Leiruangtuam 10

LEIRÛANGTUAM (10)

Ziaktu : Toni Râlte

Pu Zaikunga chanchin ngaihnawm tak leh kan zinkawng chuan inzawmna a nei niin ka hria. A sawi zo chu thaw huai hmel a puin ka hria. Ngaiha chuan, "A va ropuiin a va rapthlak êm..Pa Zai, a ngaihnawm hle mai a" a lo ti luam a. 

Nui chungin, "Mikhual ka neih hmasak ber in nia, ka han sawi ve duah a nih kha..khawiahmah chhuak tawh lo se ka duh khawp bawk mai" a ti a. 

Kima'n, "Chhuak lah lo ve. A nih chuan tihian in pafa chuan in khawsa chu a nia, engtin nge ei te in zawn ve le?" A lo ti vat a. 

Pu Zaia chuan, "Aa..hei ka chuktuah huan siam bakah kawmthlangah khuan thei eng eng emaw ka ching ve bawk a, heng ka thlai thar te hi kawng bulah hian ka zuar ve a, driver fel tak tak te hian tuikhur tui thun pah hian min rawn dawr ve ṭhin a. Bakah kan hautak lo pafa khawp a.." a ti mai a. 

Mary'n, "Mamtea hian school a kal lo tihna em ni?" Inthlahrun hmel zet hian a ti a. 

Lungngai hmel pu deuh hian, "Aw, kaltir ka tum sasawi paw'n ka bulah lo chuan khawi hmun dang mah hi a awm rei thei si lo va, tihian in lamah A, Aw, B te chu ka zirtir ve a, a hming pawh a sipel thiam ve tawh" Pu Zaia chuan a ti a. Ngaihtuahna a kalthui mang e. 

Ka ngaihtuah chhuak thut nge ni, "Pa Zai, ngaih loh lamah ngai lo la, i lasi kawm thin chu Partinchhingi a ni em?" Ka ti hlawl mai a. Ṭhiante pawn min rawn melh hrek hrek mai. 

Pu Zaia pawh chu a mengphâwk kher mai, hmuh theih khawpin a danglam a ni. 

"Engti tiha hria nge maw i nih chu le? A va mak ve aw"a ti hluai a. 

Nui chungin, " Thawnthu sei tak a ni, ti mai ang. A mak hle mai. Ka mumangah ka hmu alawm" ka ti ta a. Pûk chungchang erawh ka ṭhiante thu hmu hmasa lova sawi chu ka duh lo. 

"A mak hle mai. "Hrethiam lo tih hriat zet hian a ti a. Saia chu a insûm zo ta lo nge, "Pa Zai, in nu te chu an la tluang zel tho em ni?" A lo ti a. Saia hi uirena haw lutuk a ni, a chhan pawh nu uiresan a ni miau a! An ni phei chu High School an kal tawh hnu, engkim an hriatthiam vek tawh hnuah a ni lehnghal a, a pain zu ngawl a vei phah a, mahse, insiamṭhain nupui fel tak a nei leh ta a. Saia te pawn an nu tak aiin an nuhrawn hi an ngaina zawk tih mai tur a ni. A nu erawh a tluang lo chho zui a, nikum hmasa khan chhul cancer vangin a boral tawh nghe nghe. 

Pu Zaia chuan, "Ka ngaihven lutuk lo naa, he lama feh tur rawn chawl te hian ka hre châk emaw ti hian an sawi ri leh zauh ṭhin a. Zova nen khan innei zuiin, in pawh ka thawhrah hmang khan an din a, Ka pi erawh kum 3 liam ta khan an kawmthlang huanah a lum hlum a,. . Zova lah thawkmawh ve tak mai a ni bawk nen, Kan nu hlui chuan in sakna bang khan eichawp dawr chu a siam ve niawm tak a ni. Chu chu an eizawnna ber a ni awm e. Kan fate pawh English medium-ah kaltir tawh lovin sawrkar sikulah an kaltir ta a niang. " A ti chuar chuar a. An tluan em em kha ka ring lo rêng a ni. 

Zopari chuan, "Nupui neih leh lamte i rilrûk lo em ni? Nupui ṭha deuh nei leh la" a lo ti zawi sap a. 

Nui hawk hawkin, "Akhai! Keini ang putar te chu tu chuan nge maw min duh ang ni..bakah Mamtea hian nuhrawn a hrawn ka remti lo. " A ti mauh mai. 

Ngaiha chuan, "I fate pawh chuan an rawn dikdâk miah lo che tihna em ni?" A ti leh a. 

Pu Zaia'n, "Keimah zawk hian ka fate an nih angin ngaihthah lutuk chu a dik lo ve tiin ka chawhmeh hralhna aṭangte hian an mamawh leina tur ang te hi ka thawn ve ṭhin a. Mahse, kan nu hluiin, 'I pawisa kan mamawh lo, rawn thawn tawh suh, i fate pawn eng atan mah an ti lo che' a rawn ti zêk a. Ka thawn duh ta bik lo a ni. Mahse, thawkkhat lai khan kan nu hlui bawk chuan, "Tuna i chenna in leh huan lo ram hi Bawiha hmingin i dah ang chu maw" a rawn ti leh lawi a! Ka ngaihdan a ni ta vak lo" a ti charh charh a. Hmeichhe khawlo laklawh hi zawng siamṭhat an har châwk. A lo tlai ve duai tawh a, Pu Zaia chuan, "Naktuk pawh in la châm ang chu..kan khawhar pafa ve thei si a, ka thangkam en hun a nia, ka awh phei chuan keini pafa ngawt chuan kan ei sêng leh lo vang" a ti luam a. Ni e, khuate han var phawt teh se. 

Pu Zaia chuan min mutsan a, mutbu a ngah bik loh avangin puankawp leh kawmawl kan phah a, ruh deuh mah se, ramhnuai ai chuan a zia tawh hrim hrim. Khua a vawt em em lo bawk a, a mut ve theih mai ang. 

Pu Zaia hnar sûk sûk hnuah ka ṭhiante chu ka bekbawr ta sur sur a. "Ngaihtuah teh u, Partinchhingi khan chhan awm lovin pûk kha min kawhhmuh miah lovang. Tihian, an inah kan thleng leh ta chat bawk a. Kan ro lak te kha tlem azawng pek ṭhen ve ṭha in ti lo maw? An dinhmun heti hi a ni si a. Kei mi mawlh run tlat" ka ti ta a. 

An ngawih vang vang hnuah Saia chuan, "Ka pe dawn, kei chu. In pek ve duh loh pawn a pawi lo, an pafa damkhawchhuahna khawp hi chu ka pe ngei ngei dawn" a rawn ti nghet ta charh mai. A rilru ka hrethiam nasa. 

Zopari chuan, "Ka pe phal khawp mai. Chama mumanga rawn inlar khan pûk kha an pafa tana a lo venhim ve char char a nih hmel a, keini hnenah tikhan a hlan a, tunah ṭha takin min lo mikhual leh bawk a, kan bat ni vein ka hria" a lo ti ve bawk. Ngaiha te pawh chuan hnial chu sawi loh, pek ve an lo inhuam em em mai a. Ka zâng hawk mai. Ka rilru kam ṭûntu pawh lakbo ang huai a ni. Partinchhingi khan awmze nei takin kan kawng a lo sial niah ka ngai thei ta. 

Ka han chhing sek chuan mumang ka nei zui ta ngei bawk. Mangneia intih mai hi ka duh ta rum rum mai. Kha thlân ka hmuh bulah bawk khan ka lo ding leh vûng a, boruak a nuamin a thengthaw em em bawk. Kawla nena kan sakei hmuh kha a rawn kal zân zân a. Ka hlau miah lo. A hnungah Partinchhingi'n a rawn zui dat dat bawk. Min rawn nuih sen sen a, Pu Zaia'n a lo ngai em êm thin pawh kha ka dem lo, a duhawm êm bawk a ni. Sakei chu ka bulah rawn bawkin Partinchhingi pawh chu a ṭhu zui ve zat a. Thlan lam chu melhin lunglen hmel takin a thlir vawng vawng. 

Mi pawh en lo chuan a rawn ṭawng chhuak ta a. "Thutlukna in siam sual lo ve. Pûk kha venhim zawh loh chin ka neih dawn tak avangin in kutah ka hlan ta mai a nih kha..Hringmi leh huai inkara bang chhah tak hi mang lamah chauh lo chuan kan su hawng thei tawh si lo va..Khuazîngi'n zah a ngai ang a, in tum ram pawh tluang takin in thleng thei tawh ang. " Tiin. Ka kutah hian tu emaw hian a rawn chelh a, ka'n en nak chuan Mamtea a lo nia. Nui ver ver chungin min lo chhoh en hâ mai. Keipawn a kut te taktê chu chelhin thlan chu kan hnuchhawn ta a. Ar khuang riin min kai harh zui ve nghal zat bawk. Pu Zaia te pafa chu an lo tho daih tawh a, a thangkam kha an en a ni maithei. Keini pawh tho ve sang sangin mutna te chu kan thlep fel a. 

An pafa thang hlan chuan kan ro thukrûk ṭheuhte chu zu la chhuakin kan chanai aṭang chuan Pu Zaia te pafa ta tur chu kan dah hrang ta thliah a, a tam ve hle. An pafa chuan engmah thawk lo mah se, an damchhung daih a tling tawh ang. Kan zinkawng zawh dan, engkim thudik tak hrilh ngei pawh kan tum. A mak ngawt mai, a chanchin a sawi vang kha nge thinlung takin kan pawh a, kan lainat a ni ber mai. Bakah kan lakah a ṭhain an neih ang tawk tawk min hlui a, tunlaiah hriat ngai loh mikhual thleng duh hi an tam tawh lo a nia. Hei tunah pawh min ringin zing karah an pafain min chhuahsan daih mai a nia..hetiang taka min ringngama min tiṭhatu chu an phutawk anga rulhlet kan ba ve tlat a ni. 

Tui te kan zu chawi ve a, tui kan lum lai takin an rawn hawng ta a. Sakhi patuai a rawn pu vû vû mai. A lo awk tak tak a nih awm chu..Mamtea pawh a hlim tih a hriat. Hmuh an nuam pafa mang e. 

"Ekhai! In lo tho tawh maw? In duh chen chen mut tur alawm, kha leh chen thinthiin in mu awm si lo" pa Zaia chuan a ti a. Kan chhang lem lo. A sakhi awh mawlh chu kan lo ngaihven. 

"In châm thei tihna a nih hi..khawpuia awm in nih phei chuan sakhi chek te chu a ei pawh in ei ngai em ni? Ngawi tak rawh u, ka'n siam ang a, puar êl euhin in ei dawn nia" a ti leh zung zung a. 

Ngaiha'n, "Zep loh chuan ka ei châk khawp mai, a chek siam hi ka thiam ve chiah lo bawk nen" a lo ti ve vat. Ngaiha nen Sakhi chu tuikhurah kan zawn thla a, a pumpui vel te chu kan hai chhuak a. In lamah ṭul ang ang an lo ti ve bawk. Zing lamah chuan a chek siam hman a ni tawh lo nen, sakhi sa pangngai chu kan kang a. A rimte hi a va tui reuh tak. Kima'n, "Pa Zai, hralh rawh aw. Khawi ka lo siam ve ang" a lo ti sauh sauh a. 

"Sa hi ka hralh vak lo asin, ka ina rawn chuangkai ṭhangte hi ka hleh ve mai zel a" a lo ti nuah nuah. 

Zopari'n, "Awii, i tiuiawm lutuk, hralh ziah tawh rawh. Khai khat kha 500 manah chhuah la..chutin tunlaiah sa an inhleh chawt chawt tawh lo" a lo ti hmiah hmiah. Ṭhahnem kan ngaihpui tlâng zawng a ni. Pa Zaia pawh kan tih ang ang chuan a awm ve tawp. Tukṭhuan ei hma deuh kan la buai lai chuan leileta feh tur niawm tak an ni, mi pali an rawn lut a. Hmeichhe pakhat leh mipa pathum an ni. 

Kan lo awm hung chu mak an ti deuh niin a lang. Pa Zaia chuan min vengthâwng takin, "Hei Aizawl aṭangin ka naute an nih hi, khawchhak tlangdûng an han fang a. " A lo ti sawk sawk. An ngaih a ṭha ve ni hmiang, engmah an sawizui bik lo. 

"Kha! I awk leh tawh law? Nang zawng i vannei thei riau mai" pa pakhat zangkûl lam deuh chuan a ti sur sur a. 

"A nih hi, nia, ka vannei ngawt mai. Hei tun ṭum chu hralh suma chantir ve ka tum deuh a. " pa Zaia pawh chuan a lo ti ve a. Hmeichhia chuan, "A ho mai mai, min hleh tha ve hle hle a nih chu a" nui chungin a lo ti a. Zak lo reuh mang e. 

Pa Zaia chuan, "Aa..Lalteii nu ṭhin hi a..nangni phei chu ka hlelh tam thawkhat ve tawh bawk che u alawm le..hei khai 8 lai kan chhuah ve hi,. Pakhat hi 500 man aw" a lo ti duh lek a. Kan thu a awih chu kan lo lawm hle. 

An han khai vel chhin a, "A ṭhat khawp hi, mahse, keini zawng vawksa kan ei nasa deuh a, kan la rih lo phawt ang" tih chu an chhuanlam a ni ta deuh. Hleh dawn se an hnar awm tawp si lo. 

Pa Zaia lah chuan, "A pawi lo, Vawiin hi motor lian ho lo tlan ni a nia, an duh viau ang" a lo ti sam êt a. 

Awm pawh an awm rei lo. A pawi lo. Tukṭhuan chu hlim takin kan ei ta a. Ka ei hnem ngang mai. Pu Zaia chuan, "Tichuan, zanin chauh chu in awm leh thei ang chu tiraw?" A ti a. Intiamrual ang hrimin, "Ni mai e" kan lo ti ṭhap. Kan han nui leh rih. 

Zopari'n, "Awiii, a pawi ê" a ti thut a. Kan melh ṭhap, inthiam lo hmelpu deuh hian, "Ka tih awmzia chu ti nge khami te kha phone hman kan dil loh le" a ti niah niah. 

Pu Zaia'n, "He laiah signal a awm ve lo alawm. Phone neihin awmzia a awm vak lo. Khawchhungah chuan a awm" a lo ti var a. 

Kei pawh chuan, "Engpawhnise, kan chhungte bulah kan chin hi hrilh ve reng reng chu a ṭha. Kan riak leh dawn a nih pawhin pahnih khat hi chu khuaah va kal a ṭha lo maw le" ka ti ta a. Ni e, pu Zaia te pafa kan ngaihtuah atalângin khalam kha kan lo hrechang tawh lo a ni ber. Bakah ramhnuaia kan awm lai ang kha a ni tawh tlat lo ve bawk a. 

Kei leh Ngaiha chu khawchhunga kal turin kan titlu ta a. Kan zu intifai ve thuak thuak a, kan thawmhnaw bal ho pawh Zopari ten an lo su dawn a ni. An chhungte number ṭheuh min pe hlawm a, khawchhung ami ten mak min ti êm lo'ng chu maw. Pu Zaia pawh chuan a kawmthlang huan thei leh chuktuah huan ami a thlai thar te chu hralh turin a zu lakhawm a. Kea phei nan a la hla angreng si a, motor lo kal hmasa bera bet ve turin kan lo chang ta a. Darkar chanve awm vel kan nghah hnuah Lpk hi a rawn tlan ta a. Phar pawh ngai lovin Pu Zaia kawtah chuan an ding nghal. Driver chu lubuk tak, balh hmel zet mai a ni a. Kuhva a ei sen huam bawk. Pu Zaia nen an lo inhre ṭha viau thung a, a sakhi sa pawh chu khai hnih a laksak. Pu Zaia min sawipui azarah a motorah chuan kan bet thei ve ta mial a. A handyman chu a ngawichawi si, amah lah a ṭawng duh em em lawi a. Pu Zaia naute anga kan insawi avangin min zawt dilchhut vak lo. A phone chu hmansak nghal theih a duhawm hle. Kawng a ṭha vak lo nen, rin aiin kan tlan rei. A tawpa tawpah Farkawn khawchhung chu kan lut ve thei ta hram e. Thingpui dawr kawtah a ding ta chat a. 

Mamawh han lam khawm tur pawn pawisa kan nei tlat si lo. Kan ro lah phawrh ngam a ni chai si lo. Phone hmang turin kan kal ve vang vang a ni ber. PCO lah a awm si lo. Inthlahrung deuhin Driver lubuka thingpui in lai chu a phone hmansak kan dil ta tawp a. "E..kha kha in duhtawkin hmang rawh u" a ti lung lung mai. Driver hi a tlangpuiin an ṭawngkam phawkphawhraw ṭhin viau mah se; an tlawmngai tlangpui. Dawr sirah chuan kan ding sauh sauh a, Sir Dinsanga number kan hmet chhuak hmasa ber. 

A ring ral dawn emaw tih laiin , hmeichhe aw hian "Hello" a rawn ti a. 

"Sir Dinsanga a awm em le? Biak lawk kan duh a" ka ti a. 

A ngawi dat a, inhnit faihin, "U Dina a awm tawh lo. Ni 2 liamta khan a boral tawh a ni" a rawn ti ta mai. Ngaiha nen kan va mengphâwk tehreng êm. 

"A va pawi tak êm,. Engtia boral nge?" Ka ti hram a. 

"A lung tha lo a chhuak leh a, damdawi in kan thlenpui hmain a kal ta a ni" a rawn ti a. Sawi tur reng reng ka hre ta lo. Ka dah ta ringawt a. Sir Dinsanga chu aw..min lo nghak hman ta lo a ni maw?! Inthingharhin ka nu ka call ta a, kan chin ka han sawi chuan a ṭap ṭêpin ka hria. "Kan lo ngaihtuah lutuk che asin. In thi bo ta vek emaw kan ti hman asin, biak theih in ni bawk si lo..in dam chu ka va lawm êm" a ti mawlh mawlh. Pawisa chungchanga kan buaina chu Ngaiha'n, "Ka kutah dah rawh u" a tih avangin ka sawi ta lo law law. Chutiang chuan reilote tê ka ṭhiante chhung ṭheuh ka be ta a. Ngaiha'n a nu a be ve bawk. Thawk khat chu a veng ta deuh e. Kan call history chu kan clear leh vek a, "Kan lawm lutuk. I number hi min pe la, top up kan lo thunsak ang che" kan ti a. Ani lah chuan, "In ho mai mai e a. A ngai awzawng lo. Tikhan engmah sawi a ngai tawh lo" a lo ti bawrh bawrh. Kan lawmzia hi aw..

Khawchhung chu kan han fang kual ve a, tumah chuan min notice em em bik lo niin ka hria. Farkawn hi chu pi pu sulhnu awmna hmun a nih avang hian tlawhtu an nei kal ve reng bawk a, a awm ve viau mai. Pawisa kan nei der si lo va, tihtur dang nei tawh hek lo. Kan lo kal tawhna lamah kein kan let phei ta hnak hnak a. 

"Sir chu a mak ka va ti tak êm. Engtin nge niang le?" Ka ti a. 

Ngaiha pawh chuan, "A pawi khawp mai. Min lo nghakin kan ro hawnte han hmu ve se, a hlawhtling tih tal inhre ve se a ṭhat nen chuan aw" a ti ve vawng vawng a. 

Rilru ka siam a, "Engpawhnise, amah vanga hetiang dinhmuna ding hi kan ni a, chuvangin amah awm tawh lo mah se; a chanai hi chu a nupui fanaute kan pe ve mai aniang chu tiraw?" Ka ti a. 

A hnial ka rin tehlul nen, "Ka lo ngaihdan chiah, amah awm tawh lo mahse, a ta chu a ta a ni tlat. Ṭhiante pawh kan sawipui dawn nia" a ti ve ta mial a. Ngaiha leh Saia te mizia hi a dang ta khawp mai. Min phatsanna khan rah ṭha a chhuah a ni tehchêk ang chu..

"Pawisa hi a hmasa berah kan mamawh. " Ka tih chuan, "Pa Zaia'n a ngaihna a hai lovang, kan chanchinte kan han hrilh ve chuan..min pui thei ngeiin ka ring" a lo ti mai si. A ngai awlsam teh puat lutuk chu ka ngei lek lek. Mahse, tihtheih dang a awm bawk si lo. Kea kal chuan kan kal rei khawp mai, motor pawh kan tawk zeuh zeuh. Kan kalna lama rawn kal erawh an awm lo. 

Ngaiha'n, "Ka va â tak, ti nge kan nu ka lo biak ve loh le?" A ti hlut a. 

"Nia,." Ka ti ringawt. 

"Mahse, Cham, bialnu nei ṭha viauah hian min ngai a, kei chu han neih dawn tak tak chuan ka sit lek lek zel. Eng chu ka ni hauh lo naa" a ti sur sur a. 

"I ho em mai a, in inzui rei ve tawh em hi" ka lo ti vut a. Zopari ka mitthla nghal. Aizawl kan thlen hunah ka laka a rilru hi a la ngai reng ang em le?! Kei chuan inzui zel ka duh chiang a, ama lamah eng rilru nge a put ka hre si lo. 

Ngaiha chuan, "Champhai kan thlen phei hunah kan ro hi tiral vek law law ila ka ti deuh" a ti leh daih a. 

"Engtin?" Ka ti hû. Mawl min tih hmel zet hian, "Smugller ka hre nual alawm. Dinhmun hlauhawma awm ai chuan tiral vat zawk ila kan him hma a ni mai" a ti duh lek a. Ka hriatthiam ve vak loh thil a ni bawk a. Ka ngaihtuah zui vak peih lo. 

Pu Zaia in kan thlen chuan a chawhnu ruih tawh. A sakhi sa pawh a lo hralh zo vek tawh. Ka lawmpui e. A chek siamin a lo buai hle mai a, han puih vak dan kan hre si lo, bawlhhlo erawh Mary ten an lo siam vek tawh thung. Zopari te awmawl chuan Pu Zaia in te chu an tihfelsak a, pindan te chu an siksawi sak vel a, Pu Zaia pawh a hlim hle. Mipa pahnih chenna a ni bawk a, felfai thlap chu a har ve bawk ang. Kan chhungte theuh kan be tawh bawk a, ngaihṭha takin tlai hun chu kan hmang liam ta. Amaherawhchu, Sir Dinsanga thih thu an han hriat takah chuan an rilru a nain pawi an ti takzet tih a lang. Zopari te phei chu an mittui an hru zauh zauh mai. A ruang pawh kil hman lo va, kan la awm lehzel te hi a pawi ngawih ngawih a ni. 

Zanriah kan kil zet erawh min lo hmutu awm se; an chil a put ve khawpin ka ring a ni. Kei chuan a chek bak ka khawih lo, chawhmeh dang pawh ka ei chuang lo, a tui keih keih êm a ni. Chaw kha kan chhum tam a nia, kan quit vek, a inthlahrunawm letling,.pu Zaia lah chuan, 'Buhfai te hi chu ka ngah ve zawng tak alawm. Buhfai phur motor driver ho hian zu in nan ka in an rawn hmang ṭhin a. Buhfai chu min pe ṭhin. Phang reng reng suh u" a ti mai a. Kan inthlahrung lo ve tawp. Kan han eikham a, Vaihlo zial ru tui tawk zu hlat hlatin bawp kan han khawkherh ngei a, dam nawmzia hi a fiah kuar kuar mai. Mamtea mut veleh ro chungchang chu sawi kan tum a ni. Zopari'n a mal chungah a muttir a, a chul heuh heuh a, zan dar 8 velah a muhil ta mai. Pu Zaia'n pindanah a va pawm lut a. A rawn chhuah leh hnuah thupuifûn takin kan zinkawng chu a ṭawnghmang thiam ber Ngaiha chuan a sawi ta mial mial a. 

A tawpah puk kha sawiin ro kan lak thu leh amah pek ve kan duh thu a sawi ta bawk. Pu Zaia chu a hamhaih takzet a, a hmelhmaiah chuan buaina, hrilhhaina, lawmna a inlar chhawk zut zut mai. Ṭawng nachang pawh a hre lawk lo nghe nghe a ni. 

A hnu deuhah, "A va mak ve..engtin?" A ti bah nawk a. Kan lo nuih ringawt. 

Kei chuan, Partinchhingi ka hmuh dan leh pûk pawh a awmna min hrilh thute chu chiang deuh zawkin ka han hrilh ve leh a. A hmaite chu a nuai nawk nawk a, mak a ti a, a ṭhawng hle a ni. 

Saia chuan, "Chuvang chuan, khang ro te kha keimahniin pumbilh vek kan duh lo va, kan pe ve dawn che a ni. I fapa nen hian in damchhungin in rethei tawh lovang" a ti charh charh a. Pu Zaia chuan, "Akhai! A ngai reng reng lo, in ta alawm, in lak a nia. Keini lo neih ve ngawtna tur chhan a awm lo" a lo ti chul a. Mahse, kan hmelhmaiah kan tumruh tih a hmu a ni tehchêk ang chu, "Mahse, engtin nge ka tih riral ang?" A ti ta a. 

Ngaiha chuan, "Chutak chu kan buaina a ni. Nang hian min puih theih kan beisei nghe nghe asin. In khuaah hian hetiang lama sumdawng an awm em?" A lo ti ta chat a. 

A ngawih vang vang hnuah, "Awm ṭhin a, mahse, an pem tawh. Midang ka hre hauh lo mai" a ti a. Ngaiha bawk chuan, "Chuti a nih chuan naktukah Champhai kan pan a ngai a nih chu. Tunah hian pawisa engmah kan nei lo va, heta ṭanga champhai thlen pheina tur takngial pawh. Chutah chuan i mi puih kan ngai dawn a ni. Tichuan, Champhai kan thlen hunah he lama sumdawng ṭhin an awm leh awm loh kan thlithlai ang a, kawng a awm mai ang. Keini pawn kawl reng kan duh bik lo va" a ti ta a. 

Pu Zaia pawh chuan, "A ni khawp mai. Kawl reng chu kan him loh palhte pawh a hlauhawm alawm..ni e, inremruatna chu ka pawm e" a ti ve ta a. Saia'n fiamthu titak deuh hian, "Aizawla i rawn chhuk ve duh lo a nih pawhin, Hetah hian dawr lian tawk tak i siam ang a, i nupui hlui inchhirpui tham khawpin hlawhtlin tum rawh aw" a lo ti zauh a. 

Pu Zaia chu a nui hawk hawk, "Phuba lakna lam kha chu ka ngaihven ber hran lo a nia. Mahse, nia ka fapa hian zirna in te hi bêl ve thei se, lehkhathiam chhawrtlak tak ni se ka duh ber a ni" a ti malh malh a. A fapa a hmangaihzia hi reilote kan awm chhung pawn kan hre thei, chutin a fapain a ngaihzia pawh. Pathian hian ro a rêl thiam mang e aw. Zan te a rei ta bawk nen, mutzai kan rêl ta a. 

Muthmunah Zopari'n, "Enteh, ka nghawng hi khawih lawk teh, aw kha lai kha. I hria em? Bawk relh kha" tiin a nghawnga bâwk relh chu min khawihtir a, "Eng nge a?" Ka ti hû. 

"Ka hre lo,a na bawk si lo va, ka ngaih a tiṭha lo deuh" a ti ringawt a. 

"Aa..tonsil vel te a ni lo maw? " Ka ti a. 

"Ka hre lo, a na bawk si lo lawm, ka hlauthawng deuh reuh" tiin min rawn melh kiau a. 

"Chutin hlauthawng ngawt suh, Aizawl thlen veleh kan incheckup dawn nia. A tha em" tiin a biangah ka piai zauh. 

"Aizawlah chuan min hre duh tawh dawn mi?" A ti sap a. A va chimawm e aw. 

"Nangmah zawk hian min mikhual pelh ngâwk ngâwk ang tih ka lo hlau zawk asin" ka ti ta sup a. 

Nui sen senin, "Kan zin lovang tih ka hlau, i rinawmna te, i huaisenna leh i dikzia te hi ka hmu thei âwm si lo va. " A ti ta duah a, min tizak mai dawn lawm mawle. 

"I ho..nang hi i felin i huaisen fê aw. Mipa tihtheih ang i ti ve thei zel bawk a" ka ti a. Min melh reng laiin a hmuiah ka fawp ta a, ṭhiante chu ka vengthawng vak duh tawh lo. An hrethiam vek tho. Tichuan, inkuah rialin tui takin kan muhil ta bawrh bawrh a, mumang pawh ka nei ta lo. 

Pu Zaia'n, "Champhai lam pan tur motor a rawn kal leh em em ang, Khuaah va luh ngai lovin kan lo bet ve mai ang chu..sumo an kal vek tawh âwm sia" a tih avangin motor lo chan tawp chu kan tum ta a. Beisei ang ngeiin buhfai phur motor a rawn tlan ta ngei e. Pu Zaia te nen chuan an inhre ṭha khawp a, kal hmain zu pawh an lem zuai. Sakhi chek la bangte chu an sehhmeh a, tui an ti ve ngang mai. Keini nen pawh kan inbe nghal bawrh bawrh. Buhfai chungah chuan kan ṭhu ta thap a, haw nghal tura kal kan ni a, kan bungrua pawh kan keng nghal vek a ni. Ngaiha kutah kan innghat deuh tawp mai. 

A tawi zawngin Champhai pawh kan lut ta a. Kawnglakah din neuh neuh kan nei bawk nen, chawhnu lamah kan thleng ve hram. Khawpui luh hmain kan chhuk a, Ngaiha chuan Driver phone chu hmansakin a sumdawnpui chu a call ta a, he lama a awm lai a lo ni hlauh mai a, chu pa chu pan phawt mai kan titlu ta a ni. Mamtea te pafa pawh kan hruai tel ve zel a, mahse, ka han ngaihtuah a, a ṭhianpa te ina va luh huk ai chuan amah zawk tlawmngai thei se, khawi hmunah emaw min rawn hmu zawk se ka ti rilru ta a, ka sawi chhuak ta nge nge. Midang pawh chuan remchang an lo ti ve tho va. Hotel man tlawm deuh kan zawng ta alawm le. Dik tak chuan kha chen ramhnuaia khawsa kan ni a, kan inzuahbukin kan nula te pawh an thim bul mai a, kan vai chuan kan ṭhing ngawih ngawih. Kan zak hran lo thung. Champhai hi District Capitalah chuan a ṭhang nasa ber pawl an nih ka ring. Tichuan, hotel naran ve tak, riahna awm ngawr ngawr kan hmu ta hram. Chutah chuan kan innghat ta a. Pa Zaia pawisa kan hmansak rih lo thei lo. Kan intifai thuak thuak a, Ngaiha ṭhianpa chu kan nghak ta rân mai. Dar 4 rik hma deuhin a rawn thleng ta a. Ngaiha aia û hlek tur, pa sâr veng vawng, nelawm zet mai a ni. Kan chanchin tlangpui, kan zinkawng tlangpuite chu Ngaiha'n a hrilh mawlh mawlh a. A ringtawk ni fahmiang, leiruangtuam chenin a sawi vek, Kan ro zawng zawng chu Leiruangtuam aṭanga kan laihchhuah angin a sawi thung. Midang chuan kan lo ngaithla ve tawp. Ṭawngsual kan hlauh vang a niang kan ngawi ṭhap mai. 

A ṭhianpa chu Robina a ni a. Champhaia piang leh seilian a ni. Nupui neiin fa pahnih an nei tawh bawk. Dawr lian tak pahnih neiin pakhat thawmhnaw dawr niin pakhat erawh hardware dawr a ni thung. An nei thawkhat viau ang. Ngaiha chuan kan buaina chu a sawi chho leh ta zar zar a, he lamah rangkachak leh lunghlu hmanga sumdawng hriat a neih leh neih loh te, heta tihral nge hlawk ang a? Phai lamah tihte thlengin a zawt. Robina chu a ngawi vang vang a, vertherna tel miah lo hian, "Ṭhianpa, risk a sang hle mai. Ka ngaihdan dik tak i hre duh a nih chuan, Aizawl thlenpui phawt u la, phai lam dawr zawk la ka ti mang e. He lamah chuan hriat chu ka nei nual, mahse, in tum angin in hlawk loh ka hlauhpui che u" a ti ta a. 

Kan han ngaihtuah ho va, Him takin kan rote chu Aizawl kan thlenpui thei ang em? Phai lamah Ngaiha hian buaina tawk lovin a thehthang thei ang em? Kei chu he lam hi ka bona lam tak a ni a, sawi ve tur pawh ka nei mang lo. Ngaiha pawh chuan a huphurh deuh nge, "Dik tak chuan he lam line-ah kher chuan ka bil riau a, phai pawh dawr dawn ila, a kalhmang engmah ka hre si lo, vai ho an chalak sia, min lo bum mai zawk ang em tihte thlengin ka ngaihtuah" a ti charh charh a. 

Robina pawh chuan, "Ka hrethiam che alawm. Ni e, kawl reng ngai a nih phei chuan awm te hi a tinuam lo ve thei a. Engpawhnise, he lama tihral in duh miau chuan kawng te pawh kan zawng mai a niang chu" a ti ta dap dap a. Thla a muang leh ṭan ta. 

Saia'n, "A vai vaia tihral pawh kan ti lo, Aizawla let leh dawn pawn a sum faiin neih kan nei si lo a ni" a lo ti ve a. 

Robina pawh chuan buk nghut pahin, "Zaninah ka rawn hruai ang e. zanriah chu ka inah rawn ei mai u la a ṭhat nen" a ti luam a. Mahse, kan duh dawn lo tih a hrethiam ve tho a niang, "Pawisa in kawl si lo va, ka rawn ak chhuak tam lo bawk nen, zanin riah man chauh zawng a daih ang..zana ka rawn kal leh hunah ka rawn ken belh dawn nia" tiin ₹2000 lai a dah a. Kan han la duh lo ngial naa, a ngaipawimawh lem lo. Min chhuahsan ta a. Kan han sawi ho mam mam a, Pu Zaia te pafa erawh an ngawi reng. 

Kima a ding thut, "In ni ve em ka hre lo, keimahah hian ngaihṭhat lohna lian tak a awm tlat nia mawle. I ṭhianpa ka rinhlelh lam ni loin nuam tih lohna riau ka nei. " A ti hluai a. Mi hausa ni ngai loin ro tam tak kan kawl tak avang hian pangngai taka nun hman chu a harsa dawn hrim hrim. Zopari pawh chuan, "Kei pawh, min uap runtu awm ang hian ka hre tlat mawle. Ngaiha, tihian ti zawk teh ang u. Champhai hi naktukah mai kan chhuahsan theih pawh a rinawm loh. Zanina i ṭhianpa rawn hruai tur chu lo belchiang ve phawt ila, rangkachak tlawn 2 leh lunghlu 2 kha la chhuak rih ila, a bak chu thukru teh ang u. Ka ngaih a ngam hlawl lo" a rawn ti ve tlat. 

Mary pawh chuan, 'Ni e, a vai vai chuan hmuhtir lo teh ang u" a lo ti ve vat. Fimkhur a ngai ve êm bawk a ni. Engtia han thuhruk chi nge ni ang tih kan han ngaihtuah a, thuhrûkna tur lah chu a vâng nasa mai si. An room te taktêah chuan lang lo tura thuhrûk theih thil a awm thei pawhin a rinawm loh. 

Kan thlenna hotel chu veng hmawr fêm deuhah awm a ni a. Khawpui tak kan la lut lo a ni. Kan innghahna chu a bang rangva, a chhuat chu lei a ni. Driver motor chhiat vang emaw mikhual eng emaw laklawh vanga han riah zawkna tur atana an buatsaih mai mai a nih hmel. An uluk loh danah. Chhawng chung lam chu chaw eina pindan a ni. Room hi pali chiah a awm rêng bawk a. Room khatah khum pahnih an dawh ve thung. Riah man pawh a to hran lo. Ka va dak chhuak zauh a, hotela thawk nula hâng lam deuh hi a rawn chhuk thla mêk. Min rawn hmuh rual chuan, "Chaw ei a hun tawh a..in rawn ei dawn em?" Nelawm tak hian a ti a. 

"Aw kan rawn chho dawn e" ka lo ti ve mai a. Ka dak chhuak leh nghal. Hotel ṭhenawm hnai ber chu pen 70 bawr vel a ni maithei,. A thlang lam chu hotel neitu ten thlai eng ilo an chinna hmun tih hriat takin an hung ve khap. Hotel dinglam sir erawh bawlhhlawh paihna ni tur a ni, thil halna leh kang bang a awm nual danah. A bul mai chu culvert a nei bawk. Kan bungrua kan thuhruk dawn chuan kan chet vat a ngai. Ngaiha pawh chuan, "Tihral ka duh luatah ka lo hmanhmawh lu deuh a ni. Hetiang zata tam kan kawl tih an hriat chuan rilru ṭha lo an pu thei tlat. Kan professional lo tlâng ve bawk si" a ti ve nuah nuah. 

"Hotel chhungah hi chuan kan thukru theiin ka ring lo. Zaninah a lei nghal dawn pawh ni hlei lo, kan inbiak zawhah hotel hi chhuahsan leh mai ila a ṭha mai lo maw?" Ka ti a. 

"Mahse, pawn lamah pawh kan him chuang kher lo thei asin. "Saia'n a lo ti khauh. A ni bawk si. Kan mawl luat vangin kan che buai a ni ber. 

Ngaiha'n, "Buai lo lawk ang u. Phone hman tur ka han zawng ang a, Robina kha ka va hrilh tha leh mai ang. " A ti ta a. Chu chu kan pawm leh ta thluam. Naupang thil thar nei ang deuhin kan danglam hû mai a, kan hlauthawng rûn bawk si. 

Mary'n ,"Mahse, Pa Zaia te hi engtin nge niang?" A lo ti a. 

Ngaiha'n, "Pa Zai, pawi i tih loh chuan, Aizawlah kan hawn thla ang a, i chanpual pawh kan tihralsak che ang a, pawisa chu kan rawn thawn mai dawn che em ni? " A ti a. 

Pu Zaia chuan inngaihtuah buai miah loin, "In tih dan dan aw. Kei chuan engmah chang lo mah ila pawi tihna ka nei lo" a ti thluam mai. Mahse..buaina dang la awm fô chu pawisa..Rs 2000 ringawt chuan Aizawl kan thleng thla dawn lo. Ngaiha chuan, "Hawn na tur pawisa chu Robina'n min pe thei ang. Engpawhnise, chaw han ei phawt ang u" a ti a. 

"Hetah ei mai ang u, laktir ila..bungrua kalsan thei kan nih loh hi" Kima'n a lo ti a. Pawi kan ti lo tlâng hle. Tin, kan ril a ṭâm em em pawh a ni si lo. Ngaiha chuan, "Aw le, phone hman pahin ka han hrilh ang e. " Tiin a chhuak ta nghal a. Kan lo nghak ṭhap. Mamtea chu a luah tuaiin, "I ril a ṭam tawh em?" Ka ti a. A lu a thing ringawt. A motor chuang kha a rui nge ni, a ngui riau. Keini pawh kan muk rûn hlawm. Kan nawi ru hle in ka hria. Thil kan ruahman a, ngaihtuahna fîm hmang lem loin kan bawh huam huam a, a hnuah kan ruahmanna bawk kan sût leh a, hetia chet ngai lo hian Pa Zaia pawisa kha lo pûk tawp ila, Aizawl direct nghal daih ila kan felfai mai tur. Lehlamah Pa Zaia hausak bik lohzia hretu kan nih avangin pawisa han pûksak ngawt kan hreh ve bawk si kha hawnna tur duh luatah kan ro tihral kha kan duh ta em êm niin a lang. Chinchang hre lo kan nihna laiah kan demawm em em bikin ka hre lo. Ngaiha a rawn tlan lut rawp..

Thaw hlawp hlawp hian, "Cusdom duty an lo kal. Constable pahnih an tel bawk..kal ang. Vatin" a ti hluam hluam..chiâi ru deuh chungin kan bungrua kan chuh rawk rawk a, Hotel hnuai an huan siam sirah chuan kan inpal thla ta bawrh bawrh a..kan vakvai leh ang em ? Naupang pawisawi lo kan hruai tel lehnghal..Lalpa, ramhnuaia vahvaih ka duh tawh lo asin..