Tatai 13

TATA-I (13)

Ziaktu : Toni Râlte

A lung chu a rawn phu nghal zawih zawih mai. Engtin nge Pi Dingi leh a pa chu an inzui theih. An inhriat ṭhat hmel viau lehnghal a. An piah deuha dawhkanah chuan an ṭhu ta. Pi Dingi lah chu a nui ver ver reng a, a mood a ṭhat hmel khawp mai. 

"Tata, hey, Ta-i " Jejea'n a rawn tih chuan a phu zawk mai. 

"Eng nge maw i ngaihtuah le?" Jeje chuan a ti sup a. Sawi chi lah chu a ni mang si lo. 

"Aa..thil dang daih ka lo ngaihtuah a, sorry.." a ti bah nawk nawk. 

Sawma thusawia rilru pek hram hram a tum naa a harsa lam a ni. Pi Dingi te lam chu a hawi leh zak zak ṭhin. Jeje chuan Sawma bulah chuan, "Engpawhnise, i tum dan ang chuan i chet a ngai a nih chu, i nu chu hrilh la, Mafaka pawh chu chhuahtir rawh. Mahse, ka buaina chu i pain thil awmzia a hre ngei dawn sia" a ti sauh sauh a. 

"Chuvang chuan alawm ka chet ngam loh" Sawma chu a ti khauh. 

Amah bawk chuan, "Mahse, karlehah hian ka pa chu a zin leh dawn a, remchang ka hmuh ka beisei" a ti leh a. A sawi anga ti ngei ngei tur chuan an fuih ta a. Tatai erawh chuan pawi a ti. Pi Dingi te avanga a ṭhianpa a ngaihsak thei lo chu. A serious tehlul nen chuan. Pi Dingi te chuan an rawn hmu ve lo ve, nge an hmu reng zawk a hre lo. A rilru a mang zo vek, he thil hi Chrisa pawh hrilh ngei a ngai ang. He thil hi a zûng nen lama pawh phawn a ngai ta. A rilru a pek thlawt loh avangin Sawma lakah a inthlahrung ngei mai. Mahse, an tihluih ngial paw'n a thei ngang lo a ni. 

An haw dawn chuan Tatai chuan Pi Dingi te chu a va melh zauh zauh a, an rawn hmu ve lem lo, rawn hmu mah se; pawi tihna a nei lem lo bawk. Jejea'n a thlah a, a chau nghulh mai. A nu bula sawi a tum a, mahse, hun remchang a la nei hleithei lo. Thil mak tak chhui sen rual lohte chuan a rilru hlim ve ṭan pawh a rawn khuhbo leh ta si! Engkim chu an nufa vanga thleng niin amah ngei pawn a ngai chho ṭan tawh. A nute chuan a la tuar ve mai ang tih a hlau, venhim erawh a tum rân thung. Chrisa'n a rawn bia a, a ipik thawkhat bawk a niang, "Hun i neih chuan lo kal lawk ta che" a ti ta tawp a. Chrisa lah a lo law zaw mah. Rang takin a rawn thleng phei ta a. Bathlarah chhuakin hun thawl an nei thei ta. Tatai pawn engmah zêp hni hne a tum tawh lo, a pa nia inchhalin a lo biak dante aṭanga ṭanin vawiina Chrisa nu nen a hmuh dun thute, engkim zawng zawng chu a sawi fai ta vek a. Chrisa pawh chuan a lo ngaithla uluk kher mai. A chal a chuar nâng nâng danah eng emaw tak zawng a ngaihtuah tih a lang. Tatai'n a sawi zawh chuan, "Ka rin ang zelin thil a kal. Chu pa thlalak chu i nei em?" A ti a. Tatai lahin a lo nei mai si lo. Vawiin khan a thla lâk rûk chu a tum reng naa Jeje te'n zawhna an nei dawna a hriat avangin a ṭhulh leh ta kha a nia. Chrisa chuan, "Ta, engkim hi ka nu bulṭan niin ka hria. I nu leh ka pute hi an inneih hma khan kum engzat nge an inrim?" A ti a. A zawhna tehdaih chuan Tatai a tihrilhhai deuh. A chil lem khalhin, "Kum khat vel a niang" a ti ringawt. 

"Engvanga Mafeli laptopah khan i thlalak kha awm ringawt nge a nih ang? In la inhriat loh chu thuhran, i nu leh ka pute pawh an la inzui si lo. Helai tak hi ka buai ta a ni" Chrisa chuan a ti nghut nghut a. 

"Kei chuan ngaihtuah vak dan pawh ka hrethiam tawh lo" Tatai'n a ti ringawt. 

"Engpawhnise, chu pa i pa anga insawi chu kan hmuh vat a ngai, ka nu nen engtin chiah nge an inzawm tihte kan hriat a ngai" a ti mawlh mawlh a. 

"Chaw ei chhuahpuiah min sawm a, ka âw mai dawn mi?" Tatai chuan a ti a. Tunah chuan Chrisa bak rin tur a hre rih tlat lo. 

"Chu chu a ṭha ber ang, ka rawn zui ang che. Chuan Alice pawh naktukah a rawn thleng dawn" Chrisa chuan a tih zawm zat a. 

Tatai a ner sawk. He nu hming hriat fô pawh hi a ning. Chrisa vang ni pakhat mah se; a mizia cheng chawng hi a mil hlawl lo. Mi ngei hi a nei vak ngai lo a nia, Alice erawh ngei theihtâwpin a ngei ve tlat. 

Chrisa chuan a rawn kuah a, a fawh hmain, "Ang phûau zel tawh suh" a ti hram. Tatai pawh a nui ve ringawt. A rawn fâwp ta chiah a, a hma ai ngawt chuan Tatai pawh a zei ve tawh. Thingpui an in leh hnuah Chrisa pawh a haw ta a. Tatai pawh mu turin a inbuatsaih nghal. A nu chu hun thawl a hmuh veleh a be mai ang chu maw. Ear phone vuahin hla a ngaithla pah a, pindan lehlama thil thleng pawh engmah a hre lo. A rilru a kal dîng bawk nen. Dar 10 a ri ṭêp tihin a pa anga insawi khan a rawn call a. A la lo ṭêp a ni. 

"Aw "a ti mawl tawp. 

"Zanriah chu engtikah nge min kilpui theih ang le?" A rawn ti dam thluam a. 

"Kar tawp lamah aw" a ti ve mai a. 

"A ṭha alawm, i nu bulah i sawi em?" A rawn tih chuan, "Sawi e, ka sawi loh i ring em ni?" A ti hmak. 

"A pha nasa viau ang chu" nui chungin a rawn ti a. Tatai a sa phat, mahse, inbengdai lehin, "Dâwt i sawi miau alawm" a ti a. 

"Dâwt ka sawi lohzia engtin nge ka fiah ang aw" a rawn ti vang vang a. 

"Dâwt chu finfiah a har ngawt ang" Tatai'n a ti ve ngat. 

"Ka û kha la dam se engkim i hmai hmaah kan pholang thei mai tur" a rawn ti ve leh a. 

"Engpawhnise, hmaichhanah kan la sawi dawn nia, ka mut a chhuak, nih phawt le" Tatai chuan a ti a. A hmet hlum nghal daih. A va zung a, a ear phone a la thla bawk. Khuma a mu leh chiah chu Mafeli rooma inhnît faih faih thawm a hre leh ta. A tho vat a, hlauhna engmah a nei lo, Rinpuia khan cctv kha a fit tawh a,mahse, va fiah hmiah a duh tawh. Rinpuia a lo la haw lo thung. Mafeli room kawngka chu chhunglamah a inkalh ta tlat mai! A han sawi ṭhin, thawm lah chu a reh leh hmak tawh. Tatai thinin a tuar ta lo nge a chum ta dawt dawt a, "Tu nge a chhungah khan awm che u..lo hawng r'u" tiin a au a. Mahse, thehmeh ang maiin a reh tlawk tlawk thung. Insehruhin, "Mai mai chuan" tih leh kawngka chu nêk a rual ta a, a ri rak a, a inhawng ta. Chumi rual chiah chuan Mafeli room thlang lama bathlar lian vak lo lama thil phe zauh chu a va hmu hman. Hmanhmawh zetin a va chhuak a, a thim vek si. A zuangthla tih dawnin a sang angreng si, a zuk en kual naa, a thim vek avangin tumah a zuk hmu lo. Mafeli room chhungah chuan a hawi kual leh a, thil danglam thleng a awm lo. Bathroom pawh a ngai ngaiin a lo awm. Thinrim ru deuhin a chhuak a, Rinpuia a rawn haw ve chiah. Tatai a rawn hmuh chuan thil thleng a awm tih a hrethiam nghal a niang. 

"A che leh em ni?"a ti sup. Tatai a bu nghat, "Hawh, en ang" tih leh footage enpui a rual ta a. Thilmak tak a thleng leh ta. Engmah a lang leh ta lo! A chhan chu cctv hliahin baloon niawm tak a awm tlat! Rinpuia chuan dawhkan a chum bur mai. 

"Eng thil phiangsen hrep nge maw ni le..mai mai chuan" a ti pawr hlur mai. An pindan ve ve an pan leh ta phawt a. Muthilh erawh a har ta ṭalh mai. Tatai pawh a rilru a saisa nuaih tawh. He thlarau anga inlar ṭhin hian engkim a hre ve thei zel mai a, an rin loh tak pawh a ni thei tlat mai. Khawvar hnaih lamah a chhing ve sek a, mit thial ûrhin a tho. A zawi nen mai a, a harhvâng hlawl lo. Phur lo zetin a insiam a, A pain, "Tata, Mafeli scooty hi i khalh hreh tih ka hria, chuvang chuan saw saw hralh a, a thar laksak che ka lo rilrûk a" a tih chuan a tihlim veng veng. 

"Ka lawm ngawt ang" a ti sap a. A nu hmel pawh a hlim hle, A nu a hlim hi chuan ani pawh a hlim ve thei mai zel. Vawiin chu Sawma a rawn kal lo va, Jeje nen bawk an inzui. Sawma thil tawn rapthlak zet chu an sawi dun a, an khawngaih takzet a ni. Uirenaah hi zawng eng chhuanlam mah hi a tling thei lo. Sawma nu hi naupangtêa Sawma pa nen innei an ni a, a la ṭhalai viau bawk. Tin, nu hmelṭha leh harhvâng ve tak, thian kawm nuam ti tak a ni ve a. Tunlaiah lang chhuak si lo va phone kaltlanga hetiang thil tenawm bâwiha tâng mek hi an awm nual ang. A ṭha lam aiin a tha lo lam kawng zawh hi a awlsam phian bawk nen, mi nu leh mi pa a ruka inbiaa sex video call hmanga inhrithla te pawh an tam mai. Pawisak hi kan nei tawh lo khawp a nih dawn hi. Tatai pawh vawiin tlai chu practice ve a tum tawh avangin Jeje pawh nghak lovin a hawnsan a. Chrisa'n a rawn sawm a, an chhuak nghal. Hma an sâwn ta viau. Tatai pawh a che ṭha e. Karleh aṭanga khelh tur a ni bawk nen, couch te pawh an ṭang na ngang mai. Khaw thim thet thetah an haw ta a. Rinpuia'n Chrisa bulah nizan thil vel kha a lo sawi tawh a, mak an tih thu an sawi ve nasa mai. 

"Azêli ka bia a, naktuk zanah kan inhmu dawn e" Chrisa chuan a ti a. Tatai pawn Azeli chu a chanchin a lo chhiar ve tawh bawk a, Mafeli thla hi a hmuh theih tak tak chuan hma an sawn viau a rinawm. 

"Chaw lo ei ve mai ta che" Arami'n Chrisa chu a lo ti var a.

"Alice a rawn thleng sia, a vui lutuk palh ang" Chrisa chuan a lo ti a. 

Tatai a tûm leh hmân tawh. Mahse, engmah a sawi lo. A inbual zawhah zanriah pawh an ei ta a. A pain, "Mama, Ruati te sawi theih turin awm rih lo la ka duh, Zorina te nau pawh i lo ngaina viau a nih pawhin insûm rih a ṭha. An ṭawng chak si a, in inṭhen ang hialah an chhuah leh duh mai ang che" a ti dap dap a. Rinpuia'n, "An ni mitmei ka ven chhan tur ka lo hre vak hleinem. " A lo ti awlsam êt. 

"Chutiang ngawt a ni lo, in inṭhenna a la rei lo lulai êm mai" a pa chuan a ti a. A sawi dik reng mai, insûm ve rih chu a ṭha ngawt tak ang. 

"Nia, ka lo insûm dawn nia" a ti ve mai a. 

A pa bawkin, "Naktukah Tata, Scooty chu va en ila" a ti a. A rin aia hmaa ama puala scooty a nei ve thei tur chuan a tilâwm hle. 

"A ṭha lawm, ka van lawm tak" a ti ve hliai a. 

"Kartawpah chhungkaw picnic kha an rêl leh bawk a, Alice rawn zin lai a ni bawk nen" A pa bawk chuan a ti a. Tatai a hnual deuh, zêp nâk emaw an zinga tel ve a chak hlawl lo a ni e. Mahse, Chrisa'n a nawrluih leh vak a ring bawk si. A pa anga insawi nen a tuk tlaia chaw ei chhuah an tum ta bawk. Engkim hi hailan vek a tha e. A hne tawh. A chau deuh bawk nen, a mu hma viau, Chrisa nen pawh an inbe rei lo. An ni inngaizawng ve hi inkalpah te pawh an ang lek lek zawk, an inngaihsak huam lo a, zantin erawh an inbe ve. Thu thlum leh ril tak tak an sawi dun ve ngai meuh lo; mahse, an dinhmunah an chiang a, thu an intiam vak lo naa, an rinawm ve riau. Chrisa pawh hian hmeichhe dang a ngaihven meuh lo niin a lang. Bakah buaina an nei rih a ni bawk a. 

Dar 2 velah a harh hlawl mai a, light a lo in on vûai. A off ngei khan a hre sia. Khum bul maia awm a ni bawk a, a off ta a. A zun a chhuah leh tlat avangin mutpui lui thei hek lo, a va zung leh ta nge nge a. Sana en paha phone a'n khawih chuan Alice msg a lo awm! A seen ta vat a. 

"Chrisa hi ka lak atangin i lak bo theih inring ngai suh" tih a ni. Tatai pawh a nui tawp. Alice chu mak a tih piahlamah a mizia chu a ngainep a ni deuh ber mai. Chrisa a ngaizawng pawh thilmak a nih tawh laiin Tatai a la bei zui zel hi chu amah leh amah a indahhniam a ni ringawt alawm le. Chhan pawh chhang lovin a mutsan leh ta daih a. Zinga a harh rualin vawiinah a pa nia inchhal nen zanriah an kil dun dawn tih a hrechhuak nghal, a khi sak mai. Vawiinah hian a tâwp an thlen theih loh pawhin an hnaih viau ta ve ang. Huaisen turin a infuih nghal mawlh mawlh. In hnuaia a zu chhuk chuan a nu chauh a lo awm a, Arami bazar thu a lo hrilh nghal var, remchangah la vatin a nu bulah chuan a thiltawn chu a sawi ta mawp mawp a, Pi Dingi ber kher nena a pa anga insawi an inhmu chu thil pangngai a ni tlat lo a ni. A nu pawh a ngaihtuahna a hman nasat hmel viau. Midang erawh chuan la hre rih lo se an duh thung. Helhhawlh ru zetin class kal tur chuan a insiam nghal mawlh mawlh a, mascara hman a zir ve a, a inhnawih lai mêkin Mafeli room lama thil tlu ri thuai niawm tak a hre ta a, a ranga rangin a va pan nghal. Arami'n a lo tifai a lo nia, Tatai a hmuh rualin, "Enteh, Tata, a mak tawp. Nimina ka tihfel khan a kawrfual hi Almira-ah ka khai thlap sia, tunah hian hei tah hian a lo awm leh daih" tiin kawrfual hring par, a damlai pawha a hak zin ve pawl tak khum lû-a lo inbang ṭha thlap chu a kawk a. Tatai chuan tihvak ngaihna a hre si lo, " a..mi an lut a niang" a ti ta ngawt a. Arami lah chuan, "Kei zep loh chuan a rooma luhte hi ka tîm vek tawh, mi râp" a lo ti ve bawk. 

"Engmah a ni lovang, hlau suh" a'n ti ngawt a. Mahse, nitin mai hian thil thar an tawng reng chu a nih hi maw. 

"Alice lo thleng lo ka lawmzia hi, he nu cheng chawng hi ka mil thlawt lo" Arami'n a tih chuan a lo nui hawk. Nia, Mafeli ngei ngei pawh khan a diary-ah Alice a huatzia a ziak kûr ngei nguai alawm. Mi hrang tan ngat phei chuan mil a harsa ve ngawtin a rinawm. Tatai pawh a pa rualin a chhuak a, scooty an en dawn bawk nen, a mood pawh a fuh viau. 

A pa chuan, "Tata, zep nei miah loin sawi la, a thâwi thâm takngial paw'n Mafeli thla hi i la hmu ve lo maw?" A ti a. 

Hmalam bih ngarin, "La hmu miah lo, mumangah takngial pawh ka la hmu lo" a ti sap. 

"Mi lah hian an sawi duh nasa si a, kan tan hian a nuam lo tak tak a ni. Mumangah tal inlar se ka lawm dawn nen aw" a pa chuan a ti vâng vâng a. 

Tatai chuan thawk la hakin, "Pa, a nih thil ka zawt ve ang che aw. Mafeli nu a boral lai khan amah Mafeli hi tu kutah nge a awm ber? Ka sawi awmzia chu tuin nge buaipui ber" a ti ta a. Pu Hruaia chuan a ngaihna hriat loh hmel deuh hian, "Ani Dingi leh Alice te khan an buaipui, Alice-i nu pawn a buaipui tho mai, ngati nge?" A ti hû a.

"A nu thih sarhu laia a lusûn khawharna khan a rilru a tibuai deuh a nih ka ring a, a nih thil dang daih, Chrisa te pa hi a la dam tiraw?" Tiin a pa a en a. 

Pu Hruaia chuan, "La dam e. Mahse, hei kum eng emaw zat ka hmu tawh lo. Chrisa leh Dadina te hi pianghmun an ni lo tih i hre tawh em" a ti hê hâw a. Tatai tan thil thar a ni leh ta. 

"Aih, ka hriat vawikhatna, Chrisa pa hi a dang maw?" Mawl mang tak hian a ti a. 

Pu Hruaia'n, "Umm, Chrisa pa hi chu tunah chuan Lunglei lamah an khawsa a, an sumdawnna pawh a kal tluang viau, Dadina pa erawh Aizawla awm kha a nia, sawi tawh angin ka hmuh lohna chin ka hre tawh lo. I ni Dingi chhelna êm êm chu Chrisa hi a pai lâwk a, an han innei kha Chrisa pi a pa nu tihretheihin a awm a, hlawh a la nei bawk si lo nen. Chuta karah Chrisa pain ngaihzawngte a han neihsan lâwp lâwp a, tuar thei ta ngang lovin Chrisa kum 2 lek a nih laiin a rawn haw leh ta a. Lehkhate zir ṭha lehin tun dinhmunah hian a invawrh kai ta a ni. Chrisa kum 5 a nih laiin Dadina pa nen intawng lehin kum 4 dawn chu an khawsa ho va, Chrisa pawn a pa ang tak takin a en ve kha a nia, mahse, Dadina pa pawh chuan phatsan ve lehin ngaihzawng a neihsan a, tihian a fate a hmeithaipui ta a nih hi, a thil tawrhte kha an namai lo ve êm mai a, hriatthiamna chin neih ve pawh a tha. A nihna takah chuan a huat vang che u a nih ka ring lo, A fate ang thova fahrah ve i nih avang hian chan ṭha i chang hi a lawm lo ni maiin ka hria, fahrah i ni ka tih kha chu i nu nen kan inneih hma thilah ngai la aw" a ti ta dap dap a. Tatai chuan ngaihnawm a ti viau.

"A nih pa hrang an ni tih an inhria em?"a ti leh a, a dilchhut viau chu a inthlahrung leh deuh. 

"Hria e, tlai khawhnuah Chrisa chu a pain rawn ngaihven lehin farm house te pawh saw a pek a nia, Dadina pa erawh a dam tawh lo pawh a ni maithei" a pa pawh chuan a ti ve mai a. An chhukna tur hmun an thleng a, Tatai duhthusam ang tak an la ta. Registration tihfel nghal theih a nih rih loh avangin class a kal ta phawt a, Jeje a la rawn kal lo zui! 

Hunbi tin chu ning zetin a chhiar a ni deuh ber e. An bang ve ta hram. Nghakhlel ru si, huphurh ru siin a pa nen an inhmuhna tur hmun lam chu a pan ta a. Chrisa bulah chanchin a hrilh bawk. Chrisa paw'n practice lovin a rawn vil ru dawn a ni. Dawr kawtah chuan a'n ding leh ren rawn a. A hawi kual bawk. Hmelhriat a hmu lo, dawr chhunga a luh chuan an dawhkan lam a pan nghal a. An dawhkan aṭanga chhiara pathumnaah lukhum hmathlawk khuma kun deuh chhala lo ṭhu nen chuan an insignal zauh. Rinpuia an hrilh hre lem lo, Mafeli nen inzawmna a lo neih loh tak thutah a mimal nun Rinpuia'n a hriat ve kha nuam a ti chiah lo a ni. A thleng deuh chiah tihin a pa pawh chu a rawn lut ta a. Zu rim a nam lo va, a thar vûk mai. Sawi tawh angin a vanglai chuan tlangval hmelchhe lo tak a ni ngei ang. 

"I lo kal chu ka lawm hle mai. "A pa chuan a ti zauh a. Tatai chuan a lo buk khum zauh. An zanriah tur an nghah chhungin thu tam tak an sawi hman a beisei. 

Tatai chuan, "Engvangin nge min zawn chhuah leh?" A ti nghal ta chat a. Pehhel vak a tum buai peih lo. 

"Ka fanu i ni miau alawm" a lo ti ve mai bawk. 

"A nih engtin nge min zawn chhuah dan tak hi?" A tih chuan, chu pa chuan a ṭhut dan siamremin fel ât hian a ṭhu a. 

"A hmasa berah college enrollment ka en vek phawt a, a hautak viau. Khaw dangah mi ka ruai bawk, in collegeah i hming ka hmu ta a, ka hming aiah i nu hming a lo inziak kalh bawk. A rûkin ka veh ta che a, i hriat tur chu i pahrawn chhungte lam hi ka hmelhriat an awm ve nual a, Pi Sangi pawh ka be pawp ta a nih kha. Ani chuan i pa ka ni ang tih rin ngaihna reng reng a lo hre lo va, engkim dik taka ka sawifiah hnuah min ring ve ta chauh a, i number pawh min pe ta a ni. I pahrawn pawh hian min hre lutuk a nia. Mahse, i nuin ka lak aṭangin a thukru char char che a, i pahrawn bulah nise dâwt ngialngan lutuk sawiin falak ang hialah a chhuah che. I pahrawn pawn a khawngaih phah ta rêng a, a nihna takah chuan i nu hi pawisa vanga engmah tih hreh lo a nih hi. Chu chu chiang tawp phawt rawh. Ni e, i tan chuan awih a harsa ang, i tetlai min mamawh hun lai zawng zawngin ka awm lo va, eng thu nge a fah ṭhin che ka hre lo. Mahse, ka thusawi hi a dik vek a ni" a ti ta charh charh a. Tatai'n Chrisa a va melh zauh chu a lo awm tawh reng reng lo. A'n hawi kual deuh naa Chrisa hmel âwm reng reng a hmu lo. 

Rilru pek tum tih hriat takin, "Ni lo, i thusawite kha a dik tih theihna tur finfiahna engmah i nei lo. Ka nu hian i hlawh a cut hek lo, chawhmeh zuara a chawm seilen ka nih hi" tiin a nu thlavâng a la hauh ve ngar ngar. 

A pa chuan, "Chutak chu alawm ka buaina. I nu hi ka û te ina awm ṭhin a ni a, ka nupui hmasa zawk nen kan inṭhen hnuah ka û te chu ka bêl a, tah chuan kan intawng ta a ni. Kei chuan ka hmangaih takzet a ni. Mahse, sawi leh sawi hnu pawisak a nei tlat lo va, min uiresan chhan pawh kha eng dang vang a ni lo, ka hna aṭanga chawlhtir lailâwk ka nih avangin kan rethei a, retheih kha a peih ta lo va, a uire ta a nih kha" a ti bawrh bawrh. Tatai thinlung erawh a sawi nghing thei meuh lo. 

A pa chu a melh ran a, "A nih ka pahrawn farnu Pi Dingi nen hian eng nge in inlaichinna?" A ti ta thut chu a pa mitmeng pawh a buai ve ta nak mai. Mahse, inthunun leh vatin, "Ka sawi tawh kha, i pahrawn chhungte nen hian kan inhre ṭha viau asin. Dingi pawh farnu anga ka en a ni" a ti nawk nawk a. Tatai mawl bik hek lo, dâwt a sawi tih a hmu thiam ve tlat. Eitur a rawn thleng a, chawhleh pahin, "Ka nu ka la ring zawk. Chuan min hmu tawh bawk a, min tibuai lo la ka duh a ni" a ti thâm ṭiak. 

"Ni lo ve, Tata, i pa ka nih angin i laka ka mawhphurhna ka hlen ve a ngai alawm. Tunah chuan Pathian zarah nanga chawmna tur khawp sum chu ka nei ve tawh e" a lo ti vat a. Tatai'n chhan dan tur a ngaihtuah rauh rauh laiin Pu Thansanga chu a tho thut a, "Ka kal a ngai. " Tiin a kal zui daih! Tatai hrilhhaizia chu aw. A hawi a hawi ringawt. Waiter a rawm kal a, "Miss, i bill pek a ni tawh aw" a rawn ti ngawt bawk. A tu chuan nge maw lo pe le. Phur lo zetin a ding chhuak a, tumah chuan an rawn ngaihsak lem lo va, a zia viau zawk. Mak an ti ve dawn êm asin. Pawn a thlen rual rualin, "Hetah" ti thum chhaktu avang chuan a phu chiang ngang mai. Chrisa chuan a rawn kai nghal a, hmanhmawh zetin a motor lam a panpui nghal. Khua chu a thim a ni deuh tawh mai e. 

"Chris, engmah hi ka hrethiam lo a nia" Tatai chuan a ti nghal sawk sawk. Chrisa hmel tak run leh chezia hrim hrim chuan a tihhrilhhai bakah a tihlauthawng vek thei mawle. An in lam an pan a, Chrisa lah a ṭawng bawk si lo, Tatai dawhthei ta lo chuan, "Christopher, thil thleng hi eng nge a awmzia?" A ti ta tuar a. Chrisa chu an in piah kâwn zau laiah a break nghal tuarh. Hmalam melh chung leh insehruh chungin steering a chum bur. Tatai chuan a lo melh nghek ringawt. Chrisa chu inthunun tum tih hriat takin a chhing vang vang a. 

"Tata, kha pa kha Dadina pa a nih kha" a ti zawi ta sup. Tatai chuan a thu hriat chu awih harsa ti zetin Chrisa a melh a, a fiamthu a ni lul lo tih chu a hmelhmai leh mitmengah a lang thei. Mak tihna hlira khat chungin, "A awmzia chu i nuin kha pa kha a lo ruai tihna maw?" A ti thei hrâm. 

Chrisa chuan a lu a thing a, "Ni lo, i pa ngei chu a nia lawm. Dadina nen unau in ni tihna a nih chu" a ti dam thlup. A thinthawk thut kha a reh fel tawh a niang. 

Tatai erawh a la hawihai dawn chauh, "Ka pa maw?! Engmah hi ka hrethiam ta lo. Ka â dawn" a ti ta thlâwt a. 

A biang tawn tawnah rawn dawmin, a khabe a chawikang a, "Hriatthiam a ngai lo. Ka nuin in nufa a huat chhan che u ka hre tawh a, chinfel lam chu ka hna aw. Tikhan lo awm tawp rawh. A ṭha em?" A ti hniam ruih a, thla a timuang ngawih ngawih. Mahse, hmeichhe chhel leh khauh tak ni ṭhin Tatai biangah mittui a luang ta tlat! 

A heh pet fan fanin, "Mi vanduai tak kan ni. Keini nufa avangin buaina a tam tawk tawh e. Chris, min ngaihsaknaah ka lawm, mahse, ka nu bulah engkim ka sawi ang a, chhungkua aṭangin kan bang ang" a ti sêp sep a. A insût hraih bawk. 

Chrisa chuan nui chungin, "Min ring tawh a, a tawp kan thleng ṭêp tawh. Bansan hni hne lo zawk teh ang. " A ti sup. 

Rei tawk fang ngawi renga an ṭhut hnuah Chrisa chuan zawi muangin in lam a panpui ta a. 

"Picnic hunah engkim ka pho chhuak ang,zam lo la,ka kutah engkim dah la aw. " Chrisa chuan a ti phei mawlh mawlh. Tatai erawh a ngawi reng. He chhungkuaa an lo intatlut chu pawi a ti, mi chhungkaw phel darh hi a duh loh ber a ni a, mahse, hei an inlaichinna a khi chho ṭan mek chu a ni ta si. 

In an lut a, Chrisa chu pangngai takin a awm a. A inthunun thei khawp bik mai. Tatai nu hian a fanu a chik bawk a, a fanu awmdan chu a hrethiam a nih hmel, a mitmei pah reng. Chrisa pawh rei awm lovin a haw a, pu Hruaia chuan an boruak hrethiam lo takin video pakhat viral mêk chungchang a sawi daih. Pi zuali erawh chuan Tatai chu biak ngei a tum. Thil dik lo a awm tih a man thiam nghal vek si a. Vanneihthlak deuhin Pu Hruaia chuan hrechhuak thut niawm takin, "Ekhai! Nu-i, ka lo theihnghilh hmin der alawm le..Êngzama nu chu i va kan ve ang hmiang,. " A ti ta a. 

Pi Zuali chuan awm nawm loh hmel fê hian, "Awiii aw..ka hnungzâng na a chhuak leh sia, nangmahin i va kan lawk mai dawn em mawni le.." a ti niah niah. Hnungzâng nâ nei thin a ni bawk a, an pa pawh chuan a awih lo hran lo, a va inthlak zung zung a, a chhuak ta nulh. Pi Zuali chu a ranga rangin Tatai roomah a chho nghal. Kawngka a lo kalh hmak a, mahse, a nu a ni tih a hriat chuan a rawn hawnsak ta vat. Bual pawh a lo la inbual lo. Vei nei tih hriat takin a lo awm a. 

"Thil thleng a awm em ni? Bawihte, i ṭap tiraw? Eng nge thleng?" Tiin Pi Zuali chuan a zawt nghal mawlh mawlh mai. Tatai pawh chuan thâwk an la tê tê a. A nu bulah zep leh chuan tur a nei lo bawk a, a pa leh Dadina pa thuhmun an nih thu chu a sawi ta a. Chrisa'n chinfel a tum dan zawng zawngte nen. Pi Zuali pawh a ṭhawng kher mai, a meng kâwk kâwk a ni ber e. 

"A va pawi tak êm

.chuvang a nih chu U Dingi hian min lo ngaihtheih loh nufa em em ni" a ti ṭiau mai. 

"Nu, a pawi ka ti, Chrisa nen hetiang inzawmna hi nei lo ila tiang zawng zawng hi a thleng awm si lo" Tatai pawh chuan a lo ti ve a. Pi Zuali chuan, "Ni lo ve, nangmahah burbun vek ṭhin suh. Pawi ta ber erawh i pa ka lo tawng kha,. Umm, ka ngaihtuah lêt hian a dik ang. Dadina nen in inthlauhna hi a tam vak tlat lo, U Dingi nen an intihthiam loh laiin kei min bum a, U Dingi a bum bawk a nih ber mai chu" a ti duah a. An nufa chuan eng nge thleng zel ang tih ngaihtuahin reitak an inkawm ta. Huaisen chhuahin Pu Hruaia bula engkim sawi vek mai chu an thutlûkna a ni ta a ni. Pi Zuali'n zaninah mut hmunah an pa chu a hrilh ngei ang le. An tuar dawn a nih pawhin an tuar nufa mai a niang chu, nu zawkin a fa a phatsan thei lo ang bawkin fanu pawhin a nu hlimna atan chuan tawrh pawh a thlang zawk. A nu chhuk hnuah a inbual a, thildang reng reng a ngaihtuah thei lo. Pi Dingi'n a lo haw nufa viau pawh chu a awm tihna chen a nei ve tho, Dadina pian hnu lawkah Pi Zuali"n Tatai a pai mai kha a ni bawk nen, hetiang a lo nih takah chuan khang thlalak Mafeli laptopa awm a school kal lai amite kha pi Dingi'n a pasal hlui fa chhui zui a tumna lama an lak a nih ngei dawn kha. Tihian a ngaihtuah a, Mafeli thihna leh a kaihhnawih lam chu thuhranah a dah ta tawp, tuna an buaina nen hian a suihzawm thiam mang tlat lo. Chrisa khan chinfel a tum thu kha a sawi bawk a, engtin chiah nge a chinfel dawn a hre lo va, lo dawnsawn ve tawp mai chu finthlak berin a hre ta a ni. Phone pawh a khawih peih lo, eng thil mahin a mood chu an thlak theih a ring lo te pawh a niang e. An zanriah ei lai khan a pa kha engvanga kal thut nge a nih ang le! Tin, engvangin nge a nu chungchangah dâwt a fah ṭeuh? Zawhna a ngah ta lutuk chuan a tibuai deuh. 

Zing dar 3 bawr vel a ni maithei. Pen ri thlep thlepin a tiharh a, a ngaichâng vang vang. Va fiah mah se; eng a nih a ring tawh lo. Rinpuia khan Azêli a hmu ta em tih pawh a hre tawh lo. Mafeli pindan kawngka inhawng ri rêt rêt niawm tak a hre leh a, a inbeng kang sauh sauh naa thawm dang a hre zui tawh lo. Mahse, chumi hnu darkar chanve âwm velah in hnuaia rak tuar tuar thawm a hriat avangin a tho ta vat a. Arami ngei a ni. Thlabâr tih hriat tak awrawl a ni bawk. Chanchin ngaihven tura a chhuk chu Rinpuia lo chhuak nen an insu ṭhelh. An chhuk rual ta a, a pate pawh an lo tho ve. Arami aw a ring ṭha bawk a. Khur zawih zawih hian living roomah a lo ding a, Pu Hruaia'n thil awmzia a han zawh chuan, "Amah a ni, Mafeli ngei a ni. Ka khum mawngah a ding reng a, ih..sawi pawh a nei" a ti bah nuaih. 

Rinpuia'n, "Hlau suh, engmah hlauh tur a awm lo ve. Eng nge ka nau chuan a sawi?" A ti a, Arami chu a pawm bet bawk. 

" nchhia min lawh" a ti teh tawp a. A ngaihna hre lo fê hian an melh thap. 

"Ka ruang chhuahna in chhung hian lungngaihna in tawng baw zel ang. Kei chu ka nu bulah muang te'n ka chawl tawh" a tia..biak zui hman lohin a ral nghal. Ka hlau êm mai, Puia" tiin Rinpuia kut chu a vuan a. 

Pu Hruaia mitmeng pawh a buai ve ta nak mai le. Mut hmuna an nuin a thu hrilh zawng zawngte nen a han khaikhawm a, Mafeli thlarau hi a chawl hahdam thei miah lo tihna em ni ang? Tatai te nufa vang em ni dawn? Patling a buai ve ta. 

Amahin mu ngam hek lo, Arami chu Tatai bulah a mu ta ngawt a. A rawn phu leh zawk ṭhin bawk. Tatai chuan a han hnem ve ngial a, Mafeli thusawi nia Arami'n a sawi khan a tibuai pha tlat! He inah hian mi hrang chu an ni nufa hi an ni mai a. A nu leh pa inneih hnua buaina tam tawhzia te, nunna hialin a tawrh tak dante, a ṭhian thi ta te zawng zawng nen a ngaihtuah a ngaihtuah chuan an nufa hi buaina thlentu an ni mai lo maw? Nge he thil phênah hian thildang a la awm chêu zawk?!