Mampui 3

MAMPUI..(3)

Ziaktu : Toni Râlte

Khua a rawn var a, tlemtê bak ka chhing hman lo. Ka mit a thîp bawk si, ka lu lah a rit bûr mai a. Hnathawh a ngai tho bawk si. Nilênga muthilh ka va châk tak. A tu amah an rawn dîkdak loh danah Mampuii chungah chuan thil ṭha lo a thleng lo ni turah ka ngai ve tawp. A number nei tawh mah ila, aman min lo biak hmasak loh chuan ka va be tawp ngam lo. Fimkhur thuhlaah. He chhungkaw maksak zet hi engtin nge ka phawrh theih ang aw tih ngaihtuah rauh rauh chungin ka insiam a. Nimin tlaiah an inah chaw ka ei daih avangin chawhmeh ṭhing ho pawh rin theih lohin an hîng vek a. Nizan khan ka paih ta vek kha a nia. Dawrah inhnawhpuar mai a ngai dawn a ni. In ka kalh fel a, pheikhai zang fahran lo chuan ka chhuak chho ta hnak hnak a. An kawt ka thlen chuan Mampuii scooty a lo la inhung vâ mai. Tumah rawn chhuak lah an awm hek lo, an inkhar ṭhiap mai a. Ngaihte pawh a ṭha lo lek lek alawm le. Ngaihven duh lo luiin ka motorah ka ṭhu lut a, ka tihnun mêk lai chuan kawngkapui chu a rawn inhawng ta phak a. Ka va hawi phei lo thei lo. Nu Sangi bawk a ni lehpek. Nui tho mah se; a mitmenga nguina chu a thup seng bik lo. "Tukin chu i va tlai ve" a ti khawmawi a. A la tlai chhe hran miah lo. 

"Nia, rawng ka bawl chawp leh a" ka ti ta ngawt. Min rinhlelh loh nan Mampuii chungchang chu ka zawt dawn mawni ka ti rilru a, mahse, ṭul bera ka hriat tak loh avangin buk khum zauhin ka tlanchhuak ta a. Aizawl lirthei a tam tawh si, kawngpui a chêp tulh tulh mai chu a ni sia. A va hneawm ṭhin tak. 

Traffic Jam-a ka tan laiin sms ka dawng a. Company lam a nih leh ka rin laiin Mampuii a lo nia! Ka open ta vat.

"Ka ṭha aw. Ka û erawh nikhua a hre lo mêk" tih thu chauh a ni. Rilruah Hlauhthawnna a rawn lut nghal a. Tihtheih erawh ka nei dêr si lo. Police hrilh tawp mai tur em niang aw ka tih laiin, va report ve ta ngawt ila, finfiahna emaw ka neih si loh chuan, thuhretuah Mampuii a ding ngam awm bawk si lo. Pu Siama te nupain an sawi mam hnehsawh dawn bawk si. Kei hi ka buai lohna turah ka inpalhnawk ni ta berin ka hria. Ka pa la râwn ka rilruk ta a.  

Dawr ka thlen chuan an lo awm kim thap tawh. Makimi pawh a lo nui leh har har tawh mai. Ka hna tura ka dah ho ka khawih nghal mawp mawp, ka eitur chah a rawn thleng a, a ṭâm tawh bawk a, ka ei nghal buan buan. Nizan thil thleng kha sawichhuah ka tum hran lo. Rilruah engtin nge hma ka lak ang tih ngawt a awm. Lindai chu engtia tih zel nge an tum ang le..chanchin ka zawt tawp mai dawn mawni..mahse, fimkhur a ngai bawk si. Rilru buai reng rengin ka awm a ni ber e. Hnaah pawh rilru pek a harsa, min biakte chuan ka lo melh leh hû ṭhin. Rinpuia pawn, "Eng nge maw i hriat le? I hawi ang hê hê a.." a ti fiamthu nghe nghe. Ka chhang lem lo. Ban vat vat ka châk ber tawh. Ka pa pawh ka la be ta chuang lo. A tawpa tawpah kan bang ta nge nge a, hmanhmawh zetin ka haw ta nal nal a. 

An in kawt ka thlen chuan kawngkapui a inkhar ṭhap. Ka motor thawm hriaa rawn lawr ziah nu ber pawh vawiin chu a reh hmak mai. Ka hrilhhai letling. Chhuanlam siama va luh thâwr mai ka rilruk ta a, mahse, chhuanlam tur a vâng dawn ê..keia thluak ve tehlam hi a bil roh si. Lindai leh Mampuii mitthla chungin kawngka chu ka kik ta a, 1 min velah a ri rak a, Mampuii'n a rawn hawng. Kan inmelh ngawt ngawt a, a nguiin ṭap hrep hmel a pu. A nu aw ka hriat rual chuan, ka lut ta vat a. In chung aṭanga rawn chhuk mek nu Sangi lam chu hawiin, "Nachhawkna in kawl mial lo maw? Ka lo lei lo laklawh sia, ka nuamsam lo lutuk a" ka ti ta zung zung a. 

Makti hmel a pu deuh naa, a insiamrem leh vat, "Mampui, va laksak rawh. Vawiin chu in bang hma ve ni maw?" Tiin min rawn en a. 

Remchangah lain, "Chu ka nawmsam loh vang chuan hawn hma ka dil tawp a,. " Ka ti nuah nuah. Mampuii chuan nachhawkna chu min rawn pe a, biak ka châk, a tan ṭha dawnin ka hre si lo. Filter tui chu dawhin nâ engmah nei lo mah ila min rinhlelh loh nan damdawi chu ka dawlh ta pawp a. Bengvar tih takah , "A bang pawh kha pe rawh, zanah te a khua a sik takin" Nu Sangi chuan a lo ti var a. Mampuii pawn min pe nghal. Ka hawi kual vel a, "Lindai hi a la haw na nge? A tlereuh zawrh ensak ka duh tak asin le..zungbun mamawh a na ve ta tlat" tiin ka nui lui a. 

Mampuii chuan nui chungin ,"Eh! I propose dawn mi? Hetah lo hruai ve la, ka hmu ve châk" a lo ti vat a. Inhrethiam tawn zeta innuihin, "Lutuk, mahse, a thikthu chhe lutuk a, buaithlak" ka ti ve vut. 

Nu sangi chuan, "Nizan aṭang khan ani pawh a nuamsam lo va, dawr pawh a nghak thei lo. Mama lo hawn hunah casualty-ah han tlan lawk rawh se.." a lo ti ve mawlh mawlh a. Zah theih loh chhuahin, "A remchan hlauh chu, keipawh ka inentir ve duh khawp mai.." ka ti a. Nuam ka ti vak lo. Nu Sangi mitmenga eng emawni lo lang zawk chu ka hmu hman. Hreh zet hian, "Nia, i duh leh kal ve la" a ti chuai raih. 

"Ka zuk haw phawt ange,. Ka zia tak leh ka rawn sawi leh mai ang" tiin an ṭawng leh hmain ka chhuahsan ta a. Ka insangmar nasa lutuk a, ka hah vek thei. He ina cheng mi pathumte hi an inthurual a nih ngat chuan kei ve mai mai chu min hmetmit hneh dawn lutuk. Phungbawm sawm chi a ni rih mang si lo. Police bawk ka rilruah an rawn lang a, mahse, mi chhungkaw buainaa ka lo inrawlh ve chiamna hian chhiatna te min thlen zawk ang em? Pa ber lah pawisak nei zo lo khawpa piangsual a ni si. Nu Sangi hi ka rindan chuan nu sual leh a pasal a thlâwp tlat vanga hetiang thutlukna hi siam a nih ka ring lo. Rahbeh a nih vang bakah a chhungten an ngaihsak bawk si lo va, a pasal a hlauh leh vahvaih a hlauh luatah hetiang thutlukna tenawm tak hi a siam a ni maithei. Ka ngaihdan hi a lo dik chuang miah lo thei bawk. 

Muangmarin rawng ka bâwl a. chaw ei châkna pawh a bo. Ka inbual harh ta phawt a. Kawngka kalh leh tê têin ka pa ka call ta a. Ka buaina leh ka thiltawn zawng zawngte chu a chinchhuakin engkim ka hrilh ta dap dap a. Mak a tih ve hmel kher mai. "Engtiangin nge ka hmachhawn tak ang?" Tiin a tawp ka khar a. 

Muangchang hian, "A zia lo hle mai a. Bawiha,. Thilmak tak pawh a nih chu. Police rawih ngam chi a nih bawk si loh chuan inrawlh buai lo law law zawk la ka duh mang e. Khatiang mi kha chuan pawisak an nei vak ṭhin si lo, i nunna atan te thleng hian a pawi thei ang tih ka hlau deuh, i nu phei chu engmah hrilh hauh suh ang che. " A ti ta charh charh a. Ka rindan chiah a ni. Ka pa hi chu dân pêla khawsak hreh tlat chi a nia. Police ka rawih theih si loh chuan keimah ngeiin ka hmachhawn a remtih ka ring lo. 

"Mahse, pa, an lainatawm unau sia..sawi tawh angin a û phei chu tunah thichhawngin a awm mêk a nia" ka ti leh hram..

"Ni e, an lainatawm unau khawp mai. A û zawk chu a tlanbo theihna kawng dapsak mai a finthlak ang. A nau zawk erawh engmah a chungah a la thleng chuang lo bawk a, ngaichâng rih deuh la..".a ti ve ta nge nge a. 

"Nia, ka tum rûk ve dan chuan a û hi han dam fel se, tlanbo dan tur dap pui mai ka duh, kha lamah pawh a rawn phei a ngai thut maithei a nia aw" ka ti ta hmiah a. 

"E! A lo awm duh phawt te chuan englai pawn kan welcome e" a rawn ti ve vat. 

Ka pa bula ka buaina ka sawichhuak chuan min ti awm nuam huai mai. Chaw pawh ka rin aia tam ka ei ve. Mahni ringawt hi chuan eitui a harsa ve lulai êm a. Thleng ka sil zo ka phone ka'n en chu, Mampuii msg a lo awm leh vâng tawh. "Kan kal dawn hnai asin. Hmanhmawh rawh" tih a ni. 3mins liam taa a lo thawn a ni a, an la kal loh beiseiin ka inthlak sawk sawk, ka wallet akin ka pen chho ta pâwk pâwk a. Ka beisei ang ngeiin an lo la kal lo. Zah pawh sawi thei loin nat hmel deuhin ka lut ve ta râwih a, an lo insingsa vel mêk a lo nia. Pu Siama chuan dam thluam hian min lo chhawn a, Mampuii sawi ang kha a nih a rinawm loh ngawih ngawih. Amah hi ka'n sawi leh hrâm ang e, pa valai ,kum 58-62 inkar bâwr vel, pa sang leh ruaukhuau, thahrui ngah hmel tak, a vun pawh uk deuh kharh mai a ni a. Mipat hmeichhiatna lam hawi hmel a put loh nen chuan aw..mihring hi zawng kan pawnlam landan hi engmah a ni ngai lo a nih hi. Bsa'n Lindai chu a rawn paw chhuak ta ruau mai. Mak ka tihna thup hram hramin ka lo pui ve ta vat a, "A pang pawh a sa vur alawm.." tiin a chal te chu ka dek a. Mampuii leh a nuin an kalpui ve dawn bawk a, motorah kan leng tawk chiah a ni. Pu Siama chuan kan kal hmain, "An admit a nih chuan cabinah invawmlut nghal mai r'u aw" tiin an nu a chah a. Nu Sangi chu ka chîk khawp mai, a hmelhmaia thlabârna lang zauh zauh leh inthup tum lutuka a inla zangkhai luite chu mi mawl tê mah ni ila ka hmuh hmaih bik lo. A khawngaihthlak letling zawk e a. Bsa chuan a khalh chak khawp mai. Lindai chuan pawnlam hmuh theihah hliam a nei lem lo va, a zawiin a chau takzet tih a lang,men pawh a meng peih lo. Zan hnih khat leka chutiang taka a lo chau hman chu an nghaisa nasa emaw an pawngsual rawn nasa a niang te ka ti rilru hial! Chhungrilah mipa ka nih angin thin a rim tut tut nia mawle..mipa pangngai tan chuan pawngsual hi thil tenawm tak a ni miau a. 

Damdawi in kan thleng a, Bsa nen kan zawn chhuak, keia inentir tum ve pawh chu ka dam mah mah a ni. Casualty-ah kan zawn lut a. Nurse ten an rawn en nghal vat vat, a bp te an han check chuan rapthlak khawpin a lo hniam! A lo chau ngawih ngawih pawh chu a mak lo ve. An admit ta chiah rêng a, an pa chah ang khan cabin âwl a awm leh awm loh zawt nghalin a lo ruak ve hlauh bawk a. Chulamah chuan kan insawn nghal ta rum rum. An han intihfel hnu chuan nu Sangi chuan min rawn enin, "I inentir dawn emaw tia" a ti ta chiah a. 

"Nia, puih in ngai sia..ka zuk chhuk ve leh lawk ang e" tia kal mai ka tum lai chuan, "Mama nen hian zuk haw nghal rawh u. Zanin chu tihian Mampuii nen kan lo riahpui ang. Mamawh chu naktukah kan rawn la leh mai dawn nia" a ti ta zung zung a. 

"Bs, min lo nghak ve lawk mai rawh aw. Damdawi tal ka inchawhtir ve loh chuan" tiin hmanhmawh zetin ka chhuk thla ta a. Lehlamah Lindai am admit chu a lawmawm ka ti, ka tan pawh puih theihna chance a ṭha dawn a. An ngaihṭhat nan nurse pakhat bulah , "Ka migrain hi a nasa riau a, damdawi min lo chawh mai teh a" ka ti ta ngawt a. Bsa rawn lan hmaa ka intihfel a ngai. Nurse chu a lo fel viau mai a, damdawi a hming ka hriat vawikhatna vasograin tih emawni min chawh a, strip hnih ka'n lei ngawt kha. Pum damdawi ka mamawh tho tiin pum damdawi a tui ka lei tel bawk. Bsa pawh a rawn lang ta a. An in lam panin kan haw leh ta vang vang. 

Kan ngawi dun rân a, kan ngaihtuahna kan kawm a ni ber ang chu. Mahse, an veng kan thlen phei takah chuan, "Zohma, i bialnu chu khawi a mi nge a?" A ti ta a. 

"Lunglei lamah daih a awm. Tunlai phei chu kan inbe ṭha vak lo" ka ti satliah a. 

"Kei chu bialnu nghet ka nei duh lo" a ti hmuk. 

"Nia, bialnu nghet neih pawh hi eng emaw chang hian a nuam lo" hriatthiam hmel tak hian ka ti vel a. A nui huk, "Hmeichhe pakhat tan chauh ka la inphal rih lo. Hmeichhia chu min siam nuam thiam apiang an hlu" a ti ham ham mai. Ka rilru tê têin, "Ekhai! Nang hi i pa i chhun em mawni le.." ka ti nuah nuah. 

A langah erawh, "I zei hmel riau mai a. Kei chu sawi tham pawh ka la nei ve hleinem" ngaisang âwm deuh hian ka ti a. Hmalam bih ngar chung hian, "Ka mutpui nawn leh hi chu pahnih chiah an la awm" a ti hniam raih. Chuta a hmel chu alawm nunrâwn hmel hian ka hre khawp a. Ka thlen tirha bungrua min thiar thlakpui laia a mize dam dup ang kha a ni tawh miah lo mawle. A mutpui tawh hmeichhia te an lainatawm mang e. A tan chuan hmeichhia te hi infiamna ang chauh an nih hmel si a. 

An in kan thleng a, kan inmangṭha nghal. Ka in ka luh chuan ruak leh mal riau hian ka inhria a. Ka sawi thiam loh lunglênna mak tak hian min tuam ka ti mai. Chu chuan ka taksa a tichau nge, ka mu nghal daih. Nizan lamah mut ka hmu ṭha lo bawk a, kar lovah ka muhil ta bawrh bawrh a. Mumang pawh ka nei lo. Ka harh chuan dar 6 a lo pel hlek chauh, mut ka kham hnêp hnawp bawk a, ka harh ta vâk mai. 

Tukṭhuan ka ei laiin Mampuii a rawn lang hlawl mai. 

"Ngati nge?" Ka lo ti hû a. 

"Mamawh ka rawn la dawn a. Mama inthiar hlanin ka lo chhuk zawk" a ti sawk sawk. 

"Chuan, nizan lamte in mu ṭha thei em?" Ka ti a. 

"Umm thei a ni mai ang chu, ka nu muthilh hlanin ka û bulah engkim ka sawi a. " A tih chuan, "Engtin nge a ngaih?" Ka ti vat.

"Ani pawn tlanchhuah chu a duh ve tawhin ka hria. Chuan thil pakhat min hrilh bawk a" a ti niah niah a. 

"Eng chu?" Tiin ka melh kâwk. 

A heh liak zauhin, "Ih, englo, nang hian min lo star tih" a tih chuan ka nui hawk. A sawi dan tehtawp chuan min tilâi vek alawm le. 

"A sawi dik a nih chu" ka ti ta ngawt a. Ani pawh a nui. 

"Mahse, pastor nupui tur i ni sia" ka tih zawm zat a, ner sakin, "I sual" a lo ti hlar. 

"Ruahmanna ka la nei lo va, vawiin lamah ka lo ngaihtuah ang a, ka rawn hrilh ang che. Biak theihin awm la aw" thunei âwm fê hian ka ti zung zung a. Ani pawh chuan, "Umm, ka phone a thi daih a, nizan khan..ka han chho ang e. Fimkhur la aw" tiin min rawn melh zauh a. A chho zui nghal. Ruak huaia ka inhriat ve leh ngawt chu. Lawmna riau erawh ka nei, ka star tih Mampuii'n a hre tlat! Inthup ṭît ṭêt a ngai tawh dawn lo va, min duh emaw duh lo emaw ka nunphung hloh khawpain ka hmachhawn tawh dawn lo va, chu chu zia ka ti tawk viau mai. 

Motor ka start laiin Pu Siama office tur pawh a rawn chhuak a, a dam leh dup tawh. "Kha Lindai lah chu an lo admit sia, a zia lo tak tak a ni. " A ti luam a, a sawi ngai lova ka hriatsa a ni. A zahzel mai mai a ni ang tih ka ringhlel lo. 

"Ni ngawt mai, engpawhnise, Pathian zarah a zia ve leh mai ang" ka lo ti ve bawk. 

Vawiin zet chu kan va lûn mep mep ngai ve le. Makimi pawh a ṭhu hman meuh lo a ni e. Kei pawh siam tur ka nei mawlh mawlh reng mai. Chaw chhun kan ei laiin Mampuii'n min lo call ta a. Ka kal hrang ta vat, "Ka û lakchhuah an tum, vawiin tlaiah" a rawn ti nghal tâwng. Phone siam tur kan ngah atalângin ruahmanna pawh ka la siam hman meuh lo kha a nia. 

"A va mak awm ve, a dam tawh mi?" Ka ti a. 

"Dam lo, ka pa a lo kal a, in lama inenkawl a ṭhat zawk tur thu a sawi. Hetiang a nih chuan ka û hi a thi thei mai ang, eng emaw tal ti rawh" a rawn ti ngawih ngawih a. 

"Mampui, Police ko mai ang hmiang " ka tih chuan, "A chi loh, an sawi mam thiam leh dawn lutuk. Chance kan nei tawh lo zawk ang" a ti tlat bawk si. Ngaihtuahna a va buai bawk ve mawle. 

"Aw le, a nih chuan i û kha a rukin biak tum la, nikhua kha hre lo der leh rih rawh se..chuan zanah chetlak kan tum dawn nia" ka ti ta tawp a, a kawtawpah kan ṭang tawh tih ka hria, ka puihna mamawh ngawih ngawih chu ka palliam thei mai bik lo. Pathianin he mawhphurhna hi ka lak a remti a nih takzet chuan kawng a rawn hawn zel ka beisei. Mihringte hi chu kan mak mang e, kan nun nawm lai leh hlim laia Pathian hming lam ngai eih lo kha, kan han tuarin buaina kan han tawk deuh a, Pathianah bak intukluhna kan hre leh si lo. Hei hi Pathian hlutna tilangtu langsar tak ni pawhin a lang.

Hawn pahin chawhmeh ka lei haw zuai a, kan veng pa nen kan la inhmu zui, chaw eiah mi sawm nghe nghe. In ka thleng a, rawng ka bawl nghal zar zar, Mampuii ka call leh ta a. 

"Eng nge chanchin?" Ka ti nghal var. 

"Aw i sawi ang khan ka hrilh a, zanin chu a riak leh rih thei dawn e" a rawn tih chuan ka thaw huai mai. 

"Aw le, zanah ka rawn kal ang. I nu kha tirhbo dan lo zawng r'u" ka ti ta thâwr..a hnawksak tlat si a. 

"A kalbo duh awzawng lo vang, kan unau bila kan awmdun an remti teuh lo" a rawn tih chuan mak ka ti lem lo. Mahse, tihdan dang a awm tho ang chu maw..beiseina hi han nei phawt mai ila. Ka inbual zawhah zanriah ka ei sawk sawk a, meizuk chawlh te ka neih hnuah ka inthlak a, damdawi ina kal tur chuan ka chhuak ta a. Kawtah Bsa'n phone a lo hmang a, an driver Zira'n motor a lo tinung mêk bawk. Chhuah an tum em mawni le. Zira zawk chu biain an chhuak dawn em ni tih ka zawt a. 

"Aw ka puin mitthi ral tur a nei a, ka hruai dawn" a ti a. 

Bsa phone hmang zo chuan, "Khaw nge i kal dawn?" A rawn ti lûng lûng.

"Kan veng ami te inah ka va leng ve ang e, a khawharthlak ve angreng sia" ka ti satliah a. A awih êm ang chu maw. Ding takin Damdawi in ka pan ta vang vang a, Mampuii nen kan inbe pah bawk. A û chu drip an khai mêk thu leh a nu chu an veng chhung ami damlo awm vete kana a chhuah thu a sawi bawk. Damdawi in ka thleng a, Nu Sangi hmuha lanmawi nan tiin eitur eng ilo ka lei nual a, an cabin lam chu ka pan nghal. Ka va luh chuan hlauh ang ngeiin Nu Sangi a lo ṭhu leh rûn tawh. Lindai pawh a ṭhu mu a, a luhtirh ai chuan a zia tawh hle, a mitmeng pawh a fîm ṭha viau. Mampuii erawh kil khatah nihawichi a lo kheh a, eitur ka kensak te chu ka han dah ṭha a. Nu Sangi chuan ka ṭawng hma hmain, "I lo kal chu a tihzia e, Zira kha ka hrilh naa, i haw hma zawk takin Mampuii hi phur haw ve nghal mai rawh aw. Pahnih hnih riah a ngai tawh lo" a lo ti zat zat a. Mampuii nen kan inmelh zawk. 

"Umm nia..mahse, i buai lovang maw?" Ka ti khawmawi a. 

"Buai lo ve, hei a zia sâwt tawh lutuk, naktukah phei chuan a chhuak thei tawh ang" a lo ti var a. 

Lindai lam chu hawiin, "Nula apumpa ti nge i lo damloh mai mai..dam vat teh, zungbun mamawh a na tawh a nia" nui chungin ka ti a. 

Nui lui tih hriat zet hian, "Ve che, kei pawn pasal ka la neih loh hi, nang aiin ka û zawk, nei thawt thawt bik lo vang" a lo ti ve a, Nu Sangi tan kan rinhlelhawm êm lo'ng chu maw. 

A nu a awm ve reng si, ka ruahmanna han sawi chi a ni bawk si lo, rilru a buai angreng hle. Mampuii chuan kan rilru hrethiam niawm takin, "Nu, hawh coffee min lo leipui, U Zoa awm lai a ni tho..coffee in zo ila, haw i la " tiin min rawn melh zauh a. Ka lo buk khum nghut. Nu Sangi lah chuan, " ww..nangmahin zu kal ve mai la aw. " Tiin a phun nang nang a, Mampuii lahin pangchang zetin, "Gatekeeper khu ka hlau alawm, a hur hmel si" a ti niah niah. An nufa an chhuak fel a. Lindai chu ka ṭhut hnaih sauh sauh. Ani pawn min bengkhawn hle tih a lang. 

"Ka duh dan chuan damdawi in aṭanga bo leh tlanchhuak angin thang la ka duh a. I chhungte hlata i awm phawt a ngai hrim hrim. Mahse, i nu hian a veng dawn si che a, engtin nge niang aw.." ka ti mawlh mawlh. 

A heh pet fânin, "A muthilh hnuah ka chhuak mai dawn mi? Mahse, khaw nge ka kal ang? Ka ṭhiante zawng zawngin min pui ngam lo vang, ka pain a lo vau tawh te an ni hlawm si a" a ti sar sar a. 

"Zan khat lek riahna tur tal i hre lo em ni? Zingah chuan ka buaipui thei tawh che ang a" ka tih chuan a chhing vang vang a. Ka lainat takzet. A ṭhiante pawh pantir ngam lo khawpa pa nunrâwng a lo nei hi..engtin chiah nge maw a lo vau ni. 

"Tlanchhuak thei ta lo ila, naktukah damdawi in kan chhuahsan a ngai tawh dawn sia. In aṭang saw chuan ka chhuak dawn lo. Mama leh ka pain min vil leh reng dawn" a ti mawlh mawlh a, "Chutak chu alawm, heta ṭanga i chhuah a ngaih. Mampuii'n zaninah i thawmhnaw leh mamawh lo siamfel vek se, ka hnenah rawn dah bawk se, hnathawk tura ka rawn chhuah pahin ka buaipui thei dawn che a" ka ti ta a. 

"Police an pun ngei dawn a, min zawng hmu vat ang. Kalna tur leh riahna tur khawpa rinngam ka nei lo, Zohma.." beidawng zet hian a ti a. 

Ka ngawih vang vang hnuah, "I phone i ak em?" Ka ti nghut a. 

A lu a thing nar nar. 

"Mampuii'n a phone hnutchhiah se, zanah i tlanchhuak thei a nih chuan min lo call la, ka rawn hruai ang che. Ka inah i riak dawn nia" ka ti ta a. Mak tiin a mengphâwk, "I â nih chu, i inah chuan min hmu nghal dawn asin" a ti hlar a. 

"Ni lo, ka inah zawn nachang che an hriat loh ka beisei. Kawng chu a awm zel mai ang, i nau nen pawh ruahmanna kan lo siam ang. Lungngai suh. I himna a pawimawh ber" ka ti charh charh a. 

Mittui tling piau hian, "Pawngsual rawn ka ni asin. Ka taksa mai ni lo ka rilru leh thlarau thleng hian a na chhuak vek..Zohma" a tih mêk laiin kawngka an rawn hawng thut. Lindai chu a chhing ta ringawt a. Kei pawh zahzelah ka phone ka phawrh a, ka hmet mual mual. Coffee chu min lo lak kep a, ka in ve leh nghal. Nu Sangi chuan, "A muhil elo?" Tiin Lindai a melh a. 

"Ka hre lo, in kal hnu khan kan inbe leh tawh lo, hahchawlh a duh a nih ka ring, a chau ve êm bawk a ni" ka ti duah a. Lindai pawh chu a chechâng duh lo. 

Coffee kan in zawh chuan hawnlam kan hnaih ta a. Mampuii pawh chuan a hawn tur ho a va la khawm a, a phone a hnutchhiah a ngai tih ka hrilh ngam chiah loh avangin ka text ta ngawt a. A en lawk lo lehnghal. Ka miscall ta ringawt a, a en ve ta chauh. Nu sangi a awm ve run si a, a phone a hnutchhiah tih a hriat chuan a ringhlel nghal dawn si. A û bulah chuan va ṭhuin a chal te chu a han dek a, a mutdan te chu siamremsakin chumi pah chuan lukham hnuaiah a phone chu a rawlhlut ta zauh a. Lindai'n a hrethiam êm ang chu maw..Nu sangi nen inmangṭhain damdawi in chu kan chhuahsan ta a. Hmabak a kô viau mai. Phungbawm tur mipa pakhat tal awm belh ve se ka awm a nuam deuh tur. Mi nazawng hriat chi ni si lo thurûk danglam tak a ni miau mai si a. 

Hawn kawngah Mampuii chu thil awmzia ka hrilh ve nghal char char a, a ngaithla uluk ngang mai. Ka motor pawh an in thlenga khalh luh chi a ni dawn lo, "A chhia" tia an in chhak rem laia dah mai a ngai ang, zan laiah ka chhuah a ngaih thut takin. An in aṭanga la hla ve deuh hlek kawng zau laiah ka hung a, kein an in lam chu kan pan dun ta hnak hnak a. 

Ka uang châk ta tlat, "Pastor nupui tur hetia zana kalpui thei nih hrim hrim pawh a inchhuanthlak hle mai a" ka tih duah chuan ngei hmel zeta min rawn melh râwin, "I chhe mai e a. Sualthiam viau lo teh. Min star tih ka pa ka hrilh vaih chuan in luah tur i dap chawp chuk chuk mai ang" a ti tan tân a. 

"Ka star che tih hi i va sawi zing tak, nuam i ti awm hle mai a" ka tih leh chiah phei chuan ka hnungzângah a rawn chum awk, nat erawh a na hran lo. 

"Min star tawh suh, i na mai mai" thutak zawka a tih chuan ka ding dat, ani pawh a rawn hawilet a. 

"Engvangin nge ka nat ang?" Ka ti nghut a. 

En pawh min en lovin, "Ka û a awm tawh loh chuan target ka ni dawn asin" a ti ta a. Hei hi a nia ka rilru tibuai em emtu chu..mahse, Lindai nunnain a tawrh a hlauhawm tak êm vang a nia puih mai pawh ka duh tak ni. Lindai a awm loh chuan ama thisen ngei pawh nise a pa hian Mampuii a khawih hreh chuang lo vang tih ka ring, mi piangsual a ni tlat. Tin, Bsa'n a la chhun zui! An pafa rothap zet kara Mampuii talbuai tur ka mitthla chang chuan ka chhungrilah min hnawh up up zel..engpawhnise, kan thlir phawt aniang chu. 

"Hlauthawng suh, inringtawk tak khan awm la, i dolêt ngama i hmachhawn ngam phawt chuan, an raphrual miah lo vang che. Tunah chuan i û hi ngaihtuah phawt ang" ka ti ta ringawt a. Ani pawn a sawizui ta bik lo. An in kan thleng a, ka pengkawi ve ta lo mai. Ka motor chhiat thu chu lo sawi mai turin ka hrilh thung. 

Ka mu fel âwrh tihin Lungleia ka awm laia min duh der ve em êm ṭhintu, keiin duh luih ka tum pawha ka tihtheih ngang loh Saii'n min lo call a. A hmai ka zah êm vang hian ka pickup leh nge nge ṭhin. 

"Aizawl chu a nuam awm hle mai, i reh vang vang mai alawm le" a rawn ti a. 

"Chupawh ni lo, ka buai nghal char char alawm" ka ti ve vat. 

"Naktukah ka rawn zin dawn asin. Ka rawn thlenchilh maithei che ni" nui har har chungin a ti a. 

"A pawi hleinem, rawngbawl ka ngai dawn lo tihna a ni mai a" ka ti sam êt. A lo thleng tak tak ang tih erawh ka hlau ru viau. 

"Tak taka ka nu ka rawn incheckup pui dawn a, min rawn ṭâwiâwm ve ang chu.." a rawn ti a. 

"Tehreng mai..chanchin min lo hrilh ang a, khawi vengah nge in thlen dawn?" Thutak zawkin ka ti a. 

"Venghluiah, putea te bulah a niang. " A ti a. Kan inbe rei lem lo. Saii hi kan kum chu a inrual reng a, nula fel leh mi biangbiak thiam tak, hmel pawh chhe lem lo a ni. A ṭhiante aṭanga inhria kan nia, min lo star ve ngei a, ka ruih laiin ka nihpui rawk a. A hnu lehzelah sawi thiam chiah si loh hian ka nghet thei thlawt si lo va, a tan a hrehawm mai mai ang tiin ka then leh ta ringawt kha a nia. Mahse,tihian inhaw zui lovin kan la inbe ve ta reng chu a nih hi. Luck loh nak alaiin duhzawngtê lah hi kan han nei ve khanglang zel a! 

Lindai ngaihchân ngai tho mah se; zan rei lamah chauh a chet ka rin avangin tlem tal muthilh tumin ka chhing ta vang vang a. Ka mu hi ka mu nghet vak ngai lo, thawm eng emaw ri hlekah ka harh thuai zel. 

Ka phone nghawr dut dut pawh chuan min kaiharh rang hle. Ka en vat a, ka beisei ang ngeiin Mampuii hnen atangin call ka dawng. 

"Hello" ka tih rualin, "Ka chhuak a, Damdawi in thlang stepah ka ṭhu" a rawn ti ta a. Zing dar 2:42 a ni. Engtin nge gate a paltlang ang aw tih ka ngaihtuah a, mahse, chu chu a pawimawh rih ber lo. Ka tho vat a, ka inha sawk sawk. Dim takin stepah chuan ka pen chho ta pâwk pâwk a. 

Khawlai a reh tawh bawk a, ka thleng phei rang viau. Shawl hian a lo intuam hlân a.. hmanhmawh takin a rawn lut. Chak zetin in lam ka panpui a, motor chu a hmaa ka hunnaah bawk hungin, a ke chu ka vit thêp ta a, kun zauh zauh chungin an in chu kan thleng thla ta a. A reh vawng vawng mai. Stepah thawm nei lovin kan inzuithla a, ka in kan lut ta. Rin aiin a awlsam. Mahse, eng nge kan la tawn lehzel dawn sawi lawk theih a ni lo. Khumah ka muttir a, kei chu ṭhutthlengah ka mu thung. A vawt lem lo bawk a, a shawl bah lai kha ka sin a, a muthilh theih ve mai e. Ṭawng vak chi a la ni rih lo bawk a, in chung daihah awm mah se, zan reiah chuan thawm hi a ring hma êm a, fimkhur tluk a awm lo. Linda pawh chu a mu ngawi hle hle. Kan hmabak kozia ngaihtuah chang lêk lovin kei pawh ka muhil ta bawrh bawrh a. 

Ka harh chuan dar 7 a ri têp. Roomah ka va lut a, a lo la mutui hle. A bo tih an hre tawh ngeiin a rinawm a, an buai viau tawhin ka ring. Tu emaw ber an rawn chhuk thut pawha birûkna tur ngaihtuah vat a ngai. Room-a an hunsa Wardrope hmanlai chhuak ang lek lek chu ka'n enkual a, a hnuai ber chu mihring leng tawk vel a ni ngei ang, mahse, a risk a sang ka ti tho. Pawnah chhuahtir dawn ila, an ṭhenawm ten an hmuh a hlauhawm bawk si. Rilru a buai. Kawngdang awm ta lo chu an lo kal thut pawha Almira-a biru tur chuan kan inhrilh ta ngawt a. Lehlamah keimah min rinhlelh daih thu kha a awm bik lo. Theihtawpin ka fimkhur ve bawk nen. 

Rin ang ngeiin Mampuii zawk a rawn chhuk ta a. "An hre tawh..khaw nge amah chu" a rawn ti lut nghal. Room lam ka kawk zauh a, a va lut nghal thuai. 

An buai dan leh hriatchhuah dan vel ka zawh chuan, "Ka muthilh laiin ka pain min lo kaitho a, 'I û an hmu zo lo, i nuin min lo bia a' a rawn tia. Mama te nen damdawi inah kan phei nghal. Ka nu a lo mangang khawp mai a, nurse leh doctor te pawh an buai vek. Cabin atanga a chhuak lai hmu nurse pakhat chu a awm a, mahse, zung turah a ngaih avangin a lo ngaihven lem lo a niawm e. Gate keeper pawh an dâwp dawn. Damdawi in lamin police an hrilh ta sia, ka pa te chuan Police inrawlh lo se an duh zawk naa, an dang thei lo a niang. Chuan khua a var khan kan rawn haw phei ve chiah. Ka nu chu a ṭap reng mai. " Tiin. 

"Kei hi min ringhlel awm ten an awm em? Eng nge an sawi?" Ka ti leh sek sek a. 

Insiamrem tê têin, "I hming an sawi ri lo hrim hrim. Ka û ṭhiante emaw a bialpa emaw an ringhlel, mahse, bialpa a neih an hre bawk si lo va. A ṭhiante ho pawh an be kual vek dawn. Gate keeper kha an ngaichâng bawk, engtin nge gate kha i paltlang reng reng?" A û en chungin a ti a. 

Lindai chu a nui sak, mak ka lo ti deuh a. Chutah hâm leh bâi bâiin, "Thil harsa ni hek lo. Hmeichhe nihna hman ṭangkai hun a awm alawm. Dâwp engang mah se, a inpuang chuang lovang. A hna thlengin a tuar thei dawn tlat a" a ti sar sar a. Ka manthiam nghal mai. A rawn chhuak thei hrim hrim hi a lawmawm. 

"Nurse te hmuh loh khan engtin nge i chhuah theih? " Ka ti a. 

"Ka nu a muhil nghet ta maw tihah khan ka chhuak tawp a, nurse pakhat chuan min hmu. Mahse, toilet lam ka pan zaih a, chuan bawkvak deuhin ward ho kha ka kalpel a, a reh tawh hrim hrim a, veivak an awm tawh lo. Gate ka thleng a, keeper kha ka kaitho a, a bak chu in hrethiam mai ang chu.." tiin a nui sak a. 

Mampuii chu enin, " I phone kha la la, chho rawh. Chanchin min rawn hrilh zel ang che." Ka ti a. Buk nghat pahin a phone a la a. A û thawmhnaw leh mamawh lo lakkhawmsak turin ka ti bawk. A chho ta a. 

Tukṭhuan chu ka ei hmasa a, kawngka ka kalh hnan dawn a, amahin a lo inhnangfak ve mai a niang chu. Khaw en laia chhuahpui chi ni hek lo. Engmah la hre ve lo niawm takin ka chho ta a. Kawtah chuan Zira leh a pu an lo awm a. Ṭhenawm te pawh an lo zi ve nak nak mai. Hawihai takin ka va lut ve a. Nu Sangi chu a lo ṭap par mai. Mampuii pawh a lo ngui nghiai a. 

"Nu Sang, a zia lo hle mai a..engtia tih chi nge mawni le?" Ka han ti ve ngial a. 

"Ni e, hei a zia lo tak tak a ni. Khawiah tak awm ang maw?" Tiin a insût faih faih a. Nuam ka ti chiah lo mang e.

"Engtia hmalak nge in tum deuh, tihtheih te ka nei ve em?" Ka ti a. 

"Keini lam chet vak chu a ngai lo, Police an inrawlh tawh sia.." a ti chuai raih. A rilru tur ka hrethiam, inthiam lohna nen, hlauhthawnna nen a rilru a buai dawn lutuk. 

"A nih chuan, hnaah ka va kal ang e. Ka lo ngaihven ve reng dawn nia" ka tih laiin Bsa a rawn kal a. 

"Zohma ,khaw nge i motor i dah?" A rawn ti nghal. 

"Khi lai deuhah khian. A ke a thêp khanglang a. Vawiin pawh taxi ka hmang mai ang ka ti ringawt" ka ti nuah nuah a. Pawi tih hmel takin ka lang bawk. 

"A nih chu mawle, nizan khan Mampuii'n a sawi tak e" a ti ve mai a. Min ringhlel lo chuan ka hria, rinhlelh ngawtna chhan tur ka awm lo ve bawk a. min biak tam hmain ka chhuak ta daih a. Ka motor chu engtia tih chi nge niang aw ka ti rilru, min rin ka duh luatah a ke ka vit thêp khanglang si. A ṭhat vat a ngai, Lindai a ranglama ka hruaichhuah loh chuan a buaithlak dawn tlat. Engpawhnise, Dawr lam pan phawt mai teh ang. 

Taxi ka hmang a, a ṭawng duh ngei mai. Mahse, eng nge a sawi ka hre vak lo, ka rilru hmun dang daihah a awm sia. Mahse, "Nizan nula bo chu ka hawn lama kawng kan kha a nih ngei ka ring. Ks emaw ka tih kha" a tih thu chuan ka ngaihtuahna a rawn kaiharh dâwrh. 

"I hmu maw?" Ka ti hû a. Mak tih hmel lek leka min rawn thlek zauh hian, "Hmu e, shawl-in a inkhuh hlûn a. Mahse, a bo hun an sawi vel danah ka hmuh ngei kha a nih ka ring" a ti mial mial a. 

"Chuti chu amaha tlanchhuak a va nih mai hmel ve" ka ti zawi deuh sup. Thudang a sawi leh daih a, dawr kan thleng zui ta bawk. 

Rinpuia te chuan Linda bo thu an lo hre ve tawh a. Min lo zawt nak nak. Engmah ka hriat ve loh thu bak ka sawi lem lo. Rilru pe lutuk lo va hna ka thawh mawlh mawlh laiin Mala chu a rawn rak hlut, "Hei gate keeper kha a inpuang an ti" a rawn ti hlawl! Kan melh ta thap a.