Boss Amanda

BOSS AMANDA (1)

(HONEYMOON) 

Ziaktu : Toni Râlte

Ka nupui Amanda, a vanglaia Detective lar leh mite rin kai êm êm ṭhin chu ka bân lukhamin tui êm êmin a muhil sâk sâk a. Kum 54 a ni tawh nachungin a vanglai ang tho khan ka mitah chuan a la hmelṭha ber a, a la nalh ber bawk. Kan fapa neihchhun Malsawmpeka'n a nu hnung rawn zuiin tunah hian training hautak tak nei turin Phaiah a thâng mek a ni. Kan in te fêl renrawn, Amanda duhdan ang taka sakah chuan kan nupa chauhin kan khawsa a, Malsawmpeka hian kum 21 a tlin kum khan amaha khawvel hmachhawna damkhawchhuak turin in a chhuahsan a, amahin Apartment lian vak lo a luah ve a ni. Kan fa neihchhun a nih avangin chenho reng kha ka duhdan a nih laiin, a nu Amanda hian kal turin a duh tlat zawk. A fapa chu mahnia inhaikaw tur leh kan tel lo va damkhawchhuak turin a duh miau a. Kei pawn ka khap thei lo. Amanda kha a ni miau a. Bawihtea rawn pian hlim bâwr vela Zorama buaina tam tak thlengte ka ngaihtuah chuan ka thaw a ipik ṭhin. Ka fapa ngei a nu lak ata ru bo va , Abigail kuta ka hlan lai ka mitthla phei chuan khatih lai khan lo thi daih ila tih ngaihtuah chang ka nei fô mai. Mahse, tihian chhungkua chu Amanda zarah kan inzawmkhawm leh thei ta a. Pasal leh pa tling lo tak ni mah ila, ka nupui leh kan fapa aṭangin demna awka ka dawng ngai lo mai ni loin min hmangaih êm êm a ni. 

Kan nu chu a kum a lo tam ve ta deuh bawk nen, hna hautak thawh fô chu tlin a inti lo va, bansan tawp aiah eng emaw case tenau a la khawih ve. A hranpa taka rawn ngentu an la awm fô bawk a, mimal taka ngentu te erawh a tibeidawng ngai lo thung. Amanda case lak kher phût lah hi an tam phian zel a. Mahse, hei tun lai chu a nerve ṭhat loh vangin chawlh a la ve a, keiin ka la bawk nen, kan inawm heuh heuh a nih ber hi. 

Ka phone ka'n hmeh ên chuan, dar 11 chauh a lo la ni. Kan mut hma vang kha nge zan a la rei dawn hlein ka hria. Ka mut lah a chhuak der si lo. Whatsappa ka luha kan department groupa ka luh chuan, Zothana hian, keimah min lo mentionin, "In nuin innei tir te nupa tuak khat, an honeymoon hmanna lama a nupui thihna case a chinfel kha en lêt ka va duh êm..chawlh i la si a, record awmsa hi ka lo en mai dawn asin" a rawn ti a. 

"A ṭha lawm, a va pawimawh awm ve" ka va ti ve mai. Min rawn chhanna pawh nghak lo chuan ka out leh nghal daih. A chhan chu hriatchhuah ka neih vang a ni, Kha case tuna Zothana rawn sawi zawh chiah kan chinfel laia Amanda nen tihpalh thilthu takmeuha kan infawh ṭum kha ka rilrua a rawn lan vang a ni. Ka khi suk a. Khatih lai khan kan hna tih lohah inzawmna kan la nei lo. Kei pawh thawktir ka la ni ve a. Amanda erawh ka star ru viau tawh thung. Khatihlai kha Aizawl mi hausa tawntaw Pu Ramzauva hmingthan hun lai kha a ni bawk. Aizawl leh Lunglei inkarah ram âwl zau lutuk tak mai a lei a, chulai hmunah chuan in mawi leh simple si bakah tuikhuah te a dah a. Inneih zan hmanna atan te, Honeymoon hmanna atan te an book nasa ṭhin. Ram dang leh khaw danga Honeymoon hmang ve thei lote tan pawh a hmun chu a nawm leh a romantic êm avangin an hmang nasa a, tin, ramdanga zin aiin a hautak lo bawk nen. In dingte chu in hlat tak tak an ni hlawm a, mahse, intihhlimna hmun bîk Hall zau tak a awm a, chutah chuan nupa tuakthar ṭhenkhat te inkawm hlim turin an kal khawm ṭhin. Dawr a awm bawk a, an cottage hi a secure êm êm bawk. Cctv dah vek niin, Gate lian angreng tak leh mawi tak a awm a, chu chauh chu luhna leh chhuah theihna awmchhun a ni. Thirlena hung chhuah vek a nih avangin. Ka sawi thiam dan berin khua ang deuh, mahse, in erawh inhlat tak tak si a ni ber. In tin bulah pool zau lutuk lo dah vek a ni bawk. He thil buatsaih nan hian nuai tam fê a sêng reng bawk a. Mahse, kum 5 a liam meuh chuan a senso zat chu a hmu var var âwm e. Ṭhangtharte kan changkang chho zel a, inneih zan bakah honeymoon hmana nupa reka han awmdun leh ei in han siam vel kha an châk sakhai bawk nen, a tlangpuiin zan 3 an riak ṭhin.

Tuna an chanchin ka sawi tur pawh hi, Hmeichhia hi Kolasib khua niin, Vanlalruati a ni a. A pasa hi Aizawl khua niin Liantluanga a ni thung. Ka muhil thei lo mu ning si chu kan nu min kuahna chu dah thla riai riaiin ka tho ṭhem ṭhem a. Book shelf hawngin khatihlai huna ka diary a kawm sen ngei mai chu ka phawrh ta zâl zâl a. Kan nu insawrbinna roomah lutin ka diary chu ka chhiar ta a. 

Ni 22, August, Zirtawpni chawhnu dar 3: 48 pm. 

Office-ah thawhpui Rinliana nen checker kan khel a, keia thluak thawl zet hian a finishing ka thiam loh a leiah Rinliana chuan min sawp zêk zel. Ka peih ve phian lawi si! Ka inngaihtuah ngut ngut laiin Amanda a rawn kal a. 

"Sam, kan kal a ngai" a rawn ti leh thut. Rina chuan, "Eng nge thleng?" A lo ti var a. 

"Nimin lama report rawn lut, nupa tuakthar, an nu bo kha a ruang hmuh a ni tawh e" a ti felfai leh thlap. Keipawh laklawh sawi lovin ka insiam nghal zung zung a, hetihlai hian Amanda hian a kut dinglam a tihulh a vangin a driverah ka ṭang a ni deuh ber, a motor chuan SAILO VILLA lam panin kan tlan ta vang vang a. Ni e, Amanda sawi ang khan nimin zingah khan Liantluanga inti hian a nupui bo chungchangah report a rawn thehlut a, Police lam ten theihtawp kan chhuah chungin hmuh a ni lo thung. A bona hi nimin piah lam daih a ni nghe nghe. Amanda phei chuan, "Ti nge report i va thehlut tlai ve" tiin a kamkhat nghe nghe kha a nia. Tluanga chuan, "Ka hmuh ve leh mai ka rin vang a nia" a ti ringawt. Liantluanga chu Aizawl veng pakhata khawsa an ni a, ni 7 liamta khan tuna a nupui bo ta nen hian an kohhran sunday school Hall-ah an lo inkutsuih a ni. An sawi hmangin an puklawk ve a niawm e. A nupui Vanlalruati erawh Kolasib khua a ni thung. Liantluanga chu kei aiin a u hret maithei, hleitling leh hmaitluak ṭha ve tawk tak, zaidam hmel deuh mai a ni a. Police stationa a rawn kal pawh khan chiâi hmel leh han hamhaih hmel hmuh tur a awm lo lem lo, pa inthunun thei tak zawng a ni ngei ang. A sawi hmangin, "Thawhlehni chawhnuah kan nupa puala hun hmang turin Villaah hian kan riak lut a, Room no. 034-ah kan innghat a ni. Zanriah kan ei kham hlimah boruak a nuam bawk a, a hmunhma vel kan fang dun a. Thla te pawh kan la nghe nghe. Dar 8 velah roomah kan lut a, kan nu hi a sambu a chhah deuh avangin a sam chu a chhem ro a, hetih chhung hian zu ka lo in a. Tam phei chu ka in lo. A ṭawng nuam tawk vel a ni e. A inchhem ro zawh chuan, "Ka chaw ei kha ka puar vak lo a niang, ka ril a ṭâm dawn chiang, eitur ka zuk lei ang e" tiin Villa aṭanga pen 50 vel tur lek dawrtêah eitur a zuk lei a. 

Dar 9 velah kan mu ta a. Zêp loh chuan kan chauh ve deuh bakah kei ka lo lem ve sek nen, nupa nun pawh kan hmang lem lo.Kei phei chu ka muhil thuai nghe nghe. Zing dar 3 bawr velah ka penṭawng tuihal ka harh a, tui ka in nghal, ka'n mu leh tur chu kan nu chu a lo awm ta hauh lo mai a. Bathroomah a awm a niang tiin ka han mu leh renrâwn a. Mahse, thawm ka hre mai si lo, bathroom chu ka va hawng a, a awm lo. Room aṭanga chhuakin in hnuai hall lam ka pan a, a reh ṭhuap tawh. An elevator a ṭhat loh avangin step thui angreng tak chu ka zawh chho leh a, Kan nu chu ka han call dawn a, a phone chu khumah a lo awm bawk si. Mak ka ti khawp mai a, chutia sakuh ser nghah ngawt ngawt chu ṭha ka tih loh avangin Manager ka zuk kaitho ta tawp a. Ani pawn mak a ti ve hle. In hnuai Hall leh Reception counter hi zan dar 12-ah kawngka kalh ṭhin a nih thute a sawi nghe nghe. Tukverh zawng zawngah bar dah vek a ni a, kawngkapui pawh a lo inkalh thlap bawk si. . Kan pahnih chuan kan han zawng kual leh a, vâng tak a ni. Ka mangang ṭan viau tawh naa ka chhungte leh a chhungte ka la be duh lo, chiâi hma chi an lo ni bawk nen. Manager hian cctv footage en a rawt ta hlauh a, kan en ta a, kan nu gate-a a lawnliam lai a lo lang reng mai. Mahse,engtin nge kawngkapui inkalh chung khan pawnlamah a chhuah theih tih ka ngaihtuah a, ka bo hle. Mahse, a hnuah ka hrechhuak titih a, Villa chhawng chunglam hi bar dah a ni tawh lo va, lei aṭang chuan a sang ve thawkhat bawk nen. Kan room bathroom ventilation a lo inhawng, chuta ṭang chuan hruiin emaw a uaithla a ni thei ang em tih ka ngaihtuah leh ta a. Tichuan, chhungte hrilh kualin, Chutiang a lo nih takah chuan Police pun vut vut lovin a theih ang angin zawng ila, mualpho theihna a nih avangin ama chhungte lam pawn ka rawtna chu an pawm lo thei lo. Honeymoon hman laia nupui ten min kalsan daih chu mi nawlpui hriat atan zahthlak ka tiin tlawmthlak ka ti a ni.Tichuan, a ruk deuhin pawnlam kan dap chho ta kha a nia, kan hmu ta bawk si lo. A phone password ka hriat loh avangin tu nge a va hmuha a va pan kan hre bawk si lo. Mahse, a hawng thiam ruaiin kan han check kual a, mak tak maiin a phone chu a lo inreset vek a, whatsapp bakah galerry lam pakhatmah kan check thei lo. A email ID leh password kan hre bawk si lo. Tichuan, ka mangang tawpkhawkin ka rawn pun ta tawp che u a ni" tiin. 

Chu chu Ruati bo dan a ni. Tunah a ruang hmuh a ni leh ta mai si hi Amanda a inrawlh lo thei ta lo. Villa kan thlen chuan kan mi leh sa tlem bakah Villaa hnathawkte an lo awm ṭhap mai. Ruang pawh khawihsawn loin an lo la dah a, ruang an hmuhna hmun chu vawitam an zawn tawhna basement-ah a ni tlat! Chulai tak chu a mak ta a ni. Vanlalruati chu a saisir zawng deuhin a lo mu ngât a. A ban veilam chunglamah pharin, a dinglam erawh a delh thung. Amanda chuan a han kuailet a, khawng hneh tawh tak a ni. Rim a nei ṭan tawh bawk, ruahtui tam vanglai a ni a, boruak a lum lutuk loh avangin a la rimchhe over lo mai mai zawk a ni. A chal lai tak a kak duaih a, thisen erawh a khang vek tawh. A ring ruh chu a tliak tih hriat takin a thle hnâwp hnâwp bawk. Chubak lang thei chinah hliam a neih awm ka hmu lo. Kum 28 mi a ni a, hmeichhe hmelṭha leh pian pawh dik ve tawk tak niin a lang. A la raitir bawk a, a dul pawh a kiar hran lo hle. Kekawr buang, awmhmun hak a ha a. Tshirt dum a nghawng bial a ha bawk. Pheikhawk emaw chapal emaw a bun lo. Ruang chu posmortem turin phurhchhoh nghal a ni ta a. Ruati chhungte leh a pasal chhungte pawh an rawn lang nghal. A nu a ṭap hawm hawm mai. Pu Tluanga pawh chu ban bulah dingin intipa tak siin a mittui a hru mual mual mai. Dik tak chuan a nupuiin an honeymoon hman lai rengin a kalsan a, chuta tâwp mai lovin a ruang hmuh a ni leh ta si hi a tan chuan a na ve ngawt ang le. Hallah lut pheiin Amanda chuan reivaklo kawm a dil a, an lo remti ve mai bawk. 

Pu Tluanga melhin, "Tuin nge a ruang hmu hmasa ber?" A ti chat a. 

Manager zawkin, "Kan hmunphiattuin a hmu hmasa ber..hei amah pawh" tiin kilkhata lo ding khawng ve reng pa tar lam tawh chu a kawk zauh a. Amanda chuan, 'Ka pu, tu nge i hming le? Chuan, ruang i hmuh dan kimchang min han hrilh ta che" a ti nem diai a. Chu pa chu a hlauhthawn hmelin a meng zek zek reng mai, a âwm ve tho, a mi den dan a danglam lo thei bik lo ve bawk a ni. A aw a thian kharh a. 

"Zuithanga ka nia, âaa..hetah hian kum 2 ka thawk ve tawh. Chawhnu lamah khan in hnuaiah khuan bungraw ṭhenkhat an dah lut a, chumi hnawk vel chu phiatfai turin ka zu chhuk a. Thil rimchhia ka hriat pawh khan ngaihṭhat lohna ka nei hran lo. A chhan chu ek in khur khu hman deuh khan a min avangin a phui chiah tawh lo va, thli bêng zawng hian a rawn nam ve huk ṭhin avangin. Ka phiatfai bawlhhlawh bawma ka va dah lai tak chuan ban leh ban inkara bân niawm tak lo lawr hi ka hmu fuh a, ka pan nghal vat. Tichuan, he hmeichhe khawngaihthlak tak hi ka va hmu zui ta a ni. Bungrua an unload laia an hmuh lohna chhan nia ka rinna chuan ruang lo awmna leh bungraw dahna hi a inhlat bakah a kalkawng a ni lo va, tin ban leh ban inkara lo awm a nih vangin keipawn a bân chiah ka va hmu kha a ni reng a. A ruang kan hmuhna lam hi chu garage atan pawh hman a ni ṭhin , mahse, mikhual kan ngah loh lai tak a nih avangin car pakhat leh scooty pahnih chiah a ding" a ti ta mual mual a. Ka rin aiin zawhna a chhang felfai. Pa fel tak zawng a nih hmel e. Amanda chuan a note-ah eng emaw a ziak zauh zauh. 

"Tichuan, in chungah i chho nghal a, midang i pun nghal anga tiraw?" A ti a, Pu Zuia chu a bu nghut. 

Amanda chuan Pu Tluanga chu enin, "Amah inzawn lai khan tuna a ruang inhmuhna hmun khu in en vek em?" A ti a. 

Harsa tih hmel zet hian, "En lo, Villa chhung, basement tih loh kan en a, footage kan hmuh khan pawnlam kan zawng ta nghal a ni." a ti nghut. 

Manager bulah, "Elevator hi engtik aṭanga ṭha lo nge a nih?" Tiin a zawt leh a, "Kar hnih liamtaah khan, a siam thiam te hi an hna a laklawh lutuk a" a lo ti var. 

"Pu Tluang, in nupa inkar pawimawh sawi tur te i nei em? In nu khan zanlaiah chhuakin tu nge a va hmuh ang? Han rinhlelh tur te i ngaihruat thiam em? " A ti leh mawlh mawlh. 

Pu Tluanga chuan chhuat lam melh ngar ngarin, "Kan inngaihzawn lai aṭang khan danglam hi chu a awm fô, Ruati chhungte lamin lo ngaihaw lo se. A bialpa hlui nen hian an lo la inbe ṭhin a, ṭhian kan ni tawh alawm ti mah se; kei mi thikthu chhe chi ka nih avangin ka block sak nghe nghe. Tikhan nau kan han pai a, a ranglamin kan innei ta kha a nia. Tunah hian thla 2 mi a pai ve a ni. Ka sawi hreh deuh, sawi loh theih loh erawh kan inneih aṭangin nupa nun hman a duh miah lo. "Nau ka pai hi" a tih loh leh "Ka chau, ka kawng a nâ" tih a chhuanlam fô. Keipawn ka fa paitu leh ka nupui a nihna laiah ka hrethiam zel a, A raino mood inthlak te a niang tiin. Hetia a ruangte hial kan hmuh takah chuan khami zan a bo zan khan ngaihbel tur tingin, Dawra a kal tur kha zui ve ka tum a, a remti ṭhak lo. Eng nge a awmzia ka hrethiam lo. Tin, khami zan khan Police te bulah pawh kan nu thup mawi nan zu a in ve thu ka sawi ta lo kha a nia, a in a. Nau a pai avangin ka khap nghe nghe. A nulat lai pawha han lem ve thei mai kha a nia, hei chu ka tan a mak hran lo. A ṭha zawnga ngaihtuah ka han tum ngial paw'n khami zan khan a chhuak ru ang a, a lo let leh kha Lift a chhia tih hre tawh si lo kha in chung lama chhoh a tum ang a, a tla thla ta a niang te ka han ti a. Chhe taka rin hi ka hreh ve ngawih ngawih a ni" a ti ta charh charh a. A mittui tling pum chu a khap sak sak bawk. Ka lo lainat ve takzet. 

Ruati nu chuan Amanda ṭawng leh hun a nghak thei lo nge, "Min hrethiam u la, ka fanu a nih vang lam ni loin Bawihi khan zu a in ka hre ngai miah lo. Kei tluka hnaih a nei lo va, hre tur chu ka ni ve asin" a lo ti bawrh bawrh. 

Amanda pawh chuan, "Ka pi, ni e, kha kha kan hriat duh a la ni dawn a. I fanu nungchang leh mize tlangpui leh a ngaihzawng chungchang i hriat chin min han hrilh ve ta che" a lo ti dam thlap a. 

Insût hraihin, "Ni e, Fate hi zawng kan lakah inthup chinte pawh an lo nei ve thei a. Amaherawhchu, Bawihi kha a tleirawl chhuah phat aṭangin sawisep a kai âwm ka hre ngai lo. A theih ang tawkin kohhran leh khawtlângah a inhmang ve a, ngaihzawng pawh ka hriatpui vek, Tluanga nen an intawn hma hian kan khua ami Dinpuia nen an inzui ve a, rei an inzui lo. Chumi hnuah Kâwnpui aṭanga hnathawka rawn awm Johny nen an inzui ve leh a, kum 2 dâwn an inzui ve. Johny khan zu a in nasa êm a, inzui kan remti ta lo kha a nia. Nu leh pa thuawih thei tih takah a thlah zui ve mai, tichuan, Johny'n a tihbuai zui hlauin Aizawlah Computer zirin a rawn awm ta a. Ka nau, a nuteii te inah a awm nghe nghe. Tichuan, Tluanga nen pawh hian an intawng zui ta a ni. Chuzawng chu ka hriat theih chin a ni e" a ti ta a. Tu zawk nge dika dik lo kei chuan ka hrethiam ta hauh lo. Ruati nute hi an inneih vuakvêt avangin Aizawlah an la awm ve rih a ni. 

"Tluanga, Ruati ex chu Johny chu em ni? A biak ṭhin chu?" Amanda chuan a ti leh a, "Ka hre lo, a hming a save lo, emoji ringawtin a save" Tluanga chuan a lo ti hmuk. 

"An inbia tih engtin nge i hriat?" A ti leh ta zêl a. 

"Kan inneih hmaa ka len ṭumin a thingpui lum tur khan a phone kha inhawngsain a dah a, ka lo en kual vena lamah ka hmu. Ka la hriatchian deuh chu, 'In inneih hmain vawikhat chauh' tiin a rawn ngen a. Kan nu chuan like button chiahin a reply" a ti ta zung zung a. Amanda hmel pawh a buai ve deuh. Kan mi kawmte sawi dan tlangpui aṭanga ngaihdan ka lo siam ve danah chuan Ruati kha a hmel en ang ngawt ni loin a lo hirha ve deuh ang a, khami zan khan a bialpa hlui hmu tura chhuakin a rawn haw lehna lamah a rui kai tawh kha Lift aṭangin a tla tihna a ni thei ang em? Mahse, khalai kha an zawng vek tawh si a, tin, a ruang an hmuh hun hi khaw ên lai a la ni zui. Entirnan: Nizan lamah lo hawin tlahlum ni ta se, chhun khaw êngah chuan basement-ah khan tu emaw tal chu khalai hmuna ruang lo let reng kha a hmu ngei ngei ang. Chulai tak chu buaina a ni ta a ni. 

Lusûn an ni bawk a, Amanda chuan nakinah a ṭul anga a kawm leh tur thu hrilhin a kaltir ta rih a. Keini erawh kan la ṭhu khawmuang. An hawn vek hnuah Manager leh receptionist te chu kan ko leh a, Manager chu thu a han zawt ve leh ta a. 

"A bo zana Tluanga'n a rawn kaihthawh lai che khan a rui em?" Tiin. 

Manager chuan a kut elh neuh neuh pahin a chhing vâng vâng a, "Rui chhia chu a ni lo, mahse, a nam angreng" a ti ta a. 

"Cctv footage khami zana Ruati gate-a a lawnliam lai chu ka lo en ve ang e" Amanda chuan a ti leh a. Manager chuan pawi tih hmel deuh hian a chal a beng thak. "Chu chu lawm pawi lutuk chu, nimin zing khan heta ṭanga ṭhenawm hnai ber pen 100 bawra cottage-ah sawn rukru pakhat a che a, chu rukru chu a lo fing zêk nge ni, a main aṭangin kan villa-a cctv kan kam zawng zawng a lo tichhe vek mai a, engtin chiah nge a khawih kan hre bik lo, vawiin chawhma khan mi thiam kan ruai a, an siam ṭha naa, record awmsa zawng zawng kha a lo bo vek tawh. " A ti chuai ruih a. A hmelah chuan pawi tihna tak tak a langchiang viau bawk. 

Amanda a chek hlak a, "Rukru chu in man ta chuang lo va" a ti sep a. 

"Zingah kan hre chauh a, bakah saw lai in saw a ruah lai a nia, eng thil vak mah a ru lem lo bawk nen, report kan thehlut ta lo mai a nih kha.." Manager chuan a ti a. Amanda pawh a bu nghat. 

"Pawi intih loh chuan in hmunhma hi kan han fang kual lawk ang e" tih leh thawh a rual a. Manager chuan polite takin, "Zui in ngai em?" A ti var. 

Nui sâng chungin, "Ngai lo ve, hei ka assistant hian a idea min hrilh duh ang" tiin min rawn melh zauh, ka lo ner suk ringawt. Kan chhuak zui ta nghal a. Basement-ah kan chhuk lehnghal. Ruang an hmuhna lai bâwr chu ngunthlûk takin a han melh kual leh a, thil danglam em em hmuh tur a awm lo. Car sen pakhat leh scooty pahnih a awm a. A fai hun bawk si. Car chu a'n dinchilh ren râwn a, Villa-a hnathawk tu emaw ta a nih ka ring. A la thar ṭha viau bawk. Car hnunglam chu a bih uluk zual, a kun a, chhuatte chu hnai zetah a bih a, ka lo ding khawng reng. Eng nge a zawn ka hre si lo. Chutah car trunk chu a hawng ta a, a lo inkalh miah lo a nih hmel. "Sam, vatin" a rawn ti sep a. A hnâr a hup bawk. Ka va pan hnaih chuan car hnung chu mitthi uih rim a nam hak mai le! A hnâr hup chungin an bih kual leh a, car back light invuahna kil sirah chuan hmuh a nei ta, a zu zen rawk rawk a, silver ṭhi sen zet hi a lo ni reng mai! Sarangah ka lo khung nghal var a. Trunk chu khar lehin in chunglam a melh vang vang. Engmah chu a sawi hran lo thung. 

Basement chhuahsanin gate chu an belchiang leh a,a kawtzawl zawng zawng cement-a zût chhuah vek a nih avangin hniak pawh hmuh hleihtheih a ni lo, chuvang chuan hniak lam kha chu a ngaihven lo rêng bawk a. Gateah chuan a han lâwn chhin a, a tum tan chuan lawnliam mai a lo harsa hran lo. Mahse, gate nena inzâwl leh inhmatâwnin cctv an kam avangin mi ṭhenkhat tan lawnliam ngam a ni chiah lovang. Lêt lehin an ṭhenawm hnai ber lam chu min panpui leh ta a, Dawrtê kan kalpel tur chu, "Lawk, a pawimawh viau tak asin" tiin kan peng leh zuai. Dawr chu a muk ṭân reuh a, mamawh chi hrang hrang bakah hmawmsawm a tam viau. Dawr nghaktu chu Amanda nen an inrual vel awm e. Hâng lam, nu lian leh ruaukhau zet mai a ni a. A nelawm tehchiam loh. 

"Ka pi, thil kan lo zawt lawk thei che ang em? Police department aṭanga lo kal kan nia" Amanda chuan a ti a. 

"Ee..aw, in duh duh min zawt rawh u" a ti ve mai a. A hmel en aiin a âw a dam raih mai. 

Amanda pawh chuan, "Ruang chhar chungchângte kha i lo hre ve tawh ang a,. A hmasa berin i dawr hi dar engzat thleng nge i hawn ṭhin" a ti a. 

"Umm hre ve e, a zia lo tak tak a ni kha..aw ka dawr hi chu a tlangpuiin dar 10 thleng ka hawng tlangpui" a lo ti ve var a. 

"A nih chuan khami zan hmeichhe bo zan khan amah ngei khan thil a rawn lei niin ka hria a, a dik em?" Amanda chuan fimkhur takin a han ti leh a. 

"Aw lei chiang e, kan titi lûam lehnghal, a felin a nelawm roh sia, ka ui tak tak a ni. A mak êm mai" a lo ti ve mawlh mawlh. 

"Chuan, khami zan khan dar engzat thleng nge dawr i hawn a? Kha hmeichhia ni lo, dawrtu che an tam em?" Amanda chuan a ti duah a. 

A ngawih dat hnuah, "Aaa..umm, dar 10 pawh ka thleng lo, a chhan chu ka fapa ruhseh a chhuak a, ka haw hma ta a nih kha, chuan dawrtu neuh neuh chu ka nei, Villa-a thleng ho hi ka hre vek bik lo va, mipa pahnih leh boralta leh hmeichhe pakhat rui angreng tak te kha ka hrechiang a , a bak chu chutia han kawh chat tur ka hre mai lo" a ti ta a. A bengvarthlakin a hriatna a la ṭha hlein ka hria. Amanda pawh a lawm tih a lang. 

"Min hrethiam la, thil zawng zawng hi kan hriat ve vek a ngai ṭhin si a, hmeichhe rui angreng tak i tih chu heta thleng ngei a ni em?" Amanda chu a mitak viau. 

Chu nu pawh chu a thutak ve nghal niin ka hria, "Ka chiang lo, a thleng a nih loh chuan he tah tihtur a nei awm si lo va, hei chu manager ten an hre zawk lo'ng maw? " A lo ti ta chat a. 

"Ni e, an register kan la keu lo a, hriat dan a awm ang. Ka va mang nghilh teuh êm..ṭhiannu, kan lawm takzet e. Nakinah pawh kan inpui zel ang chu" Amanda chuan a ti sawk sawk a, kan invailiam ta rih. Rukruin a rawk an tih cottage chu luahtu an awm loh avangin a lo inkalh ṭhap a, "Chabi i dil si lo" ka ti sup. 

"Luh kher ngaiin ka hre lo. Rukru a ni tak takin ka ring lo. He thil hi rin aiin a ril dawnin ka hria" Amanda chuan a ti sap. Ka dar ka lo san âk ringawt. Kan kir leh ta vut a, a ngaihtuahna a sawrbîng leh viau tawh a niang, a kal chak êm mai 😀 Villa- kan thlen chuan Manager pawh a lo la awm a. 

"Thawhlehni aṭanga vawiin thlenga in mikhual ho hriat kan va duh ve " a ti a. Manager chuan Receptionist chu melh zauhin, "Entir rawh" a ti nghut. Manager hi palian leh thau lam, a vai hmel lek lek em aw tihtur a ni a, a nu leh pa emaw a pi leh puteah emaw vai an awm ka ring, a smartin a polite takzet a ni. Receptionist chuan Register chhah angreng tak hi Amanda kutah a pe ta a. 

A han enkual dan dan a, Thawhlehni tlaiah khan he mi Villa bikah hian mikhual panga an nei. Liantluanga te nupa bakah nupa tuak khat leh sumdawng pakhat a ni. Nilainiah erawh cottage lamah pahnih an nei thung a, Ningani-ah Liantluanga tih loh an chhuak vek bawk. Tin, tunah an Villa-a ruang chhar anih tak avang hian mikhual an thleng thei rih dawn lo va, thil dik lo a awm a nih phei chuan, Sawrkarin a kharsak hial maithei a ni. Chuvang chuan heta hnathawkte hi chuan chinfel vat nise an duh a rinawm. 

Zawitê hian, "Nupa tuak khat te zawk address hi la rawh le" a ti sap a. Ka lo la vat. Hmingliana, Khatla south hminga book a ni a, a number kan la bawk. Chumi zawh chuan Liantluanga te room kan pan ta a. A felfai bakah a zau viau,. Amanda chuan khum hnuai lam a bih leh dûk dûk roh a, kei chu ka zun chhuah lutuk avangin bathroom ka pan nghal. Ka va zung sur sur..ventilation chu a lo inhawng tak tak a, ka han dahthlak chuan a lo sang viau mai. Hrui hmanga uai thlak mai mai chi niin ka hre lo. A risky tlat! Tum viau tan erawh thil theih loh tawp chu a ni lo thung. Mahse, kei chuan ka ngam ka ring lo. Ka chhuah chuan Amanda chu khum hnuaiah a lo lut kût kût a, hmuh erawh a nei lo niin a lang. Bakah an lo chingfel vek tawh bawk nen. Rei awm lovin kan chhuk leh a. 

Manager bulah chuan, "Pu Tluanga kha an nu bo tukah khan a chhuak nghal em ni?" A ti a. 

Manager chuan, "Aw a inla chhuak ti ila, chawhnu lamah a chhuak a..mahse.." a ti nuah nuah. Amanda chuan sawi zawm turin a mitmei zauh, "Nizanah khan rui tawkin a rawn kal leh a, "Ramtinah hian min zawnpui teh u. A awm êm êm ang" ṭap deuh pur hian a rawn tia. Staff ṭhenkhat te nen hmun dang te an va en kual leh ngei a, mahse, an hmu si lo. Ani a rui bawk si, hnathawkte khan, 'Ka pu, tikha chuan i haw thei lovang, i accident mai ang, riak mai rawh' an tia, a dinhmun an lo khawngaih ve bawk nen, kan riahtir a, mahse, guest roomah" a ti ta mawlh mawlh a. Amanda mitmeng chu a fim leh ta kâk mai. Duh ai hian ka lo chîk ṭhin. A hmel hmuh hi nuam hek.

Thil dang hriatbelh leh vak tur a awm ta lo bawk a, khua a lo tlai lam ta bawk nen, hawn lam kan hnaih ta a. Manager a kalbo lawk hlanin kan haw tur pawn lam kan pan mêk laiin Amanda chu Reception counterah chuan a va lut kawi leh a, ka zui ve leh. An nula hmel fai ving veng, ngaihnobei tak bulah chuan, "Khami zan a bo zanah khan hmeichhe dang zu rui a rawn thleng ve tiraw? A dik em?" Tiin chiang kekkâwk hian a melh a. Nula chu a zâm lek lekin ka hria. 

Inthunun tum takin, "Kan manager bialnu hi a nia, kar khatah vawi khat a rawn riak ve ṭhin a. Weekend ah a ni tlangpui" Meng zak zak chung hian a ti ta a. 

Amanda bawk chuan, "Tu mitmei nge i ven? Thil dik lo i sawi pawh ni hlei lo, engah nge i hlauhthawn chiam" a ti dam thlap. 

Kei pawn nula chu hlauthawng hle angin ka hmu ve tlat a ni. "Aa..ih, Manager hian sawi vak a remti lo ṭhin a, pute beng a thlen a hlau ve bawk nen.." a ti ta chiah a, Amanda chuan, "Ka hrethiam e. A lawmawm e. Engpawhnise, lo fimkhur u la" tiin kan chhuahsan thei ta hrâm a. Amanda chuan, "Sam, dawrah chaw ei mai ang hmiang, zaninah la la Hmingliana te nupa kha va hmuh ka duh" a ti nghat. Hnialna ka nei lo. 

Sikulpuikawna chaw dawr pakhatah kan inhnawh puar tê tê a, ka chhungte ka be bawk. Kan ei lai chuan, "Ngaihdan sawi hun lai tak" a ti zauh a. A nelawm leh viau tawh. 

"Ka hrethiam teh nuaih lo ve a. Tluanga kha a khawngaihthlak ka ti, Ruati bialpa hlui niawma an sawi pawh kha kawm chian chi a ni lo maw?" Ka ti a. 

A bu nghat nghat, "Ruati chhungte hi vawikhat kawm leh ka duh, vawiin khan an lusûn hlimchhawn nen, Tluanga te lam mitmei an veng tih i hai lo'ng chu maw?" A ti sar sar a. Ar bawp lek larh larh chungin, "Chulam pawh ka lo ngaihven lo" ka ti hluk. A ner sak a, "Din khawng luh reng hi thluak tan exercise a tling lo" a ti zui hmak. Ka chhang tawh lo. 

Kan ei kham a, chawl khawmuang lem lovin Hmingliana te veng lam kan pan zui nghal, an in awmna tak kan hriat loh vangin a number dahah khan kan call ta a. Amandain a bia, an in awmna an inhrilh nghal mawlh mawlh a, house number aṭangin zawn a awlsam ang. Rei kan zawng buai lo, Building lian ve tawk tak, sakna la rei lo tih hriat zet mai a ni nghe nghe. 

Amah Hmingliana ngei mai chuan min lo dawngsawng a, pa thluak nem hmel tak, a pumrua pawh derthawng lam hret a ni a. An inah chuan a nu leh pate nen an la khawsa ho a nih hmel, eng dang sawi hmain in chung lamah min chhohpui nghal a, an nupa kan kawm dawn tih an hre sa bawk nen, an lo inhawng viau chu a lawmawm. In chung sitting room zau helh hawlhah chuan, kan pali chuan kan ṭhu ta ṭhap a. Amanda chuan pehhel kual lem lovin khami zan chungchanga hriat an neih leh neih loh a zawt nghal rap. 

Hmingliana chuan, "Nia mawle, a zia lo tak tak a ni. An ni kha kan awmna chungah an awm a, zanriah ei lai pawh khan an nu leh kan nu hi chu an inbe ve reng. An nu pawh kha a fel hmel viau. Zanriah ei khamah kha chuan roomah kan nu nen kan tawm nghal a, dar 9 rik hma deuhin dawrah thil ka va lei a, ka kir hnu lawkah kan mu. Khami zan khan hmeichhe pakhat, zu rui angreng tak hi a rawn lut ve a, zantir lam phei kha chuan a bengchheng angreng. Manager nen khan an inhnimhnai deuh niin ka hria, a bialnu emaw a nupui emaw ni turah ka ngai ngawt a. Zing dar 1 bawr vel a niang a, kan nu hian ka muhil lai mi rawn nghawk harh a, 'Chu! Eng thawm nge?' a ti zawi sap a. Ka'n ngaithla chiang deuh a, kha zurui nu bawk kha a ṭap chu niin, kan nu chuan a lo hlau a niawm e. A ṭap ring lutuk lo naa, thleng ve pakhat pawh khan a lo hre ve. Mahse, 10 mins vel hnuah a reh ve ta mai bawk a, keini pawh kan muhil zui lehnghal. A bak chu tikhan zing lamah min rawn kaitho ta kha a ni mai. Chubak han hriat leh î kan nei lem lo" a ti malh malh a. 

Amanda ṭawng hmain, "Thil ka lo zawt ve lawk che u, weekend pawh a ni si lo va, Villa-ah khan eng hun hmang turin nge in zuk kal ve le?" Ka lo ti ve zuk a. Amanda pawn a lo ngaichâng ve nghal, an nu melh zauh pahin Hminga chuan, "Aaa..sawi nuam a ni vak lo naa kan sawi mai a niang chu..englo a nia, ka farnu phaia awm a rawn haw a, kan nu nen an thu a inhmu lo deuh nge ni, kan in chhung boruak nuam lo ta lutuk kha ka pa mangangin 'Tunkar bak a châm dawn lo, intihhlim pahin zuk awm khawthawng mai rawh u' a tia, kan chhuak khât bawk nen, kan zu kal ve ta tawp a nih kha" a ti chuar chuar a. Amanda a bu nghat. 

"Zu rui nu chu khawiah nge a riah i hria em?" A ti teh daih a! Nge maw chunu pawh chu a ngaihven viau le?

"Guest roomah a riakin ka hria. Kan pa dawr kal hlan khan ka silver ṭhi bo ka zu zawng kual a, tah chuan guest roomah a awm" Hminga nupui chuan a lo ti ta var a. Silver ṭhi?! Ka harh zawk, Amanda mitmeng pawh a buai ve deuhin ka hria. 

Amanda chuan, "Silver ṭhi i tibo tihna em ni?" A lo ti ta chiah a. 

"Aw, zanriah eikham hnu reivakloah ka inbual a, ṭhi awrh chunga ka inbual tur darthlalanga ka inen khan a lo awm ta si lo va, manto tak ni lo mah se; ka pi ka nu nuin a thih dawna min pek ve a nia, ka roh ve lutuk a, ka lo thlauh palh a niang tiin ka zuk zawng mawle" Hminga nupui chuan a ti siam siam a. Ani pawh an pa ang deuhin a zia a zawih hmel angreng. 

"A nih chu mawle..anih Pu Hming, in motor kha khawiah nge in hun?" Amanda chuan a ti a. 

"Dawr piah garage -ah khan.." a lo ti var a. 

"Anih thil pakhat chiah, hetia a ruang an hmu leh ta mai hi ngaihdan i nei ve em? Elevator kha i va hmu ve reng em? Tlakhlumna khawp niin i hria em?" A ti ta a. Ka sawi hmaih tak chu Villa-ah khan Elavator kha accident a awm leh hlauh thuah hawn remtih tawh loh a ni a, keini pawh khan kan va hmu ta lem lo kha a nia.

Hminga chuan, muangchâng hian, " a..ngaihdan neih thiam harsa ka ti. Kan inhrechiang hman lo bawk nen, an nu kha kei fel hmel fû khan ka hria a, khatianga zanlaia pasal muthilh hlana chhuak ru duh tur chi niin ka hre lo. Mahse, footage kha ka hmu ve bawk si, ka hrethiam tehnuaih tawh lo. Tunah basement-ah a ruang chhar a ni leh lawi si,a tira Villa chhung lam hrim hrim an zawng lo kha a pawi a nih hmel, an pa mangang lah a ṭap pur bawk nen..Elevator kha chu hre sa lo tan zawng a hlauhawm viau mai. Chutihrualin khar kha a ni sa reng a, a chhiat thu pawh an tar kha..tiraw, Kimi" tiin an nu a en a. An nu pawh chuan, "Aw , a hman theih loh thu an tar ngei alawm." A lo ti ve var a. 

Amanda ṭawng leh hmain, "A nih thil pakhat lawk, Villa chhung lama cctv footage kha in en lo em ni? Pawnlam in en chuan, tah chuan tuna ruang chhar hi a tei vel a hmuh theih ngei awm si a" ka lo ti ve vat vat a. 

An nu zawk chuan, "Aih, chhunglamah khan an vuah lo nge a chhia an tih kha aw.." tih pahin an pa a melh a, Pu Hminga chuan, "Receptionist khan kan vuah lo a tia, Manager khan a chhia a tiin ka hria.." a lo ti a. Amanda nen kan inmelh zauh. 

Pu Hmingliana te nupa chu kan kalsan leh ta phawt a, Dar 10 a ri thuak tawh. "Sam, motor ka la khalh hleithei si lo va, kea hawn leh ngawt ai chuan, ka inah riak ve mai ta che. Naktukah zingkara kan chhuah a ngai dawn bawk nen" a ti a. 

"Ka inthlakna tur la kawi lawk ila" ka ti a, a hnial bîk lo. A rawn thawh tirh ai chuan innel tawh tak kan ni. 

Kan inah inthlakna ka la zuai a, ka nu ber a lo mu tawh a, chanchin min zawt tur an awm lo, ka pa hi zawng case kal lai hian a ngawi thei khawp a..a ṭha ka ti viau. Amanda in lam kan pan mêk laiin, "Silver ṭhi tehdaih kha a mak tiraw?" Ka ti hluai a. 

Hmalam melh ngar chung leh mitmeng thim raih hian, "Accident ni lovin tualthahna ngei a ni..kan case hi" a ti zawi raih a..

To be cont..