Tatai last

TATA-I (LAST)

Ziaktu : Toni Râlte

Tatai a ding chawt. Chrisa kha a hnunglam aṭanga zuk hmu a ni bawk a, amah a ni ang tih ngaihna a hre lo ve bawk a ni. Chrisa chuan a rawn pan ta chhat chhat mai. Tatai chu a tawlhkir hrat hrat a, Inhmuh hi a duh hauh lo asin le. Birûk char char kha a duh dan a nia. Hetia a rin aia hmaa a rawn hmu hi pawi a ti lutuk. 

"Tata" Chrisa aw chu a zawi ruih mai. A cher ve kûam te, a thu deuh that te chu Tatai paw'n a hmuh hmaih bik lo. A thil tawn mêk te hi an namai lo ve bawk a tin ni. 

"Kan la inhre ngai lo, a ṭha em?" A ti khur dat a. 

Chrisa a nui hul hak, "Chutiang tithei tur khawpin ka chak tawk ve lo ve" a ti ro hak a. 

Tatai chuan sawi leh mai tur vâng a ti ngawih ngawih. Jeje lah a lo inthiam lo ve êm êm ringawt, tihsual a nei tawp si lo. Puii lahin hrilhhai zetin Tatai te chu a lo thlir ve reng ringawt. 

"Engvang nge? Hetah ka hmuh che" Chrisa chuan a ti a. 

"Hre lo la a ṭha zawk, Je, kal ang" Tatai chu stepah a pen chho pâwk pâwk. Mahse, a umzuitu bawp a sei bawk a, an inumpha rang viau. Tatai banah a vuan chat mai a, mi veivak an awm ve reng bawk si, buaina neih a hreh tawh êm avangin Tatai pawh chuan a kut chu a thinthlaksak duh bik lo. A tawpah a nu awmna ward-ah an inzui lut ta nge nge a. Chrisa'n a pite Zuali a va hmu chu a ner sawk mai, a dângin rei tak na tuar hmel a pu miau a tin ni. Pi Zuali pawh a lo hamhaih ve viau mai. An han inmelh vung vung phawt a, "Pite" Chrisa chuan a ti thum chhak. 

"Hetah eng nge i rawn tih dawn?" Pi Zuali chuan a ti ram hmak. 

"Ka nu a ṭha lo va, hmuh phei chu ka la rawn hmu lo. " Chrisa'n a ti a. 

Pi Zuali chuan, "An rawn hmuh hma chein kalsawn vat la a ṭha ang. Ka tuar peih tawh lo a nia" a lo ti leh hmiah. 

Chrisa erawh chuan a va ṭhut hnaih sauh zawk. "Eng nge i natna?" A ti daih. 

Ngawi renga an bula lo ding Tatai chuan, "An zai" a lo ti ringawt. 

Chrisa chuan mak tih hmel zet hian, "Chuan" a lo ti hû. 

Pi Zuali chu mi hmai êng zah chi a ni bawk a, "Ka rilphir an paih a mawle. Chris, chhungkaw bula sawi a ṭul lo a nia aw. I putea phei chuan engmah hre lo se ka duh" a ti nghal mawlh mawlh. 

Chrisa chu a ding a, "Pite, min hrethiam teh u. Keimah vang veka thleng a ni a, putea te pafa pawn an ngaihtuah takzet che u asin. Inrem leh thei hram ula ka lâwm ngawt ang" puitling tak hian a ti a. Tatai a lo ner sak,. Puii khan Chrisa chu a rawn ko va, "I nu chu va hmu ve phawt ila" a tih avang leh Pi Zuali nawrna avangin Tatai te chu an kalsan rih ta phawt a. Chauh hmel fê hian Pi Zuali'n, "Ka damdawi in awm kher kher chu aw..buaina hi ka hne tawh asin mawle" a ti vawng vawng. 

Tatai a inhumruh a, "Nu, lungngai miah suh, ka awm alawm, an rawn ânkhum leh che a nih chuan ka tihtheih ka lantir ve tawh ang" a lo ti rum ûl mai. Chrisa a hmu leh khan engtin emaw tak chuan a la khawih viau naa, nem a duh tawh rih lo. A nu avang pawhin buaina pumpelh rih zel chu a thlang a ni. Mahse, Chrisa khan a bansan hlen a ring lo ve tawp, an hmalam hun chu hun siamtu Pathian kutah awm teh se a. 

Chrisa te chhuak ta pawh chuan a nu an dahna cabin lam an pan nghal a. An rin ai daihin a nu chu a lo tlahniam. A cher bakah a vunte chu a thim hmuk thei mawle. A chauh hmel viau bawk. A nu unaute bakah an nupuite an awm kim tak hnuah chuan Pi Zuali te nufa chungchang chu a sawi ta hmiah a. A nu erawh a muhil thung. Pu Hruaia a lo phâwk hrâ mai. Pu Lawma pawh chuan, "Hetah hian an awm ve a maw?" A lo ti chul a. Chrisa a bu nghut. A putea melhin, "Pute, inrem thei ula ka duh a ni. Midang thusawiah buai suh. Inrem leh phawt ula, dan ang takin Tatai nei turin palai ka rawn tir bawk ang" a ti leh mawlh mawlh. Thil thleng rang lutuk leh an beisei loh dan ang zel a ni chuan a tiṭhuanawp kan ti dawn nge, a tupawh mai chu an ni hrû vek mai a. Pi Sangi pawn ngawih a chuh ta hle hle. 

Pu Hruaia chuan, "Chris, i thusawi kha i hrechiang meuh a maw? Engtikahmah i nu hian Tatai a pawm dawn lo a nia" a lo ti bul bul. Tatai a huat vanga sawi a ni lem lo. Pi Dingi mitmei a vêng ru bawk si a ni. 

"A pawm em em ang. Ka nu hi ka hrechiang alawm. Ka hmangaih chu a pawm ang" a lo ti nghet charh thung. 

Engpawhnise, Pi Dingi te chu bail chhuah an ni ta chu a nia. Bail an nih avang khan thiam an chang e tihna erawh a ni lo nasa, hearing te la neiin an la court zak zak dawn a, thiam loh chantir pawh an la ni thut thei. Chuvangin Alice pawh Shillonga awm phalsak a ni lo. Arami pawh Pu Hruaia te pâwi khawih tawh mah se; ṭhangkhat lian dâwn an bula khawsa tawh a lo nihnaah an bulah a cheng zui leh thei dawn niawm tak a ni. Pi Zuali te nufa awm tak loh hnuah phei chuan mipa leh mipa inbiak reng thu awm hek lo, Pu Hruaia te pafa an lênlâm tam phah a, an in chhung a ruakin a khawhar ngawih ngawih mai a ni. Tuna an rorel hmasak ber tur chu Tatai te nufa hruai let leh chungchang a ni dawn ta. 

Pu Hruaia pawn Pi Zuali chu a va kan ta nghal a, an pahnih inkar buaina vang ni lo mah se; pi Zuali tan chuan lo biak hawrh hâwrh chu a chakawm vak bik loh ang. Rinpuia pawh a rawn thleng a, a nî aiin Pi Zuali a kan hmasa zawk. 

"Ka nu, in lo hawn a ngai a ni. In tel lo chuan engmah a nuam lo, a ruak vek. Ka pa khawharzia chu aw" a ti ve vawng vawng mai. Pi Zuali lah a hel laklawh ve tawh si, "Puia, nang hi chu kan nufa tan i ṭha tluanparh a ni, sawiselna tur che ka hre miah lo. Mahse, inhruai haw leh ila, buaina eng emaw awm leh se; an kamchhe tleuhna ka ni leh dawn a. Ka tuar thei tawh dawn lo. " A lo ti ve dap dap. Rinpuia paw'n a thusawi awmzia chu a hrethiam viau. 

"Innei leh lo mah ula, Christophera hian Tatai neih ngei a tum dawn tho va, buaina chu a la awm dawn tho tho a nia" a ti ta râwih a. Pi Zuali a chhing sawk. Christopher hi huat duh ṭhin viau mah se; mak deuhin a haw tak tak thei ngai miah lo. A fanu ngaihsaka a hmaa ding ngam zar zar ṭhin a nihna laiah a lakah a rilru a nêm viau pawh a ni mahna le. 

"Ka remtihna tel lo chuan a nei lovang" a ti tak naa, Chrisa luhlulzia an nufain an hrechiang hle si. Rinpuia chuan a chhang tawh lo. Engpawhnise an ni lam chuan inrema inhruai hawn leh an duh ber kha a nia. Pi Zuali hi a khauh reng ang em? Tu hriat va ni suh. Tatai tak paw'n an duh duha an bawlzân theih nih chu a duh tawh bik kher lo maithei. 

Pi Dingi pawh zan lamah chuan ziaawm lam a pan a, Chrisa pawh a ṭhu ve ran e.  

"Chris" a rawn ti thâm ṭiak a. 

Chrisa chuan a lo melh vat, "Aw sawi rawh" a ti a. 

Chauh hmel zet hian, "Min hua tiraw? A dik em?" Pi Dingi chuan a ti sap a. 

Chrisa chuan nui chungin, "Ka nu i ni a, ka haw thei lo che chu a nih hi" a ti ringawt. 

Pi Dingi chuan chunglam melhin, "Mi â thutlukna hi chu a tawp dan a rapthlak ṭhin reng a ni. Eng nge ka hriat tak le..ti nge ka huatna thinlung thu kha ka lo awiha ka lo buai em em mai ni. A pawi zo ta vek a nih hi.." a ti sep sep a. 

Chrisa chuan, "I inpawm thei leh i dik lohna i hmu thei hi mi tam tak an sual tih pawm duh lote aia i felna a ni. Kan hmangaih em em che alawm" a lo ti zawi raih a. A nu chau taka a han mu bal mai chu a lainat lo thei bik lo. Nurse a rawn lut a, drip a rawn khaisak a, a chhuak leh nghal. Pi Dingi pawh mutchhuakin a zêm leh chiai chiai tawh a. A chhing leh ta riai riai. Chrisa chu intihharh pahin a va chhuak a. Pi Zuali te ward lam chu a va bih dûk dûk a, Tatai ṭhu chunga lo muthlu lâwp lâwp a hmuh chuan a tuar thei ta ngang lo nge, a va lut ta thawr a. Tatai chu kai harhin, "Coffee in ila" a ti sur sur. A nu a harh a hlauh avangin Tatai pawh chuan a zui chhuak ta ngawt a. Chrisa bula awm nuam a tihna te, a thlamuan thinna te kha a la reh miah lo tih a hre bawk. Rinpuia'n khatia a rawn biak hnu lawkah khan pu Lawma leh Pu Hruaia te pawh an rawn kal ve a, a dam veleh inhruai turin an rawn ngen leh kha a nia. Pu Hruaia phei chuan, "Tata, i chau lutuk ang, va haw la, zanin chu ka lo awmpui ang e" a ti hial a. Mahse, "Va haw phawt zawk rawh u, naktuk lamah kan sawi ṭha dawn nia," a nuin a tih tlat avangin an haw ta kha a nia. Pi Zuali rilru pawh a buai viau ngei ang le..

Bench-ah an ṭhu dun a. Coffee la khu vat vat chu an in pah bawk. Tatai chuan sawi tur a hre lo bawk a, a ngawi tawp mai. Chrisa chuan, "Ka nu pawh a inchhir ve ta hle niin ka hria. Boruak hian ṭhat lam a pan dawnin ka hre bawk, Ta, zir zawm tawh lo mai la, sports lamah hian kal zawk mai la, ka pui ang che. Ka nupui ni chungin engkim i tih ka phal" a ti mial mial. 

Tatai chuan no vak lo va melhin, "I â em ni? Kei leh nanga inkar chu a tawp tawh,. " A ti hmak. Ngaipawimawh lo zet hian Chrisa chuan, "Ka kidnapp che nga ni mai" a lo ti. Tatai a thaw hawk ringawt. 

"Naktukah ka nu pawh ka rilru ka hrilh ang. A pawm thei lo a nih pawn in leh lo ka nei tawh a, ka chhuak mai ang" a ti leh a. 

"Christopher, i mak ka ti, i nu thuawih kha a ṭha zawk. A nihna takah chuan unau kan ni asin. A tluan pawh an tluang lo an tih ṭhin kha. Tin, pasal neih hi ka peih lo, fa enkawl ka thiam dawn si lo" Tatai chuan a ti duah. A awah beidawnna pawh a lang tel nghe nghe. 

"Ka hmangaih che a ni, Tata..chân che ka duh lo, midang ta ni tura thlah tur che hian min beisei tawh lo hram teh" Chrisa chuan a ti sûp sup a. A rin loh taka Chrisa'n a chhan avang chuan Tatai pawh a dang deuh. Tun ṭum chiah hi 'Ka hmangaih che' a tih ṭum a la ni. Ani phei chuan vawikhatmah a la sawi lo. Coffee an in zo ta bawk a, "Ka luhsan ang che. Ka chau ve deuh bawk sia, nang pawh i nu chu va vil rawh." Tatai chuan a ti a. A kal nghal, Chrisa pawn chelh a tum hran lo. Muangchangin an cabin lam a pan ta chhat chhat a. Tatai'n a en dan leh a ṭawngkam a ṭangin a haw em em bik lo va, a rilru pawh a la danglam bik lo tih a chiang a, a duhtawk viau. Tatai pawh muthmunah nasa takin a inngaihtuah a, eng ang pawhin tum se Chrisa nen hian an inhlat tak tak theih a ring lo. Mipa a nih bakah a duhna lamah pawisak a nei si lo, an la mualpho zau zawk ang tihte pawh a hlau angreng. 

A tukah chuan Pi Zuali pawh nidang ai chuan a tho harhin chaw pawh a ei ve ta nual a, Tatai a lawm hle. An chaw ei laiin a nu chuan, "Eng nge i rilru ni reng reng? Khatiang khan min rawn ngen leh ta sia" a ti a. 

Tatai'n, "Ka hrethiam tawh bik lo, engpawhnise, Pi Dingi te hian ngaihdam an dil phawt che a ngai ka ti, Pi Sangi te ho pawh" a ti a. 

A nu pawh chuan, "Ka ngaihdan chiah, engmah hnialna nei lova kan haw leh chuan min hmusit leh mai mai ang. Nia, i pa bulah ka sawi dawn nia" a ti ve a. An thu a rual dun viau e. 

Pu Hruaia leh a unau te bakah an kawppui te pawh Pu Lawma te dawrah an kim ṭhap mai. Tatai te nufa hruai hawn leh hawn loh chungchang an sawiho dawn kha a nia. Pi Sangi chuan, "Keini lo sawi ve ngawt pawh hi a fel dawn em ni? Dingteii ngaihdante pawh kan ngaihchân a ṭha ve lo maw? Rilru dang daih hi a lo pu ang e" a ti a. Ani pawh a hma ai kha chuan nêm tawh tak a ni. Pi Dingi an han man ta chaih khan a tizuai ve deuh a ni mahna le. 

An pain, "Kan chhungkuaah Dingi a thu ber lo tlat, tin, nang leh Rami te pawn Zuali te nufa ngaihdam in dil hi ṭha ka ti. A ṭawng nasa ber kha in ni bawk a" a lo ti hmuk. Pi Sangi pawh an pa ṭawngkam bung nghut avang chuan sawi nawi a nei ta lo. An pa hi a ngam mah mah deuh em aw tih chang an nei fô mai. Pu Thianga hi pa thluak nêm, zaidam tawpkhawk a ni a. Nupui fanaute âwka vin pawha hau ngai mang lo, kut phei chu thawh ngai miah lo a ni. Hmeichhe ṭhenkhat hi chu kan danglam ve a, kan pasalte an ṭhat poh leh zaha duat a hnêkin kan inluling a, ka thei tak emaw tih mai turin rahbeh kan tum fô, hmeichhe finin tuikhur râl a kai lo an tih zawng zawng hi kan nei zo a, pasal ngam nupuite hian an mawng bakah an pasalte mawng an hlim tel tih kan hre ṭhin lo. Pi Sangi pawh an pa a ṭhat êm vang leh mo zinga upa ber a lo nihna laiah chhungkaw thil zawng zawngah inrawlh a tum a, a ṭawng tam si, a â pêng pûng bawk si, a mopuite ngei pawn an ngeih thei meuh lo chu a nih hi maw. 

Pu Lawma chuan, "Kei hruai hawn ngei ṭha ka ti e. An khawngaihthlak nufa êm mai" a lo ti a. 

Midang pawh chuan an lo sawi ve nak nak, an thutawpna chu Pi Zuali te nufa hruai hawn a ni ta a nih chu. Mahse, an hruai haw ngawt thei bik ang nge mawle. Tlaiah Pi Dingi chu an va hmu ta hlawm a, an thutlukna pawh an hrilh. An rin loh deuhin, "A lawmawm e. Keimah vanga inkehdarh hi ka hlau rêng a ni. Kei pawhin ngaihdam ka dil ang, min ngaidam thei lo a nih pawhin ka dem lo" a lo ti ta a. An rilru a dam tlâng ta viau e. 

Chrisa pawh Pi Zuali leh a nu a vil chhâwk a ni ber e. A tukah Pi Zuali chu a chhuak tawh dawn a. Pu Hruaia'n an chhungkaw thutlukna te a han hrilh chuan hlauh ang ngeiin, "Chu! In duh duh dana min kaihphar theihah in lo inngai a ni maw? " A ti ta chiah a. 

"Chu lam a ni lo, hriatthiam tum hram teh. Dingi paw'n ngaihdam dil che a tum asin, chhungkua kan din tawh a, kehdarh lo hram teh ang u" tiin Pu Hruaia'n a ngen ve thung. Pi Zuali erawh a rilru a hmin vak lo. Lehlamah pasal a nei a, heti ringawta inṭhen leh chu a duh bik lo. Mahse, a hma boruak kha an pha leh thei ang em a hre lo. Zan tirah chau chung chungin pi Dingi a rawn kal ta a. A hmaa a mitmenga huatna kha a bo tawh, inngaitlawm leh kimki takin a ni a awm tawh ni. Ngaihdam a dil ta chiah a, "Khatihlai khan Dadina pa min phatsanna kha tawrh harsa ka tih êm vangin huatna nen khawvel kha ka hmachhawn a ni ber. In nufa chungah tawrhhlelhawm takin ka khawsa a, a thiam lo zawkah ka ngai lui tlat che a, ka rilru kha a chhe tûk a ni ber e. Mahse, hremna ka han hmu a, ka rilru pawh fîm chhoin ka tihdik lohzia ka hrechiang ta telh telh a, ka zak êm em a ni. Min ngaidam thei lo pawh ni la ka dem lo che. Mahse, Hruaia hnenah chuan kir leh hram la ka duh, ka thinlung zawng zawngin ka ngen che a ni " tiin. 

Pi Zuali lah mi hrilhhai hmel hmu thei lo a lo ni nen, a thinlung dam kim lo mah se; lehlamah Tatai pain Tatai a pai laia a phatsanna te a han ngaihtuah let a, Pi Dingi rilru chu a hriatthiampui tho bawk si. 

"Ka ngaidam a che. Mahse, lehpek awm tawh lo se ka duh a ni" a ti thei ta a. Pi Dingi hmel pawh a êng sawt sawt mai. Chrisa leh Tatai ten an lo thlir ve reng bawk a, Tatai pawn a nu thutlukna chu a pawmpui lo thei lo. Tichuan, an inrem a nih tak ber mai chu. Pu Hruaia te chhung lamin Tatai te chu an hlauh tlawn kan ti dawn nge, engkimah an duhsak em em ta vek a. A tha lamah ngaihsak mai teh ang. Tatai leh Chrisa pawh an inbia a, "Ka lawm takzet e. Ka nu hi han zia chho se, thla thar lamah palai ka rawn tir ang" Chrisa chuan a ti leh ngawt tawh. 

Tatai'n, "Duhtawk tawh la, Chris, buaina neih kan duh tawh lo, ka nu rilru a dam dawn lo nen. Bakah i nu pawn he thil kher hi chu a pawmpui che ka ring lo a ni" beidawng lek lek hian a ti a. 

"A nih midang ta i ni ang maw!" Na tih hmel fe hian Chrisa chuan a ti a. 

Tatai chuan ban chatin, "Ka hre lo, ka la ni mahna" a ti ringawt. Zep nak emaw Chrisa nena inṭhen hlen leh inzawmna neih tawh miah loh chu hrehawm a la ti dawn tih a hria, mahse, boruak nei leh se a hma ang bawk khan buaina a awm leh ang a, chhungkaw tan pawh an demawm ve dawn lutuk a ni. Tawrh chhuah mai theih a inbeisei a ni ber e. 

Chrisa chuan, "Ka lo tum ang e. Mahse, ka zin bo a ngai ang, ka hmu fo che a nih chuan ka tlawm leh dawn sia" harsa tih hmel fê hian a ti ta a. Tatai a bu nghat ringawt. An dinhmun laklawh leh intawng fuh lo lutuk hian a ti beidawng ngawih ngawih, ani phei chuan mipa a ngaihven zui theih a inring lo hial. Chutiang chuan an inkalsan ta kha a ni a, chhungkaw inremna chuan Tatai te erawh a tilâwm tawk ta lo a ni ber ang chu. Mut pawh a muhil ṭha thei meuh lo, zanin hi an volleyball khelh hun kha a ni naa, rokhawlhna a awm avangin nak zanah an sawn a ni. Chrisa sawi ang khan sports lamah hian kal law law a duh, a hming chher vea mi hlawhtling tia sawi nih ve a châk..a tukah an insingsa a, a nu pawh ṭha tawh tak a ni. Doctor-in ward a rawn fan zawhah chhuak turin an tifel thei ta a. Chrisa te chu Pi Zuali'na va tlawh ve zuai, Pi Dingi pawh zan khat bak a riah a ngai tawh dawn lo va, a lawmawm viau e. Rinpuia'n a rawn hruai ta a, Jeje leh Sawma te'n an bungrua kha an rawn kensak bawk. Englaipawha ṭhianṭha tia sawi theih tur Tatai"n a nei hi a lawm vawng vawng ṭhin. Sawma pawh a pa a zin tawh a, engkim a chingfel ang chu maw..an han fuih ve leh ngial kha. Chrisa erawh a rawn lang lo, Tatai chuan a lo beisei ru naa hmuh fo kha a duh tawh lo bawk nen, Chrisa a tina hi nuam a ti bik reng reng lo, a ngai ve lutuk. Mahse, duhthlanna kan tih pawh hi a chang chuan kan rilru diktak a nih loh a ngaih chang a awm ve miau si a! Tichuan, Pu Hruaia te in lam chu an pan leh ta poh a. Arami pawh a lo awm leh ta bawk a, a zak nge hrehawm a ti zawk, a lo be vak lo. A cher viau bawk. Tatai zawkin a be bawrh bawrh a, an rilru hi a ṭha nufa ve ngawt mai. Damdawi inah khan duh ang thâlin a inbual thei si lo va, a inbual pawh chu a rei ngat ngat viau. A inbual zo pawh a zang hawk thei alawm le. A chau ve deuh naa, mut ringawt chu tiin in hnuai lamah a chhuk ta a. 

"Tata, zaninah in inkhel dawn a ni lo'm ni? Han mu hahdam rih la, chaw ei dawnah kan rawn kaitho mai ang che" a pa chuan a lo ti var a. Ni dawn tak ti rilru chungin, "Nia, ka che ṭha thei lo palh ang, ka han mu ve lawk ang e" tih leh chhoh a rual nghal. Chrisa a ngaihtuahnaah awm tho mah se; mutchhuakin a zêm nasa bawk a, tui takin a muhil ta bawrh bawrh a. 

Chrisa erawh a nu nen an lo inkawm mêk thung. Tatai chunga a rilru putdan, neih a tum dan leh Tatai'n a hnar dan zawng zawngte chu zep nei hlek loin a sawi malh malh a, a nu pawn a ngaithla uluk viau. "Nêp harsa ka ti a, mahse, a luhlul piah lamah a nu a hmangaih êm mai a, tun ṭum chu kan inthlah hlen a ngai dawn a nih hmel, hrehawm erawh ka ti ang. Chuvang chuan Dubai-ah ka Muantea'n min rawn ngen reng bawk nen, ka zuk zin thawveng ang nge. Dadina pawh thla tharah chuan a rawn haw thei tawh dawn tho a" tiin a tawp a khar ta a. 

Pi Dingi chuan amah vanga a fapa duat leh a innghahnain nâ a han tuar chu a inhaw ngawih ngawih, a fapa chu a zah thar em em bawk. Tatai pawh a dem reng reng lo, thutlukna dik tak a siam niin a lang. Mahse, kawng dang awm se a ti a, "Bawihpui, ka tihpalh a ni. Keimah vangin chhungkua kan buai zo a, nangni thlengin in tuar a, hrehawm ka ti takzet. Engpawhnise, keiman Tatai chu ka lo be ve phawt dawn em ni ang? Keimah ngeiin ka biak chuan a rilru pawh a thlak maithei asin" a ti dap dap a. A nu hmela inchhirna leh zahna chu a der a ni lo Chrisa pawn a hrechiang ngang mai. 

"Aaa..a rilru a thlakin ka ring lo. Mipa rilru ang deuh hi a pu a. Ka hrethiam tawh lo le.." a ti ta ngawt a. 

"Ka chhuah veleh ka va lêng dawn nia. Ka inthiam ve nan tâl pawh ka biak a ngai..ngaihdam pawh ka dil ang" a nu chuan a ti leh a. Chrisa pawn beiseina chhetê a neih leh theih phah ta. Ni e, an sawi fo angin Tatai hi engvanga hetitaka duha atchilh nge a nih a inhre lo, amah aia hmelṭha leh zeihawi pawh a hmu nasa, mahse, thil pakhatah a chiang. Tatai a ngaihzawn tirh kha chuan zep loh chuan game khel angin a inhre ve tho, Tatai patil rilru hnehsaka hmeichhe diktaka siam kha a goal a ni a, a rei a, Tatai mizia, mi pawisawi ngai lo, rilru tlang leh dik, thinrim ve mai mai ngai lo a nihna te, a thianghlimna te avangin a duh tulh tulh a, a hriat loh karin hmangaihna khurah a tla lut ta a ni ber mai. Neih ngei a duh chhan pawh midang tan a phal lo, midangin an khawih kual tur a ngaihtuah hian a sa vek thei. Engpawhnise, Tatai chu a ta a ni thei ang em hunin a la hril ang chu. 

Zanriah eikhamah Tatai pawh a insiam nghal mawlh mawlh a. An damdawi in han awm ve leh nen a fit tehchiam lo, mahse, football anga han tlan kual ve vak a ngai lo bawk a, chet ṭhat a tum ruh viau. Rinpuia te pawh an khel ve dawn tho va, an kal rual thei ang. An chhuah dawnah a nuin, "Tha takin aw..bawihte" tiin a thlah a. A nui sak. An va thlen chuan an lo zi mur mur tawh. Coach te'n an lo dawngsawng ta vat a, a nu chanchinte pawh an zawt ve a, Neihpuii'n, "Chrisa hi a dam lo em ni? Ti nge a rawn khelh loh le" a ti nang nang. 

Tatai chuan, "A nu a damlo va, chuvang a niang" a ti ringawt. An han khel ṭan ta a, Chawnpui nen an intum dawn, Chawnpui hi an ṭha tlangin an fit em em mai a, an hneh loh mai a hlau. Set khat chu Chawnpui lamin an la ta chiah a. Coach te an ṭang si, Tatai pawn theihtawp a chhuah ve a. An break lawk laiin Chrisa'n a rawn call hlawl, makti ru deuhin a la a. "Point box in hre lo a nih kha, an jersey no. 8 lamah khan ball sem tawh r'u, kha kha cover ngai zar zar a nia, in chak thei" a rawn ti nghal mawlh mawlh. A lo en ve reng a nih awm chu a. 

Tatai chuan a vawng ta ran a. A ṭhiante pawh chu a hrilh kual a, an han khelh leh chuan Chrisa sawi ang chuan chu nu lamah ball chu an pe ta deuh zel a, sawi ang tak takin cover a lo ngai khawp mai, a la sual ta zel bawk nen. Set 1 an la ve ta. An han khelh leh chuan no. 8 nu chu a khel ta lo, mahse, a aiawha an dah luh pawh eng teh ual a nih a rinawm loh avangin an kal ngaiin an kal ta zel a. An chak ta. Chrisa vang tih theih a niawm e. Tatai chuan Rinpuia te inkhel a lo nghak a, Rinpuia a che ṭha lehpek hle. An khelh zawhah an haw ta a, Tatai chuan ,"Zari nen chuan in la inkawp em?" A ti chut. Rinpuia a nui vur vur mai, "Kan ni tawh alawm. Mahse, ka pa sawi ang khan tlangthan kan duh rih lo va".a ti a. 

"A fel em" a ti lehzel. 

"Ruati ang chuan mi han biak vel a thiam vak lo naa, a taimain mi a rêl ve ngai lo" Rinpuia chuan a ti a. 

"A ṭhat êm chu..kei aiin a naupang em?" Tatai'n a tih chuan,"In inrual vel ang ka ring" a lo ti nghut. 

An in an thlen chuan an beisei loh deuhin Ruati nu a lo awm a, Rinpuia a hmuh rual rualin, "Puia, Mami'n nau a chhiat a..i ngaihsak lo lutuk a, a rilru nâ leh hrehawm tih lutuk vanga chhiat a ni ngei ang" a lo ti bawrh bawrh. Rinpuia pawh a hamhaih deuh, "Nau a chhiat a maw?" A ti hû a. 

"Umm, zaninah damdawi inah kan hruai alawm, thi a rawn pût vak a. A pawi tak tak a ni" a hma aia nêm deuh zawkin a lo ti a. 

Rinpuia chuan a chal a dawm vung vung, "A va mak ve, kan inbiak hnuhnun ber kha chuan a ṭhat thu leh nautê pawh a that thu a sawi sia..ei loh tur a ei te hi a ni lo maw" rinhlelh hmel fê hian a ti a. 

Ruati nu chuan thinrim zetin, "Chutiangte engtin nge i sawi ngam zawk. Kan theihtawpin kan enkawl ṭha ve aw. Mai mai a" a ti zêk. 

Pu Hruaia chuan, "Hei Mama, zângnadawmna min rawn dil a nih hi, a damdawi in awmna bakah damdawi man te pawh kan tumsak a ngai ang. " A lo ti a. Rinpuia chuan, "Chutiang vang chuan nimaw i lo kal. Aw ka pa, pe r'u, pe mawlh teh u. Hem huam a"tiin in chungah a chho nal nal. Ruati nu pawh chuan a thlir zui vung vung ringawt. Pi Zuali an ngenna ang zat pawisa chu va la chhuakin a pe ta a. Ruati nu pawh a chhuak ve nghal. Pi Zuali'n, "Nau chhiatna man an lak ngai ka hre lo reng reng, sum hi chu an duh ve ngawtin ka hria" a ti sap. Pu Hruaia pawh chuan, "Aaa.. an lo inṭhen vat hi a lawmawm ngawtin ka hria" a lo ti ve a. 

Pi Dingi pawh a chhuak ve ta. A chhuah tlaiah Pu Hruaia te chhung chu chaw eiah a sawm ta a. Tatai chuan a hreh viau, mahse, anuin "Kan inrem tawh a, boruak ṭha tawh tihchhiat leh ai chuan nuam lo deuh mah se; va lan ve a ṭha e" a tih avangin a insiam ve a. Chrisa hmuh leh a hreh êm a ni. A hmuha a bula a awm chuan nep harsa a ti ṭhin si. Englaipawha min ngaihsaka min duattu te hi chu han kal hlatsan viau ṭhin mah ila; a tawpah kan bel leh nge nge zel. Tleirâwl hote hian mipa chu pa deuh, ṭawng tam lo, min duh huam lo ni se te an han ti vei tak naa, chutiang mite nena nun hmandun chu a nawmna a vân hmel mang e. Nupa nih hnuah ngat phei chuan ngaihsaktu hlutna hi a lang chiang viau zel. Dar 4 velah Chrisa te in lam chu an pan ta a. 

Pi Dingi pawh a hmel hmuh a lo nuam tawh viau. A lo nui sâng mai a, Tatai erawh chuan thinlung takin a nêl thei dêr lo. Chrisa a inbual a, Rinpuia pawh Chrisa roomah a lut nghal zuk. Alice kha Chrisa'n an ina awm a remtih loh avangin Pu Thianghlima te inah a awm ta a, a reh vang vang khawp mai. Naupangtê niin jail a tâng ve ta chu a nia, rilru chhiat leh sual hi chu a nghawng hi a ṭha thei ngai lo rêng a ni. Tatai chu an zinga awm ve reng nuam ti hek lo, Puii eirawngbawl chu a va pui ve a, Puii hi a ṭawng duhin a titi ngaihthlak a nuam ṭhin. Chawhmeh siam a thiam bawk si. Pi Dingi'n, "Tata, lo phei lawk ta che, i laklawh loh chuan" a rawn ti lâng lang a. Makti ru deuh chungin a va phei leh, an lo melh ṭhap chuan a tizâm deuh. A nu bulah a ṭhu a. 

Pi Dingi chuan, "Hei i nute bulah ka lo sawi zo chiah a. Chrisa leh nangma chungchang hi sawi ho ngaiin ka hria a ni. Chrisa'n engkim min hrilh tawh a, i lo hnar dante pawh. I thutlukna kha a sual ka ti miah lo , chhungkua i ngaipawimawh a, buaina a awm leh dawn ai chuan tiin hrehawm ti takin i hnarah ka ngai. Chrisa hi a na viau mai a, zinbo te pawh a tum thut thut a. Mahse, keiman ka be ve phawt ang e tiin ka khap a. Tata, ka fapa hi i lo hmangaiha i lo khawngaih ve duh a nih chuan ka lawm tawh zawk aw. Keimah vangin buaina in tawk nasa a, i ngaihdam pawh ka ngai rêng bawk. Kei min ngaidam thei lo a nih pawhin ka fapa beiseina hi chu tihchhiatsak lul lo la ka duh a ni. Hetiang taka hmeichhia a buaipui hi ka la hre ngai lo, a hmangaih tak tak che tihah ka chiang. Chuvang chuan khawngaihin lo inngaihtuah nawn leh la ka duh takzet, i hlauhthawnna ber buaina kha chu keimah aṭang chuan a awm leh tawh dawn lo. Tin , tunah hian thiam kan chang dawn nge dawn lo tih pawh kan hre lo va, thiam kan chang lo a nih phei chuan jail-ah ka damchhung hun ka hmang tawh maithei. In tan ka hnawksak tawh dawn lo tih tal hi min hriatsak la; lo inngaihtuah ṭha leh hram ta che" a ti ta mawlh mawlh a. 

A rin loh tak thil a rawn sawi avang chuan Tatai a hamhaih deuh,. An lo melh ṭhap bawk si, " a..ih, ka hlauthawng tawh êm a. Amah ka duh tawh loh vang pawh a ni lo. Nia, ka lo inngaihtuah leh ang" a ti tawi tak ringawt. 

A pain, "I nu rilru zawng ka hre hauh lo a, mahse, kei chuan inneih in duh a nih pawhin hnialna ka nei hran lo a nia. Chhungkhat ni mah ila, ngaih loh lamah lo ngai lo ula thisena inzawm kan ni lo bawk a. Thil âwm lo tak a nihna pawh ka hre lo" a rawn ti ve ti ve ta charh charh a. 

A nu pawhin, "Ekhai! Kei chu min vengthawng suh u. Amah Tatai thutlukna hi ka pawm vek e. Chrisa lah mi pangngai, mipa dik tak a ni bawk nen.." a lo ti ve ta vat a. 

Tatai erawh chuan sawi tur a hre vak tawh lo. Zanriah an ei a, Chrisa chu a en ngam lo reng reng, ani lah thil thleng awm lo ang maiin zangkhai takin a ṭawng bawrh bawrh bawk si. Puii eisiam a tui bawk a, an chaw ei a tui tlang khawp e. Eikhamah an han ṭhu khawmuang ve leh a, Chrisa leh Rinpuia te nen balcony-ah an chhuak thung. A lai ṭût reng chu a ning. Rinpuia lah a zei vel tawp, phone a hmang a, a kalsawn daih bawk si. 

"Nizan kha i khel ṭha berin ka hria. Nang i nih vang pawh ni loin" Chrisa'n a ti a. 

"Ka lawm e" a ti sep. 

Rawn hnaih deuhin, "Ta, i rilru ka thi thei chuang si lo va, thutlukna i siam sualin i hre lo maw? Nge midang an awm zawk" a ti ta a. 

Tatai'n , "Midang an awm lo, ih..i nu khan tikhan a sawi tawh sia, ka hre tawh lo e a. Mahse, inneih nghal ka duh lo" a ti a. Chrisa a nui hawk, "I ti tak tak tiraw? Duhawmnu, hmeichhe vannei berah ka siam ang che. Inneih chu i duh hun ka nghak thei" a ti a, a hlim tih hriat takin a mitmeng pawh a de sawr sawr mai. 

An inkar chu a ṭha leh ta chu a nia. Tatai pawh a rilru a buaiin a hah ta bik lo e. Chrisa pawh Dubaiah a zin ta hek lo. Chhungte hriatpuia inzui an ni bawk a, duh aiin an inhmu zing em aw tihtheih tur khawpin an boruak tha leh chu an hlimpui a ni. Tuman an sawisel ngam hek lo. Tatai pawh class a a kal nitin leh a, a scooty thar nen..Chrisa hian a thawmhnaw thleng thar zinga nalh a tih deuh hi a lo dahsak a, hmeichhia tak tak anga a han inchei chu startu pawh a nei chho ṭan ta. Chrisa hi a thikthu a chhe si. Hei hi an inhauh tamna ber pawh a ni. Mipa zingah Rinpuia, Jeje leh Sawma chiah a thîk lo. Amtea te, Lawmkima te pawh a thîk! A hahthlak tak tak a ni. 

Ruah a rawn sur a, kawl a phe zawr zawr mai. Chrisa len tum paw'n a ṭhulh ta ringawt a. Tatai pawh a roomah tawmin lehkhabu a chhiar mai mai. Pu Hruaia te garage aṭang chuan Alice hi a rawn chhuak zâl zâl a, in lam chu melh vang vangin a chemte hum lai chu a hum nghet sawt. Ruah chuan a nan huh vek a, vawt ti hmel pawh a pu lo. Tatai room la eng pap chu melh lehin, mitmeng de sawr sawr hian, "I tan naktuk a awm ve tawh dawn lo. Ngurtluangpui.." a ti vawt raih a. 

A TAWP TA.