Amanda 2

BOSS AMANDA (2)

(HONEYMOON..)

Ziaktu: Toni Râlte

Ngawi rengin a inah kan lut a, kan inbual sawk sawk a, "Mu rawh, kei chu ka la meng lawk dawn" a tih avangin ka chau ve deuh bawk nen, ka mutsan ta a. Dar engzat thleng nge a men ka hre lo. Ka harh chuan a lo tho leh der tawh. Zing dar 7 velah Villa lam bawk kan pan leh ta a. Ruati ruang postmortem result-a a lan danah chuan, a ring ruh tliakin, a chal kha na taka tauh a ni bawk. A kawchhung lam erawh fel lo a awm lo va, mipa chi hmuh tur a awm hek lo. Alcohol erawh tlem hmuh a ni thung, Tluanga khan dâwt a sawi lo tihna a ni ve maithei, zu in chungchangah chuan. Villa lam kan pan leh chhan ka hre chiah lo va, a ṭul a niang chu maw. Tin, Ruati ruang chu Kolasib lama lakthlak an duh rualin a rim a nat deuh tawh avangin Liantluanga te veng thlanmualah phum a ni dawn a ni. Mizo zinga innei rei lo ber pawl an ni hial awm e a. Villa kan thlen chuan an lo reh ṭhuap mai. Sawi tawh angin mikhual thlen a rem rih lo bawk a, hnathawkte pawh an haw nual. Manager pawh chu chhuak mai thei turin a lo inṭam at mai. Khaw nge a kal dawn kan zawh chuan, "Kan Villa-a thleng a nih avangin a vuina lama kal ve ka duh deuh a, puin a sawi bawk nen" a ti a. Thil âwm lo tak a ni hran lo.

Amanda chuan, "I bialnu kha khawi veng nge min hrilh thei em? Tu nge a nih tih te?" A ti sawk sawk a,. Manager chu a ner nâwng, "A privacy mah mah lo maw? Bakah ani hmertel ka remti hauh lo mai" a ti nghut a. A aw paw'n ngaihno a bei vak lo. 

Amanda chuan, "Ka hria alawm, mahse, khami zana heta awm ve zawng zawng kha kan biak a ngai tlat" a ti khauh a. A zâm hran lo. 

Manager chuan hreh hmel zet hian, "Lateii a nia, Zarkawtah an khawsa..a pa chu kan ex MLA Pu Chullova kha a ni nghe nghe. Mahse, khawngaihin chimbuai vak lo ula ka duh, kha thil thleng khan a shock angreng a, a mumal vak lo" a ti duah a. Amanda chuan engmah a zawt zui tawh lo. 

"Room kha han en leh lawk ka duh a, i duh chuan min kalsan thei a nia" tih thu bak. Manager pawh chu a kal zui ve mai bawk. A bialnu ven a tina thiam mang e. Hmeichhe ho duhzawng tak tur a ni. Roomah chuan kan chho leh a, khum a chinglet leh tawh. Rizai te chu a hnîm leh that that ṭhin, "Eng ber nge i zawn?" Ka tih chuan, "Mipa chi rim ka hre duh" a ti tawl mai. Ka nui huk a, a dangdai mah mah ka ti. Ka ngaihruat thiam ve mang bawk si lo. 

"Aw le..hei le.." tiin khum bul dustbin-a tissue paper chu a ten hmel zetin a khai a, "Hnîm teh" a ti nghat. Ka va hnim a, mipa chi rim a nam ngei e. Sarangtê-ah kan khung leh ta hmak. Bedsheet leh rizai kawr vel an lo thlak tawh avangin khumah chuan rim kha a lo awm tawh lo a nih hmel. Bawlhhlawh bawm erawh bawlhhlawh a tlem deuh avangin an la paih fai lo a nih dawn hi. 

Hall-a kan chhuk chuan nimina nula smart tak kha a lo awm leh vâng tawh a. Amanda chuan va panin, "Mikhual in nei chuang si lo va, ti nge i hawn ve loh?" A ti sar sar. 

"Nia, puin awm turin min ti deuh tlat a. " A ti mai a. 

"Dawr pawh saw an khar daih a ni maw?" Amanda chuan a ti leh. 

"Aw..U Thangpuii chu a nautê kha entir a ngai hrim hrim a, a haw ve a nih kha.." a ti felfai leh thlap. Nimina hlauh nei ang deuh khan a awm tawh miah lo. 

Nula chu va hnaih hlekin, "Thil hriat duh tlêm ka la nei a, khawngaihin min chhansak la tiraw?" Amanda chuan nelawm tak hian a ti a. Nula chuan a hmui a pet hlak a, zangkhai takin, "Tehreng mai" a ti ve ta a. Manager ber a awm tawh lo bawk a, Lounge -ah ṭhu khawmin Amanda chuan, "Vanlalruati kha accident vanga thi niin i hria em? Ngaihdan eng emaw tal kan laka sawi ngai si te i nei lo maw?" Tiin bul a han ṭan a. 

Nula chu a ngawih det hnuah, "Aa..ka hrethiam lo, ngaihdan han sawi tur paw'n. Bakah khami zan khan cottage ah ka riak daih a. " A ti ringawt. 

"A nih chu mawle, a nih Lateii, in manager bialnu kha i hrechiang em? " Amanda chuan a ti leh a, Manager bialnu a ngaihven tehdaih hi mak ka tiin ka lo hnual ru viau tawh. A ngaihtuahna hrethiam ve hek lo i! Nula chuan, "Hrechiang em em chuang nang, kan inbe ngai meuh lo, a induhtawk ve hlein ka hria, an hausak bakah a hmelte a ṭha bawk a." A ti ve mai bawk. A dik ang hei chu. Hnathawkte hmuh leh hriat laia zu rui lang ngam khawp chuan midang a pawisa loin a ngainep tih a lang reng. 

"Zawhna pakhat chiah, pakhat chiah tak tak..pu Tluanga hi a hmain a nupui neih hma hian Villa-ah hian a rawn kal ve tawh em?" Amanda chuan a ti leh a. Nula chuan mak tih hmel deuh hian, "Kal reng reng e. Manager nen hian ṭhianṭha tak alawm an nih.." a ti ta a. Chu zawng thuthar a ni tlat! Manager kha Thanpuia a ni a, Chanmari-a khawsa an niin ka hria. Ka chiang tawh lo. Amanda chuan, "E..nia ni dawn tak,. A nih kan lawm lutuk aw" nelawm zetin a ti a. Kei chuan, "Cctv footage kha i hmu ve em? Gate a lawnliam lai kha" ka lo ti hmanhmawh. Nula chuan a lu a thing nar nar, nia, nichin lawkah a sawi reng sia. Khatih hun laite kha chuan Villa-ah a awm tawh lo tih kha..umm, Amanda nen chuan kan inzuichhuak leh ta phawt a. Ril a ṭâm ṭan. Villaah lah eitur lei theih an siam rih si lo. Hotel lo awm hnai bera tukṭhuan ei turin kan tlan leh ta char char a, Chawlhhmunah dingin hotel lun vak loah tukṭhuan chu kan ei ta a ni. 

"Ti nge Manager bialnu kha i va ngaihven ve?" Ka ti satliah a. 

"Ngaihven âwm tak a ni miau sia lawm. Weekend chauha a bialpa hmu tura kal ṭhin, kar laklawh lutuka a zu riakthla khan ngaihdan eng emaw a neihtir ve lo che em ni?" A ti ta khauh a. Ka dang titih leh ta dêr mai. 

"Chuan, mitthi vui chhungin kan va hmu dawn nia..an inah chuan ka kal tawh lawm, a pate ruling lai khan.." a ti nghal zat. 

"A thuhrimin Amanda,a bo chungchangah report thehluh a nia, a ruang hmuh hnuah case an file reng reng em ni?" Ka lo ti daih. 

A ner sak a, "Ruati pa khan thubuai a thehlut alawm. Chutini lo se, office-ah thluak vawrhvirin checker i khel leh dâwk dâwk tawh ang chu " a ti hmak. Ka heh a hîl viau. Kan ei kham a, ei man kan inpek lai chuan Amanda phone a ri ral ral a, pawnah chhuakin a be zui nghal. 

Motora kan luh hnuah, "Ruati nu leh a laizawn ten min hmuh an duh a nih chu, mahse, vui zawhah" a ti sap a. 

"Eng thu hla tak nei ang maw? " Ka ti sup a. 

"Niminah khan sawi chhuah duh loh ap ṭûn ang khan an awm rêng a! Thu thar kan hre leh turah ngai ang" a ti ve mai a. Tichuan, Chawlhhmun aṭangin Zarkawta Pu Chullova, Ex-minister te in lam panin kan tlan ta vang vang a, kan inbe tam lo ngang mai. Kan be lawk lo naa, a awm kan ring a niang chu maw. 

MLA lo ni hrep tawh a ni bawk a, Pu Chullova te in chu ropui hem hem tak a ni. Kan ramah hi zawng ram hruaitu te an hausa duah hluah hluah zel chu a nih hi. Hruaitu hna leh mawhphurhna a san tehlul nen, sum tam tak sênga ram hruaitu nih an han tum ngat ngat pawh hi a mak lo ve. An hausak phah miau a! An hnathawh erawh eng teh ual a nih kan hre ngai lem hlei law..an nula awmpui ni ngeia langin kawng min lo hawnsak a, Amanda chuan a nihna te chu hrilhin, "Lateii rawn kawm lawk kan tum a ni" a ti a. 

Nula chuan Living room-a phone lo khawih mial mial a pi chu va koin, "U Lateii an be duh a" a ti a. Nu ber chu a phâwk riauin a lang. A ding hluai a, "Eng atan nge Mateii chu in hmuh duh a?!" A ti nghat a, a awka hrim hrim chuan ngaihno a bei lovin a chaltlai lek lek. Mi hausa nu a nih vang nge phei zawng ka hre lo. 

Amanda chuan dam thlap hian, "Detective Amanda ka ni a, Vanlalruati ruang chhar chungchangah a hmuna awm ve i fanu hi kawm ka duh a ni..ka pi" a ti a. Chu nu pawh chuan a hrethiam ve nge ni, "Nu-i, Mateii chu han ko rawh" a ti lâng lâng. Nui a tira min lo dawngsawngtuin in chunglam a pan lai chuan Living room ṭhutthlengah chuan mawng kan hûng ve nghal zat. 

A tira min lo biak danah a inthiam chiah lo nge ni, kan pii chuan, "In tur in duh em?" A ti nem diai a. Kan hnar thung. Nui chu rawn pen thla hlak hlakin, "Ka roomah lo chho mai rawh se " a ti" a ti a. Pii chuan, "Han chho mai ta che u" a lo ti bawk. An fanu chu an duat hmel kan ti dawn nge, a lal hmel viau mai. Keini pawh duhthlan tur dang nei ta lo chu in chung lam kan pan ve ta nghal a. In chung inleng kawmna pindanah chuan Lateii ni ngei tur chu a lo thu hnawk niaih mai. Magazine eng eng emaw a let phung a, sikret bung lah an thal phung bawk. A pindan cheimawina vel a hautak dawn tehlul nen, a che ṭawp mang e. 

A mitmeng a thîp lek lek a, ngo tak, cher lam lek lek, hleitling lam a pawl bawk, a heh chu a pan hleng mai a, mahse, a fuke engkim chu a invuah fuh ve phian bawk si, hmelṭha ka tih chi a ni lo naa, a chhe lo tiin i sawifiah mai teh ang. "Eng nge in duh?" A lo ti nghal tâwng a. A aw chu a lian phian!

Amanda chuan, "Sailo Villa-a ruang chhar chungchangah biak che kan duh a ni" a lo ti var a. 

Lateii chuan, "A engah chuan? Pawimawhna ka nei ve em ni?" A ti duh lek a! Min ngaihpawimawh hmel fahran lo kher mai. 

Amanda chuan zawi sap hian, "Silver ṭhi i tibo em?" A ti ta a. Lateii chu a mitah tak a melh chat bawk. Kei takngial paw'n Lateii mitmeng buai leh eng emaw lo lang zawk chu ka hmuh hmaih hauh lo nia! Mahse, a inthunun leh vat thung. 

"Tibo lo..ngati nge a? Eng nge a awmzia" a ti bah nak. 

Amanda a nui hak a, "Chu chu rawn hriat ka duh mai mai..a nih kan kal ang e" tiin a ding nghal zat, ka lo hrilhhai letling. Lateii pawh chuan maktih hmel deuh hian, "Chumi ringawt zawt tur chuan in lo kal a maw!" A ti ve nghek. Kei tak pawn mak ka ti a ni. Amanda lah chuan enghelh neih loh hmel zet hian, "Aw..chu chauh chu, i number kan nei lo va..kan rawn kalchilh ta mai che. I hun min pe a, kan lawm..Sam, kal ang" a ti nghal zung zung. La hawihai ru deuhin ka tho ve vut a, an in kan chhuahsan rual rualin, "Eng nge a awmzia? I mak êm mai a" ka ti nghal chiam. A nui hak a, "I volume down ṭhin rawh. Ka kalkawng tur ka mitthla thiam ṭan e, tikhan" a ti hmiah. Huzzz, he nu hi engtikah nge maw ka hriatthiam theih ang le?! 

Vanlalruati ruang chu a lo nam deuh tawh bakah lumen a nihna laiah dar 11-ah an vui a. Office-ah kan kal zuai a, Amanda chuan Sailo Villa din a nih atanga eng emaw thil thleng a awm tawh leh tawh lo record a en mêk a. Kei erawhin kan mi kawmte thusawi ho kha ka lo zirchiang thung. Han hnemhnanpui em em tur ka hmu lo. Mahse, mak ka tih ve deuh erawh an Villa chhunga cctv chungchanga Manager leh Receptionist te thusawi inang lo kha a ni. Pakhatin dah a ni lo a tih laiin pakhatin a chhiat thu a sawi bawk a. Tin, cctv pawnlama an dah aṭangin gate-a Ruati lawnliam lai an hmu tih an sawi laiin kan hmuh ve hmain a chhe leh ta daih bawk si te chu. Manager leh Tluanga chauh khan em ni Ruati lawnliam lai chu hmu ta ang? A nih chuan dâwt a nih theihna a awm. Hriatpuitu an nei tlat lo. An pahnih kha ṭhiantha tak an ni tih khata thawk nula khan a sawi chiang bawk si, a tira kan zu kawm lah khan inkawm ngai lo leh inhre ngai lo ang maiin an awm bawk si! A hnawk riau. Mak leh êm êm bawk chu Manager car hnunga silver ṭhi lo awm ngawt te, a car hnung rimchhe viau te leh a car bul maia ruang an hmuh dante kha..Manager Thansanga hi a rinhlelhawm ta riauin ka hria, a smart viau naa, a mitmeng ka ngaihtuah let hian a fin hmelin nunrâwnna ka hmu thei tlat! Ka inlak fin vang emaw ka zeldin thubawl te pawh a ni lehpek ang. Keima tawka ka lo buai ve mual mual laiin, "Hawh le, Ruati nu leh a nau chu va hmu ila.." a rawn ti a. Ka indah fel sawk sawk a, ka zui chhuak nghal. Corridor kan zawh laiin Ruati nu leh a naute chu Corridor zawhin an rawn phei ve mêk lawi a! Amanda pawh chuan, "A awlsam zawk e. Coffee kha lo va thlitsak lawk rawh, ka lo dawngsawng ang" a ti sawk sawk a. Kei pawh kan office-ah ka lut leh nghal zuk. Sawi hmaih pakhat chu tissue papera mipa chi them la kai kha Forensic lamah thawn a ni tawh a, hmanrua leh khawl kan neih ṭhat tawk loh aleiah nghah ve leh hlek a la ngai ang. Tluanga chi ni ta se; amah leh amah a inhrithla a nih ngawt loh chuan Ruati taksaah mipa chi hmuh a ni si lo. Kei chuan ka ngaihruat thiam vak lo a ni ber e. Coffee ka thlit laiin Ruati nu leh a naute chu an rawn lut a. Boss chuan ṭhutna a kawhhmuh vat, kei pawh an coffee keng chungin ka pan zui a. Amanda bulah ṭhu ve nghal zatin, an thusawi pawimawh lai chhinchhiah tur chuan ka inring ta ran a. 

Boss chuan, "Han hahdam u la, in inpeih hunah ka hriat tura in duhte chu in sawi dawn nia" a ti dam thliam a. Ruati nu hi Ruati khan a chhun hle niin ka hria, a nulat lai pawn a chhe vak miah lovang. Ruati nau erawh a pa lamah a kal nge nula e ti lo chuan a pa hrûk mai a, patil erawh a ni hran lo niin ka hria. An ṭap nasa tih hriat takin an mit a bui lâk bawk. Coffee in pah chuan Ruati nu chuan, "Ni e, niminah khan Tluanga te lam kha an awm ve nen, duh angin thil kan sawi kimchang lo êm mai a, mi mawlh rûn reng a, vui zawh rual deuhthawin mi hriat tam hmain kan rawn kal tawp mai a ni" a han ti tê tê a. 

Kan lo ngaichâng ta ran mai, eng lam nge an sawi dawn tih hriat ni hek lo. 

Coffee an in zo ta. A ṭhut dan siamremin aw khur dar dar hian a rawn ṭawngchhuak leh ta a. 

"Ka fanu kha ka lo hrechiang tawk lo pawh a ni maithei, mahse, a nulat chhuah tirh aṭanga pasal a neih thlengin zu far khat mah a in ka la hre lo. A nu ka ni a, fate zingah pawh min nghenga min nêk rengtu a ni a, a pangchan pawh a pangchang. Unau pathum chauh an ni a, hei tuna ka rawn hruai hi a tê ber a ni a, ani lah tihian a nu zîm zêm lo nen, a u zawk hi a vel ṭap lo chauh zel kha a nia. A û ber mipa erawh a nupui fanaute nen Arunachal-ah Missionary hnathawkin an awm ve a. Ka han sawi duah a nih chu, chhungkaw chanchin te pawh hriat ngai a awm ve ṭhin avangin. 

Niminah khan Tluanga khan a bialpa hlui chungchangte thlengin a sawi a, ka sawi tawh ang khan, Ni e, Johny kha chu Mateii paw'n a duh ve alawm, thil reng reng chu a hunlai a awm ve. Mahse, Tluanga nen an intawn aṭang hian Johny nen an inbiak leh awm ka hre lo, kha chu ka sawi huai ngam bik lo. Ka lakah a lo thup pawh a ni thei. Mahse, khamizan a bo zanah kha chuan Mateii kha Johny hmu tura a chhuah ka ring lo. A chhan chu in lo hre tawh maithei,Mateii te inneih hma karah khan Johny chu a nu nerve ṭha lo entirin phaiah a zin daih a, tunah pawh a lo la haw lo. Chu chu a nia, keini lam chuan a thih dan hi kan hrethiam lo, accident vanga thi niin kan ngai thei thlâwt lo a ni. Khami zan zanriah an ei hnu lawkah khan min lo bia a, an kalna hmun a nawm thu leh thawktute felzia te, an zanriah tuizia te a sawi ve siam siam a. Ngaihṭha takin ka awm ve ta mai kha a nia. Kan inbiak hnuhnun berna tur a ni ang tih hria ila phone kha ka dah lo tur..(a han ṭap leh hlawp hlawp a, kan lo ngawi reng tawp. Mi hnem kan thiam lo dun ve ropui sia, a han inhruhul a) ..tin, nupa nun chungchâng a sawi dan kha mak ka ti takzet bawk a ni. Kan makpa hi ka ringhlel a ni lo, mahse, ka fanu ruang chungah ngei pawh dâwt a sawi thei kha mak ka ti a ni. An inneih zanah kha Mateii rai haw ve deuh bawk si kha a chau deuh nen, nufa inpawh tak kan ni a, a tukah, "U Tluanga pawn min hrethiam" a rawn ti a. Kan nui dun nasa viau, Tluanga mitmei ven te a nat ve avangin, "Nupa in ni tawh a, i pasal thute pawh i ngaihchan thiam a ṭha..nupa nun hi min tinupa berte zing ami a ni ve bawk nen" tiin ka chah a. An inneih zan 2-naah khan nupa nun an hmang ngei tih amah Mateii ngeiin min hrilh leh a ni, "Nu, i sawi ang khan ka inphal a, a lawm vur vur khawp mai. Mahse, nau pai lai ka ni sia, insûm a tha tho" a rawn ti chiang lutuk. Khata thildanga kan titina pawh ka la hre vek thei. Chutiang a nih laia Tluanga'n an inneih aṭanga nupa nun hmang ngai miah lo anga a insawi te kha ka fanu kha thiamloh chantir a tum ni hian ka hre tlat a, ka rilru a luah reng mai a ni. " Tiin. 

Kei pawn a pawimawh lai chu ka chhinchhiah ta zel a. A nu meuh chuan dâwt a sawi ka ring bik lo. Tin, nufa inpawh tak an nihzia a lang hlein ka hria. Fanu ṭhenkhat chuan nute bulah an sex life an sawi ngam awkawng lovang. Chuvangin Ruati kha nula hawiharh, fingfel leh ngainatawm tak a nih ka ring ve tawp. 

Amanda chuan, "A lawmawm e,. Ni e, zêp nâk emaw vui zawhah rawn kawm chian leh che u kha kan tumdan a ni hrim hrim a. I thusawi chu kan lo vawng tlat ang e, thildang a la awm em?" Tiin Ruati nau chu a melh zauh a. Lungchhiat hmel zet hian, "Umm, sawi duh ka nei ve a. Ih,.anu sawi ang khan ka u khan zu a in ngai lo. Beer takngial pawh a in lo. Chuan, thildang pawimawh intih takin, U Tluanga hian ka u phone password kha a hria, a hria tih ka hriatna chhan chu khamizan ka u a awm lo tih a hriat hnu lawk nge ka hre lo, zing lam tawh a ni zawk mah ang chu..ka u phone aṭang khan min lo call tlat a ni! "I u a awm lo, kan hmu zo lo. A phone hi a hnutchhiah bawk sia..mahse, i nute la hrilh suh, an chiâi lutuk ang" a rawn ti! Kei kha pubg ka khelh avangin ka mengrei a, ka tlaivar zui ta rêng bawk. U Tluanga thu min chah ang khan Anu te chu ka hrilh ta lo, bakah ka ṭhiante inah ka riak daih bawk nen, va call harh kha ka hreh ve deuh a, tin, ka û phone atanga min lo call tih in awih loh chuan ka phone-ah hian min lo call-na chu a la awm e. Tin, an inneih hma zanah chiah pawh ka û thingpui lum hlanin ka u phone chu a khawihsak, ka hmu chiang lutuk. Innei mai tur an nia, password an inhriatsak turah ka ngaisa hrim hrim. Niminah khan he lamah kan buai avangin ka rawn chhuk ve hman lo va, a hnuah Anuin U Tluanga thusawi dan leh Ka u phone-a engmah hmuh tur a awm loh thu vel a sawi khan mak ka ti lutuk a, a thusawi kha tak tak emaw in tih ka hlau..chuvangin ka rawn kal ve a ni" a ti ta chat chat a. Rin ai tak chuan a inthunun theiin a ṭawngkam pawh a fiahfel viau e. 

Amanda pawh a lâwm hmel ta kher mai. A chhan chu rin aia hmaa he case hi kan tihtâwp a rinawm tak avangin a ni ber ang chu. 

Amanda chuan, "Ka pi, thu dang ka lo zawt lawk ang che u, Tluanga te chhungkaw khawsak dinhmun saw eng nge le? " A ti a. 

Ruati nu chuan a aw thian kharhin, "Aa..keini ai thlawt chuan an khawsa thei alawm. Tin, chhungkua vua leh vâng, mi lian tak tak an nei bawk. An pa ber saw contractor a niawm e, nu ber erawhin thawh a neih awm ka hre lo. Tluanga te unau saw pali an nia, Tluanga saw a upa ber dawttu a ni bawk. An û ber mipa pawh Sap ramah a awm. Eng nge a thawh ka hre bik lo, Tluanga hi chu Electric Department-ah hian a thawk ve a. A la nghet lo thung. A naute erawh saw chuan eng nge an thawha an zir ka hre mumal chiah lo" a ti ta a. Kan hriat loh kan hriat belh leh ta nual mai. An lo kal chu a tihzia kher mai. 

"A nih Ruati thihna chungchanga thubuai in thehluh hi Tluanga te lamin an hria em? An pawmpui ve che u em?" Amanda chuan a ti leh a. 

"Pawmpui ti ila, Tluanga nu kha chuan, 'Ruati mualphona tur mai mai te hi a ni lo'ng maw? ' kha chu a tia. Mahse, a mualphona chhan tur ka hre lo, mualpho pawh nise ani chu hetah a awm ve tawh lo, mahse, thi tawh mahse, a dikna chanvo hi chu a hmuh ngei ka duh tlat a, kan pa pawn ka rilru ang chiah hi a pu ve bawk nen, tikhan kan rawn thehlut leh ta a nih kha.." a ti nghat nghat a. 

"Tluanga'n eng nge a sawi ve?" Ka lo ti ve vut. 

"Ani paw'n a nu ngaihdan kha a ṭawmpui deuh a, mahse, sawi tawh ang khan kan ngaipawimawh lo lui ve a nih kha" a ti hmiah. A ṭha, hetiang hian nu leh pate hian dikna kenkawh kawngah ṭan la ila, huaisen takin pen ila, kan ram dinhmun pawh a danglam mahna. 

Ruati nau chuan, "Ka u thattu hi in manchhuak a nih chuan, ka nu leh paten ngaidam mah se; kei chuan ka ngaidam ngai lo vang. Khawngaihin ka pi, manchhuak vat rawh u aw" a lo ti ve ngial a. 

Amanda pawh tumruh zetin a bu nghat nghat mai. 

An chhuah hnuah thatchhe zeta a chair-a ṭhut pahin, "Silver ṭhi khan min la tibuai deuh a, a bak chu ka hmu tlang ruâk tawh.." a ti a. 

"Tluanga'n a that i tihna em ni?" Ka tih chuan, "Tluanga ngawt chuan a that lo vang. Tel ve dang an awm..Ṭhi khan pawimawhna a nei thei ang em aw.." a ti vang vang a. 

"Hmingliana nupui kha a tel ve ang a, a ṭhi kha motorah khan a thlauh palh te a ni thei ang em? Tluanga nen a rukin an lo inngaizawng a, chu chu Ruati khan a hrechhuak ta si a,an mu dun lai a phâwk emaw pawh a ni thei, kawng dang an neih tawh loh avangin an pahnih inthurualin an dahbo a ni thei ang em?" Ka lo ti ve zung zung a. Fing ka inti ve rap..

"Tichuan, Hmingliana chu amahin a mu tihna a niang a..a ni em?" A ti khauh. A mitmenga ka lo remkhawm ve thu te a ngaihven lo tih langsar lutuk chuan mi run takzet. 

"Nih loh paw'n, Ruati leh manager kha an mu dun ang a, Tluanga hian phâwk ta se.." ka tih leh phei chuan pawr zet hian, "Sama, chutiang idea chhe lutuk chu Tualthattu tih âwm tawk lek a nih chu" a ti hlar. Ka ngawi ta daih. Dawhkana a pen chhu kauh kauhin chunglam a melh vang vang a. A chair chu a tivir a tivir bawk. 

"An manager Thansanga hi Sam, hriat tawhna neiin ka inhria a, ka lo upa ve ta a niang, khawi hmunah nge engtikah nge tih ka ngaihtuah let ngial hian ka hrechhuak zo tawh lo. Ka hmuh phat aṭang leh min lo dawnsawn dan aṭang khan ka enthlakzui tur list-ah ka dah nghal. A smart lutuk leh polite em em kha a nihdan tur a ni lo. Mipa inthunun thei tak pawh nise; an Villa, a enkawl lai ngeia ruang chhar mai bakah a hma lawka rukru chetna awm si, khatitaka a invawng thei kha i lo notice lehpekin ka ring lo. He mihring hi a tawhkhirh zêk thei tlat! Mahse, tualthattu ka ti lo a nia..tualthattu chu a dang daih. " A ti charh charh a, ka lo ngaihtuah loh lam daih a ni. 

"A nih chuan ko ila" ka ti vat a. 

"Aih..Hmingliana te inah khan kalin ṭhi chungchâng hi kan sawipui phawt ang. " A ti nghet charh a. Hnial thei dinhmunah ka ding si lo. Kan inzuichhuak leh ta nge nge a. Kan va thlen chuan chhuah an lo tum mêk, mo lawmna ruai kil tur an lo nei a lo nia. Mahse, hun chu min siamsak ta tho. Muangchâng lovin ṭhi chu Amanda chuan a phawrh a, a entir ta a. Hminga nupui Siami chu a rak hlut, "Awii, khawiah nge in hmuh? Ka thi ngei a nih hi. A van mak" a ti chul a. 

Amanda chuan zawi sap hian, "I ṭhi tihbona âwm kha ngaihtuah turin ka duh che a ni..muangchângin ?" A ti daih. Siami pawh a hawihai viau nghe nghe. A chhing ta vang vang a. Kan lo ngaichâng ran mai. 

Rawn mengin, "Min hrethiam ula, ka hrechhuak thei ngang lo a ni" mangan hmel lek lek hian a ti ta a. Amanda pawh chuan, "A pawi lo, a lawmawm e. Kan tikhawtlai rei tawh che u, kan kal phawt ang" a ti ve mai a, lungawi lo hmel a pu hran lo bawk. 

"A va ho si" motora kan chuan hnuah ka ti a. 

"A ho lo, hrechhuak thei se a ho vek zawk dawn asin" a ti daih. Ka va melh vung vung chu hre miah lo niawm takin hmalam a en tlat. A kut a ziaawm tawh avangin office-a let ve tawh lovin ka haw tlang ta a. Engtin nge hun a va hman tak ka hre zui lo. 

Ka chhungten sakhi sa rêp an lo lei a, an chhum hluah a, dul hmul khât phuarin ka ei. A manhla mang e. Kan case chhuilai chu a tih fô angin ka nuin min zawt leh sek, "Engmah kan la hre thei lo" ka ti ringawt a. A dilchhut thei si, ninawm..zan len pawh ka peih vak lo, ka nuamsam chiah lo deuhin ka hria. Ka roomah tawmin diary ka ziah mek laiin Amanda call ka dawng a, "Zanin chu Villa-ah zuk party lawk ang hmiang" a rawn tih chuan ka ner deuh, mahse, hna lam thil a nih miau avangin ka hnial ngam chiah si lo, "Mikhual neih an remtih loh kha" ka ti hluk a. 

"Tu ten nge remti lo? Sawrkarin a la kharsak reng reng hleinem..kan department aṭangin thuchhuah a la awm hek lo" a ti duah a. Ka dang titih leh ta der mai. Nachhawkna ka hmawm a, ka insiam leh mual mual, ka nute bulah, "Thawhpui pakhat nu a damlo va, ka va tlawh ve ang e" ka ti. Thudik ka sawi chuan ka nu a philî leh vak dawn a, a buaithlak. Ka bike ṭâwng tawh lam chuan Amanda in lam ka pan a. Ruah hmi a tla seng seng. Boruak pawh a dai angreng viau. Ka va thlen chuan a lo inpeih at tawh. A motor bawkin kan kal leh ta. A sawi ang khan khar a la ni lo. 

"Mahse, keimahni kan nih te chuan an fimkhur ang a, kan hna pawh kan thawk thei dawn em ni!" Ka ti a. 

Hahdam hmel fê hian, "an mikhual kan zu ni dawn tak tak hleinem, zaninah hian lusûnna boruak enjoy an awm em tih kan thlithlai ringawt chauh dawn a ni" a ti vei sak a. A sam a thlah ve hnûp a, kawr dum ban tlawn hain a kekawr pawh a dum tho. A inchei simple poh leh a nalh ting zel, he nu hi..Dar 9 a ri ṭêp tihin Villa pêng kan thleng a, an lo la eng iarh mai. Thawm erawh kan hre lem lo. Motor chu pêngah kan dah a, kein kan pan thla ta. 

Gate chu beisei ang ngeiin a lo la inkalh lo hlauh. Hawi zak zak chungin kan lut a, kan kun phei zauh zauh bawk. Nachhawknain min chhâwk a, ka thaw a sa phat phat. Villa basement-ah kan lût thla a. A lo thim ruk mai. Ruang chharna a ni bawk nen, a nuam fahran lo. In chung lam thawm engmah a hriat theih bawk si loh. Amanda lah chu thim zingah a phar ang du du a. Amah a ni tih hre sa lo ila chu a hlauhawm duh ngawt ang. A hnu deuhah a phone phawrhin flashlight a on ta a, Thansanga car leh scooty pakhat an lo ding leh ran. Scooty number chu a en vat a, a khi sak. 

"Chuan" ka lo ti nghut a. 

"A zo têp.." tiin a sana a melh zauh. Boruak lah chu a uap churh mai a, chhuah ka chak tawh takzet. 

Manager car chu a dap a dap a, a car hnunglam chu hawn a han tum leh a, mahse, a sak ta tlat. A phun zui nang nang mai. "Hawh le" a rawn ti leh thut. Basement chu kan chhuahsan leh ta a. Hall kawngkapui chu a inkhar khap tawh, in chunglam pawh room pahnih a la êng pap mai. Thawm erawh bang chhah tak aṭang chuan hriat ngaihna a awm lo. 

Hall bathlarah chuan kan ding vang vang a, Hall chu a reh duk a, mihring hmuh tur an awm hek lo. Kawngka pawh chu chhunglam aṭanga kalh a ni. Amanda chuan tu emawni a text zeuh zeuh, a sawi duh der si lo. Ka ning ta riau mai. Eng nge kan nghah lah chu ka hre ve bawk si lo. Ka thaw leh hawk ṭhin chu a hrethiam nge..

Tu emawni a call a, "Aw..hei kawngka min lo hawnsak a ngai tlat mai. Tukin zingah khan ka hmanraw pawimawh lutuk roomah khan ka theihnghilh a, la turin ka rawn kal vang vang" a ti ta a. Thansanga a bia tih ka hrethiam nghal. Phone a dah a, "I mit leh beng chhi nasa ang che" a ti sap. Kâr lovah Thansanga chuan kawngka chu a rawn hawng ta a. A hmel chu a phelh deuh phang mai, zu rim a nam bawk. 

"Lo kal kher ngai loin lo sawi la, naktukah ka rawn chho dawn tho asin mawle.." a lo ti leh thluam a. Rinhlelhna tur hi a vâng thei. Amanda lah chuan, "Ni ngawt mai, mahse, Falkawnah kal ka ngai tho a tiin ka rawn tlang ta mai a nih hi" a ti ve mai a. In chung kan pan nghal bawk. Tluanga te pindan kha chu a lo thim ṭhuap a, Amanda chu tek lut zauhin lukham hnuai chu a dap nghal a, silver ṭhi sin zet, Siami ta ang chiah kha a rawn phawrh ta a. Nui chung hian, "Ka kum a tam ve ta nge, ka haihawt riau a, tukina ka theihnghilh pawh a ni lo, nimin piah tlai ami zawk kha a nia. Vanlalruati ruang chharna bula ka hmuh a nih hi" a ti lang lang. Ka lo hamhaih nasa, mahse, detective a ni tih ka hrechhuak leh vat. Thansanga pawh chu a meng phâwk ve tho, "Maw?! Ṭhi kha maw? ruang bulah a lo awm i ti elo?" A ti nawk nawk a. 

"Um, i car ke bulah bih chian fê loh chuan hmuh a har alawm" a lo ti awlsam êt a. 

Thansanga ṭawng leh hmain, "Chuan, Ruati ṭhi kha a ni thei ang em? I ring em? Nge midang ṭhi a ni zawk..hei bak hnuhma hnutchhiah a nei si lo, a pawimawh viau a nia" a ti leh ta zung zung a. Thansanga chu a inngaihtuah buai hlek a ni maithei, a ngawih vang vang hnuah, "E! Ni dawn tak! Ka lo sawi theihnghilh daih a, khami zan Ruati a bo zan khan heta thleng ve tho Hmingliana nupui khan a thi a zawng tak asin.." a ti ta hluai a, thawveng suai hmel a pu nghal bawk. 

Amanda chuan mak tih hmel fê hian, "Maw?! Takzet hian..rin loh lamah min hruai dawn a va ang ve..Tluanga kan biak nghal a ngai ang, Ruati khan ṭhi a awrh em tihte kan hriat a ngai" hmanhmawh hmel zet hian a ti leh sawk sawk a. 

Chhuah mai kan tum laiin Thansanga chuan , "Tluanga chu hetah a awm alawm. A lusûn rilru tâwt hetah a riak dawn a" a ti ta a. Amanda meng de sawr sawr chu ka lo en thung. Hetia nung sârha a men tawh hi chuan a hnuchhuina kawng a tluang tih ka hrethiam ve tlat tawh. 

Thansanga chuan, "Ka va ko ang e"tih leh a piah lawka room pan chu a rual a. Amanda chuan, "A harsat kha ka ring vak lo rêng a" a ti sep. Ka lo bo leh hû thung.kâr lovah Thansanga leh Tluanga te chu an rawn inzui phei ta a. Tluanga mitmeng chu a nu bat mai, zu rim a nam huam bawk. A nupui ruangthlak zanah inah pawh awm loin hetah a chhuk a, zu a la inzui a. Mi tam tak tan chuan a tuar viau anga ngaihtheih a nih laiin keini lam tan erawh rinhlelhna siamtu a ni thei tlat. 

"Min hmu duh em ni?" Insûm tum tak chuan a ti ve a. 

"Aw thil pakhat chauh, i nupui khan silver ṭhi a awrh em? " Amanda chuan a lo ti var a. Tluanga chuan chhuat lam melh run runin, "A awrh awm ka va hre lo ve..a awrh em? Ṭhianpa" tiin Thansanga chu a melh hû. Khata Thansanga'n a lo mitmei dan kha kei mi thluak thawl Samsona hian ka va hrethiam ve si êm…Thansanga ṭawng leh hma si chuan Tluanga bawk chuan, "Awrh lo, a awrh miah lo tih ka chiang e. Ngati nge?" A ti ta zawt zawt a. Hahdam zetin Amanda chuan, "A ṭhi a nih ka ring deuh a, Aw le, tualthattu chu kan hnaih ṭan tawhin ka hria..." a lo ti fiah kâk a. Thansanga chuan, "Chu! Thah a nih i ring tihna em ni?" A lo ti ta vat. 

Nui lek lekin, "Ring tehreng mai. A thattu hi ka rekchhuak vat bawk ang. " Amanda chuan a lo ti nghet charh. 

Tluanga chuan, "Kha ṭhi neitu kha zawn chhuah vat a ngai a nih chu, ka nupui thattu a ni ngei ngei ang" a lo ti phawr phawr a. 

Amanda chuan va thlek hâin, "Uai! Ṭhi neitu chu engtin nge tualthattu anga i ngaih mai theih? " A lo ti ta khauh. Tluanga chuan meng buai nuaih chungin, "Aa..i sawi sia, bakah a pawimawh hmel êm a" a ti nawk nawk. 

Amanda chuan,"Engpawhnise, kan haw ang e. A lawmawm e. Lo fimkhur u la, he lai hnaiah hian tualthattu a lo tawm reng thei a nia. " Tiin a nuih sak. Kan inzui thla nghal nal nal. Gate kan pelh hnuah chiah thawk ka la ngam, ka eng emawti zâm ve vak ringawt. Ka hrethiam lo e a. 

Motor bulah ka hah chu ka thaw hluam hluam a, "I fit lo ṭeh ṭuah mang e" Amandain a tih pawh chu ka chhang thei lo. Nia, tunhnai hi ka fit lo tak tak a ni. Zu ka in ve leh zauh zel a, chuvangte pawh chu a niang, kein ka kal tlem bawk nen. 

Kan inkhalh chhuak leh ta vawn vawn a. Aizawl kan lut ṭêp tihin Amanda chuan call a dawng a, "Sir tehnawlh chu.." a ti sap. A la ta nghal a. 

"Eng a?! Engvangin maw? "A ti hluai, lungawi lo hmel a pu bawk. Lehlam ṭawng ka hre thei si lo. 

Phone a dah tau sawk, "Eng nge?" Ka lo ti vat. Hmalam bih ngar pahin chang khek khawk hian, "Case hi ASI Remliana'n a buaipui tawh dawn a nih chu..kei chu khawchhak lama kuhva tawlh lam ngaihven turin thupek min pe.." a ti ta a..

Ka rilruah thil pakhat a rawn lang zawk. ASI Remliana hi vawiina kan va hmuh Lateii pa, kan ex MLA Pu Chullova makpa a ni tih hi…