Tatai 9

TATA-I (9)

Ziaktu : Toni Râlte

Kha thu sawitu kha Alice ngei a ni si! A va mak ve le! Chrisa meuh pawh a bangboin a hrilhhai a ni e. Alice inrawlh ve ngawt dan a ngaihtuah thiam lo, Mafeli hi hmanruaah an hmang tihna em ni ang? Thil chu a beisei loh deuhin a ril ru phian dawn mai a. Chutiang a nih dawn chuan Mafeli hian MPD a nei lo tihna a ni thei mai ang em? A nih chuan khang a chet dan zawng zawng kha ama duhthlanna vek maw lo ni ang? Alice khan tu nge a biak?! A va hah tak êm. Mafeli bulah a kir leh a, a la muhil tui hle. A hnu lawkah Alice pawh a rawn lut ve a, a rawn ṭawng leh sar sar. Pu Hruaia chu a chauh ve tawh êm avangin Chrisa chuan haw mai tur leh amah leh Dadina'n an menpui theih thu a sawi a. Pu Hruaia lah lo tlawmngai ve bawk, an innawr titih. Dadina rawn thlen hnu reivakloah an nawrna angin Alice leh Pu Hruaia te chu an haw ve ta hram a. Mafeli erawh mut duhnain an jection a ni bawk a, a mutui chiah chiah ngei mai. Chrisa chuan, zawi sup hian, "Sawi tur pawimawh deuh a awm a. A la harh chuang lo bawk a, coffee in pahin va chhuak lawk ang hmiang" tiin a nau a bia a. Dadina pawh a tho nghal vut. Ani hi zawng sawi tawh angin a hmel hi a pa hrak lo a, mahse, a felin a û leh a nu thuawih êm êm mi a ni. Shillong-a awm an ni bawk a, a lum fahran lo. Coffee dawm chungin bathlarah an ṭhu dun a. 

"Sawi ṭan dan tur ka hre lo. Mafeli chungchang hi a nia. Engkim hailan ka duh si, min puih a ngai dawn tlat" Chrisa chuan a ti nghut a. 

"Sawi la, eng nge buaina ber" a nauin a tih chuan a ngawi leh vung vung roh a! A hnu fê-ah rawn ṭawng chhuak lehin Alice phone hman dante chu a sawi ta vek a. Dadina a lo bu nghut nghut mai. 

"An ina awm i ni bawk a, kei ai maha hrechiang tur i ni. Amahah hian danglam a awm em?" A û chuan a ti ta a. 

Coffee a in tê tê phawt a, muang ban churh hian, "A ngaizawng che tih i hria em?" A ti ta daih! Chrisa rin loh leh beisei loh lam daih a ni. A û men phawkna avangin engmah a la hrethiam lo tih a hai lo a niang, "Vawi tam tak i chanchin sawia a changa a nuiha a changa a ṭap lai ka phawk tawh alawm. Tin, rawn zin a châk êm êm nachhan pawh nangmah vang a ni. A duh lutuk che hi kei pawn mak ka ti" a ti ta duah a. Chrisa a rum hawk. A lo rinhlelh sa a ni. Mahse, chutiang em em khawp a nih chu a ring lo. A chhan chu unau an ni miau a. 

"Keima lam chu thuhran ni se; Mafeli lakah hian rinhlelhna eng nge i neih?" Chrisa chuan a ti nghut a. 

"Ka hrethiam chiah lo, mahse, ngaihbel theih tur ting chuan in lo zin dawn tih kan hriat aṭang khan phone a hmang nasa zual, a roomah a tawm nasa bawk. A bak chu han point out mai tur ka hre bik lo" a ti ta a. Chrisa pawh a bu nghut ringawt, "Engpawhnise, midang kan hrilh a rem lo, Mafeli hi kan venhim hmasak a ngai. Nang emaw keiin emaw kan riahpui ziah a ngai tihna a nih chu" Chrisa chuan a ti ta a. An ṭhu rei ta bawk nen, bakah a vawt bawk si, Cabin lam chu an pan ta a. An va luh chuan nurse hian Mafeli chu jection a lo tum mêk a, Chrisa te thawm a hriat rual chuan a phu nghal dâwrh mawle..syringe erawh a la keng rûn a. Dadina zawk chuan, "Eng damdawi nge" tiin a syringe ken lai chu a melh zauh a. 

"Mut duhna a nia" a aw chu a khur deuh niin Chrisa chuan a lo hria, tupawh mai rinhlelh rih a ngaih miau avangin ngaihṭhat ngawt chi a ni lo. 

"A ngaih ka ring lo, Nurse, a la muhil char char a" a ti dam thlup. Nurse chu a meng kal relh relh a, engmah pawh sawi lo chuan a chhuak ta nulh. 

Dadina'n, "Kan va tlai teuh ve" a ti zawi sup a. A û a serious êm avangin a palzam thei bik lo a ni ber e. Bakah sawi leh sawi hnu an chhungkaw ho bikah Mafeli te nen hian an inpawh lehzual a, Amtea te leh Lawmkima te an inpawh bik ang deuhin, tin, Mafeli bik hi chu naupang ber ni lo mah se; a aia nau zawkte pawn an dawm ṭhin, no tak kha a ni ve bawk nen..

"Muhil rawh, ka lo meng ang" a û-in a rawn tih chuan, Chrisa chauh dan tur a lo ngaihtuah. Shillong an thlen thlak aṭangin a la hahdam hman meuh lo, bazar bakah Alice nu leh pate a pui ve leh bawk si, chuvang chuan, "Mu zawk rawh, kei chu games ka la khel dawn" a ti ve ta tlat a. Chrisa pawh a chauh tawh êm avangin a nau chu hnial buai lovin khum pakhatah chuan a mu ta a. A muhil zui ta vat. Mumang danglam tak a la nei zui ! 

Aizawl bazar lun laiah hian Tatai hian mipa kawnghren lo zuarin a lo au lauh lauh mai a. Dawr ve ngei tuma a va pan lai takin Tatai chu a tlanchhe ta daih, a kutah tu emaw hian a rawn vuan a. Lawmkima nau Akimi a lo nia! Inkai chung hian an lo kal zel a, hmun fianrial tak an thlen hnu chuan Akimi te reuh chuan a hmai kâwr niawm tak hi a la thla ta a, Alice lek a lo nia! Makti taka a melh reng laiin Dadina ṭawng thawm vangin a harh ta hlauh a ni. A lungphu a lo rang viau mai. Dadina chu a va en a, games chu a lo khel lem lo, tu emaw a bia a lo nia. A nui hak hak mai. Mafeli erawh a mu hlum a niang tih mai tur khawpin a mutui nia. A ṭha zawk, a harh chuan buaina a awm leh palh ang. A mumang a ngaihtuah zuina lamah Tatai bawkah a tawp leh ta a. 

"I infiamna hmanrua ka ni lo, in inchawinaa i hlawhchham vang khan na der suh" a tih te kha a ngaihtuah lêt vang vang. A inlet thawk a, "Min hna9rna a tana a 9 hman hi a mak ber kher e" a rilruin a ti..hnar a duh luatah amah Chrisa chu thiam lo zawk anga chhuah a tum ṭâlh tih a lang reng, hmeichhe danglam tak zawng a ni mawle..

A harh chuan khua a lo var tawh. A tho vut a, Dadina a lo awm lo. Mafeli chu a han en kual a, a thaw lak a ṭha a a ngaih a ngam suai mai. Dadina a rawn lut a, "Ê..i lo harh tawh law? Ka va inthiar lawk a" a ti zangkhai vah. 

"Ka harh tha tawh viau e. Va haw la, va chawl hahdam ang che. Chaw chu ka pu khan rawn keng nghal mai se la aw" a ti zung zung a. A nau chu nau a nih angin a khawngaih ve lehchhawng, tlaivar hi chu a dan a dang ve miau a. Dadina pawh chuan a û thu chu hnial hran lovin a insiam sawk sawk a, a chhuahsan ta nghal. Dadina kal hnu reivakloah Mafeli pawh a rawn harh ta a. Chrisa chuan a ngaihven vat. A hma ai ngawt chuan a mitmeng pawh a fiah ta deuh. 

"I ril a ṭam em?" Chrisa'n a lo ti vat. 

"Umm..ṭâm khawp mai" a lo ti ve mai a. Hmanhmawh takin canteenah eitur a va dap a, Mafeli chu a eitir ta a. A ṭâm tawngkhawng tawh a niang, a ei buan buan mai. Hetia han en mai chuan dam ṭha pangngai ang mai a ni leh tawh. A nau pai kha an paihsak ta nge nge kha a nia, naute chungchang engmah a la sawi ri eih lo. A thiltih kha a hre miah lo te pawh a ni mahna le. 

"Mizoramah ka haw duh tawh" a ti sep a. Chrisa chuan a lainat tlat. A hmai dâng bâi mai leh a mitmeng ti riai te, a hmelhmaia inthlahrunna lo langchhuak te avang chuan a lainat lo thei lo. 

"I dam ṭêp alawm. Kan haw ṭêp" a lo ti ve ngial a. Nurse a rawn luh avangin Mafeli ṭawng tum pawn a ṭhulh leh daih. Damdawi a rawn khai sak a, nizana nurse kha chu a ni tawh lo. A chhuah hnuah, "Ka naute kha engtin nge ?" A ti ta ngei a. 

"A thi tawh" Chrisa chuan a ti ringawt. 

Mafeli chuan chunglam a melh ran a,"Duhawma fa ni lo mah se; piang se ka duh asin le" a ti thâm ṭiak a. Chrisa'n a melh vung vung ringawt. 

Hetih lai mêk hian Tatai te chhungkua pawn buaina neuh neuh an lo nei ve reng a. Ruati chhungte lam an pawngpawrh chho riau mai a, veng chhungah phei chuan Mafeli chanchinte phei chu hre lo aram an awm tawh lovang tih theih a ni. Mahse, Ruati te lamin an hriat loh chu hetia an chanchin an sawi darh vak vakna hian Rinpuia rilru a tikhauh tulh tulh thung si lai tak hi..Ruati te mizia a hrechiang telh telh a, inthen a cho tawlh tawlh bawk. Zep loh chuan mipa a ni bawk a, engmah a sawi ve duh lo mai zawk a ni. An inneih lai pawh khan mut hmunah zantin deuhthaw Ruati hian a chhungte a rêl a, an in lama chaw an va ei ve lahin Rinpuia hmai eng pawh zah miah loin a nu nen a chhungte an rêlsak bawk a, chuvang chuan hetia kal hrang thei dinhmuna an ding hi a lawmawm lamah ngaih sak tawh mai ang. 

Chumi zing tukṭhuan ei hma chuan Ruati'n a rawn call a, "Bungrua chu kan rawn la ang maw? Hei hi i duh tak tak maw?" A rawn ti a. Awlsam êt hian, "Ka pindan a tichêp a nia, in lak dawn chuan lo la vat r'u" a lo ti hmiah. Ruati leh a nu tum rûk dan kha chuan in danpuia a pa hnen atanga a chanpual laktira Ruati chhungte nen inhne reng chunga kal chhoh kha an tum a nia. Mahse, an ngaih anga awlsam a lo ni bik hauh lo. Chu chuan a tihrilhhai ve deuh bawk. Mahse, mipa zawkin rawn la rawh u a tih tawh si chuan va tlawm leh dûk kha an hreh ve tawh si. A dik adik chuan mizo society-ah chuan hmeichhe chan hi a chhe zawk deuh zel a, nau pawm an niha nuṭa te an belh ngat phei chuan an mo te nen an lo inngeih lo tumhrang nen, a tawpah a lal lo zawk na nâ na chu pet chhuah an ni fô. Ruati nu pawh hei hi a ngaihtuah chiang lo a ni. Rinpuia te khawsak dinhmun a thlir a, makpa atan a iai lo va, a fanu a rai pawh khan chuti tehvakin a thinrim lo. Rinpuia chu an duh dana kawihher theih a inbeisei vang a ni. An pa thu pawh ngaichâng eih lovin in dang turin a han nawr ta hmiah kha a nia. Nawmsak duh luat vanga khaw hmuh loh hi a pawi thui viau reng a ni. Ruati û hian nupui a nei hnai ve tawh lehnghal a, a nu leh pate dam chhung chuan a rethei bik kher lovang. Mahse, tumah hi dam hlen tur kan awm lo va, Ruati û lah hlawh nei a ni a, an in chhungah a lal lo thei si lo. Ruati'n he thil hi a ngaihtuah phak lo va, dik tak chuan a va mona te kha mi mona ai chuan a nuam fê zawk ang. Eirawngbawl, sekrek khawih engmah a ti ngai lo. An nupa room tihfai a ni mai. A nute inah a leng phei reng bawk a. Tuman a hranin an attack pawh a ni si lo, a hma a sial luatah a hloh nual dawn ta a nih hi. 

Tukṭhuan ei laiin Rinpuia chuan, "Ka nu, Ruati te chuan bungraw rawn lak an tum hnai a nih hmel a, ka awm ve kher hi a ṭul ang em? Inkhel tura kolasib-a kal ka lo rilruk deuh sia" tiin pi Zuali a en a. 

"A ngaih kher pawh ka hre lo, zu inkhel rawh. Ka lo dawngsawng vek ang..mahse, Puia, nupa inṭhen hi kei chu ṭha ka ti ber lo, nau a pai tawh lehnghal a. Kawng dang a awm lo em ni?" Pi Zuali chuan zaidawh takin a ti a. 

Rinpuia lah a rilru a khauh nasa tawh mai si. "Ka chhungte ngeih lo, thla hnih êm pawh a awm hmaa in dan rawttu hmeichhia chu nupui ṭha a ni thei lovang. Bakah kan chanchin an sawi duhdan hi ka lawm lo..inṭhen a ṭha mai. Ka fa erawh ka thlahthlam lovang" a ti nghet charh charh. Pi Zuali paw'n a rilru sakzia a hrethiam, an pa a awm bawk si lo nen, zep nâk emaw Ruati chhungte lo dawnsawn pawh chu a hreh ve tho. Nu ber a nih anga a tih a ngai miau si a. 

Arami'n, "Bialnu chhe lo deuh nei hmak rawh. I luckzia a hre lo a nih saw" a lo ti zauh. An han nui leh rih. Arami pawh hi a ri ve phawng phawng zel si a. Tatai erawh chuan sawi tur neiin a inhre lo va, a ngawi reng. A sawi lawk angin Rinpuia chu chawhnu lamah Kolasib lam a pan ta daih a. An nu nen an awm hrang chu nuam a ti zawk mah emaw tih mai tur a ni. Pi Zuali pawn an pa a be zauh zauh reng a, Mafeli dinhmun pawh an hre ve zel e. 

Tatai erawh rilru buai reng rengin a awm. Duata nen an inṭhen ta kha a nia, thu leh hla engmah a rawn nei lo bawk a. Ani pawn a ngaihtuah zui êm êm lo. Cindy zawk khan a rawn be zauh ṭhin a, elsen leh runluih rawngkai hian..a chhang ngai lo thung. Vawi khat erawh, "Duata pawh in inthen aṭangin a dam chak khawp mai, inṭhen a ngeih a niang

.kan lawm e " a rawn tih ṭum chuan, "Ka lawmpui che u. Min elsen tur ringawta min lo biak sek danah Duata hi i duh a nih hi..a dik tiraw?" A va ti ve ta fawk a. 

Cindy chu a reh ta vang vang. Chutihruala Tatai rilru tibuaitu dang chu a pahrawn chhungten an hua niawm taka an mihrang cheibawl ta riau hi a ni. An family group aṭangin remove a ni a. Pawi a ti hran lo, sawi ve tur a hria azeng pawh a ni lo va. Mahse, an remove hmaa Chrisa nu Pi Dingi'n, "Chhungkaw thil tak tak pawn lam miin an hriat hi a ṭul ber lo ve" a tih kha a la na ve khawp mai. Mafeli chungchang a nih chuan an ni ai mahin a hrechiang zawk awm si a, nge thildang zawk? Amtea te, Lawmkima bakah Akimi leh Ziri te takngial pawn an be ngai tawh lo. Vui loh hram a tum a, mahse, eng emaw hi chu a thleng a nih rinna a nei. A nu lakah erawh an ṭha huam tho si a. A nu ber an tihlungawi chuan a tawk reng alawm tiin inhnem ve bawk mah se; mi chuang tak tak anga an enna chuan nâ a siamsak lo thei bik lo. Chrisa vang em ni ang tihte thlengin a ngaihtuah. An inbiak lohna a rei ta..biak tumna pawh a nei lo. 

Rinpuia te zin zanah Ruati chu a nu nen an rawn lang hlawl mai a. Pi Zuali tak pawh a hamhaih deuh. Bungraw rawn la tur chu an nih hmel loh, zingkarah bungrua hi chu an la tlangpui ṭhin. 

"Khaw nge Rinpuia" Ruati chuan zâm lo tak hian a ti a. 

An sawi a. Ruati nu chu a ner sâwng mai, " A va inhmuhsitthlak deuh ve le..koh pawh ko loin tihian an inṭhen dawn chu a nia. Intiho hle mai" a ti ta mai a. 

Pi Zuali'n, "Amah ngei a lo kal kha kan lo ring mai asin. A hrana koh kher in phut tih in sawi lem bawk si lo va, a nih chuan ka lo be dawn nia" dam deuh hian a lo ti a. 

"Nangte chuan eng thuneihna mah i nei tawp reng nang. Ka pa be zawk rawh,. " Ruati chuan a ti ham ham. Tatai chak lohna chu a hmaihmaa a nu chaldelh taka an ṭawngkhum hian a insûm zo ṭhin lo. 

"Ka pa tih lohah he inah hian ka nu a thu ber. U Rinpuia pawn a thu leh hla a ngaichâng ber bawk. Tin, amah U Rinpuia'n a hrana palai rawn tirh leh kual chu a duh tawh ka ring lo. A duh ber chu inthen a ni" a lo ti ve ta sak sak a. Pi Zuali pawn a khap duh bik lo. Ruati nu chuan, "A nih tak chu! Khanglang che u hian, ṭhen che u hi kan hlau emaw in lo ti ang e. Naktuk zingah bungrua kan rawn la ang" tiin a fanu a kai a, a chhuahpui dâwr dâwr. Eng vanga rawn kal nge an nih pawh an hre thei ta lo. A hnu dar 9 velah Rinpuia'n a nu chu a rawn bia a, "Min rawn bia a, naktukah bungrua chu an rawn la dawn e. Kan inah te an lo kal a ni maw? I nu leh Tatai te'n kan luh pawh min phalsak lo va te kha a tia..ka awih lo lutuk kha ka nui huk alawm" a rawn ti ta a. 

Thil awmzia an han sawi hnu phei chuan, "Inthen ngam leh chiah si lo, an awmngaihna hre lo a nih kha. Lo laktir vek rawh u, a bungrua engmah kha hnutchhiah suh se.." a rawn ti ta hmiah. Mahse, Pi Zuali chuan pu Hruaia a zuk be tho, thil awmzia a zu hrilh ve a, "Amah Mama berin duh a thlan chuan hnial ka tum lo ve" a rawn ti ve bawk. Mafeli pawh damdawi in aṭanga lakchhuah an sawiho mek thu leh a zia sâwt thu te a rawn sawi ve luam. 

Dadina chuan Alice chu englaipawn a enthla titih tawh a. A vil rûn lo naa, a beng a chhi kar reng mai. Phone a hmang nasain a awm hle hle thei lo, a za sek zel tihte a hrechhuak a, a û hnenah a thlen zel bawk. Phone-a a biak ṭhin hi tu nge tih hriat a châkawm viau naa, a phone êm han khawihsakna hun an nei thei si lo. Mizoram lama awm tu emaw tak zawng a ni chiang. Mafeli chhuah hma zanah Dadina chuan Alice chhuak chu a umzui ru ta a. A hrechhuak ang tih erawh a hlau viau. Restaurant pakhatah Alice chu a lut ta a. Dadina chuan mask vuahin lukhum a khum bawk a, a theihtawpa a hmel thupin restaurant-ah chuan a lut ve ta. Alice ṭhutna piah lawkah a ṭhu a, Alice chu amahin a ṭhu, tu nge a nghah tih chu hriat a duh ber a ni. Coffee no 2na a in lai mêkin Alice chu a tho ta nalh a, a chhuak daih! A thil eina man a pe sawk sawk a, a zui ve nghal. Mahse, khawi lamah nge a kal a hre thei ta lo, a hawi kual ruai laiin, "Min zawng em ni?" A hnunglam aṭang chuan a rawn ti zawi sap a. A hawilet rang kher mai. 

"Hetah eng nge i tih?" Inthunun tum zetin a ti a. 

Alice chu a nui hak, "Lemchan i thiam ve vak lo a nia. Engvanga min zuirua min enthla nge i nih zawk?" A ti ta sak mai. Dadina lah a û anga thluak ṭha leh inthunun nghal zung zung chi a ni bawk si lo, "Ka zui lo che..ih, ka leng a" a ti nuah nuah. 

"Min zui tawh lo la ka lawm ngawt ang. Ka bialpa nen inhmuh kan tum ve a nia, i tiflop vek. Haw rawh" Alice chuan mitmeng de sawr sawr hian a ti a. 

"Nia, ka haw dawn..nang pawh a tlai tawh, haw rual ila" Dadina chuan a pangngai thei ang berin a ti ve a. 

Alice phone a rawn rik takah chuan a kalsawn vat a, taxi lo tlan chu phar rual nghalin an tlan liam zui nghal. Hrilhhai zetin Dadina chu a ding reng ringawt. Umzui a tum tawh lem lo, Alice khan a hrechhuak tawh miau si a. A û a call ta tawp mai. 

"Alice-in min manchhuak

.a hre vek" a ti nghal tâwng a. 

"Aw le..hahdam rawh. Keiman ka lo buaipui ang. " A rawn ti dam thlup. A û ber a thinrim loh avang chuan a hahdam deuh huai a, muangchangin a haw ve ta nghal. 

Chrisa chuan a rilru a sêng nasa viau. Mafeli lah a ṭha tawh viau bawk si, chutihrualin MPD nei anga an ngaih kha a nei lo nge, doctor ten an kawm danah kha lam hawi kha engmah an sawi ri si lo. Amah Mafeli lahin sawi hek suh. Zing dar 1-ah te chuan a la meng kur mai. Eng emaw thleng turah a ngai tlat nia! A zauthau kan ti dawn nge a helhhawlh zawk ni..amah pawn a inhrethiam bik lo. Mahse, eng êm ti lovin khua a lo var a, Mafeli pawh an hruai chhuak thei dawn ta e. A hmai dâng lêp te kha a bo tawh a, tisen erawh a la nei vak lo. Engpawhnise, a buai chhunzawm rih lo bawk a, a ṭha tawh turah an ngai ve tawp mai. Pu Hruaia pawh a khi sûng reng mai. Alice te inah bawk an innghat leh a, Alice pawn a lo lawm thiamin a lo kawm hlim thiam viau. Ngaihbel theih turin Chrisa erawh a belbul vak lo. Chrisa lahin a be bik hek lo. Dadina pawh inthunun a tum hram hram a, an tum dan chuan vawiin an awm ang a, a tukah bazarin an chhuak leh ang a, a tuk leha hawn an tum a ni. In lam ngaih pawh a na ve tawh ang chu. Chrisa erawh chuan Mizorama an hawn hnuah Mafeli chu a fala biak a la tum tho a, tualthahna kha palzam chi niin a hre lo. Tatai lahin a tawrh phah nasa bawk si. Alice hian inhnamhnawihna a nei ve a nih ngat phei chuan eng emaw tak chu a tih a ngai tlat. Hre kûr chunga thil haider luih hi a mizia a ni ve tlat lo. Mafeli pawh a inbual fai a, a harh ta vâk mai. A nîin a chawhmeh duhzawng hlir a lo siam bawk nen, zanriah pawh an beisei aia tam daih a ei ve a. A nau pai chungchang engmah an sawi ri tawh lo. 

"Chris, i va ngawichawi ve, i chau em ni?" A nuteii'n a tih chuan a lo phu uih. 

"Aa..ngaihtuahna ka lo kawm tui deuh a" a ti ve mai a. 

"I lung a leng tawh chiang, mizoramah ngaih tur tha deuh an awm leh a ni maw?" Alice te unau zinga naupang ber Hlutea chuan a lo ti var a. Nuih huk pahin, "Awm se ka ti ngawt mai" a ti duh lek. 

Zanriah eikhamah Chrisa chu a ṭhian hluite tlawh turin a chhuak ta a. Intihthawven pawh a mamawh ve reng reng e. A lehkhazirpui thenkhatte chu hmun dangah an lo awm nual tawh a, sumdawnna bul ṭan chho ve mêk, Alexander nen an inhmu thei hlauh. Zu pawh an in dun nghe nghe. An lehkhazir hunlai vel an sawi dun a, an lung a lêng thar angreng. 

"I naga bialnu Rosalyn lah kha a intihlum ringawt sia, ka rawn hrechhuak vang vang che alawm" Alexa'n a tih chuan, "Ehe! Rosa a thi tawh maw? Ka hre ve reng reng hleinem" a ti hluai. Mak a ti ve kher mai. An titi tui ata lângin hun a lo kal duai tawh a. An inṭhen meuh chuan dar 1 a ri lek lek tawh. Zu kha a in tam hauh lo naa a rin aiin a rui. A taksain a zo lo tih a hriat mai, tunhnaiah a thluak a hman nasat avangin thil a ei ṭha lo ve deuh bawk a ni. In a thleng a, mikhual roomah Mafeli te pafa an mu a, ani hi chu Dadina roomah a mu ve mai. Mahse, engin nge mawlh a hre lo, mikhual rooma luha va enfiah chu a lang ta tlat! An lo kalh lem lo bawk a, zawitêin kawngka a hawng a. Mafeli mutna lam a en nghal. A zangthal zawngin a mu a, rizai pawh a sin thlap. Mahse, ani rui lungpuam ngaihtuahna nge ni dawn ni, a thaw lo tlata hriatna a nei ta tlat mai le. Va kal ṭhem ṭhemin a khum bulah chuan a ding ta ran a. Mafeli thawk leh thawk loh chu chîk zetin a en ta. Ni e, aw a thaw miah lo tak tak. Rang zetin a mar a dek a, a mar a phu hauh lo. A sawi nawk nawk a, a ko mawlh mawlh bawk. Mafeli chu a lo khawng ṭan titih der lehnghal. A nih chuan a thihna a rei tawh tihna em ni ang? 

A pu a ko tuar tuar a, a ṭawng ring bawk a, midang ho pawn thawm an rawn nei nghal. Tu mai pawh chu an hamhaihin an hrilhhai takzet a ni. Pu Hruaia phei chu a hrilhhai ngawih ngawih tih a lang. Alice leh a nu an ṭap nghal râwih râwih a. Mipa lamin Mafeli ruang chu an lo siamrem bawk. Chrisa rui pawh a reh duak mai. A mutna khum chu a han dap kual a, lukham sir deuhah hian damdawi mum te tak tê tê pali a lo awm a. Lukham hnuaiah lehkha a lo awm bawk. Rang takin a la a, Dadina room lam a panpui nghal. 

Lehkhaah chuan he thu hi a lo inziak a. 

"Min hmangaihtu ka chhungte, engkimah ngaihdam ka dil che u a, keima nunna ngei titawp tura thutlukna ka siam hi ka tihsual loh hram ka beisei. Damdawi inah khan hun remchang pek ka ni lo va, nurse ngei pawh ka ngen a, mahse, an ngam si lo. Nun ve reng hi a ṭangkaina ka hre hlawl lo a ni. A chhan chu ka thiltih tam tak ten min umzui reng a, an thisen phubâ chuan englai pawhin min tibuai reng a ni. Dam hi ka tan a nuam ve tawh lo. Chhungkaw timualphotu, zahna thlentu ka ni miau a. Mahse, heng zawng zawngah hian hei erawh min lo hriatsak hram rawh u aw. Keimahah hian awm ve dang a awm a. Tu nge a nih ka hre lo. Amah chuan min thununin min uap reng a, tal chhuah ka tum nasat poh leh min chelh nghet tulh tulh thung si. 

Ka nu a boral khan ka innghahna lungpui a keh taah ngaiin tawrhna zawng zawng hi ka ta emaw tih mai turin ka tuar a. Ka nu kha ka ngai ṭhin takzet a ni. Mahse, kha ka khawhar lusun lai hmang ṭangkai khan tu emaw chu ka nunah a rawn lut ta a. Kei pawn a tirah ka hrethiam bik lo. Mahse, miin ka awmna hmun, min hmuhna hmun an sawia ka awm lai ka hre lo ta fô va, ka ruih thu an sawi phei chuan awih ngaihna ka hre lo zawk. Ruihhlo ka huat êm avangin. Mahse, ka lo rui ṭhin tih chu zinga ka harha keimah ka nih leh chiah hian ka hre ta thin a. Ka hrethiam lo va, hrehawm ka ti ngawih ngawih zel. A tawi zawngin ka'n sawi ang e. Ka pain nupui a rawn hruai lut a, a fanu nen. Tatai te nufa ka hmuh rual khan ka kehchhe nawn leh ta a ni. An ni hian ka chanvo min chhuhsak angah ka ngai tlat a, ka hua a, tihnat ka duh. Mahse, ka beisei loh deuhin an fel nufa em em a. Ka nu ngat phei chuan min zah zawk emaw tih turin inngaitlawm takin min be ṭhin. An laka ka rilru chhia pawh a kiang ta telh telh a..mahse, ka nuna lo awm ve khan a lo ngaithei awzâwng si lo. Ka duh loh dan hlirin min chetpui ta a nih kha. Tatai ṭhiante aṭanga bulṭanin amah Tatai an puh theih nan hma ka la a, ka thiltih ho kha a zawng zawng ka hre tawh lo. Mi pakhat ka ruai tih erawh ka hria. Chungliana a nih nghe nghe kha. Ka pa pawisa ru chhuakin sum tam tak pein tual ka thahtir a. Heng thil hi ka harhfim hnuah ka hre chauh ṭhin. Engtin nge Chungliana nen kan inbiak ka hre ngai lo. Jail aṭanga a rawn tlanchhuah khan min rawn bia a, a pawisa ka la pek ban zawng laka tlanbo a tum a lo nia. Ka va pe ta ngei a, mahse, a ruang an hmu leh si! Keima thah bawk a nih leh ka ring. Ka thah lai erawh ka hre hauh lo. Khatiang khan thisena ka tuihalna kha a thûk tulh tulh a, ka che na telh telh bawk. Eng lai pawha Tatai te nufa chhiatna leh haw tura fuihtu ka neih avangin ka thinlung pawh a kha tual tual a, kha thil kha keipawn ka duh bik lo asin. Hrin hran ni mah ila; inpawh leh inngeih taka chenho ve ka châk takzet. Mahse, lang lo aṭanga min nawra min thununtu hi a chak êm mai a. Ka hneh ngang lo a ni. Multiple personality Disorder neiah min ngai a, keipawn ka nei ngei niin ka hria. Mahse, ka lo nei lo nge doctor ten engmah an sawi si lo. Enkawl dam pawh ni ila mi nunna ka lak zozai kha ka ngaihtuahin dam reng tlakah ka inngai lo a ni. Ni e, thi tlak ka ni. 

He ka lehkha ziah hi Police kutah lo hlan u la..Tatai pawh a fihlim tawh ngei ang. Thu tam tak sawi tur nei mah ila; sawi vek a ṭul ber lo ve. Ka chhungte, ka ngai dawn hle mai che u. Mangṭha vek u le.." tih thu a ni. 

Chrisa a thaw kâwk kâwk mai. Lehkha chu a thlep ṭha sawk sawk a, a suitcase-ah a va dah ta hmak. Mafeli kutziak a ni ngei em tih a la chian loh avangin midang hmuh a la remti lo. Engkim hi rinhlelhnain a khat tawh a, dem theih pawh a ni lo ve. Tichuan, Mafeli ruang chu Shillonga mizo awm vete nen an lumen ta ngawt mai. Kuang pawh mawi takin an siamsak thlap. Post mortem result-ah chuan damdawi chi khat over dose vanga thi-a ngaih a ni. A kawchhung a chhe vek a, dam ngaihna a lo awm miah lo a nih dawn kha. Pu Hruaia rilru nâ lutuk chu a lainatawm ngawih ngawih. Mafeli chu a han chul ringawt ṭhin a, a han ko ṭhin. Chhangtu an awm tawh si lo. Patling meuh pawh a ṭah hawm hawm kha..fate chân hi zawng a na dawn êm mai. Alice leh a nu pawh an ṭap bang hleithei lo, damna changin damdawi in aṭangin a rawn chhuak ve bawk a, a chhuah zanah la la a ruang hmuh a han ni leh ta chu a rapthlak bawk êm a tin ni. 

Pu Hruaia sawi danin, "Dar 9 velah a mutchhuah thu sawiin a va mu a. Kei erawh ka la meng. Dar 11 rik hma deuhin ka mu ve a, kei mi ngaihsam tih takah va endik pawh ka tum hran lo, chutihlai chuan a saisir zawngin a mu. Ka chau bawk a, ka muhil nghal bawrh bawrh. Chrisa'n min koh khan ka harh ve chiah" tih a ni. A nih chuan a pa mut lai kha chuan engmah a la thleng lo a nih hmel a, a pa mut tawh hnuah a tum dan ang takin lehkha te chu ziak leh tê têin a che ta a nih a rinawm ta ber. Lehkha kha a lo ziak lawk vek tawh pawh a ni maithei. Chrisa khan a chhiar ve deuh zung zung a, engmah han zir chianna kha a awm lem lo, nakinah hun thawlah a la zir chiang ang chu..

Mizoram lama an chhungte pawh a ṭhawng tih piah lam a ni. A chhungte mai ni lo, veng chhung pawn mak an ti. Ṭhenkhat phei chuan a damloh thu pawh an lo hre lo va, a mak ve bawk êm a ni. Tatai te nufa pawh an chiâi takzet. Thihna meuhin a han den chuan Tatai pawn a khawngaih lo thei lo. Hetiang em em hi chu a thlen a ring phak lo asin le aw..Mafeli ruang nghakin an ṭhu ṭhup mai. An chhungkua an hûng ve bawk a, milian leh hausa hmelhriat an ngah bawk nen, ruang nghak ho pawh an hraw hlawm viau mai. Mafeli ruang pawh a rawn thleng ta. Ṭap thawm a va nasa tak êm. A uiawm bawk a ni, nula a vanglai taka a han boral chu. Amah a hmelchhe lo bawk si. A thi ropui i ti mai teh ang, ṭhenrual a ngah bawk a, an chawimawi thiam khawp mai. Thlan thlenga zuitu pawh an ṭhahnem khawp mai. Mafeli chu vuiliam a ni ta. Ama sawi dan kha a tak tak a nih chuan, mi nunna a laksakte nen thlan khurah an awm tlang ta tihna a nih mai chu. 

Mafeli thih sarhu lai vel chuan an buai nuai nuai a ni ber e. Tatai pawh a che buai pawlah a ṭang ve a, Chrisa nen inhmu mah se la; an inbe ngai lo. Alice hian a virbuai hneh êm mai a, midang pawn an chang hman meuh lo. Arami a khawngaihthlak, Mafeli nen an lo cheng ho rei tawh si, a ṭap reng ringawt mai a ni. Rinpuia tak pawh mipa mah nise; a tuar ve hle tih a lang. Amaha awm a duh a, a roomah a tawm tam zawk, hnem tum viau mah se; a sarhû lai hi chuan a inhnem tak tak theih loh. 

Chrisa pawn hun thawl a hmuh veleh Mafeli lehkha hnuhnung kha a zir chiang ta a. Vawi tam a chhiar nawn, Mafeli kutziak nen a entawn dun nasa bawk. Danglamna a awm lo, ama ziah ngei chu a nih hmel. A nih chuan Mafeli thiltih vek a lo ni tak tak tihna em ni ang? Alice thusawi te kha eng nge a awmzia ni ta ang? Mafeli chungchang kha a sawi ngei si a. A rilru a buai zual ta ngei mai. Tumah lah chu a hrilh thei bawk si lo. A tawpa tawpah Amanda rawih tawp mai a rilruk ta a ni. Aman a ngaihtuah dawn chuan a buai zual zel si. 

Tatai te pawh class an kal ve leh tawh a. Alice leh an cousin tho Mawipuii te an la châm a. Mafeli roomah an mu mai zel..Tatai nen erawh an inkawm vak lo, Mawipuii chu sawi nuam ni lo mahse; 99 kan tih ang deuh chi kha a ni ve a, thau lêng luang, ṭawng lûng lûng chi a ni. Mi pawi a sawi hran lo naa, a titi ngaihthlak a ninawm lek lek zel. A insawithei ve reuh zêk bawk sia. Haha..

Hetih hun lai hian Tatai nunah mipa dang an rawn lang ta tlat! An veng chhung ami Tluanga a ni. Mafeli thih sarhu lai khan a lo hmu ve ni ngei tur a ni, a rawn bawhzui deuh rap rap mai. Tatai lahin a hawi lo nasa mai si a! Zep loh chuan Tluanga chu a hmelchhia pawh a ni lo, a fing vak bik lo va, thluak aia thahrui hmang nasa zawk kan tih ang kha a ni. Tatai duhzawng a nih loh bakah ngaihzawng neih a duh tawh lo. Buaina a titam mai mai. Jeje te pawh a hrilh duh lem lo. Mahse, Tluanga chu a hrat lak thei zêk roh a. Zan tin a rawn leng ta mai. Alice te lah chuan an dembel titih ringawt lehnghal a! Mei nei deuh deuhin an chhaih ve ziah. 

Mafeli thih cham an hman tukah Ruati pawh a rawn lang ve hlawl mai. Buaina erawh a chhuak êm lo ve. Tawrhpui awm deuhin a rawn awm naa, a chhuah hnua awm ve te thil sawi chuan Rinpuia thin a tirim kher mai. Bungrua kha an la rawn la ta chuang lo va. An chhuanlam, "Pa ber te rawn haw ve phawt rawh se" an ti kha a nia. Tiang khan thihna a thleng zui ta nen, bungraw lakna khua a kaw ta vak lo a ni. Ruati te chuan Mafeli thihna chu, "A mo tan a tawrhhlelhawm khawp a, a nunnain a tuar ta a nih kha" an lo ti a niawm a! Rinpuia mai ni lo, an chhungkhatte thin a na viau, palai thlak te pawh an sawi ut ut hman a, mahse, Pu Thianghlima an upa ber ni bawk chuan, " aa..an tihtheih nei lo an ṭawng ve mai maiah ngaihsak mai ang u. Hetiang hi kan dinhmun a ni si a, buaina hmachhawn thei pawh kan nih loh hi" tiin a naute lungawi lohna chu thawidam a tum a. Û ber a nihnaah an zah ve bawk nen, an ngawi zui thei ta hram. Rinpuia rilru erawh lêt chiang veng veng tak a ni. 

Alice te hawn hma niah Chrisa farmah khan va intihhlim an rawt a. Tatai pawh an sawm ve. Class kal loh nî a lo ni kher bawk nen, chhuanlam tur a vân riau. 

"Ka awm a nuam vak lo va" a ti nuah nuah chu Chrisa'n, "I duh phawt chuan Tluanga i sawm ve thei a nia" a lo ti nghut a. 

"Engvangin nge ani chu ka sawm ang a?" A ti hlar.

"I bialpa a nia.." Alice in a lo ti leh zawt zawt. 

"I hre sual tlat..bialpa ka nei lo" a ti ro hak a, a nui lui sâng bawk. 

Chrisa chuan, "Aw, i lo kal theih loh pawn a tha vek e. Lo dam rawh" a ti hmawk hmawk a. A chhuak zui nghal daih. Tatai pawh chuan kal tumna a nei lo, an ni unau zaho kianga mal taka va awm vel kha a peih teuh lo. Alice lah hi a over ropui si..

Kal loh a tum tehreng nen Amtea leh Ziri ten an rawn luhchilh a, an nawr ngat ngat. An zahawm a ti ve bawk si, phur lo zet chuan a insiam ta a. Amtea motorah a chuang kâk mai. Mafeli scooty kha a pain chhawm turin a pe a, mahse, a khalh hreh tlat zel..a hlau pawh a ni lo. Farm an thlen chuan an bengchheng tawh hle. An unau ho an tam bawk a, intihlim tham an ni ve reng reng bawk nen..Tatai erawh dil piah lawka kuhva hmunah a va awm daih, a pms vang nge Alice hi a hmel huat tlat! A ṭawng paha a meng zek zek te, a ṭawng no vak zel te hi a tei thei ṭhak lo. A nihna takah chuan Chrisa a zar buai chhen vanga ngei pawh a ni maithei. Amah chuan khalam hawi kha a duh miah lo thung.

"Inlak cool vak a ngei em ni?" Christophera aw a hriat chuan a phu zawk. 

"Ka inla cool em ni?" A ti nghat. 

"Tata.." a bulah a rawn ṭhu a. Chrisa chu a lang upa sawt hian a hria. 

"Umm" a ti dat a. 

"Thil tam tak a thleng a ni" a ti sup a. A sawi awmzia pakhatmah a hre lo. 

"Eng thil" a ti hâ.

"Amanda ka ruai ta tawp mai..tikhan i man em?" Tiin a rawn melh a, an pahnih inkar a nih loh vang nge Tatai chu a hnual ve ringawt nia! 

"Umm, a va buaithlak ve" a ti ta ngawt a. 

"Chuan..I thil sawi inchawi chungchang kha tu sawi chhuah nge?" A ti ta chiah. 

Zêp zêp ṭula a hriat tawh bik loh avangin, "Alice" a ti zawi sap. Chrisa chu a nui hawk, "Ka rin ang chiah. Lo en rawh aw. Dâwt a nihzia ka hmuhtir ang che" a ti nghet ta charh mai. A mitmeng tak ran chuan Tatai a tizâm lek lek zawk.

"Engtin?" A ti ro hak a. Chrisa ṭawng tum lai takin, "Hetah law in lo awm..Chris, lo kal teh..vat" Alice aw hian a rawn ti a..

Chrisa'n, "Lo koh che ka lo tum mêk a. Lo ṭhu ve lawk teh. " Tiin a bulah Alice chu a kuai ṭhu a. Chrisa a ngheng ar ar mai. Chrisa chuan, "Inchawina chungchang vel kan lo sawi a.." tiin a melh zauh. 

Alice chu a ṭhu tha vat a, "Maw? Eng inchawina maw?" Bo hmel fê hian a ti a. 

"Aw..nangma sawi ngei pawh i hre tawh na nge? Tatai vanga kan inchawina kha.." Chrisa'n a ti ve zel. 

Alice hmel chu a danglam ṭan, "Nia..kha kha maw" tiin za lo zetin a nui a. 

"Dâwt a nihzia i hrilhfiah theih ka lo beisei asin" Chrisa'n a tih zawm zat. Alice hmel a buai tawh takzet a ni. Tatai lahin a lo melh ve kar bawk si. 

"Ka hrethiam lo, insawi awmzia hi..eng inchawina mah ka hre ve lo ve..eng nge a awmzia? Tata" Alice aw chu a khur tlat!

"Nangmah ngeiin i sawi kha mawle..i va haihawt tak" Tatai lah chuan chimawm chhuahin a lo ti ve bawk. 

Alice chuan thinrim hmel a pu leh ta daih, "Khatin Chrisa bulah dâwtin min hêk hlek suh, Chrisa i duh huam huam lutuk hi kan ten tawh che" a ti ta mai. 

Tatai a ding ta phat, "Christophera ka duh huam dan chu han sawi teh. Nang ching cheng hi lawm hneawm chu, i za em mawni..Mahni unaute pawh zarbuai sek.." a ti ve ta hmawk hmawk. A rilrua awm a sawi chhuak a ni bawk a, a thawl hawk zawk. 

Alice chuan kut a lek ta mai, mahse, Chrisa'n a lo mansak chawt. 

"Duhtawk rawh Alice..i thiltihte kha ka hre vek tawh. Nang ni lovin ani hi ka duh a ni. Ka nei ngei bawk ang" a ti vawt ta raih mai. 

"Chris..ani hi patil

." Alice in a tih mek laiin Chrisa chuan Tatai a kuah hnai dâwrh a, a hmuiah tak a fawp ta siah mai. Alice ai mahin Tatai a hamhaih zawk. 

"Tikhan patil a ni lo tih i chiang tawh em? Ani hi ka ta, ka ta chauh a ni" Chrisa aw chu a hlauhawm lek lek. Tatai pawn engmah a sawi ngam lo. Chrisa phone ri tlang tlang chuan an boruak rit zet chu a rawn lapêng a. 

"Hello, Amanda.." Chrisa chuan a ti zawi sup. ..