Leiruangtuam last

LEIRÛANGTUAM (LAST)

Ziaktu : Toni Râlte

Ka hmela tihlan loh hram tumin ka nui lui a. Mak min tih hmel viau. An enkawl ṭha bawk a, a taksa lang thei chin chu a no leh sar tawh. Tin, ei leh in a ei in ṭha bawk a niang, a khal riau bawk. Ka pa chuan thingpui in pahin kan kal chhante chu a sawi mual mual a, Zopari nu leh pate pawn an dawngsawng thiam khawp mai. Tichuan, Zopari chanpual chu kan pe ta a. A tihralna lam erawh anmahni lamin an lo ngaihtuah mai a niang chu. 

Pa Zaia te pafa ta tur erawh kan kawlsak a, ka pa bulah ka ngen nasa bawk a, Pa Zaia te ta bik chu a ranglama thehthang tur leh pawisa thawn vat turin. Ka hmanhmawh bakah ka ngenngawl êm vangin ka pa pawn a buaipui vat vat. Mahse, Fimkhur a ngai ve tho si. Kan accident thu lah chuan Zoram a luahkhat a, ṭhenkhatin an lo zeldin kual thul. Ro chungchang hria kha chu keimah leh kan chhungte bak an nih loh laiin Robina leh a hote an rawn che nge ni.."Ro an laichhuak a, ro vengtu huaiin a tibuai zel" tihte a thang nasa mai. Nuihte pawh a za lek lek alawm le. Zopari tih loh ṭhiante nen kan inbe kal reng a, Zopari erawh chuan tumah min hre tawh si lo. Doctor te'n zawi zawia a hriatna insiam chho tur niin an sawi naa, kei a bo dan en saw'n a harhchhuah leh ka ring tawh lo. Zopari tel lo chuan rangkachak tlawn hi a mawi thlawn mai a ni. Hlutna a nei lo. Mak ka inti, heti taka ka lo duh hman hi. Kan zinkawngah khan mawi lo leh angel te dai ngam loh khawp nawmchenna sualah kan tlu lut miah lo. Kan infawh kha a ni mai. Hmangaih thu thlum tak tak kan inhrilh hek lo. Mahse, hetia a tana mi hrang ang mai ka nih takah hian tawrh thiam a har êm a ni. Ṭhiante pawn min lainat khawp mai. Saia pawh duh ang thâlin ka sûn thei lo chu a ni e. Ka ke lah ka la hmang ngam si lo. Huan lam pawh ka ngaihthah ta rih law law. Ka pain a zuk tlawh ṭhin a, Hriata te nupa an fel bawk a, ka enkawl lai ang thoin engkim chu a kal tluang vek tho. Chuvang chuan ka theih loh chhung chu inah tawmin ngaihtuahna ka kawm melh melh ṭhin. Ka pu pawh hniam lam a pan zel a, ngaihven tur ka nih tehlul nen, min bawhbuaitu thildang a tam lutuk a, ka ngaihsak ṭha meuh lo. Ka nu leh ka û te bulah hian zêp leh î ka nei ngai lo va, ka hrilh ve vek. Min lainat ve hle, ka nu chuan, "I tana Pathian ruat a ni ang e, pawm tum zawk rawh. " Tiin min fuih ṭhin. Tawnhriat ngah lo tak ka nih vang erawh chuan han dawnsawn mai dan hi ka thiam ṭhin lo. Ral aṭanga ka hriat ve danin Zopari chu a dam ṭha tawh bawk a, a hmaa a hna, an cottage leh park te enkawl leh turin a inzir chho leh mêk tihte ka hre ve zel a. Ka lawmpui rualin min hria se, puih theihna kawngah te pui ve thei ila ti ten duhthu ka sam ṭhin. 

Ro chungchanga thuthang a vang khan chet kan la la ngam hlawm lo. Ka pa hian helama sumdawng ṭhin hmelhriat ṭha tak mai a nei a. Aizawl pa challang leh a sumdawnna hre lo te'n an ngaihsana an zah êm êm a ni. Chu pa kaltlanga ka ro hawnte pawh thehthang chu a tum a niawm e. Ro kan hralh hnua kan awmzel dan tur erawh kan la sawi chiah lo. Kei phei chuan duhdan ka nei lo lehzual, an duh ang angin tlakral mah se; pawi tihna ka nei lem lo. 

Kan accident aṭanga thla khat a liam leh meuh chuan ka ke an zawm fuh bawk a, bai auh auh chung chuan ka kal ve thei tawh. Huan lamah pawh ka liam ta fo a, motor ka khalh thei a , a lawmawm. Ka awl niah Kima emaw Ngaiha emaw ka va kawm ṭhin. An ni chesawn thei tawh lo ṭhu reng an nih avang hian min thlahlel êm êm zel a, kei lahin Zopari avangin ka lo ngai ve tho bawk si. Kan bial a zîm sâwt hle. Pa Zaia te lah phone an nei si lo va, biakpawh ngaihna a awm si lo. Nakinah ka dam ṭhat tak tak hunah kawng ka la zawng ang chu. 

Chhuak turin ka insiam malh malh a, ka nu chuan, "Lo haw hma tum rawh aw, i pu khi a hniam zual riau a nia" a ti a. 

Kan ranvulh te mamawh lamkhawma motor hire a ni mai. "Aw le" ka ti ve mai bawk. Ka tlanchhuak a, Ka dawr ṭhante dawr lam ka pan nghal. Ka va thlen chuan bungrua a lo thleng thar chu niin hnathawkho an lo vei suau suau a. Pu Marama chuan, "Cham, lo ṭhu ve rih rawh, buai zualpui hi reh phawt teh se, thingpui hâng in ang" a lo ti sawk sawk a. Kan inhre ṭhang tawh bawk a, ka ṭhu ve mai bawk. Thingpui sen hâng min rawn pe nghal zat a, Pu Marama chuan, "Kha in chanchin lah kha an sawi duh phian a, nangni hi rote hi in han laichhuak tak tak te chu a ni êm lo maw?" A ti luam a. Satliah taka nuiin, "Han laichhuak tak tak ni ila, ranvulhin ka la buai peih dawn mawni le" ka lo ti puat. Ani pawh chu a nui hawk hawk. Chutihlai tak chuan a nau tlangval keimah ang rual vel tur, fel leh polite tak mai hi a rawn lut ve a, a hnungah Zopari a rawn kal bawk. Ka insum hman lo ṭhelh a ni. Zopari lah a nui sâng bawk si. Tlangval chuan, "I hmu ve châk sia, hei ka rawn hruai..Zote, hei ka û chu aw" tiin a û leh Zopari a hmelhriattir ta nghal a. Ka chhungril hi a na ngawih ngawih. Zopari hlim nui sângte chu keimah vang a ni lo tih ka chiang nasa mai si. En pawh ka en rei ngam lo, a bialpa tlangval zawk khan min rawn hmuh chuan, "Bungrua i rawn lam leh a ni maw? " A ti luam a. Ka lo bu nghut ringawt. Zopari te nen zinchhuak ho vek kan ni tih a hre vek ngei ang a, Zopari'n a hriatna a hloh tak avangin min hre tawh dawn lo tihte thlengin, mi pangngai a nih chuan min khawngaih ka ring. Kan inngaizawng tih a hre kher dawn lo bawk nen, Zopari pawn min rawn melh zawk a, an ina kan va kal aṭang khan hun a liam leh ta deuh a, min hre leh tawh lo a ni maithei. Rei awm lovin an chhuak ta a, kei pawh ka mamawh ka lamkhawm zung zung a, ka pickup hire a rawn thleng ta bawk nen, kan huan lamah ka tirliam zui ta nghal. Ina haw nghal lovin Kima te inah ka peng kawi a. 

Lehkhabu a lo chhiar mual mual, ani hi zawng sawi leh sawi hnu kan sahâwk lai pawha Pathian bel tlat, nghet tlut mai kha a ni a. Hun a han liam leh deuhah chuan a dinhmun chu a pawm thiam khawpin ka hria. A awhawm ṭhin ngawt mai. A pindanah kan innawr lut a, pakhat ke bai, pakhat ṭhut ngai, kan chhangchhe khawp mai. 

Zopari ka hmuh velte chu ka hrilh ve mawlh mawlh a. Mipa e ti lo chuan hmeichhia anga han inbunruahte hi ka mamawh fô. 

"Ṭhianpa, thlah hlen tawh mai rawh, i ta tura ruat a ni lo a niang. Pawm tum rawh" ka nu ang bawkin a ti ve leh malh malh. 

"Ni e, ka tum alawm. Han dam ṭha ver vawt phawt ila, kawng chu a awm mai ang" ka ti ve mai a. Ka rilru erawh a sak chi a nih avangin ka sawi ang aiin a awlsam dawn lo tih ka hria. Kima chuan, "Mary hi ka khawngaih a ni. Neih tlak nia ka inhriat loh lai hian min ṭhen duh si lo, buaipui ngai reng pasala nei tur chuan ka ui" a ti a. 

"A lo fel em mai,Mary hi, a puitling ka ti lutuk. Amahin a duha a chhungten an remtih phawt a hnu, nei hmiah rawh. Pathian zarah rangkachak leh lunghlu in tihral theihte chuan in damchhungin in rethei tawh nang" ka lo tihpui a. A ngawi vung vung. 

Kima nuin thingpui min rawn pe a, "Chama, nang zawng vanduai vannei i ni. I ke pawh i hmang leh thei mai ang a. Nupui te pawh hi ngaihtuah ve ṭan rawh" a ti ve luam a. 

"Nupui neih pawh a la lang lo, Kima te hi inneihtir vat zawk r'u " ka lo ti a. 

A phur nasa ta mai, "Chu chu alawm, Mary hi e ka duhthusam a ni. Bawiha lah hian a rawn kal changte hian a be ṭha duh lo ziah a, ka ngei a nia." A ti hmuar hmuar a. Kima a ner suk ringawt. A nu kal hnuah, "Ka nu leh ka naute hi Mary zunah an uai a ni ringawt. An lam reng mai a, ka rilru an hrethiam pha tawh si lo" a ti nghut nghut a. Kima rilru chu kei chuan ka hrethiam, amah hi mahni hmasial lo leh midang tana inphal em em a ni a, Wheelchair-a ṭhu reng tawh tur, buaipui ngai tur a ni tih a inhria a, Mary a khawngaih tih a lang. Mahse, Mary'n a iai lo a nih phawt chu nei se ka ti viau thung. Hawn lam ka hnaih ve ta a, Kima te in aṭanga ka chhuah hnuah dawrtê bulah ka ding zuai a, Kikii hawntur thil ka lei..chhuah changa engmah hawn loh chu a hrilhhai hmel hi hmuh a nuam thin lo. Dawr nghaktu chuan pawisa nawi a lo nei daih lo va, "Ka va thleng lawk ang e" tia a piah lawk dawra a kal hlan chuan.."Chama" tia min kotu an awm avangin ka hawilêt vat a. Pu Zaikunga a lo ni reng mai. Makti zetin ka melh a, min rawn pan lai pawh chuan ka lo melh vung vung ringawt. 

"In dam tlang a maw?" Tiin min chibai a. 

"Engtin nge..hetah?" Ka lo ti nawk nawk. A nui suk a, ngui hmel rawn pu lehin, "Mamtea entirin ka rawn kal a nih hi.." a ti chuai raih a. 

"Ngati nge? Eng nâ nge?" Ka ti sawk sawk. 

" a..a natna tak an la hre lo, tlaiah an test result a chhuak dawn a. In haw hnu lawk aṭang khan a taksa ṭhenkhat hi a rawn duk vak zel a, a lu nâ a tih bakah a luakte pawh a luak ṭhin. A taksa a na lai ber sawi thei si lo hian na a ti ṭhin em em a, Champhai damdawi inah ka kalpui a, Aizawl hi pan turin min tia" a ti charh charh a. Min den dan a dang viau mai. Pu Zaia pawh chuan a fapa damlohna chu a tuar viau a nih hmel, a cher kuam a, a dâng bai bawk.

"Chuan, tunah khawiah nge kal i tum?" Ka ti vat a. 

"Saw lai deuhah sawn kan rawn innghat ve a,Fârkawn khawchhuak an nia, chhungkhat nei ta lo chu kan rawn bêl ve ta chawt a, Mamtea thawmhnaw thlakna tur va lak ka tum alawm mawle" a ti mawlh mawlh a. 

"Lo kal rawh, ka va kalpui ang che. " Tiin motor lam ka pan a, ka pawisa kir pawh ka la tawh. A rawn kal ve mai bawk a, an thlen inte in lam chu kan pan ta a. 

"Inla chhuak nghal vek rawh, kan inah i rawn thleng tur a ni. Ka û hi nurse a ni bawk a, chanchin pawh hriat a awlsam ang. " Ka ti zung zung a. 

Inthlahrung deuh hian, "Aa..a chi dawn mawni le. I chhungten min ngaithei lo palh ang e" a ti a. 

"Ka nu leh pate pawn hmuh ve che an châk hle asin. I lo thlen loh chuan ka lawm lo hle zawk ang" ka ti hmiah. A sawi nawi ta bik lo va. A thawmhnaw tam lem lo tak chu a la ta vek a, "Hei, ka nau nen hian kan inhmu fuh a, damdawi in an lo hnaih bawk a, ka insawn rih phawt mai ang .chanchin kan inhrilh zel dawn nia" a ti a. A thlen inte pawh chuan engmah an sawi lem lo. Muangchang lovin kan chhuak leh a, damdawi in lam kan pan rih ta phawt. Ka nu ka bia a, "A ni maw? Lo thleng ngei ngei rawh se" a rawn ti ve luam. Damdawi in kan thlen chuan Mamtea an dahna ward-ah kan lut nghal a. Nurse an lo fel viau mai, a pa awm loh hlanin an lo kawm hlim a lo nia. Mamtea'n min hmuh chuan, chau chung chung hian, "A û.." a lo ti var. Mak ka ti zawk, a lo cher lutuk chu. A vun lah chu a'n dâng êm êm khawp a. Ka va lainat tehreng êm. 

"Na i nei em?" Ka ti a. 

"Nei lo. Mahse, ka luak a chhuak e" a ti niah niah a. Nurse pakhat rawn kalin, "Khawi le, jection leh lawk ang aw. Mamtea hi chu a fel asin aww, a huai a nia aw, apu lo en rawh u" tia thlem pahin a venflonah chuan a kap lut a, a lo dawh ve hle hle mai. Han en reng reng pawn a chau tih hi a hriat ngawih ngawih. Test result a lam theih tawh bawk a, Pu Zaia chuan, "Chama, ka va lam ang e, tikhan lo inawm lawk r'u aw" a ti a. A chhuak nghal. Ka zêp lo, hlauhthawnna hlirin ka khat. Mamtea chuan natna khirh tak a vei a nih ka ring hmiah bawk. 

A pa kal chhung chuan, "Mamte, eng nge i ei châk?" Ka ti a. 

"Ih maw, Artui kan ka ei châk ee" a ti ta reuh a. Ka ṭawng leh hmain, "Lapaw chini pawh ka ei châk" a ti leh a. 

A venflon vuahna bawr lai vûng deuh chulsak pahin, "Zanah ka rawn kensak ang che. Chuan, chaw ei pûk pûk tur aw" ka ti a. A bu nghat mai. Nurse in damdawi a tui an rawn pe leh a, "A tui lo si" a ti ṭiau a. Nurse chuan nelawm zet hian, "Hei chu a tui zawk kha alawm, kha le" tiin a pe a. 

Pu Zaia pawh kawngka a rawn kan ve mêk, chik zetin ka lo en a. A nguiin beidawnna niawm tak pawh ka va hmu tel thei. Ngaihṭha lo em em hian ka lo ngaichâng a. A rawn thlen chuan Mamtea chu enin, "Bawihte, A û nen hian i chawhmeh tur kan zuk la lawk ang aw" tiin a luah a chul a. 

Mamtea pawh chuan, "mm, chuan apa, ih chow ka ei châk" a ti a. "Kan lo lei ang" ka lo ti vat. Kan chhuak ta a. Ward pelh hlekah min dinpui a. A thaw kâwk kâwk, mittui tling pam hian, "Chama, nâ ka ti mang e aw. Mamtea chu a lo cancer a" a ti ta a. Ka lo rinlawk mah nise, a taka a han thlen meuh chuan ka nghing lawih thei. Sawi mai tur ka haihchham a, hnem vak dan lah ka hre si lo. 

"Pa Zai, a va pawi runthlak êm. Khawi maw result chu ka lo en ve hrim hrim ang e" tiin a lehkha ken chu ka laksak a, Ramthanzauva chuan thisen cancer a lo vei reng mai. A hmui khur dar darin, "Phai lam pan turin min tia, mahse, Chama,neih engmah kan nei si lo. Ka fapa hi chân ka duh lo asin. Ka neihchhun a ni" tiin a kun ta tlawk tlawk a. Ka mittui ka khap per leh ta. Pa Zaia te pafa hringnun engkim hre tawhtu tan chuan lainat loh chu har tak a ni. 

"Pa Zai,insum hram hram rawh. Phai lam chu pan dan a awm ang. Kan ro te kha kan tiral ṭêp tawh alawm. Mamtea bulah phei chuan intipachang hram hram rawh" ka ti ve mawlh mawlh a. Ka va khawngaih pafa tehlul êm. Tichuan, zana kal leh tura intiamin ka hawnsan ta rih a. Lapaw chini pawh ka lei nghal. In ka thlen pawh chuan ka ngui lutuk chu an lo hrethiam nghal a. Chanchin ka han sawi chuan pawi an ti ve hle mai, Ka pa chuan, "Pu Khuma zaninah ka lo bia ang e. A ranglamin Pu Zaia thil bik phei chu tihral a ngai a nih chu" a ti sawk sawk a. Chaw pawh tihtham ka ei meuh lo. 

Zanriah ei khamah ka ṭhiante ho ka be kual ta a, Pa Zaia te chanchin ka han sawi chuan pawi an ti khawp a. Mary phei chu a rawn inhnit faih faih mai. Kima'n, "Zopari pawh hian hre ve ngei teh se, keinin kan puih loh chuan chhungkhat tumah a nei si lo " a ti a. 

"Bia u la, nangnin" ka ti ringawt. Mary'n a lo biak tur thu a rawn sawi ta a. Zep nak emaw a hriatna a hloh avang hian kan ṭhian zing aṭangin a hla nghal dâwrh thei. A tan mi thar vek kan ni miau si a. Ka nu artui ka kantir a, tiffinah ka dah a, Mamtea te pafa va hmu leh tur chuan ka chhuak leh nghal. Mary pawn min rawn zui thei dawn e. 

Kan va thlen chuan a venflon vuahna a vun nasat tawh avangin hmun danga vuah an lo tum mêk a. Naupanga thuchâng, a ngik ve faih faih mai. Mary erawh Mamtea hmel a hmuh khan insum zo dawn lova inhriain a tlanchhuak leh daih. Ka hrethiam lutuk tlat. An vuah zawhah ka thil kensak chu ka eitir ta a. Mary pawh a rawn lut tawh. Lapaw chini chu tui ti em em hian a ei a, a natna a hre ve der si lo. Pa Zaia bulah Mamtea hriatthiam loh turin bungrua kan tihral tur thute chu ka sawi nuah nuah a. 

"Kan lo intawng hlawm lovang tih hi ka va hlau êm..in tel lo chuan engmah ka ni lo" a ti ve tawp mai. Khawvelah hian vanduai leh vannei hi chu an lo awm takzet e. Pu Zaia chuan, "Doctor chuan a ranglama phai chu pan turin min ti a, Mahse, ka han ngaihtuah hian Chama, hetiang natna hi chu an thihpui tho tho zelin ka hria. A nunna pawhsei chu duhthusam mah nise; a tawpa min kalsan tho tho chuan eng nge maw a sâwtna ni ang le?" A ti zawi sûp sup a. 

Mary chuan, "Stage engzat nge a nih tawh le" a lo ti vat. Pa Zaia chuan, "Ka hre mai lo. Doctor kha chuan a la ṭantir a ti mai a" a ti ringawt. Nakina la zawh chian chi a nih hmel. 

Inkan hun a tâwp leh ta mai si a. Naktuka kal leh tura intiamin kan hawnsan leh ta. Pa Zaia pawh chhawk ve a ṭha ngawt ang, a rilru leh taksa a hmang rim dawn si. Mary chuan, "Zopari chu ka bia a, 'naktukah ka lo kal ve ang e ' a tia. Amah hian maw engkim hriatchhuah ve hi a duh lutuk a, Pu Zaia te pafa hi hrechhuak thei se ka ti ngawt mai" a ti mial mial a. 

"Bialpa fel deuh a nei" ka ti ringawt. Ka mitmeng danglam a hmuh loh nan hmalam ka melh ngat ngat bawk. 

"Hriatthiam tum rawh" a ti sap a. Chubak han inhnemna a awm lo ve bawk a ni. "Ka hrethiam alawm. A hriatna hi lêt lo law law se a ṭha zawk" ka ti a. Mary ka thlah kual leh hnuah Ngaiha te in lam ka pan ta a. A roomah a awm avangin ka lut ve nghal. Tu emaw nen an lo inbia a, ka lo nghak. Sumdawnna chungchang an sawi niin ka hria, ani hian a sumdawnna kha a la kalpui reng a, a thluak a ṭha bawk a, hma pawh an sawn leh tawh viau. An inbiak zawhah Pa Zaia te chungchang chu kan sawi leh a, naktukah kal ve a tum. Wheelchair-ah ṭhu mah se; Kima anga kal thei lo tawp zawng a ni lo. Mahse, kal rei chi a ni lo thung. 

"Kan bungrua chu tihral vat a ngai tawh a nih hi, ka vai ṭhianpa ka biak kha chuan he lama sumdawng hmelhriat chu a nei ngei mai a, a lo ngaihven tur thu chu a sawi ve kha a" a ti mual mual a . 

"Kei pawh ka pain min buaipuisak dawn a, Pa Zaia thil pawh kan tiral nghal ang " ka lo ti ve a. 

Ngaiha hi a vanduai ve lehna em em chu a bialnu khan a ṭhen ta daih kha a nia, che hleitheilo pasala neih chu a ngam chiah lo te pawh a ni ta ve ang. Damdawi inah vawikhat chu a va kan ve a niawm e. Chubak chu a reh ta vang vang mai a ni. Mihring rilru hi a mak ṭhin mang e, indem hleihtheih ngawt chi pawh a ni lo. Nawmsak hi a hlu ve bawk nen. Ngaiha chu ṭha chhuak leh thei se ka duh khawp mai. 

In ka thlen veleh ka mu nghal. Ka chau nghulh thei mai. Ka chhing sek tawh âwm e, call ka dawng pek a. Ka'n en nâk chuan Zopari a ni reng mai. Makti zetin ka la a. 

"Chama a ni em aw?" A aw thawp sat chuan a rawn ti a. 

"Aw ni e, eng nge ni ta?" Ka ti var. 

"Aa..ih englo, Mary nen kan inbia a, ka hre ve lo naa pu Zaia in tih emawni te kha naktukah tlawh ve ka tum a, kal i tum em ka rawn ti" a ti a. 

"Aw tum e. Ka rualin kal la" ka ti vat. Ka lung lah chu a rawn phu leh dup dup tawh. Ninawm. 

"Aw chu chu a nia, ka rawn call chhan che. Min lo sawm zuai mai la tiraw?" A rawn ti no hnâp a. "Tehreng mai" ka ti vut. 

"Ka hriatchhuah theih loh thilte pawh ka hrechhuak maithei asin. " A rawn tih chuan, "Ni e, i hrechhuak mahna" ka ti ringawt. 

"Ih maw, Cham, thudik min hrilh la, ka hriatna ka hloh hma hian nang leh kei hian inzawmna eng emaw tak kan nei tawh em le?" A rawn tih chuan ka zâm ringawt. Ka chil ka lem khawlh a, "Aaa..i rilru tihbuai ka duh lo. Khalam chu nakinah muangmarin sawi zawk ang" ka ti ringawt. 

"Aw le, mak ka ti ṭhin a, ka hmuh che emaw ka biak che emaw hian ka danglam ziah a" a ti a. Ka bialnu a lo ni tawh tih han hrilh dawt kha ka ngam lo a ni ber e. 

A dah hnu pawh chuan muhil leh thei loin ka ngaihtuah leh ta chiam a. Zopari hriatna hloh vel kha Pa Zaia bulah pawh ka sawi tawh. Biak dan tawk a lo thiam êm ang chu maw. Khua a rawn var a, ka û in Kikii a hau mawlh mawlh chu ka ngaithla reng. Ka û hi a senior tawh bawk a, a strict rem rem khawp mai. Kikii lah harvang leh ninhlei ve tak a lo ni bawk nen, an inhau reng mai a ni. Ka tho va, ka mood a chhe hran lo khawp mai. Chaw pawh a hma ai chuan ka ei tam ta deuh e. Ka û duty tur insiam lai chuan, "Û, naupang ward lam i vil dawn em?" Ka ti a. 

"Aih, Emergency-ah ka awm dawn" a lo tih chuan, "Chupawhnise, Pa Zaia te chu han tlawh ve lawk la. Chawhmeh te saw kensak teh, an la ei lovang" ka ti vat. 

"Aw le" a ti ve mai bawk a. Ka û hi a nghet tawh bawk nen, a hlawh a tam tawh a nia aww..fanu rangkachak chu a ni ve khawpin ka ring. In chhungkhur thuam mawi nan a hmang deuh vek zel lehnghal. Kan inpuitlin hleih deuh zawng a ni e. Ka û kal hnuah ka inbual a, ka inthlak laiin Ngaiha'n min lo bia. Sawm phei ve turin. Vawiin zawng kan kim ve dawn khawp e, Saia pawh a huhoa la râl kan tum nghe nghe. Ka insiam a, mipa hi zawng kan che rang viau ṭhin mai. Zopari te in a hnai ber a, ka lam phei a, a va hmelṭha leh tak. A khal dan a tawk reuh bawk si. Min hmuh chuan a lai ve deuhin ka hria. Kei pawh ka lai. Ngaiha kan sawm phei leh a,. A nauten an rawn kuah phei nul nul. Zopari nen min han hmu dun chu, "Bul kan ṭan thar leh ta ni maw?" A'n ti ngawt a. Ka nui pût pût ringawt. Mary a rawn chuan ve hnuah damdawi in lam ding takin kan pan ta nghal a. 

Pa Zaia te pafa kan va hmachhawn leh chu Ngaiha leh Zopari te chuan an lainat hmel ngang mai. Mamtea lah chuan an ina kan awm lai khan a lo ngaina tawh nen, Zopari chu lo banin, "A û, i lo va kal har ve" a lo ti reuh a. Zopari mitmeng buai nak chu ka hmu thei. A kuah ve vat a, "Nia, ka buai ve lutuk a. Nâ i nei em? Ei châk te i nei em?" A ti sawk sawk. 

"Aih, nei lo..ih, ka luak leh a" a ti chuai raih. Nitin mai hian a hniam telh telh mai niin ka hria. Ka û khan chawhmeh chu a lo han pe a lo nia. Pa Zaia pawn fel a tih thu te a sawi ve luam mai. Mary nen doctor kan va hmu ta a. Mamtea chungchangte leh a stage a san tawh leh tawh lohte kan zawt a, "A la sang lem lo naa, zep loh chuan thisen cancer hi zawng cancer dang ang hi a ni ṭhin lo va. Zemabawk lamah pawh inenkawl theih chu a la ni rih ang, an pafa chauha khawsa an ni si a, phai lam pawh kha ka sawi hmuh ngawt tak naa, an tan a harsat ka ring leh deuh si. An lainatawm pafa khawp mai" a ti charh charh a. Zemabawk lama ro tihral hma awm theih chu a zia viau ang. Kan kuta innghat an ni a, a tawp thlenga puih kan tumruh viau. Doctor kan ngenna angin chawhnu lama insuan phei nghal rum rum chu kan titlu ta a. Zemabawk lam pawh kan be pawp tawh. 

Pa Zaia pawh kan ruahmanna kan hrilh a, a e aw ve vek mai. Tunah pawh pawisa hi an ngah ka ring miah lo, ka nu a bengvar bawk a, ₹10000 min ahchhuahtir chu a ruk deuhin ka pe ta a. Kei aiin Ngaiha'n a nachang a lo hre hmasa, ₹20000 lai mai a lo pe tawh a lo nia. Pu Zaia lawm leh hrilhhai bawk si chu nui chungin ka thlir reng. Mamtea leh Zopari te erawh an inngheng chawt mai. Zopari pawn hrechhuak thei mah suh se la; chutitaka amah ngainaa nêltu chu a duat ve viau mai. Tichuan, chhuak mai thei turin kan insingsa ṭan ta a. Bungrua an ngah lo bawk a, kan inpeih vat mai. Ka zung zo ka va lut leh chu Zopari an lo dawm laih laih mai, hmanhmawh zeta va panin, "Ngati nge?" Ka ti nghal tuar. 

Mary'n, "A lu a na a ti" a lo ti vat a. Zopari chuan a bek tawn tawn a dawm a, a mittui a hnâm bawk, "A na lutuk, a nâ" a ti sêp sep. 

Nurse ka ko vat a, "Khawngaihin nachhawknain jection mai teh u" ka ti tawp. "Chutia en hmasa lo va chiu tawp te chu" an ti naa. Zopari chuan, "Ka lu hi a keh mai dawn, khawngaihin min chiu mai teh u" a rawn ti ṭiau a. Nurse senior deuh lo awm ve chuan, "Jection mai rawh u" a lo ti mial. Chuti tehthuta Zopari lu han na ta chuan ngaih a tiṭha lo mang e. An han chiu ta a, Mamtea lah chuan hlauhthawn hmel tak hian a lo thlir ran mai. Mary chuan zawi sap hian, "A mak hle mai, Mamtea thil sawi vang kha mawni le ka ti" a ti a. 

"Eng nge a sawi" ka lo ti vat. 

"A û, hmanniah apain sakhi a awk leh a, ka lo hrechhuak che u a" a tia, Zopari hmel a danglam nghal, chuan a lu kha chawplehchilhin a rawn na ta bawk a nih kha" a ti a. 

"Chu! A hriatna a rawn kir leh dawn tihna em ni?" Ka ti a. 

"Ka hre lo. Memory loss te hian an nunhlui an hriatchhuah dawn hian an lu a na vak zel an tih chu ka hre tawh" a ti niah niah. Beiseina ka nei, mahse, ka hlauthawng tho. Nachhawknain a chhawk ṭan ta a niang, Zopari pawh a rawn harh chho ṭan a. A mitmeng erawh a fîm tehchiam lo. A ni rûai mai. A hawi kual a, Ngaiha a melh a, a dawtah Pa Zaia..kei chu a tawp berah min melh ding ta ngat ngat a. Kei pawn ka lo melh let ve char char. Boruak chu a uap nge a vawt zawk nge, ka sawithiam lo. Chutah Zopari chuan, "Mumang angin khang kha ka hria. Zantin hian ka mumangah ramhnuaiah ka lo vak ṭhin a, thlan ang deuh bulah te hian ka tei ka tei ṭhin. Ka hun lo hman tawh dan a nih ka ring a, mahse, Doctor ten ngaihtuah vak vak an remtih loh avangin ka insûm ṭhin. Tunah hian khawngaihin ka lakah zêp nei loin min han hrilh tawh teh u. " A ti ta a. Kan inmelh hrek hrek ringawt. Mamtea chuan hrilhhai hmel fê hian Zopari chal chu a dawm a, "A u, a dam tawh ami?" A ti a. 

Nui chungin, "Umm, a dam vek tawh. Mamte, in inah khan sakhi sa kha kan ei tawh tiraw?" A ti siam siam a. 

"Umm, a pain sakhi chek a siam a, tui in tih êm kha..chuanin ih, hotel aṭang pawn kan tlanchhia a, kawngpui lamah kan bawhvah chhoh te kha..kha khan ka zun a chhuak lutuk a, ka sawi ngam si lo va" a ti ta mial mial mai. Zopari chuan a ngaithla uluk kher mai. 

Ngaiha'n, "Engpawhnise, Zopar, Pa Zaia te hi va hruai phawt ila, muangmarin i hriat duh chu kan sawi dawn nia" a ti ta a. Kan pawm tlâng e. Tichuan, Zemabawk Cancer Hospital lam panin kan tlanchhuak leh ta a. Kan han indah lut fel a, Pa Zaia chuan inbual emaw hahchawlhte a duh ve dawn êma ka hriat avangin, "Zanin chu ka lo riahpui mai dawn mi niang? Chawl hahdam ve la" ka ti a.

"Ka tel loin a muhil thei lovang. " A ti tlat si, ka ring tho mai. Pafa azawnga inngai ber kha an ni miau a le..an mamawh tur ang angte kan leisak liam liam a, A tuka tlawh leh turin kan hawnsan ta a ni. Ngaiha rawt angin Zopari te huan, Alexander gardenah kan kal ta a. A la tlai chhe lem lo. 

Mi tam lohna laiah ṭhu khawmin Zopari chu kan melh ta ṭhap. A zâm hlein ka hria. "Aw le, tikhan engkim chu min han hrilh tawh teh u" a ti a. A aw pawh a ri chang chang chauh a ni. Ngaiha a phanchang ber chuan Sir Dinsanga aṭanga ṭanin a chinchhuakin kan zinkawngte chu a sawi ta malh malh a. Zopari mitmeng a buai leh nak ṭhin, a tawpah, "Chama nen hian in induh a, mahse, engkim i theihnghilh ta vek si a, Chama hi a lainatawm khawp mai" a ti nghe nghe. Nuam lo ka ti lek lek. Boruak chu a reh duk a, Zopari chuan ral hla deuha tlang inkhawh zûi lam chu a thlir dauh dauh. A rilruah eng nge awm ang aw..

Chutah thawk la hawkin, "Ka hre thei rei ruai e. A tirah khan engkim kha sawi ni ula, kan intihrehawm rei lo ni mai tur..tunhnaitêah hian ka sawi tawh ang khan eng emaw mak deuh deuh hi mumang ang ruaia hmuh ka nei ṭhin a. Ka inrinhlelh phah rêng bawk. Ka chhungte erawh chuan inngaihtuah hah lo turin min ti thung. Engpawhnise, ka lawm e. Min ensan mai lovin tihian min la ngaihven zui zel a.." a ti mawlh mawlh a. Boruak pawh a nuam leh ta deuh. A hriatna tak chu kir lo mah se; a hriatna hloh hmaa a awmdan a hrechhuak ringawt pawh chu a lawmawmah ngai teh ang. Kei chu min rawn enin, "Cham, pawi ka ti lutuk. Ka hmuh chea ka danglam ziah chhan ka hre tawh, mahse, Remruata nen thu kan lo thlung tawh si a" a ti ta a. A mi den dan a nat chu thuhran, ka zak. 

Nui luiin, "A ho lutuk, accident a nia, ka hrethiam vek alawm. Hlim taka i awm hi a ṭha ber" ka ti ta ngawt a. Lehlamah Zopari chu a ngaihsanawm tho mai, Remruata nen an inzui tawh si a, keimah vanga an inkar a chhiat kha ka duh bik lo. Tlangval fel tak a ni bawk nen. Ka ṭhiante pawh chuan nuam lo ka ti ang tih hrethiamin hawn an rawt ta vat a. 

Zopari erawh an huanah chuan la awm hnufual a ngaih avangin kan rualin a haw ta lo. Kalkawngah chuan Ngaiha leh Mary ten min fuih phei mial mial a, "I tana Pathian ruat a ni lo a niang e, i tana ruat chu a hun takah a rawn lang mai ang" tih ten min fuih a, kei pawh rilru siamfel nan ka hmang thei ngei ang. A hma kha chuan a hriatna a neih let leh hunah midang ka lo neih daih chuan tiin ka ngaichâng kha a nia. Mahse, tunah chuan a hriatna neikir vek lo mahse, ka tan a rem dawn chuang lo tih ka hriatna chuan beiseina a nuai bo a, hmalam ka pansan thei tawh ang chu..nge mawle ka phutâwk zawng an piang ve âwm êm mai. 

In ka thlen chuan ka nuin, "I pa Zaia chu a hahte pawh hahchawl ve se la. " A lo ti var a. 

."Mamtea sawn a ngai lutuk a, kalsan ngam a ni lo a ni" ka ti ringawt. "Rawng pawh ka bawl zo tawh a, chawhmeh i va pe lawk dawn em mawni le" a la ti zui. 

"Aa..zanin hmeh tur chu kan leisak nual a, naktuk aṭangin kan kensak zawk dawn nia" ka ti a. Ka chau riau. 

"Phone a nei lo hi a buaithlak mang e. " Ka nuin a tih chuan, "Ni dawn tak, ka û phone hlui kha in la dah ṭha em?" Ka ti hluai a. 

"E ni dawn tak, dah ṭha e. Kensak tak teh, sim card erawh lei a ngai ang" a ti zung zung. 

Zanriah ei laiin ka pain, "Pu Khuma chuan zaninah a rawn en dawn a. Fimkhur thuhlaah inleng neih a rem lovang" a ti a. 

"Ni e, thehthang vat vat teh ang u. A buaithlak" ka lo ti hluk. 

Zanah chuan ka pa sawi angin pu Khuma chu a rawn lang ta a. Mi an lo luh thut a hlauhawm avangin ka pate roomah kan lut dial. Kan han phawrh a, a'n en kual vel a, lens hmang ten a han thlek kual vel thul. A chîk ngang mai. 

A thaw hak a, "Ekhai! A man a tlawm thei lo hrim hrim.. " a ti ro hak a. Ani hian kan rote chu a commission dawn tihna a nih ber chu! A hlawkna tam zawk a tel maithei a ni. Man a tawk erawh chuan engkim chân a ni mai. 

"Fimkhur thuhlaah a vai vai chuan i ti rih lovang u. He ti chin hi ka'n keng phawt ang a. Nakinah receipt leh thil dang tihfel ngai pawh kan ti dawn nia. " A ti leh a. Ngaih a ngam ta deuh e. 

Mahse, a mak khawp mai, ka rilruah ro hian hmun a chang thei tawh hlawl lo. Chhiatna thlentuah ka ngai a ni ber. He thil vanga hrehawm leh tawrhna ka hmachhawn te, Zopari ka chân dante ka ngaihtuah phei chuan ka haw hlur thei hial. Pu Zaia te avang chauhin ka buaipui a ni deuh ber. Heta kawl reng lah a hlauhawm ve bawk si. 

Ka mutui ta phian a. Ka lawm hle. Ka hmai phih lai chuan chanchinthar an puan chu ka ngaithla pah a. "Hriangpui khua hi in 70 vel awmna a ni a, hmuchhuaktu te hian cancer damdawi chi khat, Hnaidam an zawnna lamah he khaw mak tak hi an va hmuchhuak ta a ni. Tlawhpawh an duh loh avangin an lo man a, an khua aṭanga chhuah an phal tawh lo. Amaherawhchu, ni 10 lai an awm ve hnuah an Burma rama mamawh an lam hlanin engtin tin emaw an rawn tlanchhuak thei ta hlauh a ni. He thil hian sawrkar beng pawh a thleng tawh a, hmalak dan tur ruahmanna siam turin vawiin chawhnu dar 2-ah hian Meeting koh a ni" tih thu chuan min din khawngtir reng mai. Ka nu chuan, "Eng nge a?" A lo ti hû a. Ka chhungte bulah takngial pawh Hriangpui khua ka sawi lo. 

"Eng ni lo ve" ka ti sup. Ka mitthlaah U Kawla leh Ṭhianga te an rawn lang nghal uaih uaih. A tawpa tawpah chuan an inthukru hlen thei ta bik lo a nih chu..ka khawngaih nge ka lawm pawh ka hrethiam lo. Khaw thuhrûk kha Zoram pumah hriat a ni dawn ta chu a nia. Engtintak khawsa zel ang maw..

Kima pawn min rawn be nghal. "Ka khawngaih êm mai" a rawn ti. 

Rilrua vei nei rûn chungin Pa Zaia te pafa va hmu leh tur chuan ka insiam leh ta a, Ran chaw pawh lei leh tawh a ngai. An heh ve reuh tawh khawp a. Ka û phone hlui chu ka keng bawk, bazarah sim card ka lei nghal a, tihi chuan Pa Zaia nen kan inbepawp thei zel tawh ang a, kan buai lo deuh ang chu. Ka va thlen chuan Mamtea chuan a taksa na a tih avangin an lo jection dawn mêk. A tal et et a, a ner nâng bawk. A ṭap duh miah lo thung. A pain lainat hmel zetin a thlir ran a, kei pawn ka melh tlawk tlawk. Naupang tawrh atan zawng a na lua a ni. An chiu zawh chuan a zawi hnawk a, a mu hle hle mai. Phone chu Pa Zaia ka pe a, a khawih dan ka zirtir nghal bawk. A thawmhnaw ka kensak bawk a, ka awm chhungin a va inbualfai ve a, Mamtea pawh a muhil thei hram , a muhil thaw sâk sâk te chu ka lo melh leh vawng vawng ṭhin. Natna chimawm tak cancer hian nunna a la la hnem tawh zozai êm aw. 

Ran chaw lei ka la ngaih si avangin tlaiah chaw kensak tura intiamin ka chhuahsan leh ta phawt a. Ran chaw an load mawlh mawlh lai chuan nula pahnih lian lo ve takte hi an rawn nui phei bawrh bawrh a, ka zawn an thlen chuan ka hnaih lama ding chuan lungtê a rap hrual nge ni, a tlu tur chuan mi rawn nêk sawk mai a, ka lo dawm ve vat. Sam tawi, ngo zet mai, hmel fiah kek kawk mai a ni a..ka hamhaih chhungin, "Ka tihpalh lutuk aw" a ti sep a. A aw chu a mawi hrep. 

"A ho lutuk" tiin ka thlah a. 

"A nih aw" tiin an kal zui nghal. Bungraw load mek tlangval pakhat chuan, "A va hmelṭha reuh ve" a lo ti..ka nui huk ringawt. 

Huan lamah ka zuk kal a, Hriata te pawn an hna an lo thawk ṭha hle mai. Ka han thlir kual a, lung zawng a awi e. Vawk pawh hralhchhuah tham an awm fur tawh a, ka zin hlan khan ka ui Rimtuia'n parvo a lo vei ve a, a lo boral daih mai a, ka tuar na ve hle nghe nghe. Tlai lamah tihtur ka neih avangin ka hawnsan leh ta phawt. Karleh aṭang chuan huan lama hun hman tam pawh a ngaiin ka hria. Zopari leh Remruata te inzui det det ka la hmu zui a! Mood chu a khawih ve dat thei. Mahse, hmalam pan tur ka ni tlat. Tlaiah Pa Zaia te chawhmeh tur kengin bike zawkin ka va phei leh a, tunhnaiah ka vei tuak zing ve ta khawp mai. Mamtea pawh a harh ṭha e. An chaw ei chhungin kan veng pa Pu Chhunga ka va tlawh ve a, ani hi pumpui cancer a ni.

Pu Zaia te eikhamah tiffin te chu khawm lehin hawn ka tum a, Mamtea nen kan inbye bye lauh lauh mai. Ka chhuak chiah tihin pindan pakhat aṭangin vawiina ka nula hmuh kha a rawn chhuak ve chiah, kan inmelh a, kan innuih ringawt. Mipa zawk ka ni bawk a, "I haw dawn mi?" Ka ti a. 

"Umm nih hi, nang pawh" a ti a. Ka lo chhang vat. Step thui lotê kan zawh chhungin a hming leh a number ka hre thei ta. Ka neih theih dan erawh ka sawi lovang. A hming chu Lawmpuii a ni. Zarkawta khawsa an ni bawk. Ka be zui chiang ang chu aw..ka nun a tuihal miau alawm le. 

Ka han mu chu Lawmpuii pawh be leh ta chuang lo chuan thil hrang hrang ka ngaihtuah leh a, U Kawla te awm zel dan tur te, Mamtea dam theih dan tur te ka ngaihtuah nasa. Ka lo inngaihtuah muhil daih a. Mumang ka nei leh ta. Ka mumang hian awmzia a nei zel tih chu kan hriat kha..

Saia nen a thlân chungah kan lo ding a, thli a thaw vûk vûk bawk. Saia chu a damlai hmel ang tho kha a ni. 

"Ṭhianpa, pawi a zawnga pawi ber mai kan lo ti kha a pawi takzet a ni. Ka thlarau hian hahchawlhna a la hmu thei lo. Kha Leiruangtuam khan anchhia a kengtel a ni. Nangni a la dama te pawh hian khang ro te kha a hmun ngaia indah let leh lo a nih chuan, vanduainain a zui zel ang che u. Pûk-a ro te erawh in nei thei ang. Ṭhianpa, min khawngaih la, ka chhungte kawl mek Leiruangtuam chhulchhuak lunghlu leh rangkachak te kha a hmun ngaiah min dahsak leh ta che u. Ka chhungten keimah vanga vanduaina an tawk tur hi ka ngaingam lo. Min khawngaih rawh.." a ti ngawih ngawih a. A sawi zawh rualin ring lutukin ṭêk a rawn tla a, Saia a bo nghal a, kei pawh ka harh nghal. A lo thim mup a, zing dar 2:36 chiah chiah a ni. 

Ka phone banin flashlight ka on a.

"Saia…mumang satliah a ni em?" Ka ti zawi sup. 

(Season 2 a awm turah ngai ang aw. A laklawha ka tihtawp chhan chu kan khuaah ka haw a, ka inziak khawl thei rih lo. Bakah he thawnthu hi a sei telh telh a ngai tlat. Boss Amanda kan hrût zawhah season 2 kan tichhuak ang. Romantic a tel tawh ang aw 😍