Sangbera 15

SANGBERA (15)

Ziaktu : Toni Râlte

Remruati nui hmel ngeiawm zet avang chuan eng nge ka chungah thleng tih ka hrethiam chawpchilh nghal. Rapthlak ka va ti tak êm..thahrui reng reng ka nei si lo. Thei leh thei loin ka phone chu ka ban ṭâwk ṭâwk a. Malsawma chuan a rawn chhuih hla dâwrh mai. Mangang em em hian ka han melh chho a, ani pawh a nui sâwng mai. Eng nge ka chungah an tih dawn tih ka ngaihruat thiam bawk si, engmah hre lo law law ila a ṭha tur. Mayi, a nat leh harsat lai ber pawh a hming lam duh ngai lo va pehhel ṭâng ṭâng thin khan a tawpkhawkah chuan, "Lalpa, min pui rawh" tiin ka phun ta sep a. Ka khaw hmuh a thim ṭan a, ka zawi tawlh tawlh bawk. Malsawma chuan min rawn pawm tho lawp a, ka ṭang thei der si lo. Remruati chuan, "An nupa khumah ngei aw" a lo ti sar sar. Ka ṭah a chhuak a, ka ṭap thei si lo. Tu emaw tal min pui thei tur ka va mamawh tehlul êm. Pathian lah chu a ngawi tlat si, a hringhranin rawn inlar se, Heng mi tenawm pahnihte hi hlep ral daih se ka va duh êm..Sangber,. Khawngaihin lo haw hram teh. I nupui hi thil tenawm tak tihpui an tum a nia..khumah chuan min nghat a. Malsawma thaw ri te chu ka bengah ring tak a ni. Remruati chuan, "Lawk, cover hmain a thawmhnaw kha phelh sa rawh. " A ti leh sa sa a. Ka meng diar diar a, Malsawma chuan thaw huam huam chungin ka thawmhnaw te chu a phelh ṭan ta a. Ka lo dang thei si lo. Lalpa, i va che har ve mawle..

Saruak ngal ngata min muttir hnu chuan an tum ber hna thawk tur chuan Malsawma pawh chu a inhlip ve ta a. "Kawngka i kalh em?" Tiin Remruati a bia a. "Ehe! Lawks" tih leh Remruati chu chhuah a rual a..mahse, a rak tuar ri kan hre nghal. Ka lu chu thei leh thei lo hian ka tun a, Malsawma pawh a che hrut, mahse, "Ka that dawn che u a ni" ka aw hriat ṭhan tak hian a rawn ti vawt ta raih mai. Remruati'n, "I ngaihdan ang kha a ni lo. Ama duhthlanna ngei a nia..min awih rawh. Nang nen inṭhen a duh vangin video lem siampui turin min sawm a nih kha. Pawisa pawh min pek a tiam" a ti zawt zawt a. Dâwt sawi thinphut pawh a nei miah lo em mawni le. Malsawma erawh a hamhaih nge a ding reng ringawtin ka hria. Ri deuh sawk sawk ka hria a. Remruati rak tuar tuar ka hre zui bawk. Ka theihtawpa insangmarin ka inbengkang a, ka khur hlawk hlawk mai. Ka ṭhu chhuak ve thei hram, saruaka awm chung chuan kan nupa pindana thil thleng mek chu ka thlir ta ngawt ngawt a. 

Sangbera chuan Malsawma chu chhuatah a bawhbet a, a hmaiah a hnek mawlh mawlh mai. Remruati'n chhan tumin a va ban a, a samah a lo ṭhamsak nawk a, bang thlanglam deng dawt khawpin a nam dâwrh mai. Remruati chuan a tukhum a dawng vang vang a, a chechâng leh tawh lo. Malsawma lah chu a hnek thi buai tawh a. A sawisa hlum thei takngial dawna ka hriat avangin thei leh thei lo hian, "Duhtawk rawh..a thi ang" ka va ti a. Vawi 3 lai ka sawi hnuah a duhtawk ve ta chauh. Malsawma chu a thi nge nikhaw hre loin a awm tih ka hre lo, a che lo reng reng. Sangbera chu rawn kalin ka thawmhnaw chu min haktir mawlh mawlh a, a ṭawng lo. A mitmeng chu mei alh ang maiin a de sawr sawr mai a ni. A thinrim takzet tih a lang, ka hmuh vawikhatna a ni bawk. "An sawi ang kha a ni miah lo asin" ka ti ṭiau a. Min rawn kuah thlawp, a âwmah min pawmbet a. "Ka hria..hahdam rawh. Ka naute" a ti dam thlup a. Ka ṭah a chhuah êm vangin insum buai lovin ka baw ta hawk hawk a. Ka samah chulin ka hnungzângte chu a beng thek thek a, "Umm,..i him tawh alawm. Ka rawn tlai hlek ang tih erawh nang aiin ka hlau zawk..a ṭha vek tawh aw..Duatte" a ti sup sup a. Sangbera angchhunga tlukluk chu himna a ni tih ka chiang ta kher mai. Ani hi ka pasal ni reng se ka va duh êm..ni e, a mi ngaihsakna, a mi dawhtheihna leh ka mamawh huna tlanchhe ngai lo a nihna te pawh hi hmangaih chhan tlak an tlin tawh laiin amah hi Sangbera a nih vang hrim hrim paw'n ka hmangaih tawh niin ka hria. Ka hmangaih hi thilmak a ni lo va, tlawmna pawh a ni hek lo. Kei ang hian in khatah khum khatah awmdunpui ve ula, engtiang chiaha hmangaih awlsam nge a nih chu in hre ve mai ang. 

Tichuan, ka harh tak deuh hnu chuan thil awmzia ka sawi a. Rei pawh a ni lo, Police hmel kan hmu ta a. Ka pasal rawn man tur emaw tiin ka lo hlauthawng khawp mai a. Mahse, Remruati leh Malsawma te chu an rawn man ta chat chat mai. Malsawma erawh damdawi in lam panpui a ngai dawn a ni. Remruati chuan an chhuahpui dawn chuan, "Sawmdawng, hetiang hian maw ṭhiantha kan intih dawn a? I lo va mak ta ve. Ka hmangaih che asin, ka hmangaih vang chea hetiang thil hi ti ka ni asin. Hrethiam ve ta che..Zoremmawi, tenawmnu, nangmah vang hian ka chhe ta vek a nih hi..hre rawh, hetiang reng hi chu a ni lovang aw" a ti bawrh bawrh mai a. Tuman kan chhang lo. An phur liam ta. 

"Hlauh tur i nei ta lo" a ti zawi sup a. 

Hnukulh ṭeuhin, "Ka lawm e" ka lo ti ve. 

A hnuah a rawn hawn dan vel ka zawh chuan, "Nubawihi'n min lo call a, in inbiak laia phone dah si lo va i ngawih thut dan te, Remruati i auh thu te a rawn sawi a. Ngaihṭhatlohna lian tak ka nei ta tlat mai a. Ka rawn call che a, a ring quit ṭhak ṭhak si. A ranga rangin ka rawn tlan haw ta a ni. Kawngka a lo inkalh lo va, thawm dim takin kan pindan lam ka rawn pan a, kawngka inkau aṭangin an chetdan zawng zawngte kha ka rawn hmu ta vek a ni. Ka han nghak hlek a, Remruati rawn chhuak khan min hmu ta a nih kha" a ti. 

A hun takah a rawn thleng a, ka lawmzia hi Pathian pawhin min hriatpui ang. "I ṭawngṭai em?" A tih chuan, "Umm, mahse, a ngawi leh reng a" ka ti sap a. 

Ka khabe rawn tuai zauhin, "Keimah hi i ṭawngṭai chhanna ka ni tih hrethiam lo rual chu i ni tawh lo mawle" a ti nghut a. A hring a hrana Pathian rawn inrawlh tura ka ngai kha mawl ka inti hnuhnawh kher mai. Ni e, ka pasal ngei hi ka ṭawngṭai chhanna a ni. Kimtea pawn thil awmzia a hre ve a, a thinrim ve khawp mai. Mahse, Remruati te chu kan tan an hlauhawm chhunzawm ngam ka ring tawh lo. Jail-ah an tan ka beisei a, an tang lo a nih pawhin he lai hmun hi chu an rawn rap ngam kher tawh lovang. Mi chunga dik lo lutuka thil ti thinte hi chu an tluang hlen ngai lo. An phutawk an hmu a, ka khawngaih hranpa lo fia fia khawp mai. 

A tuk sunday zingkarah U Bawiha'n min lo be ve teh mial a. "I thla hual a ngai tlat, tlaiah zanriah rawn ei r'u aw." A rawn ti ngei! Thil thleng an lo hre ve bawk nen, "Kan pa thu thu" ka lo ti khawmawi ve a. "Huh..kan nu ti zawk ta che..in nu a nih kha" a rawn tih chuan kan nui nasa mai. Tlai lama chaw ei tur chuan kan inbe fel ta a, a hmaa kan eikhawm boruak ang kha thleng tawh lo hram se ka lawm ngawt ang. Kan inneih aṭanga a vawikhat nan leh ka û boral aṭanga a vawikhat nan inkhawm tur chuan ka insiam ve ta a. Ka pasal hi zahawm ka tih êm vang a ni. Kimtea pawn ka insiam a hmuh chuan a phur kher mai. Puan ka han bihte chu ka khawr ṭût mai a! Ka inngei zawk e a. 

"I mawi lutuk. " Kan pa chuan a lo ti hlut a, "I ninawm" ka ti hmuk. A nuih a za sia, Kimtea nen an insignal zauh zauh mai. Biak in-a ka han lut leh chu ka piangnawn leh emaw ka ti hial zawk. Ka luh lohna a rei ve tawh êm a ni. Ka lai hû mai a, ka hawi hruk hruk bawk. Khawpui a ni bawk a, tu khaw khain min ûksak lo va ,ka lawm tak tak a ni. Sangbera erawh hretu a mual mual chu a nei tam angreng. Inkhawm banah te chuan an lo be sek hlawm a, ani lah pa ṭha tih takah ṭha tak chuan a lo chhang ve zel bawk a, kan khawtlai phah zo vek. 

Kimtea chu Julie chhungten chaw eiah an lo sawm ve hlauh mai a! A engtizia mawni dawn ni. Kan bulah pawh a rawn ei ve thei dawn lo. Julie chungchang hi ka hre tam lo viau mai a. Kimtea sawi hmangah chhungkaw pangngai tak ni chuan an lang a, unau pali zinga a naupang ber niin a duat pawh an duat ve hle a niawm e. Tin, a pa hi Pathian ṭih mi tak, sawrkar hnathawk a ni a. A fate hian scholarship pawh an dil ve ngai lo a niawm e. A pa hian dâwt hmanga pawisa lak kha rem a ti tlat lo,. Nu ber pawh an pa hnungzui, fel tak mai a ni bawk. A nih ka rinna chu Sangbera nen kan inneih hma pawh khan Kimtea hi a leng ve zauh tawh a. An sual thu emaw Julie nen an inkara buaina an siam thu a sawi awm ka hre ngai lo. Chuvang chuan keipawn an inkawp hi ka sawisel hran lo. Julie lah a sual hran si lo va. Keini pawh inkhawm banah chuan ka awm deuh mai mai, phone ka khawih a, Sangbera erawh lehkha eng eng emaw a chingfel a niang. A buai hmel angreng. Chhunah thingpui ka va lumsak a, ka pek pah chuan ka ṭhu ve a, "Puih theihna che ka nei lo maw?" Ka ti khawmawi ve a. 

Khi sukin, "Intibuai duh lo mai rawh, i thinchhe sia, i thawh chi a ni lo" a ti pek a! Ka melh no fahran lo khawp mai. 

"Tlaiah chuan kal hma ila, naupangho ka duat châk tawh" ka ti a. 

"Umm hma ang. May, Bawiha hi eng nge i hmuhdan?" A ti teh thut a. Min tihrilhhai alawm le. 

"Engtia hmuh dan?" Ka ti sep a. 

"Kan mizia a inpersan em? A nelawm loh i ti em?" A ti a. 

"Zep loh chuan U Bawiha hi a pa ka ti,. Ka sawi thiam lo. Mahse, duh ai chuan a ṭawng tlem ka tia, nêl a har deuh. " Ka ti ve mial mial a. 

"Kei aiin a pa em?" A ti leh ta zel. A va naupangchhia tak e aw. 

"I ho em mai a" ka ti ringawt. 

"Sawi ve mai la" a ti tlat si, "Nangte chu i pa ber alawm" tih pahin no ka la a, ka kal daih. Ka zak ve deuh a ni. Hetia han inchhaih vel hi ka zah zawng tak, mahse, min tihlim rutu nisi a ni. Ka la practice chhoh ve zel pawh a ngai maithei a ni. Tihtur awm hek lo, thawmhnaw ka thlep fel ta mai mai a. Kan mo kawr kha ṭha taka thlehfelin ka thulkhung ran tawh. Nakin zelah a la hlu dawn tih ka hria. Sangbera thawmhnaw ka thleh fel lai chuan amah a rawn lut a, "I inbual emaw tia" a rawn ti lut. 

"A la hma lo mi?" Ka tih chuan a sana a bih vut a, "I inbual rei dan ngaihtuah chuan hma tawh lo" a ti sup. Ka ner sak a, "Inbual rei chuan kan fai nge nge" ka ti ve leh hram. Ṭawngkam thlawn hi ka ba duh bau si lo va. Inbual tur chuan ka luhsan ta nge nge. 

Ka phone ri ral ral chu ka hre pha reng, tu tak ni ang maw? Sangbera awin, "Hello, a inbual a..Mayi hi" a tih lung lung chu ka hria. Ka hre zui tawh lo. Ka inbual zo ka va chhuah chuan a lo awm lo. Ngaihven zui lovin ka inthlak nghal sawk sawk a, tunah chuan Sangbera zarah skin care te pawh ka ti chho ve ṭan a. Inenkawl ngai lo tih takah a lang hma viau lehnghal. Tin, ka thau! Thau tihah ka nulat lai ai khan ka thau hlek..mawi lo khawp chu a ni lo naa, hei aia thau belh chu ka duh hran lo. Exer lah ka la ve peih si lo va, ei leh in lam insûm deuh a ngai dawn a nih hi. Ka sam ka hruk hul laiin a rawn lut a, "Tu nge lo call a?" Ka ti satliah. 

Mi rawn melh vung vung a, a mitmenga lungawi lohna chu thup a tum hram hram ni hian ka hria.."I ex" a ti tawi tak a. Samua a ni tih ka hre nghal, ani lo ex ka nei si lova. 

"Eng nge a sawi a?" Ka ti a. 

"Tam tak" a ti leh ringawt. 

"Sawi ve mai la, eng nge a sawi?" Ka ti nawn leh sak. 

"Theihnghilh rawh" a ti chhum hmuk a, bathroomah a lut daih. Ka va hrilhhai tak e aw. Ka phone chu lain samua ka call ta vat. A la duh ṭhak lo zui! Eng thu fakâu nge maw a lo fah le? He mihringpa hi a hnawksak dawn tlatin ka hria. 

In kan chhuahsan dawn thlengin a ṭawng lo. A lungawi lohna ka hre bawk si lo, amah lahin sawi tâng e a ti bawk si lo. Rilru a va tibuai reuh tak e aw. Motora kan chuan hnuah, "A hrehawm a nia, hetia awm reng hi" ka ti ta tawp a. Ka awrâwl pawn ngaihno a bei tehchiam bik lo. 

"Ani nen khan inhmuh leh a ngai em ni?" A ti ta a. Ka nui tawp. 

"Awiii! Tiang chuan a lo sawi elo? A va tenawm tak" ka ti ta chiam a. 

"Sawi chuang nang..ka dâwp che" a ti zawi sup..ka melh rum kher mai. "I va sual tak" ka ti nghek a. A nui ve ta nge nge..ka thaw huai mai. Ni e, a lungawi lo tih ka hriatna ringawt pawn min va thunun hneh tawh êm. 

"Mahse, eng nge a sawi hrim hrim?" Ka ti ṭâlh a. 

Hmalam melhin, "In la inbiak fô thu leh keimah min ṭhena inneih in tum thu te" a ti a. Ka nui hawk hawk.."Dâwt a va sawi thei tak" ka ti nghat a. 

"Ruih a neiin ka hria" a ti nghut a. 

Dr. Zari pawh kha zawh chian law law ka duh ta. "A rui ang, dik tak chuan amah khan a nia Dr. Zari vel pawh min hrilh..i lo riak reng reng em ni?" Ka ti ta tawp a. 

Thawk a la hulh a, ka lo hlauthawng hman. 

"Dr. Zari pasal hi ka sumdawnpui Pianmawia a nia. Meeting laklawh vangin an quarterah khan kei leh ka naute nen zan khat kha chu kan riak ngei alawm" a ti ta a. Mak deuh maiin ka lo awih thlap. A chhan chu Sangbera'n dâwt a sawi ka la hre tlat lo. A lo sawi tawh maithei, mahse, kei chuan ka hre ve lo. 

"A nih chu, a rawn confi sia..min ṭhawng em alawm" ka ti niah niah a. Min rawn melh zauhin, "Mahse, a lo hrilh che avangin ka nupui i ni thei a..a dik em!" A tih chuan min tihrilhhai deuh. 

"I nupui ka ni sa reng alawm" ka ti hû a. 

"I bo thei e.." a ti ringawt. Mahse, a sawi kî ka man ta chiah. "Hmela" ka ti leh vak..a lo nui char char thung. Nia, Samua'n kha thil min hrilh avang khan bawnghnutê a liam phah a, chu thil kalzel avang chuan Sangbera nen kan boruak a ṭha lo chho a, a programme cancelin a rawn haw ta hial a! Khami zan khan a ni nupa nun kan hman tak ni. Hmn, Samua chuan a thawk ṭha ti tawh mai ang. 

U Bawiha te in kan thlen chuan Mami'n rawng a lo bawl mek a. Teberi te tel ve se ka tih nen Zôra ṭhianpa nu a boral hlauh mai a! An lo kal remchang thei lo a ni. Naupangho nen pawh hian kan innêl ve viau tawh a. Mahse, keizawng fa enkawl ka thiam ka ring lo. An tlat tlata ka tlattir ka ring, a chhan chu tihnat leh an ṭah ka hlauh luatah. Sangbera bawk hian a thiam lehpek ang. A naute a enkawla a kaihhruai dan reng a puitling êm mai. 

Mami ka pui ve nghal a, a titi leh hlut tawh. "Awii nizan chu maw Bawiha a titau ta pek a. A chhan pawh ṭhenawm pathlawi a rawn leng a, kan titi tui nasa mai a. Ani Bawiha lah a lo nuamsam vak lo nge , a sawi si lo. Mut hnuah kei aiin ngaihsak zawk a ti ṭung mai a. Ka han kuah vel sasawi pawn lehlam min hawisan hmak hmak..a thikthu hi chhe bawrlawk tak a ni. Mama hi a thikthu a chhe ve em? An unau hi an ni vek, Teberi pawh Zôra hian a dawhthei a nia aw. " A ti sar sar a. Ka lo nui vur vur ringawt. U Bawiha chu a inhmeh hlawl lo. 

"U Sangbera hi chu a thikthu a chhe vak pawn ka hre lo" ka ti a. 

"I lerh lo ve êm a, chuvang a niang" a ti ve mai bawk. Sangbera aiin ka thikthu a chhe zawk tih sawi erawh ka duh bik ṭhak lo. Zanriah pawh chu hlim takin kan ei ho ta a, Mami avangin boruak a nawm phah viau. Ani sawi tur a hria a, keiin ka lo zawm ve thei zel bawk a. A nuam a ni mai, Sangbera leh Bawiha erawh an ṭawng ve vak lo. Kan eikham kan han ṭhu khawm leh chu Mami a ding hluai pek a! A thutak phian lehnghal. An pa pawn makti zet hian a lo en a.

"Sawi tur ka nei a..Teberi te tel ve se ka tih nen,. Mahse, a rem ta si lo va. Ka sawi tho mai ang. Ih, englo a nia. Nau ka pai a" a ti ta a. A sawi dan teh tawp chu aw..

U Bawiha a ding zawk a, "Tak tak em? Dâwt a ni lo tiraw?" A ti chul mai. 

"Tak tak ni e, Bawihpuia te nau tur ka pai leh mêk" Mami chuan uar zet hian a lo ti a. 

"Ka va lawm tak.." tih leh U Bawiha chuan va kuah a rual a. Sangbera nen hmuhnawm ti zetin kan lo thlir reng. Ka lawmpui takzet a ni. U Bawiha zawk chuan kan nupa chuan min rawn enin, "Nangni pawh hi Mama, nei ve vat r'u..in neih har lutuk chuan nang lah i naupang tawh si lo va..a ṭha lo" a ti ve luam a. Kan inmelh zawk ringawt. Sex vawikhat chiah kan la hmang tih an hre lo chu ka lawm zawk. Hre ta se mak an tih bakah a ṭhâwng dawn lutuk. Fa neih chu ka ngaihtuahnaah pawh a la lut meuh lo. Sangbera chuan, "Nia, kan pai ve ṭêp ang, Mayi hi ka khawngaih deuh a" a ti ve ta ngawt a. Kan invengthâwng tawn lutuk chuan lungte pawh a tichhe lek lek alawm le. Hawn lam kan hnaih ve ta a, kan pahnih chauha kan han awm takah chuan sawi tur a vâng leh ta raih mai. Kimtea kan va lam kawi leh a, a rawn chuan takah chuan an chaw eina vel a sawi suam suam a, kan boruak muk ru deuh pawh a rawn tikiang titih. "Ate, Julie pain maw..'Kimte, Julie hi i hmangaih em?' min ti ringawt a. Ka zak lutuk, Julie pawh a sen vek. Mahse, 'Aw ka hmangaih' ka ti tawp a. Engtinmah min ti lo..min be ṭha lutuk ringawt" a tih chuan Sangbera nen kan nui hawk hawk mai. Kan tunlai khawvel hmanhmawh tawhzia hi chu aw. 

"Kimte, kan sawi ta sa sa..Hei ngaihzawng i nei a, kan hriatpui vekin..mahse, nupa nih hma chuan sex hman loh tur aw..hrereng ang che, tiang kawngah chuan ka ringtawk che a nia" thutak deuh zawkin ka ti ta a. Kimtea pawh chuan, "Aw, ka hria alawm..khalamah chuan min ngaihtuah suh u" a ti nghet charh a. Rilru a nuam huai e. Mipa an ni emaw hmeichhia an ni emaw inngaihna suala tlukluh loh hram hi a ṭha. Pathian hian hur sualna hi a lo haw êm mai. Amaherawhchu, lo tisual tawh, lo pelhe tawh te pawh beidawna chhe ta vek anga inngaih tur a ni lo. Kan lo tihsual tawh aṭanga inzir ṭhinte hi mi fing an ni. Pathian hian sual sim chu englai pawn a ngaidam thei tih kan hriat kha..

Sangbera'n ,"Tihian i ti i ti ang a, laklawhah te hian i ru ve ngawt ang e aw" a lo ti ve fuk a. 

"Teuh lo, nupui ruk chu ka duh lo. Bakah nupui nei rual ka la ni lo ve ee. Ka graduate hnuah pawh hna zawn leh te te te ka la duh" Kimtea chuan inla puitling deuh hian a lo ti ve a. 

"Chutiang tur chu a ni, mipa chuan nupui fanau chawm ngei hi tum tlat tur..nupui pawh kan ngam nge nge" Sangbera chuan a lo ti leh nghut nghut a, ka va mitsir ralh a, min en lem lo. A ṭawng dan vel hi ngeiawm tih dawna ngei chiam theih si loh, ngei loh dawna awm tinuam si lo ang kha a nia. Ka ngawi zui daih. In kan thleng a, Kimtea pawh ngawi rengin a pindanah a chhuk nghal. 

Kei pawh ka intifai a, ka mu thân mai. Mut tam hi a ṭha ber mai. Kan pa chu a rawn mu a, khua a la vawt lutuk lo naa, inkuah nuam tawk vel a ni. "Mut dawn hian ṭawngṭai ve ṭhin ta che" ka ti hlak hlak a. 

"Ka rilruin ka ṭawngṭai alawm" a ti ringawt. 

"Chutiang a ho ee" ka lo tihsan a. Min rawn kuah leh chut. 

"May, sawi dun ang" a ti teh ngawt a. A eng thu nge maw ni dawn le..leh thut thut zel hian. 

"Eng chu" ka lo ti sap a. 

Min rawn kuah nghet sauhin, "Fa neih ka duh" a ti ta a. Ka melh kâwk mai. A nau thusawi kha a ngaihtuah chhunzawm chiang lutuk. Engtia chhan chi nge niang aw.."Chutin a neih theih ngawt ami?" Ka ti ta ngawt a..

A nui huk, "Fa nei tur chuan eng emaw tihte chu ngai ve e..i hria. Chumi hma chuan fa neih i inzuam tawh em tih lam a ni" a ti ta mial mial a. 

Ka inngaihtuah vang vang. Fa chu ka awt ve tho mai, mahse, ka rilru tibuaitu chu lo inṭhen ta ila ka fa chu ka venghim thei ang em? Ka bula khawsak rem a ti ang em? "May, thil i ngaihtuah nasa lutuk a, i buai a nih kha" a rawn ti leh sup a. A ni dawn tak e, a sawi dik lo hran miah lo. Ni e, thil tam tak ka ngaihtuah a, ka buai em em zel mai. Ti nge ka lo lungkham vak kher zel le? Ka pasal hi kei anga rethei a ni lo tih ka lo theihnghilh thin. Lo inṭhen pawh ni ila ka hlauhthawn ang buaina hi ka hmachhawn kher lo maithei a ni. Sangbera hi mipa sual a ni tlat lo alawm. 

"I thu thu a ni mai. Kei chuan ka zuam reng" ka ti ta tawp a. A hma aia ngheta min kuahin, "Ka lawm e.. chuan, ka duat nufa ngawt ang che u" a ti vawng vawng , la rai lo mah ila a ngaihṭhatthlak hliah hliah ta . Nupa tam zawk hi chu an nih ka ring, han inneih chiah hi chuan beisei tur dang a awm vakin ka hre lo, fa neih vea chhungkaw din bak chu. Chu chu keini nupaah pawh a rawn thleng ve mek chu a nih hi. Sangbera ka bula a awm chuan hlauhna ka nei lo bawk e. Fa neih thu kan sawi a, a siam hna kan han thawk zui nghal ngei a 🤣 a thawk ṭha turah ngai ang. Keipawh ka zak em em tawh lo. A nawmna erawh ka la pawh pha chiah lo chu a ni. Zingah min thawh khalh leh tawh, Tuilum a lo chhawp sa diam a,. Kei pawn rawng ka bâwl zui nghal. Artui ka kan laiin Kimtea nen an rawn haw a. Anni hi zawng an insawizawi peih bawk a, a fit pawh an fit ṭha ngiang e. Breakfast kan ei laiin, "Kan khaw hlui lama zin i ti deuh ami? Engmah min hrilh ve si lo va" tiin Sangbera ka en a. 

"Umm Kimtea nen surprise che kan tum deuh a nia, ka insum leh thei ta lo a nih kha. I nu lung kan han phun ang ka tia" a ti ta mai. Ka rin loh leh beisei loh lutuk chhanna chuan min tihamhaih zo vek. Thil ei nachang pawh ka hre lo. "Mak i va ti awm ve" tiin a nui a, Kimtea pawh chuan, "Tiang hi mi kha'h tawn sabawp an tih kha" a lo ti vel..

"Hnunglama sa barh an ti zawk " Sangbera'n a lo ti zauh. Keipawn ka hriat vawikhatna a ni. 

"Ka nu lungphun kha tak tak ami? " Ringhlel ru deuh hian ka ti a. 

"Umm..tak tak ni e, Lungphun tur pawh kan order fel diam tawh" a lo ti leh hmiah. Ka hmui ka hup a, ka mittui a rawn hnâm.."Naa..ṭap ka thlem thiam lo a nia. Ṭap miah suh" a lo ti dam thluam a. 

"Ṭah lohna chi em ni?" Ka ti tham ṭiak. Kimtea chu awm lose ka fawp hmiah ang, ka lawm êm a ni. Amah bawk chuan, "I nu lung hi phun hmasa ila; hunte han liam deuh se i û lung pawh kan la ngaihtuah dawn nia" a ti sauh sauh a. Mi vannei chu ka va ni tak êm. Ka mumang ni lose heng zawng zawng te hi aw. 

An chhuak tur chu hlim takin ka thlah liam a. Mood ṭha em emin ka nileng hun ka hmang a ni. Pathian hian min lo enzuiin min lo la venghim reng a nih dawn hi, ka lo doin ka lo ep thin sateh a. Ani chuan min thungrul ve si lo. Tunah chuan a hnathawh leh a malsawmna avangin do reng thei niin ka inhre tawh lo. Hmana ka duhthusam ṭhin, Kristian chhungkaw dina inngeih leh inhmangaih taka chenho tluka châk ka nei lo. Chumi tihlawhtling tur chuan keimah hi ka pawimawh khawp mai, nia, theihtawp ka chhuah ang. In ka tifel zo va, chawhnu thlangher lamah chuan thlan tihtlak nan tiin kawt lam hnimte ka sam fai ve e ka tia, taksa ngeih tawk hna ka thawh loh chuan ka thau mah mah dawn tlat. Pool pawh tui kan dah khat rih lo va, malte thleng vel chu a awm âwm e. Ka hah thlansa chu pool sirah ka ṭhu thlandai a. Motor thawm ka hriat chuan ka ding vat. "A va lo haw hma e" ti rilru chungin ka lo nghak reng a. Mahse, kan pa motor a ni lo tawp mai. Lsa leh Sangteii te an ni reng mai. Lsa chuan motor thar a lo la ve tawh a ni ngei ang. Ka hmu thut chu mak ka ti viau mai. Min rawn deusawh tur ringawta rawn kal an nih chu ka ring si lo. 

"May, i dam maw?" A rawn ti zangkhai vah a. Ka lo bu nghat. 

Pawna indintir reng chi ni hek lo, "Tiru, in chhungah i lut ang u" ka ti sap a. Kan inzui lut ta a. Tui te an in zawh hnuah , "Eng nge in lo tih ve teh hlawl a?" Ka ti a. 

Lsa chuan ngui lek lek hian,"May, thupha chawi tura rawn kal kan ni e. " a han ti tê tê a. 

"Thupha chawi a ngai a ni maw?" Ka ti sep. Ka lungawi lo chawpchilh nghal. Mahse, ka hmelhmaiah lantir loh hram hram ka tum ve. Sangteii chuan, "Thil kan lo hriatchian tawk loh vangin i mualpho a.." a ti a. Ka chil ka lem khawlh ringawt. 

Lsa zawk chuan, "Englo a nia, in inneih hmaa video viral vak kha, a nihna takah chuan kei leh Sangteii thiltih a nia, min tihtirtu erawh Remruati a ni. Remruati kha Sangteii nî fanu a nia, ani khan Sangbera nen an inkarah nangmah hi inrawlh buai angin a sawi che a,. Sangteii lahin thil hrechiang si lo vin a lo lainat ve chiam bawk si. Kei lahin min hnarna kha ka la hre ve reng a, eng rilru nge ka put pawh ka hre tawh bik lo. Khatiang remruatna kha Remruati siam vek a ni a. Keini chuan a hna kan thawhsak mai a ni. Chu chu a nia, hrehawm kan ti lutuk a, thudik kan han hriata Remruati'n thil tenawm tak tih a tum tih kan hre lehzel bawk nen, in hnenah thupha chawi hi a ngai niin kan hria a. Kan rawn kal tawp mai a ni" a ti ta dap dap a. Dawnsawn hrehawm chu a ni lo, Remruati hming a lan avangin mak ka ti lo va, ka lo rindansa an rawn nemnghet a ni ber e. 

"Nia, a hunlai kha chuan ka thinrim ve viau a, mahse, Sangbera'n min khap dai zel a. Amah berin min rin kha chuan han sawi nawi leh viau kha ṭul ka ti ta lo va, engpawhnise, hetia in dik lohna hriaa ngaihdam in rawn dil hi in tiṭha hrim hrim e" ka ti ve ta a. 

An inthlahrung lutuk pawh a zia ta deuh. Keipawn muk rûna inkawm vel kha ka peih lo ve bawk nen,. A hnuah phei chuan thingpui te lumin kan inkawm thei ta phian a. "Thla thar lamah palai tirh ve ka rilruk a..eng nge kan an dawn ni?" Lsa'n a tih chuan ka lo phur ve nasa. 

"Chu! Min sawm ve dawn em? " Ka lo ti var a. 

"Sawm e a. Mahse, inpa hian rawn kal a duh lo mai ngah" hnual hmel fê hian a ti a. 

"Duh awm em mai. In inneih phawt chuan kan lo kal ve ngei ngei ang, Ti daih ila, U Rini te nen in intlawhpawh tawh em?" Ka ti a. An chanchin ka hre tam lo tawh em a ni. 

"Tlawhpawh bik nang, Terini ât vel kha chu ka hria a, U Rini tak chu phaiah a chhuk an tiin ka hria. Eng nge a zuk tih pawh ka hre lo" a ti ve mai a. 

"A pawi e,Terini chu..an entir leh lo mawni le?" Ka ti thuphung a. 

"Phai te pawh an panpui tawh an tih kha, eng a ang thei lo a niang. Robina lah kha an bail a, midang a ngaizawng leh daih tawh. Ka la hnek châk reng. Ka pute pawh an inhrechhuak ve ram ram ang chu" a ti bawrh bawrh a. A tan kha chuan a thinrimthlak ve bawk êm a ni. Kimtea a rawn haw a, Lsa nen an inbe ve hlut mai, "I tiṭha em?" Ka tih chuan, "A pangngai" a ti mai a. In hnuaiah a chhuk zui nghal. Kan pa pawh a rawn haw ve ṭêp tawhin ka ring. 

Lsa chuan Sangteii enin, "Keini pawh hawn lam hnaih ila, May, kan lawm takzet aw, ṭha takin min lo dawngsawng a. Kan rinphak bak a ni" a ti luam a. 

"A ho lutuk, thil kal tawh a nia, tuman sawi pawh an sawi peih tawh loh hi.." ka lo ti ve vat. Pawna kan awm laiin Sangbera a rawn thleng ve chiah. Motor aṭanga a rawn chhuak chu ka va pan nghal a, maktih hmel deuha Lsa te a melh chu lo hrilhfiah vatin ngaihdam min rawn dil thu ka sawi a. A rum nghut ringawt. 

Lsa chuan rawn pan hnai vein, "U Sangber, in nu bulah chuan ka lo sawi tawh a. Min ngaihdam kan ngai takzet a ni..thil thleng kha.." a tih mek laiin Sangbera chuan, "Ka ben hma chein ka ramchhung hi chhuahsan vat rawh u. Tin, ka nupui bulah vawikhat pawh ka hmu leh che a nih chuan kei aia naupang i ni tih ka theihnghilh ang" a lo ti hriam hraih mai. Boruak chu a reh duk a, tumah chu kan ṭawng lo. Kan hrilhhai vek ti ila ka sawi sual awm lo ve. Lsa zak lutuk chu a sen awp awp mai, Sangteii chuan ,"Ls, haw ang. " A lo ti vat a. Chelh ka tum lo va, sawifiahpui vak ka tum hek lo. Sangbera rilru tur ka hriatthiampui ve tlat a tin ni. Keimah berin ṭha takin ka lo dawngsawng tawh a, kha kha an duhtawk thei mai ang chu maw..Lsa te tlan liam hnuah in chhungah kan lut a. Ka be ngam lo. A inbual hlan chuan chawhmeh ka lo tilum a, eirawngbawl thar vak a ngai lem lo. Inbual tura pindana ka va luh ve chuan a lo inthlak mêk a. Ngawi rengin ka inbual san ve mai. Ka thinrim chuang lo naa mi titau lai biak luih vel hi ka zia a ni lo, tlawmthlak ka ti ve te pawh a niang. Ka va chhuah leh pawh chuan a lo la awm a. 

"Inthlak zo la, chaw ei ang u, ka rilṭam chu thuhran, chhuah ka ngai a" a lo ti hmuk hmuk a. 

"Aw le" tiin ka inthlak sawk sawk. Ka zo vat a, chaw ei ka siam ta nghal. Kan boruak chu Kimtea chuan a hrethiam deuh nge, "U Lsa te kha an innei dawn maw?" Tiin min zawt a. 

"An tum ve kha chu a nia" ka ti ringawt. 

"Innei rawh se, an inhmeh êm kha" a ti ve zel a. Sangbera erawh a ṭawng duh chuang lo. Kimtea kham hnu chuan, "Khawiah nge i chhuah dawn?" Ka ti ta nge nge a. 

Min rawn melh zawkin, "Tleipuia te inah" a ti duh lek a. 

"A pa chu a la ṭha lo mi?" Ka ti ve zel a, "Umm, zanin pawh hi a hman tluan an beisei lo a" tha tak chuan a ti ve leh thluam a. 

"Ehe! Chungte chu min hrilh ve ta vat che, kan pahnihin va kal ila..min lo phut ru ve maithei asin" ka ti hlut a. Ka rilru tak tak pawh a ni. 

"Zanin chu keimahin le" a ti deuh tlat. 

"Ngati" ka ti hram a.

"A ṭul tlat" a ti leh ringawt. Keia thinawrh lutuk lah hian lo pawmzam mai chu thei hek lo, "Hmm, a nih tak chu! Hmeichhia i hmu dawn a nih kha" ka ti leh ta hmiah mai. 

A kham nghal hmak, kei lah ka thinrim laklawh si, "Sawi ta che, i hmu dawn mi?" Ka ti chang fak a. 

Rawn hawiletin, "May, kal thui suh. I intina mai mai..i hrethiam tiraw?" A ti dam thlup a. Kei erawh na tak ka ni. Chaw ei chhunzawm chu hla tak a ni ringawt, ka chhungril a lum pup pup a, ka kawchhung chu a no nghal ngawih ngawih. Ni e, ka luak a chhuak. Ka kuang lo ka nawr thui luat vangin ka na ta chiah e. Ka mawl man ka hmu ta ka ti mai dawn aw..

Min be tawh bik lo bawk a, ka ngawi hmak tawh mai. Ka che char char a, ka ṭap chak, ka ṭap duh si lo. Ka na ngawih ngawih tih hian sawifiah thei se a ṭha ber awm e. A chhuah thlengin pindanah ka lut lo. A motor tlan liam thawm ka hriat rualin pindanah ka lut a, khumah bawk thlawpin ka ṭap ta zawih zawih a. 

Ni e, ani khan ka kal thui ta deuhin a hria a niang. A laka thikthu ka nei te, a nun thunun tum ve anga ka lanna te kha ani chuan hnawk a lo ti tawh hle tihna a ni. Nupa nun kan hman avang khan ka pasal tak tak emaw tiin a fa ngei hrinsak ka lo châk a! Nupa hlim tak, chhungkua pawh hlim tak nih theih beiseiin ka hmalam hun ka lo thlir ve a..ni lo, ka va mawl tak êm. May, i â lutuk tiin keimah leh keimah chu ka inhau mawlh mawlh mai. Inneihna lem lem a ni tih ka lo theihnghilh chu pawi ka ti vawng vawng mai. 

Ka ṭhu tung a, insût hlawp hlawp chungin ka rilru chuan, "Aw le, a tawk e . Ni e, ka hre tawh ang. I duh dan ang zelin ka kal ang. Tichuan, ka na lo a ni mai. A ṭha vek e" a ti mawlh mawlh a. 

Ka phone ri ral ral chu lek kangin ka pasal Sangbera hming lo lang chu ka melh tlawk tlawk a. Ka mittui a rawn luang nghal. Hetiang chung hi chuan ka be thei lovang. A ring ral thleng pawh chuan ka phone chu ka la en reng a..