Leiruangtuam 6

LEIRÛANGTUAM (6)

Ziaktu : Toni Râlte

Thawm siam tam thei lo ang berin kan kal ta zel a. Zan dar 9 velah tuikhawhthla khân chu kan pawh dawn ta. Mahse, thing thelh hmunah chuan kan ngaichâng ta ṭhap a. Mi 10 rual vel dawn lai an ni. Mei lah chu an vur belh sauh sauh lehnghal a, an titi ve nak nak bawk. Tihnat theih loh angah an inngai deuh a ni maithei, min tam hneh bawk nen. 

Ngaiha'n , "Tisawn a theih chen chen nghak ila, inthlahdah hun zawng an nei em em ang" a ti sup a. Mahse, chu thila innghah ngawt pawh chuan awmzia a nei thui tehchiam lo. Lêt leh ngawt chi lah a ni si lo. 

Kawla melh zauhin, "U Kawl, min pui duh ang em?" Ka ti zawi sup a. Min rawn enin, "Engtin?" A ti hû a. 

An mei alh teng teng thlir pahin, "An bulah sawn va kalin Hlaimual rama khân dang kan zawn thu i sawi thei, Sawma leh Thangruaia ten min umzui mêk thu leh midang hrilh tura i rawn kir thu sawiin" ka ti ta a. Ṭhiante chuan, "I va ngaihtuah chhuak ṭha ve" an ti sap sap a. Ka fin vang pawh a ni lo, chubak kawng dang neiin ka inhre lo a ni. Kawla chu inngaihtuah nasat hmel deuhin a ngawi vung vung a. Thawk la leh halhin, "Tichuan, Hlaimual lama thawk chhuak nghal turin ka sawm dawn tihna em ni?" A ti a. Ka lo bu nghut. 

"Pahnih khat tal chu Khân veng tur an dah tho vang, mahse, chinfel dan a awm ang" tiin a tho ta ṭhem ṭhem a, Saia'n min lo kheuh zeuhin, "A rintlak ang maw?" A ti ro hak. An rilru tur chu ka hrethiam tho mai. Mahse, tun dinhmunah chuan Kawlkunga chu kan rinngam a ngai tlat. Chutiang a nih loh chuan tlaivar zakin an duty dawn, silai an nei bawk si, min kap hreh dawn hauh si lo. Kawla chu a dara beng thakin, a mitah tak ka melh chat a, "U Kawl, ka ring che a nia. " Ka ti nghet charh. 

"Engkim a ṭha ang" a lo ti ve zat. Mual letliamah chuan a pil bo zui ta a. Sava chiar nak nak thawm karah sakhi huk ri niawm tak te, a hmaa sai khek ri kan hriat tawh thawm niawm takte chu a inpawlh chho nawk nawk mai. Perhpawng chiri thawmin a rawn pawlh ve zauh zauh bawk. Mei êng lam pana dul nel nel chu kan thlir thap a, Sawmliana chuan, "Khaw miten thudik an hriat hunah kei leh Kawla chung chu a rip ngawt ang" a ti nghut. Ngaiha'n, "Min lo zui ve mai rawh u" a lo ti vat. Kha chen kan lo inzui ve tawh nen, kan lo inngaina ve tak tak tawh a nih hmel. Tihhlum pawh ngai se, Kawla leh Sawma te chungah chuan kut kan lek theih ka ring tawh lo. Chutiang chiahin an ni pawn min man ta pawh nise, min nghaisak theih ka ring lo bawk. 

Sawma chuan, "Ram dang han fan chu a châkawm chang zawng a awm thin ngei alawm. Mahse, rilruah hian inthiam lohna ril tak a awm tlat a ni. Kha chen Hriangpui tan kan lo bei ve tawh si a" a ti mawlh mawlh. A rilru tur chu ka hrethiam tho mai. Tuikhawhthla pûk chhuahna bula mei alh chu a êng deuh sawt hian a lang a, an vei nuk nuk bawk. Inhrosa thawm niawm tak pawh kan hre thei. Kawla chuan a hna a va hlen ta a ni ngei mai. Kar lovah meichher nen kan awmna lam panin an rawn inzui phei ta diah diah mai. Chuveleh mual pâwng aṭang chuan chhukin chhim lamah kan inzui ta hlawk hlawk a. An meichher eng chuan a en zau thei dawn chuang lo bawk a, kal hlat vak kan tum lem lo. Hnim pik ṭul lo awmah chuan lutin kan bawkphêk ta ran hlawm a. Sawma pawh venthawn thilthuah a au thut loh nan inring ranin Ngaiha nen kan karcheh bawk. An rawn hnai ta telh telh a, an ṭawng lawng lâwng mai. 

"Fing an inti ve viau a ni maw? Mai mai a,. Khawi lai khân mah an hmu lo'ng e. Kan nangching hman ang" an ti lûng lûng a, an piah lawkah kan awm reng tih an hre hauh si lo. An vaiin meichher keng chu 8 an ni, an kim ang em aw. An rawn kal vek chu ka ring chiah lo. Kawla pawh chu a rawn tel ve a, meichher a keng ve lo thung. A zui ve ta zel a, mahse, a rawn lêt leh ka beisei. An thawm reh hnu thleng chuan kan bawkphêk ta reng a, Tuikhawhthla lamah pawh mei êng chu a la awm reng. Hmm, awm chu an awm ngei a nih hmel. Mahse, kan paltlang thei ngei ang. Darkar chanve âwm velah Kawla chu thaw hlawi hlawiin a rawn thleng ta a. Kan lawm tlâng hle. 

"Ṭhianga leh Ramzauva an la awm" hah hmel zet hian a ti a.

"Ṭhianga chu ka awmna te tlangval kha maw!" Ka lo ti var a. 

"Aw ni chiang e. Eng ruahmanna nge in neih tak le?" A ti ta a. 

"Ṭhianga awmpui chu eng mi nge?" Ka ti leh zel. 

"Ṭhianga ṭhianpa ber a nia, tlangval fel leh tlawmngai tak a ni" a ti ve mai bawk a. Beiseina ka nei ta tlat mai. A atthlak pawh a ni maithei, mahse, ka chhungrila beiseina chu a lian telh telh thung si. 

Ka ṭhiante bulah chuan, "Ṭhianga kha mi ṭha tak, ṭhian anga min en thei mai a ni a, nula pawh min rimpuia zawlbukah pawh min riahpui nghaltu a ni a. Min khawngaih theih ka beisei ta tlat mai. " Ka ti ta phawng a. Sawi tur hriat loh hmel takin min melh ralh ralh ringawt. Sawma chuan, "Thil thleng thei chu a ni reng mai" a lo ti ve sup. 

"Ti r'u, kal ang u. Ka beiseina hi a thlen dik ngei ka ring tlat a ni" tih leh kal ka rual ta hmiah, min rawn zui ve mai bawk.

Kâr lovah an mei chhemna bul chu kan va thleng ta a. Ramzauva chuan, "Kha! Tu te nge in nih? In rawn hnaih leh chuan ka kap dawn che u a nia" a rawn ti khur khur a. Mahse, kan pan zel tho. Mei êng chinah chuan dingin Ramzaua leh Ṭhianga meng kâwk pawh chu kan va hmu nghal. Mak an ti hle tih a lang. Mahse, "Lawkin, Thiante u, keimahni kan ni e. Ṭhianga, khawngaihin min kap suh u. Kan hlauhawm loh e. Tin, in mi leh sa kan kawl bawk" ka ti ta a. Kan kal hnai pah zel bawk. A mak lutuk, hlauhna engmah ka nei lo. Ṭhianga chuan, "Chama, in timak hle mai maw? Hetianga in chet hi kan ring lo asin. Ka pa pawh a lawm vak lo a nia" ṭawngkam nêm lam hian a ti a. 

"A dik alawm, in chhungkua kha ka lakah in ṭha êm a, a zah pawh ka zah khawp mai che u, mahse, Han ngaihtuah ve mah teh, kan damchhunga in sala kan han tang tur chu, chhungte pawh kan nei ve asin. Tunah pawh hian min ngaihtuah tawh ngawt ang. Khatiang zawng khan min han ngaihtuahpui ve teh u. Misual tak in ni lo tih ka hria" tiin ka han thawi kual a. Ṭhianga chuan silai kha a chuh ve lo hrim hrim sa, Ramzauva chuan, "Lal thupek a ni a, kan zawm lo thei lo" a ti mauh mai si. 

Ngaiha chuan, Kawla chu a chempuia tinin, "I ngam phawt chuan min kap rawh, damin in haw vek bik lovang" a ti hmiah mai. 

Ṭhianga chuan, "Ngawi teh u, ṭhiante u, a zaizâp zawngin kal teh ang u. Chama, kan kaltir che u a nih chuan lalin hre ta se, hremna kan hmu ngei dawn asin. Chuvang chuan lo haw leh phawt mai teh u" tiin ngenna a siam a. 

Sawmliana'n, "Ṭhianga, i kaltir mai teh ang u. Kan nunna hi an kutah a awm a nia. Engmah an sawi lovang, kha chen kha min man tawh a, misual an ni lo. An khuaa hawn an duh mai chauh a ni".. a rawn ti ve ta tlat. Ramzauva leh Ṭhianga te chu an inmelh rulh a, an rilru a buai ve hmel viau. 

Ramzauva chuan, "Mahse, kan kaltir dawn a nih pawhin ro inruk kha chu hnutchhiah rawh u" a la ti hrâm. 

Ka ṭawng hmain Kima'n, "Kan ru awzawng lo, keimahni laihchhuah, kan thawhrah ngei kan la a ni zawk e. Kan ta, kan ro a ni tlat" a lo ti nghut nghut. A sawi dik chiah bawk si. 

Kawla chuan, "Ṭhianga, i kaltir mai ang u. Tin, tunah hian Burma sipai kan ram chhungah an rawn lut a nia. Kan ngaihthah a thiang lovang. " A lo ti ve bawk. Ṭhianga mitmeng leh cheziaah chuan tuang tichhah tlat tur angin a lang lo, Ramzauva zawk chu an vengthâwng niin a lang. 

Ṭhianga chuan, "Engtin nge niang? Kan mi leh sa an kutah an awm bawk si. Lalin a hre kher nang.." tiin Ramzauva chu a han bekbawr a, rilru hmin loh hmel zet hian, "A hriatchhuah leh si chuan mawh in phur ang. A ṭha em?" A ti deuh hmuk a. Kawla ngaihdan ni ta lo chuan, "Ramzau, i nunna chhana keipui hliam hmaa ding tawh ka ni tih kha i theihnghilh ta em ni? Tunah an kutah Sawmliana nen kan awm a. Kan nunna hi an duh chuan an la thei, silai in kawl avang ngawt khan i thla timuang suh. I tana thih pawh huama lo chhanhim tawhtu che hetianga min pal mai mai hi ka lawm miah lo a nia" a ti ta khur khur mai. 

Ramzauva pawh chu chawp leh chilhin a danglam nghal, inthiam loh hmel deuh hian, "Chutiang zawngin ngai suh, ka ngaihpawimawh loh vang che u a ni lo. Lal leh upa ten an hriatchhuah ka hlauh vang zawk a ni" a ti ta chul a. Kan tlang thei dawn a nih hmel e. Ṭhianga chu ka bulah rawn kalin, "Chama, misual in ni lo tih ka chiang alawm. Amaherawhchu, kan lal thupek zawm lova kan kaltir che u a nih pawhin kan khaw thuhrûk chungchâng hi tuma bula min sawisak loh intiam ve rawh u" a ti dap dap a. Zahawm ka ti mang e aw. 

A mitah tak melhin, "Ṭhianpa, ka lawm e. I pa hmingin thu ka tiam e, khawiahmah kan sawi chhuak lovang.." ka ti nghet ta charh a. Min ring tih hriat takin ka dar a rawn hmer zauh. Inhrethiam taka lu inbukkhum tawnin puk lam chu kan pan ta a. 

Kawla'n, "Ṭhiante u, himdam takin va kal ta u la, tluang takin in ram in thleng dawn nia" a ti a. Ngaiha te hoin Kawla leh Sawma chu lawmthu an hrilh mawlh mawlh, Keipawn Kawla bulah an silai kan phumbona lai chu ka hrilh ta a, an tan silai a hlu êm a tin ni. An ni pawn va lak leh ngei an tum thu an sawi. 

Chutia kan inthlah liam liam lai chuan, meichher chhia kan lam rawn pan kan hmu ta tlat mai. Chhei! An rawn lêt leh tihna em ni ang? Silai a puak thuai a, kan bawk nghal thlawp, kan piah deuha thingkung chu a va deng fua mai. Ui bauh thawm pawh kan hre leh ta. Kawla'n, "Burma sipai kha an nih saw, min rawn nanchin hmain kal vat ang" tih leh hmalam pan a rual nghal, rilru chiâi tak chungin kan umzui ve ta hlawk hlawk a. Ṭhianga te pawh an rawn kal ve zel. Pûk kan luh zawh hnuah Ṭhianga leh Ramzauva te chuan pûk chhung kil khat laia lung lian ve tawk tak chu zawnin pûk luhna zâwnah chuan an va hûng ta a. Chu chu khân an danpinna kha a lo ni. Puk chu zawh zelin tuikhawhthla ri pawh kan hre thei ta. Tuikhawhthla kan va chuan chhuah chuan, "Tikhan kal ula, keini chu kan lêt leh ang e" Ṭhianga chuan a ti a. 

"Ni lo ve, burma sipai khan an châng reng dawn che u, reitak in biru thei dawn lo, mi lo zui phawt rawh u" kan lo ti tliar tliar. Kawla pawh chuan, "Duhthlang thei kan nih rih loh hi, i chhuak ve chawm mai teh ang u. Khawvar hunah kan lêt leh dawn nia" a lo ti ve bawk si. Ṭhianga te pawh chuan hnial ta bik loin tuikhawhthla kara mihring leng tawk lek kuaah chuan kan inzui chhuak ta diah diah a. Lui kamah chuan khua nghah tlaivar mai kan titlu ta a ni. Zing dar 2 a ri dawn e. Ril pawh a ṭâm leh ṭan tawh. Mei kan chhem hluah a, a lo vawt suk bawk nen, kan âi tlang ta a. 

Ramzauva chuan, "Engti tiha Burma sipai chu kan ram chhunga rawn tla lut nge maw an nih le? Hlaimual lam aṭanga rawn chhuk an ni ngei ang le" a ti suam suam a. 

Sawmliana'n, "Sa hnu an chhui emaw kha ka lo tia, kan mei êng an hmuh khan min rawn pan thâwr a nih ka ring" a lo ti ve bawk. Zopari nen kan inngheng rial a, a chauh reuh êm avangin ka malchungah ka muthilhtir ta a. Kei erawh rin ai takin ka harh. Saia leh Mary te pawh an muhil ta bawrh bawrh a. Tuikhawhthla thawm a rin avangin min rawn zui leh zui loh hriat theih pawh a ni lo. Mahse, pûka kan luhthlak lai kha min rawn hmu hman lovin ka hria a, tin, lungphek khan a lo dal ngei dawn a, a landan mai chuan pûk ni loin lung bang ang kha a ni mai dawn a, an rawn kal zel chu ka ring lo ve tawp. 

Tichuan, muthlu lâwp lâwp chungin khua pawh kan nghak var ve ta mai. Hriangpui ramchhung kan chhuahsan thei chu lawm taktê hian kan lawm a ni tawp. Ti hi chuan Zokhawthar lam pan ding nghal vang vang ila, remchâng hmasa berah Aizawla chhuk a ni tawh mai. Kan phone kha min chhuhsak vek avang khan an dahna mai kan hre tawh si lo. Kan chân a nih ber chu, mahse, nunna aiin a hlu lo zawk. Khua a rawn var fel takah chuan Ṭhianga te chuan an khaw ram lam pan an tum leh ta a, Kawla inngaihtuah vung vung zel ka hmuh hian rawn kal ve a châk a nih ka ring, a ruk deuhin, "Lo kal ve mai rawh. Nuam i ti zawk ang" tiin ka sawm a. 

Rilru buai hmel tak hian, "Zep nak emaw kan khaw ram ringawt hi duhkhawp loh chang ka nei ve ṭhin, va haw ila nunphung pangngai leh bawk kha a niang a, a ninawm ve deuh ṭhin. Thil thar han hmuh leh han tawn chu a châkawm ve reng. Mahse, chhungkua ngaihtuah a ngai bawk sia" a ti nuah nuah. A rilru a siamfel hleithei lo a nih ber chu. 

Ṭhianga te chuan, "Kawla leh Sawma pawh in chhuah zalên ve tawh ang chu tiru? Kan haw vat loh chuan an ngaih a ṭha lo ang e, i haw ang u hmiang" an ti a. Kawla leh Sawma te chuan phur hmel vak lo hian an zui ve nghal. An han kal dawn tak tak chuan kan han inchibai leh hnuhnawh a, kan tan an hlû ka ti. Chuvang chuan Hriangpui khua hi midang bula sawi chhuah chi-ah ka ngai lo. Ka thutiam kha ka vawng em em ang. Ṭhianga ten tuikhawhthla lam an pan mêk lai chuan, Tuikhawhthla pûk atang chuan silai keng sipai form ṭial rek ruk ha hi a rawn chhuak hlawl mai! Mi pali laiin an rawn zui bawk. Ṭhianga te pawh an rawn let nghal vat. Mahse, an rawn hmu hman si, an rawn kap ta. Ṭhianga te chu bawkvak titihin an rawn phei zel a, kan hamhaih êm avangin chet mai nachang hria kan awm lo. Silai a puak leh dur, Ramzauva a ṭê ṭhawt a, a bawkkhup thlawp bawk. A che zui ta lo,. A thi. Ṭhianga te chu chak mangkhên hian an rawn tlan ta a, Burma sipai lam pawn silai an rawn tipuak tawh rih lo. Tuikhawhthla aṭang khan kan innghahna lai kha a thlang deuh a, kan lam chu a rawn pan hlawk hlawk. Keini pawh kan harhchhuak ta,hmanhmawh zetin lui mawng lam chu kan zawh ta a, kan inkar chu hlam pen 100 lo liam a ni tawh lovang. A nung chung ngeia min man an tum nge mawni silai an tipuak tawh lo, Ṭhianga chiahin silai a nei bawk si, Ramzauva silai lah kha an chuh hman ta bawk si lo, an hamhaih ve deuh bawk a niang e. Kawla'n, "Ramhnuai ril lamah aw. Lui dungah ni lo" hnunglam aṭang hian a rawn ti lauh lauh a, hma hruaitu ka nih avangin ka peng kawi nghal. Anchiri leh hrui inzam nuaih hmunah tlan lutin hrui te chu kan pal phei bawrh bawrh mai. Saia pawh a hliam tih a hriat tawh miah loh. Nunna hi chu kan lo ngaihlu tlâng a ni e. Kan kal ril zel a, min rawn umzui tih hriat takin ui bauh thawm pawh kan hre ve zel bawk. A tawpah ramngaw chu kan lut ta. Kawla bawkin, "Tlanin awmzia a awm lo. Birûkna zawn a ṭha" a rawn ti leh a. Kan hawi kual ruai ruai, Raw hûng chhah zet chu a awm a, mahse, kan zavai chuan kan biru thei lo vang. Sawma'n , "He lamah aw" tiin veilam a pan a, kan zui leh dual. Saia tlu thlawrh chu ka va kaitho vat a, Ṭhiante va pawh ta lo chuan hmanhmawh luatah lei tlahniam laiah chuan ka zuan thlakpui a, lei bang dep chuan ka ṭhutpui nghal. A hliam chu nâ a tiin a thaw hulh hulh a, a dawm vawng vawng bawk. Midang zawng chu khawiah tak kal ang maw? Silai a puak leh ta dawt mai. Zopari ka mitthlaah ka hmu nghal. Kan ro lak kha keiman ka ak vek tawh a, Saia bungrua Kima'n a ahpui a ngaih vang a ni. Ui bauh ri a rawn hnai zel a, silai a puak leh, Mipa rak thawt thawm kan hre zui. Thawm chu a reh leh ta daih a. Lei tlahniam atang chuan thlang lamah kan bawkvak thla ta chhat chhat a, Saia lah na nei ni bawk, kal a harsa khawp ang le. Thing lian tak phenah chuan kan ṭhu dun leh tê tê a, Inhrosa thawm kan hre zui nghal. Ka va bih ta dêk dêk a. Kan ṭhiante kha an lo biru hman lo a lo nia..an lo hual ṭhap tawh. Sawma malpuiah an kap hliam ni ngei tur a ni, Mary leh Zopari te chuan an lo buaipui a, midang zawng erawh silaiin an tin ṭhap mai. Keini pawh min rawn man tho tho dawn tih hriain, ka chemtê ka phawrh sauh sauh a, min phêntu thing lianpui bulah chuan lei ka lai khuar sauh sauh a. Kan ro laihchhuah te kha ka phum ta. Saia pawn min lo en reng. Nakina kan lak leh dawna kan hriat theih nan thingah chuan ka chemtê chuan X pathum ka thai ta a. Kawl ṭawngin an rak nawk nawk, an thinrim hmel viau bawk. 

Ṭhianga chuan kawl ṭawng bawkin a lo chhang ve a, ka rindanin "Khaw nge in ṭhian dangte" an ti niin ka ring. Chuvang chuan a theih chin chin birûk chu ṭhaa ka hriat avangin Saia chu mitmeia hrilhin chhak lamah ka bawkvak chho leh ta a. A pawi ta!

Lei tlahniam kopang atang chuan an ui hruai ni ngei tur kha a lo ding vung mai. A bauh zui tuar tuar. Kan him ta bîk lo. Mahse, ro ka lo phumbo hman chu ka lawm tho mai. Rang takin sipai pahnih an rawn kal a, min rawn hnuk tho lawp. Kan ṭhiante awmna lamah chuan min khalh phei ta a. Burma sipai chu an vaiin paruk an ni. An sualin an nunrâwn hmel takzet. Kan bungrua, kan bag ah zawng zawngte chu an lepse vek a, kan thawmhnaw leh hmanraw thenkhat bak an hmu si lo. An thinrim êm êm mai a, eng emaw tak kan kawl niin an hre si. Anmahni ṭawngin an han inhrosa, kan hrethiam der si lo. Ṭhianga erawh chuan a hrethiam, mahse, engmah a sawi duh bik tlat lo. Kan hmabak a va thim leh ta ve le..

Tichuan, kan kut min hnungkhirhsak leh ta nghauh nghauh mai. Man vawihnihna kan tawk leh ta. Anmahni ṭawng zelin an inbia a, kan hrethiam ve si lo. Tukṭhuan kan la ei bawk si lo, kan rilṭam pum ruak lah chuan min tichau ngawih ngawih bawk si. Zopari bulah chuan ka va tawlh hret hret a, "Intichak hram hram rawh aw. Engkim a ṭha leh vek ang" tiin ka'n hnem ve ngial a. 

"Ro kha i bagah khan an hmu si lo va, i thukru em ni?" A ti sap a. Ka lo bu nghut. An hotupa ber niawm tak chuan Ṭhianga bulah chuan kawl ṭawngin eng emaw ni a sawi a. Thil a zawt niin ka hria. Ṭhianga chuan keini ho chu min rawn enin, "Ro phumruk in la tih an hria a, khaw nge in dah a ti a nih chu" a ti ta a. 

Kei chuan rang fê hian, "Kan laichhuak lo tih hrilh mai rawh. Leiruangtuam chu kan lai ngei a, mahse, ro kan hmu lo tiin" ka ti zung zung. 

Ṭhianga chuan an hotupa bulah chuan a sawi nghal a. An thusawi erawh kan hrethiam ve tawh si lo. An hotupa chuan min rawn pan ta chhut chhut mai, a meng rum nasa mai si. A nunrâwn hmel ngawih ngawih. Ka inrin hmain ka biangah a rawn hnek ri chhawk, ka tlu lek lek mai. Zopari a lo rak tuar bawk, An hotupa chuan eng eng emaw a sawi tûn tûn a, a thinrim hmel êm êm bawk. Ṭhianga chuan, "A awih lo a nih kha, Khang ro te kha kan ta tur, min thlahtute'n min hnutchhiah an ni a, nangni lo lak ve ngawt theih a ni lo. In dahna hmun sawi vat rawh u, in sawi loh chuan in thi vek ang' a ti a nih kha" a lo ti nghal mawlh mawlh. Saia ka melh zauh a, a lu a thing nur nur. Kei pawh kan ti ta sa sa tiin, "Kan laichhuak lo, kan laichhuak lo tak tak" tiin hotupa chu ka melh a. Ṭhianga'n ka ṭawng a lo let ve nghal zat bawk. 

Sipai pakhat hian an hotupa chu rawn bekbawrin eng emaw hi a sawi sur sur a. Kan tan awmzia a awm ve der si lo. Chutah sipai te chuan min rawn kai tho a, dim baksak lo hian hmalam pan turin min nawr ta chûk chûk a. A ram awmdan vel chhinchhiah tum takin ka hawi kual vak vak. Kan zalen leh thei a nih ngai chuan kan ro thuhrûk kha kan va lak leh a ngai dawn si a. Kawng awm leh awm loah min kalpui zel a, kut kan tuar leh thâwr zel bawk. Kan nula te erawh an dim ve deuh a, ît hmel zeta an melhna te chuan ka thin a titawt ngawih ngawih. Zopari te lahin an hlau tih a lang reng mai si. A tawpah hmun zawl nuam deuh, pangpar vul chûkna hmun kha kan thleng ta a. Chawl khawmuang lovin min kalpui zel mai si. Ngaw chhung kan luh chuan dar 12 a ri lek lek tawh. Rilṭâm tuar thei lo Mary chu a thu leh ta hnawk mai. "Ka ril a ṭâm lutuk, ka kal thei tawh lo" a ti thâm ṭiak a. Sawmliana lah a mala silaia kah a nih avangin a chauin chhel viau mah se; a hliam chu a na tih a lang reng. Ani pawh a ṭhu satliah lo, a mu tawp mai. Sipaite chuan vin tuar tuar mah se; thahrui a awm miau loh chuan tihngaihna awm hek lo. Ṭhianga chuan an hotupa chu a be leh ta a. Rin loh takin an tui paite chu sipaite chuan min rawn intir hlawmin ṭhu turin min ti ta hlawm a. Saia pawh chuan thawk a la kâwk kâwk mai. An ruckshack chu hawngin vaimim aṭanga siam chhang hi an rawn phawrh ta hlawm a, tlem tê têin min eitir a, a kham loh theih ngei mai. Khawiah nge min hruai dawn Thianga chu ka zawhtir ta tawp a. 

Hlauhthawn ang ngeiin an sipai camp-a min hruai tur thu leh an saltâng kan nih tawh thu an sawi ta a. Khawchhak lama kan unau thlang rawn tlak tumte venga rîkrâp tura ramri hrûla camp rawn nei an lo ni. Burma tan in hrehawm bera an sawi jebet hmuna kan tâng lo tur erawh chuan tlemin awm a tinuam deuh. Nakinah kawng kan bo loh nan eng emaw ti tala chhinchhiah ṭha ka ti a. Kan ṭawng an thiam lo bawk nen, Ngaiha te chu a rukin ka hrilh a, kut hnungkhirh chunga hnuhma hnutchhiah chu thil harsa tak a ni bawk si. 

Tlema kan harh tak deuh hnu chuan kal an ti leh ta a. A hmaa kan riahna hmasa ber lui dung kha a hnar lam kan zawh chho ta ngat ngat a. Kan bûk hlui awmna pawh kha kan kalpel, Hriangpui khua pawh kan hlat leh ta khawp mai. Sipai ho hian Hriangpui khua kha an lut lo a ni chêk ang chu maw. Lui hnâr lam zawh zelin tui pawh a tlem tial tial a. Khua a thim thet thet tawh tihin sipai camp chu kan thleng ta hlawl mai. 

Puan in kaih chhetê tê 4 a lo awm a. Eirawngbawlna choka lian vak lo a lo awm bawk. Lui aṭangin a hla lo bawk a, tui lamah chuan harsatna an tawkin a rinawm loh. Ka rin aiin awm an tam lo. An vaiin mi 20 vel an niawm e. An cook pa pahnih upa tawh lam an awm bawk a,. An camp lai taka meipui an chhehna zâwl laiah chuan min khalh khawm a. Min hual tuau tuau mai. An hotupa ber chu a rawn lang ta a. A dul a kiar luah mai. 

Sipai zingah chuan mizo ṭawng thiam an lo awm ve a. Zawhna hrang hrang min zawt chho ta. 

"Khawi atanga lo kal nge in nih? Ro phumruk a awm tih engtin nge in hriat? Khawiah nge in ro laihchhuah chu a awm? " Chhan sen pawh a ni meuh lo. Mahse, kan thiam ang tawkin lehkhabu hlui tawh tak kan haichhuah thu leh kan rawn rin zawn ve tawp thu te, ro erawh kan hmuh zawh loh thu leh kawng kan bo thute kan sawi ta a. Hriangpui khua kha sawilan loh hram kan duh ve bawk si a ni. An awih hmel vak loh, mahse, min han dap ngial pawhin ro chhetê eih kan kawl bawk si lo. Tihvakngaihna awm hek lo le..

"Dan phal loha kan ram chhunga in lo lut hi dan in bawhchhe tawh hrim hrim, chuvang chuan man in ni..tan inah thawn vat in ni ang" tih chu an thutâwp a ni. Jebet an sawi lang lo naa, kan mitthla nghal rûn a. Rilru a va hrehawm mai mai tak. Khawngaih kan han dil chiam paw'n awmzia nei hek lo. Khua a thim tawh a, zanriah atan dailuah fi relh rulh leh vaimim aṭanga siam chhang tho kha min eitir a. Ṭâm tawk apiang a tui a ni bawk a, kan kham meuh lo. Mahse, ṭam zawng a hnem ve tho e. 

Puan in pakhatah min khungkhawm vek a. Kan kut phuar tawh loin kan ke chu chain-in an phuar khawm ta vek a. Tlanchhuah ngaihna awm thak loin. Puan in lah chu a zim nasa mai si, kan vai mai chuan kan inkhan nulh lo thei lo, Zopari erawh ka bulah zel ka awmtir. Kan la dam ve ṭêk ṭêk chhung chuan thla timuang ve phawt mai teh ang. 

Mi tâng mah ni ila, kan chauh êm vangin kan muhil bawrh bawrh mai. Kei phei chuan mumang nuam zet mai ka lo mang pek a. Tui khawhthla piah lawka hmun nuam leh pangpar vul chûkna hmunah khan Zopari nen hian kan lo ṭhu dun a, pangparte chu ka lo thliahsak a, "Cham, ka rai asin" a lo tia. 

"Fapa ka duh a nia" ka lo ti ngei bawk. Duhthawh tak hian kan lo inkuah vawng vawng mai. Mahse, ṭawng ri nawk nawk avangin ka harh leh si, ka va ui tak êm. Zopari chu ka bân lukhamin a lo la muhil sâk sâk a. Khua erawh a var tawh. Mut ka kham bawk a, ka harh ṭha hle. Sipaite chuan vin zet hian min rawn ko chhuak a, "Eitur va siam rawh u" an ti ta. Choka lam kan pan ta dial a, cook pahnihte pawh kha an lo awm tho a, kan inbe thei lo. Pa upa lam tawh ve ve an niâwm e. An hmelah hlauhthawnna a chambân avangin sipaiho saltâng an nih ka ring deuh. Kan thiam ang angin rawng chu kan bâwl ta a. Dailuah kan chhum a, chhang chu kan siam thiam si lo. Cook te chuan min han zirtir a, engtin tin emaw chuan kan puitlin ve thei ta mai. Tukṭhuan ei khamah chuan an hotupa ber chuan, "Pâwl 3-ah kan inṭhen ang a, Leiruangtuam zawngin kan chhuak ang. Tlanbo tum in awm vaih chuan thi sa in ni" a ti tûn tûn a. Sawma kha an kahna hliam avang khan kal ve thei hek lo, ani chu an enkawl ta a, a chhel êm mai a, nâ nei hmel pawh a pu lo. Tichuan, pawlah chuan min ṭhen hrang ta thliah a. Kei leh Ngaiha kan awmdun, Kima leh Saia, Ṭhianga leh Kawla. Sawma leh nula te erawh a hmun nghak tura thupek an ni. Hriangpui khaw ramchhungah mawlh kan kal leh ang tih ka hlau nasa. Ṭhianga pawh a rûkin ka chah nasa,. Tichuan, khawchhak lam zawngin keini pâwl chu kan kal ta a. Sipai 3 in min vil a, han tlanbo ngamna chi pawh a ni lo, bakah Zopari te tel lova tlanbo kan tum lo ve hrim hrim. Kan kalpui sipai zingah kan ṭawng thiam pakhat a awm ve a, a tawng a pai viau naa, biak ve theih ber anih avangin kan inbe ve nasa. Engtin nge mizo ṭawng a thiam tih te kan han zawt a. Venthâwn nei tih hriat tak hian, "Min ṭanluihtir a, vawiin thlengin ka chhungte nen kan inhmu leh ta lo. Sipai nih hi ka duh reng reng lo asin" a ti a. A dik ka ring. Burma ram buaina hi kan lo hre ve zel bawk nen. 

"Engtia rei nge min hren in tum?" Tia ka zawh chuan, "Hotute thu thu a ni e, kan hotu aia sang thuneitu ten kan kawl che u tih hi an hriat an hlau ve tho va" a tih chuan beiseina beitham zet min neihtir pek a. Mahse, ka sawi duh lo. Ramhnuai hmun hrang hranga kan vah hnu paw'n Leiruangtuam awm reng reng hmuh tur awm ta lo chu kan beidawng tlâng hle. Bakah zêp nâk emaw hmu lo mah ila pawi hi ka ti lo nasa. Ka ro phumrûk kha a la awm ve reng turah ngai ang. Khua pawn tlai lam a hnaih ve ta zel a, kan ṭawng thiam pa chu hawn rawt mai turin kan nawr sek a, a rawt ve ta nge nge a, Camp lam panin kan haw leh ta hnak hnak a. Camp kan thlen hma deuh hian kan ṭhianpa chuan, "Nula pahnihte hi zaninah hotupa ten an rawn la ang. " A ti zawi sup a, ka bengah erawh ring tak a ni. An nawmchen nan em ni Zopari te chu hman an tum? Ni lo, ka tihtir thei lo vang. Kima nen chuan hmuh theih khawpin kan hnual nghal. Rilrua arbo zawng ru ranin kan thleng a ni mai e. Zopari te chuan zanriah tur rawng an lo bawl zo diam tawh a. Zanin chu chaw pangngai kan ei ve thei ta. Mahse, ka rilṭam tehlul nen Zopari te avangin lem harsa ka ti mang e. Anmahni hrilh dawt lah kan hreh si. An ni lah kan bulah thlamuan hmel takin an awm chu a ni si a. Chaw eikham chuan kan kalna ṭheuh report kan pe ta hlawm a. Tuman leiruangtuam an hmu lo. A hnuah Saia'n a rukin, "Leiruangtuam ang tak chu mau hmunah ka hmu a, mahse, hmanhmawh deuhin mau ro leh hnim te ka dah vat vat a..an hre ta lo a ni" a ti. Hmm..kan hmakhua chu kan ngai theuh mai. A ṭha. A sipai a nawlpui chu an sual pawh a ni lo, hotu chan chang pathumte chuan biak ṭhat chu sawi loh, kut an thawh zen chuan mipa inti ve ta nafâm ngeng an chhun lo thei lo. A chan ṭha zawk an la ni miau bawk si. Zopari te an rawn hruai hun tur nghak rana awm chu hrehawm ka tih ngawih ngawih avangin Kima râwnin a rûk deuhin ka hrilh ta tawp a, a dâng nghal sâwp sâwp mai. Mahse, Ngaiha'n, "Kan chan ṭhatna tur hmanruaah hman dan zawn a ṭha. Chawhmeh channa chemtê saw ka va ru ang a, paipawn ang che u. " A ti leh ta rup mai le. Zopari te erawh chuan eng thu sawi zai mah an rêl thei lo. Nunna chân hi tu tan pawh thil hlauhawm a lo ni ve bawk nen. Ngaiha chu a sawi ang tak tak khan Chokaah chuan lut zauhin chawhmeh channa chemte lian vak lo pahnih chu a rawn la ta a. Zopari te chuan an kekawr kawngah an thiat ta rân mai. Ṭhianga leh Ramzauva silai kha an la daih bawk si. 

Fim taka ka ngaihtuah hnuah Zopari bulah chuan, "Sual che u an tum veleh duh awm deuhin awm phawt u la, an chet dawn veleh dimna tel miah loin an englai pawh in zai tawp mai dawn nia. An hamhaih buai chhungin silai in chuh vat ang a, in tin dawn nia, sipai dang an rawn lan hunah 'Min kaltir lo a nih chuan kan kap ang" in ti ang..i hrethiam em?" Tiin naupangchhia takin ka hrilh mial mial a. A bu nghat nghat. Ka kut chu rawn vuanin chiang zetin min rawn melh a, "Cham,." A ti zawi sap. A sawi tur chu hriain ka inhria. A kut chu lo hum let salhin, "Ka hria e. I tan ka awm reng ang. Ka phatsan ngai lovang che" ka ti nghet charh.. chuta a nui hmel zet chu a va mawi chungchuang êm..

Sipai pahnih rawn langin, "In nulate hi kan puten an mamawh tlat mai" tih leh rawn kaih an rual ta nghal a. An han ṭang ve naa, an hneh mawlh si lo. Rilrua ṭang ṭun chungin kan thlir liam ta a. Keini pawh muhil tawh tura thupek pek kan ni zui nghal. Tu chu nge muhil thei ang le..rilru hah reng rengin kan thaw dep dêp hlawm a, an va chet fuh hlauh chuan kan tan zalenna kawng pawh a inhawng ve nghal a ni mai. Mahse, an chetsual hlauh chuan an nunna atan pawh a pawi thui thei khawp ang. Rilru ka ṭawngtai nghal mawlh mawlh. Kima tak pawh a rilru a hrehawm tih a thawlak dan atangin ka hre thei mai. 

Zan dar 11 vel a ni ta awm e. Camp chu a reh ṭhuap tawh a, sipai ho pawh an muhil tawh a ni maithei. Keini erawh Sawma tih loh chu nghate rêp ang kar kan la ni. Sawma chu nachhawkna a eiin a chhawk a, a muhil kha a nia. Kan hrethiam reng mai. Chanchin ngaichângin kan mu ran mai. 

Rak tuar tuar thawm kan hre ta, kan tho nghal sap sap. Sawma pawh Kawla'n kaithoin puan in hnunglam aṭangin kan bawkvak chhuak ta a, Sipai ho ṭawng nak nak pawh kan hre thei. Min dahna hmun tak hi choka bul a ni a, min hnaih bertu puan in chu vawiina kan ṭhianpa te mutna kha a ni. Kâr lovah an hotupa te mutna chu kan thleng a, biru titihin kan bihthla a, Zopari chuan saruak veka a hmaa ding chu chupa pistol ngei chuan a lo tin rân mai. Ṭawng lettu an mamawh avangin vawiina min hruaitu ngei kha a la lut zui! 

Zopari chuan a han vau ve khar khar a, Pistol chuan a tin ngat ngat bawk. Kima chuan, "Mary ka va ngaihven ang e" tiin puan in chu hêlin a va bawkvak a. Hotupa ber chuan thih a hlau viau a niang e. A hote chu an silai dah thlaa mi tâng chhuah turin thu a pe ta nge nge a. Zopari erawh ka rin phak bak a ni. A silai ken lai chu a tin kawh pât reng mai a, a mitmeng lah a hlauhawm reuh si. Ngaiha'n, "Hawh u le, va lang ila" tiin a ding a, kan ding ve nghal suau. Hotupa ber puan in sirah chuan kan ding ta ṭhâm mai. Sipai ho lahin hotupa thupek angin min tina ngam si lo. Mary te pawh an lo inchaibuai ve nasa a, Mary phei chuan shot gun-in a lo tin hmiah mai. Han kap na se zawng a nasa lo teh ang chu. Zanlai dar 12 tlângah kan buai mup mup mai. Ṭhianga leh Kawla bakah Ngaiha te chuan sipai ho silai chu an va rûksak a, Ṭhianga tak chuan ama silai ngei kha a duh a, a zawng ngat ngat. A hmu ta a ni ngei ang. Lungawi hmel a pu tlat. Zopari leh Mary te an rawn chhuak a, keini pawn kan bungrua kan lo chingfel ve mek. Silai an la ken ve tlat vang leh an hotute thupek a nih avangin tuman engtinmah min ti lo. Bakah zêp nâk emaw mizo ṭawng thiam ve ho te kha chuan min lainat ve tlat ni hian a hriat. Ka ngaihbel a ni maithei. Tichuan, zing lam dar 2 bawr velah sipai camp chu kan chhuahsan ta a. Silai panga kan nei ta bawk a, chutimaia min rawn umzui kan ring lo. Mi 20 vel chauh an ni bawk nen. Ṭhianga'n ,"A tira min thah phiar loh chhan chu in ṭhiannu te vang hi a lawm. A tir khan sawi ka hreh êm a.." a ti ta chiah a. Mahse, Zopari te pahnih chauh pawh an zuah thei tho si a! A bul chu Pathian a va ni si êm. 

Mahse, Kawla'n, "In thla timuang ringawt suh u. An bansan che u ring suh u..chuvang chuan keini pathum hi min mamawh a ni. " Fiah kêk kâwk hian a ti ta a. A awmzia kan hrethiam vek..Hriangpui ram chin ni lo chhuahsan tur paw'n Hriangpui mi hrâng val pathumte hi kan mamawh tlat a ni..