Leiruangtuam 11

LEIRÛANGTUAM (11)

Ziaktu : Toni Râlte

Hlauthawng takin thawm siam tam thei lo ang berin kan inzui thla hlawk hlawk a, kawng mumal a awm si lo, kan tleng leh puat puat ṭhin. Pu Zaia pawh Mamtea a pawm a, ka hnungah an rawn kal ve zel. Tu te emaw huan mawng niawm tak kan thlen chuan a lo zawl deuh a, kan hah tawh bawk nen, kan chawl ta a. Bakah thawm vâng engmah kan hre lo bawk nen. Kan hah lutuk chu kan thaw hluam hluam mai. Mary chuan, "A thuhrimin keimahni min man tura rawn kal an ni ngawt dawn em ni?" A ti a. 

Ngaiha chuan thawk la hawk hawkin, "Ni chiang e, Robina khan min lo set up alawm le.." a tih chuan mak ti zetin kan melh ṭhap. 

A hahdam deuh hnu chuan, "Ka han biak leh khan , 'Ka mi leh sa ka rawn tir a, in bungrua kha zat leh zata kan insem dawn lo a nih chuan a vaia chhuhsak in ni ang. Duhthlanna ka chhawpsak lai che u hian ngun takin in ngaihtuah dawn nia, tlanchhiatna tur in nei lo, Champhai khawpuiah hian mit leh beng ka ngah lutuk ' a rawn ti a. Ka'n hawi kual khan hotela chaw rawn ei ve, custom duty leh police ka va hmu ta si a, ka hlauthawng êm a, ka rawn tlan thla nghal a nih kha" a ti ta a. Robina chu mak kan ti ngei mai. A mitmeng leh cheziaah vertherna reng reng kan hmu si lo. Phai lam min sawihmuhtu zawk kha a ni si a! Mahse, khawvela kan awm chhung hi chuan rosum hi a lo hlu uchuak em a lo ni. Duhtawk chin nei thei lo mi duhâm vek kan ni si a! 

Saia chuan, "I ṭhianpa chu a timak hle mai a. Kan hma ngai ber niawm khan a ṭawng vel sia. Chutiang a nih chuan sumo-a Aizawl pan pawh a va him awm lo ve" a ti a. A sawi dik khawp mai. Robina khan kan rin aiin thil a tihtheih ka ring tlat. Buaina nasa zawkah keimahni leh keimahni kan inhnuklut ni berin ka hria. A sum faiin neih kan nei bawk si lo. 

Pu Zaia chuan, "Ka lo inrawlh ve lawk ang e. Rem in tih chuan ka inah let leh phawt ila, Aizawl lam pan tur motor veivak pawh hi hriat ka nei ve nual a nia. Chutiangah chuan beh dan a awm ang, tin, in him zawkin ka ring" a lo ti ve charh charh a. 

"Mahse, engtin nge in khua kan pan tak ang? Ke chuan a hla dawn sia" Zopari'n a lo ti vat. 

"Lungngai mah ta che. Khaw daiah motor kan lo chang mai dawn alawm. Tlan tawk an awm ngei ngei ang" Pu Zaia'n a lo ti a. 

Chubak kawng dang neiin kan inhre si lo. Rilruin arbo a zawng a ni ber e. Zawi zawiin kawngpui pawh tumin kan inzui leh ta dam dam a. Ngaiha phei chu a lungawi lo viau a niang, ṭawng pawh a ṭawng tawh lo. A ṭhianpa a rin êm êmin a phatsan a ni si a. Kawngpui pawh kan hnaih ta. Motor tlan ri pawh kan hre thei tawh. Pu Zaia chuan, "Mamte, i û te bulah hian lo awm lawk rawh aw. Mi ka han thlithlai ang e" tiin amahin a han bawkvak chho a. Mamtea pawh a fing reuh bawk a, engmah thawm a siam lo. Pu Zaia chu a rawn lêt leh vat a, "A him e" a rawn ti sar sar. Thaw huai chungin kan bawkvak chho ve ta ṭhâm ṭhâm a. A engah chuan Champhaiah hian kal nge maw kan nih le..kawngpui kan pawh takah chuan rinhlelhawm thei lo ang berin Farkawn khaw lam panin kan inzui a. Motor remchang kan lo phar tawp mai a niang chu. 

Waiting shed lo awm hmasa berah chuan ṭhuin motor kan chang ta. Kan hlauthawng bawk si chu kan hawi tawn zak zak reng mai. Hotel kan chhuahsan tih kha an hriat rualin min rawn umzui ngei kan ring. Mahse, kan vanneih asiamin rei kan ṭhut hma chuan Pickup a rawn tlan ta mial a. Pu Zaia chuan a lo phar vat. 

"Dinga tehhlawl chu, a va lawmawm ê..hawn kan duh a, motor kan lo chang a, kan lo bet ve mai ang aw" Pu Zaia'n a tih lâwng lâwng takah chuan kan ngaih a ngam deuh huai. 

"Lo kal r'u, i nau te em ni? " Min rawn melh kual pahin Dinga chuan a ti a. 

"Aw nih hi, khi lama kan unaute an nia, Champhaiah hian ka va hmuak e ka tia, rin aiin an rawn tlai sia, kan tangkhang ta a nih hi" Pu Zaia chuan a ti ta zung zung a. Raltlan anga kan awm a ngai a nih awm chu, kan himna a nih dawn phawt chuan a pawi teuh lo. Pu Zaia leh Mamtea te chu a chhungah an chuang a, keini chu a hnungah kan ṭhu ta ṭhâm mai. 

"Aizawl kan then theih pawh hi ka ring tawh lo" Saia'n beidawn hmel fê hian a ti a. Kan hnual ngawih ngawih tih kan hmelah a lang reng mai. Ngaiha lah biak ngamawm loh khawpin a hmel a rum. Lehlamah a tan phei chuan a nuam lo zual ang, a ṭhianpa rinchhanin keini pawh hei chen min hruai a, a beisei angin engmah a thleng ta si lo. A tumai pawh chu kan ngawichawi takzet. Phone hman tur tal awm se chhungte kaltlangin thiltih dan dan pawh a awm mai tur. Farkawn kan thlen chuan zan dar 10 a pel tawh. Kawng a chhe êm a, a tlan chak hleihtheih loh bawk nen. Dinga chu a tlawmngai viau mai, Farkawna chhuk tur kan nih laiin Pu Zaia in thleng min thlah a. A lawmawm tak tak a ni. 

Ina kan han lut leh chuan ṭah a chhuak rum rum thei mawle. Kan suangtuahna leh duhthusamte kha an thamral ka ti mai, thil a rawn thleng thut thut zel bawk si. Pu Zaia chuan min thlamuan hram hram a. "Naktukah motor kan châng ang a, in khua in thleng thei em em ang. Lungngai lutuk suh u" tiin. Ro avang hian kan nun a danglam tawhzia ka ngaihtuah, kan him lo va , khawi hmunah mah kan zalên hek lo. Hetiang a nihte chuan rosum ngah pawh chu a va nuam ber chuang lo êm. Hausak kan duh luatah sal tângah kan insiam a ni hawt alawm le. Kan mu pawh chu kan mu nghet fahran lo hle. Zopari pawh a rawn phu leh zawk ṭhin. Hmeichhe pahnih hi an khawngaihthlak zual. An chhungte pawn an ngaihtuah tawh ngawt ang. 

 Khua a rawn var a, phur vak loin kan tho a. Kan bag te chu kan han check ṭha leh a. A la kim ṭhap e. Ngaiha'n, "Mai mai a, Aizawl thleng thla ila ka theih anga rangin phai ka dawr nghal ang. Robina hi kan hmakhalh zar zar tur a ni ringawt mai" a ti tûn tûn a. A thinrim a la reh lo tih a lang. Chaw pawh kan ei tui meuh lo. Mamtea te pafa pawh an ngui ve nghiai mai. 

Kan eikham kan insengfel laiin Dinga bawk kha Ṭiau-a a kal tur a rawn ding kawi a. Pu Zaia'n lawmthu sawi nan nizan khan a sakhi rêp kha a pe ve nghe nghe. Dinga chuan satliah deuh hian, "Ka rawn kal dawn khan Champhai aṭangin custom duty nia insawi pahnih leh Police pakhat an rawn kal a. I naute hi an ringhlel ve ringawt mawni ka tia..pi Duhsangi kha i awmna hmun an zawt a" a ti a. Kan lo phâwk hrâ thung. Pu Zaia pawh a danglam deuh, "Ve leh ngawt hian, an thawmhnaw tlem bak rawn keng hman lovin an rawn tlanchhe ve ṭâwk ṭâwk a. Man tur hi an duh leh lutuk a" a ti bul bul. Dinga pawh rei awm lovin a kal ta nghal a. Keini pawh kan che ta vat vat. 

"Robina khan ro kan kawl ngei tih a chiang si a, a hrilh vek tihna a ni mai a, chuvang chuan kan ro zawng zawng kan thuhruk chu a dik lo vang. Pahnih khat kha hmuh ila an lungawi mai lo'ng maw?" Ka ti a. 

Kima pawh chuan, "Ni e, a vai vaia kan thuhrûk chuan min dâwp nasa zawk ang. A manto vak lo tur ang kha hmuh ila a ṭha mai" a lo ti ve sawk sawk. Mahse, kan ro chu khaw nge kan thuhrûk tak ang? Pu Zaia in bakah a huan zawng zawng an fang dawn tih kan hai si lo. Pu Zaia chuan zaidawh deuh hian, "Naute u, chiai suh u. Min ringngam a nih chuan in ro chu him takin ka lo kawl thei ang. " Tiin pindanah min luhpui hlawm a, an mutna chhuat bula thingphel chu a phawng ta mai a, a in hi a sang lutuk lo va, a in hnuai zu luh dawn chuan keini puitling chu kan bawhvah a ngai ang. .. Chu thingphel chhuat hnuaiah chuan hetia han en mai pawha satliah tak maiin rangva chhe tawh lam hi a lo inphah a, chu rangva a han keu hawn chuan mihring pathum leng tâwk vel hi a lo kaw rûl mai. 

"Rikrûm thil atana ka siam ve a nih hi. Eng emaw tawh palh hlauh pawha ka fapa nen himdama kan awm theih nan" a ti sauh sauh a. Chu a in hnuaia a laihkhuarah chuan kan ro te chu kan dah ta a ni. Ka sawi ang khan a man man lo deuh tur rangkachak lian vak lo leh darthlang ang maia tung sei ît êt pahnih kha kan dah chhuak thung. Chutiang chuan min man tuma lo kalte chu kan lo nghak tawp mai. Lung erawh a zîng ru viau. Mawnga hawlh ang mai kan ni. 

Kan beisei ang ngeiin kawtah motor a rawn inhung dawt. Bolero var a ni nghe nghe. An rawn chhuk sap sap a, pa zahawm tak hmel pu vek an ni. An mitmeng erawh a nelawm tehchiam loh. 

"Report kan dawn angin nangni ho hian rangkachak leh lunghlu in tawlh niin kan hria a. Man tur che uin thupek kan hmu a ni" a palian ber chuan a ti ta a. 

Ngaiha'n, "Tuin nge min report?" A lo ti chat. 

"Nangmahni hrechiangtu che u a ni tawp mai. Min rawn zui a ngai. In bungrua nen khan" paliana bawk chuan a ti leh a. Saia'n, "Kan tawlh a nih chuan tu te hnenah nge kan hralh?" A lo ti ve leh hmak. 

Pate zawk chuan, "Nangnin min hrilh ang chu. Keini chuan dan leh thupek kan kengkawh mai chauh a ni. Lo kal r'u le..nang pawh khan min rawn zui a ngai" tiin Pu Zaia a kawk a. 

Kan ri ve ta phat hlawm. "Ani hian engmah inrawlhna a nei lo, a inah kan thleng a chu zawng chu..ani hi chu man lo hram rawh u" tiin kan ngen ta a. Naupang a awm thu chenin kan sawi. An inbekbawr sur sur hnuah "Aw le, a ṭul dan angin ani pawh kan la buaipui ang, smugller a lo ṭanpui avang pawhin hrem tlak a ni" an ti a. Ka thin a khei hle. Mahse, ṭawngsual kan hlau tlâng êm mai a, kan ngawi ta rih. Pu Zaia te pafa tel lo chuan an motorah leng leh leng loin kan inhnawh a, Champhai lam bawk min panpui leh ta. Mahse, a tam zawk kan thukru a, kan lungngai lutuk lo. Min tihlum te a nih ngawt loh chuan chhuah hun kan la nei ve leh ngei dawn a. Kan fimkhur viau chuan kan paltlang thei tawh ang. Kan insawh phei bup bup a, an ni lam an ṭawng lo va, keini pawh kan ngawi dâk. Champhai kan thlen chuan Police station-a min kalpui ta lo leh Custom office-a min phur ta lo chuan veng tlabirh lamah min phur ta daih mai. Kan inmelh hrek hrek ringawt. Kan tlan zel a, in ding pawh a khât ta tial tial. Kima dawhthei ta lo chuan, "Khawiah nge min hruai in tum?" A ti ta tawp a. 

Nui huah huah chungin paliana chuan, "In hre mai ang" a ti duh lek. Kan hlauthawng ṭan ta. A tawpa tawpah khawi lai hmun nge pawh kan hriat loh kawng te taktê motor leng chang chang zawhin hmun zâwl laiah kan ding ta dawt a. Chhuk tura min tih angin kan chhuk sap sap. Hmun zâwl bul maiah chuan concrete in lian tawk tak hi a lo ding luah mai a, rawng hnawih a nih loh avang erawh chuan a hlui hmel deuh. A reh ruih mai a, a hmunhma vel kan han enkual chuan kan mengphar nasa mai. Ganja hmun a lo nia! Ganja kung a khat dul mai. Ganja karah chuan thing tuai a ding thliah thliah bawk. Min mantute chuan in lam chu kawkin, "Lut r'u le" an ti a. Kan lut zui ta. 

In chhung luh chiah chu a lo ruak huai a. Dawhkan leh chair pahnih a lo awm ve. A sir deuha in hnuai luhna kailawn lam chu min panpui lehin min chhukthlakpui leh ta zawt zawt a. Pindan pakhat kan zu pawh. A lo thim deuh ruai a, boruak pawh a uap angreng viau. Dawhkan sei pêt pût hi a lo awm a, a bak chu parcel intiat lo tak tak hlirin a lo khat. Chu pindan chu kalpel lehin pindan pakhat tukverh pawh awm lo, rimtui vak loah min dahkhawm ta a. Chu pindanah chuan dunlop balh hmel zet zet hi a inphah zûi mai a. Kawmawl sen hi hnawk niaihin a lo awm nuai bawk. Chu bak thildang hmuh tur a awm lo. Mak kan tih vang nge tumah ṭawng nachang hria pawh kan awm lo. 

"Ṭhu rawh u" tiin dunlop hnawkhnai zetah chuan min nam ṭhu a. Kan bag te chu an lepse chho ṭan ta. Kan dahchhuah lawk tawh rangkachak lian lo tak leh darthlalang sei ît êt pahnih bak kha hmuh an nei ta si lo. Kan bag chu an lepse hneh kher mai. Mahse, kan thawmhnaw leh chung thil bak hmuh an nei si lo. 

Paliana chuan, "Khawiah nge a dang in dah? Sawi vat rawh u, in thukru em ni?" A ti khur khur a. 

Pawisawi loh hmel taka enin, "Ka pu, kha bak kha kan nei lo. Kan ti tak tak" ka ti a. 

A vir vut a, a phone lain pindan a chhuahsan nghal. Tu tak call ang maw? Patê zawk erawh chu a vei kual sek a, "Hotupa rawn lan hunah in inpuang tho tho ang. Na tuar loa chhuah in duh chuan tunah hian khawiah nge a dang in dah sawi mai rawh u" a ti lûng lûng a. 

Kan ngawi tlat bawk si. Police uniform-a inthuam kha a rawn lang ve a, a pistol pai chu chhuan hmel fahran hian a lek kual vel a, "Ka silai hian hna a thawk lo rei tawh a nia aw. Nun in la duh ve a nih chuan thudik sawi mai rawh u" a ti ve leh khur khur a. 

Ngaiha'n, "Sir, Police custody-ah emaw Custom office -ah emaw engvangin nge hruai kan nih loh?" A ti ta sak mai. 

Police chu a nui sâwng a, a hmuihmul zawng zawng nen a va ngeiawm kher êm. "He lai hi custody chu a nih hi, keimahni custody" a ti ham ham a. An tana thawk a ni nge an tham kual zawk le..

Paliana kha rawn lut lehin, "Boss chu ka be tawh e. A rawn kal ang" a rawn ti a. Thil kaldan riruang chu kan man thiam ta. Boss an tih chu Robina a nih loh reng kan ring ta lo. Mahse, tuman engmah kan la sawi duh chuang lo. An ni ho pawh chuan chutia min rîkrap reng chu an ning ta deuh nge, min kalsan ta. Pindan kawngka chu pawn lam aṭangin an kalh nghal rawk rawk bawk. Chulai pindan zimtê, tukver tangial pawh awm loah chuan eng chen nge min dah ang le..?! Khua pawh a thim tawhin ka hria. Pawnlam hmuh theih hek loh. Min dahna pindanah chuan electric bulb pakhat sen rîm rêm a awm ve a, chu chauh chu kan êng neih chhun a ni mai e. Ril lah chu a ṭâm ru riau lehnghal a, eitur min pek an tum lo nge mawni..darkar khat dâwn kan awm tlawk tlawk hnuah pindan kawngka chu rawn inhawngin Robina ngei mai chu a rawn lut ta zân zân mai. Ngaiha thinrim lutuk chuan a hachang a ṭhial bawp bawp mawle. A tan phei chuan a thinurthlak duh dawn êm a ni. Chair rawn keng lutin chutah chuan a ṭhu ta nghal a. A hmel landan dam thlup kha a la ngai reng. Engtin nge kan lakah hetiang rilru hi a put theih tih chu rin harsa tak a ni. 

"In ril a ṭâm tawh em?" A ti sup a. 

Kima'n, "Ṭâm khawp mai" a lo ti hmuk. Chuveleh a bula ding chu signalin chaw han la turin a tir ta nghal a. A lalna ramah chuan a lal hmel vet vet kher mai. 

Ngaiha chu melhin, "Ṭhianpa, khatin mak ti hmel pu hû lo la..sumdawng kan nia, i hrethiam em?" Nui chungin a ti luam a. Ngaiha thinrim lah chuan chhan dan tur a hre lo nge, a ngawi hmak mai si. 

"Aw le, in chaw ei tur an buatsaih chhungin lo inkawm ang u aw. A hmasaberah chuan kei hi rangkachak leh lunghlu hmanga sumdawng ṭhin, tuman an hriat si loh ka ni e. Heng ka dawrte hi chu ka hmaikawr mai chauh an ni. Tunah hian ro tam zawk in laihchhuahte chu in thukru tih kan hria a, khawiah nge in thuhrûk sawi u la, ka naute ka va laktir ang a, tichuan, in zalên nghal a ni mai" a ti ta nghut nghut a. A thisen a sang ve hle mai, kan pu-a chu..

Saia'n, "Kan laihchhuah chu kan rawn keng e. Kha bak kan nei lo tlat. Tin, lo nei tehreng pawh ni ila, hah taka kan laihchhuahsa nangin i lo fanghma no ei theih ngawtna dan a awm tlat lo. " A lo ti chang rût a. 

Za vak lo va nui chungin, "Nangni paw'n mi ro phumrûk in laihchhuah chuan kei hian engah nge ka lo pumbilh loh ang? In hriat tur chu, engmah pe lova kaltir che u ka tum hran hleinem, Aizawl in thlen theihna tur khawp sum leh pai chu in dawng vek ang" a ti leh a. 

Ngaiha'n, "Robin, i lo danglam ta hle mai. Hetiang khawpa mi duhâm leh pawisak nei lo i ni tih ka lo hre ngai lo va. I nihna dik tak ka hre ta hi ka lawm khawp mai. Tin, ro hi a dang kan nei lo va, he lai hmun hi dama min chhuahtir ka ring hek lo. Mahse, engtikah emaw chuan tlukchhiat hun i nei ngei ang, chu chu ka ṭawngṭaina hnuhnung a ni ang" a ti ta sak sak mai. 

Robina'n a ka a ân lai takin chaw rawn dah tur an rawn lut a, a ngawi leh ta rih. 

"Tikhan in zanriah kha tui ti takin lo ei phawt rawh u, zanah ka rawn hmu leh ang che u" tiin min chhuahsan ta a. kan chaw dawn chuan hnukte pawh a tiulh lek lek thei. Chaw hmin ṭha lo tih hriat zet, dailuah dal lutuk tak mai leh alu tui neia kan, tui loh hmel zet an ni. Mahse, rilṭâma thih ngawt ai chuan kan ei mai a niang chu. Mary phei chuan a helh âwl âwl mai. Ramhnuaia duh duh dana chawhmeh kan vâi theih lai kha a ngaihawm rum rum thei mawle. Keimahni chauha kan awm lai chuan kawngka bulah min ngaithla rutu te an lo awm em tih ngaichângin kan va ding vang vang a, an awm lo nia kan hriat avangin kan awm zel dan tur kan sawi ho ta a. 

Engtikawg zawng maha ro awmna chu sawi loh kan tum vek, eng anga indâwpna leh innghaisakna pawh tawk mah ila; sawi lo hram turin kan intiam ta hlawm a. Pu Zaia te pafa mawlh khan an tuar ang tih kan hlau takzet. Pawisawi lo an ni si. Dik tak chuan han ngaihtuah ve mah teh u, harsa leh hlauhawm hrang hrang kara rim taka kan thawhrah kan rosum te, engmah thawk ve loin a pumbilh hmak tur chu..kei phei chu mi rilru sakhat tih takah thi zawk ila ka lawm zawk ang. Ka ui dawn lutuk. Ka hlauh ber erawh Zopari leh Mary te an khawih ang tih hi. 

Saia'n , "Heta ṭanga chhuah theihna kawng kan zawn hmasak ber a ngai. Heta cheng hi engzat nge an nih hre hmasa bawk ila.." a ti a. Tuna kan awmna pindan aṭang hi chuan engti kawngmahin kan chhuah a rinawm loh. In chung lamah tal kan awm a ngai. Zan dar 8 pelh hlekah Custom duty lem leh constable lem te kha an rawn lut leh a. 

"In lo sawiho tawh kan ring a, khawiah nge in thuhrûkna hmun chu min hrilh tawh rawh u le" police lema ṭang khan a ti a. A ha a kuh roh si, a meng zek zek bawk nen, chhipthlak bur mai ka va han châk tak. 

"Engmah kan thukru lo, kan neih zawng zawng chu in la tawh.. " Kima'n a lo ti hmak hmak. 

"Sawrkar beng a thlen emaw custom office lama hruai in duh loh chuan sawi vat rawh u" paliana khan a ti thûr thur a. 

"Ekhai! Min hruai mawlh rawh u, kan châk sakhai alawm. Fake in ni tih hrethiam lo khawpa mawla min ngai chu in ropui hle mai" ka lo ti ve ngat. 

Paliana bula mi chuan, "Hetiang chuan an sawi dawn lo tawp mai. An thlen inpa te pafa kha i va nghaisa mai ang u..an ka an âng awm em mai" a ti lûng lûng a. Ngaipawimawh lo awm deuh hian, "A ro pawh hmu ve hawt lo in nghaisak duh a thu le.." ka ti nghut. 

Rilru erawh chuan an va nghaisa tak tak ang tih a hlauhawm. Kan ngaihtuah ṭheuh mai si a. Pu Zaia chu chutimaia a inpuan ka ring lo naa, a fapa a hmangaih em em chunga hriam an lek a nih vaih chuan a sawi chhuah duh mai ka ring. Ka dem hran lo bawk ang. Rilru chhungril chu a hah hluah hluah. 

Chaw min rawn petu khan kawngka a rawn hawng a, "Puin a be duh che u " a rawn tih avangin an kal leh ta dial a. 

Chuveleh Ngaiha'n, "Ṭhiante u, idea ka nei. Pu Zaia te pafa chunga an ṭuan lohna tur leh kan tlanchhiat theihna tur kawng awmchhun niin ka hria. Tihian ti teh ang u..ro chu khaw thlen hma khan fimkhur thilah hmun pakhatah kan phûm ṭha a, heta tihral theih a nih leh nih loh hriat hmasak phawta thehthang theih a nih chuan va lak leh kan tum a..tiin sawi ta ila, chulai hmun chu min panpui ngei ang a. Kan tan tlanchhuahna kawng a inhawng a ni mai" a ti ta mawlh mawlh a. 

Zopari'n ,"Mahse, kan vaia min hruai ka ring chiah lo, fimkhur thuhlaah pahnih khat hi chu min kawl ang" a lo ti khauh. A sawi dik bawk si. 

Saia'n ,"Mahse, tu emaw ber kan tlanchhuak thei a nih chuan Police kan pun tawh mai ang chu.." a lo ti ve ta zel a. Rilru a nuam ṭan ta. Mahse, risk kan la dawn tihna a nia. 

Mary chuan, "Kan chhungte ṭheuh kan be tawh bawk a, haw vat tura min ngaih laia kan haw vat loh chuan hma te pawh an rawn la ve mai lo'ng maw?" A lo ti ve a. Hei pawh beiseina nen thlir phawt teh ang. Ro kawl chu buaina a tam ta ngei mai. Pathian duh loh zawng kan ti ta pawh a niang e. Hausakna um lutuk chu hei hi a tawpna a ni châwk. Rilruah inthiam lohna a awm rûn reng mai. 

20 mins velah Robina hoin an rawn lut ta huk a. Hmanrua hriamhrei engmah an keng lo chu a mak angreng. Mahse, an puanhnuai te pawh a niang e. 

"Ṭan ṭan a sawt lo. In thlen inpa te ina kal turin ka naute ka tir chhuak chiah. Dâwt insawi emaw thup in nei a nih vaih chuan an ni pafa pawh sawn an tuar ngei ang. Tin, thudangalai chuan, in nula pahnihte hi kan nauten an hmu tuihnai riau a, zanin chu kan lo kawl hawh ve lawk ang e" Robina chuan a ti sur sur a. A nui pah reng bawk. A hmelhmai en chian chuan mi nunrâwng ber khawsaziain a khawsa tlat. Kan lo en chîk lo mai mai zawk a ni. 

Ngaiha chuan, "Aw le..ṭhiante u, min dem lo mai teh u. Kan thlen inpa, engmah pawisawi ve lo ten an tawrh ai chuan thudik sawi mai hi a ṭha. Ni e, ro chu in suangtuah phak aia tam kan laichhuak ngei e. Mahse, khaw chhung rawn luhpui ngam chi a nih loh avangin leilet pakhat thlen hma ruamah kan phumbo rih a. Helama thehthang theih a ni tih kan chian hunah va lak leh kan tum a ni. Robin, hei erawh ka phût ve e. Kan ro te hi i la dawn a nih chuan, i sawi lawk tawh angin himdam taka Aizawl kan thlen theihna tur min paipawn chu a ngai ang. Tin, dama chhuah vek ka duh bawk. A chiang em? Finrâwl chhuaha ro in hmuh ruala kan nunnain a tuar dawn a nih chuan, hetah hian min that nghal thei ang. Ro pawh in hmu hek lovang. Chuvang chuan , ro la tur in kal a nih chuan..intiamkam nan ka ṭhiante hi an zalên phawt tur a ni. In kutah keimah ka awm thung ang. " A ti ta charh charh mai. Ngaiha chu remhria ka ti takzet. 

Robina te hmel buai nak pawh ka hmuhhmaih lo. Ngaiha lah chuan dawt sawi hmel reng a pu si lo, heti taka Ngaiha'n lemchan a lo thiam hi mak ka ti zawk. Saia nena an lo tihsual tawhna khan a siamṭha hle tih a ṭhiante min ngaihpawimawh danah a lang. Hlauthawng ru takin Robina te chu kan lo ngaichâng ran a. 

Chutah le, "Dâwt i sawi lo a ni tih engtin nge kan hriat ang?" A ti ve ta chat. 

Ngaiha lah chu hul fêa nui hakin, "I thu thu le..i awih lo a nih leh i chân a ni mai, ka tan a ṭha zawk. Thi mah ila, ka chhungte bulah kan phumna ka hrilh vek tho" a ti ta hmiah mai. Ngaiha thluak thatzia chu aw. Robina pawh a buai ru hle tih a lang. 

"A nih chuan zanin la laah va lak duh ta ila" a ti leh a. 

"Chu chu keipawn ka duh rêng a ni. Mahse, ka ṭhiante leh Pu Zaia te an him ngei em tih ka chian phawt loh chuan min hruai lul lovang" Ngaiha chuan a ti zangkhai vah a. A inrintawk êm avang chuan Robina leh a naute pawh chuan an ring titih ta niin a lang. Tichuan, a hote Pu Zaia ina kal mêkte chu a call nghal a. Farkawn khaw thlen hmaa lo nghak turin thu a pe bawk. Keini ho chu pindan uap zet aṭanga min nawrchhuakin kawt zawlah min dintir leh ta ṭhâm a. 

"Dâwt in sawi anih vaih chuan he khawpui hi ka ta tihtheih khawpin ka mi leh sa an tam a nia, in him dawn chuang lo tih kha inhre phawt u la, Ngaiha hruaiin in ro phumrûkna hmun chu kan va fang dawn a, kan thang hlana police emaw tu te emaw in biakpawh loh nan ka naute zing ami in an thlithlai rih ang che u. Chutia mawl viau tura min ngai a nih chuan in dik lo hle ang. Finrâwl chhuah in tum a nih teh zawngin in nunna mai mai chu ka ngaihlu lo nasa a nia. Ro kan va hmu a nih erawh chuan he khawpui rang taka in chhuahsan theih nan hma ka la nghal ang. Chumi hnu lama kei min hêk in tum a nih chuan, nangni pawh in inbarhlut tih hre nghal bawk u la, sawrkar hriatpui lohin ro phumrûk in dap a, dan in bawhchhia tih in puangzar lek fâng a niang. Tin, min lo hêk thei pawh ni tehreng u la, kei min hrem thei tur chuan tuna dan leh thupek kengkawhtu tam zawk hi mi thar hlak an nih a ngai ang. Ka sawi awmzia in hria tiraw? Dama in chhuak thei tur hi lawm hle zawk ang che u" Robina chuan a ti nghut nghut a. A aw chu a nêm tawh lem lo. Tin, a sawi ang tak khan a che bawk ang tih kan ring thiam nghal bawk. 

Ngaiha chuan, "Kan hmanhmawh loh chuan kan kalna tur a la hla viau a nia" a lo ti a. Tichuan, hmanhmawh angreng takin Eco vanah min hnawhlut rawp rawp a, Ngaiha erawh Robina te bulah a chuang thung. Kan tlan leh ta mawp mawp a. A tu amah chu kan ṭawng lo. Zopari te phei chu an muthlu nghe nghe. Ngaiha nen inbiakna hun kan neih tawh loh avangin engtia chet lak zel tur nge ngaihtuah a ngai si, rilru a buai duh riau mai. Darkar thum dawn kan tlan hnuah a ding ta chut a. Kan thleng ta e. 

Zan dar 12 a ri thuak tawh. Pu Zaia in chu a lo eng pap a. A reh ṭhap bawk. Kan kaitho lo thei si lo. A rawn thawha min hmuh chuan a mengphâwk ve deuh, theihtawpa mitmei ka tum a, a man thiam ve ni tur a ni. "In lo haw leh thei chu a va lawmawm êm. In ro te chu an man ta em ni?" A lo ti thluam a. 

Kima'n, "Aw, min laksak ta a nih kha" a ti chhum hmak. 

Robina a rawn chhuk ve a, rum angreng taka Pu Zaia melhin, "Pu-a, hei i naute hi i inah kan hnawhkhawm rih a ngai tlat. Ngaihawma'n an ro phumrûkna hmun min hruai thlen chhung tihian ka naute ho nen an lo awm ang a, nang hian finrâwl chhuahin khaw mite pûn i lo tum a nih chuan i fapa sawn pa a nei lo nghal a ni mai. I hrethiam em? Ro kan hmuh hunah i damchhungin kan tibuai leh tawh lo vang che." A ti thûr thur a. Robina kan hmuh hmasakna ber nen chuan inthlau tawh tak a ni. A mitmeng pawh duhâmna hlirin a khat tawh. Pu Zaia pawh chu a ngawi reng a. Tichuan, Ngaiha hoin thil awm miah lo zawng tur chuan an tlan liam zui ta. Keini erawh Robina hote zinga pahnihin min veng a. Robina hi a â lo viau mai. Sumdawng ve ve an indawr dawn chu a nia, Ngaiha chuan engtin tak chet la ang maw. Robina bakah Paliana te pathum khan an zui ve bawk si, a tan chetlak a har viau ngei ang. Keini heta min hnutchhiah ngawt dan ngaihtuah chhuah ka tum nasa, Ngaiha chu sawi tawh angin tharum hman a ngaih pawha hmang thei mai. Pawisak neih loh hunah chuan nunrâwng taka chetla thei mai a nih avangin min vengtu te chunga hriam lek mai turin min duh a nihte ka ring rum rum. An ni kan tukzal thei a nih chuan ro kan phumrûk te kan la chhuak thei ang a, Tin, Pu Zaia te pafa pawh kan hruai tel a ngai ang. Mahse, chulai tak chu buaina a ni. Inbiakpawhna engmah kan nei si lo va, Ngaiha chuan engtin nge min rawn pawh leh theih ang? Police kuta tlukluh ngawt pawh Robina mi leh sa an inphûm ru ṭûn dawn a, a him miah lo. Ro kan ak tel a nih lek phei chuan..hmm, tihdan ka hre ta e. 

Pu Zaia pawh mu thei bik hek lo, kan bulah a ṭhu ngawi ve ran a. Min vengtu te pahnih erawh kawngka bulah chhuatah an ṭhu ve mai a. An kawnghrena an pai pistol chu a lan loh an hlau nge an pho langsar riau. Zopari te chu an mut a chhuah êm avangin vrngtute kan dil a, Mamtea bulah an va mu ve ta a. Kei tak pawh ka mut chu a chhuak deuh, mahse, muhil hman ka ni lo. Saia leh Kima te pawh an la fim kâk mai. Zing dar 2 bawr velah chuan Pu Zaia chu a ding hluai a, "Ril a ṭâm lek lek e a. Thingpui ka'n lum ang e" a ti a. Choka lam a pan zui nghal. Kei pawh tho vein, "Ka'n zung lawk ange " tiin kawngka aṭang chuan ka chhuak a, pakhat chuan min rawn umzui nghal. 

"Zung tur ringawt alawm ka nih le, min umzui ka ngai lo" ka ti hlur a. A ngaipawimawh lem lo. Ka zung ta huau huau a. Boruak chu a vawt lek lek a ni. Amah pawh chu a zung ve ta nghal a. Ka lo nghak deuh reuh, chutihlai tak chuan in chhung lam thawm chu a ri hak a, mipa ṭê tuar thawm leh ri chhawk thawm a ni. Chuveleh min vengtu zung lai hawi phâwk lai tak chuan ka theihtawpa nâin a mawngah ka tlawh a, bang a va deng rawp, a hamhaih chhungin a silai chu ka laksak nghal zat. Rin ai tak chuan a awlsam hi a. A bekah ka chuktuah nghal a, thawm engmah a siam lo. In chhungah silaia tin chung chuan ka luhpui a, kawngka ka kalh nghal rap bawk. Saia te pawn an hna an thawk ṭha hle, vengtu pakhat chu chhuatah a lo let reng tawh a, a silai pawh an chhuhsak ve nghal zat. Ka sawi hmaih pakhat chu Burma sipai silai kan laksak te kha Pu Zaia kutah kan dah rih ta tawp kha a nia. Khawpui chhunga silai nena va inlan chi ni hek lo. Remchâng hmasa bera la leh tur khan kan intiam kha a nia. Amah pawn pindanah roh takin a lo tung fel ât a ni. 

Kan mi hrên te chu kan phuar hlawm ta mawlh mawlh a, mipa luhlul ve tawk tak an ni bawk a, thawm engmah an siam miah lo. Tichuan, an phone chu phawrhsakin, "Sawi rawh u ka tih apiang in sawi tur a ni" ka ti a. An bu ve nghut. A kawtawpa ṭang kan ni bawk a, pawisak kan nei dawn bik lo tih an hrethiam a ni ngei ang. 

Robina number chu ka hmet chhuak ta a. A ring ta ral ral mai. "Hello" a rawn ti thum dût a. A thaw hluam hluam bawk. 

"An tlanchhuak, Police pun an tum a nia" ka sawi ang chuan a sawi a. 

Pawr zet hian, "Engtin nge in tlanchhuahtir theih? " A rawn ti khur khur. 

"An vaiin min beihrawn thut a, silai an lo nei ve bawk nen, kan tihpalh lutuk. Khawngaihin Boss, Police rawn lan hma ngeiin lo haw mai rawh u" a ti mawlh mawlh a. A beka silaia chuktuah rân mai chuan a ṭawng ṭha duh kher mai, thih hi zawng kan lo hlau tlang a ni. Robina chu a rum nghut a, "Khawilam police mahin min man lo vang e. " A ti hluk. 

Mahse, "Mahse, Boss, Aizawl lam hotute pawh an be pawp tawh, kan phone aṭang ngeiin. An zinga pakhat pa hi DGP a lo nia, kan rin ang ngawt a ni dawn lo a nia" a ti leh ta a. Robina ṭawng hmain ka hmet hlum nghal. Tikhan rilru buai takin awm phawt rawh se. Kan mi mante chu an kut leh ke phuarin , an ka kan hnawhphuisak bawk a. Pindanah kan luhsan ta dial. Engtikawng mahin an tlanchhuak dawn lo tih kan chiang. Kan silai kan tun ṭhat tawh chu la thlain a mu la awm ang ang kan thun sauh sauh a, Robina te thawm ngaichâng rânin kan ṭhu ta khiau mai. Sana ka bih sek. Mawng a za, Ngaiha chuan an kut a tuar lo hram ang chu maw. Ralkhata motor tlan thawm chu kan hre ta, thinphu dêp dêpin kan lo nghak a. Kan beisei ang chiahin kawtah an ding chawt. Keini pawh tho ṭhem ṭhemin parda phenah chuan kan ding far a, Zopari leh Mary te pawh pistol humin an inpeih thlap tawh. Thawm dim angreng tak hian an rawn lut ta a. Ngaiha'n ,"Min phatsan ta a ni maw? An kalbo vek..ka awih thei lo zawk" a tih bul bul chu hriain kan nui sak hlawm a. Kan mi mante kan phuarna an phelh chât chât lai tak chuan vawileh khatah parda chu keu hawng thutin silai ngûl sei reng ruang bakah pistol nen kan tin kawh ta rap mai..

An hamhaih lutuk hmel chu a hmuhnawm mang e. Robina'n inphen nana Ngaiha pawh a tum lai tak chuan va kal hnaiin a bek dinglamah ka silai dâwt chuan va hawlhin, "Tum buai duh suh" ka ti nghut a. Ngaiha pawh Saia te bulah a phei nghal. Verther takin an che a, trick ṭhing takin kan bum let ve thung tihna a nih chu..

"Engtia min tih nge in tum?" A hlauhthawnna thup tum zet hian Robina chuan a ti khur dat a. 

Ngaiha'n ,"Ka that dawn che" a lo ti vawt raih…