Sangbera 14

SANGBERA (14)

Ziaktu : Toni Râlte

Ka harh chuan kei aia tho hmasa ziah kan pa chuan min lo la kuah ran mai. A kut chu zawitêa lasawnin ka tho ṭhem ṭhem a. Chokaah ka lut zui nghal. Kimtea hi zing tin exercise la ṭhin a ni bawk a, tui hi a lo lum sa diam zel. Kan chaw ei dan phung pawh a dang ve tawh a, Sangbera duhdan a ni bawk nen. Zing dar 7:30-ah break fast kan ei a, tah hian bawnghnutê leh chhang emaw artui emaw kan ei ṭhin. Chuan an chhuak a, lunch hi dar 1-ah emaw kan ei leh a, chaw pangngai leh a hmeh tam vak lo a ni mai. Zanriah hi chu dar 6-ah kan ei tlangpui. Hetah hi chuan chawhmeh pawh tihtham ve deuh kan siam tawh,. A tirah chuan insiamrem harsa kan ti unau a, mahse, pa ber tihṭhan dan a nih avangin kan zawm lo thei lo a ni. Buh ei tam loh hi kan support deuh bawk,. Tukṭhuan ka siam mêk laiin Sangbera chuan call a dawng leh a. Pindanah a luhpui daih zui! Ngawi rengin Kimtea nen kan ei a, Nu Buangi te hi chu zing lamah an rawn ei ngai lo thung. Ka ei kham hnuah Sangbera chu a rawn chhuak chauh, ka lo en chîk ngang mai. A hmelah danglam em em a awm hran lo va, a mitmeng erawh hriatthiam a harsa, a inngaihtuah buai hmel ve hlein ka hria. Ka lo be lem lo. Ani pawh ngawi rengin dawhkan a kil a, Kimtea bulah, "Exam zawh veleh in khaw hluiah kan zin dawn kha aw..mahse, ka duh aiin i inthlahdah ve deuh, ngaihzawng hi inthununtir loh tur " a ti mawlh mawlh a. Exam zawha kan khaw hluia kan zin tur thu ka hriat vawikhatna. Ka bulah engmah sawi ve hek lo. Mahse, ka vui lem lo, ka nau bula a lo sawi tho chuan. Kimtea pawh chuan, "Nia, ka zir ṭha ṭan tawh dawn..min be peih lutuk a, ka chhang lo phal si lo va" a ti ve mai a. Ka nuih a za deuh, a mizia hi a tlang ve reuh a. A ṭha daih zawk. Kimtea a ei kham a, a pocket money tur 50 ka pek lai chuan, "100 pe rawh, a bialnu treat te pawh a duh ve ang chu..em em a" a lo ti leh hluk hluk. Va melh kâwkin 100 chu ka phawrh ta tho va, tiffin a pai tho vang hian 50 bak a mamawhin ka hre lo a ni. Sangbera berin pawi a tih loh a hnu 100 chu pe teh poh ila a ni mai lawm. Valtea a lo thleng a, Kimtea nen kan inbye bye liam. 

Kan thil eina te chu ka seng fel zung zung a, ani pawh hahdam hmel zetin a lo ṭhu der der. "I chhuak dawn lo mi?" Ka tih chuan a chal a chuar nâng a, "Nizanah kan sawifel tawh emaw ka tia" a ti hmuk. Ka hrereng a, ka tilui châk ve hrim hrim kha a nia. 

"Ni dawn tak" ka ti vat a. Ka va nuih tlawn bawk. A ner suk a, a thinrim lo tih erawh ka hria. Ka insilfai zawhah chuan, "Khai le! Va insiam rawh, ni a sat takin kawr bantlawn ha la" tiin thu min pe leh ta. Keipawh ka va inthlak nghal mawlh mawlh a. Kan tihtur leh sawi dun tur chu ka nghahhlelh rualin ka huphurh deuh bawk. Zodini thlan tlawh paha sawi kher a ti hian min tiâwm nuam lo. Mahse, Zodini, mitthi tawh chu thîk buai ka tum hran lo. 

Muangchangin huan lamah chuan kan inzui thla ta a. Serthlum an rah ṭan tawh a, hmuh a nuam hle. Hlawhfa a rawih zeuh zeuh avangin huan chu a hnim lem lo. A mawnglam chu pan thla zelin thlân bulah chuan kan ding ta a. A fai hen reng a, a hming inziakte pawh chu a hma ai mah khan a fiahin chhiar a awlsam tawh zawkin ka hria, ka hriatpui lohin a lo zu tlawh thin a ni mahna le..

Thlân chunga hming inziak chu melh vawng vawngin, "Ani khan a tuar ve hman a" a ti hniam ruih a. Sawi tur hre ve hek lo, thawm chu a reh ngawih ngawih mai. 

"A lainatawm asin" a ti leh ringawt. Ka tan chuan sawi ve tur vâng tak a ni. 

"Tihpalh..hawh, tah sawn" tih leh min kaih a rual a. Zodini thlan piah lawka thing lian zet hlim hnuai zâwl duai lam chu min panpui a. Ka zui ve hlawk hlawk. Min ṭhutpui a, thlifim a rawn thaw heuh heuh a, ni a sa lutuk lo bawk nen, a nuam tawk viau mai. 

"Teberi hi ka farnu a ni a, mahse, ka nu fanu a ni ve lo. Ka pa nupui ka nuhrawn fanu lah a ni hek lo. Chutak chu buaina inṭan chhohna a ni. Ka nuhrawn chu Teberi pasal Zora nu diktak a ni a, Teberi nu erawh tunah hian a la dam. Pasal a nei bik lo. Chutiang tehnuaih chu kan ni a, chumi hmain kha hmeichhia Mapuii kha ka ngaihzawng hlui a ni. A hunlai chuan ani anga atchilh kha ka nei kher lo maithei,. Ni e, ka duh a, neih ngei pawh ka duh. Mahse, thildang a rawn tlazep ta tlat! Teberi a tel ve zel bawk a, amah Teberi lahin an hamtel ve tih a hre der si lo..chutak chuan ka rilru tina a ni" a ti charh charh a. Ka chil ka lem khawlh a, "Umm, khang chu ka hre ve deuh" ka ti sep a. 

"He thil hi kan chhungkua bakah Nu Buangi te nupa chauhin an hria. A hunlai khan a khirh viau. Ka pa nunna hialin a tawrh phah a, chhungkua kan kehdarh phah ta kha a nia..mi tam tak chuan min demin ka nuhrawn laka ka chetdanah nunrâwng nih ka hlawh fô..Mahse, a fapa neihchhun Zora ngeiin min dem chu sawi loh ka laka a lawm zawk thu a sawi avangin mi thusawi chu mênah ka thlak ta mai..a bul chu Teberi ka nau duat em em, ka hmangaih lutuk vang a ni a. Ka nau Bawiha hmalam hun ka ngaihtuah vang a ni bawk" a ti leh nghut nghut a. A insawi thinrim mai ang tih ka hlau deuh naa, a hmel dam thlup avang chuan ka thlamuang leh deuh. 

"Chuan" ka ti sehchilh deuh a. Ka tîm viau thung. Min rawn melh zawk a, ka lo en ṭha ngam lo. "Thil tam tak a thleng a ni. May, rapthlak tak te, mak tak te..kan unau chunga Pathian rorel dan hi a mak a, mahse, kan ṭanrualna leh kan inhmangaihna khan a hneh a, a bawhbet ta a nih kha.." a ti leh fak fak a. Chulai a sawi lai tak chuan a insehruh deuhin ka hria. He an chhungkaw thurûk hi ka hriat ve kher a ṭul em mawni le tih ka rilruah a rawn lang hman hial nghe nghe. Hre lo law law zawk ila a ṭha zawk ang em aw ka ti. A pawimawh hmel bawk sia. 

"Mapuii ka tih kha..ni e, kha hmeichhia kha rûl nen ka tehkhin ṭhin. Ka bula a nuih har har lai chuan vantirhkoh ang mai a ni. Mahse, a rilru chhungril ngêt leh ṭawih lutuk kha engtin nge ka lo hmuh hmaih theih le aw ka ti hnuhnawh thin. Mahse, ka nuhrawn nen an lo inthurual tlat si a! Teberi hi an tan a lo hnawksak nasa a lo nia, ka hmangaihzia hriain Mapuii ngei pawn rin phak bakin Teberi chu a lo haw ve a lo nia. Mapuii khan min hmangaih lo ka ti ngam lo, min hmangaih luat vanga a khawhmu lo leh a sum îtna khan a duh loh lamah a pawt peng ka ti thei mai ang chu..tun thlenga a la harhchhuak zo lo saw a pawi khawp mai" a ti leh mawlh mawlh a. 

Ka ngaithla tui lutuk a, sawi ve tur pawh ka hre lo. A lehpek zel ngaihthlak chaka ka ngaihchân ran ran lai chuan a phone a rawn ri thut a, ka phu chiang kher mai, ani pawh a phu ve zawkin ka hria. 

"Eng a?! Eng maw?! Kan lo chho" tih leh din a rual a. Min rawn enin, "Nu Buangi a buai" a ti teh tawp a, keipawh ka tho rang kher mai. Hmanhmawh em emin kan inzui chho ta hlawk hlawk a. Nu Buangi chu engtin tak awm ang maw..hlauhthawnna hlirin ka khat. Kan inah pawh lut kawi lovin Nu Buangi te in lam chu kan pan nghal a. An pa leh an pa ṭhianpa te chu an lo buai dun kher mai. Khumah Nu Buangi chu a lo mu a, boruak a khawpkham lo tih hriat zet hian hah zetin a lo thaw kâwk kâwk a, a meng buai em em bawk. Sangbera chuan zo zetin a va pawm lawp a, "Rang takin damdawi in kan pan a ngai" a ti nghut bawk. Mahse, Nu Buangi chuan thei leh thei lo hian, "Aih..aih..ka duh lo" a rawn ti ta si. Sangbera pawn a melh vung vung ringawt. Ṭawng hleithei si lo chu a lu a thing nawk nawk a, a ban vai te reng reng chu thih sual a ang ka ti..a awmdan avang chuan a ngaih a ṭha bik lo nge Sangbera pawh chuan khumah chuan a mut leh ta a. Nu Buangi chu zawitê hian a thaw tawh. An pa chu a bulah va thu vatin a kut chu a vawnsak a, a chalah a dawm bawk. Nu Buangi chu a â ruai tawh emaw ka tih laiin fim zet hian a rawn meng ta a. Ka lo melh deuh tawp, Sangbera tak pawh a chiâi ve deuhin ka hria. 

"Paa, min chelh tawh suh. Ka kal ang. Bawiha te nen kan lo nghak reng ang che. Sangber, ka nau duat..lei leh van siamtu Pathian hian vengin hualhim zel che u rawh se..bawiha, bawihte,. Ka lo kal e" tia phun sep sepin a thaw a zawi tial tial a. A tawpah phei chuan a zawi ta hnawk a! Nu Buangi a awm ta lo. A kal ta. Thihna nunrâwng chuan a lempil zo leh ta. Hmeichhe awmchhun e ti lo chuan han ṭah nachang pawh ka hre lawk lo. A mak tehthut êm a, a natna vang hian kal thut thei dinhmunah ding mah se; chuti teh thut chu kan lo beisei lo tlang hle tih kan hamhaih leh chiâi dan atangin a lang. A pachang leh thluak fîm ber Sangbera a che ta vat a. Midang be kualin Nu Buangi chu an pa duhdan angin anmahni inah zalh tur a ni. An in a tê sia, a buaithlak deuh maithei. Mahse, a pasal duhdan chu paihthlak ngawt chi a ni si lo. 

Teberi leh U Bawiha ten Nu Buangi thihna chu an tuar ber mai awm e. An ṭap an ṭap mai a, engdang a ni lo, an lusun mangan laia an tana malsawmna ni tura duan Nu Buangi kha a ni ve miau alawm le..U Bawiha tan phei chuan lung a leng duh ngawt ang, a nupui hmasa thih sarhu laia Nu Buangi hlutzia hretu a ni si a. Keipawh Nu Buangi hmu tawh lo tura nitin hun han hman ngawt mai ka ngaihtuah chuan ka ruak ngawih ngawih. Ani hi mu reng pawh nise, kan lo nu enzia ka hrefiah ta hle. Remruati te pawh an rawn lang ve, a rawn ṭap ve chiam a. Ka mittui a tihul hlauh thung. A tawrh em em hi ka ring lo ve tawp, a damlaia a biak dan reng a hnuaichhiah thei êm mai. Sangbera pawh hian a tuar tih chu ka hria, mahse, pa ber chan a chan avangin a tilang rih lo mai mai a ni. An pain a dil angin an ram zimtê-ah Nu Buangi chu an phum ta a. Kan colony-ah thlan pahnih a awm ta phawt chu a nia. 

Nu Buangi thih sarhu chhung chu Teberi te pawh kan inah an rawn awm chawt a ni mai e. Veng chhung lam hian Nu Buangi te nupa chu an lo hre vak lo bawk a, chhiat tawk dangte ai chuan an ngaihthah deuh. Mahse, a awm ve tho..kan vui hran lo. Nu Buangi pasal Pa Rama a lainatawm a ni, kha chen fa te sûn zo vekin an lo innupa ve a, khawhar inhnem tawnin an inngaihsak tawn em em a. Upa tawh lam mahnise, hmuh nuam ka tih fo kha an nia. A pawi vawng vawng teh e. 

Nu Buangi thihna pawh kar khat lai a ral ve ta. A thihchamah chhungkaw ho leh amah hre ve tute ho kan lengkhawm ve a. A thihnaa sen ngai leh engkim zawng zawng kha Sangbera kut leh vek a ni, a tihtur âwm reng kha a ni ve bawk a. Kan pa hi chu pa ṭha tak zawng a ni mawlh mai. Tlai lama chawhlui kan buatsaih mêk laiin Remruati leh mipa, ka la hmuh ngai loh te hi an rawn lang ve hlawl mai. Mipa sang ve deuh, hâng lek lek, mahse, a hiptu tana pa deuh tur ang kha a ni. Sangbera bakah keini lo awm vete bulah chuan hlim nui sang hian Remruati chuan, "Hei hi Malsawma a nia, ka bialpa..Alexa thih hnua ka bialpa hmasa ber a nih hi" a ti zangkhai vah a. Sangbera ṭhian ṭhenkhat ten kut an lo beng dar dar mai. Kei tak pawh zep nâk emaw ka awm a nawm phah sawt ti ila ka sawi sual awm love. Sangbera pawh chuan, "Malsawm, Thianpa, kan lo lawm a che. Hlim reng ang che u" tiin lawmpuina thu a lo hlan ve a. Remruati chuan, "Nupui min neih khalh vel a..ka neih ve hunah ka man pawh i ei ve lovang" a ti ham ham a. 

"Ka ei tho vang. Nang pawn ka nupui man i tum bik lo" kan pa chuan a lo ti ve khauh a. An nui dar dar mai. Tichuan, Remruati leh a bialpa te chuan chaw pawh an ei zui ve ta nghal a. Malsawma chu kan pa te nen pawh an inkawm thei fû mai,. Sangbera te ai chuan a naupang ang. A titi duhdan velah erawh a puitling viau. Remruati nen chuan innei daih se ka lo ti ve nasa. 

Sangbera thusawi lai, Nu Buangi thihnain min rawn den tak avang khan sawi chhunzawm a la awm leh lo va, inzawh sek sek chi a ni bawk si lo. Ka rilruah riak reng mah se; ka zawt duh lo, huangtau min ti lutuk palh ang. Tin, nupa nun hman chu sawi loh zan 2 chu dar 11 bawr velah sumdawnna thilah an rawn ko chhuak a, a riak chhuak daih nghe nghe. A dawr lian berah hian ama pualin mutna pindan a nei a, tah chuan laklawh thil a nih chuan a riak mai zel. Rinhlelhawmin a khawsa lo bawk a, ka ringhlel hran lo. Rinhlelhawm tak paw'n lo awm mah se; ka tan lo thinrim kha thil nuam a ni miah lo. Kan inneih chhanah chian a ngaih fô avangin..ni e, thikthu pawh nei mah ila, ka tilang thiang lo. Kan indawrtawnna anga kalpui ve zel mai bak hi tihtheih ka nei chuang lo ve. 

Kimtea te pawn exam an hmachhawn ṭan a. A sawi ang tak tak khan a inzir nasain a inkhung deuh tawp mai a. Keini lahin kan lo support ve bawk nen, theihtawp a chhuah ve chuan ka hria. Nubawihi kha rawn kal mai tur a nih laiin U Kunga'n a châwnah pân chhia a nei pek a! Ani fa û ber ta chuan a pa ai awh zo lo mah se; ran enkawl lamah an inchhawr lo thei lo va, a la tangkhang ve rih a ni. U Kunga dam veleh a rawn zin ang chu..U Sangi te nupa te nen pawh kan la intichhungkhat zui zel a, an ina chaw ei tura min sawm an tum apiangin buaina a awm ziah. Mikhual an neih loh leh amah U Sangi emaw U Kawnga emawin an sumdawnna lamah chinfel tur an nei ziah! A la hun lote pawh a niang. Sangbera zawk hian an chhungkuaa chaw eia sawm a la tum a, hun ṭha a la awm remchâng lo deuh a ni. Engpawhnise, anni nen chuan kan intihrang thei ngai lovang. Kan lo inṭhen thut phei chuan anni bak belh tur ka nei lo tih ka chiang. 

Kimtea exam ni 2na turah thil hotê anga lang ngeiawm deuh si a thleng pek a. Bawnghnutê ka chhuan laiin call ka dawng a, number hriat loh a nih avangin lak loh ka tum zet a, a pawimawh takin tih thuah ka la ta tho. Ka beisei loh lutukin Samua a lo nia! 

"I pasal lerhzia sawi ta ila min ring awm si lo" a rawn ti deuh tâwng mai a. A âw aṭangin tu nge a nih ka hai teuh si lo. 

"A ho e.." tia dah ka tum lai takin, "Kar hmasa zirtawp zanah khan khaw nge a riah min han zawt teh" a rawn ti leh a. Ruih nei ang hian a ṭawng. 

"Eng atan" ka ti nghat a. 

"I hriat duh takin..Dr. Zari quarter-ah a riak..a ṭha em? Doctorin a thlak vat dawn che" a rawn ti sak sak a. Ka ṭawng hmain a dah leh daih. Samuela mai mai chu aw..

"Khaa..a liâaamm" Sangbera aw ka hriat chuan bawnghnutê chu a liam duak tawh. Inthiam lo ru zetin ka tifai nghal sawk sawk a. Enghelh neih loh hmel deuha min rawn kalpelin, "A tu chuan nge maw i rilru lo la peng ni!" A ti satliah a. Kei lah Samuela thusawi ngawt ka rilruah a awm si avangin, "Samua" a riin ka lo ti pek a! A ding khawng nghal ut..

Ka inhrechhuak zui nghal naa ka tlai. Min melh dan chu ka duh lo, a hlauhawm tlat. Kimtea a rawn lang ve mêk bawk si. 

"A ni lo..thildang a nia" ka ti ringawt a. 

"A nih ngei dawn kha.." a ti chhum hmuk a. Kimtea rawn kal phei chuan, "Lal-û, (Sangbera hi Lal û tiin a ko) he lai tak hi ka hrethiam lo, min hrilh thei ang em?" Tiin a lehkhabu lek pah chuan a rawn ti ve mêk a. Kimtea sut thawi thuak pahin, "Samua zawt zawk rawh" tih leh chhuah nul nul a rual. Kimtea mitmenga zawhna chu chhan dan tur ka haihchham kher mai. 

"Ate, eng nge a awmzia?" A ti ta chiah a. Ka heh liak zauhin, "Samua'n min lo bia a. A hria nih kha" ka ti ta ngawt a. 

"Hmm, nge Samua chu i biak kher?" A ti hluk. 

Ka ngawi reng a, ani pawh chuan engmah a sawi zui lem lo. Sangbera insiam laiin ka va lut a, min lo en miah lo. Ka inthiam lo ve deuh bawk si chuan, "I riak leh dawn em?" Ka'n ti ngawt a! 

En pawh min en chuang lo chuan, "Riak ang, hna a laklawh chuan" a ti nghut a. Ka inrin hmain, "Dr. Zari quarterah maw" ka ti nghat a. Mi rawn melh ta chat. 

"Aih, ka dawrah" pangngai tak chuan a ti leh thluam a. 

"Aw le..lo sawi hma la aw" ngaihpawimawh loh hmel zet hian ka ti a. "Aw le" a ti leh hmak a, sawi tur ka hre tawh lo. A kal dawn apiangin kawngka bul thlengin ka thlah ve thin. Mahse, vawiin chu a motor ri a tawp hnuah chauh pindan aṭangin ka chhuak, ka lung a awi bik tlat lo. A hma pawn Lsa te khan hotela a riah ṭhin thu te an sawi tawh a, engah vak ka ngai lo lui tawh. Tin, kan inneih hmain hotel a bookna receipt ka hmu tawh bawk a,. Nichin lawkah Samua'n Dr. Zari ina an riah dun thu chiang takin min rawn hrilh bawk. Pasal hmingpu, nupa nun ka la hmanpui loh mahnise; nupui pasal inkara thleng ve tur thikthu avang chuan ka mood a chhe vek mai. Bakah Samua daih daihin a lo hria kha ka duh lo tawp a ni mai. Min hmusit thei dinhmuna a din ka phal lo. A ngaihdan leh a hmuhdanah nupa hlim leh inngai tak nih ka duh tlat a ni. Nilêngin ka awm a nuam lo. Keimah chauhin ka awm bawk si, han inbun thawlna tur nei ila chuan ka zia ve deuh mahna. Ka pasal hian bialnu nghet a lo nei reng te hi a ni lo maw?! Kei aia thlan zawk a nei ang tih ka hlauhna leh a pasalin bialnu dang a neihsan tia midang ten min hre tur ka duh lohna chu a inbuktawk viau ang. Engmah ni lo chung pawha la chapo ve thei he mihring rilru hi chu aw…

Dar 4 a la ri lo deuh ang tihin Sangbera chuan min lo call a, Reifê hnuah ka pick up. "Chaw min lo chhum kep suh aw. Rawn sawi hma rawh i ti sia, ka rawn sawi. Ka riak dawn hetah" a rawn ti nghal zung zung a. Mi mah mood chhiat tawh nen, ka insum zo ta lo chuan, "Aw le, mutdun nuam u" ka ti ta pek a! Dah leh mai ka tum laiin, "I thusawi kha i hrechiang maw?" A rawn ti sup a. 

"Aw ka chiang. Dr. Zari nen chuan mutdun nuam u" ka ti leh tuar. Ka thin lah chu a rim tawlh tawlh lehnghal, a nui huk a, chu te chu min nuihsawh niin ka hre tlat tawh. "Nui rawh, nui vak vak rawh" ka ti leh nghek a. 

"May" a rawn ti dam thlup. "Eng nge" ka ti pawr hlar a. 

"I thikthu a va chhe ve" a rawn ti satliah a, "Ka thik bawk lo. Thik ila riahdun ka phal nang" ka ti lawi si! 

"I thik a, thik i hreh bawk si a nih kha. A bulah ka riak dawn hleinem, Mukesh-a te an rawn kal leh a, zanriah eipui an ngai sia, zan dar 9-ah meeting ka nei bawk si. Rawn haw tingtang kha a buaithlak ka tih vang a nia" a rawn ti mawlh mawlh a. A rawn insawithiamte chuan min tinêm eih lo. A mak lutuk. 

"Aw..a ho lutuk, i awm awm khan awm rawh. " Ka ti nghat nghat a. Ka nuih a za hlawl lo. 

"A mak thei" a rawn ti zawi sup. 

"E..ka dah aw. Rawng ka bawl dawn" ka ti leh a, a tawng hmain ka dah daih. Khang a meeting, a vai sumdawnpui vel lam kha ka care lo. Ka duh ber chhanna ka hriat loh chu thuhran, ka rinhlelhna nemnghet tur tingin Dr. Zari bula a riah dawn loh thu a rawn sawi a nih kha.."Dr. Zari nen chuan engmah chutiang a awm lo ve" a ti lo va, "A bulah ka riak dawn hleinem" a ti zawk a nih kha. Kha khan thil tam tak a kawk..ni e, a bulah a lo riak tawh ṭhin tih a tilang tlat. "Ka riak ngai hleinem" a ti bawk si lo. a..ka na ut ut a, ka rawngbawl te chu awmze nei lo mai a ni. Ka awmdan ka theihnghilh titih, a awmzia chu Sangbera hi ka duh tawh hle tihna a nih chu! Hei hi a nia ka hlauh ruk em em, thleng lo se ka duh kha. Ka thunun zo ta lo tih ka pawm mai a ngai dawn ta. Min duh leh hmangaih vang ni hauh lo va, midang laka inphen nan leh min khawngaih vanga min neitu chu hmangaih ka duh lo. Ni e, ka duh mawlh lo. Mahni tawka nghet leh sak intih ve nak alaia ka pasal, a hming maia ka pasal ni ta Sangbera zûna ka han uai ta mai chu ka tan chuan tlawm vawng vawngna a ni tlat! 

Ka kut ka la zai thi zui! A rawn thip zawk ah ka harh chauh. Ka silfai vat a, pem thar damdawi ka va zawng nghal vat vat. Kimtea in hnuaiah a awm a, tihbuai ka duh lo. Damdawi chu ka hnawih a, band-aid ka zawn laiin ka hnunglam aṭang hian, "May" a rawn ti ta a. Ka ding mar nghal awt. 

Min rawn kuah nghal a, ka kut a hmuh chuan, "Ehe! Khaw maw" tiin a lek kang a, a la thi duh mai sia. Bandage a zawng rawk rawk a, zei deuh mai hian a tuam ta mial mial a. Ka lo en reng ringawt. A motor thawm ka hre si lo va, a rawn thleng ringawt chu mak ka tih bakah programme nei si a rawn haw leh lawi si chuan min tihrilhhai ka ti mai. A tuam zawhah min rawn melhin, "Rawngbawl lai chuan min ngaihtuah loh tum ve la" a ti a. 

"Hmela" tih leh chum ka rual nghal. Lo indan pahin, "I kut a tê si, i kutthlak a nat hmel bawk si..khaw maw. Kawlh viau lo teh" tiin ka kut chu a la a, na vak lo va herhin min rawn pawm bet ta hmiah. Min pawm ngheh êm vangin keipawh a tih ang ang chuan ka awm ve ta hle hle a. Rilru pawh a rawn fîm ṭan. 

"Ti nge?" Ka ti tâwng a. Ani pawh inthlahdulin, "Ka lo haw" a ti duh chauh. 

"Ti nge ka tia lawm" ka ti hlar a. 

"Ka ngai che a" a ti leh hmiah. Khumah chuan min namṭhu a, ka hmaah dingin kan inmelh ran a, "Ka cancel ta vek mai. Ka nupui thinrim ai chuan ka tia" a ti leh a. 

"I â nih chu" ka lo ti hmuk. A nuih a za, mahse, ka thutak em vangin a nui duh lo. "Nia, ka â tawh" a ti ve lehzel si. 

"Ka phei dawn" tiin ka ding a. Min rawn chelh nghal vat. Min kuai dâk a, "Min en teh, chiang takin min en rawh. Ka mitmeng hi chhiar thiam tum teh..may" ngenngawl zet hian a ti ta a. 

"Ka..ih..engtin?" Ka ti bah nuaih a, "I rilru ang tho kha ka rilru a ni.." tih leh min rawn fawh a rual ta a. Ka lo dang eih lo. Mahse, ka fawp lêt ve lo thung. Khumah chuan na vak lo hian min nam mu leh a, min rawn bawhthuah zat. Chutah chuan keipawn lo kuah letin ka thiam ang tawkin ka lo fawp let ve a ni. A thaw ham ham a, ka samah a ṭhâm tâwn tâwn bawk. Thil kang rim ka hriat rualin ka meng kâwk a, ka nam vak, "Chu! A ût" ka ti tham ṭiak a. Ka chhungril erawh a la ti er er mai. Ani pawh rang zetin a tho a, "A va hun lo tak" a ti hluk. Ka nui hawk a, chokaah a ranga rangin ka phei nghal. Ka sangha kan a ût vek! Huizz, a kanna bel pawh chiah fê loh chuan silfai chu a har khawp ang. Ka nikhua loh vang vek a ni. 

Chokaa a rawn luh chuan a inthlak fel vek tawh a. Kal leh a tum tawh lo tak tak a nih hmel. "I kal tawh dawn lo tak tak ami?" Ka lo ti a. 

"Dawn lo, chaw min chhum kep rawh" a ti a. 

"Ka chhum kep tawh lo che, nghei mai rawh" ka lo ti hmak. Ka uang châk ve deuh bawk a. "A pawi lo, ka ril a ṭâm vak lo. " A tih chuan, " chaw ka la chhum lo" ka lo ti leh lawi a. A nui suk..

Kaikuang a kang a, keiin anhnah ka lo bai thung. Thinrim takin tlai hun ka hmang dawn emaw ka tih laiin tlai hun nuam ber ka hmang chu a ni ta reng mai. A mak mang e. Zanriah ei hmain ka inbual a, kei hi sawi leh sawi hnu ka inbual rei thei lutuk hi Kimtea pawh a hma khan a phun fôna a ni. Ka che rang thiam thlawt lo a ni e. Bathroom aṭanga ka chhuah chuan khumah a lo ṭhu kur a. Min en ngawih ngawih bawk. Ngawi rengin ka inhruhul a, mahse, a rawn kal hnai vat a, min pawmin, "I va duhawm tak" a ti sup a. Ka lo lai chhe lutuk hran lo. Ngawi rengin kan inhîptawnna hnathawh chu kan hmui chuan a thawk leh ta mawlh mawlh a. 

Ka bathrobe phelha ka hnutê a rawn hum chuan ka meng kâwk, mahse, ka rilruin, "May..i paltlang thei" tiin ka infuih a. 

Mahse, Kimtea aw hian, "Ate..Ate..mi an lo kal" a rawn ti lauh lauh ta si..Sangbera nen chuan kan inṭhen phawk a, kan innuih ringawt. Ka inthlak sawk sawk a, Sangbera pawh a chhuak nghal vut. Tu te tak ni ang maw? Ka va chhuah phei ve chuan Remruati leh Malsawma te lek! Hmm..chaw ei te kha an rawn tum leh ringawt awm sia, ka mood chu a hnual nghal rawih rawih thei. Remruati kher kher hi chu ka ngaina ngai dawn lo a nih hi maw. 

Sangbera chuan, "Hei..May, kan ṭhiani te hi an rawn tlan ve deuh a nih hmel" nui chungin a ti a. Remruati chuan, "May, min hrethiam rawh aw. He lai lo chu kalna tur kan hre si lo va" inthlahrun hmel lek lek hian a ti ve a. Tlemin amah ka ngainat lohna pawh a kiam ta deuh. Chutianga rawn inru ve na nâ na lo hnar ngawt thu awm hek lo. "Chaw ka va chhum belh ang e aw. Inthlahrung su" ka ti ve a. Chokaah ka phei nghal. Kimtea erawh a ril a ṭam deuh tawh avangin a ei hmasa a, Chaw ka chhuanbelh laiin Sangbera chu a rawn kal a. "I thinrim lo maw?" A rawn ti sur sur. 

"Rim lo ve" ka lo ti sam êt a. 

"Riak dawn ta se" a ti leh a. "Khaw nge an riah ang!" Ka lo ti thung. 

"Nubawihi room turah khuan kan riahtir mai dawn mi?" A lu hiah nuah nuah pahin a ti a. 

"Umn a ṭha reng alawm. " Ka lo ti ve mai. 

Zanriah ei hma deuhin zu an in leh tawh kha..Sangbera chuan no khat bak a in lo naa ka lawm lo deuh. Remruati nena han in ho kher chu. An laklawh laiin, "Chaw ei dawn hnai ila, ka ril a ṭam" ka va ti ta hmiah a. Remruati ner sak chu ka hmu reng, ka ngaipawimawh duh lo. Sangbera chuan, "Ni e, ei ang u, keipawh a ṭâm " tiin a ding a. A hotupa berin ei a tih miau avangin an rawn zui lo ngam lo a niang. Zanriah chu kan ei ta a. Malsawma chuan, "Mayi chu chawhmeh siam i thiam hi le..nupui tlak i nih hi" a ti hlut a. Remruati mitmei ka lo veng deuh. 

Sangbera lah chuan, "Ka nupui a ni lovang tih hi a hlauhawm a nia..rawngbawl ka thatchhe ropui si" a lo ti ve nasa. Ka va melh kawk a, min en duh ṭhak lo lehnghal. 

"I nupui nih loh a hlau reng alawm" Remruati leh bawk. He mihring teivet hi chu a..ka ṭawng chuan ka ṭawng nâ ang tih ka hlau deuh a, ka ngawi ta mai. Zan khat bak riak lo se ka duh. Inru hmingpu an ni ve sia, lo hnar ngawt kha thil tih chi a ni si lo. Malsawma chu kawm a nuam viau ang, Remruati bialpa ni lose chuan..fiamthu sawi tur lah a hre si. 

Kan eikham a, ka sengfel vek. Ka phût lo naa Remruati pawh ka rin ang ngeiin a inthiarfihlim hmak a, Sangbera bulah a ṭawng leh zuah zuah tawh. A ṭawng paha a nêk tel kher zel hian ka mit a tikham lek lek fô. 

Dar 9 a la ri lo hlek tihin Sangbera chuan, "Tir'u, in pindan tur ka kawhhmuh ang che u. Mut ka duh hnai tlat" tiin a sawm ta a. Ka lo thaw huai mai. Anni pawh chuan an zui ve mai bawk a, in hnuaiah chhukin an zuk inkawhhmuh fel thei a niang, a rawn chhoh leh chuan, "Mu ila" a ti sup a. Ka hnial hran lo. Ka intifai thuak thuak a, ka mu ve ta a. Phone a hman leh te te hnuah a rawn mu ve chauh. Min rawn kuah nghal thawk a, ka lo hnial bik lo. Thil chu a nih tur ang hi ni vek law law se ka duh tawh. Min rawn fawhna pawh chu ṭha takin ka lo chhanglet ve. Rizai hnuaiah chuan min rawn dap ta rak rak a, ka lo chhing diar diar thung. A rum nghut a, "May, min en rawh, chhing suh" a rawn ti hrâwk. Ka meng a, kan mit leh mit chu a intawng chiang hle..umm, ṭêk chhawk kha a lo la bo fai vek lo a nih hmel. "I inpeih tiraw?" A ti leh sup a. Ti nge maw mi zawh teivet le..a tih dawn chuan tih ve hle hle mai tur a nia. Ka ngawi reng chu min rawn fawp lehin,. Nupa nun tak tak min hmanpui tur chuan chet a la ṭan ta. Ka hlau a, ka zâm a, mahse, ka feel tho si! Chulai mood hrang hrang hnuaiah chuan nupui ka nih angin ka pasal Sangbera chu ka lo pui ve hram hram a. Ka zei hlawl lovang tih chu a hai ka ring lo. 

Ka rum kâwk chu nghet zeta min rawn kuahbetin, "Ka hria.. mahse, ka lawm e. " A ti tham ṭuak a. A natzia kha ka sawifiah thiam lo e a. Mahse, kha kha ka paltlang a ngai miau si a. 

Zinga ka harh chuan ka pasal ban ka lo kham a, ani pawn min lo kuah chial mai. Ka han chet chuan a rawn harh ve nghal, ka chalah rawn fawp zauhin, "Bawihte, good morning" a ti sup a. Ka lo nuih let sak. Hetiang reng hi kan nupa damchhung hun nise tih ka ngaihtuah a. Ka chhungril a rawn na nghal. Sangbera hnenah ka thianghlimna ka hlan tawh a, mahse, a tan hlutna ka nei ve ang em le?! Ka tho a, tukṭhuan ka rêl nghal. Remruati te pawh an la rawn tho lo a niang. Vawiin chu Inrinni a ni bawk a, Kimtea pawh a mu rei ve deuh dawn a nih hmel. Ṭhanglai an nia, mu âm deuh mah se; a pawi lo. Kan pa rawn thawh hnu lawkah Remruati te pawh an rawn tho ve a, a ṭhing rim an nam ther ther mai. Sangbera'n, "Vawiin chu chawhma ka chhuak lawk dawn aw. Bank ka han dawr ang e. Chawhmeh pawh ka rawn lei haw nghal ang" a ti a. Remruati te an awm ve si avangin kan pahniha kal a rem chiah lo a ni. Remruati te pawh chuan, "Chawhnu lamah kan chhuak chho ang. Malsawma nuteii bulah kan khawsa ve rih mai ang" a lo ti ve a. A pawi lo nasa. An sawi hmangin Remruati chhungte lamin Malsawma chu an lo iai ve tumhrang a niawm e. An fanu hi an hmu sang mah mah te pawh a ni mahna. Tihah te chuan Malsawma chu eizawnna nei a ni a, Remruati tan te chuan a ṭha lutuk alawm. Mahse, kan sawi ve phak a awm si lo va..

Tukṭhuan ei khamah chuan Sangbera pawh a insiam a, A rualin Kimtea pawh a chhuak ve. A bike hi Kimtea khalh a phalsak naa Kimtea hian license a la neih loh bakah ka ngaihtuah deuh thin avangin khalh ka la remti chiah lo. A bialnu a han hmu ve leh dawn a nih hmel..an induh ve riau mai, anni hi. 

Keini pawh Remruati te nen chuan kan awm a, in ka tifel mawlh mawlh. Sawi tur vak ka hre si lo va, anni pawh an phone khawihin an mu zâl vel mai mai. Sangbera'n min lo bia a, "Tleipuia pa a chau thut a, hei ka va lang ve zuai ang e. Ka rei lo vang" tiin. Tleipuia pa hi a upat tawh bakah natna hrang hrangin a bawm a, hetiang thut dinhmuna ding a ni hrim hrim a. 12 a la ri lo tihin Remruati chuan "Theitui in ang u, a lum riau" tiin Fridge a va hawng a. A va thli nghal. Kei erawh in hnuaiah Kimtea pindan singsa turin ka chhuk daih. Ka in châk rih lo bawk nen. Remruati te chuan an mutna takngial pawh an lo siam lo. Ka chek hlak mai, ka siam fel vek a, hmun ka phiah leh vek hnuah ka chho leh ta a. Remruati chuan, "May, chawl hahdam ve rih tawh rawh. Kha theitui kha in rawh. " A lo ti siam siam a. An pa malchungah a bawp a hlang deuh ngei..ka dangro ve deuh bawk a, dawhkana theitui chu inthlitin ka in ve ta khawlh khawlh a. Tihfel ngai em em a awm tawh rih lo. Azuii nen kan inbia a, "Karleh khian ran damdawi laa rawn zin ka tum a, inngaihawm ve tawh bawk nen" a rawn tih chuan ka lawm kher mai. "Awii, ka van lawm, i lo kal loh vaih" tiin ka vau lawk a. 

"I rai tawh em?" A rawn ti leh thâwr mai. Ka nui vak a, "Kal teh,. A teuh lo lutuk" ka ti chul a. Kan nui dun hawr hawr..kan inbiak zawhah Nubawihi ka call leh zat, "Lo kal chu ka châk tawh lutuk. Apa hi lawm a la dam ṭha thei lo va. " A ti nang nang a. 

"A dam ve ṭêp ang. Taka I u Kimtea exam zawhah kan khaw hluiah rawn zin kan tum a, kan rualin i kal ve thei maithei asin, karleh thawhlehniah an zo dawn a" ka ti a. 

"A ṭhat hlauh chu, apa te ka lo hrilh ve ang" a ti a. Kan inbiak lai mêk chuan ka lu a rawn hai thut a, ka tha chu a zawi rawih rawih ni hian a lang. Phone pawh chu ka hum nghet thei meuh lo. Ka mit sulh sulh bawk si, ka awmdan chu mak ka ti nasa..dawhkan kila chaira ka ṭhutlai a ni a, chair aṭang chuan tla thlain chhuatah ka bawk thlawp mai. Inbenkan tuma ka han insanmar pawh chuan a phet zel,. Thahrui reng reng ka nei lo. Ka thluak erawh a fîm si! Mangang zetin "Remruat" tiin ka au a. kar lovah an pahnih chuan an rawn lang nghal. Min rawn hmuh chuan Remruati chuan, "Ehe! Ti nge?" Tih leh min kaihthawh a tum a, a tha rinchhana thawh hram tuma ka insanmar lai chuan min thlah thut a, ka bawk leh thlawp. Makti zeta ka han melh ṭâwk ṭâwk chuan verther zet hian min lo nuih ver ver mai..