Sangbera 11

SANGBERA (11)

Ziaktu : Toni Râlte

Muangmarin damdawi ina kal tur chuan ka insiam ta a. Chaw han kensakte pawh a ṭha viau naa, tukin kha chu kan ruaibut ve deuh bawk nen, naktuk aṭang chuan pek tawh tur a ni. In ka kalh laiin U Rini a rawn lang ve hlawl mai. "I chhuak tawh dawn elo? Khaw nge Lsa chu" a ti a. 

"A chhuak tawh, khaw nge i awm daih a? I va reh êm êm" ka lo ti ve a . 

"Nia, ka nuteii te ka va pui lawk alawm le, Lsa chu rawn hmuh ka duh asin le aw, call a la thei bawk si lo. Khaw nge in a luah dawn a hrilh che em?" A ti a. 

Ka sawi ta mai. Chanmari-khawi lai tak nge ka hre chuang lo bawk a. "A nih chu, a zia lo tak tak a ni. Terini vang vek, chuan, mikhual te i lo nei a ni maw?" A ti siam siam a, stepah kan chho dun mêk. "Umm, hei damdawi inah kan indahlut ve leh sia, ka han hmu lawk dawn a nih hi" ka ti a. 

Ding deuh datin, "Eng nge Sangbera chanchin? I la thawk tiraw?" A ti sap a. 

"Aw..thawk e, vawinah pawh ka kal ang, kal hmain ka û te chu ka han tlawh lawk dawn a" ka ti ve mai a. Thildang min zawt zui lem lo. Keipawh peng khawmuang lovin ka kal ve nghal char char. Damdawi in ka thleng a, Rempuii chu an nufain an lo ṭhutpui ran a, thisen chaw an pek reng bakah thisen pawh a la mamawh belh tur thu nizana kan inbiak kha chuan an sawi a. Thisen pek kha chu a ngai dawn tih ka hre sa. Kei hi 0+ ka ni a, Rempuii erawh B+ a ni thung. Damdawi ina an blood bank-in a daih loh hunah thisen petu tur kan zawnsak tawp mai a ngaih hmel a, hmelhriat lah ka nei pachhe si, rilru a hah lawk hle. 

U Mawii bulah, "Vawiin chu ka hnathawhnaah ka kal ve loh chuan, ka chawl rei ve tawh sia, in chabi hi ka pe che u ang a, in duh leh lo zuk inbual u la, in chawhmeh duhzawngte kha lo siam mai u la.." inthlahrung angreng tak hian ka ti a. 

"Aw..va kal rawh, keimahni vangin i chawl tawh a, hei kan ṭha mai ang. Nia, chabi kha chu dah rawh, Nubawihi hi duh leh zuk inthlak rawh se" a ti thliam a. Nubawihi chu a chauh hmel angreng, mutchhuak hmel a pu deuh a, ka khawngaih si chuan, "Tihian ti zawk i la, U Mawi, Nangmah hi lo zu chawl hahdam rih la, Nubawihi pawh chau viau mah la lo awmpui hram hram la, zaninah chuan i nu nen kan riahpui tawh dawn nia" ka ti a. 

"Riah ve kher a ngai lo. Keimah pawn ka riahpui thei tawh ang. Pahnih hniha riah kha a buaithlak zawk" U Mawii chuan a lo ti vat a. A inthlahrun vang a ni tih ka hria. Lehlamah heta awm ṭhangte chu ni ila pahniha riahpui kha a ngai miah lo rêng a, mahse, anni hmun kilkhawr ve tak aṭanga lo kal ta chu chinchang an hriat loh chu thuhran, an zumin ward-a awm ve te pawh an hnaih ṭha ngam meuh lo chu a ni si a. Mahni chauha riahtir chu hrehawm an ti dawn lutuk. 

"A ho lutuk, a khawharthlak loh ve deuh dawn alawm. Ka sawi ang chuan ti r'u, chuan, eng emaw a thlen chuan min lo be vat r'u aw" ka ti a. Min hnial ta bik lo. Ngaihngam tak chuan ka hnathawhna lam chu ka pansan ta a. Sangbera pawh a hnaah a kal daih tawh ka ring, nizan leh tukin lama ka thinrimna te kha chu an dal ti mai ang, chutin min kap rûn tawh lem lo. Thildangin min tlakbuak ve bawk nen. Valtea bawkin min thlah a. Ka va thlen chuan a reh ruih mai. A chabi dahna hi min hrilh sa hrim hrim a,. Mahse, in chu a lo la inkalh lo! Nu Buangi a awm a nih ka ring. Thawm dim vak lo chuan ka lut a. Living room sofa-a Sangbera lo ṭhu khur mai ka hmu thut, ka ding châwih mai. A kal daih tawh ka rin vang a nia. A thutak viau lehnghal..kei lahin ka thinrimna, nizana min lo biak loh avangte khan ka'n titau thar leh vel a. Ka be hmasa duh ṭhak lo. Chokaah lutin tui ka va in ringawt. Fridge ka hawng a, a lo fai han mai. Choka bungrua tihfai ngai a awm em tia ka thlek dûk dûk lai chuan a rawn lut a. Lehlam ka hawi nghal hmak. Ani pawh a awmdan vel hi a mak tawp. Min be châk vak lo hmel a puin ka hria. 

"Chaw ka la ei lo" a ti sup a. Ka mengphar deuh. Tun ang huna tukṭhuan la ei loh chu, a tho tlai viau mawni le. 

"Ti nge? " Ka ti sap a. 

"Ka awm a nuam vak lo va" a tih chuan ka va en vat. Nuam lo hmel pawh a puin ka hre lo. Awihsak loh ngawt chi erawh a ni si lo, "A nih chuan eitur ka siam ang a, ei rawh aw" ka ti a. 

"Ei châk pawh ka nei lo" a ti nghut ringawt. Eng emaw helhkam nei hmel a pu..ka sawi thiam chiah lo. Ka zawt ngam chiah bawk si lo. 

"Thingpui tal in la" ka ti leh a, "Umm, lum la..chuan, i thinrim tawh lo mi?" A ti leh daih. 

"Ka thinrim mi?" Ka ti ve ngat a. A nui suk, "Rim teh kha le..kha bak bak" a ti chuai ruih a. Ka melh vak ringawt. 

"Aw..nizan khan ka rawn kal ta si lo va, Ka be bawk si lo che a. Kha kha ni lawm ni? I thinrim chhan. " A ti leh ta zung zung a. Ka hrilhhai letling. "Thingpui chu ka'n lum ang e" ka ti ta daih a. 

Ka lum nghal bawk. Ani pawh living roomah a phei a. Thingpui chu tray-ah chawiin ka va pe a. Kal leh mai ka tum laiin, "Ṭhu lawk rawh" a ti a. A mûk leh hmuk tawh. Eng thil tak chuan tibuai ang maw. 

Ka ṭhu ve mai a. "Eng nge?" Ka ti nghat a. Ka awm a tinuam lo vek alawm le. 

"Remruati hi a hnawksak i tih ang chiahin keipawn hnawksak ka ti ve. Nizan khan ka phone a thi a, tin, Alexa nu min ngenna angin ka ṭhu khawmuang ve a nih kha..rawn kal loh ka tum vang a ni lo. Chu chu sawi nawn ngai tawh lo se, dam la. Thil pakhat a awm a" a ti a. A nui lo va, a mitmeng pawh a thutak tawp. "Umm sawi la" ka ti a. 

"Alex-a lehkha hnuhnung nizanah khan a nuin min pe a.." a ti sup a. Ka lo bo hû mai. "Chuan" ka ti a. 

"Alexa kha ka ṭhiantha ber a ni a. Unau ang mai kan ni ṭhin. Zodini thih hnu lawka thi ve kha a ni a, lu ka sûn belhchhah hle. Tichuan, Alexa khan a thih tur thu hre lawk ang hrimin ka tan lehkha hnuhnung a lo hnutchhiah a..chutah chuan a hmangaih em em Remruati tuamhlawma nupuia nei tura min ngenna a ni" a ti ta a. A mi den dan chu a dang ta deuh. 

"Chuan, i nei dawn mi?" Ka ti a. 

"Neih ka duh lo" ka ti hmuk. 

"I ṭhianṭha ber thuchah a ni sia" ka ti tham ṭiak a. Min rawn melhin, "Chuvang chuan nang nen hian kan inneih a ngai" a ti ta mai a! Ka meng kâwk. Sawi mai tur pawh ka hre lo. 

"Mak ti viau suh. Remruati ka neih i duh em ni?" A ti ta khauh mai. Engkim chu a rang mah mah a ni, ka hrilhhai ngawih ngawih ti ila a sual awm lo ve. Ka la ngawi char char, "May, ka thusawi chu i hria em?" A ti leh a. 

"Aw hria " tih chauhin ka chhang. 

"Chuan, eng emaw tal sawi ve la" ngenngawl zet hian a ti a. Ka chil ka lem khawlh. 

"Sawi tur ka hre lo" ka ti a.

"Min duh em?" A ti hawk a. Amah pawh chu a vai rûai niin a lang, a mumal lo tawp. 

"Ka hre lo chu pawh" ka ti ro leh halh a. 

"Neih che ka duh a ni. Kan invenghim tawn dawn tihna a nih chu.." a ti nghet ta charh a. Inringtawk hmel a rawn pu leh tawh. 

"Venhim ka ngai ve em ni?" Ka ti khauh. "I ngai lo em ni? I nau nen chauh in khawsak saw" a ti a. 

"Ka hlau hleinem" ka ti ringawt. 

"Engpawhnise, lo inngaihtuah turin ka duh che a ni. Khawngaihin" a ti thawp sup a, boss zawkin khawngaihna min dil tihna a nia. Kei hian chu ngenna chu ka phu chiah em le? Engmah lo mai, fahrah, vanlaia tla rethei bawk si ka ni a, nau chawm tur ka la nei zui! 

Ka inrin hmain, "Ka nau a la awm ve saw.." ka ti a. 

"Chhuanlam tling lo lutuk a nih chu..kan bulah a khawsa ang, Mizoram School ṭha berah kan kaltir bawk ang" a ti nghut nghut a. Mahse, duhthlanna ka la siam thei chuang lo. 

Chawhnu lamah a chhuak a, kei pawh ka tihtur ka ti ve mawlh mawlh, rilru erawh a chawl meuh lo chu a ni. Ka chunga thil lo thleng mak leh dangdai tak chu engtianga lo dawnsawn chi nge ka hrethiam hlawl lo. Ka û tal kha la dam se thurâwn min pe thei tur. Thutlukna ka siam thei rih lo. Chutia awlsam taka siam chi pawh a ni lo bawk. Eirawng ka bawlsak a, ka lo inngaihtuah mûk lutuk nge ka chawhmeh kan ka la ti ût zui! Ka va ngei tak. Sangbera vangin ka nileng hun chu a buai deuh nuaih mai. U Mawii te chanchin pawh ka ngaihven hleithei lo. Hawn dawnah ka call ta hram a, "Hei a zia deuh e. A harh ṭha ve pangngai" a rawn ti hlauh a. Tlemin ngaih a ngam ta deuh. Rilru mang ru deuhin ka haw ta a. Sangbera nen kan inhmu hman ta lo a nih chu! 

Kimtea leh Nubawihi ten rawng an lo bawl a, an bulah hian sawi ve vek chi em mawni aw te ka ti rum rum mai. Ka zah thar thut lehnghal. Nubawihi nen kan insiamrem angin kei pawh chaw ka ei sawk sawk a, U Mawii te han riahpui tur chuan ka insiam nghal. Sangbera pawh ka hrilh a, "Zanah ka rawn kal ang" a tih ve kha. Damdawi in ka han thlen chuan Rempuii chu a lo ṭhu peih ve a, thil te pawh a ei peih ve tawh a, a lawmawm khawp mai. U Mawii leh an pate inbiak chhung chuan Apple ka lo velsak a, Lsa a rawn lut hlawl. Ka lo be ve sawk sawk a. Eitur eng emaw a rawn keng ve nual lehnghal, mi hawiharh tak chu a ni. 

A in thar chanchinte ka zawt ve a, "Ka awmna tur tawk lek a ni. A zia reuh khawp mai. Kartawpah in dam ṭhat chuan chaw lo ei ve r'u aw" a ti luam a. Keipawn ka hnial hran lo. U Mawii phone hmang zo leh Sangbera te an rawn inzui lut ta bawk. Lsa chu ngaihbel theih tur hian a tûm deuh nghal khap mai. Mahse, Sangbera zawk chuan a be bawrh bawrh a,. 

"Thisen chu a la mamawh dawn chuan ka ṭhiante pawn an pe thei ang. Kei hi ka blood group nen a inmil tlat lo" a tih chuan, Lsa'n, "Keipawn ka pe thei ang" a lo ti ve var. Min hnaihtu te hi mi fel tak vek an ni. Lsa chu reivakloah, "Kan khaw mite kha naktuk an haw dawn sia, ka va thlah ve lawk ang e" tiin min chhuahsan a. 

Sangbera nen coffee in in kan chhuak ta bawk. Ama rawt a ni miau a. U Mawii te lahin music an lo man nasa mai si. Damdawi in piah lawka waiting shed-ah coffee in chuan kan ṭhu dun ran a. 

"Vawiin khan ka ṭhawng deuh mah mah che a, tihpalh. Ka rilru kha a buai ve thut a" a ti a. 

"Umm, nia..min ṭhawng khawp mai" ka ti ve mai a. 

"Ka naute pawh ka hrilh tawh a. Ṭha an ti vek" naupangchhia zet hian a ti a, ka lo melh nghek, "I â tawh nih chu' ka ti chiam bawk. Hmel danglam eih lo hian, "Ka chhungkua an nia, ka hrilh ve lohin.." a ti êt a. 

"A thuhrimin kei min neih avang khan Alexa thuchah che kha a danglam phah dawn hleinem" ka ti a. Ka aw pawh a nem tehchiam lo. 

"Thuchah chu danglam dawn lo ve, mahse, a thuchah ka hlen lo thei thung alawm" a ti mai si. Hnial dan tur pawh ka hre tawh lo e a. 

"I ngai harsain thil i ngaihtuah nasa lutuk a nih kha. May, tun vut vutah inneihna kan buatsaih dawn hleinem. Mahse, kan innei dawn tih erawh kan puangzar ang" a ti ta mawlh mawlh a. Nia a sawi ang deuh khan thil ka ngaihtuah kual nasa lutuk a, ka buai zo vek a ni ber. 

"Remruati'n a pawm dawn mi?" Ka tih chuan, "Ani pawm leh pawm lohin awmzia a nei hleinem.." a ti hluk ringawt. 

"Min haw dawn asin" ka ti sep a. 

"A haw tawh tho che lawm" a ti lehzel. Ka maimichhing tawp. 

A haw dawn chuan, "May, naktukah i thutlukna min hrilh theih chuan ka lawm ngawt ang. Ka nawrlui lo che a nia. Inneihna hi thil serious tak a nia, kalpah mai mai ka duh lo" a ti a. Ka bu nghat ringawt. 

U Mawii bulah ka sawi lo thei ta lo va. Engkim mai chu ka hrilh fai ta vek mai. A bu nghat nghat a, ka sawi zawh chuan, "Chu bak baka vanneihna hnâr..May, i vannei takzet. Eng thildang nge la ngaihtuah ngai a..neih che a duh a, a sawm che a. Kei chu ni ila hmangaih lo mah ila ka nei hmiah ang. A hausak chu thuhran, mi sual a ni si lo, pawisa te kha ₹5000 a nih kha aw min pek..vantirhkoh a ni ringawt. Nei rawh, i neih loh chuan i U Kunga ka hauhtir ang che" a ti ta hmiah hmiah mai. Ka hrilhhai letling. Mahse, dawnsawn a hrehawm lem loh. 

"Mahse, ka sawi thiam lo, awm nawm lohna riau ka nei. Thil a awlsam leh lutuk hi" ka ti ta a. Ni e, hei hian ngaihdan dang min neihtir a, ka awm a nuam thei thlâwt lo. Sangbera ka va ringhlel pawh a ni lo. 

"Aa..May, thingtlang nula, zep nâk emaw fahrah in ni a, mi in hnuai luahin tihian i inhlawh ve hram hram a, i hnathawhnain nupuia neih che a duh tih i hriat khan awm nawmna chi a ni hleinem. Mahse, kha chu zawi zawiin a kiang mai ang. " A ti sauh sauh mai a, kei ai aiin a phur a. Min tihlauthawng zo vek zawk. 

"Nia, ka hre lo le..nangmahni te hi han dam fel phawt ula, rilru kan la siamfel dawn nia" ka ti ta tawp mai. Rempuii buaipui ngaiin a awm lo bawk a, ka mutui phian. 

Zingah thawh veleh ka hawsan a, U Mawii chu Nubawihi'n a han thlak ve rih dawn a ni. Keipawh inah ka intifai sawk sawk a, chaw eikhamah Boss in lam ka pan lehnghal zat. U Mawii te ngaihtuahawm an ni lo bawk a, rilru a thawveng ta deuh e. Boss pawh a lo la kal lo va, a lo insiam mêk. A pindanah min ko lut a, "Necktie hi rawn suih rawh le" a ti sup. Min nupui cheibawl nghal ringawt. Necktie suih ka thiam si lo, "Ka thiam lo" ka ti ta tawp a. 

"I thiam vat a ngai dawn a nih chu" a lo ti nghut. 

"A har hmel si" ka ti sep a, nia, hotê anga lang si hi ka thiam hleithei lo. A suih dan chu min han zirtir sasawi a, a hmuh laiin vawi hnih ka han practice a, kan duhtawk ta rih. A khirh viau ang em aw. A khirh vaih chuan kei lah ka thinchhe si, kan inmil rei vak lovang. 

A chhuah dawn chuan, "Teberi leh Mami te an rawn leng dawn a. Lo inkawm r'u aw" a ti a. Amah hian a ko a nih ka ring. An bula awm a hrehawm loh bawk a, khua a har lo daih zawk ang. 

Chhuat ka nawt zo tih âwm velah an rawn thleng ta a. Naupang an rawn hruai lo. An pa ten an awm a niang chu maw, "Ti nge naupang lo hruai tur che u lawm" ka lo ti ve vat a. 

"An hlei si, a pate kan awmtir ta mai, tikhan nau awm hahthlakzia hre ve rawh se" Teberi chuan a ti sar sar a. Zorina te pafa inawm tur ka mitthla a, ka nuih a za deuh. Nu Buangi pawh a rawn phei ve a, ani hi ṭhat lam pan em em si lo hian a hniam lem lo a,. Dam ve reng se tih erawh duhthusam a ni. 

Mami'n, "Eitur kan siam dawn nia, a la hma deuh bawk a. May, tihtur i la nei em?" A ti zung zung a. "Nei tawh lem lo, tihfel tur hi a tlem thei lutuk a" ka lo ti ve vat. 

"A nih chuan in inneihna tur vel sawi ang u" Mami chuan a ti ta mai. Ka lai chhe viau mai a, sawi tur ka hre bawk si lo. Teberi chuan ka awmdan chu a hrethiam nge, "Lalmam, i sawi dan tehtawp khan a tihamhaih a nih hi, ri phawng phawng zel suh" tiin a û nupui chu a'n khak leh rih. Nu Buangi chuan, "A ni teh tak e. Maybawih, engtik hun nge in han tinzâwn deuh?" A lo ti ve a. 

"Chutiang engmah kan la sawi lo. Engtin nge in bulah a sawi?" Ka ti ve ta ngawt a. Teberi chuan, "Chutiangin a sawi tlang bik lo. Neih che a duh thu leh a ranglama buatsaih a duh thu a sawi ve tawp" a lo ti a. 

Mami chuan, "Ka ṭawng huatthu suhah in pahnih hian chhungkuaa thuneihna nei ve ve, midang râwn leh tur chuang nei lo in nia, a hun thuhla pawh in pahnih duhdan kha a ni mai lawm..a rang lam hi a ṭha..U Sangbera'n fa a awt ve tawh ropui si" a lo ti ve zung zung a. Ka nui tawp. Zah ṭît ṭêt hun a ni lo bawk a, "Nia, kei chuan sawi nawi ka nei hran lo. Mahse, ka buaina zawk chu thuam chhawm te pawh a ngai ve ang a, bakah ka man dawngtu tur ngaihtuah te" ka ti ve ta a. Tuna ka thusawi dan kalhmangah chuan Sangbera neih chu ka thutlukna a ni ta tihna a nih hmel. 

"Thuamchhawm a ngai teuh lo. Tuna in neihsa nen sawn rawn lut tawp rawh u. Chuan, i man dawng tur kha chu nia ngaihtuah ve chu a ngai ang a" Teberi chuan a ti a. Thuamchhawm tel lo va pasal han neih ngawt chu a zahthlak ve deuh. 

Mami chuan, "I nau pawh hostelah in dah ka ring, a tan a ṭha zawk. In tan hian Mama hi in rin aiin a inhuam ang" a lo ti ve bawk. Nu Buangi lahin a lo tuihnih ve zel bawk si. 

Ka sawi châk, sawi nuam ka tih vak si loh chu ka sawi ta tawp a. "Ih, Remruati hian min haw dawn sia, U Sangbera nen an inkawmngeih bawk si.." tiin. Teberi a ner sak, "Awii a huat ve ngawtna chhan tur che a awm lo. Mama a ngaizawng ve ngam ringawt hi kei chu ka ngei, Mama best friend Alexa bialnu kha a ni sia, Alexa thlarau pawh a zah lo mawni ka ti" a ti bawrh bawrh a. A tih loh zawngte lakah chuan Teberi pawh hi a ṭawng nat ve hmel khawp mai. 

" Dik chiah, bakah Remruati chu ka ei thlawt lo, a chapo si. Mi a hnuaichhiah thei si..Mama lah hi a intineitu thei vel sia, chum chawrh ka châk ṭhin" Mami chuan a lo ti lehpek. Kan nui hawk hawk hlawm a. 

Teberi chuan, "May, i hriat ngei ngei tur chu maw..u Zodini chungchang engmah i sawi ri tur a ni lo. Mama hian sawi a phal lo va. Chuan, bal a ngaithei lo tih chu i hre tawh ang a, A thikthu a chhe bawk. A ṭhiante pawh a thîk thei..i fimkhur nan ka sawi lawk aw" a ti a. Ka lo bu nghat nghat. Khatiang kha a pawimawh ang. Mahse, nupa ni tur anga ka han inngaihtuah chuan ka zak ngawih ngawih. Ti nge ka neih ve ringawt ang le ka ti..ka rilru hi a fim thei hlawl lo a ni ber e. 

Eitur vel kan ei zawhah Mami leh Teberi te chu an haw ta a. A reh nghal dûk mai. Nu Buangi pawh a la awm a, "Ka thih hma ngeia Sangbera fa hmel hmuh hi ka duh khawp mai. Hetia neih che a tum chûk chûk hi ka lawm tak tak a ni" a ti ve luam a. Anni ho hian Sangbera thutlukna hi a hma daih aṭanga lo hre lawk an ang ka ti fô, a chhan chu kei a maid neih a duh ta mai hi mak an tih loh hmel chu thuhran, ka neih loh hlau ang hrima an khawsa hi..

Nu Buangi phei hnuah rawng ka bawl a. U Mawii ka be bawk. An ṭhat zel thu leh naktukah chuan chhuah theih mai an inbeisei thu a sawi a, thawk khat a veng huai e. U Sangi ka be bawk a, anni nupa hi pasal ka nei dawn a nih pawhin nu leh pa chan chang tura ka ngaih an ni ve. U Kunga te chu ka tan ṭhain fel viau mah se; an khua a hlat bakah thil buaithlak a awm thei dawnin ka hria. Tin, Putea leh nuteii te pawh ka man dawng tura ka chah an ngai ngei ang. Palai te pawh a rawn tirh khawmawi ve a ngai dawn a, U Sangi te nupain an lo dawnsawn mai a ngai ang. Chutiang ngaihtuah reng reng chuan rawng ka bawl a. Ka bawl zo thuai mai. Sangbera a rawn haw a, "Ka ril a va tiṭâm kher êm, vawiinah ka buai lutuk a, engmah ka ei lo" tih leh ka chawhmeh siam rawn tem chu a rual nghal a. A patling vel e. Ka lo ngawi reng thung. 

"Ka va inthlak lawk ang e..lo awm rawh aw" a ti a. Ka lo nghak ran. A rei lem lo, bathlarah kan ṭhu chhuak a, ni a la tla lo naa boruak a dai diak mai. 

"Vawiin lamte chu eng nge in sawi ho a?" Zangkhai takin a ti a. 

"Kei chu mak ka la ti reng, hetia i awm hi" ka lo ti daih. Min rawn thlek zauh a, "Eng nge mak?" A ti let hû..

"Ka sawi thiam lo. Ka duh thu che pawh ka la hrilh lo che a, hetia inneih nghal rum rum hi a mak riau..thildang a awm a niang" ka ti ta hmiah hmiah a, ka tâwt ve deuh bawk a ni. 

"Thildang chu awm e. I hria alawm, Remruati'n Alexa thuchah a hriat hma ngeia inneihna kan kalpui a ngai a ni. "A ti nghut a. 

"Chutiang vang ringawt a ni dawn mi? Remruati chu i duh chuan i nei lo thei alawm, ti nge i hlauh viau a?" Ka ti ta hrep a. Ka thinrim deuh tlat ringawt. 

"Remruati i la hriatchian loh vang mai mai a nih chu..tin, Alexa nena kan inṭhianṭhatna boruak i hre lo bawk a. Engtikawng zawng pawhin Remruati hian a bawhzui dawn. Tunah pawh hetiang khawpa a ninawm tawh laiin" a ti chhum ve hmuk hmuk a. 

"Ani i nin vanga keiin lo tawrh daih" ka ti nghat. Remruati vanga a nupui nih ringawt chu ka la na tlat, tlawmthlak tihna riau ka nei a ni ber. 

" Inneih i duh lo tih ka lo hre lo pek a nih chu! Min hnial nat loh vang khan i rilru dik tak i sawi ngam loah ka lo ngai a. Kan inhiptâwn viau emaw ka tih vang a ni. Ka tihpalh" a ti sûp sup a. Ka lo dang dêr..ka melh vung vung a. A mitmenga tawrhna lo lang leh a nui lui te chuan ka thinlung a dek lutuk. Mahse, ka ka âng turin ka chiâi tlat, a thusawite kha dawnsawn dan ka hre lo. 

"Chuan, i duh chuan i haw thei tawh ang. Ka chelh rei mah mah che" pangngai deuh hian a ti leh a. A ding nghal hluai bawk. Ka ding ve zat a, "Ih, englo..ka.." ka ti niah niah chu min rawn enin, a nui hak a. "A pawi lo May, a pawi lo reng reng, ka inringtawk sual ve a ni mai..a hma ang tho khan ka hna i la thawk dawn alawm..a ṭha em?" A ti nghut nghut a. 

"Chutiang a ni lo..ka.." ka tih lai takin a phone a rawn ri a, a en nghal vat. "Min lo hrethiam mai aw" tih leh a phone chu a benga vuah a rual a, a kalsawn hlek bawk. Chechâng lovin ka ding khawng reng, Sangbera thusawi tinte khan min deng mawlh mawlh a ni ber e. Ka duh loh thu ka la sawi lo ang bawkin ka duh thu pawh ka la sawi hek lo. Ka nei dawn lo tih lah ka la sawi lo bawk. Mahse,ani chuan ka thusawite kha a bawplawkah lain ka neih duh loh vanga ka chhuanlamah a ngai ta si! Chu chuan min hnuk hla ta dâwrh a, hrehawm ka ti. A biak lai reng chuan, "May, i kal thei aw i duh chuan" a rawn ti zauh a. Ka lo en reng ringawt. 

Keimah leh keimah inthiamchawpna ka dap a, dik tak chuan khang ka zawhna te kha a ho bik lo. Nupui pasal inneihna hi thil naran a ni lo va, ngaihtuahna fim tak nena hmachhawn chi a ni. Remruati a nin leh hnawk a tih vang ringawta min neih a duh kha keiin ka duh bîk si lo, a laka ka beisei hi a hrethiam lo nge a haider zawk le..min neih a duh vang chauha min nei ni se ka duh a, mahse, Remruati hming sawilan a ni ve sek hian min tihel ve tlat a ni. A biak zawh thleng ka nghak lui ve ta ngat a. 

A biak zawh chuan a rawn phei a, a sana a bih zauh. "Kimtea'n a lo nghak rei lutuk ang che. " Nelawm tak hian a ti a. Amah enin, "Sawi duh ka nei" ka ti sap. 

"Umm sawi la, chhuanlam dang erawh ka ngaithla peih lo" a ti bul hmuk. Ka ner sak a, "Chhuanlam ka lo siam reng reng em ni a? Ka rilru i hre lo" ka ti ve ta khar khar a. Ka aw pawh a khur deuh. 

"Tunah rih chuan ka lo nawr vak che avang khan ka inthiam lo mêk a, belhchhah suh" a ti nghut a. 

"I duh duh danin thutlukna i siam nghal zung zung a,. Ka nei dawn lo che ka ti em ni?" Ka ti ve ta sak. A mengphâwk deuh a, mahse, a danglam leh vat. 

"Kan inneih avanga i tawrh tur thu kha i sawi sia" a ti sup a. 

"I ngai kawi rêng alawm. Kei chuan kan innei dawn a nih pawhin thildang vang ni lose ka duh a..ih.." ka tih laiin, "Aw ka hria, kan inpuitawn..ka pawm alawm, May, a hma pawn ka sawi tawh kha" a lo ti a. Ka thaw kâwk ringawt. Eng nge maw a rilruah awm le..hmm, chutia inpuihtawnna atana inneih a duh phawt a hnu..Hei chen min pui a, ka pui let ve anga a ni mai lawm..a ṭha e. A laka ka beisei rûk chu ka hmu dawn lo tih ka pawm a ngai. 

Tawlh hnung hretin, "Aw , a ṭha alawm, kan invenghim tawn..a dik em?" Ka ti sap a. 

Chiang zeta min rawn melhin, "Ka pawm e." A ti nghet churh a, ka lo buk khum ve zauh bawk. Kan inneihna tur chu deal a nih ber mai dawn chu a..engpawhnise, Kimtea hmalam hun avang pawn ka pawm ang,.keite chu ka chhel alawm ka ti rilru ta mai. 

In ka thlen chuan Kimtea'n chaw min lo eisan tawh a. U Mawii te pawh an nufa bawkin an riak leh a lo nia. A hautak mai mai asin mawle. Chaw ei châkna ka nei mang lo bawk a, bar hnih thum bak ka bar lo. Ka inbual zawhah U Sangi ka call a. "In hman hram chuan in lo phei lawk dawn mawni le, keima chungchang a nia. In nupa bak han râwn tur ka hre si lo va, khawngaihin" ka va ti a. 

"A va pawimawh hmel ve aw. Aw le, hei I U Kawnga inbual zawhah kan lo phei dawn nia" a rawn ti a. Kan dah ta rih. Kimtea lehkha zir hma chuan ka bulah ka ṭhuttir a, Sangbera nena kan chungchangte chu a hriat tur ṭul chin ka hrilh ta vek a. 

"In inngaihzawn kha ka ring rêng ah..innei r'u, a hausa si" a tih chuan ka rilru a tina zawk. Kan inngaizawng si lo. Kan inngaihzawn avanga inneih kha ka duh laiin ani chuan deal min siampui a tum tlat si! Mahse, chung chu Kimtea bulah ka sawi hran lo. A ṭul lo bawk a. Ama tana nei ka nihna chen a awm ve bawk, zirna ṭha taka a zirchhuah kha ka duhsak a, kei ringawt chuan a kal zelna turah chawm zawh loh hun ka la nei dawn..ka nau hian a duhthusam dinhmun a luah theih chuan kei chu tu emaw sal ni kumkhua dawn mah ila, pawi ka ti lo ve. 

U Sangi te pawh an rawn thleng phei hma viau, naupang an rawn hruai lo bawk. U Kawnga nî an awmtir a niawm e. Kimtea lehkha zir hlan chuan engkim chu ka sawi ta vek a. An ngaithla uluk ngang mai. A tawpah, "Chu chu a nia, kan fahrah si a, putea te leh nuteii te lah an awmna a hla si, nangni pahnih hian palai pawh in lo dawnsawn ve mai loh chuan ka tia" ka ti a. Ka la upa hran lo nen, chutiang thil ka han sawi chu ka zakin nuam ka ti vak lo. 

U Kawnga chuan, "I va vannei ve aw..ka lawmpui hle mai che. Kimtea tan mawlh a nia la ṭha tur ni,. Ni e, he laiah chhungkhat in nei si lo va, tling lo viau mah ila, i mi ngenna chu kan tihlawhtling turah ngai ang" a ti chuar chuar a. 

U Sangi pawh chuan, "Ka lungte pawh a chhe lek lek mai a..i nu leh i û te kha la dam ve se, an va lawm ve dawn tak. May, ka rin phak bak a ni. Aizawl khua pawh ni lo, mi in hnuai luah mai mai, fahrah tak maiin hetiang Aizawl tlangval to-a an sawi i han nei tur hi..I nu Pathian rin kha a la ngai reng a nih hi.." tiin hnukulh ṭeuh hian a sawi a. Kei pawh lungchhiatna chhan tur pahnih ka nei. Pakhatna chu ka nu leh ka û te kha la dam se, Sangbera kher ni lo midang daih pawh pasal ka neih hun hi hmuin hre ve se ka ti. Pahnihnaah erawh Sangbera nen kan inkar hretu apiang te'n kan inhmangaih vanga innei tur anga min ngai leh vannei em ema min ngai chu a ni. A ni lo tih lah ka hrilh ngam si lo. Ka ipik ru viau mai. Tiang chuan thingpuite ka lum a, palai lo len hun tur te pawh la inhrilh ṭhat leh atan kan ti a. Kei ai mahin an hlimin an lawm zawk niin ka hria, khâkna leh phûtlet nei miah lo va min tuamhlawma min khawngaihtu te kha an ni miau a. Dinhmun ṭha zawka ka dina ka puihna an mamawh a nih phawt chuan ka tlanchhe ngai hauh lovang. 

U Sangi te hawn hnuah kei pawh ka mu ve ta a. Sangbera nen whatsapp-ah kan inbia. "Palai te pawh i rawn tir ve a ngai dawn a, a hun te ngaihtuah fel rawh" ka ti a. 

"Nia, I U Mawii te kha ka han ngaichâng deuh mawle..an chhuah hun hunah aw" a rawn ti ve a. 

"A ṭha lawm. Thuamchhawm pawh ka lo intuak ve deuh loh chuan" ka tih chuan, "A ṭul lo kha kha..ka lo sawi lo tak a. Engmah a ngai lo" a rawn ti. 

"A zahthlak alawm, i ṭhiante leh hmelhriatte an hausa hlawm si" ka va ti a. 

"A ho chutiang. Ka nupui i nih chuan a tawk. Nakinah kan duhdan chu hmaichhanah kan la sawi zawk dawn nia" a rawn ti a. 

"Aw le, ka mu dawn aw. Muttui le" tiin ka thlah a. Kan inhlat ta dâwrh zawk niin ka hria. Kan inbiak dan pawh a hmaa rilru inpawh taka inbiak ang kha ni tawh lovin, ti lo thei lo dinhmuna ding ang mai kan ni. Mahse, ka hnual dawn apiangin ka nau ka hrechhuak a, ka intichak thar leh ṭhin. U Sangi thusawi, "I nu Pathian rin kha a la ngai reng a nih hi" a tih thu kha ka ngaihtuah zui a..

Ni e, mi tam tak duhthusam pasalah ka nei mai dawn chu a nia. Mahse, hei pawh Pathian min hremna tho a ni. Min hmangaih vang ni lo, midang laka invenhim nan chauh min nei dawn chu a ni si a. Ka hlim phah der si lo. Thutlukna ka siam sual ang em tih pawh ka ngaihtuah ve tho. Mahse, duhthlan tur dang nei vak hian ka inhre si lo. Huiham.. 

A tukah chuan u Mawii te pawh tlawh tawh lovin hnaah ka kal nghal a. Putea te leh Nuteii te pawh kha ka hrilh tawh a. A ṭhâwng ve hle. Sawi tawh angin an awmna a hlat bakah chhungkaw buai neuh neuh nen, kan insawirem a nih chuan man hlan nang tura an lo kal tur thu chu an sawi, keipawn a bak ka phût lo. Ka pa unaute pawh Pa Hmuna chiah ka hrilh. Ani hi chuan min rawn biak ve leh zauhte a ching a, hriattir ve kha ṭha ka ti a ni. Sangbera in ka thlen chuan ani pawh a lo chhuak dawn chiah a, "Rawngbawl a ngai lo aw. I duh leh i haw hma daih dawn nia, tihtur i zawh hma chuan" a ti a. U Mawii te tlawhna hun a ni mai. Ka ngaihbel nge ni, ani pawh hian a hma ang khan min be bawrh bawrh tawh lo. A inhmuamûp tawh bawk si,. Hetiang hi ka enliama ka palliam ve a ngai dawn tih ka hai lo. 

Ka tihtur ka ti mawlh mawlh a, a kekawr ka sûk dawna a ipte ka check chuan lehkhathem a lo awm a, eng nge ka hriat pawh ka hre lo ka'n enchiang kher a! Chu lehkha chu receipt a lo nia! Hotel book-na..hotel room no. 026 an luahna receipt a ni. Ka rilru chu a kalthui riau, a hun lah nizan a ni bawk si! Nizan khan dar 10 velah ka mutsan kha a nia. Khatihlai pawh khan hotelah a awm tihna a nia! Tu nen nge? Eng nge an tih ang? Ka inthing harh a, "May, enliam rawh, pallui rawh. Hei hi alawm hmangaihna tel lo inlaichinna, i kawng zawh tur chu..i thei a nia.." tiin darthlalang hmaah chuan ka infuih mawlh mawlh a. Ka insûk chhunzawm ta nghal. 

Chawhnuah chuan ka tihtur ka tizo chu a ni mai e. Ka insiam sawk sawk a, Valtea pawh be ta lo chuan a rem rema hawn tumin in chu ka chhuahsan ta a ni. Damdawi inah ka tlang a..U Mawii te khan an chhuah tur thu an rawn sawi si lo va, an la awm turah ka ngai a. An ward ka va lut chu an lo awm ta reng reng lo! Ka call ta vat a, a switch off tlat si! Nubawihi ka call a, a ring ral ṭhak. Ngaihṭha lo fê hian in lam ka pan ta ngawt a. Eng thil nge maw an tawn ang le?! In ka zu thleng thla chu an lo awm ṭhap si! Ka va ngei reuh tak e aw. Mahse, U Mawii khan a phone tuiah a lo thlauh pek a, a chhe daih a lo nia. Nubawihi lah chuan a phone a lo charge daih a lo nia ,bakah an chhuah takah khan an hamhaih ve deuh nge min lo biak nachang an lo hre lo a lo ni. Engpawhnise, an chhuak thei chu a lawmawm e. Rempuii pawh inbual fai sarin a lo ṭhu a. Hmuh a nuam tawh hle. 

Keipawh ka intifai a, Sangbera chu U Mawii te chhuah thu ka hrilh ve a, "A nih chuan naktuk zanah kan lo lêng mai dawn mi niang!" A ti a. 

"I thu thu" ka ti ta mai. Ngaih hohna riau ka nei a ni chêk ang chu. Chawhmeh te ka han lei leh a, zanriah pawh kan ei tlai deuh. Chaw kan ei mawlh mawlh laiin Nubawihi ta pek chuan, "Au Mayi chu fa i neih hunah nau awmtuah min chhawr rawh aw. Awii, i rai puar lai ka hmu châk" a ti ta hlut a. Fian ka thlauh ri bâwl! Kimtea'n min rawn en vat a, "Ate,." A ti a. Min melh ṭhap chu melh kualin ka nui lui hak a, "In ho lutuk, ka rai vat dawn lo..nau neih a nat hmel si" ka ti a. Ka thaw a chham mai dawna hriain ka tho ta daih a, ka nauin ngaihthat loh hmel zeta min melhna chu ka haider hram hram. Pindanah ka lut a. Khumah ka ṭhu hnawk. Ka kut pahnih suihin chhuat lam ka melh ta ngawt ngawt a.

Ni lo, kei hi ka rai ang maw? Ti nge inneihna sawi rik a nih khan mipat hmeichhiatna lam ka lo ngaihtuah miah loh le?! Nupa te chuan nupa nun an hmang ṭhin. Chu chu engtin nge ka mangnghilh theih le? Kei hian mipa ka mutpui thei ang maw? Samuela ka ngaihtuah let vang vang a..ka mittui a hnâm sawk thei..Nupa nunin a kentel sex chu Sangbera nen kan la hmang ngei dawn si a..ka thei ang em? 

Ka mittui khap per sawkin, "Lalpa, min pui rawh" ka ti sap a. 

Eng maw? Tunah khan tu nge ka biak? Lalpa tia ka koh kha tu nge? Hmm, May-i'n Pathian hming ka lam leh ta..