Mampui 1

MAMPUI..(1)

(Love story)

Ziaktu : Toni Râlte

Kawngka chu rawn inhawngin nu valai, sam kir bup mai, thinchhiat hmel lek lek nen kan inhmachhawn ta rân a. Ka nuih suk a, "Ka lo thleng e. Keimah Zohmaa" ka ti nghal bawk. Ani pawh chuan lo hrethiam nghalin, "E! A ni maw? Hawh, lo lut rawh. Lo ṭhu hahdam rawh" a ti luam a. A aw chu a sin rât mai. Living room zau angreng takah chuan ka ṭhu ve nghal a. Ka bungrua erawh verandaah ka hnutchhiah ta mai. Zohmangaiha ka ni a, Thiltlâng khuaa piang leh seilian ka ni. Tunah hian zirna ka bansan tawh a, Lungleiah mobile phone siam hna kum 2 zet ka thawh hnuin Aizawla ka ṭhianpa, Rinpuia'n, "Lo phei rawh. Ka pute dawrah thawk tur kan duh a, kan thawk dun thei ang. Hlawh pawh a chhe lo" tia min sawm avangin leh Mizoram khawpui ber Aizawla awm ve hrim hrim ka châk avangin awlsam takin thutlukna ka siam ta a. Rinpuia hi Hnahthial khua niin, a nu pa, a pu te bul Aizawlah hian a khawsa ve a, "Min lo fin ve rih phawt rawh" a ti tak naa, kei midang hrawn hreh ve tak, inthlahrun tina chi ka lo ni si a. Pawisa tlem azawng ka khawl ve hman bawk a, mahnia in luah mai ka duh zawk a. In luah tur min lo dapsak turin ka ngen a. Ani paw'n a lo hnial lem lo. Pathian zarah kan chhungkua hi kan rual angreng a, unau hi 7 lai niin a upat dan aṭanga indawtin a palina ka ni. Ka pa hi kan khaw High School Headmaster a ni a, ka nu pawh Health worker niin kan khawsak a chhe em em hran lo va. Ka unau te chu zirna lamah hlawhtling chhoin kei leh kan naupangber dawttu te erawh zirna lam chu kan chemkalna a ni lo nge, kan bansan ve ve tawh a. Ka nau pawh puanṭhui lamah kalin kan khuaah a awm thung. Kei chu tihian ka tuina lamah kalin chhungte tibuai lem lovin ka eikhawp leh mamawh ka thawkchhuak ve thei a. A tawk min tihsak ve viau chuan ka hria. Kan khua pawh ka haw khât angreng. Ka awm awm hian min enliam ve tawp a ni ber e. 

Ka nu leh pate an tê chhe lo bawk a, tlangval vantlang zet zawt, cher lam deuh ka ni a. Chaw ka heh ve nen, ka thau thei mang bâr lo. Ka hâng chhe lo va, ka farnu pakhat hi skin care lam buaipui deuh mai a ni bawk a, cosmetic eng eng emaw hi min thawn a ching a, ka vun paw'n a ṭhat phah ve viau chuan ka hria. Mize zâwi lam, ṭawng tam lem lo ka nih rualin ṭhiante leh nêl zawngte bulah erawh uangthuang ve thei tak ka ni. Kan unau zinga ruihhloa fihlim lo awmchhun ka ni bawk. Ṭhian kawmte a zir hi a ni ve tho mai. Bakah chhungte hmuh loh lamah ka tal si a, venthâwn tur awm ta lo chu nun a ho lo thei lo. Mahse, zu bak ka in lo, chupawh weekend-ah a ni tlângpui. Kohhran hi ka bêl tehchiam lo bawk a, mikhual chan han chan chuan a lo peihawm loh ve bawk ṭhin a ni. Ka nula mi tehchiam lo va, ngaihzawng nghet tih theih ang hi chu pahnih bak ka la nei lo. Pakhatin sâwn min paisan a, pakhat erawh ka zu ruih laiin ka ṭhen pek a! Ngaihdam dil ka hreh ve tawh nen, kan chhe hlen ta ngawt kha a nia. Keima tâwkah ka nun nuam ka tih hunlai, vei em em ka neih loh lai a ni. 

Rinpuia ṭhahnemngaihna zarah veng pakhatah ka awmna tur tâwk in ruak a lo hmu mial a. A ṭhiante hmuh a ni zawk mah âwm e. An in awmna te min hrilhin, ani erawh a piteii chhungte chhiat tawh avangin Kolasibah niminah khan a zin a, vawiin tlaiah chauh an rawn haw dawn a ni. Aizawlte hi chu zin zeuh zeuh châng kan ngah a, ka zum viau hran lo. Lungleiah khan ka pa motor hlui maruti 800 ka kawl ve rân a, chu chu chhawm ve lehin ka motor chuan Aizawl ka pan ta a ni. Aizawlah meuh chuan keini motor chu hawl chhuah zen chi pawh a ni lo, a tar tlat tawh. Mahse, ka zahpui hran lo e. Tuna ka in luahna tur te pa ber hi Siamthanga niin, nu ber erawh ka la hre lo. Aizawla in pangngai ve tak luah man tozia chu kan hre tlâng ang a, tuna ka luah tur pawh hi kawngpui aṭangin zu thlang deuh hlek mah se; in ṭha ve pangngai tak a nih avangin ₹ 3000 man lai a ni. Mahse, ka hlawh tur aṭanga chhutin ka indaih tho ka beisei a, veng tlabirh leh mawng lutuk chu ka peih bik bawk si lo, ka in luah tur pawh motor a luh theih vek avangin ka pawm chauh zawk, ka duh aiin a hla. 

Thingpui min rawn pek pahin ka bulah a rawn ṭhu ve a, "Zohmaa maw i nih kha,." A ti a. Ka lo bu nghut, "Kei hi Nu Sang tiin min ko mai dawn nia. Kan pa hi Pa Siam i tia nga, kan in luahtu hmasate nen kan buai chho ta lutuk a, kan fimkhur ve deuh a. Mahse, i ṭhiante khan an fak êm mai che a, kan remti ta hram kha a nia" a ti ta duah a. 

"Nia, a lawmawm khawp mai" ka ti ringawt. 

"Zanin chu hetah riak mai la, hei a tlai ve deuh bawk nen, naktuk lamah Mami te nen in inremfel mai dawn nia" a ti leh zung zung a. Midang tumah an la rawn lang lo chu mak ka ti deuh. A sawi ang chuan zanriah ka ei ang a, zanin chu ka riak ve rih phawt mai a niang chu. 

An fapa lo hawn hnuah ka bungrua chu in hnuaiah chuan kan thiar thla ta a, mipa chu kan awlsam bawk a, thiar tur ka ngah lem lo. Bakah ṭhutthleng leh khum engkim awmsa a ni bawk a. An in hi mizopa chhiara chhawng 4 a ni. An chenna hnuai chiah chu chhungkaw pangngaiin an luah a, mahse, an khaw lama an zin lai a lo ni. Chumite in hnuai chu a nia ka luah tak. Te fel rên râwn tak, nupa reka awmna âwm vel a ni a. In neitute hi an che fel a niang, engkim mai chu a lo felfai sa thlarh mai. Luh chiahin choka a ni nghal a, choka leh inleng kawmna chu a inzawm titih bawk. Plywood-in pindan tur erawh an lo ping dang ve a. Ka tan chuan tawk tiu teu tak a ni. Kan han inthiar zawh meuh chuan khua pawh a lo tlai ta duai a. Pa ber office bang pawh a rawn hawng tawh. 

Kan han inchibai a, an ni nupa hian fa pathum neiin, an milai chu min puitu an fapa neihchhun kha a ni, Bsa tiin an ko mai a. An upa ber chu Lindai niin, kan inrual loh pawn tlêmin a û hlek maithei. Tlereuh dawr a nghak ve a lo nia. Inchei a thiamin a hmel pawh a chhe lo vâwt vâwt khawp mai. A zeihawiin min be siam siam a, ka tlangnêl phah hle. An te ber erawh a ṭhiante nen an dine out a niawm e. Bsa hian zirna chawlhsan ve tawh thovin a pa bulṭansakin an veng chhungah stationary dawr a hawng ve a, a fel ka ti khawp mai. Keimah ang tho va ṭawng tam lem lo a ni. An sawi danin an fanu naupang zawk chuan tunah College kalin final semester a zir ve mêk a niawm a, tin, Bsa nen hian an kum a inthlau deuh tih an sawi bawk. A nih chuan Lindai hi kei aiin a û ngei ngei ang. Khawpui mi an nia, an lang naupangte pawh a niang e. Zanriah chu kan ei ta a, an driver hi Thingtlâng lam mi niin an inah a khawsa ve nghal bawk a, Zira a ni a, a ṭawng duh bual bual ngei mai. Zanriah pawh ka ei tui viau e. 

Awmpui nula an nei lem lo va, kan eina pawh chu Linda te nufa chuan an sengfel a,. Pa Siama chuan, "I nau chu be rawh, hei dar 7 a pel dawn tawh, a va rei ve".tiin Lindai chu a bia a. Fa hmangaih a tihnat hmel viau. 

Lindai lah chuan ngaihsam zet hian, "Be ve mai la, bakah a ṭhiante nen an nia, nuam an la ti ve rih a niang" a lo ti mai a. 

A phone chu Pa Siama chuan a hmet ta mual mual. Reivakloah, "Mampui, i va rei tawh ve. Zan a nih tawh hi" a ti dam thluam a. 

Lehlam ṭawng erawh ka hre pha lo. Nu Sangi'n thingpui hâng rawn chawi pahin, "Nula an ni ve tawh a, i ngaihtuah leh lutuk ṭhin. Engtin an va awm dawn pawh ni hlei lo" a ti hlak hlak a. Pa Siama chuan ner sukin, "Ngaihtuah hunlai tak an ni zawk" a ti duh chauh. A sawi dik tho mai. Ka nu ka ngaihtuah zui nghal, mipa hi chu le mipa kan nihnaah min palzam ve deuh naa, ka farnute a ngaihtuah theihzia leh an chhuah ve hleka a call chung zel te ka hrechhuak. Nu leh pa tan chuan fate tluk an awm lo a niang e. 

Ka zin chau ve deuh nen, mut hma mai pawh pawi ka ti vak lo, Lindai chuan min la be nuam angreng si. Kan khuaa a hmelhriat te a sawi a, mak ka ti deuh. Kan khuaa an awm lohna a rei ta deuh a, nuthlawi pawisak nei vak lo, lem ve thei mai, zan hnih khat fawrpui theih mai ang te deuh vek a hria a. An sumdawn ho ve zuai thu a sawi takah chuan ka ngaihdan lo neihsa ka dahbo leh ta vat. Pa Siama'n, "Zoa, i chau ang, mut hma i duh chuan mikhual roomah sawn va mu tawp phawt mai rawh aw" a rawn ti a. Ani hi a ṭawng dam thluam reng a, pa sual leh khirh tak niin ka hre lo. 

"Nia, mut mai pawh a pawi lo.." ka tih lai mêkin kawngka chu a rawn inhawng a, Hmeichhia ka hmuh tawh azawnga duhâwm chungchuang ber mai hi a rawn lut ta zân zân mai le..

"Apa chu ninawm, min ngaihtuah vak zel a" a rawn ti lut nang nang a. Min rawn hmu thut chu a lai deuh nge a ding dat, kei lahin ka lo melh ngur mai si. Mahse, inthunun leh vatin choka lamah a phei ta daih a. Nu Sangi'n, "Mampuii chu a nih kha..kan naute ang hi a la nia" a ti zawi sap. Chutitaka fanu duhawm nei chu lo ngaihtuah âwm reng pawh an ni e. Mampuii pawh chu rawn lêt lehin a room lam pan a tum lai chuan a nuin, "Mampui, hei Zohmaa chu..kan in luahtu tur chu" a lo ti kawkalh a. Ka lo lâi hû..a rawn hawilet zauh a, nui sak chungin, "Umm..ka.hria lawm" a ti sep a, a lut zui nghal. Ka lo hnual ve ringawt nia. Kei pawh chu ka mu zui ve ta mai. Mampuii chu rilruah a châm zui veng veng nia, hetianga hmeichhia ka ngaihvena ka vei hi an la awm lo reng reng. Tleirawl ti ila, nula anga chhiar ve theih tawh tho chu a ni. Ka rin danin 5'4ft vel a niang, a hleitlin chu thuhran, a pian dik zet, a mawngbawr vâwng lah leh a âwmbawr kawh lah te, a sam dum hlap, a lai taka bari ṭhen te, a hnar ngul invuah fuh leh, a hmui chhah lam deuh sen hiam te kha..a mitmeng erawh mit tlangkawm a nei mang lo va, mahse, a mitmu a lian tho avangin a inchawih mawi tawk êm êm vek. A hmelṭha a, a zahawm riau bawk ti mai teh ang. 

Rinpuia'n min lo call a, "Naktukah ka rawn pui ang che" a tih ve kha maw..

Ka harh chuan dar 7 a lo pel duai tawh. Thawh hi ka hre vak lo ve hrim hrim bawk a. Ka va thawh chhuah chuan Lindai'n min lo be nghal var a, he nula hi a zeihawi tlat. Tihtur a vâng angreng sia, ka inah ka zu chhuk a, inrem tehchiam pawh ngaiin ka hre lo. Bungrua ka nei lo lulai êm mai. Bungbêl lah chu ka nei pachhe nasa mai si. Mahse, he lamah a tlawm a, lei dan a awm ve mai ang chu. Ka chhoh leh chuan Mampuii pawh a lo tho tawh a. Min lo nuih ve sen sen mai. A la zakzum deuh niin ka hria. Mahse, tunlai ṭhangthar hi chu zak âwm deuh hian an lang naa, nu leh pate hmuh loha ngam huai thei riau an kat nuk tawh, chutiang turah Mampuii chu ka ngai hran chuang lo. An la naute cheibawl ve deuh bawk nen. Hnathawk chhuak tur an awm avangin tukṭhuan kan ei hma a, chaw ei laia titi hi keini chhungkaw chin ṭhan a ni a, mahse, ka in luahna te hi chu an ni ve mang lo a nih hmel. Ngawi rengin kan ei mawlh mawlh tawp. 

Lindai'n kham pahin, "Ka phone hlui saw min la ensak la a ṭha ang, a la thar sia, hralh lehah pawh' a ti hram a. 

"Nia, kan en dawn nia" ka ti ve mai. Mampuii ka melh ru zauh zauh a, buh a ei tam lo, chawhmeh erawh a ei ve nual. Chuvang a niang nula ṭhenkhat anga a dul a kiar ve loh..buh hian min tithau zual ve bawk a. An insengfel laiin, "Ka zuk inrem ve chhin ang e, chawhnu lamah bazar te ka duh ve dawn sia" tiin ka chhuahsan a, Nu Sangi'n, "Lawk, Zohma, kha keng thla rawh, heng hi" a rawn tih chuan ka lêt vat. Thirbel te fel ren rawn, dekchi pahnih leh bawlhhlo vel dahna tur niawm tak bawm lian vak lo paruk emaw vel hi a rawn dah chhuak a. 

"Khai a! A va lawmawm dawn ve.." ka ti vat. A nui a, "Mipa hi zawng hetiang lam hi in ngaihsak lo ve ṭhin lutuk a,. " A ti mai a. Kei pawh chuan chhang tawh lem lo chuan chung bungrua chu lain ka in luah lam chu ka pan thla ta a. Mutbu vel te chu ka rem hmasa a, mikhual pawh nei ila, ka khuma a mut ve ngawt loh chuan puanthuah dang ka nei lo. A awlsam thei ang bera kal kha ka ni bawk nen. Ka nu ngaihdan a ni lo maithei, mutbu ngaipawimawh deuh mai a ni si a. Ka thawmhnaw te phawrhin ka han khai ve luklak a, thawmhnaw pawh hi tlem chuan ngaihtuah belh ve deuh a ngai. Lerh loh vang nge inthlahdah vang zawk ni ka ngah falua lo. Mahse, ka neihchhun erawh ka duhtui avangin an class ve thawkhat. Ka inrem zo titih der mai. Choka lam chu ka han singsa leh ṭan a, Rinpuia a rawn lut ve ta hlawl. A rawn nui sûng a, ani hi zawng a dan ve reng a nia. 

"An tleirâwl chhiat lohzia khi" a rawn ti lut nghal thâwr. Hmela mai mai chu. 

"I zak lo, ka hauh tawh" ka lo ti ve zat a. 

"Ka chuhpui lo mai ang che. " A ti ve ngial. Tihtur te inkawhhmuhin kan han inrem ṭan a, tui hi ka in luahna te ka ṭawm dawn a, an pipe sa vek a, a zia dawn khawp e. Ka mamawh tur ang ang te ka han list a. Chumi hnuah ka inbual sawk sawk a, bazar turin Rinpuia nen chuan kan chhuak ta a. Chawhmeh bakah, ṭul tak tak bak ka lei lo. A awm theih naw naw chuan ti chi kha ka ni ve bawk nen, Rinpuia chaw eiah ka sawm nghal a. A lo hreh lo nasa. "A hrana kal leh ai chuan down nghal ila" a la ti sur sur zui. Ka hnial bik miau loh avangin Rv lam panin kan han tlan leh ta lâwp lâwp a. Naktuk aṭangin hna ka ṭan tawh dawn a, ruih lutuk ka duh lo. Penṭawng chunga hnathawh hahthlakzia hretu in kuh ṭûn hian ka ring. 

In kan thlen chuan dar 3 a pel thuak tawh. Nu Sangi chuan chaw eiah min sawm leh naa, ka hnial ta zawk mai. Bakah an chawhmeh siam dan a dal ka ti mai, tui ka ti ve meuh lo. Rawngbawl pahin kan lem zauh zauh a, kan pahnih chauha awm e ti lo chuan kan ṭawng a kal dun khawp mai. 

"Engtin nge i thiante chuan min zawn hmuhsak theih?" Ka ti a. 

"Lindai te nen khian an lo inhre ṭha phian a niang, nakinah ka la rawn lenpui dawn nia, Kima a nia, i kawm nuam tih tur chi" a ti zung zung a. 

"Lindai khi chhe lo i ti em?" Ka ti leh thut. A nui huk a, "A ṭâwng an ti êm mai" a ti ta a..a hmaa ngaihdan ka lo neih kha ka hrechhuak zawk. Mahse, ka sawichhuak duh kher lo. "Engtia ṭâwngin maw?" Ka ti hû a. 

"Zan hnih khat a riahpui theih tih vel hi an sawi dan a nia, mahse, a dik em ka hre bik lo" a ti lawi a.  

"Chutiang mi sawi mai mai , a ho" ka ti hluk. Mahse, sawi kai chin tawh hi chu âwm hi a awm a ni mai. Ka lo buai vena tur a awm lo ve.A ho êm mai. Vawksa kan chhum tawrh a, Alu ka bai thak a. Hmarcha kan râwt leh tawp a. A tawk der. Chaw no 2 ka chhum thung. Zanriah chu dar 6 velah kan ei thei ta hram. Kan lo lem sek bawk nen, kan tum ang tehchiam chuan kan ei tam thei lo. 

"Riak ve law law la, naktuk chaw ei khamah kan chhuak mai dawn nia" ka ti leh a. Ruih vea mahni chauha awm hi nuam ka ti lo. Ani lah a ngaih a sam tawh si, "Ni mai " a ti ve leh ta ngawt. A lum ka tih êm avangin ka intleuh zuai a, kawngka an rawn kik ri chu ka hre reng, tu tak ni ang maw. Rinpuia a ṭawng ta hlut a. Lindai aw ka hre zui nghal bawk. Ka va chhuah chuan an lo thu ran a, Linda chu a lo nui leh sâng tawh. Boxer nen chauh ka awm a, ka kap lam a rawn melh tih ka hria. Ka lai deuh. Kekawr tlawn ka va ha ta a. 

"Ka khuahar thei tawp a, Zohmaa lo awm hi ka lawm rap, i in chungte khi chu an chhangchhe sia, kan innêl vak lo.." a ti siam siam a. 

"Mampuii'n lehkha a zir mi?" Ka lo ti daih. Ka inthiam lo leh deuh a, ka sawi tawh si. Ani pawh chuan makti deuh hian, "Zir ang, tehdaih a" a ti ve mai a. 

Ka kai nam ta pek chuan, "I nau duhawmzia khi, ka star nghal" ka ti ta hmiah a. Rinpuia a lo nui huk, "I zakthei lo sâwt e" a lo ti a. Linda erawh chuan nui reng chung hian, "Mampuii chu a luck alawm, a la zakzum ve êm a.." a ti ve mai bawk. Hetia inhrilh hriat vek law law hi a ṭha mai. A rûka hmeichhe vei chu nuam dawn hian ka hre lo, Linda ka kawmngeih theih phei chuan kawng a awm maithei asin. Mahse, ka dinhmun leh nihna hre lo lêk hian ka beisei ka lo tisang ve vak a, Mampuii chuan min lo ngei viau thei tlat! Va ngaihzawn nghal thâwr pawh ka tum hran bik lo. An in luahtu nih erawh a hrehawm hran loh ang. 

Linda chuan, "Min lo pe ve teh u, in nuam tawh bik si..tunlai chu ka broke ve tawp a, mut tui nan ka duh ve" a ti ta sar sar a. Rinpuia'n a thlitsak ve nghal. A in thei phian a. A rui lo chung pawha a ṭawng duh ve sa nen, a'n kamnam phei chu ṭawngna hun kan chang meuh lo, mahse, a titi ngaihthlak a nuam. A sumdawnna thil vel vanga an zin laite a sawi kai a, min rawn enin, "In khua ami ka zawh che kha lawm Mizoram house-a kan thlen ṭumin a piah hotelah hnamdang a lo va riahpui pek a! Chu pa nupui chuan a va zawng hmu ta si, kan buai teh asin. Mahse, sawi chhuak suh aw, ka tan a nuam lo ve a" a ti mawlh mawlh a. Nia, thilmak tehchiam a ni lo, kan khuaa an awm lai pawha nasa kan tih ruk, ngaihzawn ena kan en loh kha a ni ve bawk a. 

"A ho êm mai" ka ti liam puat. 

"Kei chu eng ang pawn rui mah ila, hnamdang lakah hi chuan tlawm ka tum eih lo,. " Inchhuan hmel zetin a ti ham ham a. Lehlamah keini ṭhiandun min rintawkna leh a inpuang ngam chu kan tan pawh a lawmawm angreng, min ringngamtu na nâ na chu keini tan pawh nulat tlangvalna anga en a har viau mai. 

Dar 10 a ri ṭêp tihin ka kawngka chu an rawn kik a. Linda chuan, "Ka pa mawni le" a ti sap. Ka va hawng ta tho va, Mampuii a lo ding zum reng mai. Ka hamhaih deuh chuan ṭawng nachang ka hre lawk lo lehnghal. Amah zawk chuan, "Ka u a awm em?" A ti ta a. 

"A..aw..awm e..lo lut rawh" ka ti bah nak. A rawn lut ve mai a, a û a va hmuh chuan, "Apa ten lo haw tawh rawh se an tia, phone i keng bawk si lo" awki nelawm lutuk lo hian a ti a. Linda pawh chuan thawh pahin, "Kan lo titi tui deuh hlek a ni" a ti a. Min rawn enin, "A nih u aw..mangṭha u" a ti leh a, kan lo chhang ve vat. Mampuii erawh chuan engmah a sawi tawh lo. An inzuichhuak lai chu kan thlir ve tawp ringawt. Kawngka ka va kalh a, "Mu dawn hnai ila, keini pawh" pangngai fê hian ka ti a. Ka rin aiin a rui. Kei chu chuti tehchiam chuan ka rui lo thung. Ka khumah chêp angreng tak chuan kan mu dun ta a. 

"Lindai kha ka ck pui ve mai mai dawn mawni le..a fresh ka ti riau" a ti chhar chhar a. 

"A ṭul lo. Awm mai mai teh" ka ti hluk. Mampuii hmel bawk ka mitthlaah a rawn lang leh tawh. Min hawi loh hmel ve ropui si a, âaa..engpawhnise, keipawh Aizawlah ka phei ve chauh a, ka tleirawl hmuhchian awmchhun a nih avangin ka vei deuh te pawh a niang e. Naktuk aṭangin hna kan ṭan dawn a, ka rilru pawh a danglam maithei asin..

Ka harh chuan Rinpuia a lo la hnâr sûk sûk mai. Ner sak chungin ka tho va, ka ka rim chu ka tih theih hlawl loh avangin ka ha ka nawt nghal sawk sawk. Ka thawmah a rawn harh a, "Chaw chu ei lo mai ang, kan tlai dawn tlat, intifai la, phei ila..dawrah kan inhnawhpuar mai dawn nia" a tih avang leh chaw ka ei châk tehchiam loh avangin ka inbual a. Ka insiam zo hma angreng. Rinpuia bike-in a pute in lam chu kan pan ta a. Ka in luahna te ai chuan an khawsak a san hmel deuh, A pu hi pa ruaukhau deuh, ṭawng muang chet chut deuh mai a ni a. Pu Zalawma a ni. MC-ah pawh mobile phone zawrhna dawr lian zet a nei. An nu erawh nu te taktê ngo ving veng, ṭawng duh zet mai a ni a. Pi Dari an tiin ka hria. Midang ho erawh ka phêk en vek mai. Rinpuia chu a intifai zung zung a. Ani zawng a che phet phet a, nghah rei a ngai ngai lo. Ril a ṭâm ṭan. An in kan chhuahsan a, dawr lam chu kan pan ta a. An repairing centre hi Dawrpuiah awmin a lun hmel viau dawn mai. A zau ṭha bawk a, kei pawh ka ṭhutna tura an lo dah âwlsaah ṭhu nghalin an service dan chu thuneitu ber ti mai ang chu chuan min hrilh zung zung a. Ka hriat tawh hnu tho kha a nia. Lumgleiah pawh khan phone siam laklawh chuan timing a sawi hleihtheih loh, zan dar 10 thlen chang ka ngah mai. Min nghah ve tlat chuan hna khawl hi ka thiam lo bawk nen, ka tihsak leh mai ṭhin. Khatianga kan timing aia rei kan thawh chuan kan siamsak te khan extra min pe ve ṭhin. A zira zir ka ni lo naa ka chemkalna lam a nih vang nge vawi hnih khat ka tihchhin hian ka thiam zung zung zel, chuvang a nia Rinpuia pu te pawn thawk tura min duh. Rinpuia'n min lo fak arek ve bawk nen, an beisei ang nih ngei pawh ka tum ve hle. Rinpuia'n eitur a chah a, ril a ṭâm bawk nen, ka ei nghal buan buan. Ka penṭawng vak lo va, a zia. Ka thawhpuite hi ka'n sawi ve hrim hrim ang e, kan hotupa ber hi Dawnga a ni a, Kanan venga khawsa an nia. Pakhat thau lam, zahmawh sawi hrat zet hi Mala a ni a, ka nêl hmasak ber a ni. Ani pawh Saron venga khawsa tho a ni. Rinpuia chu sawi tawh ang kha a nia, kan pali chuan kan thawkho chu a ni mai a. An dawr pakhat zawkah pahnih an ṭhu bawk. 

Ka nuin min lo call a, "Hei, Mami hian palai hmel a hmu ve dawn niawm tak a ni. Kan khuaa zirtirtua rawn awm Hruaia kha i hria em? Kha kha" a rawn ti a. Ka la sawi lo tak e, unau 7 kan nih kha chu ka sawi a, mipa 3 ,hmeichhia 4 kan ni. Kan upa ber mipa niin, nupui fanau neiin eizawnna ṭha tak neiin an awm hrang tawh a, a dawt chiah hmeichhia hian pasal a nei tawh a, vanduaithlak takin an inneih aṭanga kum 2-naah an pa a boral a, fa pakhat an nei hman. Ka u hi Nurse niin Lunglei Civil Hospitalah sawn a thawk a, a fanu nen an khawsa ve a nih chu. Chumi nau chiah hmeichhia chu tuna ka nu rawn sawi chu a ni, Mami kan ti mai a. Tichuan, kei ka ni leh a. Ka nau chiah mipa erawh Bangalore-ah zirna avangin a thang ve mêk a. Chumi nauah hmeichhe pahnih la awmin, a te ber dawttu chu sawi tawh angin puanṭhui hna a thawk a, kan te ber erawh ka û a pasal sûn ta bulah khan awmin college a kal ve tawh a ni. Chutiang tehnuaih chu kan nia, mahse, kum tawp hunpui hmang tura kan han haw khawm ṭhin erawh nuam thei tak a ni. Kan inpui hi ka pain lian deuhin a sa bawk nen, khua a har hman ngai lo. 

"A ṭha reng alawm, a senior mai dawn, neihtir r'u" ka ti puat a. Mami hi Pangzawl HSS-ah a thawk ve. "Teh puat zel a che. Mipa upa ber ang i nih tawh hi..Hruaia chu ka lung a dum zân lohna chu zu a in ve zauh zauh an tia" thutak zawkin a rawn ti a. 

Ka chek hluk, "Aa..zu in zauh tih mai mai, a ngawlvei pawh a nih êm loh chu" ka'n ti ngawt pek a. 

"Puitling ve rawh, Zohmangaih, ngaihsam lutuk mai. Zeuh zeuh hian a tawpah ngawlveina a hring nge nge, i u Mama pawn a remti chiah lo va" a rawn ti lâng lâng a. Ka nu sawi chu a dik ngawt mai. A tirah ka in zauh zauh ringawt kan tih hian a tawpah a tel lo va awm theih lohna a thlen châwk. 

"Tak taka ka hrethiam lo, amah Mami ngaihdan te pawh a niang a." Ka ti a. 

"Nia, an lo len tak leh chhungkaw groupah te pawh khan kan sawiho dawn nia, Mami hi chuan kan thu a hnial ngai lo va, kan kutah a dah leh theih mai ka ring" a rawn ti ve mai a. Kan inbiakna a titawp nghal. Ka nu hi chu han bia ila, a sawi duh chin a sawi zawh chuan a off hmak zel. Kei pawh hna lamah rilru ka pe zui ta a. Nilêngin phone pathum ka khawih zo hman hram. Dawnga'n customer a lo dawngsawng deuh bik a, kei phei chu ka hâwkdâk lo nen, darthlalang phên atang chuan a tu amah ka va hmu chiang ve lem lo. 

Ban hma deuhin ka in luah min hmuhsaktu Kima kha a rawn kal a, kan inchibai ve lâwp lâwp mai. "I tilawmawm lutuk, saw a nuam reuh sia" ka lo ti ve luam a. 

"Nia, nula a chhawm nghal bawk si" a lo tih zawm zat. Mala'n a lo lafuh ngang mai a, "Eheu! Chu! Zoa, chaw eia min la sawm a ngai a nih chu, in thar lawm nan kar tawpah chaw kan eikhawm nghal ang" a lo ti lûng lûng a. 

"A pawi hleinem, mahse, ka in luahna te hi ka la hrechiang vak lo a nia. An lo strict phian maithei " ka ti a. Kima chuan, "A dik, an strict..an strict vang alawm a hmaa luahtu te pawh an chhuah. A rûka bengchheng siam lo va han ruih kamnam chu an enliam ve thei mai ang a, a hmaa luahtu te kha chu an thawm a na ve ṭhin bawk a..zai an play ring thei si, an in chung chiah te khan an complain nasa ve tawh a niang, an chhuahtir hmak alawm" a lo ti nghal bawrh bawrh. Pu Siama ṭawngkam bakah Nu Sangi thusawi aṭang pawn kei chuan mak ka ti lem lo. Khatianga hnawhchhuah ngai khawp chuan ka awm bik lovang. 

Rinpuia'n nizana kan zu in vel leh Lindai a sawikai a, ṭul ka ti fahran lo hle. Kei inla pa chi tak ka ni bawk a, ka hmeichhe zu inpui te, ka mutpui tawhte hi ka ka aṭangin tuman an la hriat ka ring lo. Sawi chhuahsak kher hi a mipa zia lo ka ti ve deuh tlat. Kima chuan a lo manthiam nghal vat rêng a, "A va rawn ngampa nghal ve..mahse, Zoa, fimkhur rawh aw. Hnaih lutuk suh. " A ti duh chauh a. Hriatbelh duhin ka lo melh kalh thung. A thaw hak a, "Aa..tlemlai deuha kan ṭhian pakhat nen an riakdun pawh FIR thehluh te an tum thut thut a, kidnap case ang deuh khan, amah saw chu a zau, a fel pawh a fel. A chhungte saw fate sualna hmu thei lo ang chi, fate ring ṭha ve tawp ang kha an nia. Chuvang chuan fimkhur tluk a awm lo" a ti ta a. A mak dawn hle mai. Mahse, hetiang nu leh pa hi an awm miau a.

"Nia, fimkhur ang, bakah chutiang zawngin ka en lem lo" ka ti ve mai a. Rinpuia lah chuan, "Ani chu Mampuii lamah zawk a mit a lên" a lo ti zauh. Ka va melh rum tak. 

Kima a nui hawk hawk a, "Saw thil tuihnai lutuk saw i lo enliam thei bik lo a ni maw? Mahse, beisei buai lo law law rawh. Anu sawn pastor neihtir a tum bur an ti.." a ti ta mai a, ka tum lawk vang pawh ni lovin ka nui hawk hawk. 

"Pastor nupui nih chu a inhmeh ngawt ang, mahse, a nuin duh mah se; a lo duh lo ve thei tho a" ka ti a. 

Kima bawk chuan, "A nungchang ṭhat dan aṭang sawn a duh ve a niang ani pawh sawn" a ti ringawt. Nakinah Kima hi Mampuii mizia leh a number te la zawh tur a ni. A zawhtlak dawn riau. 

Banah Rinpuia inthlahtir tawh loin 2wheeler taxi ka hmang a, naktuk aṭang chuan ka motor tar ve tawh tak ka khalh chhuak ve tawh ang chu. Bike ka awt ve leh ta riau. Ka nau bike hi chu kan inah a awm ran mai a, mahse, ka nau ta a ni ve bawk si. Ka motor kawl lai hi hralha bike lei mai tur em mawni te ka ti ta mai mai, Aizawl a chêp si a, jamah duh aia rei tan a awl dawn tlat. 

In ka thlen chuan dar 5:30 a pel ṭêp. Nu Sangi'n an verandaa pangpar tui a lo pe mêk a. Min rawn hmuh chuan, "I tlai sia, chaw lo ei mai la" a ti nem diai a. 

"Aa..chaw ei fô pawh..chawhmeh ṭhing tihlum a ni mai. An la rawn haw hlawm na nge?" Ka ti ve duah. 

"Mama chiah a lo la haw, a khawharthlak ṭhin a nia" tiin a nui a. Chhang tawh lem lovin ka in lam ka pansan. Ka in chungte pawh chu an la rawn haw dawn lo mawni le. Tumah hmelhriat hnaivai ka nei si lo va, han teiluh nan te pawh a remchang ve dawn asin le aw. Mahse,sawi leh sawi hnu ka lenglâm vak lo va, mahnia awm pawha tlei ve thei mai kha ka nia, a zia letling phian mai. Inbual hmain rawng ka bawl a, ka u Mami palai hmel hmu tur chuan rilru a kap ve deuh. Ka û chiah a ni bawk a, kan inngaina zual,. Kan awmdun tam lo êm zawk a. Amah hi a nia skin care min ngaihpawimawhsak em em thintu kha. Kan khua Thingtlang angah chuan nula senior chan an chang ve mai dawn a, pasal ṭha tak hmu se chuan nei mai se pawi ka ti hran lo. Chutihrualin amah a inenkawl thei tawh a, pasal neih pawh a huphurh letling tawh zawk maithei a ni. Hruaia chu Middle School-a thawk kha a nia, a thawhna pawh kum 5 vel a ni hial tawh ang. Nun ho ve tak, mi pawisawi chuang si lo, awm ve tawp kha a nia, ka hawn chang chuan a kawmte pawh kan inkawm ve lâwp lâwp zel a, zu erawh vawikhatmah kan la inho lo thung. Misual tak chu a ni lo. Mahse, ni e, ka nu leh pate hi hetiang lama fimkhur em em an ni tlat a, mipa 3 zingah zu in awmchhun ka ni pawh hi min vei bikin zilhhauna pawh ka dawng nasa bik. Ka pa lah kan Kohhranah leh bialah secretary a ni a, ka nu erawh ka pa hian nihna neih a phal mang lo va, BKHP committee member a ni ve. Khawtlângah ka pa chu YMA Adviser kumhlun a ni a, kan chhangchhiat lai, kan la tet lai khan YMA OB chutah pawh president emaw secretary emaw kha a ni kumtin zel a, ka nu kha a phun ngai miah lo thung. Lehlamah ka pa khan a hunawlah in chhung sekrek hna thlengin a pui hreh bik lo va, nau nise a paw ve lawp lâwp a. Ka unau kan rual a, a te lam chu û ten min awm thei ta zel a, ka nu pawh a hahdam ve phah. Kan upa ber dawttu pasal sun ta hian min âwm nasa, min puak nasat luatah a ṭhang ṭha thei lo a ni chêk ang chu, kan unau zingah a te ta ber a. Ani hi Teteii a ni a, Ate tiin kan ko vek thung. Tun thleng hian min la duat. Ka naute erawh kei chuan ka awm ve lo, ka velh ṭah loh leh ka hrâwk a. Min hlau thei rêng bawk. Mami awm tlei deuh vek an ni. Kan te ber phei chu Mami leh Ateii te duat rawn a ni bawk a, a pangchang reiin tun thlengin a la no..! Pathian zarah chhungkua pangdama tumah kan la insûn lo te hi a lawmawm ngawt mai. 

Ka inbual zawhah zanriah chu muangchangin ka ei a. Nizana kan in bang tlem la awm kha mut dawna inah tiin ka la khek a. Lenchhuah pawh ka tum lem lo. Kan khaw mi, he lama lehkha zir neuh neuh pawh an awm naa, nakinah ka la tlawhchhuak ang chu. Thleng ka sil laiin kawngka an rawn kik leh dat dat a, "Lo lut r'u" ka tih rualin a rawn inhawng nghal. Lindai bawk! Ka hnual râwih mai. Mahse, ka pawi a sawi pawh a ni lo va, nge maw ka lo hnual ve ngawt ni. A rawn nui leh sâng a, "Ka phone chu ka rawn keng a..chuan.." tih pahin a kawr chunga a hak summer jacket chu phelhin Blenders a rawn lek kang ta vâ mai. Mood a fuh zawm nghal. Mahse, Kima thusawi kha ka hrereng..chintawk hriat a ngai dawn hle mai. 

A phone chu ka'n ensak a, a lcd bakah a chargna lai chu a chhia a lo nia. Siam a harsa lem lo. "Hetah hmanrua ka kawl ve hleinem..engtin nge niang" ka tih chuan, "Tikhan naktukah min kensak la, i lo haw leh anga.." a ti mai a. Kei pawh ka bu nghut ringawt. 

Chaw eikham puar lai a ni sia, a zu rawn ken chu ka in hleithei lo. "I nauin a rawn ko leh che nge" ka tih chuan, "Dont worry,. Ka nu te an chhuak a. Ka nau chu movie a en..min ngaihven lovang. Mahse, ka nute lo hawn hmaa ka chhoh a ngai" a ti sar sar. Kawrbah sin tak chauh a ha a, bra erawh a hreng ve hrâm. Kekawr tlawn deh nuam deuh a ha a, a sam chu a la hnâwng deuh chap bawk. A fai vâng mai a, mipa ṭhenkhat tan chuan itawm tak tur a ni. Kei erawh chuan warning ka dawn chu thuhran, Lindai hi hmeichhia anga en harsa ka ti tlat! A nau zawk ka thinlunga a lal vang a ni mahna. Ani pawh hian min beisei lo turah ka ngai. 

"Zo, zu ka in avang hian min ngaisual viau em?" A ti a. Acid a liak zauh bawk. 

"I ho e a. Zu in ringawt te chu sual a ni em ni?" Ka lo ti thung. 

"Dik tak chuan kan ina han in êm hi ka hreh a, hetia i lo awm hi ka lawm. I fel bawk sia" a ti deuh ngei, min tilai ṭêp alawm le. 

"I nau chu a number min pe la.." ka lo ti leh daih. 

"Ninawm..tum buai lo mai rawh. Ani chu ṭhuro ang a ni, bakah pastor nupui atana an hlan thlap tawh a nih khiii" dawhtheih loh hmel zet hian a ti ta a. Kima sawi kha a lo dik a nih dawn hi. 

"A nih i number tal" zahzelah ka ti ta ngawt a. Min pe ve vat, "Pastor nupui nih chu a inhmeh viau tak ang. In va inang lo ve" nui chungin ka ti a. 

Thinrimah pawh a la bik lo, "Nia, unau ṭheuh ṭheuh..ti ila, i la hre dawn tho va, kei chu ka nu fabik ka nia" a ti ta a. A dik mahna, Mampuii nen inanna an nei miah lo tak alawm. 

"Ehe! A van mak. " Ka ti ringawt. 

"Chuvang alawm zu ka in" a ti lehzel a. 

"A va ṭha lo ve, chutiang vanga zu in kher.." namnul tum taka ka tih chuan, min rawn melh zawk a. A mitmenga eng emawni lo lang zawk chuan min tihamhaih deuh. 

"Mampuii khi chu awm lo se; kan in hi ka chhuahsanna a rei tawh ang" a ti chhum hmak a. 

"Ngati maw? Mampuii chu" ka lo ti vat. 

"Venhim a ngai tlat a tin ni.." a ti hriam hraih a. A ngaihna hre lo zetin ka lo melh hû ringawt. 

(Leiruangtuam in duh ka hria. Ngawi teh u, Pathianin rem a ti rih lo a niang. Ka ziak hleithei lo, an hming ka theihnghilh thul, ziah tur a bo zel. A mak tawp. Ziah hun a awm ve leh mai ang 😍