Mampui 2

MAMPUI..(2)

Ziaktu : Toni Râlte

"Eng nge awmzia? Linda" ka ti nghut a. A chechâng eih lo. Chhuat lam a bih ran a, a lung a chhe deuh mawni ka ti. Han tih leh vak dan ka hre si lo. Kan ngawi dun ta reng a. Zu chu a thli sawk sawk a, a thawk khat piap. Ka lo en reng ringawt. Thawk la hawkin, "Ka pa dik tak pawh ka hre lo" a ti ta daih a! Rinpuia te khan he thil hi an la hre ve lo chu a ni phawt ang a. 

"A va zia lo ve, i nuin a hrilh lo che em ni?" Inthlahrung ru tak hian ka ti a. 

Nui chungin, "A teuh lo, ka hriat a hlau zawk. Ka pa mizia ka phawkchhuak hle pawh a duh loh nak alaia..ka piantirh atangin pa ka nei lo nghal a.." a han ti tê tê a. Zu chu ka in ve zat, "Chuan" ka ti zawm nghal. Ṭawng a nuam ṭan ta bawk a, ani pawh han dâwp leh i a ngai lem lo. Ka hriat atana ṭul tak pawh ni hran lo, a nunkawng zawh dan te chu a sawi ta mial mial a. 

"Ka nu pa hi Aizawl pa lar leh sumdawng hausa a ni thin a. Tunah chuan a thi tawh, ka nu nuṭa te hoin a sumdawnna an chhunzawm zui ta si lo va, tunah chuan tu khaw khain an hre meuh tawh lovang. Ka nu chauh hi fanu an nei a, ka pa hi an driver a ni ṭhin a niawm e. Chupawh ka nu û ka pu ṭawngsual azara ka hriat a ni. Ka nu nen an lo inhmelduh a nih ka ring, a rai ta sia. Ka nu min hrilh chinah chuan, ka pa chu ka pute chuan an duh lo bur a niawm e. A nuṭa te lahin kut te an thlak zui ta bawk nen, ka nuin thla 6 min pai tihin ka pa chu ka nute in aṭangin a chhuak a, khata a chhuah hnu khan vawikhatmah ka nu chuan a hmu tawh lo a niang. Ka lo piang ta a, ka pute damlai chuan duat ka hlawh, kum 6 ka nihin tuna ka pa nen hian an innei ta a. Kei pawh a fa ang tak takin min en ka ti mai, Mampuii te nen min enhranna ka hre ngai lo. Ka nu chhungte lam nen kan intlawhpawh ta vak lo va, ka pa chhungte lam lahin keini nufa min lo duh vak lo nen, kan inpawh em em chuang lo. Tihian keimahni chhungkaw bîl hian kan khawsa a ni mai. Mahse, ka pa hlawh a tam bakah Mama nen kan inchawm thei a, tumah kan mamawh hran lo.." tiin. Ka hriat châk em em hi zawh tawp mai a pawi êm lo'ng chu maw?

"A nih Mampuii chu tu lak aṭangin nge venhim a ngaih tak?" Ka ti zawi sup a. Na zet hian min rawn melh, nuam lo ka lo ti nasa. Ṭawng leh ka tum lai mêkin, "Brain wash a nih khi, ka nu leh pate hian a thluak an su vek tawh a. Ama duhzawng leh tuizawng, ngaihdan engmah a hre tawh lo. Ka nu leh pate tan a nung ve a ni tawp. Khitiang nun khi ka hua..mi chuan nu leh pate thuawih, nungchang ṭha tiin an fak fo va, mahse, a nun zalên lo lutuk leh vawikhat pian ve mana a duhdan ang pawha a awm thei lo khi ka lainat. Ka nu thisen kai a ni a, ka nau a ni tlat.." a ti ta mawlh mawlh a. A sawi dan tehdaih chu ka rin loh lam daih a ni. 

"A nih chu mawle..a puitling ang a, a zia chho ve mai ang chu" ka lo ti ve sasawi a. 

A hmui tipawrhin, "Ka ring lo. Mipa duhzawngte pawh a nei ve ṭhin. Mahse, ka pa te duhzawng an ni ṭhin si lo va, tikhian pastor nupui ni turin a single tlawng mai a nia" a ti hmiah mai. An chhungkaw inrêlbawl dan chu ka sawi ve phak awm lo mah se; Linda thusawi hi a dik a nih ngat chuan, Nu Sangi te chu ka dem khawp ang. Fate khuahkhirh chintawk hi a awm ve tlat. Mampuii duhzawng ka nih ka ring lo naa, min duh ve ngat se chuan an chhungkaw inhungna bang chu ka su hawng ngam khawp ang le..

Thildang kan sawikai a, kan titi ta hlut. Min beisei ang zawngin a khawsa lo naa, mi rawn nghen thuak thuak te, ka hnungzânga min chum awk awk te a ching roh a. Kan la inhrechiang lutuk si lo nen, awmdan tur ka hrethiam vak lo. Dar 10 a la ri lo deuh tihah, "An lo haw hnai tawh ang, ka han chho ang e. A bang kha chu nei mai rawh" tiin a ding hluai a, a pai awt awt chu a tluk loh nan ka lo dawm vat. Ani pawh chuan mi rawn kuah ve chat a, nui sakin, "Awmang ve viau lo maw?" A ti ta roh a. Ka thlah vat..kan inmangṭha zui ta nghal a. Pa lo min ti ru viau ang em tihte ka ngaihtuah a, a ho êm mai..te ka han ti leh thul. Ka muhil thei lawk si lo chu chhungkaw groupah lutin Mami chungchang an lo khel laih laihna chu ka va chhiar ve a. 

Mama'n, "Hruaia hi amah ngau ngauah a zu in bak han sawiselna tur ka hre hran lo a, mahse, mi sawi danin a chhungte hi an ṭha vak lo nge, mo chu sawi loh awmpui pawh nei thei lo an ni an ti tlat mai a. Mami lah mi tilawm thiam lo, a nih ang anga lang ve tawp chi a ni si..ka ngaihtuahna chu a kal thui angreng" a rawn ti a. Upa ber tih takah a thu hi a puitling thei khep khep a nia. Kei ka hil bul mai si. 

Ka nî te, ka nuteii te ho bakah patea te leh putea te ho chuan sawi nawi an nei hran lo. Hruaia kan khuaa a thawh reng te chuan a chhungte bula Mami hnutchhiah daih thu a awm bik lo ti zawngin an ṭang ve hlawm a. Ka pa rilru a buai viauin ka ring. Amah Mami lah chuan, "In thu thu..chutin ka duh huam lo" a rawn ti..a hahthlak ṭhin. 

Ka hriat loh karin ka lo muhil a. Ka harh chuan ka lu a na bûr mai. Kan in hnem ve bawk a ni. Zu in pawh hian chaw thlah loh hram ka duh avang hian tukṭhuan pawh tui ti lo chung chungin ka ei lui a. Inbual faiin rit bûrin ka hnathawhna lam ka pan ta a. Dawnga chiah a lo la thleng. Lindai phone ka kensak kha ka khawihsak nghal a, Rinpuia te pawh an rawn thleng chawpchilh ve nghal. Nula pakhat a rawn hruai a, a bialnu emaw ka tih laiin, "Zo, hei Putea fanu a nih hi, Makimi aw.." a ti zung zung a. Makimi chu nula tê chhe lem lo tak, pian pawh nalh angreng tak a ni. Mahse, a hmai a ki ka ti mai, a tilang senior..tin, duh aiin make up a hmang nasa. A felin min be nghal siam siam a, niminah khan dawr pakhat zawkah a lo va kal a, a nihna takah chuan kan hnathawhna hmun hi a lo vil ṭhin zawk a lo ni. Rinpuia a awm tho sia, vil pawh ngai lo turah ka lo ngai a. Ka ṭhiana hi an ring zo lehpek lo a ni ngei ang. Makimi chuan kan phone siam ṭhat tawh ho chu a neitu te hming a chhinchhiah nen a dah hrang nghal thlap thlap a, a man tur zat lah a chhut hnehsawh. Mala pawh a rawn thleng a, "K'u Kimi chu i lo kal ve leh thei ta maw?" A rawn ti nghal. 

Makimi pawh chuan, "Tlaia pawh i lo la tlai reng a ni maw?" A lo ti fiamthu ve a. An innel tawh hmel viau. Thingpui hâng kan in laiin Lindai'n min lo call mial a! 

"Ka phone kha i keng ta em tih rawn zawh che ka tum a" a rawn ti zangkhai vah.

"Keng chiang e, ka pi..ka siam zo tawh e" ka lo ti uang a. 

"Hmela, a nih chuan chawhnu lamah chhuah lawk ka ngai a, ka rawn lam nghal mai ang, engzat nge min charge dawn?" A rawn ti ve nghal zat. 

"Zanah show la a tawk mai" ka tih zawih sup chuan a khek tuar. Kan inman chho ṭan viau e. 

Vawiin chu customer kan ngah angreng, Makimi a bengvar êm a, keini lam chu kan buai ve vak lo. Nu pakhat a phone lcd kan thlaksak erawh a buaithlak ngang mai, a dawn char char a, Makimi lahin a phal bik si lo. Kil khatah kan lo nui kan lo nui mai. Chhun thingpui kan in zo, kan la thawh ṭan hma siin Lindai leh a ṭhiannu, amah aia hâng leh hmel pawh ṭha lo zawk an rawn lang hlawl. "Hawh, ka treat ang che" a rawn ti lâng lâng a. 

"Ka lo in zo chiah" ka tih pawn min sawm tlat si. Rinpuia'n ,"Va chhuahpui lawk mai rawh. " A ti a. Ka ding chiah tihin Makimi'n, "Ṭhiante u, min hrethiam u la, hei hna an thawk leh ṭan tawh dawn a. Hruai chhuah a rem lo tlat" a lo ti kha fak mai. Linda hmel chu a hnual nghal rawih. Makimi lah chu a tum deuh hmak bawk si, nuam lo ka ti letling. 

"Nia, i phone chu zanah lo la mai la tiraw..chuan thil kha.." tih pahin ka mitmei zeuh a, a lungawi chawpchilh nge ni nui chungin ,"Lutuk, kan va lam nghal ang e" tih leh kal an rual. 

Ka ṭhut tawh hnuah Makimi chu a rawn phei a, nelawm vak loh hian, "Hnathawh hun chhung chuan bialnu te hmuh pawh rem kan ti lo a nia. Chuan, zu in pawh" a rawn ti hmak hmak a. Mala te pawn mak tih hmel deuhin Makimi chu an melh. 

"Ka lo hria ang e, mahse, zu kha chu ka duty a tihbuai loh chuan ka zalênna leh ka duhthlanna a ni" ka ti rum ve ta ûl a. Ka ngaihdan a ni vak lo. A neitu tih vanga engkima mimal nun thlenga inthunun tum ang hi. 

A duhtawk mai dawn emaw ka tih laiin, "Khatiang hmeichhe zakthei lo ang phei kha chuan dawr an tiṭawp, rawn lang fo suh se" a ti ram leh hmak. 

Ṭawng ka tum lai takin Rinpuia'n, "A mimal takin i haw ve hrim hrim a nih hmel. " A lo ti ta hmak a. Makimi chu tum bûrin a phei ta nal nal. 

Mala'n zawitê hian, "Bro, ngaih khatah ngai rawh. A âi that loh ṭum chuan tiang kha..âi tê leh âipui a nei a.." a rawn ti sur sur a. Ka bu nghut ringawt. Ka mood a chhiat phah deuh naa, kan ban meuh chuan a hma ang tho ka ni leh tawh. Makimi nen erawh kan inbe leh tawh rih lo. Rinpuia chaw eiah ka sawm a, zana kan tihtur a hre ve kur nen, a hnar thei lo. Ka ina inbual mai turin kan inphur tlang nghal a. Motor aṭanga kan chhuk chiah tihin Mampuii pawh a scooty nen a rawn thleng ve chiah. 

Min rawn hmuh takah chuan, "In bang tawh maw?" Ka lo ti ve ngawt. 

"Umm, ka ṭhiante ka thlah kawi a. " A ti a. Sawi belh tur vâng tawk chauh hian min chhang ṭhin si a aw..Nu Sangi'n ,"Zohma, kha mikhual i nei leh dawn ni maw?" A rawn tih chuan ka phu zawk. A lo awm ve reng chu niin,. "Nia, a nih hi.." nui chungin ka ti a. Mampuii pawh melh zui hran lo chuan ka in lam kan pan ta nghal a. 

"A nu kha den hmel e, bro" Rinpuia'n a tih chuan ka ner sawk. Engvang nge mawni ka titau ringawt mawle. Linda thusawi kha a dik takzet a nih chuan Mampuii chu ngaihtuah buai lo law law ila a ṭha ang. Aizawl khawpuiah hian amah anga hmelṭha min duhtu pakhat tal chu an awm ve tho vang. Hei hi mipa rilru mai chauh a nia, a tak ramah eng nge ka nih ang ka hre lo. Rinpuia inbual chhungin rawng ka bâwl a, chawhmeh siam hi chu ka tihṭhan a nia, ka farnu te ai pawn ka thiam mah zawk. Bawngsa rêp hrang hnih lek ka bâwl a, anṭam ka tlak leh a, artui kan a ni mai. Hei chu ei dawn hnaihah. 

Ka inbual zawhah artui kang lehin chaw kan ei zui nghal. Lindai nena kan in bân kha chaw ei hmain kan lem ve ve, a tawk chauhin kan lem a ni bawk a, chaw ei a tui duh kher mai. 

"Zu ngawlveiah ka chhuak ringawt ang tih ka hlau riau " ka ti thut a. 

Rinpuia'n a ngaihna hre mang lo zetin, "Engvang chuan maw?" A lo ti hû. 

"Lindai hi a money sia, a show chuan ka hnar thei dawn si lo. " Ka ti a. 

"Kima sawi kha hrereng rawh aw. An in i luah bawk si" a lo ti daih. 

"Chu chu lawm, mipa nihna laiah insum zawh loh palh a awm ka hlau" ka ti ve mai bawk. Ka rilru tak pawh a ni. A tira inhîp tawn lem lo, inkalpah mai mai pawh hi han awmduna innêk reng chuan mak deuhin eng emaw hi a lo piang mai ṭhin. Chutianga awm ve chu ka hlau. Hmm..thlir zel phawt teh ang. 

Beisei ang ngeiin Lindai chu a rawn chhuk thla ta vat a, a phone pawh ka lo pe. Local satliah in ai chuan whiskey in te chu kan châk ve lo thei lo va, kan hnar leh thei dawn ta lo. Nizan lama kan inkawmna boruak kha chu engmah a rawn sawi tawh lo va, kei pawn sawi kher ka tum lem lo. Dar 8 pelh vel aṭang chuan Rinpuia nen an inhnaih sawt riau. Rinpuia chu ka mitmei ṭhin, a hrethiam tawh si lo. Duh aiin an rui ka ti, kei tal ka harhfim a ngai tiin ka in zawm duh ta lo va. Mami'n min lo call bawk nen, roomah ka luhsan ta rih. 

"Zo, Hruaia hi a tumruh ve ropui sia, kei chu tihngaihna ka hre tawh lo" mangang aw zet hian a rawn ti a. 

"Engtin nge a tih a?" Ka ti zawi sup. 

"Min rem lo a nih chuan ka ru tho ang che te a tia, dik tak chuan ka lo hmangaih ve tho bawk nen, ka nute rilru ka hre deuh reuh bawk si, a hrehawm" a rawn ti mawlh mawlh a. 

Nu leh pate thuawih tak mah nise, a tawpkhawkah chuan a hmangaihna chu a rawn lang lo thei bik lo niin ka hria. "Ka nute ka lo sawipui ve dawn mi niang" ka tih chuan, "Ka hre lo, ka pa hi chu a nêm reng, ka nu hi zu a lo in ve ṭhin vang hian a hel tlat a" a ti ṭiau a. 

"Ka nu ka lo be dawn nia, engpawhnise, nang pawn neih i duh tak tak a nih chuan Hruaia pawh zu kha bansan tura i hrilh a ngai" ka ti ve a. 

"Hei a in lohna chu a rei ve tawh, ka sawi zing bawk a" a rawn ti ve mai a. Ka nu ka biak tur thu hrilhin kan inbiakna kan titâwp nghal. 

Ka nu call ka tum mêk laiin ka in kawngka chu na zet hian a rawn inhawng ṭhuai a. Ka phu zawk nghe nghe. Ka va chhuak ta vat a. Nu Sangi leh Mampuii an lo ding reng mai. Rinpuia leh Lindai te pawh an insiamṭha nghal sawk sawk a. An phâwk teuh kher mai a..

Nu Sangi chuan, "Rawn thlawk haw nghal rawh. I pa rawn haw hma ngei khian" a ti ram hmak a. A mitmeng pawh a ling hlar mai. Keini tan chuan sawi tur a vâng duh kher mai. Mampuii pawh chuan thinrim hmel a pu..

Lindai lah chuan ngaihsam zet hian, "Ka leng ve a ni mai a, eng nge? Tihsual ka nei em ni?in hneawm mah mah" a ti hlak hlak a. Nu Sangi chuan Lindai chhip sama rawn kêkin chhuatah a hnukthla ta a. Rinpuia che lai kual vel chu a nuihzatthlak miah loh. 

"I va zak lo pêng pûng tak, i zu in te, i fawr ṭhin te hi hre lo turah min ngai suh. Tunah lah mipa inah i leng a, a tu hi nge maw i chhun a, hetiang em ema i sihhnîp ni?" Nu sangi aw chuan ngaihno a bei tawh lo viau. Linda chu a nui lui nghek a, "A tu nge maw ka chhun ang le? A hnute tui ringa ṭhanglian ka nih angin min hringtu ka nu ngei ka chhun tur a ni dawn lawm ni?" A ti ta hmiah mai. Nu Sangi thinrim lutuk chuan keh leh a rual a, Rinpuia'n min chet khalh, "Ngawi teh, ka pi, insûm hram teh, khawngaihin" a lo ti vat a. 

Nu Sangi a ling lehzual, "Kal teh, nang hi rawn inrawlh hlek suh. Police ka mantir nghal loh che. Ka fanu i lo awm fâlpui pawh hi thil dik a ni lo hrim hrim" a ti ta zêk a. 

Lindai chu felfai taka dingin, "Ka nu, a tawk. Midangah ṭuan tawh suh u. Keimah ngeiin ka pan a, an ni hian engmah tihsual an nei ve lo. Haw ang u" a ti dam thlap. Chulai hunah kher chuan Lindai chu ka lainat, a mitmenga tawrhna inphûm chu a rawn inlar chiang ta bawk nen. 

Mampuii chuan min rawn melhin, "Zu in mi hrim hrim hi kan in luahtu atan kan duh lo asin. Ka pain a hriat chuan a hnawtchhuak ngei ang che. Chuvang chuan in dang zawng ṭan rawh" a ti ta fak fak mai. A thusawite chuan mi run lutuk a, ṭawng nachang ka hre lawk lo. 

Mahse, "Tehreng mai. Ka lo zawng ang e. " Ka ti ve ta ngat a. A ner sak leh a nui lui kual vel chuan amah ka duhna leh veina te kha a vawmbo duak nia mawle! Chutiang taka brain wash leh midang engah mah ngai lo thei hmeichhia chu ka ngaihven zui tawh lo chiang ang chu..mai mai a..

Nu Sangi pawh chuan, "Ni e, tun tut tutah i chhuak ang tihna ni lovin hetia zu leh sa nen in nih fô dawn chuan in dang luah tur lo zawn lawk a pawi lovang" a ti kha ve fak a. 

Ka chhang tawh lo. An chhuak lai chu ngawi rengin kan thlirliam tawp. Thinrimna hlirin ka khat. Rinpuia pawh chu a meng rum ûl tawh, "Ve khanglang a..naktukah in luah tur kan zawng nghal ang. Chhungkaw maksak lutuk an nih hi" a ti ta chiah rêng a. 

"Nia, kan zawng dawn nia. Mahse, kan chhuah hmain a tawp nan bengchheng ka siam khawp ang" ka ti hmuk. Ka tumdan a ni tak tak. Linda thusawi zawng zawngte kha a lo dik vek tihna em ni ang? Zu in hi thil ṭha chu a ni miah lo, kan hre vek. Mahse, an fanu zawkin a rawn keng thla a, bengchheng siam miah loin leh mipat hmeichhiatna lamah pawh tlan lem lovin kan in ho ve a ni mai. Eng nge chu chu an lo ngaihmawh em em ni. Mampuii mawlh kha, ngeinain ka khat tawh. Ka lawm daih zawk. Pastor nupui rilru kha zet a la ni mawlh ang chu..

Ka nu pawh ka call zui ta lo. Rilru a nu but a, a ṭha lo. Mut pawh a tui nek lo ve. A tukah Rinpuia nen kan chhuak dun leh a. Motor ka tihnun laiin Mampuii class kal tur a rawn chhuak ve mêk,. Min melh lo bawk a, ka melh bik lo. Hmeichhe induhtawk leh chapo tak ngaihven nan hun ka nei lo. A scooty chhuahna dâl tawk velin ka ding lui tlat si, a rawn kal ta nge nge a. 

"Min dâl a nia" a rawn ti nghal tâwng. 

Melh pawh melh lo hian, "Sorry" ka ti nghut a. Ka tlanchhuak nghal nal nal. 

Rinpuia'n, "A chapo reuh êm mai" a ti hluk a, "Ka ngaihven tawh lo nghal" ka lo tih zawm zat. Dawr kan thlen chuan Mala leh Dawnga te bulah in luah tur min lo dapsak turin ka ngen nghal a, a chhan min zawt lem lo chu mak ka ti deuh. An lo ngaihven tur thu an sawi ve kha maw..

Lunch ei zawhah ka nu ka be ta a. Mami nen kan inbiakna te ka sawi mawlh mawlh. A ngawih vang vang hnuah, "Ni e, zaninah kan han sawiho leh ang a, chutin ka hel hran hleinem. Mami hlimna tur a nih chuan kan hnial reng reng lo ve" a ti ta thlap a. Rilru a nuam ta huai e. Nupui pasal inneih hi risk a nihna chen a awm ve miau a, inneih hmaa fel leh ruihhloa fihlim pawh inneih hnuah nasa theihtawpa ti an awm ve leh a. Mihring hi zawng pumkhat nih hma hi chuan inhriatchian tak tak theih a ni ṭhin lo. 

Makimi pawh vawiin chu a mood a fuh a niang, a felin min be sek reng a, a ninawm lek lek zawk. Lindai a reh vang vang mai. A tira ka ngaih theih vak loh kha a dinhmun diktak ka'n hriat takah chuan ka khawngaih riau, a nun a chêp ka tihpui. Ka hmuh chinah ringawt pawh an in chhung kha a nawm loh hmel ka ti. Dar 3 bawr velah ka rin loh lutukin Mampuii leh a ṭhiante pahnih an rawn lang hlawl mai. Mampuii phone chu a thlauh avangin a lo nung thei lo a lo nia. Siamtir turin an lo kal a lo ni. 

"A tu saw nge in in luahtu chu.." a ṭhiannuin a tih sar sar chu ka hrereng. Ka hawi duh lo lui ve tlat, Rinpuia lah chuti bawk. Dawnga mamawh lamin a chhuak a, Mala lahin khawih lai a nei si. Mampuii chu ka dawhkan zawnah a rawn ding a, "Ih, englo, ka phone a chhia a" a ti niah niah a. Amah pawh en lem lo chuan, "Chuan" ka ti hmuk. 

"Aa..min ensak lawk thei ang em?" Pawisawi lo ber niawm chuan a ti a. Ka theihtawpa tlawm chhuahin, "Khawi maw" ka ti ta nge nge a. A phone chu min rawn pe a. 

"In nghak dawn nge in dah dawn?" Ka ti a. 

"Kan nghak mai ang" a tih avangin, "Sawtah sawn lo va ṭhu r'u" tiin ṭhutna ka kawhhmuh a. Ka chezia chu mak a ti ve maithei a ni. Chutianga ka zaha ka tihṭhat viauna chhan tur ka hre lo ve. A phone chu siam a lo harsa lem lo va. Ka siam zo ta vat. Makimi kutah pein aniin Mampuii chu a lo pe ve lehchhawng a. An haw tur rawn hawilet min rawn melh zawk chu ka va hmu fuh ve kher, ṭêk chhawk chu a la awm. Mahse, saw angel ang maia pawisawi lo chhungril nun saw ka nei châk lo. 

Rinpuia'n, "Free te kha a beisei ngei awm sia, a chawh ve e" a rawn ti sur sur a. Ka lo nui hawk ringawt. 

Banah mamawh ka lam kawi a, ka tlai viau. Motor ka hun ṭhat laiin Nu Sangi a rawn chhuak a, he nu lah hi a hman mai sia a. Nizan thil thleng kha engmah a hre tawh lo emawni tih tur hian, "Chaw lo ei rawh aw. Ka chhum kep che. A tlai tawh sia" a rawn ti nia! Hmm..

"Ngati maw?" Ka ti hû a. 

"Vawk lu ka bâwl a, tui i ti ngei ngei ang, zuk intifai la, Mama kan la nghak tho" a ti leh zat zat. Eng emaw tak min hrilh duh an nei a nih ringin ka hnial ta lo. Engtin pawn min ti se, pawmzam thei turin ka inpuahchah lawk thung. Fai ser sawrin ka chho a, Bsa pawh a inbual mêk a nih hmel. Living roomah tv enin an lo ṭhu ṭhap a. Mampuii pawh a pa bulah no zetin a lo ṭhu. Lindai hmel chu ka ngaihbel nge a ngui nghiai mai, "Vawiin dawr i nghak na nge?" Ka ti khawmawi a. 

"Nghak e, mahse, chawhnuah ka haw

,Ka awm a nuam vak lo va" a ti ve mai a. An boruak chu ka sawi thiam chiah lo, a nuam lo a ni tawp. Pa Siama hmel dam thlup phênah chuan eng emaw tak a awm ang tih ka ring. Bsa inbual zawhah chaw ei an siam ta a. Bar hnih thum vel ka bar tawh ang tihin pa ber chuan, "Zohma, i in luahtu hmasate chhuah chhan kha i hre tawh em?" A ti ta khauh a. 

"Hria e, an zu rui bengchhen ṭhin vang a ni lo'm ni?" Ka ti satliah a. Engahmah ngaih loh ka tum ve tlat. 

"Ni chiang e. Kan chhungkuaah zuk leh hmuam takngial tih pawh ka remtih loh laia ka in luah tu ten ruihhlo an tih chu ka enliam thei lovang. Nang pawn lo hria la ka duh.." a ti ta chat chat a. Hnuailama ka kut humruh chungin, "Zu in chauh te chuan mi pawi a sawi em ni? Zu ruiha midang tana hnawksak khawpa kan tala kan thawm a ring te a nih ngawt loh chuan" ka ti ta ngat a. Lindai nen kan inmelh zawk. 

Pa Siama chu a inthunun nasa hle tih ka hre thei, "A dik alawm. Kan hriat leh hmuh loha an lo in a nih chuan thuhran..hmeichhe hruai luh angte kha rem kan ti lo" a ti chhum hmuk hmuk a. 

"Hmeichhia ka la hruai lut miah lo. Tiang kawngah chuan ka hlei ve lem lo" ka ti ve leh hmak. 

Bsa'n, "Duhtawk teh u, Pa, in ti lutuk deuh ṭhin. Over taka nun hi a ṭulna a awm lo. Zohma, engahmah ngai suh. " A lo ti ta bawrh bawrh a. Ka thaw lâk pawh a ziaawm ta deuh. Engmah an sawi zui ta lo va. Kei pawh ka puar khawp mai. Chaw eikhamah ka ṭhu khawmuang ve leh a,. Mampuii nen chuan kan inhal ni berin ka hria, ka be lo va, min be bik lo bawk. 

Bsa chuan, "Nula rim ve ila,. Kan veng nula fel deuh rim tur ka hria a nia aw" boruak tihzangkhai tum zet hian a rawn ti a. 

Eng emaw zawnga min lo ngaih loh nan tiin, "Ngawi teh, lênlâm hi ka ti vak lo, bakah pakhat tan ka rinawm ve bur tawp a" nui chungin ka ti a. Bsa pawh chu a khi suk mai. Ngaihzawng nghet nei anga insawi mai kha a thain ka hria. Rei pawh ka awm ta lo. 

Chhungkaw groupah ka lut a, palai an rawn kal leh huna chhan dan tur an sawi ho nak nak. Ka nuin Mami rilru a lo hrilh hre hlawm tawh nge, an nêm hlawm ta viau. Inrem mai chu an thutlukna a ni ta. Inneihna hlawhtling tak nise ka ti khawp mai. Zu pawh a la awm reng naa, ka hne rih. Khumah ka mu tawh naa, ka harh tulh tulh. 

"Mu tawh rawh, i mengrei" Makimi teh nawlh chu. 

"Muhil thei lo" ka va ti ringawt. 

"I lung a lêng a niang" a rawn tih chuan, "Lenna tur te hi awm ve se ka ti" ka va ti ve zat a. Muthilh theih loh laia biak tur an lo awm ve hian a zia. 

"I tante chuan an tam ang chu" a rawn tih chuan ka nui vur vur. Ka luck lohzia a hre lo a ni chiang. 

"Tam nise ka single nang..nang pawh i va mengrei ve" ka va ti ve a. 

"Nia, kei pawh single meng satliah" a rawn ti ngei. 

"Bialpa nei vat rawh" ka ti ta ngawt a. A rawn reply hmain data ka off daih. Rilrua eng emaw nawm lohna riau ka neih hian midang hi ka hne zung zung zel. Dar 1 a rik tawh hnu pawn ka la zungin mei te ka la zu hluah hluah.. dar 2 a pel hlek tihin ka chhing siar siar tawh ang tihin dimtêa ka kawngka rawn kik thawm ka hre ta tlat! Ka hresual a niang tiin ka'n chhing leh a, a rawn ri leh dat dat. Rang lutuka ṭhu chhuakin kawngka chu ka va hawng ta a. Ka tawlhhnung dâwrh. Mampuii a ni tlat! Mak ka ti lutuk chu ka mit ka nuai chawt chawt. A sam a hnawk niaih a, a hmelah thlabar hmel a lang thei bawk. 

"Lo lut rawh" ka ti chhuak thei ta hram. A rawn lut vat a, kawngka chu amah zawkin a kalh zui hmiah. Ka la hamhaih deuh avangin engmah sawi tur pawh ka hre lo. Ka hmaah tak rawn dingin ka mitah a melh kalh a, "Ka u khi chhanchhuak rawh" a ti ta ṭiau a. Makti zeta ka melh hû laiin, "Ka û Lindai hi ramhuai lak atang khian chhanchhuak rawh..khawngaihin" a ti leh a, a insût zui hlawp hlawp. Ka harh chhuak ve ta chiah. Mampuii ṭap insût hlawp hlawp chu kuahin muangchangin ka ṭhuttir ta a. 

Thil thlen dan chu hriatthiam a va har bawk ve mawle..

"Eng nge a awmzia? Mampui.." ka ti a. Insûm tum takin a heh a pet fan fan. A bianga mittui sur sur zung zung chung hian ngenngâwl takin min rawn melh a. 

"Ka û Linda khi thi daih se a tan a nuam zawk ang. Ramhuai lak aṭanga chhanchhuak tur an awm si lo. Keimah vang chauhin kan in a chhuahsan lo va, mahse, kei chuan chhuak se ka duh. A tawrhna hi ka hmu thei tawh lo. Pui rawh, khawngaihin pui rawh aw.." tiin min ngen ta ngawih ngawih mai le..

A hrilhhaithlak mang e. Engmah thu awmze diktak ka hre si lo. A kut ka hum a, "Sawi chiang rawh" ka ti hrâwk. A lu thing nar narin chhuak em em hian a ṭap ta a, ka darah a lu a rawn nghat bawk. Ka lo kuah ta vat a, a hnungzângah ka chul hliau hliau, "Ymm i duh chen chen han ṭap phawt teh le..ka lo nghak thei che a nia" ka ti ta a. Rilru leh ngaihtuahna a vak kual nasa hle mai. 

A ṭap zo ta a niang. A la inhnit faih faih tho a. A ṭhut dan a siamrem tê tê a, a aw thian leh kharh kharhin, "Ih maw, Kan in chhung khi hremhmun a nih khi. Nikhua ka hriat tirh aṭangin ka nu leh pate khi sakei hlauhin ka hlau tawh. U Lindai hi apa fa a ni ve lo tih ka hriatna a la rei lo. Engkim ka sawi chuan chhungkaw mualphona a ni dawn a. Mahse, ka tuar thei tawh lo. A hmaa he in luahtu U Marama te chhuah nachhan dik tak pawh ka û in an puihna a lo ngen a, ka pa ten an hre leh sia, chuvangin chhuanlam dang siamin an hnawtchhuak ta a nih kha. Ka û hian hetiang tak hian tawrhna a hmachhawn ang tih ka lo hre ngai lo. Kum 4 liamta khan ka hrechhuak ta chauh. Mak ka ti a, rapthlak ka ti bawk. Ka û chu ka pa hmei a lo nia! Ka nu pawn a hriatpui vek. Ka pa fa a nih ve loh vangah ka ngai a. Mahse, mak ka tiin rapthlak ka ti tho. Ka û rilru hah leh mangang chuan harhfima khawvel hmachhawn a ngam lo va, a rui ṭhin. Bialpa te pawh a nei ve ṭhin, mahse, ka paten a bialpa te bulah bansan turin an hrilh zel si, bakah a ṭhiante nena an han lenchhuah emaw an riahbo ve chang ten police pun an tum zel a. Vawikhat phei chu FIR an thehlut hman tawh. Ka û in a ngen nasat êm avangin an lalet leh ta hram a ni. Ka nu nen an ṭan dun tlat avangin keini tan hneh ngaihna an awm si lo. Ka û hian vawi hnih nau a titla tawh. Ka pa fa an ni. Heng zawng zawng ka sawi chhan chu ka hmuh tirh phat che atang khan ka mi rinzawng tak i ni a, Ka û ngeiin ka bulah i mizia a rintlak thu a sawi bawk. Nizan thil thleng avang khan ka pa chuan ka û chu in chhuahsan a phal lo va, nimin khan dawr pawh a nghak lo, dâwt a sawi a nih kha. Room thimah an kalhhnan char char. Pasal neih an phalsak lo va, tikhian a damchhung hun hmantir an tum niin ka hria. Pa hrang ni mah ila ka û hi ka hmangaih a, a saltanna atang khian chhuak se ka duh ngawih ngawih a ni. Mahse,ani chuan keimah min ngaihtuah vangin in chhuahsan a tum si lo.. kan in chhung khi a hrehawm êm mai..kan nun a chêp lutuk asin" a ti ta dap dap a. Heng zawng zawng hi ka mumang mai mai a ni lo tih ka hriat chuan mak tihnain ka khat a, rapthlak ka ti hluah hluah. Pawnlam landanah sawisel bo angin an lang lawi si! Mak ka va ti ngai ve le..

"Bsa'n a hre lo em ni?" Ka ti a. 

Za lo zet hian a nui hul hak, "Ani khi maw ka pa uitê a nih khi, ka pa spy a ni bawk. In lamah ka pa awm loh hlanin eng nge thleng a hre vek zel. Tunah pawh hian ka rawn chhuak ru hi a hre leh tawh maithei. Kei tak hi chuan nghaisakna ka la tawk lo. Mahse, ka hmabak hi a êng bik miah lo" a ti a. A mittui a hul ta bawk a, tumruh leh luhlul hmel a pu tawh. 

"Heng hi a tak tak maw? Mampui" ka ti thlâwt. 

"Awih a harsa a niang tiraw? Ni e, tuman an awih thei lovang. Mahse, a dik tlat si a ni. Ka hlauh luat vanga an thuawih ka ni, mahse, ka û ang khi chuan min raphrual ve ngai lovang" a ti nghet charh charh a. A hmaa ka lo ngei rukna, chapo, induhtawk ka tihna te kha vawmbo ang duak an ni leh tawh. Ka hmaa ṭhu mêk hmeichhia hi chhanchhuah ngai, puitu mamawh ngawih ngawih hmuhin a ni ka hmuh ni. 

"Han chho tawh rawh. An hriat vaih chuan i tan a pawi dawn" harhchhuak thutin ka ti a. Ni e, ka hlauthawng takzet. 

"Min tiam phawt rawh" a ti sap. 

"Umm, ka theihtawp ka chhuah ang. Ti nge in unau chuan police in pun mai loh?" Ka ti leh hnuhnawh a. 

"A sâwt hleinem. Vawikhat ka pun tawh a, rilru lama chiang lo, depression nei mêk angah min chhuah daih alawm. Police ho pawn chutiang turah chuan an ngai ringawt. Khawi hmunah mah ka zalên ve lo. " A ti ngui nghiai a. Ka chil ka lem khawlh ringawt. 

Mahse, "Engpawhnise, i number min pe la, chanchin kan inhrilh zel ang a, i û pawh kawng ka lo dapsak ve dawn nia. Nangpawh inenkawlṭha la, i û dinhmuna i din loh nan fimkhur ang che" ka ti mawlh mawlh. A bu nghat a, "Pastor nupui nihtir min tum alawm.."..tiin za lo zet hian a nui a. 

"I duh ve rêng em? Pastor nupui nih chu?" Ka lo ti vat. 

"A teuh lo, tin, min neihtir tak tak ring buai duh suh. An hmaiphihna mai chauh alawm. Ka pa hi piangsual a ni tih hre ta che. Ka nu chauh hian a dawl zo lo, ka nu hi ka hua" a ti ram hmak hmak a. A mitmeng pawh a de sawr sawr mai. Ṭawng leh ka tum lai takin step rawn ri thla thlep thlep mai le..kan inmelh hâw a. Lung a phu nghal dûp dup thei mawle..

Hmanhmawh lutukin roomah ka nawr lut, mahse, han birukna tur a vâng nasa mai si. Rilru lah a hmanhmawh tawh. Room thlanglam tukverh chu ka hawng rawk rawk a, lei aṭanga hniam tê a ni bawk a, Mampuii chu ka hlâng chhuak vat vat, tukverh ka khar rualin kawngka an rawn kik ta nghal. Thawm ka chhuah ngam tawh lo, muhil ang chiahin min hria se ka duh a ni. A hma aia ringin an rawn kik leh a. Thophang aw niawm tak hian, "Tu nge?" Ka ti ṭial rûan a. 

"Zohma, lo hawng lawk teh, keimah Bsa" a rawn ti ta lauh lauh a. Zing dar 3:02 chiah chiah a ni. Mampuii kha khawiah tak biru ang maw..

Ka va hawn chuan hmel danglam lem lo hian a lo ding ran a. "Eng nge ni ta?" Ka ti nghut. A hawi kual ruai a, zawn chu a nei a ni. 

"Mampuii a lo kal em? A roomah a awm lo va" a ti ta chiah a. Inthunun hram hramin, "Kal nang..ngati nge a? A va zia lo ve" makti awm zet hian ka mengphâwk lui a. 

Min chhang tawh lo chuan room lam a pan nghal hmiah, ka lo thukru ang tih a hlauhawm ta hle. Birûkna tur âwm ang a vâng ve bawk a, hlauthawng takin ka lo thlir reng ringawt. 

"A lo kal lo ka tih kha..a thuhrimin hetah eng nge a rawn tih ang? Biak pawh kan inbe ngai mang lo a nia" lungawi vak lo chuan ka ti a. 

Inthiam lo hmel pu deuh hian, "Aaa..a awm tak loah chuan ka rawn zawng mai mai. Ani hi rilru lama harsatna nei a ni sia, zana chhuah thut hi a ching a, kan lo veng reng hman si lo, kan hlauthawng deuh mawle" a ti nuah nuah a. Rilru lama harsatna nei angin a nau a chhuah chu a nia! wih harsa ka la ti rih tlat. 

"Khai aw! A va zia lo êm. Ka lo zawnpui dawn che mi?" Ka ti nghal vat a. 

"A ngai lovang, khawiah emaw a awm ang. In chung lamah te hian a lo tawmbo leh a ni maithei" tiin chhuah mai a tum a. Enchhin nan hrim hrim tiin, "Police hrilh mai chi te a ni em?" Ka ti a. Rawn lehhawi zawkin lungawi vak lo hmel a pu bawk, "A ngai lo, hei chu chhungkaw buaina a nia, pawnlam mi chu lo inrawlh lo law law rawh u" a ti ta hmuk a. Ka dar ka san zauh ringawt. A chhuak a, kawngka ka kalh nghal rap. A ke pen hla tial tial chu ka ngaichâng rân a. Ka hriat phak tawh loh chinah hmanhmawh zetin room thlanglam tukverh chu ka va hawng ta a. Mampuii chu zawitê hian ka ko a. A reh vung vung mai. Ngaihṭha vak lo hian ka ko leh a. Zawitê hian min lo chhawn ta a. Thawm kan ngaihchan leh vang vang hnuah dimtêin a rawn lut ta a, ka lo dâwm vat. Sawi tawh angin ka in luah hi a hnuai ber a nih avangin lei aṭangin a sang lo a ni. Ṭawng pawh kan ṭawng ngam rih lo. Khumah ngawi rengin kan ṭhu a. Ka thiltawn mêk chu ka duh loh viau rualin ka dahbo thei miah si lo, ka mumang mai mai ni zawk se ka ti mang e. Hetiang chhungkua hi an awm ang tih ka ring pha ngai lo kha a nia, pahrawnin fahrawn an pawngsual chu ka hre fô, nupuite hriatpui thlapa fahrawn mutpui ṭhin erawh ka vawikhat hriatna a ni. Pu Siama chu a piangsual takzet, chutihlaiin Nu Sangi ka demna pawh chu sang tak a ni. 

20 mins dawn kan ṭhut hnuah, "Engtin nge ni dawn?" Ka ti ta nge nge. 

Chhuat lam melh chungin, "Tihian ka chho ang a, in chungah ka tawm mai ang" a ti sap. 

"Khawvawt hnuaiah maw..riak mai rawh hetah" ka lo ti vat a. 

"Khaw êngah i in aṭanga ka chhuak an hmuh chuan engkim a chhe vek a ni mai. Ka tihṭhan alawm, ka thei ang" a ti tlat si. 

"I û kha inah a lut nghal lo maithei asin. Khawiah emaw a la zawn che ka ring. Chuvang chuan inah lut la, i roomah lo nghak zawk rawh" ka ti a. 

"Nia, engpawhnise, hmabak kan la ngah sia, ka û i chhanchhuah hmaa an hnawhchhuah loh nan che ka hlat phawt che a ngai..ka chho ang" tiin a ding a, ka chelh duh lo, a sawi dik miau a. A hun hmaa engkim an hriat chuan an unau chan a chhe lehzual thei. Zawitêa a pen chho thlep thlep chu ka thlir liam ta a. 

Khumah ka thu hnawk. He lai hmunah hian hetiang mawhphurhna rapthlak zet la tur hian ka kal hauh lo asin mawle..mahse, min ngentu hmel khawngaihthlak tak avang leh he thil hi hremhmun rim nam a nih tlat avangin ka theihtawp erawh chhuah ka tum e..