Sangbera 1

SANGBERA..(1)

Ziaktu : Toni Râlte

Thlanlung lian lo tak hmaa ding chung chuan ka hriat phak tawk lekin ka phun sêp sep a. "Nu, ka rawn tlawh har leh tawh maithei che a ni. Mahse, ka theihnghilh ngai lovang che. Min hrethiam rawh aw" tiin. Ka biang a rawn lum puat, ka mittui chu ka nu tan a luang leh ta. Ni e, ka ngai a ni, ka nu hi la dam nise ka khawvel hi a danglam ve deuh tur..nu nei tawh lo in awm ve em? "Nu" tih ruala "Eih" lo tithei zeltu an awm ringawt pawh hi a hlutzia in hrethiamin ka va ring êm. Chanchin ropui sawi tur ka neih loh laia ka sawi ve a ngai si hi ka inthlahrung mang e.

 Unau zinga hmeichhe awmchhun ka ni. Û mipa pakhat leh nau mipa pakhat ka nei. Ka pa chu Lianngura a ni a, Sailo hnam an ni nghe nghe. Mizoram hmar lama khaw pakhatah ka piangin ka seilian ve a. Ka pa hi Forest department-ah a thawk ve a, a hlawh a tam falua lo naa, kan khawsa ve thei naw naw. Ka nu erawh zo nu ve tak, taima em em mai a ni thung. Ka nu hi Sangpari a ni a, Nu Parte tih hi an kohdan ber a ni. Ka û nen hian kum chhira piang kan nih avangin kan tetlai chuan ka nu a hah thei hle. Ka û hi Lalnunsanga a ni a, ka nau erawh Ṭhakima a ni thung. Kei hi ka pa pa ka pu tar tawh tak maiin Zoremmawii tiin ka hming a sa a, May thlaa piang ka nih vang nge kan ṭhenawm nula khawpuia awm ṭhin hian 'May' tia min koh a ching a, tichuan, ka lai-ah hming ni hran lovin mi min kohna ber chu May tih a ni chho ta a ni.Tin, ka û pawh hi Lalnunsanga ni siin Puipui tiin an ko ṭhin a, Puia ti an awm bawk. Ka pa te hi unau 6 an ni a, pahnih chu am boral tawh. Ka pa hi an naupangber a ni a, a piang tlai deuh hlek bawk. Ka pa unau dangte chu an pawimawh hunah sawi kai ta mai ila, kum 4 ka nihin ka pa chu kan khaw ṭhenawm maia an sawn avangin kan pem a, kan in pui chu ka pa û chiah ka nî te chhungkuain an luah zui ta a ni. Sawi tawh angin hausa lê lû lo mah ila; ka pa hlawh bakah a side tlemtê avang te'n kan khawsak chu a vantlang ti mai ang, Thingtlangah chuan khawsak a lo awlsam bakah rualawh te a na em em lo bawk a, a zia phian mai. Ka nu chuan kumtin leipui a nei ṭhin, thlai hnah leh rah engilo te chu khawchhungah zuarin chung chuan kan khawsak a tihziaawm phah hle. Kan awmna khuaah chuan School kal vein ka û ka zui ve hnak hnak ṭhin. Lehkhathiam tia sawi theih ni lo mah ila, a rualpawl tawk ka ni ve thei zel mai. Kum 7 ka nihin ka nau tur ka nuin a pai leh ta chauh a, ka lawm viau. Unau tlemtê nih hi chu a hrehawm ṭhin, laizawn neih ve te hi ka chak ṭhin viau. A tawi zawngin ka nau pawh hrisel takin a rawn piang a, ka nu chu a hriselna lam dinhmun a that vak loh avangin doctor ten an insiamtir ta a. Unau pathum chiah kan ni ta. Ka nau pian hnu aṭang chuan ka nu chuan insawiselna a nei ta zauh zauh rêng a. Mahse, a chhel hrim a, inentir te kha a hreh ṭhin. Leipui neih pawh a la ṭhulh duh chuang lo. Ka pa lah chuan tlai khawhnuah zu in a ching thar a, kan chhungkaw boruak a danglam chak viau mai. Ka pa zu rui lah chu a bawraw zawngin a la khawsa zui a! Ka nu chunga a ṭuan chang hi a tam zawk a niawm e. Zan khat pawh a rawn rui haw leh a, ka nu kha a khawsik sang tak avangin a mu hlûn mai a, ka pa chuan pawr zetin chaw ei siamsak turin a ti a, ka nu lah a tlun hluah hluah si, ka û nen kan mangang chuan ka pa chu thiam leh thiam lovin chaw ei kan siamsak a, kum 10 ka nih lai a ni. Ka nu khan min âwl hneh êm a, in chhungkhur thil ang hi kan ti vak lo, kan hunâwlah lehkha kan zir zel bawk nen. Ka pa chuan thleng leh chaw te chu a paih darh ta chum chum mai a, kan hlau si. Ka nu chu khur zawih zawih chungin a rawn tho a,phun miah loin ka pa bungraw paih darh te chu a chhar nghal mawlh mawlh. Chutia a chhar lai chuan ka pa chuan a chhipsamah ṭhâmin chhuatah a hnukkual ta a. 

"Nang thingtlangnu, ka thawhpuite hmuhah pawh ka nupui tih zahthlak khawpa hmelchhia leh mawl i nih hi, damlo reng bawk si, ka hne tawh che. " A ti khur khur mai. Kil khatah ka lo ding khur zawih zawih mai a, ka û insum zo ta lo chuan ka pa chu a va pawm bet a, ṭap chungin, "Pa, ti tawh suh" a ti ṭâwk ṭâwk, ani zu rui khaw hmu tawh lo chuan ka û chu a nam leng dâwrh a, bang thlang lam a zu deng dawt nghe nghe. Ka nu chu rang taka thovin ka û chu a zuk bawihsawm nghal a, ka pa lah chuan a dinchilh nghal zel si. Ka mangan tak êm avangin kan ṭhenawmpa Pa Saia ka pûn ta tawp a, an khapdai thei hram. Ka nu kha a va rethei e aw. Ka nu hi a nu leh pa an boral tawh a, a laizawn pahnihte lah khawchhak lamah an awm daih a, a nuṭa neihchhun ka pu lah Tlabungah an inbengbel bawk si, chhungkhat hnai leh han tlan tauhna tur takngial pawh a neih loh vang ni maw ka pa hian a zuam em em mai a ni. Ka pa hi pa lian tak, hmel pawh chhe lo, sar vung mai a ni a, ka nu lah nu tê taktê, zo nu ve hnik hnek, hna a thawh nasat luat vanga a kum aia lang upa a lo ni bawk nen, ka pa chuan a iai ṭan a ni maithei. Ka nu min hrilh ṭhin, ka pain ka nu neih loh a hlauh luat vanga ka nu pa ka pute khawngaih a dil thu te ngaihtuah chuan hetianga ka nu a thlauhthla ṭan hi thilmak tak a niawm e. Mihring rilru hi zawng a danglam a danglam ṭhin si a. 

Ka nu chu ka pa tan bâng lovin a ṭawngṭai ṭhin, ṭap zawih zawiha a ṭawngṭai hi ka hmu ru zing khawp mai. Ka pa a ân tûn tûn lai pawn nu zawk hi a ngawi kar a, ṭawngkam vin leh chhiain ka pa a be ngai lo. A nawmsam loh rei tak deuh avangin Aizawlah inentir turin a han kal ve a, kan te ber a hruai bawk. Keini unauin thiam leh thiam lovin rawng kan lo bawl ve a, ka nu zin chhung zawng ka pa chu a rawn haw lo. Kan khaw sipêr ti mai ang, kan khua aṭanga hnaitêah hian nuthlawi hmelfai ving veng, mi chhawnchhaih thiam tak, thingpui dawr nei a awm a, chu nu inah chuan a va chengkual a ni ber e. An inngaizawng tia sawi dawt awm lo mah se; mi nawlpui rindan a ni tho tho. Ka nu pawh damdawi ei tur nen a rawn haw ve a, a damdawi ei a ngeih ve deuh nge, kum khat vel chhung kha chu insawiselna a nei ta meuh lo. Ka nu a damṭhat chuan ka pa zurui tawrh pawh a zia zia a awm ve,. An nupa nun eraeh chuan a hma a pha thei tawh lo. Christmas pawh ka pa chuan a bialnu bulah a hmang daih a ni. Ka nu hovin kan ṭhiante nen ar kan kang ve a, naupanga thuchâng ka nu rilru ṭawmpui pha ta lo chu kan hlim ve phian tho. 

A tawi zawngin sawi mai ang. Ka nu chu a rethei chhunzawm zel a, ka pa nen la innupa mah se; ka nu chu ka pa chhiahhlawh ang mai a ni zawk awm e. A rilru damlo leh khawhar khan a taksa lam pawh a nghawng lo thei lo va, a natna ngai bawk kha a rawn chhuak leh ta. Kum 4 zet ka pa tihduhdahna leh hmuhsitna bakah a natna hriatchhuah theih loh kha a tawrh hnuah tihdam rual tawh loh natna chimawm ber mai Pumpui cancer a vei tih hmuhchhuah a ni ta a. Chutihlai chuan kei chuan kum 14-na ka hmang ve mêk a ni. Pawl 9 ka zir ve mêk bawk. Thil nihphung hrethiam rual kan ni tawh bawk a, thinlung chu a na vawng vawng mai. Khang kum 4 chhung khan ka pa hian vawitam a hnawtchhuak a, a bialnu rawn hruailuh changte pawh a nei. Mahse, kalna leh han tlan tauhna tur ka nu chuan a nei si lo, "Pathianin a siamṭha em em ang" tih changchawiin beiseinain ka pa insiamthat hun chu a nghak hram hram ṭhin. Vawi hnih erawh kan khuaa amah lainat em emtu Pu Tlansanga te inah a tlan lut ve, ka pa zuruiin sahhlum a tum vangin. Chupawh zan khat bak a riak lo, "A nupui angin min en tawh lo mah se; ka damrei a rinawm tawh loh a, ka fate tan ka damchhung reilotê chu hman ka duh" a ti tawp mai a ni. Ka pa leh a bialnu te chaw ei a siamsak changte, ka nau a kaih vak ṭuma ka pa a awm si lo mangangin a bialnu te ina a riak a zuk kaitho ngawt te..a va tam êm. Ka nu kha robot ang mai a ni, na thei tawh lo khawpa beidawngin ka pa khan a siam ka ti mai, a thinlung a sak tawh a, a fate tan khan a nun a pe pumhlum ṭhak tawp a ni. Ka nu ka khawngaih vanga a hriat hlau sia ka ṭah rûk kha a va tam tehlul êm. A cancer leh lek phei kha chu engkimah ka pa kha ka puh tawp mai a ni. Zu hi ka haw ngawih ngawih bawk. Ka pa hlawh hi ka nuin a dawn lohna a rei tawh a, a beisei tawh lo law law bawk. A chuktuah huan aṭanga a sum hmuh tlem tê tê chu inhnangfak nan kan hmang ve a ni ber. Sawrkar Schoola kal kan ni bawk a, sum hmanna tur a tlem hlauh zawk. Cancer a ni tih a inhriat hnuah pawh mi chhel ka nu chu a hnual phah pawn ka hre lo, a inhriat hma ang tho khan a awm char char. A nuṭa ka pu hian pawisa a rawn thawn ve zauh zauh a, ani lah a hlawh a tam bik si lo. 

Kan han mu a, kan unau bulah, "Kei chuan in puitlin hun ka hmu hman lo maithei, in lo puitlin hunah chuan in unau hi in lo inhmangaihin engkimah in inpuitawn zel tur a ni. Kimtea hi a la naupang deuh a, nangni a û te hian inthlahthlam tur a ni lo. I pa pawh inṭawngṭaipui fo tur a ni. Sual chu sual veka thungrulh tur a ni ngai lo ve. " Tiin min hrilh malh malh zel. Ka nu thih hun tur ka ngaihtuah chang chuan awmngaihna ka hre ngai lo, ka â vek zel. Ṭhenawm nu ho phei chuan ka nu hi an ngei letling tawh, a dawhthei lutuk leh a tlawm lutuk chu..A fate avanga tawrh ral ṭhak a tum tih an hriat loh vang a ni. Ka pa kha ani pawn a pasal ang pawn a en tawh bik lo. Inah a awm tam lo bawk a, hmeithai nen kan danglamna a awm vak lo. 

Ka nu chu a ni têlin a hniam tial tial a, a cher telh telh bawk. A tawpah phei chuan in chhung dung takngial pawh a vei thei ta lo, khumah a mu chawrh chawrh a, a nâ a chhuah changin nachhawknain kan jection leh tawp a. Engtikah nge min peih lohsan ang tih ngaihtuah reng renga hun hman kha ka damchhunga hun thim ber lai a niâwm e. Kan ṭhenawmte an felin an ṭha êm a, ka pa hlawh tel lo pawn chaw êm chu kan nghei lo. Ka pa Tlana ngaihdan ni tawh lo leh thinrim tawh lutuk chuan vawikhat chu ka pa a zilh ta hrep mai a. Pa Tlana hi kan khaw VCP a ni bawk a, mi zahkai, mi zahawm chhungkua an ni bawk a, ka pa pawn a chhang ngam teuh lo. A zilhna thu ka la hriatreng pakhat chu, "Ngura, a ni êm êm lo ve. I nupui, i fate nu a ni a. Hetiang khawpa dinhmun chhe ber a thlen tawh hnu pawha khawngaihna leh lainatna chhetê tal pawh lantir thei lo mihring hi mihring tak tak i nih pawh ka ring ta lo hial mai. Hei hi hrereng ang che, beidawng tawpkhawk leh thinlung nâ tawpkhawka kan mihringpui te siamti hian kan damlai la lain thungrulhna kan hmachhawn ṭhin, hetiang reng chuan i hun lo la awm zel tur hi i hmang hauh lovang, i lo thlir reng dawn nia" a tih kha..chumi tidiktu ka nih theih nana ka ṭawngṭai nasatzia kha. Ni e, tleirâwl rilru len laia ka pa huatna ka thinlunga tuh a ni kha a ṭha lo nge a ṭha ka hre lo, ka hneh thei lo, a dik..ka pa kha ka mihringpui zinga ka huat ber a ni. 

Ka pa pawh chuan ṭhat a chhuah ve ta deuh a, inah pawh a tal tam ta deuh. Mahse, rilruah a tla na thei tak tak tawh lo. Ka pa heti taka a danglam ta hi an thlahtute chhui chuan thilmak a ni vak lo. Ka pa pa ka pu pawh nupui pahnih nei a ni a, a nupui hmasa kha kawngka sûlah a lo ma ve tawh tho. Tin, ka pa te unau zinga upa ber hian a ṭhianpa nupui a uiresak a, an innei zui bawk. Ka nî pakhat zawk pawn mi nu a luahlan! Chutiang chhungkua chu an nia, rapthlak ka ti khawp mai. Ka pa kan chhun ang tihte reu reu hi a nia ka hlauh ni. Ka pain ṭhat a chhuah ve aṭanga thla 2-naah ka nu chuan a chatuan ram min pansan ta nge nge a. Zan 3 lai kan tlaivarpui tawh a ni. Ka nu kha ka sûn lawk vek tawh a, a thih pawh khan ka ṭap nasa lutuk lo zawk. Rohlu leh sum leh pai min hnutchhiah tur nei lo mah se; thil ropui tak erawh min hnutchhiah thung. Chu chu, "Ka nu ang hian fa ka neih ve hunah chuan ka damchhungin ka hmangaih ang" tih hi. Hei hian a funkim viauin ka hria. Keini unau chuan kan fate kan thlahthlamin kan phatsan ve ngaiin ka ring lo. Kimtea a la nau deuh si, a ṭap nasa mai a, amah vang khan ka na thar leh ṭhin. Ka û erawh mipa a ni bawk a, a chhel khawp mai. Nu kan nei ta lo chu a nia, mahse, tun hnu hian ka nu a lo thi hma kha ka lawmpui letling ṭhin. A tawrh tawk natna zozai kha a nasa lutuk a, a tan khawvel kha hremhmun ang mai a nih avangin vanrama Isua ke bula a awm tawh tur hi ka lawmpui a ni. Mahse, mihring ka la nih avangin ka nu hi ka ngai a, ka ngai zo thei pawhin ka ring lo. 

Ka nu thih aṭangin thla hnih a pum ve chiah ang tihah ka pa chuan a bialnu a rawn hruai lut ta a. Kan rindan sa a nia, mak kan ti lem lo. Kan nu thar chu a zaktheilo bawk a, a rawn tlangnel nghal viau. A fanu a rawn chhawm tel ta bawk a, Kimtea aiin kum 1-in a upa. Hmai sin zet, hang rin ren, hmel ngeiawm zet mai a ni lehnghal a, zep nâk emaw rilru that a harsat lai a ni bawk nen, ka ngei ru thei tawp. Ka pa nupui chu ka mawl biak mai zel, 'ka nu' tia koh phûin ka hre lo. Mi pawmlai ,nupui nei lai a ni tih hrereng chunga ka pa nêp thei lotu hmeichhia hi ka nu thihna chhan zingah a tel ve avangin ka damchhunga ka pawh theih ka ring lo. Ka pa pawn kan unau rilru a hrethiam a, min nawrlui ngai lo. A ze ngai a la chhuah tho va, mahse, ka nu damlai nen a danglamna chu ka nuhrawn leh ka pa chuan zu an rui dun ṭhin. Ka pa hlawh a rawn pung ve ta bawk a, zirna lamah chuan ui a nei bik lo bawk nen, ka inzir ve zel ang a, hna eng emaw thawh theih a awm veleh ka unaute nen kan in dang ve ang tih hi ka rilrua lian ber a ni tawp mai. Ka u chuan pawl 10 a fail a, a bang zui nghal. Ka nu avang khan zirna lamah a rilru pek a harsat chhoh bakah mipa a nihna laiah hmeichhia anga han inbunruak chi ni hek lo, mahnia awm tamah a tlak a, chu chuan thlemna rawn hringin a tih duh ngai reng reng loh Ganja zuk a ching chho ta a ni. A fapain ganja a han zuk ve takah chuan ka pa chu thinrim namên lovin a thinrim lawi a! Ka û chu kut a thlak hial nghe nghe. Amah pawh ruihhloa fihlim tawp si lo, keizawng ka pa hi ka ten zo vek tawh. Rilru dik put ve tum paw'n ka nu ka hrechhuak zel a, ka nu avangin ka pa chu ka pa angin ka en leh thei thin lo. Hun a kal ve zel a, kan nuhrawn chu a thatchhe hle a, zu a duh ve hle tih lohah kan unau tihduhdahna lam ang kha a lantir lem lo va, a zia ti mai teh ang. Tleirâwltê ni chungin kan in chhung chu ka kutah a awm a ni deuh ber. Zing takah ka tho va, eirawngbawl pahin in leh a vel ka tifai vek a, School bana in ṭawp taka hawn chu a hrehawm ka tih êm vang a ni. Ka pa office hlan hian ka nuhrawn chu inah a awm ngai bik lo, khawiah nge a len zawhzai pawh ka hre ve lo e a. A awm leh awm loh a danglam chuang lo bawk a, pawi ka ti vak lo. School ban veleh rawng ka bawl nghal a, ka nau ka bualfai leh a, zanah bak lehkha ka zir ve hman ngai lo. Chuvangin Kohhranah pawh duh angin ka inlan tam thei ta lo va, ka hlu lo telh telh rêng bawk. 

Pawl 10 chu 1st div. -ah ka pass ve hlauh mai a, ka pa pawh chumiṭum chuan a lawm ve viau. Ka û a lawm ber awm e. Ani zawng Thingtlang kan ni bawk a, a ṭhian zirna bansan tawhte nena lui kal, inhlawhfâk tih vel a hna a ni tawh mai a, a thawhchhuah ang ang hi ka kutah a hlan a, ka lo dahṭha ve zel ṭhin. Ka pa pawn a beisei bik lo a nih hmel. Kan khuaah Pawl 10 chunglam zirna a awm si lo va, khaw ṭhenawmah ka kal a ngai dawn ta. Aizawl te kha ka han mitthla ve ngial naa, ka pain ṭul a ti lo nge, a nupui zawkin. Khaw ṭhenawma kan chhungkhat hla tawh takte in aṭanga zirna chhunzawm tur chuan min beisei ta chu a nia. Ka zir zel theihna a nih dawn phawt chuan pawi ka ti lem lo. Hrehawm te chu ka tawrh ṭhan ania lawm le. Tichuan, chhungkaw chhangchhe angreng leh berh ve tak te inah chuan ka awm ta ran a. In lam ka ngaihtuahna chauh lo chuan min tibuai lutuk lo. Kimtea ka ngaihtuah a ni, ka û chu mipa a nihnaah naupang enkawl lamah chuan a rintlak vak dawn si lo va, ka pa lahin chhetê mahin a ngaihtuah si lo, ka nuhrawn lahin ama fanu ngei pawh a awm awmin a awmtir kha a nia. Ka û ka chah ngun ber pawh a ni. Kimtea pawn ka kal tur kha ṭap chungin min ngen reng bawk a, rilru a kal thui duh ngawt mai. Ka pa chhungte lam lahin keini an tu leh fate chu engah tehvak min ngai lo nge khual aṭang takngial pawn min rawn ngaihven tehchiam si lo. Upat vat vata mahni kea dintheih ka chak ber tawh. Ka awmna te chu sawi tawh ang khan an chhangchhe khawp a, fa hmeichhia panga leh mipa pahnih an nei a, an la tê hlawm si. A upa ber pawn min rual pha lo. Mahse, Pathian hi a lo ṭha ngawt mai, ka awmna te chu Kohhran ngaihsak vak lo mah se; ka chungah an ṭhain an fel em em mai a. An pa ber hi ka pa nî fapa a ni. Lo neih hi an eizawnna a ni mai a, an nu hi kharchhawng a ni ve bawk. Kei ka awm tak hnuah in chhungkhur ka buaipui bawk a, ka kutah an dah ngam hmiah bawk nen, an tan ka lo hlu ve te pawh a niang e, min ngaiin an fa ang maiin min en ve a. An fate lahin min û hliah hliah bawk, ka rin aiin nuam ka ti ta daih. U Mawii (nu ber) phei chuan, "Kimtea pawh i rawn hruai ve mai lo ni, nuam a ti zawk awm sia" a ti fô mai. Mahse, zirna a laklawh ve tawh si a. 

Chutiang chuan taksa lamah hah deuh mah ila rilru lamah nâtna tawk lovin zirna chu ka chhunzawm ve ta zel a, Kimtea pawh kan khaw ho lo zinte ka aṭanga ka hriat danin ka û chuan a lo ngaihsak khawp mai a lo nia. Amah Kimtea pawh amaha intifai thiam rual a ni ve tawh bawk nen, ka rilru pawh a nuam ta huai huai mai. Kan class-ah ka thiam ber lehnghal a, thian pawh ka ngah ve ta hle. Pawl 12 ka zir kumah bialpa ka nei ve ta rup mai a! Englo a nia, amah hi ka awmna te ṭhenawm lawka awm, Aizawla han awm vang vang, eng emaw vanga rawn let leh a ni a. Ka zep lo, hmelṭha ka ti khawp a, a changkangin a fai thei bawk si. Ani lahin sunday chhun leh zanah min rawn rim âwl lo bawk a, zak chung chungin lehkhathemah ka duh leh duh loh min zawhna chhanna chu ka pe ve ta a nih kha. A hming pawh Samuela a ni nghe nghe. Kei hi pumruaah ka pa ka chhun a, ka dâwng ngoh mai reuh a, kan classah ka lian ber nghe nghe, ka vunah ka nu ka chhun thung a, ka ngoin kekawrbul hak te hi ka zak zawk thin. Ka hmaifang erawh a thlirtu mit a zir te pawh a niang a. Ka hmui hrula ka khuavang chhinchhiah awm hi ṭhiante chuan, "I zûn a nih kha, mipa mit latu ber" an ti ve ziah a. Tak tak nge phei zawng ka hre lo. Ka mitmeng a lian a, "May-i'n min melh kuau hi chuan kan zak lek lek thei" an ti ve fô. Kei pawn ka mitmeng lian hi chu zahawm tih ruk chang ka ngah ve mai. 

Samu nen chuan Thingtlang a ni bawk a, kan lar nghal hle. Mahse, a mawi lo zawngin kan khawsa lo bawk a, kan pawisa em em duh lo. Chance pawh kan nei ve ngai lo, kan inngaihzawn atanga kar khat hnuah a haw tur ka thlah ṭumin ka hmui a rawn fâwp zauh a, ka va zak tak. Mahse, ta ṭang khan kan infawp ve ta zauh zauh. U Kunga'n, "Ngaihzawng i neih pawn nei la, mahse, i zirna intihbuaitir suh" a ti a, ka zawm ṭha hle. Inrinni leh chawlhniah bak a rawn leng ngai lo. Ngaihzawng kan neih ve takah chuan ka puitling sawt ten ka inhre ve. 

Inrinni vawikhat chu Samua nen thingphur turin kan chhuak ve a, gas hi kan hmang ve tawh tho nain U Kunga te chuan vawk pali lai an vulh ve avangin vawkchaw chhum nan thing hi kan phur deuh reng ṭhin. Ka rin ai daihin kan kal hla a, hlauh nachang pawh ka hre lem lo. Thing thelh hmun nuam deuhah thing chu kan fawm ta a, Samua chu khawpuia awm ṭhang tih takah a zei tehchiam lo hle. Mahse, ka nu ka chhun a, ram lamah hian ka che thiam ve riau reuh a, kar lovah ka thingphurh tur chu ka fawm ngah ta mai. Ka han thawn ṭhât a, Samua chuan, "La ṭhu ve rih ang, a la hma tho" a tih tlat avangin ka rihkam tur ka puanhlap ken chu zawl laiah kan phah duai a, kan ṭhu dun ta a. Chutia fianrial taka kan han awmdun chu ka zâm ru hle. Ka lakah rilru chhia a put loh nan ka ṭawngṭai char char a ni ber e. Inngaizawng ve nafam chu a fawhte pawh kan infawp ve a, "May, pawl 12 pass la, innei mai ang hmiang" a ti a. 

Amah pawh en chuang lo hian, "Ka la duh lo, ka unaute an ngaihtuahawm" ka ti ve tlat. Ka tleirawl chhuah aṭanga ka duhthusam ka tihhlawhtlin hma loh chuan pasal neih ka tum lo bur. A ner suk a, ka kut chu lain a chul hauh hauh bawk. Chutia ka lungmuang ṭan tihah chuan ka inrin hmain Samuela chuan min bawhbet ta thut mai a, "Ka mutpui che ang a, ka ta i ni mai. Midangin an khalh chul hma che hian ka khawih dawn che" a ti riap mai. Ka rilru nu but a reh fel a, ka tha tâwpin ka ṭang ve, min hneh mai bik lo. Chaw ka heh a, ka lo ṭhang duh ve bawk nen, a duh ang ngawt chuan min chingzal thei lo. A thinrim chho ta a, a tirah kei pawh ka au ve, ṭanpuitu ka au a, mahse, kan kalna a pilril êm avangin tuman an hriat ka ring lo. Ka bek dinglamah min hnek a, ka sam a kek thur vek tawh, ka hrawkah te a rêk leh ang chawt chawt ṭhin, ka mangang takzet ta. Ka kekawr pawhthlak tuma a insanmar lai takin ka khupin a kapah ka do ta tlat a, a tha a thlah deuh lai takin ka'n tlawh pawp mai a! A vial nghal ngawlh ngawlh mai. Kei pawh rang taka thovin ka puan chu ka chuh rawk rawk a, ka êm dona chu paihin keimahin ka inṭan ta a. A kapa ka tlawhna kha a na thawkhat a niang, min rawn beih leh tum awm pawn a lang lo. Hmanhmawh baklêngin ka tlan haw ta a ni. Ka thingphurh chu tualah ka keuh sawk sawk a, in chhungah tlan lutin U Mawii hmun lo phiat mek chu ka kuah ta chawt a, ka ṭap ta chiam mai. 

Ka tlanchhiat lai kha chuan hlauh leh thlabarna em em ka nei lem lo a niang, in ka thlena ka thlavâng hauhtu tur te hmel ka hmuh chiah khan ka lung a no ta tlat a,. Reifê hnuah ka thiltawn pawh ka sawi thei chauh a ni. U Kunga vaiza hnah la a rawn thleng a, U Mawii'n thil awmzia a lo hrilh ve nghal. U Kunga a ri phat mai, "Kan Hmel varunga mai mai chu le..chutia a chak lo zawk chunga hlei a lo len khanglan ni, zaninah palai kan thlak ang" a ti ta rap mai. Samua te hi sawi tawh angin an khuaah a awm thei ve pawl, a farnu te pawh an khuaa incheina sang filawr lak an ni. An in leh lo chuti lua lo mah se; an nunphung hrim hrimah mi chungtlak tum chi ang hi an ni ve a. Kan inngaihzawntirh pawn U Mawii hian an chhungkaw zia min hrilh ru tawh a, mahse, Samua kha hmelṭha ka lo tih ve si avangin ka hnar thei ta lo kha a nia. 

Palai thlak êm chu khual thuthang leh ar pân chuk tih ang deuhin ka pa te beng a thleng ang a, ka nuhrawn lahin a chuanchhe zawngin ṭawngkam a neih ka hlau si, pawl 12 ka zir zawm thei lo mai ang tih hlauin U Kunga chu ka khap ta a. An ni pawn thil awmzia ngun taka an han ngaihtuah hnuah a vawikhatna a ni bawk a, ngawih rih mai an tithlu ve ta a ni. Mahse le..ka beisei loh lutukin Samua kâ aṭang zawkin kan chanchin chuan khua a khat ta mai a! A ṭawngkam ka hriat leh dan chu na tîk têk tak a ni. 

"Ani mikhual nula akara hmelchhe si, a pa zungawlvei, nuhrawn hrawn hian ka duh tak tak emaw tiin min zar ve sek a. Ka duhtawka ka chinleh hnuah dâwt dâwtin min lo sawi mualpho vel a, a virgin tawh awzawng lo. Ka duh hun huna ka mutpui theih a nih hi" a lo ti a niawm e. Thingtlangah chuan thu a thang hma a, vengchhakah Samua'n min sual thu thang se, vengthlangah chuan a fa ka pai der tawh ang..chutiang a nih tak nuaihah chuan ka lungawi ta bik lo va. Schoolah ka ṭhiante emaw ka tih, an homework leh an thiam loh ka hrilha ka tihsak ṭhinten min diriamin ka chalah phung an kâwk a, ka hriat phak ngei turin Samua nen kan chungchangte chu an han sawi ta ṭhin a. Kei ang rual lek tan chuan palliam a har ta hle. Vawi hnih lai School aṭangin chhuanlam siamin ka tlan haw tawh hial nghe nghe. U Kunga ngaihdan a pel ta a. Kan ṭhenawm Pa Thara leh U kunga thianpa U Siama te chu Samua te inah an va leng ta a ni. Mipat hmeichhiatna chungchanga mualpho hi chuan khuarei a daih tawh ṭhin a, dâwt muhlum hlaka inpuh hmingchhiatna hi chu ngawi renga tawrh chi a ni lo, kan dikna hi kan tlangaupui ngam ngei ngei tur a ni. 

Rin lawk ang ngeiin Samua chhungte chuan kan palaite chu an lo hnuaichhiah khawp mai a, fiamthu ang dâwn ten an lo laksak a niawm e. Pa Thara pawh a lungawi vak lo. Samua lah chuan kan kal thui zel a rin loh vang nimaw a thusawi duhdan a thlak duh hauh lo va, "Mipain ka nula ka tih chuan ka nula a ni mai. Hmingchhiat leh mualpho a hlauh leh si avangin a ṭang laklawh mai mai a nih hi" a ti zui ham ham mai. Min ṭantu an tam lo naa, ka thlavâng hauhtu awmchhunte erawh min hrechiang tak taktu an ni a, ka zâm lo. Thudik hi rahbeh a nih vang maiin dâwt a ni ngai tlat lo a ni. 

Ka pa te beng a thleng ta a niang, ka beisei loh tawpin ka pa leh ka û an rawn phei ta a. Ka û a thinrim nasa khawp mai. Ka pa erawh ka rin ang chiahin keimah zawk min ringhlel a, mahse, ka ṭang na ngang mai si. Kan mualpho ta sa sa tiin ka û-in FIR thehluh a rawt ta hmak mai a, U Kunga ten an lo thlawp bawk. Police out post hnai berah kan complaint ta a. Police lam pawn chet an rawn la ve nghal. Dâwta inpuhna bakah min pawngsual a tum avangin Samua chu an hling ta chat mai. Mak ve deuh chu Police te hi hetia khawlaia han inhmuha han inkalpelh chuan a tu amah kan hlauin kan zum ngai lem lo, mahse, Police custody-ah police hual vel kara han mal din chiah hian kha a chihin zâmna hi a lo awm thei khawp a niang, A tira a pawr tehreng nen, Samua chu dâwp leh han zawh thui vak pawh ngai lovin a inpuang ta zut zut mai a niawm e. Samua chhungte lam an mangang tan. A pa a rawn kal ta nge nge a, ngaihdam min dilin case chu lalêt hram turin min ngen a. Mahse, laklet ngawt theih a ni tawh si lo, an cho va, an rim a, an duh an hmu ta niah ka ngai mai. Ka dikna puanzar a han nih leh takah chuan a hma zawnga min thinhrika min entleutu te khan min rawn hnaih leh huam huam hlawm a, ka hriatchian tak em em chu kan chenhonaa midang hnuaichhiaha diriam ching tak leh mi hmai êng zah map lo te hi tlawm a huna tlawm thei tak, mi tlawn thiam tak an lo ni tihna. Ka hlauh zawng tak an ni e. 

Kha ka thiltawn khan ka nunah nghawng ṭha lo tak a lo nei hman pek a! Ka han kual thui naa, a pawimawh êm avangin ka sawi lo thei lo a ni. Chu nghawng ṭha lo tak mai chu mipa ka hlau ta tlat mai hi a ni. Nulat tlangvalna chu sawi loh, ṭhian ang pawha inkawm ka thei lo chhiava a ni der mai. Ka hlau ka han ti tak naa, ka hua a ni zawk mah awm e. Ka tette aṭanga ka hringnun hman chhoh danah ka lei pathian ni tura siamtuin a voh ka pa aṭangin thil a kal dik tawh lo laklawh a, ka hmuh phak khawvelah mipa te chu a chak lo zawk hmeichhia te thuhnuaia tihduhdah ching hmuhin ka hmu zo va, rahbeh anga inngaiin ka nihna zahawm tak hmeichhe nihna leh dinhmun pawh chu ka sit ta lek lek hial..mahse, sual nge ṭha ka hre lo, mipa te khawvel chhe zet chu kei hmeichhe awmnêm leh derthawng tak hian thlak danglama hmeichhia te chakzia leh thiltihtheihzia lantira phochhuah ka châk ta zek zek mai. Chu chuan mipa te tihtheih ang ti ve thei turin min nawr a, min khalh bawk. Engtin tak nun hmang zel ang i maw..

A tawi zawngin pawl 12 pawh 1st div ah ka pass ve ta a. Kan schoolah ka tiṭha ber a ni. Ka tum êm alawm. College kal ve turin rilru a inbuatsaih ṭan a. Aizawlah ngei college kal chu ka tumruh khawp mai. Mahse, kan tan chhum hi a dum mah mah ṭhin. Kan result chhuah aṭanga kar 2 liam thleng paw'n ka zirna chhunzawm chungchang chu sawi rik a ni ta si lo. Ka pa lah a zu in nasat tuar lohin a insawisel ta zeuh zeuh bawk a, a nupui lah a inchei parh hlawrh reng a, inah a awm khât bawk si. Rilru a buai ṭan ta. Ka la naupang viau naa, mahni kea din a ngai ve dawn ta niin ka hre ta hial mai. Ka û bulah ka zirna chu ka sawi a, zankhat ka nuhrawnte nufa awm loh hlanin ka û chuan ka pa bulah a sawi chhuak ta a. ka pa chuan, "Eng atan nge college kal chu a ṭangkaina? Tihian awm ve hle hle rawh se, sum in heh unau lutuk. Pasal a hmuh zawh leh nei ve se la..College kaltir ka tum reng reng lo" a ti ta hmak mai le..ṭawng tur pawn ka aw a chhuak thei lo, ka lungchhe lutuk chu khum lam panin a rukin ka va ṭap ta ngat ngat a. Ti nge hetiang pa hi ka neih bik le? Pa dang tam tak, hausa si lo fel leh fate tana innghah ngamna an awm laia hetiang pa min pe bik hi Pathian pawh ka dem lek lek zel. 

Ka û chu thinrim takin a âng ve a, ka pa zu lo lem tawh si nen an insual zui! Ka û hi a lian bawk a, ka pa chuan a hneh mang lo. Mahse, mahni pa te meuh chu kut a thlak lo, ka pain kutthlak a tumna kha a lo indang ve chauh zawk a ni. Ka nuhrawnte an rawn haw a, buai a zual leh ta. Thil awmzia a han hria chu le thinrim takin a âng leh ta tûn tûn a. "In unau sum hrâwm na lutuk hi kan nghei phah lo chauh tawh. Kima pawh hi nakkumah chuan kal zawm tir ka tum tawh hleinem. Inhrawk kan chawm a, lawm tak aruanga a dang la beisei zel mai chu, i pa damdawi man lah a to si" tiin. Ka tuar thei ta ngang lo va, "Ngawi rawh. Ka pa nen in inneih aṭangin kawr thar pakhat pawh ka la nei lo, nangni nufa thatchhe lutuk khan in hmang huau huau zawk. Ka nau hi zirna bansantir i tum a maw? I ngam phawt chuan ti rawh..i hre mai ang" ka ti ta tuar tuar a. Ka mizia hi ze zâwi lam ka ni ka tih kha, thinrima ân buan buante ka thiam ve vak lo, ka sawi tur ka ngaihtuah chhunga ka thinrim a lo reh tak daih chang te, an ṭawng theih lutuk vanga sawi tur ka hriat ve loh changte a awm ṭhin

. Mahse, hemi zan hi chu ka thinrim êm a tin ni. 

Chutia awka vina hlau hauh lova ka nuhrawn ka chhang chu ka pa hian min rawn beng pawp mai a, ka beng a kiu nghal vawng vawng. "Nangtê reuh hi i va chaltlai ve, ani hi awm lo se tuin nge min enkawl ang? Kha zawng zawng kha khaw dangah awmin sikul ka kal e i tia, i nu hian min enkawl asin. Ngawi chipcham rawh" a ti hmuar hmuar. Chuti em ema mipa nep, nupui hlau, a fate thlavang hauh ngam lo pa chu ka melh ngat ngat a, "Ni e, nang leh ani hian ka nu kha in that a, inphatsan thei in ni lo bawk a ni" ka ti zawi sap. Reivaklo chu hrilhhai leh hamhaih hmel deuh hian min melh a. Mahse, "I ṭawng duhdan mai mai chu'h! Ka ina ka la chentir duh che u te, inhrawk ka la chawm duhte hi lawm hle rawh u. Nang phei chu mi zawng zawng thinhrik, naupangtêa mipa ngai i nih hi.." a ti ta phiar phiar a. Ka duhtawk ta. 

Tawlhhnung hratin, "Pa, vawiin thleng hian hmeichhe thianghlim, tuma la khawihchhiat loh ka nih hi..chuan, in bulah kan cheng tawh lovang. Kan chhuak ang e" ka ti ta a. Ka û pawh chuan, "Chu chu ka duhdan a ni. Naktukah kan chhuak ang. Engpawh tawk la, eng dinhmunah pawh ding mah la, keini i fate hi i tan kan thi tawh tih i hre dawn nia. " Tiin pindan lam pan a rual a. Kimtea nen kan inzui lut ve nghal. Chutiang chu a ni, chhungkua kan kehdarh bulṭanna chu..

 Chutiang chuan, kan unau chuan vahvaihna khawvel kan hmachhawn dawn chu a nia. Mahse, mak takin ka mangang em em miah lo. A chhan pawh May tia ka hming phuahtu U Kaisangi lo haw khan, "May, in rethei unau si, i nuhrawn a sual bawk si, tiang hi chuan in dam khawchhuak lovang. Khawpuiah in unauin awm ve tawp ula, i û a inhlawh thei ang a, kawng chu a awm ve zel mai asin. Awmpui tur duh pawh an tam lutuk, ka lo ngaihven dawn nia" tiin min chah a, a phone number min pe nghe nghe. Ani hian Aizawlah pasal neiin online shopping a ti ve a, a che lian viau tawh a ni. U Sangi kuta innghah a, he hremhmun chhuahsan phawt hi ka duh ber a ni. Mi hausa te ina chhiahhlawha tan pawh ka thlang zawk. Nitin zantin zu rui nupa hmuh reng, an ruihsual changa inhau reng mai leh inthlahrung dêka mahni pa inah pawh khawsak leh ai chuan mi hrang zawk tihduhdah leh hmuhsit tawrh pawh a nuam zawkin ka ring. Tin, Kimtea chuan lehkha a thiam thei a, kaltir zel ka duh ve tlat, kei chu ka college kalna senso te tuak phawta a kum leha zir zawm mai pawh pawi ka ti lem lo. 

A tuk khua a lo var a, ka pa rawn harhfim chuan min lainat leh ta deuh nge ni, "Ruih laite chuan eng pawh kan sawi ang, lo lak thutak vak tur a ni ngai lo. Ka fa, ka thisen zawmpui in nia, khawiahmah in kal ka remti lo. Ni e, kei pawh insiamṭhat ka tum ve ang e" a ti leh duam duam a. Awih harsa hle mah se; ka û zawkin, "Tun ṭum chu a ti ve tak tak maithei asin. Ngaichâng ve leh ila, bakah ṭawng thu chhe lovah ka pa hi boral ta se; in leh lo leh a ro zawng zawng ka nuhrawnin a khawm tur hi ka phal bik lo" a tih avangin keipawh chuan U Sangi pawh ka be ta rih lo. Kar khat chhung vel chu ka pa pawh chhuak lovin a tawm a, zu erawh a in lo thei tawh lo. A nupui erawh a la ngai reng thung. Mahse, ngaiah kan nei tawh a, palliam a har lem lo. 

Inrinni zanah U Kaisangi a rawn lut leh ta hlawl mai. Kan khaw ṭhenawma a nuteii boral avangin an rawn zin leh a lo nia. Ka pa inthiar hlanin, "May, awmna tur ṭha deuh kan pa û hian a hmuhsak che asin. Amah chauha khawsa a nia, eirawngbawl leh in chhung tihfel a ni mai. Be chhin ta che" a ti ta sar sar a. Ka lo ngaihtuah tawh miah lo kha a nia. 

"Ka nau hi kalsan a rem lo êm alawm, ka hruai ve theih dawn loh chuan ka duh lo" ka ti a. 

"Aw chungte chu i zawt dawn alawm, kei chu khawpuia awm ka duhpui che êm mai. I nau i chawm pah thei ang a.." a ti ta zel a. Ka nau te hi school an ṭan deuh chauh a, school danga insawn pawh a buaithlak lutukin ka ring lo. A sawi thiam si, chu a hna hmuhna pa chu a pasal û hnathawhnaa an pu ber a lo nia. Ka pa inthiar zo chu U Kaisangi chuan a lo hrilh nghal zung zung, ka mitmei thin, a hrethiam si lo. Mahse, ka rin loh deuhin ka pa chuan, "A thu thu a ni mai. A college kalna tur kan nei ta si lo va, a duh leh han intuak se la" a ti ta mial a! Mak ka ti kher mai. 

Min tiphur laklawh bawk nen, Kimtea hruai tel ve a theih leh theih loh hriat nan hrim hrim pawh U Kaisangi phone aṭang chuan kan call ta a. 

Mipa aw tih hriat ngawih ngawih hian, "Hello" a rawn ti ta. Phone nei ve ngai loa thuchâng, sawi tur a bo duak mai. U Sangi ka pe ta ngawt a, ani ṭawngkam thiam na nâ na chuan a han sawi zung zung a. A hnuah "A be duh che" tiin a phone chu min rawn pe. Ka bengah ka vuah, "Hello" ka ti sep. 

"Aw i hming kha tu maw? Kei hi MALSAWMDAWNGA ka nia, Mahse, Sangber tiin min ko ṭhin" a rawn ti ta a.