Mampui 4

MAMPUI.. (4)

Ziaktu : Toni Râlte

Mala chuan, "A inpuan dan chuan, 'Zing dar 2 leh 3 inkar bâwrah khan he hmeichhia hian min rawn kai tho va, 'Khawngaihin min lo chhuahtir lawk mai teh, i duh leh min veng dawn nia. Pawimawhah mi hmuh ngei ngei ka ngai a' a tia. Min ngen nasat êm avangin keipawh chuan tlawmngaih chhuahin ka lo pui ve a. Pawna kan chhuah chuan tumah an lo awm si lo,"Min bum a ni maw?" Tiin ka chhuahchhal a. Bang phenah min nambet a, 'I duh phawt chuan min mutpui thei a nia. Mahse, ka chhuak tih sawi miah suh' tiin min thlem ta a. Ka hnial fithla ṭhak a, lut turin ka hrilh a, a duh si lo. Ka mangangin midang kaihthawh ka va tum laiin a lo relhru hman ta a ni. Hetianga tlanchhuak turah a tirin ka ngai lo hrim hrim" tiin..

Mala thil chhiar chu tak tak a nih ka ring lo nghal. Linda berin awmze nei takin a lo sawi tawh tlat. Sex an hmang ngei tih ka chiang, gate keeper chuan a himna tur a zawn ve a ngai bawk ang chu, a demawm hran loh. Mahse, gate hawnsak tur khan Linda hian a taksa hlan lose khawilamah gate a hawnsak ka ring lo hulhual. An sawi zui nak nak a, ka ngawi reng thung. 

"Hei, nang hi i va ngawichawi ve, biak i hre thei lo si" Makimi aw ka hriat rual chuan ka phâwk hrû ringawt. 

"Ka thil siam laiah rilru ka lo pe lutuk a" ka ti ringawt. Rinpuia chuan min chîk deuh nge thingpui kan in laiin, "I awmdan hi a mak riau a nia, eng emaw ngaihtuah vung vung hmel i pu, Linda vel vang hi mi? Ka bulah engmah zep a ngai lo a nia" a ti sur sur a. 

"I ngaihbel mai mai a nih chu, a ho lutuk. Linda chu a bialpa nen an inru a nih ka ring" ka ti zung zung. Thawven luih ka tum luatah ka hah hle si..ninawm a. Dar 3 velah Mampuii'n min lo call a, a pawimawh takin tiin toiletah ka luhpui vat. 

"Aw sawi rawh" ka tih rualin, "Lawipu ramah hmeichhe ruang an chhar a, ka nuten an va en dawn mêk, ka û a nih takin tih thuah" zangkhai deuh hian a rawn ti a. 

"Wow! I û a lo ni tak tak ang e" ka ti uang a. 

"Hei, khatin ti suh, ka û ruang angah ngai daih se ka tih nak alaia" a ti sar sar. A rilru chu ka manthiam. He nau ka lo duh ru kha ka tidikin ka hria, a nu fabîk a û a hmangaih dan aṭang hian hmeichhe rilru chhia leh kheuhbeuh tak zawng a ni mawlh lo mai. 

"Kan bang ṭêp" ka'n ti ngawt a. 

"Ngatan nge chu chu" a rawn ti hlak. Kan inhriattawnna vang nge min ngamin min zuam riau tawh mai. Min haw miah lo tih ka hriatna ringawt pawh hi ka va hlimpui si êm. 

"Min ngaih tawh ka ring a" ka ti ve sak. 

"Hmela, i lerh" a rawn ti fiak ṭhak, ka nui vur vur mai. "Min ngai viau mah la, ka lo hawn hun lo nghak hram hram rawh aw..duatte" ka'n ti leh ngat phei chu ka beng kiu vung vung khawpin a rawn au..mahse, a thinrim hlek lo tih ka hre ve tlat! Hei tak hi a ni hmeichhe duhawmna chu. A langa thinrim awm deuha an lan nasat poh leh an chhungril nun kan tihlim tih mipate hian kan hrethiam lo fô! Chintawk erawh hriat a ngai thung. 

Keini pawh vawiin chu kan bang hma deuh,. Saii te pawh an lo thleng tawh a, mahse, va tlawh ka tum rih lo. In lamah a aia pawimawh zawkin min hmuak si a, Linda chuan hrehawm a lo ti viau thei tlat. Tlan pahin ka pa ka be ta a. Linda ka ina a biruk thu te leh engtiangin nge hma ka lak zel dawn tih ka zawt a. 

"Chutianga in hnuai maia in inthuhrûk chuan hmuhchhuah hun an la nei ang, i tan pawh a ṭha dawn miah lo a nia. He tah rawn pheipui mai rawh" a ti ta hmiah mai. Naktuk hi zirtawpni a ni a, Naktuk zanah kan khua panpui ta ila, Sunday vel-ah Aizawlah keimahin let leh ta mai ila tihte ka ngaihtuah a. Sumo vela Linda han thawn ringawt pawh chu himin ka hre chiah lo. Ka motor ke ka siamtir phawt a ngai. Ka motor hunna bulah ka chhuk a.. workshop a awm hnaivai mai si lo,. A buaithlak angreng. Rinpuia ka bia a, ka buaina chu ka sawi a, motor ke thlak a ni mai a, koh theih mai an awm thu a sawi takah chuan an number te zawntirin ka inthawntir nghal a. Mahse, khua a tlai deuh tawh avangin naktuk zing lama thlak turin kan inbe fel ta rih. Ngaih a ngam ta huai e. 

Mampuii te in ka thlen chuan an lo la awm nual a, pen ve loh chu mawia ka hriat loh avangin ka lut kawi ve a. Mampuii'n min lo dawngsawng var. A nute chu ruang endik tura an la thang thu leh engmah chanchin an la rawn sawi loh thu a sawi nghal siam siam a. An va thang rei bawk ve mawle. An kalna a rei tawh nen chuan. Bsa pawh a lo ṭhu ve khar mai. Mampuii te thenawm nula ten rawng an lo bawlpui a, mizo nih hi chu a nuam ṭhin ngawt mai. Mampuii chu biakfal ka duh viau naa, a buai ve bawk si. "Ka zu chhuk phawt ang e. Ka rawn chho leh vat ang" ka ti khawmawi ve a. 

Bsa pawh chuan, "Hetah chaw pawh i ei ve mai ang chu, zanin phei chu kan zawn tawp mai a ngai ang ka ring" a lo ti ve a. 

"Ni e, theihtawp kan chhuah dawn nia" ka ti zauh a, ka chhuahsan ta rih. 

Ka in ka han lut chu thawm dim em em hian Linda chuan rawng a lo bawl ve a. Ka nuih a za ngang mai. A pawr fep a, a dâng bawk si. Ka thlen tirha a ze harhvâng tak kha hmuh tur a awm tawh lo. Ka lainat khawp mai. 

"I ruang niawm tak an chhar a nih awm chu" ka tih chuan za lo zet hian a nui a. "Ka ruang emaw ti tak tak se a va ṭha ve" a ti hmiah. A sawi awmzia ka hrethiam viau. Ka inbual sawk sawk a. 

"Roomah va awm rih rawh, mi an rawn lut thut ang" ka tih avangin thuawih takin a lut ve mai a. Eirawng chu ka bâwl chhunzawm, mi an tam a, kei chu min ngaihven em em ka ring lo bawk nen, chaw han ei chhoh kher chu ka tum chiah lo. Artui ka kan laiin Mampuii'n min lo call ta a. Rang zetin ka la, "Ka nute chu an lo hawng tawh a. Ka û ruang a nih loh thu an sawi" a ti a. Bathroomah a awm a ni ngei ang, a khawk rum rum mai. 

"Aw. A ni lo rêng alawm" ka lo ti a. 

"Engtin zel nge ni dawn? Ka hlauthawng a nia" a ti a. 

"I û thawmhnaw leh mamawh zualpui chu i lakkhawmsak tawh em?" Ka ti vat. 

"Umm, ka pack vek tawh. Mahse, rawn kenthlak chi a ni rih si lo va" a ti a. 

"Nia, tihdan a awm mai ang, i pack tawh chuan a ṭha mai. Zanin chu tihian riak leh phawt rawh se" ka ti ta a. Min hnial thei dinhmunah a ding bik si lo. Kan awmdan tehnuaih chu manganthlak tak a ni. Nula pakhat a bo a, chu nula bo chu an in luahtu tlangval inah a biru lawi a! Hetiang thil hi ka beisei miah lo asin le. Ka kawng tura Pathian ruat a ni mahna le..

Lindai chu ka ruahmanna ka hrilh dap dap a, a bu nghat nghat mai. Min hnial dawn lo tih ka hria, a tan himna hmun pan a ngai miau si a. 

"Ka dawr chabi lo kawl la, i mamawh ang ang i lo la ang a, sumah i lo chantir mai dawn nia. Chu chu ka rulhlet ve theih dan che awmchhun a ni sia" a tih chuan, "I ti ang lo êm mai a. Rulhlet beiseiin ka pui reng reng lo che. I him chuan a ṭha a ni mai" ka ti hmak hmak. 

"I lo awm lovang tih ka hlau eee" a ti vawng vawng mai. Ni e, tun dinhmunah chuan kei lo chu rinngam a nei rih tlat lo. 

"Linda, engpawhnise, chhan hrehawm a nih chuan sawi lo la..hetiang thil rapthlak tak hi engtik aṭangin nge i tawn?" Ka ti a. Ka hriatchâk em em vang pawh a ni lo, engtianga rei nge chhel taka a nun a lo hman tih ka hriat duh vang zawk a ni. 

A aw a thian kharh a. "Umm, kum 20 ka nih kum aṭanga thleng a nia. Kei chuan a tirah phei chuan mak ka tih luatah awih nachang pawh ka hre lo. Mahse, a thleng miau sia..ka nu bulah ka sawi a, khata a thusawi kha ka damchhungin ka theihnghilh tawh lo vang, "I hriat angin ka hrisel lo va, hetia ka ai i lo awh ve zeuh zeuh thei hi a lawmawmah ngai zawk rawh, i pa hian i tette aṭangin en hranna awm lovin a enkawl che a, i rulhlet venaah ngai rawh" min ti anih chu! Ka pa chu ka pahrawn a ni, tunlaiah pahrawnin fahrawnte an khawih kan hre fô, thilmakah pawh kan ngai vak tawh lo. Mahse, nu ten an pawmpuia an hriatpui thlap inpawngsualna hi chu thil thleng zen zen a nih ka ring lo. Engdang a ni lo, ka nu hian ka pa a hlau êm mai a, vahvaih a hlauh vangin kei a fanu ngei hi a pasal lakah min zuar a nih ber hi..ka pa ai chuan ka nu ka dem zawk. Mi piangsual pu Siamthanga khi chu mi piangsual leh hurherh a ni, a piansualna zêppuia a fanu venghim zo lo ka nu khi ka thinlung takin ka ngaidam thei ngai ang ngem ka hre lo. Hun a kal a, khawih ka ni zeuh zeuh a. Chu chuan ka nunah pawisak lohna thlenin leh nun khawharna, tuihalna min siamsak nasa a. Zu in ka chin phah ta a. Sex hi ka tan engmah a nih tawh loh avangin ka sihhnip a, tenawm ber anga ka inhriatna chuan mahni invawn min titîm a, mi hur tia sawi ka nih phah ta rêng a ni. Ngaihzawng ka nei ngam ngai lo. Ka chhungril nun mi ten an hriat ka hlau..a bak chu ka sawi tawh lo mai ang e. Ka vanduaina zinkawng hi nakinah tu emaw chuan ziakin mite chhiar theih turin a la pholang ve mahna. Thil thleng thei lo tur emaw in tih ang hi kan chhungkuaah a thleng tlat si a. Ka nau, ka laizawn neihchhun Mampuii, ama fa ngei pawh ît taka a thlir ṭhin ka hmu fô a, ka nau tal zawng ka venghim ang, pasal a neih hma chu ka pa hmei ka ni mai ang tia rilru ka siam a ngai a. Mahse, ka nau chuan ka tawrhna aṭanga min khaichhuah a lo tum ve bawk si. Zohma, thil tam tak min tihsak tawh naa thil pakhat chauh ka ngen leh teh ang che aw..kei chu ka him ta a nih pawhin ka nau khian ka ai a awh a ngai maithei. Khawngaihtakin, Pathian hmingin ka ngen ang che. Ka nau khi a chhiat ve hma ngeiin min chhanchhuahsak hram rawh aw. Ka ngen takzet che" Lindai chu a ṭap ta a. A ṭap ring ngam si lo. Kei mipa inti ve tawk tak mitah pawh mittui a tling khat tlat! Hetiang em ema ka mihringpui ka lainat hi ka la hre ngai lo ve. 

"Mampuii chu neih ka tum asin" ka inrin hmain ka ti ta a. Ka inthiam lo leh deuh. Mahse, hlimna mitmeng nena min rawn melhin, "Tak tak em? Ka va lâwm êm. I rintlakzia a hre tawh ngei ang a, a zui duh ngei ngei ang che. Mi hausa emaw pastor emaw nupui nihtir ai chuan nang ang mipa rintlak leh huaisen bula a awm chuan ka lung a dam daih zawk ang" a ti ta mial mial a. A mi fakna avang chuan ka zak. "Min fak suh. Ka duh lo, ka nihna a ni lo, ka dawih nak alaia" ka lo ti hram. Kan han nui leh rih. Inbunruahna manhla leh ropui tak a ni ka ti lo thei lo. Pathian ka hnaih ve ber lai a ni hial âwm e, a hming ka lam sek lo naa, Pathianin min chenchilh tih hi ka thinlungah a chiang tlat nia mawle. 

Zanriah kan ei a. Tibuaitu kan nei rih lo. Kei erawh ka chhuah chhoh ve hram loh chuan an ngaih te lam ka tiṭha lovang tih a hlauhawm avangin zanriah ei khamah ka han chho ve leh a. Lindai zawn beihpui thlak turin vengchhung aurinna aṭangin mi bo zawn hnatlâng an rawn puang ta dum dum mai. Pasal ûm a nih ring tawk an awm tho ang a, mahse, damdawi ina damlo mu reng han bo hmak kha chu mi pangngai tan pawh ngaih thutak loh a harsa ve viau ang. Police lam an inrawlh bawk si nen. Hmundangah a awm lo tih hre kur mah ila, min rinhlelh loh nan Lindai zawng tur chuan ka chhuak ve ta nge nge a. Vengchhung chauh kan suartluan rih dawn a niâwm e. Mampuii erawh a kal ve lo. Inbiak falna hun pawh kan la nei thei lo chu a nia. A phone-ah lah ka call hmasa ngam rih si lo. Engkima fimkhur ngai hian min tihrehawm takzet. 

Zing dar 1 velah mi zawn hna chu kan bang a. Hmuh ngaihna awm ta lo chuan..kei pawh ka haw nal nal, ka chau. Lindai chu a lo la meng a, "Ṭhutthlengah mu tawh suh, a hrehawm dawn êm mai, chêp mah se, mu dun mai ang, engmah i hlauhthawn ang kha a thleng lo vang, ka makpa tur lakah chuan ka insûm thei viau ang" a ti mauh mai si a. Zêp nak emaw khuma mut chu ka châk ve reng. Ka chau ve bawk nen. Ka hnial ta lo va. Puan pakhat insinṭawmin kan muhil ta bawrh bawrh a. Ka mumangah Mampuii nen a roomah insi rial hian kan lo ṭhu dun a, "Ka û nen hian innei u la" a lo tia. 

"I â em mai, nangmah alawm ka duh" ka lo ti nasa. A duh lo chung ka lo kuah lui a, a ṭang nasa ngang mai, ka âwmah ka pawmbet tlat si.."Zoa, Zohmaa,, hei ka thaw thei lo" tia ka hnungzâng a rawn ṭhâm takah chuan ka harh hlawl. Khai aw! Linda ka lo pawmbet vak chu lo niin, nuih a za duh ngei mai. Ka mumang chu ka hrilh nghal a, ani pawh a nui kur kur. Zahthlakah kan la bik lo. 

Zingah ka tho hma a, motor ke kha an rawn siam dawn si, dar 6 velah ka motor hunnaah ka lo nghak ran a. Pahnih an rawn kal, awlsam zetin a ke chu an thlak ta a. Min charge tam vak lo lehnghal, a lawmawm e. Ina ka let leh chuan rawng a lo bawl a, "Ka chhuah chuan thawm nei tawh suh, i fimkhur lo ṭhin" ka ti hluk hluk. 

"Mut reng ka ning alawm" a ti mai si. Vawiin lamah hian zawn rûnpui an nei leh dawn em tih ka hre lo. Kei chu hnaa ka kal a ngai dawn sia. Ka rilrua riak reng thil ka sawi ta tawp mai. 

"Linda, hetia veng chhung mite tibuaia inzawntir zel ai chuan, pasal um angin insawi la, lehkhathawn ziak la, i chhungte pe mai ang. A tihchi loh ka ti tlat, nang pawn nuam i tih ka ring lo" tiin. 

Ani pawh a inngaihtuah ve nasa tih a lang. Buk nghat nghat pahin, "Nia tiraw, a dik khawp mai. Ṭul hlei lova thalai tihbuai chu ka duh bik hleinem" a ti ve ta a. Paper va lain lehkhathawn chu uluk takin ka ziahtir ta a ni. Hetiang hian, "Ka nu leh pa leh ka unaute,

Min ngaihtuah tih ka hria, mahse, min lo ngaihtuah tawh suh u. Min hmangaihtu leh keipawn ka hmangaih em em pasal neiin hmun nuam takah ka awm tawh e. Min zawn kha bansan u la, in thu ka awih loh vangin min ngaidam dawn nia. Ka awmna hmun hi ka hrilh thei rih lo che u a, nakinah intawn leh hun a la awm ngei ang. 

In fanu

Linda Lalṭhakimi

Lehkhathawn chu envelope ka neih loh avangin uluk takin kan thlep a. A pawnah a pa hming ziakin keiman remchang hmasa berah an inah ka dah dawn a ni. Midang tirh leh kual kha min ringhlel mai mai dawn sia. 

Chaw ka ei kham a, ka chhuak chho ta a. Lehkhathawn chu pek nghal mai ka rilruk, an inkhar ṭhiap a. Hawi zak zak chungin an kawngkapui hnuai chhuatah chuan ka dah ta a. Ka kal nal nal, min hmu an awm hlauh chuan ka chhe vek ngei ang. Ka lo dah ta kher kher a tiin nilêngin ka rilru a nuam lo. Mahse, phone ka siam laiin Mampuii'n min lo call a, "Lehkhathawn kha an hmu a, an awih a niang. Ka û kutziak ngei a ni bawk sia, Police stationah lehkha kengin an va kal mêk" a rawn ti ta a. Ka thaw nuam suai suai mai. Zaninah kan khaw lamah kan tlan dawn si a, huphurhna leh helhhawlhnain ka khat. Ka za sek mai. Mampuii paw'n a nute chhuah hlanin a û mamawh ho chu a lo zuk dahthla thei ta bawk. Kawng hi a tluang viau naa, ngaihthat lohna hi ka rilruah a riak reng tho tlat mawle. A tawp kan khar dan a fuh dawn lo a niang ti ten ka ngaihtuah thul. "Hmeichhe thu dâwn êm mai" tia inthunun ka tum paw'n ka insiamrem famkim thei thlawt lo. Ban veleh Rinpuia'n dine out a rawt pawh ngaihsak lovin ka tlan haw ta nal nal a. 

Mampuii te inah ka lut nghal thâwr. A nute pawh an lo awm tawh a, nimin lam ai chuan an hmel hmuh pawh a nuam ta deuh e. 

"Eng nge kan chanchin zel le?" Ka ti khawmawi a. 

Nu Sangi chuan zawi sap hian, "Pasal a lo um pek alawm mawle. A zia loin a zahthlak tak tak a ni" a ti a. 

Hre thar ve thut niawm tak hian, "A va tiang lo ve ,chungte chu inhrilh hriat vat tur alawm le, khawtlang an zahawm alawm" ka ti mawlh mawlh a. Pa ber pawh chuan, "Ni ngawt mai, a â tak tak a ni. Chuvang chuan ka la ensan rih dawn, a awm awmin va awm phawt teh se" a ti hmuar hmuar a. A lung chu a awi chiah lo ni tur a ni. A hmei rinawm tak khan pasal a nei miau si a! 

Ka kam lawk tawh angin ka alarm a rawn ri ta ṭung ṭung a, off pahin ka bengah ka phone chu ka vuah a, "Hello" ka tih zawm zat. Lehlam thusawi ngaithla niawm takin ka ngawi a, ka mengphâwk kual vel, "Ehe! A va zia lo ve. A nih chu..a va mak ngai ve aw. Aw le, zaninah ka rawn haw dawn nia. Ṭhiana chu ka va ui êm.." ka ti vawng vawng. Min melh ṭhap tih ka hai lo. Ka phone chu dahin an lam ka hawi a, "Ka ṭhianpa, kan khuaa ka kawm ve ber chu tun mai khan a pumna tuar lovin a boral a nih chu! Ka hawn a ngai ang" ka ti a. Ka thaw a sa phat phat thei. Lemchanna hautak pawl tak a niawm e a. Thihna thua fiamthu hi ka duh ngai loh thil a ni naa, nunna chhan nan thihna chu chhuanlama ka hman a ngai miau si. Nu Sangi chuan, "A va zia lo êm..tunlai ṭhalai hi an thi an thi ta mai a, a pawi hle mai. I kal dawn chuan hetah chaw ei mai la, eirawngbawl vel a buaithlak mai mai ang" a lo ti ve mawlh mawlh. Nu bengvar tak hi chu a ni mawle. Min rin theih nan, "Nia , a pawi miah lo. Inthlahrung viau mah ila" ka ti khawmawi a. Pa Siama'n, "A engah chuan nge maw i inthlahrun ni..zu insiam rawh. Zui ve che pawh a ṭhat nen kan buai lai a ni sia" a lo ti luam a. 

"A ngai lo, in buai lai laia lo haw daih pawh nuam tih tawh loh nak alaia" ka ti ve duah a, ka chhuahsan zui nghal. 

Lindai pawh a lo inbualfai sar a, a mamawh ho chu a lo rem ṭha mêk, a phone erawh Mampuii'n a dah tel ngam lo. A awm ve tho. Phone a neih leh pawn number thar a hman a ngai tawh ang. 

"I chhungte nen hian engtikahmah in inzawm leh kher lo thei, hei hi i duh tak tak em?" Thutak zetin ka ti a. 

A ngawih vang vang hnuah, "A ngai ang bawka chhungkua kan awm leh dawn ai chuan mal taka retheih pawh ka thlang zawk. " A ti ta sep a. Nula puitling, ṭhankin a ni tawh a, a chiang turah ka ngai. 

Ka ṭawng leh hmain, "Ka wallet a lo dah tel chu ka va lawm tak, ka ac-ah pawisa tlem azawng ka la dah ve a, eng emaw chen chu min daih ang. Ka dawr erawh ka hum thei dawn ta lo a nih hi" a ti niah niah a. Nun hman chhohnaah sum hi a pawimawh tawh si a, ka hrethiam khawp mai. 

Kan chhungkaw chungchang vel te min zawt ve a, a hriat atana ṭul ang te ka hrilh ve vek, ka pa te ka be tawh bawk a. An lo inralringin ka ring. Hnahthialah Lindai phone tur chu lei mai ila kan ti bawk. Thla khat êrh âwrh va khawsa ve se la, he lamah in luah tur te ka lo dappui ve ang a, a rawn haw ve leh mai aniang chu. Tunah rih chuan Aizawl khawpui hi a tan a la him chiah lo. Hmelhriat apui a ngah ve bawk si nen. Ka intihfel zawhah chaw ei tur chuan ka chho ta a. Min lo nghak reng tawh a lo nia, a nuam chiah lo. 

Kan chaw ei laia a pain, "Mampuii hi chu pasal pawh kan neihtir ve lo ang, a û lah tihian kan thuawih lovin pasal a um sia, ani hi chu nula reng rawh se" nui huah huah chunga a tih lai chuan Nu Sangi ka melh vat, a nui ve tak naa a ngui! Bsa erawh verther zetin a lo meng thung. Ka hlauh ruk, ka rilrua riak reng kha a thleng dawn ta a ni mai lo'ng maw? Lindai ka buaipui zawhah Mampuii pawh ka buaipui chhoh a ngai dawn niin ka hria. Engtikawng mahin ka neih an remti dawn lo va, amah Mampuii rilru lah ka hre hek lo, mahse, min belh ve chat danah min ringtawk tih a lang a. Ka nupui ka nihtir thei lo a nih pawhin a thianghlimna erawh ka venhimpui ngei tur a ni tih chu ka thutlukna a ni e. 

Kan eikhamah ṭhu khawmuang lovin, "Thawmhnaw ka la siamfel lo va, ka zu siamfel leh lawk ang e" tiin ka chhuk daih. An in chhung boruak uap lutuk chu ka hahpui mai dawn. Buaina kan nei, Lindai nen kan chhuahchhoh chuan kawtah motor ka dah tawh si, min rawn thlah ve ngei ka ring si a, Linda an hmu dawn. Engtin nge niang aw..ka bag hawn turah chuan Lindai bungrua chu a leng thei mai a, hei chu a buaithlak loh. Amah ber hi engtin nge an hmuh loh tura ka thuhrûk ang?! Linda chu ka buaina ka hrilh a. 

"I lungngai a nih kha. Buai suh" tiin roomah a lut daih. A rilru a hah loh phawt a hnu tiin kei pawh ka inthlak a. Linda han inthlak zo chu makti zetin ka thlek. Lukhum hmathlawk a khum a, summer jacket dum leh kekawr dum hain sneakers dum a bun bawk. Amah a ang lo tawp. Ani te chu inchei nu zên ṭhin, taksa lang tam thei lam ha ṭhin mi kha a nia. A idea chu a ṭha viau e. 

"Tihian khitah ka lo nghak mai dawn che alawm. I hmelhmaiah engmah tilang lo la a ṭha a ni mai" a ti duh lek a. A hunah chuan hmeichhia te hi an huaisen thei khawp mai. Kei mipa zawk ka lo zâm êm êm a. Dar 7 pelhah min chhuahsan a. Kei pawh in te chu enfel lehin bag ak chung chuan muangchângin ka chho ta a. Inah ka pengkawi ve leh hram, "Ka kal dawn aw..chanchinthar eng emaw a awm chuan min lo hrilh ve u la.."..ka ti a. An ni pawh Bsa tih loh chuan min rawn thlahliam ta hlawm a. Mampuii ngaihtuah ru tak chungin ka tlansan ta vawn vawn mai. Linda pawh chuan min lo nghak ran a. Tuma hmuh loh leh hriat lohin Aizawl khawpui kan chhuahsan thei ta. Kalkawngah kan rilṭam a hlauhawm avangin eitur kan lei nual a. Tiang chuan kan khua Thiltlang lam panin kan tlan ta char char a. Harsatna em em tawk lovin Lunglei kan lut a. Rin aiin kan thleng hma. Linda chuan min mutthluksan duh bik lo va, zai ka play a, inbe lem chuang lovin kan rilru kan kawm dun mawlh mawlh a ni mai e. Zobawk pelh hlekah ka mut chhuak lutuk chu chetsual a hlauhawm e tiin muthilh zawk ka rawt a. Kawngsirah dingin thawm reh tak hnuaiah chuan kan muhil ta a,. Ralkhata ramar khuang thawmin min kaiharh a, kan lo mu rei deuh nge ni, leilung a lang ṭan der tawh. Muangchang tawh lovin kan tlan leh ta char char a, Kan khua kan thlen chuan tukṭhuan kan ban hman vel chiah chiah. Ka lo hrilh lawk tawh bawk a, an lo inralring ve viau. Lindai pawh an lo be tlangnel nghal bawrh bawrh a, amah pawh nula bengvar leh zeihawi tak a ni bawk a, a inngai mikhual tehchiam lo. A chanchin tlangpui an hre tawh bawk a, engmah zawh belh lo turin ka chah bawk. Mami te pawh thla 1 hnuah an innei ve dawn chu a nia. Inbuatsaih hma ve deuh pawh a ngai ang. Lindai chu ka nau chiah phaia awm khami roomah khan a innghat a. A inthlahrung ang tih ka hlau, mahse, sawi leh sawi hnu nula vengva leh thenrual pawl thiam tak a ni bawk a, a ngam nghal sârh mai. Ka nu phei chuan, "Tihian awm ve reng la, heta ṭangin pasal pawh i nei ang chu, kan fanu i ni tawh mai. Mami aiawh tur" a ti hmiah mai a. Kan thlen ni chawhnuah Hnahthialah a phone tur ka va leisak a, a mamawh zualpui min thawn bawk. Kei pawh kan cham chhungin ka chhuak lem lo. Mampuii nen kan intext deuh reng a, a û an zawn tawh loh thu leh amah pawh a la him rih thu a sawi a, ka lawm viau. 

Sunday chawhnuah Aizawl lam ka pan ang ka ti kha a nia. Mahse, Nu Sangi ten chutia ka haw leh vat chu an ngaihkawih ka hlauh avangin Makimi ka bia a, thawhṭanniah ka phei zawk dawn a ni. Lindai chu Mami nen an inkawmngeih nghal mai a, kei nen phei chuan kan inkawm mang tawh lo. Thingtlang khua kan ni bawk a, ṭhian thenkhat ten an rawn rim nghal ve bawk nen,. Mi bulah chuan ka cousin kan ti mai zel a, engtia kan chhung nge tih lam an ngaihven tawh bik lo. Tihi chuan ngaihngam takin ka pheisan thei dawn e. 

Sunday zanah chuan thawh hma a ngaih avangin ka mu hma ve a. Mahse, Mampuii nen kan inbe char char..

"Min haw lo tiraw? Min duh ve tihnaah ka ngai dawn aw" ka tih chuan, "Bialpa ka nei ngai lo, ka thiam lo, ka duh lo" a rawn ti duah a.

"Ok, a nih chuan bialnu ka nei mai ang" ka tih chuan, "I lerh e a" a ti lawi si! 

"Min duh emaw duh lo emaw lam ai chuan himdama i awm hi ka duh ber a ni" thutak zawkin ka ti a. 

"Ka nu rilru hi ka hneh theih chuan ka him a ni mai" a ti a. 

"Tunah i pa chu a rinhlelhawm em? I lakah" ka tih chuan, "Min ngaihtuah hi a tina em em a a ni mai. Ka nu zawk hi a hlim hlawl lo va, min tihlauthawng zawk" a rawn ti a. 

"Engpawhnise, lo inveng hram hram rawh. Eng nge kan tawn zel dawn kan hre si lo" ka ti a. A ni têlin Mampuii hi ka duh a ni. Venhim ngai, dinhmun hlauhawma a awm vang te pawh hi a ni maithei. Nupui neih hi ka la ngaihtuah phak miah lo naa neih ngei ngei ngai thut ta se, awlsam taka thutlukna ka siam theih ka ring.

Thawhṭan zingkarah chaw fun meuhin Aizawl lam ka pan leh ta vang vang a. Hotela chaw ka ei ve hian ka puar ngai lo. Pawisa ka ui avangin chaw fun mai hi ka duh zawk. Keimahin ka ni bawk a, ka tlan muang hran lo. Ka motor tar ve ṭan tawh la ṭhat sizia hi aw. Dar 2 pelh hlekah Aizawl chu ka lut ta a. In lam ka pan nghal, Mampuii chuan class a kal a, ka peng kawi ta lo mai. Zanah duh leh ka han leng mai ang . 

Kan khaw zu fair zet mai ka hawn bawk a, Rinpuia chaw eiah ka sawm bawk. A rawn thleng hma phian. Ka nuin sakhi rêp min kentir chu ka chhum hluah a, in chungte pawh pek ve a ṭha viau naa ka pe ta lo mai. Rinpuia rawn thlen hnu lawkah ka inbual a. Inbual fai ser sawr hnua zu ṭha pangngai tak han in hi chu a ruih a nuam bik. Balh deuh hi chuan ruih te hi a na bikin ka hria. Rinpuia chuan, "Lindai chu pasal a lo um reng a ni maw? An zawn ve nasat nen" a ti a. Ka ne ne kual ta mai mai. 

Chaw kan han ei ta a, kan chaw lak chu ṭha dun tak a ni. "Zanin chu kan nu min rimpui rawh aw. Hmuh pawh i la hmu lo" a ti a. Saii te va tlawh ka tum deuh si, min lo be ve reng bawk nen, a inthlahrunawm ka ti. Induh nihte hi thil harsa a ni si lo va. 

"Ka ṭhiannu te va tlawh ka tum deuh asin" ka ti a. 

"A ho mai mai, naktukah tlawh mai rawh" a ti deuh tlat. Lehlamah Saii nu kha an lo admit avangin an thlennaa va tlawh chi pawh a ni vak lo nen,naktuk hnathawh ban vela damdawi ina tlawh ka rilruk ta zawk a. Rinpuia bialnu chu ka va hmu ve ang e. Thleng ka siltir a, kawruah laia kan in vang em mawni ka kai deuh chhulh mai. Linda nen kan inbe zuai a, Mampuii pawn min lo text. 

"Ka thianpa ka lenpui dawn a, ka rawn peng zuai ang" ka ti a. 

"A nih chu" ti chiahin min chhang. Ka nuih a za deuh. Inngaizawng ni si lo, midang tana inphal lo tawn si ang vel a ni kan awmdan hi. A leh nawm phian reuh a. Mahse, ka duhkhawp hauh lo thung. Min duh ve mai tura Mampuii ka ngai pawh hi ka thisen a sang ve hrim hrim ka ti dawn nge, ka zakthei lo ka ti zawk dawn..a ṭha ve reng reng e. Mipa hi chuan phu loh nei lo ang hian inhre ve tlat mai ila, kan phutawka Pathian min pekah erawh lungawi theih zir ila, chubaka nun duhthusam le tiraw..nau..

Ka insiam peih a, Rinpuia nen chuan a savano rim turin kan chhuak ta a. Mawihawiah tiin in chungah chuan ka peng ta a. Rinpuia'n min lo nghak. Tv an lo en ṭhap a, Bsa erawh ka hmu lo. 

"Ehe! I lo haw elo? Ngah nge engmah i rawn sawi loh?" Nu Sangi chuan a lo ti hû a. Ṭhut ve pahin, "Nia mawle, in reh thap sia, in awm lo emaw ka tia. " Ka ti ringawt. 

Pa Siama chuan, "I va rawn phei leh hma zawk ve, la awm rih tur alawm" a lo ti a. 

"Ka hna hi chawlh reng kha a nuam si lo va,. Ka thawk tir ve chauh bawk nen" ka ti ve mai a. Mampuii ka va melh chuan rum angreng tak hian min lo melh a, ka nuichhuak teuh hle. 

"Chanchin thangva engmah in la hre lo chu a nia nga?" Tiin Nu Sangi ka melh a, "Umm, a nih ang angin kan enliam thei tawh. Tihian a peih chen chen nei se la, a peih loh tawpah lo haw ve leh mai rawh se kan ti ta ngawt mai. A mipa lam lahin palai an rawn tir mang si lo va" a ti duah a. 

"Nia, tikhan enliam tawp mai r'u, a hahdamthlak daih zawk ang. Kei pawh Lungleia ka ṭhiannu a nu entirin an rawn zin a, min phût ve sia, ka va tlawh ve ang e. " Tiin ka ding hluai a, Mampuii'n, "I bialnu chu mi?" A lo ti vat. 

"Ni mai mai lo" ka ti hluk. Thudang an sawi leh hmain ka chhuak ta a. Rinpuia nen chuan a bialnu te veng Khatla lam kan pan ta vang vang. A ṭawng nuam tawk velin kan in bawk a, a bialnu inkiss zeizia aṭanga ṭanin a kumkar a sawi thleng takngial dawna ka hriat avangin, "Aw a tawk, ka hria.." ka lo ti vat, a nui hawk hawk ringawt. Duh aiin a sawi ril ṭhin. A bialnu te in lah chu a hla zêk az step kan zawh tawp thei dawn lo emaw ka ti hman. A tawpa tawpah kan peng a, Assam type lian angreng tak, hlui tawh lam siah chuan kan lut ta a. A bialnu Dingi chuan min lo dawngsawng vat, Mampuii chuan Dingi chu pet ve tak a ni. Mahse, a chhia e ka tihna erawh a ni lo a nia. Duh ai chuan a khal lam hret a ni, a ngo lutuk bawk si lo. A hmai hlai phuk leh nui hmel chambang avang erawh chuan nula rilru tluang leh zau tak a nih ka ring ve tawp. Keipawh min be nghal siam siam a, ka tlangnel thuai mai. A chhungte pawn Rinpuia an lo hre vek tawh a, a zia viau e. 

"Zohmaa hian an deuh a nei, ka hrechhuak zo tawh si lo" Dingi chuan a ti a, "An hi ka ngah khawp a, ka hmelchhe lo a niang" ka lo ti zauh. Rinpuia'n min ei lo nasa. 

Thingpui hâng kan in zawh hnuah chuan sawi tur em em hre ve tawh hek lo, ka phone ka khawih ta mai mai a. Mampuii msg lo awm vâng chu ka seen nghal, "I lerh e. I tenawm" teh ngawt chuan aw. Nui vur vur chungin, "Min ngai viau tih ka lo hre lo va, ka leng tawh miah lo vang" ka va ti. 

A hnu deuhah, "Tiangte chuan rinngam pawh i ni nang. Ka duh che ti ve si, midang rim leh daih si" a rawn ti ta a. A rilru a rawn puang taah ka ngai. A nuam veng veng, haw vat vata muthmuna call ngeia inbiak ka châk tawh. Rinpuia te lah an la inchul heuh heuh mai si. Dar 9 a rik takah chuan, "Kan haw tawh mai dawn mi? Ka zin chau ve nen, ka mut a chhuak ṭan tlat" ka ti ta tawp a. Ani pawn a lo hnial bik lo. Hah hnêpin step thui lutuk kha kan zawh chho leh ta a. Ruih zawng zawng pawh a reh vek. Intleuh leh thuak loh chuan ka mut theih pawh ka ring lo. "Ka riak ve leh mai ang. Ka haw peih tawh lo" a tih miau avangin ka inah kan lut dun leh ta a. Thildang sawi hmain ka inleih tleng leh nghal thuak thuak. Kan mut meuh chuan dar 10 a ri thuak tawh. Mut tui nan no 1 ve ve kan lem leh bawk a. Kei pawh ka meng chau titih dêr. Mampuii biak hram ka duh si, ka call ta a. Reifê a ring hnuah mutchhuah hmel zet hian, "Hello"a rawn ti tham ṭiak a. 

"Hei kan mu dawn chiah a. I mu tawh mi?" Ka ti a. 

"Mut loh a hun tawh mi? " A rawn ti khauh. 

"Ka tiharh che ni maw? Tihpalh lutuk, ka be châk che sia" ka ti a. 

"Hmm, over lo mai teh. Nula rim zawh tawh lama inbiak châk chauh te chu a" ka rin aiin ṭawngkam a chhep thiam tlat! Bialpa la nei miah lo ang khan a insawi bawk si. 

"Ka thianpa bialnu alawm" ka ti a. 

"Aw tupawh lo nise, a ho êm mai. " A tih mêk laiin, "Tu nge i biak? Mut a hun tawh. Khawi maw i phone kha..rawn la teh" pu Siama aw ngei mai chuan a rawn ti ta lûng lûng a. Ka lungphu a rang nghal thei mawle. Phone an in chuh nge a ri deuh rawk rawk a. Ka off duh mai bik lo. A hnu deuhah Pu Siama aw hian, "Hello, tu nge ka biak?" A rawn ti lauh lauh a. 

Ka ngawi tlat! Min hriat loh danah Mampuii'n ka no hi ka hmingin a save lo a nih hmel. 

"Ṭawng ta che..tu pawh lo ni la, hei hi lo hre rawh. Kan fanu hi kan hlan thianghlim tawh a, pastor nupui tur a nih hi, lo be tawh lo la a ṭha ang. I na mai mai..i hrethiam em? Vala" a rawn ti fak fak mai. 

Mampuii aw hian, "Keima biak a nih kha..khatin ka mi biak te apiang vau ziah tawh suh. " A ti lâng lâng a. Phone chu an hmet hlum ta daih. Ka hum nghet hle a niang. Ka harhchhuah chuan ka lo ṭang nasa mai a. Rinpuia'n a hre lo hlauh. Call nawn lehna chi a nih tak loah chuan lukham hnuaiah phone chu dahin ka chhing ta vang vang a. Zanin hi Mampuii tan zan rapthlak a nih loh nan ka rilruin ka ṭawngṭai bawk..tihtheih ka nei si lo. Han chho ta ngawt ila buichhia laih lohin ka inpuang dawn tihna a ni si..

Mampui, lo him mawlh teh aw.