Tatai 14

TATA-I (14)

Toni Râlte

A tuk zingah thawm ngaihnawm loh zet an hre leh ta zat bawk. Pi Dingliani âng thawm ngei a ni. Tatai a zu chhuk chuan Pi Dingi chuan rum elkhen hian a lo melh a, mahse, a pawisa duh bîk lo. Pu Hruaia leh Rinpuia te pawh an rawn tho tawh a, Pi Zuali pawh a ṭhu ngawi hle hle. 

"Ni e, engkim pholan a ni tawh bawk a, Hruaia pawh i farnu thlavâng i hauh ngam dawn em kan hria ang chu. He mite nufa nena inzawmna neih hi ka duh tawh lo, i chhuahtir lo a nih chuan kei leh nanga inzawmna ka tichat thung ang. A chiang em?" Pi Dingi chuan a ti tan tân mai. Rinpuia tak hi chuan an thu leh hla chiang taka hriat a la nei lo va, a hawihai deuh rêng bawk. 

Pu Hruaia'n, "Insûm teh, khatia ân buan buan kha a ṭul ber lo ve. Ka nupui leh a fanu hi i haw hrim hrim nge, Tatai leh Dadina te pa an thuhmun vang hian i haw zawk?" A lo ti dam thluam thung a. Pi Dingi lah thinrim tawh si, a ter at reng mai. 

Rinpuia chuan mak tih hmel zet hian, "Maw?! Tatai pa leh Dadina pate thuhmun maw? Khai a! Kan lo va inthup thei hlawm ve" a ti a. A ṭhawng tih a lang reng mai. 

Pi Dingliani chuan, "A hma daih aṭangin ka hre tawh, chuvang a nia neih i tum lai pawn aw ka pawh ve duh loh che. Hetiang khawp hian buaina min thlen nasa ang tih ka hre lâwk bik lo va, i neih tak râwih siah chuan sawi leh î ka nei ta bik lo a nih kha. Mahse, han ngaihtuah teh, an nufa rawn lan aṭanga buaina kan tawh zozai te hi. Mafeli pawh kha an that nufa lovang tih tu nge sawi thei? A fanu chan ṭhatna a nih dawn phawt chuan he nu hian pawisak a nei hleinem" tiin Pi Zuali a kawk sawk sawk a. Tatai te nufa tan chuan sawi ve tur vâng tak a ni. Pu Hruaia'n, "Ka fanu thihna lehzelah chuan mawhphurhtir suh. Mafeli kha Shillonga thi a nih kha" a lo ti nghut. 

"Khatianga ama nunna la duh tur khawpa dan chêp pawh a ni thei asin. In chhungkhura thil thleng zawng zawng engmah hriat i nei lo" Pi Dingi'n a lo ti leh hmiah. Pi Zuali a insûm zo ta bik lo nge, "U Ding, tlin tawk lohna chu kan nei ngei ang, amaherawhchu, thihna chungchangah êm chuan min ringhlel suh. Mafeli zawk khan Tatai hi vawi tam tihnat a tum zawk asin, engmah a sawi ve ngai lo zawk a. Ni e, kan nufa vang hian buaina te hi kan tâwk a niang e. Chuvang chuan kan chhuak ang, Paa, nang pawn min dan tum tawh suh. Ka tuar thei tawh lo" a ti ta hmak hmak a. Tatai pawn rilru a lo siamfel ve tawh. He in hi nuam tihna a nei hran lo bawk a, a nuin a theih phawt chuan a nu nen chauha rethei tê pawh nise zalên taka chen dun kha a thlang zawk. Buaina hian zual lam a pan zel bawk nen.

Rinpuia chuan, "Tatai te nufa ka ringhlel miah lo, mahse, an nufa vanga heng buaina hi lo irh chhuak a nih ka ring ta e. Ka nî, nang hi a bul tumtu i ni ngei bawk ang. Ka nu boral hlimchhawn laia ka nau enkawla buaipuitu ber i ni bawk a. Mafeli chungah khan eng emaw tak zawng i ti a nih ka ring ta e" a lo ti ta hmiah hmiah mai. A rin loh lutuka chutianga Rinpuia lo ṭawng ve chuan a ṭhawng lutuk nge Pi Dingi pawh a hmel a buai deuh nak mai. Mahse, nu phanchang, thil tam tak lo tuar tawh a ni bawk a, a chiâi rei lem lo. 

Elsen zeta nuiin, "Chu! Nang pawh chu an lamah i ṭang elo? Mafeli thlarau la vakvai reng te hi engvang nge? Eng nge min chah duh a neih tak ang? I farnu a ni bawk a, han ngaihtuah teh le" a ti kual a. Rinpuia lahin a lo mil lo sa deuh bawk nen, "A hman hmanin ka nute nufa in rawn ânkhum hi ka ning zozai tawh e. Ka pa hlimna tur pawh hi in ngaihtuah tak tak lo, in hmakhua chiah in ngai. A khawhar thinzia te kha in hria em? Ka nu a sûn a, tunah a duh ber tawngin a nei a. A hlimna pawh inṭawmpui ve duh lo. Rilru chhe hlawm lutuk" a ti ta zêk a. 

Pi Dingi thinrim meng ling hlar chu a pawisa eih lo niin a lang, "Chuan, ka la duhtawk lo, Chrisa hi Tatai zem thlukah i lo ngai ang e. Amah Chrisa zawk hi Tatai tel lo va awm thei lo zawk a nih hi. Hrereng tawh rawh. " A ti leh ta siah siah mai. A pain khap lo phei se chuan duh aiin a ṭawng na maithei a ni. Pi Dingi tihngaihna hre tawh lo thinrim bawk si chu a chhuak tau ta nghawng nghawng a. 

Pi Zuali pawh chuan, "Tata, han insiam rawh, keini pawh chhuak ve ang" a ti nghat. 

Pu Hruaia'n, "A engah chuan maw in chhuah ve ngawt ang a? Engahmah ngai suh u ka tih ṭhin kha. Dingi hi zawng enrêmna nen en a ngai. A â tawh a nih hi" a lo ti vat. Pi Zuali lah a tum ruh ve tlat si, an indang laih laih mai. 

Rinpuia chuan, "Ka nu, ni e, i tan pawh a tlawmthlak zozai tawhin ka ring. Mahse, tunah hian a hmawr kan bâwk thei ṭêp tawh a, a tawp hi khar fel ila chuta chhuah in duh ṭâlh leh kan dang thei lo che u nise, reilotê chauh tal chu min nghak lawk ta che u" tiin ngenna a siam ta ngawt a. Dik tak chuan Rinpuia hi chu mipa tih takah Pi Zuali te nufa tan hian sawiselna tur engmah a awm lo, an thlavâng a hauhsak char char zawk thin. Chuvangin a ngenna pawh chu zahawm an ti a, nghah leh rih chu pawi an ti ta lo a ni. 

A tuk lawk kha picnic a la ni zui a! Zing kar atanga buai ta chu Tatai pawn class kal loh mai a rilrûk ta. Thansanga kha biak a tum a, a tlang thei tlat lo. A hringnun thawnthu inchherchhuan chhoh dan mak tak hi ziak chhuak thiam nise ngaihnawm a tling ve hial âwm e. Thil ni thei awm pawha ngaih loh hi he Zoramah ngei pawh hian a thleng a thleng ta chu a ni si a! Chrisa nen an inzawmna chhu chat vek turin a nuin thu a pe bawk a, a block fai ta vek mai. Ni e, buaina bul chu Chrisa nen inlaichinna an lo nei hi a niawm asin. Nilêngin Arami a pui a, a awl hlek chuan ngaihtuah loh a harsa si, an cctv footage pawh an en buai peih tawh lo. Awmzia a awm tak tak lo e a. Rinpuia erawh Azêli hmu turin a chhuak a, eng tak va ang maw? Chrisa a la reh char char, a block a ni bawk a, a rilru tak chuan ina a rawn kal vat kha a ring deuh a, mahse, a beisei sang te pawh a ni mahna le..a rawn lang hauh lo. Practice turin a insiam a, a phur lo ngei mai. Chrisa'n a rawn sawm ta bawk si lo nen, Bza rualin a kal ve leh ta a. Ṭawng pawh a ṭawng tam peih lo. Hah hnêpa a han inkhel chuan a rilru hah zualpui pawh a tikiang hawkin a hria. A vannei êm a, rilru nâ leh hah vanga muthilh theih loh emaw thil ei theih loh ang hi a nei vak ngai lo. Bza rual bawkin a haw a, a rilruah Chrisa a awm. Ani pawh hi Pi Dingi hian a hneh ta nge nge a ni ngei ang. A pawi lo daih zawk, a sarhû lai chuan nain hrehawm ti mah se; chhungkaw kehdarh ai chuan a thlanawm fê zawk. 

Rinpuia rawn haw lah chu a rawn ngui haw viau mai a, a rukin Tatai bulah, "Azêli chu nau nei turin damdawi inah an lo lut ve deuh chiah alawm le. Tihbuai a ngamawm vak loh. Engpawhnise, ka rindan hi ka kal vûngpui dawn, Amanda bulah pawh ka sawi tawh. A rawn be ṭêp ang che" a ti thung. Tatai pawh chuan a ngaichâng ve pah a, zanriah ei kham hlim deuhah Amanda chuan a rawn be ta chiah, tun tum erawh a pa chungchang a rawn sawipui thung. A zawt chîk ngang mai. Tin, Alice pawh a ruka an chhui thu te nen lam a rawn sawi a, tin, a siruk laa an thawh a ngaih tawh dawn avangin a nu ngei pawh an la rawn kawm tur thu a sawi bawk. A pa number kha Tatai'n a pe bawk. Tel ve duh lo mah se; an ham tel ve zel tawh chu a ni si a. A buaithlak vek tawh. 

Zanah lehkha ka zir e a ti tak naa, a rilruah engvakmah a lut thei lo. Dar 9 velah a mu ta ringawt a. A mut erawh a chhuak tehchiam lo, thawm dangin an tihbuai a nin tawh êm avangin ear phone a vuah leh hmak bawk. Hla hlui lam hian a lung a lên bawk a, a ngaithla kual leh nasa. An thlarau pawh a che tawh dawn lo a ni maithei. A ngaihven peih tawh lo. Mahse, ngaihven loh theih lohin zing dar 2 bawr velah Mafeli room aṭangin ṭawng bul bul thawm a hre ta. A'n ngaihthlak chian chuan Chrisa aw ang a ti hle, a mangphan a niang tiin muthilh leh mai a tum a, mahse, haider rual a ni ta lo. Ṭap thawm a hre ta zat bawk si, a inbeng kang vat a, a tho chhuak ta nge nge. A va chhuah chuan Mafeli pindan kawngka bulah midang zawng chu an lo ding ṭaih tawh a lo nia! Christophera pawh a lo ding ran mai. Hrethiam lo zetin a melh kual a, a laia ding Arami hmel chu hlauhthawnna hlirin a khat. 

"Eng nge a awmzia?" A ti ta tawp a. An hmel a thutak hlawm êm avangin biak pawh an châkawm loh a ni. 

Chrisa chuan, "Thlahrang kha hei kan man tawh e" tiin Arami a kâwk ta vâ mai le! Tatai a meng phâwk nasa.

"Maw?! Arami maw?" A ti nghek. 

"Aw..ani hi alawm kan plan zawng zawng hriaa thawm nei ṭhin. A ruaitu hi ka nu a ni bawk" lungawi loh hmel fê hian Chrisa chuan a ti ta a. Tatai a la hamhaih ta fô! 

"Ani te chuan nizanah pawh Mafeli a hmuh kha" a ti niah niah. 

"Dâwt a sawi a nih kha. In hnuaiah chhuk phawt teh ang u" tiin amah chuan hma a hruai nghal zat. Pu Hruaia te nupa pawh zêp nâk emaw an hamhaih a, an la phâwk hrû tho mai. Living roomah an ṭhu ta thap a. 

Chrisa chuan, "Aram, sawi rawh le..a bul aṭanga a tâwp thlengin" a ti vawt raih. 

Arami chuan hlauhthawn hmel takin a chil a lem khawlh a, a melh kual hrek hrek bawk. Rinpuia dawhthei lo chuan, "Sawi vat ta che mawle" a lo ti bung nghut. Arami a phu zawk mai. 

Chutah le tihian a sawi ta a. 

"Pu, min ngaidam hram rawh u, ka tihpalh a ni. Engkim hi ka thiam loh vek a ni, ka duhâm luat vangin thil ka tisual a. Min ngaidam hram r'u aw. Englo a ni, ih, Nu Dingi avanga in ina lo awm ka ni tih in hria ang a, ani hi min khawngaihtu leh min duhsak ve em emtu a nih avangin keipawn ka ngaina. I hriat angin Tatai pa leh Dadina pate an thuhmun a. Hei hi Tatai nu i rim hma khan Nu Dingi'n a hre daih tawh. Amah ngeiin Tatai te nufa hi a zawng chhuak a ni. Ka pi (Tatai nu) hi a haw em em a, tihnat ve a duh takzet, Dadina pa kha ka pi zar thlûkah a ngai tlat a. An nufa hi tihchhiat a duh hle ṭhin. Dadina pa nen erawh inzawmna an nei zui tawh lo. Tikhan ka pite nufa hi a chhui kal reng a, dik tak chuan Dadina pa kha a hmangaih ve êm a, a rilru nâ pawh a dam hleithei lo a ni ber. Mak deuh maiin ka pu hian Tatai nu a rim ta si a! Nu Dingi chu a tirah a thinrim, tin, khang a thuruk kha kei, Mafeli leh Alice te chiahin kan hriatpui bawk. Kan bulah chuan, "Innei se la; ka tan chetlak a awlsam zawk ang" a ti mai a. In han innei ta a, thil kha a thleng chho ta mawp mawp mai a ni. 

Doctor pakhat kawmngeih deuh mai a nei a, chu pa hmang chuan Mafeli kha thunun a tum ta a ni. Tatai tal buaitir a duh a, Tatai thenfai zawha ka pi laka chet leh a tum bawk. Eng damdawi nge ka hre ve chiah lo va, chu damdawi chu Mafeli tui bottle-a thlak ṭhin turin min ti a, amah ka hlauh bakah hlawh min pe zel bawk nen, Mafeli chu kan hrai ta a ni ber ang chu. A tam thei ang berin Tatai te nufa chungchang leh sawiselna hi Mafeli hriatah kan sawi bawk ṭhin. Kei erawh fimkhur thuhlaah Tatai te lamṭang niawm taka awm turin min ti thung. Mafeli kha ka khawngaih ngawih ngawih ṭhin. Sual kha a duh bik lo, mahse, damdawi hmanga thunun a nih avang khan zêl ang deuh hian a awm ṭhin a. A thiltih engmah a hre tawh ngai lo. Tin, Chungliana hmanga an tih vek a ni. Mahse, Mafeli chungah khan engkim tlaktir an tum leh si a! Chungliana ngei pawh an dah ṭha ta a nih kha. Nu Dingi hi a â vek tawh, hmangaihna avangin a â tawh ka ti ngam sak. Tual an thah dan leh Mafeli kha engtin chiah nge an hman ṭangkai ka va hre ve vek lo. Mafeli damdawi inah a awm ta a, a rilru rawn fîm chho kha an hlauthawng nge tikhan a chungah an che leh a. Mahse, a chinchhuakin engmah min hrilh ve ngai lo va, kha lam chu sawi tur ka nei ve vak lo. Mafeli a boral a, Puia leh Chrisa ten a thih dan an chhui ru tih an hriat avangin tibuai turin a thla ang taka lemchang turin a nawrin min nawr ta a. Tin, ka rinhlelhawm loh ber dawnin an hre bawk. Tuman min ringhlel ta lo rêng bawk a. Tikhan a pindanah Tatai rilru tibuai zual turin thawm ka han nei ṭhin. Nizana Mafeli thusawi niawm tak ka sawi pawh kha anmahni kamchhuak vek a ni e. Chrisa leh Tatai te inzawmna nei lehzel hian Nu Dingi rilru a tibuai zual ta êm a ni. A fapa naupang zawk nena unau chu engtin nge mo atan a pawm theih bik ang? Zaninah khan engtin nge Chrisa khan min lo chan tih ka hrethiam miah lo, mahse, he thil hi a tâwp a hun tawh. Hremna in tih ang ang hmuh pawh ka inhuam e" tiin. 

1 min vel chu thawm a reh tlawk tlawk. Inpuanna rapthlak tak zawng a va ni êm. Nu pakhat hmangaihna avanga thluak buai vek tawh leh nula a unaupa ngei ngaizawngtu te thiltih atan chuan a rapthlak lu deuh zawng a ni. 

Chrisa chuan, "Amanda min tirhna anga rawn kal ka ni e. Mafeli rooma ngawi renga riak turin kei leh Rinpuia chiahin kan hre thung. Zêp loh chuan nang kher hi chu ka beisei lo asin le" tiin Arami a melh tlawk tlawk. Arami inthiam lo hmel pha dâi chu a lainatawm letling zawk e a. Mahse, hremna a hmuh ve ngei chu a ngai ang. A awmna te fanu ngei damdawia hrâiin thisenin a tuihaltir a, a thih hnuah lehzel a thlâ anga inlarin midang tan buaina a la siamsak chêu bawk. 

Pu Hruaia a ding vut, "Ka fanu chu aw..ka va lainat tehlul êm. Aw le, Rami, va mu la, zingkarah Police kan be dawn nia. Beidawn hlawhchhamna avang khan mahni intihnat te kha i lo tum ang e. Chris, lo hrethiam la, ka farnu leh Alice lakah pawh report ka thehlut dawn a, chhungkua a sawi theih tawh loh a nih hi. Min hrethiam ang che" a ti khur dat dat. 

Chrisa pawh chuan, "Khai a! Pute, hma la lo mah la keiin hma ka la ang. Ka nu a nihna laiah chuan ka hmangaih alawm, mahse, thisen rim a nam tawh chuan thisena inzawmna pawh hi indantir loh tur. Ka lo rindan sa deuh a ni a, min ṭhawng vak hleinem. A hmawr kan bâwk fel taah ngai ila, a lawmawm zawk e. " A lo ti charh charh. Mipa, a mawhphurhna hlen tum tlat, a hmangaihte venhim tum ṭhin chu tuboh leh dolung inkarah a awm ve ta reng mai. A nu chuan engtin nge khatiang thil rapthlak lutuk kha a tihtheih zawk le?! A nu a ni tlat bawk si. 

Tumah an muhil zui ta lo. Chrisa'n Amanda a be lâwk tawh bawk a, zingkarah an rawn tifel thei ang chu. Tatai pawh hahdam huai tur a nih laiin a thaw a ipik tlat! Chrisa chu a khawngaih ngawih ngawih. Chrisa nu chet ang hian ama nu hi che ve ta se la; engtiangin nge hma a lak ang a hre lo. Hnem a duh a, a thiam si lo. Thudik hriat ni tawh mah se; a tu amah chu an hlim phah lo. Chhungkua an buai zo va, kehdarh an hmabak chu a ni ta reng mai. Khua a lo var a, mitthi vui tur ang maiin an ngui nghiai thei. Amanda te pawh an rawn thleng phei a, Pu Hruaia te ngenna angin a darhzau lo zawnga chetlak an tum a ni. Arami chu an la ta phawt a, Pi Dingi leh Alice te pawh midangin an va hruai bawk. Chhungkaw picnic hun tura an ruatah chhungkua an ṭap ta. Mawhpuh loh loh tur mawhpuh tum tawk an awm laiin Tatai te nufa lainat tâwk an awm bawk, an family groupah pawh Tatai an add ve leh ta a, ngawi rengin a lo chhiar ve hmiah hmiah. Sawi ve tur vak a hre lo. Pi Dingi te an man rualin pu Thansanga pawh lak tel a ni a. Chawhnu lamah an thu leh hla ngaichâng turin an thawk chhuak hlawm ang chu. Pu Hruaia tak pawh a khawngaihthlak, a rin loh pui puiin thil a kal bawk nen, a farnu a mantir a ngai bawk si. Thil a inphaman chho thlup ta erawh thâwk khat chu a veng huai e. Chawhnu lamah chanchin ngaichâng tur chuan an chhungkaw zinga a puipa deuhte chu an thawk chhuak ta a. Chrisa erawh a farm house-a a kal thu an sawi. Tatai chuan a ngaihtuah ru viau naa, tihbuai rih loh mai a duh. Mite angin a hnem thiam ve mang bawk si lo. 

Police lam pawhin an chhungkaw ngenna ngaihpawimawhsakin eng thu leh hla mah an la tlangzarhsak lo va. Tin, Pi Dingi leh Alice te inpuanna ngaihthlak a la ni lo bawk nen. Pu Thianghlima te unau pawh an kim ṭhap e. Pi Dingi chu zan khat thil thu lekah pawh a tla nghal dâwk thei mawle. Alice erawh engmah tihsual nei lo ang maiin a awm thiam lawi a! He nau mizia hi a mak ngawt mai. Amanda chuan thupui an vai chho ṭan ta a. Pi Dingi te tan pawh han inphenna tur chuang awm tawh hek lo le. Tualthattu an nih loh thu erawh an sawi nasa, mitthi tawh khinte chu thil harsa ni mawlh hek lo. Amaherawhchu, Arami sawi ang khan Mafeli thlâ anga an lantir thu leh Tatai te nufa chunga phuba lak ngei an duh avanga an remhriat dan ang anga hma an lak ve thu erawh an zep thei ta bik lo. 

Damdawi chungchang kha Pi Dingi chuan, "A nu a sûn khan mi â ang maiin a khawsa a, Hruaia lah mipa a nih bakah an nu thihna kha a tuar ve tho bawk nen, eng han tithei a ni si lo va, rilru doctor ka râwnsak ta ngawt mai a ni. Aniin damdawi a chawh ang kha ama duhthua a ei kan rin loh avangin Arami mawhphurhnaah ka dah a, engtin nge a damdawi ei khan a taksa leh rilruah hna a thawh ka hre bik hauh lo mai. Ka vahnu a nihna angin ngaihsakna ka lantir a, chutah chuan thiam lohna ka nei lo" tih thu a ṭanchhan ve tlat. Arami lahin eng damdawi nge a nih a hre bik si lo, Pi Dingi doctor râwn ṭhin lah chu Pu Hruaia te inneih hma lawk khan heart attack vangin a lo boral daih tawh a lo nia! Engkim chu a khirh leh ta vek. Khang Tatai ṭhian boral ta te thihna kha chhui zui ngaihna vak a awm dawn lo a ang hle. Tin, Pu Hruaia leh a unaute ngenna avang pawhin Mafeli thih chhan leh thih dan tak chu chhui zui ngai lo turin an khup fel i ti mai teh ang. An chhungkaw thutlûkna a ni bawk a. Mahse, Tatai ṭhiante thihna bakah Chungliana thihna erawh case a la tâwp mai thei lo. An chhui zui zel mai a niang chu. Pi Dingi te pathum chu Central jail-ah dailuah leh alu ring tura phurh thlak an ni ve ta phawt a. Pu Lawma hmalakna azarah bail theih vat an nih erawh a rinawm. Chhungkhat kual vek an ni bawk nen, thisena inzawm na nâ na chu a chhe ber a thlen takah chuan inkhawngaihna a piang lo thei lo. Tin, Pi Dingi thinrimna leh phuba lak duhna chhante pawh zir tham a ni ve bawk a, huat tur dik haw lo va, Tatai te nufa chunga a ṭuan tak hi a tisual ta a ni ber. Man chhuah remchang taka Arami a han hmang tlat maite hi a thluak a fim lo tih a lang chiang hle. Engle khaw le, hmangaihnaah hi zawng thiang lo pawh a lo awm lo a nih awm hi a. Dadina pawh a rilru a rawn na viau, a nu chu han haw viau dawn se, a pa avanga a tawrhnain a kentel vek a ni bawk si. Awmdan thiam a har duh ngawt ang le. 

Chhungkaw groupah Pu Thianghlima nupui pi Sangi'n, "Boruak a alh zel loh nan Zuali te nufa pawn in in chhuahsan mai hi a ngai niin a lang. Dingteii hi rawn chhuakin chhungkuaa rawn tal leh dawn se, ser kan insiamsak nual tawh si a. In tan pawh a nuam tawh dawn lo. " A rawn ti hmiah mai. 

Pu Lawma nupui Pi Tlani erawh chuan, "A nih tur ang a ni vek tawh, an chhuah kher a ngaihna ka hre lo. Tisawn pangngai takin an khawsa thei tawh zawk ang chu mawle" a rawn ti thung. Midang an ṭawng ve vak lo. Nia, an sawi ang khan Pi Zuali te nufa tan chuan a nuam lo zual ngei ang le..a nihna takah chuan he chhungkuaa an lawi luh vanga thil thleng vek a ni ve bawk si. Pu Thansanga khan Pi Zuali hnenah ngaihdam a dil nasa a, khatiang dâwt muhlum hmanga Tatai te nufa inkara khi siam tur khan Pi Dingi'n rem a ruat vek tih a sawi bawk. A mi huat leh phatsantu ngei zawngchhuaka Tatai te nufa tichhe tura a tlawm thei pawh hi a mak! Ti êm êm hian mihringte hian huatna thinlung kan lo pai thei ang tih pawh rin a harsa a ni. 

Chrisa lam kan hawi ve tawh ang. Farm house-ah zan 2 a riak ta. Ruihhlo nena thil thleng mêk chu hmachhawn a duh lo va, harhfim kara a han tuar chu mipa dik tak mah nise; a hrehawm thawkhat a niang. Thawpui a la ve hulh hulh thei. Tumah a be duh lo va, tumah a be hek lo. A lo rin lawk angin thil thleng mah se; a nu chu a nu miau si a! Tatai lah a tana hmeichhe awmchhun ni hial âwma mawi khawpin a lo hmangaih hman tawh si! Chu lai boruak uap leh sosang lutuk inkara a han ding chu Chrisa meuh paw'n a zo lo lam chu a ni e. Tatai a ngai êm êm, mahse, a nu hmel a mitthla a, engtikah mah ser reh thei lo tur pai chunga Tatai kut vawn chu a zuam bik si lo. Thlah hlen tur anga a han inngaihtuah lahin nâ a ti lutuk bawk si. A nu chu a hua a, a haw tak tak thei chuang bawk si lo. Thil a ei ṭha meuh lo bawk a, a tla ve kûam mai. Amtea leh midang ten an zuk panchilh paw'n a lo dawngsawng hleithei lo. A nau ngei pawh a be hleithei chuang lo. Pu Lawma'n, "Ani zawng mipa takin a tuar dai mai ang, a phur a rit rih êm a nih hi, chimbuai rih lo mai ang u. A rawn ṭha leh em em ang" tiin a fate pawh a khap tawp mai a ni. 

A zan 3-na zanah a inkhalh chhuak ve ta a. Kalna tur lam pawh a hre chuang lo, hmalam panin a inkhalh ve mawp mawp ringawt. Phone khawih peih hek lo le, tute chanchin mah hriat a nei lo, a nute jail-ah dah luh an nih aṭang khan a phone a la khawih leh lo hrim hrim. Lawmkima te dawr kawtah a ding chat a, khua a thim lek lek tawh naa dawr chu a la lûn angreng. Thaw la hawkin a lut ve ta a. A ṭhutna ṭhin lam a pan nghal vut. A pi Tlani'n a lo besâwm ta vat a, nui hmel pu lui hram hramin, "Ka rilṭamzia hi..eitur tam tak ka duh" a ti a. Chairah a ṭhu nghal. 

Akimi'n eitur a rawn serve a, "I tha tawh tiraw?" A ti seuh seuh. 

"Ka ṭha chuan ka hria" a lo ti nghut a. 

"Kan lo ngaihtuah lutuk che a. Ka ni pawh ka pain lak chhuah dan a dap zel a nia. " Akimi chuan a ti leh a. A lo nui hawk ringawt. A ngaihtuahna ruak lutuk chu a chauhpui hial mai. Akimi chuan zawi sap hian, "Tatai te chanchin pawh kan hre thei tawh lo, khawiah nge an awm kan hre si lo va" a ti ta a. Chrisa a vir zawk mai. 

Akimi melh rûn chungin, "Eng nge i sawi kha? " A ti hlur. 

Akimi chuan meng zak zak chungin, "I hre tawh emaw ka tia, in an chhuahsan alawm. Chhungkua kan buai zel loh nan an tia. Ka nute chuan an phal lo viau naa, Nu Sangi leh Ka ni Rami te'n an ṭawngkhum nasa sia. An tan a nuam lo êm a ni" a ti ta a. Chrisa a zawi nghal vek thei. Eitur pawh chu ei ta lo chuan, "Ka kal a ngai.." tih leh biak hman loha chhuah a rual nghal. Akimi chuan hrilhhai zetin a thlir vung vung ringawt. 

Chrisa chu a tlan chhuak nghal rawp rawp, mahse, kalna tur lam a hre chuang si lo. Tatai a call tlang theih loh avangin pi Zuali a call a, a ring ral ṭhak ṭhak bawk si. A phone a en loh rei aleiah chanchin engmah a lo hre si lo. Aizawl dai, Ngaizel lamah te a va tlan ta ngawt a. Muangchâng leh uluk takin an family group chat chu a chhiar ta a. Pi Sangi leh Pi Tlani inhnialna karah Ziri te, Amtea te leh Rinpuia te an rawn ṭawng ve leh zauh ṭhin. Alice nu ngeiin Tatai te nufa chu a remove ta kha a nia. Pi Zuali msg hnuhnung ber chu, "Ni e, kan nufa hi ânchhia kan lo ni a niang e. In chhungkaw lak aṭang hian kan kalbo kumkhua tawh ang" tih a ni. Tatai erawh kam khat mahin a ṭawng ve lo. Pi Sangi'n, "Chhungkua kan inbe râwn tawh a, chhungkaw zing ami ni tur chuan a rem teh ṭeuh tawh lo a ni e. Engkim tâwp rawh se" a rawn ti hmak hmak. Alice nu lahin a lo thlâwp thei ropui si. Chrisa chuan a steering hum ngawt ngawtin hmalam a bih ngur a, "Keimah vang a ni a, keimah bawkin ka chingfel ang" a ti hul hak. Tlan lêt lehin Rinpuia te in kawtah a ding dawt. A lo reh ṭhap a, an pafa chauhin an khawsa tawh chu a niawm si a, an khua pawh a har viau ta ve ang. Door bell a hmet ri tlang tlang a. A nghah deuh vang vang hnuah kawngka chu a ri ta rak a, Pu Lawma fanu naupang ber Julie'n a lo hawng. A lo va awmpui a nih hmel. 

"Awii, i lo haw maw?" A ti chul a. Chrisa chu a lut vut. Julie chu a rak hlut a, Chrisa chuan dawhtheih loh hmel zet hian, "Khawiah nge Rinpuia" a ti nghut a. 

Julie chuan, "A bialnu a rim a niang, Papuia chu a chhuak a" a lo ti var. 

"Juju, thingpui min han lum teh, ka ṭamchhâwl mai dawnin la hria" Chrisa chuan chauh hmel zet hian a ti a. Rinpuia a call nghal bawk, "Bro, lo haw lawk mai teh..in inah ka awm" a ti a, a dah zui nghal. Julie chuan thingpui chu a va siam ta rak rak a. Chrisa chu a hawi a hawi mai, Tatai tel lo chuan a putea te in lianpui chu a reh zual a, a zau zual bawkin a hria. Julie'n thingpui a rawn dah chuan, "Tatai te khawiah nge an awm?" A lo ti ta chat. 

A bulah rawn ṭhuin, "Ka hre lo, kan call nasa tawh lutuk, an la thei si lo va" a ti ta niah niah a. Hmm, Aizawl khawpuia an la awm zawngin zawnchhuah theih loh tawp chu an ni bik lovang. Thingpui chu tui ti tak hian a in khalh khalh a, a dam sawng sawngin a hria. 

"Chris, i nu te hi i ngaihven miah lo em ni? " Julie chuan a ti leh thut. 

"Ngaihven an ngai em ni?" A lo ti let hmuk. Julie pawh chu a ngawi ta hle hle a, Chrisa hmel thutak zet avang chuan a hlauthawng a ni ber ang chu. 

Rinpuia a rawn hawng ta a, "I reh rei hle mai. I ṭha tawh maw?" Chrisa melh chungin a ti nghal. 

"Ka ṭha emaw ka tia, ka lo la ṭha lo tawp a nih hi. Khaw nge Tatai te?" Chrisa chuan ipik hmel zet hian a lo ti tham ṭuak. 

Rinpuia chuan a rawn melh vung vung a, "Ka hre lo, ka zawng nasa tawh lutuk. An kalna tur âwm ka hre lo a ni. " Beidawn hmel zetin a ti chuai raih. Chrisa a rum nghut , "Ka beidawng ve dawn lo, engvangin nge nang tal paw'n i chelh loh? " A ti nghut nghut a. 

Rinpuia chuan, "Ka theihtawp ka chhuah ve alawm, ka pa paw'n a chelh. Mahse, chhungkaw group kha i hmu ang chu..thin hi a rim asin" a ti mawlh mawlh. 

Chrisa chu a tho leh vut, "Engpawhnise, a zawng turin mi pawh ka ruai mai ang, chumi hmain chhungkua kan inhmuhkhawm a ngai a ni" a ti sup a, a chhuak zui nghal. Rinpuia leh Julie te chu an inmelh hrek hrek ringawt. 

Zan thil a ni bawk a, Chrisa chuan an in lam a pan ta phawt a. Puii a lo awm. Chrisa chuan a khawngaih deuh, a nau a awm si lo va, awmpui kuta in leh lo han dah ngawt chu a inthiam lo deuh. Mahse, a thil hmachhawn kha a namai lo ve bawk a ni. Puii hi Ṭhiak khua a ni a, fahrah tih mai theih a ni ve, kum 5 lai an inah hian a awm tawh a. Engkima an rinrâwl ber a ni bawk. Amah pawh a rinawm bawk a, Chrisa te pawn farnu ang thawthângin an en ve vek tawh a ni. 

"Chris, pi chu bail hram dan a awm lo'm ni? " A lo ti chat rêng a. 

"Pute Lawma'n a buaipui dawn kha. Lungngai lutuk suh" a lo ti ṭha ve mai. A pindanah a lut nghal a, Puii'n a lo tihfaisak reng a niang, han hnawk leh bal a awm lem lo. Chau zetin a mu thlawp. Hmalak dan tur pawh a ngaihtuah peih rih lo. Chhungkua inhmuhkhawm phawt ṭha a ti. Lehlamah Tatai te chhuak chu a ṭha zawk ang em tihte a han ngaihtuah ngial a, a chang leh khawi emaw laiah rethei takin an lo awm nufa ringawt a nih chuan tih a ngaihtuah bawk. Chu tak chuan a thinlung a tinêm leh ṭhin. Bansan kha a tum lo a ni lo, chuvanga farm lama zuk invawmbo kha a ni rêng bawk a. Mahse, Tatai te'n in an chhuahsan hial takah chuan a rilru a buai ta nuaih mai. A chau tawngkhawng bawk a niang, kar lovah a muhil ta bawrh bawrh a. Mumang ramah Tatai, cher leh bâl êm êm a lo la hmu zui! A vei ngang a niang e. 

A tukah Family Groupah chuan, "Chawhnu dar 1-ah kan inah ka lo awm ang, sawi ho ka duh a ni. " Tih thu a post ta a. Alice nuin, "Eng chungchangah maw?" A rawn ti hê hâw.

"Tatai te nufa chungchangah mawle" a va ti hmak. Tumah an rawn ṭawng tawh lo. A seen erawh an seen ṭhup thung. A ngenna an ngaihpawimawhsak êm ang chu maw. A pute Lawma'n a rawn bia a, "Vawiinah ka buaipui dawn a, bail theih an nih chu a rinawm dawn a. Inhmuhkhawm kha i nute rawn chhuah hunah law law kan ti mai dawn em ni ang?" A rawn ti. Chrisa paw'n a nute nena sawiho chu ṭha a ti ve bawk a, a pawm ta mai. 

Hetih lai mêk hian Tatai erawh a nu kut vuan rânin damdawi in khum bulah a lo ṭhu ran thung. In an chhuahsan aṭangin zan 3 a liam ta. An chhuak kha kalna tur ber hre lo leh belh tur nei ta lo nafam chu hotel man tlawm leh langsar lo takah an insuan lut ve râwih a. Thlen man a tlawm bawk a, hotel pawh a nuam fahran lo hle. Mahse, an nufa vahvaihna kawng chu a inṭan leh tak avangin chak lo leh phur lo chung pawha an zinkawng an zawh a ngai ta si. Nasa tak leh chaldelh tak taka an tawngkhum reng bakah Pi Zuali'n nâ a tih êm êm chu a thlavâng hauh ngam miah lo pasal a nei chu a ni. Chuta kârah Pu Hruaia lah chuan, "An sawi dik lohna a awm hleinem, tuar ve mai teh u. Dingi chan pawh dâwnpui ve ta che u" a la ti zui a! Ni e, Pu Hruaia nen innei ta lo se; heng thil zawng zawng hi an tawng kher lo maithei. An nufa vang a nihna chen chu a awm ngei e. Mahse, thleng tur a thleng vek tawh, a tawpkhawkah pawh an nufa ânchhia lawha diriam an han ni chho ta mawlh mawlh chuan a rilru a tihel laklawh ve tawh a. Thutlukna siamin Tatai nen in an chhuahsan ta kha a nia. Tih tak êmah chuan Pi Dingi rilru buai vanga Tatai ṭhiante thisen luangte kha an sawi an sawi bîk lo. Pi Zuali hian Thansanga kha a zar buai eih lo bawk. Amah Thansanga zawkin a bum thlu mai zawk a ni. Pi Dingliani rilru kal sual avanga an nufa tawrhna hi a zozai tawh êm mai a, tlanbosan an duh tawh. Rethei nufa viau mah se; a dam ṭhat phawt chuan rethei bakberh lutuka an awm a ring bik lo. Kha chen kha an lo inchâwm nufa tawh alawm le. 

Mahse, vanduai asiamin an chhuah zanah la la Pi Zuali pum chu a nuam thei reng reng lo mai a, a tai na fîk ṭhak avangte chuan a thlan fim a bawl ṭawk ṭawk mai. Tatai lahin han sawngbâwl vak ngaihna a hre si lo, Hotel manager koin a ranga rangin damdawi in lam an panpui ta a. An tlai ṭhelh a lo nia! A rilphir a lo puakkeh lek lek tawh. Emergency -in an zai nghal ta chûk chûk a. Pi Zuali a â bik lo bawk a, bakah an pa remtihna thlapin thla tin a account-a a sum lo khawlsa ve kha Tatai chuan a la chhuak lo thei ta lo. An awm zel dan tur a ngaihtuah buai peih lo law law. Mahse, Jeje leh Sawma te erawh chanchin a hrilh ve a, an rawn lang var mai. A ṭhiante chu a intiamtir thlap hnuah an chhungkaw buaina zawng zawng chu a hrilh fai ta vek a. A awmna hmun tupawn an zawt a nih chuan hrilh miah lo turin a ngen bawk. Ṭhiantha hi zawng an lo hlu ngai e, Jeje chuan an thenawmte in hnuai a lo biaksak nghal a, Pi zuali dam veleha insuan lut nghal turin. Tin, Hotela an bungraw la dah ho te pawh an va thiarsak vek bawk. Pi Zuali pawh Pathian zarah ṭha takin an zai thei ta bawk a, Mahse, a cham thleng erawh a la awm ve a ngaih hmel. Chulai karah an volleyball khelh tur nen, coach te'n an rawn be sek lehnghal. A nuin, "Ngaihtuahawm ka nih tawh loh hi, va khel rawh. Sum tlem azâwng i thawhchhuah pawh a hlu alawm" a ti tak naa, a nu kalsan a hreh viau. Mahse, a nu sawi ang khan hlawh tlemtê pawh an nufa tan chuan a îtâwm ve bawk si. Sawma'n, "I inkhelh chhung i nu chu ka lo awmpui ang, lungmuang takin va khel rawh" a ti hlauh mai bawk. Ṭhiante hi an va hlu tak êm. Tichuan, Chrisa rawn haw zanah khan match khat a va khel ta hrâm. An chak zui ta bawk. Chrisa khan khalam kha ngaihtuah chhuah nachâng a lo hre miah lo va, amah pawh coach te'n biakpawh an tum nasa, an be tlang thei bawk si lo kha an beidawnsan titih ta ngawt kha a nia. Tatai chuan a sim card a thlak ta daih a, Jejea nu sim card hlui a hmansak. A nuin thutâwp a siam tawh a, a nu thuawih bak tihtheih a nei lo. Dik tak chuan ani pawh Chrisa lakah a vui rilru ve alawm, khati khawpa an diriam lai kha engtin nge a enliam theih tih hi..Chrisa'n phone a khawih lo tih a hre tawh bawk si lo, an inpelhsawlh kual vel a ni ber e. Pu Hruaia inchhir leh lunglêng paw'n Pi Zuali chu a rawn call reng, a la duh bik der si lo. Natna khuma a mut lai pawhin a pasal awmchhun chu Pi Zuali paw'n a theihnghilh bik reng reng lo. Mahse, a dinhmun chhiat ber laia a kut vuan tura a beiseiin a hnungchhawn khan a tinâ em a tin ni. 

"Nu, hei tal hi ei tum la, chak i mamawh sia" tiin buhhawp chu a chhawpsak a. A nu pawh chuan chauh hmel tak hian, "Ka ṭha tawh lutuk alawm. Min ngaihtuah lutuk a nih kha. Naktukah chuan chhuah dil tawh mai ang hmiang" a lo ti ve a. A mitmeng aṭangin a chau tih a lang tho si. 

"I hmanhmawh a nih kha, dam ṭha ver vawr phawt rawh." A fanuin a lo ti var. Nilêngin an inawm nufa a, tlaiah Jejea'n chaw a rawn kensak leh dawn a ni. Tatai chuan towel a va pho chhuak a, corridor rawn zawh phei mêk te a hmuh chuan a tlum lut nghal vat. Pi Sangi leh Ziri te an ni. Eng nge maw an rawn tih dawn le?! Heng ho kaihhnawih hi hmuh fô a duh tawh lo. 

Chrisa chuan Rinpuia call a dawng a, a la nghal vat. "Nizan khan Tatai chu a khelh ve kha" a rawn ti nghal tâwng a. Chrisa a meng nghal kâwk. 

"Ka lo ngaihven miah lo va, chuti a nih chuan Aizawlah an la awm tihna a nih chu" a ti nghut. 

"Naktuk zanah an inkhel leh dawn. " A rawn tih chuan, "Umm, ka ngaihven ang. Ka lawm e" a ti sup a. 

Jeje a hrechhuak nghal, a number a nei lo lai tak chu a pawi ta a ni. Tatai'n Jeje aia hnaih ṭhian a nei lo tih a hrechhuak har te chu a inhaw hlur tawh mai. A rilru buai nâk alaiin Pu Lawma'n a rawn bia a, "Hei kan inlachhuak thei dawn e. I rawn lan ve ka beisei tehlul nen, i nu BP a lo hniam lutuk a, damdawi inah kan tlangpui nghal dawn. I remchan chuan rawn lang ve la " a rawn ti a. A nu meuhin chutiang a tawh takah chuan thlauhthla thei bîk lo le..a insiam ve ta nghal a. Puii pawn zui ve a tum. Civil Hospital kawt an thlen chuan dar 3 a ri ṭêp. Gate-a an lut tur leh Jeje rawn lut ve mêk chu an innagching ta a. 

Chrisa'n a va hnaih nghal ruak, "Khaw nge a awm?" A ti nghal thâwr mai. 

Jeje lah hamhaih chi lo ni ve bawk si chu hawi phâwk hrû hian, " ka hre lo" a ti nawk nawk. 

"I hre ngei tur a ni. Khawngaihin Jeje" Chrisa aw-a ngenngâwlna chuan Jeje rilru pawh a tibuai deuh. 

"Je, canteenah kal leh lawk ang,." Step tâwp aṭanga rawn titu lam chu an hawi rual ṭhawt..