Leiruangtuam 12

LEIRÛANGTUAM (12)

Ziaktu : Toni Râlte

Ngaiha hmel tak leh rum ûl mai avang chuan a ti mai mai lo tih Robina chuan a hrethiam a ni ngei ang. Khawngaihthlala zet hian, "Ṭhianpa, ka lo tisual a ni. Nunna chu kan inzuahsak thei hram lo'm ni? Tihian min kaltir u la, kei leh ka naute hian vawikhat mah kan tibuai leh tawh lovang che u" a ti nem duai a. Ka ngei lek lek, chapo huna chapo thei viau, nêm huna tenawm khawpa nêm thiam hi an awm. An nun hi a lem ka ti mai. 

Khua pawh a rawn var chhunzawm ta a. Kan la hreng ve zel. Kan awm zel dan tur ngaihtuah ngai bawk nen, Robina te chu Police kutah hlan ngawt ila, keini thlengin kan tawrh phah thei dawn tlat bawk si. Custom lamin min ngaihthah dawn hlek si lo. Min chhuhsak vek dawn ai chuan Robina te chu ngawi renga kan kaltir mai a ngaih hmel. An ni hi chuan police chu an pun a rinawm lem loh. Mahse, kan kaltir ringawt chuan mit leh beng a ngahzia amah pawn a zep lo va, kan la chesual leh thei. Rilru a buai nuaih nuaih mai. 

Saia chuan, "Tihian in chungah zahngaihna lantirin kan kaltir ang che u. Mahse, lehpek a awm tawh tur a ni lo. Kan ro min laksak pawh kha a man min pe ngei tur a ni. Tin, in silai leh in phone hi chu kan lo kawl ve tawh ang e" a ti nghut nghut a. Ngaiha erawh a ngawi hmuk reng a, a thinrimna chu a sosang tih ka hria. Mahse, thisen chhuah lo zawnga inchinfel hram hi a ṭha. Buaina nasa zawk kan tawh leh a hlauhawm. Aizawl thlen thlak a chakawm tawh êm mai. 

Robina chuan, "Kan va lawm dawn ve. Ni e, in ro kan laksa man kha chu pek in ni ngei ang. " A lo ti a. 

Ngaiha'n pawr tawkin, "Tunah min pe nghal rawh"a lo ti tuar. 

Robina chuan, "Chutin ahsa ka lo nei mai hleinem. Engtin nge niang aw" a ti vung vung a. 

"Chhetê mahin ka ring tawh lo che. Vawiinah i hote hi laktir la, nang erawh kan hrêng rih ang che. A man hû tawk min pe ngei tur a ni" Ngaiha chuan a lo ti leh hmiah. Robina pawh chuan duhthlan tur nei hek lo. A pawm lo thei ta lo va. Tichuan, ruahmanna siam zung zungin Robina mi rin ber Paliana khan an naute pahnih hawnpui pahin pawisa a va la dawn a ni. Tichuan, Police lema chang leh Duty anga lemchangte khan an pu chu an lo awmpui ve dawn a ni. An phone chu hmansakin kan chhungte ṭheuh kan be ta a. Ka nu ngaihṭhalo ka han hnem leh ngial a, "A rang thei ang berin rawn haw rawh u" a ti bur mai. Ka pu a ṭhat vak loh thu a sawi bawk. A rang lama kan hawn vat tur thu ka hrilh a. Zopari pawh a pain a ngaihtuah tawh kher mai. Ka rawn hruai mai dawn che u mi? A ti hial nghe nghe. Mahse, keimahnia kan inchinfel ve theih mai kan beisei avangin kan hnar a, ka pate pawh in hruaitir duh ila chuan ka cousin ten Champhaite chu zin an châk sakhai a, an theih a rinawm. Mahse, buainaa an inbarhluh ve a hlauhawm pha tlat. 

Tukṭhuan pawh kan nuai liam ta vel mai mai a. Robina leh a naute pawh ngawi rengin an ṭhu ran. Buaina chawhchhuah tum ang zawng chuan an awm lovin ka hria. Pawisa lo thleng se kan chin zel tur chu kan la sawi ho ang chu. Motor hire tawp mai ka duh tawh. Passenger dang zinga tel ve pawh Robina mi leh sa an lo inphum ru ve thei tlat. Kan bungrua hawn kan duh bawk si chuan..

Chawhma lamah Paliana te pawh an rawn thleng thei a. Kan ro hlut zawng kha keini chuan kan chhut thiam vak lo, kan hawn theihna a daih chuan a tawk maiah kan ngai deuh kha a nia. Pawisa chu Nuaih 2 leh singthum kan dawng. A tawk viauah ngai mai teh ang. Thu leh awm tawh lo tura intiamkamna neihtirin Robina te pawh chu kan kaltir ta a. Hrên beh reng thu awm hek lo. An kal liam veleh kan awm zel dan tur kan sawiho ta nak nak a. 

Saia chuan, "Fimkhur thuhlaah bungrua hi Pu Zaia kutah hian kan la dah mai dawn em mawni le ka ti. Robina te kha kan kaltir avang khan an tâwp mai ring suh u, hetiang sum pathian tawh chinin duhtawk an nei ngai lo. Kan bum lêt ve theih hunah ngai ang" a ti chat chat a. 

Mary pawh chuan, "Kei pawh ka rindan, tunah hian khulam custom duty te beng a thleng vek tawh ang. Keini tan sawi buai theih miah loh turin thang a kam thiam dawn nasa a nia" a lo ti ve mawlh mawlh a. Ngaiha chuan, "Keng vek ang u, min man lo vang" a lo ti hlur. Mahse, thluak nu buta ngaihtuah chi a ni lo. 

Zopari chuan dam thlap hian, "Ka ngaihdan ka lo sawi ve teh ang. In sawi ang khan kan ro lakkhawm hi Pa Zaia kutah awm rih se, keini kut ruakin Aizawl lut ila, min lo check a nih pawhin hmuh an nei dawn lo. Kar khat hnu velah a rûk deuhin Pa Zaia te pafa hian kan bungrua chu rawn kengthla mai se la; tuman an notice ka ring lo. Aizawlah kan inchingfel thei mai ang a, a ṭha inti em?" A ti dap dap a. 

Kan ngawi ṭhap. kan ngaihtuahna a inân ṭhûm ka ring deuh. Pa Zaia chu rinngam a nih leh nih lohah kan buai vek ngei ang. Kan rilru hrethiam takin Pa Zaia chuan, "Hei kan inhriatna pawh a la rei lo va, kei zopa mawl ve tak heti taka min ringngam hi lawmawm pawh ka tia. Mahse, ka tan pawh heta in ro in hnutchhiah hi him lohna chin a awm dawn a. Robina te khan min rawn luhchilhin ka fapa chungah te hian ṭuan vaih se, ka kâ ka âng ang em tih ngaihtuah tham a ni. Amaherawhchu, a theih chen chu tlawm loh ka lo tum ang a. Rim taka in thawhrah chu a lo thlawna a luanral ka phalpui bîk lo che u. Min ringngam a nih chuan min ringtute ka tithlawn lo vang" a ti ta charh charh a. Awm a nuam huai mai. A mak a ni, Pa Zaia kan hriatchian em em pawh ni lo heti taka kan ring hi. Kan aikaih te a ni thei ang em? 

Ngaiha chuan, "Aih, Pa Zaia ka rin loh vang ni loin ro chu kan ak chhuak vek tur a ni. An ni pafain keimahni avanga tawrhna an hmachhawn ka remti lo bur..kan mawhphurhna a ni a, tuar a ngaih pawha tuar tlâng tur kan ni" a lo ti khauh ṭung mai. Kan han inhnial leh bap bap ṭhin. Upa ber chanchang leh amah vanga Robina te kut aṭanga chhuak thei kan nihna laiah a zahawm kan ti si a, a thu anga kal chu kan tum ta poh a. Kan kutah pawisa eng emaw zat a awm tawh bawk a, silai kan nei bawk. Buaina dang a awm leh a nih pawhin a tlachhe zawka ṭan loh hram kan tum mai a niang chu. Pa Zaia chanpual tur pawh kan kensak nghal vek a, suma kan chantir hunah a account-ah kan thawn mai dawn a ni. 

Motor veivak awm hmasa ber lo chân a, a theih chen chen chuan ve hnuah Champhai aṭanga zana Aizawl pan turin ruahmanna kan siam ta a. 

Mamtea chuan kan insiam mawlh mawlh a hmuh chuan, "A û, in haw tawh dawn ami?" A lo ti ve seuh seuh a. 

Zopari'n, "Aw..kan haw ang a, kan rawn zin leh vat ang. Lo dam ṭha zel rawh aw. Kawr mawi leh pheikhawk mawi tawk tawk kan lo hawnsak ang che" a ti siam siam a. 

Mamtea chu a ngui ve nghuai mai, "Apa nen chauh chuan a reh ee" a ti a ti mai. Ka khawngaih reuh mang e. Aizawla pem kan han sawipui lahin a pain a duh lo bur ve bawk si, a lo seilenna tlang dung han pelh chu a zuam chiah lo a nih a rinawm. Ka hrethiam tho mai. Mahse, pawisa a dawn veleh Mamtea chu School kaltir vat turin kan chah nasa, tum pawh a tum ve ngei kha maw. 

Rei pawh kan nghah hmain truck a rawn tlan a, a ding chat. Mamtea chuan nêl em em hian, "A pa Reng" tiin driver lubuk zet, hmulphurh chhe ve fahran chu a lo bawh cheng cheng a. Renga pawh chuan, "Eng nge ka lo hawn hi aw" tiin a ipte a dap ruk ruk. Chocolate a rawn phawrh ta a, an hmuhnawm dun mang e. Renga handyman Duata pawh chu a felin a nelawm viau. Pa Zaia inah chuan no hnih khat an han lem tê tê a, Champhai thleng kal tur an ni bawk a, a tihzia e. 

"Raltlan emaw ka ti dawn che u lawm le.." nelawm taka nui chungin a ti a. Kan lo nui ve tawp. 

Rei mawi tawk an ṭhut hnuah kal zai kan rel ta a. Mamtea leh a pate chu kan bye bye nasa mai. An ngaihawm vung vung dawn hle mai a..Truck hnunga balu chungah chuan kan sawt phei boh boh a, Zopari nen kan inngheng leh rial tawh. Farkawn pelh hnu lawkah Saia'n, "Khawchhung lut lo vang u aw" a ti a. Kan bu nghut nghut hlawm. A rûka thil engkim kalpui ngai hi ka ning tawh. In thlen vat vata zalên taka Zopari nen inrim ka châk tawh. Ka ranvulhte pawh an ngaihawm ta hle mai, ka ui zinga ka duat ber Rimtuia pawh ka mitthla nasa. Hriata te nupa pawn an mawhphurhna an lo hlen êm ang chu maw. Sawi lawk tawh angin Champhai khawchhung luh hmain kan chhuk ta dial a, mak min tih loh nan, "Kan thlenna tur ten min lo hruai dawn a,. Tah hian nghak turin min tia" kan ti a. An awih ve tho a niang, kan invailiam zui ta a. Waiting shed-ah kan han ṭhu leh ren rawn a. 

"Sumo hire tur a awm loh pawn private motor kan ngaihven mai dawn nia. A man lamah kan buai lo bawk a" Ngaiha chuan a ti a. Lungphu pawh a rang leh ṭan. Mitthlaah in lam a lang uar uar tawh. Keiin khawchhung kan pan ta a. Khua a thim ṭan tawh a, tin, zanriah ei reh vanglai a nih avangin veivak pawh an tam lem lo. Amaherawhchu, khawpui ni nâ nâ nâ chu motor veivak erawh a awm chho zut mai. Min ngaihven hran lo bawk a, a pawi lo. Petrol pump pelh lawkah thingpui dawr lian lo tak a lo awm a, kan lut ta dial. An eitur neih ang angin kan inhnawhpuar a, nutling thau lam leh a fanu niawm tak Zopari te aia û hlek tur an lo awm a. Min be lem lo. 

Kan inhnawhpuar zawhah Ngaiha chuan, "Ka pi, ka lo tibuai lawk che u. Aizawl thlenga hman tur sumo hi a awm remchang ang em le?" A ti ta a. 

An nufa chuan an han inmelh zawk a, nula chuan, "An awm ang ka ring,. U Fâna hi a lo haw tawh em le? A peih ka va ring" a nu melh pahin a ti a. A nu pawh chuan, "Peih ang, pawisa a mamawh êm kha. Be chhin la" a lo ti ta var a. 

Nula chuan a call nghal. Kan duh dan ang kha a hrilh nghal mawlh mawlh a. Keimahni min rawn enin, "Tunah mai hian em ni in duh?"a rawn ti a, kan lo aw dual. Fana a tih chu a be zawm leh ta a. 

A hman zawhah, "In vannei hle mai, a thei dawn hlauh e. Dar 7 velah a rawn thleng ang" a ti ta a. Kan thaw suai suai mai. 

Kima chuan, "Engzatin nge an hman tlangpui le?" A ti a. 

Nu zawk chuan, "Deasil leh petrol man a to zel tawh sia, tunah hi chuan sing thum leh sangnga velin an tlan tawhin ka hria. " A lo ti var a. Engzat pawh ni raw sek sek, kan khua kan ngai tawh. Hawn ngei ngei kan ngai. Ngaiha chuan, a ruk deuh hian, "Ka nau ka'n be lawk ang e, custom duty lam lo ngaihven turin" tih leh chhuah a rual a. Idea ṭha tak a ni. Min lo châng a nih chuan engtin emaw kan bungrua hi dah chhuah a ngai dawn tihna a ni mai. Dar 7 rik hma deuhin Fana chu a rawn thleng ta a. Pate lam, ngo var mai a ni a, a fel hmel thar thar hle. Kalkawnga ril a ṭâm thut pawha kamram tur eng emaw kan lei leh nual hnuah Aizawl thlen ngei tawh tumin Fana sumoah chuan kan lut ta dial a. A hmaah Ngaiha leh Saia te an ṭhu a. A hnungah keini pali. Kan bungrua erawh seat hnung berah kan dah ṭhât. Champhai khawpui chu kan chhuahsan ta vung vung mai. Fana chu a ṭawng duh reuh hle, "Khawchhak tlangdung fangin kan rawn zin ve a nih hi.. fan man a awm khawp mai" kan ti ta tawp. A awih ve mai. 

"He lam hi chu rawn fang hi an tam ṭhin teh asin. Lamsial pûk te, Lianchia râl venna tih vel, Kungawrhi pûk, Lianchhiari lunglên tlang. Fiara tui..aa..mizo te sulhnu hi a tam ve bawk êm a ni" a ti mawlh mawlh a. 

"Ni ngawt mai, Fiara tui hi Farkawn leh Vaphai hian an la inchuh reng em?" Ka tih chuan a nui suk a, "Aaa..khalam kha chu sawi tam vak chi pawh a ni lo ,inhnialna kan titam mai mai" a ti ta ngawt a. 

Kawlkulh kan thlen chuan kan nula te chu an muthlu barh barh tawh. A tlan chak over lo va, a tlan muang lem lo bawk. A motor khalha chuan pawh a nuam fû mai. Ngaiha'n, "Lungte pawh a lêng rum rum dawn alawm le" a ti lûng lûng a. Kei pawn ka lo ngaihtuah mek. Zêp nâk emaw a hunlaiin hrehawm viau mah se; Hriangpui khua te pawh a ngaihawm vung vung hle tak mai, U Kawla leh Thianga te, lalnu te, ka pu te chenin ka chunga ṭhat chhuah ve hram hramtu te kha an ngaihawm vawng vawng. Kan damchhungin kan inhmu leh ang em hriat a ni si lo. Chutah Pa Zaia te pafa an lo ni bawk. Kan zinkawng harsa tak kharah khan mi rinawm leh dik kan tawng ve zel bawk a, hahthlakin hlauhawm kar pawh ni se, kan nuna kan theihnghilh tawh ngai loh tur sulhnu min hnutchhiahtu te an la awm tal a. A zia viau alawm le. Chutah ro tam tak kan la hawn zui bawk nen. Ngaiha sawi hmangin a nau khan zingkarah custom lam chu a va ngaihven dawn a ni awm e. chanchin min rawn hrilh leh theih chuan keini tan chetlak hun a ni thei chiah ang a, a ṭha viau ang. Kan tlan tluang viau mai. Biate khaw daiah zunram thiarin kan ding zawk a, boruak a vawt sûk tawh. Aizawl lam erawh a la vawt lutukin ka ring lo. Kan tlan leh hnuah keipawh mutchhuakin min zêm a, ka muthlu ve ta bawrh bawrh mai. Eng khua khua nge kan tlan pelh ka hre lo. Thawm ring tak bakah rak tuar thawm ka hria a, ka harh rualin motor che lawih lawih leh kawngthlanga kan lum thla bawp bawp ka hre zui nghal. A bak chu a thim ta mup mai. Ka hmai chu tui hian a lo far pep pep a, thei leh thei loa mengin leilung lo lang ṭan rei ruai chu ka hre thei. Ka ke veilam na ngut ngut ka hriatchhuah rualin, ka nâk na chuan ka thaw a rawn kalh nghal a. Ka lu chu zawimuanga tichein ka hawi kual a, ka kut chuan thei leh thei loin ka mutna lai chu a dap bawk. Lungṭhil niawm tak ka zuk khawih fuh a,. Thawh kan mai ka tum chu ka ṭhulh chiang kher mai. Ka taksa pumpui chu a na chhuak vek. Mangang zetin ka thal leh huang a, kan chuanna motor pawh chu ka bulhnaiah a awm hauh lo. Theihtawpa thâwk lain, "Kima, Zopar. " Tiin ka han au a. Ka aw lah chu a zawi em em bawk si. Khawiah nge ka ṭhiante hi an awm tak ang? An la dam ang em? 

"Lalpa, min pui rawh" ti supin a vawi hnih nan inbenkân ka tum leh a, khur hlawk hlawkin engtin tin emaw chuan ka ṭhu chhuak thei. Ka ke veilam erawh ka tiche ngam lo, a tliak a ni tih ka hai lo bawk. Ka hawi kual ruai a, ka piah hlam 2 bawr velah chuan Mary hi a bawkkhup zawngin a lo mu a, a harh lo. Kan awmna lai chu lui kawr tui kang tawhna niin ka hria. Tuiin min far ka tih kha ruah mal a tlak pheuh pheuh vang a lo nia. "Mary" tiin ka han au va, a chechâng eih lo. Keilah chesawn thei lêk lovin ka na vek bawk si. Beidawng taka Mary ka melh tlawk tlawk laiin, "Chama, Kima.." Ngaiha aw chau tak thlanglam aṭangin ka hre ta. Rang lutuk hian, "Ngaiha..heta ka awm" ka ti piap a. Tlemin ka aw pawh a ring ta deuh. Zopari khaw nge? Khawiah nge a awm ve ang? Ni lo, a thi tur a ni lo. Ngaiha bawk chuan, "Ka kawng ruh hi a tliak niin ka hria, a bak hliam dang ka nei lo, ka chesawn thei lo, khawiah nge midang?" A rawn ti leh a. 

"Mary chu ka bul maiah a awm a, a harh lo..midang khawiah nge an awm ka hre lo" ka ti tham ṭuak a. A rum kâwk chu ka hre pha. 

Kei aiin a aw a la ring zawk bawk a, a theihtawp chhuahin, "Kima, Saia..Zopar, khaw nge in awm?" A ti ta lauh lauh a. Chhawntu reng an awm si lo. Tun ṭum zet zawng ka beidawng ta. Hlawhchham pumhlumin ka inhre tawh. Ka na vawng vawng. Tumah kan chesawn thei si lo, kan bungrua pawh engtin nge ni ang? Khawiah nge a awm ang? Ngaihtuah tur a va tam êm. 

Beiseina beithamtê la neiin ka han indap a. Lalpa leh! Robina nau pakhat phone ka laksak kha ka lo la ak mial e. Khur dur durin ka hmet eng a, battery a low têp tawh. Signal pawh tum hnih a lo la awm ve vâ vâ a. Ka nu number ka hmetchhuak nghal. 

An la tho lo nge ni a la thei lo, ka pa ka call leh a, mutchhuah hmel zet hian min rawn chhang ta. Tlangvala pumpa ka pa aw ka han hria leh kan tun dinhmun ngaihtuah avangin ka mittui a hnâm sawk mai. 

"Pa, kan accident a. Ka chesawn thei lo" ka ti nghal tâwng. 

"Mama,." A rawn ti hluai a. Ka ṭawng leh hmain, "Khawilaiah nge in chetsual i hre thei em?" A rawn ti a. Ka hre mai si lo, Ngaiha ka zuk au leh, "Kan awmna lai vel hi a bawr vel tal i hria em?" Ka zuk ti a .

"Tuivawl leh Keifang inkar tih chu ka hria, mahse, kan chetsualna lai tak erawh ka sawi thei bik lo" a rawn ti ta hlauh a, ka pa chu ka hrilh nghal vat. 

"Aw le, kan han inhrilh kual ang a, kan rawn kal nghal ang" a ti sawk sawk. Tlem chuan ngaih a ngam. Mahse, Zopari te khawiah nge an awm ve tak ang? Lalpa, damin min awmtir vek rawh aw..

 Ngaiha chuan, "Kan thlang deuhah khuan motor chu a dingin ka hria. Tah khuan Saia te chu an la tâng a ni maithei" a rawn ti a. Ka chauh leh nat êm avangin ka aw pawh a chhuak hleithei tawh lo. Nikhaw hre lovin ka lo awm leh a niang, kut vawr thler hian ka biang chu a rawn chul a, ka meng nghal zawk. Hmuh thianglo hmu ang maiin thâwk pawh thaw ṭha ngam lo hian ka melh ta tlawk tlawk a. Amah Partinchhingi ngei kha a ni. Ka chiang, kei hi ka thi ang a, he thlarau hi ka hmu zawk te a ni thei ang em? 

A nui sak a, "Zâm suh aw. Ka pui dawn che u alawm. I ṭhian pakhat tih loh chu nungdamin in la awm vek e" a ti sap a. Pakhat tih loh chu? Chu chu tu nge ni ta ang? 

"Tu nge pakhat chu?" Ka aw chu a hriat theih chang chang a ni ber e. 

"Pawi ka ti lutuk, motorin a delh a, chhan theih a ni tawh lo a ni. Sailiana a ni e" a ti ta a. Ka awmah hian hnawhtu a awm, ka thaw ṭha thei lo. Ka inrin loh laiin ka mittui a rawn luang nghal zawih zawih. Saia maw?! Saia, thichhawngin vawi 2 i awm a, tunah mahni in lam kan pan mek laiin i kal bik a maw?! Kan thleng ṭêp tawh asin. 

Ngaiha aw hian zawitê hian, "Cham, tu nge i biak?" A rawn ti khur dat a. 

Ṭâh aw ṭiau hian, "Ngaiha, Saia kan chân ta" ka ti ringawt. 

"Maw?! Engtin nge i hriat?" A rawn ti a. 

"Partinchhingi khan min hrilh a ni" ka ti sup. Van lam ka en a, ruah a sur tawh lo naa chhum erawh a chhahin a duk hle. "Lalpa, nuntir leh rawh" ka han ti ngawt a! Partinchhingi bawk kha ka hmaah a rawn ding leh vang a. 

"Midang chu khaw nge an awm?" Ka ti ringawt. 

"Motorah an la tâng. " A ti sep a. 

"Kan bungrua kha engtin nge?" Ka ti leh hrâm. Lusun lai pawn ro chu theihnghilh a har ngang a niang e. 

"An la awm vek e" a ti a. Lawm tho mah ila lawm a kim si lo. Nge kei hi ka mumang mai mai a ni zawk lo maw?! Mahse, ka harhin Ngaiha te kha ka be thei vek lawi si! Eng thil rapthlak nge maw ka la tawn fô dawn le..

Partinchhingi chu a kalbo leh tawh nge, thawm reh tlawk tlawk karah chuan na tuarin kan mu leh ta chawrh chawrh a. Ramhnuaia kan vahvaih lai kha a ngaihawm ta fê zawk mai. Engtin nge maw kan accident theih le?! Driver kha a muthlu em ni ang? Kan lum thui a nih ka rinna chu motor tlan ri chu a hla êm mai. Kan chesual lai hmutu an awm a nih loh chuan kan chesual tih hria an awm awm si lo. Ka pate ka be thei kha kan tan vanneihna tawpkhawk chu a lo ni e. 

Ka phone kawl lai chu a rawn ri tlang tlang a, "Bawiha, i harh em? Lo harh reng rawh aw. Lo tuar hram hram rawh u, i pate an rawn thang mêk a nia" ka nu a ni. Ka nuin min ngaihtuah tih hriat taka min rawn be mawlh mawlh chuan ka lungchhiat a tizual sauh. 

"Ka ṭhiante chhung in hrilh ve em?" Intihpachan tum takin ka ti a. 

"Aw kan hriat theih ang ang kan hrilh hria e. I pain, 'In bungrua avang khan mi hrang vak hrilh kha a remti lo va' " a rawn ti zawi sap. Ni e, kan haw dawn khan bungraw chungchang engkim kha kan hrilh sa vek tawh a ni. Mi hrang an lo lan a rem chiah lo ve bawk a, kan thil neih an hmuh ruala tlanbopui duh mai tur an tam dawn si a.. 

Rilrua Saia hlir ngaihtuah chungin ka chau tawngkhawng lutuk chu ka lo chhing leh hman a. Ka hminga min ko lauh lauh thawmin min kaiharh leh. Ka meng kâwk a, ka nâ pawh hrechâng lo lêkin, "Hetah kan awm" ka theihtawpa ring hian ka ti ta a. Mangan tawpkhawkah hi chuan kan lo pachang thei viau mai a lo ni. Ṭawng ri nak nak thawm ka hre zui a. Ka lo nghak ta ngat ngat mai. An rawn thleng ta huk a, ka pa aw hian, "Mama, Bawiha, hei i harh em?" Tih pahin ka lu a rawn sawi nawk nawk. Thatchhe zetin ka meng lep lep a, "Ka chau" tih chiah ka sawi. A bak chu min zawn chhuah lai awm vel ka manghriat ruai ruai a, a thim leh ta vek mai. 

Ka harh chuan damdawi inah ka lo awm tawh. Nikhaw hre loin ka awm rei âwm hle mai. Ka rilru a rawn fim ṭan a. Ka thiante khaw nge an awm ve ang tih ka ngaihtuah nghal. Kawngka chu a rawn inhawng a, ka û leh ka nute an rawn lut a. Ka lo en reng ringawt. 

"E! Kha i lo harh tawh maw? I ril a ṭâm em?" Ka nu chuan a ti sawk sawk a. 

"Ka tui a hal zawk" ka lo ti zawi raih a. Ka û in tui min tulh vat. Tam phei zawng ka in thei lo. 

"Ka ṭhiante kha" ka ti tham ṭuak a. 

Ka nu leh ka û te chu an inmelh zawk. Sawi hreh hmel zet hian, "Mama, a pawi ngawt mai, Saia a boral a, midang chu in ṭha e" ka nu chuan a ti ta a. Ka hriatlawk mah nise, a tak tak a nih meuh chuan Saia lainatna hlirin ka khat. Kha chen harsatna kan paltlang ho va, a tawpna hian duhthu a va sam si lo êm. 

Ka nu chu melhin, "A nih kan bungrua kha" ka ti leh hram. Hahdam hmel deuh hian, "I pain a dah ṭha vek e" a ti dam diai a. kan ro laihchhuah pawh kan ṭhianho kan kim si loh chuan a va ho dawn ve. A hlutna a tlahniam vek thei mawle. 

Ka hriat châk em em zawh ka hreh si chu ka hel fê hnuah, "Kan nula pahnihte kha eng nge an an ve?" Ka ti ta a. 

Ka û chuan, "Mary kha chu a lung lam chian loh vang a nia nikhaw hre lo va a awm ni, hliam na em em a nei lo. Kima a khawngaihthlak, a ke dinglam a sâwp vek a, an tansak tawh. Ngaiha pawh a kawng ruh tliak kha an enkawl mêk e, Chuan, Zopari a vanduai bawk. A hriatna a hloh a, a lu a lo sawh na viau a niang" a ti ta malh malh a. Ka chhing sawk. Zopari'n a hriatna a hloh a maw?! Kei pawh min hre tawh dawn lo tihna a nih chu! Ka taksa nâ aiin Zopari'n min hre tawh lo tur chu nâ ka ti zawk mah awm e. Mahse, engmah ka sawi lo. Kima pawh ka lainat takzet. Kan thiltih kha thil ṭha a ni lo a niang e, chhiatna hlirin min hmuak chu a ni si. Kan lo kal kher kher kha ka inchhir ṭan der tawh. Kei lah mahnia chesawn thei loin ka mu chawrh chawrh ringawt mai si. Ka ṭhiante pawh ka awmna Hospitalah ve tho an awm a, a tu amah chu kan inhmu thei chuang bawk si lo. Kan vanduai mang e. 

A hnu deuhah fim zawka ka han zawh chuan kan accident chhan kha ka rin ang takin Fana kha a lo muthlu a niawm e. Kan lum tirh khan ani chu a lo zuangthla hman a lo nia. A inhliam ve vak lo, mahse, a lumna lamah a silâwng ve hle tho a niawm e. Ka nute sawi danin ka pate rawn kal khan kan lumna lai tak hre bik hek lo, kan lumna zawn an rawn thlen lai chuan nula pakhat hi a lo ding ran a, ka pa ten biak tuma an din rualin a bo lehnghal a niang, mak an ti nasa mai a. Mahse, kei chuan ka hrethiam ,Partinchhingi a nih ngei ka ring. Hei chen min pui a, ramhuai fel tak a va ni êm. 

Mut duhnain min jection deuh reng a, ka ke tliak pawh kha an zawm tawh naa, rah ngam chi a la ni lo hulhual. Ka nâk ruh erawh ramtuileilo tur khawpin ka sawh na lo hlauh. Eng emaw changa ka thaw a rawn kalh leh zauh thin tih mai loh chu ka nâk lamah harsatna em em ka tawk tawh lem lo. Chutiang chuan chawlhkar khat dawn chu min khung ta. Ka nuin min riahpui a, chhunah erawh ka û in min vil thung. Ngaiha a chhuak hmasa ber a. Ani pawh a kein a kal leh tawh ngai dawn lo a nih hmel. Kima pawh ke lem an vuahsak dawn a niawm e. Ralkhat aṭanga ka lo hriat ve danin Mary a fel khawp mai, engkimah a pui vek a, a vil chawt a niang. Zopari erawh hliam dang nei ta lo chu an hawnpui ta a. Ama hming takngial pawh a hre lo. Kan thil tawn zet chu a rapthlak ti hian a hrilhfiah zo lo'ng e. Kei pawh ka nin tawh êm avangin chhuah ka dil ta tlut tlut a. Ka chhungte pawn min khawngaih ve bawk nen, in lama inenkawl tawh turin kan chhuak ve ta hram a. 

Inleng neuh neuh kan nei kal ve reng. Chhungkaw bila inkawmna hun pawh a la awm thei vak lo. Ka cousinte lah min kawmhlim tumin an lut ve reng bawk nen, kan zinna chanchin sawi tur ten min han ngen thul. A hnuah phei chuan a ninawm lek lek. Chimbuai reng chu ka ngaithei lo ta thuai a. 

Ka chhuah aṭanga zan 3naah chiah chhungkaw bilin zanriah kan kil ho thei ve ta a. Ka pa bulah ro chungchang chu ka sawi ta a. 

"Ni e, ka la thukru vek e. In zavai bag kha ka khawm vek a. A ngai ngaiin ka la dah ṭha. Mama, engtia han tih nge i tum deuh?" A ti a. 

"Ka hre tawh bik lo le. Ngaiha kan innghahna ber lah sawti saw a ni ta mai sia" ka ti hul hak. 

Ka nu chuan, "Engpawhnise, i pa paw'n an bag kha va sem kual tawh se a ṭha ang. Sir Dina ta tur pawh kha pe nghal se la. " A lo ti zung zung a. 

"Nia, a pawi miah lo, keipawh ka kal ve thei ang chu. Pa Zaia te pafa dinchhuahna tur tal chu tiral thei ila ka duh mang e" ka ti ve mawlh mawlh a. Damdawi ina ka awm lai khan engkim zawng zawng zep nei lovin ka chhungte hi ka lo hrilh tawh a ni. 

Ka pa pawh chuan, "Ni e, min zui ve mai rawh. Motorin kan kal dawn tho bawk a. I ṭhiante pawn an hmu châk ve tawh ang che" a ti ve luam a. Saia ruang êm pawh kil thei lo va kan han na vek mai hian mi run ber mai e a. Amah boral tawh mahse; a thawhrim rah erawh a chhungten an têl ve ngei tur a ni. Chutiang chuan ka pa nen ruahmanna kan siam ta a. 

Phone pawh min leisak tawh naa, biak tur em em pawh ka hre lo. Kima leh Ngaiha te ka be zauh zauh chauh,. Kan nun a inlet thawk hlawm ka ti mai. Kan ngui em em vek a, sawi tur vak pawh kan hre ngai lo. Ka han mu chu Zopari bawk ka mitthlaah a rawn lang leh ta. Champhai aṭanga kan chhuk tirhte kha chuan an ina ka len hun tur te a siamfel thlap a, inneih te pawh kan sawi hman ṭhelh a nih kha mawle. Tunah erawh a tan chuan awm ve lo ang mai, mikhual hmelthar mai chauh ka ni ta si. A taksaah hliam tawk zawk se a hriatna hloh kher lo hian te ka ti hial ṭhin. Kha chen kan lo inzui a, a hrehawm leh a nuamah pawh langsar si lovin kan inngaihtuah dun em em a, hetia vawi leh khata engkim a danglam ta mai hi tawrhthiam harsa ka ti ve thlâwt a ni. 

Zanah hian thinthiin ka la muhil thei mang lo. Ka harh leh thut ṭhin, ka phu zawk zawk zel bawk. Ka taksa la chak loh vangah an puh deuh. Nih pawh a ni mahna. Khua a rawn var a, ka tan chhun leh zan hian awmzia a nei tehchiam lo. He tah tak hian alawm rosum hi kan hlimpui ber anih lohzia ka chian tak em em ni. Ka pain kan ro hawnte a han dahchhuak pawh chu a melh pawh ka melh peih lo. Ka hua emaw tih mai tur a ni. Sawng thil vang sawn chân leh hloh ka ngah zozai ta. Tichuan, tukṭhuan eikhamah ka pa nen chuan ka ṭhiante tlawh kual tur chuan kan chhuak ta a. Saia te in kan pan hmasa ber. Ka va lut hreh tak êm aw. Inleng neuh neuh an lo la nei a, an chhungkhat an ni maithei a ni. A pa pawh a lo ngui bûr mai. Inleng awm laia han sawichhuah chi a ni chiah si lo, kan tlai a hlauhawm bawk si nen, Saia pa chu kan ko hrang ta ringawt a. An pindanah min luhpuiin thil awmze tlangpui ka hrilh malh malh a, Ro pawh chu ka pe ta nghal. Ro a hmuh rual chuan patling e ti lo chuan a ṭap fup fup a, "Mama, i thawhrim rah i seng ve hman dawn lo chu a nia tiraw? I vanduai bik mang e aw" tiin. Rilru a khawih takzet, lehlamah a damchhuak bik nih pawh a nuam lo lek lek alawm le. Rei pawh awm lovin Sir Dina te in lam kan pan leh a, an nuin min lo dawngsawng. Ro kan han pe chu a ṭap hawm hawm a, "Mami pa, heng thilte chu i tel lovin engtin nge ka chinfel ve thiam tehlul ang, i kal hma lua a ni" a ti vawng vawng bawk. A hrehawm a ni,. Kima te kan va tlawh ve leh ta a, wheelchair-ah a lo ṭhu ran a. Kan inhmu chiah chu , "Ṭhianpa, a pawi mang e tiraw!" Kan ti rual ṭhawt. 

Kima chu kan inzawm zual bik avang hian ka lainat takzet. A ngawi vung vung a, a hnu deuhah, "Pi pute serh leh sâng kan palzamna man kan tel a nih hi. Leiruangtuam kan laihna phuba a nih hi" mi pawh en chuang lo chuan a ti nghut nghut a. 

"A dik ang,. Kei zawng ṭhianpa, rote hi a melh pawh ka melh peih lo. Chhiatna thlentuah ka ngai tlat" ka lo ti ve bawk. 

"Kei chu ka tan Mary a la awm reng zawk a, tawrh pawh a zia zia a la awm..nang mawlh hi Zopari hriatna hloh hi pawi ka ti lutuk..ka ui ngawih ngawih a ni ber" a ti khur dat dat a. 

Sawi tur ka hre lo, ni lo, ka ṭawng chuan ka hnukulh ka hlau a ni zawk. Midang tlawh leh turin Kima chu kan chhuahsan ta phawt a. Ngaiha erawh phai lam an pan rih avangin kan pe thei rih lo. A chhungte bula hnutchhiah ngawt kha a tihchi ber lo ve bawk nen. Mary pawh kan va tlawh a, a lungchhia tih loh rual a ni lo. 

"Cham, ka khawngaih che êm mai, Zopari hriatna hloh hi nangmah vang hian pawi ka ti zual..a rapthlak a ni tiraw?" A ti mial mial a. 

"Kan thi vek zawk law law lo a.." ka ti hniam raih. 

"Mahse, Cham, beidawng lutuk suh. Engtikah emaw chuan a la dama te hi kan la inhmu khawm leh em em ang." Tiin min fuih ve nasa mai. 

"Ṭhianpa Kima hi thlauhthla lo hram rawh aw" ka tih chuan a insehruh a, "Chutimaia a kea a kal theih tawh dawn loh avangin kalsan duh tur chi ka ni lo' a ti nghet charh. Kima chu a la vannei tal alawm le. 

Zopari te doorbell kan hmet ri tlang tlang a. Rawn inhawngin Zopari nu chuan hawihhawm tak hian, "Eng nge ni ta? Lo lut r'u " a ti a. Kan lut ve nghal. Zakdawh tiang nen chuan ka ti ve thei hram hram e. 

Zopari chu a room aṭangin a rawn chhuak a, kan inmelh ta ngat ngat. Min hria emaw ka ti hman a, ka lawm ve tawh tehlul nen..

"Eng nge ni ta a?" A ti sep a. 

"Zopar, Chama ka nia.." tiin ka kut ka pharchhuak a, rawn hum ve chatin, "I va fel ve, lo ṭhu r'u" tiin choka lam pan a rual a. A ṭawng lâwng lâwng bawk. Zopari nu chuan, "I ṭawngvaih chang apianga a hming i lam ṭhin kha a nih kha. bawihte, hriatchhuah han tum teh' a ti sasawi a. 

Zopari chuan, "Ka hmuh rual khan min deng dawttu awm ang mai hian awm, ka nunah a pawimawh viau ṭhin a nih ka ring" a ti sar sar bawk. 

Mother Terresa thuziak hmamgin "A harsat lai kha i beidawn loh hun chu a ni" tih thu hi ka bengah a cham reng a, kan beidawn loh hun tur bera kan beidawn si chuan..

"Cham, kha thingpui aw" no a keng a, ka pa a pe ve bawk, kei erawh chuan ka hming chiang taka a lam avang khan min hrechhuakah ngaiin , "Zopar, min hria maw?" Ka lo ti vat a. 

Hamhaih hmel zeta min melh hâin, "Tu nge i nih?" A ti ta hû mai.