Sangbera 13

SANGBERA (13)

Ziaktu : Toni Râlte

Tukṭhuan ei laiin Sangbera thutlukna chu ka hrilh ve hlawm a. An hlim hle, Nubawihi chuan, "In innei thei lovang tih kha ka lo hlau hman lutuk a, ka ṭawngṭai nasa tawp" a ti lehpek. Kan bula awm a chak zek zek bawk a, Sangbera'n pawi a tih loh chuan awmpui pawi ka ti lo. Kan inpuihtawnna zel a nia. Azuii chuan, "Engpawhnise, thudik hriat hrim hrim chu a ṭha, Social mediaah i lar tawh sia, miin an ngai dik lo vek tawh ang che" a ti ve a. Ka ngaihdan chiah a ni. Thudik chu Sangbera pawn hriatchhuah a duh ka ring. Thil harsa lutuk turah ka ngai lo, Police rawih kher pawh a ṭul lo maithei a ni. Chaw eikhamah ka lu ka su a, ka hruk hul laiin U Rini a rawn lut leh nawlh. Ka hmu khât bawk a, ka hmu cherin amah chu a da bûi mai, ka sawithiam lo. 

"In inneih chu in ṭhulh fel ta em?" Nui sâwng chung hian a ti a. Mak ka tih chu ti nge hetiang ho hian mi hmai êng zahna hi an neih miah loh le ka ti. Anni aia kan retheih êm vangte pawh a ni mahna. 

"Ṭhulh ta nang" ka lo ti sam êt a. A meng phâwk deuh chu ka hmu reng, "Ti nge? In inṭhen ngei ka lo ring asin" a ti tawp mai. Beiseina a lo nei ve hmanhmawh a nih hmel. A â roh mang e aw. "Ti nge kan inṭhen ngawt ang, kan inhmangaih alawm" ka ti ve zel a. Azuii leh Nubawihi te lo nui ru char char chuan min insûmtir thei lo lek lek mai. Tâu bûrin a haw leh hnak hnak kha..ani pawh hi a â vek tawh. Sangbera zûn chu a lo na deuh a niang e. 

Keipawh ka insiam mual mual a, Sangbera nena hmaichhana inkawm tur chuan in ka chhuahsan ta. Vawiinah putea te an lo thleng dawn bawk nen, rei vak pawh a chi loh ang. Dar 11 rik hmain Sangbera in ka thleng a, inneih a hnaih tawh avangin a nau te hoin in pawh an lo khawih danglam ve a lo nia. A nuam tawh khawp mai. Sangbera chu awmhmun thawmhnaw nen a lo awm a, ngawi rengin inhmatawnin reifê kan ṭhu dun hman awm e. Eng nge a ngaihtuah ka hre si lo, a tawpa tawpah hmeichhia zawk na na na chu ka insûm zo ta lo nge, "Ṭawng ta si che" ka ti ta hlawl a. A rum nghut. 

"I sawifiah hun ka lo nghak zawk a..i naute chu an ṭha em?" A ti ta nge nge a. Ka naute buaina tawh thu kha a hre ve sia, a lo la ngaihtuah ve hram hram a nih hmel. 

"An ṭha e. Chuan, nia, kha thil kha sawifiah vak ngai paw'n ka lo hre lo va. Engtin nge i rin theih zawk ka lo ti. I zin hlan khan Lsa khan min sawm ngawrh ve sia, Azuii nen chaw kan va ei ve a. A bialnu pawh a sawm nghe nghe. Nangmah an rêl char char che a, mak ka ti ru tawh rêng a. Chuan, kan haw hma deuhin Lsa khan roomah min ko lut a, puan min pe ve a. Chuan, keipawn ngaihṭha takin ka lo kuah ve mai kha a nia. Engmah dang kan ti lo" ka ti ta zung zung a. A hmel a danglam eih lo, lungtum chiah chiah. 

"Ka rindan sa chu a ni tho va. Amah Lsa chu kan biak ve reng reng pawh a ngai a nih chu" a ti ve ta a. 

Ka biak tawh thu leh a ṭan natzia te ka sawi ve mawlh mawlh bawk. Thinrimin engmah kan sawi lo va, ka lawm. Mahse, sawi tel ve hram ka duh sia, "Remruati thiltih vek a nih ka ring. I hriat angin neih che hi a tum nasa sia" ka ti ta hmiah mai. Ani pawh a bu ve nghut a, "Heitê hi rin aiin a hnawksak zêk mai. Engpawhnise, khatia lar vak kha ka duh loh ber a nia, tumah hian min ngaihven lo se ka duh. Mahse, kan duh angin thil a kal ngawt thei si lo va. Innei zo ila, he thil hi chu kan chingfel ang" a ti ta charh charh a. Hetiang kawngah chuan ka ring zo bawk a, ka hmin thlap mai. Ka haw hmain Nu Buangi ka va kân hram a, ka rin aiin a lo ṭha. Kan buaina vel pawh engmah a lo hre ve lo va, ka sawi ta lo law law mai. Ka hawn dawn chuan Sangbera chuan kawt thlengin min thlah a, "Ka motor ka siltir a, bike lah ka hnathawkin a hmang bawk sia, ka thlah lo mai ang che. Lo hahdam la, lo him bawk la aw. Ka nupui tur i nih kha" a ti dam thlup a. 

"Umm, nangpawh le" ka ti ve sap, rawn kun hniam zauhin ka hmuiah a rawn chuk zeuh a, ka inla hrang rang lutuk chu keipawn mak ka inti! A nui hawk a, "Sakawlh emaw min ti leh tawh em ni?" A ti nghut. 

"Ka tihpalh. Ih, englo..aa..a ho lutuk" tiin ka ne ne kual ta ringawt. Ka rilru dik tak hria se tih chang ka nei a, mahse, deal ang leka innei tur kan nihna laiah inthup tluan ka duh zawk tho. A tan he inneihna hi invenhim leh inpuihtawnna a ni miau si a. Chu chu ka pawm a ngai tih thu hi ka inhrilh mawlh mawlh reng mai a ni. Mahse, min lo puih tawhna zozai te avangin nupui ṭha tak nih erawh ka tum. Kan hmalam hun kal zel dan tur ka hre lo va, Remruati a beidawn hunah emaw aman min ṭhen a duh huna inṭhen leh mai turah ka inchan ber, chutiang hun a lo thlen pawn min puih zui zel ka ring bawk. Chumi beisei vanga nei tur erawh ka ni lo thung. Remruati'n a neih ai chuan hrehawm deuh mah se; neih mai ka hnial loh danah a laka ka rilru tur chu in hriatthiam mai ka ring. Mahse, ka rilru hi chu ka hrilh ka ring chuang lo. Inpuitawn kan nia, ka nau hmalam hun tur vang pawn duhthlang thei dinhmunah ka ding tlat lo a tin ni. 

Tlaiah putea te an lo thleng ta a, an nupain an rawn kal thei hlauh mai. Pite Vani nen hian kan inhmuh khât aleiah kan innel em em lo va, mahse, chutia kan han inhmu thut chu kan inpawh ve nghal mai. Kan in te taktêah chuan kan chêp ve deuh tak avangin U Sangi te in lamah Putea te nupa chu an riak dawn a ni. Pawnthuah kan nei vak bawk si lo nen, in chungte lah an chhungkaw buai tawh sa nen ka tibuai ngam chiah lo. Bakah U Rini leh Terini te avang hian kan inhlat ngawih ngawih tawh. Kei tak pawn chhuahsan ka châk zek zek tawh. Zanah chuan Putea te nupa bulah Sangbera te chhungkaw chanchin ka hriat ve chhunte chu ka hrilh ve nel nual a. 

"Chhungkua tak tak i nei tawh dawn tihna a nia, ka lawmpui che. I nu kha la dam ve se tiraw?" Putea chuan a ti vawng vawng a. Rilru a kal thui duh ṭhin ngawt mai. Ka pa chanchin erawh kan sawi tam lo ve khawp mai. Mut dawnah Teberi nen kan inbia a, kan video vel te kha kan sawi dun ve a, "A thuhrimin khatiang inkuah satliah mai mai kha, engmah a ni lo. A ho lutuk, an ngai serious ve mai mai a nih kha" a ti ve nasa mai a. Sangbera farnuin min ringngam chu ka tan lawmawm tak a ni. Min do ve ta tlat se, ka tan tihngaihna a vâng dawn êm mai. Sangbera nen pawh kan intext zuai, vawiin khan Lsa number kha ka pe a, a va be ta em ka hre lo. Remruati te ho ka block tawh bawk a, tibuaitu ka nei rih lo. 

Inneih hma ni 2-ah U Kunga te an rawn thleng ve ta. Rempuii leh an te ber an rawn kal ve lo thung. Vawk chu an rawn phur tak tak! A va lawmawm tak e aw. Mahse, kan in a chêp ve sia, kan buai ta deuh. U Kawnga'n, "Ngawi teh u, hetiang zawng a fel lo ve. Pu Zothana ten âwka an rawn nei duh mang si lo va, kan in lamah chawhlui pawh i buatsaih mai teh ang u. Kan in a zau chu thuhran, keini chu kan in luahna te an felin an inphal zau alawm" a ti ta mial a. Aw..hemi te nupa hi an awm lovang tih ka va hlau tak êm. Ka ṭah a chhuak zawk e a. Ka hnial thei ta lo chu a nia. U Kunga te chhungkua pawh U Sangi te in lamah an insawn thla ve leh a, putea te nupa inthlahrung lah chu Pite Vani naute in lamah an lo insawn daih a. Mahse, a lehlamah a âwm ve tho, kan dêldûl ve êm a ni. A hnua Sangbera'n a hriat chuan, "Ti nge maw min hrilh vat loh le? Hotel ka book sak mai tur a nia, cottage pawh a tam tawh" a ti nghe nghe. Mahse, mipa lam va tihbuai sek kha ka duh bik lo a ni. 

Man hlan dawn tlaiah chuan U Kawnga te in lamah ṭhenawm ṭhenkhat te, in chungte bakah Kimtea ṭhen leh rual te nen chawhlui chu kan kil ve ta a. Kan chhangchhe viau naa, a nuamin a hlimawm. Sangbera te chhungkua leh a ṭhian ṭhenkhat ten an rawn ei ve bawk a, Nu Zami te chhungkua an fakawm takzet. Kan inthlahrun tehlul nen, engkimah huau an ni tawp mai. An kawt zawl zau vak lovah rawng kan bâwl ve a, kei leh Azuii tak chu kan buai ve hran lo. U Kawnga leh U Kunga inkawmngeih nghal lutuk te chu Pathian remruat zel a ni ka ti lo thei lo. U Sangi leh U Mawii lah chuti bawk, Nuteii te erawh vanduaithlak deuhin an pa nî a boral tlat mai a, an rawn lang thei ve ta lo. Mahse, pawisa min lo thawn ve thung. Thuamchhawm pawh tihtham ka nei lo naa, ka phak tawk a nia, ka lawi luhna tur ka hre sa bawk a, ka zak em em bik lo. Man hlan zanah chuan kan ṭhu ve hmur mai. Mizo dana man leh mual ₹420 chu ka nu nuṭa ka putea chuan a dawng ta a. Sangbera nen chuan man leh mual inhlan kan ni ta. A hawn dawn chuan midang hriat phak si loh hian, "Naktukah chuan ka nupui i ni tawh dawn sia, zan hun kan hman dunna tur pawh ka tifel diam tawh e. Lo hahdam rawh aw" a ti lehpek a. Ka ner vak ringawt. Ka zak bawk si, ka ngaihtuah zawng pawn ka âwm a nuam lo nghal. Mahse, ka tihpuitlin a ngai si. Hmabak a va kô tak. Kan mut hmain putea chuan thupui fun takin min zilh ta a. 

"Hei le, naupangtêin pasal i nei dawn chu a nia, lehlamah a vanneihthlak bawk si. Hetiang taka pasal ṭha i hmu hi malsawmna a ni. Mahse, lawm ringawt lo la, mi dang bula khawsak dan i zir ve viau a ngai dawn a ni. Mizo danah pasal nei tawh chu i pasal te chhungkaw zing ami i ni tawh dawn a, engkim a chhia a ṭha pawh an bulah i thlen zel tawh ang. Vuivaina ngah lutuk mihringte hi chenpui nuam an ni ngai lo tih hria la..tin, pawimawh em em pakhat chu i pasal hi nang aia upa fê a ni a, nupa nun hmanna kawngah pawh ani chu engkim hresa leh varpawh tawh a ni dawn a. Khumlaizawlah nupui chu zakthei lo ni lovin zaklothei an nih a ngai tih hrereng ang che. Khumlaizawl nuna i pasal i tihlungawi loh chuan thildang hotê têah in intithinur fô ang. Hrereng ang che..i pasal i zahthiam chuan lalnu ang chiaha cheibâwl i ni ang. Inzahtawnna leh inhriatthiam tawnna tel lohna hmunah tumah kan inhmangaih reng thei ngai lo a nia" tiin. Ka vawng rauh rauh mai. Ka nu kha la dam se hetiang thu ṭha tak tak hi min hrilh ve ngeiin ka ring. 

A tuk nghakin kan mu ta dial a. Ka pasal neih ni chu a lo herchhuak ve ta reng mai. Ka harh rualin ka nu leh ka û te ka hrechhuak nghal mawle. Ka lung a chhe lek lek, mahse, Kimtea hmuh laia lungchhe awm deuha awm chu ka duh lo. Zingkar aṭangin kan buai ve mawp mawp mai. In chungte pawh man an ei ve bawk a, ka beisei loh deuhin thilpek min rawn leisak ve. U Rini hmel erawh hmuh tur a awm lo. A pawi lo daih zawk. Inneih hunserh kha dar 1 a ni a. Hmanhmawh khûk ruai a ngai hran lo. Min chei tur pawh a la rawn thleng lo, Sangbera rawih vek an nia. Zep nak emaw ka pasal nei ve hi ka thuamchhawm thlengin ka pasal tur hian min tumsak lo chauh a ni. Hei baka vanneihna a awm dawn chuang em ni? Hmangaihna vang ni lo mah se; keini unau rethei tan chuan malsawmna a ni lo thei lo. Dar 12 rik hma deuhin Sangbera in lam chu kan pan ta dial hlawm a, motor pawh ama sum sêng vekin a hmang a ni. Putea ten an han nawr ve teh pawn a thutlukna a sût duh si lo va, lehlamah kan tan chuan a tlawmthlak ve lek lek a ni. Min cheitu a thiam bawk a, natural make up nen chuan hmelṭha ka inti ve viau mai. Azuii pawh a hmel landan a danglam vek thei mawle..Sangbera inah chuan pastor nen, inneihna lo chhimtu te nen kan kim ta ṭhap mai le. Ka zâm rûk nen, rin ai tak chuan ka ti ve thei mai. Zungbun min buntir laia Sangbera mitmeng mawlh chu a ni, ka zep lo, duh leh hmangaih em em mitmeng ka hmu tlat nia! Mahse, a inthunun leh vat a, keipawh ka hnual nghal rawih mai. Inneihna chhim tu te tan ruai ropui tak a siamsak bawk a, tupawh mai chu an puarin an tlai niin ka hria. Remruati te pawh an rawn nalh viau, mahse, a hlim hlawl lo tih a lang reng. Pawi ka ti teuh si lo va, min hawtu te laka rilru ṭha tak put kher hi ka bat niin ka hre lo. Tin, mi ka huat tawh chuan Samua pawh a daihrei êm kha, chutia awlsam taka nêm leh mai mai chi ka ni tlat lo va, Sangbera te hi huat namên lohin ka hua ang tih pawh a hlauhawm a ni. Teberi te chhungkua, U Bawiha te chhungkua, Nu Buangi te thlengin an rawn nalh em em vek a, an hmel hmuh a nuam ngawih ngawih a ni ber e. Zanriah kan ei aṭangin zan hun huphurhnain ka khat tawh a, ka puar leh puar loh pawh ka hre lo ve a. Ka zâm ta takzet ta. Khua a rawn thim a, ṭhenrual hnai tak takte bak an awm ta lo. Tleipuia te resort-ah lawiṭhat zan chu kan hmang dawn a nih hmel a, ka ṭah a chhuak lek lek thei. Ni e, zep loh chuan englo film pawh en ngai lo, video leak out an tih pawh a chhehvel chauh en ngam kha ka nia, zahmawh hi ka zah a ni ber mai. Tin, ka hlau a ni tel bawk ang chu. Azuii'n fiamthu titaka kan inneih dawn zana a sawi, "Inzir nan englo ho film te hi en ve reng reng la, i la virgin sia ,i bo lutuk ang e" min tihte kha fiamthua lak chi pawh niin ka hre lo. Mizo chu hetiang ze nei, sex education pawh zahmawh leh hur lama ngai tlat kan la tam êm mai a, hei hian nupa inkara khi tam tak pawh hi a siam a tih ve theih âwm e. Present kan dawn hote chu naktuk lama hawnah kan ti ta mai. Tleipuia hoin an resort lam chu dar 9 velah kan pan ta a. Azuii hi chu a thlah haw leh dawn a ni. Kan nupa room tur pawh an lo siam special viau mai, keini thil changkang la hmu ve vak lo chu kan hawi kan hawi mai alawm le. 

"Inbual ang aw. Tuilum a awm kha" Sangbera'n a ti nghut a. Ka lo îp leh hman. Mahse, inbual chu ka duh, ka zâm luatah ka thlante a chhuak a, ka bân chuap mai. Ka inbual hmasa ta a, bathroomah chuan zankhuaa awm mai te ka châk rum rum alawm le. Theih hek loh le, "May, hmachhawn rawh, i thei" tia infuih mawlh mawlhin ka chhuak ve ta hram a. Teberi min leisak underware themlem ve angreng tak chu inbelin mut kawr pante ka ha bawk. "Lo mu hahdam rawh. Ka va inbual ve ang e" tiin bathroomah min luhsan a. A zangthal zawnga muin buai nuaihin ceiling ka melh vang vang. Ka rin aiin a la inbual rei lo zui! Boxer a ha a, kawr pawh a ha lo. Wine a thli a, "I khur chhe lo chauh a ni sia, i lem ve duh hlek em? I zâng hawk dawn asin" a tih chuan ka lo nerkhum nasa. Eng anga boruak ngamna pawh nise zu kaihhnawih kher hi chu in loh hram ka tum. 

"Ka chau" ka ti sap a. Min hriatthiam ka beisei vang a ni ber. Wine a in zo, a rawn mut pah chuan, "May, kan pehhel kumkhua thei dawn si lo va. Mahse, i duhthlanna ka zahsak ang che. Nupa nun hman kher hi ngai i ti lo a nih chuan ka pawm ang. " A ti ta a. A rilru ṭhat vang hrim hrim nge min mutpui hreh vang ka hre lo. 

"I thu thu kha chu" ka ti ta ringawt a. Za vak lo hian a nui huk, "Nupa kan nia.." a ti a, a ngawi leh daih. Nia, nupa chuan tihtur an nei ṭhin. 

"Nia" ka ti tawi tak a. Ka chechâng eih lo bawk. Min rawn kuah thlawp a, ka lo îp nasa mai. "Ka nupui duhtak hi a inpeih hun ka nghak thei alawm. Chutiang lutukin ka râwp lo ve" a ti dam thluam a. Ka lo chhing vang vang ringawt. Kan chau dun ve bawk a, ani phei chu a wine in kha a thawk nge a muhil hmasa zawk. Keipawh rilru nuam vak lo chuan ka muhil zui ve ta a. Kan zankhatna chu a ho ka ti dawn nge, ka duh ang takin a thleng ka ti zawk dawn ka hre lo. Inpeih tik ka nei lo mai ang tih pawh a hlauhawm ve viau. Kei aiin a harh hmasa a, ka harh chuan ka bo hû mai. Ka inthlak sawk sawk a, in hnuai lamah chuan ka chhuk thla ve nghal. Eisiamnaah a lo awm a, a thilsiam rim chuan ka ril a tiṭâm tawp. 

"Good morning. Hnâr ringnu" tiin ka chalah a rawn fâwp zauh a, ka lo nui ve hak, nia, ka hnâr ṭhin tlat. Duh vang pawh a ni bik lo va. 

"Tukṭhuan eikhamah muangmarin kan haw ang. " Thunei fê hian a ti leh zat a. Ka lo pawm thliam mai. Tukṭhuan chu ama bâwl vek kan ei ta a, bawngsa roast leh soup bakah thlai hnah kan hmeh, nimin ai khan ka eitui daih zawk. Tichuan, kan eikhamah insiamin a in lam panin kan haw ta vang vang a. Keima chhungte lam kha vawiinah an haw deuh vek dawn a, ka dem lo. Hnain a hmuak tlat si a. An theihtawk an rawn ti tawh a, ka lawm em em tho. Nubawihi erawh a haw zuai ang a, awm reng turin a rawn kal leh dawn a ni. Tin, Kimtea pawh vawiin lamah kan unau bungrua nen Sangbera inah a rawn invawm lut ve bawk ang. Buaipui turin Sangbera'n hlawhfa a ruai fel vek tawh. Dik tak chuan ka awmthiam lo zawk, lal ang mai ka ni ta mai chu..mahse, hmalam hun kan hre lo va. 

Sangbera inah Kimtea nen ni 3 kan khawsa ve ta. Inleng neuh neuh kan la nei naa an tam vak tawh lo. Nu Buangi te nupa erawh chuan chaw min la rawn eipui hram hram thung. Tlem lutuk hi chuan chaw ei tuite hi a har ṭhin sia. Kimtea pawh kum a laklawh deuh avangin a school kalna ngaiah kumin chu a kal ang a, nakkum lamah chuan Sangbera thu angin kan sawn tawh ang. Valtea kha kan ruai ta mai a, ani khan a kal leh haw lam a rawn thlah ta ṭhin, a zia viau. Ka pasal nen nupa nun kan la hmang ta chuang lo va, zan 3na phei chu a riak chhuak daih! Mahse, an sumdawnna vang a nia. Ngaihṭhat lohna ka nei lem lo. Kei chu nupui dinhmuna ding mah ni ila, a hmaa a hnathawk ang deuha inngaihna kha ka la nei a. Nupa nun la hmang lo ta na nâ na chu pasal anga en harsa ka ti ve deuh pawh a ni maithei. Sawi hmaih hauh loh tur chu Teberi leh U Mami te felzia mawlh hi, an pasalte chu thuhranah lo dah ta ila..thuamchhawm te kha nei vak hek lo i,. A û hriat lohin ka mamawh tura an rin ho kha an lo order ve tawp mai a. A inthlahrunawm takzet zawk. Zanin tlaiah hian in pui ber U Bawiha te inah chhungkaw chaw eikhawm kan nei dawn nghe nghe. Sangbera pawh a rawn haw hma a, a rawn luh rualin, "Lo lut lawk teh" tiin min rawn ko a. Kan pindanah ka zui lut ve nghal. Pawisa ṭhahnem tak mai hi rawn dahchhuakin, "Safe-ah khan lo dah lut lawk rawh aw. Bank ka la dawr hman lo va, chhungpuinu i nih angin kan sum dinhmun i hriat ve hi a hun tawh" a ti zung zung a. Chutiang khawpa tam pawisa chu ka la hmu ngai si lo va, ka melh char char mai. 

"May" a rawn tih nghut chuan ka phu zuk a, "Aw le..ih engzat nge?" Ka ti ṭial rûan a. Keini ang rethei bakberha khawsa ṭhin tan chutiang khawpa tam pawisa hmuh chu nervous a awl khawp mai. In ni ve tho ang. "Nuai 3 sing 8 " a ti a. Ka chil ka lem khawlh, "Hetah a him ang maw?" Ka ti leh hram, ka hlauthawng thut te chu a mak lo. 

"A him turah ngai ang, nang leh kei chauhin password kan hre dawn a" a ti ve mai a. Ngawi rengin pawisa te chu ka la khawm a, A safe password ka la hre si lo. "1305" nuih suk pahin a ti a. Ka phone password kher kher..

"Ti nge?" Ka ti hû a. A nui leh hawk, "I va dilchhut tak" a ti hluk a. Ka melh vak ringawt. Pawisa chu ka dah lut ta a, a him êm ang chu maw. Inbual turin bathroomah a lut a, Teberi min hrilhrûk angin leh ka lo tih ṭhin dan angin a thawmhnaw hak tur ka lo dahchhuahsak a. Choka lamah ka lut phei leh nghal. Kimtea pawh a rawn thleng a, "Inbual ve nghal rawh, kan chhuah hma takin" ka ti a. Ani hian in hnuaiah ama pualin pindan zau leh nuam tak a nei ve a, ani pawh a tir kha chuan a awm thiam bik lo lek lek. Kutdawh, hausa thut kan ang ve bawk a. Nubawihi rawn awm hunah in hnuaiah ani pawh a awm ve mai ang chu. Chaw ei chhuak tur kan ni naa, Nu Buangi te an rawn kal ve dawn loh avangin arsa ka siamsak a ni. Kan inneih hnu aṭang khan mak deuhin a hriselna a tlahniam ṭan a, kan inneih kha a lo nghak ve te pawh a ni maithei a ni. An pa lah hnathawkin a chhuak ve reng bawk nen..hetia lo buaipui hi hrehawm ka ti hran lo. Anni hi awm lo se ka khua a har viau ngei ang. Ka inbawl peih hnuah ka inbual ve ta chauh a, ka inbual tur bathroom-a ka lut tur chu min rawn pawt letin ka beng bulah, "Fai deuhin aw. Zanin chu ka ta liau liauah ka siam dawn che a nia" a rawn ti a. Ka mur chhuak nghal vek thei mawle. Ka chil lem khawlhin ka nui lui a, "Aw le" ka ti thei hram. Ka luhsan ta a. Darthlalang hmaa saruaka ka din hmasak ber khan zah vangin ka sen awp awp a, mahse, tunah chuan Pathianin duhtaka a siam mihring taksa mawi leh nalh tak neitu ka nihna chhuang ru tak chungin ka inthlir ve thei tawh. Nia, zep loh chuan ruaka hmeichhia kan awm hian kan mawi ka ti..ka dul thep zaih leh ka kawng fek rât te, ka mawngbawr poh târh maite chu model te aia a nalh loh bikna ka hre hauh lo, mahse, model nih erawh ka duh hran chuang lo. Sangbera nen kan inneih hma khan ka rilruah ka sam tan châkna kha a awm ta tlat mai a! Hmana a sawi, "I sam hi tan la,i inhmeh ngawt ang" a tih vangte pawh kha a niang e. A la dum hlap reng a, a awm ang angin ka dah a, vawihnih chu "Sam inhmehnu" tiin min ko tawh nghe nghe. Nuam tih veng vengnain ka khat a, kha ringawt pawh kha manhla ka ti. Bathroom kawngka a rawn kik a, "I rei ṭêp, nu-i" tiin. Nu-i a rawn tih chuan ka nui nghek ringawt, a inhmeh lo ka ti tawp, kei lah ka la nau ve ropui si. Bathrobe nen ka va chhuak a, khumah ṭhuin min lo melh ngat ngat. Ka lai leh dawn ta mai. 

"Nge, tikhan min en suh" ka ti hlak a. 

"Ka vannei ka ti" a ti ringawt. Ka ner sak a, "I zak lo" ka ti leh tawp. Hetiang huna ṭawngkam ka thiam lo leh tlat zel hi ka inngei ṭhin. Sawi thiam ila sawi ve tur ka ngah tehlul nen..

"Lo va chhuak teh, ka inthlak dawn" ka ti leh a. "A ho, i pasal ka nih hi..i kumkar zawng zawng ka la hmu fai vek dawn" a ti nghut a, lungawi lo te pawh a ang lek lek. 

"Ka hria, mahse, a nuam hleinem" ka ti ve leh a, ka thawmhnaw ka la chhuak bawk . Ka inhrukhul lai chuan a lo chhuak ve vut a, ka nui hak mai. Ka insiam rei hran lo. Nu Buangi te an rawn phei ta bawk a, keini pawh kan chhuak ve ta nghal. U Bawiha te in kan thlen chuan Teberi te pawh an lo awm reng tawh a. Min lo pawm leh chuk chûk tawh. Amah hi a naupangchhia thei hrim hrim..a û te lakah lah a pangchang thiam si. Farnu duhawm tak zawng a ni chiang a ni. An fate ho chu an toys roomah an infiam a, puitling ho chuan rawng kan bawl suau suau mai. Bâwl ti ila Mami'n a lo bâwl deuh vek tawh a, tihlum ngai leh salad te kan siam thar vel mai mai. Kimtea hian a pa Zorina hi a'n ngaisang mai mai khawp a! Insual thiam ngaihsan hi mipa nihna ve rengte pawh a niang e. Zorina bulah hian kan awmho tawh chuan a tâp chawt zel, Zora lahin nuam a lo ti ve bawk nen. A ṭha vek mai e. 

Teberi chuan, "Mam, Mayi te video vel kha chinfel i la tum lo mi?" A rawn ti ta chat a. 

Sangbera kan melh ṭhap, "Chinfel ngai pawn ka lo hre tawh hleinem" a ti mai si. 

Mami'n ,"Ngai lo, khatiang thil tenawm ti duh kha chu hremna pek ve ngei ngei chi" a lo ti hlak hlak. Mami hi a ṭawngkam reng reng a nêm thliam ngai lo, vin hlak hlak ang hi a ni ber. Mahse, a ngainatawmna a bo phah chuang miah lo, tin, a rilru a ṭha ang tih chu Teberi nen an inpawh dan aṭang hian a lang thei mai e. 

Sangbera chuan min rawn enin, "Mayi ngaihdan dan a ni mai" a ti sup a. 

Dik tak chuan mahni tawka dik inti leh kan diknaah chuan tlawm duh lo theuh mai kan ni a, keipawn ka dikna chanvo hmuh chu ka duh ve viau, "Chinfel pawh a pawi lo. A harsat hmel loh bawk a" ka ti ta a. Sangbera a bu nghut ringawt. Mahse, a hna a ṭan nghal dawn tih ka hai miah lo. 

Chaw ei lam pawh kan hnaih chho va. Naupangte ko tura Mami a din lai mêkin kawngka chu kik khawmawi pawh awm lovin a rawn inhawng rawp a. Ka la hmuh ngai loh nu valai leh nula te fel rin ren, hmelṭha tak hi an rawn lut a. Sangbera hoin an ding ṭhuau mai. Keipawh an hamhaih hmel êm avangin hrilhhai zetin ka lo ding ve ringawt, lo lutte lah chu an zâm loh hmel nasa bawk sia. Tu te tak ni ang maw?! 

Zora ber kher a rawn ṭawngchhuak hmasa ta ber a, "Nute, eng nge i duh?" A ti chang nghut a. A nuteii tihna a nih chu..ka hriat vawikhatna a ni. Zora pa hi chu ka hmu tawh a, a farnu erawh nikumah khan a boral tawh a niawm e, a kawng hnuailam a zen vangin hun rei tak che thei lovin a awm an ti. Ka hmu ve hman lo a nih chu. 

Chu nu valai lam chu rawn ṭawngchhuakin, "Nang hi chu kan mamawh i ni lo" a ti zang vah a. A hawi valh valh bawk. Sangbera chu a ṭhu tawh a, a tira a hamhaih hmel kha hmuh tur a awm leh tawh lo. A dam ruih mai a, a mitmeng erawh a thim..

"Nang leh ani kha kan mamawh in ni bik lo" a ti hriam hraih a. Nula hmel kha a ngui nghal rawih hian ka va hria. Sangbera hlir a melh avangin ka lo en chîk ve bawk a. 

Zora nuteii chuan, "Kan rawn kal hun hi a fuh ber zawk alawm. I nupui pawh min la hmelhriattir lo va.." tih pahin min rawn melh ralh a, a nui sâng bawk. Nu hmelṭha tak tia sawi tur chi chu a ni lem lo, a hmelchhia tihtheih lah a ni hek lo. 

Teberi'n, "Chhuak r'u, in hmelhriat ve pawh a ngai lo" a lo ti vat a. Ani pawh a aw a nêm bik lo. Nu bawk chuan ngaihnep hmel fê hian Teberi a melh a, "Nang hi chu lo inrawlh buai lo law law rawh. Hmangaihna hrethiam lo i nih kha..nangmah vang veka engkim kha thleng a ni a, nat nawn leh i duh loh chuan lo ngawi hmak rawh" a ti nghat nghat a. 

A reh duk a, ka tan lo ṭawng vena chi a ni si lo. Thil thleng chu ka hrethiam lo a ni satliah lo, a boin ka bo hû a ni ber e. 

U Bawiha a rawn ṭawngchhuak ve ta a, "Nute, ka inah hian tihtur leh chanvo in nei lo bawk a. He in chhungah hian in damchhungin rawn lut leh tawh lo ula ka duh, Chhuak rawh u" a ti rum ûl a. Nu nen khan an inmelh na dun kher mai, nula chuan nu chu kaiin, "Kal ang. Eng kan ang dawn lo. Mahse, kan beidawng lovang..i hria maw? Sangber" tiin kan pa a va melh zauh a, a nui sak bawk. An inkaichhuak lai chu keipawn ka lo uipui tuilian thlir ve reng ringawt. Kimtea nen bik chuan bo tak kan ni. 

Boruak chuan ngai a awh hleithei ta meuh lo. Ka zawt ngam si lo, Sangbera lah a hmel dam thlup phêna a mitmeng thim ruih vangin ka hnaih ngam chiah si lo. Mami chuan boruak siam han tum viau mah se; a hma a pha thei thlawt tawh lo. Chaw pawh kan rin aia tlem ṭheuh kan ei ka ring. Naupangho erawh engmah hrethiam ve hek lo, an ninhlei ngaiin an la ninhlei reng tho. Mami chuan dawhkan kan tihfai laiin zawitê hian, "A pawi ee, misual pahnih rawn kal hun fuh lo lutuk kha..ka ngei lutuk. " A ti tân tân a. Midang an awm hla tho bawk a tiin, "Tu te nge anni kha?" Ka ti ve ta sap a. 

Hawi kual hrek hrekin a hma ai maha zawi hian, "Zora nuteii leh Mama bialnu hlui" a ti ta a. Zora nuteii a tih kha chu mak ka ti lem lo va, nula rawn kal ve kha Sangbera ex maw lo ni a?! Kei ai chuan a upa fê ang, mahse, a hmel kha chu a ṭhain a nungchang pawh han en mai chuan a ṭhat hmel khawp mai. 

"A va mak!" Ka tih hluai chuan ka hmui a rawn hup vat. "Sawi suh, ka sawi tih phei chu" khawngaihthlala lek lek hian a ti a. Ka hrethiam ta deuh, tupawh hian chhungkaw thurûk kan nei ve ṭhin a, chutiang vel te chu a lo ni maithei a ni. Mahse, Sangbera nupui ka nihna angin ka hriat ve te chu a pawina a awm em em dawn em mawni le! A hma khan an chhungkaw chanchin tlemtê kha chu ka hre thuak tawh a, a pa thih dan, a nu a chhuah dan te..khang thil kalzel kha em ni ang? A nih hmel ka tih laiin lo kal nu lah kha Zora nuteii a ni leh daih bawk si! Chu chuan min tibuai ta riau. Mahse, hre châk zek zek anga awm kha ka duh chuang lo. Dar 8 rik hma deuhin kan pa chuan, "Kan haw ang e. Engkim a nih tur ang a ni lo va, a pawi khawp mai. Mahse, ka chingfel ang" a ti nghet charh a. A naute pawn an chelh bik lo. Teberi te erawh Mami ngenna angin an riak dawn a nih hmel..in lam kan pan lai chuan ka ngawi reng, Kimtea a awm ve avangin zawhna neih chi a ni si lo va. Ani Sangbera pawh motor a khalh uluk em em ringawt. Kan boruak a mûk bawk a, a mi uap a na viau a niang,in kan thlen meuh chuan ka chau angreng hle. Kimtea pawh engdang sawi lovin a pindan lam a pan a. Keini nupa pawh ngawi rengin kan intifai a, kan mu ta hmak mai. Mahse, chau viau mah ila ka mut a chhuak awzâwng lo. 

Sangbera mu zangthal ût lam chu hawiin, "Enteh,.englo..vawiin kha" ka ti niah niah a. 

"Umm" a lo ti ringawt. Min tihrilhhai letling alawm le, mahse, ka sawi pawp ta sa sa..ka hriat ṭul a nih chuan min hrilh ka phût ve tlat dawn. 

"Lo kalte kha..ngati nge?" Inkalpah lo zet hian ka ti a. 

Che eih lo hian, "Zora nuteii leh Mapuii te an nih kha" a ti leh hmuk. 

"Nia, in hamhaih sia, in thinrim bawk sia" ka ti ve zel. 

"An rawn kal hun kha hun dik ni hek lo" a ti leh mai a. Min chhang ṭha duh lo chu ka la na leh ta roh si.."E" ti ram hmakin lehlam ka hawi ve ta daih a. Ka titau ngam ta te chu a mak mang e. Mahse, ka inhrethiam bik lo, an chhungkuaah min lawmlut a, pawimawhna leh hlutna nei ve si lo anga ka inngaihna chuan min run a ni ber ang chu. A kut lum thur thur chuan ka hnute hnuaiah a rawn kuah ta chut a. Mahse, ka chechâng duh bik ṭhak lo. Kan boruak kha ṭha se chuan zaninah min mutpui a tum kha a nia, a khami ka va beisei vang lam ni loin khatiang boruak ṭha pangngai rawn nuaichhe vek thei tur khawpa thiltithei te chungchang engmah ka hre ve lo chu ka nâ a ni ber. 

"May" thatchhe aw zet hian a ti a. Ka chhang duh lo. 

Ka hnutê a rawn dek zauh a, ka che lo thei ta lo. A kut a dahthla leh vat a, min kuahbet ta tlat mai. Mahse, ka ṭang vak duh lo, nupa nun hman mood-ah a awm lo tih ka chiang a, lo ṭan vak kha ka hah mai mai. 

"Zoi..Zorem..Zoremmawi" a rawn ti leh duah a. Min hmu lem lo bawk nen, ka nui.

"Hetia ka laka i pangchan hun hi lawm ka lo nghah" a tih leh chuan ka nui tawp nghal hmak. 

Min rawn kuai vak a, ka lo hneh si lo, a lam ka hawi ta nge nge a. Hnai takah kan inmelh ta ran mai. Boruak chu a danglam leh ta daih, a hmaa a mitmeng thim leh tak rûn kha an thlawk bo ta vek a niang..mitmeng thatchhia leh min mamawhna a ni ka hmachhawn ni. 

"I inpeih tiraw?" A tih leh phei chuan vawiin tlai lama thil thleng kha engmah hre tawh lo ang mai hian a awm. Keipawh chutiang deuh chu..

"Zaninah chuan ni lo ve" ka inrin hmain ka lo ti leh chut pek a..a moodah khan ka cheng hman zuai asin le.

A nui suk a, "Ka hria..chuan, i pasal ka ni tihah chiang la" a ti leh daih. Hrethiam lo zetin ka melh a, ka chalah rawn fâwpin, "Hrilhhai viau ṭhin suh. Ka nupui i nih avangin ka huntiam rawn tichhetu te chungchâng chu i hre mawlh ang..a ṭha em?" Min thlem awka hian a ti a. Ka lungawi chawpchilh nghal. 

"Umm, aw le" ka ti ban chhalh a. 

"Zaninah chuan tihian ka kuah ang ang che hian awm phawt rawh. Ka tina lovang che. Hahdam ka duh rih a ni" a ti a, an boruak tawn tehhrep vang khan min thlahlel ve te pawh a niang e. 

"A ṭha lawm.." ka lo ti a. 

Ka biangah rawn fâwpin, "Ka lawm e. Naktukah Zodini thlan tlawhin kan kal ang. Chuan, engkim i hria ang" a ti sup a. Ka lo chhing vang vang.