Sangbera 2

SANGBERA..(2)

Ziaktu : Toni Râlte

Zum angreng tak hian, "Zoremmawii ka nia, May tiin min ko ṭhin" ka ti sap a. 

A thaw hak ri ka hre nghal, "Aw le, a ṭha e. Engtikah nge i rawn kal theih ang?" A rawn ti ta mai, ka inring hman chiah lo. 

"Aa..ih, englo ka nau chu ka hruai tel thei ang em?" Ka ti bah nak a. 

"Thei turah ngai ang aw, in chhungkaw dinhmun tlem azawng ka lo hre tawh a." A rawn tih chuan ka thaw huai mai. 

"Aw le, U Sangi te rualin lo phei kan tum ang" ka ti ta tawp a, ka pain a thu a sût leh a nih loh chuan Thawhṭan zingah kan khua aṭangin Aizawl kan pan thei turah ngai ang. U Sangi te inah kan innghat ang a, chuta ṭang chuan ka awmna tur chuan min lo hruai dawn niawm tak a ni. U Sangi lo awm remchang chu a lawmawm takzet a ni, tin, min lainattu a ni hi ka lawm lehzel bawk. Ka pa bulah pawh ka sawi a, engmah a sawi nawi lo. Ka nuhrawn erawh chuan Aizawlah kan awm dawn leh dawn loh pawh a ngaihven lem lo. A pawi hran lo e. Sunday a rawn thleng a, ka insiam ru tan deuh. Ka û pawh chuan, "Va kal u la, keipawh ka la rawn kal ve daih maithei a ni. Sawi tawh ang khan kan nuhrawn lal hrawt lutuk tur hi kei talin ka ven ve a ngai sia" a ti ve mawlh mawlh. Nia, keipawh ka ngaihdan chiah a ni. Kan unaua kan kal bo vek chuan ka pa hian zan khat mitchhin pawh lo tawk se, ka nuhrawn hian engkim ruh vek a tum dawn tih kan hai lo. Tibuai tur hrim hrima ka û chu a awm a ngai. Chawhnuah Kimtea thawmhnaw ka thlehfel mêk laiin Ka û lengchhuak hi hmanhmawh zetin a rawn tlan lut a. 

"May, ka pa nikhaw hre lovin a awm" a rawn ti ta mai. Ka hamhaih atalângin ṭawng mai nachang pawh ka hre lo. Ṭhenawm an rawn lut sap sap a, ka la bangbo hû thung. Pa Thara'n, "Puia, i pa chuan mihring a tling zo tawh lo a nih chu..tunah an rawn pheipui dawn e.." a ti ta a. Ka thaw a tâwp mai dawnin ka lo hria. Engvangin nge ka pa chu a thih ka hre bawk si lo. Ka mawl hûih a, ka mang vek. Nula tlangval an rawn lut sap sap a, kan in chu an rawn singsa mawlh mawlh. Kimtea thawmhnaw la pawm ṭûn chung chuan an chevel chu ka lo thlir reng ringawt. Ka û erawh mipa ta na nâ na chu a patling thei viau. Kar lovah ka pa ruang chu an rawn zawn lut ta a, an zalh ta zân mai. Ruang kil nachâng pawh ka hre lo. Ka la ding khawng reng chu U Sangi hian min rawn kuahin, "May, i ṭha em? Khawi maw heng hi ka lo dah ṭha ang" a ti sawk sawk. 

Khum bulah min ṭhutpui a, ka mittui far khat pawh a tla lo. Kimtea pawh ka bulah a rawn ṭhu a, a inhnit faih faih. Ka û pawh a ṭap chuang lo. Ka nuhrawnte nufa an rawn lut ta a, a rawn tap lut hawm hawm mai. Ka pa chu a bawh a, "Min va tihrilhhai êm..Paa, engtin nge i tel lovin kan awm tak ang?" Tiin a au tuar tuar. Ka thêngthâwngah a thawk thei meuh lo. Kan vanduaina kal tluang lutuk hi Pathian siam pawh kan ni chiah lo em mawni le..thinlung hi a va rit ṭhin êm. 

Mipui sahâwk reh deuh hnuah a va tluk luhna in neitupa Upa Zakhama a rawn ding ta a. A tarmit chawi chhoh zauh pahin, "Aw le, hei vawiinah rin loh takin Puia pain min peih lohsan thut mai chu a nia,. Ka awm a nawm chiah loh deuh avangin chawhnu inkhawm pawh ka kal ta lo kha a nia. Dar 2 bawr velah khan kan kawtah hei Dina nen hian an rawn inkuah phei hnâwp hnâwp mai a, tukverh atangin, "Kha khawilamah nge?" Ka va ti chu Dina chuan mangan hmel deuh hian, "Hei, Ngura hi a thaw a hah riau mai a, hawnpui ka tum a nih hi" a ti a. Ngura hmel ka han en chuan a thaw a hah bakah na tuar hmel a put avangin ka ngaihṭha ta vak lo chuan ka ko lut ta a. Kan han muttir a, tui ten a lu te kan han tihuh a, a thaw kâwk kâwk reng mai. A mitmeng pawh dik lova ka hriat tak avangin Dina chu midang pun turin ka tir ta a, tiang khan kan han bâwihsawm chho a, damdawi in panpui kan tum mêk laiin a rawn khuh ṭhawt ṭhawt a, "Ka âwmah hian a hnawh.." tih chiah a sawi hman. A zawi nghal hnawk a, min peih lohsan chu a ni ta mai. A pawi kan tiin, Dina tak phei chu a hrilhhai viau nghe nghe. Engpawh nisela, kan hriat angin Puia pa nundan hre lo kan awm lovang a, tlem lai deuh pawh khan a taksa lam harsatna avangin ka bial fang khan ka kawm tawh nghe nghe a. Amaherawhchu, a taksain a huat em em zu a thlah thei si lo va, hetiang hi kan thleng ta chu a nia..mahni inenfiah nan hmang ta ṭheuh ila a duhawm khawp ang. Pathian hmaah ṭawngṭaiin i kun ang u" a ti dap dap a, a ṭawngṭai zui ta bawk. 

Ka pa thih dan chu ka hre ta phawt a, ka tan pa ṭha leh entawntlak ni lo mahse, a thihdan tehthut chuan min ṭhawng lo thei bik lo. Nia, Kan upa khan a sawi dik, a insawiselna a rei tawh nen, pum damdawi ama inchawh chawp a ei ringawt a, zu a thlah duh chuang si lo va, a chhungte pawn kan dawmhlum lohin a kal ta. Ka nu thihna ka tawrh angin ka tuar ve thei lo. In duh chuan min dem mai teh u,. Mihring sakhat, lungpui ang maia sak thinlung neitu ka ni tawh miau a. Ka pa ruang chungah chuan ka mittui far khat pawh a far ta lo. Min hrechiangtu te chuan mak an tih pawh ka ring hran love.

Ka pa thih sarhu lai chuan mi an ṭhain inleng kan nei kal reng a, khawhar hman pawhin kan awm meuh lo. Aizawl lama ka awmna tur kha thil awmzia hrilhin ani pawn min lo hrethiam viau. Ka tana lawmawm em em turin, "Nakinah buaina in tawk a niha he lama rawn awm in tum a nih chuan, hnathawk ka lo la tawh a nih pawhin inthlahrung lovin min lo be dawn nia" a rawn ti thlap. A aw chauh pawh thlamuanpui tham a nih tawh tehlul nen, min khawngaihtu kan neih belh leh chuan rilru a tinuam viau. Ka pa thih aṭanga thla 2 a vei awrh tihin ro chungchangah ka nuhrawn chu a buai ta chiah a. Ka pa lahin engmah ziakin a lo dahfel bawk si lo. An office lamah a kal zut reng mai a, ka pa ai luh ve chu a tum nasa, mahse, a qualificationin a phak ngang si lo. A pension hlawh erawh a chang thei dawn a niawm e. Pasal a nei a nih erawh chuan keiman pasal ka neih hma ka chang thung ang. In leh lo pawh neih a tum khawp mai a, ka û nen an intâwng ta fô mai. Ka û-in tawlh a tum bik der si lo. "Kan theih chen chen kan khawsa ho ang a, kan hun tawn azirin in leh lo luahtu tur chu a chiang mai ang" a ti mauh mai a. Ka pa nupui erawh chuan aman neiha kan unaua min chhuahtir a tum thung si. Lohtheih loh avangin ka pa chhungte kan pun lo thei ta lo. Ka pain ka nu a thlauhthla leh nupui a neih nghal vat avang khan ka pa unaute chu an lawm lo viau a, ngaihsak pawh an ngaihsak zui ta vak lo kha a nia. Mahse, tihian amah ber a boral takah chuan a nupui kuta in leh lo dah chu an lo duh lo ve nasa mai a, ka nu nena an lo din kha a lo ni bawk nen. Ka pa unau tlema thiltithei deuhte chuan office lam dawrin theihtawp an chhuah zui ve ta a. Mahse, beih vak a ngai ta lo. Ka pa mitmu êm pawh a keh hmain ka nuhrawn chuan pasal a um ta daih mai a! Thaw a veng ta huai mai. A pasal um lah chu an chhungte emaw kan tih mai, kan inah pawh rawn chuangkai reng reng thin kha a la ni zui a! Ka pa kha an lo thlim fê tawh a ni maithei. Pasal a um tak si-ah chuan ka pa pension pawh ka kutah a awm thei turah ka ngai a, mahse, kan rin angin thil a lo awlsam lem lo. Ka nuhrawn leh a pasal um chuan "Man leh mual kan inhlan lo va, nupa kan ni lo" an ti ta tlat mai le. Ka pa unaute lamin an han beih ve paw'n pasal nei a ni miau si lo va, ka pa pension chu kan hum zo ta lo. Mahse, beidawn loh erawh kan tum. Tunah chuan rikrâpna tel tawh lohna hmun kan inah kan unau thumtêin kan khawsa ve ta rak rak a. Mahse, kan hlim a, kan zalên a ni. Aizawl awm lam pawh kan ngaihtua zui ta meuh lo. Ka û a puitling sawt a, keipawh ka kum phû lohin ka puitling ve chuan ka hria. Ka û chu a inhlawh theihna ang angah inhlawh ve thinin, kei pawn kan kawmthlang huanah chuktuah huan ka siam ve a, chawhmeh tur eng ilo ka thar ve ringawt pawh chuan min tihlim hle. Zirna ka chawlhsan ta rau rau, Kimtea chu theihtawp chhuaha zir puitlintir ka tum ve hle. 

Zan khat chu ka û lengchhuak a rawn haw hma a, "May, ka ngaihtuah mai mai a, hetia zirna i chawlhsan ringawt hi ṭha ka ti lo. Lehkha i thiam thei si, a uiawm êm mai. Kuminah chuan i zir lo zo tawh a, nakkum aṭang chuan zir ṭha leh thei la ka ti khawp mai. Kimtea nen hian ka chawm ve thei mai ang che u, in hautak lo bawk a" a ti ta mial mial a. 

Ka thil châk ruk em em, ka sawi ngam si loh a rawn sawichhuak chuan min ṭhawng ve deuh a, ka û min duhsakna avang chuan ka lung a chhe lek lek mai. "Ka hrethiam lo, ka awm bosan che u chuan mipa ringawt hi chu in ngaihtuahawm ve sia" ka ti a. 

"A ho lutuk, amah Kimtea pawh naupangchhia a nih tawh loh hi.." a ti mai a. Mipa hi chu an ngaih a sam ṭhin. Kan sawi zawm leh ta lo va, mahse, ka û chuan thla hnih hnu lekah a rilru thlakin Aizawla pem a rawt ta mauh mai le. "Thufing chuan, 'Changkan i duh chuan i ram khawpui berah awm rawh' a tia, kan in leh lo hi hralh ila, nakkum kumtirah i pem tawp mai ang u, ka pa chhungte lam lahin min rawn ngaihven zui tawh bawk si lo. " A ti a. Ka rilru tak chuan ka nu lu nghahna hmun han chhuahsan daih chu ka ngaingam chiah lo. Mahse, ka û thurâwn pawh chu han paihthlak tur ka hre chuang lo. A tawpa tawpah ka û thutlukna chu ka pawmpui ve ta nge nge a. December thla tir lamah kan khaw High School-a rawn thawk thar, Pu Hnema chuan kan in leh lo chu kan chhiarna ang zatin min leisak ta a. Mahse, an khaw lamah hunpui a hman dawn avangin kan la khawsa tho va, kumthar veleha pem thei turin kan bungrua leh engilo singsakna hun kan nei thei ta bawk. U Sangi bawk kha kan tan a ṭangkai ta a, Aizawla in luah tur min lo dappui turin kan ngen a, an awmna vengah tho mi in hnuai min lo hmuhsak ta thuai a. Kan lawm a kim ta deuh. Phone pawh kan la nei ve si lo va, Aizawl thlen veleha lei ve ngei kan tum ruh hle. Ka pa unau ten kan thiltum an lo hriat chuan an rawn thinrim angreng a, mahse, ka û hi suta pal luih mai mai chi a lo nih lohzia ka chiang ta viau, "Kan kuta awm tawh a ni a, kan tiral thiang e."a ti hmiah mai a ni. Lehlamah chuan min lo buaipui tawhnaah an zahawm ve tho nain, khatiang thil a fel hnu kha chuan kan chanchin han ngaihven zui an awm tawh lem lo. Kan unau chauh chu kan ni tlawng mai. Christmas chu kan khuaa kan hman hnuhnunber te a nih hmel si a, Hlim taka hman kan tum ve a. Ka ṭhian ṭha ve tak tak Azuii leh Tluangi te bakah an bialpa te nen kan inah ar kan kang ve a, kan hlim ve hle. Ngaihzawng chungchangah ka sawi tawh ang khan ka rilru a piansual tawh avangin kan khaw tlangval min han ngaihmelh deuhte chu ten lamah ka ramṭang zo va, min duh dawn nia ka hriatte lakah ka inhung bik vat zel. Chutiang na nâ na chu tu mipa mahin bawhzui peih bik hek lo, ka single kumtluan ta mai. Ka lawm daih zawk. Mipa ṭhenkhat titi ka hriat ruk danin, "May-i chu a inla em mai, a pa thih hnu phei hi chuan a mizia a dang vek, sangha ang maia vawt a ni" an lo ti thin a niawm e. Mênah ka thlak zel mai. 

Tichuan, Kimtea te exam zawh aṭanga ni 2-naah Aizawla pem tur chuan kan intintuah a, ka nu thlan ka va tlawh a, thlanlung pangngai tak la phun ngei ka tum khawp mai. Tunlaiah chuan YMA te hmalakna azarah thlan chungah lung lian vak loah an hming leh thih hun ziakin an dah tawh a, chu ringawt chu ka duhkhawp lo. Ka pa thlan erawh ka tlawh ta lo mai. 

Zingkarah kan khaw sumo U Ramzaua khalhah ngei mai chuan, bungraw ṭhenkhat te nen kan chuang bâwr ta lûk mai. Ṭhiante bakah ṭhenawm khawvengten min rawn thlah liam ve hlawm a, kan invailiam ta. Kal kawngah kan muthlu deuh char char mai. U Sangi'n min lo hmuak dawn a, he nu hi kan unau tan a va hlu tak êm. Ka û chuan kan in leh lo hralhna pawisa te chu sarangah khungin a bagah a dah a, a pawm bet chial reng mai. Tlai dar 4 rik hma deuhin Aizawl chu kan thleng ta a. Kimtea a hawi nasa ngang mai, kei tak pawh ka hawi nasa ve tho. Ka û erawh inhlawhin kar khat lai a han zin ve tawh a, a bo lutuk loin ka hria. U Sangi hmel kan han hmu chu hah a dam sawng sawng thei mawle. Kan bungrua te chu pickup hire-in kan in luah tur lam kan panpui a, zanriah erawh U Sangi te inah kan ei dawn thung. A riah pawh kan riak ang. A tukah kan in thar chu kan singsa dawn chauh a ni. U Sangi te hi an pa nen an indang ve tawh a, fa pahnih harh zet zet an nei ve tawh. An pa U Kawnga chu zopa ve deuh, fiamthu duh deuh mai a ni a, ka û nen an inkawmngeih nghal hle. Inthlahrung lutuk lovin Aizawla kan zan khatna chu kan hmang ral ve ta phawt a. 

A tuk aṭangin in thar chu kan singsa ta a. Kan in chu a lian lutuk lo naa, kan unau tan chuan a tawk viau. Tin, a chhuat slab vek a ni a, a zia. Room pahnih awm vein pakhatah ka û a mu a, pakhatah Kimtea nen kan mu ve dawn thung. Nilêngin kan buai ve khawp mai. Kan in luahna te hi Pu Zothana te niin, amah hi sawrkar hnathawk a nia, eng hna nge a thawh pawh ka hre chuang lo. An nu erawh chuan an in piah lawk kawng zau laiah thingpui dawr a siam ve a, an fate pathum ve tho niin an upa ber hmeichhia chu a fa Kimtea aia nau hlek nen an rawn lêt leh a, a thu hmel viau. Chumi chhang chiah mipa chuan engmah a tih pawh ka hre lo. An te ber hmeichhia kei aia û hlek Terini chuan College a kal ve mêk thung. Nu ber Nu Zuali chu a felin a ṭawng duh em em a, kan tlangnêl phah hle. Kan dinhmun leh chhungkaw chanchin zawng zawng erawh hrilh vek kher kan tum hran lo. Chutianga kan tih nek nek chhungin Kimtea admission lak pawh a lo hun ve ta mai a, ka va laksak nghe nghe. Kan venga english mediumah kan kaltir ve a ni. Ka u khan kan in hralhna kha bank-ah a dah lut ve bawk a, U Kawnga'n a inhlawhna lamah a helper atan a hmang thei dawn hlauh a, kan khawsak a ziaawm chho turah ka ngai. Kei pawh ka û min nawrna angin College chu ka han beisei chho dawn a, Admission lak a la hun lo naa, entrance pek zel a ngaih tawh avangin ka inzir ve zauh zauh. Ina tawm sen reng ringawt ka duh bik loh avangin Nu Zuali thingpui dawrah ka pui ve thin a, chawhmeh man te ka lo hlawh ve thei a, ka lawm ve hle. Ka û sawi ang tak takin Aizawlah chuan engkim a lo awlsam a, kan pem chu inchhirna ka nei ta lo. Phone pawh ka nei ve ran tawh a, mahse, ka khawih tam lem lo. Kohhranah pawh kan inziak lut ve ta a, mahse, sawi leh sawi hnu incheina thawmhnaw mawi leh ṭha nei ta vak lo chu sunday zingah bak ka inkhawm meuh lo. Hmelhriat leh ṭhian tia sawi theih pawh ka la nei mumal lo. Terini lah hi ka kawm phak lo ti mai teh ang, a titi reng reng a changkangin ka hriat ve loh lam a ni zel a, bakah an in luahtu kawm chu a duh tehchiam lo tih ka hrethiam ve. An û ber nuthlawi u Rini erawh tlemin a zia deuh. A fanu leh Kimtea te chu an inkawm thei ta mai bawk a, a fanu hi Judy a ni. 

Nikhat thingpui dawra ka awm laiin u Sangi'n min lo call a, "May, Puia in chung aṭangin a tla a, a insawh na viau mai. Tunah civil hospital an panpui mêk, i han chho ve ang hmiang" a rawn ti a. Mak deuh maiin ka hamhaih mang lo, Nu Zuali ka hrilh ve nghal a, nu bengvar tih takah dawr a khar sawk sawk a, U Sangi a rawn kal ta bawk a, kan pathum chuan damdawi in lam chu kan pan ta a. A hmun kan thlena ka û dinhmun ka hriatchian hnuah ka hlauthawng chauh. A lu vel a sawh ang a, a ban emaw a tliak ang a, kan inenkawl dam leh vat mai ang tih rilru ka put laiin vanduaina chuan min lo la umzui zel chu niin, ka û chuan a hnungzâng ruh a sawh thu leh surgery an neih ngam rih loh thu an sawi ta a. Ka tliak hnâwp a ni ber e. Spinal chord sawh chhiatin a nghawng ka hre ve vek a, ka û chu ama kea a kal leh theih ka beisei lo hulhual. Ka chiâi êm avangin Nu Zuali leh U Sangi ten doctor pawh an be vek, ka û chuan a lu a sawh tel avangin nikhua a la hriat loh thu an la sawi ta zel. Ṭah pawh ka ṭap thei lo. Hlauhthawn ang ngeiin doctor ten test hrang hrang an neih hnuah ka û chuan kea kal leh theihna chance a nei lo niin an sawi ta a. Damdawi ina a luh aṭanga thla chanve hnuah kan inlachhuak ta ngawt mai a ni. Wheelchair-a a han ṭhu chu mipa e ti lo chuan a mittui a tla zawih zawih mai. Amah enkawlna leh a damdawi manah kan in hralhna kha kan hmang lo thei si lo va, kan rethei sâwt ta hle. Vengchhung mi ten min la hre vak bawk si lo, U Sangi te leh in chungte bak han belh tur kan nei ta lo. Ka patea te leh ka nî te chu ka hrilh hre ve tho va, Ka pa farnu ka nî Luaii ṭawngkam zet chuan ka rilru a tilêt chiang hle. "In khati reng ang chu, nu leh pate lu nghahna hmun hralh sumah in chantir vel a. In phutawk a nih kha" tiin. Ta ṭang khan ka pa chhungte chu biak ka tum ta lo. Ka nu nuṭa putea te erawh chuan an khawsak harsat ve nak alaiin ₹ 5000 lai min lo la thawn hram a ni. Kan unau vanduaina chuan a vawrtawp a thleng ka ti lo thei lo. 

Ka û-in, "Lo thi law law ila aw..hetianga chhungte tana hnawksak leh enkawl ngai ni tura dam hi eng nge a sâwtna le..May, ka thih loh avangin min ngaidam r'u aw" a tih ngawih ngawih zanah chuan kan unau thumin kan ṭap hlawp hlawp mai. In thlang lama bathlar lian lo takah chhuakin van lam ka hawi a, arsi lo pe ûn te chu ka thlir ngat ngat, ka thinlung tâwt leh na tawpkhawk chuan min siamtu Pathian ka dem ta. "Pathian pawh i ni nek lovang e. Hetiang tuar tura min lo din ve hi ka hua che. I hnenah hian engmah ka dil leh tawh ngai lovang. Keimah ngei hian i puihna tel lovin khawvel ka hmachhawn ang" tiin ka au ta piap piap a. Kimtea'n min lo pawm chawt, "Ate, tikhan ti suh" a ti ṭiau a. Ate tih hi min koh dan a ni, kan kum a inthlauh deuh avangin min û hreh a ni maithei. Mahse, ka thu ka sût duh lo. Ka thinlung chu huatna hlirin a khat tawh. Ka û leh ka nau avanga la dama nung ve chauh ka ni ta. 

A sum thawkchhuaktu ber enkawl a ngaih tak siah chuan College kal chu sawi rik ngam chi a ni ta lo. Kan sum khawlsa lah a tlem tawh si, Kimtea zirna senso atan khawih chet tawh loh ka tum a. Kan nitin mamawh tur thawhchhuah nan hna ka zawn ve mai a ngai dawn a ni. Chutah chuan hmana U Sangi'n awmna tur min hmuhsakna pa thusawi kha ka hrechhuak ta a. A number erawh ka nei lo. U Sangi ka va dil ta râwih a, an ni pawh hian min khawngaih, mahse, an khawsak a chuti lua bik si lo va, inpuih a harsa ve êm a ni. Tichuan, Sangbera inti number chu hmetchhuakin ka call ta a. 

"Hello" a aw pawh a la ngai reng mai. 

"Englo, ih, hmanah kan inbiak tawh kha..May-i kha ka nia,." Ka ti bah nuaih. 

A reh dat a, "Umm, ka hria che. Eng nge ni ta?" A rawn ti a. Zah pawh dâwn zo tawh lo chuan kan buaina leh harsatna tawh zawng zawng chu ka hrilh ta vek a. A rum nghut mai. 

"A va pawi ve aw. Chawhnu dar 2-ah meeting ka nei a, tlai lamah ka rawn bia ang che. A ṭha em?" A rawn ti a. A ṭawng danah chuan thu a neih hmel hle. Ka û hi ni khat danah ka bualfai thin a, thingpui dawrah ka va inhlawhsan leh lâwp lâwp a, zing karah ka inthiartir vek zel bawk a. Chutitak chuan hna a tikhaihlak lem lo. A rilru na leh mangang hian a taksa a vaw chhe zual. Ka theihtawpin ka hnemin ka fuih ve ṭhin. Tuna ka hna zawn pawh hi ka la hrilh lo. 

Tlaiah chuan a sawi ang ngeiin rawng ka bawl laiin min lo call ta a. Thinphu dûp dup chungin ka la ta a. 

Ka chanchin min zawt chhuak ta vek a, ka sawi zawhah, "Hnathawh tur chu ka nei maithei. Eirawngbawl i hman loh hmel si a, ka in chhung tifai tur chu ka mamawh tho mai. Zing dar 9-3 thleng i thawk ang a, hlawh chu thla khatah 10000 ni rih phawt se la, naktukah ka zin dawn a. Kar thar aṭangin i rawn ṭan dawn nia. Ka address ka rawn thawn ang che" a rawn ti charh charh a. Tunlaiah awmpui hlawh hi 8000- 10000 a ni tlangpui tawh a, chutianga nilêng hna pawh ni loa 10000 ka la thei tur chu ka hlim lutuk a, ka lungchhe thar thut nghe nghe. A number pawh Pu Sangbera tiin ka save ta zân mai. Zanriah kil ho laiin ka thiltum chu ka unaute ka hrilh ta a, ka û chu a ngawi reng. A rilru a kal thui tih ka hria. Kimtea chuan, "Mahse, Ate, Mama hi engtin nge niang?" A ti a. 

Ka chil ka lem khawlh, ka û chu melhin, "Hna ka thawh hlanin nangmahin i lo awm thei ang tiraw? Eitur engkim ka siamsak sa vek che ang a" ka ti a. Ka inthlahrung lek lek. Za lo taka nui hakin, "Inthlahrung mah ta che, ka awm thei lutuk. Tunah pawh thingpui dawrah i kal ziah tho alawm. " A ti a. Rilru a nuam ta deuh. Sum mamawh a na miau si a. Thingpui dawra ka thawh ve hi chuan kar tawpah 1000 te ka hlawh ve ṭâwk a, kan unau tan chuan a beitham lulai ve êm a ni. 

Chutiang chuan ka pu thar zin haw nghakin chumi kar chu ka hmang ral a. Ka û pawh amahin a inkhalh kual ve thei tawh a, inthiar tak pawh tihdan thar kan hre ta a, a chair seat chu hawn theiha siamin a hnuaiah bucket tê kan khai a, inthiar a ngaih chuan a seat chu a nem tawlh a, a inthiar ve thei ta. Nilêng deuhthawa ka kalsan tur chu rilru nuam chiah lo mah se; hetiang reng reng chuan kan damkhawchhuak zo dawn tlat lo. Sunday zinga upa bial fang chuan rin loh takin ₹2000 min pe ta nawlh mai a, Kohhran member pakhatin mamawhte tan a lo donate a lo nia. Kan mamawhin a hria ni ngei tur a ni. Kimtea school fees atan a ṭhen ka hmang a, mahse, Pathian hnenah lawmthu ka la sawi duh chuang lo. Ka hel laklawh tlat a tin ni. 

Kar thar a rawn thleng ta. Zingkarah ka tihtur ka zo fel vek a, Kimtea hi a fel reuh a, amah hian a intifel thei ve vek tawh mai. Ka pu thar turin a awmna hmun a sawi lam chu taxi lain ka pan ta a. Huphurh ru si, phur ru siin ka awm a ni ber. A awmna hmun a sawi chu veng mawng lam deuh, motor erawh lut thei vek a ni a. A awmna mawng chhan ka hrethiam, a compound a zau êm a ni. A lo inhung khap a, gate lian angreng tak bulah chuan kan ding a, taxi fare pawh a to angreng. Gate keeper niawm tak uniform ha thlap chuan min lo thlir reng a. Ka va pan ta chhat chhat. 

"Ka pu, he lai hi Pu Sangbera in a ni em le?" Ka ti a. 

"Aw ni e, May-i i ni em? " A lo ti var. Ka nih thu ka sawi chuan gate chu a hawng a, min luhtir ta a. A in chu thing hmanga sak niin a mawi dangdai kher mai. A kawt zawl zau zetah chuan grass a phah chhuak vek a, in sir dinglamah swimming pool lian lutuk lo a awm bawk. Pangpar nalh dangdai tak tak bakah thingkung ṭâwi buk luih mai an ding khup bawk a, ka tehkhin thiam dan ber chuan sap ho in a ang ka ti. A in chu a lian lutuk lo thung. Guard khan min hruai zel a, kawngkapui lian angreng tak chu a kik kauh kauh a. A rawn inhawng phak, ui var leh dum lian zet an lo dak hrû mai. Ui hlau chi ka ni si, ka tawlhkir dâwrh. Kawngka rawn hawngtu chuan uite chu chul thuak thuakin, "Lo lut ta che" a ti a. A nu a nih ka ring, kum 45-50 bawr vel tur, sam tawi leh nelawm tak, ngo vang mai hi a ni a. A nulian hran lo. A nuih sâng avangin keipawh ka ngampa sawt. Ui te chuan engtinmah min tih loh avangin ṭi ru deuh chung chuan ka lut ve ta a. In chhung chu a dai nuam hle. Engkim chu a awmna turah an awm thlap vek mai a, furniture ho pawh thing hmanga siam nalh tak tak vek an ni. Kan ṭhut hnuah, "Buangi ka nia, a chaw chhumtu" tiin a kut a rawn pharchhuak a. Ka lo ban ve zat, ka hmingte chu ka'n sawi ṭha ve leh a. 

"Amah hi zingkarah a chhuak lawk a, a rawn lêt ṭêp tawhin ka ring. Chumi hma chuan i tihtur ka lo kawhhmuh dawn che em ni?" A ti a. Ka bu nghat. Pindan pakhatah min luhpui a, hotupa thawmhnaw dahna pindan a lo nia. A closet a hawn chuan kamiz nalh zet zet a lo inkhai ṭhât mai. A pheikhawk ho lah chu an man a tlawm lo tih a hriat ngawih ngawih bawk. Ka hnathawhna tur hi a hausa viau a ni ngei ang le..bakah U Sangi khan amaha khawsa a nih thu a sawi a, ka rilru a tibuai deuh. Nu Buangi chuan, "A hmasa berin he pindan hi i tifel ang, thawmhnaw ho hi i thlep felin, khai ngai ho i khai ṭha ang a. Thil harsa chu a ni lo, amah hi a che ṭawp vak lo a. Chuan, i zawh hunah i insu dawn nia" a ti seuh seuh a. Ka bu nghat nghat ringawt. Min chhuahsan hnuah chuan ka che ta zung zung a, kan khuaah khan in chhungkhur kha ka kut a ni bawk a, ka hna chu han thawh harsa a awm lem lo. A pindan lah chu a rimtui veng veng mai. Ka tihfel zawhah ka chhuak a, insu tur chuan bathroomah ka lut. Nu Buangi a rawn kal leh a, "Pu hian machine hman a duh lo a, kutin i suk mai a ngai ang" tiin bal bâwm chanve vel thawmhnaw hi a rawn dah a. Insuk pawh ka tihṭhan tho. Ngaihtuah lem nei vak lo chuan ka insu a. Pool bulah ka va pho ta a. Chutihlai tak chuan eng car nge pawh ka hre ve lo, nalh deuh a ni tawp mai, a dum tle zak hi a rawn tlan lut ta a. Ka hnathawhna pa a nih ka ring nghal thlap. Nu Buangi pawh a rawn chhuak ve a, car chu dingin kan pu-a chu a rawn chhuk ta. Ka rin loh deuh hmel a pu nia! Patling lam deuh kum 50-60 bawr vel tur hmuh ka lo tum a, a ni lo nasa. Kum 30-40 bawr vel tur, mipa sar veng vawng, hmel pa deuh mai a ni tawp mai. A hmel chu a zahawm hle bawk. A sang hle bawk. Hmeichhiain mipa a en angin ka en lem lo naa, hmeichhe duh chi tak mipa niin ka hria. A aw pa em em nen pawh a hmel chu a inrem thlup mai. Jean jacket, tunlaia Denim tia an sawi tak a dum a ha a, jean kekawr tho a dum a ha bawk, tshirt var a ha thung a, a pheikhawk pawh chu a man a tlawm lovang tih a lang reng. Ka lo ding zum ve reng chu min rawn melh zauhin, "Mayi chu i ni em? Lo lut la" a ti nghut a. Phone- aiin a takah a aw a pa zawk. Ngawi rengin ka zui lut ve ta a. Chokaah kan inzui lut nghal, Nu Buangi chuan, "Chaw i ei dawn em? A tlai tawh sia" a ti nang nang a. 

"Ka ei tawh e. Vawiin chu ka awm ang, huan khu ka zu fang ang e. Chuan, May.." tiin ka lam a rawn hawi a, ka lo phu zuk. 

"Hei Piteii hian chinchang a lo hrilh tawh che ka beisei. Ani hi ka eitur min siamsaktu a nia, ka in piah lawkah sawn an nupain an khawsa ve a ni. In inkawmngeih ka beisei..harsatna a awm chuan min hrilh hreh lo u la.." a ti zung zung a. Ka la zum êm vangin sawi tur pawh ka hre mang lo. A va inthlak a, awmhmun thawmhnaw nen a chhuak leh nghal daih. 

Kei pawh chuan Nu Buangi sawi angin a in chhung bungrua te chu ka hrufai a, a bal hran lo. Pa inchengvawng tak zawng a ni ngei ang. Dar 1-ah chhun chawlh neiin Nu Buangi nen thingpui kan in dun a, "Hrehawm i ti em? Kei hi mi han biak tlangnel ka thiam lutuk lo va, kan pa zawk awm se chuan i nêl hma daih zawk ang" a ti luam a. 

"I fel ka ti reng..chuan, In pa chuan eng nge a tih ve?" Ka ti a. 

 Hlim hmel deuh hian, "Sangbera dawrah bungraw thiarin a thawk ve a. Ani chu tlaiah a lo haw chauh ang" a ti siam siam a. 

Sawi tur dang hre hek lo, "A nih Nu Buang, fate in nei ve em?" Ka ti ta chawt a. 

Ngui hmel rawn pu lehin, "Kan vanduai a, fa pahnih kan nei ve a, mahse, vanduaithlak takin min boralsan ve ve tawh a ni." A ti chuai raih. Pawi ka tihpui ve hle. Ka ṭawng leh hmain, "Taka i chanchin tlangpuite ka lo hre ve a, Sangbera'n a chhawr che hi lawm hle rawh. Mi nazawng a chhawr duh lo asin. Mahse, nang chu in dinhmun a hriat khan a khawngaih lutuk che a"..a ti hluai a. Sawi tur ka haihchham deuh. 

"Aa..nia, a dik alawm" ka ti ringawt. 

"I û chu inah amahin i hnutchhiah ta mai em ni?" A ti sap a. 

"Umm, kawng dang a awm si lo va" ka ti sep. 

"A pawi a ni tiraw? A hausa leh eiru, thil tisual nasa zawkte an hrisela an dam sen lul laiin phak tawka thil ṭha ti ve hram hram te kan han vanduai em em zel hi chu" a ti niah niah a. Dik ka ti khawp mai. 

Chawhnu lamah chhuat ka nâwt a, darthlalang erawh a tuka nawh atan ka khek thung. Chhuat ka nawh zawh chuan ka tlawngawl ta angreng sia, "Nu Buang, tihtur dang a la awm em?" Ka ti a. A hawi kual fê hnuah, "I che fel reuh sia, tihtur em em ka hre mai tawh lo. " A tih mêk laiin Sangbera chu a rawn lut a. A ui pahnihte nen an inchhaih lai chu ka lo thlir reng. A ui var zawk chu Para tia koin a dum zawk chu Duma a ti mai a. An inngainat hmel viau. Min rawn thlek zawk a, "Vawiina i tihtur ang angte i zawh tawh chuan i haw thei ang. In lamah ngaihtuah tur i nei bawk sia" a ti a. 

"Ka lawm e.." ti sapin ka bag ka la nghal. Ka ni khatna chu a hrehawm loh mai ni lovin a fuh hlein ka hria. U Sangi hian kan chanchin a lo hrilh kim viau em mawni dawn le..tiang taka khawngaihtu kan han tawng hi lawm ngawih ngawihna tham a tling a ni. Taxi ka hmuh mai loh vangin kawngpui pawh tumin kein ka chho ta ngat ngat a, ka va hah tak. Thlan hluamin kawngpui ka pawh a, two wheeler taxi a rawn tlan remchang hlauh a. Kan inphur liam zui ta nghal. 

Chutiang chuan Pu Sangbera ina hnathawk chuan kar khat lai ka kal tling ve ta a. Harsatna em em ka la tawk lo. In lam ka ngaihtuah viau naa, ka û pawh a rilru lam buaina a kiang chho ve zel a, ngaihtuahawm em emin a khawsa zui ta lo, chutihrualin a tihfuh loh ṭum chuan chhuata a lo zun kawi nuaih changte pawh a awm tho. A inthlahrung lutuk thin chu ka khawngaih takzet. Kimtea pawh kan fuihin kan zilh tam bawk a, lehkha zir rawh tih a ngai ngai lo,. Mizo medium nen a lo inang vak lo bawk a, a ṭang ve hle. Ka hnathawhna lama kan pu ber chanchin tlem azawng pawh ka hre chho ve zel a, Tlangval hnahkhat niin, a pa a boral tawh a. An in puiah chuan a chhang chiah te chhungkua an khawsa a, an farnu neihchhunin pasal a nei tawh bawk. Tuna a awmna hi ama thawhchhuaha a lei ngat, a cheihnûm leh vek an ni. Sumdawng tih bak a hnathawh ka hre ve vak lo. ka thawh ṭanni bak kha ka hmu leh tawh lo hrim hrim. Nu Buangi'n vawikhat chu, "Nula ho hian an rawn hêl nasa thei viau a, mahse, amah hi ka sawi thiam chiah lo, phurna a nei lo. A nunhluiah na taka hliam a lo tawk tawh a ni maithei" a ti a, kan inan duh hmel hle mai. 

Inrinni a ni a, "Vawiin chu ka haw hma thei ang chu maw" ka tih rauh rauh laiin pu ber a rawn haw a. Ka ṭi leh dûk tawh. He ka ze ṭhing zet hi phumbo ka duh mang e aw. 

"Pite, Teberi ten chaw an rawn ei dawn kha aw. Rawngbawl hma a ṭhat ka ring, Chuan May, pawi i tih loh chuan piteii hi pui ve lawk mai ta che" a ti thum dût a. 

"Aw le" ka ti sap. 

A sana a melh zauh a, "Inrinni a nia, i nau a awm thoin ka ring a, zanriah pawh hetah ei mai ta che. Piteii a buai dawn si a, harsatna a awm ang em?" A ti leh a. Ka heh liak zauhin, "Aa..awm lovang" a thu hnial ka hreh vangin ka ti ta ngawt. Mahse, a sawi kha a dik ve tho, Kimtea hi a kum phu lohin a fel reuh a. Keipawn a awm ve ni hi chuan ka hrual ve nasa bawk nen, rawngbawl pawh siam harsa lo chi chu a thiam ve vek tawh. Ka û lah kei ai aiin a duat emaw tihtur a nia. Ngaih ka tiṭha ta ringawt mai. Tichuan, chawhnu dar 2 vel aṭangin an zanriah tur chu Nu Buangi nen kan siam ṭan ta a. Teberi a tih kha a farnu neihchhun kha a ni. Ka la hmu ve lo thung. Sa kan ei khât a leiah sa siam dan hi ka hre vak lo va,. Thlai lam erawh ka huphurh lo ve tawp. Anṭam ka tlak a, bawkbawn leh samṭawk ka bai pawlh bawk. Uih lam chi pawh an lo ei ve tho va,.ka bai uih ta mai. Sa lam chu Nu Buangi'n a siam thung. Kan inbawl fel meuh chuan dar 4 a pel tawh. Ka û ka be tawh a, "Hei ka ṭha lutuk, Kimtea'n rawng a bawl a, min lo ngaihtuah suh" a rawn ti thlap a, thaw a veng ta deuh. Kan chet hnawknate ka thenfai leh vek hnuin ka insil dai a,. Teberi a tihte pawh an rawn thleng chawpchilh nghal. 

Naute duhawm leh meng fiah zet mai a pua a, an pa niawm tak chuan bag a khai bawk. Teberi chu a hming ang chiahin a te fel ât a, a hmel pawh a ṭha kher mai. An pa chu hmuh tawhna ka nei chiang..a rukin ka va melh leh zauh zauh ṭhin, Nu Buangi'n ka beng bulah, "An pa saw insual thiam a nih saw" a rawn tih chuan ka harh kâwk. Nia, ka hmu tawh khan ka hrereng a ni. Street fighter an tih ṭhin, tuna Ultimate fight-a champion ni lai mek kha a ni tak alawm. Insual lam hi ka û hian a en nasat theih êm vang chauha en ve thin ka nia. Teberi te rawn thlen hnu lawkah Sangbera chhang chiahte chhungkua an rawn thleng ve ta bawk. Fa phir mipa an nei a, kum 2 an ni ve tawh, an va duhawm dun tak. Sangbera nau chu Bawiha an ti maiin ka hria. An kim hnu chuan pu ber chu kei chu inhmelhriattirna te a nei a, an fel unauin min han enhniamna emaw min chungtlakna emaw hriat leh hmuh tur a awm lo. 

An ri nak nak a, keiin chokaah salad ka siam mêk thung. Kawt lama motor ding dawt thawm ka hriat hnu lawkah hmeichhe aw tliang ral mai hian, "Min thlim in tum..Malsawmdawng, ti nge engmah ka hriat ve loh?" A rawn ti lut lâng lâng a. Nu Buangi'n theitui min va pektir a, lo kal thar nu han chhiat lohzia leh changkanzia mai chu..

Ka sawi thiam dan berin model ang mai a ni, a vun a nalh si, a engkim chu a nihdan tur ang vek a ni. Sangbera chuan, "Mayi a nih kha, ka hnathawk thar..May, hei hi ka ṭhianṭha êm êm Remruati a nih hi.." a lo ti sawk sawk a. Kei ve mai min lam sek chu nuam lo ka ti letling. Remruati chuan nui sâng chung hian, "I vannei hle mai, Sawmdawnga hian nula hnathawk a la ngai lo asin" a ti sap. Ka nui ve ringawt. 

Choka lamah ka tawm leh ta ngat ngat a. Dar 6 rik hma deuhin zanriah chu an ei ta a. An chaw ei chhungin naute te chu kan lo kilkawi ve a, duh loh an nei si lo. Teberi fanu chu Bawihpui tiin an ko va, phirte erawh Kevin leh Jimmy te an ni. An eikham vek hnuah Nu Buangi te nupa nen kan ei ve a, ka hmanhmawh luatah ka puar leh puar loh pawh ka hre vak lo. 

Haw turin ka insiam a. Nu Buangi thurawn angin 2wheeler biak bik ka nei a, ka hna banah min lo hruai mai zel a, Valtea call ka tum mêk laiin Sangbera a rawn kal a. "Ka thlah ang che, i tlai tawh sia. " A ti sup. Hnial ka tum lai mekin Remruati kha a rawn lang ve zat a, "Ka driver sawn va thlah mai rawh se, i naute an la awm sia, a dik lo" a rawn ti zung zung a. 

Sangbera chuan min rawn enin, "I hreh em?" A ti a. Ka lu ka thing nar nar. Pawnah chhuakin verandaa lo ṭhu Remruati driver chu a ko a, "Dinga, zu i la in em?" A ti nghut. 

"Zeuh zeuh" a lo ti ham ham a. 

Sangbera chuan aw hriam lam lek lek hian, "Chutichu, May, lo kal rawh, keiman le.." tiin min rawn melh ta chat a.