Sangbera 10

SANGBERA (10)

Ziaktu : Toni Râlte

U Mawii ten min thawh khalh a, An ṭawng bawrh bawrh thawmah ka harh. Lsa an va hmu thut kha mak an lo ti deuh a nih hmel. Lsa pawh a tho tawh a, a inthlahrun hmel lehzual. U Mawii te bulah chuan thil awmzia ka sawi zung zung a, zep leh î ka nei hran lo. A buaithlak mai mai, Tukṭhuan kan rel zui ta nghal a. Rin loh deuhin Kimtea pawh a rawn tho harh viau mai, nizan lam khan a harh miah lo va, a zu in khan a la tinguai a nih ka ring, tukin erawh a harhvâng khawp mai. Ka lawm viau. Doctor hmu tur kan nih avangin chaw pawh kan ei hma deuh, Lsa chu, " A laklawh êm mai, karleh atangin i insawn chhuak dawn nia..mamawhte pawh i lam ve a ngai ang chu, inthlahrung suh" ka ti ve a. Dik tak chuan han in dang ringawt dawn se bungbel leh eng ilo pawh engmah a nei si lo va, retheihna leh thil buaithlak tak lo paltlang tawhtu ka nih vena laiah ka khawngaih a ni. "Ka hrethiam bik lo. Nia, i sawi ang pawh chuan chet a ngai maithei" a ti ve ringawt bawk. 

Keini chu kan insiam a, Nubawihi leh Kimtea ten in an lo nghak dawn a ni. Tichuan, Dr. Rintea hmu tur chuan kan chhuak ta a. A clinic awmna chu a zawh chawp theih mai ang. Rempuii chu Aizawl a kal vawikhatna a ni ve bawk a, kan awm tirh ang mai khan a hawi ve nasa mai. Ani hi ṭhanthi a neih hnu lawk atangin a thi pût a reh thei ta tlat lo va, thla khat han âwl ve zauh chang nei mah se; tun hnaiah a zualkai ta em mai a, ngaihṭhatna chi a ni tawh lo a ni. Tluang takin Doctor clinic pawh chu kan va thleng phei ve ta a. Sangbera'n zingkarah khan morning wish min rawn thawn a, chubak kan la inbe lo. Tunah rih chuan ngaihtuah tur ka la ngah ve deuh bawk nen, a chungchâng chu ngaihven rih vak ka duh lo. Rei kan nghak lo hlauh e. U Mawii'n a va luhpui a, pawnah ka lo nghak thung. 

"Heii, hetah eng nge i tih?" Remruati a ni daih mai. A kalpuipa chu hmuh tawhna ka nei mawle, ka hrechhuak zo tawh lo. 

"Nia, kan inentir a" ṭha pangngai takin ka ti a. 

"Je, hei hi Sawmdawnga maid thar chu..a thingtlang hnek hnek asin" nui har har chung hian a ti a. Mipa chuan min rawn melh zauh a, "May-i i ni ngei ang maw? I hming hi ka hre ngun riau, tunlai chu" a ti sup a. Sangbera aw emaw ka ti ṭêp alawm le. 

"Aw ni e,. " Tiin ka nui ve ringawt. 

"A zin tiraw? A lâng dawn em?" A ti leh a, "Aw lâng tur ang kha chuan a insawi a" ka ti ve mai a. Remruati'n, "Maid nuamsaberi" a lo ti leh sep. Mipa chu a pangngai khawp thung, a kalpui ta daih a. Remruati hi an chhungkua vel ka hrechiang châk. An veng hming chu ka hria a, tumah hmelhriat ka nei si lo. Nakinah ka la hre thovang, an chapo chhungkua ngawt hian ka ring a ni. U Mawii te pawh rei fê hnuah an rawn chhuak ve thei hram e. 

"Damdawi ni ni 5 ei min chawh a, eng a an loh chuan kal tha leh turin min tia" a ti a. Ka rindan sa kha a ni hrim hrim. Damdawi te chu ka lam khawmsak zung zung a. Taxi laa hawn mai kan tum,. Taxi ruak a vâng hrep a,. 

"May.." Samuela bawk. U Mawii te a hmuh chuan a meng phâwk ve deuh a, "Ehe! U Mawi, eng ati nge a?" A ti hluai. U Mawii pawh chuan ṭha tê tê chuan a chhang ve a, "A va zia lo ve, Remi pawh kha a dâng bai alawm. Mayi inah maw in thlen?" A ti mawlh mawlh a. U Mawii zelin a chhang. 

"Naktukah ka rawn leng ve dawn nia, kan khawmi te chu ka ngaipawimawh alawm" a ti ve ngial, Tûm hmukin, "I lo kal tawh angah inngai mai rawh" ka ti a. Taxi ka phar nghal zat bawk. Kan kalsan ta daih a. 

U Mawii chuan, "I la haw reng a ni maw?" A ti a. 

"Ka haw reng ang" ka ti hmiah. 

"An chanchin pawh i hre lovang a..Nupui te kha a ru ve a, fa pakhat an nei tihin an nuin a uiresan a, Chuan, he lamah a rawn awm ta daih a nih hi..a rawn haw khât khawp mai" a ti mawlh mawlh a. Sawi zawm lo se ka duh avangin, "Rempui, ei châk te i nei em?" Tiin Rempuii chu ka melh ta daih a. Ka rin loh deuhin, "Lapaw chini leh ice cream ka ei châk" a ti ta mai a. Tleirâwl ve uaih tawh si, ka nuih a za deuh hle. Mahse, a âwm ve tho, Thingtlang pilrilah chuan hmuh tur awm ve hek lo. Remchanna laiah driver ka dintir a, ka va leisak,. Chawhmeh tuihnai ve deuh hmehpui ka duh ve bawk si, Vawksa rêp ka lei leh hram. Thlai lam chu kan veng kâwnah lei tur a tam. 

In kan thleng a. Lsa pawh mamawh lam turin a lo chhuak ve a lo nia. Nubawihi'n, "Au May, Pa Lsa khan i chanchin min zawt vak a" a ti a. Pa Lsa a ti chu ka nui chhuak hawk hawk. Lsa hi Sangbera ai chuan a nau ang a, Nubawihi te tan chuan a û ve deuh bawk a ni. "Ngati nge a zawh vak che" ka ti a. 

"Ka hre bik nang, kan ina i awm lai vel te..U Samua pawh min zawt" a ti a. Min hriatchian chu a lo tum ve hle a nih dawn chu. 

Kimtea chu a khua pawh a lo sik tawh lo va, "Ka pum hi engtin emaw ni a awm a, ka luak a chhuak deuh a, chu chu ni mai" a ti a. Zu khan a pum a tino a nih ka ring. Rawngbawl nan a la hma bawk nen, tui sem nî a ni bawk a, ka insu a, Nubawihi'n min pui ve bawk. Anni unau hian an nu chu âwl hneh tawh tak an ni, unau hmeichhia an tam bawk a, an han nula ṭhuau ang a, an nungchang a that phei chuan an zahawm tham ngawt ang. Tin, U Mawii hi zo nu mawl vetê e ti lo hian fa enkawl lamah a harh riau a, an chhawr theihna kawngah chuan a chettir hma a, Thingtlang lam hna phei chu kei aiin an thiam vek zawk. 

"Au May, bialpa i nei em?" Insûk kan zar lai chuan Nubawihi chuan a ti leh ta phawng mai. A va buaithlak ṭhin e aw. 

"Nei nang, ti nge?" Ka ti a. 

"I nei ang, Ih, Kima paw'n a lo leng ṭhin a ti" a tih chuan ka nuih a za hle, Sangbera ka mitthla lo thei lo. "Aizawl ami pasalah nei la, chuan min awmpui daih r'u. Puanṭhui te ka zir ve ang a, Ka châk ve lutuk a" a ti sar sar a. Ka rilru a dek deuh. Ka dinhmunte hi han ṭha vein sumte hi hei ai hian thawkchhuak tam ve ni ila, An unau zinga pahnih emaw tal hi chu awmpui ka hreh miah lo mawle. Ka la rethei rih êm a ni. 

"Nia, ka neih chuan i lo awm dawn nia. Pasalte kha i lo nei ringawt ange" ka ti a. 

"Awii Enteh, kha ka ṭhiannu Lal Tlani kha, kha khan pasal a nei tawh asin, a rai mêk" a tih chuan mak ka ti,. A la naupang mah mah a ni. Hei hi a ni khawpui leh Thingtlang danglamna lian tak chu. Thingtlang tihah tunlaiah Thingtlang khaw changkang leh in leh lo ṭha tak tak pawh a tam tawh a, chutihrualin a pilril, khawpui tlawh zen zen theih lohna hmunah chuan an nula hman meuh lo, an tleirâwl chhuak a, pasal an nei zung zung zel. Chuvang a nia kum 25 bawr vel chu nula senior an nih zel ni..nupui pasal neih hma lutuk hi inṭhenna chhan tam tak zing ami a ni ka ti lo thei lo. Chhungkuaa inzirtir nasat hi a fuh viau ang. 

"Ate, i phone" Kimtea'n a ti lâng lâng a. Sangbera a ni. Pindanah ka luhpui ta daih a. "Eng nge in chanchin? " A rawn ti a. Ka sawi a, "Hei keipawh ka intifel thei ṭêp..Kimtea a ṭha em?" A rawn ti a. 

"Umm, a zu in kha a ngeih a niang" ka tih chuan, "A zawngchhang i hlau awm" a ti a. 

"Hlau e, nang pawn in tawh suh" ka ti vat a. Ka zak leh deuh. A maid kha ka ni sia, a tih leh tih loh tur lo hrilh vel kha..

"Kan la in duh ang chu" a rawn tih chuan, "Hmela" ka ti tuar. A nui zui hawk hawk a, "Eng nge ka lo hawn ang che" a rawn ti sup a. 

Engtin emawni ka awm. "Ka hre lo, thil tui deuh a ni mai" ka ti ringawt. 

"Zaninah ka rawn kal hman ka ring lo deuh a. Naktuk lamah rawn tlawh che u ka tum dawn nia. In chung tlangval te an rawn kal leh em?" A ti mawlh mawlh a. Lsa chungchang ka la hrilh lo tih ka hrechhuak chiah. Hrilh tur nge hrilh loh tur tihah ka buai deuh a, mahse, hriat hunte a la neih khan hnehsawh zetin min ṭawngkhum leh ka hlau sia, "Englo, Lsa kha a lo awm ve a. Kan inah" tîm deuh hian ka ti a, ka awmdan chu ka va duh lo e aw. A ngawi dat a, "Eng a?!" A awrâwlah chuan thinrimna aiin mak tihna a langsar zawk. 

"An hnawtchhuak a, nakinah hmaichhanah ka hrilh ang che" ka ti zung zung a. 

"Nizanah a lo riak em?" A ti hrâwk. "Umm" ka ti a. A rum nghut, "Aw le..engtik thleng nge awm a tum?" A ti a, a aw pawh a dam tawh. "Mondayah a chhuak ang ka ring" ka ti a. 

"A ṭha e. A awm laiin inbual lo la, i mut dawnah kawngka kalh ṭha bawk ang che. Ka dah rih aw,. Ka buai lawk dawn" a ti mawlh mawlh a. Ka ngaih anga a thinrim lo chu ka lawm vak chuang miah lo. A hmaa a thusawi, "Thinrim lo ila i lawm leh chuang miah lovang" a tih kha a thleng dik a va nih mai hmel ve. He pa hian min hneh dawn chu a âng ta riau mai a. Tin, thil pakhat awm bawk chu, ka boss a nihna laiah ka vengthâwngin ka ngaihsak lo thei bik si lo hi a ni, ani lahin kha tak kha remchangah a hmang ve bawk sia. Bakah a zei lutuk reng reng, a zei nge a fel hrim hrim ni, ka nau chanchin a ngaihven em em te,. Kan inbiaka a tihtur a sawi thlap zel te hi..ngaihzawng pakhat chiah nei ve tawh tan chuan âwm a tinuam ve êm a ni. Tuin nge ngaihsak leh ngaihven te chu nuam ti lo bik ang le? 

Nubawihi nen bawk rawng kan bawl a. Lsa pawh a rawn thleng, "Ka in luah turah bungraw ṭhenkhat chu ka rawn dah nghal a. Mamawh zualpui bak ka lei lo. " Tiin report a han pe ve zung zung a. 

"Khawi vengah nge" ka tih chuan, "Chanmari-ah..luah man a to ve deuh naa, kawngpui hnaih kha ka duh sia..tihdan a awm ve mai ang" a ti a. Remruati te vengah a awm dawn a nih chu! Hmm..

"Nupui nei vat la, a zia ang. Parawl chu an ei a chhe thei êm mai" U Mawii'n a lo ti ve a. 

"Mayi hi ka nghak dawn alawm" nui chungin Lsa chuan a lo ti ve a, ka nui ringawt. Kan in a lian vak si lo va, kan chêp ve ṭêp. Puitu ka nei a ni bawk a, rawng pawh kan bawl zo thuai e. 

Inbual ka tum lai mêkin Terini leh Pa Zothana te an rawn lut thut. Kei pawh chuan ka ṭhulh leh nghal daih. Pa Zoa chuan, "A mualpho zawnga hetia inchachhuah hi a ṭul ber hleinem, thinrim laia kan thusawite chu kan thinrim a reh a, kan hrereng tawh ngai lo. Hetia mi hrang ina awm kual hi a ṭul ber lo, lo haw rawh" Lsa bulah chuan a ti ta a. A aw pawh a vîn hran lo. 

Lsa chuan, "Engvangin nge ka rawn hawn leh ang a? Min duh lo va, min hnawtchhuak a, min duh lotu te bula awm ai chuan min khawngaiha min tuamhlawmtute hi ka ngaihlu fe zawk" a ti ram hmak hmak a. Keini tan lo ṭawng vena chi a ni si lo. 

Terini chuan, "A thuhrimin May, i lo sawm ami a? I lo inrawlh vena tur a awm miah lo asin" a ti nghat nghat a. Kei tehdaih min hmêr tel chuan ka lung a tiawi lo ve hle. 

"Sawm awkâwng lo mai." Ka ti a. 

Lsa chuan, " a..pu, lo haw leh pawh ni ila in dan ka tum tho nen, heta ṭang hian ka in dang zawk mai ang. In in luahtu te tho an nia. Awmho leh pawh a nuam tawh lo" a ti a, thinrim hmel a pu hran lo. Pa Zoa chuan, "Tih tak êmah chuan nizan kha chu i rui êm mai a, i thiam lo hulhual..i pi Zuali ân hla pawh kha a dikna chen a awm ve. Tihian in unau kan tuamhlawm che uin, i nu boral hnuah phei chuan engkim zawng zawng kan tihsak che u a, khati teh vaka thinrima inchachhuah kha a ṭul lo êm a ni. Miin an hre tam lo hlauh zawk a..tirawh, i haw ang" a ti chuar chuar a. 

Lsa ka rin loh deuhin a ri ta phat mai. "Ih e, Pu, tih tak êmah chuan Putea te leh Nuteii te ho an khawsak a harsat ve êm avangin ka rawn bêl che u a. Anni chuan sum leh pai ang zawngin min pui lo a ni thei, mahse, min hmangaih a, an fapa leh an tupa ang tak takin asin min en. He lamah hna zawn a awlsam e tiin reilotê ka rawn awm ve zawk a, chutah pawh ka pi Zuali ṭawng mei nei zet zet ka hre chamchi chungin ka ngawi zel a. Nizanah khan dik lohna chhetê mah ka nei lo. Pa pangngai tak ni la, i fanu hi i vaw zawk ang , a bialpain khati khawpa a hnehsawha a hmusit chung paw'n a bialpa chapo lutuk kha in chhungkuain in la ṭan zawk a. I lo patling lo êm mai. Nizana in ṭawngkam zawng zawngte kha ka theihnghilh ring suh. A tawpkhawkah lo chuan in in hi ka rawn rap leh tawh lo bawk ang" a ti ta phiar phiar mai. Pa Zoa chu a thinrim ngam lo nge a ngawi dûk a. Terini erawh a ter leh at tawh, "Lawmsang, khatin mi puh chhe reng reng suh. Robina hian ka laka engmah thil ṭha lo a ti ngai lo. Aw i thu thu alawm, rawn kal tawh lo tawp la a ni mai. Hei he thingtlangnu hi luhkhung la ,in inhmeh viau ang. Kan in pawh hi an luah thei lo ṭêp tawh ang. Nangmah vang pawn, Pa, Chho ang. A ho êm mai" a ti hlawih hlawih a. Kei min hmertel ve zel hi chu aw..a pawi hi a hranpaa ka sawi ka hre miah lo asin le. 

Pa Zoa ṭawng hmain Lsa chuan, "Mayi te hmertel sek suh, i eng pawi mah an sawi lo. Zanin leh naktuk zan ka riak ang a, Mondayah ka insuan chhuak dawn. Tikhan engmah sawi buai a ngai tawh lo" a ti ve ta hmak hmak a. Terini chuan a pa a kai a, an in zuichhuak nghal. Kan boruak teh hrep chu a.. U Mawii te pawh an hrilhhai hmel kher mai. 

Ka inbualsan ta tho va. Kan zanriah ei pawh Kimtea leh Nubawihi an inchawi. Kan leng tlat lo. Kan mûk rûn hlawm a, Lsa lah chu biak inthlahrunawm deuh hian a awm a, a rilru tur chu ka hrethiam tho mai. Pu Zothana nêp vang vek ka ti lo thei lo. 

Chaw eikham aṭanga reivaklo-ah Lsa chuan, "Ka chhuak lawk dawn a. Kan khua ami te an rawn zin a, ka va tlawh ve lawk ang e,." Tiin a chhuak a. U Mawii'n Lsa a khawngaih thu a sawi char char. "Enteh, a duh hmel che ka ti, zirtirtu a nih phei chuan nei daih rawh. An hlawh a tam si, amah kha a fel hmel bawk si" a ti luam a. 

" a..a chi loh, pasal neih ka duh lo. Kimtea engtin nge awm se i tih?" Ka tih lahin, "Awii, Kimtea ringawt te chu a huphurh dawn lo rapthlak" a ti a. Sangbera chanchin ka la hrilh tam lo va, a rawn kal hunah a hmuh dan hriat ka duh vangin. Lsa a sawi reng avang chuan ka sawi ve ṭêp a ni. Amah ka ngaihtuah lai mekin min lo call a, "Falkawn ka rawn thleng,. Ka rin aiin ka tluang a" a rawn ti dam raih a. 

"Motor khalh chungin min be suh" ka lo ti hmanhmawh. 

"Ka ngai tawh che a" a ti zawi sup a. Ka nghilh deuh dup thei nia. 

"I chhe mai nih chu,. Chuan i inah mi i tlang dawn? Eirawng an bawlsak che mi?" Ka ti ve zung zung a. 

"Aih, Zanriah chu Bawiha te inah ka ei ang. Zanin dar 9-ah phai lam mi hmuh ngei ngei ka ngai a. Chuvang alawm ka rawn kal hman dawn loh" a rawn ti ve mawlh mawlh. 

"Umm, nih chu..i lo thleng tluang chu a tha" ka tih chuan, "I thianpa chu engtin zel nge?" A rawn ti. 

"Hei a chhuak a. Ka sawi ang kha a ni mai" ka ti ṭha ve mai a. 

"Kimtea bulah riak leh ang che" a ti leh nghut. Ka nuih hi a za ṭhin. Ka thinrim thei thlawt lo, hetia thunei deuha min tawngkhum hian. 

Nubawihi, "Eh! Tuna i biak kha i bialpa chu a ni chiang" a lo ti kawkalh, Sangbera'n a ṭawng a lo hre pha si, "A va fing ve" a rawn ti

.."Dah teh" ka ti ringawt. A dah ve mai bawk. 

Zanin chu an chau vak lo nge ni, Kimtea te nen Nubawihi te unau chu an inkawm a, zawhna an ngah bawk sia. Kimtea lah chuan dawhthei takin a lo chhang ve mai zel bawk a. Keini U mawii nen kan titi char char bawk. "Pasal i neih pawn i nau hi chu tuman an huphurh ka ring lo. Khatiang zawng khan rilru pu tawh suh" a ti sauh sauh mai. 

"Samuela vang khan mipa hi ka phek en deuh tawh a" ka ti ve ngial a, "Khatiang tleirawl ngaihzawng mai mai vangin i vanglai hun tichhe suh, i hmel chhe lo va, Aizawl mi ngei, a theih phei chuan hlawh nei ngei neih tum rawh. Nakin zelah keini tan pawh a la manhla ve dawn" a ti bawrh bawrh mai. Ka nui reng ringawt. Dar 10 a ri hnai tawh, Lsa a lo la haw si lo. Sangbera pawh a mi hmuh tur hmu turin a kal daih tawh. Lsa chu ka call ta tawp a, ruih hmel fê hian min lo chhang a. 

"Khaw nge i awm? Lo haw tawh la" ka tih chuan, "Hetiang chung chuan ka lo haw lo mai ang. Ka ṭhianpa te inah ka riak mai ang. " A ti tlat. A inthlahrung leh lutuk a, a buaithlak. Nawr vak ka duh bik lo va, a ṭha mai. Keini pawh kan mu ve ta sang sang a. Sangbera ka nghak deuh naa, ka hriat loh karin ka muhil daih. 

U mawii ka thawh khalh leh ta lo. Rempuii erawh a tho peih tlat lo mai a, nizan lamah kan muthilh hlanin an lo inbuaipui leh deuh em mawni..a ṭha lo ê ka ti, U Mawii bulah pawh, "Kalpui mai ang u, hetiangte chu admit chi alawm" ka ti chung a. Amah Rempuii chuan, "Vawiin nghak leh law law ang u" a ti tlat reuh a. Kei hetiang lam chinchâng hre vak bawk si lo chu ka zâm hma em êm mai a ni. Kimtea erawh a zu in kha a dampui ta nge ni, a lu na leh zauh bak khawsik a nei leh ta rih lo. 

Thawh hlima Boss hnen aṭanga , "Morning, nizan kan tlai deuh a. Ka rawn be ta lo che a. Inkhawm rawh aw" tih thu dawn chu a tawp lam tih loh dawnsawn a nuam viau mai. Inkhawm erawh ka tum lem lo. U Mawii te an awm ve bawk nen. Kimtea erawh "Ka zia tawh tho" tiin a insiam hram. Ka tluk lo ṭhin ngawt mai. Tihtur em em awm ta lo chu ka tluzâl mai mai a, U Mawii pawh a lungleng deuh tawh nge an pa a be sur sur reng mai. Lsa a rawn lut hlawl, nizana a riah loh avang khan ka lo ngaihven leh tawh lo va, a pawrin zan khat lekah pawh ka hmu bawrchhawr angreng hle mai. Zu ṭhing rim a nam huam bawk sia, chauh hmel zetin ṭhutthlengah chuan a ṭhu a. 

"Chaw ei la" ka tih chuan, "Ka rawn ei tawh e. Ka inbual ang a, mut lawk ka duh, ka chau deuh a" a ti a. 

"Va inbual rawh, i thawmhnaw bâl kha chu tikhan dah tawp rawh,. Ka lo su dawn nia" ka ti zung zung a. 

Min rawn melh vang vangin, "May, i fel ka ti takzet, ka tihbuai tehlul che u nen" a ti nuah nuah a. 

"A ho ê, tiang kha sawi tawh suh. Kan û ang tho i nia..inthlahrun a ngai lo" ka ti a. Ka nu thusawi ka hrechhuak nghal. 

Zan khat kan unau min mutpuiin, ka pa erawh a bialnu ina a riah lai a ni a. Kan mut tawh hnuah paihte sumdâwng, kan ina rawn thleng reng reng ṭhin pahnih hi an rawn thleng leh a, an bungrua te chu kan dah felsak ve a, chaw erawh an ei tawh avangin ka nuin mutna a siamsak zung zung a. Kan mut leh hnuah, Kan unau bulah chuan, "A hma chuan kan khuaah hian mikhual an hnawng thin a. Chuvang a nia kan changkan mawh êm êm ni. Mikhual hnawnna khua leh chhungkua reng reng an changkang mawh an ti ṭhin. Nakinah ka lo awm lohsan hunah che u pawh in hrereng dawn nia, Eng ang mi pawh nise, mikhual hnar ngai loh tur. In neih ang ang in hluiin a hrehawm emaw a nuam emaw in riahtir ve mai tur a ni. Mikhual neih hi pi pute chuan malsawmna an ti ṭhin. " Tiin. 

Ka ni Luaii te erawh kha chu an pa chhungte Aizawlah an awm ve reng bakah, a damlo ber pawh an pa chhungte an nia. Chuta karah ka û laka a ṭawng duh dan avang khan ka hnar ta kha a nia. Ka inchhir lem lo. Chuvang chuan Lsa leh U Mawii te chuan kan in te taktê chu hrehawm an tih ka hlau ru ve em êm a ni. 

Lsa pawh a inbual zo va, Kimtea a rawn bang ta bawk. Thingpui ka lum laiin Sangbera pawh a rawn thleng ve chiah. Eitur eng emaw a rawn keng nual a, U Mawii te nen chuan ka han inhmelhriattir ve a, Sangbera bulah meuh chuan an zum riauin ka hria. A palianin a zahawm ve khup bawk nen, ka dem hran lo. Lsa pawh a be ve bawrh bawrh a, Lsa zawk chu a tîm zawkah a ṭang. Rempuii thawh harh peih loh a han hriatte chuan, "Khai aw! Ti nge min rawn call loh, thingpui in zo ila, han chho ang u. " A ti leh hmiah. 

Rempuii pawh chu a chauh tak êm avangin a nuin damdawi in kal vel a han sawi pawh chuan a um e liam ta mai mai a. Ka rin aiin a serious daih mai. Thingpui kan in sawk sawk a, Rempuii chuan in pawh a in ve peih lo. Tichuan, kan insiam sawk sawk a, Lsa erawh, "Kimtea te in lo nghahpui rawh" ka tih tlat avangin a lo kal ve dawn lo. Sangbera'n zo tak maia a han paw hnûp mai ka hmuh chuan ka lung a chhe lek lek thei mawle, hetitaka a mihringpui te laka ṭha hi chuan malsawmna dawng tlak pawh a lo ni chiang a nih hi. Damdawi in kan thlen chuan amah bawkin engkim a tiin biak ngai a be leh vek a, keini kan leh-âwl der mai. An lo admit ta ngei a, Thisen an pe nghal char char. U Mawii a chiâi chi leh thlaphang hma chi a lo ni bawk nen, kei chu ka intichhel zawk viau. An mamawh tur ang kha kan lakim lo nen, Sangbera nen kan lêt leh a, an mamawh kan zuk la sawk sawk. Zanin chu U Mawii leh Nubawihi ten an riahpui rih phawt ang. Kimtea ngaihtuah ve tho a ngaih bakah Lsa ka la mikhual ve sia, a in neitu ber riahbo daih kha a tihchi bik loh a ni. Tlai dar 4 velah U Mawii te chu kan hawnsan ta phawt a, Sangbera'n kan chhuah dawn khan ka hmuh hlau zetin pawisa a pe..engzat nge ka hre lo thung. An belh ve ber kei lah ka rethei si. Mi retheite vanduaina hi chu a va nasa bîk tak êm. Kan in lam kan pan dun leh ta a. 

"Ka lawm e aw" ka ti sap a. Ka rilru tak tak ka sawi. 

"Ka hria alawm" a ti ve mai a. "I awm lo vang tih a hlauhawm thei e" ka ti leh a. Hmalam bih ngur chungin, "Lsa a awm kha" a ti nghut a. A nui duh der si lo. 

"I chhe mai nih chu a" ka ti hlak a. Ka tum nghal bâr bawk. 

"Cute thei bawk sia" a rawn ti leh a, ka nui duh chuang lo. In thlen hma deuhin, "Chaw ka lo ei dawn" a ti leh thut. 

"A mak e aw" ka lo ti nghat. 

"Chu! Min huphurh tihna em ni? " A ti nghut. "Ka huphurh che ka tia mi?" Ka ti ve leh lawi a. A nui huk. 

"Zanah pawh ka riak ang" a tih leh phei chuan, "Malsawmdawng" ka ti nghek. A hmingpuma ko ngam tur leh ko pha tur pawh ka nih loh laiin ka insûm hman lo a ni ber. 

"Insûm insûm,. Mahse, rei deuh ka lêng ang." A ti a. Ka thaw hawk ringawt. A chimawm sâwt riau mai. Motor a hun ṭhat laiin Terini leh a ṭhiannu te hi inchei zetin an rawn chhuak a, tunhnaiah U Rini hi ka hmu ngai miah lo, a zin em mawni dawn le. 

Terini te pahnih chuan min rawn en nghal chat. Ka zâm duh bik lo, ka bulah Sangbera a ding tlat. A ṭhiannu mit dur huam mai lah chuan Sangbera chu a melh nget nget mai a, a engah mah hmain ka mil lo ve nghal ringawt. Kan zawn an lo thlen chuan, "Mikhual i neih kha,. Lensan suh che.." Terini'n a ti leh ngei e. 

"Ka leng bawk lo ve a" ka ti ve hmak. 

A ner sak. Ka kal chak sauh a, a tawng leh hmain ka kalpel thei. Sangbera erawh chuan engmah a sawi lo. Pawna nu Zuali lo awm chuan min lo en duh viau, . "I mikhualte chu eng nge an ân? Tlawh pawh ka rawn tlawh hman rih si lo che u a" a ti ve luam a. 

"Hei tun mai khan kan va in admit a. A chau ve deuh bawk nen" ka ti a. "Ehe! A va zia lo ve, naktuk lamah rawn kan ve tur a nih chu, Lsa chu a la awm em ni?" A ti hluai a. 

"Aw..naktukah ani pawh insuan chhuah a tumin ka hria" ka ti ve mai a. Kan chhuksan nghal. U Rini reh viau chhan ka lo zawt lo va aw. Kan zu thlen chuan Kimtea'n rawng a lo bawl a, Lsa chu ṭhutthlengah a lo muhil bawrh bawrh. A lainatawm mang e. Kan dinhmun anga ding ve a nihna laiah en hran harsa ka ti. 

Kimtea ka pui ve nghal zat a, "Chaw chu i ei dawn tak tak em? Ka chhum dawn asin" Sangbera melh chungin ka ti a. 

"Ka ti mai mai a nih kha..ka phei a hun dawn..ṭhianpa Alexa thincham a nia, chaw kan ei dawn a" a sana bih chungin a ti a. Call a dawng nghal zat. "Aw " a ti liam puat a. 

"Hei, ka rawn phei dawn hnai e. In kim tawh maw?" A ti nghal mawlh mawlh. Keipawh chuan chaw ka chhuangkai a, a phone hman zawhah, "May, ka phei ang. Min lo nghak hlawm tawh sia. Zanah lo kal ka tum ang" a ti a. 

Zawh châk ka nei a, ka zawt ngam teuh si lo. Ka bu nghat ringawt. Kimtea a awm ve avangin romantic taka inthlah a rem lo, a chhuak zui ta nghal a. Kimtea'n, "Ate, in inngaizawng tiraw?" A ti ta phawng mai le..min lo chîk ve viau a ni ngei ang. 

"Ngaizawng lo" ka ti ringawt. "Ka awih lo, in awmdan hi inngaizawng in ang, a ngaihsak bawk che sia" a ti ve nuah nuah a. 

Ka zah deuh vangin, "A fel vang mai mai alawm, nang pawh Angaihi i tih ziah hi i bialnu a ni chiang" ka ti ve a. 

" ..amah lo zawk asin" a ti zauh. "Ehe! I va'n lerh reuh" ka tih chuan, "Lerh vang a ni lo. Min lo star ve a..chutiangin kan inngaizawng lo" a ti a. Kan inpawh ve bawk nen, a zak êm êm bik lovin ka hria. A ṭhangduangin a hmel lah hi a chhe bik lo ve bawk a, startu a mual mualte chu a nei ve bawk ang. Ka inbual zawh hnu chuan Lsa pawh a rawn harh ve a, chaw kan ei zui nghal. U Mawii te chu a ngaihtuah ve hle mai. Kan eikham kan intifel hnuah Kimtea chu lehkha zir turin a pindanah a lut a. Lsa nen chauh chuan kan ṭhu ran a. Sawi tur a vâng leh ta raih mai. Mipa zawk na nâ na chuan, "May, hman zan kha ka tihpalh tak tak aw. Ka ruih vang a nia" a ti ta a. 

"Umm, ka hria alawm, a ho lutuk. Mahse, zu hi chu in tawh lo la a ṭha e. I dinhmun i hria a" ka ti ve ngial a. 

"In tawh dawn lo, rilru neih deuh hlek a ngai. In te pawh min la rawn hmuhpui ve ang chu, chawte in la rawn ei ve ang a" a ti a. 

"Tehreng mai. Ka rawn buaipui hman loh hmel che sia, U Mawii te heti hi an ni leh bawk nen, engin nge ka indan ang che aw" ka ti ve luam a. 

"A ngai lo khatiang. In inah min riahtir a, a lawmawm tawk tawh. In ṭhatna hi ka hrereng ang" a ti a. 

"Unau kan ni mai tihian, nupui i neih hunah pawh ka intithu viau ang" ka ti a, ka nui bawk. Hetiang zawnga ka sawi loh chuan min beiseizui ka hlau, tihnat ka duh lo a ni. A sual si lo va. 

"Nupui lam chu ka hmanhmawh lo. Ih..may, i duhzawng ka ni lo mi?" A ti ta a. Ka chil ka lem khawlh, "Chutiang sawi suh. Ṭhian kan nih kha" ka ti sap. 

"Ka duhzawng tak i nia, kan dinhmun pawh a inangin ka hria. Mil pawh kan inmil ka ring. Min duh ve la chuan innei daih ila, Kimtea pawh kan bulah a awm ang a. Chhungkaw nuam deuh kan din thei maithei asin. " A ti ta duah a. Mipa zaktheilo leh ṭawng phawr phawr a ni lo bawk a, ka ngeiin ka ngainat loh phah lo. Mahse, ngaihzawn erawh ka thei si lo. 

"Aa.. Ls, tunah rih chuan mipa ngaihsak thei ka la ni lo alawm" ka ti leh ringawt a. 

"Amah pawh kha i ngaihsak hle tho sia" min melh kar chung chuan a ti a. 

"Ani te chu ka boss a nia.." ka ti vat. 

"Mahse, a bula i awm khan i mitmeng leh i chezia a danglam ziah" a ti nghut a, "A awihawm loh ê" ka ti hliai. Min va'n lo chîk awm ve aw ka ti. 

"Ka hrethiam ve alawm, nia, ani te kha chu keini ang tan el phak chi a ni lo. Engpawhnise, i lakah rilru chhia ka pu lo va, i nau nen hian hlim deuhin awm u la ka duh ber. " A ti ve leh lawi a. Mipa sual tak zawng a ni mawlh lo mawle. "Ka lawm e, nang pawh lo hlim reng rawh. Zu in tawh lo la" ka ti leh hram a. 

Thingpui hâng kan in zawh hnuah chuan, "Naktuk hnain min hmuak sia, May, pawi i tih loh chuan mut mai ka duh..I boss kha a lo kal leh dawn em?" Tiin a ham bâi bâi a. Sana ka en vat, dar 10 rik nan 10 mins a la awm. Min la rawn be lo va, a rawn kal dawn lo a nih hmel. "Dawn lo ang, a tlai tawh ê. Nia, mu rawh, keipawh mut ka duh" ka ti a. A mutna tur kan phah nghal sawk sawk. A mut hnuah keipawh ka pindanah ka lut zui nghal, kawngka pawh ka kalh nghal bawk. Mahse, ka mut a chhuak hlawl lo. 

Keimah ang lo tak leh ka duh loh dan deuhin Sangbera chauh ka ngaihtuah ta ngut ngut mai. A online si lo, a call ka dawng bawk si lo. Alexa thihcham an hmang a, Alexa bialnu chu Remruati a ni tih te thlengin ka hre ve tawh si, Remruati pawh a kal ve ngei awm sia, chu chuan ka thaw a tipik ka ti dawn nge ka awm a tinuam hlawl lo. Kan in aṭanga a chhuah hmaa lo betu pawh kha Remruati a nih loh reng ka ring lo. Rang zetin IG-ah ka lut a. 

Remruati thlalak post tharlam ber ka va check ta nghal. Hmn, ka rindan chiah. In chung zâwlah Sangbera nena an ding dun lai, Sangbera pawh hlim taka a nui lai ngei mai a dah a, Captionah, "Ka tana awm reng ṭhin.." tih a hmang bawk. Ka lungphu a rawn rang a, ka sawi thiam lo, ka nâ tih dawnin a ni chiah si lo. Sangbera ngeinain ka khat a ni ber. Nuam an ti dun viau a nih dawn hi..an ṭhianpa thihcham chu. 

Ka awmdan leh ngaihtuahna chu duh loin ka ṭhu ta hlawl a. "Ka tih rêng kha, infiamna hmanrua mai chauh i ni. I lo nem dawk dâwk a. Nang ang mi mawl leh changkang lo lutukte chu a duh tak tak che i ring reng reng em ni? Mawli, i mawl. Zoremmawi.. " ka rilru chuan a ti mawlh mawlh. Ka chhing vang vang a, ka mu leh ta phawt. Ka phone pawh ka switch off ta hmak. Ni e, mi nêp tak ka lo ni. Sangbera avangin ka na mêk anih hi. Ka zak bawk si, ka lo ngaizawng ve reng tawh a, sawichhuak ngam si loin ka thinlungah ka lo dah lian em em tawh a lo nia! Chu thil chuan min vaw na leh mêk chu a nih si hi maw.  

Ka tal ka tal a, ka intâl muhil ve ta nge ni,. Ka harh chuan dar 7 a lo ri lek lek tawh. Ka tho vat a, Kimtea a lo che rak rak mai. Ka pui ta vat a. Lsa pawh kan thawmah rawn harhin a rawn tho ve nghal zat. Kimtea'n School a kal tawh dawn sia, chaw ei hma a ngai dawn. Kei hi ka awmdan tur ka hrethiam ta hauh lo, Sangbera inah ka kal dawn nge, U Mawii te bulah tihah ka buai. Amah lah ka be duh si lo. Ka phone pawh ka la on lo tak, ka va on leh hnuhnawh a. Msg a rawn lut zut zut mai. Chaw ei laiin Sangbera chuan min rawn call ta chiah a. Vawi 2 ka ring ral tir hnuah ka pickup ve chauh, hrem ve hlak kha ka duh tlat. Ka pu mahnise..

"I va la har ve, i la mu mi?" A rawn ti a, a aw chu a zangkhai viau.

"Mu lo, chaw ka ei" ka ti hmuk a. 

"E..aw..vawiinah damdawi inah nge hetah i rawn kal dawn." A rawn ti ta a. "Ka hre nang, i sawi si lo va" ka ti leh hmak. Ka boss ka biak dan chu a chaltlai angreng hle, ka duh hun huna a hna va thawhsak tura a rawih pawh ka ni tawp si lo, mahse, ka lungawi lo ve êm a ni. 

"I û te chu han hmu zuai la, an dinhmun azirin rawn kal la,." A ti dam leh thlup. Ka lungawi lo tih a hre lo em mawni le. 

"Aw le" ka ti nghat a. 

"Chaw eikham phawt la, i thinrimna kha chu kan la sawi dun dawn nia, chaw eitui " a rawn ti a, a dah nghal. Ka lungawi lo tih chu a hre ta chiang. 

Kimtea kal hnu lawkah Lsa pawh chu a insiam ve a, "U Mawii te pawh zan lamah ka hman hram chuan tlawh ka lo tum dawn nia. Chuan, May, ka lawm e aw. " Tiin min rawn kuah a, ka lo ding tlawn reng ringawt. Ka bianga rawn fawh a tum chu ka lo indang a, "Ti miah suh" ka ti tuar. Ani pawh a hrilhhai letling. 

"Ka..ka tihpalh" a ti nawk nawk a. Ka ngawi ran mai. "Sorry lutuk..a nih ka kal e aw. Kan inbe dawn nia.." tiin a chhuak a. Ka chhang lo. Mak ka intih luat vangin. Sangbera min dehna leh fawhna te ka ngaihtuah let a, Lsa'n min kuah khan lo namkian ka duh a, mahse, ka insûm kha a nia. Ka bianga rawn fawh a tum leh phei kha chuan hlauhna bakah huatna a rawn awm chawpchilh nghal tlat nia mawle..Chu thil chu Sangbera'n min fawh khan a awm ve lo nge,. Thinrim tak kha chuan ka nam kiang a, ka chala a fawhna erawh a dam thlap khan ka hre thung si. Hei vang hi em ni kan Sangbera hi a inrintawk em em le..a sawi dik, ka tan chuan mipa dang ang a ni ve tlat lo. Ni e, Amah chu Sangbera a ni tlat!