Mampui Last

MAMPUI..(LAST)

Ziaktu : Toni Râlte

Thinthiin ka muhil meuh lo a ni e. Ka phu leh zawk thin. Mampuii lah a reh vang vang mai si. Ka tuar thei ta ngang lo va, thawm dim taka thovin ka chhuak ta a. Mampuii te kawtah chuan ka ding vang vang, thawm chu a reh duk mai. An living room bak a eng tawh lo bawk. Tunah hian Mampuii chu a ka hnawhphuisakin an nghaisa mek a ni thei ang em? Pafa tenawm leh rapthlak takte khan dim lo baksakin an pawngsual em ni ang? Hlauhthawnna hlir hian ka khat a, ka chhungril pawh a khur titih. Eng pawh ni rawh se, ka number a save danah keimah ka ni tih an hre chuang lo bawk a tiin Mampuii no-ah chuan ka call leh ta hmiah a. A ring ral ral, mahse, a ring ral ta ṭhak. Luhlul chhuahin ka dial leh ngat. A ring tawp leh mai dawn emaw ka tih laiin a pain a rawn la ta a. Aw pangngai tak hian, "Hello" a rawn ti. Ka ngawi ren rawn a, garage-ah lut zauhin, "Mampuii ka lo bia" zam lo deuh hian ka ti a. 

A rum nghut, "Engvangin nge ka fanu chu i biak duh a? I eng nge a nih a?" A ti ta khur khur mai. 

Intipachangin, "Ka nupui hual a ni" ka ti nghet charh. 

A nui huk a, hmusit tih hriat ngawih ngawih awrâwl a ni. "Nang hian ka fanu neih i tum a maw? Tu nge i nih ka hriat loh che i ring elo? Zohmangaih" a rawn ti ta mai! Ka ding mar nghal awt. Min lo hre reng a maw?! Zawnga mai mai chuh!

"Aw i hre ta sa sa, Mampuii ka be duh, a nih loh chuan Police ka ko ang" ka ti ve ta hmak a. A ngawi dat, "I duhtawkin ko rawh. Ka fanu kidnap tu tia ka kawh che chuan i damchhung hun jail-ah i hmang ngei ang. Engkim ka hriat loh ring reng reng suh. Ka fanu, i ngaihzawn rûk em em Mampuii hi ka uitê tih i la hre lo a niang e, vanduaipa..khawvar hma ngeiin ka in chhuahsan ang che. A chiang em?" A rawn ti ta hluk hluk mai. Mahse, a mak khawp a, hlauhna leh zâmna chhete mah ka nei lo. Ka nei lo chauh ni loin va luhkhung ka châk et et zawk. 

"Police ka bia ang a, thuhretuah i hmei ni ṭhin Linda a ṭawngchhuah chuan alu leh dal ringin i hun hnuhnung i hmang ngei ang" ka ti ve ta ngat a. Tlawm dêk anga min hriat chuan min zuam telh telh dawn tih ka hre tlat. 

"I duh phawt chuan ko rawh. Thuhretu ka fanu ka nei ve tho, ani hi in lamṭang emaw i ti em ni? Ka savano, ka uitê a nih hi..aw le, tihian sawifel ang, engmah sawi lova ka in i chhuahsan chuan ka rawn umzui lovang che. Chutiang ni lo va finrâwl chhuah i tum a nih chuan ka tichhe vek ang che. I nunna hial pawh ka la mai ang" a ti chher chher a, min vauna chu engahmah ngaih loh ka tum tlat. Mampuii a hrêng mêk a, a vau tih ka chiang. A kut aṭanga Mampuii ka la chhuak lo a nih chuan engtikahmah ka inngaidam dawn lo. Phone ka hmet hlum a, Lindai ka call ta. Zan a rei tawh a, a muhil tawh ngei ang. 

Reifê hnuah mutchhuak âw zet hian a rawn la ta a. Thil awmzia ka hrilh nghal zung zung. A thophang awrâwl chu thlaphâng awrawlin a rawn thlak nghal. 

"Zohma, Police chu i koh mai a ngai tawh a nih chu..kawng dang kan nei lo" a ti chuai raih. Mahse, Police ko ta ila, an inah chuan va lut ta se, Mampuii chu him pialin va hmu ta si se emaw keimah chu Linda rubotu ka ni tih sawiin min hêk zawk ta si se..kei dan lam hre ta vak lo chu ka buai ta deuh. Mahse, Mampuii chhanchhuah a ngai si. 

Engpawhnise tiin ka hmaa awm apiang hmachhawn turin Pu Siama te kawngkapui chu ka kik ta dat dat a. Ke pen thawm ka hre zui nghal. Pu Siama ngei chuan a rawn hawng ta a. A hmel dam thlup phêna a nunrâwnna leh hurherhna te chu kei hian ka la phawrhsak leuh ang mawle. 

Nui sâwng chungin, "Inthlahna hun i rawn nei dawn em ni?" A ti nghut a. Zâm loh hmel taka kalpelin ka hawi kual a, kut an thawh thut thei tih ka hriat avangin ka fimkhur viau thung. 

"Mampuii a him ngei tih ka chian chuan police ko loin i in ka chhuahsan ang. Mampuii ka hmu duh" ka ti chang rût a. 

Nu Sangi pawh an pindan atangin phelh phang hian a rawn chhuak ve. Ani erawh chuan hlauthawng hmel a pû. Pu Siama chuan, "A hmuh duh che ka ring lo, enteh, i in ngaisang mah mah lo maw? Nang thingtlang tlangval akara mobile chhe siam hnathawk chu ka fanu hian a mawng hrufai tur atan bak a duh che ka ring lo" a ti tûn tûn a. Zing dar 2 a ri chiah. 

"Ka hmuh hma chu ka haw dawn lo" ka ti tlat si. 

An nu bulah, "Han ko rawh" a ti nghut a. Nu Sangi chuan in chung lam a pan nghal. Mampuii room chu in hnuaiah a awm reng sia, eng nge in chungah a tih ang? 5 mins hnu velah in chung kailawn chu an rawn zawh thla hnak hnak a. Mampuii sam chu a thur bam a, a taksa lang theiah hliam hnuhma ka hmu lo. Ka bul a rawn thlen chuan chiang zet hian min melh a, "Engvangin nge min hmuh i duh? Nang thingtlangpa hian" a ti chang fak. 

"I ṭha takzet em? " Ka lo tihsan. 

"Engvangin nge ka ṭhat loh ang? Ka tana mi hnawksak leh ka pa zahna siamsak thintu ka nu fanu min rukbosak tawh a, ka lawm e. Ṭangkaina i nei tawh lo. Kan in hi khawvar hma ngeiin chhuahsan ang che" a ti khawl khawl a. Ka mit sulh thei. Ka'n en thin, dâwt sawi leh ti mai mai hmel a pu mawlh si lo. 

"I ti tak tak a maw? Engkim kha plan vek maw?" Ka ti leh hrâm. Nin hmel zet hian, "Aw. Ka ning, ka mu dawn. I hneawm, i hmel kha ka hmu peih tawh lo. Hmanrua chauh i ni. Chu chu hrereng rawh. " A ti leh kalh kalh a. Biak zui hman lohin a chho leh nghal. Ka na ngawih ngawih. Thil thleng chu mumang a ni si lo, Pu Siama chu rawn kal hnaiin, "I hria maw? Tikhan a chiang tawh em? Khanglang che hian..chhuak vat rawh" a ti vawt raih a. Vai rûai hian kawngka lam ka pan. Nu Sangi chu a che hrut a, Pu Siama chuan fridge hawngin tui bottle a la chhuak mek, hriat hleihtheih loh hian a phun bul bul bawk. Nu Sangi chu ka melh zawk a, chutah chuan ka zawhna chhanna zawng zawng ka hmu ta a ni. A mitmenga ṭanpui ngai ngawih ngawih kara lungchhiatna chuan ka chhungril a fan chhuak vek thei. "Chhuak vat rawh" tih pahin min nam dawt dawt a, kawngka ka pelh dawn lai takin ka kutah lehkhathem a rawn hmehbel chawt chawt, ka lo hum vat a, ka petek chhuak ta nghal. Kawngka chu a kalh nghal rawk rawk bawk. 

Veranda light hnuaiah chuan lehkhathema thu inziak chu ka zuk chhiar a, "Naktuk chhun dar 12-ah" tih chiah a lo inziak. Nu Sangi ziah nge ni ang? Mampuii? Ka buai ta. Ka inah ka haw thla ta phawt a. Rinpuia a lo la hnar bur bur. 

Loh theih lohna avangin ka kaitho ta a. A phâwk hru mai a, a meng sen rûm bawk. A hmai phih harh turin ka ti a, a va phih ve mai bawk. Khuma a rawn ṭhut leh hnu chuan engkim a chinchhuakin ka hrilh ta vek a. A chek tlawk tlawk ringawt. Min hnawhchhuah miau avangin engtin nge ka awm zel dawn ka hrethiam tawh lo. Chutah chuan Rinpuia puihna ka mamawh a ni. 

"A va rapthlak ve le..police hrilh vat a ngai a nih chu" a ti a. "Nia, in hi ka chhuahsan veleh police chu ka pun ang, Linda kan ko hawng bawk ang a, thuhretua din a hreh lo bawk a" ka ti a. Tuna ngaihtuah hmasak tur erawh khua a lo var ang a, khawiah nge ka insawn chhuah ang tih a ni. 

"Bungrua ho hi pack fel ila, tihdan a awm mai ang, Dawr hnuai ber kha a chung chiah luahtu te khan bungraw dah nan an hmang a, luah man an chawi hran lo bawk, tah khan i awm naw naw thei tho vang, in dang luah tur hmuh hma chuan" a ti ta a. Zanin khera a lo riak chu ka va lâwm êm. Ka chhungte erawh engmah ka la hrilh duh lo. Ka nu a chiâi leh dawn êm mai. Lehlamah an inah ngei ka luhkhung a, kut tuar lo leh him piala ka chhuak leh thei hi Pathian vang ka ti lo thei lo. Nungdamin chhuak lo ta ila, an pafa piansual dan ngaihtuahin thilmak a ni lo vang. Mahse, Pathianin Mampuii chhanchhuak turin hun ṭha min pe ka ti lo thei lo. 

Rinpuia nen chuan ka bungraw neih ve ang angte chu kan pack ta mial mial a, ka ngah lo hrim a, a harsa lo. Rinpuia chungah ka lawm takzet a ni, awm lo se ka baihvaih dan tur chu aw..kan pack mawlh mawlh lai te chuan, "A rapthlak ka ti ê..hetiang em ema piangsual mizo zinga an lo awm hi..Mampuii pawh a la him ang maw?" A ti leh thut ṭhin. A vei ve ngang ni tur a ni. 

"A la him turah ka ngai, Rinpui, he thil hi nang leh keia thurûk aw. Midangin an hriat chuan Mampuii nunna thlengin a tuar thei dawn a nia" ka ti leh mawlh mawlh a. Ner sak chungin, "Min va ring lo tak e aw..lungngai suh, ṭhian kan nih kha" a ti a. Ka ringtawk e. 

Khawvar hmain kan intifel thei a. Mutchhuak a reh vek mai, thin a rim ṭûn bawk si. Leilung a rawn lang dêt dêt tihin bungrua chu ka motorah kan thiar chho ta a. Mahse, hma lutuka chhuah pawh a buaithlak,. Kan inthiar zawhah ka in ruak zetah chuan kan chhuk leh, ni chhuak kan nghak a ni ber mai. Rinpuia lah mut kham si lo chu a muthlu leh lâwp lâwp ṭhin. Kei erawh chhetê mahin ka mut a chhuak lo, chhun dar 12-ah chuan eng nge thleng dawn tih chauh ka rilruah a awm. An in kan chhuahsan dawn si a, engtin nge ka va ngaihven tak ang? A phone a kawl tawh bawk si lo. Mampuii'n khati taka naa min ṭawngkhum khan ka mipa rilru rawn thoin "Eng nge ni vei?" Ti rilru ka pu ve nghal phat kha a nia. Mahse, rilru kilkhatah erawh "A pain a vau vang a nih hi" tih chu a awm. Nu Sangi khan lehkhathem kha min pe lo se chuan rilru nuam vak lo chungin Mampuii hi ka bansan tawh ang. Keima kawng bik ka zawhsan daih ang. Mahse, ka rilru tibuai tingtang turin lehkhathem ka hmu leh si. Huiham, keia Aizawl awm ve hi ka tum loh ang hlirin ka awm, a mak a ni. Nun ho ve tak, ngaihtuah lem nei lo tak hi hetiang mawhphurhna pek tlak pawh ka ni meuh lo asin le..kan tâwpna tur hrelawk thei ila aw..

Ni pawh a rawn tlangsang ve ta deuh a, Rinpuia nen chuan ka in luah, reilotê ka luahlum ve chu kan chhuahsan ta a. Motor ka tihnun laiin Nu Sangi a rawn chhuak a, mahse, an pain a rawn zui ve avangin biak chu sawi loh melh pawh kan melh duh lo. Kan tlanchhuak chiah tihin Lindai'n min lo call a, thil awmzia leh lehkhathem chungchangte chu ka hrilh ve a, a thaw hawk chu ka hre thei, "Engpawhnise, chhun dar 12-ah chuan va ngaihven chhin la ka ti mang e. Ka nu ka lo bia ang aw..a pawi ang em?" A ti ta a. 

"I bia tih i pain a hriat chuan a buai vek dawn a nia" ka ti a. 

"Lungngai suh,. Khalam chu" a rawn tih chuan thla a muang ta deuh. Linda hi kan la mamawh dawn chauh. Mampuii chhanchuah ringawt hi ka tum ber a ni lo, Pawngsualtu te hi dan hmanga hrem ngei ngei ka duh a ni, chumi a thlen theih nan chuan theihtawp chhuah ka tum ve tlat a ni. 

Rinpuia'n a pute biain ka chin chu a hrilh a, hnawhchhuah anga min sawi a hreh ve si, "A in luahna pa hi zu a rui sual thin a, nizan khan an intibuai a" a ti ta ringawt. Tichuan, an in lam kan pan zui ta nghal a. Tukṭhuan chu an inah ka ei ve rih mai dawn a ni. Kan thleng a, ka bungrua pawh hlang thla hran loin kan lut ta a. A pu chuan thil awmzia min lo zawt chiang a, Rinpuia sawi ang deuh khan ka sawi ta mai. Engkim la sawi chi a ni si lo. Tukṭhuan pawh kan ei ta nghal. Ka puar leh puar loh pawh ka hre lo e a. Rilruah thildang a tam lutuk hi a ni. Rinpuia sawi angin dawr hnuai ber bungraw dahna atana an hman chu vawiina tihruaha luah nghal turin an tithlu ta a. Ka lawmzia chu aw..ka hnathawhna hmun a hnai sawt dawn bawk nen. Luah man lah chu tun thla min la free dawn lehnghal.. tukṭhuan ei khamah muangmarin dawr lam chu kan pan a. Kei leh Rinpuia chuan phone kan siam thei rih dawn lo, ka in luah tur kan tihruah phawt a ngai dawn sia, bungrua kan thiar char char. Dar 12 a ri tawh em tih leh ka phone a ri em tih erawh ka ngaichang ran thung. Chawhma chhungin kan inthiar zo ta mai, in atana luah tura an siam kha a ni lo hrim hrim a, bathroom erawh a awm. Mamawh tur a awm nual, engtin tin emaw a khawsak ve theih mai ang chu. Mampuii awmdan azirin ka chin tur a sawilawk theih si loh. Dar 11:47-ah Lindai'n min lo call ta a. Ka la rang ngei mai. 

"Ka nu chu ka be tawh aw. Ka pa a chhuak a, Mama a la awm. Mampuii chu pindan thimah an khung, ka nu chuan a pui ngam lo, Police hruaiin va chhanchhuak rawh u, ka nu bulah engkim ka sawi tawh e" a rawn ti ta a. Ka thaw huai mai. Rinpuia pawh ka hrilh nghal a. Intihfaina hun awm tawh hek lo, Police stationah kalin kan buaina chu kan hrilh a, an lo ngai serious khawp mai. Police hruai chuan Pu Siama in lam chu kan pan ta a. Kawngka chu police te chuan an kik dat dat, reifê hnuah Bsa hian a rawn hawng ta a. Police hmel a hmuh chuan a tawlhkir dâwrh. A hamhaih ve deuh tih a lang. 

"Khawiah nge i farnu?" Police chuan a ti chang fak a. 

Nu Sangi a rawn lang ve nghal zat. Hlauthawng hmel a pu tawh lo, thaw huai hmel a ni a put tawh ni. "Nu Sang, Mampuii awmnaah min hruai rawh le" ka lo ti vat a. Mitmeiin zui turin min ti a, kan zui nghal, Bsa erawh a la ding khawng reng. A hrilhhai hle tih a lang. In chung pindan thlang lamah chuan pindan te taktê thim rek ruk a lo awm a, chutah ngei chuan Mampuii chu an lo khung a lo ni. Police pakhat nen kan va luh chuan kil khatah hian a lo ṭhu kun reng a, kan thawm hriain a rawn hawichhuak vat, min hmuh rual chuan min rawn pan a, zah pawh sawi thei loin kan inpawm thawk mai. A tap khur ngat ngat a, "I lo thleng hman lovang tih ka hlau lutuk asin. Damdawiina min hruaia ka chhul paih an tum a" a tih chuan ka chhungril a nghawng dawt thei. Rapthlak tih hian sawifiah thei se ka ti mang e. 

Nu Sangi chuan, "A lo thleng e" a ti sap a. A pasal a sawina a ni. In hnuai lamah rang takin kan chhuk thla a, Pu Siama rawn lut mêk chu ka zu hmu thei. In hnuaia Police lo awm chuan Bsa kha a lo handcuff tawh a, Pu Siama rawn lut hamhaih lai tak chuan, "I fanu i pawngsual leh i rîkrâp avangin man i ni e" a lo ti hmak mai. Pa rothap, nunrâwnnaa khat leh nunna pawh ngaihlu hleithei lo khawpa mi piangsual ni ta chu reilotê bak a hamhaih lo, nui hawk hawk chungin, "Maw?! Kei hian ka fanu ka pawngsual a maw? Finfiahna i nei em ni? " A ti ta khur khur a. 

Ka bula ding Police lian zet chuan, "Chu zawng station lamah kan la sawi dawn nia, min rawn zui phawt a ngai" a lo ti hriam hraih. 

Pu Siama chuan Nu Sangi chu rum êlkhena melhin, "Nang hmeichhia hian ka hriat lohin kawng i lo hreuh a maw? Inspector, kei min man a nih chuan he nu pawh hi in hlin tel a ngai ve ang. Ani hian kei min mantirna tur thangkamin ka in leh lo leh rosum chan vek a tum a ni. In lak tel ve ngei a ngai ang" a ti tûn tûn a. 

Nu Sangi chu mittui tling pam chungin a rawn penchhuak a, an pa mita chiang kelh kawlha melhin, "Nang ramhuai leh setana tirhkoh hnuaia kun leh ai chuan ka damchhunga jail-a hun hman pawh ka thlang zawk. Nangmah vangin ka fanu pakhat ka chân tawh a, i thisen ngei i fanu lehzel pawh îta rahhrual tumtu hi hmuh leh che ka duh tawh lo. Hremna i hmuh theihna a nih dawn phawt chuan ka theihtawp chhuahin ka tlangau zel tawh ang. Tenawmpa" a ti ta charh charh mai. A tumruh hmel bawk a, a pasal pawh chuan zâm hmel a pu ve hial mai. Bsa erawh a ngawi hle hle ringawt. 

Police chuan, nu Sangi bulah, "Engpawhnise, nangni pawh koh theihin lo awm u la, an ni hi kan hruai phawt ang e" a ti a. An chhuahpui ta. Tisawn thiam loh chang han ni tawh mai se ka va ti êm. Dan lah hi a tam si a, evidence, thuhretu mamawh a la ni dawn si. Mampuii chu ka ṭhuttir a, a dang lep a, a mitmeng pawh a buai nuaih nuaih mai. 

"I ṭha em?" Ka ti a. 

"Ka ṭha chuan ka hria, engtin nge rawn kal hun i hriat theih?" Tiin min melh hâ a. 

A nu ka melh zawk. Nu Sangi pawh rawn kal hnaiin, "Bawihte, min ngaidam rawh aw. I nu hi ka lo nep êm a lo ni..ka dawihzepna khan ka duh loh thil tam tak min tihtir a, mahse, Zohmaa avangin tumruhna leh huaisenna ka nei ta a. I û ka chân tawh a, nang lehzel chân che chu ka duh tawh lo a ni. Min ngaihdam theih chuan ka lawm ngawt ang" tiin a fanu chu a ngen ta ngawih ngawih a. Mampuii chuan a nu chu kuahin, "Nu, a hun takah i harhchhuak a ni. I puihna tel lo chuan ka zalên dawn hleinem, ka ngaidam che. Khatiang thu kha sawi tawh suh aw" a ti a, an tap dun ta a. Ka lo thlir reng ringawt. Rinpuia pawh a mûk khawp mai. Linda pawh ka call a, thil awmzia ka'n hrilh chuan a lawm ve khawp mai, Aizawlah pawh a rawn haw thuai beisei ang, ṭangkaina a la nei dawn chauh si a. Chutiang tehnuaih chu kan ni ta sia, Nu Sangi chuan Rinpuia nen chuan zan riahpui turin min sawm a. An nufa ngawt chuan a nuam lo ve bawk ang. Keini pawn kan hnial hran lo, mahse, inthlakna va lak leh phawt te a ngai dawn thung. 

A tu amah kan kamtam lo bawk a, Mampuii te case chu mi nawlpuiin an hre lem lo. Nakinah hriat a tul leh Police lam zawkin an la tlangzarh ang chu. Chhungkaw mualpho theihna a ni ve bawk a, tlangzarh hluai chi a ni lem lo. An man aṭang khan ni 3 a liam tawh a. Central jail-ah dahluh an ni tawh. Linda a rawn haw ta bawk a, a statement ringawt pawh chu thuneitu te lam pawn rapthlak an tih hmel viau. Mampuii erawh vanneihthlak takin a la him a, mahse, a rilru lamah a nghawng nasa a, a la pangngai tak tak thei lo. Linda a huaisen bawk a, a pa leh Bsa te chuan hremna an hmuh ngei theih nan mualpho pawh sawi lova ṭan ral raih a tum ruh hle,. Tin, witness tur Nu Sangi a awm bawk si, Pu Siama te pafa tan chuan kawl a êng lo ve khawp ang. Central jail lamah pawh an zuk nuamsa tehchiam lo a nih hmel, pawngsual case-a lut ngat hi chu Jail tang ṭheuh ṭheuh zingah pawh an lal lovin hmuhsit leh diriam an hlawh ve châwk. A âwm ve bawk a ni. Nakinah Court-in thiam loh a la chantir ang chu maw. Rinpuia chu an in lamah a haw tawh a, kei erawh an nufa thum chuan min la chelh tlat. Ka thawmhnaw leh bungrua ka va la sauh sauh a, a hmaa ka awmnaah khan ka dah leh ta ren rawn a. Mahse, an inah ka chengkual tam zawk mah awm e. Kei akar min ngai ve chu ka induh phal lo. Mampuii nen erawh han inkawm fâlna hun vak kan la nei lo. Ṭhenawm khawveng inleng an nei nak nak reng bawk si. An mikhual roomah ka mu ve leh mai a, chhungkua tak tak te pawh kan ang alawm le. Ka hnaah pawh ka la kal ve zel a, Chinchang ka hre ve zel bawk. Makimi lah hi ka ngaihbel êm mawni min ngaizawng ang deuh reuh hian min bia, ka sawi thiam lo. Min hauh thei vel tawp a, kei lahin ṭhian ang bakin ka en si lo. Saii te pawh kha vawikhat bak ka tlawh hman ta lo, nuam lo chu ka ti ve reng, mahse, buaipui tur ka ngah ve êm a ni.

A tawi zawngin sawi mai ila, hun a kal a, Pu Siama te pawh an court ta zak zak a, an ukil lah chu ṭawng thei leh fing kherek zet mai a ni lehnghal. Bail a dilsakna lah chu an pawmsak hmiah mai a, Pu Siama te pafa chu thla khat êm pawh a ral hmain bail-in an rawn chhuak leh ta luau mai. Chhungkua an buai leh zo ta. Kan rin loh danin thil a kal leh ta tlat mai. Pu Siama zawk chuan Pi Sangi te nufa lakah case file vein, a rosum chhuhsak an tum vanga puh hmingchhia leh an nufa ṭangrual angin a puh let ta hlauh mai. A puhna tifiah thei tur tingin a hma daiha Pi Sangi rokhawm ve tur an siamfelna lehkha chu amah Pi Sangi'n a hrai ruih laiin a sign luihtir tiin a ṭang tlat zui! Vawikhatmah a fanu te chu mipat hmeichhiatna lam hawia a khawih ngai loh thu leh chutiang rilru a put loh thu a sawi chamchi bawk. Thiam loh chantir ngei a ni dawn emaw tih laia chutiang boruak rawn awm leh ta chuan kei tak pawh min vaw nâ.. Lindai leh Mampuii te thusawi ringawt kha evidence tlingah an pawm thei bawk si lo. Lindai taksaah mipa chi hmuh tur a awm tawh bawk si lo va, Pu Siama ngeiin, "Ka hrin a nih lohna laiah ka lakah a hel tlat a, zu leh sa leh nawmchenna lam a uar avangin pa ka nih angin a chungah hremna ka lek ve ngei alawm. Mahse, a nuin a vuipui a, amah Lindai lahin min tihmualphoah min vau reng a, Kan in luahtu rilru hnehin a inrûk chhuahtir a, Police mai bakah khawtlang chenin kan tihbuai phah. Chhuah a duh luatah gate keeper lakah pawh inphalrai duh hmeichhia kha a nia. Keimah min tihmualpho an tumna kawng vek a ni. Lindai awm loh hnua Mampuii pindan thima ka dahna chhan kha chu a û a lo pui ve a, ka lakah rilru dik lo a put avangin ka hrem a nih kha. Pa ka nih angin ka fate chungah hremna ka lek thiang lo em ni?" Tia a han sawi dap dap chuan, mi ṭhenkhat rilru no deuhte chu an nêm nghal duai reng a. Kei erawh min hneh lovang. Sum leh pai vang mai maiin hmeichhe pathumte hian nunna thâpin dâwt muhlum an sawi ka ring hlawl lo. 

An lo chhuah leh si avangin chengho thei tawh hek lo le..Nu Sangi te chu an in dang ta a. Kei pawh dawr hnuai berah ka awm nghet ta rih. An inṭhen ta chu a ni mai a,. Veng dangah mi in hnuai chêp zet luahin an khawsa ve ta naw naw a. Lindai a fing hlauh a, a dawr a hum ve thei hrâm. Nu Sangi erawh chuan engmah chan a nei ta lo. A rokhawm vena tura lehkha tihfel vek tawh lah hrai ruih vanga sign luihtir tia puh a nih miau avangin chutimaia tihfel theih a ni bawk si lo. Pu Siama te pafa chu an in lianpuiah an khawsa ve ta rûk ruk chu a ni ngei ang a, an case chuan hun a duh rei dawn hlein ka hria. Lindai nundan leh chettlat tawh dan an han chhui ngei a, a pa sawi ang tak tak khan nula tal ho ve tak, zan hnih khat riahbo mai pawisa lo chi a lo ni si! Chu chu Pu Siama te lamin remchangah an hmang ve tho bawk si..Pu Siama lah officer a nih angin dan hremi bakah hmelhriat mi lian leh thiltithei tak tak a ngah ropui si a, Nu Sangi te chu an chak zo lovang tih a hlauhawm ta hle mai. 

Ni khat phone ka siam mawlh mawlh laiin Nu Sangi'n min lo call tehmial a, ani hi chuan a fa upaber ang thawthâng hian min en tawh ka ti mai, engpawh ti dawn se min rawn zel tawh a ni. 

"Zohma, kei chu kan case hi lakkir leh mai te ka duh rum rum. Min ringtu aiin min ringlo an tam zawk. Vawiinah pawh kan in luahna pitar a rawn leng a, 'Hetiang thubuai lama hming lang pha chin hi chu kan in luah atan pawh ka duh vak lo, ka fate lo haw se kan lo sawiho ang. Pasalte pawh rawk duh mihring chu nu ṭha an ni thei lo vang" a rawn ti tehngawt a, a hrehawm êm mai. Case lalêt leh ta ila, tibuaitu nei tawh miah lo va, zalên taka awm ve theih ka châk a ni" a rawn ti dap dap a. 

"Ni lo ve a, kan bei zel ang, sawtiang mi piangsual sawn hremna a hmuh ngei ngei a ngai alawm" ka lo ti ve tlat. Min hnuklut ta sa sa, a tawp thleng a, tel ve zel ka tum tawp mai a ni. Sum leh pai nei lo mah ila, dan chu a chungnung ber turah ka ngai ve tawp. Mahse, kan rin leh ngaihdan ang hian thil a lo kal vek thei ṭhin si lo a nih hi maw. 

Aizawla thla 3 zet ka awm tak hnuah chuan Mampuii nen pawh tihtakzetin kan inngaizawng tawh a. An in luah kha sawnin Lindai dawr piah lawkah a hma aia zau leh nuam zawk, luah man pawh to deuh zawk an luah ta a. Pu Siama hian vawikhat chu Pi Sangi chu a rawn kohtir ve âwm e. Mahse, "Hremhmuna let leh ai chuan, zalen taka retheih ka duh zawk" ti ve tlattu Nu Sangi a awm tawh a.An inko haw lo chiang asin. A pasal lak aṭanga ro khawm leh chan neih ve lam a ngaihven lo va, Lindai thawhchhuah chauh rin duh bik lovin sum tlemtê hmanga bulṭan vein an in piah lawkah thingpui dawr lian lo tak a hawng ve a, eisiam thiam tak a ni bawk a, a têt ang aiin a lun ve thei phian. Mampuii'n a class chawlh niah a pui ziah bawk a. Hausa lo mah se; khawsak harsa an ni lo. An case kha a la kal reng tho naa, kei pawn chak zawh ka inring ta meuh lo. Pi Sangi pawh a pasalin a puhna vangin a la court ve zak zak bawk. Kan Zoram hi zawng mi ram anga chet vat vat theih a ni ve si lo va,. Case zuihral kan tih mai, a hunlaia lar hluai, a rei hnua sawizui tur awm tawh lo va dai ta diak te hi sawi tur a awm ta nual mai. Kan la hetih chhoh fô dawn chuan eng pawl pawl emaw hi chu an la ding chho nukin ka ring. 

Zantin ka bialnu ka rim a, ka motor pawh kha a la ṭangkai ve zel avangin ka la tiral phal bik lo. Ka in luah chu zim teh mah se, ka awmna tur âwm tak a ni. In leng ka neihchhun lah Rinpuia a ni mai a. Mampuii nen kan inngaihzawn ngheh hnu aṭangin zu pawh ka in leh ta lo, a changtunu hian a haw hlur mai si a, kei lahin zu ai thlawt chuan ka lo duh hleuh hleuh bawk si. Kan hlim a, thikthu vanga han inbakkaih chang chu kan nei zeuh zeuh, mahse, kan inrem leh zel tho. A nu leh a û te phei chuan min makpa chei ka ti mai. Kan boruak chu a nuam ti mai teh ang. 

"Ka thiannu Spi kha i hria em? Khami khan a birthday a lawm dawn a, chaw eiah min sawm ve sia, ka kal ve dawn aw" tiin min rawn dil thlap a. Kei pawn chutiang na na na te chu tiin , "Aw, mahse, eikham veleh lo sawi la, ka lo hruai ang che" ka ti a. Mi rilru zîm leh kheuhbeuh tak ka ni vak lo ve hrim hrim a. Tichuan, keipawh muangmarin rawng ka bawl a, Mami te pawh kha tluang takin an innei a, kei pawh ka va haw ve kha a nia. Biak in hawnga innei an ni bawk a, mi an ṭhahnem ve khawp mai. Hruaia te hi Hnahthial khua an ni a, thla chanve êrh âwrh Hruaia te inah Mami pawh a han khawsa ve a, mahse, a hna bakah an pa hna avangten kan khaw lamah an in dang ve ta thuai a, inhrawn rei hman lovin an khawsa a, a zia khawp mai. Nupa hlim tak ni mawlh teh se. Ka nute lah hian, "Engtikah nge mo kan neih ve dawn?" An ti sek a, Mampuii hi graduate ve phawt se ka duh a, ama duhdan pawh a ni. Ka hna hi eizawnna tlak ni tho mah se, nakinah fate kan han nei ang a, ka hna ringawt hi chu kan la khawpkham dawn lo tih ka chiang, Mampuii hian sawrkar zêm hi eng emaw ti talin zen ve thei se ka duh viau. 

Zanriah ka ei a, ka taksa pawh a mum ve kâng tawh. Aizawl nge nge chu ka lo ngeih deuh a niang e. Dar 7ah pawh Mampuii chuan min la rawn biak loh avangin ka call ta a. Midang daihin an lo la, "Khaw nge Mampuii?" Ka ti vat. 

"A chhuak lawk a, a phone hi a hnutchhiah a..a lo let ṭêp ang" ruih hmel deuh hian hmeichhia hian min lo chhang a. Ka ngaihdan a ni lo hle,. A kalna an hre bawk si lo. An awmna chu ka zawt ta tawp a, ka chhuak zui ta nghal. Nu Sangi'n min lo call ve zat bawk, "A thianten a kalna an hre si lo va, ka ngaih a tha lo êm mai. " A rawn ti a. Hruai tura ka chhuah thu ka sawi chuan a thaw ve huai mai. A ṭhiannu sawina hmun lam chu ka pan ta vang vang a. Veng mawng lam, fâl angreng takah hian a ṭhiannu te in chu a lo awm a. He lai veng hi ka kal vawikhatna a niawm e. Kalkawngah mi pawh ka zawt nual hlawm. Ka zu thlen thlak chuan Mampuii numberah ka call leh a, a thiannu bawkin a lo la..pawnah a rawn chhuak ta a, Mampuii ang rual vel, piannalh tak, hmel pawh chhe lem lo tak a ni. Rsi a intiin ka hria. "Chaw eikham khan Spi khan , 'Zana eitur min va leipui rawh' a tia, an chhuak nghal a. Spi lah kan be tlang thei tawh si lo, ka hrethiam lo. Dawr te chu a han hla em em bawk si lo va" a ti niah niah a. Hlauhthawnna ka nei nghal. Mipa lamah chuan ka ringhlel hran lo, kan inhrechiang tawh a, a phone pawh ka duhtawkin ka lepse thei, rinhlelhawma a awm ka hmu ngai lo. 

"Hei hi Spi te in chu a ni lo mi?" Ka ti a. In chhung lam thawm chu a ṭha angreng,. Music an play a, an ri nuai nuai mai. 

"Ni nang, hei hi chu hetiang hun hman nan vela hauh theih a nia. Zanin zankhua atan Spi'n a hauh tawh. Amah ber hmuh tur a awm si lo" a ti nang nang a. A lungawi vak bik lo niin a lang. Spi number chu ka la ve a, ka call a, switch off hmak bawk si. Mampuii'n a phone a keng lo chu ka thinrim hlur tawh. Rsi chu melhin, "Zawng risk tawp mai ang hmiang" ka ti ta tawp a. Ani pawh chuan a lo hnial bik lo. Dawr awmna lam kan pan hmasa ber a, dawr neitu te chu kan han zawt a. An nula chhawr chuan, "Darkar chanve vel liamtaah kha chuan nula pahnih chuan eitur eng emaw chu an rawn lei ngei mai a, chuan, car pawlah an chuang a..ka lo enzui tawh lo" a ti ta a. Hma kan sâwn hlek e. 

Rsi chuan, "Lawk, car pawl a nih chuan Spi ex Lalnuna a ni ngei ngei ang, a rawn hêl leh deuh tak alawm. Ka'n call ang e" a ti ta zung zung a. Ka lo ngaichang ve tawp. 

"Lalnun, hello..khaw nge in awm?" A ti lang lâng a. Ka lo helhhawlh nasa. 

"Aw..engmah sawi lovin an kal daih a, hei Mampuii thianpa a rawn kal a, lo haw tawh r'u,. Spi pawh a timak, kan nghak ṭhup a nia" a ti leh mawlh mawlh. Phone chu a dah a, "An rawn haw mek a nih chu, Zu kan va la lawk a a ti" a ti mai a. Ka lo thaw hawk ringawt. Mampuii chu ka hau tho vang. Ka thin a tirim tlat. 

Inah khan kan chhuk leh a, kan nghak ta ngat ngat. Darkar khat dâwn kan nghak âwm e. Rsi pawn vawi 2 a be leh tawh. A tawpa tawpah an rawn thleng ta hram e. A hnung aṭangin Mampuii chu a rawn chhuak a. A rawn pen phei hnak hnak chu chîk zetin ka lo en, a pai ta khet khet a, a mitmeng lah chu a'n fim lo mai mai khawp a! He nau hian ruih a nei. Ka bul a rawn thleng a, zu rim hriat tumin ka hnar ka lên a. Eng rim mah ka hre ta hauh lo mai. A darah sâwiin, "Mampui, hei..i harh em?" Ka ti nawk nawk. Chiang lo ruaia min rawn melhin, "Umm..haw ka duh" a ti bah nak a. A phone chu lain midang pawh be tawh lem lo chuan ka motorah ka nawr lut a, ka tlan hawpui ta nghal. A zawi nguai a, a rawn uak leh tuar ṭhin. A che sek reng a, damdawi chak tak a rui chiang mai. Ka thin chu ur teh mah se; a ruih lai chuan hauh a sâwt lo tih ka hria. An in kan thleng a, ka kuah lut ta a. A u leh a nute chuan mak an ti kher mai. Zuk leh hmuam takngial pawh ti ngai lo kha a ni si a. A nu chuan a han hau hlak hlak a, a bengkhawn lo hrim hrim. "Mut tir phawt mai ang u. Naktukah a harhfim hunah kan la hau dawn nia" ka ti ta ngawt a. 

Tichuan, a khumah muttirin puan pawh ka sintir thlap. A chalah ka fâwp zauh a, rawn meng diar diarin thei leh thei lo hian a rawn nui a. "Ka hmangaih che" a ti sep. 

"Kei pawn" tih chauhin ka chhang a. A chhing zui leh daih. Kei pawh thingpui hâng ka in zawhah ka phei ve ta chauh a. Mampuii chu engvanga rui ve ngawt nge maw a nih le? Zu emaw beer emaw te chu lo in ve zauh nise ka la hrethiam deuh, a thiante pawn an in vek a.. damdawi ber kher a rui bik khan min tinâ a, ka thinrim. Nge a rukin a lo bar fô tawh ang a, ka lo hre lo mai mai zawk. Mahse ,ka han ngaihtuah lêt a, damdawi rui awm anga a awm lai awm ka hrechhuak zo bawk si lo. Mi hlim thei leh harhvâng tak, min ngaia min thlahlel ngawih ngawihtu kha a ni bawk si. Spi te khan an hrai rui a niang ti dawn ila, a ṭhianṭha ve em em kha a ni si a, ka ring phal chiah si lo. Ka tum loh deuhin ka mu hma ta ringawt. 

Chhum chu a chhah mah mah a ni. Kan khuaa haw turin Aizawl ka lo chhuahsan a, mahse, chhum leivak a chhah êm vangin ka ding ta ngawt, chetsual a hlauhawm si a. Ka car tukverh darthlalang rawn kik dat dattu lam chu ka han melh zawk a, Mampuii a lo nia. Ka lo hawnsak vat, a huh hliam a, en pawh min en chuang lo hian.."Ka ngai dawn che e. Haw lo mai la" a lo ti a. 

"Ka rawn let leh vat dawn alawm" ka ti sup. 

"Hmeichhe dang i melh vaih.." a ti leh hlak hlak a. A biangah ka fawp zauh a, "Ka rawn let leh chuan ka nupui i ni tawh ang" ka ti nghut a. Min rawn en a, a mitmengah chuan tawrhna thûk tak ka hmu ta tlat! "Mampui..i ṭha em?" Ka ti vat a..a lu thing nar nar chungin ka chelh zui ṭâwk ṭâwkna chu dahthlain ka car aṭang chuan a lo tlanchhuak daih. Umzui tuma car aṭanga ka chhuk rual chiah chuan ka harh ta a..ka thlan a lo tla nasa mai, pawnlamah ruah a sur naa, ka in chu a ûp reuh êm a , boruak a daih phah vak lo. Ka harh ta bawk nen, zial ka ṭan a. Ka hîp vang vang laiin ka phone a rawn nghawr dut dut..zing dar 3:12 a ni. 

"Aw Linda.." ka ti nghut a. 

Chhuak em êma rawn ṭapin.."Zohma, Awiii…Mampuii a thi.." a rawn ti. 

Ka nui hawk a, "Thingi, uan hun a nih tawh loh hi..mu mai mai teh" ka ti hluk.

"Zohma, ka uang lo. Ka nau chuan ama nunna ngei a la..lo phei vat teh.." tiin a ṭap leh hlawp hlawp..

Phone chu khumah ka thlauh a. Ka ding thut..ka in zimtêah chuan hrilhhai zetin ka hawi ka hawi ringawt…

A TAWP TA.