a, rilru erawh a nuam ta lo hle. 

A tukah mut kham lo ru deuhin ka tho va, khawsak ka rel nghal zung zung. Tlai tawh loh hram ka duh ve bawk nen. Ka chhuah dawn chuan ka û bulah, "Lo ṭha rawh aw. Ka ngaihtuah che a nia" ka ti ta tawp a. Ka rilru a tinuam lo êm a ni. 

"Ka ṭha reng alawm, min ngaihtuah suh..rilru nuam deuhin va awm rawh" a ti dam thlap a. Ka chhuahsan ta. Sangbera in ka thlen chuan dar 9 a ri vel chiah chiah. Nu Buangi a lo awm tawh a, ka hmu chu ka hlim angreng. Nilênga kawm tur awm lova hnathawh ngawt chu a ninawm duh ve êm a ni. 

Tukverh darthlalang ka nawh laiin chhuak tur niawm takin Sangbera pawh a pindan aṭangin a rawn chhuak a, nimin lam ai ngawt chuan a hmel hmuh a nuam ta deuh e. 

"May, vawiin chu pangpar ho saw lo ngaihven rawh aw" a rawn ti a. Ka bu nghat. 

Nu Buangi'n, "Nizan ami kha rawn kal leh ta se engtin nge kan tih ang?" A lo ti zauh a. 

Ngaihpawimawh loh hmel zet hian, "Ka awm loh thu in sawi mai ang chu..a awm rei peih tawp nang" a ti liam puat. Tu tak va kal ang maw? 

A kal hnu reivakloah Nu Buangi'n, "May bawih, chawl rih rawh, nilêng hun i nei alawm. Hawh hei ser hi bâwl ila ei teh ang, ka damkawr hian ka râwp tlat" a rawn ti lang lâng a. Keipawh chuan ka hnial ta lo, thei ngaina mi ka ni ve bawk a. Thei hmingpu hi chu an hel lai ngei nise, thur ngei ngei bawk se ka duh. Ser chu aman a bâwl a, ka chil a lo pût vel. 

Ka hriat châk ve êm avangin zah pawh dawn loin, "Nizanah lo kal an awm mi?" Ka ti ta pawp a. Min rawn melh zawkin a ser a buaipui leh nghal daih, "Awm chiang e. Nula nge nuthlawi nge mi nu nge pawh ka hre lo. Boruak a rawn ngam teh asin" a ti ta mai a. Ka rindansa ni tho mah se, a sawi dan velah chuan chu nu chu a zahtheih loh hmel viau. 

"A hmelhriat chu a ni sia" ka ti leh zauh. 

"Umm, an lo inhre ve tawh thin niawm tak a ni. Rawn riahte kha a tum ut ut a, pu a chebuai ṭhelh alawm" a ti a. 

"A van mak" ka ti ringawt. 

"Mak hleinem, tunlai mihringte chuan zah an hre tawh lo. Amaha khawsa a nih avang hian an zuam ve bawk a, mahse, tumah an la hlawhtling lo chu a nih hi.." a ti duah a. Ser chu kan ei dun nghal. 

"Ti nge nupui hi neih a tum lo mi le?" Ka ti hû a. Ka rilru diktak pawh a ni. 

A nui hawk hawk a, "I sawi dan teh bawl chu aw..ka hre bik lo, âa..a hun kal tawhah thil rapthlak tak a tawng tawh tlat a..Zodini kha chu la dam se.." a ti a, a chawl daih. A sawi loh tur chin sawi niawm takin mahni inthiam lo hmel a pu bawk. Zawh luih êm chu ka ngam bik si lo. "A va pawi ve" ka ti sep ringawt. 

Thudang hlir a sawi ta a, an pa pheikhawk bun uih ṭhin a ninzia leh tihrehna tur a duhzia te, Teberi felzia leh an monu Mami nen laizawn ang mai an nih thu te..a tam mai. Mahse, ka tan thil thar vek an ni bawk a, ngaihthlak a hrehawm hran loh. Pu ber min chah angin darthlalang ka nawh zawhah pawnah chhuakin pamgpar te chu ka en kual ta a, a ṭang thliah ṭhen ngai te, tui pek ngai te ka tih leh vek hnuah a lum deuh avangin pool sirah ṭhuin ka ke chu tuiah ka zu chiah a. Tui hleuh hi ka thiam loh avangin ka khup thleng ka dai hian ka duhtawk viau. Nu Buangi thil sawi, a chhunzawm duh tak loh kha ka tum loh tawpin ka ngaihtuah zui reng lehnghal. Mi chanchin ngaihvena buai hman pawh ka nih loh tehreng nen..mahse, rin dan ka nei ve deuh, Sangbera chu a bialnuin a thihsan tawh tih chu thil chiangsa a ni. Chumi avang chuan a inkharkhip ve ta tihna a ni thei maithei..ka lu thing nar narin, "Eng nge i buai ve vak a..may.." ka inti a. In chhungah ka lut ta daih. 

Ka tihtur ka zo ta bawk a, haw turin ka intintuah mêk..Sangbera a rawn haw a, a hma ve hle mai. "Ka haw tawh mai dawn asin" ka lo ti var a. 

"Umm, fimkhur la" a ti nghut. Ka phone a rik avangin ka ding leh dat a. U Rini a ni. "Hello" ka ti satliah a. 

"May, lo haw vat teh, i û kan kaitho zo lo a nia" a rawn ti ta a..ka phone ka thlauh tawp. 

"Hey, May,. May, i ṭha em? Hawh le, ka hruai haw ang che. Engkim a ṭha vek ang. I ṭha aw.." tia min be mawlh mawlhtu Sangbera chu ka melh ngat ngat, .ka rilru erawh a mang vek thung si. Ka chechâng thei dêr lo bawk. Ka inrin hmain min pawm kang lawp a, a motorah min pawm lut ta a. Ka tal buai lo va, engtinmah ka awm lo tawp. Driver seat-ah rawn ṭhu lutin, "Vanduainu" a tih sup chu ka hre thei. Chak zeta khalhin kan in lam min panpui a. Kei erawh ka mit ka chhing tlat..May-i hi piang ve lo tur a lo ni a niang e. Khawvel hi a tan a nuam lo êm mai..reitak ka lo auh tawh loh leh ka dem em em chu ka ko leh ta. "Lalpa, a thi a nih chuan..keipawh ka thi ve ang" tiin.