Tatai 8

TATA-I (8)

Ziaktu : Toni Râlte

"Eng nge a awmzia?" A ti nghek. 

"Nakinah kan hrilhfiah ang che. Tunah chuan i bialpa hi damdawi inah hruai a ngai tlat" Kimkimi'n a rawn tih chuan, Tatai dang a ro hulh thei. Chrisa chuan a khawih na viau em mawni le.Kimkimi lah chuan a dah hmak bawk si, Jejea a call a, a ring quit ṭhak. A buai chiâi tawh nak alaiin Ruati leh an pa an lo la inhau zui a! Rinpuia chuan, "Ka lawm lo, i awmdan hi..ka chhungte ti reng mai. Vawi tam chaw kan ei tawh..kei min hrilh lovin" a ti nghut nghut a. A ni lah tak bawk a, Ruati te lamin chaw eia an sawm ve pawh hian amah Ruati chauh an hrilh a, hei hi thil nihdan tur a ni vak lo. Ruati chhungte lam hawihhai loh vang a ni pakhat ang. 

Ruati'n, "Ve tak che hian, i chhungte ka chenpui duh hi lawm hle rawh, hetiang mi hrin hrang hrang awmkhawmho bulah ka khawsa a" a ti hmarh hmarh reuh a. Rinpuia thin a thawk leh ta thut nge ni ben tumin a tin uaih, Tatai'n a va chelh hman a. 

"I lo va nasa reuh ve mawle. Ka chhungte i chenpui peih loh chuan haw daih la a ni mai lawm" Rinpuia chuan a ti hmiah. Pu Hruaia a rawn hawn tak avangin an ngawi ta chauh hlawm a. An in chhung boruak rit lutuk chu a hne takzet a ni. Ani lah a tih ni miah lova puha enthlak a ni mêk a. Mamawii anga Sawma call tu number kha chhui zui ngaihna awm miah lovin a thi hmak. Mafeli lah han enthla viau dawn se tun hnai chu rinhlelhawm ang pawn a awm lo, a rui reng ringawt mai a ni. 

Jejea'n a rawn call ta a, a pindanah a luhpui vat. 

"I lo hre tawh ang tiraw? Duata leh Chrisa vel kha" a rawn ti a, "Tlem chauh ka hria. Han sawi teh" a ti vat vat a. Jeje awmna hmun chu a bengchheng angreng, a kalsawn hlek nge thawm pawh a zawi ta deuh. 

"Chrisa thiam loh liau liau a ni. Duata ṭhiannu Delhia awm reng ṭhin a rawn hawng a, an chhuak dun ve mai chauh kha a nia. A hmu dun kha buaina a siam nghal ringawt mai a ni. Kut a thlak na viau lehnghal. Ka thinrim viau a nia kei pawh" a rawn ti tûn tûn a. 

"Tunah engtin nge a awm?" Tatai chuan nuam lo ti zetin a lo ti. 

"Hei a chal kak an ṭhui dawn vel mêk..i theih chuan rawn lang ve la. Zanriah eikhamah pawh. Chrisa te pawh an la awm" zangkhai deuh zawkin a rawn ti a. 

"Ka lo tum ang" a ti sap. Huiham, Christophera chetdan chu a duh lo hle mai, mipa kutram lutuk hi a ngaina lo hrim hrim bawk nen. 

Zanriah an ei laiin pai khat khatin Mafeli a rawn haw a, a mit pawh a sen rûm mai. A pa chuan, "Tumah ṭawng rih suh u, chaw eikhamah keiman ka bia ang. " A tih lâwk avangin Mafeli lam hawiin ṭawngkam an nei lo. Chaw eikham thleng an seng fel laiin Ruati chuan, "Rui reng ringawt mai, pawisa a heh ngawt ang. Pasalte farnu tia sawi pawh a zahthlak tawh alawm le" a ti hlak hlak a. Arami leh Tatai chauhin an hria, an chhang lo bawk a, a sawi zawm ta bîk lo. An intihfel zawhah a nu bia a, thil awmdan a hrilh zung zung. Taxi a hmang tawh mai a niang chu, Duata chu va tlawh ve ngei ṭha a ti a ni. Amah vanga tuar a ni bawk nen. A insiam nghal mawlh mawlh a, Mafeli pindan lama an ṭawng thawm chu a hre pha ruai ruai bawk. Mafeli'n ṭap pur chunga, "Engmah hi ka hre ngai lo, hei hi ka nun duh dan a ni bik lo asin..keimah pawh hi ka inhrethiam tawh lo" a tih ri chuan a ngaihtuahna a tikalthui viau. Ni e, Mafeli ze duhawm zawk kha chu pawisawi lo, mi huatthu sawi hreh leh ze zâwi tak kha a ni si a. A ze pakhat zawk erawh chumi letling chiah a ni thung si. A nau pai lah tihtlak a phal lo bur a, Duhawma fa a ni bawk si lo va, falak a hring ve dawn a ang ta viau. A pa leh a û te tan pawh rilru hahna tham a tling chho ṭan der tawh. Tatai chungchang, pawikhawihtua an puhna kha chu Police lam an reh rih vang nge in chhungah a hriat laia sawi an awm ngai lo. Zawhna pawh an nei hek lo. Pawi a khawih lo tih an ring ve ta a niang e. 

In a chhuahsan a, kawngpui pawh tuma amaha a chhoh hnak hnak laiin taxi a rawn tlan ta hlauh. A phar ta vat a. Ding takin damdawi in an pan ta. Jeje nen an la inbe leh lo, an buai a ring deuh nen. Chrisa'n a rawn be miah lo chu mak a ti zawk mah. Amah vanga kutthlak a nih si chuan thil awmzia te pawh rawn sawi awm tak a nia. Damdawi in a thlen rualin Jeje a call nghal, a lo chhang var a. A rawn hmuak..

Cindy bakah Jeje chhungte pawh an lo awm ve ṭaih a. Nuam lo a ti takzet. A hawi kual deuh a, Chrisa a hmu mai lo. 

"Khaw nge Christophera chu" Jeje bulah a ti zawi sap. 

"I rawn thlen hma khan an haw ve chiah, inenkawlna senso engkim an tum dawn a, kan inngaidam ta a nih kha. A nu a rawn kal bawk nen" a ti duah a. A hnual deuh, Chrisa chu hmaichhanah ngei biaka thil awmzia zawh a duh tehlul nen. Kimkimi lah khan khatiang khan a rawn ti duah bawk si, a bialnu lem lem a lo ni tak tak nge game an la khel reng zawk a hrethiam lo. Tunah rih chuan amah vanga na tuar mêk Duata a theih ang anga ṭanpui bak tihtheih neiin a inhre lo. A rin ang em emin Duata pawh a lo na lo, a chal a kak a, a biang a vûng bawk. A kut dinglam banrêk a tiulh nge a nâ a ti a, a bak na dang han mutpui vut vut tur a nei lem lo. Amaherawhchu, a chhungte tan chuan mi kut tuar a nih miau avangin engpawhnise a na vek tho ang. 

Cindy a rawn kal hnai sauh sauh a, "Tata, nangmah vang vek a ni tih i hria ang chu tiraw?" A rawn ti nghal bawrh bawrh. A lo hawihai deuh a, Jeje chhungte lam an awm ve si, nuam a ti vak lo. 

"Pawi ka ti lutuk

.englo" a tih laiin, "Pawi tih ringawt khan awmzia a nei lo, Nuteii phei chuan FIR thehlut turin min tia, Chrisa nu khan ngaihdam min dil nasa êm a, kan ngaidam ta hram a nih kha..kha pa kha i eng nge a nih reng reng a? Unau in ni emaw tia" ring zet zetin Cindy chuan a ti leh hmuar hmuar. 

Jejea'n, "Duhtawk teh, Tatai vang a ni kher lo" a lo ti zauh. 

"Ka nau hian tu pawi mah a sawi ngai lo ,kha mihring phiangsen khan a kutthak hnawih nan a hmang leh a nih chuan a hre tawh viau ang. Tata, nang pawh Duata hnaihah awm tawh suh. I hrethiam em? Hetiang mihring kan duh ve lo. " A ti leh tâwn tâwn. Tatai chuan ṭawng ve ngaihna pawh a hre lo. A zak bawk si. Jeje nute nen hi chuan an inhre ṭha êm a, a zia zia a la awm, midang a hriat ve vak loh Duata chhungkhat an awm avangin nuam lo a ti takzet a ni. 

"Je, ka haw phawt ang" a ti sap a. Jeje pawn chelh a tum bik lo, Duata a muhil rih bawk nen, he lai hmuna tâp ve reng kha ṭulin a hre lo a niang. Cindy lah chuan, "Mahni unaute ngaihzawn ching..awmherh thlak lutuk, Patil emaw tih laiin lo thak ve phian a" a la ti zui hrâm. Chhan a tum lai mêkin Jeje nuin, "A tawk, i ṭawng tam mah mah e" a rawn ti chang ta fak a. A chhang ta lo. 

"Ka thlah ang che aw" Jejea'n a ti sup a. 

"Taxi a awm mai ang, a la hma alawm" tia sana a bih zauh laiin, "Keiman ka lo thlah ang e. Jeje, kan lawm e.." rawn ti dam thluptu Chrisa nen an inhmachhawn ta siah mai. 

Jeje pawh chuan, "I lo kal leh a ni maw? Aw le, ka nute awmpui an ngai ve bawk sia, ka chhohsan ang che u, Tata, a nih phawt" tiin biak leh hman rual lohin a chho ta a. Tatai lah chuan chutia Chrisa a hmu thut hrilhhai bawk si chu a kha a chih nge,sawi mai tur a hre lo. Chrisa chuan rawn kaiin a motor lam a panpui ta a. Kawngka hawnsakin a nem lut, amah pawh rawn chuang ve nghalin an tlan chhuak chu a ni mai e. Mahse, in lam an pan ta tlat lo. Tatai'n a hriatchhuah meuh chuan an lo thleng thui tawh angreng. 

"Khawiah nge kan kal dawn?" A ti vat a. Chrisa a melh bawk. 

"A rei lovang" a lo ti duh chauh. Sawi vakin awmzia a nei dawn chuang lo bawk nen, a ngawi ta hle hle a. Chrisa hruaina hmun chu a la kal ngai lohna a ni. Aizawl daiah a ni a, khawpui ri bengchheng hriat lohna tawk vel, farm nuam deuh a lo ni. Farm house lo awm ve chu a lian fahran lo naa, an sak dan ît êt chu a mawi reuh zêk a, a felfai thlurh bawk si. Chrisa chu a zui ve zel ringawt, a reh dûk tawh a. Hnathawk pawh an awm lo a nih hmel. Farm house-ah chuan a luhpui ta a, a chhung chu a lum nuamin engkim chu a nih dan tur ang thlap vek a ni. 

"Ṭhu rawh" Chrisa chuan a ti hmuk a. Tatai pawh a ṭhu ve mai. Chrisa chuan juice a va thli a, Tatai a pe, a lo in ve leh mai bawk a. A inthlahdul deuh hnu chuan, "Engvangin nge i tih?" A ti ta nghat a. 

"Eng ber" tiin a rawn melh hû. 

"Duata kutthlak kha a nia ka sawi. Engvanga awmze nei lova che nge i nih?" A ti chang fak. 

A nui tawi tak a. Awlsam zet hian, "A phutawk a hmu a nih kha" a ti ringawt. 

"Tuman kutthlak kan phu lo, Duata khan tihsual a nei hek lo. A ṭhiannu a nih kha a rawn chhuahpui, keipawn ka hriatpui alawm" a ti ta zung zung a. Chawp leh chilha dâwt a sawi ta mai chu amah paw'n mak a inti. 

Chrisa chu hahdam hmel zet hian a ṭhu a. 

"Chu! A ṭhiannu nen chuan an infawhte pawh i phalsak vek tihna em ni?" A ti ta khauh a. 

Tatai pawh a hrilhhai deuh, chutianga an lo awm tak tak a nih chuan a lungawi tehchiam bik lo vang. 

"An infawp lai i hmu em ni?" A ti ta ringawt a. 

"Chiang hle lo ila ka hnek lo ang. " A lo tihsan hmuk. Tatai a dang titih dêr mai, mahse, engtin emaw Chrisa chu chhanlet ve a duh bawk si. 

"Mahse, min lo kawp a nih pawhin nang hian kut thlak theihna i nei lo hul hual" a ti leh ta a. Chrisa za lo zetin a nui hul huk, "Ka nei..ka hmeichhe duhzawng tak leh ka farnu ni bawk chu ka venghim ang" a ti nghet charh a. 

"I khawih na bawk si, i sual êm mai, FIR thehluh te hial an duh asin.." a ti leh hliai a. 

"Thehlut se la..a lawmawm daih zawk" a lo ti awlsam êt a. Tatai thinrim bawk si, sawi tur hre tawh bawk si lo chu a ṭhu tau bûr ringawt. 

"Kha thil thleng mita hmutu an awm nual alawm. Ka thinrim insûm zo lo ka lo che rang deuh kha chu pawi ka ti. Mahse, kut a za laklawh tawh a nih kha..Ka hmuh lai renga khatiang khawpa an che ngam kha, thisenah inzawmna nei lo mah ila a hming tal pawn min zah ve tur a nia. A pawi ngawt mai. A ṭha vat ang" amah leh mah ang lo takin Chrisa chuan a ti ve ta duah a. Tatai pawn rilru siamfel harsa a ti viau. Chrisa hi a confi viau mai si a, Duata chuan a lo kawp tak tak em ni ang? An awmdun laite kha chuan rinhlelhawmin a awm ngai bik si lo va, nge a ngaih a ṭha lutuk hi a lo bum char char zawk..a hrethiam tehnuai tawh lo e a. 

"Aw, engpawhnise hawn ka duh" tiin a ding auh a. 

"Thildang a la awm. A serious hle bawk" Chrisa'n a lo ti khauh. 

"Eng nge" a lo ti pawr hlar thung. 

"Ṭhu phawt rawh. Hun kan ngah tawk alawm..". Thatchhiat hmel zet hian a ti a. Tum bûrin Tatai a ṭhu ve leh. 

"Sawi ta che" dawhthei lo zet hian a ti nghat a. 

"Mafeli chungchang a nia. " A ti sup. Tatai pawh a insiamrem ta vat a, Mafeli chungchang hi chiang zawka hriat a duh ve bawk nen, tualthattu a nih rinna a nei lian viau naa, finfiahna a nei tlat lo. 

"Multiple personality Disorder a nei niin ka hria a, ka khawngaih hle bawk. A hmaa ka lo chhui rûk tawh angin amahah hian i ṭhiante thihna kha a tawp ta chat vek a.." tiin bul a han ṭan a. 

Tatai lah hetiang lama bengvar vak lo a lo ni ve bawk nen, ngaihven loh zawngah chuan hre lo nih a zak bik lo bawk a. "Eng nge chu chu" a lo ti hû a. 

Dawhthei takin Chrisa chuan, "Natna chi khat, vâng tak mai a ni a. A mihring azirin a lanchhuah dan pawh a dang. Mafeli chu a mood swing nasa lutuk leh depression a neih aṭangte khan ka chîk zual a. Amah leh amah ngei pawh intihnat a lo tum ṭhin tih ka hre tawh bawk. Ka hriat loh erawh engvanga i ṭhiante chhuia that zel ṭhin a ni tih hi..a haw viau che a nih chuan i nunna zawk chhah mai awm, emaw i nu nunna pawh. Mahse, a ti bawk si lo. Hei tak hi ka hrethiam lo, Shillonga chhukpuia doctor hmuhpui ka rilruk deuh, ka pu hian ka kutah a dah ve deuh bawk nen" a ti mawlh mawlh a. Tatai paw'n a varpawh ta deuh e. 

"A chiang reng alawm, ka thah anga lantira min dahbo daih a duh alawm" chhungril na veng veng chungin a ti sep a. 

"Mahse, a chang chuan i chungah a ṭha hle si a" a ti dam thlup. 

"Kan man chhuah loh nan lem a chang a ni mai lawm..kan rin loh anga mi an awm hian rilru lamah natna a nei tih zel pawh a fuh ber dawn em ni?" A lo ti let ve a. 

"I sawi dik tho mai. Mahse, han ngaihtuah teh, a video-a a mutpui te kha amah Mafeli hian tu nge a nih a hre reng reng lo. A fa paina pawh a hre thei lo chu a nia. Thil pangngai a ni thei dawn em ni? " Chrisa chuan a ti ve a. Tatai pawn dik tak chuan mak a tih rûksa a nia, hnial ṭâwng ṭâwng a tum pawh a ni bîk lo. 

"A nih ka ṭhiante thihna i chhui chhuah dan chu han sawi teh" ngenngâwl zet hian a ti ta daih a. 

Tuisik a in khawlh khawlh hnuah Chrisa chuan a sawi ta malh malh a, Tatai lo meng phâwk leh hrâ zel chuan a thu ngaihthlakah a rilru a pekzia a pholang chiang mai awm e. 

"A hmasa bera thi Nunpuii te kha i hriat angin Hlimen parkah an lêng a nih kha. Mafeli te pawh an lêng ve. Mahse, hming dang a hmang thung. Mafeli hian a rek hlum a nih ka ring. A bialpa phone hman hlan chhung kha chetna hun a nei tlat, mahse, thil risky lutuk a nih avangin rilru fim a put ka ring miah lo. Peka kha chu a ko chhuak tihna a ni mai, a rekhlum ang a, inawkhlum angin a khai ang, mahse, mak ka tih chu ani ang hmeichhe derthawng takin engtin nge mipa pangngai tak kha a thaha inawkhlum anga a lantir ang? Rindan ka neih dang leh chu thurualpui a nei tihna a ni ngei ang. Kha pa Chungliana ngei kha..ka pu pawisa bo kha Mafeli rûk a nih loh rêng ka ring lo bawk. Zovi thih dan kha chu kei chuan sawifiah harsa ka ti, amah Mafeli kâ ngei aṭanga hriat a ngai. Seni erawh cottage-ah khan a mi tirh emaw amah emawin an luhchilh tihna a ni mai. Keima tawkah nasa takin rilru ka lo sêng ve asin. Mahse, finfiahna erawh ka nei hauh si lo. Mafeli hi Police kuta hlan tawp mai tur em ni ang tih ka pu pawh ka sawipui tawh. Mahse, fanu na nâ na chu a lainat lo thei lo va, a ngaingam ngang si lo. Tin, i ṭhiante zel a bitum chhan hi chhan ṭha tak a awm rinna ka nei ve tho..Police lamin an enthla mêk tih pawh ka hai lo. Mahse, tunhnaiah pawikhawih lam aiin amah innghaisakna lam a uar thar leh ta bawk sia..Police pawh dem vak chi an ni lo, finfiahna a ngai zel tawh si a. Tal awhtir a tum che khan ka thil chhui ve dan a lo dik ngei tih ka chiang ngam chauh, i ṭhi kha a bo tih pawh i hre hauh lo a nia. I tan thang a kamna lamah amah leh amah a talâwk dawn a ang khawp mai" tih thu hi Chrisa hnen atanga a dawn chu a ni. 

"Tichuan, engtin nge ni ta ang? Amah chu a inpuang duh dawn miah lo, ka tan tak hian a nuam lo. Ka ṭhian thi ta chhungte min en dan pawh a danglam ṭan tawh a nia. " Tatai chuan a ti hlak hlak a. Mafeli a huatna chu a rawn inṭham chho leh tawh. Ni e, amah vangin mi en a hlawh a, sawisep a kai phah bawk. An in chhungah nise a mi chuang zual a, a nu tan kha kha hrehawmna siamtu a lo ni ve lehzel bawk nen, thinrimthlak duh deuh mai a ni. 

"Ka hre lo, amah hi hruai luiha rilru doctor hmuhpui a ngai phawt.." Chrisa'n a ti hul hak. Ani pawh a beidawn hmel angreng. Lehlamah a pu fanu a ni a, a thlauhthla ngawt thiang lo. An sawi hmangin Mafeli nunkawng hi a lo bumboh ve riau a niawm e. A nuin a boralsan khan a tuar lutuk a, ruihhlo pawh a tihphah ta hial a, an chhungte dangin an tuamhlawm ngai khawpin a nu kha a sûn ve a ni. Zêp nâk emaw a nu fanu duat kha a ni ve a, a pa tak hi chuan an tet lai pawn Rinpuia a la deuh bik ṭhin. Chuvang a nia Mafeli hetia a han danglam chho pawh hriatthiamna nen an en hram hram ni. A no a, tihnat a awlsam, chutihrualin thutlukna atthlak tak siam thut a ching bawk si. Khatia a khawhar lusun lai khan he natna hi a lo chhar ve ta pawh a ni maithei. 

"Hmuhpui la, doctor chu, nangte chu i thu an hnial ngam hleinem" Tatai chuan a ti a. 

"Ka tum dawn alawm. Tihluihna hman ka duh loh vang chauha la che lo ka ni" Chrisa'n a lo ti a. 

"A ṭha lawm, haw tawh ila..a reh si, ka ngaina lo" Tatai'n a ti hliai. A ding leh auh bawk. Chrisa pawh a rawn ding ve a, "He lai hmun hi ka pain min hnutchhiah a nih hi. Ka nu puihna tel miah lovin tihian ka chei hnûm ve thei a, i duh hun hunah nang pawh i kalin i chawl hahdam thei ang" nelawm zet hian a ti a. 

"Ti nge i nu chuan a puih loh che?" A inrin hmain a ti! A inchhir leh deuh naa a sawi zo tawh si. 

Hul haka nuiin, "Engvangin nge amah phatsana hnutchhiahtu sulhnu chu a cheihnûm tehlul ang. Ka nu tan chuan a thi tawh alawm" a ti hmuk. Tatai pawn engmah a sawi zawm ngam tawh lo. Chrisa nen an dinhmun a inang ve deuh niin a hria, chu chuan a tilawm pawh a ni lo. Mahse, Chrisa nu natna leh luhlulna chu a dem hauh lo thung. Chrisa pa chu a thih tawh vanga pa nei lo an ni emaw a tia. A pa chanchin reng reng tuman an la sawi ri ngai bawk si lo, a nu fakawmzia, chhelzia, pa tel lova a fapa te pahnih a enkawl puitlinzia chauh a hre ṭhin. Pasal sûn vanga hmeithai tur riakah a lo ngai a, a lo ni bik miah lo a nih dawn hi, nakinah a nu a la zawt ṭha ang. Chrisa lak atang chuan a pa chungchang hriat a nuam lo ve thei, amah Chrisa a venthawn vang zawkin. 

"Kan kal hmain, Tata.." Chrisa'n a rawn ti hniam leh ruih. A ding chat a, hawilet chuang lovin, "Eng nge ni leh ta?" A ti nghat. Dawhtheih lohna a lang ṭan a ni mai ang chu. 

"Thinchhe viau zel suh. Ih maw, innei ang" a thu hriat chu a awih thei lo zawk. A hawilet a, chiang zeta Chrisa melhin, "Mi zakthei lo tâwp chu i lo ni e. In inchawinaah khan i chak lo tih pawm rawh. A ṭha em?" A ti tuar tuar. A biang a tai leh hlar tawh. 

"Inchawina a?! Eng nge a awmzia?" A lo ti let hû. 

Chek hlakin, "Hre lo der khanglang suh. In inchawi a, ka bialpa ni thei hnenah Rs. 50000 pek in tiam a, chu pawisa i ît avang chuan hetia min chhaihkual hi i sim thei lo chu a nih hi..i hausak tawh tehlul nen, kei hi chu min awmtir mai mai tawh rawh. " A ti ta phiar phiar a. Chrisa a ngawi hmuk, Tatai a melh char char bawk si. 

"Ka kal dawn, kein ka haw mai ang" tih leh pen a rual a. A rawn chelh nghal vat. 

"I sawi awmzia kha i chiang chiah maw? Eng inchawina mah kan nei si lo va..nge min hnar nana i phuahchawp zawk" tiin na fahran hian a rawn chhuk melh run mai. Tatai erawh chuan khami zana Alicei thusawi zawng zawng kha a la hrechiang nasa mai si, dâwt phuahchawp ringawt a sawi a ring hauh lo. 

"Aw..ka hnar nan chea ka phuahchawpah ngai mai rawh. Min thlah rawh..ka kal dawn..Ka nunah hian rawn inrawlh tawh suh,. Patil ka ni lo tih i chiang tawh a, duhtawk tawh mai rawh" a ti sak sak a. A hawi sang vah bawk. Chrisa chuan a kut chu a thlah a. 

"Aw le..i duhnaah chuan pawisak i nei bîk lo a nih hi..i.chak zawk e. Ka bansan tawh ang che. Hawh le, ka thlah ang che" tiin kawngka lam a pan nul nul. Tatai chuan a zui ve nghal zat bawk. Ngawi rengin motorah an lut dun a, ṭawng miah lovin Tatai te in an inkhalh thleng. Tatai a chhuk a, mangṭha pawh an inmangṭha lo. Engkim a ngawi a ni mai e. Tatai mu pawh chu a muhil thei lawk lo, Chrisa khatia a puan takah khan thawl hawk turah a lo inngai naa, a thawl hawk phah lem lo. Chutihrualin Chrisa'n phat a tumna vel a ngaihtuah chuan a ngei thar leh tho, Duata kut a thlak pawh hi a game vek a ni lehpek ang chu. Hetiang game atthlak tak hi a ngaina ve lo. Amaha khawvel hmachhawna zalên taka nun hi a duh ber a ni. A nu hi hlim bawk se la, chu aia thlakhlelh a nei vak lo. Hmalam hun chu Pathian kutah a dah tawp mai. Nih tum leh nih châk em em a nei hran lo, sport a tui a, hemi line-ah hian a kalte pawh a la kal ve mahna le. 

A pate pawn Chrisa leh Duata vel chu an hre lo thei lo va, a hriat ang ang a hrilh ve mai. Jeje bulah erawh, "Cindy min ṭawngkhum vang ni pawh lovin, Duata leh a ṭhiannu kha rinhlelhawmin an lo awm hrim hrim a, chuvang chuan hetia kal hran mai hi a ṭha" a ti tho. Jeje erawh chuan unaute na nâ na chu a rawn phatpui nasa a, mahse, Tatai'n a awih hreh vek tawh. Bakah Cindy thusawi dan khan a lai a chhun na ve deuh bawk. Khatianga midang awm ṭhup laia chaltlai taka ṭawngkhum tur kha niin a inhre bik lo. 

A tuk chawlh a ni bawk a, a nu puiin pangpar a khawihpui ve a, pot te an sawn dawr dawr mai. A nuin, "Chrisa nu a lawm lo viau an tia, hnaih tawh lo mah la a pawi lo, chhungkua kan innghirngho ai chuan" tiin a zilh a. 

"Ka hnaih hleinem, amah vek zel alawm. " A ti ve hmak. 

"Bawihte, ka neihchhun i ni a, tihnata i awm hlau bertu ka ni. A chang chuan hetia i pa ka lo nei hi thutlukna ka siam sual ta em ni ang tihte ka ngaihtuah fô, i tana ṭha tur ka zawnna lamah duhthlanna ka siam dik lo pawh a ni maithei. Eng pawhnise, hei chen kan kal tawh a; tuar hram hram phawt ang aw. Ruati hi chu enliam mai mai rawh. Mafeli pawh damlo natna nei a nia, hrethiam hram zel la aw" a ti mawlh mawlh mai. A bu nghat nghat a, "Kan tuar chhuak em em ang, Nu..thutlukna i siam sual lovang. I hlimna hi a ṭha ber" tiin a hnem ve ngial. A nu pawh hahdam huai hmel a pu thei ta e. Chawhnu lamah Arami a pui ve leh thung. Hetia hna a thawh hian a rilru a zangkhai daih zawk. Amah chauha a awma a inngaihtuah chuan rilru hahna tur ngah riauin a inhre tlat zel. Anxiety, depression neih tum lo ve tawp a ni a, chumi avang ringawt chuan natna hian a kal kan thei bik lo tih erawh a pawm. Arami nen an titi bawrh bawrh laiin Mafeli a rawn lut pawr chhap mai. A rim lah chu an chhe khawp a! A ṭhing rim nen, mipa chi rim nen, a tal bawraw viau a nih dawn hi, khawngaihthla te pawh a la lek lek thei alawm le. 

Eng sawi set set lovin Tatai chu a rawn kek dak âwrh mai pek a! Tatai hrilh a hai kher mai. 

"Hmeli, engvangin nge ka chanchin hi mi bulah i lo sawi chiam a, i lei hi ka pawt dawk mai ang. " A ti chher chher mai. Tatai a insiamrem vat a, "Khawiah leh tu bulah nge ka sawi? Min han hrilh teh le" hlau hauh lo hian a ti ta a. A melh kar bawk. 

"Kan veng chhung bakah veng dang amite pawn an hre vek, a rui reng a, a bialpa fa pawh ni lo a pai a..chuti khati..i ṭawng thei mah mah aw..khawih leh i duh em?" Tia ben tuma a tin uaih chu Tatai'n a kut a lo mansak chawt. 

"Tu bulah mah leh khawi hmunah mah nanga chanchin hi ka sawi ngai lo ve. Hetia inhauh reng ai chuan insual mai ang hmiang, ka hne ve tawk tawh e" a ti chang fak fak a. A nu a rawn kal a, a fanu chu khap a tum. Chutihlai tak chuan Ruati chu a dul puar pawh la puar mang lo dawma intirai zeta lo pheiin, "Tatai chu i zam lo ve ham ham hle mai a. He inah hian mi chuang i nihzia hre lovin Mafeli insualpuiah ka cho e te i lo ti vel a maw? Mawina, Mafel, a sawi vek alawm amah hian i chanchin chu" chotuah tum zet hian a lo ti ve ham ham. Pi Zuali meuh pawh a insûm zo ta bik lo, "A tawk e, duhtawk rawh u. Tatai hi dâwtin inpuh zen mai a, ka ning zozai ta. Khawiah nge a sawi sawi ula, kan inchhal hmiah hmiah ang, Mafel, sawi rawh le..ka lawm lo teh mai a nia" a ti ve hmak hmak. 

Mafeli'n, "Sawtah kâwna ka kal lai pawn Renga te tih velin min lo chhaih a nia. An ni sawn engtin nge ka chanchin an hriat ngawt ang? Hrilhtu an awm a ni mai" a ti hmarh hmarh. Pi Zuali so thut khan a tidai ve deuh nge a hma aiin a awki pawh a dam ta deuh. 

Arami lo awm ve reng chuan, "Ih, Ruati'n i chanchin chu a sawi. Pi Hmangaihi pawn min lo zawt ringawt tawh, "Ruati'n a sawi nasa alawm" a tih kha..Ka hriat theih chinah Tatai hian ka bulah takngial pawh tumah a rêl ka la hre lo" a lo ti ta hmiah mai le.

Ruati a sa leh ta phat, "Rammawi, i zak em? Zawngi, engtin nge nang awmpui mai mai khan ka hming i sawi ngam zawk a? Dâwt chuan mi puh hlek suh" a ti tuar tuar a. Pu Hruaia a rawn hawng ve chiah. Rinpuia erawh Reiêkah inkhelin an kal daih thung. Pu Hruaia'n thil awmzia a zawh chuan Pi Zuali chuan dam takin ṭan bîk pawh nei hran lovin a lo hrilh ta dap dap a. 

Pu Hruaia chuan, "Chanchin sawi tur i nei a, an sawi a ni mai. Hetiang hian nung lo la tuman an sawi nang. Insiamṭhat tum zawk teh" a fanu melhin a ti dam thlup thlup a. Mafeli a thinrim laklawh tawh si, a ni ve lah tak bawk a, ani kawng kal lai nawmnah leh hmusit taka chhaih han nih chu hahdam taka dawnsawn a har ve bawk ang. 

"Ka duh lo, ni e, tun hnaiah ka che bawraw ka inhria e. Mahse, chhungkua chauhin kan hriat tur hetia midang dangin an hriat zel chuan nakinah kan la buai ang, chingfel ang u. Tu zawkin nge sawi che u.." tiin Ruati leh Tatai a melh dun ralh ralh mai. 

Tatai pawh chuan, "Ni e, sawifel ang u, hetianga inpuh ngawt hi ka duh tawh bik lo" a lo ti ve hmak. Pu Hruaia tan pawh thu lailak dan thiam a harsa ve ngawt ang. Hmeichhe pathum inngeih miah lo chenhona kara lo awm ve tan pawh an boruak chu rit dawn tak a ni. 

"Aw le, engpawhnise, i û lo haw phawt se, kan rêl dawn nia. Ni e, Mafeli pawn a sawi dik reng, kan chhungkaw thil bik hi chu hmun dangah ri chhuak tawh lo se la, kamtam lutuk hi chuan thil ṭha a thlen ngai lo a nia" tiin thutawp a siam ta ngawt mai a ni. 

Ruati'n, "Engpawhnise, Rammawii hian kan in chhuahsan se la duh, mi ngeih lo ve ngawt hi a zakthei lo thlawt..mo ka nih avang hian ka laka inla sang thei a ni lo a nia" tiin a rawn ṭan leh ta. 

Mahse, Arami kher zawng a thlavâng hauh an tina viau a ni ngei ang, Pu Hruaia'n, "Arami hi kan chhungkaw mia kan lakluh tawh a ni a. Hei chen kan khawsa ho tawh, buaina kan nei ngai lo. Buaina in nei a nih chuan inenfiah rawh u. Tu pawi mah a sawi ngai lo" a ti ta nghut nghut a. Ruati a tum nghal bûr. Mafeli pawn, "U Arami i ngeih lo a nih chuan nangmah zawk kha chhuak daih rawh" a lo ti khauh. Chu ṭawngkam chu a la na ta viau ni tur a ni, zanriah ei hma deuhin a nauin a rawn hruai ta hmiah mai. Rinpuia lah a la rawn haw si lo. An va buai chhungkua tak êm..

Duata pawh a chhuak thei ta a..chuti em ema na chu a lo ni lo a nih dawn kha. A rawn be lo bawk a, Tatai pawn biak tumna a nei bik lo. Rinpuia a rawn haw ta a. A engahmah hmain an nu thil lo sawi hmasak vangin a farnu chu a'n hau hrep phawt a! A pain khap lo se kut hial pawh a thlak duh ang. A pain muangchangin thudik a lo hrilh ta a, Rinpuia zawng mipa ve tak a ni bawk a. Mi thusawi zawng zawng awiha awih lo tur khawpa fing a ni ve bawk nen, ngawih a chuh ta rih a. An nu chuan engtin tak a thiamthu sawi ang maw..dik tak chuan Tatai ngaihdan chu a pa hi a demawm berin a hre tawh. A nupui a sûn a, fate tan theihtawp chhuahna kawngah chuan a fakawm. Mahse, in chhungkhurah thu leh hla a nei lo lutuk a, fate han zilha han hauh a ti ngai bawk si lo, an awm ang angin a enliam a. Mafeli pawh a bawraw hnuah chauh anih kha a manganpui ni..pa ber a nih angin chhungkaw kilkawi chungchangah, mo te laka awmdan tur leh a dangte pawh sawia rorel tur a nih laiin an thu leh hlaa inrawlh a tum lo ṭhin lutuk a, Ruati pawn a zuam phah a tih loh theih loh. Tihian an buai chho chu a ni ta reng mai. 

Chrisa leh a nu pawh an inhau nasa mai. A roomah tawmin zu a in tluk tluk ringawt a, a nu ngaihdan a pel ta a niang. A luhchilh sauh sauh a, a ânkhum ta hrep. 

"A eng saw nge maw i duh a? Chuti taka i tlakchhiat phah le? Patil, a pa pawh hriat loh a nih saw. Amah vangin mi pawi i khawih a, ka lawm i ring em? Ka û fahrawn chu ni lose ka kalchilh duh tawh hial ang. Chulai karah nang lahin zu ka in phah de de dei i lo ti kual a. Ka lawm lo, Christopher" a ti sak sak mai. 

Chrisa erawh zial a ṭan a, uluk zetin a zuksan daih. A nu thusawi chu hre awm pawn a lang lo. 

"Ka sawi chu i ngaithla em?" A nuin a rawn kawih her sawk takah chuan, "Ka hria e. Ka nu" a ti sup. 

"Bansan vang vang ang che. Bakah unau diktak ni lo mah ula, thil mawi a ni lo. " A hma aia dam deuh zawk hian a ti a. 

"Ka bansan dawn..ka sûn ve lawk a nih hi. Hmeichhe danglam tak a ni miau a, naktuk aṭang chuan keimah ka ni leh dawn alawm" inringtawk zetin a ti ta a. A nu pawn a chhuahsan nghal. Arsi pe un chu a thlir doh doh a, "Ni e, ka bansan tawh ang" a ti nawn leh sak. Mipa intipa leh inringtawk, khauh tak nia kan hriatte pawh hi hmangaihna avang chuan an lo nem ve thei khawp mai. Christophera nihna pawh a ni. 

Sunday zingah tal hi chuan inkhawm ve hram a duh ṭhin a. Tatai pawh a insiam ve, mut a hmu ṭha vak lo nen, a hmel pawh a dik lo. Chawhnuah pu Hruaia'n chhungkaw inhmuh khawm a rawt a, an rawn kal khawm dawn sia, awm ve loh a duh avangin Jeje lenpuiah a sawm chung mai. Chrisa vang pawh ni hran lovin a tel vena tur niin a hre lo. He inah hian Arami ai pawn thu a nei lo zawk tih a chiang tawh a, ama awm awma awm a tum ta mai. Inkhawm ban rualin a inthlak nghal sawk sawk. Jeje a call pah bawk a. 

"Ta, min hrethiam rawh. Apî a zual thut a, an inah phei vek tur an tia, hei kan insiam mêk" a rawn ti ta. A hnual ngawih ngawih, mahse, a chhiat ber lai pawha phatsan ngai lotu chu ṭha takin a thlah ta thlap a. Lenbo a duh a, scooty chu nei ve se Aizawl dai velah va inkhalh bo daih a châk. A nei bawk si lo. Dam loh der tawp idea a nei ta a. Amah pawh a nui ringawt. A nu a call a, "Nu, ka awm a nuam lo lutuk a, ka lo chhuk ve lo mai ang aw. Ka mu dawn" a ti nghal mawlh mawlh. 

"A va zia lo, i khua a sik em ni? Damdawi i ei em?" A rawn ti nghal vat. A ngaihtuah leh dawn tih a hriatchian êm avangin, "Aw ka ei zo chiah, ka nuam lo satliah ringawt aw. Ka ngaihtuahawm loh a nia" a ti a. A dah nghal. Kawngka a kalh sawk sawk a, a mu ta hmak mai. 

An rawn kal khawm ta nak nak a. Mafeli chungchang bakah Rinpuia te nupa chungchang sawiho a ngai a nih hmel. Pi Dingliani chu a hawi kual hrek hrek a, a tum angin Tatai a hmu mai si lo chu a hrilhhai deuh. Chrisa erawh Tatai ang thoin pehhel dan kawng a lo dap ve chu niin, Amtea te nen an farm houseah an lo zu kal daih a lo nia! Hmm, inpumpelh tum ve ve chu an inhmuh a rinawm vak loh. An han sawiho ta nak nak a, Thawhlehniah Chrisa leh Pu Hruaia te'n Mafeli chu Shillongah zuk hruai se tih an rel thlu ta phawt, Rinpuia te erawh zaninah aman va ko mai se, chuta an thu hla azira rêl ṭhat leh an ti a ni. Lehlamah veng a lo inang lo bawk a, hetia inhmuhkhawm zeuh zeuhte hi a ṭha ve tlat! Chhungkaw intlawhpawh loh lutuk chu a buaithlak ṭhin. 

An sawi tawh angin zanah Rinpuia chu an nu hruai turin a va kal ta ngei a. Nu berin a lo dawngsawng bawk. 

"I farnu te sawn an ngeih si lo va, bakah in awmpuite thleng thlengin an hmusit a. Inṭhen hi kan duh a ni lo, Amarawhchu, kan han sawiho a, in indang lo a nih chuan engtikah emaw in la inṭhen tho a rinawm bawk nen, i thu thu a ni e" tih chu an thutawp a ni. 

"Kan in sak mêk pawh an zo ṭêp a, in luah duh phawt chuan a luah theih ang. Nangte chu i ngaihtuahawm loh, i pa hnenah i chanpual i dil ang a, sumdawnna bul te pawh inṭan chho ve ang a, in rethei bîk lovang. " An la ti lehzel. Rinpuia ngaihdan hi a'n ni lo mai mai khawp a. Mahse, a pi leh pu an nihna anga a zah avangin, "Ka va haw phawt ang e. Kan lo sawiho ve dawn nia" tiin a chhuahsan ta a ni. An nu chhungte khawsak dan hrechiangtu a ni bawk a, an duh dan dana awmtir an tum tih a hai lo nasa. Ina haw nghal lovin Chrisa te in lamah a tlang ta a. Chrisa bula a inbunruah ve phawt a ngai a ni. 

Tatai pawh Duata'n a rawn text ve leh ta mial a. "I thinrim mi? Min va ngaihsak lo ve" a rawn ti nghal tâwng. 

"Rim lo ve. I la damloh ka ring a" a va ti ringawt. 

"Ka ṭha reng, min rawn kan pawh i tum ve si lo" a rawn ti a. Tatai chuan chhan dan tur a bangbo deuh, "Nia, englo..inṭhen ka duh a" a ti ta tawp mai. Duata chuan a rawn call ta bawk. 

"Engvangin maw inṭhen i duh?" A rawn ti a. 

"Min lo kawp avangin.." a ti tawi tak. 

"Tu maw ka kawp che? Kha pa thusawi kha i ring zawk a maw?" A rawn ti leh a, "Rin zawk thil pawh a ni lo, ngaihzawng neih hi ka peih thlawt lo. Min hrethiam mai teh " a ti ta ngawt a. Chhuanlam mai tur a hre tawh bawk si lo a ni. 

"A ṭha alawm, min ring lotu ngaihzawn reng ka tum bik lo. Mangṭha" a rawn ti ve ta fak a, a dah nghal. 

Ama hriat tawk lekin, "Tihian a nuam daih zawk. A hmaa Tatai kha ka ni leh a" a ti sap. 

Mafeli pawh an tur nasa bawk a, Shillonga chhuk chu a duh ve ta hlauh mai. A pa leh Chrisa te chuan an zu hruai dawn ta. Rinpuia te erawh amah Rinpuia thutlukna kha a pa chuan a duh ber a ni a, "I chanpual i duh pawn ka pe thei che. Duhthlanna a ni. Fapa neihchhun i nih avang hian ka hauh ngawt thei lo che. Chutihrualin nangmah hringtu i nu a boral tawh a, kei hian zan khat mit chhin pawh lo tawk ila; i farnu hi i kut tur a la ni. Ani hi chu i thlahthlam thiang lo. " A ti thlap mai. Pu Hruaia fin ve lehna chu a ro insem chungchangah engkim ziakin a dah fel thlap tawh. Pi Zuali te nufa pawh an rethei bik lovang, mahse, Tatai leh Mafeli inkar boruak a hriat avangin Mafeli hi chu pi Zuali te kuta dah tawp a hreh ve deuh a ni. 

Chutiang a nih avang chuan Rinpuia pawh a inngaihtuah nasa, Ruati lahin phone aṭangin a rawn nawr sek sek reng a. 

"In hrang aṭangin a inhmangaih theih. Nakinah i pa a boral ta a nih leh in puite chu kan luahlum leh thei tho alawm" a rawn ti kual a. Thil thui tak a thlirin leh an boruak thleng tawh zawng zawng a chhût vek hnuah thutlukna a siam ta a ni. Ruati chu callin, "In duh hun hunah i bungrua in rawn la thei e. Ka pa leh ka farnute ka thlahthlam thei lo" a ti ta a ni. Ruati te lam an thinrimin chhe theihtawpin Rinpuia te chhungkua chu an sawi a, mahse, an chhungkaw zia leh nu ber rorelna hnuaia awm an nihzia an hriat fur avangin tuvak mahin an ûksak lo, an ṭan hek lo. Rinpuia te lam lah an ngawi hmak mai si. Bungrua lah rawn la tang e an ti bawk si lo. An ngaingam leh chiah lo a ni maithei. 

Chrisa te pawh Shillong an thleng ta. Alice'n a lo lawm leh cheng cheng a, a hne lek lek zel. Dadina pawh a lo ṭha viau e. Mafeli chu a rang thei ang berin doctor an panpui ta a. A ze kawlh zet kha a chhuak leh tawh miah lo, Doctor te pawn tihvak ngaihna an hre lo. An thu zawh lah a chhang dik thlap zel bawk si a. Pu Hruaia hrilh a hai mah zawk awm e. Mahse le..an zin aṭanga zan 3na zanah a ze pakhat zawk a rawn chhuak leh ta, Bathroomah a kap thi hnuangin an va hmu a, amah lah thisen a hloh nasat vang nge a dângin nikhua a hre bawk si lo. Mangang takin damdawi in an panpui a. Doctor ten an han en vel chuan, a naupai mêk kha amahin tihtlak a lo tum chu niin..a serh zai thlerin naute chu lakchhuah a lo tum a nih awm chu! Doctor te pawn an la tawn vak loh thil a nih vang nge mak an tih hmel kher mai. 

A hnu ni 2na aṭangin a biak theih ṭan a. A mitmeng a nu but mai. Chrisa a hmuh chuan, "An man tawh em?" A ti sap a. 

"Tu maw?" A lo ti nghut. 

"Tatai kha mawle..tual a thah kha" a ti leh hap a. 

"Ni lo, ani khan tumah a that lo" Chrisa'n a ti vat. 

Peih leh peih lova nuiin, "Kha vang khan alawm buaina a inṭan..englai pawn a lamah i ṭang a..amah vangin thil tam tak a thlen phah ta a nih kha.." a ti mawlh mawlh mai. Chrisa a hrilhhai deuh. 

"Tu nen nge khang thilte kha in tih?" Chrisa'n a tih chuan, "Hriat tum buai lo mai rawh" a ti nghat. 

"Mafel, tu nge nangmaha awm ve hi? Sawi teh, i harsatna hi ka hria asin" a ti dam thlup. 

Chauh hmel zet hian a rawn meng lep lep a. A mitmeng pawh a fiah deuh. 

"Ka hre lo. Mahse, englaipawhin min chenchilh a ni. " A ti zawi sap. 

Zan rei tawh lamah Chrisa chu intiharh turin a va chhuak ve a. Chanchin a nu hrilh ve a tum lai takin ṭawng thawm lo awm avang chuan a ṭhulh leh a. Tu aw nge tih a chiang khawp mai. 

"Aw..Mafeli hi chu thi tawh mah se a pawi lo. Ṭangkaina a nei tawh lo ve" tih thu chuan a mutchhuak zawng zawng a tireh vek thei mawle..!