Sangbera 12

SANGBERA..(12)

Ziaktu : Toni Râlte

Hun a kal a, U Mawii te pawh dam ṭha pangngai takin an khaw lamah an haw ve ta a. A khawharthlak teh e. Sangbera palai te pawh rawn lêng tawhin kan inrem fel thei a, a hun a tan thla leh ni 21 kan tinzâwn ta. Ka awm ve tawp tawp a ni ber e, han inbuatsaih vak ngaihna ka hre lo. Kimtea a phur em em a, ka rilru a hah tial tial thung. U Rini'n Sangbera nen kan innei dawn tih a han hre chiah mai chu, Terini aiin a tawrhhlelhawm zawk. Min hnawtchhuak deuh sek mai, "I va han tenawm tak, ka tan i bei emaw tih laiin i tan lek a ni maw i lo beih. I lakah hi chuan zahna pawh a zak ta ve ang, i hmel pawh hi ka hmu ning" a ti deuh reng mai a. Ngawi rengin ka lo dawngsawng tawp. Sangbera lo len ṭumin vawikhat chu ṭawngkam chhe zet zet leh mei nei zet zetin min tawngkhum lehpek a, "Rini, Ani hi nei dawn lo pawh ni ila nang hi chu ka duh dawn chuang lo che. Hetianga na tak taka i ânkhum tur a ni lo. Tun hnuah lo ching tawh ngai suh" a ti ta hmiah mai a. U Rini chu a zak chuang lo reng reng, Sangbera hi a lo duh ve hle a nih hmel. 

Remruati erawh mak deuhin a reh deuh tawp a, Sangbera nen an inbiak dan erawh ka hre lo. Keimah hi chu min rawn tâwng êm em lo. Pasal nei tur ka ni tih intheihnghilh chang ka nei ṭhin a, ka nundan a danglam phah hû hran lo. Sex hman a ngai tih chiahin min mawlh a ni mai, a bak chu a tlachawpa ngaihtuah atan ka ti pawh a niang e. Sangbera nen kan duhdan angin mawlmang taka inneih kan ti a,ama inah pastorin sawm bîk mi tlemtê hmaah inkutsuih chu kan duhdan a ni. A chhan chu pui deuh taka tih chuan thenrual min ṭawiawm tur ka nei ve lo êm a, ka tan a nawm loh bakah inneihna lem a nihna laia ropui taka tih kher kha ṭul ka ti lo. Inneih a hnai tial tial a, ka la ho hulh mai a, inneihna tak tak ni lo anga ka ngaih avangin ka palzam a ni ber. Sangbera pawh a sumdawnna thilah inneih hmaa chinfel tur ang chingfel turin a zin deuh zut mai a, a hmuh pawh kan inhmuh khât phah. Min ngaihsak reng naa, keimahah hian ngaihhlut lohna riau leh a hma anga ṭêk chhawk ang kha a awm thei tawh lo. Sangbera chu ka hua pawh a ni lo. Mahse, a hma ang khan ka en hleithei tawh lo a ni ber. Eng nge maw kan an zel dawn ni. 

Kimtea ten school an chawl bawk a, vawiin chu ka û thlan va tlawh kan rilruk ve a, kan tlawh khât angreng, ka inthiam vak lo. Chaw ei khamah kan insiam mawlh mawlh a, "Ate, Angaihi te sawm ve ila" a tih chuan ka lo remtihsak. Angaihi tak hi chu ka hmu ve tawh a, a fel reuh khawp mai, a ṭhiannu Kimtea bialnu ve deuh tak zawk hi ka la hmu lo thung. Julie a ti tain ka hria. Angaihi te chuan min lo nghak ran tawh a, Julie chu sang vak lo, khal lam deuh, ngo zet mai a ni a. A hmel a nelawm reuh kher mai. Kei chu min zah ve deuh nge a lai ṭût a, mahse, ka biak tak bawrh bawrhah chuan a zia ve mai. Ka û thlan chu kan tifai a, engtikah emaw a lung tal hi chu la phun ve a ngai a ni. Pasal ka han nei ang a, Sangbera'n rem a tih chuan ka nu thlanlung pawh phun ka duh khawp mai. 

Darkar hnih vel zet kan awm hnuah kan haw leh ta dam dam a. "Thingpui lo in r'u, in lo leng ve a ni mai" tiin Julie te chu ka sawm a, an lo hreh lem lo. Thingpui te chu ka lum a, Angaihi chuan, "U May, i pasal tur hi a hmelṭha ee, a hausa bawk sia. " A ti teh phawng a.

"Ka ṭha daih zawk alawm" ka lo ti fiamthu hlut. 

"Ih maw, thinrim lo la mi sawi ka hriat a nia. I pasal tur hian bialnu a nei reng sia, ti nge nupui a neih dawn le an tia. A bialnu pawh kha IG -ah engtin nge a indah kha aw..Remruat tih lam chu a ni" a ti ta mial mial a. Chutin min ṭhâwng lem lo, Remruati a ni tih ka hre bawk a. "Nia, a â ngawt mai. A bialnu pawn a phal zawk e tiraw?" Ka ti ve leh mai a, Julie chuan mak tih hmel fê hian, "Bialnu a nei tih hrereng chungin i nei dawn a maw?" A lo ti ve hlut. 

"Nei dawn tho e" ka lo ti si. A ngaihna an hriat loh hmel ngang mai. Thingpuite an in zawh chuan Kimtea'n a va thlah ta a. Kei pawh thawmhnaw ka thlep fel..Ka inngaihtuah mûk lai takin ka phone a rawn ri thut a, ka va phu chiang tak. 

"Hello" ka tih rual rual chuan, "Chhiahhlawhnu, i va ngam zawk ve a. Ka pasal tur min chhuhsak hi" a rawn ti nghal tuar tuar mai, Tudang ni lovin Remruati a ni. Thawk ka la hawk a, "Inbengdai rawh" ka ti zawi sap. 

A hma aia ring mah hian, "Zawngi, i nei nge nei lo kan hre khawp ang, Sawmdawnga hi ka ta, keima ta chauh a nih hi. Alexa thuchah a tihhlawhtlin loh ring reng reng suh" a rawn ti a. Alexa thu hnuhnung kha a hmu ve chiah a ni maithei. 

"Oh! A nih chuan amah be zawk la" ka lo ti leh tawp. 

"Ka bia ang, chuan in inneih in ṭhulh bawk ang. I hria em? Kei min el te i lo tum ve a, i nghal mah mah a ni. " A ti leh buan buan, ka nuihte lam a za tawh zawk. U Rini leh Remruati te mize inang lutuk hi aw. Tihtheih nei si loin awmhmunah an lo thinrim ve em em a. An khawngaihthlak letling. 

A ân zel avangin ka ngaithla ning chuan ka off ta daih a. A number chu ka block nghal daih. A hneawm leh dawn êm mai. Azuii'n a lo call ve leh a, ani hi ṭhiana ka dinpui tur a ni nghe nghe. Kan khua aṭangin a rawn zin vang vang dawn a ni. Aizawlah thian bulfûk nei hek lo le..a phur ve khawp mai. "Enteh, Ṭhiannu, ka rawn zin tum hunah khan ka theih loh hmel, ka pi lung kan phun dawn a, ka awm loh chuan an buai lutuk ang. Lo hrethiam hram mai rawh aw. Lungphun zawh veleh ka rawn kal mai ang" a rawn ti a. 

"Aw le, nia Nu Chhani a buai dawn êm mai. "Ka lo ti ve a. Azuii hi ka'n sawi lan hram duh chu hmeichhe pakhat a tling ve ka ti lo thei lo. Zirna bansanin vawk vulh lamah a ṭuan a. An huan a zau bawk a, tah chuan vawk a vulh hmiah, tunah tak hian vawk 24 zet a vulh a ni. A riahchilh tawp a,a chhungten an pui mang lo. A vawk vulh pawh a hlawkna a tel ṭan mêk tawh a ni. A lo zin chhungin a naute nupain an lo vilsak dawn a, chungte chu a rilru a hah lâwk sa..a sawi reng mai, ka tan pawh a inthlahrunawm letling. 

"I pasal neih tur leh i pasal chanchin vel kan khaw hoin an hriat chuan mak an ti ve lutuk a, mahse, vannei an ti chein an lawmpui vek che" a ti kha a nia. Ka naupanlai leh tleirawl lai hriaa hmu pha chin vek kha an ni bawk a, mak an tih chu a mak lo. Min lawmpui em em ang tih pawh ka ring nghet tlat a ni. 

Zanah Sangbera a rawn lêng a, U Sangi te an rawn leng bawk. Mi hmuhah chuan inngeih leh inngaizawng ber ang hrima kan awm hi hneawm ka ti. Ka chauhpui fô mai. Amah Sangbera lah hi a inthunun thei mai sia maw. 

"May, naktukah mo kawr va en ve ang aw" Sangbera chuan a ti a. Azuii tel lova chhuahpui chu ka hreh deuh. Mahse, Azuii han nghah leh kha hun a tepter ve tawh sia. 

"Tleipuia pawh a rawn tel thei dawn e. " A ti leh a, Tleipuia chu a ṭhianpa a nia, inneih hunah a dinpui dawn a ni. "A ṭha lawm" ka ti ve mai a. 

Ka mu tur ka phone ka han en chu thilmak deuh ka hmu ta a, ka group awm vena pakhatah video an lo post a. "Leak out thar ber" tiin. Ka'n en nâk chuan Terini leh a bialpa te mu dun lai a lo ni. An lang chiang dun nasa mai sia, ka lo zak chem chem mai. Pa Zothana te nupa rilru ka hre chak khawp mai, Terini bialpa vangin Lsa a chhuah phah kha a ni sia, an inchhir ve tawh maithei a ni. Zing ka thawh chuan mut ka hmuh ṭhat loh vang nge ka hai bûr mai. Ka nuam lo a ni tawp. Kimtea kal hnu lawkah ka inbual a, ka inthlak laiin Lsa'n min lo call..

"Terini te kha i lo hmu ve em? Tikhan ka pute chuan engkim an hrethiam tawh ang chu" a rawn ti a. 

"Nia, ka lo hmu a, ka lo zak ve tawp" ka ti hmiah. 

"Chuan, keipawh bialnu ka nei ve tawh asin. " A rawn tih chuan thinlung takin ka lawmpui. 

"Awiii, a va lawmawm ve, min la inhmelhriattir ve ang chu" ka ti ve luam a, nuih hawk hawk pahin, "Ka chang zo ta si lo che a, ka neih ve mai loh chuan..nia ka la inhmelhriattir ang che u. " A rawn ti a. 

"Keite chu ka ṭha lo êm alawm,. Pasal ka neih hmain chaw kan la eikhawm dawn nia" ka ti ve ham ham mai. Lsa hi misual a nih miau loh avang hian min mawlh ve tlat a, hetia bialnu a neih theih chuan ka lawmpui lutuk. Kan inbiak zawhah ka inchei ve thuak thuak a, Sangbera te ka lo nghak rân mai. Rei ka nghak lo, an rawn thleng ve mai, A motor-a ka luh dawn lai takin Terini an in aṭangin a rawn chhuak a, a phone a be mawlh mawlh bawk. Nu Zuali'n a rawn zui chhuak ve nghawng nghawng bawk a, "Lo awm ang che, ka sawina hmunah chuan. A nih loh chuan police ka phone ang" Terini chuan a ti hlaih hlaih a, a bialpa a nih ngei ka ring. Nu Zuali chuan keini pawh min zah zo tawh lo nge, "Ding rawh, kal suh. I pain a hriat chuan i nasa lo viau ang" a ti tuar tuar a. Terini lah chu luhlul zetin a kal zel si, inrawlh ka tum hran lo. An chhungkaw buaina a nia, inhnimhnai vak lo ila ka duh ber zawk. Kan kalsan ta a, Sangbera ṭhianpa Tleipuia chuan, "Robina bialnu, video leak out te kha a ni maw?" A ti nghut a. 

Ka lo buk khum ringawt. "Robina te ang a lo ring chu a pawi hle mai, kan veng tlangval a nia, kan hrechiang sia" a ti leh a, "Nia a zia lo tak tak" ka ti ve ringawt. A sawi zawm tawh lem lo. Sangbera ṭhiante dawrah kan lut phawt a, mo kawr chu an nei nalh hlawm ngei mai. An polite-in an pi ber phei chu ka ngaina ve nghal tawp. 

"May chuan simple tak a inhmeh ang, bakah tih chhuai hi ka ngaina lo" Sangbera'n a ti bawk a, keipawn ka pawm viau. Mo kawrah pawh ṭhui mawl tê tê kan en kual ta a. Ka mit la tak pakhat chu ka ha chhin ta a. Ka fit tawk reuh hle, Sangbera hmaah chuan ka han ding a, ka zak tawh em em bik lo. "Kha kha a ṭha e. La ila, pawi i ti em?" A ti a. Thil en kual vel vak hi ka peih zawng a lo ni lo ve bawk nen, ka pawm ta a. Kan hawh dawn emaw ka tih laiin a man a pe ta mai a! A rukin, "Kan hawh dawn lo mi? Lei em emte chu hak lehna tur a awm tawh hleinem" ka ti a. 

Nui sukin, "I kawl ṭha reng ang chu, ka thih hunah pawh" a ti ringawt. Ka hrilhhai letling, insensona tur a hre si, kei lah sum leh paiah ka pachhe si, ka inthlahrung thei eee. Azuii kawr tur erawh kan hawh dawn a, amah a rawn zin hun atan kan ti thung. Kan in leifel a, thil ei tura kan chhuah dawn lai takin Remruati leh a ṭhiannu te an rawn lut ve leh ta chiah e. Ninawm thei ee..amah ang lo takin nelawm zet hian a awm lehpek a. Sangbera chu a kuah leh thuak thuak tawh. 

"Thil dah lawk kan ngai a, min lo nghak r'u, lunch chu ka treat ve ang che u" a tih tlat avangin kan lo nghak a. An rei hran lo. Inhnawhpuar tur chuan kan chhuak ta hlawm a. Eitur kan nghah laiin , "May, i 1st love nen khan kan inbe tak asin. Samuela kha, i hria em?" Remruati chuan a ti ta mai a! Ka rin loh lam daih a ni. Engti tiha Samua nen lo inbe leh hman nge maw an nih le? 

"Hria e. Min lo bia alawm keipawh" ka ti ve vat a. A thangkama awh loh hram ka tum ve. A ṭhiannu chuan, "Pasal i nei dawn tih a hria em?" A ti ve leh a. 

"Hre lovang, a hriatna chhan tur a awm hleinem" ka ti ringawt. Eitur a lo thleng a, Remruati te chuan ei hmain a thla an han la leh rih, tihian IG-ah an post leh ang a. An lawmzawng hi a ho thei sia maw. A ṭha vek e. "In inneih hmain chaw eikhawm ka rawt e. Rem in tih loh vaih chuan in inneihnaah ka rawn kal lo a ni mai" a ti leh hlang hlang a. Sangbera chuan amah pawh en lem lovin ,"Nia, ka lo rilruk sa hrim hrim alawm, Hei Mayi ṭhiannu hi rawn thleng phawt se. Inpawh lehzual nan pawh" a ti ve mai a. Ka lunghnûr hran lo. Remruati hian tihtheih a neih vak ka ring tawh lo bawk nen..Tleipuia chuan, "Remruat, nang pawh mipa lam hi ngaihsak ve ṭan rawh. A rei thawkhat tawh alawm le" a hma ngai takin a ti a. 

Ner sak chungin, "Ka mamawh rih lo alawm, tin, Alexa thuchah kha kei chuan hlen ngei ka duh vang a nia" tiin Sangbera a melh kher a. Ka lo îp deuh. Tleipuia lah chuan engmah a hre ve lo ni tur a ni, "Eng thu nge a chah che a.." a lo ti ṭût. 

Ngui fê hian, "Sawi chi pawh a ni lo. A thleng dawn chuang si lo va. Kei chu ka tia maw..Tleipui, ṭhianṭha berte thu hnuhnung hi chu ka ngaipawimawh viau ang. Mipa ni ta ila ka mawhphurhna ka hlen bawk ang" a ti chat chat a. Sawi chhan a nei tih ka hre ve vek si. Tleipuia erawh a hrethiam lo takzet a nih hmel, a bo hû mai. A ṭawng leh hmain Sangbera'n, "Alexa kha accident-a thi kha a nia. A thih tur thu kha a hre lâwk awm si lo, thuchah a lo nei kha ka hrethiam vak lo" a lo ti ta a. 

"Nia, i sawi takah chuan keipawh mak ka ti deuh. Bakah a thih sarhû laite pawn a thuchah te chu keini a ṭhiante chuan hriatpui ve awm tak, tunah chauh han hriat chu" Tiin Tleipuia chuan Remruati a melh ta chat mai. Ka lo en chiang ve kher nen, Remruati hmel pha dai leh inthunun a tum lehnghal chu ka hmu chiang ngang mai. Mahse, engmah ka sawi duh lo. Ka buaina pawh a ni ve hleinem. 

Kan ei khamah Sangbera chuan, "Chaw eikhawm chu nakinah ṭhiante ka la rawn hrilh hria ang che u. "A ti leh thlap a. Kan chhuak ta. Tleipuia chu a nuteii fapa zin a hmuah a ngaih avangin a kal hrang nghal a, keini pawh kan in lam kan pan ve zat. Hun thawl leh fianrial kan nei ngai lutuk lo va, kan neih pawn keimah hi ka inlahrang tlat zel. Ka hlau ka ti lo va, mahse, hnaih hi ka hreh tlat tawh. Amah pawh hian engkim hi a la lâp vek niin ka hria, chu chuan nâ min siam lo thei lo nen,. Ka khawvel hman chhoh zel dan tur hi engtiang tak ni ang maw?!

In kan thleng a,ani pawh a rawn peng kawi ve leh zuai. U Rini hmel hmuh pawh a khât leh ta deuh, kan thlen hnu lawkah Kimtea a rawn haw a, phâwk deuh hian "Ate, U Terini bialpa kha an man an tia. Chuan U Terini pawh a awmna chin an hre lo an ti" a rawn ti a. In chungte kha kan kalpelh lai khan an reh ṭhuap a, an chhuak vek a nih kha ka lo ring a. Chuvang chu a lo nih dawn chu a. Sangbera awm lai thoin U Mawii'n min lo call a, "Hei, i U Kunga hi a phur ve lutuk a. Ka vawkpa pakhat hi Mayi pasal neihnaah chuan ka thawh ve teh ang ,tihsak theih kan nei si lo a tia" a rawn tih chuan ka hnuk a ulh lek lek alawm le. 

"Awii, ka va lawm dawn ve. Mahse, engmah tihsak ka ngai lo asin. Nangmahni in lo kal theih kha a tawk reng.." ka ti a. Sangbera pawn kan inbiakna a hre ve vek a, a lo lawm ve hmel hle. 

"Akhai! Chutiang ringawt a ni lo. Naute pasal nei tur kut ruaka kaltir tawp te chu a zia lo êm mai. Nia, rawn kal theih hi chu kan tum ve viau a, kan ran ho hi a ni buaithlak dawn ni" a rawn tih chu ka hrethiam viau. An vulh hnem ve angreng sia, kalsan vek chi a ni dawn lo hrim hrim. A hmain ka sawi lawk tawh a, Nubawihi chu a rawn kal hma ang, min pui tur ka mamawh ve dawn sia. Sangbera in lamah innei dawn mah ila, he lamah chhungkhat leh ṭhenawm khawveng te tal chaw kan eipui ve kha ṭha ka ti ve a ni. In chungte pawh lehlamah ka bêl lo lutuk a, U Rini vang a ni pakhat ve bawk a. Pasal ka nei dawn tih an hriat aṭang khan nu Zuali thlengin min hlat ve bawk nen, mahse, an in kan luah tawh dawn lo bawk a, a tawp nana chawhlui siamsak chu ka duh ve fan a ni. 

Hun a kal a ti mai ang. Terini pawh an hmu tawh, mahse, rilru buai ang deuh hian a awm a. Zanlaiah chhuah te a ching chho a, doctor te pawn tih vak ngaihna an hre lo a nih hmel. Tihian ka ngaihtuah a, kan damchhung la la hian kan tuhrah kan seng ṭhin tih hi..Terini pawh amah aia hnuaihnung zawkte tan a tawrhhlelhawm thei êm mai a, a ni fapa ngei ngei pawh a bialpa vanga in aṭanga chhuahtir thei kha a ni bawk nen, tunah chuan khang a tihsual te khan an rawn umzuiin an rawn nangching ve ta ka ti lo thei lo. U Rini erawh ka hmu khât khawp mai. Azuii leh Nubawihi te an rawn thleng ta bawk a, kan khua pawh a har lo ve ta sawt mai. Sangbera pawh, "Inneih hmaa a tawp nan" tiin Phaiah a zin leh a. Azuii nen pawh an inkawm ṭha hman meuh lo. A zin chhungin tiin Lsa'n min sawm ngawrh ve nen, a inah Azuii nen chaw kan va ei ve a. Azuii a pangngai bawk a, an inkawm thei fû mai. A bialnu pawh a sawm tel ve a, Sangteii a ti mai a, keimah ang tiat vel, kei aia khal hret tur, hmelchhe lo tak leh nelawm zet mai a ni. School-a a thawhpui a lo nia. An inhmeh viau e. Mahse, ka rin loh deuhin chaw ei hmain zu an rawn phawrh ta mai a, Sangteii pawh chuan a lem ve thei mai. Azuii nen erawh kan in lo, zu ka huatna kha la ngai reng mah se; chutin anmahniin hrehawm an tih ngawih ngawihna tur ang chuan ka awm tawh bik lo. Sangteii chuan, "May, in pa tur hi ka lo hriat ve dan chuan nula mi ve tak a ni maw..an sawi ka hre tlat" a ti ta pek a. A kamnam tawh si, thil ni lo lo te hi a sawi ang tih a hlauhawm. 

"Ka hre ve lo, kan inhriat hnu hi chuan hmeichhia a ngaihsak vak pawh ka hre lo" ka ti ta ringawt a. 

Amah bawk chuan, "Nikum nge nikum hmasa kha aw..kha pawn hotel pakhatah mi nu nen an mudun lai an phâwk tawh tak kha mawle..mahse, ngaih loh lamah ngai suh, nunhlui nei lo kan awm hleinem. Bakah ani te chu a hausa a, a intizahawm thiam bawk a, a mualpho ve tak tak thei lo" a ti leh bawrh bawrh a. Hotel chungchang kher chu ka hriat vawikhatna a ni. Min ṭhâwng ve deuh, Azuii a zahawm ka tih êm vangin ,"Nia, lehlamah mi hian an er ve bawk a" tiin ka pasal tur thlavâng chu ka hauhsak ve a. 

Lsa chuan, "Tu sawi nge kha aw..ka hre mai tawh lo, a ṭhianpa boral tawh bialnu pawh hi a hmei ang deuh a nia. A ṭhianpa boral chhan pawh kha an pahnih vang tihte kha sawi a awm. May, nei suh ka ti miah lo, mahse, sawi a awm tawh hi chuan eng emaw hi chu a lo awm nge nge zel a nia" a ti ve ta zel a. Anni pahnih mai mai chu aw..hetiang tur tih hriata lo kal loh tawp tur hi a nia. Kan boruak an ti nuam lo vek, Azuii chuan ka rilru hrethiam takin ,"A ho ee..sawi sawi tawh suh u. Thudik pawh a ni vek nang" a lo ti zung zung a, ka hmaizah takzet a ni. Tin, an sawi ang zawng zawng kha Sangbera nihna a nih ka ring lo nghal. Engvanga hetia sawi kher hi nge an nih ang tihah ka buai zawk. Lsa chuan min ngaihzawn ve ṭhin vangah ngai ta ila, Sangteii zawk hian eng nge a sawi chhan ni ta ang? Chaw ei pawh a tui lo zo vek. Kan chaw eikham Sangteii zun hlan chuan dawhkan ka hrukfai lai takin a phone a rawn ri a, U Remruati tih a ni. Ka rilruah mi pakhat a rawn lang nghal. Mahse, ka tilang duh lo. Sangteii hi ka la hrechiang lo deuh a nih hmel e. A rawn chhuah chuan a phone chu lain pawnah a chhuahpui ta chiah a. Va ngaithlak rûk kha thil tih chi a ni si lo. Rilru a buai ru hle, ka ngaihbel êm mawni Sangteii rawn lut leh chu a hmel a pha dui hian ka hria. Keini pawh hawn lam kan hnaih ve ṭan a. Lsa chuan, "May, lo kal lawk teh, in inneihnaah ka rawn kal theih loh takin leh kan inhmuh leh lawk loh takin ka thil leisak che hi lo en ve la" tiin a pindanah min ko lut a. Puanzeh bakah a plain pathum lai mai hi fun ṭhat thlapin min pe ta mai, ka beisei miah lo asin le. "Awii ka lawm e..i ti duh kher a, puan man a to tawh si" ka ti khawmawi ve a, zep loh chuan puan chhawm tur pawh ka la inlei zo lo kha a nia, lawmawm duh tak a ni. Nui chungin ka biangah a rawn piai zauh a, "I phu alawm, nupui ṭha tak va ni ang che" a ti a. Min rawn kuah thuak, kei pawn a zu rim hnîm lo tawk velin ka lo kuah ve a. Kan chhuak leh nghal. Kawngpui thleng min thlah a, taxi ruak a lo tlan remchang bawk nen kan phar ta vat a. 

Inneih ni pawh a hnai ve zel e, Sangbera pawh a rawn haw tawh a. Azuii kawr hak tur pawh kan hauh fel diam tawh. Azuii hian a ti ṭhin ,"Mi sawi ang kha chu a nih ka ring lo, hetia kan inkawm mai pawh hian a mizia tur awm ka hrethiam ve. I rilru tinuam lo miah suh" tiin. Ṭhian ṭha tak zawng a ni e. Sangbera lo sawi lawk tawh angin inneih hmaa a ṭhiante ho sawma chaw ei chhuak turin kan insiam a. Nubawihi leh Kimtea te erawh chuan, "Kan zak, an puitling awm si" an ti teh tlat a. An rawn tel ve dawn lo. Putea leh Nuteii te pawh naktukah an rawn thleng ve ang. U Kunga te erawh inneih dawn ni khat velah a nih hmel, an ranvulhte vang bawk. A ṭha vek tho e. Sangbera a rawn kal hman loh avangin a ṭhianpa a rawn tir a, Kima a ni a, Sangbera aiin a û hlek ang. A felin a ṭawng duh khawp mai. Kan va thlen chuan an lo awm nual tawh. Sangbera khan Azuii nen kan hak tur kha min leisak a, duh ai chuan a tight deuh a ni. Thawmhnaw lamah ka lerh lo ve ropui sia. Remruati te, Baby te ho pawh ka hmu. Hlim hmel pu vek mah se; ka ngaina thei tawh chuang lo. Sangbera'n min inti neitu taka min han kai leh a ṭhiante min han hmelhriattir te chu a nuam lo miah lo. Azuii pawh Tleipuia nen an inzui ve ral ral mai. Inngaizawng ve daih se ka tia, mahse, Azuii hian kan khaw hluiah bialpa nghet a nei si. 

Ka beng bulah Sangbera'n, "Wine tlem ka in ve dawn aw.." a rawn ti sur sur a. Ka bu nghat. Ka thinrim lem lo, Sangbera te khawvel angah kan chuangkai ve a nih chuan enliam leh palliam chin kan neih ve a ngai tlat a ni. Ṭul loah ka intihah mai mai ang. Kei erawh chuan ka in ngai lo vang. Party hlimawm tak a ni ka tih mêk laiin lang lo ruamah Remruati leh Baby te ho chuan Azuii te chu an lo hmusit nasa hi a lo nia. Mipa dangte hriat ve theih si lohin an lo diriam vel niawm tak a ni. Mahse, Azuii hi chutia rahbeh ngawt theih a ni bik lo, amah hi a induhtawk ve tlat. Sangbera leh a ṭhian mipa te inkawm laiin Remruati te chu an rawn kal hnai a. 

"Heng kawr manto leh changkang lutuk te hi a hatu ten in zir loh vang nge a ṭhing nghal ngawih ngawih" tih vel chu an ṭawng duh dan a ni. "Tihtheih nei si lova thinrim ve vak mai" ka lo ti ve a. Chhan let loh chuan min zuam zel a, a ṭha lo. 

Remruati chu rawn kal hnai hlekin chiang zetin min en a, "Tihtheih ka neih leh neih loh chu i hre mai ang. Tu nge ka nih i la hrechiang lo a nih hi" a ti nghat nghat a. Ka lo nuih sâng thung. Chaw kan ei kham a, ka puar khawp mai. A tui hlawm si..

Kimtea'n min lo call a, "U Nubawihi hi u Terini'n stepah a namthla a, hei a ke hi na a ti lutuk, in lo hawng dawn tawh em?" Tiin. Ka lung a phu nghal zawih zawih thei, ti nge maw harsatna hi ka tawh reng mai le. Sangbera ka zawn kual lai takin Remruati te lama ri hak thawm ka hre ta a, ring lêng lâwng hian, "Ka rin dan chiah a ni. Kan Sangbera lo bum duhtu chu hmeichhe nasa tak a nih ngei hi..a tir aṭang khan ka mi rinzawng a ni lo rêng a" Remruati'n a ti ta mai. Tu chungchang nge an sawi ka hre bawk si lo. Hlauthawng deuhin ka va pan hnai a, min en ṭhup chuan ka awm a tinuam lo zual. Baby chuan, "I la zak eih na nge? Pasal nei mai turin mipa te i la kuahin a la tawmpui ngam a nia. Hmeli" a ti sawk sawk a, hrilhhai zetin ka melh reng ringawt. Sangbera leh Tleipuia te an rawn thleng a, "Eng nge thleng a?" Tleipuia'n a tih rual rualin, "Hei kan mi tenawmnu hian Sangbera a lo bum a nih hi, a sum ûm vang leka kawp kha a niin ka hre rêng a. " Remruati'n a ti hlawih hlawih mai. Ka la hawi â ho tho. Remruati phone chu Sangbera chuan a ensak ve a, a chek hluk. Baby chuan, "Kha tenawmnu, en ve rawh. I lar tawh teh mai a nia. Zoram mipui huat rawn i ni mêk" tih leh a phone min rawn pek a rual a, ka lo en ve nghal vat. Awii! Lsa nen a pindana a thil min leisak min pek hnua kan inkuah thuakna kha a lo ni reng mai. Tu lo lak nge ni ta ang? Aw..an thangkam a ni tih kha hre tur ka nia sin mawle. Kan awmdan vel han en chuan induh deuh, inthlah tur kan ang nasa mai si, kei pawh chu ka nui sâng a, Lsa lahin ka biang a rawn piai kher bawk. Ka thaw a tihah, Nubawihi rilruah a awm bawk si. Sangbera chu ka en vat a, chiang fahran hian min lo melh ve kur mai. 

"Ka sawifiah thei" ka ti thâm ṭiak a. Remruati'n rang fahran hian, "Thiamthu sawi tur i nei lo. He video hi a darh mêk tawh " a lo ti a. Ka bengkhawn duh lo, Sangbera ka melh ngat ngat thung. Ani pawh a ṭawng bik chuang lo. Ka insum thei ta lo va, "Remruati te thiltih vek a nih kha" ka ti leh a. An ri hak, ka biang a rawn ri nghal sawk a. Remruati'n min beng a nih chu! 

"Hmeli, min puh i tum elo?ka ṭhianṭhaber nupui neihna tur hi ka tihchhiat duh i ring em ni? Kha pa kha tu nge a nih pawh ka hre ngai hek lo. I va zaktheilo em em ve" a ti tâwn tâwn a. Sangbera a la ngawi tlat si. Ka beidawng rilru tâwt tawh si chuan Azuii kaiin, "Kan haw dawn, ka nauten buaina an tawk mêk" ka ti a. Min chhang chuang lo. Kan kal tur min sawi zuina te chu ka hre pha reng, mahse, ka beng ka chhut ngawn rih a ngai tlat. Azuii chuan, "May, engin nge kan hawn ang?" A ti a, ani pawh mangang hmel a pu ve deuh. 

"Ka hre lo, kal phawt ang" ka ti a. Kan awmna hmun hi resort a ni tih chu ka hria, motor veivak an awm lo maithei. Mahse, eng nge ka tih chuan ang? Remruati te thangkamah ka âwk mek a, ka nauten buaina an tâwk mêk bawk. 

"May" mipa aw kan hriat rual chuan kan ding chawt. Kima kha a lo ni. "Ka thlah ang che u" a ti a, hnar thei dinhmunah kan ding lo. Kan lut nghal zat. Kan tlanchhuah hnu chuan Azuii chuan, "Engtin nge video kha a darh theih? Tu nge la ang? Engtinmah in awm tawp si lo" a ti nghal mawlh mawlh. Rilru a mang rih bawk si. Kima chuan, "Tu te emaw thiltih a nih rinna chu ka nei, mahse, Sangbera ngaihchân a ṭha. Thutlukna dik tak a siam leh thlup mai ang" a ti ve a. Sangbera min melh dan kha ka mitthlaah a châm vawng vawng, na tuar mitmeng bakah mak tihna a lang tel a nih kha. Ani chuan Lsa a hria a, Lsa ina kan chaw ei erawh ka hrilh bik lo nen, a tan chuan a mak ve khawp tak ang. Mahse, thil chinfel harsa tak tur niin ka hre lo. 

U Sangi call ka dawng a, "Hei eng nge awmzia? I va lar ve. " A rawn ti ve ta chiah. Ka chhing sawk mai, "Engmah a ni lo, nakinah ka sawifiah ang. Kimtea te chu eng nge an chanchin?" Ka ti a. 

"Hei damdawi ina hruai êm a ngai lo hlauh, kan tuamsak a, zût thiam a lo kal mêk e" a rawn tih chuan ka thaw huai mai. 

Kan inbiak zawhah ka phone kan en ve nak chuan, "Zoram tlangval hlawhtlinga sawi Malsawmdawnga, Sangbera tia hriat lar tak nupui tur chuan mipa dang kawpin man chhuah an ni ta. Sangbera te hi an innei tho ang em i lo thlir ang" tih captiona hmangin kan video chu a lo darh hle tawh mai. Sangbera hi mipa satliah chu nise tu khaw khain a nupui neih tur an ngaihven awm si lo. An comment te chu ka chhiar duh lo law law, Zoram ṭhalai ṭhenkhat, hman em em hoin ṭawngkam dengkhawng leh na tak takin min chilh leh luai luai dawn tih ka hai lo. Mi hausa fanu lah ka lo ni ve bawk si lo. Mahse, Lsa biak ve hrim hrim ṭha ka ti a, ka call ta hmiah mai. 

"I thiltih rah hi i la seng ngei ang, hetiang mi i nih ka lo ring lo asin" ka ti khawl khawl mai. 

"May, engmah ka hre ve lo, keipawn mak ka tihzia aw. Tu lo lak nge ni ang ka hre lo.." a rawn ti chul a, "Ka awih ring suh" tiin ka dah leh hmak. A rawn call nasa a, mahse, ka reject ta rih. Rilru fim tak ka put a ngai niin ka hria. Sangbera chuan eng thutlukna pawh lo siam se dem loh ka tum bawk ang, mahse, thudik chu ka haichhuak ngei ngei dawn a ni. 

Kan chhuk dawn chuan Kima chuan, "May, chutin rilru lo tihah lutuk suh u. Ka ṭhianpa hi chutimaia thutlukna siam zung zung chi a ni lo a nia. Hrehawm in lo ti lutuk ang e" a ti dam thluam a, rilru pawh a tinuam ve khawp mai. Sangbera ṭhian mipa te hi chu mipa an nih vang nge an felin ka lakah te hian an ṭha mawle, a ṭhian anga inchhal hmeichhe ho hi an rapthlak êm a ni. 

In kan thlen chuan U Sangi te pawh an lo la awm a. Nubawihi ke chu an lo zut mek. Nâ tiin a ṭhen chak chak reuh a, ka khawngaih reuh e. Thil thlen dan ka zawh chuan, "Kimtea hi thenawmah a kal a, ka khua a har deuh vangin Nu Sangi te inah hian zuk len ka tum a. An kawt ka thleng chiah tihin a rawn chhuak a, a bawrchhawr si, a meng sen rûm bawk a. 'Nangni thingtlang lubâwk ho hi' tih leh stepa min namthlak a rual ta ringawt a, ka lum na lo hlauh zawk alawm, a û mipa khan min lo hmu a, min rawn buaipui ta a ni" a ti a. Terini mai mai chu a..a va bawraw sâwt tak. Mahse, Pathian zarah damdawi in luh ngai khawpin a hliam lo va, a lawmawm. Ka phone a ri sek reng mai, Putea te bakah U Mawii te pawn kan video kha an lo hmu ve a niang, "Sangbera thutlukna ngaichâng tawp ang u. Mahse, ka bum lo tih erawh min hriatsak u la" tiin ka chhang ta ngawt hlawm. Amah Sangbera erawh a reh tlawk tlawk mai a, inneih kan ṭhulh loh reng ka ring ta lo. Remruati te hnen aṭang lahin diriamna ka dawng kal reng a, ka block tawp hlawm mai. Lsa nen kan intext ta a. Incall ai chuan rilru fîm ka hmang thei zawk. 

"Pathian hmingin kha thil titu kha i ni lo takzet em?" Ka ti a. A ṭan nat ve êm vangin ka lo ring leh ṭan der tawh a nih hmel. 

"Aw ka ni lo takzet. May, ni e, a hma kha chuan ka duh che, mahse, i chhiatna tur leh i mualphona tur ka duh ngai lo. Sangbera bulah pawh ka sawi mai ang. " A rawn ti a. 

"Sangteii kha i hrechiang em? A thiltih a ni thei a nia" ka va tih chuan, "Hrechiang tihah an inah te chuan ka leng fô a. Chhungkaw pangngai tak an ni. Rinhlelhna chhan tur ka hre ve lo" a rawn ti bawk si. Azuii bulah khatia Lsa nena a rooma kan luh dun lai khan Sangteii'n eng nge a tih ka zawh chuan, "Engmah,.a ṭhu ve tawp" a ti bawk sia..rilru a buai duh hle mai a. Min set up ta se, buai rukna ka neih chu Lsa khan a pindanah min ko lut dawn tih a hre lawk dawn tihna a nia, hriat lawk ngaihna awmin ka hre si lo. Ngaihtuah chian chuan Lsa bak puh tur an awm ngang lo a ni. Sangteii kha Remruati ten hmang ṭangkai pawh nise, Lsa rilru a hre vek bik lo. Thil ni thei bawk chu an vaiin an ṭangrual tihna..

Ka hriat loh karin ka lo muhil ve a niang, ka harh meuh chuan an lo tho vek tawh a. Nizan thilthleng ka lo theihnghilh hman ṭêp alawm le..ka phone ka'n en a, Sangbera msg lo awm chuan min tiphu deuh. Hlauthawng ru takin ka hawng a, a tawi tek tawk viau. "Inneihna ṭhulh a ni lo" tih chiah a ni. Ka thaw hawk a, "Inhmuh ka duh" ka va ti ve ta hmiah. Hmaichhana sawi dun a ngaiin ka hre tlat a ni. 

"Aw le, ka inah dar 11-ah lo kal rawh" tih thu ka dawng ve nghal a..rilru thawl ru deuhin ka tho chhuak ve ta a. 

(Ka hritlân âwm nat êm vangin ka aw a phui titih a, tin, hnatlâng te, exam tura inbuatsaih te nen. Story hi zan khat danah te pawh rawn dah rih a ngai mairhei. In duh sei bawk a, tun ṭum chu chapter tam ve deuh kan tum dawn nia. 😍