Leiruangtuam 4

LEIRÛANGTUAM (4)

Ziaktu : Toni Râlte

Chawngi nu chuan min rawn melhin, "I va ngawichawi bîk ve..ṭawng ve bawrh bawrh ta che" a ti a. 

" a..hei an titi ka lo ngaithla alawm" ka ti vat. Inleng dang ten nuam ka tih lohna tur ṭawngkam an nei lo pawh chu lawmawm ka ti. Mi rilru chhia leh misual tak hi zawng an ni mawlh lo mai. An awmna hmun kan sawi an hlauh vang chauha min hrêng ta an ni tih a chiang reng e. Ṭhianga chuan ka awmdan chu hrehawm ka tih a ring nge ni, hawn a rawt ta hlauh a, ka thaw huai nghe nghe. Vantlang zinga la chetla tak tak thei tur khawp chuan ka la zûm ve rih êm a ni. Zawlbuk kan pan ding nghal a, a hmun nghak an lo awm nual. An bawhbel chu a lian mang e. Min hmuh chuan mak an ti deuhin ka hria. Mahse, engmah chu an sawi bik lo. Zawlbuk laiah mei an chhep hluah a, khua a lum deuh bawk a, a alh nêp viau. Upa lam deuhte titi khawchang kan ngaithla ta a. 

Muang bân cherh chawrh hian, pa hâng lam deuh hian, "Kumin kan lo thlanga sih huai khu a che na thei viau zel mai a, hman zan kan riak pawh a bengchheng lutuk a, Thanliana ning deuhin vau aṭangin lungin a zu deng pek a, zankhuain thlam a rawn sâwi ta mai a, a ninawm duh a nia aw" a ti a. 

A bula ṭhu chuan, "Pi Seizîngi thla pawh a hrân nasat hi le. An monu hi a huaisen khawp a, hman zan an ar lu a ṭhuai chhum ṭumin, 'Ka nu, duhtawk tawh rawh, kan ning tawh. Mitthi khaw lama i kal a hun tawh' a ti piap piap mai a, a reh ve ta hmak e an tih kha" a lo ti ve charh charh a. 

Chutiang chuan huai leh huai lo, ramsa kah chungchang sawi chuan an titi a, ngawi renga lo ngaithlatu nih a nuam phian. An thusawi ka bengverh deuhtu chu, "Zâma pa te vaua leiruangtuam chungah sawn zan laiah thil êng lian tak an hmuh ṭhin thu an sawi tlat mai a, eng emaw tak zawng a ni ngei ang" tih chu a ni. Leiruangtuam ngaihventu tan chuan thu ho mai mai a ni lo. 

Ṭhianga chuan, "Kan thlawhhmaa thinglubul pawh khu zanah hian a insawi nawk nawk ṭhin nia mawle, pi pute serh leh sâng hi chu han serh ve phawt a ṭha, ka pa alawm mawle, 'Ram a chang tawh sia, eng êm kan ti lovang' a ti tlat a. Kan han nei ta chawm kha a nia, eng tak tawk ang imaw?" A ti mawlh mawlh a. Thinglubul hi ka la hmu miah lo, an serh zinga pakhat a ni tih erawh ka hria. An leiruangtuam mawlh chu a ni, engtin nge a awmna lai kan hriat ang aw..

Muthmunah Ṭhianga nen kan titi a, "Kan ṭhiante umtu zingah khan i tel ve em? Khawi laiah nge in va nanchin?" Ka ti sur sur. 

"Tel ve e, châr lui an lo zawh mêk laiin kan nangching,. Kawhmawh an bâwl deuh a, kan piai ta liam liam a nih kha" a ti ve mai a. 

"Leiruangtuam an sawi kha khawi laiah nge a awm le?" Inthlahrung deuhin ka ti a. Min rawn melh zawk a, "Zama te lo chu a bîng deuh a, lângin an feh vak ngai lo, Châr lui hnâr lamah an nei" a ti a. A dang ka zawh belh tawh lo. Min rinhlelh ka hlauh avangin. Kan reh ta ṭhap a, suangtuahna tam tak neiin kei pawh ka muhil zui ve nghal. Varṭianah kan tho a, mut ka kham vak lo. Zawlbuk chhuahsanin in lam kan pan ta hnak hnak a, "Chawngi kha ka lâwmnu a nih kha, kuminah hian palai tirh ve ka rilrûk deuh a, eng nge a an dawn ni?" Ṭhianga chuan a ti mawlh mawlh a, Chawngi kha nula fel leh vengva tak niin ka hria. A inlengte a dawnsawn leh kawm danah pawh a fingvâr viau. A hmel erawh ṭha ka ti lem lo. An hmel hi zep loh chuan a hmanlai êm mai a, tumah hi ṭha tia han enzui theih tur ka la hmu lo. Hmaihriama te kawtah Kima'n thing a lo ek a, ka khawngaih. 

"Kima, chaw ei khamah ka rawn lêng lawk ang. Eng nge i tih ang?" Ka ti a. 

"An la sawi lo va, ka la hre bik lo. " A ti mai a. Mut a kham loh hmel si, a awmna te hi pa ber mitmeng a thîp bawk a, an ṭha vak dawn loin ka hria. Ṭhianga bulah, "Ṭhianga, ka ṭhian dangte awmna kha khawngaihin min kawhhmuh teh a" ka ti a. 

Mualkil upa te ina awm vek an ni bawk a, inhnaih tê têin kan lo awm vek a, a tihzia viau a. Ngaiha tui chawi haw lam kan tawk a, Tel ṭin kan tih ang kha a lo kawt ngei,. Khawia tel ṭin nge maw an hmuh ni. 

"Ngaiha, chaw ei khamah ka rawn lêng ang, eng nge i tih dawn?" Ka ti vat a. 

"Feh a ngai dawn a,." Mahni inkhawngaih hmel zet hian a ti a, ka khawngaih mang e aw. 

"In chhuah hmaa rawn kal ka tum dawn nia" ka ti sup. 

Saia erawh zing zingah a awmna pa nen thlam sa turin an lo chhuak daih tawh a lo nia! A buaithlak dawn mang e. Lal inah pawh kan pêng haw a, Zopari ka hmuh chuan, "Thil pawimawh deuh sawi tur ka nei a, chaw eikhamah inhmukhawm lawk ang u aw" ka ti ru sup a, a bu nghat mai. Mary nen rawng an lo bâwl mêk. An ni hi chu an hrehawm vak ka ring lo. In kan thleng a, an monuin rawng a lo bâwl. 

"Chama, khuai laknaa kal ve i tum em ?" Ka pu chuan a lo ti vat a. 

"Ka hre lo le, feh te a ngai zawk lo em ni?" Ka ti khawmawi a. 

Ṭhianga'n, "Ngai lo, kal ve rawh, khuai laknaah pawh i la kal ngai awm si lo, a nuam teh mai a nia" a lo ti zung zung. Misual tak zawng an ni lo mawle. Ka vannei bîk khawp mai. Tukṭhuan pawh hma deuhah kan ei a, tlangau pawh a rawn âu leh tawh. Saia feh daih chuan ka rilru a tibuai, tlanchhuak dawn pawh ni ila inkalsan daih kha ka duh bik si lo. Rilru a buai ngei mai. 

Chaw eikhamah Ṭhianga chu a insiam nghal malh malh a, a û pawh a kal ve dawn. Kei erawh phatna tur chhuanlam ka ngaihtuah ngat ngat, "Ka pu, tui te ka chawi ngah zawk mai ang, khawtual mi nih ve loh chuan nuam ka ti rih lo" inthlahrung deuhin ka ti ta ngawt a. Min hrethiam ve a niang, "Aw le..i thu thu alawm. I ṭhiante an kal ve loh chuan a nuam bik lo vang" a ti ta mial a, ka lawm hle. Ṭhianga te chhuah rualin, "Kima ka va tlawh lawk ang e, tui chawipuiah sawm ka duh" tiin ka zui chhuak ve nghal a. Lal mualah chuan ṭhalai ho pawh an lo awm nual tawh mai, an phur hmel hlawm khawp mai. Kei chu tlangin Kima te in chu ka pan a, Sumhmunah a lo awm a, a hlim loh hmel viau. A bulah ṭhu ve nghalin zawitê hian, "Vawiin hi tlanchhuahna chance a tan ka lo hual deuh a" ka ti a. A hawi kual leh tê tê hnuah, "Keipawn ka lo ngaihtuah mêk asin" a ti ve sup a. 

"Mahse, buaina chu Saia te feh daih hi" ka tih chuan, "An rawn haw leh dawn, khuai laknaah a pu kha kal a tum ve a, khuai la thiam deuh a niawm e" a ti ta a. Ka va lawm tak. 

"Tirawh, an buai lai tak hian Ngaiha va hrilh ve ang" tiin ka chhuahpui a, Ngaiha pawh chu khuai laknaa kal tum awmin a lang. Dik tak chuan kan lakah a inthlahrung tih a hriat, a zum dûk mai a, a lainatawm letling. Kan hruai hrang deuh a, kan thiltum chu kan sawi ta. "A tih chi viau ang, ṭhalai tam zawk an kal vek dawn sia, mahse, engtin nge kan pute bulah chhuanlam kan siam ang" a ti a. 

"Tihdan ka hria, tui chawi tur ang deuhin chhuak khawm ve ila, vawi khat chu kan zu chawi ve zuai ang a, kan bungrua ber hi a ni engtin nge an hriat loha kan lak chhuah theih ang tihah ka buai" ka ti ta mial mial a, ina awm an awm ngei dawn a, bakah khawlaiah bag aka kan inzui chuan min ringhlel lo thei dawn lo. 

Kan han ngaihtuah a, a buaithlak riau. Kima tlanchhuah duh lutuk lah chuan, "Bungraw tel loin kal tawp mai ang u" te a han ti ngawt ṭhin. Kan mangang viau. Bungrua tihah lei laihna vel kha chu min manna hmunah khan kan kalsan tawp kha a nia. Tuna kan kuta awm chu kan thawmhnaw leh map vel kha a ni mai. Mahse, thawmhnaw tel lova chhuah ngawt thu awm si lo. 

Ngaiha chu a chhing vang vang a, "Tihian ti mai teh ang u, hak thuah nual ila, min hre kher dawn mawni le" a ti a. Thawmhnaw kha kan keng tam vak lo sa hrim hrim bawk. Chubak chu kawng dang awmin kan hre ta lo va, Saia pawh a lo hawn veleh Kima'n a lo bekbawr nghal dawn a ni. Lal in leikapui-a Zopari leh Mary te puan pho chu kan han hmu a, kan pan zui nghal. An ni pawh an rawn chhuk ve vat a, kan ruahmanna chu kan hrilh ta zung zung. An bu nghat nghat mai. Zopari chuan zawitê hian, 

"Ro awmna kha ka hre tawh asin. Lalnu thûlah an dah..engtin nge niang? " A ti ta sar sar a. Kan inmelh hrek hrek ringawt, Ngaiha'n ,"Lak dan awm se ka ti hle mai. Tihdan in hre lo maw? A vai vai lo pawn" a ti a. 

Mary chuan, "Kan lo tum chhin dawn nia" a lo ti ve var. Tlem azawng an lakchhuah theih pawh thil lua a nia, a zia viau ang. Hun tiama inhmu leh turin kan inṭhendarh ta rih a. 

Ka bag chu lain thil ka ngaihtuah chhuak thut, "Kan thawmhnaw sûk a ngai tawh sia" tiin ngati nge kan lak mai loh ang? Umm a pawi thui lo ve. Anmahni thawmhnaw suk tur pawh a awm ngei ang. Ṭhalai te chu ka rin aiin an kal har a. Mawng a za sek tawh mai. Ka pi bulah, "Pi, thawmhnaw suk tur in nei em? Tui chawi pahin ka lo su ang e. Ka thawmhnaw ho saw suk an ngai tawh tho a" ka ti luam a. 

A lu hiah nuah nuah pahin, "Siami kha a insu ve a, nimin khan. Mahse, naupang te hi an tal bâl thei sia, a awm ka ring, Zawlbuka i sin tur puankawp pawh saw i su dawn nia, khua a vawt chho dawn a" a ti ta chuar chuar a, ka va lawm ber tak. Sukhlo te pawh an lo hmang ve tawh a. An changkang ve tawh angreng. Ṭhalai an chhuak fel ta maw tihah Ṭin pahnih kawtin bag ka ak bawk a, puankawp bakah naupangte thawmhnaw tam vak lo chu ṭinah ka dah bawk. Ka pu chuan, "Chingal kha keng tel la a pawi lo, puankawp chiah nan khan, a fai ṭha nge nge a nia" a tih avangin chingal chu tam vak lo ka keng bawk. Bâwr zetin ka chhuak ta a. "Lalpa, min pui rawh aw" ka ti rilru mawlh mawlh. Saia pawh lo haw tawhin kan han insawm khawm a, mahse, in nghak ho min melh dan chu dik lo tlata ka hriat avangin, "Ngawi teh u, ka lo zu kal hmasa ang. A hlawm hlawma kal chu min ringhlel dawn tlat" ka tih avangin keimahin tuikhur lam chu ka pan ta a. An tuikhur chu a hla vak lo. Rem zetin lung phek a inphah zûi mai a, tui pawh a tam e. Ṭhiante nghak chuan ka ṭhu vang vang a. An rawn kal ve ta pheuh pheuh, Khaw mite ngaihṭhat nan an ni chuan tui vawi khat an han chawi phawt dawn a ni. Tichuan, insu pah tur angin an lo kal leh ang. Zopari te erawh an la rawn lang ve lo, an ni an ro lak tum hian buaina an tawk ta mai em ni ang tih ka ngaihtuah. Tunhnaia Zopari ka rilruah a len sâwtzia hi mak ka ti. Ka duh ve tak tak a ni maithei. Ngaiha te chu sawi tawh ang khan an han haw leh ta phawt a, Zopari te pawh a rûka ngaihven turin kan inchah. Tihtur ka nei si lo, ka ṭhu a, a chang leh ka han insil dai leh thul. Mi nghah hi ka dawhtheih lohna lam tak a ni. 20 mins vel ka nghah hnuah Ngaiha te chu an rawn lang leh ta a, Zopari te pawn an rawn zui ta. An bag ṭheuh an rawn ak thei ta bawk. Ka sawi ang khan insu tur niawm takin an lo insawi ve a lo nia, an awmna te thawmhnaw pawh an rawn keng nual. Zopari leh Mary chu an hawi zak zak reng a, an hlauthawng niin a lang. 

"Kan rawn ru thei e, mahse, a vaiin kan la hman lo, Nguri kha a rawn lut thut a. Mahse, min hmu hman lo chuan ka hria" Zopari'n a tih chuan kan hmel a êng sawt sawt hlawm mai. Phawrh pawh ṭul kan la ti rih lo. Midang rawn lan hma ngeia kan kal a ngai. Kei chuan ka pute puankawp chu fel taka thlepin ṭinah ka dah thlap, ka chunga an sual loh êm avangin chhe taka kalsan kha ka hreh ve a ni. Tichuan, tuikhur mawng lamah kan chhuk ta a, hnuhma hnutchhiah lo thei ber turin kan kal ve. A theih ang anga hla thlen phawt ṭha kan tih avangin chawlh pawh kan rawt ngam lo. Tuikhur atang khan mel 5 dâwn kan kal tawh âwm e. Lui dung zawh zel chu len deng te an lo awm palh takin tih hlauhthawn thilah kan pensan ta a. Changel hmun kan fang a ni ringawt, tumbu pawh a tam mai, mahse, la hman kan ni lo. Chawhnu lamah chuan ril pawh a ṭâm ta raih mai. Chul niawm tak kan pawh ta hlawl a, kan kal thui ve thawkhat tawh bawk a, thlam rawp tawhah kan lut ta a. A insawi dul dul mai, a chim rup duh hmel. Kan ril a ṭâm bawk nen, Saia nen chuan eitur eng ilo vâi tur a awm tak mialin tiin kan han fang thuak thuak a, mai tai lian zet mai kan hmuh chuan kan lawm ngei mai. Mai tai tawh hi chu chhum kher loh paw'n a ei mai theih bawk nen, Kima a fing leh bik tlat. Mamawhna a awm thei e tiin a awmna pa chempui hriam hmel zet a rawn paipawn ṭât a. Chu chauh chu kan hmanraw neih a ni. Mai chu a helin kan ei ta a, upain "Ṭam tawk apiang a tui ngai" an lo tih hi chu a dik a ni. A tui em em vek tawh. Kima'n, "Ro chu han phawrh chhin teh u" a ti a. Zopari te chuan puanhlapa funin an lo ak ve ve a lo nia. Rangkachak tlawn 8 leh lunghlû 16 lai an lo la hman. Lunghlu te hi lian tak chu an ni lo naa, an to ve khawp ang. Tichuan, kan hah te a dam hnu chuan chul chu chhuahsanin chul lu lam kan pan ta a. Ni a sa angreng sia, a hahthlak khawp mai. Khaw thim hmaa riakbûk sual a ngai ngei dawn a, lui kam lam bawk kan pan chu a ngai. Bûk lah a suala kan sual chawp takmeuh a ngai tawh dawn nen, lui lah chu kan pawh har hrep a. Tumah pawh kan ṭawng peih tawh lo. A tawpa tawpah luitê tui pawh tam vak lo kan pawh ve ta hlawl a, kan innghat ta. Kima chem bak hmanrua kan nei si lo, changel hnah lain uluk vak loin riahbûk chu kan sual ve nawk nawk, bang pawh kan neihtir ta lo law law. Mutbu engmah kan nei ta bawk si lo, a nuam fahran lovang. Puankawp kha ka lo keng tel daih lo va, ka â tak tak a ni. Hmeichhe pahnihte sin tur tal pawn. Ngaiha nen chawhmeh kan va zawng a, buhfai a awm bawk si lo, kan rethei takzet. Tumbu eng emaw zat kan la ta a. Kan rawh tawh mai ang chu. Kan vannei hlauh a, lighter kan lo la ak ṭhap mai. Tichuan, chi leh hmarcha tel lovin tumbu rawh chu kan ṭhei ta. Zopari leh Mary te chuan ei tam harsa an ti ve ngang a niang. Pakhat pawh an ei zo lo. Keini erawh chuan kan ei lui ve deuh a, puar khawpin kan ei. 

Kima'n, "Heti ringawt zawng a dik lovang. Lo kan hmuh hmasak berah kan mamawh zualpui hi la mai teh ang u. " A ti a. Kan thlawp hlawm khawp mai. Zopari te chu an ro rûk chhuah dan kan zawt a. 

"Lalpa leh lalnu te khan khuai la tur thalai te kha an va thlah ve a, an chhiahhlawh chiah kha a awm. Chuan, Mary hian "Kan insu dawn a, insûk tur i neih chuan va zawng la kan lo suksak ve ang che" a tia. A zawn chhungin Lalpa te pindanah lutin kan hai nghal rawk rawk. Nguri kha a rawn lut ta sia, "I nuin min tir a" kan ti ta tawp. A â bawk a, engmah a sawi lem lo a niang. Ka ṭawngṭai nasa êm a ni" Zopari chuan a ti malh malh a. 

Saia'n, "Kut bênga kan haw lo tur hi a lawmawm. Chuan, thiante u, Ngaiha nen in mi ngaihdam kan ngai khawp mai. Zep loh chuan hrehawm kan tiin kan inthiam lo takzet a nia. Tun hnuah chuan in tih ang angin kan awm tawh ang" a ti charh charh a. 

"Vawikhat tihsual te chu a awm tur alawm. Engpawhnise, an tihlum lo che u hi keini pawh kan lawm em em a nia" ka lo ti ve vat. Min phatsan leh ngam ka ring tawh lo. Keini pawn thinlung takin kan ngaidam vek, tichuan, tihtur awm hek lo, mut lam kan tintuah ta a. Khua a vâwt vak lo va a lawmawm. Kan kal chau bawk a, kan muhil hma hlawm khawpin ka hria. Engmah tawk loin khua pawh a rawn var ve leh ta a. Tukṭhuan ei lovin kan bûk chu kan chhuahsan leh ta phawt. Kawng kan bo ta sa sa, tunah chuan he lai ram chhuahsan theih hi kan tum ber a ni. Ngawah kan lut a, heng lai ram chan dan hi aw, a mak a ni. Tuma daidar loh a nih vang a ni mai. Hmun dâm deuh kan luh chuan a vawt sûk thei mawle. Ngaiha'n, "Ka pum a chiang tlat lo, ka va inthiar lawk ang e aw" tiin a peng ta zauh a. Kan lo nghak ṭhap. 3 min pawh a la tling awm lo ve, Ngaiha chu a rak ta ṭhawt mai. Kan phâwk nghal hrû, "Thiante u, Saphai..saphai" a ti ta chul a. Chuveleh kan pan nghal rûak. Ka thil hmuh tawha mi la râp ber tu a ni hial âwm e, Ngaiha chu Saphai lian zet chuan a lo zial rûn mai a, Ngaiha hlau lutuk chu a thidang nge nikhua hre âwm pawn a lang lo. Kan hamhaih tlang a ni e, Mary leh Zopari an rak nghal tuar tuar bawk. Saia'n Kima chempui hum lai chu chuh rawkin saphai chu a sat ta a, Ngaiha sah tel a hlauhawm tho bawk si, hlauh sawi hman ni tawh hek lo, Kei leh Kima pawh chuan kut lâwngin saphai chu kan lo pawt ve ngat ngat, Saia chuan zak kau meuhin saphai lu tun hrûa dak chu a sat leh ta chawrh a, a chaldarah tak a ni, saphai thinrim tal vel chuan Ngaiha chu a thlauh ta a, a mei han hawl kual vel chu min rawn vai thlu bawk. Mahse, ka tho leh vat a, Saia bawk chuan thinrim em em hian a taksa pawh a lu pawh a sat ta zawt zawt mai. A tawpa tawpah a lu chu a sat chhum ta a. A thi ve ta hram e. Lungphu a va rang duh ngai ve le! Mary phei chu a thauah a man nge ni a khur hlawk hlawk thei. Ngaiha chu rang takin kan buaipui nghal a, a mar a la awm avang chuan kan thaw huai e. Tui ten a lu chu kan tihuh a, kan ko pah reng bawk. A dâng bai mai a, a hlau ve ngang a nih dawn hi. Rak lo se saphai khan a dawlh ngei ang, mihring pawh dawlh thei tur khawpa lian a ni tlat. A rawn rum kâwk kâwk a, vai ruai hian a rawn meng ta lep lep a, "I tha em? Thiana" ka lo ti vat. 

A hawi kual ruai a, "Khaw nge rulpui kha" a ti tham ṭuak. 

" A thi tawh e. I him e aw" Saia'n a lo tih chuan, a chhing sawk a. "A va rapthlak ngai ve le..min dawlh tawh emaw ka ti asin" a ti khur dar dar a. 

A ṭhu chhuak a, tuite a han in leh hnuah chuan a zia ta deuh a niang, "Ka inthiar tur kekawr phelh ka tum lai takin ka inphenna thing lian tak aṭang khan a rawn tleng thla a, leh pawh tih hman hmain min rawn zial nghal tawp a nih kha. Ka va thi teuh kher êm" a ti mawlh mawlh..a la khurh nasat êm avangin kal pawh kan la kal thei lo. Ka saphai hmuh tawhah a la lian ber awm e. Saia ta pek chuan, "A sa a tui asin. Kan va hlep dawn em ni?" A ti a. Mary'n "I ti rapthlak e a. Ka ei ngam awzawng lo" a lo ti ṭhawt. Kei pawn ka ei ngam ka ring lo, saphai sa ka ei ngam lo ni loin tun ami saw chuan mi râp êm a ni. Darkar chanve dâwn kan ṭhut hnuah a ziaawm ta deuh a, kal zai kan rêl leh ta. Kan ṭi dûi vek tawh. A ram awmdan hi a rapawm hrim hrim, bûng leh hmawng a tam bawk si. A nelawm hlawl loh. A tawpa tawpah tlang pawng ve deuh kan pawh ta a. "Khua han chuan ang u, tihtheih a awm maithei asin" tiin tlang chu kan lawn ta a, a hahthlak angreng, chauh tawh nen rilṭâm nen. Kan han lawn fel chuan kan han hawi vel a, Hriangpui khua pawh kan hmu ta. Kan lo va kal thui hman awm e ka ti, khua kan hlat tawh êm mai. Min zawngin an buai mêk maithei a ni. Min hmuh vaih chuan kan lu an la tawh bawk ang. Lo niawm tak a awm hnaivai em tih kan han thlirkual leh a, Lo pathum niawm tak chu kan hmalam mel 2 awm velah a awm. Pan risk phawt ṭha kan ti tlang a, kal kan siam leh ta. Mel khat âwm vel kan kal hnuah Mary chu a ṭhu hnawk, "Ka ṭamchhawl" a ti tham chhal mai. Kima'n a buaipui ta vat, midang pawh hi kan ṭam thawkhat tawh. Eng emaw tal kan ei loh chuan kal zel turin chakna kan nei dawn lo. 

Chau chung chungin mipa ho chuan eitur kan zawng ta a, a vâng bawk si. Kima a rawn au ta lauh lauh a, "Sunhlu ka hmu e. Mahse, thing lawn ka thei lo" tiin. Kei thing lawn hi ka theih ve zawng tak a ni bawk a, sunhlu chu a tam thei ang ber ka lo ta. Tichuan, chi tel loin kan ei ta hlawm a, mahse, a ei theih viau mai. Sunhlu hi thei hrisel tak mai a ni a, kan han hmu kher kher chu lawmawm tak a ni. Mary pawh a harh ta sawt. Lo thlen vat kan duh avangin kan kal leh ta phawt a. 

Kan rin ang ngeiin thlawhhma chu a lo ni ngei e. Buh pawh an thar tam dawn khawp e. Lo hmasa ber thlamah chuan awm an awm lo tih kan hriat hnuah kan lut ta a. Thlam ṭha leh nuam tak mai a lo ni reuh a, tin, kan mamawh tur pawh a awm nual e. Banga chem lo inthiat, kawi lek lek chu kan la ta hmak a. An chi chu a bur chawpin kan la bawk, fairêl bel erawh a lo ruak hiau a, bel ûng zet erawh kan la ta tho. Pahnih dang la luh tur a awm si a, kan chhuak leh nghal. Fanghma bakah chawhmeh awm ang ang kan la pah zel bawk. Kan vannei kher mai. Thlam pahnihna erawh pa thawkmawh thlam ni mai awm a ni. A ruak bawk si, lak tur amang pawh kan hmu lo. Mahse, Zopari'n, "Hei hmarcha rêp.." tiin rapchunga bag ung tawh lama an khai chu a vaiin a la ta vek a. A tihzia e, hmarcha hi ka ngam vak lo naa, a tel lova chaw ei hi chu a har ve tlat. An fairêlah erawh a chanve aia tlem hret tur buhfai a lo la awm a, kan rût fai vek. A lo-ah pawh chuan buh bak a ching meuh lo nge ni, thlai han lak mai tur a vâng riau, kan fang kual vak hman bawk si lo nen, thlam tawp ber chu kan lut leh ta. Kan duh kan hmu leh ta nual, chemtê pawh kan la tel a, sawhthing, aieng, chi pawh mamawh reng tur kan ni bawk a, buhfai pawh fairel khat tlatin a lo awm. Kan rût leh ta vek mai. Kan kawrah theuh kan fun far a, buhfai a awm hi chuan mizo chu kan buai lo deuh nge nge. Vanneihthlak deuhin an riahna mutbu tam lutuk lo a lo awm kâk bawk a, bâwr dawn teh mah ila kan la lo phal lo. An thlawhhma pawh a tha bik, thlai pawh kan la ta nual a. Kan inkeng bawr lûk mai. Bel pakhat kan la tel leh bawk. Kan intodelh ve ta âm e. Mahse, lo hlat thei ang bera kan kal vat vat a ngai, an thil neih kan la nual tih an hre ngei dawn a, min rawn chhui zui thei dawn tlat. Mual pangperah kan inzui thla ta dam dam a, bawr viau mah ila rilru a hlim tlat! Hriangpui khaw hlat zawng nia kan hriat zelah kan kal a, kawng tuk chawp ngai a awmin a buaithlak zual. Ngaw bawk kan lut leh ta a, hah pawh a dam ta deuh, ngaw pelh lawkah lui kan pawh mai kan ring a, tlai tawh viau mah se; kan la kal ṭâng ṭang. Rin ang ngeiin lui lian ve angreng fâ kan pawh ta a. Remchang deuh maiin lung pûk zau vak lo kan hmu chhuak ta bawk. Chutah chuan kan inkulh mai a ngai ta. Hmanrua kan nei tam ve ta bawk a, kan che nghal sang sang. Bawkbawn leh samṭawk kan bai pawlh hluah a, chaw pawh thuk pakhat zawkah kan chhuangkai. Kan thlan a chhuak nasa bawk nen, kan awmna thlang lawka li lian ve pangngai takah chuan kan inbual a, sukhlo kha ka ak tlang ta zel a, rimtui vak lo mah se; tui lawng ngawt ai chuan a zia deuh ang. Zanriah ei dawna kan hnah han la chuan thawm mak tak, ramsa hram thawm niawm tak kan hre ta a, kan han hawi kual a, kan hmu mai si lo. 

Saia'n, "Sai awrawl a ang mang e. Mahse, a nih ka ring chiah si lo" a ti sur sur. Daidar loh ram mahnise, tun ang huna sai la awm chu kan ring lo tlâng a ni e. Mahse, zanriah kan kil laiin lui mawng lam aṭang chuan sai padâwp pahnih hi an rawn inzui chho ta tlat mai. A ranga rangin pûk kil lam kan pan a, an rim hriatna hi a chak êm avangin kan rim an hria a ni maithei, sai sual an nih teh zawngin kan nasa lo viau ang le. An rawn chho zel a, kan zawn an thlen chuan an ding ta chut mai, thaw dêp dêpin kan lo thlir a, ring takin an han hram leh ta mai a, kan au chhuah mai loh nan kan ka kan hup far mai. Mahse, lui hnâr lam hla fê aṭangin chhawntu an nei ta. An inzui chho leh ta hnuk hnuk a, kan thaw huai hlawm e. A mak mang e, sai te pawh an la awm a nia! Ti nge maw thilmak deuh deuh kan tawn fô ni. Chaw ei pawh a tui tawh nek lo ve a. Zanriah ei khamah tak hian zial zûk a châkawm ṭhin. Kan pai hlawm der si lo. Kan ha hi chu meihâwlin kan nawt mai zel a, kan thaw a rimchhe hran lo. Zuk hmuam ti tana chaw ei khama thlamuang taka kuhva ei chunga zial zuk nawmzia kan hria ang chu. Khawpui a rawn ri dur dur a, kawl a phe zawk zawk bawk. Ruah a sur dawn a nih hmel. Keini pawh pûk kil lamah mutna siamin mut zai kan rêl zui ta a. Kima'n a awmna pa sualzia a sawi nuah nuah a, "A meng thîp ram reng mai a, a nupui fanaute pawn an ngaina lo tih ka hre thei. An monu phei chu koh pawh a ko ngai lo, a mawl biak tawp. Engtin nge khatiang misual kha khawnbawl upa a nih theih zawk ni" tiin. A dik ang, mihring te hi kan hmel landanah pawh fel leh sual hi a thliar ve theih titih a, mitmeng thîp lutuk hi chu han ṭawng dam thluam mah se; chhungrilah kan ngaina tak tak thei lo chu a nih hi maw. 

Ka bula mu Zopari chuan, "Cham, ka chal hi lo dek lawk teh, a sa deuhin ka hria" a ti a. Ka han deh chuan a lo sa deuh tak tak. "I khuasik a nih hi, a va buaithlak e aw. I hah tawngkhawng a niang" ka ti a. 

A tlun ta hluah mai, kan buai nasa ta mai a. Tuivawta an chal deh a ṭha an tih avangin kan han dep ṭhin, eng a ang thei si lo. A luak nasa bawk, a chau em em mai a, khawvar dawn lamah kan mu ve thei chauh, vâwt a tih êm vangin ka kuah bet tlat a, kan taksa han innâwk vel chuan min tidanglam dawn ta mai. Theihtawpin ka insûm a, hrehawm ka va ti tak. Amah lah chuan min kuah chial bawk si. Ka insehruh ngar ngar a ni ngawt e. Mahse, mut a rawn chhuak ṭan a, ka zuai ve ta deuh. Kan muhil har bawk a, kan thawh meuh chuan dar 9 a ri thuak tawh. Eirêl kan buatsaih nghal a. Chawhmeh kan la ngah bawk a, kan zawng buai peih lo. Chaw ka chhuang kai awrh tihin ṭawng ri kan hre ta. Kan phâwk ta hra mai le. Hlauthawng reng renga khawsak hi chu a va hrehawm tak êm. Mei ka timit vat a, pûkah kan lut nghal rawk rawk. Mei kha a khu nasa hman lo bawk a, an hmu hman lo turah ngai ang. Ṭawng ri chu a lo hnai zel a, lui hnar lam aṭanga rawn ri a ni. Kan awmna hi lui atanga han penhleh ve hlek a ni a, mahse, rawn hawi se min hmu tho vang. Ngaiha'n, "An tam hmel loh bawk a, kan innangching a nih chuan kan beilet ve ang, damkhawchhuak tur chuan thisen kan chhuah pawh a ngai dawn a nia" a ti ru sur sur. Ni e, chubak kawng dang kan nei miau lo a tin ni. Kar lovah mi pathum an rawn inzui thla ta dam dam a, silai an pu vek bawk. Sa chang tur te pawh an ang zawk alawm le. Pakhat a sa ṭha ber chuan, "Khulai lengkir thleng kha kal ang u, lui dung an zawh hi kei ka ring chiah lo, an fimkhur ve dawn a" a ti chhur chhur a, a awrâwl pawh a lian viau. Min zawngtu te ngei chu an ni si. A bula kal chuan, "Nia, kei pawh ka ring vak lo. a, hei eng nge ni ngai?" Tiin a hma lungpuia Mary'n Zopari kan dehna a kawr a pho chu a kawk ta vah mai. Mary chuan, "Lalpa leh!" A ti sep. An hawi kual ta ruai a, pûk chu an rawn melh ta chat mai. Kan biru viau naa, an rawn kal hnaih chuan min hmu dawn chiang lutuk, Mary leh Zopari te chu pûk kilah kan nam phei vat a, kan chem kan phawrh zâl zâl bawk. Pakhat la ṭawng ve lo kha a rawn kal hnai ta ngei a, kan mei chhemna la tharlam tak chu a rawn hmu ta le. Silai an nei tlat chuan min titîm lo thei lo. 

"Pûkah khian an awm e. Lo chhuak r'u le, kan rawn luhchilh hma che u hian, chuti lo zawng thi sa in ni" a ti nghal ta khur khur mai. Saia'n, "Nunna thâpin aw niang" a ti sup a. Ban phar sain kan chhuak ta dam dam. Silai chuan min rawn tin nghal ṭhap a, thinrim hmel tak chu an pu lo. Sa tha ber chuan, "An kut va hnungkhirh rawh" tiin a bula ding bawk chu a melh zauh a, a silai dah thlain a rawn kal nghal. Hnâng an lo ken sa chuan Kima kut chu a hnungkhirh nghal mawlh mawlh a, a ṭhiante erawh chuan min la tin ran mai. Saia a hnungkhirh dawn lai tak chuan a che zawk a, a kiu zum lai takin chu pa thinah chuan a theihtawpin a nghawk ta, Ngaiha nen che ve nghal phatin Ngaiha'n a hnunga a thuhrûk chempui chuan chu pa tlu mêk chu a tin nghal zak, Zopari te erawh lung phenah an zuanglut a. Mahse, silai a puak ta tlat! Saia chu a tlu ta thlawrh a, a âwm a rawn thi nghal puat, Ngaiha'n, "Silai in hmet puak leh a nih chuan in ṭhianpa lu hi ka la ang" a ti ta chher chher mai. Sa ṭha bera khan, "Lalpain a nung chung ngeia hawn tur che uin min chah a, amaherawhchu, in thih mai a ngai dawn a nih hi, kan ṭhianpa kha in rawn kaltir lo a nih chuan in vaiin ka kaphlum phiar dawn che u" a ti ta lûng lûng. Silai keng zawk an ni bawk a, an zâm lo viau. Kan dinhmun hi a zâmawm duh khawp mai. Mahse, Ngaiha chuan a thlah duh bîk lo. Mary'n Saia chu a buaipui nghal a, hmun leh hmuna inkap an ni bawk a, Saia hliam chu a na ngawt ang le. A thi nghal lo kha a vannei,. Finrâwl chhuah a ngai tih hriain, "Min hruai dawn a nih pawhin kan ṭhianpa hi kan buaipui phawt ang, heti chungte chuan engtin nge kal pawh a kal theih ang" ka ti a. Saia chu ka ṭhutchilh ve nghal bawk. Mi nunrâwng tak zawng nise la kan thi vek tawh maithei a ni. An ṭhianpa Saia nghawk pawh chu a na thawkhat a niang, a thaw a sak tih hriat takin thawpui a la hulh hulh mai. Ngaiha bawk chuan, "In silai kha dah thla ula kan zui ang che u. Mahse, Kan ṭhianpa hi kan buaipui phawt ang" a lo ti ve bawk. 

"Aw a tha alawm, finrâwl chhuah in tum a nih vaih chuan in lu kan la ang" Pakhat chuan a ti leh chhar chhar. Zopari biru khan lunga inphen zauh zauhin kan hmaa dingte chu a lo hel kual a, a chesual ang tih ka hlau ngei mai. Saia chuan nikhua a hre lo ṭan ta der mai, na a ti bawk nen, an kahna hliam lai chu nghet zetin kan ṭawn a, thisen chhuak pawh a tlem ta deuh. Tui ka intir a, a lu te ka tihuh bawk, mahse, a vai ruai mai a, a kal mai dawn a niang ka ti hman tawh. Mi pahnihte pawh chuan an rawn pan ve ta nge nge a, an silai pawh an la thla tawh. Tlemin a thlamuanthlak ta deuh e. Saia ena an rawn kun lai takin an hnunglam aṭangin Zopari'n lung lian ṭha ve tawk takin sa ṭha bera chu a luah a rawn chhu ta chawrh mai, a bawkkhup nghal thlawrh, pakhat chetlak tum a hamhaih buai lai takin ka va bawh ta rawp a, ka theihtawpa nain a hmaiah ka hnek nghal buan buan, silai pawh a thlauh avangin Zopari chuan rang takin a lo chhar a, an ṭhianpa lah a che hleithei tawh si lo. Kima phuarna Mary'n a phelh zawhah Kima nen an ni pathum chu kan hnungkhirh ve ta thung a, lungpui nghengin kan ṭhuttir ta ran mai. Saia chu pûkah kan zawn chho a, nachhawkna han ei tur lah awm hek suh. Enkawl vak dan kan hre lo hle mai. Tui ka lum sawk sawk a, tuilumte chuan kan han dep ngawt a, nikhua a rawn hriat deuh chuan a na ti lutuk chu a ṭhen chak chak zel. Silaimu kha an kahna a hnaih vang ni maw a tlang a, a tâng lo hlauh chu a lawmawm zawk. Tunlai silai changkang tak angte chu nise a thi chiang viau ang, tin, an kahna lai hi a lûng khawih lo tawk vek a nih a rinawm. An silai hi hmanlaia an tukchawp ang, awlan silai an tih ang kha a nia. A zên pawh an siamchawp ang kha. 

Zopari'n, "Engtin nge khu mite khu ni dawn?" A ti a. 

"Ka hrethiam lo, kan chhuah zalen chuan a siruk lain min rawn chhui zel a hlauhawm bawk sia, tihhlum lah a ngamawm bik si loh. " Kima chuan a ti a. Kei tak pawh ka buai, lehlamah an nunna lak êm chu ka theih ka ring si lo, keini lah Saia heti hi a ni a, kan kal chhuak a nih pawhin kan thleng hla hmanin a rinawm bawk si loh. Ngaiha chuan, "Engpawhnise, vawiin chu chhuah ngaihna a awm lo a, tikhuan awm ve rih mai rawh se. Kan ngaihtuah ṭha dawn nia" a ti ta ngawt a. Chaw kan la ei bawk si lo, rawng kan bawl ṭha leh a, kan mi tângte pawh kan pek ve loh chuan an khawngaihthlak ve tho si. Pûk hnaihah kan hruai chho a, thu an awih fû mai. An hmingte kan han zawh chuan, sa ṭha ber kha Thangruaia a ni a, a ṭhianpa Kawlkunga, Saia nghawk pa erawh Sawmliana a ni thung. 

"Engtia tih nge in duh? Kan chhuah che u chuan min rawn chhui leh dawn si a, tihhlum che u lah kan duh bik si lo" te kan han ti ngawt a. 

"Khawngaihin min chhuah ula, engmah kan sawi zui lovang tih kan tiam a che u" Kawlkunga chuan a ti a. Chaw te kan ei phawt a, Saia chu kan han barh ngial pawn a lem hleithei lo a ni e. Thangruaia te pawh chu kan pe ve a, "Engpawhnise, tihian ti teh ang u. Kan ṭhat tlan theih nan, in khaw luhna khânah khan min hruai u la, tichuan, in ram kan chhuahsan ang a, nangni pawh in kir leh thei ang" ka ti ta a. An duh ka ring chiah lo nain kawng dang a vâng rih êm mai. An inmelh kual ta hrek hrek a, "Khân chu heta ṭang chuan la hla tak a ni. In ṭhianpa hliam nen in thleng zoin ka ring lo" Sawmliana chuan a ti a. 

"Nangni hian min hruai dawn rêng alawm, in ramchhunga awm tawh loh hi kan duh ber a ni. Min hruai ngei tur a ni" ka ti ve tlat. Ka ṭhiante pawn min lo pui tliar tliar a, duhthlan tur dang nei bik hek lo, Ngaiha lah thu a duh rum angreng si, "Min hruai dawn lo a nih chuan dama chhuah inbeisei lo law law rawh u" a ti hmiah mai. A sawi ang chuan a ti leh duh tak tak ang. 

"Ni thum kal vel a la niang. Ni e, duhthlan tur dang nei ta lo chu kan hruai poh mai ang che u" Thangruaia chuan a ti ta nge nge a. Rilru a hlim ṭan. An silai kha eng emaw tia min laksak leh hlauin kan tan hman ṭangkaina tur tam tak awm mah se; kawl loh law law kan duh ta a, Kima nen chhunah kan va phumbo ta daih a, chempui pawh kan bulhnaiah lo chuan dah ngam a ni lovang. An kut phuarna te kan phelh ve tawh bawk si nen. Saia enkawl nan nikhat chu kan hmang ta a, Kawlkunga khan a damdawi niawm tak a sawi hnah hlai pui pui mai a va la a, chu chu nuai sawmin Saia hliamah chuan a bel ta a. Saia erawh a ṭawngvai niah niah reng a, a khua a sik nasa hle bawk. Tin, Kawlkunga bawk chuan eng thing emawni pil hi a chhuang a, chumi tui chu a intir ta bawk, tlem chuan a zia ve ta deuh e. Zanriah pawh Zopari'n a barh lui a, bar hnih thum vel chu a bar ve kha. Kan mi mante chuan finrâwl chhuaha an tlanbo kan hlau si, Ngaiha te nen a rukin kan sawi a, zanah in duty chhawk mai ila kan ti ta a ni. Ka duty hmasa ta ber a, pûk kawngka bulah chempui nen ka ṭhu ta ran mai. 

Dar 12 a la ri lo hlek ang tihin Thangruaia chu a rawn ṭê ta rawng rawng mai., pûk pawn zawl lai eirawng kan bawlna bul lawkah an mu ve mai kha a nia. Min tiphu chiang lutuk, rang takin pûk atangin ka zuang thla a, a ṭhiante pawh an harh nghal, an rak ve nghal tuar tuar ..khai leh! Thla êng hnuaiah chuan keipui lian zetin Thangruaia chu a lo bawh rûn mai..!