Sangbera 16

SANGBERA (16)

Ziaktu : Toni Râlte

A rawn ri leh ta. Ka pasal bawk a ni. Ka mittui hru hul sawk sawkin a pangngai thei ang berin, "Hello" ka ti thei hram. 

"Tleia pa chu a boral ta nge nge a. Ka rawn hrilh ve che" a rawn ti a. A hmaa a thinrimna ang kha a aw aṭang ringawt chuan a awm tawh lo. 

"Aw le. A va pawi ve" ka ti bung nghat a. 

"Nia , a pawi. Ka tlaivar dawn a, kawngka i lo kalh dawn nia" a rawn ti leh a, "Aw le" ka ti a. Keimah zawkin ka hmet hlum nghal. Kawngkapui chu ka va kalh a, Kimtea erawh lehkha a la zir ka ring. Tleipuia ten chhiat an tawh leh si chuan kan khaw lama zin pawh a rem rih ka ring lo. Sangbera ṭhianṭha ve ber kha a ni sia. Mut nan la hma viau mah se; tihtur ka nei bawk si lo va, ka mu ta ringawt. Mahse, ka mut erawh chhuak lo chiang tak a ni. Ka hui pap pap mai a, ṭah erawh ka ṭap tawh lo. Ka zeldinnain Sangbera chu hmeichhia tu emaw nen an awmdun ang a, Tleipuia pawn a hriatpui vek bawk a, Tlaivar hmingpu siin kei hi min thlim ta a..ni lo, ngaihtuah ka duh lo. Hetiang hi a ni maw hmangaihna chu le?! A va na ve..ka duh ve lo. Kan khum zau puiah chuan rilru ipik ngawih ngawihin ka mu kawm ngel a, zanlai ar khuang, khawvar ar khuang thlengin ka hre chho ta zat zat, Tlaivar chiang tak ka ni. Ka thawh chuan chuti lutukin ka lu pawh a la rit lo. Kimtea te vawiinah an zo dawn si a, eitur siamsak a ngai si. Peih leh peih loin ka siamsak a, ka luak lah chu a chhuak reng bawk a. Ka pum lam dik loh vang a ni ngei ang. Kimtea chauhin tukṭhuan chu a ei a. "I û ka lo nghak ang" ka ti khawmawi ve ringawt, nghahchhuah tur a awm awm chai si lo. Ka ei châk hlawl loh vang a ni. A eina ka sengfel lai chuan namên lovin ka lu a rawn hai ta a. Ka vai ruai mai, ka pai ta awt awt a, Kimtea a lo rak ṭhawt. Ka tlu turin ka bek veilam chair kila ka tauh dawt chu ka hria a, a bak ka hre ta hauh lo. Ral hla taka Kimtea aw niawm takin, "Ate..Ate" a tih chu ka hre rei ruai, mangramah ka la talbuai zui. Hrui hnawk zetah hian ka lo tang a. Tal chhuah tumin ka lo inhai nasa mai a, ka tang nghet tulh tulh lehnghal. Mangang zetin ka lo au vak vak a, chhawntu reng ka nei bawk si lo. Ka ke zem chiattu hrui chu palchah tumin ka theihtawpin ka ke chu ka leng ta âwrh a. Ka harh ta hlawl mai. Kan nupa khumah ka lo mu a, Sangbera bakah Teberi leh Mami te hi khum bulah an lo ṭhu ṭhap. Min ngaihtuah em em hmel an pu vek bawk. Ka harh tih an hriat chuan an rawn kal hnai a, Sangbera chuan ka kut a rawn hum vat bawk. Ka awmdan ka hriatthiam loh avangin ka meng â deuh ruai maithei a ni. 

"I ṭha aw. may,. I ril a ṭâm em?" Sangbera chuan a lo ti dam duai a. A awka ngaihnobei lutuk chuan ka lung a tichhe lek lek. Inbenkan ka tum chu ka luhai lutuk vangin ka ṭhulh leh. Teberi chuan min lo chelh vat a, "Mu hle hle rawh, i bp a lo hniam lutuk a, thil i ngaihtuah nasa bawk a ni maw?" A lo ti mawlh mawlh a. 

"Ti nge hetia ka awm?" Ka lo ti daih. 

Mami chuan rang fê hian, "Kimtea'n Mama a lo bia a, nikhaw hre lo va i tluk thu a hrilh a. Kan lo thlen chuan khumah hian i lo mu tawh" a ti zung zung a. Ka tluk lai kha chu ka la hre rei ruai e. 

"Kimtea chu a exam em?" Ka ti vat a. Keimah vanga a exam theih loh ka hlau êm a ni. 

"Thei e. A rawn bang ṭêp tawh zawk ang" Sangbera'n a lo ti vat. Ka awmdan mai mai chu ka va duh lo tak e aw. Nizan ka tlaivar vang kha a ni maithei a ni. Ka ril a rawn ṭâm ṭan a, chaw kha ka ei ta miah lo bawk nen, "Ka ril a ṭâm" ka ti sep a. Teberi leh Mami a ranga rangin an chhuak nghal. Ka inthlahrung zawk e a. Samgbera nen chauh kan awm ta a. Dik tak chuan a lakah hian ka la lungawi chuang lo, mahse, tihlan hun a ni em tih ka hre lo thung a. "Ti nge bp hniam khawp khawp ten i lo awm a? Ka hriat lohin rilru hahna i nei em ni ?" Sangbera chuan a ti ta chiah a. 

Chhan dan tur ka va hre lo tak. Chunglam ka melh vang vang ringawt, "Hey, May, eng nge i ngaihtuah? Kei hian i rilru ka tihrehawm em ni?" A ti dam leh thlup a. Ka chhing sawk. 

"Aih, keimah leh keimah ka intina" ka ti thei ta hram a. A chek hluk chu ka hre reng. Mami te chuan eitur an rawn chawi lut a, heti taka kei ve mai min ngaihsak hi ka va lawm tak êm. Ka ril a ṭâm tawh bawk a, anmahni pawh ngaichâng tawh lem lovin ka ei ta buan buan a. Chaw ka ei hian ka ei buan buan ve thin hrim hrim ,ka zak hran lo. 

Ka ei kham meuh chuan ka puar bawk a niang, ka mut a rawn chhuak leh ta chiai chiai a, Sangbera chuan a lo hrethiam nge, "Muhil leh rawh, mut tam i mamawh. " A lo ti var a. Mutchhuak hi chuan lal pawh a zah zo lo tih ang deuhin a tu amah ngaichâng tawh lem lo chuan ka muhil leh ta siai siai a. Mumang erawh ka nei tawh pawn ka hre lo. 

Ka harh chuan khua a thim vek tawh a, zan dar 7 a lo pel tawh bawk. Sangbera chauh khum bulah a lo awm tawh a, a muthlu em mawni..tihharh hlau zetin ka inbengkang a, ka luhai pawh a zia viau tawh. Zawitêa thoin kan pindan chu chhuahsan ka tum a, "Ka muhil hleinem. Khatia thawm dim vak a ngai lo" a rawn ti ta roh si. Lai zetin ka va lehhawi a, ka nui ringawt. 

"I ṭha deuh tawh em? Na i nei em? " A ti zung zung a. "Aih, ka ṭha tawh reng, Kimtea a awm em?" Ka ti a.

"Awm lo, zanin chu exam zawh lawm nan lenchhuah ve min dil a, ka phalsak ta a nih kha" a lo ti var a. Pawi ka ti hran lo. An tan enjoy ve hun alawm. 

"Tleipuia te inah i kal dawn lo em ni?" Ka ti ta ngawt a. Ka inthiam lo angreng, keimah vangin a ṭhianṭha ber pa thihnaah pawh a lang ve thei lo va. Tleipuia hmuh leh pawh ka inthlahrung e a. 

"Chu aia pawimawh zawk i awm alawm" awlsam zet hian a ti a. 

"Ka ring lo" ka ti hul hak. Kha kha sawi ka tum ber pawh a ni lo, nizan lama ka rilru kal thui lutuk vel kha ka hriatchhuah vang a ni. 

"I ring emaw ring lo emaw a danglam chuang em ni?" A ti ta nghut a. A thinrim lo tih erawh ka hria. Zahzelah, "Ka'n zung lawk" tiin bathrooma luh ka rual a. Ka inngaihtuah vang vang. Nizan ang êm khan ka thinrim tawh bawk si lo, mahse, ka lung a awi tihna erawh a ni bawk si lo. Awmdan ka thiam lo êe. Engpawhnise, nizana ka kal ve rem a ti tlat lo leh kal thui lo tura min duh chhan kha sawipui tawp mai ila a ṭha ang tih ka ngaihtuah a, nupa kan nia, kan inneih chhan ka hria. Sawi dun a rem lohna em em ka hre lem lo, mahse, ka inphawrh mualpho vak ang tih erawh ka hlau, ka mawl ropui si. 

Ka va chhuah leh chuan mei a lo zu hluah a. Zial hi a zu mang mang lo ka tih kha.."Chaw i ei tawh em?" Pangngai deuh hian ka ti a. 

"La ei nang, ka nghak che a" a lo ti thum dût. 

"E..ei ila a nih chuan" ka ti sam êt a. Pindan chhuahsan mai ka tum laiin, "Lawk..May, " tih leh ka kuta rawn vawn a rual a. Ka ding ta ringawt. 

"Nge" amah pawh en lo chuan ka ti a. 

Chek hlukin, "Mi i biakin an mitah en ṭhin rawh. A zahawm ngai,. Khatiang inrintawk loh hmel lutuk khan tumah hmachhawn tawh suh" a ti ta daih a. Nia, hei hi zep loh chuan ka sim hleithei lo. Kan ṭobul leh seilennain a zir loh vang nge mi mita en kalh chunga biak hi ka zak! Ni lo, ka inngaihniam leh lutuk a, ka nunah a bet nghet tawh ka ti mai. Zahawm taka mi hmachhawn te chu ka duh lo bik lo, mahse, ka en lo tih pawh hre tawh lo khawpin ka lo ching ṭhang tawh a lo a ni. 

"Tehdaih a che. Eng nge i sawi duh chu?" Ka ti nghat a. 

"Ti nge i bp a hniam?" A ti teh ngawt a!

"Hmm, ka hre bik nang. " Ka ti si. 

"Thil i ei ṭha a, in chhungah taksa ngeih tawkin i che reng bawk a, i mu ṭha hle bawk si, ngati nge?" A ti leh a. A dilchhut bawk sia maw. 

"A mak! Ka hre bik lo. Ka chak lo ve tawp a niang" ka ti nuah nuah a. A sawi zawng zawngte kha dâwt a ni lo, tunlai tak phei chu ei ka duh lai tak a ni lehnghal. Keipawn mak ka ti deuh. 

"Nizanah i muhil em?" A ti ta chat mai. Insangruh ṭeuhin, "Ka muhil tui lutuk" ka ti zangkhai vah a. 

"Ka ring lo" a ti ro hak. 

"Nge i rin loh ve ngawt?" Ka ti a. 

"Rilru hahna i neih chuan sawi rawh. I pasal ka nih hi, nangmahin tuar suh" a ti nghut nghut a. 

"Rilru hahna ka nei lo" ka ti tlat bawk si. A beidawng nge ni, "Aw. A ṭhat chu, chaw chu ei ila..ka ril a ṭâm" a ti ta a. Choka lam kan pan dun ta a. Rawng chu a lo bawl ve vek a lo nia,. A siam thiam ve ber vawk sa a chhum tawrh a, bean a chhum hâng hluah bawk. Alu a lo fry bawk a, a zia ve reng mai. Chaw ei chu ka siam zui mawlh mawlh a. Kimtea a awm bawk si lo, a reh ngawih ngawih. Kan pahnihtê chuan kan ei ve ta rak rak a. Ka ka a tui nep deuh vang nge khawrh khat pawh ka ei zo hleithei lo. Ani pawh tihtham a ei bik lo. Ka sengfel pahin, "Ka zia tawh tho, U Tleia te inah chuan va leng ve rawh. A nuam lo êm mai, a lo beisei ve dawn tehreng che nen" ka ti mawlh mawlh a. 

"Zanin chu ka kal loh tur thu ka hrilh tawh. Naktukah kan nupain kan va kal ang a, tlaiah chaw kan ei nghal ang. Kimtea chuan a ṭhiante hetah a eipui ang" a ti ta zung zung a. Ka tel loin an lo rel fel diam a nih dawn hi. Ka chhang zui tawh lo. Ani pawh phone a hmang ta daih a. 

Nilengin ka inbual ta si lo va, tuilum tala inbual ka duh. Ka inthlakna tur ka lak lai chuan a rawn lut a, "Remruati te kha an bail a.." a rawn ti. 

"Umm, an va lawm dawn ve" ka lo ti mai a. 

"Fimkhur tawh la aw. Hetah ka awm reng ṭhin si lo va. " A ti charh charh a. "Nia, mahse, anni kha chu an rawn lang ngam kher tawh dawn mi?" Ka ti a. 

"Remruati a nih chhung chuan a ngam leh tho vang" a lo ti hmiah. A lo hrechiang viau em mawni dawn ni. Ka inbualsan ta daih a. Tuiluma inbual chu nuam ka ti viau, ka harh sawng sawng mai. Ka va chhuah leh chuan a lo mu duai a. Phone a khawih mawlh mawlh thung. Ani pawh hi a chau ve ngawt ang, nizanah a tlaivar a, vawiinah nilêng deuhthawin min buaipui leh bawk si. A laka lawm viau tur ka ni nameuh mai, mahse, ka lawm famkim thei bawk si lo. Ka inthlak zawh chuan kawngka leh tukverh te ka va check ṭha leh a, engkim a ṭha vek tih ka chian hnuah ka mu ve ta chauh a. Amah si lo tawk velin ka mu hlân a, ka phone chu ka'n hmet ve a. Thil thar em em a awm lo. Youtube ka en a, mukbangah bawk ka tawp leh ta. Bawng thlîng an ei lai hi ka en ve ziah, a tui hmel thei si. Ka chil a pût leh ringawt, min lo melh reng em mawni, "Naktukah kan lei haw dawn nia" a rawn ti sup a. 

"Aa..a ngai kher lo, ka en ve mai mai alawm"ka ti ringawt. A phone a lukham hnuaiah thawlh lutin min rawn kuah a, lo dan ka duh, mahse, ka dang phal si lo. Nêp inti ru zetin chechâng lovin ka awm hle hle. 

"Vawiinah khan Kimtea'n khatia min lo biak kha chuan, 'Ani hi a rai no a niang' ka lo ti hman a" naupangchhia zet hian a ti a. Ka tum loh deuhin ka nui vak, "I va â tak, rai pawh ni ila a lan a la hun lo, kan inenglo hun te kha ngaihtuah ta che" ka ti a. 

Mi rawn en vung vungin ,"Ni dawn tak. Ka va â e aw. Engpawhnise, i ṭha hi ka lawm" tiin a lamah min pawt hnai deuh a. Ka zâm nge ka hua nge, engtin emawni ka awm leh tawh. 

"U Sangber" ka ti hluai a. Ka auh khat êm vang hian mak a ti deuh nge min rawn thlêk hû mai. Ka sawi tum ber a bo leh daih sia, "Ih,..englo, Mapuii te kha sawi zawm leh tawh la" ka ti ta daih a. Nia, kha thil kha ka rilru luahtu pakhat a la ni ve hrim hrim bawk a, zawh tawp loh chuan min hrilh hi a tum tawh lo niin ka hria. 

A mitmeng a danglam zawk a. "Ka mood i thlak daih alawm" a ti nghut. A lungawi lo emaw ka ti hman tawh. Mahse, ṭha deuhin, "Englaiah nge kan tawp khah" a ti ta a. Ka phur ta viau mai. Zan a la rei dawn sia, ka mu nasa tawh bawk si nen, an chhungkaw thurûk ngaihthlak chu ka zuam zawng tak a ni. 

"Sawi tawpna lai tia sawi dawn chuan..ih, englo,. I nu leh Mapuii te ṭanrual thu bakah Teberi lo tel ve dan vel kha a nia i sawi" ka ti niah niah a. 

"Ni dawn tak e..umm, chumi hmain" tiin min rawn fâwp zauh a. A fawhte hi chu a la thlum reng asin mawle. Mahse, kal thui lo tur khan min duh si a, ka inthunun lehzual a ngai dawn a ni. Keimah leh keimah ka inhmuhsita ka inngaihnep hma ngei hian. 

"Nia, Ka sawi tawh ang khan ka pa nupui leh Mapuii te chu sum duh luat vangin an ṭangrual ta a. A chhan chu ka pa khan Teberi hmingin sum leh pai bakah in hmun lo ram hlu tak a lo dah khiau a. Chu chu ka nuhrawn khan a hre ta si, Teberi a fanu ni ta bawk si lo chu a thîk a ni ber ang chu..a chanvo chu neihsak tumin kawng hrang hrang a dap a. Tin, keimah ngei pawh min bum ta hial a" a ti charh charh a. Chil pawh lem ṭha ngam loin ka lo ngaithla uluk. Tui a han in leh tê tê a, ka lo hmanhmawh ru hle. Zaninah chuan sawi zawhtir ngei ngei ka duh. 

Tihian a sawi chhunzawm ta a. 

"Chuan, nia, keipawh ka nu khan min bum ve tlat a ni. Teberi ka duatzia leh hmangaihzia hriain Teberi nuin kan Teberi rawn lak a tum thu leh a nu chu khawlai mi tak a nih avangin Teberi chu hralh atana rawn lak let leh a tum a nih a rin thu te thlengin min fah a. Kei Teberi khawngaih leh chân hlau bawk si khan khua ka hmu ta lo hial rêng a. Teberi nu nia an sawi ngei chu va hmuin ka tih loh tawp tur ka va tih phah ta a nih kha.." a ti mawlh mawlh a. A ngawi leh daih chu ka lo melh kâwk. Min rawn en a, "May, ka mut a chhuak" a ti ta daih. Ka ngei mang e aw, mahse, ani nizan tlaivar, vawiinah mu bawk si lo chu a mut a chhuak ve lutuk dawn tih ka hriatpui tho bawk si. 

"A laklawh ve ee.." ka ti nang nang a. A nui suk a, "Nakzanah kan chhunzawm dawn nia. Serial film ang deuh hian laklawh deuha tihtawp hian a next a nghahhlelhawm ṭhin" a ti duah a. 

Ner sak chungin, "I mutchhuah tak tak vang pawh a nih loh kha aw" ka ti nghat a. 

"A chhuak tak tak. Light ka off dawn, nang pawh mut tam i mamawh" a ti a. A mitmengah chuan a chauh hmel ve tak tak. Ka nawr lui duh ta bik lo. Light a off a, min rawn kuah ṭha sauh sauhin a chhing ta duar duar a. Kei erawh che loin ka pasal hmel chu ka thlir ngawih ngawih..a hmel hi zawng a ṭha ve chiang a ni. Mahse, ka pasal ni siin ka ta a ni si lo. Kei chu a ta nih ka duh asin le. Engtikah emaw tih ka beiseina nung reng hian eng hun leh hmunah emaw chuan hlim tak tak turin min la hruai thleng ve êm ang chu maw..Beiseina hi a va hlu êm. 

Zinga ka harh chuan Sangbera a lo awm leh tawh lo. Min thawh khalh ve ziah, vawiin lam chu Tleipuia te inah kan kal dawn tak e. Ka tho vat a, ka intifai sawk sawk. Kimtea te exam an zo tawh bawk a, hmanhmawh lutuk a ngai tawh lo. Tukṭhuan ei laiin Kimtea'n, "Vawiin chu heta eikhawm chu in phal tak tak maw? " A ti a. Sangbera ka ngaichang, "Phal tuk e. Phal lohna chhan tur a awm hleinem. Hlim deuhin lo eikhawm ru" Sangbera chuan a ti a. Ka lo hlim ve ringawt. 

"Mahse, ruihhlo leh a kaihhnawih ang kha ti lo u la" ka ti hram. Lo rui suau suau ta se, ka pasal lakah ka inthlahrung dawn lutuk. Kimtea pawh chuan, "Khalamah chuan kan ngaihtuahawm loh" a lo ti var a, nia, ka nau hi ka ringtawk viau mai. 

Sangbera bawk chuan, "Kimtea te chawlh chhung hi a rei lo viau naa, Zirtawpni-ah khian in khaw hluiah chuan zin tum ta ila, Azuii pawh ka be tawh a. Thawhṭan nî-ah i nu lung chu phun tum ila, Kimtea pawh ni hnih khat chu chawl ve mai rawh se" a ti mawlh mawlh a. A ṭhulh fel diam tawhah ka lo ngai a, ka lawmzia chu aw. 

"I thu thu. Keini lam chu kan inpeih reng mai" ka lo ti ve a. Kan inkar boruak chu ṭha hle awm hian a lang leh tawh. Mahse, keima lam dik loh te pawh a niang e, kan inneih hmaa ka inlak hranna zia kha a rawn chhuak leh niin ka hria. Kan intihfel zawhah muangmarin kan insiam a, Kimtea erawh a û bike hman a dil a, ka khap duh ta bik lo. Lehlamah râwlthar an nia, han ride vel kha anni tan chuan a manhla ve êm bawk a ni. Fimkhur tur erawh chuan ka chah leh malh malh tho. Sangbera nen chuan Tleipuia te in lam kan pan dun ta vang vang a. 

Tleipuia te hi an veng chhungah pawh a awm thei leh a milian deuh an ni bawk a, an in pawh a lianin a pui khawp mai. Inleng pawh an ngah. Ka ti mai mai a, Zoramah hian Thingtlangah pawh khawpuiah pawh hausa leh rethei inkar hi a zau ta deuh deuh chu a nih hi maw. Dinhmun ṭha deuh leh hming langsarte chhiat tawhah chuan kan khat hmûr zel a, tlema chenbeh ve deuhte erawh rilruah ngaihpawimawh lohna a awm thuai zel. A chhan niawma lang chu, khang mi chhia leh chuanhnuai deuhte lak aṭang kha chuan eng thil mah kan dawng let thei dawn lo nia kan ngaih vangte hi niin a lang. Amaherawhchu, mak deuh chu khaw khat veng khata tlawmngai tak, chhiat ṭhata thawk tam ber thin mite hi lo rui bâwk bâwkin enliam mai mai mah ila, thihna hial an han tawh chuan rilruah an ṭhahnemngaihna kha a parchhuak tlat tawh a, a mi nawlpui pawh hian kan ngaipawimawh tlat zel..hei erawh kan ze duhawm ber zing ami ka ti lo thei lo. 

Tleipuia te pawh an mi ṭha bawk a, mi an tam viau. Thlan ṭhut ni a ni bawk a. Keini pawh amah Tleipuia'n min lo dawngsawng vat a, Tleipui nu upa ve tawh lam pawh an rawn lang ve nghal var. Sangbera chuan betu leh ngaihventu a ngah leh hle, a nupui nih hi a inthlahrunawm lek lek zel. Tleipuia hoin a pa thlan chu kan va tlawh a, thlan siam pawh an lo awm ve nual. 

"Pate meuh han chân chu rilru a hrehawm duh khawp mai. Ka û lah hi a puitling lo chi a ni ve bawk si, engkim ka kutah a awm a ngai tawh dawn a. Ka patling lo nasa sia" Tleipuia chuan a ti chuar chuar a. 

Ka pa ka lo ngaihtuah daih. Ani kha chu han uina emaw han ngaihna kha ka nei ngai miah lo, mahse, hringtu na nâ na chu hriatchhuah hun a awm lo thei lo va. Sangbera chuan, "A ni khawp ang ṭhianpa, keipawh ka pa a han boral chiah kha chuan ka tliak hnâwp a ni ber e. Ka hrethiam khawp mai che, mahse, mahni koa engkim a han tlak tawh hi chuan rilru hian puitlin lam a zawh ve mai zel a nia." A lo ti ve luam a. Ani hi chu a pa thi lo mah se; a puitlin tho ka ring e a. 

An inah kan chho leh a, In chung zawlah chhoin Tleipuia farnu ten thingpui min rawn pe a. An felin an polite khawp mai. Thingpui in pah chuan kan titi leh a, "Remruati chet duhdan kha ka ngaihtuah hian mak ka la ti tho. Mayi'n a beng lo chhu ngawng se la; Alexa thih hma pawh khan ngaihbel theih tur hi chuan i lakah a inhawng hle ṭhin khan ka hria" Tleia chuan a ti leh charh charh a. Ngaihven vak lo anga lang siin ka bengkhawn ru viau thung. 

Sangbera pawh chuan, "Zep loh chuan mak ka ti ṭhin alawm. Alexa nen intithiam lo hlek se a rawn kal nghal a, zan khat phei chu ka muthilh tawh hnuah rui zetin a rawn kal a. Kan inchai buai nasa alawm. Ṭhianpa Alexa kha ka zah êm a, engmah a thleng lo mai mai zawk a ni. " A lo ti ve a. A sawi thui duh lo mai mai zawk a, Remruati chu a nasat hmel ka ti lehzual. 

Tleipuia bawk chuan, "Tunah an chhuak lehnghal sia, hmeichhe zah hre tawh lo na laileng chu a rawn lan leh ngam tho hi ka ring deuh asin. Mayi tan pawh hian a ngeiawm khawp ang" tiin min rawn melh zauh a, "Nia, a ngeiawm. " Ka lo ti hmiah. Sangbera chuan nui ruh ruh chungin, "Engdang a ni lo ka luck êm a nih hi..a ni em? May" a lo ti zauh a, ka hmui ka tihpawrh khum vak ringawt. Kan ti nek nek a, tlai lam chaw ei hun pawh a lo thleng ve mai. Tleipuia te nen dawhkan pakhat kan kil a, ka rin ai daihin ka ei tam. Eisiam an thiam riau a nih dawn kha. Zan lamah dar 7 thleng kan ṭhu khawmuang ve a, "Ṭhianpa, duh angin ka rawn lang tam thei lo va, min hriatthiam ka ngai. Kar tawpah Mayi te khaw hlui lamah zin kan tum bawk nen, nakinah kan ṭhianhoin kan la rawn râl ang che.." Sangbera chuan a ti mawlh mawlh a. Tleipuia pawh mi â a ni lo bawk a, a hrethiam viauin ka hria. Tichuan, lang leh vat tura intiamin kan hawnsan rih ta phawt a. In kan thlen chuan Kimtea te pawh an lo la awm a. An lo hlim ve hle,. Julie, Angaihi leh Tetea an ni mai a. Angaihi leh Tetea hi an ni ve deuh em ka hre lo. Kan hawn takah chuan an inthlahrung deuhin ka hria a, "Kimtea room lamah duh leh zuk awm u la..inthlahrung suh u" ka ti a. An chhuk ta dial. An hawn hun hunah an haw mai ang chu. 

Keini pawh kan intifai a, kan mu leh hmiah. Tunlai chu mut lam a lang tlat a niang chu maw. Nizan lama a sawi zawh hman lohte pawh ka hriatbelh leh turah ngai ang. A tih fô angin min rawn kuah leh chial a, ka pasal tak tak nise tiin duhthu ka lo sam leh ngei bawk. "Ka pum a nuam tlat lo , ka va inthiar lawk" tiin a tho nulh a. Hmarcha thak a ngam vak si lo va, vawiin tlaia kan chawhmeh ho kha an thak deuh vek sia, a zo lo deuh a nih ka ring. A rawn chhuah leh chuan, "Ka mawng a thip hlur mai" a ti nghut a. Ka nuih a za deuh. 

."Thak i ngam lo em a nih kha" ka ti a. 

"Dik chiah, ka pa lo si" a tih chuan ka nui vak a, "I pa reng" ka lo ti. Min rawn bawhbet thut a, "Hey" ka lo ti vak. 

"Fa nei tawh ang" a ti leh ringawt tawh. "A mak.. chutin a neih ngawt theih loh" ka lo ti hlar a. 

"Fa neih ka duh chhan i hria em?" Tiin ka mitah tak a rawn en. Zâm ru deuh hian, "Hre lo, ti nge?" Ka ti sap a. 

"A chhan chu i rilru ngheh nan" a ti thên a. A sawi awmzia ka lo ngaihtuah kual leh vak tawh. Rum nghutin, "Hmm..ngaihtuah nasa thei e. Ka sawi awmzia hi ril deuh ngaihtuah kher a ngai lo. A awmzia chu ka lakah i nghet lo, i pelhe zung zung a, fa kan neih chuan i rilru a nghet tawh dawn ka tihna a nih chu" a ti ta duah a. Ka varpawh ve chiah. Mahse, a thusawi dan chu mak ka ti thung. 

"Nghet lo turin min duh a ni lo'm ni?" Ka ti ta hû a. Mak tih hmel deuh hian, "Eng a?! Ka rilru lo pui min puttir ṭhin suh" a ti nghut. 

"A ni reng, kal thui suh min tih kha..nimin piah tlaiah khan" ka ti ta a. Ka thawl deuh hawk, ka lo pai rei deuh a ni. A nui ta huk a, "A va atthlak mai mai tak. Ka sawi awmzia te chu kei hian hmeichhe dang ngaihven angah min ngai tawh suh ka tihna a nih kha..ti nge a ni lo lamah daih i lo thlêk ṭhin" a ti mawlh mawlh a. 

"Mahse, i sawi dan kha" ka ti leh hram. 

"Chuvang chu ni maw? Luhaia i lo tluk vel? Hmm, ka lawm e" tiin ka biangah a rawn fâwp zauh. "A ni bawk lo, kal teh" ka lo ti hlar a. A nuih a za tawlh tawlh thung. Kei tak pawh ka nuih chu a za ve lutuk, ka lo ngaihdan dik lo kual kawi vel vanga ka lo intihrehawm hrep kha ka inngei. 

"May..i rilru dik tak sawi hi a harsa viau em ni?" A ti zawi ta sup a. A thupui kan kheh chho ṭan dawn e. Zâm a hun tawh lo tih hriain ka intihuaisen lui a. 

"I rilru dik tak i sawi bik ami?" Ka ti sep a. 

"Sawi kher ngai lovin ka lantir tam tawk tawh lo maw?" A ti nghut a. Chhan dan tur ka ngaihtuah rauh ruah mai. 

"Keipawn ka lantir ve tho alawm..nupa nun pawh kan hman kha " zak chung chungin ka ti a. 

"Ka hria alawm,. Mahse, nupui i nih vanga i tihtur ti ve mai angah i inngai alawm, a dik em? may, inpawh leh inhmangaih taka hmangaihna chen dun awmzia i hriat hi ka duh a ni" a ti tlang ta hrâwk a. Ka manthiam ṭan. 

"Dik tak chuan ka zak alawm" ka ti zawi raih a. 

"Ka hria, i zahna kha phumbo ka tum a, mahse, i inthununtir tlat a. Tin, keimahah i innghat thlap ngam lo bawk" a ti ta a. Chu chu a nia ka rilru kaptu chu. 

"A dik alawm, ka sawi ve tawp ang aw" ka han ti tê tê a. "Umm, i sawi hun ka nghak ṭhin" a lo ti vat. 

Ka mut dan siamremin, "Ih maw, a tir kha chuan Remruati laka inphen nan leh keini unau min puih i duh vanga inneih kha i duh niin ka hria a. Kan han innei a, inchenchilh reng chuan ka lo ngaina ta che a. Ih, ka hmangaih che em chu ka hre lo. Mahse, nakinah min la ṭhen leh mai ka ring a. Chutiang vel chu" ka ti ta niah niah a. Ka sawi tum ang pawn ka sawi ta chuang lo. Min melh kul si a, a zâmâwm êm a ni. 

Ani pawh chuan thutak zawkin, "Chutianga i ngaihdan ang chiah chuan ngaihdan ka lo nei zawk asin. Ka lakah i nghet lo va, i nau hmakhua avang chauha min nei angin ka lo ngai che. Lsa te, Samua te avang hian ka rilru a rûm ṭhin. I hriat loh hian ka lo buai ve viau zel a nia" a ti a. Chutia kan han inphawrh fai ta vek chuan nun a tinuam ta sawt mai. 

"A nih May, nupa hlim tak kan ni thei tawhin i ring em? Chhungkua ka duh a ni. Ṭhen leh mai mai tura nupui neih ka duh loh vang a nia ka lenrei ni..nang leh kei hi chuan a tawp khar dun ang aw" sawmna azawnga sawmna duhawm ber ka han dawng ta chu chhan mai ngaihna ka hre lo. Ka chiâi vek. 

"Ka..ih..i ti tak tak tiraw?" Ka ti hâ a. A lo bu nghut, lungchim em em hian min melh bawk. Ka tuiral a ni ber e. "Aw..ka duh, chhungkaw dina damchhunga inneih ka duh" ka ti ve ta tawp a. Min rawn kuah nghal thlawp, keipawn ka lo kuah ve chial. 

Nautê siam hna thawh leh a tum lai takin a pum a rawn nuam lo leh tawh. Ka nuih hi a va za tak. Thinrim zetin bathroomah a lut a, ka lo dir tlat tlat. Naute siam moodah ka awm thei tawh lo. Ani pawh a rawn chhuah leh chuan, "Hmarcha hi ka ngam ve tawh ang. Naktuk aṭangin" a ti hmuk hmuk a. Ka lo nui awr awr a. "Hmm, zanin chu awl phawt mai ang. Mood a bo vek alawm" tiin a mu zangthal a. Ka insum theih hnuah, "Nizana i sawi bak kha sawi leh mai la..umm" tiin ka han tlawn kual vel a. Ka zak lo reng reng. 

"Aw le..sawi zawh hman tum tawh ang aw. Sawi fô pawh hi a ninawm ṭhin" a ti sup a. Ngaithla turin ka lo insiamrem sauh sauh. 

"Khatia Teberi nu anga an sawi ka va hmuh khan, an sawi ang tak takin khawlai mi hmel tak, inchei vur mah se, ṭawp ru tlat kan tih ang hi a lo ni ngei a. A lo rui chhâw nghe nghe. Kan inhnial hrep a, 'Ka fanu saw ka ta a ni. I pa sawn min chhuhsak alawm, chuvangin ka la let leh dawn a ni' a ti tlat mai si. Nu pangngai tak, fate hmangaih tak tak hmel chu pu nise ka inbengdai thei ngei ang. Mahse, sawi hreh a nei si lo, 'Pawisa ka nei lo va, ka mamawhna a sang khawp mai. Chuvangin sum siam nan ka fanu saw ka lakir ang,. Courtah pawh ka kal mai ang. I pa ngei pawh hi kidnapp case vangin a tâng thei tih hre rawh' tih thlengin min ṭawngkhum a ni. Ka lawm lo va, ka nau duat vangin ka chiâi ve ta hial a nih kha. A duh ang zat sum pek ka tiam ta ngawt a. A lo pawm ve mai. Sum fai ṭhahnem tak ka pe ta a, reh hlen tawh turin ka intiamtir thlap. Ka lo ring ve ringawt kha a pawi hle a lo ni. 

Thla tam pawh a liam hmain min rawn hnimhnai leh ṭan a. Teberi hian a hriat ka hlau em em bawk si. Tichuan, Teberi nu anga inchhal nen chuan kan inhmu leh ta a. Nasa takin kan inhnial a ni. Ani lah a zâm duh malêk a, pawisa chiah a nunah khan a lal a ni tawp mai. Chutia thinrim taka kan inhnial takah chuan ka insum zo lo ta chiah a, ka nam ta a. Kawngthlangah a lum ta mai. Chutah chuan ka damchhunga keimah leh keimah ka inngaihnepna turin chu hmeichhia chu a awm awma awm turin ka kalsan ta hmiah mai a ni. Kha thil khan ka nun a vaw chhe rei teh asin. Teberi'n a hriat ka hlau a, Mapuii leh ka nu lahin min vau nan tak an hmang bawk si. Khatihlai khan Teberi leh Zôra te hi an inngaizawng ṭan tawh a. Ka nu min ngenna vangin Zôr nen inhnimhnai lo turin ka theihtawpin ka dang a, Teberi huatna ka hlawhchhuak hial nghe nghe. Ka mit kha a del rei khawp mai. Ka pa boral hma deuh khan ka harhchhuak ta chauh a. Inphiarûkna ril tak a lo ni.." a tih mawlh mawlh lai chuan ka phone a rawn ri thut mai a! Kan va phu dun chiang tak. Kimtea a lo nia! Ani hi darkar chanve liam ta khan Julie te thlahin a chhuak kha a nia. 

"Hello,." Ka tih chuan thawm ri nuai nuai karah mipa aw thum lam hian, "Tu nge ka biak aw. He mi phone neitu hi a accident a,." A rawn ti ta mai! Ka va ṭhu chhuak rang tak. 

"Eng a?! Eng maw?" Ka ti ta chiam a. Ka chiâi zia hriain Sangbera chuan ka phone chu a rawn la a, speaker a on ta a. Mipa chuan, "Hei truck nen an insu hlauh mai a! Mahse, a chhe ber kan thleng lo a nia, tunah damdawi inah phurh chhoh kan tum mek e. Civil Hospital lamah rawn kal thei ula a lawmawm ngawt ang" a ti felfai thlap a. Ka hmui hupin ka lo khur zawih zawih thung. Sangbera chuan, "A lawmawm e, kan rawn kal nghal e" a ti nghet charh a. Phone a dah hnuah, "Kal ang. Insiam la" a ti dam thluam.

"A thi lovang tiraw? A thi ang em?" Ka lo ti sek sek. 

"Thi dawn lo,. A thi dawn lo reng reng" tiin min rawn kaitho a, Sangbera sawi a nih vang nge ka thla a muang huai thei. Ka kekawr hak tur a va zawng a, min haktir, kawr erawh a chungah kawrlum ka hak avangin ka thlak lo. A inpeih rang khawp mai. Tichuan, Civil Hospital lam pan chuan chak zetin a tlan ta a. 

Kan han thlen chhoh chuan amah vekin buaipui ngai a buaipui a, Kimtea chu a lu a sawh nat deuh vangin ICU-ah an nawrlut a lo ni. ICU meuha awm te chu kan ngaihdan a dan ṭhin hi, ka thla a phâng thar leh a, ka awmdan ka theihnghilh vek. Midang han hrilh kual tur pawh Sangbera vekin a ti..kei chu ka ṭhu tawp ringawt. Ka nau lehzel ka chân chuan thih ve mai inringsa ranin ka awm. Ani chauh hi he khawvela ka thisen zawmpui ka neihchhun a ni. Thi thei a la ni lo. 

"May, hawh va inphihharh lawk ang" zing dar 1 velah chuan a rawn ti a. Kimtea lo buaipuitu te kha an veng LC hruaitu te bakah YMA hruaitu te an lo ni hlauh a, an felin an tlawmngai takzet. Sangbera'n lawmthu a hrilh hnuah an haw ve ta kha a nia. Angaihi, Julie leh Tetea te erawh an ṭhianpa chu an rawn menpui ve ṭhap. Julie u pawh a rawn tel ve. An fel ka va ti tak. Tin, U Kawnga a rawn chho bawk a. Chubak kei hian ṭhenrual sawi tur ka nei ve lo. 

Sangbera nen chuan toilet lam kan pan dun a. Boruak pawh a vawt tawh khawp mai. Thawm a reh dûk tawh a. Amah hmachhawn zawngin min dintir a, "May, ṭawngṭai rawh. I thinlung zawng zawngin ṭawngṭai rawh le. " A ti hniam ruih a. A mitmengah hian thlaphanna ka va hmu tel ve tlat! Kimtea dinhmun a ṭha lo viau a nih ka ring. Min thlamuan tur ber pawn ṭawngtaina bak hmachhuan tur a nei ta lo. 

"Ka thei lo. Kimtea pawh min laksak leh a tum a nih hi. A awm lo, ani hi awm se ka vanduai lovang" ka ti tuar tuar a. Ka rilru a hel ngawih ngawih. Ka bek tawn tawnah vuanin amah min entir a, "Ni lo, May, hei..Pathian a awm. I auh hun nghakin i bulah a awm reng. Tun hi i tan hun ṭha a ni. Kimtea nunna nena thleng kher ngai lovin i thinlung kha pe rawh. I hria em? Ka sawi chu..Duatte, Pathian chuan a hmangaih em em che asin" a ti dap dap a. Mittui kar aṭangin ka han melh ṭâwk ṭâwk..ka maimichhing leh a. Bang nghenga dingin, "Lalpa, i awm a nih chuan ka nau hi tidam rawh. Khawngaih takin" ka thinlung zawng zawngin ka ti ta a. Ka thawl huai miah lo va, ka zang hawk hek lo. Mahse, ka thinlung hian Pathian a awm tih a hre thei. Tin, ka nau chu a thi dawn lo tih chiang takin ka hre bawk. 

Sangbera pawh chu ka hmuh lai rengin chhuatah chuan a ṭhingṭhi a.."Lalpa, ka nupui hi chhandam rawh. Nangma laka hel nawn leh turin a nau hi laksak lo hram rawh" tiin a ṭawngṭai a. Kei ka lo dam thung. Pathian remruat dan hi hriatthiam a har fô ṭhin a nih hi..vanduai ber anga kan inngaihna te, engmah nei ve lo anga kan inngaihna te hi setana hnathawh a ni. Min hmangaiha min ngaidam duh rengtu Pathian hi kan duhdan anga chettir kan tum luatah kan ringhlel ṭhin a lo ni. 

Min rawn kai a, light dul ruih hnuaiah chuan inmelhin, "Kimtea a dam ang. Chuan, May, ka hmangaih che" a ti zawi sup a.